Mutapu Tukutwisha Kurijek Dichuku da Uruw Chakwel Dimutumbish Yehova

1-2. Yom ik yikatinay Yehova mulong wa dichuku da uruw wen?

OV, WAKANIJADINANY kal ni muntu anch ukwatijanany? Ang mwawiy, tukujikitishinany nakash! Chimeken anch ukwatikenany kamu nakash mulong wa kutenchik dichuku da uruw wen. Uruw wen umutadin kamu Yehova. Ukatin anch usangarany dichuku den da uruwa ni ukatin anch wikalany ni mashakamin mawamp mu machuku ma kurutu.​—Jnsw. 5:18; Mum. 3:11.

² Chid cha usey nakash kumutumbish Yehova pa dichuku da uruw wen. Mulong wak tulondina mwamu? Ni mutapu ik ukutwishanya kusal mwamu? Ap anch mutu wa mulong winou uyitadin cha kusambish antu atenchikina dichuku da uruw wau, mbil tukwisambina mwinomu yikutwish kutukwash etu awonsu kumutumbish Yehova anch atutazuk ku musambu wa uruw, ap anch atwit kukwash mu mutapu kanang ku yom yitenchikinau.

MULONG WAK DICHUKU DA URUW WEN DIFANYIDIN KUMUTUMBISH YEHOVA?

3. Yom ik yifanyidinau In Kristu kuvurik chisu chirijekinau dichuku da uruw wau, ni mulong wak?

³ In Kristu atenchikina yom chakwel atijan, afanyidin kukwat mipak yimedina pa mbil ja Yehova jida mu Bibil. Mulong wak? Mulong Yehova ndiy Musul wa uruw. Ndiy watenchika uruw wa kusambish—wayibombakesha Adam ni Ev chakwel ikala ambay a uruw. (Dis. 1:28; 2:24) Mulong Yehova ukwatining uruw nich usey, chawiy antu asotina kwatijan afanyidin kwikal ni kashinsh anch dichuku da uruw wau dikumutumbish.

4. Mayingishin ik makwau mafanyidina kuyibachik antu akimbina kwatijan kumutumbish Yehova pa dichuku da uruw wau?

⁴ Kud mayingishin makwau ma usey, mafanyidina kukubachikany kushinshikin chitongijok cha Yehova piur pa yom ukusalanya pa dichuku da uruw wen: Ud Tatukwen ni Murund nen muwamp nakash. (Heb. 12:9) Pakad kwidjidjek, ukatinany anch yom yidandamen kwikal mwamu. Ukatinanyap ap pakemp anch pa dichuku dined ap dichuku dikwau kand, usalany yom yikutwisha kumunenganesh Murund nen. (Kus. 25:14) Anch watongijokinany pa yom yakusadidinanay kal Yehova ni yikukusadinanay machuku ma kurutu, ov umenanap kwen anch uwanyidin kumutumbish pa dichuku da uruw wen?​—Kus. 116:12.

MUTAPU IK UKUTWISHANA KUMUTUMBISH YEHOVA?

5. Bibil ukutwish kuyikwash mutapu ik antu akimbina kwatijan kutenchik dichuku da uruw wau?

⁵ Bibil kaletinap list wa yom yifanyidinau In Kristu kusal pa dichuku da uruw wau. Antu ni antu akutwish kutenchik yom kukwatijan ni mashakamin mau, ndond yidau ap mutapu ukatinau. In Kristu akin alimishining kand yijil ya ngand. (Mat. 22:21) Anch yom yikusalau dichuku da uruw ayitenchik kukwatijan ni mbil ja Bibil, yikutwish kumutumbish Yehova ni kumusangaresh. Chad mbil ik jikutwisha kukukwashan?

6. Mulong wak chid cha usey kud antu akimbina kwatijan kulimish yijil ya ngand yau piur pa uruw?

⁶ Limishan yijil ya ngand. (Rom 13:1, 2) Mu jingand jivud, antu akimbina kwatijan chiyitining kulimish yijil kanang ya ngand kurutu kwa kwatijan. Antu inay afanyidin kwijik yijil ya ngand yau ap ya ndond yishichau. Anch kud yom wakadan kwijik pa mulong winou, ufanyidinan kuyipul amakurump chakwel akukwashan.b

7. Mutapu ik ufanyidina kusadik yom dichuku da uruw?

⁷ Salan anch yom yisadik nawamp pa dichuku da uruw. (1 Kor. 10:31, 32) Salan usu wa kusutish yom mu mutapu umekeshina mikadil yiwamp ya dibuj da spiritu wa Nzamb pa ndond pa kusal yom ni chitongijok cha mangand. (Gal. 5:19-26) Kukwatijan ni mbil ja Bibil jilondina anch ikuny ndiy mwant wa mband, ngatan ufanyidin kusal usu chakwel yom yikal yisangareshina ni ya kalimish. Yom ik yikutwisha kumukwash kusal mwamu? Diskur da uruw dimedina pa Bibil disadinau kwa rukat, kwa chirungul, ni mu mutapu umekeshina kalimish, dikutwish kuyikwash antu awonsu kwijik anch uruw chid chipan cha Yehova. Antu awonsu akukumangana akutaninamu, mulong diskur dikuyikwash kuman usey wa uruw. Mulong wa chinech, In Kristu avud akat kutond kusadin yom yiney ku Chot cha Want, anch chitwishikin kusal mwamu. Anch ukatinan kusadin Chot cha Want, chikwikal cha usey kuyifundin amakurump kurutu kwa chisu.

8. Yom ik yikutwisha kukukwashany kusutish musambu wa uruw mu mutapu umutumbishina Yehova? (Rom 13:13)

⁸ Tang Rom 13:13. Anch watondany kusal musambu wa uruw, mutapu ik ukutwishanya kwipuk kumekesh chitongijok cha mangand? Dizu da Grek dikarumwinau anch “misambu yisutina chipim” dimekeshin misambu muda kuna kusutina chipim ni mizik yishikijina mapep ma uchuku. (Tal note d’étude wa “fêtes débridées” mu Rom 13:13, mu Franse.) Anch watondany kupan maar, ijikany yom ufanyidinana kusal mulong wa kwikal ni kashinsh anch kwikil muntu ukuna kusut chipim.c Anch kukwikal mizik, chikwikal chiwamp kutek volim ukuyikwasha antu kovijan chisu chambambinau. Shinshikinany nawamp mizik ni mazu madamu chakwel kangal muntu ap umwing wipwakal.

9. Yom ik yifanyidinau antu akwatijana kulam mu manang piur pa yom yikulondau antu, ap piur pa milad yikwau ya kwipuwangej yikusadika ku musambu wau?

⁹ Ov, ku musambu wen kukwikal kuyinkish antu mazu mulong wa kulond, kumekesh yipich yen, mavideo ap milad yikwau ya kwipuwangej? Yom yiney yikutwish kuwapish musambu. Pakwez yifanyidin kwikal yikasikeshena. (Filip 4:8) Iyipulany anch: ‘Ov, yom yiney yikumekesh kalimish kud antu akwau? Ov, yikulimish ditenchik da uruw?’ Ni cha usey kupandakan, iyupulany anch: ‘Yikumutumbish Yehova?’ Ap anch chikutwish kwikal chiwamp kud muntu kulond yom yisipishena, kafanyidinap kulond yom yikutwisha kuyishikij antu kutong piur pa kulalijan. (Efes 5:3) Ikalan ni kashinsh anch anamakwen ni arunen akulonda yom yiney ij ni akulimish yom ukatinanya anch alond ap bwat.

10. Mulong wak ufanyidinau antu akimbina kwatijan kwikal isikena chisu chitenchikinau dichuku da uruw wau? (1 Yohan 2:​15-17)

¹⁰ Ikalan isikena. (Tang 1 Yohan 2:15-17.) Yehova ukat kusangar anch atushalapol end atond kumutumbish ndiy pa ndond pa kukimb kupwitin nkeu pad ayinau. In Kristu isikena kakatap kusadin nfalang jivud nakash ni kukimb “kumekesh yom [yikwetau].” Yom ik ukutaninanyamu anch wasalan musambu wa uruw wisikena? Pamwing ap yom yikusadik mud yamusadikina Mike, mukadivar uda mu Norvej. Ulondin anch: “Twatambulap mabaz ni chinech chatukwasha kudandamen mudimu wa uchibol. Yom twasala dichuku da uruw wetu yading yisikena, pakwez kand yiwamp ni yasha chilakej chiwamp.” Nambaz Tabitha uda mwi ngand ya End niyend ulondin anch: “Twiyakamishap kwetu nakash, mulong yom twatenchika kusal dichuku da uruw wetu yading yisikena, twikalap ni yom yivud ya kutenchik ap ya kupwitamijadin.”

11. Mutapu ik ukutwishay ngatan ni ngachik kumekesh anch isiken pantaliken ni kudjal ni mutapu ukumekanau? (Tal kand yipich.)

¹¹ Ov, wakwatinany kal mupak piur pa yom ukudjalanya? Chakin kamu, ukatinany kumekan nawamp kurutu kwa antu. Ap pasak, ngatan ni ngachik ashinshikinang nakash pa mutapu ukumekanau kurutu kwa antu. (Isay 61:10) Ap anch yom ukudjalanya yikutwish kushalijan ni yom ukata kudjalany yisu yawonsu, pakwez yifanyidin kwikal yisikena. (1 Tim. 2:9) Kangal walikidinany yom ukudjalanya ni mutapu ukumekananya yikala ya usey nakash pa dichuku da uruw wen.​—1 Pita 3:3, 4.

12. Mulong wak antu akimbina kwatijan, afanyidin kwikal ni kashinsh anch akwipuk yaku ya kwi ndond yishichau, yakad kukwatijan ni mbil ja Bibil?

¹² Ipukan yaku yakad kukwatijan ni mbil ja Bibil. (Kuj. 18:4) Mangand ma Satan mandjikin kal yisal ya upagan, ya ayilembil, ni yisal yikwau kand yiyimp mu yom yisadikining pa dichuku da uruw. Yehova utubabeshin kuchin kulemp ni yom mud yiney yijondila. (2 Kor. 6:14-17) Anch kwi ndond ushichanya kud yaku ap yishankur wakad kwijikany anch yimusangareshin Yehova ap bwat, kimbijolany jinsang piur pa yom yiney ni mbil ja Bibil jikutwisha kukukwashan kukwat mupak uwamp.

13. Mutapu ik ukutwishau antu akimbina kwatijan kwikal ni chitongijok cha Yehova piur pa yipan?

¹³ Ov, kwi ndond udanya kuding chaku cha kuyinkish antu atijadina yipan kud antu ezang ku musambu? Yipan ya amwing pakach pa antu inay yikutwish kukwatijan ni mitapu yikwetau. Chakin, In Kristu ayikasikeshin kupan, ni kusal mwamu kukat kuyiletin musangar. (Jnsw. 11:25; Mid. 20:35) Pakwez, ufanyidinanyap kusal yom yikutwisha kuyibachik antu kwiyov anch afanyidin kamu kupan chom, ap anch ukusangeranyap yipan yikemp. Mwimburijan Yehova, salan usu wa kuman yipan mud muyimeningay ndiy kusutin kuyishil antu chisu cha kupan yipan kukwatijan ni mutapu watenchikangau mu michim yau.​—2 Kor. 9:7.

IPUKAN NI PANDAKANAN YIKOKUJOL ANCH YASHIKEN

14. Yikokujol ik yikatau kurish nich antu amwing akimbina kwatijan?

¹⁴ Chikutwish kukukasikenan kutenchik musambu ukutwisha kumutumbish Yehova. Chilakej, chikutwish kukukasikenany kurijek musambu wa uruw wisikena. Charlie ushicha pa matung ma Solomon, ulondin anch: “Chading chitukasikedin kuman nany tufanyidina kutazuk ku musambu. Twading tukwet arund avud, ni kukwatijan ni kwi ndond twading tushicha, muntu win mwawonsu wading ukwet kuswir kwa kumutazuk!” Tabitha wajimbulangau kwinsambishin ulondin anch: “Kwi ndond nishicha kukat kusadikang misambu nakash. Chayita anvaj etu chisu mulong wa kwitiy mupak wetu wa kutazuk kwau antu 100.” Sarah uda mu End ulondin anch: “Antu amwing akat kushinshikin nakash pa nfalang jikwetau ni mutapu ukuyimanau kud antu akwau. Musanyam umwing wasala musambu ujim nakash, chawiy niyam nova ja kusal musambu usutina pinipa.” Yom ik yikutwisha kukukwashan kwipuk yikokujol mud yiney ni kuyipandakan?

15. Mulong wak malembil mad ma ukwash kud antu atenchikina musambu wa uruw?

¹⁵ Lembilan chisu chawonsu utenchikinana yom ukusalana pa dichuku da uruw wen. Ukutwishan kumulej Yehova mu malembil mutapu wiyovilanya ni yikokujol urishinanya nich. (Filip 4:6, 7) Mwitany chakwel akukwashan kukwat mipak yiwamp, kutek rudung mwi ndond chisu wiyakamishinana, ni kumekesh kutakaman chisu chifanyidina kusal mwamu. (1 Pita 5:7) Ruchingej ren muday Yehova rikutwish kukasikan piukumananya anch wakwil malembil men. Tabitha wajimbulangau kwinsambishin ulondin anch: “Am ni ikuny wantonda twading twiyakamishin anch tukupwitamijan ayinetu, ap ni antu a mu majuku metu. Chawiy, chisu chawonsu twalembilang kurutu kwa kwisambin piur pa mutapu wa kutenchik yom tukusala pa dichuku da uruw wetu. Twamana kamu ukwash wa Yehova ni twalama chisambu pakach pa ayinetu ni antu a mu majuku metu.”

16-17. Kwambamb nawamp kukutwish nchik kuyikwash antu atenchikina musambu wa uruw?

¹⁶ Ambamban patok ni kwa kalimish. (Jnsw. 15:22) Mipak yivud piur pa musambu wa uruw ukutwishany kuyikwat en awonsu pamwing. Chinech chirumburikin kukwat mupak piur pa dichuku, nfalang ja kusadin, antu akutazuk ni yom yikwau kand. Kurutu kwa kukwat mupak, shinshikinan yom pamwing, isambinan mbil ja Bibil ni yiyul yikwinkishinanau kud In Kristu aswila ni akweta ukaliweny. Chisu ulejenana yom yikatinay muntu ni muntu, ikalany ni kalimish, in kwitek pa ndond ya antu akwau ni aswakela kuswimp. Chilakej, anch anvaj en atongin kuwejaku chom kanang ku musambu wen chisikena kwau, ikasikeshany kusadin chitongijok chau ni kuyilimish. Chinech chid chirung chiwamp nakash kud awiy. Anch ukutwishanap kusal yom yikwitinanau kusal, yirumburilany mayingishin men nich nkeu. (Kol. 4:6) Yirumburilany anamakwen patok anch rusot ren rid ra kusal yom yiwamp yimutumbishina Yehova.

¹⁷ Chikutwish kukukasikenany kuyirumburil anvaj en yom utonginana kusal, pakampwil anch kadap Atuman, pakwez ukutwishany kusal mwamu. Mukadivar Santhosh uda mu End ulondin anch: “Majuku metu mading makatin anch tuwejamu yishankur ya In Hindou. Chatusenda chisu chilemp mulong wa kuyirumburil mupak wetu. Twasadina yom yimwing yading yikatinau pitwamana anch yijipinap kwau mbil ja Nzamb. Chilakej, twaswimpa yom ya kuda twading twatenchika kal ni twadoshaku mizik ni maj mulong kadingap kijidina yom yiney.”

18. Yom ik yikutwisha kukukwashan kwikal ni kashinsh anch yom yikusut nawamp dichuku da musambu wen wa uruw? (1 Korint 14:40) (Tal kand chipich.)

¹⁸ Tenchikan yom nawamp. Anch watenchikan yom nawamp ukwiyakamishanyap nakash pa dichuku da musambu wen wa uruw. (Tang 1 Korint 14:40.) Wayne uda mu Tayiwan ulondin anch: “Machuku makemp kurutu kwa musambu wetu wa uruw, twakumangana pamwing ni in kwisotin ading akimbina kutukwash. Twisambina yom twatenchika ni twachirikinamu yom twafanyina kusal mulong wa kwikal ni kashinsh anch yom yikusut nawamp.” Salan usu wa kulimish chisu mulong wa kumekesh anch uyilimishinany antu watazukangana.

19. Yom ik yikutwisha kukukwashan kushinshikin nawamp yom yikusadika ku musambu wen wa uruw?

¹⁹ Ukutwish kwiyepan yom yivud kusutin kuyitongijokin kurutu kwa chisu. (Jnsw. 22:3) Chilakej, anch ushichan kwi ndond kukatau antu kwiyezin ku misambu pakad kuyitazuk, irijekan kurutu kwa chisu chakwel kangal yom mud yiney yashiken. Ikalan ni kashinsh anch anamakwen akad kwikal Atuman ij mutapu ukusadika yom, ni ij yom utonginanya piur pa yaku kampand yikata kusadik ku misambu ya uruw. Ukutwishan kuyitumin mutu wa mulong uda pa jw.org ulondina anch: “Comment se passe un mariage chez les Témoins de Jéhovah?”. Ukutwishan kumwit mukadivar uchingejidinana chakwel ikal “ntakel wa musambu,” mulong ashinshikin nawamp yom yikusadika. (Yoh. 2:8) Anch wamulejan patok yom utenchikinana piur pa musambu, ukukukwashan chakwel usadik mu kalimish ni kukwatijan ni mutapu watenchikangana.

20. Yom ik yifanyidinau kuvurik antu akimbina kwatijan piur pa musambu wau wa uruw?

²⁰ Piutenchikinanya yom mulong wa musambu, ukutwish kumanan anch yom yivudin ni chinech chikutwish kukwakamishan. Pakwez vurikany anch, musambu wen wa uruw ukusadik kwau dichuku dimwing. Did kwau disambishin da mwom uwamp ukutwishana kwikal nich mu kumusadin Yehova pamwing. Salan usu wa kusal musambu wisikena ni wa kalimish. Muchingejinan Yehova. Nich ukwash wend ukutwishan kurijek musambu ukukuletinanya musangar yisu yawonsu ukuvurikangana dichuku dined ni ukwinananyap.​—Kus. 37:3, 4.