Papela dzra ku sungula ledzri yaka ka Vakorinte

8 Kutani mayelanu ni swakuda leswi phahleliwiki swithombe: Hinkwezru hi ni wutivi bya kukazri mayelanu ni mhaka leyi. A wutivi byi yentxa mhunu a tikukumuxa, kambe a lizrandzru dzra yaka. 2 Loko mhunu a yanakanya leswaku a tiva xan’wantxhumu, a nga si na xi tiva hi lani a fanelaka ku xi tiva ha kone. 3 Kambe loko mhunu a zrandzra Xikwembu Nkulukumba, Xikwembu Nkulukumba awa mu tiva mhunu yelweyo.

4 Mayelanu ni ku da swakuda leswi phahleliwiki swithombe, ha swi tiva leswaku a xithombe a hi xa ntxhumu ni leswaku ko va ni Xikwembu Nkulukumba mun’we ntsena. 5 Hikusa nambileswi ku nga ni lava vitaniwaka swikwembu, a tilweni kumbe a misaveni, ku fana ni leswi ku nga ni “swikwembu” swa swinyingi ni “tihosi” ta tinyingi, 6 kwezru ko va ni Xikwembu Nkulukumba mun’we ntsena, ku nga Papayi, lweyi mintxhumu hinkwayu yi pfaka kwake nakone hi lumbaka yene; futsrhi ko va ni Hosi yin’we, ku nga Yesu Kriste, lweyi a mintxhumu hinkwayu yi nga kone hi kola kwake nakone hi nga ni wutomi hi kola kwake.

7 Nambitanu, a hi hinkwavu va nga ni wutivi lebyi. Van’we leswi a va gandzrela swithombe, loko va da swakuda leswi phahleliwiki swithombe, va pimisa leswaku va le ku gandzreleni ka xithombe, kutani a lipfalu dzravu dzra va kingindzra hikusa a dzri tiyanga. 8 Kambe a swakuda a swi nge ti hi tsrhindzretela ka Xikwembu Nkulukumba; loko hi nga di a hi luzi ntxhumu, ni loko hi da a hi ganyi ntxhumu. 9 Kambe tivonelani leswaku a ntsrhunxeko wenu wa ku tihlawulela wu nga vi zribye ledzri wisanaka ka lava kalaka va nga tiyanga. 10 Hikusa loko wene u nga ni wutivi u voniwa na u da a tempeleni dzra swithombe, xana a lipfalu dzra mhunu lweyi a kalaka a nga tiyanga a dzri nge ti mu yentxa a za a tiya ku da swakuda leswi phahleliwiki swithombe? 11 Xileswo, hi wutivi byaku u hohlota lipfumelo dzra makwenu, lweyi Kriste a mu feliki. 12 Loko mi dohela vamakwenu hi ndlela leyi, kutani mi vavisa lipfalu dzravu ledzri kalaka dzri nga tiyanga, mi dohela Kriste. 13 Hi kola ka leswo, loko swakuda swi tsranisa* lipfumelo dzra makwezru, a ni nge he txhuki ni da nyama, akuva ni nga tsranisi lipfumelo dzra makwezru.