Imburij Kwikepish kwa Yehova

1. Mulong wak kwikepish kwa Yehova kud kamu kushimwokishena?

NLEL anch waman antu atakedina maguvernema, ov ukutwish kulond anch ad in kwikepish? Bwat kamu. Pakwez Yehova uda mwin dikand din dawonsu ud mwin kwikepish. (Kus. 113:5-8) Kwikil muntu wikepishina mud Yehova; mu wuntu wend mwikiling kwitutul ap kukemp. Chikwikal cha usey kud etu kushinshikin mitapu yinying ya wuntu wa Yehova ni kujingunin mutapu ukatay kumekesh kwikepish mu yom yiney. Tukuman kand mutapu wimburijay Yesu kwikepish kwa Tatukwend. Kusutin kwisambin yom yiney, tukuman mutapu tukutwisha kumusejin Yehova piswimp ni kwimburij kwikepish kwend mud muchifanyidina.

YEHOVA UD USWAKELA KUSEJIN

2. Kuseng 62:9 umekeshin yom ik piur pa Yehova? (Tal kand chibur.)

² Yisu yivud chiswapelingap kuyisejin antu itutwila. Antu a mutapu winou akat kuyisadin akwau yom kwa chisum, mulong atongining anch ad a usey nakash kuyisutamu, chawiy chikata kuyibachik antu kuyiyep. Pakwez Yehova kadap mwamu! Mulong wikepishining, chawiy ututazukin kumusejin piswimp ni kumulej yom yawonsu turishina nich ni yituziyishina mu manang. (Tang Kuseng 62:9.) Mud mutapu ukatay tatuku muwamp kutesh yakamish ya anend chisu chimulejinau, Yehova ukat kutesh ni kwakul malembil ma atushalapol end. Mud uman, wafundikishin kal malembil ma mutapu winou mu Bibil. Chinech chimekeshin kamu anch ud uswapela kusejin. (Jos. 10:12-14; 1 Sam. 1:10-18) Pakwez chid nchik anch mulong wa diyingishin kanang, twiyov anch tuwanyidinap kumusejin Yehova?

3. Mulong wak tukutwisha kwikal ni kashinsh anch Yehova ukatin tumulembilang yisu yawonsu?

³ Tukutwish kumulembil Yehova ap anch twiyov anch tuwanyidinap kutukat kud ndiy. Mulong wak tukutwisha kulond mwamu? Mu chishimu cha Yesu cha mwan washadika, Yesu wamufanakesha Yehova ni tatuku ukweta ranaken, wading ukweta mwan wakarumuka ni wading utongina anch kawanyidinap kuchirik mu dijuku dend. Yom ik yasalay tatuku winou pachirikay mwanend ku chikumbu? Yesu walonda anch, pamumanay kapamp kamwing, “waya mau kuday mwanend, wamubwikat, ni wamususwa kwa chirungul.” (Luka 15:17-20) Yehova ud mud tatuku winou. Anch watesh malembil ma antu anenganena ni aziyina mulong wa yakamish yau, kwikepish kukat kumubachik kapamp kamwing kuyitil matu. (Mad. 3:19, 20) Yehova ukwet ranaken. Mud mwasalay tatuku wa mu chilakej cha Yesu, niyend ukat kwez mau kud awiy mulong wa kuyikasikesh ni kuyimekeshin ranaken ni rukat rend. (Isay 57:15) Mutapu ik ukatay Yehova kusal mwamu nlel? Yisu yivud ukat kusal mwamu kusutin amakurump a chikumangen, anamakwetu, arunetu ni ambay netu In Kristu. (Yak. 5:14, 15) Yehova utukwashin mu mutapu winou mulong ukatin anch tumusejin piswimp.

4. Mutapu ik wamekeshay Yesu anch wading muntu uswakela kusejin?

⁴ Yesu ukat kumwimburij Tatukwend. Mud Tatukwend, Yesu niyend ud mwin kwikepish. Mud chibudikin, padingay pa divu, chayiswapelang antu kumusejin piswimp. Amwipulang yipul pakad kwidjidjek. (Mar. 4:10, 11) Chawiy payipulangay chakwel alonda piur pa chom kanang, antu amulejang kamu mutapu wiyovilau. (Mat. 16:13-16) Ni parumbukangau, kovangap wom mulong ading ij anch Yesu ukwet rukat, ukwet riy, ni ud mwin kushimpish muchim. (Mat. 17:24-27) Kwijik yom yiney kud kwa usey mulong Yesu wamwimburija Tatukwend nawamp nakash, chawiy chayiswapela in kwilej end kumwijik Yehova nawamp. (Yoh. 14:9) Ajingunina anch Yehova kadingap mud antakel a ma relijon ading in kwitutul, isumina ni akad kutwish kusejin. Pakwez, Ndiy uding mwin kwikepish ni uswakela kusejin.

5. Kwikepish kwetu kukutwish kuyikwash antu akwau kutusejin piswimp, mutapu ik?

⁵ Mutapu ik tukutwisha kumwimburij Yehova? Anch twikal ikepishina, chikuyiswapel antu kutusejin. Kwikepish kukutukwash kulik kwikal in ris, in kwitutul, ni akad kulikishinang—mikadil yikata kuyichinish antu akwau kulemp. Pakwez kwikepish kukat kutukwash kukudish rukat, kushimpish muchim, ni kulikishin—mikadil yikata kuyisejish antu akwau piswimp. (Kol. 3:12-14) Pakampwil amakurump afanyidin kusal usu wa kwikal aswakela kusejin. Chakin kamu, chakwel chiyiswapel antu akwau kuyisejin piswimp, amakurump afanyidin kwikal ni chaku cha kumekanang. Chinech chirumburikin anch, afanyidin kusal usu wa kwezang ku yikumangan pa ndond pa kulondul yikumangan kusutin videokonferans pakad kwau diyingishin. Ni anch chitwishikin, akutwish kand kwikasikesh kulejanaku pamwing ni akadivar nau anambaz ku chikumbu ni chikumbu. Anch akadivar nau anambaz ayijidin amakurump, chikuyiswapel kuyisejin piswimp ni kuyilej yovil yau.

YEHOVA UD WISIKENA

6-7. Let yilakej yimekeshina anch Yehova waswimpa pamulembilau kud atushalapol end.

⁶ Antu itutwila avud kadingap isikena mu mashakamin mau nau antu akwau. Pakwez Yehova wikepishining, ud wisikena ni kakatap kujikishin pa chom​—ap anch mu mitapu yawonsu, ud wa piur nakash kusutamu muntu mwawonsu. Shinshikin yom yasalay pantaliken ni Miriam, mpanyend wa Moses. Ndiy pamwing ni Aron amupungana Moses, muntu watekau kud Yehova amwinend. Chawiy mu uyakin, Miriam wading umuburedin Yehova kalimish. Mud chibudikin, Yehova wamujimena Miriam ni wamwasa musong wa mak. Aron wamwilembina Moses, ni Moses niyend wamwilembina Yehova chakwel amwoka mpanyend. Yom ik yasalay Yehova? Anch wading muntu witutwila ing kaswimpap chitongijok chend, pakwez Yehova kasalap mwamu. Mulong Yehova waswimpa chitongijok chend, chawiy wamulikishina Miriam.​—Kuch. 12:1-15.

⁷ Yehova wamekesha kand kwikepish kwend kusutin mutapu wamuteshay Mwant Ezekias. Kusutin muprofet Wend, Yehova wamuleja mwant winou anch ukufa. Ezekias wamwilembina Yehova nich mansoj ku mes chakwel amwoka. Yehova wamutesha, chawiy wamukwasha mwant winou kushakam kand mivu 15. (2 Ant 20:1, 5, 6) Chakin kamu, kwikepish kukat kumubachik Yehova kuyanaken antu ni kuswimp mipak yend.

8. Yilakej ik yimekeshina anch Yesu ud wisikena? (Marko 3:1-6)

⁸ Yesu ukat kumwimburij Tatukwend. Padingay pa divu, Yesu kidjidjekangap kuyisadin antu akwau yom yiwamp mu yisu yading yiwamp kusal mwamu. Chilakej, wayoka antu dichuku da Sabat chikalap nchik mutapu wamupompatangau. (Tang Marko 3:1-6.) Yesu udandamedin kwikal wisikena paday kand mwant wa chikumangen cha Win Kristu. Chilakej, anch muntu wasal chitil chikash mu chikumangen, ukat kumushimpishin muchim ni kumushil chisu cha kuswimp.​—Kuj. 2:2-5.

9. Mutapu ik tukutwisha kukudish ni kumekesh mwikadil wa kwisikan? (Tal kand yipich.)

⁹ Mutapu ik tukutwisha kumwimburij Yehova? Nich kwikepish, tufanyidin kusal usu wa kukudish mutapu wisikena wa Yehova wa kutong ni wa kusal yom. (Yak. 3:17) Chilakej, anvaj amwimburijina Yehova kakutwishap kuyit anau kusal yom yakadau kutwish kusal. Yakob ud chilakej chiwamp nakash pa mulong winou, mud tukutwisha kuman mu rusang rilejenau mu Disambishil 33:12-14. Anvaj ikepishina ni isikena afanyidin kand kusal usu wa kulik kuyifanakesh anau. Amakurump a chikumangen niyau afanyidin kwikal isikena. Akutwish kusal mwamu kusutin kwitiy mupak witiyinau antu avud mu chisak cha amakurump, anch ujipinap kwau mbil ja Bibil. (1 Tim. 3:2, 3) Ni etu awonsu tukutwish kusal usu wa kutesh chitongijok cha antu akwau, ap anch tumen yom mu mutapu windj. (Rom 14:1) Mwaning, muntu mwawonsu mu chikumangen ufanyidin kusal usu chakwel “mwikadil [wend] wa kwisikan wijikan kud antu awonsu.”​—Filip 4:5.

YEHOVA UD MWIN KUSHIMPISH MUCHIM

10. Mutapu ik wamekeshay Yehova mwikadil wa kushimpish muchim?

¹⁰ Natong niyey wamen kal anch antu in kwitutul kakatap kwau kushimpish muchim. Kwitutul kukat kuyikangesh kushimpish muchim. Pakwez Yehova kadap mwamu, ndiy uding mwin kushimpish muchim nakash kusutamu muntu win mwawonsu. Chilakej, chirung cha Now, Yehova wamekesha kushimpish muchim mu mivu 120 kurutu kwa kuyishesh antu ayimp. (Dis. 6:3) Now wikala ni chisu cha kulil an ni kutung waat nich ukwash wa dijuku dend. Mu kusut kwa chisu, mwangel watumay Yehova wamutesha Aburaham nich kushimpish muchim pamwipulay piur pa kusheshik kwa musumb wa Sodom ni Gomor. Anch wading mwin kwitutul, ing wamwakula anch: ‘Ov, ukwet kamu mbil ya kwingipul mwamu?’ Pakwez, mulong wa kumwimburij Yehova, mwangel winou wamushimpishina Aburaham muchim.​—Dis. 18:20-33.

11. Mud mulejenau mu 2 Pita 3:9, mulong wak Yehova ushimpishin muchim pa chirung chetu?

¹¹ Nich kwikepish, Yehova ukat kushimpish kand muchim pa chirung chetu. Uchingedin chisu chatenchikay kal mulong wa kulet disuden da mangand minam. Mulong wak ushimpishin muchim? “Mulong kakatinap anch muntu ap umwing asheshik, pakwez ukatin anch awonsu ashiken ku kukarumuk.” (Tang 2 Pita 3:9.) Komb kushimpish muchim kwa Yehova kud kwau kwa chamwamu? Bwat! Mamiliyon ma antu atentamina atil kal urund ni ndiy. Ni tuchingejin anch mamiliyom makwau ma antu akusal kand mwamu. Chakin kamu, kushimpish muchim kwa Yehova kukwet mimbu. Yehova uyikatin antu, pakwez pashimpishinay muchim kalikinap anch asal yawonsu yikatinau. Kakulikidinap uyimp udandamen chikupu.​—Hab. 2:3.

12. Mutapu ik wimburijinay Yesu kushimpish muchim kwa Yehova?

¹² Yesu ukat kumwimburij Tatukwend. Mu tunan twa mivu, Yesu wimburijin kal kushimpish muchim kwa Yehova. Wamumana Satan ukat kumudimben Yehova makasu ku mes ma antwend ashinshamena. (Dis. 3:4, 5; Job 1:11; Kuj. 12:10) Yesu wamen kal kand antu avud arishina ni yikokujol yikash. Tongijokin mutapu wiyovilay pachingedinay “kushesh midimu ya Djabul”! (1 Yoh. 3:8) Yom ik yimukwashina Yesu kuchingel mbil yikumwinkishau kud Yehova mulong wa kushesh kamu rawonsu midimu ya Djabul? Diyingishin dimwing did anch, kwikepish kwa Yesu kukat kumubachik kuman anch ching Yehova ndiy wija chisu chiwanyidina kurijek yom.​—Mid. 1:7.

13. Yesu wayishimpishina atwimbuy end muchim mutapu ik, ni mulong wak?

¹³ Padingay pa divu, Yesu wayishimpishina atwimbuy end muchim. Chilakej, patadikijanangau atwimbuy tupamp tuvud mulong wa kwijik nany wading mujim nakash pakach pau, Yesu katongap anch kakuswimpap. Wadandamena kuyishimpishin muchim. (Luka 9:46; 22:24-27) Wading ukwet kashinsh anch mu kusut kwa chisu akuswimp kwau. Ov, niyey wasadinap kal kurumbuk kwawiy kumwing tupamp tuvud? Anch mwawiy, umenap anch ufanyidin kwikal mwin kujikitish mulong wa Mwant uda mwin kwikepish ni ushimpishina muchim ukuyikedina?

14. Mutapu ik tukutwisha kukudish mwikadil wa kushimpish muchim?

¹⁴ Mutapu ik tukutwisha kumwimburij Yehova? Ang twikal ni “chitongijok cha Kristu,” tukutwish kusambish kutong ni kusal yom mud Yehova. (1 Kor. 2:16) Mutapu ik tukutwisha kwijik nawamp chitongijok cha Kristu? Mutapu uwamp tukutwisha kusal mwamu ud wa kutang Maevanjil chisu chawonsu. Kupwa tufanyidin kwishil chisu cha kutongijokin mutapu umekeshinau chitongijok cha Yesu mu rusang tutangina pa chisu turishina ni yikokujol. Ni pakad kwidjidjek, tufanyidin kumwit Yehova atukwash kumekesh chitongijok cha kwikepish mud cha Yesu. Anch twikal ni chitongijok cha Kristu, tukwikal mud Nzamb kusutin kushimpish muchim mulong wa ayinetu ni mulong wa ambay netu In Kristu.​—Mat. 18:26-30, 35.

YEHOVA UKAT KUYISHINSHIKIN ANTU IKEPISHINA

15. Let yilakej yimekeshina anch Yehova uyilimishining antu ikepishina (Kuseng 138:6)

¹⁵ Tang Kuseng 138:6. Did dilau dijim kud antu ikepishina kuyilimish kuday Mukaleng Mwant wa mangand mawonsu! Shinshikinaku yilakej yimwing ya antu ikepishina alimishay Yehova mu kusut kwa mivu. Amwing pakach pau ukutwishap kuyitongin, pakwez ayisambidin mu Bibil. Yehova wamubachika Moses kufund dijin da Debora, nlij umwing wading ushicha pa chirung cha anshankur. Wasadina mu chikumbu cha Izak ni Yakob mu mivu piswimp 125! Ap anch twijap yom yivud piur pa mband winou mwin kashinsh, Yehova wamubachika moses kufund yom yimekeshina mutapu wading umukatinau. (Dis. 24:59; 35:8.) Mu kusut kwa mivu, Yehova wamutonda nsand David, wading kafung, mulong wa kwikal mwant wa muchid wa Isarel. (2 Sam. 22:1, 36) Chisu chikemp kupwa kwa kuvadik kwa Yesu, Nzamb wayilimisha atufung ading ikepishina kusutin kutum angel mulong wa kuyilej awiy cha kusambish anch ku Betlehem kwavadik kal mwan ukwikala Mesiya. (Luka 2:8-11) Ni payay Jozef pamwing ni Mariy mulong wa kumutwal Yesu ku tempel, Yehova wamulimisha Simeyon ni Ana kusutin kuyinkish dilau da kumuman Mwanend. (Luka 2:25-30, 36-38) Chakin, “ap anch [Yehova] udap nchik wa piur, ukat kuyishinshikin itudishina”!

16. Mutapu ik wimburijay Yesu mutapu ukatay Tatukwend kuyisadin antu akwau?

¹⁶ Yesu ukat kumwimburij Tatukwend. Mud Tatukwend, Yesu wayisadina antu nich kwikepish. Wafundisha uyakin piur pa Want wa Nzamb kud “antu akad kwilej ni ading kwau mud antu awonsu.” (Mid. 4:13; Mat. 11:25) Yesu wayoka kand ayej mu mutapu wayikwasha kwiyov anch ayikatin ni ayilimishin. (Luka 5:13) Uchuku wa nsuden kurutu kwa rufu rend, Yesu wayowisha atwimbuy end ku mend, chom chading chifanyidinau kusal ching kud atushalapol. (Yoh. 13:5) Ni kurutu kwa kuya mwiur, wayilimisha in kwilej end ikepishina a pa chirung chend kusutin kuyinkish mudimu wa usey nakash, mudimu watwinkishay kand niyetu—kuyikwash antu akwau kwikal ni ruchingej ra mwom wa chikupu.​—Mat. 28:19, 20.

17. Mutapu ik tukutwisha kuyilimish antu akwau? (Tal kand chipich.)

¹⁷ Mutapu ik tukutwisha kumwimburij Yehova? Tukat kuyilimish antu akwau kusutin kulejan rusang ruwamp kud awonsu atuteshina, chikalap nchik ndond yidokilau, ulombu wau wa chikit, ap shikol yilejau. Tukat kuyilimish kand akadivar nau anambaz netu anch twayiman mud atusutinamu, chikalap nchik ukaliweny tukweta ap yisend tukutwisha kwikal nich. (Filip 2:3) Yehova ukat kusangar anch twikal “a kusambish” kumekeshijadin kalimish umwing ni mukwau mu mitapu yiney ni yikwau kand.​—Rom 12:10; Sof. 3:12.

18. Mulong wak tufanyidin kwimburij kwikepish kwa Yehova?

¹⁸ Anch twikasikesh kwimburij kwikepish kwa Tatukwetu wa mwiur ukweta rukat, tukwikal aswapela kusejin kud antu akwau, isikena, in kushimpish muchim, ni mwamu tukuyilimish antu akwau mud mukatay kusal Yehova. Tuvurikany anch, ang twasal usu wa kwikal ikepishina mud Nzamb, tukwikal antu akweta usey nakash ku mes mend!​—Isay 43:4.