1. Con si o Isus?

O Isus si iech îngero zuralo cai beșel ando cerii. O Iehova Del cărdea-les angla te cherel sea le buchia. Anda codoia, i Biblia phenel anda leste că si „o iechto năștime anda sea i creația”. (Coloseni 1:15) I Biblia phenel anda o Isus că si ‘o Șiav unico-năștime’ le Devlesco, anda codoia că vo sas o corcoro cărdo directo le Iehovastar. (Ioan 3:16) O Isus cărdea buchi ande iech than pesche Dadeia, o Iehova, hai ajutisardea-les te cherel sea le coaver buchia. (Citisaren Proverbe 8:30.) Le Isusos siles vi aghies iech amalimos chidino le Iehovaia, hai cadaia anel lesche iech bari bucuria. I Biblia phenel că vo si „o Cuvânto”, anda codoia că o Del del duma prin leste. O Isus silo loialo hai îngărel mai dur o cuvânto le Devlesco. (Ioan 1:14)

Amen păcătuisaras, nachas prin pharimata hai meras anda codoia că le dintune manușa, o Adam hai i Eva, ci așunde le Devlestar.a Cu sea cadala, ci sam hasarde. O Iehova bișaldea pesche Șiaves, le Isus Cristosos, caște hastravel-ame anda o armai le păcatosco hai le merimasco. I Biblia sicavel-ame că, prin pesco merimos, o Isus pochindea iech răscumpărarea. So si iech răscumpărarea? Si o prețo pochindo ca varecon te avel hastrame. O prețo pochindo le Isusostar sas leschi viața perfecto sar manuș. (Citisaren Matei 20:28.) O Isus daisardeas te trail veșnico pi phuv sar manuș. Tha vo alosardea te merel caște pâtrel amenghe o drom caring sea so o Adam hai i Eva hasarde. Prin cadaia sas sicadi i bari iubirea cai le Isusos hai le Iehovas silen caring amende. Cadai lecția va ajutila-tu te diches vi mai cuci o merimos le Isusosco.

1. So miștimata anel amenghe o merimos le Isusosco aghies?

Anda codoia că sam păcătoși, amen cheras but buchia cai duchaven le Iehovas. Cu sea cadala, daștil te avel-ame iech amalimos chidino leia, cana fal-ame ciaces pharo anda le buchia nasul cai cărdeam-le, mangas-les te iertil-ame ando anav le Isusosco hai das sea amari zor te na mai cheras cadal păcatea. (1 Ioan 2:1) I Biblia phenel: „O Cristoso mulea iech data anda sea o timpo anda păcatea, iech manuș orta anda codola neorta, caște îngărel tumen co Del”. (1 Petru 3:18)

2. So miștimata anel amenghe o merimos le Isusosco ando viitorii?

O Iehova bișaldea le Isusos „ca oricon sicavel pachiamos ande leste te na avel distrugime, tha te avel-les viața veșnico”. (Ioan 3:16) Anda codoia că o Isus mulea anda amende, pa țâra timpo o Iehova va chosela sea le buchia nasul cai andea-le o Adam cana ci așundea le Devlestar. Cadea că, dacă sicavas pachiamos ando merimos le Isusosco, daisaras te bucurisaras-ame viațatar anda sea o timpo ando paradiso pi phuv. (Isaia 65:21-23)

HACHIAR MAI MIȘTO

3. O merimos le Isusosco hastravel-ame anda o păcato hai o merimos

MATERIALO VIDEO: Sostar mulea o Isus? (Partea 1) (2:01)

• So hasardea o Adam anda codoia că ci așundea le Devlestar?

Citisaren Romani 5:12 hai pala codoia den duma:

• So andea tuche o păcato le Adamosco?

Citisaren Ioan 3:16 hai pala codoia den duma:

• Sostar bișaldea o Iehova pesche Șiaves pi phuv?

1. O Adam sas iech manuș perfecto cai ci așundea le Devlestar hai îngărdea le manușen co păcato hai co merimos

2. O Isus sas iech manuș perfecto cai așundea le Devlestar hai va îngărela le manușen ca i perfecțiunea hai ca i viața veșnico

4. O merimos le Isusosco anel miștimata sea le manușenghe

MATERIALO VIDEO: Sostar mulea o Isus? (Partea 2) (2:00)

• Sar daștil-pe ca o merimos ieche corcore manușesco te anel miștimata sea le manușenghe?

Citisaren 1 Timotei 2:5, 6 hai pala codoia den duma:

• O Adam sas iech manuș perfecto cai îngărdea le manușen co păcato hai co merimos. Vi o Isus sas iech manuș perfecto. Sostar o merimos le Isusosco sas iech „lași răscumpărarea” anda le păcatea le manușenghe?

5. I răscumpărarea si o cadouo le Iehovasco anda tute

Le amala le Iehovasche dichen i răscumpărarea sar iech cadouo anda pende. Citisaren Galateni 2:20 hai pala codoia den duma:

• Sar sicadea o Pavel că dichlea i răscumpărarea sar iech cadouo anda peste?

Cana o Adam păcătuisardea, vo hai sea lesche șiave sas-le șiute tela o armai le merimasco. Tha o Iehova bișaldea pesche Șiaves te merel ca tu te daștis te trais anda sea o timpo.

Cana citis le versetea cai aven, gândisar-tu so sas ande le Iehovasco ilo cana dichlea pesche Șiaves prin so bari duch nachlea. Citisaren Ioan 19:1-7, 16-18 hai pala codoia den duma:

• So si ande chio ilo acana că jianes so cărdea o Iehova hai o Isus anda tute?

SO SICHILEAM

Anda codoia că o Isus mulea anda amende, o Iehova daștil te iertil amare păcatea hai te del-ame viața anda sea o timpo.

So dichleam

• Sostar mulea o Isus?

• Sostar o merimos le Isusosco sas iech „lași răscumpărarea” anda le păcatea le manușenghe?

• So miștimata anel tuche o merimos le Isusosco?

RODE MAI BUT

Va avela te hachiares sostar i viața perfecto le Isusoschi si iech răscumpărarea.

„Sar si i jertfa le Isusoschi iech «răscumpărarea anda but manușa»?” (Articolo pa amaro site-o)

Va avela te hachiares so trebul te cheres caște aves hastrame.

„Sar hastravel-ame o Isus?” (Articolo pa amaro site-o)

Daștil te iertil o Iehova chiar vi le bare păcatea?

„Pușimata hai răspunsuri andai Biblia” (O Turno de veghe, 1 mai 2013)

Va avela te diches sar ajutisardea i jertfa le Cristososchi ieche murșes te paruvel pesco phiraimos.

„Ci mai som iech manuș ratavalo” (Articolo pa amaro site-o)

1. Sar daisaras te sicavas că dichas cuci so cărde o Del hai o Cristos anda amende?

I Biblia phenel că „oricon sicavel pachiamos ando [Isus]” daștil te trail anda sea o timpo. (Ioan 3:16) Tha sar daisaras te sicavas pachiamos? Si mai but sar te pachias ando Isus. Trebul te sicavas pachiamos vi prin le buchia cai alosaras te cheras-le hai vi prin amaro phiraimos. (Iacov 2:17) Cana sicavas amaro pachiamos prin so cheras hai prin so phenas, zuriaras amaro amalimos le Isusoia hai lesche Dadeia, o Iehova. (Citisaren Ioan 14:21.)