Papela ledzri yaka ka Varoma
3 Kutani a Vayuda va va tlula hi yini vambeni, kumbe hi dzrini lisima dzra ku soka? 2 Va va tlula hi tindlela hinkwatu. Ya ku sungula ka hinkwatu hi leswaku va nyikiwe zritu dzra Xikwembu Nkulukumba ledzri xwengiki. 3 Kambe swi li yini hi lava kalaka va nga dumbekanga? Xana ku va va pfumala lipfumelo swi hlaya leswaku Xikwembu Nkulukumba o kala a nga dumbekanga? 4 Nakunene a swi hlayi swone! Kambe nambiloko vhanu hinkwavu va ngo hemba, Xikwembu Nkulukumba minkama hinkwayu a hlaya ntiyiso hi lani Matsralwa ma hlayaka ha kone ma ku: “Akuva u ta voniwa u li lweyi a lulamiki hi mazritu yaku u tlhela u hlula loko u yavanyisiwa.” 5 A ku pfumala ku lulama kwezru ku swi khanyisa ha hombe leswaku Xikwembu Nkulukumba a lulamile. Kutani ke, leswo swi djula ku hlaya leswaku Xikwembu Nkulukumba a nga lulamanga loko a hi khatisa? (Ni swi hlaya hi ku ya hi leswi vhanu van’wana va yanakanyisaka xiswone.) 6 Im-him! A swi hlayi swone nikutsrongo, loko Xikwembu Nkulukumba a nga lulamanga a ta yi yavanyisisa kuyini misava?
7 Kambe loko madzrimi yanga ma yentxa leswaku ntiyiso wa Xikwembu Nkulukumba wu ya wu tiviwa a tlhela a ya a dzrumisiwa, ha yini mi ni yavanyisa ingiki hi loko no va mudohi? 8 Nakone ha yini hi nga hlayi leswi vambeni va hi lumbetaka leswaku ha swi hlaya, swaku: “A hi yentxeni swa ku biha akuva ku ta humelela leswinene?” A yavanyiso ledzri taka wela vhanu volavo dzra va fanela.
9 Xana hine Vayuda ho yampswa ku tlula vambeni? Nikutsrongo, hikusa hi lani hi hlayiki ha kone a Vayuda kun’we ni Vagriki, hinkwavu i vadohi; 10 hi lani Matsralwa ma hlayaka ha kone ma ku: “A ku na mhunu ni mun’we lweyi a lulamiki; 11 a ku na mhunu lweyi a nga ni ku twisisa; a ku na mhunu lweyi a djuletelaka Xikwembu Nkulukumba. 12 Vhanu hinkwavu va hambukile, hinkwavu va ve lava nga pfuniki ntxhumu, a nga kone ni mun’we lweyi a kombisaka wunene.” 13 “A nkolo wavu wu fana ni sizra ledzri pfulekiki; va tizrisa lidzrimi dzravu akuva va kanganyisa.” “A minomu yavu yi ni wuhlungu* bya tinyoka.” 14 “A nomu wavu wu tale hi nhlambha ni mazritu ya ku tlhava.” 15 “A minkondzro yavu yi tsrutsrumela ku dlaya.”* 16 “Minkama hinkwayu va vangela van’wana swikazratu leswikulu va yentxa leswaku va xaniseka, 17 nakone a va yi tivi ndlela ya ku va ni ku zrula ni vhanu vambeni.” 18 “A va mu txhavi Xikwembu Nkulukumba.”
19 Swoswi ha swi tiva leswaku hinkwaswu leswi Nawu wu swi hlayaka swi kongomisiwa ka lava nga hansi ka Nawu, akuva va pfumala xa ku tiyimelela ha xone ni kuva swi voneka leswaku misava hinkwayu yi ni nandzru mahlweni ka Xikwembu Nkulukumba yi faneliwa hi ku khatisiwa. 20 Xileswo a nga kone lweyi hi ku yentxa leswi Nawu wu swi hlayaka a nga voniwaka a li lweyi a lulamiki mahlweni ka Xikwembu Nkulukumba, hikusa Nawu wu hi yentxa hi swi tiva ha hombe leswaku hi vadohi.
21 Kambe swoswi ku paluxiwe leswaku mhunu a nga va lweyi a lulamiki a mahlweni ka Xikwembu Nkulukumba na a nga landzreleli Nawu, ku nga leswi Nawu ni mabuku ya Vaprofeta ma nyikelaka wumboni bya swone, 22 ina, mhunu a nga va lweyi a lulamiki mahlweni ka Xikwembu Nkulukumba hi ku va ni lipfumelo ka Yesu Kriste, nakone leswo swa koteka ka hinkwavu lava nga ni lipfumelo. Hikusa a vona vhanu hinkwavu hi ndlela leyi fanaka. 23 Hikusa hinkwavu va dohile nakone va hluleka ku kombisa matsrhamela ya ku hlamalisa ya Xikwembu Nkulukumba, 24 Xikwembu Nkulukumba a va vona va li lava lulamiki hi kola ka xitizrulo lexi Kriste Yesu a xi hakeliki akuva a va huluxa, lexo i xihanano lexi Xikwembu Nkulukumba a xi nyikeliki hi kola ka timpswalu take letikulu. 25 Xikwembu Nkulukumba a hi nyike ndlela ya kuva hi kota ku pfuxeta wuxaka* na yene, hi ku va hi kombisa lipfumelo ka ngati ya Yesu. A yentxe leswo akuva a kombisa wululami byake, hikusa hi ku lehisa mbilu a o dzrivalela swidoho leswi yentxiwiki khale. 26 Kambe swoswi a tlhela a kombisa wululami byake kwezru hi ku hlaya leswaku lweyi a kombisaka lipfumelo ka Yesu a lulamile.
27 Kutani ke, xana xi kone xivangelo xa kuva hi tibyela? Im-him, xi helisiwile. Xi helisiwe hi nawu lowu wa mintizro? Im-him, xi helisiwe hi nawu wa lipfumelo. 28 Hikusa ha swi tiva leswaku mhunu a voniwa a li lweyi a lulamiki hi mhaka ya lipfumelo ku nga li hi ku va a tikazratela ku yentxa leswi nawu wu hlayaka swone. 29 Xana Xikwembu Nkulukumba o va Xikwembu Nkulukumba wa Vayuda ntsena? Xana vamatiko na vone a hi Xikwembu Nkulukumba wavu? Ina, na vone i Xikwembu Nkulukumba wavu. 30 Leswi Xikwembu Nkulukumba a nga yelweyi wa mun’we, a ta vona vhanu lava sokiki va li lava lulamiki hi kola ka lipfumelo dzravu, ni lava kalaka va nga sokanga a ta va vona va li lava lulamiki hi kola ka lipfumelo dzravu. 31 Kutani swi hlaya leswaku hi fanela ku dlaya nawu hi mhaka ya lipfumelo dzrezru? Nikutsrongo, ku hambana ni leswo, ha wu seketela.