Mutapu wa Kusadin Nawamp Chisu Chey

Mbil ya 1: Rijek Yom Nawamp

Tek yom ya usey pa ndond ya kusambish. Bibil utukasikeshin anch: ‘Shinshikinany pa yom ya usey nakash’. (Filip 1:10) Fund list wa yom ya kusal yidia ya usey nakash ni ya kuswapej. Pakwez vurik anch yom ya usey, mud kuland yakudia​—yidiap kamu ya kuswapej. Ni yom yikutwisha kumekan anch yid ya kuswapej​—mud kutal program wa ku televizion ukatining nakash—​yidiap kamu ya usey nakash.a

Sambel kutenchik yom. Mukand wa Mulej 10:10 ulondin anch: “Anch kasok kachinchik, ap anch muntu kakasawilap, ching kamu wakasikesh kukatul. Pakwez manangu mawamp madi ma kusambel kusaul kasok kurutu.” Dilejan did kwisu? Saul kasok key, kwawiy kulond anch sambel kutenchik yom kurutu chakwel utwisha kusadin nawamp chisu chey. Tenchik kusal yom chisu chikwau ap lik kusal yom yakad usey nakash, yikata yisu yivud kusend chisu ni usu. Anch waman anch wapwish kal mudimu wey kurutu kwa chisu, umenap anch chiwapin kusal mudimu ukwau wadia utongina kusal chisu chindj? Anch wasambel kutenchik yom, ukusal yom yivud nakash, mud mwin kuchay nkuny ubabela, ukata kusaul kasok kend.

Swapej mwom wey. Ileja kulik kusal yom yakad usey ni nakash. Kusal midimu yivud nakash ni kuwanyish yisend yivud kukutwish kukuziyish nakash ni kukushadishin musangar wey.

Mbil ya 2: Ipuk Yom Yikata Kusend Chisu

Kuladikij yom ni kwidjidjek kukwat mipak. “Anch wamuchingel ruvul ap rinkind anch awanyin bil, ukutwishap kukun ap kwangul chom.” (Mulej 11:4) Dilejan ik didiaku? Kuladikij yom kukat kusend chisu ni kumukangesh muntu kusal yom yivud. Ndim ukata kuchingel anch ching yom yawap kamu nakash kakukunangap ap kwangul chom. Chilik chimwing, tukutwish kwidjidjek kukwat mipak mulong wa wom wa yom tutongina anch yikutwish kushiken. Ap tukutwish kutong anch tufanyidin kuchingelaku kushik ni pitukwikala nich yom yawonsu mu chikas chad lel tukwata mupak. Chakin kamu, tufanyidin kukimbijol ni kutong nakash kurutu kwa kukwat mipak ya usey nakash. Jinswir 14:15 utulejin anch: “Muntu ubabela ukat kushinshik kuyilay.” Pakwez win yakin ud anch mu mipak yivud tukata kukwat mudingaku kwidjidjek.​—Mulej 11:6.

Kukat kusal ching yom yiwanyidina. Jakobu 3:17 urumburil anch: “Manangu madiokila mwiur [ap madiokila kud Nzamb] makwet . . . kwitudish.” Chakin kamu, chid chiwamp nakash kukat kusal yom mu mutapu uwamp nakash. Pakwez yisu yimwing tukutwish kwitekin mbil ja piur nakash ni kukangany kujilimish, ni chinech chikutwish tukuziyish kamu nakash. Chilakej, anch muntu wasambish kwilej dizu dindjing, ufanyidin kwitiyin anch ukurumbukang yisu yivud mu kulond, ni kwijik anch yawiy yikumukwasha kuya kurutu. Pakwez muntu ukatining kusal ching yom yiwanyidina ukat kwovang wom wa kurumbuk ni chinech chikat kumulabishang kuya kurutu. Chawiy chid chiwamp nakash kwijik kwitiyin mimbu yetu! Jinswir 11:2 ulondin anch: “In kwitudish akwet manangu”. Chikwau, antu itudishina ni ija mimbu yau kakwikwatangap nich usey nakash ni yisu yimwing akat kwisipaku ayinau.

Mbil ya 3: Ikal Wisikena ni Ukweta Chitongijok Chiwamp

Ikal muntu wisikena ku mudimu ni mu kwipuwangej. “Chidi chiwamp kwikal nich yom yikemp nich chisambu, kupandakan kwiswidiosh nich midimu yikash yakad ukwash. Mwamu chidi kumulondul rinkind.” (Mulej 4:6) Antu asadining midimu kupandakan yisu yivud kakatap kutaninamu mu ‘midimu yau yikash’, mulong kakwetingap chisu ni usu wa kuyisanger. Pakwez ku mutambu ukwau, in usweral akat kwiswedish nakash ni kushadish chisu cha usey. Bibil utukasikeshin kwikal ni chitongijok chisikena: Kusal mudimu nakash ni kusanger difut. Musangar mud winou chid ‘chipan cha Nzamb.’​—Mulej 5:19.

Lal mu chisu chiwanyidina. Mwin kufund umwing wa Bibil wafunda anch: “Nikat kulal tul nich chisambu.” (Kuseng 4:8) Amakurump avud akweting kuswir kwa kulal tul mu asaa piswimp chinan pa dichuku mulong wa kwikal kand nich usu ku mujimbu ni mu manangu. Pa mulong winou, kulal tul ud mutapu uwamp wa kwikal ni chisu mulong kusal mwamu kukat kukwash kushinshikin nawamp yom ni kuyivurik, ni chinech chikat kumukwash muntu kwilej nawamp. Pakwez, kulik kulal kukangeshining kwilej nawamp, kusadikishining ma aksidan ni kurumbuk ni kuletining ujim swa.

Itekina ntong jisikena. “Chiwapin kusangar nich yom yiukweta kupandakan kwikal ni maku mayimp.” (Mulej 6:9) Dilejan ik didia mu verse winou? Muntu ukweta manangu kakatap kulik anch maku mend matakela mwom wend, pakampwil maku mayimp ap makadiay kutwish kuwanyish. Chilakej, kakatap kwitiy swa ma piblisite ma chamwamu ap mabaz maswepela. Pakwez ukat kwilej kusanger ‘yom yikwetay’.

Mbil ya 4: Itekina Mbil Jiwamp

Shinshikin mbil jey jikutakedina. Mbil jawiy jikutwisha kukukwash kwijik anch chom kanang chid chiwamp, chid cha usey ni anch chiwanyidin. Chilakej, anch mwom wey wad mud nseu, ing mbil jey jawiy jelang kuutakel. Chikwau kand, mbil jiwamp jikukukwash kwitekin ntong ja usey ja mwom ni kukukwash kusadin nawamp chisu chey, saa win mwawonsu ni dichuku din diawonsu. Kwisu ukutwisha kutan mbil mud jinej? Antu avud akat kujikimb mu Bibil, mulong ij anch mud manangu mawamp nakash.​—Jinswir 2:6, 7.

Tek rukat kurutu kwa mbil jin jawonsu. Kolosay 3:14 ulondin anch rukat “rawiy moj wa kukukasany mu umwing uwanyidina.” Tukutwishap kwikal ni musangar wakin ni chisambu cha mu manangu pakad rukat, pakampwil mu dijuku. Antu alikina kwitiyij uyakin winou, pamwing ap mulong akat kutek pa ndond ya kusambish mapit ni mudimu uwamp, kakutwishap kwikal ni musangar. Inge, chawiy Bibil ujimbwil rukat kwikal mbil ya kusambish ni urisambidin tupamp tuvud nakash.​—1 Korint 13:1-3; 1 Yohan 4:8.

Itekina chisu mulong wa kuwanyish maswir ma mu spiritu. Ikundj umwing utazukinau anch Geoff wading ni mband muwamp, an aad akweta musangar, arund awamp ni mudimu usangareshina wa uchimwingang. Pakwez, mu mudimu wend watanijanang ching ni antu amena mar ni akimbina kufa. Wiyipula anch: “Ov, komb mwamu mufanyidina kwikal mwom?” Kupwa, dichuku dimwing watanga mikand yimedina pa Bibil ya Atuman a Yehova ni watana yakul yisangareshina

Geoff wamulejamu mukajend ni anend, kupwa niyau asangera. Dijuku diawonsu diasambisha kwilej Bibil. Ni kusal mwamu kwayikwasha nakash mu mwom wau ni kwayikwasha kand kusadin nawamp chisu chau. Kwilej Bibil kwayinkisha kand ruchingej ra mwom wa chikupu mwi ngand yakad mar ni yom yiyimp.​—Kujingunik 21:3, 4.

Yom yamushikena Geoff yimekeshin patok win yakin wa mazu malonday Yesu Kristu anch: “Ayuk kwau antu ija anch: ‘Tukwet kuswir kwa yom ya Nzamb.’” (Mateu 5:3) Ov, usotin kwitekin chisu mulong wa kuwanyish maswir mey ma kumwijik Nzamb? Ikal nich kashinsh anch kwikil mutapu ukwau uwamp nakash wa kusadin machuku mey ap mwom wey wawonsu kusutamu kumwijik Nzamb.