Daniyele

10 Hi lembe dzra wuzrazru dzra ku fuma ka Khorexe, hosi ya Persiya, Daniyele, lweyi a a txhuliwe vito dzra ku Beltexatsara, a yamukele mpfuletelo. A dzrungula dzra kone a dzri li dzra ntiyiso, a dzri khanela hi yimpi leyikulu. Daniyele a dzri twisise ha hombe dzrungula dzroledzro nakone a nyikiwe ku twisisa leswi a swi voniki.

2 A masikwini wolawo, mine Daniyele, ni ve ka xidzrilo ku dzringana mavhiki mazrazru ya ku tala. 3 A ni danga swakuda leswi nandzrikaka, nambi ku li nyama ni vhinyu a ni swi nghenisanga non’wini wanga nakone a ni tolanga mafuzra mizrini wanga ku dzringana mavhiki mazrazru ya ku tala. 4 Hi siku dzra wu 24 dzra hweti ya ku sungula, na ni le nkingeni wa nambu lowukulu, ku nga nambu wa Tigri,* 5 ni tlakuxe matihlo ni vona wanuna na a yambale mpahla leyi hambiwiki hi panu ya linyu, nakone na a tsrimbe bandhi ledzri hambiwiki hi woru dzra le Ufazi a masengeni. 6 A mizri wake a wu fana ni zribye dzra krizolite, a wuso byake a byi fana ni lihati, a matihlo yake a ma fana ni ndzrilo, a mavoko ni milenge yake a swi fana ni kobri ledzri politxhiwiki, nakone loko a vulavula a mpfumawulu wa zritu dzrake a swi yentxa ingiki ko vulavula xitsrhungu. 7 Ke va mine Daniyele ntsena ni voniki wanuna lweyo ka xivoniso; lava a va li na mine a va mu vonanga. Nambitanu va txhave ngopfu va va va tsrutsruma va ya tumbela.

8 Hiloko ni sala wuswanga, nakone loko ni ve ni xivoniso lexo lexikulu ni hele ntamu, a wuso byanga byi txintxile byi nkwalala ngopfu swinene, ni heleliwe hi ntamu wanga hinkwawu. 9 Kutani ni twa mpfumawulu wa mazritu yake; kambe loko ni mu yingela na a vulavula, ni wile ni biwa hi wuzrongo lebyikulu, na wuso byanga byi khumbe hansi. 10 Hi ku landzrela a ni khumba hi voko dzrake a ni hlakahla a ni yentxa ni khinsama hi matsrolo na ni tiye hi mavoko yanga. 11 A ni byela a ku:

“We Daniyele, wanuna wa lisima ngopfu swinene,* zreyela ndleve ka mazritu lawa ni taka ku byela wone. Sekeleka hikusa ni zrumiwe kwaku.”

Loko a ni byele leswo, ni sekelekile na ni zruzrumela.

12 Hiloko a ni byela a ku: “U nga txhavi Daniyele. A mazritu yaku ma twiwile ku sukela ka siku ledzri u nga tinyiketela ka ku djula ku twisisa u tlhela u titsrongahata a mahlweni ka Xikwembu Nkulukumba waku, kutani ni te hi kola ka mazritu yaku. 13 Kambe a muzrangeli wa mfumu wa Persiya a lwisane na mine ku dzringana 21 wa masiku. Hiloko Mikayele,* mun’we wa vazrangeli va lisima ngopfu swinene,* a buya a ni pfuna; kutani mine ni tame ni va kolahayani ni tihosi ta le Persiya. 14 Ni tele ku ta ku tlhamuxela leswi taka yentxekela vhanu va tiko dzraku a masikwini ya wugamu, hikusa i xivoniso xa leswi swi taka yentxeka a nkameni lowu taka.”

15 Loko a ni byele mazritu lawo, ni lavise hansi ni pfumala ni xa ku xi hlaya. 16 Hiloko lweyi a a fana ni mhunu a ni khumba nomu, xileswo ni pfule nomu ni byela lweyi a a yime mahlweni kwanga ni ku: “Hosi yanga, no zruzrumela hi kola ka xivoniso nakone a na ha na ntamu. 17 Xileswo mine nandzra waku ni nga vulavulisa kuyini na wene hosi yanga? Hikusa a na ha na ntamu nakone a ni swi koti ku hefemula ha hombe.”

18 Lweyi a a fana ni mhunu a tlhela a ni khumba a va a ni tiyisa. 19 Hiloko a ni byela a ku: “U nga txhavi, wanuna wa lisima ngopfu swinene. Vana ni ku zrula. Tiya, ina, tiya!” Loko a vulavulile na mine ni titwe na ni tiyile ni va ni mu byela ni ku: “Hosi yanga vulavula, hikusa u ni tiyisile.”

20 Hiloko a ni byela a ku: “Wa swi tiva leswaku ha yini ni tile ni ta ta kumana na wene? Swoswi ni ta tlhela akuva ni ya lwa ni muzrangeli wa Persiya. Loko ni fambile ku ta buya muzrangeli wa Grikiya. 21 Nambitanu, ni ta ku byela mintxhumu leyi tsraliwiki a bukwini dzra ntiyiso. Ka mintxhumu leyo hinkwayu a nga kone lweyi a nga ni pfunaka loko ku nga li Mikayele, muzrangeli wenu.