Yoxuwa

22 Kutani Yoxuwa a vitana lixaka dzra Rubeni, dzra Gadi ni hamfu ya lixaka dzra Manasi, 2 a va byela a ku: “Mi yentxe hinkwaswu leswi Moxe nandzra wa Yehovha a mi leletiki swone, nakone mi yingisete zritu dzranga ka hinkwaswu leswi ni mi leletiki swone. 3 Ka nkama lowu hinkwawu a mi va tsrhikanga vamakwenu ku ta ta tlhasa namunhla nakone mi landzre nawu wa Yehovha Xikwembu Nkulukumba wenu. 4 Swoswi Yehovha Xikwembu Nkulukumba wenu a nyike vamakwenu ku wisa, hi lani a va dumbisiki ha kone. Xileswo, mi nga tlhelela a matendeni yenu, a tikweni ledzri Moxe nandzra wa Yehovha a mi nyikiki dzrone akuva dzri va dzrenu, ka tlhelo ledzrin’wana* dzra Yordani. 5 Kambe yingisetisisani ha hombe swileleto ni nawu lowu Moxe, nandzra wa Yehovha, a mi nyikiki wone, hi ku zrandzra Yehovha Xikwembu Nkulukumba wenu, mi famba tindleleni take hinkwatu, mi bekisa swileleto swake, mi mu namazrela ni ku mu tizrela hi timbilu tenu hinkwatu ni hi wutomi* byenu hinkwabyu.”

6 Hiloko Yoxuwa a va tovokisa a gama a va tsrhika va famba, kutani va tlhelela a matendeni yavu. 7 A hamfu ya lixaka dzra Manasi, Moxe a a yi nyike pfindla a Baxani, kasi a hamfu leyin’wana Yoxuwa a yi nyike tiko a mpeladambu wa Yordani, kun’we ni vamakwavu. Nakone loko Yoxuwa a va tsrhike va tlhelela matendeni yavu, a va tovokisile, 8 a va byela a ku: “Tlhelelani a matendeni yenu na mi ni wupfundzri bya byinyingi ni mintlhambi ya yinyingi ngopfu swinene ni prata, woru, kobri, nsimbi ni mpahla ya yinyingi ngopfu swinene. Yavelanani ni vamakwenu leswi mi swi phangiki ka valala venu.”

9 Ntsrhaku ka leswo, a Varubeni, a Vagadi ni hamfu ya lixaka dzra Manasi va siye Vaisrayele lavan’wana a Xilo, a tikweni dzra Kanana, va tlhelela a tikweni dzra Giliyadi, ku nga tiko ledzri va nyikiwiki dzrone akuva va dzri teka va tsrhama ka dzrone, hi ku landzra xileleto xa Yehovha lexi a xi nyikeliki hi ku tizrisa Moxe. 10 Loko va tlhase a mugangeni wa Yordani a tikweni dzra Kanana, a Varubeni, a Vagadi ni hamfu ya lixaka dzra Manasi, va yake a altari a tlhelweni ka Yordani, altari dzra dzrikulu dzri tlhela dzri hlamalisa. 11 A Vaisrayele lavan’wana va game va twa leswi: “Lavisani! A Varubeni, a Vagadi ni hamfu ya lixaka dzra Manasi va yake a altari a ndzrelekanwini wa tiko dzra Kanana, a mugangeni wa Yordani, ka tlhelo ledzri lumbaka Vaisrayele.” 12 Loko Vaisrayele va twe leswo, nhlengeletanu hinkwayu ya Israyele yi hlengeletane a Xilo akuva yi ya lwa yimpi na vone.

13 Kutani a Vaisrayele va zrumela Feniyasi n’wana wa muprista Eliyazari ka Varubeni, ka Vagadi ni ka hamfu ya lixaka dzra Manasi a tikweni dzra Giliyadi, 14 va mu zrumele na a ni 10 wa vazrangeli, muzrangeli ha mun’we a a li wa ndangu ha wun’we wa tinxaka hinkwatu ta Israyele, na ha mun’we kwavu a li nhloko ya ndangu a xikazri ka magidigidi ya Israyele. 15 Loko va tlhase ka Varubeni, ka Vagadi ni ka hamfu ya lixaka dzra Manasi, a tikweni dzra Giliyadi, va va byele va ku:

16 “Nhlengeletanu hinkwayu ya Yehovha yi li: ‘Ha yini mi nga dumbekanga ka Xikwembu Nkulukumba wa Israyele hi ku yentxa leswi? Mi tsrhike ku landzra Yehovha hi ku tiyakela a altari, mi va mi pfukela Yehovha. 17 A xihoxo lexi hi xi yentxiki a Peyori a xi hi dzringananga? Ku ta tlhasa namunhla a hi si na tibasisa ka xone, nambileswi nhlengeletanu hinkwayu ya Yehovha yi weliwiki hi ntungu. 18 Kutani mi djula ku tsrhika ku landzra Yehovha? Loko mi pfukela Yehovha a ta gama a hlundzrukela nhlengeletanu hinkwayu ya Israyele. 19 Swoswi, loko a li leswaku a tiko ledzri mi dzri yamukeliki akuva dzri va dzrenu a dzri basanga, tlulelani mi ya ka tlhelo ledzrin’wana, ka tiko ledzri lumbaka Yehovha, lani ku nga ni tabernakela dzra Yehovha, mi ya tsrhama makazri kwezru, kambe mi nga pfukeli Yehovha nakone mi nga hi yentxi vapfukeli hi ku tiyakela altari, handle ka altari dzra Yehovha Xikwembu Nkulukumba wezru. 20 Loko Akani n’wana Zara a nga dumbekanga mayelanu ni mintxhumu leyi a yi fanela ku helisiwa,* nhlengeletanu hinkwayu ya Israyele a yi hlundzrukeliwanga? Nakone a hi yene wuswake lweyi a fiki hi kola ka xihoxo xake.’”

21 Kutani Varubeni, Vagadi ni hamfu ya lixaka dzra Manasi va hlamula tinhloko ta mindangu ta magidigidi ya Israyele va ku: 22 “Yehovha, Xikwembu Nkulukumba wa swikwembu! Yehovha, Xikwembu Nkulukumba wa swikwembu! Awa swi tiva, Israyele na yene a ta swi tiva. Loko hi ve vapfukeli nakone hi nga dumbekanga ka Yehovha, a nga hi tsretsreleli hi siku ledzri. 23 Loko hi tiyakele altari akuva hi tsrhika ku landzra Yehovha ni kuva hi hamba ka dzrone magandzrelo ya ku hisiwa, magandzrelo ya tinhleke ni magandzrelo ya ku kombela ku zrula, Yehovha a ta hi khatisa hi kola ka leswo. 24 Ku hambana ni leswo, hi dzri hambe hi ku txhava leswaku a nkameni lowu taka a vanenu va nga byela vanezru va ku: ‘I wuxaka muni lebyi mi nga na byone na Yehovha Xikwembu Nkulukumba wa Israyele? 25 Yehovha a beke Yordani swanga ndzrelekanu a xikazri kwezru na n’wine, n’wine Varubeni ni Vagadi. A mi na xiyenge a wugandzrelwini bya Yehovha.’ Kutani vanenu va ta sivela vanezru ku gandzrela* Yehovha.”

26 “Xileswo hi te: ‘A hi yakeni altari, ku nga li dzra kuva hi ta nyikela ka dzrone magandzrelo ya ku hisiwa, nambi ku li magandzrelo man’wana, 27 kambe akuva dzri va wumboni a xikazri kwezru na n’wine, ni le xikazri ka vatukulu vezru ni vatukulu venu, bya leswaku hi ta tizrela Yehovha a mahlweni kwake hi magandzrelo yezru ya ku hisiwa, magandzrelo yezru ya ku kombela ku zrula ni magandzrelo man’wana, akuva a nkameni lowu taka a vanenu va nga byeli vanezru va ku: “N’wine a mi na xiyenge a wugandzrelwini bya Yehovha.”’ 28 Hi kola ka leswo hi te: ‘Loko a nkameni lowu taka va txhuka va hi byela leswo, hine ni vatukulu vezru, hi ta ku: “Vonani altari ledzri fanaka ni dzra Yehovha ledzri hambiwiki hi vakokwana vezru, na ku nga li akuva ku hambeliwa ka dzrone magandzrelo ya ku hisiwa nambi ku li magandzrelo man’wana, kambe akuva dzri va wumboni a xikazri kwezru na n’wine.”’ 29 A hi nge ti txhuka hi pfukela Yehovha, nambi kuva swoswi hi tsrhika ku landzrela Yehovha hi ku yaka altari akuva hi hamba magandzrelo ya ku hisiwa, magandzrelo ya tindzroho ni magandzrelo man’wana, handle ka altari dzra Yehovha Xikwembu Nkulukumba wezru, ledzri nga mahlweni ka tabernakela dzrake!”

30 Loko muprista Feniyasi, vakulukumba va nhlengeletanu ni tinhloko ta mindangu ta magidigidi ya Israyele lava a va li na yene va twe mazritu lama hlayiwiki hi vatukulu va Rubeni, va Gadi ni va Manasi, va nyonxa. 31 Xileswo Feniyasi n’wana wa muprista Eliyazari, a byela vatukulu va Rubeni, va Gadi ni va Manasi a ku: “Namunhla ha swi tiva leswaku Yehovha a le xikazri kwezru, hikusa n’wine a mi mu pfukelanga Yehovha. Mi huluxe Vaisrayele a mavokweni ya Yehovha.”

32 Kutani a vakulukumba na Feniyasi n’wana wa muprista Eliyazari va tsrhika Varubeni ni Vagadi a tikweni dzra Giliyadi, va tlhelela a tikweni dzra Kanana va ya dzrungulela Vaisrayele lavan’wana mhaka leyi. 33 A Vaisrayele va nyonxa hi madzrungula lawo. Kutani Vaisrayele va dzrumisa Xikwembu Nkulukumba, nakone a va ha tlhelanga va vulavula hi ku ya lwa yimpi ni Varubeni ni Vagadi akuva va helisa tiko ledzri a va tsrhama ka dzrone.

34 Hiloko Varubeni ni Vagadi va txhula altari vito,* hikusa va te: “A altari ledzri i wumboni makazri kwezru, bya leswaku Yehovha i Xikwembu Nkulukumba wa ntiyiso.”