LEVHITIKA

1 Kutani Yehovha a vitana Moxe a vulavula na yene a tendeni dzra ntlhanganu a ku: 2 “Byela Vaisrayele* u ku: ‘Loko mun’we wenu swi djula kuva a nyikela gandzrelo ka Yehovha hi swifuyu swake, a fanela ku nyikela hi tihomu, tihamba kumbe hi timbuti.

3 “Loko mhunu a nyikela hi homu swanga gandzrelo dzra ku hisiwa, yi fanela ku va homu ya xinuna leyi hanyiki ha hombe. A fanela ku yi nyikela hi ku tizrandzrela a mahlweni ka Yehovha a nyangweni wa tende dzra ntlhanganu. 4 A fanela ku tlhanteka voko dzrake a nhlokweni ya xihazri lexi taka tizriseliwa ku hamba gandzrelo dzra ku hisiwa, nakone a gandzrelo dzrake dzri ta yamukeleka akuva a dzrivaleliwa swidoho.

5 “A xihon’wana xi fanela ku dlayiwa a mahlweni ka Yehovha, kutani a vana va Aroni, ku nga vaprista, va teka ngati va yi nyikela ka Xikwembu Nkulukumba, va gama va yi xwanya a matlhelweni hinkwawu ya altari ledzri nga nyangweni wa tende dzra ntlhanganu. 6 A xihazri lexi taka nyikeliwa swanga gandzrelo dzra ku hisiwa, xi fanela ku xindliwa xi gama xi tsremeleliwa.* 7 A vana va Aroni, ku nga vaprista, va fanela ku buyisa ndzrilo a altarini va gama va tlhanteka tihunyi ka wone. 8 A vana va Aroni, ku nga vaprista, va ta beketela nyama ya gandzrelo leyi tsremeleliwiki kun’we ni nhloko ni fuzra* a henhla ka tihunyi leti nga ndzrilweni a altarini. 9 A mazrumbu ni minenge ya xone swi ta hlampswiwa hi mati, kutani a muprista a ta swi hisa a altarini akuva swi mpukuka swanga gandzrelo dzra ku hisiwa, ku nga gandzrelo ledzri hambiwiki hi ndzrilo, nun’hwelo lowu nyonxisaka Yehovha.

10 “‘Loko gandzrelo dzrake dzra ku hisiwa a nyikela hi xifuyu xa le ntlhambini wake wa tihamba kumbe wa timbuti, ku fanela ku va xa xinuna lexi hanyiki ha hombe. 11 A xihazri lexo, xi fanela ku dlayeliwa ka tlhelo dzra le n’walungu dzra altari a mahlweni ka Yehovha, nakone a vana va Aroni, ku nga vaprista, va ta xwanya ngati ya xone a matlhelweni hinkwawu ya altari. 12 A muprista a ta swi tsremelela a gama a teka nyama leyo kun’we ni nhloko ni fuzra* a swi tlhantekela ka tihunyi leti nga ndzrilweni a altarini. 13 A mazrumbu ni minenge a ta swi hlampswa hi mati a va a swi nyikela ka Xikwembu Nkulukumba a gama a swi hisa a altarini swi mpukuka. I gandzrelo dzra ku hisiwa ledzri hambiwiki hi ndzrilo, nun’hwelo lowu nyonxisaka Yehovha.

14 “‘Kambe loko a nyikela gandzrelo dzra ku hisiwa ka Yehovha hi tinyanyana, a ta nyikela hi swivambalana kumbe hi swituvana. 15 A muprista a ta dzri nyikela a altarini. A ta dzri tsrema nkolo* hi n’wala a gama a dzri hisa a altarini akuva dzri mpukuka, kambe ku sungula a ngati ya dzrone a ta yi xiririkisa tlhelweni ka altari. 16 A fanela ku susa xidelo ni tinsiva ta dzrone a swi txukumeta tlhelweni dzra le wuxeni dzra altari, lani ku nga ni nkuma.* 17 A ta dzri pandzra hi le makazri ka timpapa ta dzrone kambe a nga dzri khatluli. Ntsrhaku ka leswo, a muprista a ta dzri tlhanteka ka tihunyi leti nga ndzrilweni a altarini a dzri hisa akuva dzri mpukuka. I gandzrelo dzra ku hisiwa ledzri hambiwiki hi ndzrilo, nun’hwelo lowu nyonxisaka Yehovha.

2 “‘Loko mhunu wa kukazri a nyikela magandzrelo ya tinhleke ka Yehovha, a fanela ku ma nyikela hi mapa lamanene; a fanela ku txhela mafuzra ni olibanu ka mapa wolawo. 2 Kutani va ta swi yisa ka vana va Aroni, ku nga vaprista, a muprista a ta nunsa mapa lamanene lawa ma txheliwiki mafuzra ni olibanu hinkwadzru ku tala voko, a ya ma hisa a altarini ma mpukuka, akuva ma yimela gandzrelo hinkwadzru.* I gandzrelo ledzri hambiwiki hi ndzrilo, nun’hwelo lowu nyonxisaka Yehovha. 3 Leswi swi taka sala ka gandzrelo dzra tinhleke, swi ta lumba Aroni ni vanake swanga ntxhumu wa ku xwengisisa ka magandzrelo lama hiseliwaka Yehovha.

4 “‘Loko u nyikela gandzrelo dzra tinhleke hi mapawu lawa ma woxiwiki a xitikweni, ma fanela ku hambiwa hi mapa lamanene, ma va mapawu lawa ma kalaka ma nga txheliwanga fermentu,* lawa ma hambiwiki ma fana ni xitlan’wana nakone ma patsriwiki ni mafuzra, kumbe ma va mapawu ya ku phaphateka lawa ma kalaka ma nga txheliwanga fermentu nakone ma totiwiki mafuzra.

5 “‘Loko gandzrelo dzraku dzra tinhleke dzri li dzra mapawu lawa ma hambeliwiki xifiridjelweni, a mapawu lawo ma fanela ku hambiwa hi mapa lamanene, ma va mapawu lawa ma kalaka ma nga txheliwanga fermentu lawa ma patsriwiki ni mafuzra. 6 Ma fanela ku khemeleliwa u gama u ma txhela mafuzra. I gandzrelo dzra tinhleke.

7 “‘Loko gandzrelo dzraku dzra tinhleke dzri li dzra mapawu lawa ma hambeliwiki paneleni, a mapawu lawo ma fanela ku hambiwa hi mapa lamanene lawa ma patsriwiki ni mafuzra. 8 U fanela ku heketela Yehovha gandzrelo dzra tinhleke ledzri hambiwiki hi mintxhumu leyi, nakone dzri ta nyikeliwa ka muprista lweyi a taka dzri tsrhindzretela a altarini. 9 Kutani a muprista a ta pambula xiyengenyana xa dzrone akuva xi yimela gandzrelo hinkwadzru, a xi hisa a altarini akuva xi mpukuka swanga gandzrelo ledzri hambiwiki hi ndzrilo, nun’hwelo lowu nyonxisaka Yehovha. 10 Leswi swi taka sala ka gandzrelo dzra tinhleke, swi ta lumba Aroni ni vanake swanga ntxhumu wa ku xwengisisa ka magandzrelo lawa ma hiseliwaka Yehovha.

11 “‘A ku na gandzrelo dzra tinhleke ledzri fanelaka ku nyikeliwa ka Yehovha na dzri ni fermentu, hikusa a mi fanelanga mi hisa fermentu nambi wulombe bya tinyonxi swi mpukuka swanga gandzrelo ledzri hiseliwaka Yehovha.

12 “‘Mi nga swi nyikela ka Yehovha swanga gandzrelo dzra mihandzru ya ku sungula, kambe a swi fanelanga swi yisiwa a altarini swanga nun’hwelo lowu nyonxisaka.

13 “‘A magandzrelo hinkwawu ya tinhleke lawa u ma nyikelaka, ma fanela ku lungiwa hi munyu; ka gandzrelo dzraku dzra tinhleke a u fanelanga u kiyeta munyu lowu wu ku dzrimuxaka xipfumelelanu xa Xikwembu Nkulukumba. Ka magandzrelo yaku hinkwawu u ta nyikela ni munyu.

14 “‘Loko u nyikela gandzrelo dzra tinhleke ka Yehovha, dzra ntsrhovelo wa ku sungula, u fanela ku nyikela tinhleke leti ta ha tsrakamaka,* ti kantingiwiki nakone ti khuvutiwiki swanga gandzrelo dzra tinhleke dzra ntsrhovelo waku wa ku sungula. 15 U fanela ku dzri txhela mafuzra ni olibanu. I gandzrelo dzra tinhleke. 16 A muprista a ta hisa xiyengenyana xa tinhleke leti khuvutiwiki nakone ti txheliwiki mafuzra, ni olibanu hinkwadzru, swi mpukuka, swanga leswi yimelaka gandzrelo hinkwadzru, swi va gandzrelo ledzri hiseliwiki Yehovha.

3 “‘Loko mhunu wa kukazri a nyikela xihazri xa xinuna kumbe xa xisati ka Yehovha, xa le ka ntlhambi wake wa tihomu swanga gandzrelo dzra ku kombela ku zrula,* xi fanela ku va xihazri lexi hanyiki ha hombe. 2 A fanela ku tlhanteka voko dzrake a nhlokweni ya xihazri lexo xi va xi dlayiwa a nyangweni wa tende dzra ntlhanganu; kutani a vana va Aroni, ku nga vaprista, va ta xwanya ngati a matlhelweni hinkwawu ya altari. 3 A ta nyikela xiyenge xa kukazri xa gandzrelo dzra ku kombela ku zrula swanga gandzrelo ledzri hiseliwiki Yehovha, ku nga fuzra ledzri nga matlhelweni ka mazrumbu, fuzra ledzri namazreliki mazrumbu 4 ni tinso ha tibidzri kun’we ni fuzra ledzri nga ka tone, kusuhi ni mazreve. A ta susa ni fuzra ledzri nga ka xivindzri kun’we ni tinso. 5 A vana va Aroni va ta swi hisa swi mpukuka a altarini na swi tlhantekiwe ka gandzrelo dzra ku hisiwa ledzri tlhantekiwiki ka tihunyi leti nga ndzrilweni. I gandzrelo ledzri hambiwiki hi ndzrilo, nun’hwelo lowu nyonxisaka Yehovha.

6 “‘Loko a nyikela gandzrelo dzra ku kombela ku zrula ka Yehovha hi tihamba kumbe hi timbuti, a ta nyikela hi xihazri xa xinuna kumbe xa xisati lexi hanyiki ha hombe. 7 Loko a nyikela hi xihambana xa xinuna, na xone a ta xi nyikela ka Yehovha. 8 A ta tlhanteka voko dzrake a nhlokweni ya xone, xi va xi dlayiwa a nyangweni wa tende dzra ntlhanganu, a vana va Aroni, ku nga vaprista, va ta xwanya ngati ya xone a matlhelweni hinkwawu ya altari. 9 A ta nyikela fuzra dzra gandzrelo dzra ku kombela ku zrula swanga gandzrelo ledzri hiseliwiki Yehovha. A ta tsrema nkila hinkwawu wa ku nona hi lani wu sukelaka kone a wu susa, a susa ni fuzra ledzri nga matlhelweni ka mazrumbu, fuzra hinkwadzru ledzri namazreliki mazrumbu 10 ni tinso ha tibidzri kun’we ni fuzra ledzri nga ka tone, kusuhi ni mazreve. A ta susa ni fuzra ledzri nga ka xivindzri kun’we ni tinso. 11 Kutani a muprista a ta swi hisa swi mpukuka a altarini. Leswi i swakuda,* gandzrelo ledzri hiseliwiki Yehovha.

12 “‘Loko a nyikela hi mbuti ya pswele, na yone a ta yi nyikela ka Yehovha. 13 A ta tlhanteka voko dzrake a nhlokweni ya yone yi va yi dlayiwa a nyangweni wa tende dzra ntlhanganu, kutani a vana va Aroni, ku nga vaprista, va fanela ku xwanya ngati a matlhelweni hinkwawu ya altari. 14 A xiyenge lexi a taka xi nyikela swanga gandzrelo ledzri hiseliwiki Yehovha, i fuzra ledzri nga matlhelweni ka mazrumbu, fuzra hinkwadzru ledzri namazreliki mazrumbu 15 ni tinso ha tibidzri kun’we ni fuzra ledzri nga ka tone, kusuhi ni mazreve. A ta susa ni fuzra ledzri nga ka xivindzri kun’we ni tinso. 16 A muprista a ta swi hisa swi mpukuka a altarini. Leswi i swakuda, gandzrelo ledzri hambiwiki hi ndzrilo akuva dzri va nun’hwelo lowu nyonxisaka. A fuzra hinkwadzru dzri lumba Yehovha.

17 “‘Lowu i nawu wa hi lani ku nga helikiki a tinxakeni tenu, a mimbangwini hinkwayu leyi mi tsrhamaka ka yone: Mi nga txhuki mi da fuzra kumbe ngati.’”

4 Yehovha a ya mahlweni a byela Moxe a ku: 2 “Byela Vaisrayele u ku: ‘Loko mhunu wa kukazri o* txhuka a doha hi mphazamu, hi ku yentxa leswi Yehovha a hlayiki leswaku swi nga yentxiwi, a ku yentxiwi leswi:

3 “‘Loko muprista lweyi a hlawulekisiwiki* a doha a va a buyisela tiko nandzru, a fanela ku nyika Yehovha xihon’wana lexi hanyiki ha hombe swanga gandzrelo dzra xidoho hi kola ka xidoho lexi a xi yentxiki. 4 A ta buyisa xihon’wana a nyangweni wa tende dzra ntlhanganu a mahlweni ka Yehovha, a tlhasa a tlhanteka voko a nhlokweni ya xone a va a xi dlaya mahlweni ka Yehovha. 5 Ntsrhaku ka leswo, a muprista yelweyo lweyi a hlawulekisiwiki a ta teka ngatinyana ya xihon’wana a nghena na yone a tendeni dzra ntlhanganu; 6 a muprista a ta peta litiho ka ngati a va a yi xwanya ku dzringana 7 wa makhambi a mahlweni ka Yehovha a phambeni ka kortina dzra le mbangwini wa ku xwenga. 7 A muprista a ta tlhela a tota ngatinyana ka timhondzro ta altari dzra muzri wa ku nun’hwela, ledzri nga mahlweni ka Yehovha a tendeni dzra ntlhanganu, a va a teka ngati hinkwayu leyi salaka a yi txhela ka khumbi dzra altari dzra gandzrelo dzra ku hisiwa, hi le hansi, ledzri nga nyangweni wa tende dzra ntlhanganu.

8 “‘Kutani a ta susa fuzra hinkwadzru ka xihon’wana xa gandzrelo dzra xidoho ku patsra ni fuzra ledzri nga matlhelweni ka mazrumbu, fuzra ledzri namazreliki mazrumbu 9 ni tinso ha tibidzri kun’we ni fuzra ledzri nga ka tone, kusuhi ni mazreve. A ta susa ni fuzra ledzri nga ka xivindzri kun’we ni tinso. 10 Ku ta susiwa swa ku fana ni leswi susiwaka ka homu ya gandzrelo dzra ku kombela ku zrula. Nakone a muprista a ta swi hisa swi mpukuka a altarini dzra gandzrelo dzra ku hisiwa.

11 “‘Kambe a xikhumba xa xihon’wana lexo, nyama ya xone hinkwayu, nhloko, minenge, mazrumbu, ni nswanyu, 12 ku nga hinkwaswu leswi salaka swa xihon’wana, a ta swi teka a swi humesa handle ka mintxhatxha a swi yisa mbangwini lowu basiki lani ku txukumetiwaka kone nkuma, a ya swi hisa henhla ka tihunyi leti nga ndzrilweni. Swi fanela ku hiseliwa lani ku txukumetiwaka kone nkuma.

13 “‘Loko nhlengeletanu* hinkwayu ya Israyele yi va ni nandzru hi mhaka leswi yi yentxiki xidoho hi mphazamu, kambe yi nga swi xiyi leswaku yi yentxe ntxhumu lowu Yehovha a yi leletiki leswaku yi nga wu yentxi, 14 swi gama swi tiveka leswaku ku dohiwile, a nhlengeletanu yi fanela ku humesa xihon’wana akuva xi va gandzrelo dzra xidoho, yi va yi xi buyisa a mahlweni ka tende dzra ntlhanganu. 15 A vakulukumba va nhlengeletanu va ta tlhanteka mavoko yavu a nhlokweni ya xihon’wana a mahlweni ka Yehovha, xi va xi dlayiwa a mahlweni ka Yehovha.

16 “‘Kutani a muprista lweyi a hlawulekisiwiki a ta teka ngatinyana ya xihon’wana a nghena na yone a tendeni dzra ntlhanganu. 17 A muprista a ta peta litiho ka ngati a va a yi xwanya ku dzringana 7 wa makhambi a mahlweni ka Yehovha, a phambeni ka kortina. 18 Kutani a ta tota ngatinyana ka timhondzro ta altari ledzri nga mahlweni ka Yehovha a tendeni dzra ntlhanganu, a va a teka ngati hinkwayu leyi salaka a yi txhela ka khumbi dzra altari dzra gandzrelo dzra ku hisiwa, hi le hansi, ledzri nga nyangweni wa tende dzra ntlhanganu. 19 A ta susa fuzra hinkwadzru ka xihon’wana a dzri hisa dzri mpukuka a altarini. 20 Ka xihon’wana lexi, a fanela ku yentxa leswi a swi yentxiki ka xihon’wana xa gandzrelo dzra xidoho. A ta swi yentxisa xiswoswo. A muprista a ta kombelela tiko ku dzrivaleliwa, kutani dzri ta dzrivaleliwa. 21 A ta teka xihon’wana a huma na xone mintxhatxheni a ya xi hisa hi lani a hisiki ha kone le xa ku sungula. I gandzrelo dzra xidoho ledzri hambeliwaka nhlengeletanu.

22 “‘Loko muzrangeli wa kukazri a doha hi mphazamu, hi ku yentxa wun’we ka mintxhumu hinkwayu leyi Yehovha Xikwembu Nkulukumba wake a hlayaka leswaku yi nga yentxiwi, kutani a va ni nandzru, 23 kumbe a xiya leswaku a dohile hi ku yentxa ntxhumu wa kukazri lowu lwisanaka ni nawu, a fanela ku nyikela gandzrelo dzrake hi xiphongo xa xitsrongo lexi* hanyiki ha hombe. 24 A ta tlhanteka voko henhla ka xone, a va a xi dlaya a mahlweni ka Yehovha, lani ku dlayeliwaka kone a swihazri swa magandzrelo ya ku hisiwa. I gandzrelo dzra xidoho. 25 A muprista a ta peta litiho dzrake ka ngati ya gandzrelo dzra xidoho a va a yi totanyana ka timhondzro ta altari dzra gandzrelo dzra ku hisiwa, a gama a teka ngati ya xone leyi salaka a yi txhela ka khumbi dzra altari dzra gandzrelo dzra ku hisiwa, hi le hansi. 26 A ta hisa fuzra hinkwadzru dzra xone dzri mpukuka a altarini hi lani swi yentxiwaka ha kone ka gandzrelo dzra ku kombela ku zrula; kutani a muprista a ta mu kombelela ku dzrivaleliwa hi kola ka xidoho xake, kutani a ta dzrivaleliwa.

27 “‘Loko mhunu wa kukazri a tikweni o txhuka a doha hi mphazamu, hi ku yentxa wun’we wa mintxhumu leyi Yehovha a hlayaka leswaku yi nga yentxiwi, 28 kumbe a xiya leswaku a yentxe xidoho xa kukazri, a fanela ku nyikela ximbutana xa pswele lexi hanyiki ha hombe, swanga gandzrelo dzra xidoho lexi a xi yentxiki. 29 A ta tlhanteka voko dzrake a nhlokweni ya xone a va a xi dlaya, a mbangwini wolowu wa wun’we lowu ku dlayeliwaka kone swihazri swa gandzrelo dzra ku hisiwa. 30 A muprista a ta tsrakamisa litiho hi ngati ya xone a va a tota yitsrongo ka timhondzro ta altari dzra gandzrelo dzra ku hisiwa, a gama a teka ngati hinkwayu ya xone leyi salaka a yi txhela ka khumbi dzra altari, hi le hansi. 31 A ta susa fuzra hinkwadzru dzra xone hi lani fuzra dzra gandzrelo dzra ku kombela ku zrula dzri susiwaka ha kone, nakone a muprista a ta dzri hisa dzri mpukuka a altarini swanga nun’hwelo lowu nyonxisaka Yehovha. Hi ndlela leyo, a muprista a ta kombelela mhunu lweyo ku dzrivaleliwa, kutani a ta dzrivaleliwa.

32 “‘Kambe loko a nyikela hi hamba swanga gandzrelo dzrake dzra xidoho, a fanela ku buyisa hamba ya pswele leyi hanyiki ha hombe. 33 A ta tlhanteka voko dzrake a nhlokweni ya yone a va a yi dlaya swanga gandzrelo dzra xidoho, a mbangwini lowu ku dlayeliwaka kone swihazri swa gandzrelo dzra ku hisiwa. 34 A muprista a ta peta litiho dzrake ka ngati ya gandzrelo dzra xidoho a va a yi totanyana ka timhondzro ta altari dzra gandzrelo dzra ku hisiwa, a gama a teka ngati hinkwayu leyi salaka a yi txhela ka khumbi dzra altari, hi le hansi. 35 A muprista a ta susa fuzra dzra yone hinkwadzru hi lani a fuzra dzra xihambana xa xinuna xa gandzrelo dzra ku kombela ku zrula dzri susiwaka ha kone, a dzri hisa dzri mpukuka a altarini, a henhla ka magandzrelo lawa ma hambeliwiki Yehovha hi ndzrilo. Hi ndlela leyo, a muprista a ta kombelela mhunu lweyo ku dzrivaleliwa hi kola ka xidoho lexi a xi yentxiki, kutani a ta dzrivaleliwa.

5 “‘Loko mhunu wa kukazri a vona* mhunu mun’wana na a doha kumbe ku tiva hi ta xidoho lexo, kutani a twa leswaku ku vitaniwa timboni akuva ti ya nyikela wumboni mayelanu ni xidoho lexo,* kambe a nga yi a ya byi nyikela a ta va ni nandzru nakone a ta tihlamulela hi kola ka xihoxo xake.

2 “‘Kumbe loko mhunu wa kukazri o khumba ntxhumu lowu kalaka wu nga basanga, ku nga ha va ntsrumbu wa xihazri xa nhova lexi kalaka xi nga basanga,* wa xifuyu lexi kalaka xi nga basanga, kumbe wa xin’we xa swihazrahazrana* leswi kalaka swi nga basanga, a ta va lweyi a nyamiki* nakone a ta va ni nandzru nambiloko e swi khumba na a nga swi xiyi. 3 Kumbe loko mhunu wa kukazri o txhuka a khumba mhunu lweyi a kalaka a nga basanga kumbe ntxhumu lowu kalaka wu nga basanga, na a nga swi xiyi, leswi nga mu yentxaka a va lweyi a nyamiki, a gama a swi tiva, a ta va ni nandzru.

4 “‘Loko mhunu wa kukazri, na a nga swi xiyi, a hamba xihlambanyu hi magugu xa leswaku a ta yentxa ntxhumu wa kukazri, ku nga ha va ntxhumu lowunene kumbe wa ku biha, swi nge na mhaka leswaku i yini ntxhumu wa kone, kambe a gama a swi xiya leswaku a gigisekele ku hlambanya, a ta va ni nandzru.*

5 “‘Loko a va ni nandzru hi wun’we wa mintxhumu leyi, a fanela ku ya hlaya leswaku he xini xidoho lexi a xi yentxiki. 6 Handle ka leswo, a ta buyisa gandzrelo dzrake dzra nandzru ka Yehovha hi kola ka xidoho lexi a xi yentxiki, ku nga xihazri xa pswele xa le ntlhambini wa tihamba kumbe wa timbuti; ku nga ha va xihambana xa pswele kumbe ximbutana xa pswele, akuva dzri va gandzrelo dzra xidoho. Kutani a muprista a ta mu kombelela ku dzrivaleliwa xidoho xake.

7 “‘Kambe loko a nga na makotela ya ku humesa hamba, a fanela ku buyisela Yehovha swivambalana swibidzri kumbe swituvana swibidzri swanga gandzrelo dzrake dzra nandzru hi kola ka xidoho lexi a xi yentxiki; xin’we xi va xa gandzrelo dzra xidoho, lexin’wana xi va xa gandzrelo dzra ku hisiwa. 8 A fanela ku swi heketa ka muprista lweyi ku sungula a taka teka xin’we xi va xa gandzrelo dzra xidoho, a va a xi tsrema nkolo hi n’wala kambe a nga khatluli nhloko. 9 A ta xwanya ngatinyana ya gandzrelo dzra xidoho a tlhelweni ka altari kambe leyi salaka yi ta txhululiwa tlhelweni ka khumbi dzra altari, hi le hansi. I gandzrelo dzra xidoho. 10 A ta teka lexin’wana xi va gandzrelo dzra ku hisiwa hi ku landzra mayentxela lama tolovelekiki, kutani a muprista a ta mu kombelela ku dzrivaleliwa hi kola ka xidoho lexi a xi yentxiki, kutani a ta dzrivaleliwa.

11 “‘Loko a nga na makotela ya ku humesa swivambalana swibidzri kumbe swituvana swibidzri akuva swi va gandzrelo dzra xidoho xake, a fanela ku humesa kolomu ka kilu* dzra mapa lamanene akuva ma va gandzrelo dzra xidoho. A nga fanelanga a txhela mafuzra kumbe olibanu ka mapa lawo hikusa i gandzrelo dzra xidoho. 12 A ta ma yisa ka muprista kutani a muprista a ta nunsa ya voko akuva ma yimela gandzrelo hinkwadzru,* a va a ma hisa ma mpukuka a altarini a henhla ka magandzrelo lama hiseliwiki Yehovha hi ndzrilo. I gandzrelo dzra xidoho. 13 Hi ndlela leyo, a muprista a ta kombelela mhunu lweyo ku dzrivaleliwa xidoho lexi a nga ha vaka a xi yentxile ka swidoho leswo, kutani a ta dzrivaleliwa. Leswi swi taka sala ka gandzrelo ledzro swi ta lumba muprista, hi lani swi yentxiwaka ha kone ka gandzrelo dzra tinhleke.’”

14 Yehovha a ya mahlweni a byela Moxe a ku: 15 “Loko mhunu wa kukazri o txhuka a nga dumbeki, a va hi mphazamu a tlula nawu mayelanu ni mintxhumu ya ku xwenga ya Yehovha, a fanela ku buyisela Yehovha hamba ya xinuna swanga gandzrelo dzra nandzru; a muprista a ta hlaya leswaku ku fanela ku va hamba leyi dzringanaka mali muni ya prata hi ku ya hi mpimu wa xekele* lowu a wu tizrisiwa mbangwini wa ku xwenga.* 16 Nakone leswi a doheliki mbangu wa ku xwenga a ta hakela xidoho lexo a tlhela a yengesela 20 wa mapursentu ka mali yoleyo, a ta swi nyikela ka muprista* akuva hi hamba ya xinuna ya gandzrelo dzra nandzru a muprista a mu kombelela ku dzrivaleliwa, kutani a ta dzrivaleliwa.

17 “Loko mhunu a txhuka a doha hi ku yentxa ntxhumu wa kukazri ka mintxhumu leyi Yehovha a hlayaka leswaku a yi fanelanga yi yentxiwa, nambiloko a nga swi xiyi a ta tama a va ni nandzru, futsrhi a ta tihlamulela hi kola ka xihoxo xake. 18 A fanela ku heketa hamba ya xinuna ka muprista hi ku ya hi ntsrengo lowu hlayiwaka* hi muprista swanga gandzrelo dzra nandzru. Kutani a muprista a ta mu kombelela ku dzrivaleliwa hi kola ka xihoxo lexi a xi yentxiki na a nga swi tivi, kutani a ta dzrivaleliwa. 19 I gandzrelo dzra nandzru. Nakunene a ve ni nandzru hi ku dohela Yehovha.”

6 Yehovha a ya mahlweni a byela Moxe a ku: 2 “Loko mhunu wa kukazri o txhuka a dohela Yehovha hi ku kanganyisa mhunu mun’wana mayelanu ni ntxhumu lowu a nyikiwiki wone akuva a wu bekisa, lowu a tamelisiwiki wone, lowu a wu yiviki kumbe hi ku kanganyisa mhunu mun’wana, 3 kumbe a zrola ntxhumu wa kukazri lowu lahlekiki a va a hemba mayelanu na wone, nakone loko a hlambanya madzrimi mayelanu ni xin’we xa swidoho leswi a nga ha vaka a swi yentxile a fanela ku yentxa leswi: 4 Loko a dohile nakone a ni nandzru, a fanela ku tlhelisa ntxhumu lowu a wu yiviki, lowu a wu tekiki hi nkanu, lowu a wu tekiki hi ku kanganyisa, lowu a nyikiwiki wone akuva a wu bekisa, lowu a wu zroliki 5 kumbe ntxhumu wun’wana ni wun’wana lowu a hlambanyiki madzrimi mayelanu na wone. A fanela ku hakela ntxhumu lowo hi lani ku heleliki a tlhela a yengesela 20 wa mapursentu ka mali leyi wu dzringanaka yone. A ta nyika n’winyi wa wone hi siku ledzri a nandzru wake wu taka tiviwa ha dzrone. 6 Kutani a ta nyika muprista hamba ya xinuna leyi hanyiki ha hombe, leyi a yi tekiki ntlhambini, swanga gandzrelo dzrake dzra nandzru ka Yehovha, hi ku ya hi ntsrengo lowu koxiwiki wa gandzrelo dzra nandzru. 7 A muprista a ta mu kombelela ku dzrivaleliwa mahlweni ka Yehovha nakone a ta dzrivaleliwa ka xin’wana ni xin’wana lexi a nga ha vaka a xi yentxile kumbe a nga ha vaka a ni nandzru ka xone.”

8 Yehovha a ya mahlweni a byela Moxe a ku: 9 “Byela Aroni ni vanake u ku: ‘Hi lowu nawu wa gandzrelo dzra ku hisiwa: A gandzrelo dzra ku hisiwa dzri ta tama dzri va ndzrilweni wa altari wusiku hinkwabyu, ku ya tlhasa loko byi xa, nakone ndzrilo wu ta tama wu tsrhiveleliwa a altarini. 10 A muprista a ta yambala mpahla yake ya wuprista leyi hambiwiki hi panu, nakone a ta yambala a buluku dzrake dzra ku goma akuva a fihla swizro swake swa xihundla. Kutani a ta susa nkuma wa gandzrelo dzra ku hisiwa ledzri hisiwiki a altarini a va a wu txhela tlhelweni ka altari. 11 Ntsrhaku ka leswo, a ta txintxa mpahla yake a va a teka nkuma a wu yisa mbangwini lowu basiki a handle ka mbangu lowu va dzimiki ka wone mintxhatxha. 12 A ndzrilo wu ta tama wu tsrhiveleliwa a altarini. A wu fanelanga wu timeka. Mixo wun’wana ni wun’wana a muprista a fanela ku tlhantekela tihunyi a ndzrilweni, a gama a tlhantekela gandzrelo dzra ku hisiwa kutani a hisa fuzra dzra magandzrelo ya ku kombela ku zrula, dzri mpukuka ka wone. 13 A ndzrilo wu fanela ku tama wu tsrhiveleliwa altarini. A wu fanelanga wu timeka.

14 “‘A nawu wa gandzrelo dzra tinhleke hi lowu: A vana va Aroni va ta tsrhindzrekela a altarini va va va dzri nyikela a mahlweni ka Yehovha. 15 Mun’we wavu a ta nunsa mapa lamanene ya gandzrelo dzra tinhleke lawa ma nga ni mafuzra a tata voko kun’we ni olibanu hinkwadzru ledzri nga ka gandzrelo dzra tinhleke, kutani a ta swi hisa a altarini swi mpukuka, na swi yimela gandzrelo hinkwadzru, swi va nun’hwelo lowu nyonxisaka Yehovha. 16 Aroni ni vanake va ta da leswi salaka ka gandzrelo. Va ta swi tizrisela ku hamba mapawu lawa ma kalaka ma nga txheliwanga fermentu. Va ta ma dela mbangwini wa ku xwenga, nakone va ta ma dela gqekeni dzra tende dzra ntlhanganu. 17 A ma fanelanga ma woxiwa na ma ni fermentu.* I xiyenge lexi ni va nyikiki xone ka magandzrelo lawa ni hiseliwiki wone. I ntxhumu wa ku xwengisisa ku fana ni gandzrelo dzra xidoho ni gandzrelo dzra nandzru. 18 Ma to diwa ntsena hi vana va xinuna va Aroni. I xiyenge lexi va nyikiwiki xone a tinxakeni tavu hinkwatu hi lani ku nga helikiki, ka magandzrelo lawa ma hiseliwiki Yehovha. Xin’wana ni xin’wana lexi taka khumba magandzrelo lawo xi ta va lexi xwengiki.’”

19 Yehovha a tlhela a byela Moxe a ku: 20 “Hi ledzri gandzrelo ledzri Aroni ni vanake va taka dzri nyikela ka Yehovha hi siku ledzri a taka totiwa ha dzrone: kolomu ka kilu dzra mapa lamanene swanga gandzrelo dzra tinhleke hi lani hi ntolovelo swi yentxiwaka ha kone, a hamfu a mixweni kasi a hamfu leyin’wana a madambyeni. 21 Dzri ta hambiwa hi mafuzra ka xifiridjelo. U ta dzri buyisa na dzri khemeleliwile nakone na dzri patsriwe ha hombe ni mafuzra swanga gandzrelo dzra tinhleke ledzri woxiwiki, nun’hwelo lowu nyonxisaka Yehovha. 22 Ka vana va Aroni a muprista lweyi a totiwiki lweyi a taka mu pfaleta na yene a ta nyikela gandzrelo ledzro. I nawu wa hi lani ku nga helikiki: a gandzrelo ledzro dzri ta hisiwa hinkwadzru dzri mpukuka a mahlweni ka Yehovha. 23 Gandzrelo dzrin’wana ni dzrin’wana dzra tinhleke dzra muprista dzri fanela ku nyikeliwa hinkwadzru. A dzri fanelanga dzri diwa.”

24 Yehovha a tlhela a byela Moxe a ku: 25 “Byela Aroni ni vanake u ku: ‘A nawu wa gandzrelo dzra xidoho hi lowu: A mbangwini lowu ku dlayeliwaka ka wone xihazri xa gandzrelo dzra ku hisiwa, na xone xihazri xa gandzrelo dzra xidoho xi ta dlayeliwa kone a mahlweni ka Yehovha. I ntxhumu wa ku xwengisisa. 26 A muprista lweyi a nyikelaka xihazri swanga gandzrelo dzra xidoho a ta xi da. Xi fanela ku deliwa mbangwini wa ku xwenga a gqekeni dzra tende dzra ntlhanganu.

27 “‘Xin’wana ni xin’wana lexi taka khumba nyama ya gandzrelo xi ta va lexi xwengiki, nakone loko mpahla ya mhunu wa kukazri yo txhuka yi txheliwanyana hi ngati ya gandzrelo ledzro, u fanela ku teka mpahla leyo u ya yi hlampswa a mbangwini wa ku xwenga. 28 Loko nyama leyo yi swekeliwe ka xibya xa vumba xi fanela ku gama xi pfotlotiwa. Kambe loko yi swekeliwe ka xibya xa kobri xi fanela ku gama xi khuxiwa xi va xi hlampswiwa hi mati.

29 “‘Yi to diwa ntsena hi va xinuna lava nga vaprista. I ntxhumu wa ku xwengisisa. 30 Kambe loko ke tekiwa ngatinyana yitsrongo ya gandzrelo dzra xidoho yi tisiwa ndzreni ka tende dzra ntlhanganu akuva ku kombeliwa ku dzrivaleliwa a mbangwini wa ku xwenga, a nyama ya gandzrelo ledzro a yi fanelanga yi diwa. Yi fanela ku hisiwa.

7 “‘Lowu i nawu wa gandzrelo dzra nandzru: I ntxhumu wa ku xwengisisa. 2 Va ta dlaya xihazri xa gandzrelo dzra nandzru a mbangwini lowu ku dlayeliwaka ka wone swihazri swa magandzrelo ya ku hisiwa, nakone a ngati yi fanela ku xwanyiwa ka matlhelo hinkwawu ya altari. 3 A muprista a ta nyikela fuzra hinkwadzru dzra xone, ku nga nkila wa ku nona, fuzra ledzri nga matlhelweni ka mazrumbu 4 ni tinso ha tibidzri kun’we ni fuzra ledzri nga ka tone, kusuhi ni mazreve. A ta susa ni fuzra ledzri nga ka xivindzri kun’we ni tinso. 5 A muprista a ta swi hisa swi mpukuka a altarini swanga gandzrelo ledzri hiseliwiki Yehovha. I gandzrelo dzra nandzru. 6 A xihazri lexo, xi to diwa ntsena hi vavanuna lava nga vaprista, xi fanela ku deliwa a mbangwini wa ku xwenga. I ntxhumu wa ku xwengisisa. 7 A nawu wa gandzrelo dzra xidoho wu tizra ni le ka gandzrelo dzra nandzru, a gandzrelo ledzro dzri lumba muprista lweyi a kombelaka ku dzrivaleliwa hi ku tizrisa dzrone.

8 “‘Loko muprista a nyikelela mhunu wa kukazri gandzrelo dzra ku hisiwa, a xikhumba xa xihazri xa gandzrelo ledzro ledzri nyikeliwiki xi ta lumba muprista.

9 “‘A gandzrelo dzrin’wana ni dzrin’wana dzra tinhleke ledzri taka woxiwa a xitikweni kumbe dzri kantingiwa a paneleni kumbe a xifiridjelweni, dzri ta lumba muprista lweyi a taka dzri nyikela. 10 Kambe gandzrelo dzrin’wana ni dzrin’wana dzra tinhleke ledzri patsriwiki ni mafuzra kumbe ledzri ngeke na wone, dzri ta va dzra vana va Aroni, hinkwavu va ta yaveliwa hi ndlela leyi fanaka.

11 “‘Hi lowu nawu wa gandzrelo dzra ku kombela ku zrula ledzri nga nyikeliwaka ka Yehovha: 12 Loko mhunu wa kukazri a dzri nyikela swanga ndlela ya ku tlangela, a ta dzri nyikela kun’we ni gandzrelo dzra ku tlangela, ku nga mapawu lawa ma kalaka ma nga txheliwanga fermentu* lawa ma hambiwiki ma fana ni xitlan’wana nakone ma patsriwiki ni mafuzra, mapawu ya ku phaphateka lawa ma kalaka ma nga na fermentu nakone ma totiwiki mafuzra, ni mapawu lawa ma hambiwiki ma fana ni xitlan’wana hi mapa lamanene lawa ma pfuviwiki ha hombe ni mafuzra. 13 A ta nyikela gandzrelo ledzro ni mapawu lawa ma txheliwiki fermentu nakone ma hambiwiki ma fana ni xitlan’wana, kun’we ni gandzrelo dzra ku kombela ku zrula swanga ndlela ya ku kombisa ku tlangela. 14 Ka muxaka ha wun’we wa mapawu lawo, a ta teka dzrin’we a dzri nyikela swanga xiyenge xa ku xwenga ka Yehovha; xiyenge xolexo xi ta lumba muprista lweyi a xwanyaka ngati ya magandzrelo ya ku kombela ku zrula. 15 A nyama ya gandzrelo dzra ku kombela ku zrula ledzri nyikeliwaka swanga ndlela ya ku kombisa ku tlangela, yi fanela ku diwa hi siku ledzri yi nyikeliwaka ha dzrone swanga gandzrelo. A nga fanelanga a yi beka ku ya tlhasa mixweni.

16 “‘Loko gandzrelo ledzri a dzri nyikelaka a dzri nyikela swanga ndlela ya ku hetisisa xihlambanyu kumbe swanga gandzrelo dzra ku tizrandzrela, dzri fanela ku diwa hi siku ledzri a dzri nyikelaka ha dzrone nakone leswi swi salaka swi nga ha diwa hi siku ledzri landzrelaka. 17 Kambe hi siku dzra wuzrazru a nyama leyi saliki ka gandzrelo yi fanela ku hisiwa. 18 Kambe loko xiyenge xa kukazri xa nyama ya gandzrelo dzra ku kombela ku zrula xo diwa hi siku dzra wuzrazru, lweyi a nyikeliki gandzrelo ledzro a nge ti yamukeleka. A gandzrelo ledzro swi to fana ni loko dzri nga nyikeliwanga, i xizruku, nakone a mhunu lweyi a dzri daka a ta tihlamulela hi kola ka xihoxo xake. 19 A nyama leyi khumbiki ntxhumu lowu kalaka wu nga basanga a yi fanelanga yi diwa kambe yi fanela ku hisiwa. Mun’wana ni mun’wana lweyi a basiki a nga da nyama leyi basiki.

20 “‘Kambe loko mhunu wa kukazri lweyi a kalaka a nga basanga o txhuka a da nyama ya gandzrelo dzra ku kombela ku zrula ledzri lumbaka Yehovha, a mhunu lweyo a fanela ku dlayiwa. 21 Loko mhunu wa kukazri a txhuka a khumba ntxhumu lowu kalaka wu nga basanga, ku nga ha va mhunu lweyi a kalaka a nga basanga, xihazri lexi kalaka xi nga basanga, kumbe ntxhumu wa kukazri lowu kalaka wu nga basanga nakone wu nyenyentsaka, a gama a da nyama ya gandzrelo dzra ku kombela ku zrula ledzri lumbaka Yehovha, a mhunu yelweyo a fanela ku dlayiwa.’”

22 Yehovha a ya mahlweni a byela Moxe a ku: 23 “Byela Vaisrayele u ku: ‘Mi nga txhuki mi da fuzra dzra homu, dzra xihambana xa xinuna, kumbe dzra mbuti. 24 A fuzra dzra xihazri lexi kumiwiki na xi file ni dzra xihazri lexi dlayiwiki hi xihazri xin’wana dzri nga tizriseliwa xin’wana ni xin’wana, kambe a dzri fanelanga dzri diwa. 25 Mun’wana ni mun’wana lweyi a daka fuzra dzra xihazri lexi a xi nyikelaka swanga gandzrelo ledzri hiseliwaka Yehovha, a fanela ku dlayiwa.

26 “‘Kun’wana ni kun’wana lomu mi taka tsrhama kone a mi fanelanga mi da ngati, ku nga ha va ya tinyanyana kumbe ya swihazri swin’wana. 27 Mun’wana ni mun’wana lweyi a daka ngati ya xivumbiwa xin’wana ni xin’wana, a fanela ku dlayiwa.’”

28 Yehovha a ya mahlweni a vulavula na Moxe a ku: 29 “Byela Vaisrayele u ku: ‘Lweyi a nyikelaka gandzrelo dzrake dzra ku kombela ku zrula ka Yehovha, a ta buyisa xiyenge xa gandzrelo dzrake dzra ku kombela ku zrula ka Yehovha. 30 A ta buyisa ha wuswake a mavokweni, a fuzra ledzri nga ka xifuva kun’we ni xifuva xa kone, swanga gandzrelo ledzri hiseliwaka Yehovha, a gama a swi yisa mahlweni na a swi tlhelisa ntsrhaku, swanga gandzrelo ledzri zrendzrelekisiwaka a mahlweni ka Yehovha. 31 A muprista a ta hisa fuzra dzri mpukuka a altarini kambe a xifuva xi ta va xa Aroni ni vanake.

32 “‘Ka magandzrelo yenu ya ku kombela ku zrula, mi ta teka nenge wa xinene mi nyika muprista, swanga xiyenge xa ku xwenga. 33 A n’wana wa Aroni lweyi a taka nyikela ngati ya magandzrelo ya ku kombela ku zrula ni fuzra, a ta nyikiwa nenge wa xinene swanga xiyenge xake. 34 Hikusa ka magandzrelo ya ku kombela ku zrula lawa ma hambiwaka hi Vaisrayele, ni teka xifuva lexi nyikeliwaka swanga gandzrelo dzra ku zrendzrelekisiwa ni nenge lowu nyikeliwaka swanga xiyenge xa ku xwenga, ni swi nyika muprista Aroni ni vanake. Lowu i nawu wa hi lani ku nga helikiki ka Vaisrayele.

35 “‘Lexi i xiyenge xa magandzrelo lawa ma hiseliwaka Yehovha lexi lumbaka vaprista, ku nga Aroni ni vanake, ku sukela siku ledzri va hlawuliwiki ha dzrone akuva va tizrela Yehovha swanga Vaprista. 36 Hi siku ledzri va hlawulekisiwiki* ha dzrone Yehovha a lelete leswaku a Vaisrayele va va nyika xiyenge lexi. I nawu wa hi lani ku nga helikiki a tinxakeni tavu hinkwatu.’”

37 Lowu i nawu wa gandzrelo dzra ku hisiwa, gandzrelo dzra tinhleke, gandzrelo dzra xidoho, gandzrelo dzra nandzru, gandzrelo dzra ku kombela ku zrula ni gandzrelo dzra ku simekiwa ka vavanuna lava swanga vaprista, 38 hi lani Yehovha a leletiki Moxe ha kone a Nhaveni ya Sinayi, a sikwini ledzri a leletiki Vaisrayele ha dzrone akuva va nyikela magandzrelo yavu ka Yehovha a mananga ya Sinayi.*

8 Yehovha a ya mahlweni a byela Moxe a ku: 2 “Buyisa Aroni ni vanake, mpahla yavu ya wuprista, mafuzra ya ku hlawulekisa, xihon’wana* xa gandzrelo dzra xidoho, tihamba tibidzri ta xinuna ni ntsrhava wa mapawu lawa ma kalaka ma nga txheliwanga fermentu, 3 u va u hlengeleta Vaisrayele hinkwavu a nyangweni wa tende dzra ntlhanganu.”

4 Moxe a yentxa hi lani Yehovha a mu leletiki ha kone kutani a Vaisrayele va hlengeletana a nyangweni wa tende dzra ntlhanganu. 5 Moxe a byela nhlengeletanu ya Israyele a ku: “Leswi hi leswi Yehovha a hi leletiki kuva hi swi yentxa.” 6 Xileswo, Moxe a buyisa Aroni ni vanake a va hlampswa hi mati. 7 Ntsrhaku ka leswo, a mu yambexa mpahla ya ku leha, a mu tsrimba bandhi, a mu yambexa mpahla ya ku pfumala mavoko, a va a mu yambexa efodi a dzri tsrimba dzri tiya hi bandhi dzra dzrone ledzri lukiwiki. 8 Hi ku landzrela, a mu yambexa nkwama wa le xifuveni a gama a nghenisa Urimi ni Tumimi ka wone. 9 Ntsrhaku ka leswo, a mu tsrimba ntuzru nhlokweni a va a beka mahlweni ka ntuzru lowo a xipepezrele xa woru lexi phatimaka, ku nga mfungu wa ku xwenga wa ku tinyiketela kwake, hi lani Yehovha a a lelete Moxe ha kone.

10 Kutani Moxe a teka mafuzra ya ku hlawulekisa* hi wone a hlawulekisa tabernakela ni hinkwaswu leswi a swi li ka dzrone, a swi xwengisa. 11 Ntsrhaku ka leswo a teka ya matsrongonyana a xwanya altari ku dzringana 7 wa makhambi, a dzri hlawulekisa, a hlawulekisa ni swibya hinkwaswu swa dzrone ni basiya kun’we ni lexi dzri tlhantekiwaka ka xone, akuva a swi xwengisa. 12 Hi wugamu a txhela mafuzranyana ya ku hlawulekisa a nhlokweni ya Aroni, a mu hlawulekisa akuva a mu xwengisa.

13 Moxe a gama a buyisa vana va Aroni a va yambexa mpahla ya ku leha, a va tsrimba mabandhi a tlhela a va yambexa swilembe,* hi lani Yehovha a a mu lelete ha kone.

14 Hiloko a buyisa xihon’wana xa gandzrelo dzra xidoho, kutani Aroni ni vanake va tlhanteka mavoko yavu a nhlokweni ya xone. 15 Moxe a xi dlaya, a peta litiho dzrake ka ngati a gama a yi tota ka timhondzro hinkwatu ta altari ka matlhelo hinkwawu, a xwengisa altari ka xidoho, kambe ngati leyi saliki a yi txhela ka khumbi dzra altari hi le hansi akuva a dzri xwengisa, a dzri kombelela ku dzrivaleliwa. 16 Ntsrhaku ka leswo, Moxe a teka fuzra hinkwadzru ledzri nga matlhelweni ka mazrumbu, fuzra ledzri nga ka xivindzri, ni tinso ha tibidzri kun’we ni fuzra ledzri nga ka tone, a swi hisa swi mpukuka a altarini. 17 Hiloko a teka hinkwaswu leswi saliki ka xihon’wana ku nga xikhumba, nyama ni nswanyu* wa xone, akuva swi ya hisiwa a handle ka mbangu lowu va dzimiki ka wone mintxhatxha, hi lani Yehovha a a mu lelete ha kone.

18 Hi ku landzrela, a buyisa hamba ya xinuna ya gandzrelo dzra ku hisiwa, kutani Aroni ni vanake va tlhanteka mavoko yavu a nhlokweni ya yone. 19 Kutani Moxe a yi dlaya, a va a xwanya ngati ya yone a matlhelweni hinkwawu ya altari. 20 A hamba yi tsremeleliwe hi swiyenge a va Moxe a teka swiyenge leswo leswi tsremeleliwiki, nhloko kun’we ni fuzra,* a swi hisa swi mpukuka. 21 A mazrumbu ni minenge ya yone swi hlampswiwe hi mati, kutani Moxe a teka hamba hinkwayu a yi hisa yi mpukuka a altarini. I gandzrelo dzra ku hisiwa, nun’hwelo lowu nyonxisaka. I gandzrelo ledzri hiseliwiki Yehovha hi lani Yehovha a a lelete Moxe ha kone.

22 Hiloko a buyisa hamba ya wubidzri ya xinuna kutani Aroni ni vanake va tlhanteka mavoko a nhlokweni ya yone. 23 Moxe a yi dlaya a gama a teka ngatinyana ya yone a yi tota wugan’wini bya ndleve ya xinene ya Aroni, ka litiho dzrake dzra dzrikulu dzra kone dzra voko dzra xinene, ni ka litiho dzra dzrikulu dzra kone dzra nkondzro wake wa xinene. 24 Hi ku landzrela, Moxe a vitana vana va Aroni a va a tota mun’wana ni mun’wana wavu ngatinyana a wugan’wini bya ndleve ya xinene, bya litiho dzra dzrikulu dzra kone dzra voko dzra xinene ni ka litiho dzra dzrikulu dzra kone dzra nkondzro wa xinene, kambe a ngati leyi saliki Moxe a yi xwanya ka matlhelo hinkwawu ya altari.

25 Ntsrhaku ka leswo, a teka fuzra, nkila wa ku nona, fuzra hinkwadzru ledzri nga ka mazrumbu, fuzra ledzri nga ka xivindzri, tinso ha tibidzri kun’we ni fuzra ledzri nga ka tone ni nenge wa xinene. 26 Ka ntsrhava wa mapawu lawa ma kalaka ma nga txheliwanga fermentu lowu a wu li mahlweni ka Yehovha, a teke pawu dzrin’we ledzri kalaka dzri nga txheliwanga fermentu nakone dzri hambiwiki dzri fana ni xitlhan’wana, pawu dzrin’wana ledzri hambiwiki dzri fana ni xitlan’wana nakone dzri patsriwiki ni mafuzra, kun’we ni pawu dzra ku phaphateka, a swi tlhanteka henhla ka fuzra ni ka nenge wa xinene. 27 Hi ku landzrela, a teka hinkwaswu leswo a swi beka mavokweni ya Aroni ni vanake, a sungula ku swi yisa mahlweni na a swi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha. 28 Ntsrhaku ka leswo, Moxe a swi teka mavokweni yavu a swi hisa swi mpukuka a altarini a henhla ka gandzrelo dzra ku hisiwa. Ku ve gandzrelo dzra ku simekiwa ka vaprista, nun’hwelo lowu nyonxisaka, gandzrelo ledzri hiseliwiki Yehovha.

29 Kutani Moxe a teka xifuva xa hamba a xi yisa mahlweni na a xi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha. A xifuva lexo xa hamba ya ku simekiwa ka vaprista xi ve xiyenge xa Moxe hi lani Yehovha a a mu lelete ha kone.

30 Kutani Moxe a teka mafuzranyana ya ku hlawulekisa ni ngatinyana leyi a yi li altarini a yi xwanya Aroni ni mpahla yake kun’we ni vanake ni mpahla yavu, lava a va li kun’we na yene. Hi ndlela leyo, a xwengise Aroni ni mpahla yake kun’we ni vanake ni mpahla yavu.

31 Hiloko Moxe a byela Aroni ni vanake a ku: “Swekani nyama leyi a nyangweni wa tende dzra ntlhanganu nakone mi ta yi da ni mapawu lawa ma nga ntsrhaveni wa ku simekiwa ka vaprista, hi lani Xikwembu Nkulukumba a ni leletiki ha kone a ku: ‘Aroni ni vanake va ta yi da.’ 32 A nyama ni mapawu leswi taka sala mi ta swi hisa ndzrilweni. 33 Mi nga txhuki mi suka kusuhi ni nyangwa wa tende dzra ntlhanganu ku dzringana 7 wa masiku, ku ya tlhasa loko masiku ya ku simekiwa kwenu swanga vaprista ma hela. Hikusa ku simekiwa kwenu swanga vaprista ku ta teka 7 wa masiku. 34 Leswi hi swi yentxiki namunhla hi leswi Yehovha a leletiki leswaku hi swi yentxa, akuva mi kombeleliwa ku dzrivaleliwa. 35 Mi ta va kusuhi ni nyangwa wa tende dzra ntlhanganu ku dzringana 7 wa masiku, wusiku ni nhlikanhi, nakone mi fanela ku landzra swileleto swa Yehovha akuva mi nga fi, hikusa hi leswi ni leletiwiki swone.”

36 Kutani Aroni ni vanake va yentxa hinkwaswu leswi Yehovha a swi leletiki hi ku tizrisa Moxe.

9 Hi siku dzra wu 8, Moxe a vitana Aroni ni vanake kun’we ni vakulukumba va Israyele. 2 Moxe a byela Aroni a ku: “Teka zrole* akuva dzri va gandzrelo dzra xidoho, ni hamba ya xinuna akuva yi va gandzrelo dzra ku hisiwa, ha swibidzri swi fanela ku va leswi hanyiki ha hombe, u swi nyikela mahlweni ka Yehovha. 3 Kambe u ta byela Vaisrayele u ku: ‘Tekani xiphongo akuva xi va gandzrelo dzra xidoho kun’we ni zrole ni xihambana xa xinuna, ha swibidzri swi fanela ku va ni lembe dzrin’we nakone swi hanye ha hombe, akuva swi va gandzrelo dzra ku hisiwa, 4 mi teka ni homu kun’we ni hamba ya xinuna akuva swi va magandzrelo ya ku kombela ku zrula, leswaku mi swi nyikela mahlweni ka Yehovha swanga magandzrelo, ni gandzrelo dzra tinhleke ledzri patsriwiki ni mafuzra, hikusa Yehovha a ta tivonekisa kwenu namunhla.’”

5 Xileswo, va teka leswi Moxe a va leletiki swone va swi yisa tendeni dzra ntlhanganu. Kutani nhlengeletanu hinkwayu yi tsrhindzrekela yi tlhasa yi yima mahlweni ka Yehovha. 6 Kutani Moxe a ku: “Leswi hi leswi Yehovha a leletiki leswaku mi swi yentxa, akuva ku phatima ka Yehovha ku humelela kwenu.” 7 Hiloko Moxe a byela Aroni a ku: “Tsrhindzrekela altarini u nyikela gandzrelo dzraku dzra xidoho ni gandzrelo dzraku dzra ku hisiwa u va u tikombelela ku dzrivaleliwa, u kombelela ni muti waku u gama u nyikelela tiko gandzrelo u va u dzri kombelela ku dzrivaleliwa, hi lani Yehovha a leletiki ha kone.”

8 Aroni a tekela ku tsrhindzrekela a altarini a dlaya zrole akuva dzri va gandzrelo ledzri taka tizrela swidoho swake. 9 Hiloko vana va Aroni va mu nyiketa ngati, kutani Aroni a peta litiho a ngatini a tota timhondzro ta altari, leyi saliki a yi txhela khumbini dzra altari, hi le hansi. 10 A hisa fuzra, tinso ni fuzra ledzri nga ka xivindzri, swa xihazri xa gandzrelo dzra xidoho akuva swi mpukuka a altarini, hi lani Yehovha a a lelete Moxe ha kone. 11 Nakone a hise nyama ni xikhumba a handle ka mbangu lowu a va dzime mintxhatxha.

12 Ntsrhaku ka leswo, Aroni a dlaya xihazri xa gandzrelo dzra ku hisiwa, kutani a vanake va mu nyiketa ngati, a gama a yi xwanya ka matlhelo hinkwawu ya altari. 13 Va mu nyikete swiyenge leswi tsremeleliwiki swa gandzrelo dzra ku hisiwa, ku patsra ni nhloko, a va a swi hisa swi mpukuka a altarini. 14 Handle ka leswo, a hlampswe mazrumbu ni minenge ya xihazri a va a swi hisa swi mpukuka a altarini a henhla ka gandzrelo dzra ku hisiwa.

15 Ntsrhaku ka leswo, Aroni a nyikela gandzrelo ledzri buyisiwiki hi vhanu: a dlaye xiphongo a xi nyikela hi mhaka ya swidoho swa vhanu, hi lani a yentxiki ha kone ka xihazri lexa ku sungula. 16 Nakone a nyikele gandzrelo dzra ku hisiwa hi ku landzra mayentxela lawa ma tolovelekiki.

17 Hi ku landzrela a nyikela gandzrelo dzra tinhleke, a nunsa xiyengenyana xa dzrone a tata voko, a xi hisa xi mpukuka a altarini, handle ka gandzrelo dzra ku hisiwa ledzri hambiwaka mixweni.

18 Ntsrhaku ka leswo, a dlaya homu ni hamba ya xinuna leswi buyisiwiki hi vhanu akuva swi va gandzrelo dzra ku kombela ku zrula. Kutani a vanake va mu nyiketa ngati a va a yi xwanya ka matlhelo hinkwawu ya altari. 19 Loko ku li fuzra dzra homu, nkila wa ku nona wa hamba ya xinuna, fuzra ledzri nga matlhelweni ka swizro swa le ndzreni, tinso ni fuzra ledzri nga ka xivindzri, 20 a fuzra ledzro hinkwadzru va dzri tlhanteke a swifuveni swa swihazri, ntsrhaku ka leswo a dzri hisa dzri mpukuka a altarini. 21 Kambe a xifuva ni nenge wa xinene swa xihazri xin’wana ni xin’wana, Aroni a swi yise mahlweni na a swi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha, hi lani Moxe a a lelete ha kone.

22 Kutani ntsrhaku ka loko Aroni a hambe gandzrelo dzra xidoho, gandzrelo dzra ku hisiwa, ni magandzrelo ya ku kombela ku zrula, a tlakuxela vhanu mavoko a va tovokisa a gama a xika. 23 Hi wugamu, Moxe na Aroni va nghena a tendeni dzra ntlhanganu va gama va huma va tovokisa vhanu.

Kutani a ku phatima ka Yehovha ku va henhla ka vhanu hinkwavu, 24 Hiloko ku xika ndzrilo wu pfa hi ka Yehovha, wu hisa gandzrelo dzra ku hisiwa ni fuzra a altarini. Loko vhanu hinkwavu va vona leswo, va sungula ku bandlukana va va va khinsama va kozramisa tinhloko va langusa hansi.

10 Hi ku famba ka nkama Nadabi na Abihu, vana va Aroni, mun’wana ni mun’wana wavu a teke xa ku khoma ndzrilo ha xone a va a txhela makhala ni muzri wa ku nun’hwela a henhla ka wone. Kutani va hisela Yehovha muzri wa ku nun’hwela hi ndlela leyi kalaka yi nga yamukeleki, ku nga leswi Xikwembu Nkulukumba a kalaka a nga va leletanga leswaku va swi yentxa. 2 Hiloko ku xika ndzrilo wu pfa hi ka Yehovha wu va hisa, lakakuva va fa mahlweni ka Yehovha. 3 Kutani Moxe a byela Aroni a ku: “Yehovha a te: ‘Lava va nga kusuhi na mine va ta ni xwengisa, nakone ni ta dzrumisiwa mahlweni ka vhanu hinkwavu.’” Aroni a tama a miyela.

4 Xileswo Moxe a vitana Mixayele na Elizafani, vana va Uziyele, papayi lwentsrongo wa Aroni, a va byela a ku: “Buyani halenu mi ta ta tlakula vamakwenu mi va humesa a mbangwini wa ku xwenga mi va yisa handle ka mintxhatxha.” 5 Xileswo va ya, va tlhasa va va tlakula ni mpahla yavu ya ku leha va va humesa handle ka mintxhatxha, hi lani Moxe a a va lelete ha kone.

6 Hiloko Moxe a byela Aroni ni vanake lavan’wana, Eliyazari na Itamari, a ku: “Mi nga tsrhikeni ku hlayisa misisi ya tinhloko tenu kumbe mi handzrula mpahla yenu akuva mi nga fi, ni leswaku Xikwembu Nkulukumba a nga hlundzrukeli nhlengeletanu hinkwayu. Vamakwenu, ku nga muti hinkwawu wa Israyele, hi vone va taka dzrilela lava Yehovha a va dlayiki hi ndzrilo. 7 Mi nga txhuki mi suka kusuhi ni nyangwa wa tende dzra ntlhanganu akuva mi nga fi, hikusa Yehovha a mi hlawulekise* hi mafuzra.” Xileswo va yentxa hi lani Moxe a va byeliki ha kone.

8 Ntsrhaku ka leswo, Yehovha a byela Aroni a ku: 9 “Loko mi buya tendeni dzra ntlhanganu, wene ni vanaku, mi nga txhuki mi nwa vhinyu kumbe swa ku nwa swin’wana leswi popswanaka akuva mi nga fi. Lexi i xileleto lexi nga helikiki a tinxakeni tenu hinkwatu. 10 Leswi swi ta kombisa ku hambana ka ntxhumu lowu xwengiki ni ntxhumu lowu nyamiki, ni ka ntxhumu lowu kalaka wu nga basanga ni lowu basiki, 11 swi tlhela swi dondzrisa Vaisrayele milawu hinkwayu leyi Yehovha a va byeliki yone hi ku tizrisa Moxe.”

12 Kutani Moxe a vulavula na Aroni kun’we ni vanake lava saliki, Eliyazari na Itamari, a ku: “Ka magandzrelo lama hiseliwiki Yehovha, tekani leswi saliki ka magandzrelo ya tinhleke mi hamba mapawu lawa ma kalaka ma nga txheliwanga fermentu* mi ma dela kusuhi ni altari, hikusa i ntxhumu wa ku xwengisisa. 13 Mi fanela ku ma dela mbangwini lowu xwengiki, hikusa i xiyenge xaku ni vanaku, lexi pfaka hi ka magandzrelo lama hiseliwiki Yehovha, hikusa hi leswi ni leletiwiki swone. 14 Mi ta tlhela mi dela a mbangwini wa ku xwenga a xifuva lexi nyikeliwaka swanga gandzrelo dzra ku zrendzrelekisiwa, ni nenge wa xiyenge xa ku xwenga, n’wine kun’we ni vanenu va madjaha ni va van’hwanyana, hikusa mintxhumu leyi yi nyikiwe n’wine ni vanenu ka magandzrelo ya ku kombela ku zrula lama nyikeliwaka hi Vaisrayele. 15 Va ta buyisa nenge wa xiyenge xa ku xwenga, xifuva xa gandzrelo dzra ku zrendzrelekisiwa, kun’we ni fuzra dzra gandzrelo dzra ku hisiwa, akuva swi zrendzrelekisiwa, swi yisiwa mahlweni na swi tlhelisiwa ntsrhaku, swanga gandzrelo ledzri zrendzrelekisiwaka mahlweni ka Yehovha, nakone xi ta va xiyenge xenu ni xa vanenu hi lani ku nga helikiki, hi lani Yehovha a leletiki ha kone.”

16 Moxe a sungula ku djuletela xiphongo xa gandzrelo dzra xidoho, ka matlhelo hinkwawu, kutani a gungula leswaku a xi hisiwile. Xileswo a hlundzrukela vana va Aroni lava a va salile, Eliyazari na Itamari, a ku: 17 “Ha yini nyama ya xiphongo ya gandzrelo dzra xidoho mi nga yi delanga mbangwini wa ku xwenga swanga hi leswi yi nga ntxhumu wa ku xwengisisa? Xana a yi nyikiwanga n’wine akuva mi ta hlamulela nhlengeletanu swihoxo swa yone ni ku yi kombelela ku dzrivaleliwa mahlweni ka Yehovha? 18 Ma swi twa! A ngati ya yone a yi nghenisiwanga a mbangwini wa ku xwenga, nakunene a mi fanela ku va mi yi dele mbangwini wa ku xwenga, hi lani ni leletiwiki ha kone.” 19 Aroni a hlamula Moxe a ku: “Namunhla va nyikele gandzrelo dzra xidoho ni gandzrelo dzra ku hisiwa a mahlweni ka Yehovha, kambe ni humeleliwe hi mintxhumu leyi. Loko namunhla a ne da gandzrelo dzra xidoho, xana a swi ta va swi mu nyonxisile Yehovha?” 20 Loko Moxe a twa leswo a nyonxa.

11 Kutani Yehovha a byela Moxe na Aroni a ku: 2 “Byelani Vaisrayele mi ku: ‘Ka swihazri swa le misaveni, leswi mi nga swi daka hi leswi: 3 Xihazri xin’wana ni xin’wana lexi nga ni sondzro ledzri yavaniki hi swiyenge swibidzri nakone dzri pfulekiki hi ku helela futsrhi xi daka xi gama xi gayela xi nga diwa.

4 “‘Kambe a swihazri leswi swi daka swi gama swi gayela kumbe leswi nga ni sondzro ledzri yavaniki hi swiyenge swibidzri leswi mi kalaka mi nga fanelanga ku swi da hi leswi: kamela, dzra da dzri gama dzri gayela kambe a sondzro dzra dzrone a dzri yavananga. Dzri nyamile kwenu. 5 Mpfundla wa le mazribyeni,* hikusa wa da wu tlhela wu gayela kambe a wu na sondzro ledzri yavaniki. Wu nyamile kwenu. 6 Na wo mpfundla, hikusa wa da wu tlhela wu gayela kambe a wu na sondzro ledzri yavaniki. Wu nyamile kwenu. 7 Ni nguluve, hikusa yi ni sondzro ledzri yavaniki hi swiyenge swibidzri nakone dzri pfulekiki hi ku helela kambe loko yi dile a yi gayeli. Yi nyamile kwenu. 8 Mi nga txhuki mi da nyama ya swihazri leswo kumbe ku khumba mintsrumbu ya swone. Swi nyamile kwenu.

9 “‘Ka swihazri hinkwaswu leswi nga matini mi nga da leswi nga ni swihupa ni mayaya, ku nga ha va swa le malwandle kumbe swa le milambyeni. 10 Kambe hinkwaswu leswi nga le malwandle ni le milambyeni, leswi kalaka swi nga na swihupa ni mayaya, swihazrahazrana hinkwaswu leswi taliki matini ni swihazri leswin’wana hinkwaswu leswi* hanyaka matini. I ntxhumu lowu nyenyentsaka kwenu. 11 Ina, swi fanela ku va leswi nyenyentsaka kwenu, mi nga txhuki mi da ntxhumu ka nyama ya swone, nakone nyenyani mintsrumbu ya swone. 12 A swihazri hinkwaswu swa le matini leswi kalaka swi nga na swihupa ni mayaya i ntxhumu lowu nyenyentsaka kwenu.

13 “‘Ka swivumbiwa leswi hahaka, hi leswi leswi mi fanelaka ku swi vona na swi li leswi nyenyentsaka nakone mi kalaka mi nga fanelanga mi swi da: gama, gama ledzri daka tihlampfi, gama dzra ku leha dzra ntima ledzri nga ni nhloko ya ku leha ya ku pfumala mavoya, 14 mangatlu wa ku pshwuka ni mixaka hinkwayu ya mangatlu wa ntima, 15 mixaka hinkwayu ya magwavava, 16 yintxa, xikhovha, n’wantsrekute, mixaka hinkwayu ya swikotana, 17 xikhovha xa xitsrongo, n’wampekupeku, xikhovha xa ku leha, 18 sekwa, khungula, gama dzra ku leha dzra nhloko ya ku pfumala mavoya,* 19 yindwa, mixaka hinkwayu ya nyakukolwa, n’wamahlanga ni ntengeledjana. 20 Handle ka leswo, a swihazrahazrana hinkwaswu leswi hahaka ni leswi fambafambaka misaveni leswi nga ni mune wa minenge i ntxhumu lowu nyenyentsaka kwenu.

21 “‘Ka swihazrahazrana hinkwaswu leswi hahaka, leswi taliki misaveni nakone swi fambaka hi mune wa minenge, mi nga da ntsena leswi nga ni minenge yibidzri ya ku leha ya ku ntlula ha yone. 22 Hi leswi mi nga swi daka: mixaka ya ku siyanasiyana ya mintete leyi tolovelaka ku yendzra, mixaka yimbeni ya mintete leyi diwaka, swiyendlwa, ni mintete leyi tolovelekiki. 23 Swihazrahazrana hinkwaswu leswi hahaka nakone swi nga ni mune wa minenge leswi taliki misaveni, i ntxhumu lowu nyenyentsaka kwenu. 24 A swihazrahazrana leswo swi nga ha mi nyamisa. Mun’wana ni mun’wana lweyi a khumbaka xin’we xa swihazrana leswo lexi fiki a ta va lweyi a nyamiki ku ya tlhasela madambyeni. 25 Mun’wana ni mun’wana lweyi a zrwalaka xin’we xa swihazrana leswo lexi fiki, a fanela ku hlampswa mpahla yake; a ta va lweyi a nyamiki ku ya tlhasela madambyeni.

26 “‘Xihazri xin’wana ni xin’wana lexi nga ni sondzro ledzri yavaniki kambe dzri kalaka dzri nga yavananga hi swiyenge swibidzri, lexi kalaka xi nga gayeli loko xi dile, a xi basanga kwenu. Mun’wana ni mun’wana lweyi a khumbaka swihazri leswo a ta va lweyi a nyamiki. 27 Swihazri hinkwaswu leswi fambaka hi mune wa minenge leswi kalaka swi nga na masondzro swi nyamile kwenu. Mun’wana ni mun’wana lweyi a khumbaka ntsrumbu wa swone a ta va lweyi a nyamiki ku ya tlhasela madambyeni. 28 Mun’wana ni mun’wana lweyi a zrwalaka ntsrumbu wa swone a fanela ku hlampswa mpahla yake nakone a ta va lweyi a nyamiki ku ya tlhasela madambyeni. Swi nyamile kwenu.

29 “‘Hi leswi swivumbiwa swa ku nkwala leswi nga misaveni leswi nyamiki kwenu: ngole, khondlo, mixaka hinkwayu ya makwahle, 30 damazrela, kwahle ledzrikulu, nkolombya wa mabatibati, nkolombya wa ku tsrhama ka misava ni lompfana. 31 Leswi i swivumbiwa swa ku nkwala leswi nga misaveni leswi nyamiki kwenu. Mun’wana ni mun’wana lweyi a khumbaka mintsrumbu ya swone a ta va lweyi a nyamiki ku ya tlhasela madambyeni.

32 “‘Loko xin’we xa swihazri leswo xo fa xi va xi wela ntxhumu wun’wana ni wun’wana, ku nga ha va wa pulangu, mpahla ya kukazri, xikhumba kumbe saka; wu ta va lowu kalaka wu nga basanga. Swi nge na mhaka leswaku ntxhumu wolowo wu tizriseliwa yini, wu fanela ku lovekiwa matini nakone wu ta va lowu kalaka wu nga basanga ku ya tlhasela madambyeni; ntsrhaku ka leswo wu ta va lowu basiki. 33 Loko swo wela a xibyeni xa vumba, a xibya lexo xi fanela ku pfotlotiwa, nakone hinkwaswu leswi a swi li ndzreni ka xone swi ta va leswi kalaka swi nga basanga. 34 Ntxhumu wun’wana ni wun’wana lowu diwaka lowu nga ha kumiwaka hi mati ya xibya lexo wu ta va lowu kalaka wu nga basanga, nakone swa ku nwa swin’wana ni swin’wana leswi nga ha vaka swi li ka xibya lexo, swi ta va leswi kalaka swi nga basanga. 35 Ntxhumu wun’wana ni wun’wana lowu weliwaka hi xin’we xa swihazrana lexi fiki wu ta va lowu kalaka wu nga basanga nakone wu fanela ku hohlotiwa, ku nga ha va xitiko kumbe sweko. A mintxhumu leyo a yi basanga nakone yi ta tama yi va leyi kalaka yi nga basanga kwenu. 36 Kambe loko xo wela a xihloveni kumbe lani ku bekisiwaka kone mati, a mimbangu leyo yi ta tama yi va leyi basiki, kambe lweyi a khumbaka swihazrana leswo leswi fiki a ta va lweyi a kalaka a nga basanga. 37 Loko xihazrana lexo lexi fiki xo wela mbewu leyi taka byaliwa, mbewu leyo yi ta tama yi va leyi basiki. 38 Kambe loko mbewu leyo ye tsrakamisiwa kutani xiyenge xa xihazrana lexo lexi fiki xi yi khumba, mbewu leyo yi ta va leyi kalaka yi nga basanga kwenu.

39 “‘Loko xihazri xa kukazri lexi diwaka xo txhuka xi fa, lweyi a khumbaka ntsrumbu wa xone a ta va lweyi a kalaka a nga basanga ku ya tlhasela madambyeni. 40 Lweyi a daka xiyenge xa kukazri xa ntsrumbu wa xihazri lexo a fanela ku hlampswa mpahla yake, nakone a ta va lweyi a nyamiki ku ya tlhasela madambyeni. Lweyi a zrwalaka ntsrumbu wa xihazri lexo a fanela ku hlampswa mpahla yake nakone a ta va lweyi a nyamiki ku ya tlhasela madambyeni. 41 Swihazrahazrana hinkwaswu leswi fambafambaka misaveni i ntxhumu wa ku nyenyentsa. A swi fanelanga swi diwa. 42 Mi nga txhuki mi da xihazri ni xin’we lexi fambaka hi khuzri, lexi fambaka hi mune wa minenge kumbe swihazrahazrana leswi fambafambaka misaveni leswi nga ni minenge ya yinyingi, hikusa swi nyamile. 43 Mi nga tintxhimisi* hi kola ka swihazrahazrana leswi fambafambaka misaveni, mi nga tinyamisi hi kola ka swone. 44 Hikusa hi mine Yehovha Xikwembu Nkulukumba; tixwengisani mi va lava xwengiki, hikusa mine ni xwengile. Xileswo mi nga txhuki mi tinyamisa hi swihazrahazrana leswi fambafambaka misaveni. 45 Hikusa hi mine Yehovha lweyi a mi humesiki a tikweni dzra Egipta akuva ni kombisa leswaku ni Xikwembu Nkulukumba wenu; mi fanela ku va lava xwengiki, hikusa mine ni xwengile.

46 “‘Lowu i nawu mayelanu ni swihazri, swivumbiwa leswi hahaka, swivumbiwa leswi hanyaka matini ni swihazrahazrana hinkwaswu leswi fambafambaka misaveni, 47 akuva ku va ni ku hambana xikazri ka swihazri leswi nyamiki ni leswi basiki, ni ku hambana xikazri ka swivumbiwa leswi hanyaka leswi nga ha diwaka ni leswi kalaka swi nga fanelanga swi diwa.’”

12 Yehovha a ya mahlweni a byela Moxe a ku: 2 “Byela Vaisrayele u ku: ‘Loko wansati wa kukazri a kuma nyimba* a gama a phuluka n’wana wa djaha, a ta va lweyi a nyamiki ku dzringana 7 wa masiku, ku fana ni loko a nyamile hi ku va a li nkameni wake.* 3 A n’wana yelweyo a ta sokisiwa* hi siku dzra wu 8. 4 A wansati yelweyo a ta tama a tibasisa a ngatini yake ku dzringana 33 wa masiku lama landzrelaka. A nga fanelanga a khumba ntxhumu ni wun’we lowu xwengiki nakone a nga fanelanga a nghena mbangwini wa ku xwenga ku ya tlhasa loko a heta masiku yake ya ku tibasisa.

5 Loko a phuluka n’wana wa n’hwanyana, a ta va lweyi a nyamiki ku dzringana 14 wa masiku ku fana ni loko a li nkameni wake. A ta tama a tibasisa a ngatini yake* ku dzringana 66 wa masiku lama landzrelaka. 6 Loko masiku yake ya ku tibasisa hi leswi a phulukiki n’wana wa djaha kumbe wa n’hwanyana ma helile, a ta heketela muprista a nyangweni wa tende dzra ntlhanganu: Xihambana xa xinuna lexi nga ni lembe dzrin’we, akuva xi va gandzrelo dzra ku hisiwa, ni xivambalana kun’we ni vondlo dzra xituvana, akuva swi va gandzrelo dzra xidoho. 7 A muprista a ta swi nyikela ka Yehovha a kombelela wansati yelweyo ku dzrivaleliwa, kutani a ta basisiwa a ngatini yake. Lowu i nawu wa mayelanu ni wansati lweyi a phulukaka, swi nge na mhaka leswaku a phuluka n’wana wa djaha kumbe wa n’hwanyana. 8 Kambe loko a nga na makotela ya ku kuma xihambana, a fanela ku nyikela swivambalana swibidzri kumbe swituvana swibidzri, akuva xin’we xi va gandzrelo dzra ku hisiwa, xin’wana xi va gandzrelo dzra xidoho, nakone a muprista a ta kombelela wansati yelweyo ku dzrivaleliwa, kutani a ta basisiwa.’”

13 Yehovha a ye mahlweni a vulavula na Moxe na Aroni a ku: 2 “Loko mhunu wa kukazri o txhuka a pfimba mbangu wa kukazri, a huma xilondzra kumbe ntsrhosi ka xikhumba,* leswi nga ha tikombaka ingiki i nhlokonho,* a fanela ku yisiwa ka muprista Aroni kumbe ka mun’we wa vanake lava nga vaprista. 3 A muprista a ta kambela mavabyi wolawo lama nga ka xikhumba. Loko mavoya yake ma ndzruluke ma va ya ku basa, wu va mbangu lowo wu yenta ku tlula xikhumba, i mavabyi ya nhlokonho. A muprista a ta kambela mavabyi wolawo a va a hlaya leswaku a nyamile. 4 Kambe loko ntsrhosi lowu nga ka xikhumba wu li wa ku basa nakone wu tikomba wu nga yentanga ku tlula xikhumba, futsrhi a mavoya lawa ma nga ka wone ma nga ndzrulukanga ma va ya ku basa, a muprista a ta mu beka kule ni vhanu ku dzringana 7 wa masiku. 5 Hi siku dzra wu 7 a muprista a ta tlhela a mu kambela nakone loko mavabyi yake ma tama ma va xileswi a ma li xiswone a ku sunguleni, ma nga hangalakanga ni xikhumba, a muprista a ta tlhela a mu beka kule ni vhanu ku dzringana 7 wa masiku.

6 “Hi siku dzra wu 7 a muprista a ta tlhela a mu kambela; loko mavabyi ma nyamalalile nakone ma nga hangalakanga ni xikhumba, a muprista a ta hlaya leswaku a basile; a ko va mavabyinyana ntsena. A mhunu lweyo a ta hlampswa mpahla yake, kutani a ta va lweyi a basiki. 7 Kambe loko mavabyi* yake ma gama ma voneka hi ku helela leswaku ma hangalake ni xikhumba ntsrhaku ka loko a humelele ka muprista akuva a hlaya leswaku a basile, a ta tlhela a ya ka muprista.* 8 A muprista a ta kambela mavabyi wolawo; loko ma hangalake ni xikhumba a ta hlaya leswaku a nyamile. I mavabyi ya nhlokonho.

9 “Loko mhunu wa kukazri swi tikomba ingiki a ni nhlokonho a fanela ku yisiwa ka muprista, 10 kutani a muprista a ta mu kambela. Loko xikhumba xake xi pfimbile xi va xi ndzruluka xa ku basa ni ku yentxa leswaku a mavoya yake ma va ya ku basa, ku gama ku huma xilondzra ka mbangu lowu pfimbiki, 11 i nhlokonho ya xikhumba leyi kalaka yi nga holi, a muprista a ta hlaya leswaku a nyamile. A swi nge ti vilela leswaku muprista a mu yisa kule ni vhanu hikusa a nyamile. 12 Kutani loko nhlokonho yi hangalaka ka xikhumba hinkwaxu, ku sukela nhlokweni ku ya tlhasa ka minkondzro, lakakuva muprista a kota ku vona nhlokonho leyo, 13 a va a mu kambela a vona leswaku a nhlokonho yi funekete xikhumba hinkwaxu, a muprista a ta hlaya leswaku a mhunu yelweyo lweyi a vabyaka a basile.* A xikhumba xake hinkwaxu xi ndzruluke xa ku basa; a nga nyamanga. 14 Kambe siku ledzri a taka huma xilondzra lexi pfulekiki a ta va lweyi a nyamiki. 15 Loko muprista a vona xilondzra lexi pfulekiki a ta hlaya leswaku mhunu yelweyo a nyamile. A xilondzra lexi pfulekiki xi nyamile. I mavabyi ya nhlokonho. 16 Kambe loko xilondzra lexi pfulekiki xo gama xi tlhela xi ndzruluka xa ku basa, a ta ya ka muprista. 17 A muprista a ta mu kambela; loko a xiya leswaku a xilondzra xi ndzruluke xa ku basa a ta byela mhunu yelweyo lweyi a vabyaka leswaku a basile. A nga nyamanga.

18 “Loko mhunu wa kukazri a huma zrumba ka xikhumba dzri gama dzri hola, 19 kambe lani a ku ni zrumba ku ndzruluka ka ku basa ku va ku pfimba kumbe ku va ni ntsrhosi wa ku zuka, a fanela ku ya ka muprista. 20 A muprista a ta kambela ntsrhosi lowo; loko wu tikomba na wu yentile ku tlula xikhumba nakone a mavoya ma ndzruluke ma va ya ku basa, a muprista a ta hlaya leswaku a mhunu yelweyo a nyamile. Lexi humiki lani a ku ni zrumba i nhlokonho. 21 Kambe loko muprista a kambela ntsrhosi lowo a va a vona leswaku a mavoya a ma ndzrulukanga ya ku basa, nakone a wa ha yentanga ku tlula xikhumba futsrhi wu sungule ku nyamalala, a ta beka mhunu lweyo kule ni vhanu vambeni ku dzringana 7 wa masiku. 22 Loko swi voneka hi ku helela leswaku a ntsrhosi wu kule wu va wu hangalaka ni xikhumba hinkwaxu, a muprista a ta hlaya leswaku a nyamile. I mavabyi. 23 Kambe loko ntsrhosi wu nga kulanga, leswi liki, wu nga hangalakanga, i ku pfimba ka zrumba ntsena; a muprista a ta hlaya leswaku a basile.

24 “Kumbe loko mhunu wa kukazri a ni ntsrhosi wa ku va a pshwe hi ndzrilo kumbe loko nyama ya lani ku pshwiki yi ndzruluka yi va ntsrhosi wa ku zuka kumbe wa ku basa, 25 a muprista a ta wu kambela. Loko mavoya lawa ma nga ka ntsrhosi ma ndzruluke ma va ya ku basa, nakone ntsrhosi lowo wu voneka na wu yente ngopfu ku tlula xikhumba; lexi humiki ka ntsrhosi lowo i nhlokonho, a muprista a ta hlaya leswaku mhunu lweyo a nyamile. I mavabyi ya nhlokonho. 26 Kambe loko muprista a kambela ntsrhosi lowo a va a vona leswaku a ku na mavoya ya ku basa nakone a wu yentanga ku tluka xikhumba futsrhi wu sungule ku nyamalala, a muprista a ta mu beka kule ni vhanu vambeni ku dzringana 7 wa masiku. 27 Hi siku dzra wu 7 a muprista a ta mu kambela; loko swi voneka ha hombe leswaku a ntsrhosi wu hangalake ni xikhumba, a muprista a ta hlaya leswaku a nyamile. I mavabyi ya nhlokonho. 28 Kambe loko ntsrhosi wu nga kulanga, leswi liki, wu nga hangalakanga ni xikhumba, nakone wu sungule ku nyamalala, o va ku pfimbanyana ka ntsrhosi hi leswi a pshwiki; a muprista a ta hlaya leswaku a basile, hikusa e pfimba hi leswi a pshwiki.

29 “Loko wanuna wa kukazri kumbe wansati a va ni mavabyi ya xikhumba a nhlokweni kumbe ka xilepfu, 30 a muprista a ta kambela mbangu wolowo. Loko wu tikomba wu yentile ku tlula xikhumba wu tlhela wu va ni misisi* ya halandi* leyi patsraka ni ku holokela, a muprista a ta hlaya leswaku mhunu lweyo a nyamile; i mavabyi ya xikhumba xa nhloko kumbe xa xilepfu. I nhlokonho ya le ka nhloko kumbe ya le ka xilepfu. 31 Kambe loko muprista a xiya leswaku a mbangu wolowo a wu yentanga ku tlula xikhumba ni leswaku a wu na misisi ya ntima, a fanela ku beka lweyi a vabyaka kule ni vambeni ku dzringana 7 wa masiku. 32 Hi siku dzra wu 7 a muprista a ta kambela mbangu wolowo; loko mavabyi ma nga hangalakanga ni xikhumba nakone misisi yi nga li ya halandi, futsrhi wu tikomba na wu nga yentanga ku tlula xikhumba, 33 a mhunu lweyo a fanela ku tsremeta misisi ni malepfu, kambe na a nga tsremeti mbangu lowu kumiwiki hi mavabyi. Kutani a muprista a ta beka mhunu lweyo kule ni vhanu van’wana ku dzringana 7 wa masiku.

34 “Hi siku dzra wu 7 a muprista a ta tlhela a kambela mbangu lowu kumiwiki hi mavabyi; loko mavabyi ya xikhumba xa nhloko kumbe xa xilepfu ma nga hangalakanga ni xikhumba ni loko mbangu wa kone wu nga yentanga ku tlula xikhumba, a muprista a ta hlaya leswaku mhunu lweyo a basile; a fanela ku hlampswa mpahla yake, kutani a ta va lweyi a basiki. 35 Kambe loko swi voneka hi ku helela leswaku mavabyi lawo ma hangalake ni xikhumba ntsrhaku ka loko ku hlayiwe leswaku mhunu lweyo a basile, 36 a muprista a ta kambela mhunu lweyo; loko mavabyi ma hangalake ni xikhumba, a swa ha vileli leswaku a muprista a kambela misisi ya halandi; a mhunu lweyo a nyamile. 37 Kambe loko muprista a kambela a va a xiya leswaku a mavabyi a ma hangalakanga nakone ku mile misisi ya ntima, a mavabyi ma dahekile. A mhunu lweyo a dahekile, nakone a muprista a ta hlaya leswaku a basile.

38 “Loko wanuna kumbe wansati a huma mintsrhosi ya ku basa ka xikhumba,* 39 a muprista a ta kambela mintsrhosi yoleyo. Loko mintsrhosi leyo yi li ya ku basa, o va ku tlhukuvela ka xikhumba ntsena, a nga nyamanga.

40 “Loko wanuna wa kukazri a suketela misisi ka nhloko, kutani a va ni mpandlha, a nga nyamanga. 41 Loko a suketela misisi a mahlweni ka nhloko ku gama ku va mpandlha, a nga nyamanga. 42 Kambe loko a humeliwa hi xilondzra xa ku zuka ka mpandlha, a henhla kumbe a mahlweni ka nhloko, i nhlokonho ya le henhla ka nhloko kumbe ka ximombo. 43 A muprista a ta mu kambela. Loko mbangu wolowo lowu pfimbiki ka mpandlha a henhla ka nhloko kumbe ka ximombo wu li wa ku zuka nakone wu fana ni mavabyi ya nhlokonho ya le ka xikhumba, 44 a ni mavabyi ya nhlokonho. A nyamile, nakone a muprista a fanela ku hlaya leswaku a nyamile, hikusa a ni mavabyi a nhlokweni yake. 45 A mhunu lweyi a nga ni mavabyi ya nhlokonho a fanela ku yambala mpahla ya ku handzrukela, a nga hlayisi misisi yake nakone a mbhonya nomu* a va a huwelela a ku: ‘Ni nyamile, ni nyamile!’ 46 A ta va lweyi a nyamiki ku dzringana nkama hinkwawu lowu a taka va na a vabya. Swanga hi leswi a nyamiki, a fanela ku tsrhama kule ni vhanu vambeni. A ta tsrhama handle ka mbangu lowu ku dzimiwiki ka wone mintxhatxha.

47 “Loko a nhlokonho yi tlulela mpahla, ku nga ha va mpahla leyi hambiwiki hi voya, kumbe leyi hambiwiki hi panu ya linyu, 48 ku nga ha va ka tingoti* ta panu leyi hambiwiki hi linyu kumbe hi voya, ka xikhumba kumbe ka ntxhumu wa kukazri lowu hambiwiki hi xikhumba, 49 kutani ku humelela bati dzra mavabyi, dzra nkuxe kumbe dzra ku zuka, ka mpahla, ka xikhumba, ka tingoti ta panu, kumbe ka ntxhumu wa kukazri lowu hambiwiki hi xikhumba, i mavabyi ya nhlokonho, nakone wu fanela ku ya kombisiwa ka muprista. 50 A muprista a ta kambela bati ledzro, nakone a fanela ku beka ntxhumu lowo kule ni vhanu ku dzringana 7 wa masiku. 51 Hi siku dzra wu 7 a ta kambela bati ledzro, loko a vona leswaku dzri hangalakile ka mpahla, ka tingoti ta panu, kumbe ka xikhumba (swi nge na mhaka leswaku xi tizriseliwa yini), a bati ledzro i nhlokonho leyi dlayaka nakone ntxhumu wolowo wu nyamile. 52 A fanela ku hisa mpahla, panu leyi lukiwiki hi tingoti (swi nge na mhaka leswaku i panu leyi hambiwiki hi voya kumbe hi linyu), kumbe ntxhumu lowu hambiwiki hi xikhumba, leswi humeliwiki hi bati, hikusa i nhlokonho leyi dlayaka. Swi fanela ku hisiwa a ndzrilweni.

53 “Kambe loko muprista a kambela a va a vona leswaku a mavabyi a ma hangalakanga ka mpahla, ka panu leyi lukiwiki hi tingoti kumbe ka ntxhumu wun’wana lowu hambiwiki hi xikhumba, 54 a ta zruma vhanu va hlampswa ntxhumu lowu tluleliwiki hi mavabyi, nakone a ta tlhela a wu beka kule ni vhanu ku dzringana 7 wa masiku. 55 A muprista a ta kambela ntxhumu lowu tluleliwiki hi mavabyi ntsrhaku ka loko wu hlampswiwe ha hombe. Loko ntxhumu lowo wu tama wu va ni mavabyi hi lani a swi li ha kone a ku sunguleni, nambiloko mavabyi lawo ma nga hangalakanga, a ntxhumu lowo wu nyamile. U fanela ku wu hisa ndzrilweni, hikusa wu honiwile hi le handle ni hi le ndzreni.

56 “Kambe ntsrhaku ka loko ntxhumu lowo wu hlampswiwe ha hombe kutani muprista a wu kambela a va a xiya leswaku a bati dzri sungule ku nyamalala, a ta susa mbangu lowo lowu kumiwiki hi mavabyi, ka mpahla, ka xikhumba, kumbe ka tingoti ta panu. 57 Nambitasu, loko bati dzra ha tama dzri humelela ka mbangu wumbeni wa mpahla kumbe wa panu leyi lukiwiki hi tingoti, kumbe ka ntxhumu lowu hambiwiki hi xikhumba; swi komba leswaku mo hangalaka, kutani u fanela ku hisa ntxhumu lowu nga ni mavabyi a ndzrilweni. 58 Kambe loko wo hlampswa mpahla, panu leyi lukiwiki hi tingoti kumbe ntxhumu lowu hambiwiki hi xikhumba, kutani a bati dzri nyamalala, swi fanela ku tlhela swi hlampswiwa hi khambi dzra wubidzri, kutani swi ta va leswi basiki.

59 “Lowu i nawu mayelanu ni mavabyi ya nhlokonho lawa ma nga ha kumekaka ka mpahla leyi hambiwiki hi voya kumbe hi linyu, ka tingoti ta panu kumbe ka ntxhumu lowu hambiwiki hi xikhumba, akuva ku hlayiwa leswaku wu basile kumbe wu nyamile.”

14 Yehovha a ya mahlweni a byela Moxe a ku: 2 “Loko mhunu lweyi a nga ni nhlokonho a yisiwa ka muprista, hi lowu nawu lowu taka landzriwa hi siku ledzri ku taka hlayiwa leswaku a basile. 3 A muprista a ta huma a mbangwini lowu va dzimiki ka wone mintxhatxha a va a mu kambela. Loko nhlokonho yake yi dahekile, 4 a muprista a ta mu byela leswaku a buyisa tinyanyana tibidzri leti hanyaka nakone ti kalaka ti nga nyamanga, lihunyi dzra nkedari, ngoti ya ku pshwuka ni xiphundla xa hisopa* akuva a basisiwa. 5 A muprista a ta zrumisa leswaku a nyanyana yin’we yi dlayeliwa ka xibya xa vumba lexi nga ni mati lama kiwiki xihloveni. 6 Ntsrhaku ka leswo, a ta teka nyanyana leyi hanyaka, lihunyi dzra nkedari, ngoti ya ku pshwuka ni xiphundla xa hisopa, a swi peta ka ngati ya nyanyana leyi dlayeliwiki ka mati lama kiwiki xihloveni. 7 Kutani a ta xwanya lweyi a hanyisiwaka ka mavabyi ya nhlokonho hi ngati ku dzringana 7 wa makhambi a va a hlaya leswaku a basile, a gama a tsrhika nyanyana leyi hanyaka yi haha yi tifambela nhoveni.

8 “Lweyi a tibasisaka ka mavabyi ya nhlokonho a fanela ku hlampswa mpahla yake, a byevula misisi yake hinkwayu* a va a hlamba, kutani a ta va lweyi a basiki. Ntsrhaku ka leswo, a nga nghena a mbangwini lowu va dzimiki ka wone mintxhatxha kambe a nge ti nghena a ntxhatxheni wake ku dzringana 7 wa masiku. 9 Hi siku dzra wu 7, a fanela ku byevula misisi hinkwayu ya nhloko yake, malepfu ni tinxiyi. Ntsrhaku ka loko a byevule misisi yake hinkwayu a ta ya hlampswa mpahla yake a va a hlamba, kutani a ta va lweyi a basiki.

10 “Hi siku dzra wu 8, a ta teka swihambana swibidzri swa xinuna leswi hanyiki ha hombe ku patsra ni xihambana xin’we xa xisati, na swo ho va ni lembe dzrin’we, a teka ni mapa lamanene ya kolomu ka makilu mazrazru* lawa ma patsriwiki ni mafuzra, akuva ma va gandzrelo dzra tinhleke, a teka ni mafuzra ya kolomu ka hamfu ya litru.* 11 A muprista lweyi a hlayaka leswaku mhunu lweyo a basile, a ta yisa mhunu yelweyo lweyi a basisiwiki ku patsra ni magandzrelo lawo a mahlweni ka Yehovha, a nyangweni wa tende dzra ntlhanganu. 12 A muprista a ta teka xihambana xin’we xa xinuna a xi nyikela swanga gandzrelo dzra nandzru ku patsra ni kolomu ka hamfu ya litru dzra mafuzra, kutani a swi yisa mahlweni na a swi tlhelisa ntsrhaku, swanga gandzrelo ledzri zrendzrelekisiwaka a mahlweni ka Yehovha. 13 Ntsrhaku ka leswo, a ta dlaya xihambana lexo xa xinuna a mbangwini wa ku xwenga lani hi ntolovelo ku dlayeliwaka kone swihazri swa gandzrelo dzra xidoho ni swa gandzrelo dzra ku hisiwa, hikusa ku fana ni gandzrelo dzra xidoho, a gandzrelo dzra nandzru dzri lumba muprista. I ntxhumu wa ku xwengisisa.

14 “Ntsrhaku ka leswo, a muprista a ta teka ngatinyana ya gandzrelo dzra nandzru, kutani a yi tota wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni dzra nkondzro wa xinene, swa lweyi a tibasisaka. 15 Ka mafuzra lawo ya kolomu ka hamfu ya litru, a muprista a ta tekanyana matsrongo a ma txhela ka xiyandla xake xa voko dzrake dzra ximatsri. 16 A ta gama a peta litiho dzrake dzra xinene ka mafuzra wolawo lawa ma nga ka xiyandla xa voko dzrake dzra ximatsri a ma xwanyanyana a mahlweni ka Yehovha hi litiho dzrake, ku dzringana 7 wa makhambi. 17 Hi ku landzrela, ka mafuzra lawa ma salaka ka xiyandla xake xa voko, a ta totanyana matsrongo a wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka, a ma tota lani a sunguliki a tota ngati ya gandzrelo dzra nandzru. 18 A mafuzra lawa ma taka sala ka xiyandla xake xa voko, a ta ma txhela nhlokweni ya lweyi a tibasisaka, hi ndlela leyo a muprista a ta mu kombelela ku dzrivaleliwa a mahlweni ka Yehovha.

19 “A muprista a ta dlaya xihazri xa gandzrelo dzra xidoho, a va a kombelela mhunu lweyi a tibasisaka ka ku nyama kwake leswaku a dzrivaleliwa a gama muprista a dlaya xihazri xa gandzrelo dzra ku hisiwa. 20 Kutani a muprista a ta nyikela gandzrelo dzra ku hisiwa ni gandzrelo dzra tinhleke a altarini; hi ndlela leyo, a muprista a ta kombelela mhunu lweyo ku dzrivaleliwa, kutani a ta va lweyi a basiki.

21 “Kambe loko mhunu lweyi a tibasisaka a li xisiwana nakone a nga na makotela ya ku humesa mintxhumu leyi, a ta teka xihambana xin’we xa xinuna xa gandzrelo dzra nandzru, a xi nyikela akuva xi va gandzrelo ledzri zrendzrelekisiwaka, ku yentxela leswaku a tikombelela ku dzrivaleliwa, a nyikela ni kolomu ka kilu dzra* mapa lamanene lama patsriwiki ni mafuzra akuva ma va gandzrelo dzra tinhleke, mafuzra ya kolomu ka hamfu ya litru, 22 swivambalana swibidzri kumbe swituvana swibidzri hi ku ya hi makotela yake. Xin’we a ta xi tizrisela kuva gandzrelo dzra xidoho xin’wana xi va gandzrelo dzra ku hisiwa. 23 Hi siku dzra wu 8, a ta ma yisa mahlweni ka muprista a nyangweni wa tende dzra ntlhanganu a mahlweni ka Yehovha, akuva ku hlayiwa leswaku a basile.

24 “A muprista a ta teka xihambana xin’we xa xinuna xa gandzrelo dzra nandzru ni mafuzra ya kolomu ka hamfu ya litru, kutani a swi yisa mahlweni na a swi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha. 25 Ntsrhaku ka leswo, a muprista a ta dlaya xihambana xa xinuna xa gandzrelo dzra nandzru a va a teka ngatinyana ya xone a yi tota wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka. 26 A muprista a ta teka mafuzranyana matsrongo a ma txhela ka xiyandla xa voko dzrake dzra ximatsri, 27 a gama a peta litiho dzrake dzra xinene ka mafuzra wolawo lawa ma nga ka xiyandla xa voko dzrake dzra ximatsri, a ma xwanyanyana a mahlweni ka Yehovha hi litiho dzrake ku dzringana 7 wa makhambi. 28 Kutani ka mafuzra lawa ma nga ka xiyandla xake, a muprista a ta totanyana matsrongo a wugan’wini bya ndleve ya xinene, ka litiho dzra dzrikulu dzra kone dzra voko dzra xinene ni le ka litiho dzra dzrikulu dzra kone dzra nkondzro wa xinene, swa lweyi a tibasisaka, a ma tota lani a sunguliki a tota ngati ya gandzrelo dzra nandzru. 29 A mafuzra lawa ma taka sala ka xiyandla xake xa voko, a ta ma txhela nhlokweni ya lweyi a tibasisaka, hi ndlela leyo a muprista a ta mu kombelela ku dzrivaleliwa a mahlweni ka Yehovha.

30 “A ta nyikela xin’we xa swivambalana kumbe xin’we xa swituvana hi ku ya hi makotela yake, 31 xi va gandzrelo dzra xidoho, lexin’wana xi va gandzrelo dzra ku hisiwa, a ta nyikela ni gandzrelo dzra tinhleke; kutani a muprista a ta kombelela mhunu lweyi a tibasisaka ku dzrivaleliwa, a mahlweni ka Yehovha.

32 “Lowu i nawu mayelanu ni mhunu lweyi a viki ni mavabyi ya nhlokonho kambe a kalaka a nga na makotela ya kuva a tibasisa.”

33 Hiloko Yehovha a byela Moxe na Aroni a ku: 34 “Loko mi tlhasa tikweni dzra Kanana ledzri ni mi nyikaka dzrone swanga pfindla dzrenu, ni va ni pfumelela leswaku a mavabyi ya nhlokonho ma hlasela yindlu ya kukazri a tikweni dzrenu, 35 a n’winyi wa yindlu a fanela ku yela muprista a tlhasa a mu byela a ku: ‘Ni ngheneliwe hi ntungu kaya.’ 36 A muprista a ta leleta leswaku ku humeseliwa mintxhumu hinkwayu a ndlwini na a nga si na ya a ya yi kambela, akuva loko a tlhasa a nga hlayi leswaku a mintxhumu leyi nga ndlwini yi nyamile; ntsrhaku ka leswo a ta nghena a yi kambela. 37 A muprista a ta kambela mbangu wolowo; kutani loko makhumbi ma ni mabati ya nkuxe wa ku ya ka halandi kumbe ya ku zuka, nakone ma tikomba na ma nghene ndzreni ka khumbi, 38 a muprista a ta ya nyangweni wa yindlu a va a hlaya leswaku a yi fanelanga ku tizrisiwa ku dzringana 7 wa masiku.

39 “Hi siku dzra wu 7, a muprista a ta tlhela a ya ka yindlu leyo akuva a ya yi kambela. Loko a mabati lawo ma hangalake ni makhumbi ya yindlu, 40 a muprista a ta leleta leswaku a mazribye lawa ma nga ni mabati ya ntungu ma susiwa ma ya txukumetiwa handle ka doropa a mbangwini lowu nyamiki. 41 Ntsrhaku ka leswo, a ta leleta leswaku a ndzreni ka yindlu leyo ku khwayiwa ngopfu swinene, kutani a mintxhumu leyi suseleliwaka* yi fanela ku ya txukumetiwa handle ka doropa a mbangwini lowu nyamiki. 42 Kutani ka mbangu lowu va suseleliki mazribye lawa a ma ni mabati ku ta bekiwa man’wana, nakone a yindlu yi fanela ku rebukariwa hi mbopfi ya nyiwana.

43 “Kambe loko ko tlhela ku humelela mabati nambileswi yindlu yi khwayeleliwiki, yi suseleliwa mazribye yi tlhela yi rebukarisiwa xinyiwana, 44 a muprista a ta nghena a yi kambela. Loko mabati ma hangalake ni yindlu swi hlaya leswaku i nhlokonho leyi dlayaka. 45 A muprista a ta leleta leswaku a yindlu leyo yi gilhitiwa, ku suseleliwa mazribye, timhandzri, ku va ku woliwa hinkwaswu swi yisiwa handle ka doropa a mbangwini lowu nyamiki. 46 Kambe loko mhunu wa kukazri o txhuka a nghena ka yindlu leyo na ka ha hlayiwe leswaku a yi fanelanga yi tizrisiwa, a ta va lweyi a nyamiki ku ya tlhasela madambyeni; 47 lweyi a yetlelaka ka yindlu leyo a fanela ku hlampswa mpahla yake ni lweyi a delaka ka yindlu leyo a fanela ku hlampswa mpahla yake.

48 “Kambe loko muprista a ya kambela a kuma leswaku a mabati a ma tlhelanga ma humelela ka yindlu ntsrhaku ka loko yi rebukarisiwe xinyiwana, a muprista a fanela ku hlaya leswaku a yindlu leyo yi basile* hikusa a mabati ma nyamalalile. 49 Akuva yindlu yi basisiwa,* a muprista a ta teka tinyanyana tibidzri, lihunyi dzra nkedari, ngoti ya ku pshwuka ni xiphundla xa hisopa. 50 A ta dlaya nyanyana yin’we ka xibya xa vumba lexi nga ni mati lawa ma kiwiki xihloveni. 51 Ntsrhaku ka leswo, a ta teka lihunyi dzra nkedari, xiphundla xa hisopa, ngoti ya ku pshwuka ni nyanyana leyi hanyaka, a swi peta ka ngati ya nyanyana leyi dlayeliwiki ka mati lawa ma kiwiki xihloveni a gama a xwanya ngati leyo ku dzringana 7 wa makhambi na a kongome yindlu. 52 Kutani a ta tizrisa ngati ya nyanyana, mati lawa ma kiwiki xihloveni, nyanyana leyi hanyaka, lihunyi dzra nkedari, xiphundla xa hisopa ni ngoti ya ku pshwuka akuva a basisa yindlu leyo leyi nyamiki. 53 A gama a tsrhika nyanyana leyi hanyaka yi haha yi tifambela nhoveni a handle ka doropa, a va a basisa yindlu* ka ku nyama ka yone; kutani yi ta va leyi basiki.

54 “Lowu i nawu mayelanu ni mavabyi ya nhlokonho, mavabyi ya xikhumba xa nhloko kumbe xa xilepfu, 55 nhlokonho ya le ka mpahla kumbe ka yindlu, 56 ni mayelanu ni ku pfimba, swilondzra ni mabati, 57 akuva swi ta tiveka leswaku ntxhumu wa kukazri wu nyamile kumbe wu basile. Lowu i nawu mayelanu ni mavabyi ya nhlokonho.”

15 Yehovha a ya mahlweni a byela Moxe na Aroni a ku: 2 “Byelani Vaisrayele mi ku: ‘Loko wanuna wa kukazri a va ni ntsrhundzrwana, a ntsrhundzrwana lowo wu yentxa leswaku a va lweyi a nyamiki. 3 A nyamile hi kola ka leswi a nga ni ntsrhundzrwana, swi nge na mhaka leswaku a nsila yi tama yi humetela a xizrweni xake xa wununa kumbe xi pfalekile; wanuna lweyo a nyamile.

4 “‘A mubede wun’wana ni wun’wana lowu lweyi a nga ni ntsrhundzrwana a taka yetlela ka wone wu ta va lowu nyamiki, ni ntxhumu wun’wana ni wun’wana lowu a taka wu tsrhamela wu ta va lowu nyamiki. 5 Lweyi a taka khumba mubede wake a fanela ku hlampswa mpahla yake* a tlhela a hlamba, nakone a ta va lweyi a nyamiki ku ya tlhasa madambyeni. 6 Lweyi a taka tsrhamela ntxhumu lowu tsrhameliwiki hi lweyi a nga ni ntsrhundzrwana, a fanela ku hlampswa mpahla yake a tlhela a hlamba nakone a ta va lweyi a nyamiki ku ya tlhasa madambyeni. 7 Lweyi a taka khumba lweyi a nga ni ntsrhundzrwana, a fanela ku hlampswa mpahla yake a tlhela a hlamba nakone a ta va lweyi a nyamiki ku ya tlhasa madambyeni. 8 Loko mhunu wa kukazri lweyi a kalaka a nga nyamanga o txhuka a txheliwa hi mazri ya mhunu lweyi a nga ni ntsrhundzrwana, a mhunu lweyo a fanela ku hlampswa mpahla yake a tlhela a hlamba nakone a ta va lweyi a nyamiki ku ya tlhasa madambyeni. 9 Loko mhunu lweyi a nga ni ntsrhundzrwana o khwela ka xifuyu a va a tsrhamela ntxhumu lowu kapekiwiki ka xone, a ntxhumu lowo wu ta va lowu nyamiki. 10 Mun’wana ni mun’wana lweyi a khumbaka ntxhumu lowu tsrhameliwiki hi lweyi a nga ni ntsrhundzrwana, a ta va lweyi a nyamiki ku ya tlhasa madambyeni nakone lweyi a zrwalaka mintxhumu yoleyo a fanela ku hlampswa mpahla yake a va a hlamba futsrhi a ta va lweyi a nyamiki ku ya tlhasa madambyeni. 11 Loko mhunu lweyi a nga ni ntsrhundzrwana o khumba mhunu na a nga hlambanga mavoko, a mhunu lweyi a khumbiwiki a fanela ku hlampswa mpahla yake a va a hlamba, nakone a ta va lweyi a nyamiki ku ya tlhasa madambyeni. 12 A xibya xa vumba lexi taka khumbiwa hi lweyi a nga ni ntsrhundzrwana xi fanela ku pfotlotiwa, nakone loko ku li xibya lexi hambiwiki hi xigodo xi fanela ku hlampswiwa.

13 “‘Loko a ntsrhundzrwana wake wu yima, a ta yima ku za ku khaluta 7 wa masiku akuva a va lweyi a basiki; kutani a ta hlampswa mpahla yake a va a hlamba hi mati lawa ma kiwiki xihloveni, kutani a ta va lweyi a basiki. 14 Hi siku dzra wu 8, a fanela ku teka swivambalana swibidzri kumbe swituvana swibidzri, a ya mahlweni ka Yehovha a nyangweni wa tende dzra ntlhanganu, kutani a swi nyika muprista. 15 A muprista a ta nyikela xin’we akuva xi va gandzrelo dzra xidoho kasi lexin’wana xi va gandzrelo dzra ku hisiwa; nakone a ta mu kombelela ku dzrivaleliwa a mahlweni ka Yehovha hi mhaka ya leswi a a ni ntsrhundzrwana.

16 “‘Loko wanuna wa kukazri o txhuka a huma mbewu ya wununa, a fanela ku hlamba mizri hinkwawu, nakone a ta va lweyi a nyamiki ku ya tlhasa madambyeni. 17 A fanela ku hlampswa mpahla ni ntxhumu wun’wana ni wun’wana lowu hambiwiki hi xikhumba lowu txheliwiki hi mbewu ya wununa nakone mintxhumu leyo yi ta va leyi nyamiki ku ya tlhasa madambyeni.

18 “‘Loko wanuna a yetlela* ni wansati a va a huma mbewu ya wununa, ha wubidzri va fanela ku hlamba, nakone va ta va lava nyamiki ku ya tlhasa madambyeni.

19 “‘Loko wansati a huma ngati hi leswi a nga nkameni wake, a ta va lweyi a nyamiki ku dzringana 7 wa masiku. Lweyi a mu khumbaka a ta va lweyi a nyamiki ku ya tlhasa madambyeni. 20 Ntxhumu wun’wana ni wun’wana lowu a taka yetlela ka wone na a nyamile hi mhaka ya leswi a nga nkameni wake, wu ta va lowu nyamiki nakone ntxhumu wun’wana ni wun’wana lowu a taka wu tsrhamela wu ta va lowu nyamiki. 21 Lweyi a khumbaka mubede wake a fanela ku hlampswa mpahla yake a va a hlamba, nakone a ta va lweyi a nyamiki ku ya tlhasa madambyeni. 22 Lweyi a khumbaka ntxhumu wun’wana ni wun’wana lowu wansati yelweyo a wu tsrhameliki a fanela ku hlampswa mpahla yake a va a hlamba, nakone a ta va lweyi a nyamiki ku ya tlhasa madambyeni. 23 Loko o tsrhamela mubede kumbe ntxhumu wun’wana, lweyi a taka swi khumba a ta va lweyi a nyamiki ku ya tlhasa madambyeni. 24 Loko wanuna wa kukazri o yetlela* ni wansati lweyo a va a khumba ngati yake, a ta va lweyi a nyamiki ku dzringana 7 wa masiku, nakone mubede wun’wana ni wun’wana lowu wanuna lweyo a taka yetlela ka wone wu ta va lowu nyamiki.

25 “‘Loko wansati wa kukazri o humetela ngati ku dzringana masiku manyingi na a nga li nkameni wake, kumbe a va na a li nkameni wake kambe ngati yi humetela ku tlula masiku lawa ma tolovelekiki, a ta va lweyi a nyamiki ku dzringana masiku hinkwawu lawa a taka va na a humetela ngati, ku fana ni loko a li nkameni wake. 26 A mubede wun’wana ni wun’wana lowu a taka yetlela ka wone hi nkama lowu a taka va na a humetela ngati, wu ta va lowu nyamiki ku fana ni mubede lowu a yetlelaka ka wone loko a li nkameni wake; ni ntxhumu wun’wana ni wun’wana lowu a taka wu tsrhamela wu ta va lowu nyamiki, hi lani swi nga ha kone loko a li nkameni wake. 27 Lweyi a swi khumbaka a ta va lweyi a nyamiki nakone a fanela ku hlampswa mpahla yake a va a hlamba, futsrhi a ta va lweyi a nyamiki ku ya tlhasa madambyeni.

28 “‘Nambitasu, loko ngati yi yima ku humetela a ta konta 7 wa masiku, ntsrhaku ka leswo a ta va lweyi a basiki. 29 Hi siku dzra wu 8, a fanela ku teka swivambalana swibidzri kumbe swituvana swibidzri a swi yisa ka muprista a nyangweni wa tende dzra ntlhanganu. 30 A muprista a ta teka xin’we a hamba gandzrelo dzra xidoho kasi lexin’wana a hamba gandzrelo dzra ku hisiwa, nakone a ta mu kombelela ku dzrivaleliwa a mahlweni ka Yehovha hi mhaka ya leswi a a nyamile hi kola ka ku humetela ngati.

31 “‘Mi fanela ku pfuna Vaisrayele leswaku va va lava basiki, akuva va nga fi hi kuva va ntxhimisa tabernakela dzranga ledzri nga makazri kwavu.

32 “‘Lowu i nawu mayelanu ni wanuna lweyi a nga ni ntsrhundzrwana, wanuna lweyi a nyamaka hi kuva a huma mbewu ya wununa, 33 wansati lweyi a nyamiki hi kuva a li nkameni wake, wanuna lweyi a humetelaka nsila ka xizro xake xa wununa, wansati lweyi a humetelaka ngati kun’we ni wanuna lweyi a yetlelaka ni wansati lweyi a nyamiki.’”

16 Yehovha a vulavule na Moxe ntsrhaku ka loko vana vabidzri va Aroni va file hi mhaka ya leswi va tsrhindzrekeliki ka Yehovha. 2 Yehovha a byela Moxe a ku: “Byela makwenu Aroni leswaku a nga tsrhameli ku nghena mbangwini wa ku xwenga a ntsrhaku ka kortina a mahlweni ka tampa ya Areka, akuva a nga fi, hikusa ni ta humelela henhla ka tampa yoleyo na ni le tlavini.

3 “Loko Aroni a ya mbangwini wa ku xwenga a fanela ku famba ni leswi: Xihon’wana* xa xinuna akuva xi va gandzrelo dzra xidoho, ni hamba ya xinuna akuva yi va gandzrelo dzra ku hisiwa. 4 A fanela ku yambala mpahla ya ku xwenga ya ku leha leyi hambiwiki hi linyu, ni buluku dzra ku goma ledzri hambiwiki hi linyu akuva a funeketa a tingana take.* A fanela ku tsrimba bandhi ledzri hambiwiki hi linyu a masengeni a va a tsrimba ntuzru lowu hambiwiki hi linyu a nhlokweni. Leyo i mpahla ya ku xwenga. A ta hlamba a gama a yi yambala.

5 “A nhlengeletanu ya Israyele yi fanela ku mu nyika swiphongo swibidzri akuva swi va gandzrelo dzra xidoho, ni hamba ya xinuna akuva yi va gandzrelo dzra ku hisiwa.

6 “Kutani Aroni a ta nyikela homu akuva yi va gandzrelo dzra swidoho swake a va a tikombelela ku dzrivaleliwa, a tlhela a kombelela ni va ndangu wake.

7 “A ta teka swiphongo leswo ha swibidzri a swi yimisa mahlweni ka Yehovha a nyangweni wa tende dzra ntlhanganu. 8 Aroni a ta hamba wuhlolotwana* akuva a teka xiboho mayelanu ni swiphongo leswibidzri, a xiphongo xin’we xi ta va xa Yehovha kasi lexin’wana xi ta va xa Azazele. 9 A xiphongo lexi a wuhlolotwana byi kombisaka leswaku i xa Yehovha, Aroni a ta xi nyikela swanga gandzrelo dzra xidoho. 10 Kambe a xiphongo lexi wuhlolotwana byi kombisaka leswaku i xa Azazele, xi fanela ku buyisiwa mahlweni ka Yehovha na xa ha hanya akuva xi tizriseliwa ku kombela ku dzrivaleliwa, ku yentxela leswaku xi zrumeliwa ka Azazele, a mananga.

11 “Aroni a ta nyikela homu akuva yi va gandzrelo dzra swidoho swake a va a tikombelela ku dzrivaleliwa a tlhela a kombelela ni va ndangu wake; ntsrhaku ka leswo a ta dlaya homu akuva yi va gandzrelo dzra swidoho swake.

12 “A ta teka xa ku hisela ka xone muzri wa ku nun’hwela lexi taliki hi makhala lama susiwiki a altarini a mahlweni ka Yehovha, ni swiyandla swibidzri swa muzri wa ku nun’hwela lowu nga mpupu, a famba na swone a ntsrhaku ka kortina. 13 A ta txhela muzri wa ku nun’hwela a henhla ka makhala a mahlweni ka Yehovha, a musi wa muzri wa ku nun’hwela wu ta tala a henhla ka tampa ya Areka dzra Wumboni, akuva a nga fi.

14 “A ta teka ngatinyana ya homu a yi xwanya hi litiho a mahlweni ka tampa, hi tlhelo dzra le wuxeni; a xwanya ngati yitsrongo hi litiho ku dzringana 7 wa makhambi ka tampa.

15 “A ta dlaya xiphongo akuva xi va gandzrelo dzra xidoho; a teka ngati ya xone a famba na yone a ntsrhaku ka kortina, a ya yentxa leswi a swi yentxiki hi ngati ya homu; a fanela ku yi xwanya ka tampa.

16 “A fanela ku xwengisa mbangu wa ku xwenga, hi mhaka mintxhumu leyi nyamiki leyi Vaisrayele va yi yentxiki, ni hi kola ka ku tlula nawu kwavu kun’we ni swidoho swavu; hi leswo a fanelaka ku swi yentxela tende dzra ntlhanganu ledzri nga makazri ka mintxhumu leyi nyamiki leyi Vaisrayele va yi yentxaka.

17 “A tendeni dzra ntlhanganu a ku fanelanga ku va ni mhunu mun’wana ku sukela nkama lowu Aroni a nghenaka ha wone akuva a basisa mbangu wa ku xwenga ku ya tlhasa loko a huma. A ta tikombelela ku dzrivaleliwa, a kombelela va ndangu wake ni nhlengeletanu hinkwayu ya Israyele.

18 “A ta huma a kongoma a altarini ledzri nga mahlweni ka Yehovha, a tlhasa a dzri xwengisa, kutani a teka ngatinyana ya homu ni ngatinyana ya xiphongo a yi tota ka matlhelo hinkwawu ya timhondzro ta altari. 19 Nakone a ta xwanya ngatinyana hi litiho dzrake a altarini ku dzringana 7 wa makhambi a dzri basisa ni ku dzri xwengisa ka mintxhumu leyi nyamiki leyi Vaisrayele va yi yentxaka.

20 “Loko a hete ku xwengisa mbangu wa ku xwenga, tende dzra ntlhanganu kun’we ni altari, a ta nyikela xiphongo lexi hanyaka. 21 Aroni a ta tlhanteka mavoko yake ha mabidzri a nhlokweni ya xiphongo lexi hanyaka, a hlaya swihoxo hinkwaswu, ku tlula nawu hinkwaku ni swidoho hinkwaswu swa Vaisrayele, kutani a ta tlhanteka swidoho leswo a nhlokweni ya xiphongo a va a xi nyiketa wanuna lweyi a hlawuliwiki akuva a xi yisa a mananga. 22 A xiphongo xi ta teka swihoxo hinkwaswu swa Vaisrayele xi famba na swone a mbangwini lowu ku kalaka ku nga tsrhami mhunu. A ta xi zrumela a mananga.

23 “Kutani Aroni a ta nghena a tendeni dzra ntlhanganu a va a susa mpahla yake leyi hambiwiki hi panu ya lisima, leyi a yi yambaliki akuva a nghena mbangwini wa ku xwenga, a yi siya tendeni dzra ntlhanganu. 24 Ntsrhaku ka leswo, a ta hlamba a mbangwini wa ku xwenga a va a yambala mpahla yake; a ta gama a huma a nyikela gandzrelo dzrake dzra ku hisiwa a nyikelela ni tiko, hi ndlela leyo a ta va na a tikombelela ku dzrivaleliwa a va a kombelela ni tiko. 25 A ta hisa fuzra dzra gandzrelo dzra xidoho dzri mpukuka a altarini.

26 “A wanuna lweyi a heketiki xiphongo xa Azazele a fanela ku hlampswa mpahla yake a va a hlamba; ntsrhaku ka leswo a nga nghena a mintxhatxheni.

27 “Kutani a homu ya gandzrelo dzra xidoho ni xiphongo xa gandzrelo dzra xidoho, leswi ngati ya swone yi nghenisiwiki a mbangwini wa ku xwenga akuva ku kombeliwa ku dzrivaleliwa, swi ta humesiwa handle ka mbangu lowu va dzimiki ka wone mintxhatxha. A swikhumba, nyama ni nswanyu wa swihazri leswo, swi ta hisiwa a ndzrilweni. 28 Lweyi a taka swi hisa a fanela ku hlampswa mpahla yake a va a hlamba, ntsrhaku ka leswo a nga nghena a mintxhatxheni.

29 “Leswi swi ta va nawu wa hi lani ku nga helikiki kwenu: hi siku dzra wu 10 ka hweti ya wu 7, mi fanela ku kombisa leswaku mi xukuvalile* hi mhaka ya swidoho swenu nakone a mi fanelanga mi tizra, n’wine ni valuveli lava tsrhamaka na n’wine. 30 Hi siku ledzro mi ta kombeleliwa ku dzrivaleliwa akuva ku hlayiwa leswaku mi basile. A mahlweni ka Yehovha mi ta va lava basiki a swidohweni swenu hinkwaswu. 31 I savata, siku dzra ku wisa kwenu hi lani ku heleliki; mi fanela ku xukuvala. I nawu wa hi lani ku nga helikiki.

32 “A muprista lweyi a taka hlawulekisiwa a va a bekiwa leswaku a tizra swanga muprista leswaku a siva papayi wake, a ta kombela ku dzrivaleliwa a va a yambala mpahla leyi hambiwiki hi panu ya linyu, ku nga mpahla ya ku xwenga. 33 A ta xwengisa mbangu wa ku xwengisisa, tende dzra ntlhanganu, altari, vaprista ni vhanu hinkwavu va Israyele. 34 Lowu wu ta va nawu wa hi lani ku nga helikiki kwenu, akuva kan’we hi lembe ku kombeleliwa Vaisrayele leswaku va dzrivaleliwa swidoho swavu hinkwaswu.”

Kutani Aroni a yentxa hi lani Yehovha a leletiki Moxe ha kone.

17 Yehovha a ya mahlweni a byela Moxe a ku: 2 “Byela Aroni ni vanake, kun’we ni Vaisrayele hinkwavu u ku: ‘Yehovha a te:

3 “‘“Loko mhunu wa kukazri wa yindlu ya Israyele o dlaya homu, xihambana xa xinuna kumbe mbuti a mbangwini lowu mi dzimiki ka wone mintxhatxha kumbe a handle ka wone, 4 a matsrhan’wini ya ku swi yisa a nyangweni wa tende dzra ntlhanganu akuva swi nyikeliwa ka Yehovha swanga gandzrelo, a mahlweni ka tabernakela dzra Yehovha, mhunu lweyo a ta va ni nandzru wa ngati. A dlaye xihazri na swi nga li nawini, xileswo a fanela ku dlayiwa. 5 Leswo swi yentxeliwa kuva Vaisrayele va nga ha dlayi swihazri a livaleni, kambe va swi nyikela ka Yehovha a nyangweni wa tende dzra ntlhanganu, va swi nyiketa muprista. Va fanela ku swi nyikela ka Yehovha swanga magandzrelo ya ku kombela ku zrula. 6 A muprista a ta xwanya altari dzra Yehovha hi ngati a nyangweni wa tende dzra ntlhanganu, a va a hisa fuzra dzri mpukuka swanga nun’hwelo lowu nyonxisaka Yehovha. 7 Akuva va nga ha nyikeli magandzrelo ka mademona lama fanaka ni timbuti,* lawa va mbuyetaka na wone hi ku ma gandzrela. Lowu wu ta va nawu wa hi lani ku nga helikiki kwenu ni le tinxakeni tenu hinkwatu.”’

8 “U fanela ku va byela leswi: ‘Mhunu mun’wana ni mun’wana wa yindlu ya Israyele kumbe lweyi a hanyaka na n’wine swanga muluveli, lweyi a nyikelaka gandzrelo dzra ku hisiwa kumbe gandzrelo dzrin’wana 9 a matsrhan’wini ya kuva a dzri yisa nyangweni wa tende dzra ntlhanganu akuva a dzri nyikela ka Yehovha, a fanela ku dlayiwa.

10 “‘Loko mhunu wa kukazri wa yindlu ya Israyele kumbe lweyi a hanyaka na n’wine swanga muluveli o txhuka a da ngati ya xivumbiwa xa kukazri, nakunene ni ta lwisana ni mhunu lweyo lweyi a daka ngati ni va ni mu dlaya.* 11 Hikusa a wutomi bya xivumbiwa byi le ngatini ya xone* nakone mine ni mi nyike yone a altarini akuva mi tikombelela ku dzrivaleliwa. Hikusa a ngati hi yone yi kombelaka ku dzrivaleliwa swanga hi leswi a wutomi byi nga ka yone.* 12 Hi leswo swi yentxiki ni byela Vaisrayele ni ku: “Ku nga vi na mhunu kwenu lweyi a daka ngati, nambi o va lweyi a hanyaka makazri kwenu swanga muluveli a nga fanelanga a da ngati.”

13 “‘Loko Muisrayele wa kukazri kumbe mhunu wa kukazri lweyi a hanyaka makazri kwenu swanga muluveli o hlota a va a phasa xihazri xa kukazri xa nhova kumbe nyanyana ya kukazri leyi nga diwaka, a fanela ku halata ngati ya xone a va a yi seletela hi misava. 14 Hikusa a wutomi bya xivumbiwa xin’wana ni xin’wana i ngati ya xone swanga hi leswi wutomi byi nga le ngatini. Hi leswi swi ni yentxiki ni byela Vaisrayele ni ku: “Mi nga di ngati ya xivumbiwa xini na xini, hikusa a wutomi bya swivumbiwa hinkwaswu i ngati ya swone. Lweyi a yi daka a ta dlayiwa.” 15 Loko mhunu wa kukazri, ku nga ha va Muisrayele kumbe muluveli, o da nyama ya xihazri lexi kumiwiki na xi file kumbe lexi hahluleliwiki hi xihazri xa nhova, mhunu lweyo a fanela ku hlampswa mpahla yake a va a hlamba nakone a ta va lweyi a nyamiki ku ya tlhasa madambyeni; ntsrhaku ka leswo, a ta va lweyi a basiki. 16 Kambe loko a nga hlampswi mpahla yake a va a nga hlambi, a ta tihlamulela hi kola ka xihoxo xake.’”

18 Yehovha a ye mahlweni a vulavula na Moxe a ku: 2 “Byela Vaisrayele u ku: ‘Hi mine Yehovha, Xikwembu Nkulukumba wenu. 3 Mi nga txhuki mi yentxa leswi yentxiwaka a tikweni dzra Egipta lomu a mi tsrhama kone nakone mi nga txhuki mi yentxa leswi vhanu va le tikweni dzra Kanana va swi yentxaka, ku nga tiko ledzri ni mi yisaka ka dzrone. Mi nga txhuki mi landzra swihena swavu. 4 N’wine mi fanela ku yingiseta swiboho swanga swa wuyavanyisi, mi bekisa ni milawu yanga mi va mi yi landzrela. Hi mine Yehovha, Xikwembu Nkulukumba wenu. 5 Bekisani milawu yanga ni swiboho swanga swa wuyavanyisi; mun’wana ni mun’wana lweyi a yentxaka leswo a ta hanya hi kola ka swone. Hi mine Yehovha.

6 “‘Ku nga ve ni mhunu makazri kwenu lweyi a yentxaka swa tinkuku ni* xaka dzrake dzra le kusuhi. Hi mine Yehovha. 7 U nga txhuki u hamba swa tinkuku ni papayi waku nakone u nga txhuki u hamba swa tinkuku ni mamana waku. I mamana waku, xileswo u nga txhuki u hamba swa tinkuku na yene.

8 “‘U nga txhuki u hamba swa tinkuku ni nsati wa papayi waku. Swi nga txhela tingana papayi waku.*

9 “‘U nga txhuki u yentxa swa tinkuku ni makwenu wa xisati, nambi mo va vamakwavu hi papayi kumbe hi mamana, swi nge na mhaka leswaku mi pswaliwe ka muti wun’we kumbe a pswaliwe handle.

10 “‘U nga txhuki u yentxa swa tinkuku ni ntukulu waku wa n’hwanyana lweyi a pswaliwaka hi n’wanaku wa djaha kumbe ntukulu waku wa xisati lweyi a pswaliwaka hi n’wanaku wa xisati, hikusa swi nga ku susa xintsrhuti.*

11 “‘U nga txhuki u yentxa swa tinkuku ni n’wana wa xisati wa nsati wa papayi waku, ku nga n’wana wa xisati wa papayi waku, hikusa i makwenu.

12 “‘U nga txhuki u yentxa swa tinkuku ni makwavu wa xisati wa papayi waku, hikusa i xaka dzra papayi waku dzra le ngatini.

13 “‘U nga txhuki u yentxa swa tinkuku ni makwavu wa xisati wa mamana waku, hikusa i xaka dzra mamana waku dzra le ngatini.

14 “‘U nga txhuki u danisa makwavu wa papayi waku* hi ku yentxa swa tinkuku ni nsati wake, hikusa i mamana waku.

15 “‘U nga txhuki u yentxa swa tinkuku ni n’wingi waku, hikusa i nsati wa n’wanaku; u nga txhuki u yentxa swa tinkuku na yene.

16 “‘U nga txhuki u yentxa swa tinkuku ni nsati wa makwenu, hikusa swi nga susa makwenu xintsrhuti.*

17 “‘U nga txhuki u hamba swa tinkuku ni wansati wa kukazri kun’we ni n’wanake. U nga txhuki u teka ntukulu wake wa xisati lweyi a pswaliwaka hi n’wanake wa xinuna, nakone u nga txhuki u teka ntukulu wake wa xisati lweyi a pswaliwaka hi n’wanake wa xisati u yentxa swa tinkuku na yene. I maxaka yake ya le kusuhi; swi ni tingana.

18 “‘U nga txhuki u teka makwavu wa nkataku akuva a va nsatikulobye, u hamba swa tinkuku na yene nakasi a nkataku a ha hanya.

19 “‘U nga txhuki u yentxa swa tinkuku ni wansati wa kukazri lweyi a nyamiki hi mhaka ya leswi a nga nkameni wake.

20 “‘U nga txhuki u yentxa swa tinkuku ni nsati wa mhunu mun’wana,* u tinyamisa.

21 “‘U nga txhuki u pfumelela leswaku mun’we wa vanaku a nyikeliwa ka Moleki. U nga txhuki u ntxhimisa vito dzra Xikwembu Nkulukumba waku hi ku yentxa leswo. Hi mine Yehovha.

22 “‘A wanuna a nga txhuki a yentxa swa tinkuku ni wanunakulobye.* I ntxhumu lowu nyenyentsaka.

23 “‘A wanuna a nga txhuki a yentxa swa tinkuku ni xihazri, a tinyamisa; nambi wansati a nga fanelanga a tinyikela ka xihazri akuva a yentxa swa tinkuku na xone. I ku honiwa ka leswi swi nga swa ntumbuluku.

24 “‘Mi nga tinyamisi hi ku yentxa wun’we wa mintxhumu leyi, hikusa ni za ni hlongola matiko lawa ma nga mahlweni kwenu hi mhaka ya mintxhumu leyi hinkwayu, leyi yi ma yentxiki ma va lawa ma nyamiki. 25 Xileswo a tiko dzravu dzri nyamile, kutani ni ta khatisa vayaki va dzrone hi mhaka ya xihoxo xavu, nakone a tiko dzravu dzri ta va hlanta. 26 Kambe n’wine mi fanela ku hlayisa milawu yanga ni swiboho swanga swa wuyavanyisi, nakone mi nga txhuki mi yentxa ntxhumu ni wun’we ka mintxhumu leyo ya ku nyenyentsa, ku nga ha va n’wine Vaisrayele kumbe mhunu lweyi a hanyaka makazri kwenu swanga muluveli. 27 Hikusa a mintxhumu leyo hinkwayu ya ku nyenyentsa yi yentxiwe hi vavanuna lava hanyiki tikweni ledzro na mi nge si na tlhasa, kutani swoswi a tiko dzri nyamile. 28 Kutani hi ku va mi nga dzri nyamisanga a dzri nge ti mi hlanta, hi lani dzri va hlantiki ha kone lava sunguliki va tsrhama ka dzrone. 29 Loko ko txhuka ku yentxiwa wun’we wa mintxhumu leyi ya ku nyenyentsa, hinkwavu lava yi yentxaka va fanela ku dlayiwa. 30 Mi fanela ku yentxa leswi ni swi yimeliki kwenu, mi nga yentxi ni xin’we xa swihena swa ku nyenyentsa leswi a swi yentxiwa na mi nga si na tlhasa, akuva mi nga tinyamisi ha swone. Hi mine Yehovha Xikwembu Nkulukumba wenu.’”

19 Yehovha a ya mahlweni a vulavula na Moxe a ku: 2 “Byela nhlengeletanu hinkwayu ya Israyele u ku: ‘Mi fanela ku va lava xwengiki, hikusa mine Yehovha Xikwembu Nkulukumba wenu ni xwengile.

3 “‘Mun’wana ni mun’wana wenu a fanela ku hlonipha* mamana wake ni papayi wake nakone mi fanela ku bekisa masavata yanga. Hi mine Yehovha, Xikwembu Nkulukumba wenu. 4 Mi nga landzreli swikwembu leswi kalaka swi nga pfuni ntxhumu kumbe ku tihambela swikwembu swa nsimbi. Hi mine Yehovha, Xikwembu Nkulukumba wenu.

5 “‘Kutani loko mi nyikela gandzrelo dzra ku kombela ku zrula ka Yehovha, mi fanela ku dzri nyikela hi ndlela leyi taka yentxa leswaku mi yamukeleka. 6 Dzri fanela ku diwa hi siku ledzri dzri nyikeliwaka ha dzrone ni hi mundzruku ka kone, kambe leswi taka sala ku ya tlhasa siku dzra wuzrazru swi fanela ku hisiwa. 7 Kambe loko xiyengenyana xa swone xo txhuka xi diwa hi siku dzra wuzrazru, ku ta va xizruku; nakone a dzri nge ti yamukeleka. 8 Lweyi a to ko dzri da a ta tihlamulela hi kola ka xihoxo xake, nakone a ta dlayiwa hikusa a ntxhimise ntxhumu lowu xwengiki ka Yehovha.

9 “‘Loko u tsrhovela u nga txhuki u tsrhovela hi ku helela leswi nga wugan’wini bya masimu yaku nakone u nga zroleli leswi wetetelaka. 10 Handle ka leswo, u nga txhuki u khaya leswi saletelaka ka nsinya waku wa mawuvha kumbe u zrolela mawuvha lawa ma wetetelaka. U fanela ku swi siyela xisiwana* ni muluveli. Hi mine Yehovha, Xikwembu Nkulukumba waku.

11 “‘U nga txhuki u yiva, u nga txhuki u wonga, nakone mi nga txhuki mi kanganyisana. 12 U nga txhuki u funga* madzrimi hi vito dzranga, hi ndlela leyo u ntxhimisa vito dzra Xikwembu Nkulukumba waku. Hi mine Yehovha, Xikwembu Nkulukumba waku. 13 U nga txhuki u kanganyisa mhunu mun’wana, nakone u nga txhuki u yiva, a wu fanelanga u tsrhama ni muholo wa mutizri waku wusiku hinkwabyu ku ya tlhasa mixweni.

14 “‘U nga txhuki u zruka* mhunu lweyi a fiki tindleve kumbe ku bekela xihinga mhunu lweyi a fiki matihlo; txhava Xikwembu Nkulukumba waku. Hi mine Yehovha, Xikwembu Nkulukumba waku.

15 “‘U nga txhuki u yavanyisa hi ndlela leyi kalaka yi nga lulamanga. U nga txhuki u yima ni xisiwana ntsena hi leswaku i xisiwana kumbe u yima ni mhunu lweyi a ganyiki ntsena hi leswaku a ganyile. U fanela ku yavanyisa mhunu mun’wana hi ndlela leyi lulamiki.

16 “‘U nga txhuki u famba u khanela ku biha hi vhanu van’wana. U nga txhuki u yentxa ntxhumu lowu nga bekaka mhunu mun’wana nghozini.* Hi mine Yehovha.

17 “‘U nga txhuki u nyenya makwenu hi le mbilwini. U nga tsrhiki ku laya mhunu mun’wana, akuva u nga kumi nandzru ku fana na yene.

18 “‘U nga txhuki u dzrihisela kumbe ku bekela xiviti vhanu van’wana, nakone u fanela ku zrandzra vhanu van’wana hi ndlela leyi u tizrandzraka ha yone. Hi mine Yehovha.

19 “‘U fanela ku yingiseta milawu yanga. U nga txhuki u yentxa leswaku a swihazri swa mixaka yibidzri leyi hambaniki swi pswalisana.* U nga byali mixaka yibidzri ya mbewu leyi hambaniki a masin’wini yaku, u nga txhuki u yambala mpahla leyi hambiwiki hi tingoti ta mixaka yibidzri leti patsriwiki.

20 “‘Loko wanuna wa kukazri a txhuka a yetlela ni wansati kutani a yentxa swa tinkuku na yene, nakasi i mutizri lweyi a dumbisiwiki wanuna mumbeni kambe o kala a nga si na tizruliwa kumbe ku ntsrhunxiwa, va fanela ku khatisiwa. Nambitanu, a va fanelanga va dlayiwa, hikusa lweyi wansati a a nge si na ntsrhunxiwa. 21 Wanuna lweyo a fanela ku buyisela Yehovha gandzrelo dzrake dzra nandzru a nyangweni wa tende dzra ntlhanganu, ku nga hamba ya xinuna ya gandzrelo dzra nandzru. 22 Hi kola ka xidoho lexi a xi yentxiki, a muprista a ta tizrisa hamba ya xinuna ya gandzrelo dzra nandzru akuva a mu kombelela ku dzrivaleliwa a mahlweni ka Yehovha, kutani a ta dzrivaleliwa ka xidoho lexi a xi yentxiki.

23 “‘Loko mi nghena tikweni ledzri ni mi yisaka ka dzrone kutani mi byala minsinya leyi pswalaka mihandzru leyi diwaka, a mi fanelanga mi da mihandzru ya minsinya leyo ku dzringana malembe mazrazru. A mihandzru ya minsinya leyo mi fanela ku yi vona na yi li leyi nyamiki nakone yi yilisiwaka. 24 Kambe hi lembe dzra wumune, a mihandzru hinkwayu ya minsinya leyo yi ta va leyi xwengiki, nakone wu ta va nkama wa leswaku ku nyonxiwa a mahlweni ka Yehovha. 25 Kutani hi lembe dzra wuntlhanu mi nga da mihandzru ya yone, akuva mihandzru ya yone yi ta tlhantekela ka leswi mi swi tsrhovelaka. Hi mine Yehovha, Xikwembu Nkulukumba wenu.

26 “‘Mi nga txhuki mi da ntxhumu lowu nga ni ngati.

“‘Mi nga txhuki mi djuletela ku tiva wumundzruku* kumbe ku yentxa masalamusi.

27 “‘Mi nga txhuki mi tsremeta* misisi ya le matlhelweni ka nhloko, kumbe mi tsremeta wugan’wini ka malepfu.*

28 “‘Mi nga txhuki mi titsremelela mizri hi mhaka ya mhunu lweyi a fiki,* nakone mi nga txhuki mi titsremelela mizrini.* Hi mine Yehovha.

29 “‘U nga susi lisima n’wanaku wa n’hwanyana hi ku mu yentxa nghwavana, akuva tiko dzri nga yentxi wunghwavana dzri va dzri tala hi mahanyela ya ku biha.

30 “‘Mi fanela ku hlayisa masavata yanga mi tlhela mi kombisa mbangu wanga wa ku xwenga xitxhavu. Hi mine Yehovha.

31 “‘Mi nga txhuki mi yela lava zamaka ku vulavulisana ni vafi nakone mi nga vutisi vapfhumbi, akuva mi nga tinyamisi ha swone. Hi mine Yehovha, Xikwembu Nkulukumba wenu.

32 “‘Mi fanela ku kombisa xitxhavu ka mhunu lweyi a nga ni misisi ya ku basa, mi hlonipha mhunu lweyi a duhwaliki nakone mi fanela ku txhava Xikwembu Nkulukumba wenu. Hi mine Yehovha, Xikwembu Nkulukumba wenu.

33 “‘Loko mi hanya ni muluveli a tikweni dzrenu mi nga txhuki mi mu xanisa. 34 A mhunu lweyi a tsrhamaka na n’wine swanga muluveli mi fanela ku mu vona swanga Muisrayelekuloni. Kutani mu zrandzrani hi ndlela leyi mi tizrandzraka ha yone, hikusa na n’wine mi ve valuveli a tikweni dzra Egipta. Hi mine Yehovha, Xikwembu Nkulukumba wenu.

35 “‘Mi nga tizrisi mimpimu ya wukanganyisi, loko mi pima ku leha, ku bindzra kumbe ku kula ka ntxhumu wa kukazri. 36 Mi fanela ku tizrisa mimpimu leyi nga yone, mpimu lowu nga wone wa ku pima ku bindzra, wa ku pima mintxhumu ya ku woma* ni wa ku pima mintxhumu leyi nga mati.* Hi mine Yehovha, Xikwembu Nkulukumba wenu, lweyi a mi humesiki a tikweni dzra Egipta. 37 Xileswo, mi fanela ku hlayisa milawu yanga hinkwayu ni swiboho swanga hinkwaswu swa wuyavanyisi, mi swi landzrela. Hi mine Yehovha.’”

20 Yehovha a ya mahlweni a vulavula na Moxe a ku: 2 “U ta byela Vaisrayele u ku: ‘Mhunu mun’wana ni mun’wana lweyi a nga Muisrayele kumbe mhunu wa kukazri lweyi a tsrhamaka a Israyele swanga muluveli, lweyi a nyikelaka vanake ka Moleki a fanela ku dlayiwa. A vhanu va tiko ledzro va fanela ku mu khandla hi mazribye a za a fa. 3 Mine ni ta mu fulazrela* mhunu lweyo ni va ni mu helisa a xikazri ka vhanu vanga, hikusa a nyikele van’we va vanake ka Moleki, a ntxhimisa mbangu wanga wa ku xwenga a va a nyamisa vito dzranga. 4 Loko vhanu va tiko ledzro va mu vona na a nyikela vanake ka Moleki kambe va nga yentxi ntxhumu, va nga mu dlayi, 5 nakunene mine ni ta mu fulazrela mhunu lweyo, kun’we ni ndangu wake. Ni ta mu helisa xikazri ka vhanu vanga, yene ni hinkwavu lava mu seketelaka va hamba wumbuye na Moleki.

6 “‘A mhunu lweyi a zamaka ku vulavulisana ni vafi ni lweyi a ya ka ka vapfhumbi,* a dumbela ka vone, nakunene ni ta mu fulazrela mhunu lweyo ni va ni mu helisa xikazri ka vhanu vanga.

7 “‘Hi mine Yehovha, Xikwembu Nkulukumba wenu, xileswo tixwengisani, mi va lava xwengiki. 8 Bekisani milawu yanga mi tlhela mi yi landzra, hi mine Yehovha lweyi a mi xwengisaka.

9 “‘Loko mhunu wa kukazri a zruka papayi wake kumbe mamana wake, nakunene a fanela ku dlayiwa. Leswi a zrukiki papayi wake kumbe mamana wake a ngati yake yi ta va henhla kwake.

10 “‘Mayelanu ni mhunu lweyi a yentxaka wumbuye ni nsati wa wanuna mun’wana, ina, mhunu lweyi a yentxaka wumbuye ni nsati wa mhunu mun’wana, nakunene a fanela ku dlayiwa, yene kun’we ni lweyi a mbuyetaka na yene. 11 A wanuna lweyi a yentxaka swa tinkuku ni nsati wa papayi wake a txhela tingana papayi wake.* Lava mbuyetiki ha wubidzri byavu nakunene va fanela ku dlayiwa. A ngati yavu yi le henhla kwavu. 12 Loko wanuna wa kukazri a yentxa swa tinkuku ni n’wingi wake, nakunene ha wubidzri byavu va fanela ku dlayiwa. Va honise leswi nga swa ntumbuluku. A ngati yavu yi le henhla kwavu.

13 “‘Loko wanuna a yentxa swa tinkuku ni wanunakulobye, hi lani swi yentxiwaka ha kone ni wansati, ha wubidzri byavu va yentxa ntxhumu lowu nyenyentsaka. Nakunene va fanela ku dlayiwa. A ngati yavu yi ta va henhla kwavu.

14 “‘Loko wanuna o yentxa swa tinkuku ni wansati wa kukazri kun’we ni mamana wa wansati lweyo, va yentxa ntxhumu lowu nyenyentsaka,* mi fanela ku hisa wanuna lweyo kun’we ni vavasati volavo hi ndzrilo, akuva mahanyela ya ku biha ma nga yi mahlweni a makazri kwenu.

15 “‘Loko wanuna wa kukazri o hamba swa tinkuku ni xihazri, nakunene wanuna lweyo a fanela ku dlayiwa, nakone mi fanela ku dlaya ni xihazri lexo. 16 Loko wansati wa kukazri o ya tinyikela ka xihazri akuva a hamba swa tinkuku na xone, mi fanela ku dlaya wansati yelweyo ni xihazri xa kone. Nakunene va fanela ku dlayiwa. A ngati yavu yi ta va henhla kwavu.

17 “‘Loko wanuna wa kukazri a yentxa swa tinkuku ni makwavu wa xisati, ku nga ha va n’wana wa papayi wake kumbe n’wana wa mamana wake, lwe wanuna a vona lwe wansati na a nga yambalanga ni lwe wansati a vona lwe wanuna na a nga yambalanga, swi ni tingana. Va fanela ku dlayiwa na va hlaleliwa hi tiko. Lweyi wanuna a txhele makwavu tingana.* A fanela ku tihlamulela hi kola ka xihoxo xake.

18 “‘Loko wanuna a yetlela ni wansati lweyi a nga nkameni wake a va a yentxa swa tinkuku na yene, ha wubidzri byavu a va yi hloniphanga* ngati ya lweyi wansati leyi humetelaka. Ha wubidzri byavu va fanela ku dlayiwa.

19 “‘U nga txhuki u yentxa swa tinkuku ni makwavu wa xisati wa mamana waku kumbe ni makwavu wa xisati wa papayi* waku, hikusa leswo swi nga txhela tingana xaka dzraku dzra le kusuhi. Va ta tihlamulela hi kola ka xihoxo xavu. 20 A wanuna lweyi a yentxaka swa tinkuku ni nsati wa makwavu wa papayi wake, a txhela tingana makwavu wa papayi wake.* Va fanela ku tihlamulela hi kola ka xidoho xavu. Va fanela ku fa na va nga na vana. 21 Loko wanuna wa kukazri a teka nsati wa makwavu, i ntxhumu lowu nyenyentsaka. A txhele makwavu tingana.* A va fanelanga va va ni vana.

22 “‘Mi fanela ku bekisa swileleto swanga ni swiboho swanga swa wuyavanyisi mi va mi swi landzrela, akuva tiko ledzri ni mi yisaka leswaku mi ya tsrhama ka dzrone dzri nga mi hlanti. 23 Mi nga txhuki mi landzra swihena swa matiko lawa ni ma hlongolaka mahlweni kwenu, hikusa ma yentxe mintxhumu leyi hinkwayu nakone na yi nyenya. 24 Hi leswo swi ni yentxiki ni mi byela ni ku: “Mi ta teka tiko dzravu nakone ni ta mi nyika dzrone dzri va pfindla dzrenu, tiko ledzri taliki ngopfu swinene hi leiti ni wulombe. Hi mine Yehovha, Xikwembu Nkulukumba wenu, lweyi a mi hambanisiki ni vhanu va matiko mambeni.” 25 Hambanisani swihazri leswi basiki ni leswi kalaka swi nga basanga; ni tinyanyana leti kalaka ti nga basanga ni leti basiki; mi nga txhuki mi tinyamisa hi swihazri, tinyanyana kumbe hi mintxhumu leyi nkwalaka misaveni, leswi ni swi hambanisiki akuva mi swi vona swi li leswi nyamiki. 26 Mi fanela ku va lava xwengiki kwanga, hikusa mine Yehovha ni xwengile nakone ni mi hambanisa ni matiko man’wana akuva mi va vanga.

27 “‘Wanuna mun’wana ni mun’wana kumbe wansati mun’wana ni mun’wana lweyi a zamaka ku vulavulisana ni vafi kumbe a nga mupfhumbi, nakunene a fanela ku dlayiwa. A xitsrhungu xi fanela ku va khandla hi mazribye va za va fa. A ngati yavu yi ta va henhla kwavu.’”

21 Yehovha a ya mahlweni a byela Moxe a ku: “Byela vaprista, vana va Aroni, u ku: ‘A ku fanelanga ku va ni muprista lweyi a tinyamisaka hi mhunu lweyi a fiki. 2 Kambe a nga ha tinyamisa loko a li leswaku mhunu lweyi a fiki i xaka dzrake dzra le kusuhi, ku nga ha va mamana wake, papayi, n’wana wa xinuna, n’wana wa xisati kumbe makwavu; 3 nakone a nga ha tinyamisa hi mhaka makwavu wa xisati loko a li leswaku a a nge si na tivana ni wanuna, a a tsrhama na yene nakone a a nge si na tekiwa. 4 A nga fanelanga a tintxhimisa kumbe ku tinyamisa hi nsati wa wanuna mun’wana lweyi a nga xikazri ka vhanu vake. 5 A va fanelanga va tsremeta mpandlha, va tsremeta malepfu yavu ya le matlhelweni nambi ku titsremelela mizri. 6 Va fanela ku va lava xwengiki ka Xikwembu Nkulukumba wavu nakone a va fanelanga va ntxhimisa vito dzrake, hikusa va nyikela magandzrelo lawa ma hambeliwiki Yehovha hi ndzrilo, ku nga swakuda swake; xileswo va fanela ku va lava xwengiki. 7 A va fanelanga va tekana ni wansati lweyi a nga nghwavana, wansati lweyi a hambiwiki nsele, nambi ku tekana ni wansati lweyi a tsrhikaniki ni nuna wake, hikusa a muprista a xwengile ka Xikwembu Nkulukumba wake. 8 Mu xwengisi, hikusa hi yene a nyikelaka swakuda ka Xikwembu Nkulukumba waku. A fanela ku va lweyi a xwengiki kwenu, hikusa mine Yehovha lweyi a mi xwengisaka ni xwengile.

9 “‘Loko n’wana wa xisati wa muprista o tintxhimisa hi ku tiyentxa nghwavana a ta va na a ntxhimisa papayi wake, a n’wana lweyo a fanela ku hisiwa.

10 “‘A muprista lwenkulu lweyi a hlawuliwiki a makazri ka vamakwavu a va a txheliwa mafuzra ya ku hlawulekisa a nhlokweni yake kutani a bekiwa leswaku a yambala mpahla ya ku hlawuleka ya wuprista, a nga fanelanga a tsrhama ni misisi ya ku honekela kumbe ku handzrula mpahla yake. 11 A nga fanelanga a tsrhindzrekela lani ku nga ni mhunu lweyi a fiki;* a nga fanelanga a tinyamisa nambiloko lweyi a fiki a li mamana wake kumbe papayi wake. 12 A nga fanelanga a huma mbangwini wa ku xwenga, nambi ku ntxhimisa mbangu wa ku xwenga wa Xikwembu Nkulukumba wake, hikusa a mfungu wa ku tinyiketela kwake, ku nga mafuzra ya ku hlawulekisa ya Xikwembu Nkulukumba, ma le henhla kwake. Hi mine Yehovha.

13 “‘A fanela ku tekana ni wansati lweyi a kalaka a ngi ngi yentxa swa tinkuku. 14 A nga fanelanga a tekana ni wansati lweyi a feliwiki hi nuna, lweyi a tsrhikaniki ni nuna wake, lweyi a hambiwiki nsele,* nambi lweyi a nga nghwavana; kambe a fanela ku tekana ni wansati lweyi a kalaka a ngi ngi yentxa swa tinkuku, wa le xikazri ka vhanu vake. 15 A nga fanelanga a ntxhimisa vanake a xikazri ka vhanu vake, hikusa hi mine Yehovha lweyi a mu xwengisaka.’”

16 Yehovha a ya mahlweni a byela Moxe a ku: 17 “Byela Aroni u ku: ‘Ka vanaku, a tinxakeni tavu hinkwatu a wanuna lweyi a nga ni wulema bya kukazri a nga fanelanga a tsrhindzrekela a altarini akuva a nyikela swakuda swa Xikwembu Nkulukumba wake. 18 Loko ku ni wanuna wa kukazri lweyi a nga ni wulema a nga fanelanga a tsrhindzrekela, ku nga ha va wanuna lweyi a fiki matihlo, lweyi a khutaka, lweyi a limaliki wuso,* lweyi a nga ni nenge kumbe voko leswi lehiki ku tlula munghanu; 19 wanuna lweyi a tsrhovekiki nenge kumbe voko; 20 lweyi a nga ni lundha,* lweyi a nga xigono,* lweyi a limaliki tihlo, lweyi a nga ni swizrumbana kumbe mazransi, kumbe lweyi a limaliki mazranga ya wununa. 21 Ka vana va muprista Aroni, a ku na wanuna lweyi a nga ni wulema bya kukazri a faneliki ku tsrhindzrekela a nyikela magandzrelo lawa ma hiseliwaka Yehovha. Leswi a nga ni wulema, a nga fanelanga a tsrhindzrekela a nyikela swakuda swa Xikwembu Nkulukumba. 22 A nga da swakuda swa Xikwembu Nkulukumba wake leswa ku xwengisisa ni leswa ku xwenga. 23 Kambe a nga fanelanga a tsrhindzrekela ka kortina nambi a altarini, hikusa a limalile; kutani a nga fanelanga a nyamisa mbangu wanga wa ku xwenga, hikusa hi mine Yehovha lweyi a va xwengisaka.’”

24 Xileswo Moxe a byela Aroni, vana va Aroni kun’we ni Vaisrayele hinkwavu.

22 Yehovha a ya mahlweni a vulavula na Moxe a ku: 2 “Byela Aroni ni vanake leswaku va tivonela ka ndlela leyi va ma tizrisaka ha yone* magandzrelo ya ku xwenga ya Vaisrayele ni leswaku va nga ntxhimisi vito dzranga dzra ku xwenga a mhakeni ya mintxhumu leyi va ni hlawulekiselaka yone. Hi mine Yehovha. 3 Va byeli u ku: ‘A tinxakeni tenu hinkwatu, ni ta helisa wanuna mun’wana ni mun’wana lweyi a tsrhindzrekelelaka mintxhumu ya ku xwenga nakasi a nyamile, mintxhumu leyi Vaisrayele va yi hlawulekiselaka mine Yehovha. Hi mine Yehovha. 4 A tinxakeni ta Aroni hinkwatu, wanuna mun’wana ni mun’wana lweyi a nga ni nhlokonho kumbe lweyi a nga ni ntsrhundzrwana, a nga fanelanga a da mintxhumu leyi xwengiki ku ya tlhasa loko a va lweyi a basiki, nambi lweyi a khumbiki mhunu lweyi a nyamisiwiki hi ntsrumbu kumbe lweyi a humiki mbewu ya wununa, 5 nambi wanuna lweyi a khumbaka xin’we ka swihazrana leswi kalaka swi nga basanga leswi nkwalaka a misaveni, kumbe lweyi a khumbiki mhunu lweyi hi xivangelo xa kukazri a nyamiki, mhunu lweyi a nga ha mu nyamisaka. 6 Lweyi a khumbaka wun’we ka mintxhumu leyi a ta va lweyi a kalaka a nga basanga ku ya tlhasa madambyeni nakone a fanela ku hlamba, futsrhi a nge ti da ntxhumu ni wun’we lowu xwengiki. 7 Loko dambu dzri pelile a ta va lweyi a basiki, nakone ntsrhaku ka leswo a nga ha da mintxhumu leyi xwengiki, hikusa i swakuda swake. 8 Nakone a nga fanelanga a da nyama ya xihazri ni xin’we lexi kumiwiki na xi file kumbe lexi hahluleliwiki hi swihazri swa nhova, ku nga mintxhumu leyi nga mu nyamisaka. Hi mine Yehovha.

9 “‘Va fanela ku yingiseta milawu yanga nakone a va fanelanga va ntxhimisa mintxhumu ya ku xwenga akuva va nga dohi va va va fa. Hi mine Yehovha lweyi a va xwengisaka.

10 “‘A mhunu lweyi a kalaka a nga pfumeleliwanga a nga fanelanga a da mintxhumu ya ku xwenga; nambi mutizri lweyi a tholiwiki kumbe mhunu wa le tikweni dzrimbeni lweyi a yendzreliki muprista, a nga fanelanga a da mintxhumu ya ku xwenga. 11 Kambe loko muprista a xava mhunu wa kukazri hi mali yake, a mhunu lweyo a nga da mintxhumu leyi xwengiki. A malandzra lama pswaliwiki kaya kwake na wone ma nga da mintxhumu leyo. 12 Loko n’wana wa xisati wa muprista a tekiwa hi wanuna lweyi a kalaka a nga li muprista, a nga fanelanga a da mintxhumu leyi xwengiki leyi humesiwiki hi vhanu. 13 Kambe loko n’wana wa muprista o feliwa hi nuna kumbe a hambana na yene na a nga na vana a va a tlhelela ka papayi wake, a nga da swakuda swa papayi wake hi lani a swi li ha kone na a ha li mumpshwa, kambe a ku na mhunu lweyi a kalaka a nga pfumeleliwanga* lweyi a fanelaka ku da mintxhumu leyi xwengiki.

14 “‘Loko mhunu wa kukazri o txhuka a da mintxhumu ya ku xwenga hi mphazamu, a fanela ku nyika muprista gandzrelo dzrin’wana a tlhela a yengesela 20 wa mapursentu ka dzrone. 15 Hi ndlela leyo, a vaprista a va fanelanga va ntxhimisa mintxhumu ya ku xwenga leyi Vaisrayele va yi nyikelaka ka Yehovha, 16 kutani va va vitanela xikhatiso hi kola ka nandzru wavu wa kuva va de mintxhumu leyi xwengiki, hikusa hi mine Yehovha lweyi a va xwengisaka.’”

17 Yehovha a ya mahlweni a byela Moxe a ku: 18 “Byela Aroni ni vanake kun’we ni Vaisrayele hinkwavu u ku: ‘Loko Muisrayele wa kukazri kumbe muluveli lweyi a tsrhamaka a Israyele a nyikela gandzrelo ledzri hiseliwaka Yehovha akuva a hetisisa xihlambanyu xa kukazri, kumbe a dzri nyikela swanga gandzrelo dzra ku tizrandzrela, 19 a fanela ku nyikela xifuyu xa xinuna lexi hanyiki ha hombe lexi a xi hlawuliki ka tihomu, swihambana ni timbuti, akuva a ta yamukeliwa. 20 Mi nga nyikeleni ntxhumu lowu limaliki hikusa a mi nge ti yamukeliwa.

21 Loko mhunu wa kukazri a nyikela gandzrelo dzra ku kombela ku zrula ka Yehovha akuva a hetisisa xihlambanyu xa kukazri kumbe swanga gandzrelo dzra ku tizrandzrela, a fanela ku nyikela hi xihazri lexi hanyiki ha hombe lexi a xi hlawuliki ka tihomu, tihamba kumbe ka timbuti akuva a ta yamukeliwa. A xihazri xa kone a xi fanelanga xi va ni wulema. 22 Mi nga nyikeli xihazri lexi fiki matihlo, lexi tsrhovekiki, lexi tsremiwiki, lexi nga ni nhlungu,* lexi nga ni swizrumbana kumbe lexi nga ni mazransi; mi nga nyikeli ni xin’we xa swihazri leswo ka Yehovha lexi nga ni matsrhamela lawo, futsrhi mi nga xi nyikeleni ka Yehovha a altarini. 23 U nga ha nyikela homu ya xinuna kumbe hamba, leswi swi nga ni voko kumbe nenge lowu lehiki ku tlula munghanu swanga gandzrelo dzra ku tizrandzrela, kambe a swi nge ti yamukeliwa loko u swi nyikela swanga gandzrelo dzra ku hetisisa xihlambanyu. 24 Kambe mi nga nyikeli gandzrelo ka Yehovha hi xihazri lexi nga ni mazranga ya wununa lama limaliki, lama pshwandlasiwiki, lama khatluliwiki kumbe lama tsremiwiki. A mi fanelanga mi nyikela hi swihazri swa muxaka lowo a tikweni dzrenu. 25 Mi nga nyikeleni ni xin’we xa swihazri leswo lexi nyikeliwiki hi mhunu lweyi a kalaka a nga li Muisrayele swanga swakuda swa Xikwembu Nkulukumba. Hikusa a swihazri leswo a swi tsrhamisekanga, swi ni wulema. A swi nge ti yamukeleka.’”

26 Yehovha a ya mahlweni a byela Moxe a ku: 27 “Loko ku pswaliwa xihon’wana xa xinuna,* xihambana xa xinuna kumbe ximbutana, xi ta tsrhama ni mamana wa xone ku dzringana 7 wa masiku, kambe ku sukela hi siku dzra wu 8 xi ta yamukeleka swanga gandzrelo, gandzrelo ledzri hiseliwaka Yehovha. 28 Loko ku li homu kumbe hamba, mi nga yi dlayi hi siku dzrin’we ni n’wana wa yone.

29 “‘Loko mi nyikela gandzrelo dzra ku tlangela ka Yehovha, mi fanela ku dzri nyikela hi ndlela leyi taka yentxa leswaku mi yamukeleka. 30 Dzri fanela ku diwa hi siku dzroledzro. A mi fanelanga mi siya xiyenge ni xin’we xa dzrone ku ya tlhasa siku ledzri landzrelaka. Hi mine Yehovha.

31 “‘Bekisani swileleto swanga mi va mi swi landzrela. Hi mine Yehovha. 32 Mi nga ntxhimiseni vito dzranga ledzri xwengiki nakone ni fanela ku xwengisiwa a makazri ka Vaisrayele. Hi mine Yehovha lweyi a mi xwengisaka 33 nakone a mi humesiki a tikweni dzra Egipta akuva a va Xikwembu Nkulukumba wenu. Hi mine Yehovha.

23 Yehovha a ya mahlweni a vulavula na Moxe a ku: 2 “Byela Vaisrayele u ku: ‘A minkhuvu leyi Yehovha a liki mi fanela ku yi tlangela i tinhlengeletanu ta ku xwenga, mi fanela ku yi twalisa. Hi leyi minkhuvu ya kone:

3 “‘Mi nga tizra ku dzringana 6 wa masiku, kambe a siku dzra wu 7 i savata, siku dzra ku wisa hi lani ku heleliki, ku nga nhlengeletanu ya ku xwenga, a mi fanelanga mi yentxa ntizro ni wun’we. Dzri fanela ku va savata dzra Yehovha hinkwaku lomu mi taka tsrhama kone.

4 “‘Hi leyi minkhuvu leyi Yehovha a liki mi fanela ku yi tlangela, ku nga tinhlengeletanu ta ku xwenga leti mi fanelaka ku ti twalisa hi tinguva leti ti bekiseliwiki tone: 5 hi siku dzra wu 14 ka hweti ya ku sungula mi ta hambela Yehovha Paxkwa a madambyeni ntsrhaku ka ku pela ka dambu.

6 “‘Hi siku dzra wu 15 ka hweti yoleyo mi ta hambela Yehovha Nkhuvu wa Mapawu lawa ma kalaka ma nga txheliwanga Fermentu.* Mi fanela ku da mapawu lawa ma kalaka ma nga txheliwanga fermentu ku dzringana 7 wa masiku. 7 Hi siku dzra ku sungula mi ta hamba nhlengeletanu ya ku xwenga. A mi fanelanga mi hamba ntizro ni wun’we wa ku bindzra. 8 Kambe mi fanela ku hambela Yehovha gandzrelo dzra ku hisiwa ku dzringana 7 wa masiku. Hi siku dzra wu 7 ku ta va ni nhlengeletanu ya ku xwenga. A mi fanelanga mi hamba ntizro ni wun’we wa ku bindzra.’”

9 Yehovha a ya mahlweni a byela Moxe a ku: 10 “‘Byela Vaisrayele u ku: ‘Loko mi nghena tikweni ledzri ni mi nyikaka dzrone kutani mi tsrhovela a masin’wini kwenu, mi fanela ku nyika muprista a nyandzra yin’we ya ntsrhovelo wa ku sungula. 11 Kutani a muprista a ta yi zrendzrelekisa, a yi yisa mahlweni na a yi tlhelisa ntsrhaku a mahlweni ka Yehovha, akuva mi yamukeleka. A fanela ku yentxa leswo hi siku ledzri landzrelaka siku dzra Savata. 12 Hi siku ledzri a nyandzra yi taka zrendzrelekisiwa ha dzrone, mi fanela ku nyikela xihambana xa xinuna lexi hanyiki ha hombe nakone xo ko va ni lembe dzrin’we, swanga gandzrelo ledzri hiseliwaka Yehovha. 13 Mi ta nyikela ni makilu mabidzri ya* mapa lamanene lawa ma patsriwiki ni mafuzra, swanga gandzrelo ledzri hiseliwaka Yehovha hi ndzrilo, nun’hwelo lowu nyonxisaka. Mi ta nyikela ni litru* dzra vhinyu swanga gandzrelo dzra swa ku nwa. 14 Mi nga txhuki mi da pawu, tinhleke ta ku kantingiwa kumbe tinhleke le ta ha tsrakamaka ku ya tlhasa siku ledzro, ku ya tlhasa loko mi buyisela Xikwembu Nkulukumba wenu gandzrelo. I nawu wa hi lani ku nga helikiki a tinxakeni tenu hinkwatu, kun’wana ni kun’wana lomu mi tsrhamaka kone.

15 “‘Ntsrhaku ka siku dzra Savata, mi fanela ku konta 7 wa masiku ya masavata ku sukela hi siku ledzri mi buyisaka nyandzra ya gandzrelo ledzri zrendzrelekisiwaka. Ma fanela ku va 7 wa mavhiki lama heleliki. 16 Mi ta konta 50 wa masiku ku ya tlhasa siku ledzri dzri landzrelaka Savata dzra wu 7, ntsrhaku ka leswo mi fanela ku nyikela ka Yehovha gandzrelo dzra tinhleke leti ta ha tsrakamaka. 17 Mi fanela ku buyisa mapawu mabidzri hi le makaya kwenu akuva ma va gandzrelo ledzri zrendzrelekisiwaka, ma fanela ku va na ma hambiwe hi makilu mabidzri ya* mapa lamanene. Ma fanela ku woxiwa na ma txheliwe fermentu swanga ntsrhovelo wa ku sungula lowu nyikeliwaka ka Yehovha. 18 Mi fanela ku nyikela mapawu kun’we ni 7 wa swihambana swa xinuna leswi hanyiki ha hombe leswi swo ko va ni lembe dzrin’we, ni xihon’wana kun’we ni tihamba tibidzri ta xinuna. Swi ta va gandzrelo ledzri hiseliwaka Yehovha, ku patsra ni gandzrelo dzra tinhleke kun’we ni dzra swa ku nwa, ku nga magandzrelo lawa ma nyikeliwaka kun’we na swone akuva dzri va gandzrelo dzra ku hisiwa, nun’hwelo lowu nyonxisaka Yehovha. 19 Mi fanela ku nyikela ni ximbutana akuva xi va gandzrelo dzra xidoho kun’we ni swihambana swibidzri swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. 20 A muprista a ta zrendzrelekisa swihambana leswo swibidzri swa xinuna a swi yisa mahlweni na a swi tlhelisa ntsrhaku, na swi li kun’we ni mapawu ya ntsrhovelo wa ku sungula, swanga gandzrelo ledzri zrendzrelekisiwaka a mahlweni ka Yehovha. Swi ta va ntxhumu lowu lumbaka muprista, lowu xwengiki ka Yehovha. 21 Hi siku dzroledzro, mi ta byela vhanu leswaku mi hlengeletana mi gandzrela Xikwembu Nkulukumba,* a mi fanelanga mi yentxa ntizro ni wun’we wa ku bindzra. I nawu lowu nga helikiki hinkwaku lomu mi tsrhamaka kone a tinxakeni tenu hinkwatu.

22 Loko mi tsrhovela, mi nga txhuki mi tsrhovela hi ku helela leswi nga wugan’wini bya masimu yenu, nakone mi nga zroleli leswi wetetelaka. Mi fanela ku swi siyela swisiwana ni valuveli. Hi mine Yehovha Xikwembu Nkulukumba wenu.’”

23 Yehovha a ya mahlweni a vulavula na Moxe a ku: 24 “Byela Vaisrayele u ku: ‘Hi siku dzra ku sungula ka hweti ya wu 7, mi fanela ku wisa hi lani ku heleliki, i siku ledzri dzri kalaka dzri nga fanelanga ku dzrivaliwa ledzri taka twalisiwa hi xipalapala,* ku nga nhlengeletanu ya ku xwenga. 25 Mi nga yentxi ntizro wa ku bindzra nakone mi ta nyikela gandzrelo ledzri hiseliwaka Yehovha.’”

26 Yehovha a ya mahlweni a vulavula na Moxe a ku: 27 “Kambe a siku dzra wu 10 ka hweti leyo ya wu 7, i Siku dzra ku Kombela ku Dzrivaleliwa, mi fanela ku va ni nhlengeletanu ya ku xwenga; mi tlhela mi xukuvala* mi va mi nyika Yehovha gandzrelo dzra ku hisiwa. 28 Mi nga yentxi ntizro ni wun’we hi siku ledzri, hikusa i siku dzra ku kombela ku dzrivaleliwa, akuva vaprista va mi kombelela ku dzrivaleliwa mahlweni ka Yehovha Xikwembu Nkulukumba wenu. 29 Mun’wana ni mun’wana lweyi a taka kala a nga xukuvali hi siku ledzro a ta dlayiwa. 30 Mun’wana ni mun’wana lweyi a tizraka hi siku ledzro ni ta mu helisa. 31 A mi fanelanga mi yentxa ntizro ni wun’we. Lowu i nawu wa hi lani ku nga helikiki a tinxakeni tenu hinkwatu, kun’wana ni kun’wana lomu mi tsrhamaka kone. 32 I siku dzra savata, siku dzra kuva mi wisa hi lani ku heleliki, kutani mi fanela ku xukuvala a madambyeni ya siku dzra wu 9 ka hweti yoleyo. A madambyeni mi fanela ku bekisa savata ku ya tlhasa ka madambu lama landzrelaka.”

33 Yehovha a ya mahlweni a vulavula na Moxe a ku: 34 “Byela Vaisrayele u ku: ‘Hi siku dzra wu 15 ka hweti leyo ya wu 7, mi ta hambela Yehovha Nkhuvu wa Mintsronga ku dzringana 7 wa masiku. 35 Hi siku dzra ku sungula mi fanela ku va ni nhlengeletanu ya ku xwenga; a mi fanelanga mi yentxa ntizro wa ku bindzra. 36 Mi fanela ku nyikela gandzrelo ledzri hiseliwaka Yehovha, ku dzringana 7 wa masiku. Hi siku dzra wu 8 mi fanela ku va ni nhlengeletanu ya ku xwenga; mi va mi nyikela gandzrelo ledzri hiseliwaka Yehovha. I nhlengeletanu ya ku hlawuleka. A mi fanelanga mi hamba ntizro ni wun’we wa ku bindzra.

37 Leyi i minkhuvu ya Yehovha leyi mi fanelaka ku yi twalisa swanga tinhlengeletanu ta ku xwenga, akuva mi nyikela gandzrelo ledzri hiseliwaka Yehovha, ku nga gandzrelo dzra ku hisiwa, gandzrelo dzra tinhleke ledzri nyikeliwaka ni gandzrelo dzra xihazri kun’we ni magandzrelo ya swa ku nwa, hi ku ya hi leswi swi bekiseliwiki siku dzroledzro. 38 Lawa i magandzrelo lawa mi fanelaka ku ma nyikela ka Yehovha ku tlhantekela ka lawa mi ma nyikelaka hi masavata ya Yehovha, lawa mi ma nyikelaka ya swihanano swenu, lawa mi ma nyikelaka akuva mi hetisisa swihlambanyu swenu, ni magandzrelo lawa mi ma nyikelaka hi ku tizrandzrela. 39 Kambe hi siku dzra wu 15 ka hweti ya wu 7 loko mi hlengelete ntsrhovelo, mi fanela ku tlangela nkhuvu wa Yehovha ku dzringana 7 wa masiku. A siku dzra ku sungula ni siku dzra wu 8, i masiku ya ku wisa hi lani ku heleliki. 40 Hi siku dzra ku sungula mi ta teka mihandzru ya minsinya ya ku xonga ngopfu swinene, swiphundla swa minkindzru, swiphundla swa minsinya leyi nga ni makamba ya ku yavana ni swiphundla leswi nga ni makamba ya ku yavana swa minsinya leyi kulelaka mimfuleni,* mi va mi nyonxa mahlweni ka Yehovha Xikwembu Nkulukumba wenu ku dzringana 7 wa masiku. 41 Mi ta tlangela nkhuvu lowo wa Yehovha ku dzringana 7 wa masiku hi lembe. Mi fanela ku wu tlangela hi hweti ya wu 7. Lowu i nawu wa hi lani ku nga helikiki a tinxakeni tenu hinkwatu. 42 Mi fanela ku tsrhama ka mintsronga ku dzringana 7 wa masiku. Hinkwavu lava nga Vaisrayele* va fanela ku tsrhama mintsrongeni, 43 akuva vatukulu vavu va ta swi tiva leswaku a nkama lowu ni humesiki Vaisrayele a Egipta ni va yentxe va tsrhama mintsrongeni. Hi mine Yehovha Xikwembu Nkulukumba wenu.

44 Xileswo, Moxe a byela Vaisrayele mayelanu ni minkhuvu ya Yehovha.

24 Yehovha a ya mahlweni a vulavula na Moxe a ku: 2 “Byela Vaisrayele leswaku va buyisa mafuzra lamanene ya nhlwazri* akuva mimotsre yi ta tsrhama na yi vaninga. 3 Wusiku byin’wana ni byin’wana Aroni a ta tlhavika mimotsre a va a yentxa leswaku yi tsrhama na yi vona a mahlweni ka Yehovha a tendeni dzra tlhanganu, ku ya tlhasa mixweni, a mahlweni ka kortina ledzri nga kusuhi ni areka dzra Wumboni a tendeni dzra ntlhanganu. Lowu i nawu wa hi lani ku nga helikiki a tinxakeni tenu hinkwatu. 4 Aroni a fanela ku tiyiseka leswaku minkama hinkwayu a mimotsre yi tsrhame hi ndlela ya kone, ka xa ku tlhoma mimotsre xa woru ledzrinene a mahlweni ka Yehovha.

5 “U ta teka mapa lamanene u hamba 12 wa mapawu lama fanaka ni xitlan’wana. A pawu ha dzrin’we dzri fanela ku hambiwa hi makilu mabidzri ya mapa.* 6 U ta ma folisela hi mintlawa yibidzri ka menza wa woru* dzra dzrinene, lowu nga mahlweni ka Yehovha, ntlawa ha wun’we wu va ni 6 wa mapawu. 7 U fanela ku txhela olibanu ledzrinene* ka ntlawa ha wun’we; akuva dzri yimela gandzrelo hinkwadzru dzra mapawu, dzri ta va gandzrelo ledzri hiseliwiki Yehovha. 8 Siku dzrin’wana ni dzrin’wana dzra Savata a mapawu ma fanela ku bekiwa a mahlweni ka Yehovha, nkama hinkwawu. Lexi i xipfumelelanu xa hi lani ku nga helikiki ni Vaisrayele. 9 Ma ta va ya Aroni ni vanake nakone va fanela ku ma dela mbangwini wa ku xwenga, hikusa i ntxhumu wa ku xwengisisa kwavu, ka magandzrelo lawa ma hiseliwaka Yehovha. I nawu wa hi lani ku nga helikiki.”

10 Ka Vaisrayele, a ku ni n’wana wa djaha lweyi a mamana wake a a li Muisrayele kasi papayi wake a a li Muegipta, kutani a lwa ni Muisrayele wa kukazri a a mbangwini lowu ku dzimiwiki ka wone mintxhatxha. 11 Hiloko lweyi wa djaha a sungula ku yeyisa vito dzra Xikwembu Nkulukumba* ni ku dzri zruka, kutani va mu yisa ka Moxe. A vito dzra mamana wa djaha ledzro a ku li Xelomiti n’wana wa Dibri, wa lixaka dzra Dani. 12 Va pfalele djaha ledzro ku ya tlhasa loko va tiva xiboho xa Yehovha.

13 Kutani Yehovha a byela Moxe a ku: 14 “Humesa mhunu lweyi a zrukiki a mbangwini lowu mi dzimiki ka wone mintxhatxha, nakone hinkwavu lava mu yingeliki loko a zruka va fanela ku tlhanteka mavoko yavu nhlokweni yake, kutani nhlengeletanu hinkwayu yi mu khandla hi mazribye. 15 Nakone u fanela ku byela Vaisrayele u ku: ‘Loko mhunu wa kukazri a zruka Xikwembu Nkulukumba wake a ta tihlamulela hi kola ka xidoho xake. 16 Hi ndlela leyo, mun’wana ni mun’wana lweyi a zrukaka vito dzra Yehovha a fanela ku dlayiwa. Nakunene, a nhlengeletanu hinkwayu yi fanela ku mu khandla hi mazribye. Swi nge na mhaka leswaku i muluveli kumbe i Muisrayele, a fanela ku dlayiwa hi leswi a zrukiki vito dzra Xikwembu Nkulukumba.

17 “Loko mhunu wa kukazri a dlaya mhunu mun’wana,* nakunene a fanela ku dlayiwa. 18 Lweyi a baka xifuyu xi za xi fa a fanela ku xi hakela, wutomi hi wutomi.* 19 Loko mhunu wa kukazri a vavisa mhunu mun’wana a fanela ku yentxiwa leswi swi fanaka. 20 Ku tsrhoveka hi ku tsrhoveka, tihlo hi tihlo, tinyo hi tinyo; ndlela leyi mhunu a vavisaka mun’wana ha yone na yene a fanela ku vavisiwa ha yone. 21 Lweyi a baka xihazri xi za xi fa a fanela ku xi hakela, kambe lweyi a baka mhunu a za a fa a fanela ku dlayiwa.

22 “‘Hinkwenu mi fanela ku yavanyisiwa hi ndlela leyi fanaka, swi nge na mhaka leswaku u muluveli kumbe u Muisrayele, hikusa hi mine Yehovha, Xikwembu Nkulukumba wenu.’”

23 Xileswo, Moxe a byela Vaisrayele, kutani va teka mhunu lweyi a zruketeliki va mu humesa a mbangwini lowu ku dzimiwiki ka wone mintxhatxha va ya mu khandla hi mazribye. Hi ndlela leyo, a Vaisrayele va yentxe hi lani Yehovha a byeliki Moxe ha kone.

25 Yehovha a ya mahlweni a vulavula na Moxe a Nhaveni ya Sinayi, a ku: 2 “Byela Vaisrayele u ku: ‘Loko hi wugamu mi nghena tikweni ledzri ni mi nyikaka dzrone, a tiko dzri ta bekisa savata dzra Yehovha. 3 Ku dzringana 6 wa malembe mi fanela ku byala a masin’wini kwenu, mi khakhata* minsinya yenu ya mawuvha mi va mi tsrhovela. 4 Kambe a lembe dzra wu 7 dzri ta va savata dzra leswaku misava yi wisa hi lani ku heleliki, savata dzra Yehovha. A mi fanelanga mi byala a masin’wini kwenu nambi ku khakhata minsinya yenu ya mawuvha. 5 A mi fanelanga mi tsrhovela leswi nga ti milela ka tinhleke leti weteteliki ka ntsrhovelo wa wugamu nambi ku khaya mawuvha ka minsinya yenu ya mawuvha leyi kalaka yi nga khakhatiwanga. A masimu ma fanela ku va ni lembe dzra kuva ma wisisiwa hi lani ku heleliki. 6 Kambe n’wine, malandzra yenu ya xinuna ni ya xisati, vatizri lava mi nga va thola, kun’we ni valuveli lava tsrhamaka na n’wine, mi nga da leswi misava yi taka swi bindzrula hi savata. 7 A swifuyu ni swihazri swa nhova leswi nga kone a tikweni na swone swi nga da, mi nga da hinkwaswu leswi a misava yi taka swi bindzrula.

8 “‘U ta konta 7 wa malembe ya masavata u ma phindha ka 7, kutani a nhlayu ya wone hinkwawu yi ta va 49 wa malembe. 9 Hi siku dzra wu 10 ka hweti ya wu 7, ku nga Siku dzra ku Kombela ku Dzrivaleliwa, mi ta txhaya mpfumawulu wa nanga wu twala ngopfu swinene, mi fanela ku wu txhaya wu twiwa a tikweni dzrenu hinkwadzru. 10 Xwengisani lembe dzra wu 50, ku nga lembe dzra ku huweleliwa ka ntsrhunxeko ka vahanyi hinkwavu va le tikweni ledzro. Lembe ledzro dzri ta va Jubilewu* kwenu xileswo mun’wana ni mun’wana a fanela ku tlhelela ka mintxhumu yake, nakone a fanela ku tlhelela a maxakeni yake. 11 A lembe dzra wu 50 dzri ta va Jubilewu kwenu. A mi nge ti byala, nakone mi nge ti tsrhovela leswi swi ti mileliki ka tinhleke leti wiki, nambi ku hlengeleta mawuvha ya le minsinyeni ya mawuvha leyi kalaka yi nga khakhatiwanga. 12 Hikusa i Jubilewu. Dzri fanela ku va ledzri xwengiki kwenu. Mi nga da ntsena leswi swo ko yentxa hi ku timilela a tikweni.

13 “‘Hi lembe dzra Jubilewu, mun’wana ni mun’wana a fanela ku tlhelela ka mintxhumu yake. 14 Loko mi xavisela mhunu mun’wana ntxhumu wa kukazri kumbe mi xava ntxhumu wa kukazri kwake, mi nga xololani. 15 Loko u xava ntxhumu wa kukazri ka mun’wana u fanela ku konta malembe lawa ma khalutiki ntsrhaku ka Jubilewu; ni loko a ku xavisela nsimu a fanela ku ku xavisela hi ku ya hi malembe lawa ma ha saliki akuva ku tsrhoveliwa. 16 Loko ka ha sale malembe ya manyingi a nga ha yengesela mali, kambe loko ke sala malembenyana a fanela ku pumba, hikusa a va na a mu xavisela tinhleke leti ta ha taka bindzrula. 17 Ku nga vi na mhunu kwenu lweyi a xololaka mhunu mun’wana; mi fanela ku txhava Xikwembu Nkulukumba wenu, hikusa hi mine Yehovha Xikwembu Nkulukumba wenu. 18 Loko mi bekisa milawu yanga ni swiboho swanga swa wuyavanyisi, mi ta tsrhama na mi sizrelelekile a tikweni ledzro. 19 A tiko dzri ta humesa mihandzru ya dzrone, nakone mi ta da mi xuzra mi va mi hanya ka dzrone na mi sizrelelekile.

20 “kambe loko mi ku: “Hi ta da yini hi lembe dzra wu 7, swanga hi leswi hi kalaka hi nga fanelanga ku byala nambi ku tsrhovela?”, 21 mi nga vileli, hikusa hi lembe dzra wu 6 ni ta mi tovokisa, lakakuva misava yi bindzrula leswi yanelaka malembe mazrazru. 22 Xileswo mi ta byala hi lembe dzra wu 8, na mi tama mi da ntsrhovelo wa lembe dzra wu 6 ku ya tlhasa ka lembe dzra wu 9. Mi ta da ntsrhovelo lowo ku za ku tlhasa ntsrhovelo lowu landzrelaka.

23 “‘A mi fanelanga mi xavisela mhunu wa kukazri mbangu wa tiko ledzro akuva wu va wake hi lani ku nga heleliki hikusa a tiko i dzranga. Futsrhi hi ku ya hi vonela dzranga n’wine mi valuveli. 24 A mimbangu hinkwayu leyi yi mi lumbaka ya tiko ledzro swi fanela ku tlhela swi koteka kuva yi tlhelisiwa.*

25 “‘Loko makwenu o ndzruluka xisiwana lakakuva a xavisa xiyenge xa mbangu wake, a mutizruli, lweyi a nga xaka dzrake dzra le kusuhi, a fanela ku ta ta xava* mbangu lowu a wu xavisiki. 26 Loko mhunu wa kukazri a nga na xaka dzra le kusuhi ledzri nga xavaka mbangu lowu a wu xavisiki, kambe yene a hluvuka, a va ni makotela ya ku tizrula mbangu wake, 27 a fanela ku kontela leswaku ku khalute malembe mangani ntsrhaku ka loko a wu xavisile, kutani a hakela mali ya malembe lawa ma ha saliki akuva ku tlhasa Jubilewu. Hi ndlela leyo, a mbangu wu nga tlhelela ka n’winyi wa wone.

28 “‘Kambe loko a nga na makotela ya ku tizrula leswi a swi xavisiki, swi ta tama swi va swa muxavi ku za ku tlhasa lembe dzra Jubilewu; kutani hi Jubilewu a mbangu wolowo wu ta tlheliseliwa ka n’winyi wa wone wa ku sungula, wu va wu lumba yene.

29 “‘Loko wanuna wa kukazri a xavisa yindlu a doropeni ledzri nga ni muru, a mfanelo yake ya ku tizrula yindlu leyo yi ta tizra ku ya tlhasa loko a tlhanganisa lembe na a xavise yindlu leyo; a mfanelo yake ya ku tlhela a xava* yindlu leyo yo tizrela lembe dzrin’we ntsena. 30 Kambe loko a nga yi xavi ku za ku hela lembe, a yindlu leyi nga doropeni ledzri biyeliwiki hi muru yi ta lumba lweyi a yi xaviki hi lani ku nga helikiki, a tinxakeni take hinkwatu. A nga fanelanga a yi tlhelisa hi Jubilewu. 31 Nambitasu, a tiyindlu leti nga mimbangwini leyi kalaka yi nga biyeleliwanga hi muru ti fanela ku voniwa na ti li xiyenge xa masimu ya tiko. A mfanelo ya ku va ti tlhela ti xaviwa hi vinyi va tone va ku sungula yi fanela ku tama yi tizra, nakone hi Jubilewu a tiyindlu leto ti fanela ku tlhelisiwa.

32 “‘Mayelanu ni tiyindlu ta Valevhi leti nga madoropeni yavu, a Valevhi va ni mfanelo ya hi lani ku nga helikiki ya ku tlhela va ti xava. 33 Kambe loko Mulevhi wa kukazri a nga tlheli a yi xava yindlu leyi a yi xavisiki, a yindlu leyo leyi nga doropeni, leyi lumbaka Valevhi yi fanela ku tlhelisiwa hi lembe dzra Jubilewu, hikusa a tiyindlu leti nga madoropeni ya Valevhi i pfindla dzravu a makazri ka Vaisrayele. 34 Handle ka leswo, a mimbangu ya ku byisela ka yone leyi nga matlhelweni ka madoropa yavu a yi fanelanga yi xavisiwa, hikusa i pfindla dzravu dzra hi lani ku nga helikiki.

35 “‘Loko makwenu lweyi a hanyaka na n’wine a va xisiwana, a nga swi koti ku kuma swa ku tihanyisa, u fanela ku mu pfuna hi lani a wu ta mu pfuna ha kone mhunu lweyi a nga muluveli, akuva a tama a hanya. 36 U nga mu voleki ntxhumu na u yimela kuva a ku tlhelisela na swi li swinyingi. Txhava Xikwembu Nkulukumba waku, kutani a makwenu a ta tama a hanya. 37 U nga mu voleki mali kutani u yimela kuva a ku tlhelisela na yi li yinyingi kumbe u mu nyika swakuda na u yimela leswaku a ku tlhelisela na swi li swinyingi. 38 Hi mine Yehovha Xikwembu Nkulukumba wenu, lweyi a mi humesiki tikweni dzra Egipta akuva a mi nyika tiko dzra Kanana leswaku ni tiyisekisa leswaku ni Xikwembu Nkulukumba wenu.

39 “‘Loko makwenu lweyi a hanyaka na n’wine a va xisiwana lakakuva a tixavisa kwaku, u nga mu sindzrisi ku yentxa mintizro ya wukazrawa. 40 Hanyisana na yene swanga mutizri lweyi u mu tholiki kumbe muluveli. A fanela ku ku tizrela ku ya tlhasa ka lembe dzra Jubilewu. 41 Ntsrhaku ka leswo, a ta timukela kun’we ni vanake, a tlhelela ndangwini wake. A fanela ku tlhelela pfindleni dzra vakokwana vake. 42 Hikusa vone i swikazrawa swanga, leswi ni swi humesiki a tikweni dzra Egipta. A va fanelanga va tixavisa hi ndlela leyi swikazrawa swi xavisiwaka ha yone. 43 Mi nga va yentxeli tihanyi; txhavani Xikwembu Nkulukumba wenu. 44 Lava va nga yentxiwaka swikazrawa swenu swa xinuna ni swa xisati, va fanela ku pfa hi ka matiko ya le kusuhi na n’wine. Mi nga tixavela xikazrawa xa xinuna kumbe xa xisati ka matiko wolawo. 45 Nakone mi nga ha xava swikazrawa ka vana va valuveli lava tsrhamaka na n’wine, kumbe ka mindangu ya vana lava pswaleliwiki vone, lava tsrhamaka a tikweni dzrenu. Hi ndlela leyo va ta va pfindla dzrenu. 46 A vhanu lavo va nga va pfindla ledzri mi nga dzri nyikaka vanenu, pfindla dzra hi lani ku nga helikiki. Mi nga va tizrisa swanga vatizri, kambe loko ku li vamakwenu lava nga Vaisrayele mi nga va hambeli nsele.

47 “‘Kambe loko mhunu lweyi a nga muluveli kwenu a hluvuka, a makwenu lweyi a nga Muisrayele lweyi a hanyaka na wene a va xisiwana lakakuva swi djula a tinyikela ka muluveli lweyo kumbe ka xaka dzra muluveli yelweyo, 48 a ta tama a va ni mfanelo ya ku tizruliwa ntsrhaku ka loko a tixavisile. Mun’we ka vamakwavu a nga ha mu tizrula, 49 kumbe a nga ha tizruliwa hi malume wake, hi n’wana malume wake, hi xaka dzrake dzra le kusuhi kumbe hi xizro xa kukazri xa ndangu wake.

“‘Loko yene kutani a hluvukile, a nga ha titizrula ha wuswake. 50 Yene kun’we ni lweyi a mu xaviki va fanela ku konta ku sukela ka lembe ledzri a tixavisiki kwake ha dzrone ku ya tlhasa ka lembe dzra Jubilewu, kutani a mali ya ku xavisiwa kwake yi ta ya hi nhlayu ya malembe. A mali ya masiku lawa a ma tizriki yi ta fana ni ya muholo wa mutizri lweyi e ke tholiwa. 51 Loko ka ha kiyela malembe manyingi, a fanela ku hakela mali ya ku tizruliwa kwake ya malembe lawa ma ha saliki. 52 Kambe loko ke sala malembenyana akuva ku tlhasa lembe dzra Jubilewu, a fanela ku tihambela tikonta a va a hakela mali ya xitizrulo xake ya malembe lama ha saliki. 53 Lembe dzrin’wana ni dzrin’wana a fanela ku tizrela lweyi a mu xaviki, na a tizra ku fana ni mutizri lweyi a tholiwiki nakone u nga pfumeleli kuva lweyi a mu xaviki a mu hambela nsele. 54 Kambe loko a nga na makotela ya ku titizrula hi tindlela leti, yene kun’we ni vanake va fanela ku ntsrhunxiwa hi lembe dzra Jubilewu.

55 “‘Hikusa a Vaisrayele i swikazrawa swanga. I swikazrawa swanga leswi ni swi humesiki a tikweni dzra Egipta. Hi mine Yehovha, Xikwembu Nkulukumba wenu.

26 “‘Mi nga txhuki mi tihambela swikwembu leswi kalaka swi nga pfuni ntxhumu, nakone mi nga txhuki mi tibekela swithombe leswi vatliwiki, kumbe tinsika ta* ku xwenga; nambi ku va a tikweni dzrenu mi tibekela mazribye lawa ma kovotliwiki akuva mi ma khinsamela, hikusa hi mine Yehovha Xikwembu Nkulukumba wenu. 2 Mi fanela ku hlayisa masavata yanga nakone mi kombisa xitxhavu mbangu wanga wa ku xwenga.* Hi mine Yehovha.

3 “‘Loko mi tama mi yingiseta milawu yanga ni ku bekisa swileleto swanga mi va mi swi landzrela, 4 ni ta mi nisela timpfula hi nguva ya kone; kutani misava yi ta humesa mihandzru ya yone, ni minsinya ya nhova yi ta pswala mihandzru. 5 A nguva ya ku hehezra yi ta famba ku ya tlhasa ka nguva ya ku khaya mawuvha, nakone a nguva ya ku khaya mawuvha yi ta famba ku ya tlhasa ka nguva ya ku byala; mi ta da swakuda mi xuzra mi va mi tsrhama tikweni dzrenu na mi sizrelelekile. 6 Ni ta yentxa leswaku mi va ni ku zrula a tikweni, kutani mi tsrhama ntsrhutini wenu na ku nga na mhunu lweyi a mi txhavisaka; nakone ni ta hlongola swihazri swa nhova a tikweni leswi nga ni nghozi, futsrhi a ku na mhunu lweyi a taka hlasela tiko dzrenu. 7 Nakunene n’wine mi ta hlongolisa valala venu mi va mi va dlaya hi xipada. 8 Mi ta hlongolisa 100 wa vone na mi li ntlhanu, mi va mi hlongolisa 10.000 wa vone na mi li 100, kutani mi ta dlaya valala venu hi xipada.

9 “‘Ni ta mi komba timpswalu ni va ni yentxa leswaku mi tala nakone ni ta bekisa xipfumelelanu xanga na n’wine. 10 Na ma ha da ntsrhovelo wa lembe ledzri khalutiki, swi ta djula mi txukumeta lowa khale akuva ku va ni mbangu wa ku nghenisa wa nyiwana. 11 Kutani ni ta beka tabernakela dzranga kwenu nakone a ni nge ti mi tsrhika. 12 Ni ta va na n’wine, ni va Xikwembu Nkulukumba wenu, n’wine mi ta va vhanu vanga. 13 Hi mine Yehovha Xikwembu Nkulukumba wenu, lweyi a mi humesiki a tikweni dzra Egipta akuva mi nga ha vi swikazrawa swavu. Ni tsrhove mpinga wenu kutani ni yentxa leswaku mi famba na mi wololoxe tinhloko.*

14 “‘Nambitanu, loko mi nga ni yingiseti kumbe mi nga swi bekisi swileleto leswi hinkwaswu, 15 nakone mi tsrhika milawu yanga ni swiboho swanga swa wuyavanyisi lakakuva mi nga swi landzri swileleto swanga hinkwaswu, mi hona xipfumelelanu xanga, 16 ni ta mi yentxa leswi: Ni ta mi khatisa hi ku yentxa leswaku mi xaniseka, mi va ni nkohlela, ku hiseta lokukulu ka mizri, matihlo yenu ma nga ha voni ha hombe, ni yentxa ni leswaku mi hela ntamu. Mi ta byala mahala, hikusa leswi mi taka swi byala swi ta diwa hi valala venu. 17 Ni ta mi fulazrela nakone mi ta hluliwa hi valala venu, lava va mi nyenyaka va ta mi xanisa, futsrhi mi ta tsrutsruma na ku nga na lweyi a mi hlongolisaka.

18 “‘Kambe loko mi tama mi nga ni yingiseti swi ta djula leswaku ni mi khatisa hi lani ku phindhiwiki ka 7, hi kola ka swidoho swenu. 19 Ni ta hohlota ku tikulisa kwenu, ni pfala matilo akuva ku nga ha ni mpfula ni misava yenu yi nga ha bindzruli.* 20 Mi ta tizra mahala hikusa a misava yenu a yi nge ti bindzrula, ni minsinya yi nge ti pswala mihandzru.

21 “‘Kambe loko mi tama mi ni fulazrela, mi yala ku ni yingiseta, swi ta djula leswaku ni mi ba hi lani ku phindhiwiki ka 7, hi kola ka swidoho swenu. 22 Ni ta zrumela swihazri swa nhova kwenu leswi taka mi siya na mi nga ha na vana, swi va swi heta swifuyu swenu ni ku pumba nhlayu yenu, kutani a ku nge he ti famba mhunu ka tindlela ta le tikweni dzrenu.

23 “‘Kambe loko mi nga swi yamukeli loko ni mi luleka, mi tama mi ni fulazrela, 24 na mine ni ta mi fulazrela ni va ni mi ba hi lani ku phindhiwiki ka 7 hi kola ka swidoho swenu. 25 Ni ta yentxa leswaku a valala venu va mi hlasela akuva va mi khatisa hi mhaka ya leswi mi honiki xipfumelelanu. Loko mi tsrutsruma mi ya madoropeni yenu ni ta mi zrumela mavabyi, kutani mi ta nyikeliwa a mavokweni ya nala wenu. 26 Loko ni helise swakuda swa swinyingi leswi mi nga na swone, 10 wa vavasati va ta mi woxela pawu ka xitiko xin’we va va va pima va mi khemela dzra dzritsrongo; mi ta da kambe a mi nge ti xuzra.

27 “‘Loko nambitanu mi nga ni yingiseti, mi tama mi ni fulazrela, 28 Ni ta mi fulazrela hi lani ku yengeselekiki, kutani swi ta djula leswaku ni mi khatisa hi lani ku phindhiwiki ka 7 hi kola ka swidoho swenu. 29 Xileswo mi ta sindzriseka ku da nyama ya vanenu va madjaha ni va van’hwanyana. 30 Ni ta hohlota mimbangu yenu ya ku xwenga leyi tlakukiki, ni wisa ni maaltari yenu ya muzri wa ku nun’hwela ni va ni tlhantekela mintsrumbu yenu a henhla ka mintsrumbu ya swikwembu swenu swa ku nyenyentsa; ni gama ni mi fulazrela hikusa ma ni nyenyentsa. 31 Ni ta helisa madoropa yenu ni ku yentxa leswaku a mimbangu yenu ya ku xwenga yi va zrumbi; a ku nun’hwela ka magandzrelo yenu a ku nge he ti va loku nyonxisaka kwanga. 32 Ni ta yentxa leswaku a tiko dzrenu dzri va zrumbi, a valala venu lava tsrhamaka ka dzrone va ta hlamala hi leswi va taka swi vona loko va dzri lavisa. 33 Ni ta mi hangalasa a xikazri ka matiko ni va ni yentxa leswaku a valala venu va ta ta lwisana na n’wine hi xipada; kutani a tiko dzrenu dzri va zrumbi ni madoropa yenu ma hohloka.

34 “‘Hi nkama wolowo, a tiko dzri ta hakela masavata hinkwawu lawa mi ma tluliki nkama lowu na dzri li zrumbi na ma ha li tikweni dzra valala venu. Hi nkama lowo a tiko dzri ta wisa,* hikusa dzri fanela ku hakela masavata ya dzrone. 35 Masiku hinkwawu lawa a tiko dzri taka va na dzri li zrumbi dzri ta wisa, hikusa nkama lowu a mi tsrhama ka dzrone a mi wu bekisanga nawu wa savata, a mi dzri wisisanga.

36 “‘Lava taka huluka ni ta yentxa leswaku a timbilu tavu ti txhava ngopfu swinene a tikweni dzra valala vavu, va ta txhava nambi hi ku twa mpfumawulu wa kamba ledzri dzro ko wungisiwa hi moya, kutani va tsrutsruma va patsra ni ku wa ingiki hi loko vo hlongolisiwa hi mhunu lweyi a nga ni xipada nambiloko ku nga na mhunu lweyi a va hlongolisaka. 37 Va ta phazriyetana va wa ingiki hi loko vo hlongolisiwa hi mhunu lweyi a nga ni xipada nakasi a va hlongolisiwi hi mhunu. A mi nge ti swi kota ku hlula valala venu. 38 Mi ta fela xikazri ka vamatiko, a tiko dzra valala venu dzri ta mi minta. 39 Van’we venu lava taka va na va ha hanya va ta siyiwa akuva va xaniseka a matikweni ya valala venu, hi mhaka ya swihoxo swenu. Ina, va ta xaniseka hi mhaka ya swihoxo swa vapapayi vavu. 40 Va ta tihlaya swihoxo swavu, swihoxo swa vapapayi vavu ni ku kala ku dumbeka ka vapapayi vavu, va pfumela leswaku va hanye hi ndlela leyi kalaka yi nga dumbekanga hi ku va va ni fulazrela, 41 va yentxa leswaku na mine ni va fulazrela ni va ni va yisa tikweni dzra valala vavu.

“‘Kumbexana timbilu tavu leti tlanyaliki ti nga va leti ti titsrongahataka, kutani va hakela swihoxo swavu. 42 Ni ta dzrimuka xipfumelelanu lexi ni xi hambiki na Yakobe, xipfumelelanu lexi ni xi hambiki na Izaki, xipfumelelanu lexi ni xi hambiki na Abrahamu ni va ni dzrimuka tiko. 43 Na va ha fambile va siya tiko, a tiko dzri hakele masavata ya dzrone dzri va dzri ndzruluka zrumbi na va nga li kone, nakone a vo hakela hi kola ka swihoxo swavu, swanga hi leswi va tsrhikiki swiboho swanga swa wuyavanyisi va va va fulazrela milawu yanga. 44 Nambitanu, na va ha li tikweni dzra valala vavu a ni nge txhuki ni va fulazrela hi lani ku heleliki, nambi ku va txukumeta lakakuva ni va helisa, ku nga leswi a swi ta hona xipfumelelanu lexi ni xi hambiki na vone, hikusa hi mine Yehovha Xikwembu Nkulukumba wavu. 45 Akuva va pfuneka ni ta dzrimuka xipfumelelanu lexi ni xi hambiki ni vakokwana vavu, lava ni va humesiki a tikweni dzra Egipta a mahlweni ka vamatiko, akuva ni tiyisekisa leswaku ni Xikwembu Nkulukumba wavu. Hi mine Yehovha.’”

46 Leswi i swileleto, swiboho swa wuyavanyisi ni milawu leyi Yehovha a yi nyikiki Vaisrayele a Nhaveni ya Sinayi, hi ku tizrisa Moxe.

27 Yehovha a ya mahlweni a vulavula na Moxe a ku: 2 “Byela Vaisrayele u ku: ‘Loko mhunu wa kukazri a hamba xihlambanyu xa ku hlawuleka xa ku nyika Yehovha ntsrengo wa kukazri wa mali leyi koxiwaka hi ku ya hi mhunu, 3 a mali leyi koxiwaka ka mhunu lweyi a nga ni 20 ku ya ka 60 wa malembe, loko a li wanuna i 50 wa maxekele* ya prata, hi ku ya hi mpimu wa xekele lowu tizrisiwaka a mbangwini wa ku xwenga.* 4 Kambe loko a li wansati, a mali leyi koxiwaka i 30 wa maxekele. 5 Loko a li wanuna na a ni ntlhanu ku ya ka 20 wa malembe, a mali leyi koxiwaka i 20 wa maxekele, kasi loko a li wansati, i 10 wa maxekele. 6 Loko ku li xidjahatana lexi nga ni hweti yin’we ku ya ka ntlhanu wa malembe, a mali leyi koxiwaka i ntlhanu wa maxekele ya prata, kasi loko ku li xin’hwanyatana i maxekele mazrazru ya prata.

7 “‘Loko a li wanuna na a ni 60 wa malembe ku ya henhla, a ntsrengo lowu koxiwaka i 15 wa maxekele, kasi loko a li wansati i 10 wa maxekele. 8 Kambe loko lweyi a hambiki xihlambanyu a li xisiwana ngopfu lakakuva a nga swi koti ku humesa mali leyi koxiwaka, a ta yela muprista kutani a muprista a hlaya leswaku a fanela ku humesa mali muni. A muprista a ta ya hi makotela ya lweyi a hambiki xihlambanyu.

9 “‘Loko mhunu wa kukazri a hlaya leswaku a ta nyikela xihazri lexi basiki ka Yehovha, a xihazri lexo xi ta va lexi xwengiki ka Yehovha. 10 A nga fanelanga a txintxisa xihazri lexo, xa xinene hi xa ku biha kumbe xa ku biha hi xa xinene. Kambe loko a txintxisa xihazri hi xin’wana, ha swibidzri swi ta va leswi xwengiki. 11 Loko xihazri xa kone xi nyamile nakone xi nga fanelanga xi nyikeliwa swanga gandzrelo ka Yehovha, lweyi a xi nyikelaka a ta xi yisa mahlweni ka muprista. 12 A muprista a ta kambela xiyimu xa xone a va a hlaya leswaku xi dzringana mali muni. 13 Kambe loko lweyi a a li n’winyi wa xone a txhuka a djula leswaku xi tlhela xi va xake, a fanela ku nyikela mali leyi koxiwaka a va a tlhantekela 20 wa mapursentu ka mali yoleyo.

14 “‘Loko mhunu wa kukazri a nyikela yindlu yake ka Yehovha swanga ntxhumu lowu xwengiki, a muprista a ta ya yi kambela a vona leswaku yi le ka xiyimu muni. Kutani hi ku ya hi xiyimu xa yone, a ta hlaya leswaku a yindlu leyo i mali muni. 15 Kambe loko lweyi a yi xwengisiki a djula leswaku yi tlhela yi va yake, a fanela ku hakela mali ya yindlu leyo a tlhela a tlhantekela 20 wa mapursentu, kutani a yindlu yi ta va yake.

16 “‘Loko mhunu wa kukazri a nyikela xiyenge xa nsimu yake ka Yehovha swanga ntxhumu lowu xwengiki, a mali ya kone yi ta ya hi mpimu wa mbewu leyi djulekaka akuva yi yaneta nsimu leyo: A 130 wa makilu ya mbewu* ya sevhada i 50 wa maxekele ya prata. 17 Loko a nyikela nsimu yake hi lembe dzra Jubilewu* akuva yi va leyi xwengiki, a mali ya ha ta va yoleyi ya yin’we. 18 Loko a nyikela nsimu yake ntsrhaku ka lembe dzra Jubilewu akuva yi va leyi xwengiki, a muprista a ta hamba tikonta hi ku ya hi malembe lawa ma ha kiyelaka akuva ku tlhasa lembe ledzri landzrelaka dzra Jubilewu, kutani a mali leyi a yi fanela ku humesiwa yi ta pumbiwa. 19 Kambe loko lweyi a yi nyikeliki a djula leswaku yi tlhela yi va yake, a fanela ku hakela mali ya nsimu leyo a tlhela a tlhantekela 20 wa mapursentu ka yone, kutani a nsimu yi ta va yake hi lani ku nga helikiki. 20 Kambe loko a nga yi xavi yi va yi xaviseliwa mhunu mun’wana, a nge he yi xavi swimbeni. 21 Loko nsimu yi ntsrhunxiwa hi Jubilewu, yi ta va ntxhumu lowu nyikeliwiki ka Yehovha swanga lowu xwengiki. A nsimu leyo yi ta lumba vaprista.

22 “‘Loko mhunu wa kukazri a nyika Yehovha nsimu leyi e ke yi xava nakone yi kalaka yi nga li xiyenge xa pfindla dzrake, a yi nyikela leswaku yi va ntxhumu lowu xwengiki, 23 a muprista a ta kontela mali hi ku ya hi nhlayu ya malembe lawa ma ha kiyelaka akuva ku tlhasa lembe dzra Jubilewu, a va a mu nyika mali ya kone hi siku dzroledzro. I ntxhumu lowu xwengiki ka Yehovha. 24 Hi lembe dzra Jubilewu a nsimu yi ta tlheliseliwa ka lweyi yi xaviwiki ka yene, ku nga lweyi yi mu lumbaka.

25 “‘A mali hinkwayu yi fanela ku kontiwa hi ku ya hi mpimu wa xekele lowu tizrisiwaka a mbangwini wa ku xwenga. A xekele dzrin’we dzri fanela ku dzringana 20 wa magera.*

26 “‘Kambe a ku na mhunu lweyi a fanelaka ku nyikela mativula ya swihazri, a ma nyikela swanga ntxhumu lowu xwengiki, hikusa a mativula hinkwawu ma pswaliwa na kutani ma lumba Yehovha, ku nga ha va homu kumbe hamba, swi va na swi lumba Yehovha. 27 Loko a xava xihazri xa mativula lexi nyamiki, hi mali leyi ku hlayiwaka leswaku a fanela ku humesa yone, a fanela ku tlhantekela 20 wa mapursentu ka yone. Kambe loko a nga xi xavi xi ta xavisiwa hi mali leyi yi xi dzringanaka.

28 “‘Nambitasu, ka mintxhumu leyi yi ku lumbaka a ku na ntxhumu ni wun’we lowu wu nyikeliwiki ka Yehovha akuva wu helisiwa wu fanelaka ku xavisiwa kumbe ku tizruliwa, ku nga ha va mhunu, xihazri kumbe masimu lawa u nga ha vaka u li na wone. Mintxhumu hinkwayu leyi nyikeliwiki, yi xwenge ngopfu ka Yehovha. 29 Handle ka leswo, a ku na mhunu ni mun’we lweyi a nyikeliwiki akuva a helisiwa lweyi a fanelaka ku tizruliwa. Mhunu lweyo nakunene a fanela ku dlayiwa.

30 “‘A swiyenge hinkwaswu swa wu 10* swa tiko, ku nga ha va swa ntsrhovelo wa le masin’wini kumbe swa mihandzru ya minsinya, swi lumba Yehovha. Swi xwengile ka Yehovha. 31 Loko mhunu wa kukazri a txhuka a djula ku tizrula xiyenge xake xa wu 10 xa ntxhumu wa kukazri, a fanela ku hakela mali ya xone a tlhela a tlhantekela 20 wa mapursentu ka yone. 32 A xihazri xin’wana ni xin’wana xa wu 10 ka mintlhambi ya tihomu, tihamba ni timbuti, lexi xi khalutaka ka nhonga ya mubyisi, xi ta va lexi xwengiki ka Yehovha. 33 A nga fanelanga a xi kambela leswaku i xinene kumbe a hi xinene nakone a nga fanelanga a xi txintxa. Kambe loko o txhuka a zama ku txintxisa xihazri lexo hi xin’wana, ha swibidzri swi ta va leswi xwengiki. A xi fanelanga xi tizruliwa.’”

34 Leswi i swileleto leswi Yehovha a swi nyikiki Moxe a Nhaveni ya Sinayi, akuva a ya swi byela Vaisrayele.