Habakuki
1 Dzrungula ledzri muprofeta Habakuki* a dzri yamukeliki a xivonisweni:
2 We Yehovha, xana ni ta kombela mpfunu ku ya tlhasa kwini kambe u nga ni yingeli?
Xana ni ta kombela kuva u ni huluxa ka madzolonga ku ya tlhasa kwini kambe u nga yentxi ntxhumu?*
3 Ha yini u ni yentxa ni vona wubihi?
Ha yini u pfumelela leswaku vhanu va xanisa vhanu van’wana?
Ha yini ni vona ku honetela ni madzolonga?
Ha yini ku tale timholova ni ku lwa?
4 Hi leswo swi yentxaka leswaku nawu wu nga tizri,
Nakone a wululami a byi landzriwi nikutsrongo.
Hikusa lava ku biha va xanisa lava lulamiki;
Hi leswo swi yentxaka a wululami byi honisiwa.
5 “Lavisani matiko, mi xiyisisa leswi taka yentxeka!
Pondzrolelani mi hlamala;
Hikusa ku ni leswi swi taka yentxeka a masikwini yenu
Swa ku a mi nge ti swi kholwa, nambiloko va ngo mi byela.
6 Hikusa ni tisa Vakaldeya,
Tiko ledzri nga ni nsele ni ximbilwambilwana.
Va hlasela mimbangu ya yikulu ya misava
Akuva va teka tiyindlu leti nga liki tavu.
7 Va yentxa leswaku vhanu va zruzrumela ni ku txhava.
Va tibekela milawu nakone a va byi hlayeli ntxhumu wululami bya van’wana.*
8 A makavhalu yavu ma tsrutsruma ngopfu ku tlula tiyingwe,
Ma leva ngopfu ku tlula timbyana ta nhova* a wusikwini.
A makavhalu yavu ya yimpi ma tsrutsruma ngopfu swinene;
A makavhalu yavu ma pfa he kule.
Va hlasela ku fana ni gama ledzri tsrutsrumelaka ku ya ku deni ka xihazri lexi khomiwiki.
9 Hinkwavu va buya na va lulameli ku hamba madzolonga.
Loko va ya mahlweni na va li xikan’we, va fana ni moya wa le wuxeni,
Nakone va hlengeleta swib’otxhwa ku fana ni misava.
10 Va poyila tihosi
Va va va hleka vazrangeli lava tlakukiki
Va hleka mimbangu hinkwayu leyi tiyisiwiki
Va hamba swidulu swa misava va khwela henhla ka swone va teka madoropa.
11 Kutani va famba ku fana ni moya, va khaluta hi le tikweni ledzri
Kambe va ta va ni nandzru,
Hikusa va hlaya leswaku ntamu wavu va wu kuma ka xikwembu xavu.”*
12 We Yehovha, xana wene a wu kone ku sukela khale ka khaleni?
Wene u Xikwembu Nkulukumba wanga Lweyi a Xwengiki nakone a wu fi.*
We Yehovha, u va hlawulile akuva va yavanyisa;
Zribye dzranga, u va simekile akuva va ta khatisa.*
13 A matihlo yaku ma base ngopfu swinene lakakuva a wu nge langusi leswa ku biha,
A wu nge swi pfumeleli leswa ku biha.
Kutani ha yini u pfumelela vakanganyisi,
U va u tama u miyela loko lava ku biha va helisa lava lulamiki ku va tlula?
14 Ha yini u yentxa leswaku mhunu a fana ni tihlampfi ta le lwandle,
A fana ni swihazri leswi fambanga hi khuzri* leswi nga liki na muzrangeli?
15 A phasa* hinkwavu hi ndzrovo.
A va phasa hi nkukutu wake,
A va hlengeleta hi nkukutu wa ku phasa tihlampfi.
Hi leswo swi mu yentxaka a nyonxa ngopfu swinene.
16 Hi leswo swi yentxaka a nyikela magandzrelo ka nkukutu wake
A tlhela a hambela magandzrelo nkukutu wake wa ku phasa tihlampfi;
Hikusa a da ku nona* hi kola ka minkukutu leyo,
Nakone swakuda swake i swa xiyimu xa le henhla.
17 Xana a ta tama a txhulula nkukutu wake?*
Xana a ta tama a dlayetela matiko na a nga kombisi ntwelawusiwana?