Papela dzra ku sungula ledzri yaka ka Vatesalonika

2 Vamakwezru, n’wine mi swi tiva ha hombe leswaku a hi mi yendzrelanga swa mahala. 2 Hikusa nambileswi hi xanisekiki ni ku khomiwa hi ndlela ya ku biha a Filipiya hi lani mi swi tivaka ha kone, Xikwembu Nkulukumba a hi pfune kuva hi mi byela madzrungula lamanene na hi nga txhavi,* na hi kanetiwa ngopfu swinene.* 3 Hikusa leswi hi mi tsratsriyiki swone a swi sukeli ka mintxhumu leyi yi nga liki ya ntiyiso nakone a hi mi tsratsriyi hi nkongometo wa ku biha kumbe kuva hi mi kanganyisa, 4 kambe leswi hi hlawuliwiki hi Xikwembu Nkulukumba leswaku hi zrezra madzrungula lamanene, hi vulavula akuva hi nyonxisa Xikwembu Nkulukumba lweyi a kambelaka timbilu, ku nga li ku nyonxisa vhanu.

5 Ma swi tiva leswaku a hi ngi ngi mi kanganyisa hi ku mi byela mazritu ya ku nandzrika nambi ku tiyentxa vhanu vanene akuva mi ta hi nyika swa kukazri, Xikwembu Nkulukumba a yi tiva ha hombe mhaka leyi! 6 Nakone a hi zanga hi djuletela ku dzrumisiwa hi vhanu, nambi ku li hi n’wine kumbe hi van’wana, nambileswi a hi ta mi zrwexa ntsrhwalu wa kuva mi hi hlayisa swanga hi leswi hi nga vapostola va Kriste. 7 A matsrhan’wini ya leswo, hi ve vhanu vanene kwenu, ku fana ni mamana lweyi a nyan’wisaka xibebetana xake a tlhela a xi hlayisa* hi lizrandzru. 8 Kutani leswi hi mi zrandzraka ngopfu swinene, a hi nga tiyimiselanga* ku mi zrezrela madzrungula lamanene ya Xikwembu Nkulukumba ntsena, kambe ni ku nyikela wutomi byezru akuva hi mi pfuna.

9 Nakunene vamakwezru, ma swi dzrimuka leswaku hi tizre ngopfu swinene. A hi tizra wusiku ni nhlikanhi, akuva hi nga bindzriseli ni mun’we wenu, loko hi mi zrezrela madzrungula lamanene ya Xikwembu Nkulukumba. 10 N’wine mi timboni, na yene Xikwembu Nkulukumba i mboni ya leswaku a nkama lowu a hi li na n’wine, n’wine vapfumeli, hi ve lava dumbekaka hi yentxa mintxhumu ya ku lulama nakone a hi vanga ni lexi solekaka. 11 Mi swi tiva ha hombe leswaku a hi tsrhamela ku mi tsratsriya ni ku mi txhavelela hi tlhela hi dondzrisa mun’wana ni mun’wana wenu, hi lani papayi muni a yentxaka ha kone ka vanake, 12 akuva mi ya mahlweni mi hanya hi ndlela leyi yamukelekaka mahlweni ka Xikwembu Nkulukumba, lweyi a mi vitanaka a Mfun’wini wake ni leswaku mi ta hlengela a ku phatimeni kwake.

13 Nakunene hi leswo swi yentxaka leswaku na hine hi nga tsrhiki ku tlangela Xikwembu Nkulukumba, hikusa loko mi yamukele zritu dzra Xikwembu Nkulukumba ledzri mi dzri yingeliki kwezru, a mi dzri yamukelanga ingiki hi loko dzro va zritu dzra vhanu, kambe mi dzri yamukele swanga zritu dzra Xikwembu Nkulukumba, ku nga leswi nakunene dzri nga swone, ledzri dzri tizraka ni kwenu n’wine vapfumeli. 14 Hikusa n’wine vamakwezru mi yetisele mabandla ya wukriste lawa ma nga Yudeya, lawa ma lumbaka Xikwembu Nkulukumba, hikusa na n’wine mi xanisiwile hi vhanu va tiko dzrenu hi ndlela leyi vamakwezru va le Yudeya na vone va xanisiwaka ha yone hi Vayuda, 15 lava patsriki ni ku dlaya Hosi Yesu ni vaprofeta va tlhela va xanisa na hine. Handle ka leswo, a vo nyonxisa Xikwembu Nkulukumba, kambe vo lwisana ni leswi a swi ta pfuna vhanu hinkwavu, 16 hi ku zama ku hi sivela nkama lowu hi zrezrelaka vhanu va matiko leswaku va kota ku huluxiwa. Hi ndlela leyi vo yengesela swidoho swavu. Kambe hi wugamu a mahlundzru yake ma va welile.

17 Kambe loko hi tsravukanisiwe na n’wine vamakwezru ku dzringana nkamanyana (a hi nga mi voni, kambe a timbilwini tezru a hi tsrhamela ku mi dzrimuka) hi yentxe minzamu hinkwayu akuva hi mi tela hikusa a hi swi djula ngopfu swinene ku mi vona.* 18 Xileswo hi swi djulile ku mi tela, ina, swi ze swi ku kabidzri na mine Pawulo ni zama ku mi tela; kambe Sathana a hi pfalele ndlela. 19 Hi nkama wa kuva Hosi Yesu a tlhela a ta, i mani a taka va dumbo dzrezru, ku nyonxa kwezru ni ngiyana yezru, leswi hi taka tikhuza ha swone a mahlweni kwake? A hi n’wine ke? 20 Nakunene hi n’wine mi nga ku tikhuza kwezru ni ku nyonxa kwezru.