LECȚIA 47
San gata te boles-tu?
De cana studiis i Biblia sichilean but buchia anda o Iehova hai daștil-pe că cărdean chichiva paruimata ande chi viața. Cu sea cadala, daștil-pe că vareso așavel-tu te des chi viața le Iehovasche hai te boles-tu. Ande cadai lecția va avela te diches chichiva buchia cai daștin te așaven-tu te cheres o bolimos hai sar daștis te naches părdal lende.
1. Chichi de but buchia trebulas te prinjianes caște boles-tu?
Caște boles-tu trebul te arăsăs ca „iech prinjianimos exacto le ciacimasco”. (1 Timotei 2:4) Cadaia ci însemnol că trebul te jianes o răspunso ca orisavo pușimos andai Biblia. Chiar vi le creștini cai si de but timpo bolde sichion mai dur. (Coloseni 1:9, 10) Cu sea cadala, trebul te jianes le bare ciacimata andai Biblia. Le phure de congregație va ajutina-tu te diches dacă arăsăl chichi de but buchia prinjianes.
2. Save si chichiva buchia cai trebul te cheres-le angla o bolimos?
Angla te boles-tu trebul ‘te căisares-tu . . . hai te risares-tu’. (Citisaren Faptele 3:19.) Cadaia însemnol că trebul te fal-tu pharo anda le buchia nasul cai cărdean-le ji acana hai te manghes le Iehovas te iertil-tu. Mai but, trebul te meches o phiraimos nasul hai te cames anda sea o ilo te traisares chi viața cadea sar camel o Del. Trebul te jias vi ca le întruniri hai te phenes i vestea lași la congregațiaia, sar vestitoro neboldo.
3. Sostar ci trebul te meches ca i dar te încărel-tu parpale?
Chichiva manușa daran că ci daștin te încăren pengo solaharimos cărdo le Iehovasche. Si ciaces, poiechdata va avela te cheres greșeli, cadea sar le slujitori fidelo le Iehovasche andai Biblia. Tha o Iehova ci ajucărel te avas perfecți. (Citisaren Psalmo 103:13, 14.) Anda o Iehova san cuci cana des chi zor te cheres sea so daștis. Vo va ajutila-tu! O Iehova phenel amenghe că chanci ‘ci va daștila te încărel-ame dur catar leschi iubirea’. (Citisaren Romani 8:38, 39.)
HACHIAR MAI MIȘTO
Va avela te diches sar daștis te naches părdal orisavi buchi cai daștil te așavel-tu te boles-tu, cana prinjianes mai mișto le Iehovas hai meches-les te ajutil-tu.
4. Prinjiar mai mișto le Iehovas
Chichi de mișto trebul te prinjianes le Iehovas angla te boles-tu? Trebul te prinjianes-les cadea de mișto încât te arăsăs te iubis-les hai te cames te aves cuci ande lesche iacha. Dichen o MATERIALO VIDEO cai sicavel murșa hai jiuvlea pa sea i phuv cai cărde cadai buchi, hai pala codoia den duma:
So ajutisardea le manușen anda o materialo video te aven gata anda o bolimos?
Citisaren Romani 12:2 hai pala codoia den duma:
Si tuche pharo te pachias vareso anda so sicavel i Biblia, sau că le Martori le Iehovasche sicaven o ciacimos?
Dacă si cadea, so daștis te cheres?
5. Nach părdal orisavi buchi cai daștilas te așavel-tu te boles-tu
Cana alosaras te das amari viața le Iehovasche hai te bolas-ame, savore nachas prin pharimata. Dichen o MATERIALO VIDEO cai sicavel amenghe iech exemplo hai pala codoia den duma.
Părdal so pharimata nachlea i Narangerel caște slujil le Iehovas?
Sar ajutisardea-la i iubirea anda o Iehova te nachel părdal codol pharimata?
Citisaren Proverbe 29:25 hai 2 Timotei 1:7, hai pala codoia den duma:
So del amen tromai caște nachas părdal le pharimata?
6. Șiu chio pachiamos ando Iehova
O Iehova va avela te ajutil-tu te aves pala lesco ilo. Dichen o MATERIALO VIDEO hai pala codoia den duma.
So așadea cadale murșes te bolel-pe?
So ajutisardea-les te zuriarel pesco pachiamos ando Iehova?
Citisaren Isaia 41:10, 13 hai pala codoia den duma:
Sostar daștis te pachias că va avela te încăres o solaharimos cai cărdean-les, cana phendean că va avela te des chi viața le Iehovasche?
7. Te avel sea mai cuci anda tute i iubirea le Iehovaschi
Cana gândisares-tu chichi de bari si i iubirea le Iehovaschi anda tute, vi tu va cameia te sicaves lesche că iubis-les hai că cames te slujis lesche anda sea o timpo. Citisaren Psalmo 40:5 hai pala codoia den duma:
So miștimata catar o Iehova sile mai cuci anda tute?
O profeto Ieremia iubisardea le Iehovas hai lesco Cuvânto, hai anda leste sas iech bari pachiv te phiravel o anav le Iehovasco. Vo phendea: „Chio Cuvânto cherel ca mânro ilo te hutel bucuriatar anda codoia că chio anav silo achardo opral mande”. (Ieremia 15:16) Den duma anda le pușimata cai aven:
Sostar si iech bari pachiv te aves Martoro le Iehovasco?
Cames te boles-tu sar Martoro le Iehovasco?
Si vareso cai așavel-tu te cheres o bolimos?
So pachias că trebul te cheres caște arăsăs te boles-tu?
UNII MANUȘA PHENEN: „Ci cherav o bolimos anda codoia că pachiav că ci daștiv te încărav mânro solaharimos”.
Simțosares vi tu sa cadea?
SO SICHILEAM
O Iehova va ajutila-tu te naches părdal orisavi buchi cai daștilas te așavel-tu te cheres o bolimos.
So dichleam
Chichi de but buchia trebul te jianes andai Biblia caște daștis te boles-tu?
So paruimata trebul te cheres angla so te boles-tu?
Sostar ci trebul te meches ca i dar te așavel-tu te boles-tu?
RODE MAI BUT
Va avela te diches sostar trebulas te cames te boles-tu.
Va avela te hachiares sar daștis te naches părdal le pharimata cai așen po drom caring o bolimos.
Va avela te diches sar nachlea iech murș părdal le pharimata cai daștinas te așaven-les te bolel-pe.
Iech murș po anav Ataa mai anglal ci sas-lo hotărâme te bolel-pe. Va avela te diches so cărdea-les te cherel cado baro paso.