Mpfuletelo Lowu Yamukeliwiki Hi Yohane

3 “A ntsrumi leyi nga ka bandla dzra le Sarda yi tsraleli leswi: Leyi i mintxhumu leyi hlayiwaka hi lweyi a nga ni 7 wa mimoya ya Xikwembu Nkulukumba ni 7 wa tinyeleti: ‘Na yi tiva mintizro yaku ni leswaku u ni ndhuma ya leswaku wa hanya, kambe hi ntiyiso wa kone u file. 2 Pfuka, u tiyisa mintxhumu leyi nga kusuhi ni ku fa, hikusa ni xiya leswaku a wu si na yi heta* mintizro leyi Xikwembu Nkulukumba wanga a djulaka leswaku u yi yentxa. 3 Xileswo, tsrhama na u dzrimuka leswi u swi yamukeliki ni leswi u swi twiki, u ya mahlweni u swi hlayisa, u va u tisola. Nakunene loko u nga pfuki, ni ta ku tela swanga muyivi, nakone a wu nge ti swi tiva nikutsrongo leswaku ni ta ku tlhasela nkama muni.

4 “Nambitanu, halanu bandleni dzra Sarda ku ni vhanu va nga li vangani* lava va kalaka va nga ntxhimisanga timpahla tavu, va ta famba na mine na va yambale timpahla ta ku basa, hikusa swa va fanela. 5 Ina, lweyi a hlulaka a ta yambexiwa timpahla ta ku basa, nakone a ni nge ti txhuka ni tima vito dzrake a bukwini dzra wutomi, kambe a mahlweni ka Papayi ni le mahlweni ka tintsrumi take ni ta hlaya leswaku na dzri tiva vito dzrake. 6 Lweyi a nga ni tindleve a a yingeli leswi moya wu swi byelaka mabandla.’

7 “A ntsrumi leyi nga ka bandla dzra le Filadelfiya yi tsraleli leswi: Leyi i mintxhumu leyi hlayiwaka hi lweyi a xwengiki, lweyi a nga wa ntiyiso, lweyi a nga ni mpfungulu wa Davhida, lweyi a pfulaka leswaku ku nga vi na mhunu lweyi a pfalaka, nakone a pfalaka leswaku ku nga vi na mhunu lweyi a pfulaka: 8 ‘Na yi tiva mintizro yaku. Lavisa! Ni ku pfulele xipfalu, lexi ku nga liki na mhunu lweyi a nga xi pfalaka. Nakone na swi tiva leswaku u yingisete zritu dzranga u va u dumbeka ka vito dzranga nambileswi u nga ni ntamu wa wutsrongo. 9 Lava va nga va sinagoga dzra Sathana, lava hlayaka leswaku i Vayuda nakasi a hi vone vo hemba, ni ta yentxa leswaku va ta, va tlhasa va khinsama a minkondzrweni yaku ni tlhela ni va yentxa va swi tiva leswaku na ku zrandzra. 10 Leswi u yetiseliki ku tiyisela kwanga, na mine ni ta ku sizrelela hi nkama wa ku dzringiwa, lowu taka tela misava hinkwayu akuva wu dzringa vhanu hinkwavu lava tsrhamaka a misaveni. 11 Na ta hi ku kahlula. Tama u khoma swi tiya ka leswi u nga na swone, akuva ku nga vi na mhunu lweyi a ku tekelaka ngiyana* yaku.

12 “‘Lweyi a hlulaka ni ta mu yentxa a va nsika a tempeleni dzra Xikwembu Nkulukumba wanga, nakone a nge ti txhuka a huma ka dzrone. Handle ka leswo, ni ta mu tsrala vito dzra Xikwembu Nkulukumba wanga ni vito dzra doropa dzra Xikwembu Nkulukumba wanga, ku nga Yerusalema Lwemumpshwa lweyi a xikaka hi le tilweni ka Xikwembu Nkulukumba wanga, ni ta mu tsrala ni vito dzranga dzra nyiwana. 13 Lweyi a nga ni tindleve a a yingeli leswi moya wu swi byelaka mabandla.’

14 “A ntsrumi leyi nga ka bandla dzra le Lawudikiya yi tsraleli leswi: Leyi i mintxhumu leyi hlayiwaka hi Amen, ku nga mboni ya ku dumbeka ni ya ntiyiso tlhelo masungulo ya ntumbuluku wa Xikwembu Nkulukumba: 15 ‘Na yi tiva mintizro yaku, na swi tiva leswaku a wu titimeti futsrhi a wu hisi. A ni navela leswaku u titimeta kumbe u hisa. 16 Xileswo leswi u kufumelaka, u kalaka u nga hisi kumbe ku titimeta, ni ta ku hlanta u huma non’wini wanga. 17 Leswi u liki: “Ni xipfundzri, nakone ni tihlengetelele wupfundzri* futsrhi a na ha vileli ntxhumu”, nakasi a wu swi tivi leswaku u mbuyangwana, u twelisa wusiwana, u xisiwana, u fe matihlo nakone a wu yambalanga ntxhumu, 18 ni ku tsratsriya leswaku u tixavela woru kwanga ledzri basisiwiki hi ndzrilo, akuva u va xipfundzri, ni timpahla ta ku basa leswaku u yambala akuva vhanu va nga ku voni na u nga yambalanga u gama u daniseka, u xava ni muzri wa ku txhela ka matihlo akuva u ta kota ku vona.

19 “‘Hinkwavu lava ni va zrandzraka, na va kawuka ni tlhela ni va laya. Xileswo, tisoli a swidohweni swaku u va u tizrela Xikwembu Nkulukumba hi mbilu hinkwayu. 20 Lavisa! Ni yime xipfalwini ni gongondzra. Loko mhunu wa kukazri a yingela zritu dzranga a va a ni pfulela xipfalu, ni ta nghena ndlwini kwake hi lalela xikan’we. 21 Lweyi a hlulaka ni ta mu tsrhika a tsrhamisa na mine a xiluvelweni xanga, ku fana ni leswi na mine ni hluliki kutani ni tsrhamisa na Papayi a xiluvelweni xake. 22 Lweyi a nga ni tindleve a a yingeli leswi moya wu swi byelaka mabandla.’”