Ov, Uvurikin?

Ov, wasangaredin kutang manimero ma Chinong cha Kalam cha muvu winou? Akul lel ku yipul yilondwilaku ey:

Yom ik yitubachikina kupan katumb kud Yehova?

Tukat kusal mwamu mulong tumulimishining nakash ni tumukatin kand chipandakena. Tukat kumutumbish kand mulong tukatin anch antu akwau amwijik.—w25.01, paj 3.

Anch muntu waturumbukin, mutapu ik tukutwisha kwikal in kulikishin nakash?

Tukatap kusu kuduul yovil yetu; pakwez, kulikap ujim ni kulik kulam yom ku muchim kukat kutukwash kwiyep rukuny.​—w25.02, paj 15-16.

Mulong wak Marko ud chilakej chiwamp kud akadivar ansand?

Marko witiya pakad kwidjidjek chisend cha kuyisadin antu akwau. Ap anch yom yamushikena mu mwom wend yamuziyisha, pakwez wadandamena kwipan. Wakudisha urund uwamp ni Paul nau In Kristu akwau aswila mu spiritu.​—w25.04, paj 27.

Yom ik yading yikimbinay Yesu kulond palembilay anch: ‘Nayijikishin dijin dey’? (Yohan 17:26)

In kwilej end ading ij kamu nawamp dijin da Yehova. Pakwez Yesu wijikisha wuntu wading ujingamina mu dijin da Yehova, kuwejinaku ntong Jend, yom yasalay kal, ni mikadil yend.​—w25.05, paj 20-21.

Anch twij mimbu yetu, yom ik tufanyidina kwitiyin?

Twij anch kud yom yimwing twakad kwijik. Chilakej, twijap anch disuden dikwez chisu ik, ni twijap mutapu ukusalay Yehova yom pa chisu chinicha. Ap anch twijap yom yikusadika damashik, pakwez twij anch Yehova utwij kamu nawamp.​—w25.06, paj 15-18.

Yom ik yikutwisha kutukwash kutaninamu mu mitu ya milong ap mu diskur da antu awonsu?

Tukutwish kwiyipul anch: ‘Uman ik upaninawamu mulong wa kuyinkish antu kashinsh piur pa uyakin winou wa Bibil? Ov, mud chilakej chiwamp nikutwisha kusadin chisu nimufundishina muntu uyakin winou? Nany ukutwisha kusanger mutu wa mulong winou?’​—w25.07, paj 19.

Mutapu wamulikishinau David kud Yehova utufundishin ik piur pa dilikishin Dend?

Ap anch David wasala yitil yikash, pakwez pakarumukay Yehova wamulikishina. (1 Ant 9:4, 5) Anch Nzamb watulikishin, kakatap kand kuvurik yom yasuta kal ap kuyilam mulong wa kutupup nich machuku ma kurutu.​—w25.08, paj 17.

Yom ik ukutwisha kusal anch mwin kwilej wa Bibil urishin ni chikokujol kanang?

Ang waman anch yom kanang yimukasikedin kutesh nawamp, kangal walabinap nakash. Ukutwish kusut ni kwirijek mulong wa kwisambin yom yiney dichuku dindj.​—w25.09, paj 24.

Bibil ulondin anch ‘chitil chikwet usu wa kudimban.’ (Heb. 3:13) Mutapu ik?

Kuburen kuwanyin kukatap kwau ching kutubachik kusal yom yiyimp, pakwez kukat kutubachik kand kwidjidjek piur pa rukat ra Yehova.​—w25.10, paj 16.

Yom ik yisatu yikutwisha kutukwash kuwapish malembil metu?

(1) Tufanyidin kwimburij mikadil yiwamp ya Yehova. (2) Tufanyidin kutongin pa yom turishina nich ni kuyijimbul mu malembil, mud piur pa kumulikishin muntu mukwau. (3) Tukutwish kwitekin chisu chiwanyidina cha kulembil. Anch twasal mwamu tukutwish kumulej Yehova yom yivud yida mu muchim.​—w25.10, paj 19-20.

Mutapu ik tukutwisha kuyikwash amapal?

Tukutwish kuyitazuk ku telefon ap kuya kuyital kwol kwau. Tukutwish kand kuyitwalaku kumanijan ni mwingang. Ap tukutwish kand kulejan nau mu mitapu kushalijan.​—w25.11, paj 6-7.

Yom ik yikutwisha kusal anch dichuku da uruw wa In Kristu dimutumbisha Yehova?

Afanyidin kulimish yijil ya ngand. Kwikal ni kashinsh anch musambu ni yom yikwau yikusut mu mutapu umekeshina mikadil yiwamp ya dibuj da spiritu wa Nzamb. Kwikal isikena mu mutapu wau wa kudjal ni kwipuk yaku yakad kukwatijan ni mbil ja Bibil. Afanyidin kwambamb nawamp chisu chirijekinau dichuku da uruw wau.​—w25.12, paj 21-24.