Eksoda

18 Yetro muprista wa le Midiyani, mukon’wana wa Moxe, a twa hinkwaswu leswi Xikwembu Nkulukumba a swi yentxeliki Moxe ni leswi a swi yentxeliki vhanu vake ku nga Vaisrayele, ndlela leyi Yehovha a humesiki Vaisrayele ha yone a tikweni dzra Egipta. 2 Xileswo Yetro, mukon’wana wa Moxe, a teka Zipora nkata Moxe, lweyi Moxe a mu tlheliseliki kaya kwake, 3 kun’we ni vanake va madjaha. A vito dzra n’wana mun’we a ku li Gerixomu,* hikusa Moxe a te: “Ni mupfi a tikweni ledzri,” 4 kasi lwemun’wana a mu txhule vito dzra ku Eliyezere,* hikusa Moxe a te: “Xikwembu Nkulukumba wa papayi wanga i mupfunisi wanga, lweyi a ni huluxiki ka ku dlayiwa ha Faro.”

5 Xileswo, Yetro mukon’wana wa Moxe, vana va Moxe ni nkatake, va ya ka Moxe a mananga lomu a a dzime kone ntxhatxha, a nhaveni ya Xikwembu Nkulukumba wa ntiyiso. 6 Kutani Yetro a zrumela zritu ka Moxe a ku: “Mine Yetro mukon’wana waku, na ta kun’we ni nkataku ni vanaku vabidzri.” 7 Moxe a tekela ku huma a ya kumana ni mukon’wana wake, kutani a khinsama a gama a mu losa hi ku mu n’qunta. Ntsrhaku ka loko va dzrungulisanile, va nghena tendeni.

8 Moxe a dzrungulela mukon’wana wake hinkwaswu leswi Yehovha a swi yentxiki Faro ni Vaegipta akuva a pfuna Vaisrayele, ni swikazratu hinkwaswu leswi va kumaniki na swone ndleleni, ku patsra ni ndlela leyi Yehovha a va huluxiki ha yone. 9 Yetro a nyonxa hi ku tiva mintxhumu hinkwayu leyinene leyi Yehovha a yi yentxeliki Vaisrayele hi ku va huluxa a tikweni dzra Egipta. 10 Kutani Yetro a ku: “A ku dzrumisiwi Yehovha, lweyi a mi huluxiki ka Faro a Egipta, nakone a huluxiki vhanu ka wulawuli bya Vaegipta. 11 Swoswi na swi tiva leswaku Yehovha a tlakukile ku tlula swikwembu swin’wana hinkwaswu, hi kola ka leswi a swi yentxiki ka lava va tikulisiki ka vhanu vake.” 12 Ntsrhaku ka leswo, Yetro mukon’wana wa Moxe a buyisa xihazri xa kukazri akuva xi nyikeliwa swanga gandzrelo dzra ku hisiwa, a buyise ni swihazri swin’wana akuva swi nyikeliwa ka Xikwembu Nkulukumba nakone Aroni ni vakulukumba hinkwavu va Israyele va yile akuva va ya da swakuda kun’we ni mukon’wana wa Moxe a mahlweni ka Xikwembu Nkulukumba wa ntiyiso.

13 Hi mundzruku ka kone, Moxe a tsrhamisa akuva a yavanyisa vhanu hi lani a a tolovela ku yentxa ha kone, a vhanu va tsrhamela ku mu yela ku sukela mixweni dzri za dzri ya pela. 14 Loko mukon’wana wa Moxe a vona hinkwaswu leswi Moxe a a swi yentxela vhanu, a ku: “I yini leswi u swi yentxelaka vhanu lava? Ha yini u tsrhama lani wuswaku na vhanu hinkwavu va yime mahlweni kwaku ku sukela mixweni dzri za dzri ya pela?” 15 Moxe a hlamula mukon’wana wake a ku: “Hi leswaku vhanu va tsrhamela ku ni tela va djula nkongomiso wa Xikwembu Nkulukumba. 16 Loko ku va ni mhaka, yi tisiwa kwanga ni va ni yi yavanyisa a xikazri ka vhanu vabidzri ni gama ni va byela xiboho xa Xikwembu Nkulukumba ni milawu yake.”

17 A mukon’wana wa Moxe a mu byela a ku: “Leswi u swi yentxaka a hi swinene. 18 Nakunene u ta kazrala, wene ni vhanu lava va nga na wene, hikusa ntizro lowu i wukulu swinene, i ntsrhwalu kwaku, a wu nge swi koti ku wu yentxa na u li wuswaku. 19 Swoswi ni yingiseti, ni ta ku nyika xilayu nakone Xikwembu Nkulukumba a ta va na wene, wene u muyimeli wa vhanu a mahlweni ka Xikwembu Nkulukumba wa ntiyiso kutani yisa timhaka ka Xikwembu Nkulukumba wa ntiyiso. 20 Va dondzrisi swiboho ni milawu, u va byela ni ndlela leyi va fanelaka ku hanya ha yone kun’we ni mintizro leyi va fanelaka ku yi yentxa. 21 Kambe u fanela ku hlawula vavanuna lava nga ni wuswikoti lava txhavaka Xikwembu Nkulukumba, lava dumbekaka, ni lava va nyenyaka ku bindzrula hi ku kanganyisa; kutani u va beka leswaku va va vazrangeli va 1.000 wa vhanu, 100 wa vhanu, 50 wa vhanu ni va 10 wa vhanu. 22 Va fanela ku yavanyisa vhanu loko ku humelela timhaka,* a timhaka hinkwatu ta ku kazrata va ta ti buyisa kwaku, kambe ka timhaka hinkwatu letitsrongo va ta teka xiboho. Tinabyaliseli hi ku yavelana ntsrhwalu lowo na vone. 23 Loko u yentxa leswi, nakone a li swone leswi Xikwembu Nkulukumba a ku zrumiki swone, u ta swi kota ku zrwala ntsrhwalu lowu, futsrhi hinkwavu va ta muka na va yanelisekile”.

24 Moxe a tekela ku yingiseta mukon’wana wake, a va a yentxa hinkwaswu leswi a mu byeliki swone. 25 Moxe a hlawula vavanuna lava nga ni wuswikoti a Israyele hinkwaku a va beka va va vazrangeli va 1.000 wa vhanu, 100 wa vhanu, 50 wa vhanu ni va 10 wa vhanu. 26 Xileswo, va yavanyisa vhanu loko ku humelela timhaka. A mhaka ya ku kazrata a va ta yi yisa ka Moxe, kambe a timhaka hinkwatu ta titsrongo a va ta ti yavanyisa. 27 Ntsrhaku ka leswo, Yetro a lelela Moxe a va a tifambela, a tlhelela tikweni dzrake.