TINHLAYU

1 Kutani hi siku dzra ku sungula ka hweti ya wubidzri, ka lembe dzra wubidzri ntsrhaku ka loko va hume tikweni dzra Egipta, Yehovha a vulavula na Moxe a mananga ya Sinayi, a tendeni dzra ntlhanganu. A ku: 2 “Tsralisani vhanu hinkwavu va nhlengeletanu ya Israyele, ha mun’we mun’we, hi ku ya hi mindangu yavu, mavito ya vakokwana vavu, mi longoloxa hinkwavu va xinuna hi ku ya hi mavito yavu. 3 Wene na Aroni mi fanela ku tsralisa vhanu hinkwavu lava va nga ni 20 wa malembe ku ya henhla, hi ku ya hi mintlawa yavu,* lava va nga tizraka swanga masotxha* a Israyele.

4 “Ka lixaka dzrin’wana ni dzrin’wana tekani wanuna mun’we, akuva a va muzrangeli wa lixaka dzra vito dzra vakokwana vavu. 5 Hi lawa mavito ya vavanuna lava taka tizra na n’wine: Ka lixaka dzra Rubeni, Elizuri n’wana wa Xeduwuri; 6 ka lixaka dzra Simiyoni, Xelumiyele n’wana wa Zurixadayi; 7 ka lixaka dzra Yuda, Nasoni n’wana wa Aminadabi; 8 ka lixaka dzra Yisakari, Nethanele n’wana wa Zuwari, 9 ka lixaka dzra Zebuloni, Eliyabi n’wana wa Heloni; 10 ka lixaka dzra Efrayimi, Elixama, n’wana wa Amihudi, ka lixaka dzra Manasi, Gamaliyele n’wana wa Pedazuri, Efrayimi na Manasi i vana va Yosefa; 11 ka lixaka dzra Benjamini, Abidani n’wana wa Gideyoni; 12 ka lixaka dzra Dani, Akhiyezeri n’wana wa Amixadayi; 13 ka lixaka dzra Axere, Pagiyele n’wana wa Okhirani; 14 ka lixaka dzra Gadi, Elizafi n’wana wa Dewuwele; 15 ka lixaka dzra Naftali, Akhira n’wana wa Enani. 16 Lava hi lava va hlawuliwiki ka nhlengeletanu ya Israyele, i vazrangeli va tinxaka ta vapapayi vavu, mun’wana ni mun’wana a a li muzrangeli wa 1.000 wa Vaisrayele.”*

17 Xileswo Moxe na Aroni va teka vavanuna volavo lava hlawuliwiki hi Xikwembu Nkulukumba, hi ku ya hi mavito yavu. 18 Va hlengeleta nhlengeletanu hinkwayu hi siku dzra ku sungula ka hweti ya wubidzri, akuva vavanuna lava va nga ni 20 wa malembe ku ya henhla va kota ku tsralisiwa, mun’wana ni mun’wana hi vito dzrake, hi ndangu ni hi mavito ya vakokwana vavu, 19 hi lani Yehovha a a lelete Moxe ha kone. Xileswo a va tsralisa mananga ya Sinayi.

20 A vana va Rubeni, ku nga lixaka dzra mativula ya Israyele, va longoloxiwe hi ku ya hi mavito yavu, mindangu ni hi mavito ya vakokwana vavu. Ku kontiwe vavanuna hinkwavu, wanuna mun’wana ni mun’wana lweyi a nga ni 20 wa malembe ku ya henhla, 21 a nhlayu ya lava va tsralisiwiki va lixaka dzra Rubeni ku ve 46.500.

22 A lixaka dzra Simiyoni dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu, wanuna mun’wana ni mun’wana lweyi a nga ni 20 wa malembe ku ya henhla, lweyi a nga yaka yimpini, 23 a nhlayu ya lava va tsralisiwiki va lixaka dzra Simiyoni ku ve 59.300.

24 A lixaka dzra Gadi dzri longoloxiwe hi ku ya hi mavito, mindangu, ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 25 a nhlayu ya lava va tsralisiwiki va lixaka dzra Gadi ku ve 45.650.

26 A lixaka dzra Yuda dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 27 a nhlayu ya lava va tsralisiwiki va lixaka dzra Yuda ku ve 74.600.

28 A lixaka dzra Yisakari dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 29 a nhlayu ya lava va tsralisiwiki va lixaka dzra Yisakari ku ve 54.400.

30 A lixaka dzra Zebuloni dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 31 a nhlayu ya lava va tsralisiwiki va lixaka dzra Zebuloni ku ve 57.400.

32 A lixaka dzra Yosefa ledzri sukelaka ka Efrayimi dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 33 a nhlayu ya lava va tsralisiwiki va lixaka dzra Efrayimi ku ve 40.500.

34 A lixaka dzra Manasi dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 35 a nhlayu ya lava va tsralisiwiki va lixaka dzra Manasi ku ve 32.200.

36 A lixaka dzra Benjamini dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 37 a nhlayu ya lava va tsralisiwiki va lixaka dzra Benjamini ku ve 35.400.

38 A lixaka dzra Dani dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 39 a nhlayu ya lava va tsralisiwiki va lixaka dzra Dani ku ve 62.700.

40 A lixaka dzra Axere dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 41 a nhlayu ya lava va tsralisiwiki va lixaka dzra Axere ku ve 41.500.

42 A lixaka dzra Naftali dzri longoloxiwe hi ku ya hi mavito, mindangu ni hi mavito ya vakokwana vavu. Ku kontiwe vavanuna hinkwavu lava va nga ni 20 wa malembe ku ya henhla, lava va nga yaka yimpini, 43 a nhlayu ya lava va tsralisiwiki va lixaka dzra Naftali ku ve 53.400.

44 Lava va tsralisiwe ha Moxe, Aroni kun’we ni hi 12 wa vazrangeli va Israyele. Lava, a va patsra ni ku va vazrangeli a tinxakeni tavu. 45 A Vaisrayele hinkwavu lava va nga ni 20 wa malembe ku ya henhla lava va nga yaka yimpini, va tsralisiwe hi ku ya hi mavito ya vakokwana vavu, 46 hinkwavu lava va tsralisiwiki ku ve 603.550.

47 Kambe a Valevhi a va tsralisiwanga hi ku ya hi tinxaka ta vapapayi vavu hi lani swi viki ha kone ka vambeni. 48 Xileswo, Yehovha a byela Moxe ku: 49 “Ko va ntsena lixaka dzra Valevhi ledzri u kalaka u nga fanelanga u dzri tsralisa, nakone a nhlayu yavu a u fanelanga u yi patsra ni nhlayu ya Vaisrayele lavan’wana. 50 A Valevhi va beki leswaku va hlayisa tabernakela dzra Wumboni, swibya hinkwaswu swa dzrone kun’we ni mintxhumu hinkwayu ya tabernakela. Va ta tlakula tabernakela kun’we ni swibya hinkwaswu swa dzrone nakone va ta tizrela ka dzrone, kutani va ta yaka mintxhatxha a matlhelweni ka tabernakela. 51 Loko swi djula leswaku a tabernakela dzri zruzrisiwa, a Valevhi va ta dzri tlhantlhelela; nakone loko swi djula leswaku dzri yakiwa a Valevhi va ta dzri yaka. Loko mhunu lweyi a kalaka a nga pfumeleliwanga* a tsrhindzrekela, a fanela ku dlayiwa.

52 “Muisrayele mun’wana ni mun’wana a fanela ku yaka ntxhatxha wake lani a yaveliwiki kone, wanuna mun’wana ni mun’wana a va ka ntlawa wake wa tinxaka tizrazru hi lani ti yaviwiki ha kone, hi ku ya hi mintlawa yavu ya masotxha.* 53 A Valevhi va fanela ku yaka matlhelweni hinkwawu ya tabernakela dzra Wumboni, akuva ni nga hlundzrukeli nhlengeletanu ya Israyele, nakone va ni wutiyanguleli bya ku hlayisa* tabernakela dzra Wumboni.”

54 A vhanu va Israyele va yentxe hinkwaswu leswi Yehovha a a swi lelete Moxe. Va yentxise xiswoswo.

2 Kutani Yehovha a byela Moxe na Aroni a ku: 2 “A Vaisrayele va fanela ku dzima mintxhatxha yavu a mbangwini lowu mintlawa yavu ya tinxaka tizrazru yi yaveliwiki wone, wanuna mun’wana ni mun’wana a ta dzima ntxhatxha wake kusuhi ni mfungu wa vakokwana vake. Va fanela ku yaka mintxhatxha yi langusa tende dzra ntlhanganu, va yaka matlhelweni ka dzrone hinkwaku.

3 “Lava va taka dzima mintxhatxha yavu ka tlhelo dzra le wuxeni, a wuhumadambu, ku ta va va ntlhawa wa tinxaka tizrazru leti ti lumbaka Yuda, hi ku ya hi mintlawa yavu ya masotxha.* A muzrangeli wa vana va Yuda i Nasoni n’wana wa Aminadabi. 4 A masotxha yavu lawa ma tsralisiwiki i 74.600. 5 A lixaka dzra Yisakari dzri ta dzima mintxhatxha ya dzrone a tlhelweni kwavu. A muzrangeli wa vana va Yisakari i Nethanele n’wana wa Zuwari. 6 A masotxha yavu lawa ma tsralisiwiki i 54.400. 7 Ku ta landzrela lixaka dzra Zebuloni. A muzrangeli wa vana va Zebuloni i Eliyabi n’wana wa Heloni. 8 A masotxha yavu lawa ma tsralisiwiki i 57.400.

9 “A masotxha hinkwawu lawa ma tsralisiwiki lawa ma lumbaka Yuda, i 186.400. Hi vone va fanelaka ku zranga va suka.

10 “A ntlawa wa masotxha wa tinxaka tizrazru leti lumbaka Rubeni, wu ta dzima mintxhatxha a nyingitimu. A muzrangeli wa vana va Rubeni i Elizuri n’wana wa Xeduwuri. 11 A masotxha yavu lawa ma tsralisiwiki i 46.500. 12 A lixaka dzra Simiyoni dzri ta dzima mintxhatxha ya dzrone a tlhelweni kwavu. A muzrangeli wa vana va Simiyoni i Xelumiyele n’wana wa Zurixadayi. 13 A masotxha yavu lawa ma tsralisiwiki i 59.300. 14 Ku ta landzrela lixaka dzra Gadi. A muzrangeli wa vana va Gadi i Elizafi n’wana wa Rewuwele. 15 A masotxha yavu lawa ma tsralisiwiki i 45.650.

16 “A masotxha hinkwawu lawa ma tsralisiwiki ka mintlawa leyi lumbaka Rubeni i 151.450, kutani va fanela ku va va wubidzri ku suka.

17 “Loko tende dzra ntlhanganu dzri zruzrisiwa, a mintxhatxha ya Valevhi yi fanela ku va makazri ka mintxhatxha ya tinxaka letin’wana.

“Va fanela ku yendzra hi ndlela leyi mintxhatxha yavu yi bekiwaka ha yone, wun’wana ni wun’wana wu va mbangwini wa wone hi ku ya hi mintlawa yavu ya tinxaka tizrazru.

18 “A ntlawa wa masotxha wa tinxaka tizrazru leti lumbaka Efrayimi, wu ta dzima mintxhatxha a mpeladambu. A muzrangeli wa vana va Efrayimi i Elixama n’wana wa Amihudi. 19 A masotxha yavu lawa ma tsralisiwiki i 40.500. 20 A tlhelweni ka ntlawa lowo ku ta va ni lixaka dzra Manasi. A muzrangeli wa vana va Manasi i Gamaliyele, n’wana wa Pedazuri. 21 A masotxha lawa ma tsralisiwiki i 32.200. 22 Ku landzrela lixaka dzra Benjamini. A muzrangeli wa vana va Benjamini i Abidani n’wana wa Gideyoni. 23 A masotxha lawa ma tsralisiwiki i 35.400.

24 “A masotxha hinkwawu lawa ma tsralisiwiki ka mintlawa leyi lumbaka Efrayimi i 108.100, nakone va fanela ku va va wuzrazru ku suka.

25 “A ntlawa wa masotxha wa tinxaka tizrazru leti lumbaka Dani, wu ta dzima mintxhatxha a n’walungu. A muzrangeli wa vana va Dani i Akhiyezeri n’wana wa Amixadayi. 26 A masotxha lawa ma tsralisiwiki i 62.700. 27 A lixaka dzra Axere dzri ta dzima mintxhatxha a tlhelweni ka ntlawa wolowo. A muzrangeli wa vana va Axere i Pagiyele n’wana wa Okhirani. 28 A masotxha lawa ma tsralisiwiki i 41.500. 29 Ku ta landzrela lixaka dzra Naftali. A muzrangeli wa vana va Naftali i Akhira n’wana wa Enani. 30 A masotxha lawa ma tsralisiwiki i 53.400.

31 “A masotxha hinkwawu lawa ma tsralisiwiki ka mintlawa leyi lumbaka Dani i 157.600; va fanela ku va va wugamu ku suka, hi ku ya hi ntlawa wavu wa tinxaka tizrazru.”

32 Lava i Vaisrayele lava tsralisiwiki hi ku ya hi mavito ya vakokwana vavu. Hinkwavu lava tsralisiwiki a mintxhatxheni ku ve 603.550 wa masotxha. 33 Kambe a Valevhi a va tsralisiwanga xikan’we ni Vaisrayele lavan’wana, hi lani Yehovha a leletiki Moxe ha kone. 34 A Vaisrayele va yentxe hinkwaswu, hi lani Yehovha a a lelete Moxe ha kone. A va yi dzima hi ndlela yoleyo mintxhatxha yavu hi ku ya hi mintlawa yavu ya tinxaka tizrazru nakone a va suka hi ndlela yoleyo, mun’wana ni mun’wana hi ku ya hi ndangu wake ni hi ku ya hi vito dzra vakokwana vake.

3 Leti a ku li tinxaka ta Aroni na Moxe hi siku ledzri Yehovha a vulavuliki na Moxe a Nhaveni ya Sinayi. 2 A mavito ya vana va Aroni hi lawa: Nadabi lweyi wa mativula, Abihu, Eliyazari na Itamari. 3 Lawa i mavito ya vana va Aroni, vaprista lava hlawulekisiwiki ni ku simekiwa akuva va hamba ntizro wa wuprista. 4 Nambitasu, Nadabi na Abihu va file a mahlweni ka Yehovha a mananga ya Sinayi, nkama lowu va nyikeliki ndzrilo lowu kalaka wu nga yamukeleki ka Yehovha, nakone a va vanga ni vana. Kambe Eliyazari na Itamari va tame va tizra ni papayi wavu Aroni, swanga vaprista.

5 Kutani Yehovha a byela Moxe a ku: 6 “Byela va lixaka dzra Levhi leswaku va tsrhindzrekela va ta ta yima mahlweni ka muprista Aroni akuva va mu pfuna. 7 Va ta tizra a tendeni dzra ntlhanganu va hetisisa wutiyanguleli byavu bya ku pfuna Aroni ni nhlengeletanu hinkwayu a tabernakeleni.* 8 Va ta hlayisa mintxhumu hinkwayu ya tende dzra ntlhanganu ni ku hetisisa wutiyanguleli byavu bya ku pfuna Vaisrayele hi ku hamba mintizro leyi fambisanaka ni tabernakela. 9 U fanela ku nyikela Valevhi ka Aroni ni vanake. Va nyikeliwa ka Aroni swanga swihanano leswi pfaka ka Vaisrayele. 10 U fanela ku beka Aroni ni vanake akuva va hetisisa wutiyanguleli byavu bya wuprista, mun’wana ni mun’wana lweyi a tsrhindzrekelaka mbangwini wa ku xwenga na a nga na mpfumelelo,* a fanela ku dlayiwa.”

11 Yehovha a ya mahlweni a byela Moxe a ku: 12 “Wa swi twa! Ni teka Valevhi a makazri ka Vaisrayele a matsrhan’wini ya mativula hinkwawu ya Vaisrayele, nakone a Valevhi va ta va vanga, 13 hikusa a mativula hinkwawu i yanga. Hi siku ledzri ni dlayiki mativula hinkwawu a tikweni dzra Egipta, ni tixwengisele mativula hinkwawu ya Vaisrayele, ku sukela ka mativula ya vhanu ku ya ka ya swihazri. Ma fanela ku va yanga. Hi mine Yehovha.”

14 Yehovha a tlhela a byela Moxe a mananga ya Sinayi, a ku: 15 “Tsralisa vana va Levhi hi ku ya hi mavito ya vakokwana vavu ni hi ku ya hi mindangu yavu. U fanela ku tsralisa hinkwavu va xinuna, ku sukela ka lweyi a nga ni hweti yin’we ku ya henhla.” 16 Hiloko Moxe a va tsralisa hi lani Yehovha a mu leletiki ha kone. 17 A mavito ya vana va Levhi hi lawa: Gerixoni, Kohati na Merari.

18 A mavito ya vana va Gerixoni hi ku ya hi mindangu yavu hi lawa: Libini na Ximeyi.

19 A mavito ya vana va Kohati hi ku ya hi mindangu yavu a ku li Amiramu, Izihari, Hebroni na Uziyele.

20 A mavito ya vana va Merari hi ku ya hi mindangu yavu a ku li Makhili na Muxi.

Leyi a ku li mindangu ya Valevhi hi ku ya hi mavito ya vakokwana vavu.

21 Ka Gerixoni ku hume ndangu wa Valibini ni Vaximeyi. Leyi i mindangu ya Vagerixoni. 22 Hinkwavu va xinuna lava tsralisiwiki ku sukela ka lava nga ni hweti yin’we ku ya henhla ku ve 7.500 wa vone. 23 A mindangu ya Vagerixoni a yi dzime mintxhatxha a ntsrhaku ka tabernakela, a mpeladambu. 24 A muzrangeli wa mindangu ka ntlawa wa Vagerixoni a ku li Elizafi n’wana wa Layeli. 25 A wutiyanguleli bya vana va Gerixoni a tendeni dzra ntlhanganu a ku li kuva va dzri hlayisa, va hlayisa swa ku dzri fulela ha swone, kortina dzra nyangwa wa tende dzra ntlhanganu, 26 makortina ya ku biyela gqeke, kortina dzra le nyangweni wa gqeke ledzri a altari ni tabernakela swi nga ka dzrone, mapindzra ya ku gwimba tende ni ku hamba mintizro hinkwayu leyi fambisanaka na swone.

27 Ka Kohati ku hume mindangu ya Vaamiramu, Vaizihari, Vahebroni ni Vauziyele. Leyi i mindangu ya Vakohati. 28 Hinkwavu va xinuna lava nga ni hweti yin’we ku ya henhla a va li 8.600; vone a va ni wutiyanguleli bya ku bekisa mbangu wa ku xwenga. 29 A mindangu ya vana va Kohati a yi dzime mintxhatxha ka tlhelo dzra le nyingitimu dzra tabernakela. 30 A muzrangeli wa mindangu ka ntlawa wa Vakohati a ku li Elizafani n’wana wa Uziyele. 31 A wutiyanguleli byavu a ku li ku bekisa Areka, menza, xa ku tlhoma mimotsre, maaltari, swibya leswi tizrisiwaka mbangwini wa ku xwenga, kortina ni ku hamba mintizro hinkwayu leyi fambisanaka ni mintxhumu leyi.

32 A muzrangeli wa Valevhi a ku li Eliyazari, n’wana wa muprista Aroni. A a vonelela lava a va ni wutiyanguleli bya ku bekisa mbangu wa ku xwenga.

33 Ka Merari ku hume mindangu ya Vamakhili ni Vamuxi. Leyi i mindangu ya Merari. 34 Hinkwavu va xinuna lava tsralisiwiki ku sukela ka lava va nga ni hweti yin’we ku ya henhla ku ve 6.200. 35 A muzrangeli wa ntlawa wa mindangu ya Merari a ku li Zuriyele n’wana wa Abikhayili. Vone a va dzime mintxhatxha ka tlhelo dzra le n’walungu dzra tabernakela. 36 A wutiyanguleli bya vana va Merari a ku li ku vonelela swiyenge swa khumbi dzra tabernakela, tivalelo ta dzrone, tinsika ta dzrone, swa ku tlhoma ka swone tinsika swa le hansi, swibya swa dzrone hinkwaswu ni ku hamba mintizro hinkwayu leyi fambisanaka ni mintxhumu leyi, 37 ku patsra ni tinsika hinkwatu leti a ti tsrandzrele gqeke, swa ku tlhoma ka swone tinsika leto swa le hansi, swikhokhwana swa tende ni tingoti ta dzrone.

38 Lava a va dzima mintxhatxha a mahlweni ka tabernakela hi tlhelo dzra le wuxeni, leswi liki, a mahlweni ka tende dzra ntlhanganu, a wuhumadambu, a ku li Moxe, Aroni ni vanake. Vone a va ni wutiyanguleli bya ku bekisa mbangu wa ku xwenga swanga mfanelo yavu ya ku pfuna Vaisrayele. Mun’wana ni mun’wana lweyi a tsrhindzrekelaka a mbangwini wa ku xwenga na a nga pfumeleliwanga* a fanela ku dlayiwa.

39 A va xinuna hinkwavu lava va nga Valevhi, lava va nga ni hweti yin’we ku ya henhla, lava Moxe na Aroni va va tsralisiki hi ku ya hi mindangu yavu hi lani Yehovha a va leletiki ha kone, a ku li 22.000.

40 Kutani Yehovha a byela Moxe a ku: “Tsralisa mativula hinkwawu ya xinuna ya Vaisrayele ku sukela ka lava nga ni hweti yin’we ku ya henhla, u va konta u xaxameta ni mavito yavu. 41 U fanela ku teka Valevhi akuva va va vanga a matsrhan’wini ya mativula hinkwawu ya Vaisrayele. Nakone teka swifuyu swa Valevhi a matsrhan’wini ya mativula hinkwawu ya swifuyu swa Vaisrayele. Hi mine Yehovha.” 42 Hiloko Moxe a tsralisa mativula hinkwawu ya Vaisrayele hi lani Yehovha a a mu lelete ha kone. 43 A nhlayu ya mativula hinkwawu ya va xinuna lava va nga ni hweti yin’we ku ya henhla lava va tsralisiwiki hi mavito, ku ve 22.273.

44 Yehovha a ya mahlweni a byela Moxe a ku: 45 “Teka Valevhi a matsrhan’wini ya mativula ya Vaisrayele nakone teka swifuyu swa Valevhi a matsrhan’wini ya swifuyu swa Vaisrayele, kutani a Valevhi va fanela ku va vanga. Hi mine Yehovha. 46 Leswi nhlayu ya mativula ya Vaisrayele yi khalutaka nhlayu ya mativula ya Valevhi hi 273 wa vhanu, akuva vhanu volavo va tizruliwa, 47 u ta yamukela ntlhanu wa maxekele* ka mun’wana ni mun’wana wavu, hi ku ya hi mpimu wa xekele lowu tizrisiwaka a mbangwini wa ku xwenga.* A xekele dzrin’we i 20 wa magera.* 48 U fanela ku teka mali leyo u nyika Aroni ni vanake swanga xitizrulo hi mhaka ya vhanu lava a Vaisrayele va tlulaka Valevhi ha vone.” 49 Xileswo Moxe a yamukela mali ya xitizrulo akuva a tizrula vhanu lava Vaisrayele va tlulaka Valevhi ha vone. 50 A mali leyi a yi yamukeliki ya ku tizrula mativula ya Vaisrayele i 1.365 wa maxekele, hi ku ya hi mpimu wa xekele lowu tizrisiwaka a mbangwini wa ku xwenga. 51 Hi ku landzra zritu dzra Yehovha, Moxe a nyika Aroni ni vanake mali ya xitizrulo, a yentxe hi lani Yehovha a a mu lelete ha kone.

4 Kutani Yehovha a byela Moxe na Aroni a ku: 2 “Ka vana va Levhi ku fanela ku tsralisiwa vana va Kohati, hi ku ya hi mindangu yavu ni hi vito dzra kokwana wavu, 3 hinkwavu lava nga ni 30 ku ya ka 50 wa malembe, lava nga ka ntlawa lowu yaveliwiki ku tizra a tendeni dzra ntlhanganu.

4 “Lowu i ntizro wa vana va Kohati a tendeni dzra ntlhanganu. I ntizro wa ku xwengisisa. 5 Loko mintxhatxha yi djula ku zruzrisiwa, Aroni ni vanake va ta nghena va hawula kortina dzra ku tsravukanisa va va va funeketa areka dzra Wumboni ha dzrone. 6 Va ta dzri funeketa hi xikhumba xa ntini* va gama va dzri kapeka panu ya nkuxe,* va va va hulela tinhonga ta ku dzri tlakula ha tone a mbangwini wa tone.

7 “Va ta funeketa ni menza wa mapawu ya magandzrelo hi panu ya nkuxe va gama va tlhantekela maparatu, tikopo, matijela ni majaru ya magandzrelo ya swa ku nwa; a mapawu lawa ma nyikeliwaka nkama ni nkama na wone mi ta ma tlhanteka menzeni. 8 Va ta swi funeketa hi panu ya ku pshwuka va gama va funeketa menza hi xikhumba xa ntini, ntsrhaku ka leswo va nghenisa tinhonga ta ku tlakula hi tone a mimbangwini ya tone. 9 Hi ku landzrela, va ta teka panu ya nkuxe va funeketa xa ku tlhoma mimotsre leyi tizriseliwaka ku vaninga ha yone, mimotsre ya kone, swa ku tima ndzrilo ha swone, swa ku khoma ndzrilo ha swone* ni swibya hinkwaswu leswi tizriseliwaka ku txhela mafuzra lawa ma tizrisiwaka ka mimotsre leyo akuva yi tsrhama na yi pfuzra. 10 Va ta phutsrela xa ku tlhoma mimotsre ni swibya swa xone hinkwaswu hi xikhumba xa ntini, va gama va swi tlhanteka ka xa ku tlakula hi xone. 11 Va ta kapeka panu ya nkuxe ka altari dzra woru va gama va dzri funeketa hi xikhumba xa ntini, hi ku landzrela, va hulela tinhonga ta ku tlakula hi tone. 12 Ntsrhaku ka leswo va ta teka swibya hinkwaswu leswi va swi tizrisaka nkama ni nkama a mbangwini wa ku xwenga, va swi phutsrela hi panu ya nkuxe va va va swi funeketa hi xikhumba xa ntini va gama va swi tlhanteka ka xa ku tlakula hi xone.

13 “Va fanela ku susa nkuma* a altarini va gama va dzri kapeka panu ledzri hambiwiki hi voya dzra muvala wa vhiyoleta.* 14 Ntsrhaku ka leswo, va tlhantekela swibya hinkwaswu leswi va swi tizrisaka loko va tizrela a altarini: Swa ku khoma ndzrilo, tigarfu, mafotxholo ni matijela, leswi liki, mintxhumu hinkwayu leyi tizrisiwaka a altarini. Kutani va fanela ku funeketa altari hi xikhumba xa ntini va gama va hulela tinhonga ta ku dzri tlakula hi tone a mbangwini wa tone.

15 “Loko mintxhatxha yi zruzrisiwa, Aroni ni vanake va fanela ku hetisa ku funeketa mbangu wa ku xwenga ni swibya hinkwaswu swa mbangu wolowo. Kutani a vana va Kohati va ta nghena va swi tlakula, kambe a va fanelanga va khumba mintxhumu ya le mbangwini wa ku xwenga hikusa va nga fa. Lebyo i wutiyanguleli bya* vana va Kohati a tendeni dzra ntlhanganu.

16 “Eliyazari n’wana wa muprista Aroni hi yene a nga ni wutiyanguleli bya ku vonelela mafuzra ya ku tlavikisa mimotsre, mafuzra ya ku nun’hwela, magandzrelo ya tinhleke lawa ma nyikeliwaka nkama ni nkama ku patsra ni mafuzra ya ku hlawulekisa. A vonelela tabernakela hinkwadzru ni hinkwaswu leswi nga ka dzrone, ku patsra ni mbangu wa ku xwenga kun’we ni switizro leswi nga ka wone.”

17 Yehovha a ya mahlweni a byela Moxe na Aroni a ku: 18 “Mi nga pfumeleli lixaka dzra mindangu ya Vakohati dzri helisiwa xikazri ka Valevhi. 19 Kambe va yentxelani leswi akuva va tama va hanya va nga fi loko va tsrhindzrekelela mintxhumu ya ku xwengisisa: Aroni ni vanake va fanela ku nghena va nyika mun’wana ni mun’wana ntizro wake, ni ku mu komba leswi a fanelaka ku swi tlakula. 20 A va fanelanga va nghena va vona mintxhumu ya ku xwenga, nambi ko va swa nkamanyana, hikusa va nga fa.”

21 Kutani Yehovha a byela Moxe a ku: 22 “Ku fanela ku tsralisiwa vana va Gerixoni hi ku ya hi mindangu yavu ni hi vito dzra kokwana wavu. 23 U fanela ku tsralisa hinkwavu ku sukela ka va 30 ku ya ka 50 wa malembe, lava nga ka ntlawa lowu yaveliwiki ku tizra a tendeni dzra ntlhanganu. 24 Hi leswi a mindangu ya Vagerixoni yi fanelaka ku swi yentxa ni ku swi tlakula: 25 Va ta tlakula tipanu ta tabernakela ku nga tende dzra ntlhanganu, swa ku dzri funeketa hi swone ni xikhumba xa ntini lexi nga henhla ka dzrone, kortina dzra nyangwa wa tende dzra ntlhanganu, 26 makortina ya ku biyela gqeke, kortina dzra le nyangweni wa gqeke ledzri a altari ni tabernakela swi nga ka dzrone, mapindzra ya ku gwimba tende ni hinkwaswu leswi tizrisiwaka ka ntizro lowo. Lexo i xiyavelo xavu. 27 A mintizro hinkwayu ya Vagerixoni ni leswi va taka swi tlakula swi fanela ku voneleliwa hi Aroni ni vanake. Hinkwaswu leswi va taka swi tlakula swi bekani ka wutiyanguleli byavu. 28 Leyi i mintizro leyi a mindangu ya Vagerixoni yi fanelaka ku yi yentxa a tendeni dzra ntlhanganu, nakone a mintizro yavu yi ta voneleliwa hi Itamari n’wana wa muprista Aroni.

29 “A vana va Merari u ta va tsralisa hi ku ya hi mindangu yavu ni hi vito dzra kokwana wavu. 30 U ta tsralisa hinkwavu lava nga ka ntlawa lowu yaveliwiki ku tizra a tendeni dzra ntlhanganu, lava nga ni 30 ku ya ka 50 wa malembe. 31 A mintxhumu leyi va nga ni wutiyanguleli bya ku yi tlakula, leyi fambisanaka ni ntizro wa le tendeni dzra ntlhanganu hi leyi: swiyenge swa makhumbi ya tabernakela, tivalelo ta dzrone, tinsika ta dzrone, swa ku tlhoma ka swone tinsika swa le hansi, 32 tinsika ta khumbi ledzri tsrandzreliki gqeke, swa ku tlhoma ka swone tinsika leto swa le hansi, swikhokhwana swa tende, tingoti ta ku gwimba tende, kun’we ni mintxhumu hinkwayu leyi fambisanaka ni ntizro lowo. Mi ta yavela mun’wana ni mun’wana lexi a fanelaka ku tlakula xone hi ku ya hi vito. 33 Leyi i ndlela leyi mindangu ya vana va Merari yi fanelaka ku tizrisa xiswone a tendeni dzra ntlhanganu, na yi kongomisiwa hi Itamari n’wana wa muprista Aroni.”

34 Xileswo, Moxe na Aroni kun’we ni vazrangeli va nhlengeletanu va tsralise vana va Vakohati hi ku ya hi mindangu yavu ni hi vito dzra kokwana wavu, 35 hinkwavu lava a va ni 30 ku ya ka 50 wa malembe lava a va li ka ntlawa lowu yaveliwiki ku tizra a tendeni dzra ntlhanganu. 36 Hinkwavu lava tsralisiwiki hi ku ya hi mindangu yavu ku ve 2.750. 37 Lava va tsralisiwe ka mindangu ya Vakohati, hinkwavu a va tizrela tendeni dzra ntlhanganu. Moxe na Aroni va va tsralise hi lani Yehovha a a lelete Moxe ha kone.

38 A vana va Gerixoni va tsralisiwe hi ku ya hi mindangu yavu ni hi mavito ya vakokwana vavu, 39 hinkwavu lava a va ni 30 ku ya ka 50 wa malembe, lava a va li ka ntlawa lowu yaveliwiki ku tizra a tendeni dzra tlhanganu. 40 Hinkwavu lava tsralisiwiki hi ku ya hi mindangu yavu ni hi mavito ya vakokwana vavu, ku ve 2.630. 41 Lava hi lava va tsralisiwiki ka mindangu ya vana va Gerixoni, hinkwavu a va tizrela tendeni dzra ntlhanganu. Moxe na Aroni va va tsralise hi ku landzra xileleto xa Yehovha.

42 A vana va Merari va tsralisiwe hi ku ya hi mindangu yavu ni hi mavito ya vakokwana vavu, 43 hinkwavu lava a va ni 30 ku ya ka 50 wa malembe, lava a va li ka ntlawa lowu yaveliwiki ku tizra a tendeni dzra tlhanganu. 44 Hinkwavu lava tsralisiwiki hi ku ya hi mindangu yavu ku ve 3.200. 45 Loku i ku tsralisiwa ka mindagu ya vana va Merari loku Moxe na Aroni va ku yentxiki hi ku landzra xileleto xa Yehovha lexi a xi byeliki Moxe.

46 Moxe na Aroni kun’we ni vazrangeli va Vaisrayele, va tsralise Valevhi lava hinkwavu hi ku ya hi mindangu yavu ni hi mavito ya vakokwana vavu; 47 lava a va ni 30 ku ya ka 50 wa malembe, nakone hinkwavu va yaveliwiki kuva va tizra ni ku tlakula mintxhumu leyi fambisanaka ni tende dzra ntlhanganu. 48 Hinkwavu lava tsralisiwiki ku ve 8.580. 49 Hinkwavu va tsralisiwe hi lani Yehovha a leletiki Moxe ha kone, mun’wana ni mun’wana hi ku ya hi ntizro lowu a a yaveliwi wone ni leswi a a fanela ku swi tlakula; va tsralisiwe hi lani Yehovha a a lelete Moxe ha kone.

5 Yehovha a ya mahlweni a byela Moxe a ku: 2 “Byela Vaisrayele leswaku va humesa mhunu mun’wana ni mun’wana a nxaxeni, lweyi a nga ni nhlokonho, lweyi a nga ni mavabyi ya ku humetela nsila ka xizro xa limbewu* ni mhunu mun’wana ni mun’wana lweyi a tinyamisiki hi ku khumba ntsrumbu wa mhunu. 3 Humesani mhunu yelweyo, nambi a li wanuna kumbe a li wansati. Mi fanela ku mu humesa nxaxeni akuva a nga nyamisi mintxhatxha ya vhanu lava ni tsrhamaka makazri kwavu.” 4 Xileswo, a Vaisrayele va yentxa swoswo, va humesa vhanu lavo a nxaxeni. Va yentxe hi lani Yehovha a byeliki Moxe ha kone.

5 Yehovha a ya mahlweni a byela Moxe a ku: 6 “Byela Vaisrayele u ku: ‘Loko wanuna kumbe wansati wa kukazri o txhuka a yentxa xin’we xa swidoho leswi tolovelekiki a vhanwini, a nga dumbeki ka Yehovha, a mhunu lweyo a ta va ni nandzru. 7 A fanela ku hlaya xidoho lexi a xi yentxiki a va a hakela mpimu lowu dzringanaka nandzru wake a tlhela a yengesela 20 pursentu ka mali yoleyo; a fanela ku yi nyika lweyi a mu doheliki. 8 Kambe loko lweyi a doheliwiki a fa nakone ku nga na xaka dzra le kusuhi ledzri nga yamukelaka mali leyi hakeliwaka, yi fanela ku nyikiwa Yehovha nakone yi ta lumba muprista, a ta yi nyikela kun’we ni hamba leyi muprista a taka mu kombelela ku dzrivaleliwa ha yone.

9 “‘A swihanano hinkwaswu swa ku xwenga leswi Vaisrayele va swi nyikelaka ka muprista swi fanela ku va swake. 10 A mintxhumu ya ku xwenga leyi mun’wana ni mun’wana a taka yi nyikela yi ta lumba muprista. Leswi mun’wana ni mun’wana a swi nyikaka muprista swi ta lumba muprista.’”

11 Yehovha a ya mahlweni a byela Moxe a ku: 12 “Byela Vaisrayele u ku: ‘Hi leswi swi fanelaka ku yentxiwa loko nsati wa wanuna wa kukazri o txhuka a nga dumbeki ka nuna wake, 13 a yentxa swa tinkuku ni wanuna mumbeni, kambe nuna wake a nga yi tivi mhaka leyo nakone yi tama yi va xihundla, kutani a tinyamisa kambe ku nge na mboni leyi mu kanetaka futsrhi a nga voniwanga hi mhunu: 14 Loko nuna wake a va ni wukwele nakone a tivutisa loko nsati wake a dumbeka hakunene, na nakunene nsati wake a tinyamisile kumbe loko nuna wake a va ni wukwele nakone a tivutisa loko nsati wake a dumbeka hakunene, na nsati wake a nga tinyamisanga, 15 lweyi wanuna a fanela ku yisa nsati wake ka muprista na a ni gandzrelo dzra kukazri dzra lweyi wansati, ku nga kolomu ka kilu dzra mapa ya* sevhada. A nga fanelanga a txhela mafuzra ka dzrone nambi ku li olibanu, hikusa i gandzrelo dzra tinhleke ledzri fambisanaka ni wukwele, ku nga gandzrelo dzra tinhleke ledzri yentxaka mhunu a dzrimuka nandzru wake.

16 “‘A muprista a ta buyisa lweyi wansati a tlhasa a mu yimisa mahlweni ka Yehovha. 17 A muprista a ta ka mati ya ku xwenga hi xibya xa vumba, a va a teka ntsrhuzrinyana a tabernakeleni a hansi, a wu txhela ka mati wolawo. 18 Kutani a yimisa wansati yelweyo a mahlweni ka Yehovha, a mu tlhantlha misisi a gama a beka gandzrelo dzra tinhleke a mavokweni yake, ku nga gandzrelo dzra xidzrimuxo, leswi liki, gandzrelo dzra tinhleke ledzri fambisanaka ni wukwele; a muprista a ta va na a tamele mati ya ku bava lawa ma tisaka xizruku.

19 “‘Ntsrhaku ka leswo, a muprista a ta yentxa wansati lweyo a hlambanya hi ku mu byela a ku: “Loko ku li leswaku a u yentxanga swa tinkuku ni wanuna mun’wana nkama lowu na wa ha li hansi ka wunhloko bya nuna waku, nakone a u mu kanganyisanga u va u nyama, a mati lawa ya ku bava lawa ma tisaka xizruku, ma nga tizri kwaku. 20 Kambe loko we kanganyisa nkataku nkama lowu na wa ha li hansi ka wunhloko byake, u tinyamisa, nakone u hambe swa tinkuku ni wanuna mun’wana na ku nga li nkataku . . .” 21 Kutani a muprista a ta byela lweyi wansati leswaku a hamba xihlambanyu lexi patsraka ni xizruku, a va a mu byela a ku: “Ingiki Yehovha a nga ku yentxa u va xikombiso lexi vhanu va xi dzrimukaka loko va tihambela swihlambanyu swa swizruku, Yehovha a ta yentxa leswaku u nga vi na vana* nakone a khuzri dzraku dzri pfimba. 22 A mati lawa, lawa ma tisaka xizruku ma ta nghena ndzreni kwaku, ma pfimbisa khuzri dzraku ni ku yentxa leswaku u nga vi na vana. Lweyi wansati a fanela ku hlaya a ku: “Amen! Amen!”*

23 “‘Kutani a muprista a fanela ku tsrala swizruku leswo a bukwini a gama a swi tima hi mati ya ku bava. 24 Ntsrhaku ka leswo, a muprista a ta yentxa leswaku a wansati lweyo a nwa mati ya ku bava lawa ma tisaka xizruku, kutani ma ta nghena ndzreni kwake ma yentxa leswaku a twa ku vavisa. 25 Kutani a muprista a fanela ku teka gandzrelo dzra tinhleke ledzri fambisanaka ni wukwele a vokweni dzra wansati yelweyo, a dzri zrendzrelekisa a dzri yisa mahlweni na a dzri tlhelisa ntsrhaku, a mahlweni ka Yehovha, a gama a dzri yisa a altarini. 26 A muprista a ta nunsa gandzrelo dzra tinhleke a tata voko akuva dzri yimela gandzrelo hinkwadzru, a dzri hisa dzri mpukuka a altarini; ntsrhaku ka leswo a yentxa leswaku lweyi wansati a nwa mati. 27 Loko muprista a yentxa leswaku a nwa mati lawo nakasi lweyi wansati a tinyamisile, a yentxe wumbuye a nga dumbeki ka nuna wake, a mati lawa ma tisaka xizruku ma ta nghena ndzreni kwake ma yentxa leswaku a twa ku vavisa, nakone a khuzri dzrake dzri ta pfimba, futsrhi a nge ti va ni vana; a wansati lweyo a ta va xikombiso lexi vhanu va taka hamba va xi dzrimuka loko va tihambela swihlambanyu swa swizruku. 28 Kambe loko wansati lweyo a nga tinyamisanga nakone a basile, a nge ti khatisiwa nakone swi ta koteka kuva a va ni nyimba a va a pswala vana.

29 “‘Lowu i nawu wa mayelanu ni wukwele; loko wansati wa kukazri a txhuka a hambuka a tinyamisa na a li hansi ka wunhloko bya nuna wake, 30 kumbe loko wanuna a va ni wukwele a va a tivutisa loko nsati wake a dumbeka hakunene. Lweyi wanuna a fanela ku yentxa leswaku nsati wake a ya yima mahlweni ka Yehovha, nakone a muprista a fanela ku hetisisa nawu lowu hinkwawu a mhakeni ya wansati lweyo. 31 Lweyi wanuna a nge ti va ni nandzru, kambe a nsati wake a ta tihlamulela hi kola ka nandzru wake.’”

6 Yehovha a ya mahlweni a byela Moxe a ku: 2 “Byela Vaisrayele u ku: ‘Loko wanuna kumbe wansati wa kukazri a hamba xihlambanyu xa ku hlawuleka xa ku hanya swanga Munaziri* wa Yehovha, 3 a nga fanelanga a nwa vhinyu nambi mintxhumu yin’wana leyi popswanaka. A nga fanelanga a nwa vhinyu dzra ku tsatsavela kumbe byala byin’wana lebyi tsatsavelaka. A nga fanelanga a nwa byala lebyi hambiwiki hi mawuvha, nambi ku da mawuvha, ku nga ha va ya ku tsrakama kumbe ya ku woma. 4 Na a ha li Munaziri a nga fanelanga a da ntxhumu wun’wana ni wun’wana lowu pfaka ka nsinya wa mawuvha, ku sukela ka mawuvha ya mambisi ku ya ka makamba ya kone.

5 “‘A nga fanelanga a tsremeta misisi na a ha li Munaziri, a fanela ku tama a va lweyi a xwengiki hi ku tsrhika misisi yake yi kula ku ya tlhasa loko ku hela masiku lawa a hlambanyiki leswaku a ta tizrela Yehovha. 6 Na a ha li masikwini lawa a hlambanyiki leswaku a ta tizrela Yehovha, a nga fanelanga a tsrhindzrekelela ntsrumbu. 7 Nambiloko ko fa papayi wake, mamana wake, makwavu wa xinuna kumbe wa xisati; a nga fanelanga a tinyamisa, hikusa a nhlokweni yake ku ni mfungu wa ku va Munaziri wa Xikwembu Nkulukumba wake.

8 “‘A ta va lweyi a xwengiki ka Yehovha ku dzringana masiku hinkwawu ya Wunaziri byake. 9 Kambe loko ko suketana ku fa mhunu kusuhi na yene a va a nyamisa misisi ya Wunaziri leyi kombisaka leswaku a tihlawulekisele Xikwembu Nkulukumba,* a fanela ku tsremeta mpandlha hi siku ledzri a taka tibasisa ha dzrone. A ta yi tsremeta hi siku dzra wu 7. 10 Hi siku dzra wu 8, a fanela ku heketela muprista swivambalana swibidzri kumbe swituvana swibidzri a nyangweni wa tende dzra ntlhanganu. 11 A muprista a ta nyikela xin’we xi va gandzrelo dzra xidoho, lexin’wana xi va gandzrelo dzra ku hisiwa, akuva a mu kombelela ku dzrivaleliwa, hikusa a dohile hi ku tsrhindzrekelela ntsrumbu.* Kutani a fanela ku basisa nhloko yake hi siku ledzro. 12 A fanela ku tlhela a tihlawulekisela Yehovha akuva a sungulisa masiku ya Wunaziri byake. Nakone a ta buyisa xihambana lexi xo ko va ni lembe dzrin’we akuva xi va gandzrelo dzra nandzru. Kambe a masiku ya ku sungula lawa a viki Munaziri a ma nge ti kontiwa, hikusa a byi nyamisile.

13 “‘Lowu i nawu mayelanu ni Munaziri: Loko a tlhanganisa masiku ya Wunaziri byake a ta yisiwa a nyangweni wa tende dzra ntlhanganu. 14 Kohala a fanela ku nyikela gandzrelo dzrake ka Yehovha: Xihambana xin’we xa xinuna lexi hanyiki ha hombe nakone xo ko va ni lembe dzrin’we, akuva xi va gandzrelo dzra ku hisiwa, hamba ya pswele leyi hanyiki ha hombe nakone yo ko va ni lembe dzrin’we, akuva yi va gandzrelo dzra xidoho, ni hamba yin’we ya xinuna leyi hanyiki ha hombe, akuva yi va gandzrelo dzra ku kombela ku zrula, 15 ntsrhava wa mapawu lawa ma kalaka ma nga txheliwanga fermentu, lawa ma hambiwiki ma fana ni xitlan’wana hi mapa lamanene lawa ma patsriwiki ni mafuzra, mapawu ya ku phaphateka lawa ma kalaka ma nga txheliwanga fermentu nakone ma totiwiki mafuzra kun’we ni magandzrelo lawa ma nyikeliwaka na swone, ku nga gandzrelo dzra tinhleke ni magandzrelo ya swa ku nwa. 16 A muprista a ta swi nyikela ka Yehovha a va a hamba gandzrelo dzra xidoho ni gandzrelo dzra ku hisiwa. 17 A muprista a ta nyikela hamba ka Yehovha akuva yi va gandzrelo dzra ku kombela ku zrula, kun’we ni ntsrhava wa mapawu lawa ma kalaka ma nga txheliwanga fermentu nakone a ta swi nyikela ni magandzrelo lawa ma fambisanaka na swone, ku nga gandzrelo dzra tinhleke ni gandzrelo dzra swa ku nwa.

18 “‘A Munaziri a ta tsremeta misisi ya nhloko yake* a nyangweni wa tende dzra ntlhanganu, a va a teka misisi leyo leyi kuliki hi nkama lowu a a li Munaziri, a yi txhela ndzrilweni, a hansi ka gandzrelo dzra ku kombela ku zrula. 19 A muprista a fanela ku teka katla dzra hamba leyi swekiwiki, a teka pawu dzrin’we a ntsrhaveni ledzri dzri hambiwiki dzri fana ni xitlan’wana nakone dzri kalaka dzri nga txheliwanga fermentu, kun’we ni pawu dzra ku phaphateka ledzri kalaka dzri nga txheliwanga fermentu, a swi beka ka swiyandla swa Munaziri ntsrhaku ka loko a suse mfungu wake wa ku va Munaziri hi ku tsremeta misisi. 20 Kutani a muprista a ta swi yisa mahlweni na a swi tlhelisa ntsrhaku swanga gandzrelo ledzri zrendzrelekisiwaka a mahlweni ka Yehovha. A xifuva lexi nyikeliwaka swanga gandzrelo ledzri zrendzrelekisiwaka ku patsra ni nenge lowu nyikeliwaka swanga xihanano, i ntxhumu lowu xwengiki ka muprista, ntsrhaku ka leswo a Munaziri a nga nwa vhinyu.

21 “‘Lowu i nawu mayelanu ni Munaziri lweyi a hambaka xihlambanyu: Loko a hamba xihlambanyu nakone a ni makotela ya ku nyikela gandzrelo ka Yehovha ledzri tlulaka leswi yimeliwiki ka Munaziri, a fanela ku hetisisa xihlambanyu xake hi kola ka leswi a hloniphaka nawu mayelanu ni Wunaziri byake.’”

22 Hiloko Yehovha a byela Moxe a ku: 23 “Byela Aroni ni vanake u ku: ‘Mi ta tovokisa vhanu va Israyele hi ku va byela mi ku:

24 “Ingiki Yehovha a nga ku tovokisa ni ku ku sizrelela.

25 Ingiki Yehovha a nga kombisa leswaku awa nyonxa ha wene* nakone awa ku yamukela.

26 Ingiki Yehovha a nga ku komba wunene* a va a ku nyika ku zrula.”’

27 Kutani va fanela ku vitana vito dzranga mahlweni ka vhanu va Israyele, akuva ni va tovokisa.”

7 Hi siku ledzri Moxe a hetiki ku hamba tabernakela ha dzrone a dzri hlawulekisile a va a dzri xwengisa, kun’we ni switizro swa dzrone hinkwaswu, altari ni swibya swa dzrone hinkwaswu. Loko a game ku hlawulekisa ni ku xwengisa mintxhumu leyo, 2 a vazrangeli va Israyele kun’we ni tinhloko ta tinxaka tavu, va nyikele swihanano. A vazrangeli lavo va tinxaka, lava a va langusela ku tsralisiwa, 3 va buyisela Yehovha swihanano swavu: 6 wa tin’qolo leti funeketiwiki ni 12 wa tihomu; n’qolo ha yin’we yi nyikeliwe hi vazrangeli vabidzri nakone muzrangeli ha mun’we a nyikele homu yin’we; va swi nyikele mahlweni ka tabernakela. 4 Yehovha a byela Moxe a ku: 5 “Yamukela mintxhumu leyi kwavu swanga hi leswi yi taka tizrisiwa a tendeni dzra ntlhanganu, nakone u fanela ku yi nyika Valevhi hi ku ya hi leswi vilelekaka akuva mun’wana ni mun’wana a hetisisa ntizro wake.”

6 Xileswo, Moxe a yamukela tin’qolo ni tihomu a va a nyika Valevhi. 7 A nyike vana va Gerixoni tin’qolo tibidzri ni mune wa tihomu hi ku ya hi leswi a swi vileleka akuva va hetisisa ntizro wavu, 8 a va a nyika vana va Merari, mune wa tin’qolo ni mune wa tihomu hi ku ya hi leswi a swi vileleka akuva va hetisisa ntizro wavu. A mintxhumu hinkwayu leyo a yi zrangeliwa ha Itamari, n’wana wa muprista Aroni. 9 Kambe a vana va Kohati a nga va nyikanga ntxhumu, hikusa a ntizro wavu a wu patsra ku tizrela mbangwini wa ku xwenga ni ku tlakula mintxhumu ya ku xwenga hi le makatleni.

10 A vazrangeli va nyikele swihanano swavu a ku khanguliweni* ka altari hi siku ledzri dzri hlawulekisiwiki ha dzrone. Nkama lowu va nyikeliki swihanano swavu a altarini, 11 Yehovha a byele Moxe a ku: “Hi siku, mun’we ka vazrangeli a ta nyikela xihanano xa ku khanguliwa ka altari.”

12 Lweyi a nyikeliki xihanano hi siku dzra ku sungula ku ve Nasoni, n’wana Aminadabi, wa lixaka dzra Yuda. 13 A xihanano xake ku ve paratu dzrin’we dzra prata ledzri a dzri bindzra 1,5 wa makilu* ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga,* na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 14 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 15 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 16 ximbutana xin’we akuva xi va gandzrelo dzra xidoho; 17 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Nasoni, n’wana wa Aminadabi.

18 Hi siku dzra wubidzri, a muzrangeli wa lixaka dzra Yisakari, ku nga Nethanele, n’wana wa Zuwari, a nyikele xihanano xake. 19 A xihanano xake ku ve paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 20 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 21 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 22 ximbutana xin’we akuva xi va gandzrelo dzra xidoho; 23 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we akuva swi va gandzrelo dzra ku kombela ku zrula. Ledzri ku ve gandzrelo dzra Nethanele, n’wana wa Zuwari.

24 Hi siku dzra wuzrazru, a muzrangeli wa vana va Zebuloni, ku nga Eliyabi, n’wana wa Heloni, 25 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 26 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 27 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 28 ximbutana xin’we akuva xi va gandzrelo dzra xidoho; 29 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Eliyabi, n’wana wa Heloni.

30 Hi siku dzra wumune, a muzrangeli wa vana va Rubeni, ku nga Elizuri n’wana wa Xeduwuri, 31 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 32 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 33 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 34 ximbutana xin’we akuva xi va gandzrelo dzra xidoho; 35 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Elizuri, n’wana wa Xeduwuri.

36 Hi siku dzra wuntlhanu, a muzrangeli wa vana va Simiyoni, ku nga Xelumiyele, n’wana wa Zurixadayi, 37 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 38 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 39 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 40 ximbutana xin’we akuva xi va gandzrelo dzra xidoho; 41 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Xelumiyele, n’wana wa Zurixadayi.

42 Hi siku dzra wu 6, a muzrangeli wa vana va Gadi, ku nga Elizafi, n’wana wa Dewuwele, 43 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 44 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 45 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 46 ximbutana xin’we akuva xi va gandzrelo dzra xidoho; 47 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Elizafi, n’wana wa Dewuwele.

48 Hi siku dzra wu 7, a muzrangeli wa vana va Efrayimi, ku nga Elixama, n’wana wa Amihudi, 49 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 50 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 51 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 52 ximbutana xin’we akuva xi va gandzrelo dzra xidoho; 53 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Elixama, n’wana wa Amihudi.

54 Hi siku dzra wu 8, a muzrangeli wa vana va Manasi, ku nga Gamaliyele, n’wana wa Pedazuri, 55 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 56 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 57 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 58 ximbutana xin’we akuva xi va gandzrelo dzra xidoho; 59 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Gamaliyele, n’wana wa Pedazuri.

60 Hi siku dzra wu 9, a muzrangeli wa vana va Benjamini, ku nga Abidani, n’wana wa Gideyoni, 61 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 62 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 63 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 64 ximbutana xin’we akuva xi va gandzrelo dzra xidoho; 65 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Abidani, n’wana wa Gideyoni.

66 Hi siku dzra wu 10, a muzrangeli wa vana va Dani, ku nga Akhiyezeri, n’wana wa Amixadayi, 67 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 68 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 69 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 70 ximbutana xin’we akuva xi va gandzrelo dzra xidoho; 71 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Akhiyezeri, n’wana wa Amixadayi.

72 Hi siku dzra wu 11, a muzrangeli wa vana va Axere, ku nga Pagiyele, n’wana wa Okhirani, 73 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 74 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 75 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 76 ximbutana xin’we akuva xi va gandzrelo dzra xidoho; 77 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Pagiyele, n’wana wa Okhirani.

78 Hi siku dzra wu 12, a muzrangeli wa vana va Naftali, ku nga Akhira, n’wana wa Enani, 79 a nyikele gandzrelo dzrake: Paratu dzrin’we dzra prata ledzri a dzri bindzra 1,5 wa makilu ni tijela dzra prata ledzri a dzri bindzra 800 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, na swibya leswo ha swibidzri swi tale hi mapa lamanene lawa ma patsriwiki ni mafuzra, akuva swi va gandzrelo dzra tinhleke; 80 tijela dzra dzritsrongo dzra woru ledzri a dzri bindzra 114 wa magrama na dzri tale hi muzri wa ku nun’hwela; 81 xihon’wana xin’we, hamba yin’we ya xinuna ni xihambana xin’we xa xinuna lexi xo ko va ni lembe dzrin’we, akuva swi va gandzrelo dzra ku hisiwa; 82 ximbutana xin’we akuva xi va gandzrelo dzra xidoho; 83 a nyikele ni tihomu tibidzri, ntlhanu wa tihamba ta xinuna, ntlhanu wa swiphongo, ni ntlhanu wa swihambana swa xinuna leswi swo ko va ni lembe dzrin’we, akuva swi va gandzrelo dzra ku kombela ku zrula. Ledzri ku ve gandzrelo dzra Akhira, n’wana wa Enani.

84 Leswi i swihanano leswi nyikeliwiki hi vazrangeli va Israyele a ku khanguliweni ka altari, loko dzri xwengisiwa: 12 wa maparatu ya prata, 12 wa matijela ya prata, 12 wa matijela lamatsrongo ya woru. 85 A paratu dzrin’wana ni dzrin’wana dzra prata a dzri bindzra 1,5 wa makilu, nakone a tijela dzrin’wana ni dzrin’wana a dzri bindzra 800 wa magrama, xileswo a ku bindzra ka swibya hinkwaswu ku ve 27,4 wa makilu, hi ku ya hi mpimu wa xekele ledzri tizrisiwaka mbangwini wa ku xwenga. 86 A tijela dzrin’wana ni dzrin’wana ka 12 wa matijela ya woru lawa a ma tale hi muzri wa ku nun’hwela a dzri bindzra 114 wa magrama, hi ku ya hi mpimu wa xekele lowu a wu tizrisiwa mbangwini wa ku xwenga, xileswo a matijela hinkwawu ya matsrongo ya woru a ma bindzra 120 wa maxekele. 87 A swihazri hinkwaswu leswi tizriseliwiki ku hamba gandzrelo dzra ku hisiwa, ku ve 12 wa tihomu, 12 wa tihamba ta xinuna, 12 wa swihambana swa xinuna leswi swo ko va ni lembe dzrin’we, ku patsra ni magandzrelo ya tinhleke lawa ma nyikeliwaka na swone, kun’we ni 12 wa swimbutana akuva swi va gandzrelo dzra xidoho. 88 Nakone a swihazri hinkwaswu leswi tizriseliwiki ku hamba gandzrelo dzra ku kombela ku zrula ku ve 24 wa tihomu, 60 wa tihamba ta xinuna, 60 wa swiphongo ni 60 wa swihambana swa xinuna leswi swo ko va ni lembe dzrin’we. Leswi ku ve swihanano swa ku khanguliwa ka altari ntsrhaku ka loko dzri hlawulekisiwile.

89 Minkama hinkwayu loko Moxe a nghena a tendeni dzra ntlhanganu akuva a vulavula na Xikwembu Nkulukumba a a yingela zritu na dzri vulavula na yene a henhla ka tampa ya areka dzra Wumboni, a makazri ka makerubimi; Xikwembu Nkulukumba a a vulavula na yene kolanu.

8 Yehovha a byela Moxe a ku: 2 “Byela Aroni u ku: ‘Loko u tlhavika mimotsre, a mimotsre leyo ya 7 yi fanela ku vaninga a mahlweni ka xa ku tlhoma mimotsre yoleyo.’” 3 Xileswo, Aroni a yentxa swoleswo, a tlhavika mimotsre yi vaninga a mahlweni ka xa ku tlhoma mimotsre, hi lani Yehovha a a lelete Moxe ha kone. 4 A xa ku tlhoma mimotsre a xi hambiwe hi woru ledzri beteteliwiki hi hamela. Ku sukela ka mizri wa xone ku ya tlhasa ka swiluva, a xi hambiwe hi lani Yehovha a kombiki Moxe ha kone a xivonisweni.

5 Yehovha a tlhela a byela Moxe a ku: 6 “Teka Valevhi ka Vaisrayele u ya va basisa. 7 U fanela ku va basisa hi ndlela leyi: Va xwanyi hi mati ya ku basisa swidoho, nakone va fanela ku byevula misisi hinkwayu ya mizri wavu, va hlampswa mpahla yavu, hi ndlela leyo va tibasisa. 8 Ntsrhaku ka leswo, va ta teka xihon’wana ni gandzrelo ledzri nyikeliwaka na xone, ku nga gandzrelo dzra tinhleke dzra mapa lamanene lawa ma patsriwiki ni mafuzra. 9 U fanela ku yisa Valevhi a mahlweni ka tende dzra ntlhanganu u va u hlengeleta nhlengeletanu hinkwayu ya Israyele. 10 Loko u yisa Valevhi a mahlweni ka Yehovha, a Vaisrayele va fanela ku va tlhanteka mavoko. 11 Kutani Aroni a fanela ku nyikela* Valevhi a mahlweni ka Yehovha swanga gandzrelo ledzri zrendzrelekisiwaka dzra Vaisrayele, akuva Valevhi va ta tizrela Yehovha.

12 “Ntsrhaku ka leswo, a Valevhi va ta tlhanteka mavoko a tinhlokweni ta tihomu va va va nyikela homu yin’we leswaku yi va gandzrelo dzra xidoho, kutani leyin’wana yi va gandzrelo ledzri hiseliwaka Yehovha, akuva va kombeleliwa ku dzrivaleliwa. 13 U ta yimisa Valevhi a mahlweni ka Aroni ni vanake, u va nyikela ka Yehovha swanga gandzrelo ledzri zrendzrelekisiwaka. 14 U fanela ku hambanisa Valevhi ka Vaisrayele, kutani a Valevhi va ta va vanga. 15 Ntsrhaku ka leswo, a Valevhi va ta nghena akuva va tizrela tendeni dzra ntlhanganu. U fanela ku va nyikela hi ndlela yoleyo swanga gandzrelo ledzri zrendzrelekisiwaka. 16 Hikusa ni nyikiwe vone swanga swihanano leswi pfaka ka Vaisrayele. Ni ta titekela vone a matsrhan’wini ya mativula hinkwawu ya Vaisrayele. 17 Hikusa a mativula hinkwawu ya Vaisrayele i yanga, ku nga ha va ya vhanu kumbe ya swihazri. Ni tixwengisele wone siku ledzri ni dlayiki mativula hinkwawu a tikweni dzra Egipta. 18 Ni ta teka Valevhi a matsrhan’wini ya mativula hinkwawu ya Vaisrayele. 19 Ni ta teka Valevhi ni nyika Aroni ni vanake swanga swihanano leswi pfaka ka Vaisrayele, akuva va hamba ntizro lowu pfunaka Vaisrayele a tendeni dzra ntlhanganu, leswaku va kombelela Vaisrayele ku dzrivaleliwa, ku yentxela leswaku a ntungu wu nga humeleli makazri ka Vaisrayele, hi ku va vhanu va Israyele va tsrhindzrekela mbangwini wa ku xwenga.”

20 Moxe, Aroni kun’we ni nhlengeletanu hinkwayu ya Israyele va yentxe swoleswo hi Valevhi, va yentxe hinkwaswu hi lani Yehovha a a lelete Moxe ha kone mayelanu ni Valevhi. 21 Xileswo a Valevhi va tixwengisa va va va hlampswa mpahla yavu; ntsrhaku ka leswo, Aroni a va nyikela swanga gandzrelo ledzri zrendzrelekisiwaka a mahlweni ka Yehovha, kutani Aroni a va kombelela ku dzrivaleliwa akuva va va lava va basiki. 22 Hi ku landzrela, a Valevhi va nghena tendeni dzra ntlhanganu akuva va tizra a mahlweni ka Aroni ni vanake. Va yentxise xiswoswo hi lani Yehovha a a lelete Moxe ha kone mayelanu na vone.

23 Hiloko Yehovha a byela Moxe a ku: 24 “Leswi swi tizra ka Valevhi: Wanuna mun’wana ni mun’wana lweyi a nga ni 25 wa malembe ku ya henhla a fanela ku nghena ka ntlawa wa lava va tizrelaka a tendeni dzra ntlhanganu. 25 Kambe loko a khalute 50 wa malembe a fanela ku huma ka ntlawa wolowo, a nga ha tizri ntxhumu. 26 A nga ha tizrela vamakwavu lava nga ni wutiyanguleli bya ku tizra a tendeni dzra ntlhanganu, kambe a nga fanelanga a yentxa ntxhumu a tendeni dzra ntlhanganu. Hi leswo u fanelaka ku swi yentxa mayelanu ni Valevhi ni wutiyanguleli byavu.”

9 Yehovha a vulavula na Moxe a mananga ya Sinayi hi hweti ya ku sungula ya lembe dzra wubidzri ntsrhaku ka loko va hume tikweni dzra Egipta a ku: 2 “A Vaisrayele va fanela ku tilulamisela gandzrelo dzra Paxkwa hi nkama lowu bekisiwiki. 3 Mi fanela ku dzri lulamisela hi nkama lowu bekisiwiki a madambyeni ya siku dzra wu 14 ka hweti ya ku sungula. Dzri lulamiselani hi ku landzra milawu hinkwayu ni swileleto hinkwaswu leswi fambisanaka ni Paxkwa.”

4 Xileswo, Moxe a byela Vaisrayele leswaku va lulamisela gandzrelo dzra Paxkwa. 5 Hiloko va lulamisela gandzrelo dzra Paxkwa a madambyeni ya siku dzra wu 14 ka hweti ya ku sungula, a mananga ya Sinayi. A Vaisrayele va yentxe hinkwaswu leswi Yehovha a a swi lelete Moxe.

6 Kambe a ku ni vhanu lava a va nyamile hi mhaka ya leswi va khumbiki ntsrumbu, kutani a va swi kotanga ku lulamisela gandzrelo dzra Paxkwa hi siku ledzro. Xileswo vhanu lavo va ye ka Moxe na Aroni hi siku ledzro, 7 va tlhasa va byela Moxe va ku: “Hi nyamile hi mhaka ya leswi hi khumbiki ntsrumbu. Ha yini hi nga fanelanga hi nyikela gandzrelo ka Yehovha hi nkama lowu bekisiwiki kun’we ni Vaisrayele lavan’wana? 8 Hiloko Moxe a va byela a ku: “Yimani kolanu, ni djula ku twa leswaku Yehovha a li yini mayelanu na n’wine.”

9 Kutani Yehovha a byela Moxe a ku: 10 “Byela Vaisrayele u ku: ‘Nambiloko mhunu wa kukazri kwenu kumbe ka lixaka dzrenu ledzri dzra ha taka o txhuka a va lweyi a nyamiki hi mhaka ya ku khumba ntsrumbu, kumbe a yendzrile a li kule swinene, a fanela ku va a lulamiselela Yehovha gandzrelo dzra Paxkwa. 11 Va fanela ku dzri lulamisela a madambyeni ya siku dzra wu 14 ka hweti ya wubidzri. Va dzri da ni mapawu lawa ma kalaka ma nga txheliwanga fermentu kun’we ni matsavu ya ku bava. 12 A va fanelanga va siya ntxhumu ni wun’we wa gandzrelo ledzro ku ya tlhasa mundzruku, nakone a va fanelanga va tsrhova zrambu dzra hamba leyo. Va fanela ku dzri lulamisela hi ku landzra milawu hinkwayu ya mayelanu ni Paxkwa. 13 Loko mhunu wa kukazri a dzrela ku lulamisela gandzrelo dzra Paxkwa nakasi a basile nakone a nga yendzranga a kumeka ka kule, mhunu yelweyo a* fanela ku dlayiwa, hikusa a nga nyikelanga gandzrelo ka Yehovha hi nkama lowu bekisiwiki. Mhunu yelweyo a ta tihlamulela hi kola ka xidoho xake.

14 “‘Loko mi tsrhama ni muluveli wa kukazri, na yene a fanela ku lulamiselela Yehovha gandzrelo dzra Paxkwa. A fanela ku swi yentxa hi ku landzra milawu ni swileleto leswi fambisanaka ni Paxkwa. Ku fanela ku va ni nawu wun’we lowu tizrelaka valuveli kun’we na n’wine.’”

15 Hi siku ledzri a tabernakela dzri yakiwiki ha dzrone ku ve ni tlavi ledzri funeketiki tabernakela ku nga tende dzra Wumboni, kambe a wusikwini a dzri voneka na dzri fana ni ndzrilo lowu kumekaka henhla ka tabernakela ku ya tlhasa mixweni. 16 A ku tsrhamela ku yentxeka leswi: A tlavi a dzri funeketa tabernakela a nhlikanhini, a wusikwini a dzri voneka na dzri fana ni ndzrilo. 17 Loko tlavi dzri suka tendeni, a Vaisrayele a va tekela ku suka nakone lani dzri tlhasaka dzri yima kone, a Vaisrayele a va dzima mintxhatxha kolanu. 18 A Vaisrayele a va famba hi loko Yehovha a va byela, va va va dzima mintxhatxha loko Yehovha a va byela. Loko tlavi dzri tama dzri va henhla ka tabernakela, a Vaisrayele a va tama va va mbangwini lowu va dzimiki ka wone mintxhatxha. 19 Loko tlavi dzri tama dzri va henhla ka tabernakela ku dzringana masiku manyingi, a Vaisrayele a va yingiseta Yehovha va nga suki. 20 Minkama yin’wana a tlavi a dzro yima masikunyana a henhla ka tabernakela, a va tama va va mbangwini lowu va dzimiki ka wone mintxhatxha hi ku landzra nawu wa Yehovha va va va suka hi ku landzra nawu wa Yehovha. 21 Minkama yin’wana a tlavi a dzro tsrhamisa wusikwini ku ya tlhasa mixweni ntsena, kutani loko dzri suka mixweni na vone a va suka. Swi nge na mhaka leswaku i wusiku kumbe i nhlikanhi loko dzri suka na vone a va suka. 22 Loko tlavi dzri tama dzri va henhla ka tabernakela dzri heta masiku mabidzri, hweti kumbe nkama wa ku leha, a Vaisrayele a va tama va va mintxhatxheni, va nga suki. Kambe loko dzri suka na vone a va suka. 23 A va dzima mintxhatxha hi loko Yehovha a va byela, va va va suka loko Yehovha a va byela. Va yingisete xileleto xa Yehovha, lexi Yehovha a va nyikiki xone hi ku tizrisa Moxe.

10 Hiloko Yehovha a byela Moxe a ku: 2 “Tihambele swipalapala swibidzri, swi hambe hi prata ledzri beteteliwiki hi hamela, kutani u swi tizrisela ku tivisa nhlengeletanu leswaku yi hahlula mintxhatxha. 3 Loko swipalapala leswo ha swibidzri swi txhayiwa, a nhlengeletanu hinkwayu yi fanela ku vitaniwa leswaku yi ta kwaku a nyangweni wa tende dzra ntlhanganu. 4 Loko ku txhayiwa xin’we, ko va vazrangeli ntsena va fanelaka ku buya kwaku, ku nga vazrangeli va 1.000 wa Vaisrayele.

5 “Loko va txhaya mpfumawulu wa xipalapala lowu txintxatxintxaka, a ntlawa wa tinxaka ta le wuxeni wu fanela ku suka. 6 Loko hi khambi dzra wubidzri va txhaya mpfumawulu wa xipalapala lowu txintxatxintxaka, a ntlawa wa tinxaka ta le nyingitimu wu fanela ku suka. Va fanela ku txhaya mpfumawulu wa xipalapala hi ndlela yoleyi nkama ni nkama loko ku suka ntlawa wa kukazri.

7 “Loko u vitana nhlengeletanu hinkwayu ku fanela ku txhayiwa mpfumawulu wa swipalapala, kambe ku nga vi mpfumawulu lowu txintxatxintxaka. 8 A vana va Aroni, ku nga vaprista, va fanela ku txhaya swipalapala nakone a ku txhayiwa ka swipalapala ku fanela ku va nawu lowu nga helikiki kwenu ni le tinxakeni tenu hinkwatu.

9 “Loko a tikweni dzrenu swi djula leswaku mi ya lwa yimpi ni nala wenu lweyi a mi xanisaka, mi fanela ku txhaya mpfumawulu wa yimpi hi swipalapala, kutani Yehovha Xikwembu Nkulukumba wenu a ta mi dzrimuka a va a mi huluxa ka valala venu.

10 “Ni loko mi li minkameni ya ku nyonxisa, leswi liki, mi li ka minkhuvu yenu ni le ku sunguleni ka hweti yin’wana ni yin’wana, mi ta txhaya mpfumawulu wa swipalapala a mahlweni ka magandzrelo ya ku hisiwa ni magandzrelo ya ku kombela ku zrula; a mpfumawulu lowo wa swipalapala wu ta yentxa leswaku Xikwembu Nkulukumba a mi dzrimuka. Hi mine Yehovha Xikwembu Nkulukumba wenu.”

11 Hi lembe dzra wubidzri hi siku dzra wu 20 ka hweti ya wubidzri, a tlavi dzri suka a henhla ka tabernakela dzra Wumboni. 12 Xileswo, a Vaisrayele va suka va famba hi le mananga ya Sinayi; va sukise xileswi va leletiwiki leswaku va fanela ku sukisa xiswone, kutani a tlavi dzri tlhasa dzri yima mananga ya Parani. 13 Ledzri i khambi dzra ku sungula ledzri va fambiki hi ku landzra xileleto lexi Yehovha a xi nyikeliki hi ku tizrisa Moxe.

14 Hi ndlela leyo, a ntlawa wa tinxaka tizrazru lowu wu nga wa vana va Yuda wu ve wa ku sungula ku suka hi ku ya hi ntlawa wa wone wa masotxha nakone Nasoni n’wana wa Aminadabi hi yene a a zrangela mintlawa yoleyo. 15 A ntlawa wa lixaka dzra vana va Yisakari a wu zrangeliwa hi Nethanele n’wana wa Zuwari. 16 A ntlawa wa lixaka dzra vana va Zebuloni a wu zrangeliwa hi Eliyabi n’wana wa Heloni.

17 Loko tabernakela dzri hahluleliwile a vana va Gerixoni ni vana va Merari, lava a va tlakula tabernakela, va zruzrile.

18 Hiloko ntlawa wa tinxaka tizrazru lowu wu lumbaka Rubeni, wu zruzra hi ku ya hi mintlawa ya wone ya masotxha* nakone Elizuri n’wana wa Xeduwuri hi yene a a zrangela mintlawa yoleyo. 19 A ntlawa wa lixaka dzra vana va Simiyoni a wu zrangeliwa hi Xelumiyele n’wana wa Zurixadayi. 20 A ntlawa wa lixaka dzra vana va Gadi a wu zrangeliwa hi Elizafi n’wana wa Dewuwele.

21 Kutani ku zruzra Vakohati lava a va tlakula mintxhumu ya le mbangwini wa ku xwenga. A tabernakela a dzri fanela ku yakiwa na va nga si na tlhasa.

22 Hiloko ntlawa wa tinxaka tizrazru lowu nga wa vana va Efrayimi, wu zruzra hi ku ya hi mintlawa ya wone ya masotxha* nakone Elixama n’wana wa Amihudi hi yene lweyi a a zrangela mintlawa yoleyo. 23 A ntlawa wa lixaka dzra vana va Manasi a wu zrangeliwa hi Gamaliyele n’wana wa Pedazuri. 24 A ntlawa wa lixaka dzra vana va Benjamini a wu zrangeliwa hi Abidani n’wana wa Gideyoni.

25 Hiloko ntlawa wa tinxaka tizrazru lowu nga wa vana va Dani, wu zruzra hi ku ya hi mintlawa ya wone ya masotxha nakone Akhiyezeri n’wana wa Amixadayi hi yene lweyi a a zrangela mintlawa yoleyo. A ntlawa lowu, wu ve wa wugamu akuva wu sizrelela mintlawa leyin’wana hinkwayu. 26 A ntlawa wa lixaka dzra vana va Axere a wu zrangeliwa hi Pagiyele n’wana wa Okhirani. 27 A ntlawa wa lixaka dzra vana va Naftali a wu zrangeliwa hi Akhira n’wana wa Enani. 28 Leyi i ndlela leyi a Vaisrayele kun’we ni mintlawa yavu ya masotxha a va landzrelelana ha yone loko va zruzra.

29 Hiloko Moxe a byela Hobabi n’wana wa Rewuwele,* mukon’wana wake wa mu Midiyani, a ku: “Ha zruzra, hi ya mbangwini lowu Yehovha a hi byeliki a ku: ‘Ni ta mi nyika wone.’ Famba na hine, hi ta ku hlayisa, hikusa Yehovha a dumbise Israyele mintxhumu ya ku xonga.” 30 Kambe Hobabi a hlamula Moxe a ku: “A ni nge fambi. Ni ta tlhelela a tikweni dzranga ni le maxakeni yanga.” 31 Xileswo Moxe a ku: “Ho kombela u nga hi tsrhiki, hikusa wene u yi tiva ha hombe mimbangu leyi hi nga dzimaka ka yone mintxhatxha a mananga nakone u nga va mukongomisi wezru.* 32 Loko u famba, matovoko hinkwawu lawa Yehovha a taka hi nyika wone na wene u ta pfuneka ka wone.”

33 Xileswo va suka nhaveni ya Yehovha va yendzra ku dzringana masiku mazrazru, a areka dzra xipfumelelanu xa Yehovha dzri tlakuliwa dzri zranga dzri famba, ku dzringana masiku mazrazru lawa a va yendzra va djuletela mbangu wa ku wisela ka wone. 34 A tlavi dzra Yehovha a dzri li henhla kwavu a nhlikanhini loko va suka lani a va dzime kone mintxhatxha.

35 Minkama hinkwayu loko a Areka dzri zruzrisiwa Moxe a a ku: “Yehovha yentxa xa kukazri akuva u hi pfuna nakone hangalasa valala vaku u va u yentxa leswaku lava va ku nyenyaka va ku tsrutsruma.” 36 Kutani loko dzri tlhasisiwa lomu a dzri yisiwa kone a a ku: “Yehovha hi kombela leswaku u va xikazri ka magidigidi* ya Vaisrayele.”

11 A vhanu va sungula ku khala ngopfu swinene va sola Yehovha. Loko Yehovha a yingela swikhalu swavu, a hlundzruka ngopfu swinene, kutani ku xika ndzrilo hi le ka Yehovha wu sungula ku hisa wu va wu dlaya van’we vavu lava a va li matlhelweni ka mbangu lowu a ku dzimiwe mintxhatxha ka wone. 2 Loko vhanu va sungula ku dzrilela Moxe, Moxe a khongota ka Yehovha, wu va ndzrilo wu timeka. 3 Xileswo a mbangu wolowo wu txhuliwe vito dzra ku Tabera,* hikusa va hisiwe hi ndzrilo lowu pfaka ka Yehovha a mbangwini wolowo.

4 Kutani a valuveli* lava tsrhamaka makazri kwavu va sungula ku kombisa makwanga, na vone Vaisrayele va tlhela va sungula ku dzrila va ku: “I mani a taka hi nyika nyama akuva hi da? 5 Hi ti xuva ngopfu tihlampfi leti a hi ti da hi mahala a Egipta, a mapipinu, a makhalavatla, tinyala ni swinyalana! 6 Kambe swoswi ho hela ntamu. A hi voni xa ku da lani, loko ku nga li mana ntsena.”

7 A mana a wu fana ni mbewu ya kukazri ya yitsrongo* nakone a wu ni muvala wa ku basa ku fana ni nhome ya nsinya. 8 A vhanu a va hangalaka va wu zrolela, va gama va wu sila kumbe va wu kandzra txhuzrini. Ntsrhaku ka leswo a va wu sweka mapaneleni kumbe va wu tizrisela ku hamba mapawu ya redondu, nakone a wu nandzrika ku fana ni bolu ledzri hambiwiki hi mafuzra. 9 A wusikwini nkama lowu a ku wa mbezre a mintxhatxheni, na wone mana a wu wa.

10 Moxe a yingela mindangu hinkwayu na yi dzrila, mun’wana ni mun’wana na a li nyangweni wa ntxhatxha wake. Yehovha a hlundzruka ngopfu swinene, na yene Moxe a kwata ngopfu swinene. 11 Kutani Moxe a byela Yehovha a ku: “Ha yini u xanisa nandzra waku? Ha yini u ni nyike ntizro wa ku bindzra wa ku fana ni lowu, wa ku zrangela vhanu hinkwavu lava? 12 O va mine ni kumiki nyimba ya vhanu hinkwavu lava? Xana hi mine ni va pswaliki lakakuva u ni byela u ku: ‘Va tlakuli u va beka xifuveni xaku, ku fana ni leswi mutizri* a mu tlakulisaka xiswone n’wana lweyi a nyan’waka’ ku ya tlhasa tikweni ledzri u hlambanyiki ku dzri nyika vakokwana vavu? 13 Ni ta yi kuma kwini nyama ya ku nyika vhanu hinkwavu lava? Hikusa va tsrhamela ku ni dzrilela va ku: ‘Hi nyiki nyama akuva hi da!’ 14 A ni swi koti ku byatsrha tiko hinkwadzru ledzri wuswanga; swa ni bindzrela. 15 Loko a li leswaku u ta tama u ni khoma hi ndlela leyi, no kombela u vhela u ni dlaya swoswi. Loko a li leswaku na yamukeleka a mahlweni kwaku u nga ha ni yentxi ni vona xikazratu ni xin’we.”

16 Hiloko Yehovha a byela Moxe a ku: “Ni hlengeleteleli 70 wa vavanuna lava va nga vakulukumba a Israyele, vavanuna lava u swi tivaka leswaku i vakulukumba lava va fanelekaka tlhelo vazrangeli va vhanu, u va yisa tendeni dzra ntlhanganu, u tsrhama na vone kohala. 17 Ni ta xika ni vulavula na wene kohala, ni va ni susanyana moya wa ku xwenga kwaku ni wu txhela kwavu, va ta ku pfuna ku zrwala ntsrhwalu wa vhanu lava akuva u nga wu zrwali wuswaku. 18 U fanela ku byela vhanu lavo u ku: ‘Tixwengisani hikusa mundzruku mi ta da nyama, swanga hi leswi mi dzrileliki Yehovha mi ku: “I mani a taka hi nyika nyama akuva hi da? A swi hi yampswela nkama lowu a hi le Egipta!” Nakunene Yehovha a ta mi nyika nyama, mi ta yi da. 19 Mi ta yi da, ku nge siku dzrin’we, ku nga li mabidzri, ku nga li ntlhanu, ku nga li 10, ku nga li 20 wa masiku, 20 kambe ku dzringana hweti, mi yi da yi za yi huma hi tinhompfu yi va yi mi hlambulukisa timbilu, hikusa mi fulazrele Yehovha lweyi a nga makazri kwenu, mi va mi mu dzrilela mi ku: “Ha yini hi suke Egipta?”’”

21 Hiloko Moxe a ku: “A vhanu lava ni nga makazri kwavu i 600.000 wa masotxha, kambe wene u li: ‘Ni ta va nyika nyama leyi yanelaka kuva va da ku dzringana hweti hinkwayu!’ 22 Nambiloko a ko dlayiwa mintlhambi hinkwayu ya tihamba ni tihomu, xana a yi ta va yanela, kumbe loko a ko phasiwa tihlampfi hinkwatu ta lwandle, xana a ti ta va yanela?”

23 Hiloko Yehovha a byela Moxe a ku: “Xana a voko dzra Yehovha dzre goma? Swoswi u ta swi vona leswaku leswi ni swi hlayaka swi ta yentxeka kumbe im-him.”

24 Xileswo Moxe a huma a ya byela vhanu leswi Yehovha a swi hlayiki. Kutani a hlawula 70 wa vavanuna ka vakulukumba va tiko, a va tsrhamisisa a matlhelweni ka tende dzra ntlhanganu. 25 Ntsrhaku ka leswo, Yehovha a xika hi le tlavini a vulavula na yene, a va a susanyana moya wake wa ku xwenga a wu txhela ka vakulukumba lavaya va 70, ha mun’we mun’we. Na va ha ku yamukela moya lowo, va tekela ku sungula ku vulavula swanga vaprofeta,* kambe ve yentxa leswo ka khambi dzroledzro ntsena.

26 Ka vavanuna volavo a ku ni vavanuna vabidzri lava a va ha sale mintxhatxheni. A mavito yavu i Eldadi na Medadi. Hiloko moya wa ku xwenga wu xikela henhla kwavu swanga hi leswi a va li van’we va lava va tsralisiwiki kambe a va nga nghenanga tendeni dzra ntlhanganu. Xileswo va sungula ku vulavula swanga vaprofeta a mintxhatxheni. 27 Kutani madjaha mabidzri ma tsrutsruma ma ya byela Moxe ma ku: “Eldadi na Medadi va vulavula swanga vaprofeta a mintxhatxheni!” 28 Loko a twa leswo, Yoxuwa n’wana wa Nuni, lweyi ku sukela a wumpshweni byake a a li mupfunisi wa Moxe a mu byela a ku: “Hosi yanga Moxe, va miyeti!” 29 Kambe Moxe a mu hlamula a ku: “Mine a ni na wukwele, xana wene u fanela ku va na byone? A swi ta nyonxisa ngopfu loko vhanu hinkwavu va Yehovha a vo va vaprofeta ni loko Yehovha a o va nyika moya wake wa ku xwenga!” 30 Hi ku famba ka nkama Moxe a tlhelela mintxhatxheni ni vakulukumba va Israyele.

31 Ntsrhaku ka leswo, Yehovha a yentxa leswaku ku hunga moya lowu tisiki tinyanyana,* na ti sukela ka tlhelo dzra le lwandle, a ti yentxa ti wela a mintxhatxheni hinkwayu ku patsra ni le matlhelweni ka yone. Ka matlhelo hinkwawu ti tate mbangu wa ku dzringana ku famba mpfhuka wa siku, a ti wetetele ti tlhantekelana lakakuva ti hamba 89 wa masentimetru* ku sukela hansi ku ya henhla. 32 Xileswo siku ledzro hinkwadzru ni wusiku bya kone kun’we ni mundzruku ka kone, a vhanu a va yetlelanga hikusa a va zrolela tinyanyana. A nga kone lweyi a zroleliki hansi ka 10 wa mimpimu ya homeri,* nakone a va tiyanekelela tone a mintxhatxheni hinkwayu ku patsra ni le matlhelweni ka yone. 33 Kambe na nyama ya ha li matinyweni, na ni ku ntxakunhiwa yi nga si na ntxakunhiwa, Yehovha a va hlundzrukela ngopfu swinene, a va Yehovha a dlaya vhanu vanyingi ngopfu swinene.

34 Xileswo a mbangu wolowo wu txhuliwa vito dzra ku Kiberoti-hatavha,* hikusa a mbangwini wolowo ku lahliwe vhanu vanyingi lava kombisiki makwanga. 35 A vhanu va zruzra a Kiberoti-hatavha, va ya tsrhama a Hazeroti.

12 Moxe a a tekane ni wansati wa Mukuxi, hi mhaka ya leswo, Miriyamu na Aroni va sungule ku khanela ku biha ha yene. 2 A va ku: “Xana Yehovha e khanela hi ku tizrisa Moxe ntsena? Xana a nga hi tizrisanga na hine?” Yehovha a a va yingela. 3 Moxe a a li yene wa ku zrula wa kone ku tlula vhanu hinkwavu a misaveni.*

4 Na va nga swi yimelanga Yehovha a byela Moxe, Aroni na Miriyamu a ku: “Humani tendeni dzra ntlhanganu n’wine va vazrazru.” Hiloko ha wuzrazru byavu va huma. 5 Xileswo Yehovha a xika tlavini a yima nyangweni wa tende dzra ntlhanganu, a vitana Aroni na Miriyamu. Ha wubidzri byavu va tsrhindzrekela. 6 Kutani Xikwembu Nkulukumba a ku: “Ni kombela mi ni yingiseta. Loko a ku ni muprofeta wa Yehovha a makazri kwenu a ni ta humelela kwake a xivonisweni ni tlhela ni vulavula na yene a milozrweni. 7 Kambe a swi hi ndlela leyo ka Moxe nandzra wanga! Ni beke vhanu vanga a mavokweni yake.* 8 Ni vulavula na yene na hi langutanile,* a livaleni, ku nga li hi swihundla; a vona wuso bya Yehovha. Kutani ha yini mi nga txhavanga ku vulavula ku biha hi nandzra wanga Moxe?”

9 Xileswo, Yehovha a va hlundzrukela ngopfu swinene, a va a va siya. 10 Kutani a tlavi dzri suka henhla ka tende, hi nkama wolowo, Miriyamu a biwa hi nhlokonho ya ku basa, leyi fanaka ni xitsrhwatsrhwa. Kutani loko Aroni a lavisa Miriyamu, a vona leswaku a a ni nhlokonho. 11 Aroni a tekela ku byela Moxe a ku: “Hosi yanga, na ku kombela! Ni kombela u nga hi tsrhiki hi khatisiwa hi mhaka ya xidoho lexi hi xi yentxiki! Hi tiyentxe swiphunta. 12 Ni kombela u nga mu tsrhiki a tama a fana ni mhunu lweyi a fiki, lweyi a pswaliwiki na hamfu ya mizri wake yi bolile!” 13 Hiloko Moxe a sungula ku dzrilela Yehovha a ku: “Xikwembu Nkulukumba, na ku kombela! Ni kombela u mu daha!”

14 Kutani Yehovha a byela Moxe a ku: “Loko papayi wake a o mu thukela wusweni, a a nge ti va tinganeni ku dzringana 7 wa masiku? A a bekiwi wuswake ku dzringana 7 wa masiku a handle ka mbangu lowu ku dzimiwiki ka wone mintxhatxha, ntsrhaku ka leswo a nga tlhela a buyisiwa.” 15 Kutani Miriyamu a tsrhamisisiwa wuswake a handle ka mbangu lowu ku dzimiwiki ka wone mintxhatxha ku dzringana 7 wa masiku, nakone a tiko a dzri zruzranga na Miriyamu a nge si na tlheliseliwa a mintxhatxheni. 16 Kutani a tiko dzri zruzra a Hazeroti, dzri ya dzima mintxhatxha a mananga ya le Parani.

13 Yehovha a vulavula na Moxe a ku: 2 “Zrumelani vavanuna leswaku va ya kambela tiko dzra Kanana ledzri ni dzri nyikaka Vaisrayele. Mi ta zrumela vavanuna lava va nga vazrangeli ka lixaka ha dzrin’we.”

3 Xileswo, Moxe a va zrumela na va sukela mananga ya le Parani hi ku landzra xileleto xa Yehovha. Vavanuna lavo hinkwavu a va li vazrangeli va Vaisrayele. 4 A mavito yavu hi lawa: Ka lixaka dzra Rubeni, Xamimuwa n’wana wa Zakuri; 5 ka lixaka dzra Simiyoni, Xafati n’wana wa Hori; 6 ka lixaka dzra Yuda, Kalebe n’wana wa Yefune; 7 ka lixaka dzra Yisakari, Igali n’wana wa Yosefa; 8 ka lixaka dzra Efrayimi, Hoxeya n’wana wa Nuni; 9 ka lixaka dzra Benjamini, Paliti n’wana wa Rafu; 10 ka lixaka dzra Zebuloni, Gadiyele n’wana wa Sodi; 11 ka lixaka dzra Yosefa, leswi liki lixaka dzra Manasi,* Gadidi n’wana wa Susi; 12 ka lixaka dzra Dani, Amiyele n’wana wa Gemali; 13 ka lixaka dzra Axere, Seturi n’wana wa Mikayele; 14 ka lixaka dzra Naftali, Nahabi n’wana wa Vhofisi; 15 ka lixaka dzra Gadi, Gewuwele n’wana wa Makhi. 16 Lawa i mavito ya vavanuna lava Moxe a va zrumeliki akuva va ya kambela tiko. Nakone a n’wana wa Nuni ku nga Hoxeya, Moxe a mu txhule vito dzra ku Yoxuwa.*

17 Loko Moxe a va zrumela leswaku va ya kambela tiko dzra Kanana, a va byele a ku: “Yanani Negebu, mi gama mi tlhantuka mi ya mugangeni wa tinhava. 18 Mi fanela ku vona leswaku a tiko ledzro dzri tsrhamisise kuyini, ni loko vhanu va kone va ni ntamu kumbe va tsranile, va li vatsrongo kumbe va li vanyingi, 19 loko tiko dzra kone dzri li dzrinene kumbe dzri bihile ni loko madoropa ya kone ma ni mimuru kumbe ma nga li na yone. 20 Lavisisani ni leswaku a tiko dzra kone dzri nonile kumbe a dzri bindzruli ni leswaku ku ni minsinya kumbe a yi kone. Vanani ni xixixi mi va mi buya ni mihandzru ya kukazri ya le tikweni ledzro.” A ku li nguva ya ntsrhovelo wa ku sungula wa mawuvha.

21 Xileswo, va suka va ya kambela tiko ku sukela a mananga ya Zini ku ya tlhasa a Rehobi kusuhi ni le Lebo-hamati.* 22 Loko va tlhantuka va ya Negebu, va tlhase a Hebroni, lani a ku tsrhama Akhimani, Xexayi na Talmayi lava a va li Vaanaki. A Hebroni ku zrange ku yakiwa, ntsrhaku ka 7 wa malembe ku yakiwa a Sowana a tikweni dzra le Egipta. 23 Hiloko va tlhasa a nkoveni wa Exikoli kutani va tsrema zrwavi ledzri dzri nga ni xitxatxa xin’we xa mawuvha, lexi xi ngo tlakuliwaka hi vavanuna vabidzri hi nhonga. Va tlhele va buya ni magranada* ku patsra ni makuwa. 24 Va txhule mbangu wolowo va ku i nkova wa Exikoli* hi mhaka ya xitxatxa lexi Vaisrayele va xi tsremiki kolahayani.

25 Ntsrhaku ka loko va hete 40 wa masiku na va kambela tiko, va tlhela. 26 Xileswo va tlhasa ka Moxe na Aroni kun’we ni nhlengeletanu hinkwayu ya Israyele a mananga ya le Parani, a Kadexi. Va nyikela ndzrava ka nhlengeletanu hinkwayu va va va kombisa mihandzru ya tiko dzroledzro. 27 Va dzrungulela Moxe va ku: “Hi nghenile tikweni ledzri u hi zrumiki ku ya ka dzrone, nakunene dzri tale ngopfu swinene hi leiti ni wulombe nakone a mihandzru ya dzrone hi leyi. 28 Kambe a vhanu lava va tsrhamaka ka dzrone va ni ntamu, nakone a madoropa yavu lawa ma tsrandzreliwiki hi mimuru i makulu. Hi vone ni Vaanaki kohala. 29 A tikweni dzra Negebu ku tsrhama Vaamaleki, a mugangeni wa tinhava ku tsrhama Vaheti, Vayebusi ni Vaamori nakone a kusuhi ni lwandle ni le nkingeni wa Yordani ku tsrhama Vakanana.”

30 Kalebe a zama ku zrulisa xitsrhungu lexi a xi yime mahlweni ka Moxe, a ku: “A hi tekeleni ku tlhantuka, hikusa nakunene hi nga va hlula hi va hi teka tiko.” 31 Kambe vavanuna lava a va fambe na yene va ku: “A hi nge tlhantuki hi ya lwa ni vhanu lava, hikusa va ni ntamu ku hi tlula.” 32 Va va va phikelela va nyika Vaisrayele ndzrava ya ku biha mayelanu ni tiko ledzri va dzri kambeliki, va ku: “A tiko ledzri hi yiki dzri kambela i tiko ledzri hahlulelaka lava tsrhamaka ka dzrone nakone vhanu hinkwavu lava hi va voniki kohala i swihotlovila. 33 Hi vone ni Manefilimi vana va Anaki, lava va nga va lixaka dzra Manefilimi, nakone loko hi tidzringanisa na vone a ho fana ni mintete, na vone a va hi vona hi ndlela yoleyo.”

14 Kutani a nhlengeletanu hinkwayu yi ba nkosi, yi tama yi dzrila ngopfu wusiku hinkwabyu. 2 A Vaisrayele hinkwavu va sungula ku ngurangurela Moxe na Aroni nakone a nhlengeletanu hinkwayu a yi va holovisa yi ku: “A swi ta va swi yampswile loko a he tifela Egipta kumbe a he tifela ka mananga lawa! 3 Ha yini Yehovha a hi buyise ka tiko ledzri akuva hi ta ta dlayiwa hi xipada? A vasati vezru ni vanezru va ta tekiwa hi valala. A swi yampswi hi tlheleleni Egipta?” 4 A va patsra ni ku byelana va ku: “A hi hlawuleni muzrangeli hi tlhelela Egipta!”

5 Xileswo Moxe na Aroni va khinsama va lavisa hansi na va li mahlweni ka Vaisrayele hinkwavu lava a va hlengeletanile. 6 Yoxuwa n’wana wa Nuni na Kalebe n’wana wa Yefune, lava a va li van’we va lava va yiki kambela tiko, va handzrula mpahla yavu 7 va va va byela nhlengeletanu hinkwayu ya Israyele va ku: “A tiko ledzri hi yiki dzri kambela i dzrinene ngopfu swinene. 8 Loko Yehovha a hi nyonxela, nakunene a ta yentxa leswaku hi nghena tikweni ledzro, a va a hi nyika dzrone. Tiko ledzri taliki ngopfu swinene hi leiti ni wulombe. 9 Kambe mi nga xandzrukeleni Yehovha nakone mi nga txhaveni vhanu va le tikweni ledzriyani, hikusa hi ta va hlula hi ku nabyala.* A va ha na xa ku va sizrelela nakone Yehovha a na hine. Mi nga va txhavi.”

10 Nambitanu a nhlengeletanu hinkwayu a yi hamba makungu ya ku va khandla hi mazribye. Kambe a tendeni dzra ntlhanganu ku va ni ku phatima ka Yehovha a mahlweni ka vhanu hinkwavu va Israyele.

11 Kutani Yehovha a byela Moxe a ku: “A vhanu lava va ta ni yeyisa ku ya tlhasa kwini nakone va ta pfumala lipfumelo kwanga ku ya tlhasa kwini nambileswi ni va kombiki mahlolana lawa hinkwawu? 12 Ni ta va ba hi ntungu ni va helisa, ni gama ni yentxa wene u va tiko ledzrikulu nakone dzri nga ni ntamu ku va tlula.”

13 Kambe Moxe a byela Yehovha a ku: “Phela a Vaegipta lava u humesiki vhanu lava a tikweni dzravu hi ntamu waku, va ta yi twa mhaka leyi 14 nakone va ta khanela hi yone mhaka leyi a tikweni dzravu. A Vaegipta va swi twile leswaku wene Yehovha u le makazri ka vhanu lava nakone ma vonana wuso hi wuso. Va twe leswaku u Yehovha ni leswaku a tlavi dzraku dzri le henhla ka vhanu lava. A nhlikanhini u va kongomisa hi ku tizrisa tlavi,* kasi a wusikwini u va kongomisa hi ku tizrisa ndzrilo.* 15 Loko wo tekela ku helisa vhanu lava, a matiko lawa ma yingeliki ndhuma yaku ma ta ku: 16 ‘Yehovha swi mu hlulile ku tlhasisa vhanu lava a tikweni ledzri a hlambanyiki ku va nyika dzrone, hi leswi swi yentxiki leswaku a va dlaya a mananga.’ 17 Kutani swoswi Yehovha, ni kombela u kombisa wukulu bya ntamu waku hi lani u dumbisiki ha kone loko u te: 18 ‘Hi mine Yehovha, lweyi a hlwelaka ku hlundzruka nakone a taliki hi lizrandzru dzra ku dumbeka, lweyi a dzrivalelaka xihoxo ni ku tlula nawu kambe wa ku a nge txhuki a tsrhika ku khatisa lweyi a nga ni nandzru, hikusa a ta khatisa vana, lixaka dzra wuzrazru ni dzra wumune, hi kola ka swihoxo swa vapapayi vavu.’ 19 Leswi u nga ni lizrandzru dzra ku dumbeka, ni kombela u va dzrivalela xihoxo xavu hi lani u va dzrivaleliki ha kone ku sukela a tikweni dzra Egipta ku ta tlhasa swoswi.”

20 Kutani Yehovha a ku: “Hi swone, na va dzrivalela hi lani u kombelaka ha kone. 21 Kambe leswi nakunene ni hanyaka, a tiko hinkwadzru dzri ta tala hi ku phatima ka Yehovha. 22 Nambitanu, a ku na mhunu ni mun’we lweyi a voniki ku phatima kwanga ni mahlolana lawa ni ma yentxiki a Egipta ni le mananga kambe a tama a ni dzringa ku dzringana 10 wa makhambi a va a nga yingiseti zritu dzranga, 23 lweyi a taka vona tiko ledzri ni dzri hlambanyeliki vapapayi vake. Ina, a ku na mhunu ni mun’we lweyi a ni yeyisaka lweyi a taka dzri vona. 24 Kambe leswi nandzra wanga Kalebe a kombisiki leswaku a hambanile na vone nakone a tamiki a ni landzrela hi mbilu yake hinkwayu, kunene ni ta yentxa leswaku yene ni lixaka dzrake va titekela tiko ledzri a yiki ka dzrone. 25 Leswi a Vaamaleki ni Vakanana va tsrhamaka a nkoveni, mundzruku mi fanela ku djika mi kongoma a mananga hi ndlela ya le Lwandle dzra ku Pshwuka.”

26 Hiloko Yehovha a byela Moxe na Aroni a ku: 27 “Xana nhlengeletanu leyi ya ku biha yi ta ni ngurangurela ku ya tlhasela kwini? Ni va twile Vaisrayele loko va ni ngurangurela. 28 Va byeli u ku: ‘“Nakunene leswi ni hanyaka”, ku hlaya Yehovha, “ni ta mi yentxa leswi ni mi twiki na mi swi hlaya! 29 Hinkwenu mi tsralisiwiki, ku sukela ka va 20 wa malembe ku ya henhla, n’wine mi ni ngurangureliki, a mintsrumbu yenu yi ta wela ka mananga lawa. 30 Handle ka Kalebe n’wana wa Yefune, na Yoxuwa n’wana wa Nuni, a nga kone ni mun’we kwenu lweyi a taka nghena tikweni ledzri ni hlambanyiki ku mi nyika dzrone akuva mi tsrhama ka dzrone.

31 “‘“Loko ku li vanenu, lava mi hlayiki leswaku va ta tekiwa hi valala, ni ta yentxa leswaku va nghena a tikweni ledzri n’wine mi dzri yaliki, vone va ta dzri tiva. 32 Kambe a mintsrumbu yenu yi ta wela ka mananga lawa. 33 A vana venu va ta va vabyisi a mananga ku dzringana 40 wa malembe, nakone va ta sindzriseka ku tihlamulela hi kola ka swiyentxo swenu swa ku kala ku dumbeka, ku ya tlhasa loko hinkwenu mi hela. 34 Mi ta tihlamulela hi kola ka swihoxo swenu ku dzringana 40 wa malembe, hi ku ya hi masiku lawa mi ma hetiki na mi kambela tiko, ku nga 40 wa wone, leswi liki, a siku dzrin’we i lembe dzrin’we, siku dzrin’we i lembe dzrin’we, akuva mi ta swi tiva leswaku swo yini ku ni fulazrela.*

35 “‘“Mine Yehovha, ni hlayile. Leswi hi leswi ni taka swi yentxa nhlengeletanu leyi hinkwayu ya ku biha, leyi tlhanganiki akuva yi lwisana na mine: Va ta helela ka mananga lawa nakone va ta fela kola. 36 A vavanuna lava Moxe a va zrumeliki ku ya kambela tiko, lava buyiki ni ndzrava ya ku biha mayelanu ni tiko ledzro va yentxa leswaku a nhlengeletanu hinkwayu yi mu ngurangurela, 37 ina, a vavanuna lava nyikeliki ndzrava ya ku biha mayelanu ni tiko, va ta khatisiwa va va va fa a mahlweni ka Yehovha. 38 Kambe Yoxuwa n’wana wa Nuni, na Kalebe n’wana wa Yefune, ku nga van’we va lava yiki kambela tiko, nakunene va ta tama va hanya.”’”

39 Loko Moxe a byela Vaisrayele hinkwavu mazritu lawa, a vhanu va xukuvala ngopfu swinene. 40 Handle ka leswo, va pfuka na ka ha li mpundzru na va ni nkongometo wa ku tlhantuka va ya mugangeni wa tinhava, na va ku: “Swoswi hi lulameli ku tlhantuka hi ya mbangwini lowu Yehovha a hi byeliki wone, hikusa hi dohile.” 41 Kambe Moxe a ku: “Ha yini mi tlula xileleto xa Yehovha? A swi nge ti famba ha hombe. 42 Mi nga tlhantuki, hikusa Yehovha a nga na n’wine, mi ta hluliwa hi valala venu. 43 Hikusa a Vaamaleki ni Vakanana va mi yimelile akuva va lwa na n’wine, xileswo va ta mi dlaya. Leswi mi tsrhikiki ku landzrela Yehovha, Yehovha a nge ti va na n’wine.”

44 Nambitasu, va tiwomise tinhloko va tlhantuka va ya mugangeni wa tinhava, kambe a areka dzra xipfumelelanu xa Yehovha a dzri sukanga a makazri ka mintxhatxha, na yene Moxe a nga sukanga. 45 Hiloko a Vaamaleki ni Vakanana lava a va tsrhama a mugangeni luwani wa tinhava va fulamela va va dlaya, va va hangalasa ku ya tlhasa a Horma.

15 Yehovha a ya mahlweni a byela na Moxe a ku: 2 “Byela Vaisrayele u ku: ‘Loko hi wugamu mi nghena a tikweni ledzri ni mi nyikaka dzrone akuva mi tsrhama ka dzrone, 3 kutani mi nyikela gandzrelo ledzri hiseliwaka Yehovha hi ndzrilo hi ku tizrisa tihomu, tihamba kumbe timbuti, ku nga ha va gandzrelo dzra ku hisiwa, gandzrelo dzra ku hetisisa xihlambanyu xa ku hlawuleka, gandzrelo dzra ku tizrandzrela kumbe gandzrelo ledzri nyikeliwaka hi nguva ya minkhuvu yenu, akuva dzri va nun’hwelo lowu nyonxisaka Yehovha, 4 lweyi a dzri nyikelaka ka Yehovha a fanela ku nyikela ni gandzrelo dzra tinhleke, kolomu ka kilu dzrin’we dzra mapa lamanene,* lawa ma patsriwiki ni mafuzra ya kolomu ka litru dzrin’we.* 5 U fanela ku nyikela ni kolomu ka litru dzra vhinyu swanga gandzrelo dzra swa ku nwa kun’we ni gandzrelo dzra ku hisiwa kumbe gandzrelo dzra xihambana xin’wana ni xin’wana xa xinuna. 6 Loko u nyikela hi hamba, u fanela ku nyikela ni gandzrelo dzra tinhleke dzra makilu mabidzri ya mapa lamanene, lawa ma patsriwiki ni mafuzra lawa ma tlulaka litru. 7 Nakone u fanela ku nyikela vhinyu dzra mpimu lowu tlulaka litru, swanga gandzrelo dzra swa ku nwa, nun’hwelo lowu nyonxisaka Yehovha.

8 “‘Kambe loko u nyikela homu ya xinuna ka Yehovha akuva yi va gandzrelo dzra ku hisiwa, gandzrelo dzra ku hetisisa xihlambanyu xa ku hlawuleka, kumbe magandzrelo ya ku kombela ku zrula, 9 a homu leyo u fanela ku yi nyikela ni gandzrelo dzra tinhleke dzra makilu mazrazru ya mapa lamanene, lawa ma patsriwiki ni mafuzra ya kolomu ka malitru mabidzri. 10 U fanela ku nyikela ni vhinyu dzra kolomu ka malitru mabidzri swanga gandzrelo dzra swa ku nwa, akuva swi va gandzrelo dzra ku hisiwa, nun’hwelo lowu nyonxisaka Yehovha. 11 Leswi hi leswi mi fanelaka ku swi yentxa ka homu yin’wana ni yin’wana ya xinuna, hamba yin’wana ni yin’wana ya xinuna, xihambana xin’wana ni xin’wana xa xinuna kumbe timbuti. 12 Swi nge na mhaka leswaku mi nyikela swihazri swingani, leswi hi leswi mi fanelaka ku swi yentxa ka xihazri ha xin’we, hi ku ya hi nhlayu ya swone. 13 Leswi hi leswi Muisrayele mun’wana ni mun’wana lweyi a nga xipswaliwa xa le Israyele a fanelaka ku dzri nyikelisa xiswone gandzrelo dzra ku hisiwa, swanga nun’hwelo lowu nyonxisaka Yehovha.

14 “‘Loko mhunu wa kukazri lweyi a tsrhamaka na n’wine lweyi a kalaka a nga li Muisrayele, kumbe mhunu wa kukazri lweyi a nga ni malembe manyingi na a tsrhama na n’wine, a nyikela gandzrelo dzra ku hisiwa swanga nun’hwelo lowu nyonxisaka Yehovha, na yene a fanela ku yentxisa xileswi na n’wine mi yentxisaka xiswone. 15 N’wine mi nga Vaisrayele kun’we ni lava va tsrhamaka na n’wine lava va nga liki Vaisrayele, mi ta va ni nawu wun’we. Wu ta va nawu wa hi lani ku nga helikiki a tinxakeni tenu hinkwatu. N’wine ni valuveli mi fanela ku fana a mahlweni ka Yehovha. 16 Ku fanela ku va ni nawu wun’we ni xiboho xin’we xa wuyavanyisi kwenu ni ka lava va tsrhamaka na n’wine swanga valuveli.’”

17 Yehovha a byela Moxe a ku: 18 “Byela Vaisrayele u ku: ‘Loko mi nghena tikweni ledzri ni mi yisaka ka dzrone 19 mi va mi da swakuda swa le tikweni ledzro, mi fanela ku nyika Yehovha xihanano xa kukazri. 20 Mi fanela ku nyikela tinhleke leti kalaka ti nga kandzrekanga ha hombe ta ntsrhovelo wenu wa ku sungula, mi hamba mapawu lawa ma fanaka ni xitlan’wana, mi swi nyikela hi lani mi yentxaka ha kone ka swihanano swa le mbangwini wa ku hehezrela ka wone. 21 A tinxakeni tenu hinkwatu, mi fanela ku nyika Yehovha tinhleke leti kalaka ti nga kandzrekanga ha hombe ta ntsrhovelo wenu wa ku sungula.

22 “‘Loko mo yentxa xihoxo xa kukazri nakone mi tsrhika ku yingiseta swileleto leswi hinkwaswu, leswi Yehovha a swi byeliki Moxe, 23 leswi liki, milawu hinkwayu leyi Yehovha a mi nyikiki yone hi ku tizrisa Moxe, ku sukela hi siku ledzri Yehovha a mi leletiki ha dzrone ku ya tlhasa a tinxakeni tenu hinkwatu, 24 ni loko leswo swe yentxiwa hi mphazamu nakone a nhlengeletanu yi nga swi tivi, a nhlengeletanu hinkwayu yi fanela ku nyikela xihon’wana swanga gandzrelo dzra ku hisiwa akuva xi va nun’hwelo lowu nyonxisaka Yehovha, xi nyikeliwa kun’we ni magandzrelo lawa ma nyikeliwaka na xone, ku nga gandzrelo dzra tinhleke ni gandzrelo dzra swa ku nwa, hi lani swi tolovelaka ku yentxiwa ha kone, ku nyikeliwa ni ximbutana swanga gandzrelo dzra xidoho. 25 A muprista a ta kombelela nhlengeletanu hinkwayu ya Israyele ku dzrivaleliwa, kutani yi ta dzrivaleliwa, hikusa ku ve mphazamu, nakone va buyise xihanano xavu ka Yehovha hi kola ka mphazamu wavu, ku nga gandzrelo ledzri hiseliwaka Yehovha hi ndzrilo ni gandzrelo dzra xidoho. 26 A Vaisrayele hinkwavu kun’we ni valuveli lava tsrhamaka na vone va ta dzrivaleliwa hikusa hinkwavu va swi yentxe hi mphazamu.

27 “‘Loko mhunu wa kukazri o txhuka a doha hi mphazamu, a fanela ku nyikela mbuti ya pswele leyi yo ko va ni lembe dzrin’we akuva yi va gandzrelo dzra xidoho. 28 A muprista a ta kombelela mhunu lweyo ku dzrivaleliwa hi kola ka xidoho lexi a xi yentxeliki Yehovha hi mphazamu; a ta mu kombelela ku dzrivaleliwa, xileswo a ta dzrivaleliwa. 29 Mayelanu ni loko mhunu a txhuka a doha hi mphazamu, ku fanela ku va ni nawu wun’we ka Muisrayele wa mapswaliwa ni le ka mhunu lweyi a hanyaka na vone swanga muluveli.

30 “‘Kambe mhunu lweyi a dohaka hi maxivomu, ku nga ha va Muisrayele wa mapswaliwa kumbe mhunu lweyi a nga muluveli, a va na a zruka Yehovha nakone a fanela ku dlayiwa. 31 Leswi a yeyisiki zritu dzra Yehovha a va a honisa nawu wake, mhunu yelweyo nakunene a fanela ku dlayiwa. A fanela ku tihlamulela hi kola ka xihoxo xake.’”

32 Na Vaisrayele va ha li mananga, va ke va kuma wanuna wa kukazri na a zrolela tihunyi hi siku dzra Savata. 33 Lava va mu kumiki na a zrolela tihunyi va mu teke va mu yisa ka Moxe na Aroni ni le ka nhlengeletanu hinkwayu. 34 Kutani va mu pfalela, hikusa a va nge si na swi tiva leswaku a fanela ku yentxiwa yini.

35 Hiloko Yehovha a byela Moxe a ku: “Wanuna lweyo nakunene a fanela ku dlayiwa, a nhlengeletanu hinkwayu yi fanela ku mu khandla hi mazribye a handle ka mbangu lowu ku dzimiwiki ka wone mintxhatxha.” 36 Xileswo, a nhlengeletanu hinkwayu yi mu humesa handle ka mbangu lowu ku dzimiwiki ka wone mintxhatxha yi va yi mu khandla hi mazribye a fa, hi lani Yehovha a a lelete Moxe ha kone.

37 Yehovha a byela Moxe a ku: 38 “Byela Vaisrayele leswaku va fanela ku tihambela matxhakala a wugan’wini bya le hansi bya mpahla yavu a tinxakeni tavu hinkwatu, nakone va fanela ku zrungela ngoti ya nkuxe* a henhlanyana ka matxhakala wolawo. 39 ‘Mi fanela ku hamba matxhakala lawo akuva mi hamba mi ma vona mi va mi dzrimuka milawu hinkwayu ya Yehovha mi tlhela mi yi landzra. A mi fanelanga mi landzrela ku navela ka timbilu tenu ni ka matihlo yenu, loku ku mi yentxaka mi nga dumbeki kwanga.* 40 A nawu lowu wu ta mi pfuna ku dzrimuka milawu yanga hinkwayu, kutani mi va lava xwengiki ka Xikwembu Nkulukumba. 41 Hi mine Yehovha Xikwembu Nkulukumba wenu, lweyi a mi humesiki tikweni dzra Egipta, akuva ni tiyisekisa leswaku ni Xikwembu Nkulukumba wenu. Hi mine Yehovha, Xikwembu Nkulukumba wenu.’”

16 Kutani Kora n’wana wa Izihari, n’wana wa Kohati, n’wana wa Levhi, a tipatsra na Dathani na Abiramu vana va Eliyabi, na Oni n’wana wa Pelethi, lava a va li va lixaka dzra Rubeni. 2 Vone kun’we ni 250 wa vavanuna lava va nga Vaisrayele, vavanuna lava va hlawuliwiki makazri ka nhlengeletanu akuva va va vazrangeli va yone nakone va nga vavanuna va ndhuma, va sungula ku holovela Moxe. 3 Va hlengeletana va holovisa Moxe na Aroni va ku: “Hi kazralile ha n’wine! A nhlengeletanu hinkwayu yi xwengile, hinkwavu lava va nga ka yone, nakone Yehovha a na vone. Ha yini n’wine mi tikulisa a mahlweni ka nhlengeletanu ya Yehovha?”

4 Loko Moxe a twa leswo, a tekela ku khinsama a lavisa hansi. 5 A gama a byela Kora ni hinkwavu lava yimaka na yene a ku: “Mundzruku mixweni Yehovha a ta kombisa leswaku i mani lweyi a mu lumbaka, i mani lweyi a xwengiki nakone i mani lweyi a fanelaka ku tsrhindzrekela kwake, kutani lweyi a taka mu hlawula hi yene lweyi a taka tsrhindzrekela kwake. 6 Wene Kora ni hinkwavu lava yimaka na wene yentxani leswi: Tekani swa ku hisela ka swone muzri wa ku nun’hwela, 7 kutani mundzruku mi txhela ndzrilo* ni muzri wa ku nun’hwela mi ya yima mahlweni ka Yehovha; lweyi Yehovha a taka mu hlawula, hi yene lweyi a xwengiki. Mi tlulise mpimu n’wine vana va Levhi!”

8 Ntsrhaku ka leswo, Moxe a byela Kora a ku: “N’wine vana va Levhi, ni kombela mi yingiseta. 9 Xikwembu Nkulukumba wa Israyele a mi hlawulile a makazri ka nhlengeletanu ya Israyele a va a mi pfumelela kuva mi tsrhindzrekela kwake akuva mi hamba ntizro a tabernakeleni dzra Yehovha ni leswaku mi yima a mahlweni ka Vaisrayele akuva mi va tizrela, mi swi vona swi li switsrongo leswo? 10 Xikwembu Nkulukumba a yentxe leswaku u tsrhindzrekela kwake kun’we ni vamakwenu hinkwavu, ku nga vana va Levhi. Swoswi mi djula ni ku va vaprista? 11 Leswo swi kombisa leswaku, wene ni hinkwavu lava yimaka na wene, lava mi hlengeletaniki, mi lwisana na Yehovha. Loko ku li Aroni, e hona yini a ku za mi mu ngurangurela?”

12 Hi ku famba ka nkama Moxe a zrumela leswaku ku vitaniwa Dathani na Abiramu vana va Eliyabi, kambe va ku: “A hi nge ti ya! 13 U li i switsrongo ku va u hi suse tikweni ledzri taliki ngopfu swinene hi leiti ni wulombe akuva u hi tsrhika hi fa lani mananga, swoswi u djula ni ku hi fuma? 14 A mhaka hi leswaku, a wu hi buyisanga a tikweni ledzri taliki ngopfu swinene hi leiti ni wulombe, nambi ku hi nyika masimu kumbe minsinya ya mawuvha akuva swi va pfindla dzrezru. U djula leswaku vavanuna lava va landzrelela wene ingiki hi loko ve fa matihlo? A hi nge ti ya!”

15 Xileswo, Moxe a hlundzruka ngopfu swinene a va a byela Yehovha a ku: “U nga dzri yamukeli gandzrelo dzravu dzra tinhleke. A ni va tekelanga ntxhumu nambi ko va mbongolo yinene, nakone a ni zanga ni yentxela wubihi ni mun’we kwavu.”

16 Xileswo, Moxe a byela Kora a ku: “Mundzruku buyani mi ta yima mahlweni ka Yehovha, wene ni hinkwavu lava ku seketelaka, kun’we na Aroni. 17 Mun’wana ni mun’wana wenu a a titekeli xa ku txhela ka xone muzri wa ku nun’hwela a txhela muzri wa ku nun’hwela, a ya yima mahlweni ka Yehovha. Lava va ku seketelaka va fanela ku va ni 250 wa swa ku txhela ka swone muzri wa ku nun’hwela. Na wene kun’we na Aroni, mun’wana ni mun’wana wenu a fanela ku va ni xa ku txhela ka xone muzri wa ku nun’hwela.” 18 Xileswo mun’wana ni mun’wana wavu a teke xa ku txhela ka xone muzri wa ku nun’hwela, kutani va txhela ndzrilo va va va txhela muzri wa ku nun’hwela va ya yima a nyangweni wa tende dzra ntlhanganu na va li kun’we na Moxe na Aroni. 19 Loko Kora ni lava va yimaka na yene va hlengeletanile a nyangweni wa tende dzra ntlhanganu akuva va lwisana na Moxe na Aroni, a ku phatima ka Yehovha ku humelela henhla ka nhlengeletanu hinkwayu.

20 Hiloko Yehovha a byela Moxe na Aroni a ku: 21 “Titsravukanisani ni ntlawa lowu akuva ni wu helisa swoswi.” 22 Xileswo, va khinsama va lavisa hansi va ku: “Xikwembu Nkulukumba, Xikwembu Nkulukumba, wene u nyikaka wutomi vhanu hinkwavu,* xana u ta hlundzrukela nhlengeletanu hinkwayu hi mhaka ya xidoho xa mhunu mun’we?”

23 Yehovha a byela Moxe a ku: 24 “Byela nhlengeletanu hinkwayu u ku: ‘Tsrhindzrekani kule ni mintxhatxha ya Kora, Dathani na Abiramu!’”

25 Kutani Moxe a suka a yela Dathani na Abiramu na a li kun’we ni vakulukumba va Israyele. 26 Moxe a byela nhlengeletanu a ku: “Ni kombela mi tsrhindzreka kule ni mintxhatxha ya vavanuna lava va ku biha nakone mi nga khumbi ntxhumu ni wun’we lowu wu va lumbaka, akuva mi nga helisiwi hi kola ka xidoho xavu.” 27 Hiloko va tsrhindzreka va ya kule ni mintxhatxha ya Kora, Dathani na Abiramu. Kutani Dathani na Abiramu va huma va yima tinyangweni ta mintxhatxha yavu, na va li kun’we ni vasati vavu, vanavu kun’we ni swivanana swavu.

28 Hiloko Moxe a ku: “Hi ndlela leyi, mi ta swi tiva leswaku i Yehovha lweyi a ni zrumiki ku yentxa mintxhumu leyi hinkwayu ni leswaku a no yi yentxa hi ku tisungulela: 29 Loko vhanu lava vo fa hi ndlela leyi tolovelekiki hi lani vhanu van’wana hinkwavu va faka ha kone, ni loko vo khatisiwa hi ndlela leyi vhanu van’wana hinkwavu va khatisiwaka ha yone, a hi Yehovha a ni zrumeliki. 30 Kambe loko Yehovha o va yentxa ntxhumu wa ku hlamalisa, a misava yi pfuleka yi va minta vone kun’we ni mintxhumu hinkwayu leyi yi va lumbaka, kutani va fulamela Sizreni na va hanya, nakunene mi ta swi tiva leswaku vhanu lava va yeyise Yehovha.”

31 Na a ha ku gama ku hlaya mazritu lawo, lani a va yime kone a misava yi sungula ku pandzreka. 32 A misava yi pfuleka yi va minta kun’we ni mindangu yavu, hinkwavu lava yimiki na Kora ku patsra ni mintxhumu yake hinkwayu. 33 Hi ndlela leyo, hinkwavu lava a yimiki na vone va fulamele Sizreni na va ha hanya yi va misava yi va mbhonya va nyamalala a makazri ka nhlengeletanu. 34 Loko va va twa na va ba nyandha, a Vaisrayele hinkwavu lava a va li matlhelweni kwavu va tsrutsruma na va ku: “Hi txhava leswaku na hine hi nga mintiwa hi misava!” 35 Hiloko ku humelela ndzrilo lowu pfaka hi ka Yehovha wu dlaya 250 wa vavanuna lava a va nyikela muzri wa ku nun’hwela.

36 Kutani Yehovha a byela Moxe a ku: 37 “Byela Eliyazari n’wana wa muprista Aroni leswaku a susa swa ku hisela ka swone muzri wa ku nun’hwela a ndzrilweni hikusa swi xwengile. Mu byeli ni leswaku a teka nkuma a ya wu hangalasa kule ni lahayani. 38 A swa ku hisela ka swone muzri wa ku nun’hwela swa vavanuna lava dohiki, lava hakeliki hi wutomi byavu, swi fanela ku hambiwa swixapana swi va swi namaketiwa a altarini, hikusa swi yisiwe mahlweni ka Yehovha kutani swi va leswi xwengiki. Swi ta tizra swanga xidzrimuxo ka Vaisrayele.” 39 Kutani muprista Eliyazari a teka swa ku hisela ka swone muzri wa ku nun’hwela swa kobri leswi nyikeliwiki hi lava hisiwiki, a hamba hi swone swixapana akuva swi namaketiwa ka altari, 40 hi lani Yehovha a a mu lelete ha kone hi ku tizrisa Moxe. A swixapana leswo a swi tizra swanga xidzrimuxo ka Vaisrayele xa leswaku a ku na mhunu lweyi a kalaka a nga pfumeleliwanga, lweyi a nga liki wa lixaka dzra Aroni, a fanelaka ku tsrhindzrekela akuva a hisa muzri wa ku nun’hwela a mahlweni ka Yehovha, ni leswaku a ku na mhunu lweyi a fanelaka ku fana na Kora ni lava a va yima na yene.

41 Hi mundzruku ka kone, a nhlengeletanu hinkwayu ya Israyele yi sungula ku ngurangurela Moxe na Aroni yi ku: “Hi n’wine vabidzri mi yentxiki leswaku vhanu va Yehovha va dlayiwa.” 42 Nkama lowu vhanu va ha hlengeletaniki akuva va holovisa Moxe na Aroni, va lavisa tende dzra ntlhanganu, va vona leswaku dzri funeketiwi hi tlavi, kutani ku sungula ku humelela ku phatima ka Yehovha.

43 Hiloko Moxe na Aroni va ya a mahlweni ka tende dzra ntlhanganu, 44 kutani Yehovha a byela Moxe a ku: 45 “Sukani makazri ka nhlengeletanu leyi akuva ni tekela ku yi helisa.” Loko va twa leswo, va khinsama va lavisa hansi. 46 Moxe a byela Aroni a ku: “Teka xa ku hisela ka xone muzri wa ku nun’hwela u va u txhela makhala ya ndzrilo lawa ma nga altarini, ni muzri wa ku nun’hwela, u kahlula u ya nhlengeletan’wini u ya yi kombelela ku dzrivaleliwa, hikusa Yehovha a yi kwatelile. Ku sungule ntungu!” 47 Aroni a tekela ku teka xa ku txhela muzri wa ku nun’hwela, hi lani Moxe a mu byeliki ha kone, a tsrutsruma a ya xikazri ka nhlengeletanu. Loko a tlhasa, a kuma leswaku ntungu kutani a wu sungulile. Xileswo, a txhela muzri wa ku nun’hwela ka xa ku hisela ka xone muzri wa ku nun’hwela a va a sungula ku kombelela vhanu ku dzrivaleliwa. 48 A tlhasa a yima makazri ka lava ku fa ni lava ku hanya, hi wugamu a ntungu wu yima. 49 Lava va fiki hi mhaka ya ntungu ku ve 14.700, na ku nga kontiwi lava va fiki hi mhaka ya Kora. 50 Nkama lowu Aroni a tlheleliki ka Moxe a mahlweni ka tende dzra ntlhanganu, a ntungu kutani a wu yimile.

17 Yehovha a byela Moxe a ku: 2 “Byela Vaisrayele leswaku ka lixaka dzrin’wana ni dzrin’wana a va buyisi nhonga ya muzrangeli wa lixaka dzroledzro, leswi liki, 12 wa tinhonga. Ka nhonga yin’wana ni yin’wana tsrala vito dzra n’winyi wa yone. 3 U fanela ku tsrala vito dzra Aroni ka nhonga ya lixaka dzra Levhi, hikusa a muzrangeli wa lixaka ha dzrin’we o va ni nhonga yin’we. 4 Bekani tinhonga leto a tendeni dzra ntlhanganu a mahlweni ka Areka dzra Wumboni, lani nkama ni nkama ni humelelaka kone kwenu. 5 A nhonga ya wanuna lweyi ni taka mu hlawula yi ta huma swiluva. Hi ndlela leyo, a Vaisrayele va ta tsrhika ku ngurangurela mine na n’wine.”

6 Xileswo Moxe a byela Vaisrayele. Kutani a vazrangeli hinkwavu va mu nyika tinhonga, ku heleketiwa nhonga ya muzrangeli wa lixaka ha dzrin’we, leswi liki, 12 wa tinhonga. Ni nhonga ya Aroni a yi li ka tinhonga toleto. 7 Moxe a teka tinhonga leto a ti beka a mahlweni ka Yehovha a tendeni dzra Wumboni.

8 Hi mundzruku ka kone, Moxe a nghena a tendeni dzra Wumboni kutani a vona leswaku a nhonga ya Aroni, leyi a yi lumba lixaka dzra Levhi, a yi hlukile yi tlhela yi va ni swiluva swa ku baleka ni swa ku kala swi nga balekanga, ni mamendwa ya ku wupfa. 9 Moxe a humesa tinhonga hinkwatu leti a ti li mahlweni ka Yehovha a ya na tone a mahlweni ka Vaisrayele hinkwavu. Hiloko va ti lavisisa, mun’wana ni mun’wana a titekela yake.

10 Yehovha a byela Moxe a ku: “Tlhelisa nhonga ya Aroni u ya yi beka a mahlweni ka Areka dzra Wumboni akuva yi bekisiwa leswaku yi va xidzrimuxo ka lava va djulaka ku xandzruka, leswaku va tsrhika ku ni ngurangurela ku yentxela leswaku va nga fi.” 11 Moxe a tekela ku yentxa leswi Yehovha a mu byeliki swone. A yentxise xiswoswo.

12 A Vaisrayele va byela Moxe va ku: “Swoswi hi ta fa, nakunene hi ta helisiwa, hinkwezru hi helile! 13 Mun’wana ni mun’wana lweyi a taka tsrhindzrekela a tabernakeleni dzra Yehovha a ta fa! Xana hinkwezru hi ta fisa xileswi?”

18 Hiloko Yehovha a byela Aroni a ku: “Loko ko txhuka ku va ni xihoxo lexi nyamisaka mbangu wa ku xwenga, wene, vanaku kun’we ni lixaka dzraku mi ta tihlamulela hi kola ka xihoxo lexo nakone wene kun’we ni vanaku mi ta tihlamulela loko ko txhuka ku honisiwa nawu wa kukazri ka ntizro wenu wa wuprista. 2 Vitana ni vamakwenu lava va nga va lixaka dzra Levhi, ku nga lixaka dzra vakokwana vaku, akuva va tipatsra na wene va ku seketela kun’we ni vanaku a mahlweni ka tende dzra Wumboni. 3 Va ta hetisisa wutiyanguleli lebyi u va yaveliki byone ni ku yentxa mintizro hinkwayu a tendeni. Kambe a va fanelanga va tsrhindzrekelela swibya swa le mbangwini wa ku xwenga ni altari, akuva vone kumbe n’wine mi nga fi. 4 Va ta tipatsra na wene va hetisisa wutiyanguleli byavu lebyi fambisanaka ni tende dzra ntlhanganu ni mintizro hinkwayu ya le tendeni, nakone a ku na mhunu lweyi a kalaka a nga pfumeleliwanga* lweyi a fanelaka ku mi tsrhindzrekelela. 5 Mi fanela ku hetisisa wutiyanguleli byenu mayelanu ni mbangu wa ku xwenga ni altari, akuva ni nga ha tlheli ni kwatela vhanu va Israyele. 6 Mine ha wuswanga ni hlawule vamakwenu, ku nga Valevhi, a xikazri ka Vaisrayele akuva ni mi hanana vone. Va nyikeliwe ka Yehovha akuva va yentxa ntizro wa le tendeni dzra ntlhanganu. 7 Wene ni vanaku mi ni wutiyanguleli ka mintizro ya wuprista leyi fambisanaka ni altari ni mbangu wa ku xwengisisa,* mi fanela ku yentxa ntizro lowo. Ni mi nyike ntizro wa wuprista swanga xihanano, nakone mhunu mun’wana ni mun’wana lweyi a tsrhindzrekelaka nakasi a nga pfumeleliwanga a fanela ku dlayiwa.”

8 Yehovha a ya mahlweni a vulavula na Aroni a ku: “Mine ha wuswanga ni ku beke akuva u vonelela swihanano leswi ni nyikiwaka swone. Ni nyike wene ni vanaku xiyenge xin’we ka mintxhumu hinkwayu ya ku xwenga leyi nyikeliwaka hi Vaisrayele. Lowu i nawu wa hi lani ku nga helikiki. 9 Ka magandzrelo ya ku hisiwa ya ku xwengisisa, leswi swi taka va swaku hi leswi: Magandzrelo hinkwawu lawa va ma hambaka, ku patsra ni magandzrelo ya tinhleke, magandzrelo ya xidoho ni magandzrelo ya nandzru lawa va ni tiselaka wone. A magandzrelo lawo ma xwenge ngopfu nakone ma lumba wene ni vanaku. 10 U fanela ku ma dela a mbangwini wa ku xwengisisa. A va xinuna hinkwavu va nga ma da. Ma ta va lawa ma xwengiki kwaku. 11 Swin’wana leswi swi ku lumbaka hi leswi: Swihanano leswi Vaisrayele va swi nyikelaka ku patsra ni magandzrelo hinkwawu lawa ma zrendzrelekisiwaka. Ni ku nyika swone, wene, vanaku va xinuna ni vanaku va xisati. Lowu i nawu wa hi lani ku nga helikiki. A kaya kwaku mun’wana ni mun’wana lweyi a basiki a nga da.

12 “Ni ku nyika mihandzru yavu ya ku sungula leyi va yi nyikaka Yehovha, ku nga mafuzra hinkwawu ya manene ya kone, vhinyu hinkwadzru dzra dzrinene dzra kone ni tinhleke hinkwatu letinene ta kone. 13 A mihandzru hinkwayu ya le tikweni dzravu leyi zrangaka yi wupfa, leyi va yi tiselaka Yehovha, yi ta va yaku. A kaya kwaku mun’wana ni mun’wana lweyi a basiki a nga da.

14 “Ntxhumu wun’wana ni wun’wana lowu nyikeliwiki ka Xikwembu Nkulukumba a Israyele, wu fanela ku va waku.

15 “A mativula hinkwawu ya vhanu ni ya swihazri, lawa va taka ma nyikela ka Yehovha, ma fanela ku va yaku. Nambitanu, u fanela ku pfumela leswaku mativula ya vhanu ni ya swihazri leswi kalaka swi nga basanga ma tizruliwa. 16 U fanela ku pfumela leswaku ma tizruliwa loko kutani ma ni hweti kumbe ku tlula na ma pswaliwile, hi ntsrengo lowu koxiwaka wa ku tizrula, ku nga ntlhanu wa maxekele* ya prata, hi ku ya hi mpimu wa xekele lowu tizrisiwaka a mbangwini wa ku xwenga.* A xekele dzrin’we dzri dzringana 20 wa magera.* 17 Ko va ntsena mativula ya homu ya xinuna, ya hamba ya xinuna ni ya xiphongo, lawa u kalaka u nga fanelanga ku pfumela leswaku ma tizruliwa. Wone ma xwengile. U fanela ku xwanya ngati ya wone a altarini, nakone a fuzra dzra wone u fanela ku dzri hisa dzri mpukuka swanga gandzrelo dzra ku hisiwa, dzri va nun’hwelo lowu nyonxisaka Yehovha. 18 A nyama ya swihazri leswo yi fanela ku va yaku. Ku patsra ni xifuva xa gandzrelo ledzri zrendzrelekisiwaka, ni nenge wa xinene. 19 A minyikelo hinkwayu ya ku xwenga leyi Vaisrayele va yi nyikaka Yehovha ni yi nyika wene, vanaku va xinuna ni vanaku va xisati. Lowu i nawu wa hi lani ku nga helikiki. I xipfumelelanu xa munyu xa hi lani ku nga helikiki* lexi Yehovha a xi yentxaka na wene ni vatukulu vaku.”

20 Yehovha a ya mahlweni a byela Aroni a ku: “A tikweni dzravu a u nge ti va ni pfindla, nambi xiyengenyana xa dzrone. Mine ni pfindla dzraku a makazri ka Vaisrayele.

21 “Wa swi twa, a swiyenge hinkwaswu swa wu 10* a Israyele, ni swi nyika vana va Levhi swanga pfindla dzravu hi mhaka ya ntizro lowu va wu yentxaka, ku nga ntizro wa le tendeni dzra ntlhanganu. 22 A Vaisrayele a va ha fanelanga va tsrhindzrekela a tendeni dzra ntlhanganu, hikusa va nga tivangela xidoho va va va fa. 23 A Valevhi hi vone va fanelaka ku yentxa ntizro wa le tendeni dzra ntlhanganu nakone loko ko txhuka ku honiwa ntxhumu wa kukazri hi vone va taka hlamula. Lowu i nawu wa hi lani ku nga helikiki a tinxakeni tenu hinkwatu. A Valevhi a va fanelanga va va ni pfindla a xikazri ka Vaisrayele. 24 Hikusa swanga pfindla dzravu ni va nyika xiyenge xa wu 10 lexi Vaisrayele va xi nyikelaka ka Yehovha. Hi leswo swi yentxiki ni ku: ‘A va fanelanga va va ni pfindla a xikazri ka Vaisrayele.’”

25 Ntsrhaku ka leswo Yehovha a byela Moxe a ku: 26 “U fanela ku byela Valevhi u ku: ‘Mi ta yamukela swiyenge swa wu 10 ka Vaisrayele, ku nga leswi ni mi nyikaka swone swanga pfindla dzrenu, kutani mi ta teka swiyenge swa wu 10 swa swone mi swi nyika Yehovha. 27 Swi ta voniwa swi li swihanano swenu, swanga tinhleke ta le mbangwini wenu wa ku hehezrela ka wone kumbe ntsrhovelo wunyingi wa le mbangwini wenu wa ku pfuvela ka wone vhinyu kumbe mafuzra. 28 Hi ndlela leyi, mi ta va na mi nyika Yehovha swa kukazri ka swiyenge hinkwaswu swa wu 10 leswi mi swi yamukelaka ka Vaisrayele. A swiyenge leswo swa wu 10 leswi mi swi nyikelaka ka Yehovha mi fanela ku swi nyika Aroni. 29 Mi ta nyika Yehovha mintxhumu ya ku siyanasiyana, mi pambula xiyenge xa lisima xa kone ka swihanano hinkwaswu leswi mi nyikiwiki swone. I ntxhumu lowu xwengiki.’

30 “Va byeli ni leswi: ‘N’wine Valevhi, loko kutani mi nyikelile leswinene swa kone, leswi swi salaka mi ta swi vona swanga mihandzru ya le mbangwini wenu wa ku hehezrela ka wone ni mihandzru ya le mbangwini wenu wa ku pfuvela ka wone vhinyu kumbe mafuzra. 31 N’wine ni mindangu yenu mi nga swi dela a mbangwini wun’wana ni wun’wana, hikusa i muholo wenu hi kola ka ntizro lowu mi wu yentxaka a tendeni dzra ntlhanganu. 32 Loko mi nyikela mintxhumu leyinene ya kone ka swihanano leswo, a mi nge ti tivangela xidoho a mhakeni leyi. Mi nga txhuki mi nyamisa mintxhumu ya ku xwenga ya Vaisrayele, hikusa mi nga fa.’”

19 Yehovha a ya mahlweni a byela Moxe na Aroni a ku: 2 “A nawu lowu mine Yehovha ni wu nyikelaka hi lowu: ‘Byela Vaisrayele leswaku va ku buyisela homu ya pswele ya ku pshwuka leyi hanyiki ha hombe, yi kalaka yi nga limalanga nakone yi kalaka yi ngi ngi sama yi tizrisiwa. 3 Mi fanela ku yi nyikela ka muprista Eliyazari; a ta huma na yone a handle ka mbangu lowu ku dzimiwiki ka wone mintxhatxha yi va yi dlayiwa mahlweni kwake. 4 Ntsrhaku ka leswo, muprista Eliyazari a ta peta litiho dzrake ka ngati ya yone a va a yi xwanya ku dzringana 7 wa makhambi a mahlweni ka nyangwa wa tende dzra ntlhanganu. 5 A homu ya kone yi ta gama yi hisiwa a mahlweni kwake. A xikhumba xa yone, nyama ya yone, ngati ni nswanyu wa yone swi ta hisiwa. 6 A muprista a ta teka lihunyi dzra nkedari, xiphundla xa hisopa ni ngoti ya ku pshwuka a va a swi txukumetela ka ndzrilo lowu a homu yi hiseliwaka ka wone. 7 A muprista a ta gama a hlampswa mpahla yake a va a hlamba; ntsrhaku ka leswo a nga nghena a nxaxeni, kambe a ta tama a va lweyi a nyamiki ku ya tlhasa madambyeni.

8 “‘Lweyi a hisiki homu a ta hlampswa mpahla yake a va a hlamba, nakone a ta tama a va lweyi a nyamiki ku ya tlhasa madambyeni.

9 “‘Mhunu lweyi a kalaka a nga nyamanga a ta wola nkuma wa homu yoleyo a wu txhela handle ka mbangu lowu ku dzimiwiki ka wone mintxhatxha, a mbangwini lowu basiki, nakone wu fanela ku hlayisiwa hi nhlengeletanu ya Israyele akuva wu ta patsriwa ni mati lawa ku taka basisiwa ha wone. I gandzrelo dzra xidoho. 10 Lweyi a taka wola nkuma wa homu yoleyo a ta hlampswa mpahla yake nakone a ta va lweyi a nyamiki ku ya tlhasa madambyeni.

“‘Lowu wu ta va nawu wa hi lani ku nga helikiki ka Vaisrayele ni ka lava va tsrhamaka na vone lava va kalaka va nga li Vaisrayele. 11 Lweyi a khumbaka ntsrumbu wa mhunu a ta va lweyi a nyamiki ku dzringana 7 wa masiku. 12 Hi siku dzra wuzrazru, mhunu lweyo a fanela ku tibasisa hi mati ya ku tibasisa ha wone, kutani hi siku dzra wu 7 a ta va na a basile. Kambe loko a nga tibasisi hi siku dzra wuzrazru, hi siku dzra wu 7 a ta va na a nga basanga. 13 Mun’wana ni mun’wana lweyi a khumbaka ntsrumbu wa mhunu a va a nga tibasisi, a ta va na a nyamisa tabernakela dzra Yehovha nakone a fanela ku dlayiwa a Israyele. Leswi a kalaka a nga xwanyiwanga mati ya ku tibasisa ha wone, a tama a va lweyi a nyamiki.

14 “‘Hi lowu nawu mayelanu ni loko ko txhuka ku fa mhunu a tendeni: Lweyi a nghenaka tendeni dzroledzro kumbe lweyi a vaka na a li tendeni dzroledzro, a ta va lweyi a nyamiki ku dzringana 7 wa masiku. 15 Xibya xin’wana ni xin’wana lexi taka va na xi nga mbhonyiwanga kumbe lexi taka va na xi nga mbhonyiwanga ha hombe, xi ta va lexi nyamiki. 16 Mun’wana ni mun’wana lweyi a khumbaka mhunu lweyi a dlayiwiki hi xipada, ntsrumbu, zrambu dzra mhunu kumbe sizra a handle ka mbangu lowu ku dzimiwiki ka wone mintxhatxha, a ta va lweyi a nyamiki ku dzringana 7 wa masiku. 17 Akuva ku basisiwa mhunu lweyo, ku fanela kuva ku tekiwa nkumanyana wa gandzrelo dzra xidoho ledzri hisiwiki wu txheliwa ka xibya ku gama ku txheliwa mati lawa ma kiwiki xihloveni. 18 Kutani a mhunu lweyi a basiki a ta teka xiphundla xa hisopa a xi peta ka mati lawo a va a xwanya tende, swibya hinkwaswu leswi nga ka dzrone, vhanu hinkwavu lava a va li ka dzrone, a xwanya ni lweyi a khumbiki zrambu, a khumbiki mhunu lweyi a dlayiwiki, a khumbiki ntsrumbu kumbe sizra. 19 Hi siku dzra wuzrazru ni hi siku dzra wu 7, a mhunu lweyi a basiki a ta xwanya mati mhunu lweyi a nyamiki; nakone hi siku dzra wu 7 a ta mu basisa ka xidoho. Kutani lweyi a nyamiki a fanela ku hlampswa mpahla yake a va a hlamba, xileswo a madambyeni ka kone a ta va lweyi a basiki.

20 “‘Kambe a mhunu lweyi a nyamiki a va a nga tibasisi a fanela ku dlayiwa,* hikusa a nyamise mbangu wa ku xwenga wa Yehovha. A nyamile hikusa a nga xwanyiwanga mati ya ku tibasisa ha wone.

21 “‘Hi lowu nawu lowu taka va wa hi lani ku nga helikiki ka vhanu va Israyele: Lweyi a xwanyaka mati ya ku tibasisa ha wone a fanela ku hlampswa mpahla yake, nakone lweyi a khumbaka mati ya ku tibasisa ha wone, a ta va lweyi a nyamiki ku ya tlhasa madambyeni. 22 Ntxhumu wun’wana ni wun’wana lowu khumbiwaka hi mhunu lweyi a nyamiki wu ta va lowu nyamiki, nakone lweyi a txhukaka a khumba ntxhumu wolowo, a ta va lweyi a nyamiki ku ya tlhasa madambyeni.’”

20 Hi hweti ya ku sungula, a nhlengeletanu hinkwayu ya Israyele yi tlhasa a mananga ya Zini yi va yi tsrhama a Kadexi. Miriyamu a fele kolanu a va a lahliwa.

2 A ku nga na mati akuva ma tizrisiwa hi nhlengeletanu, xileswo a vhanu va hlengeletana va ya holovisa Moxe na Aroni. 3 A vhanu va holovisa Moxe va ku: “A swi ta va swi yampswe ngopfu loko na hine a he fa nkama lowu vamakwezru va dlayiwiki hi Yehovha! 4 Ha yini mi buyise nhlengeletanu ya Yehovha lani mananga akuva hine ni swifuyu swezru hi fa? 5 Ha yini mi hi suse Egipta mi hi buyisa mbangwini lowu wa ku nyenyentsa? Phela lowu a hi mbangu wa kuva hi nga byala, a hi mbangu wa makuwa, a hi wa mawuvha, a hi wa magranada,* futsrhi ku pfumaleka ni mati ya ku nwa.” 6 Hiloko Moxe na Aroni va suka mahlweni ka nhlengeletanu va ya nyangweni wa tende dzra ntlhanganu va tlhasa va khinsama, a mawuso yavu ma lavisa hansi, kutani a ku phatima ka Yehovha ku sungula ku humelela kwavu.

7 Yehovha a byela Moxe a ku: 8 “Teka nhonga u gama u vitana vhanu hinkwavu va hlengeletana, kutani na mi le mahlweni kwavu, wene na Aroni makwenu, mi ta byela zribye leswaku dzri humesa mati; mi ta yentxa leswaku ku huma mati a zribyeni mi va nyika va nwa kun’we ni swifuyu swavu.”

9 Xileswo Moxe a teka nhonga leyi a yi li mahlweni ka Yehovha hi lani Yene a a mu lelete ha kone. 10 Ntsrhaku ka leswo, Moxe na Aroni va hlengeleta vhanu hinkwavu a mahlweni ka zribye, Moxe a gama a ku: “Ma swi twa vaxandzruki ndzrin’wine! Mi djula leswaku hi mi humesela mati ka zribye ledzri?” 11 Kolanu, Moxe a tlakuxa nhonga a ba zribye kabidzri ku va ku sungula ku humetela mati ya manyingi, a vhanu ni swifuyu swavu va sungula ku nwa.

12 Hi ku famba ka nkama, Yehovha a byela Moxe na Aroni a ku: “Leswi mi kalaka mi nga kombisanga lipfumelo kwanga nakone mi kalaka mi nga ni xwengisanga a mahlweni ka Vaisrayele, n’wine a mi nge ti va nghenisa vhanu lava a tikweni ledzri ni taka va nyika dzrone.” 13 Lawa i mati ya Meriba,* lani Vaisrayele va holovisiki Yehovha, lakakuva a xwengisiwa a makazri kwavu.

14 Hiloko Moxe a zruma vhanu ka hosi ya Edomu na va sukela a Kadexi akuva va ya yi byela va ku: “Israyele makwenu a li: ‘U ku tiva ha hombe ku xaniseka hinkwaku loku hi kumaniki na kone. 15 Vakokwana vezru va ye Egipta, nakone hi tsrhame Egipta ku dzringana malembe manyingi; a Vaegipta va hi xanise ngopfu, hine ni vakokwana vezru. 16 Hi wugamu hi dzrilele Yehovha a va a hi yingela, a gama a zrumela ntsrumi yi hi humesa a tikweni dzra Egipta; swoswi hi lani a Kadexi, ku nga doropa ledzri tsremelanaka ni tiko dzraku. 17 Hi kombela ku tsremakanya hi le tikweni dzraku. A hi nge ti famba hi le masin’wini kumbe hi ka masimu ya mawuvha nakone a hi nge ti nwa mati ya xihlovo ni xin’we. Hi ta famba hi Ndlela ya Hosi nakone a hi nge ti ya a xineneni kumbe a ximatsrini ku ya tlhasa loko hi tsremakanya tiko dzraku.’”

18 Kambe Edomu a ku: “A u fanelanga u tsremakanya hi le tikweni dzrezru. Loko wo txhuka u yentxa leswo, ni ta ku tlhangaveta na ni khome xipada.” 19 A Vaisrayele va ku: “Hi ta ku nkwankwanana hi xitaratu, loko hine kumbe swifuyu swezru swo txhuka swi nwa mati yaku, hi ta ma hakela. Ho djula ku tikhalutela hi milenge ntsena.” 20 Nambitanu, Edomu a ku: “U nga khaluti.” Xileswo, Edomu a va yela na a ni masontxha ya manyingi ya ntamu.* 21 Hi ndlela leyo, Edomu a va yalelile Vaisrayele kuva va khaluta hi le tikweni dzrake. Xileswo, a Vaisrayele va mu gega va famba hi ndlela yimbeni.

22 A nhlengeletanu hinkwayu ya Israyele yi suka Kadexi yi famba yi ya tlhasa Nhaveni ya Hori. 23 Hiloko Yehovha a byela Moxe na Aroni a Nhaveni ya Hori, na va li ndzrelekanwini wa tiko dzra Edomu, a ku: 24 “Aroni a ta fa a va a lahliwa hi lani swi viki ha kone ka vakokwana vake.* A nge ti nghena a tikweni ledzri ni taka dzri nyika Vaisrayele, hikusa a mi xi yingisetanga xileleto xanga mayelanu ni mati ya Meriba. 25 Teka Aroni ni n’wanake Eliyazari mi khwela Nhava ya Hori. 26 Susa Aroni mpahla ya wuprista u yi yambexa n’wanake Eliyazari; Aroni a ta fela kolahayani.”

27 Xileswo, Moxe a yentxa hi lani Yehovha a mu leletiki ha kone. Va khwela Nhava ya Hori na va voniwa hi nhlengeletanu hinkwayu. 28 Moxe a susa Aroni mpahla ya wuprista a yi yambexa n’wanake Eliyazari. Ntsrhaku ka leswo Aroni a fela kolahayani henhla, a wugan’wini ka nhava. Kutani Moxe na Eliyazari va xika a nhaveni. 29 Loko nhlengeletanu hinkwayu yi vona leswaku Aroni a file, yindlu hinkwayu ya Israyele yi mu dzrila ku dzringana 30 wa masiku.

21 Loko Aradi hosi ya Kanana, lweyi a a tsrhama Negebu, a yingela leswaku a Vaisrayele va buya hi ndlela ya Atarimi, a ya va hlasela a va a teka van’wana vavu a va yentxa swikazrawa. 2 Kutani a Vaisrayele va hlambanyela Yehovha va ku: “Loko wo nyikela vhanu lava a mavokweni yezru, hine nakunene hi ta helisa madoropa yavu.” 3 Xileswo Yehovha a yingiseta xikombelo xa Vaisrayele a va a nyikela Vakanana kwavu, kutani a Vaisrayele va va helisa* va hohlota ni madoropa yavu. Hi leswo swi yentxiki leswaku va txhula mbangu lowo vito dzra ku Horma.*

4 Ntsrhaku ka loko va suke a Nhaveni ya Hori, va ya mahlweni ni liyendzro dzravu hi ndlela ya Lwandle dzra ku Pshwuka akuva va gega tiko dzra Edomu. Hiloko vhanu va sungula ku kazrala hi liyendzro. 5 Va tama va solasola Xikwembu Nkulukumba na Moxe va ku: “Ha yini mi hi suse tikweni dzra Egipta akuva hi ta ta fela lani mananga? Lani a ku na swakuda nambi mati, futsrhi ha dzri nyenya pawu ledzri dzra ku kala dzri nga pfuni ntxhumu.” 6 Yehovha a va zrumelela tinyoka leti nga ni mahlungu,* kutani ti va luma lakakuva Vaisrayele vanyingi va fa.

7 A vhanu va yela Moxe va tlhasa va ku: “Hi dohile hi ku solasola Yehovha na wene. Hi kombela u hi kombelela ka Yehovha leswaku a hi susela tinyoka.” Kutani Moxe a va kombelela. 8 Yehovha a byela Moxe a ku: “Hamba xifaniso xa nyoka leyi nga ni mahlungu u xi hayeka ka mhandzri ya yikulu. Loko mhunu a txhuka a lumiwa hi nyoka, a fanela ku lavisa xifaniso lexo akuva a hanya.” 9 Moxe a tekela ku hamba xifaniso xa nyoka hi kobri a xi hayeka ka mhandzri ya yikulu; minkama hinkwayu loko mhunu wa kukazri a lumiwa hi nyoka, a a lavisa xifaniso lexo xa nyoka lexi hambiwiki hi kobri a va a tama a hanya.

10 Ntsrhaku ka leswo, a Vaisrayele va zruzra va ya dzima mintxhatxha a Oboti. 11 Va zruzra a Oboti va ya dzima mintxhatxha a Iye-abarimi, ku nga mananga lawa ma kumekaka mahlweni ka Mowabu hi tlhelo dzra le wuxeni. 12 Va zruzra a mbangwini lowo va ya dzima mintxhatxha a Nkoveni wa Zeredi. 13 Va zruzra a mbangwini lowo va ya dzima mintxhatxha a mugangeni wa Arnoni, ku nga muganga lowu kumekaka a mananga lawa ma sukelaka a ndzrelekanwini wa Vaamori, hikusa a Arnoni ku kumeka a magamu ka muganga wa Mowabu, a makazri ka Mowabu ni Vaamori. 14 Hi leswi swi yentxaka leswaku a buku dzra Tiyimpi ta Yehovha dzri vulavula hi mbangu lowu vitaniwaka “Vhahebi, a Sufa, milambu ya Arnoni 15 ni nkova wa milambu lowu kongomaka a xidoropanini lexi vitaniwaka Ari nakone wu nga kusuhi ni ndzrelekanu wa Mowabu”.

16 Hi ku landzrela, va zruzra va ya Behera lani ku nga ni xihlovo lexi ka xone Yehovha a byeliki Moxe a ku: “Hlengeleta vhanu akuva ni va nyika mati.”

17 A nkameni lowo, a Vaisrayele va yimbelele lisimu va ku:

“Pfela mati, we xihlovo! Teketani!

Ntsrhaku ka leswo va fambe hi le mananga va ya Matana. 19 Va suka a Matana va ya Nahaliyele, va suka a Nahaliyele va ya Bamoti. 20 Va suka a Bamoti va kongoma nkoveni lowu kumekaka mugangeni wa Mowabu, a mugangeni wa tinhava wa Pisga, lani loko u li kone ku vonekaka Yeximoni.*

21 Hiloko a Vaisrayele va zrumela vhanu leswaku va ya byela Sihoni hosi ya Vaamori va ku: 22 “Hi pfumeleli hi tsremakanya hi le tikweni dzraku. A hi nge ti nghena masin’wini nambi masin’wini ya mawuvha. A hi nge ti nwa mati ya xihlovo ni xin’we. Hi ta famba hi Ndlela ya Hosi ku ya tlhasa loko hi tsremakanye tiko dzraku.” 23 Kambe Sihoni a nga va pfumelelanga Vaisrayele leswaku va tsremakanya hi le tikweni dzrake. A matsrhan’wini ya leswo, a hlengelete masotxha yake hinkwawu a va a yela Vaisrayele a mananga. Loko a tlhasa a Yahazi, a sungula ku lwa ni Vaisrayele. 24 Kambe a Vaisrayele va mu hlula hi xipada va va va teka tiko dzrake ku sukela a Arnoni ku ya tlhasa a Yaboki, kusuhi ni Vaamoni, hikusa a Yazeri ku tsremelana ni tiko dzra Vaamoni.

25 Xileswo a Vaisrayele va teka madoropa lawo hinkwawu ya Vaamori va va va sungula ku tsrhama ka wone hinkwawu, ni le Hexiboni kun’we ni le swidoropanini hinkwaswu leswi lumbaka kone. 26 Hikusa a doropa dzra Hexiboni a dzri lumba Sihoni, hosi ya Vaamori, lweyi a lwiki ni hosi ya Mowabu a va a teka tiko dzra yone hinkwadzru ku ya tlhasa a Arnoni. 27 Hi leswo swi yentxiki ku va ni xihlayahlaya xa ku poyila* lexi liki:

“Buyani a Hexiboni.

Ingiki a doropa dzra Sihoni dzri nga yakiwa dzri tiya.

28 Hikusa a Hexiboni ku hume ndzrilo; a doropeni dzra Sihoni ku hume langavi.

Dzri hise Ari a Mowabu, ina, vinyi va mimbangu leyi tlakukiki ya Arnoni.

29 Khombo kwaku, wene Mowabu! Mi ta helisiwa, n’wine vhanu va Kemoxi!

A yentxa leswaku vanake va xinuna va tsrhamela ku tsrutsruma; ni leswaku vanake va xisati va va swikazrawa swa Sihoni, hosi ya Vaamori.

31 Hi ndlela leyo, a Vaisrayele va sungula ku tsrhama a tikweni dzra Vaamori. 32 Hiloko Moxe a zruma vavanuna leswaku va ya kambela a Yazeri. Va teke swidoropana swa le mbangwini wolowo va va va hlongola Vaamori lava a va tsrhama a mbangwini wolowo. 33 Ntsrhaku ka leswo va djika va famba hi Ndlela ya Baxani. Kutani Ogi, hosi ya Baxani, a suka ni masotxha yake hinkwawu a va yela akuva a ya lwa na vone a Edreyi. 34 Yehovha a byela Moxe a ku: “U nga mu txhavi hikusa ni ta mu nyikela mavokweni yaku, yene ni vhanu vake hinkwavu kun’we ni tiko dzrake. U ta mu yentxa leswi u swi yentxiki Sihoni, hosi ya Vaamori, lweyi a a tsrhama a Hexiboni.” 35 Xileswo va mu dlaya, va dlaya ni vanake ni vhanu vake hinkwavu, lakakuva ku nga sali mhunu ni mun’we, va gama va teka tiko dzrake.

22 A Vaisrayele va zruzra va ya dzima mintxhatxha a mananga ya le Mowabu, a mahlweni ka Yordani lani ku fulazrelaniki ni Yeriko. 2 Balaki n’wana wa Zipori a vone ndlela leyi Vaisrayele va va hluliki ha yone Vaamori, 3 xileswo, a Vamowabu va txhava Vaisrayele ngopfu swinene hi mhaka leswi a va li vanyingi, ina, a Vamowabu a va patsra ni ku vabya hi ku txhava Vaisrayele. 4 Kutani a Vamowabu va byela vakulukumba va le Midiyani va ku: “A xitsrhungu lexi xi ta helisa tiko dzrezru hinkwadzru, hi lani homu yi helisaka ha kone byanyi bya nhova.”

Hi nkama wolowo Balaki n’wana wa Zipori a a li hosi ya Mowabu. 5 Kutani a zruma vhanu leswaku va ya vitana Balama n’wana wa Beyori, a Petori, lani ku kumekaka kusuhi ni Nambu wa Ewufrata,* ku nga lomu Balama a pswaleliwiki kone. A va zrume kuva va ya mu byela va ku: “Halenu ku humeleli xitsrhungu lexi humaka hi le tikweni dzra Egipta. Xi tate tiko hinkwadzru* nakone xi tsrhama kusuhi swinene ni muganga wanga. 6 Swoswi ni kombela u buya u ni zrukela vhanu lava hikusa va ni ntamu ku ni tlula. Kumbexana ni nga kota ku va hlula ni va ni va hlongola a tikweni ledzri, hikusa ni swi tiva ha hombe leswaku lweyi u mu tovokisaka awa tovoka, ni lweyi u mu navelelaka mintxhumu ya ku biha a weliwa hi mintxhumu ya ku biha.”

7 Xileswo a vakulukumba va le Mowabu ni va le Midiyani va ya ka Balama na va ni mali ya ku hlahluva ha yone va tlhasa va mu byela leswi Balaki a va zrumiki swone. 8 Kutani a va byela a ku: “Yetlelani kola, ni ta mi byela nhlamulo leyi Yehovha a taka ni nyika yone.” Xileswo a vazrangeli va le Mowabu va tsrhama na Balama.

9 Hiloko Xikwembu Nkulukumba a tela Balama a mu vutisa a ku: “I vamani vavanuna lava nga na wene?” 10 Balama a hlamula Xikwembu Nkulukumba wa ntiyiso a ku: “Balaki n’wana wa Zipori tlhelo hosi ya Mowabu, a zrumele vhanu kwanga, a ku: 11 ‘Halenu ku humelele xitsrhungu lexi humaka hi le tikweni dzra Egipta, nakone xi tate tiko hinkwadzru. Swoswi, buya u ta ni zrukela vone. Kumbexana ni nga kota ku lwa na vone ni va ni va hlongola.’” 12 Kambe Xikwembu Nkulukumba a byela Balama a ku: “U nga txhuki u famba na vone, u nga txhuki u zruka vhanu lavayani, hikusa ni va tovokisile.”

13 Balama a pfuka mixweni a byela vazrangeli lava zrumiwiki hi Balaki a ku: “Tlhelelani tikweni dzrenu, hikusa Yehovha a yalile kuva ni famba na n’wine.” 14 Xileswo a vazrangeli va le Mowabu va suka va tlhelela ka Balaki va tlhasa va mu byela va ku: “Balama a yalile ku buya na hine.”

15 Nambitanu Balaki a tlhela a zrumela vazrangeli va vanyingi nakone va nga va xiyimu xa le henhla ku tlula lava va ku sungula. 16 Va ya ka Balama va tlhasa va mu byela va ku: “Balaki n’wana wa Zipori a li: ‘Ni kombela u buya, u nga pfumeleli ntxhumu xi ku sivela, 17 hikusa ni ta ku tlakuxa ni va ni ku hakela hi ndlela leyikulu, nakone ni ta yentxa hinkwaswu leswi u taka ni byela swone. Xileswo ni kombela u buya u ta ni zrukela vhanu lava.’” 18 Kambe Balama a hlamula malandzra ya Balaki a ku: “Nambiloko Balaki a ngo ni nyika yindlu yake na yi tale hi prata ni woru, a ni nge ti yentxa ntxhumu ni wun’we wa wukulu kumbe wa wutsrongo lowu lwisanaka ni leswi Yehovha Xikwembu Nkulukumba wanga a swi hlayiki. 19 Kambe ni kombela leswaku na n’wine mi yetlela kola wusiku lebyi, n’waninkama Yehovha a nga ni byela swin’wana.”

20 Hiloko Xikwembu Nkulukumba a tela Balama wusikwini a mu byela a ku: “Loko a li leswaku vavanuna lava va tele ku ta ku vitana, famba na vone. Kambe u fanela ku vulavula ntsena leswi ni taka ku byela swone.” 21 Xileswo Balama a pfuka mixweni a lulamisela mbongolo yake* a va a famba ni vazrangeli va le Mowabu.

22 Kambe Xikwembu Nkulukumba a hlundzruka ngopfu swinene hi mhaka ya leswi Balama a a famba, kutani a ntsrumi ya Yehovha yi yima ndleleni akuva yi mu sivela. Balama a a khwele ka mbongolo yake nakone a a li xikan’we ni vatizri vake vabidzri. 23 Loko mbongolo yi vona ntsrumi ya Yehovha na yi yime ndleleni nakone yi khome xipada, yi zama ku gega yi nghena nhoveni. Kambe Balama a sungula ku yi bukutela akuva yi tlhelela ndleleni. 24 Hiloko ntsrumi ya Yehovha yi ya yima ka xindlelana lexi ka matlhelo ha mabidzri ya xone a ku ni masimu ya mawuvha, nakone a ku ni mimuru leyi yakiwiki hi mazribye hala ni hala. 25 Loko mbongolo yi vona ntsrumi ya Yehovha, yi sungula ku famba na yi timanya ni khumbi, yi manya ni nenge wa Balama, kutani Balama a tlhela a yi ba.

26 A ntsrumi ya Yehovha yi suka yi ya yima ka mbangu lowu laliki, lani a swi nga koteki ku khaluta, ku nga ha va hi tlhelo dzra xinene kumbe dzra ximatsri. 27 Loko mbongolo yi vona ntsrumi ya Yehovha, yi bunkwama na Balama a li henhla ka yone, kutani Balama a hlundzruka a tlhela a yi bukutela hi nhonga yake. 28 Hi wugamu Yehovha a yentxa leswaku mbongolo yi vulavula,* yi byela Balama yi ku: “Ne ku yentxa yini a ku za u ni ba makhambi lawa mazrazru?” 29 Balama a hlamula mbongolo a ku: “Hi mhaka we ni phuntisa wene. Loko a ne khoma xipada, a ni ta ku dlaya!” 30 A mbongolo yi vutisa Balama yi ku: “A hi mine mbongolo leyi u fambiki ha yone wutomi byaku hinkwabyu ku ta tlhasa namunhla, ni sama ni ku yentxa leswi?” Balama a hlamula mbongolo a ku: “Im-him!” 31 Ntsrhaku ka leswo Yehovha a pfula matihlo ya Balama, kutani a vona ntsrumi ya Yehovha na yi yime ndleleni nakone yi khome xipada. Balama a tekela ku khinsama a lavisa hansi.

32 Kutani a ntsrumi ya Yehovha yi ku: “Ha yini u be mbongolo yaku makhambi lawa mazrazru? Phela ni tele ku ta ta ku sivela, hikusa a liyendzro dzraku a dzri fambisani ni ku zrandzra kwanga. 33 A mbongolo yi ni vonile, yi va yi zama ku ni gega makhambi lawa mazrazru. Loko a yo kala yi nga ni geganga ke? Swoswi a ni ta va ni ku dlayile ni va ni tsrhika mbongolo yi tihanyela.” 34 Balama a byela ntsrumi ya Yehovha a ku: “Ni dohile, hikusa a ni nga swi tivi leswaku hi wene u yimiki lani ndleleni akuva u kumana na mine. Loko leswi swi nga lulamanga a matihlweni yaku, ni ta tlhela.” 35 Kambe ntsrumi ya Yehovha yi byela Balama yi ku: “Famba ni vavanuna lava, kambe u fanela ku vulavula ntsena leswi ni taka ku byela swone.” Xileswo Balama a ya mahlweni a famba ni vazrangeli lava zrumiwiki hi Balaki.

36 Loko Balaki a twa leswaku Balama a tlhasile, a tekela ku mu tlhangaveta a doropeni dzra Mowabu, ledzri kumekaka kusuhi ni nkova wa Arnoni, a ndzrelekanwini wa tiko. 37 Balaki a vutisa Balama a ku: “Xana a ni zrumelanga vhanu akuva va ya ku vitana? Ha yini u nga buyanga? A wo yanakanya leswaku ni nga hluleka ku ku tlakuxa ni ku ku hakela hi ndlela leyikulu?” 38 Balama a hlamula Balaki a ku: “Hi mine lweyi, ni lani a mahlweni kwaku. Kambe a ni pfumeleliwi ku hlaya xin’wana ni xin’wana, ni to hlaya ntsena leswi Xikwembu Nkulukumba a taka ni byela swone.”

39 Xileswo Balama a famba na Balaki va ya tlhasa a Kiriyati-huzoti. 40 Balaki a hamba magandzrelo hi tihomu ni tihamba, a va a pambula swin’wana a swi zrumela ka Balama ni ka vazrangeli lava a va li na yene. 41 A mixweni, Balaki a teka Balama a tlhantuka na yene va ya a Bamoti-bali, lani a a ta kota ku vona Vaisrayele hinkwavu.

23 Kutani Balama a byela Balaki a ku: “Ni yakeli 7 wa maaltari u va u ni lulamiselela 7 wa tihomu ta xinuna ni 7 wa tihamba ta xinuna.” 2 Balaki a tekela ku yentxa hi lani Balama a mu byeliki ha kone. Balaki na Balama va nyikela magandzrelo ka altari ha dzrin’we hi homu ya xinuna ni hi hamba ya xinuna. 3 Balama a gama a byela Balaki a ku: “Yima lani kusuhi ni gandzrelo dzraku dzra ku hisiwa na ha ya lahayani. Kumbexana Yehovha a ta vulavula na mine. Ni ta ku byela hinkwaswu leswi a taka ni byela swone.” Hi ndlela leyo, a suka a ya ka ganga ledzri a dzri nge na minsinya.

4 Kutani Xikwembu Nkulukumba a vulavula na Balama, Balama a mu byela a ku: “Ni lulamisele 7 wa maaltari nakone ka altari ha dzrin’we ni nyikele homu ya xinuna ni hamba ya xinuna.” 5 Yehovha a byela Balama mazritu lawa: “Yana ka Balaki nakone hi leswi u fanelaka ku mu byela swone.” 6 Xileswo a tlhela, kutani a vona Balaki ni vazrangeli hinkwavu va le Mowabu na va yime ka gandzrelo dzrake dzra ku hisiwa. 7 Hiloko a hlaya xihlayahlaya a ku:

‘Buya u ta ni zrukela Yakobe.

Ina, buya u ta navelela Israyele swa ku biha.’

 8 Ni nga va zrukela yini lava Xikwembu Nkulukumba a kalaka a nga va zrukanga?

Nakone ni nga va navelelisa kuyini swa ku biha lava Yehovha a kalaka a nga va navelelanga swa ku biha?

11 Kutani Balaki a byela Balama a ku: “U ni yentxe yini? Ni ku tise lani akuva u ta zruka valala vanga, kambe wene we va tovokisa.” 12 A mu hlamula a ku: “Xana a ni fanelanga ku hlaya hinkwaswu leswi Yehovha a ni byelaka swone?”

13 Balaki a ku: “Ni kombela hi ya mbangwini wumbeni lani u taka kota ku va vona, a wu nge ti vona hinkwavu, u to vona xiyenge xa kukazri xavu. U ta ni zrukela vone na u li kohala.” 14 Kutani Balaki a famba na yene ka livala dzra le Zofimi, ledzri kumekaka a mugangeni wa tinhava wa Pisga, a yaka 7 wa maaltari nakone ka altari ha dzrin’we a nyikela magandzrelo hi homu ya xinuna ni hi hamba ya xinuna. 15 Kutani Balama a byela Balaki a ku: “Yima lani kusuhi ni gandzrelo dzraku dzra ku hisiwa, mine na ha ya lahayani, ni ya vulavula na Yene.” 16 Yehovha a vulavula na Balama a mu byela mazritu lawa: “Yana ka Balaki, nakone hi leswi u fanelaka ku mu byela swone.” 17 Xileswo a mu yela a va a kuma leswaku a a mu yimelile kusuhi ni gandzrelo dzrake dzra ku hisiwa, na a li kun’we ni vazrangeli va le Mowabu. Balaki a mu vutisa a ku: “A ku byele yini Yehovha?” 18 A mu hlamula hi ku tizrisa mazritu lawa ya xihlayahlaya:

“Zreya ndleve Balaki, u yingiseta,

Ni yingiseti wene n’wana Zipori.

Loko a hlaya ntxhumu, xana a nga wu yentxi?

Loko a vulavula, xana a nga swi hetisisi?

22 Xikwembu Nkulukumba a va tisa na va sukela Egipta.

Kwavu a fana ni timhondzro ta homu ya xinuna ya nhova.

Swoswi ku nga hlayiwa leswi mayelanu na Yakobe, leswi liki, Israyele:

‘Vonani leswi Xikwembu Nkulukumba a swi yentxiki!’

25 Kutani Balaki a byela Balama a ku: “Loko swi nga koteki kuva u va zruka, ni ku va tovokisa u nga va tovokisi.” 26 Balama a hlamula Balaki a ku: “A ni ku byelanga leswaku ‘ni ta yentxa hinkwaswu leswi Yehovha a taka ni byela swone’?”

27 Balaki a byela Balama a ku: “Ni kombela hi ya mbangwini wun’wana futsrhi, kumbexana swi nga va swi lulamile a mahlweni ka Xikwembu Nkulukumba wa ntiyiso kuva u ni zrukela vone na u li kohala.” 28 Xileswo, Balaki a teka Balama va ya a henhla ka Peyori, lani swi kotekaka ku vona mananga ya Yeximoni. 29 Kutani Balama a byela Balaki a ku: “Ni yakeli 7 wa maaltari u va u ni lulamiselela 7 wa tihomu ta xinuna ni 7 wa tihamba ta xinuna.” 30 Kutani Balaki a yentxa hi lani Balama a mu byeliki ha kone, a va ka altari ha dzrin’we a nyikela magandzrelo hi homu ya xinuna ni hi hamba ya xinuna.

24 Loko Balama a vona leswaku Yehovha a djula leswaku Vaisrayele va tovokisiwa, a tsrhika ku djuletela ndlela ya ku va zruka a va a ndzruluka a lavisa a mananga. 2 Loko a vona mintxhatxha ya Vaisrayele hi ku ya hi tinxaka tavu, a teliwa hi moya wa Xikwembu Nkulukumba. 3 Kutani a hlaya xihlayahlaya a ku:

10 Kutani Balaki a hlundzrukela Balama. Balaki a ba mavoko swa xiyeyiso, a byela Balama a ku: “Ni ku vitanele kuva u ta zruka valala vanga, kambe ka makhambi lawa ya mazrazru we va tovokisa ntsena. 11 Muka kaya kwaku swoswi! A ni djula ku ku tlakuxa kambe Yehovha a ku tsronisile.”

12 Balama a hlamula Balaki a ku: “Kasi lava u va zrumiki a ni va byelanga ni ku: 13 ‘Nambiloko Balaki a ngo ni nyika yindlu yake na yi tale hi prata ni woru, a ni nge yentxi ntxhumu hi ku ya hi ku zrandzra kwanga,* ku nga ha va wa wunene kumbe wa ku biha nakasi wu lwisana ni ku zrandzra ka Yehovha? A ni hlayanga ni ku ni ta vulavula ntsena leswi Yehovha a taka ni byela swone’? 14 Kutani swoswi na muka ni ya maxakeni yanga. Kambe na ni nge si na famba, yima ni ku byela leswi vhanu lava va taka swi yentxela vhanu vaku a nkameni lowu taka.”* 15 Hiloko a hlaya xihlayahlaya a ku:

20 Loko Balama a lavisa Amaleki, a ya mahlweni ni xihlayahlaya xake a ku:

21 Loko a lavisa Vakena, a ya mahlweni ni xihlayahlaya xake a ku:

“A mbangu lowu mi tsrhamaka ka wone wu tiyile, wu yakiwe zribyeni.

22 Kambe ku ni lweyi a taka hisa Vakena* hi ndzrilo.

Asiriya a ta mi teka siku muni akuva a mi yentxa swikazrawa?”

23 Balama a ya mahlweni ni xihlayahlaya xake a ku:

“Yowee! I mani lweyi a taka huluka loko Xikwembu Nkulukumba a yentxa leswi?

Kambe na yene a ta helisiwa hi ku helela.”

25 Ntsrhaku ka leswo, Balama a timukela. Na yene Balaki a tifambela.

25 Na Vaisrayele va ha tsrhama Xitimi, a vhanu va sungula ku yentxa swa tingana hi tlhelo dzra tinkuku ni van’hwanyana va Mowabu. 2 A vavasati va zramba vhanu akuva va ya yentxela swikwembu swavu magandzrelo. Kutani a vhanu va sungula ku da ni ku khinsamela swikwembu swavu. 3 Xileswo, a Vaisrayele va sungula ku gandzrela* Bali wa Peyori, kutani Yehovha a va hlundzrukela. 4 Yehovha a byela Moxe a ku: “Khoma vazrangeli hinkwavu va vhanu lava, u va dlaya u gama u va hayeka timhandzrini a gqekeni* a mahlweni ka Yehovha, leswaku a ku hlundzruka ka Yehovha ku suka ka Vaisrayele.” 5 Moxe a byela vayavanyisi va Israyele a ku: “Mun’wana ni mun’wana wenu a fanela ku dlaya vavanuna lava sunguliki ku gandzrela* Bali wa Peyori.”

6 Kambe hi nkama wolowo, mun’we wa Vaisrayele a nghena ni n’hwanyana wa Mumidiyani a makazri ka vamakwavu, a mahlweni ka Moxe ni nhlengeletanu hinkwayu ya Israyele hi nkama lowu a va li ku dzrileni a nyangweni wa tende dzra ntlhanganu. 7 Loko Feniyasi n’wana wa Eliyazari, n’wana wa muprista Aroni a vona leswo, a tekela ku sekeleka a makazri ka nhlengeletanu a teka tlhazri. 8 A landzra wanuna lweyo wa Muisrayele a ndzreni ka tende, a tlhasa a va simela ha wubidzri byavu, lweyi wanuna wa Muisrayele ni lweyi wansati, hi ka xizro xake xa mbeleko. Hi ndlela leyo a ntungu wu yima ka Vaisrayele. 9 Lava va fiki hi mhaka ya ntungu ku ve 24.000 wa vone.

10 Kutani Yehovha a byela Moxe a ku: 11 “Feniyasi n’wana wa Eliyazari, n’wana wa muprista Aroni, a yentxe leswaku ni tsrhika ku hlundzrukela Vaisrayele, hikusa a nga khondlanga mavoko loko a vone leswaku va tsrhika ku dumbeka kwanga. Xileswo a ni va helisanga Vaisrayele nambileswi ni djulaka leswaku va gandzrela mine ntsena. 12 Kutani mu byeli leswaku ‘ni hamba na yene xipfumelelanu xa ku zrula. 13 Nakone lexo xi ta va xipfumelelanu xa leswaku yene ni vatukulu vake va ta va vaprista hi lani ku nga helikiki, hikusa a nga pfumelelanga leswaku vhanu va nga dumbeki ka Xikwembu Nkulukumba wake, nakone a kombelele Vaisrayele ku dzrivaleliwa.’”

14 A vito dzra Muisrayele lweyi a dlayiwiki ni wansati wa Mumidiyani a ku li Zimri, n’wana wa Salu, lweyi a a li muzrangeli wa kukazri ka lixaka dzra Simiyoni. 15 A vito dzra wansati wa Mumidiyani lweyi a dlayiwiki a kuli Khozbi, n’wana wa Zuri, lweyi a a li muzrangeli wa lixaka dzra kukazri dzra le Midiyani.

16 Hi ku famba ka nkama Yehovha a byela Moxe a ku: 17 “Hlaselani Vamidiyani mi va dlaya, 18 hikusa va mi vangele khombo hi ku va va mi hlohlotela hi ndlela ya ku tumbela akuva mi doha a mhakeni ya Peyori,* ni hi mhaka ya leswi Khozbi, n’wana wa muzrangeli wa kukazri wa le Midiyani, a swi yentxiki. Yene a dlayiwe hi siku ledzri ku viki ni ntungu hi mhaka ya Peyori.”

26 Loko ntungu wu helile, Yehovha a byela Moxe na Eliyazari, n’wana wa muprista Aroni, a ku: 2 “Tsralisani hinkwavu va nhlengeletanu ya Israyele, ku sukela ka va 20 wa malembe ku ya henhla, hi ku ya hi mavito ya mindangu ya vakokwana vavu, na mi konta hinkwavu lava nga tizraka swanga masotxha a Israyele.” 3 Xileswo, Moxe na muprista Eliyazari va vulavula na vone a mananga ya le Mowabu, kusuhi ni Yordani a Yeriko, va ku: 4 “Tsralisani vhanu lava nga ni 20 wa malembe ku ya henhla, hi lani Yehovha a leletiki Moxe ha kone.”

A vana va Israyele lava humiki hi tikweni dzra Egipta ku ve lava: 5 Rubeni, mativula ya Israyele; a vana va Rubeni ku ve lava: Ka Hanoki, ndangu wa va ka Hanoki; ka Palu, ndangu wa va ka Palu; 6 ka Hesromi, ndangu wa va ka Hesromi; ka Karimi, ndangu wa va ka Karimi. 7 Leyi ku ve mindangu ya va ka Rubeni, nakone hinkwavu lava tsralisiwiki ku ve 43.730.

8 A n’wana wa Palu ku ve Eliyabi. 9 A vana va Eliyabi ku ve Nemuwele, Dathani na Abiramu. Dathani lweyi na Abiramu a va li vavanuna lava hlawuliwiki a nhlengeletanwini, lava va lwisaniki na Moxe na Aroni na va yima kun’we ni ntlawa wa Kora, nkama lowu va lwisaniki na Yehovha.

10 Kutani a misava yi pfuleka* yi va minta, kambe Kora ni lava a va mu seketela va dlayiwe hi ndzrilo lowu dlayiki 250 wa vavanuna, va va va ndzruluka xibasopiso. 11 Nambitasu a vana va Kora a va fanga.

12 A vana va Simiyoni hi ku ya hi mindangu yavu ku ve lava: Ka Nemuwele, ndangu wa va ka Nemuwele; ka Yamini, ndangu wa va ka Yamini; ka Yakhini, ndangu wa va ka Yakhini; 13 ka Zara, ndangu wa va ka Zara; ka Xawuli, ndangu wa va ka Xawuli. 14 Leyi ku ve mindangu ya va ka Simiyoni: 22.200.

15 A vana va Gadi hi ku ya hi mindangu yavu ku ve lava: Ka Zefoni; ndangu wa va ka Zefoni; ka Hagi, ndangu wa va ka Hagi; ka Xuni, ndangu wa va ka Xuni; 16 ka Ozini, ndangu wa va ka Ozini; ka Eri, ndangu wa va ka Eri; 17 ka Arodi, ndangu wa va ka Arodi; ka Areli, ndangu wa va ka Areli. 18 Leyi ku ve mindangu ya vana va Gadi nakone lava tsralisiwiki a mindangwini yavu ku ve 40.500.

19 A vana va Yuda ku ve Heri na Onani. Kambe Heri na Onani va file a tikweni dzra Kanana. 20 A vana va Yuda hi ku ya hi mindangu yavu ku ve lava: Ka Sala, ndangu wa va ka Sala; ka Faresi ndangu wa va ka Faresi; ka Zara, ndangu wa va ka Zara. 21 A vana va Faresi ku ve lava: Ka Hesromi, ndangu wa va ka Hesromi; ka Hamula, ndangu wa va ka Hamula. 22 Leyi ku ve mindangu ya Yuda nakone lava tsralisiwiki a mindangwini yavu ku ve 76.500.

23 A vana va Yisakari hi ku ya hi mindangu yavu ku ve lava: Ka Tola, ndangu wa va ka Tola; ka Puvha, ndangu wa va ka Puvha; 24 ka Yaxubi, ndangu wa va ka Yaxubi, ka Ximironi ndangu wa va ka Ximironi. 25 Leyi ku ve mindangu ya Yisakari nakone lava tsralisiwiki hi ku ya hi mindangu yavu ku ve 64.300.

26 A vana va Zebuloni hi ku ya hi mindangu yavu ku ve lava: Ka Seredi, ndangu wa va ka Seredi, ka Eloni; ndangu wa va ka Eloni; ka Yahileli, ndangu wa va ka Yahileli. 27 Leyi ku ve mindangu ya va ka Zebuloni nakone lava tsralisiwiki a mindangwini yavu ku ve 60.500.

28 A vana va Yosefa hi ku ya hi mindangu yavu ku ve Manasi na Efrayimi. 29 A vana va Manasi ku ve lava: ka Makhiri, ndangu wa va ka Makhiri; Makhiri a ve papayi wa Giliyadi; ka Giliyadi, ndangu wa va ka Giliyadi. 30 Lava ku ve vana va Giliyadi: Ka Iyezeri, ndangu wa va ka Iyezeri; ka Heleki, ndangu wa va ka Heleki; 31 ka Asiriyele, ndangu wa va ka Asiriyele; ka Sikeme ndangu wa va ka Sikeme; 32 ka Xemida, ndangu wa va Xemida; ka Heferi, ndangu wa va ka Heferi. 33 Zelofeyadi n’wana wa Heferi, a nga va nga ni vana va madjaha e va ni ntsena van’hwanyana nakone a mavito ya vana volavo ku ve Makila, Nowa, Hogla, Milka na Tiriza. 34 Leyi ku ve mindangu ya Manasi nakone lava tsralisiwiki a mindangwini yavu ku ve 52.700.

35 Lava ku ve vana va Efrayimi hi ku ya hi mindangu yavu: Ka Xutela, ndangu wa va ka Xutela; ka Bakhar, ndangu wa va ka Bakhar; ka Takhani, ndangu wa va ka Takhani. 36 Lava ku ve vana va Xutela: Ka Erani, ndangu wa va ka Erani. 37 Leyi ku ve mindangu ya vana va Efrayimi nakone lava tsralisiwiki a mindangwini yavu ku ve 32.500. Lava ku ve vana va Yosefa hi ku ya hi mindangu yavu.

38 A vana va Benjamini hi ku ya hi mindangu yavu ku ve lava: Ka Bela, ndangu wa va ka Bela; ka Axibele, ndangu wa va ka Axibele; ka Ahiramu, ndangu wa va ka Ahiramu; 39 ka Xefufamu, ndangu wa va ka Xefufamu; ka Hufami, ndangu wa va ka Hufami. 40 A vana va Bela ku ve Aridi na Namani. Ka Aridi, ndangu wa va ka Aridi; ka Namani, ndangu wa va ka Namani. 41 Lava ku ve vana va Benjamini hi ku ya hi mindangu yavu nakone lava tsralisiwiki a mindangwini yavu ku ve 45.600.

42 Lava ku ve vana va Dani hi ku ya hi mindangu yavu: Ka Xuhamu, ndangu wa va ka Xuhamu. Leyi ku ve mindangu ya Dani hi ku ya hi mindangu yavu. 43 Hinkwavu lava va tsralisiwiki a mindangwini hinkwayu ya va ka Xuhamu ku ve 64.400.

44 A vana va Axere hi ku ya hi mindangu yavu ku ve lava: Ka Iminahi, ndangu wa va ka Iminahi; ka Ixivhi, ndangu wa va ka Ixivhi; ka Beriya, ndangu wa va ka Beriya. 45 Ka vana va Beriya; ka Heberi, ndangu wa va ka Heberi; ka Malikiyele, ndangu wa va ka Malikiyele. 46 A vito dzra n’wana wa xisati wa Axere ku ve Sera. 47 Leyi ku ve mindangu ya vana va Axere nakone lava tsralisiwiki a mindangwini yavu ku ve 53.400.

48 A vana va Naftali hi ku ya hi mindangu yavu ku ve lava: Ka Yahizeli, ndangu wa va ka Yahizeli; ka Guni, ndangu wa va ka Guni; 49 ka Yezere, ndangu wa va ka Yezere; ka Xilemu, ndangu wa va ka Xilemu. 50 Leyi ku ve mindangu ya Naftali hi ku ya hi mindangu yavu nakone lava tsralisiwiki a mindangwini yavu ku ve 45.400.

51 A nhlayu ya Vaisrayele hinkwavu lava tsralisiwiki ku ve: 601.730.

52 Ntsrhaku ka leswo, Yehovha a byela Moxe a ku: 53 “A tiko dzri fanela ku yaveliwa vhanu lava, akuva dzri va pfindla dzravu, hi ku ya hi nxaxamelo wa mavito yavu.* 54 Ka mintlawa leyikulu u fanela ku nyikela pfindla dzra dzrikulu, ka mintlawa leyitsrongo u fanela ku nyikela pfindla dzra dzritsrongo. A pfindla dzra ntlawa wun’wana ni wun’wana dzri fanela ku nyikeliwa hi ku ya hi nhlayu ya vhanu lava tsralisiwiki. 55 Nambitanu a ku fanela ku hambiwa wuhlolotwana akuva tiko dzri yaveliwa.* Va fanela ku yaveliwa pfindla hi ku ya hi mavito ya tinxaka ta vapapayi vavu. 56 Ku ta tizrisiwa wuhlolotwana* akuva ku tiviwa pfindla dzra lixaka dzrin’wana ni dzrin’wana dzri va dzri yaveliwa mintlawa leyikulu ni leyitsrongo.”

57 Lava va tsralisiwiki ka Valevhi hi ku ya hi mindangu yavu hi lava: Ka Gerixoni, ndangu wa Vagerixoni; ka Kohati, ndangu wa Vakohati; ka Merari, ndangu wa Vamerari. 58 Leyi ku ve mindangu ya Valevhi: Ndangu wa va ka Libini; ndangu wa va ka Hebroni; ndangu wa va ka Makhili; ndangu wa va ka Muxi; ndangu wa va ka Kora.

Kohati a ve papayi wa Amiramu. 59 A vito dzra nsati wa Amiramu a ku li Yokebede ku nga n’wana wa xisati wa Levhi, lweyi Levhi ni nkatake va mu pswaliki a Egipta. Kutani Yokebede a pswalele Amiramu vana lava: Aroni, Moxe ni makwavu wa xisati Miriyamu. 60 Aroni a ve papayi wa Nadabi, Abihu, Eliyazari na Itamari. 61 Kambe Nadabi na Abihu va file hi mhaka ya leswi va hiseliki Yehovha muzri wa ku nun’hwela hi ndlela leyi kalaka yi nga yamukeleki.

62 Hinkwavu lava tsralisiwiki ku ve 23.000 wa vone, va xinuna hinkwavu ku sukela ka lava va nga ni hweti ku ya henhla. A va tsralisiwanga kun’we ni Vaisrayele lavan’wana hikusa a va nga fanelanga va nyikiwa pfindla a xikazri ka Vaisrayele.

63 Lava hi lava va tsralisiwiki ha Moxe na muprista Eliyazari loko va tsralisa Vaisrayele a mananga ya Mowabu kusuhi ni le Yordani, a Yeriko. 64 Kambe ka vhanu lava, a ku nga na lweyi a a tsralisiwe ha Moxe na muprista Aroni, nkama lowu va tsralisiki Vaisrayele a mananga ya Sinayi, 65 swa nga hi leswi Yehovha a a hlaye leswi mayelanu na vone: “Nakunene va ta fela a mananga.” Xileswo ka vavanuna lavo a ku salanga mhunu ni mun’we handle ka Kalebe n’wana wa Yefune na Yoxuwa n’wana wa Nuni.

27 Hiloko vana va van’hwanyana va Zelofeyadi n’wana wa Hefiri, n’wana wa Giliyadi, n’wana wa Makhiri, n’wana wa Manasi, va mindangu ya Manasi n’wana wa Yosefa, va yela Moxe. A mavito ya vana va van’hwanyana va Zelofeyadi a ku li Makila, Nowa, Hogla, Milka na Tiriza. 2 Va tlhasa va yima mahlweni ka Moxe, muprista Eliyazari, vazrangeli ni le mahlweni ka nhlengeletanu hinkwayu, a nyangweni wa tende dzra ntlhanganu, va ku: 3 “Papayi wezru a file a mananga, kambe a a nga li wa ntlawa lowu seketeliki Kora wu lwisana na Yehovha, kambe a file hi kola ka xidoho xake nakone a nga zanga a va ni vana va xinuna. 4 Ha yini xiloso xa papayi xi fanela ku helisiwa a lixakeni dzrake hi mhaka ya leswi a kalaka a nga na n’wana wa xinuna? Hi yavelani pfindla xikan’we ni vamakwavu va papayi.” 5 Hiloko Moxe a byela Yehovha mhaka yavu.

6 Kutani Yehovha a byela Moxe a ku: 7 “Swa twala leswi vana va Zelofeyadi va swi hlayaka. Nakunene u fanela ku va nyika mbangu swanga pfindla dzravu xikan’we ni vamakwavu va papayi wavu, u va u va nyika leswi a swi ta va swa papayi wavu swi va pfindla dzravu. 8 Nakone byela Vaisrayele u ku: ‘Loko wanuna wa kukazri a fa na a nga na n’wana wa xinuna, a pfindla dzrake mi fanela ku dzri nyika n’wanake wa n’hwanyana. 9 Loko a nga na n’wana wa n’hwanyana a pfindla dzrake nyikani vamakwavu. 10 Loko a nga na vamakwavu, a pfindla dzrake nyikani vamakwavu va papayi wake. 11 Loko papayi wake a nga na vamakwavu a pfindla dzrake nyikani xaka dzrake dzra le kusuhi, kutani dzri ta va dzrake. Lowu i Nawu wa wuyavanyisi wa hi lani ku nga helikiki ka Vaisrayele, hi lani Yehovha a leletiki Moxe ha kone.’”

12 Hiloko Yehovha a byela Moxe a ku: “Tlhantuka nhaveni leyi ya Abarimi u vona tiko ledzri ni taka dzri nyika Vaisrayele. 13 Loko u dzri vonile na wene u ta fa,* hi lani swi viki ha kone ka makwenu Aroni, 14 hikusa nkama lowu nhlengeletanu yi ni holoveliki a mananga ya Zini, a mi xi yingisetanga xileleto xanga, nakone a mi ni xwengisanga a mahlweni ka vhanu lava nkama lowu ni va nyikiki mati. Ni hlaya mati ya Meriba a Kadexi a mananga ya Zini.”

15 Ntsrhaku ka leswo, Moxe a byela Yehovha a ku: 16 “Wene Yehovha, Xikwembu Nkulukumba lweyi a nyikaka wutomi vhanu hinkwavu,* hlawula mhunu lweyi a taka zrangela nhlengeletanu 17 lweyi a taka va zrangela ka mintxhumu hinkwayu a tlhela a va kongomisa ka hinkwaswu leswi va taka swi yentxa,* akuva nhlengeletanu ya Yehovha yi nga fani ni tihamba leti kalaka ti nga na mubyisi.” 18 Xileswo Yehovha a byela Moxe a ku: “Vitana Yoxuwa n’wana wa Nuni, wanuna lweyi a fanelekaka,* u mu tlhanteka mavoko. 19 U gama u mu yimisa mahlweni ka muprista Eliyazari, a mahlweni ka nhlengeletanu hinkwayu u va u mu beka a va muzrangeli. 20 Mu nyiki wulawuli byitsrongo ka lebyi u nga nabyu,* akuva nhlengeletanu hinkwayu ya Israyele yi kota ku mu yingiseta. 21 Yoxuwa a ta ya ka muprista Eliyazari, lweyi a taka mu vutisela ka Yehovha hi ku tizrisa Urimi, akuva a tiva xiboho xake. Loko a va byela leswaku va huma, va ta huma, loko a va byela leswaku va nghena, va ta nghena, yene ni Vaisrayele hinkwavu lava va nga na yene kun’we ni nhlengeletanu hinkwayu.”

22 Xileswo Moxe a yentxa hi lani Yehovha a mu leletiki ha kone. A teka Yoxuwa a mu yimisa mahlweni ka muprista Eliyazari, a mahlweni ka nhlengeletanu hinkwayu, 23 a va a mu tlhanteka mavoko a gama a mu beka leswaku a va muzrangeli, hi lani Yehovha a a byele Moxe ha kone.

28 Hi ku landzrela Yehovha a byela Moxe a ku: 2 “Byela Vaisrayele u ku: ‘Mi fanela ku tiyiseka leswaku ma ni nyika gandzrelo dzranga, ku nga pawu dzranga. A magandzrelo yanga ya ku hisiwa, lawa ma nga nun’hwelo lowu wu ni nyonxisaka ma fanela ku nyikeliwa hi nkama lowu nga wone.’

3 “Va byeli u ku: ‘A gandzrelo dzra ku hisiwa ledzri mi taka dzri nyikela ka Yehovha, hi ledzri: swihambana swibidzri swa xinuna leswi swo ko va ni lembe dzrin’we, akuva swi va gandzrelo dzra ku hisiwa ledzri hambiwaka nkama ni nkama. 4 A xihambana xin’we xa xinuna u ta xi nyikela mixweni, lexin’wana u xi nyikela madambyeni, 5 kun’we ni kolomu ka kilu dzrin’we dzra mapa lamanene lawa ma* patsriwiki ni mafuzra lamanene* ya kolomu ka litru dzrin’we.* 6 I gandzrelo dzra ku hisiwa ledzri nyikeliwaka nkama ni nkama, ledzri simekiwiki a Nhaveni ya Sinayi swanga nun’hwelo lowu nyonxisaka, gandzrelo ledzri hiseliwaka Yehovha, 7 ka xihambana xin’wana ni xin’wana u ta nyikela ni gandzrelo dzra swa ku nwa ledzri nyikeliwaka na xone dzra mpimu wa kolomu ka litru. A byala lebyo byi ta txhululiwa a mbangwini wa ku xwenga swanga gandzrelo dzra swa ku nwa ka Yehovha. 8 Kutani a xihambana lexin’wana xa xinuna u ta xi nyikela a madambyeni. U ta xi nyikela kun’we ni gandzrelo dzra tinhleke kun’we ni gandzrelo dzra swa ku nwa ledzri nyikeliwaka na xone, swa ku fana ni leswi swi nyikeliwiki mixweni akuva swi va gandzrelo dzra ku hisiwa, nun’hwelo lowu nyonxisaka Yehovha.

9 “‘Kambe hi siku dzra Savata ku fanela ku nyikeliwa hi swihambana swibidzri swa xinuna leswi hanyiki ha hombe, ni makilu mabidzri* ya mapa lamanene lawa ma patsriwiki ni mafuzra, swanga gandzrelo dzra tinhleke, ku patsra ni gandzrelo dzra swa ku nwa ledzri nyikeliwaka na swone. 10 Ledzri i gandzrelo dzra ku hisiwa, ledzri nyikeliwaka hi Savata, ni gandzrelo dzra ku hisiwa ledzri nyikeliwaka nkama ni nkama kun’we ni gandzrelo dzra swa ku nwa ledzri nyikeliwaka na dzrone.

11 “‘A ku sunguleni ka hweti yin’wana ni yin’wana* mi ta nyika Yehovha swihon’wana swibidzri, hamba yin’we ya xinuna ni 7 wa swihambana swa xinuna leswi swi hanyiki ha hombe leswi swo ko va ni lembe dzrin’we, akuva swi va gandzrelo dzra ku hisiwa, 12 ka xihon’wana ha xin’we ku ta nyikeliwa ni kolomu ka makilu mazrazru ya mapa lamanene lawa ma patsriwiki ni mafuzra, swanga gandzrelo dzra tinhleke, kutani a hamba ya xinuna yi ta nyikeliwa ni makilu mabidzri ya mapa lamanene lawa ma patsriwiki ni mafuzra, swanga gandzrelo dzra tinhleke, 13 a xihambana ha xin’we xa xinuna xi ta nyikeliwa ni kilu dzra mapa lamanene lawa ma patsriwiki ni mafuzra, swanga gandzrelo dzra tinhleke. I gandzrelo dzra ku hisiwa, nun’hwelo lowu nyonxisaka, gandzrelo ledzri hiseliwiki Yehovha. 14 A vhinyu dzra magandzrelo ya swa ku nwa lawa ma nyikeliwaka na swone, ka xihon’wana xin’wana ni xin’wana dzri fanela ku va kolomu ka malitru mabidzri, ka hamba ya xinuna dzri fanela ku tlulanyana litru, ka xihambana xa xinuna dzri fanela kuva dzra mpimu wa litru. Ledzri i gandzrelo dzra ku hisiwa ledzri fanelaka ku nyikeliwa hweti yin’wana ni yin’wana hi lembe. 15 Handle ka gandzrelo dzra ku hisiwa ledzri nyikeliwaka nkama ni nkama, ni gandzrelo dzra swa ku nwa ledzri nyikeliwaka kun’we na dzrone, ku fanela ku nyikeliwa ni xiphongo ka Yehovha swanga gandzrelo dzra xidoho.

16 “‘Hi siku dzra wu 14 ka hweti ya ku sungula ku ta va ni Paxkwa dzra Yehovha. 17 Nakone hi siku dzra wu 15 ka hweti yoleyo ku ta va ni nkhuvu. Ku dzringana 7 wa masiku ku ta diwa mapawu lawa ma kalaka ma nga txheliwanga fermentu.* 18 Hi siku dzra ku sungula ku ta va ni nhlengeletanu ya ku xwenga. A mi fanelanga mi yentxa ntizro ni wun’we wa ku bindzra. 19 Mi ta nyika Yehovha swihon’wana swibidzri, hamba yin’we ya xinuna ni 7 wa swihambana swa xinuna leswi swo ko va ni lembe dzrin’we akuva swi va gandzrelo dzra ku hisiwa. Mi fanela ku nyikela swifuyu leswi hanyiki ha hombe. 20 Mi ta swi nyikela kun’we ni magandzrelo ya tinhleke ya mapa lamanene lawa ma patsriwiki ni mafuzra, lawa ma nyikeliwaka kun’we na swone, a xihon’wana ha xin’we xi ta nyikeliwa ni kolomu ka makilu mazrazru ni hamfu, a hamba yi ta nyikeliwa ni kolomu ka makilu mabidzri. 21 Kutani ka swihambana leswiyani swa 7 ku ta nyikeliwa kilu dzrin’we ka xihambana ha xin’we, 22 mi ta nyikela ni xiphongo swanga gandzrelo dzra xidoho akuva mi kombela ku dzrivaleliwa. 23 Handle ka gandzrelo dzra ku hisiwa ledzri nyikeliwaka mixweni, ku nga gandzrelo ledzri nyikeliwaka dzra nkama ni nkama, mi ta nyikela magandzrelo lawa. 24 Mi ta nyikela magandzrelo lawa hi ndlela leyi fanaka siku ni siku ku dzringana 7 wa masiku, swanga swakuda,* dzri va gandzrelo dzra ku hisiwa, nun’hwelo lowu nyonxisaka Yehovha. Dzri fanela ku nyikeliwa ni gandzrelo dzra ku hisiwa ledzri nyikeliwaka nkama ni nkama ku patsra ni gandzrelo dzra swa ku nwa. 25 Hi siku dzra wu 7 mi fanela ku va ni nhlengeletanu ya ku xwenga. A mi fanelanga mi yentxa ntizro ni wun’we wa ku bindzra.

26 “‘Hi siku dzra ntsrhovelo wa ku sungula wa mihandzru leyi wupfiki, loko mi nyikela ka Yehovha gandzrelo dzra tinhleke leti ta ha tsrakamaka, ka nkhuvu wenu wa mavhiki mi fanela ku va ni nhlengeletanu ya ku xwenga. A mi fanelanga mi yentxa ntizro ni wun’we wa ku bindzra. 27 Mi ta nyikela swihon’wana swibidzri, hamba yin’we ya xinuna, ni 7 wa swihambana swa xinuna leswi swo ko va ni lembe dzrin’we, akuva swi va gandzrelo dzra ku hisiwa, nun’hwelo lowu nyonxisaka Yehovha, 28 ni gandzrelo ledzri nyikeliwaka na swone, ku nga gandzrelo dzra tinhleke dzra mapa lamanene lawa ma patsriwiki ni mafuzra, ka xihon’wana ha xin’we mi ta nyikela ni kolomu ka makilu mazrazru, ka hamba ha yin’we mi ta nyikela ni kolomu ka makilu mabidzri, 29 nakone ka swihambana leswiyani swa 7 ku ta nyikeliwa kilu dzrin’we ka xihambana ha xin’we, 30 mi ta nyikela ni xiphongo swanga gandzrelo dzra xidoho, akuva mi kombela ku dzrivaleliwa. 31 Mi ta swi nyikela ku yengesela ka gandzrelo dzra ku hisiwa ledzri nyikeliwaka nkama ni nkama, kun’we ni gandzrelo dzra tinhleke ledzri nyikeliwaka kun’we na swone. Swi fanela ku va swihazri leswi hanyiki ha hombe, nakone swi fanela ku nyikeliwa ni magandzrelo ya swa ku nwa lawa ma nyikeliwaka na swone.

29 “‘Hi siku dzra ku sungula ka hweti ya wu 7 mi fanela ku va ni nhlengeletanu ya ku xwenga. Mi nga txhuki mi hamba ntizro ni wun’we wa ku bindzra, i siku ledzri mi fanelaka ku txhaya xipalapala ha dzrone. 2 Mi ta nyikela xihon’wana, hamba yin’we ya xinuna ni 7 wa swihambana swa xinuna leswi swo ko va ni lembe dzrin’we na hinkwaswu swi li leswi hanyiki ha hombe, akuva swi va gandzrelo dzra ku hisiwa, nun’hwelo lowu nyonxisaka Yehovha, 3 mi ta nyikela ni gandzrelo ledzri nyikeliwaka kun’we na swone, ku nga gandzrelo dzra tinhleke dzra mapa lamanene lawa ma patsriwiki ni mafuzra. Ka xihon’wana mi ta nyikela kolomu ka makilu mazrazru, ka hamba ya xinuna mi ta nyikela kolomu ka makilu mabidzri, 4 nakone ka swihambana leswiyani swa 7 ku ta nyikeliwa kilu dzrin’we ka xihambana ha xin’we, 5 mi ta nyikela ni xiphongo swanga gandzrelo dzra xidoho, akuva mi kombela ku dzrivaleliwa. 6 Mi ta swi nyikela ku yengesela ka gandzrelo dzra ku hisiwa ledzri nyikeliwaka hweti ni hweti, kun’we ni gandzrelo dzra tinhleke ledzri nyikeliwaka kun’we na swone, ku tlhantekela ka gandzrelo dzra ku hisiwa ledzri nyikeliwaka nkama ni nkama, ni gandzrelo dzra tinhleke ledzri nyikeliwaka kun’we na swone, ku patsra ni magandzrelo ya swa ku nwa lawa ma nyikeliwaka kun’we na dzrone hi ku landzra mayentxela lawa ma tolovelekiki, swi va gandzrelo dzra ku hisiwa, nun’hwelo lowu nyonxisaka Yehovha.

7 “‘Kutani hi siku dzra wu 10 ka hweti yoleyo ya wu 7, mi fanela ku va ni nhlengeletanu ya ku xwenga, nakone mi fanela ku kombisa leswaku mi xukuvalile.* Mi nga txhuki mi hamba ntizro ni wun’we. 8 Mi ta nyikela xihon’wana, hamba yin’we ya xinuna, ni 7 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, akuva swi va gandzrelo dzra ku hisiwa, nun’hwelo lowu nyonxisaka Yehovha. 9 Mi ta nyikela ni gandzrelo ledzri nyikeliwaka kun’we na swone, ku nga gandzrelo dzra tinhleke dzra mapa lamanene lawa ma patsriwiki ni mafuzra, ka xihon’wana mi ta nyikela kolomu ka makilu mazrazru, ka hamba ya xinuna mi ta nyikela kolomu ka makilu mabidzri, 10 nakone ka swihambana leswiyani swa 7 ku ta nyikeliwa kilu dzrin’we ka xihambana ha xin’we, 11 handle ka magandzrelo lawo ni gandzrelo dzra xidoho dzra ku kombela ku dzrivaleliwa, gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni magandzrelo ya swa ku nwa lawa ma nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

12 “‘Hi siku dzra wu 15 ka hweti yoleyo ya wu 7 mi fanela ku va ni nhlengeletanu ya ku xwenga, nakone mi nga txhuki mi yentxa ntizro ni wun’we wa ku bindzra, mi fanela ku tlangela nkhuvu wa Yehovha ku dzringana 7 wa masiku. 13 Kutani mi ta nyikela 13 wa swihon’wana, tihamba tibidzri ta xinuna ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, mi ta swi nyikela swanga gandzrelo dzra ku hisiwa, ku nga gandzrelo ledzri hiseliwiki Yehovha, nun’hwelo lowu nyonxisaka. 14 Mi ta nyikela ni gandzrelo ledzri nyikeliwaka kun’we na swone, ku nga gandzrelo dzra tinhleke dzra mapa lamanene lawa ma patsriwiki ni mafuzra, ka xihon’wana ha xin’we ka leswiyani swa 13, mi ta nyikela ni makilu mazrazru, ka hamba ha yin’we ya xinuna ka leti tibidzri, mi ta nyikela makilu mabidzri, 15 ni kilu dzrin’we ka xihambana ha xin’we xa xinuna ka leswiyani swa 14, 16 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

17 “‘Kutani hi siku dzra wubidzri mi ta nyikela 12 wa tihomu, tihamba tibidzri ta xinuna, ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 18 mi ta nyikela ni magandzrelo ya tinhleke kun’we ni magandzrelo ya swa ku nwa lawa ma nyikeliwaka ni tihomu, tihamba ta xinuna, ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 19 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni magandzrelo ya swa ku nwa lawa ma nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

20 “‘Kutani hi siku dzra wuzrazru mi ta nyikela 11 wa tihomu, tihamba tibidzri ta xinuna ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 21 mi ta nyikela ni magandzrelo ya tinhleke, kun’we ni magandzrelo ya swa ku nwa, lawa ma nyikeliwaka ni tihomu, tihamba ta xinuna ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 22 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

23 “‘Kutani hi siku dzra wumune mi ta nyikela 10 wa tihomu, tihamba tibidzri ta xinuna ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 24 mi ta nyikela ni magandzrelo ya tinhleke kun’we ni magandzrelo ya swa ku nwa, lawa ma nyikeliwaka ni tihomu, tihamba ta xinuna ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 25 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

26 “‘Kutani hi siku dzra wuntlhanu mi ta nyikela 9 wa tihomu, tihamba tibidzri ta xinuna, ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 27 mi ta nyikela ni magandzrelo ya tinhleke kun’we ni magandzrelo ya swa ku nwa lawa ma nyikeliwaka ni tihomu tihamba ta xinuna ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 28 handle ka magandzrelo lawa ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

29 “‘Kutani hi siku dzra wu 6 mi ta nyikela 8 wa tihomu, tihamba tibidzri ta xinuna ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 30 mi ta nyikela ni magandzrelo ya tinhleke kun’we ni magandzrelo ya swa ku nwa, lawa ma nyikeliwaka ni tihomu, tihamba ta xinuna ni swihambana swa xinuna, hi ku ya hi nhlayu ya swone, na ku landzriwa mayentxela lawa ma tolovelekiki, 31 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni magandzrelo ya swa ku nwa lawa ma nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

32 “‘Kutani hi siku dzra wu 7 mi ta nyikela 7 wa tihomu, tihamba tibidzri ta xinuna ni 14 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, 33 mi ta nyikela ni magandzrelo ya tinhleke kun’we ni magandzrelo ya swa ku nwa, lawa ma nyikeliwaka ni tihomu, tihamba ta xinuna, ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 34 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone, kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

35 “‘Hi siku dzra wu 8 mi fanela kuva ni nhlengeletanu ya ku hlawuleka. A mi fanelanga mi hamba ntizro ni wun’we wa ku bindzra. 36 mi ta nyikela xihon’wana, hamba yin’we ya xinuna, ni 7 wa swihambana swa xinuna leswi swo ko va ni lembe dzrin’we, na hinkwaswu swi li leswi hanyiki ha hombe, akuva swi va gandzrelo dzra ku hisiwa, ku nga gandzrelo ledzri hiseliwiki Yehovha, nun’hwelo wa ku nyonxisa, 37 mi ta nyikela ni magandzrelo ya tinhleke kun’we ni magandzrelo ya swa ku nwa, lawa ma nyikeliwaka ni tihomu, tihamba ta xinuna, ni swihambana swa xinuna hi ku ya hi nhlayu ya swone, na ku landzriwa mayentxela lawa ma tolovelekiki, 38 handle ka magandzrelo lawo ni gandzrelo dzra ku hisiwa ledzri nyikeliwaka nkama ni nkama, gandzrelo dzra tinhleke ledzri nyikeliwaka kun’we na dzrone kun’we ni gandzrelo dzra swa ku nwa ledzri nyikeliwaka kun’we na dzrone, mi ta nyikela ni xiphongo swanga gandzrelo dzra xidoho.

39 “‘Lawa i magandzrelo lawa mi taka ma nyikela ka Yehovha hi tinguva tenu ta minkhuvu, ku tlhantekela ka magandzrelo lawa mi taka ma hamba akuva mi hetisisa swihlambanyu swenu, ni magandzrelo yenu ya ku tizrandzrela swanga magandzrelo ya ku hisiwa, magandzrelo yenu ya tinhleke, magandzrelo yenu ya swa ku nwa ni magandzrelo yenu ya ku kombela ku zrula.’” 40 Hiloko Moxe a byela Vaisrayele hinkwaswu leswi Yehovha mu leletiki swone.

30 Kutani Moxe a byela vazrangeli va tinxaka ta Israyele a ku: “Yehovha a te: 2 Loko wanuna wa kukazri a hlambanya ka Yehovha, kumbe a funga leswaku a ta titsrona ntxhumu wa kukazri, a nga fanelanga a honisa leswi a swi hlayiki. A fanela ku hetisisa hinkwaswu leswi a swi dumbisiki.

3 “Nakone loko wansati wa kukazri lweyi a ha liki mumpshwa a hlambanya ka Yehovha, kumbe a funga leswaku a ta titsrona ntxhumu wa kukazri nakasi a tsrhama kaya ka papayi wake 4 a va papayi wake a swi tiva leswaku a hlambanyile kumbe a tifungele ku titsrona swa kukazri, kutani a nga lwisani na swone, hinkwaswu leswi a titsrimbeliki swone swi ta tiya, nakone leswi a hlambanyiki ku titsrona swone swi ta tsrhama hi ndlela yoleyo. 5 Kambe loko papayi wake a yingela leswaku a hambe swihlambanyu kumbe a tifungele ku titsrona swa kukazri a gama a mu sivela, leswi a tihlambanyeliki swone a swi nge he tizri. Yehovha a ta mu dzrivalela hikusa papayi wake a mu sivelile.

6 “Kambe loko o txhata nakasi a tihambele xihlambanyu kumbe a hambe xidumbiso xa kukazri hi magugu, 7 kutani a nuna wake a swi tiva leswaku a hambe xihlambanyu kambe a nga mu siveli, leswi a swi hlambanyiki ni leswi a dumbisiki ku titsrona swone swi ta va hi ndlela yoleyo. 8 Kambe loko nuna wake a tiva leswaku a hambe xihlambanyu a gama a mu sivela, a nga ha yentxa leswaku a xihlambanyu kumbe xidumbiso lexi a xi hambiki hi magugu xi nga tizri, nakone Yehovha a ta mu dzrivalela lweyi wansati.

9 “Kambe loko wansati lweyi a feliwiki hi nuna, kumbe wansati lweyi a tsrhikaniki ni nuna wake a hamba xihlambanyu, hinkwaswu leswi a tihlambanyeliki swone swi ta tizra.

10 “Nambitasu loko wansati wa kukazri a hamba xihlambanyu kumbe a tifungela ku tsrhika ku yentxa swa kukazri na a li kaya ka nuna wake, 11 kutani nuna wake a swi tiva leswaku a hambe xihlambanyu, kambe a nga mu soli nambi ku mu sivela, hinkwaswu leswi lweyi wansati a tihlambanyeliki swone, kumbe leswi a tifungeliki ku titsrona swone, swi ta va hi ndlela yoleyo. 12 Kambe loko nuna wake a swi yingela leswaku a nsati a hambe xihlambanyu kumbe a tifungele ku titsrona swa kukazri a gama a swi helisa hi ku helela, leswi a nsati a swi hlambanyiki kumbe ku tifungela swone a swi nge he tizri hikusa a nuna a swi helisile, nakone Yehovha a ta mu dzrivalela wansati lweyo. 13 A nuna a fanela ku pfumelela kumbe ku helisa xihlambanyu xin’wana ni xin’wana kumbe swin’wana ni swin’wana leswi nsati a nga ha vaka na a tifungele ku titsrona swone. 14 Kambe loko nkama wu ya wu famba kutani a nuna a miyela, a ta va na o pfumelelana ni hinkwaswu leswi nsati a tihlambanyeliki swone ni hinkwaswu leswi a tifungeliki ku titsrona swone. A ta va na o pfumelelana na swone hikusa a nga swi solanga nkama lowu a tiviki leswaku a nsati a swi yentxile. 15 Kambe loko ntsrhaku ka ku swi yingela a tsrhika nkama wu khaluta ku ya ku ha khale a swi helisa, a ta tihlamulela hi kola ka xihoxo xa nsati wake.

16 “Lowu i nawu lowu Yehovha a wu nyikiki Moxe mayelanu ni wanuna ni nsati wake, ni mayelanu ni papayi ni n’wanake wa n’hwanyana lweyi a ha liki mumpshwa nakone a tsrhamaka kaya kwake.”

31 Hiloko Yehovha a byela Moxe a ku: 2 “Tidzrihiseli ka Vamidiyani hi mhaka ya leswi va swi yentxiki Vaisrayele. Ntsrhaku ka leswo u ta fa.”*

3 Xileswo, Moxe a byela vhanu a ku: “Lulamiselani vavanuna a makazri kwenu akuva va ya lwa ni Vamidiyani ni leswaku va ta hetisisa ku dzrihisela ka Yehovha ka Vamidiyani. 4 Ka lixaka ha dzrin’we ka tinxaka hinkwatu ta Israyele, mi fanela ku zrumela 1.000 wa vavanuna a yimpini.” 5 Xileswo, ka xitsrhungu lexikulu xa Vaisrayele, ku zrumeliwe 1.000 wa vavanuna y lixaka ha dzrin’we, leswi liki 12.000 wa vavanuna lava lulameliki yimpi.

6 Hiloko Moxe a zrumela 1.000 wa vavanuna va lixaka ha dzrin’we a yimpini, na va li kun’we na Feniyasi n’wana wa muprista Eliyazari akuva a va muzrangeli wavu nakone a a ni swibya swa ku xwenga ni swipalapala leswi a swi ta txhayiwa a yimpini. 7 Va lwe ni Vamidiyani hi lani Yehovha a leletiki Moxe ha kone va va va dlaya vavanuna hinkwavu. 8 Ka lava va dlayiwiki a ku ni ni ntlhanu wa tihosi ta Vamidiyani, ku nga Evhi, Rekemu, Zuri, Huru na Reba. Va dlaye na Balama n’wana wa Beyori hi xipada. 9 Kambe a Vaisrayele va teke vavasati ni vana va Vamidiyani va va yentxa swikazrawa. Va tlhele va teka swifuyu swavu hinkwaswu, mintlhambi yavu hinkwayu ni mintxhumu yavu hinkwayu. 10 Va hisa madoropa yavu hinkwawu lawa a va tsrhama ka wone ni mintxhatxha yavu hinkwayu.* 11 Va teke hinkwaswu leswi Vamidiyani a va li na swone ku patsra ni swifuyu swavu hinkwaswu, va teka ni vhanu va va yentxa swikazrawa. 12 Hiloko va buya ni vhanu lava va va khomiki leswaku va va swikazrawa ni mintxhumu hinkwayu leyi va yi tekiki, va swi yisa ka Moxe, muprista Eliyazari ni le mahlweni ka nhlengeletanu ya Israyele, a mbangwini lowu a va dzime mintxhatxha ka wone a mananga ya le Mowabu, kusuhi ni Yordani, a Yeriko.

13 Kutani Moxe na muprista Eliyazari ni vazrangeli hinkwavu va nhlengeletanu va huma va va tlhangaveta na va nge si na tlhasa ka mbangu lowu ku dzimiwiki ka wone mintxhatxha. 14 Kambe Moxe a hlundzrukela vavanuna lava bekiwiki akuva va zrangela masotxha, ku nga vavanuna lava a va li vazrangeli va 1.000 wa vhanu ni va 100 wa vhanu, lava a va buya hi le yimpini. 15 Moxe a va vutisa a ku: “Mi va tsrhikele yini vavasati hinkwavu lava va tama va hanya? 16 Phela hi vone lava hlohloteliwiki hi Balama akuva va yentxa leswaku a Vaisrayele va nga dumbeki ka Yehovha a mhakeni ya Peyori, lakakuva a nhlengeletanu ya Yehovha yi hlaseliwa hi ntungu. 17 Swoswi dlayani swidjahatana hinkwaswu ni vavasati hinkwavu lava samiki va hamba swa tinkuku ni wanuna. 18 Kambe a van’hwanyana hinkwavu lava kalaka va ngi ngi sama va yentxa swa tinkuku ni wanuna mi nga va tsrhika va hanya. 19 Nakone ku dzringana 7 wa masiku mi fanela ku tsrhamisa handle ka mbangu lowu ku dzimiwiki ka wone mintxhatxha. Mun’wana ni mun’wana kwenu lweyi a dlayiki mhunu, kumbe lweyi a khumbiki ntsrumbu, a fanela ku tibasisa hi siku dzra wuzrazru ni hi siku dzra wu 7, n’wine kun’we ni swikazrawa swenu. 20 Mi fanela ku basisa mpahla hinkwayu, mintxhumu hinkwayu leyi hambiwiki hi xikhumba, mintxhumu hinkwayu leyi hambiwiki hi voya bya mbuti ni mintxhumu hinkwayu leyi hambiwiki hi mapulangu.”

21 Hiloko muprista Eliyazari a byela masotxha lawa a ma ye yimpini a ku: “Hi lowu nawu lowu Yehovha a wu leletiki Moxe: 22 ‘Ko va ntsena woru, prata, kobri, nsimbi, xtanyu ni muthofu, 23 leswi liki, hinkwaswu leswi swi nga tiyiselelaka ndzrilo, mi fanelaka ku swi khalutisa ndzrilweni kutani swi va leswi basiki. Nambitanu, mi fanela ku tlhela mi swi basisa hi mati ya ku tibasisa ha wone; hinkwaswu leswi swi nga pshwaka mi fanela ku swi hlampswa hi mati. 24 Nakone hi siku dzra wu 7 mi fanela ku hlampswa mpahla yenu kutani mi ta va lava basiki, ntsrhaku ka leswo mi nga nghena a mintxhatxheni.’”

25 Hiloko Yehovha a byela Moxe a ku: 26 “Kontela hinkwaswu leswi va buyiki na swone, ku patsra ni swikazrawa ni swihazri; swi yentxi xikan’we na muprista Eliyazari kun’we ni vazrangeli va mindangu ya nhlengeletanu. 27 A mintxhumu leyo yi yave hi swiyenge swibidzri, a xiyenge xin’we u nyika masotxha lawa ma yiki yimpini, kasi lexin’wana u nyika lavan’wana va nhlengeletanu. 28 Ka xiyenge lexi nyikiwiki masotxha lawa ma yiki yimpini u ta teka mhunu mun’we ka 500 wa vone, homu yin’we ka 500 wa tone, ka timbongolo, ka tihamba ni ka timbuti akuva swi va tinemba ka Yehovha. 29 Ka xiyenge xa masotxha u ta teka leswo u nyika muprista Eliyazari swanga nhlengo lowu wu lumbaka Yehovha. 30 Ka xiyenge lexi nyikiwiki Vaisrayele, u fanela ku teka mhunu mun’we ka 50 wa vone, homu yin’we ka 50 wa tone, ka timbongolo, ka tihamba, ka timbuti, kun’we ni ka muxaka wun’wana ni wun’wana wa swifuyu, u swi nyika Valevhi lava hambaka mintizro leyi fambisanaka ni tabernakela dzra Yehovha.”

31 Xileswo Moxe na muprista Eliyazari va yentxa hi lani Yehovha leletiki Moxe ha kone. 32 Leswi saliki ka mintxhumu leyi masotxha ma buyiki na yone ku ve, 675,000 wa tihamba ni timbuti, 33 72,000 wa tihomu 34 ni 61,000 wa timbongolo. 35 A vavasati lava a va ngi ngi sama va yentxa swa tinkuku ni wanuna va ve 32,000 wa vone. 36 A xiyenge lexi nyikiwiki lava yiki yimpini ku ve 337,500 wa tihamba ni timbuti. 37 Nakone ka tone, 675 ti nyikeliwe ka Yehovha swanga tinemba. 38 Va nyikiwe ni 36,000 wa tihomu, lani ka tone 72 ti nyikeliwiki ka Yehovha swanga tinemba. 39 Va nyikiwe ni 30,500 wa timbongolo, lani ka tone 61 ti nyikeliwiki ka Yehovha swanga tinemba. 40 Va nyikiwe ni 16,000 wa vhanu, lani ka vone 32 va nyikeliwiki ka Yehovha swanga tinemba. 41 Ntsrhaku ka leswo, Moxe a nyika muprista Eliyazari a tinemba swanga nhlengo lowu lumbaka Yehovha, hi lani Yehovha leletiki Moxe ha kone.

42 A xiyenge lexi lumbaka Vaisrayele lexi Moxe a xi tsravukanisiki ni xiyenge lexi lumbaka vavanuna lava yiki yimpini, ku ve lexi: 43 337,500 wa tihamba ni timbuti, 44 36,000 wa tihomu, 45 30,500 wa timbongolo 46 ni 16,000 wa vhanu. 47 Kutani ka xiyenge lexi lumbaka Vaisrayele, Moxe a teka mhunu mun’we ka 50 wa vone, a teka ni xifuyu xin’we ka 50 wa swone, a nyika Valevhi, lava a va hamba mintizro leyi fambisanaka ni tabernakela dzra Yehovha, hi lani Yehovha a a lelete Moxe ha kone.

48 Kutani a vavanuna lava a va li vazrangeli va mintlawa ya masotxha, leswi liki, vazrangeli va 1.000 ni vazrangeli va 100, va tsrhindzrekelela Moxe, 49 va tlhasa va mu byela va ku: “A malandzra yaku ma kontele vavanuna lava hi va zrangelaka, lava yiki yimpini nakone ku kumeke leswaku a ku kiyeli mhunu. 50 Xileswo mun’wana ni mun’wana wezru a a nyiki Yehovha leswi a swi kumiki, mintxhumu ya woru, masindzra ya le ka milenge, masindzra ya le ka mavoko, switlan’wana swa ku funga hi swone, switlan’wana swa le ka tindleve ni mintxhumu yin’wana ya ku tixongisela hi yone,* akuva hi tikombelela ku dzrivaleliwa ka Yehovha.”

51 Xileswo Moxe na muprista Eliyazari va yamukela woru ni mintxhumu hinkwayu ya ku tixongisela ha yone leyi nyikeliwiki. 52 A woru hinkwadzru ledzri a vazrangeli va 1.000 ni vazrangeli va 100 va dzri nyikeliki ka Yehovha dzri dzringane 16.750 wa maxekele.* 53 A musotxha mun’wana ni mun’wana a a titekelile xiyenge xa kukazri ka leswi kumiwiki yimpini. 54 Moxe na muprista Eliyazari va yamukela woru ledzri a vazrangeli va 1.000 ni vazrangeli va 100 va va nyikiki dzrone, kutani va dzri yisa a tendeni dzra ntlhanganu akuva Vaisrayele va dzrimuka* ndlela leyi Yehovha a va pfuniki ha yone ku hlula.

32 A vana va Rubeni ni vana va Gadi a va ni swifuyu swa swinyingi ngopfu swinene, kutani va vona leswaku a tiko dzra Yazeri ni dzra Giliyadi a ku li miganga leyinene ya ku fuyela ka yone swihazri. 2 Hiloko vana va Gadi ni va Rubeni va yela Moxe, muprista Eliyazari ni vakulukumba va nhlengeletanu, va tlhasa va ku: 3 “A muganga wa Ataroti, Diboni, Yazeri, Nimira, Hexiboni, Eleyale, Sebamu, Nebo ni wa le Beyoni, 4 ku nga tiko ledzri Yehovha a dzri hluleliki nhlengeletanu ya Israyele, i muganga lowunene wa ku fuyela ka swone swihazri, nakone hine malandzra yaku hi ni swifuyu swa swinyingi.” 5 Va ya mahlweni va ku: “Loko hi kume timpswalu a matihlweni yaku, hi nyike tiko ledzri akuva dzri va dzrezru hine malandzra yaku. U nga hi tlulelisi nambu wa Yordani.”

6 Kutani Moxe a byela vana va Gadi ni vana va Rubeni a ku: “A vamakwenu va ta ya yimpini na n’wine me tsrhama lani? 7 Ha yini mi djula ku godolisa vhanu va Israyele akuva va nga tluleli tikweni ledzri nakunene Yehovha a taka va nyika dzrone? 8 Phela hi swoleswo vapapayi venu va swi yentxiki nkama lowu ni va zrumiki ku ya a Kadexi-barineya va ya kambela tiko. 9 Loko va tlhasa nkoveni wa Exikoli va va va vona tiko, va godolise vhanu va Israyele akuva va nga ngheni tikweni ledzri Yehovha a a djula ku va nyika dzrone. 10 Kutani Yehovha a hlundzruka ngopfu swinene a sikwini ledzriyani a va a hlambanya a ku: 11 ‘A vavanuna lava va nga ni 20 wa malembe ku ya henhla lava va humiki a tikweni dzra Egipta a va nge ti nghena a tikweni ledzri ni hlambanyiki ku dzri nyika Abrahamu, Izaki na Yakobe, hikusa a va ni yingisetanga hi timbilu tavu hinkwatu, 12 handle ka Kalebe n’wana wa Yefune lweyi wa Mukenizi na Yoxuwa n’wana wa Nuni, hikusa va yingiseti Yehovha hi timbilu tavu hinkwatu.’ 13 Xileswo Yehovha a hlundzrukela Vaisrayele ngopfu swinene, a va yentxa va zrendzrelekela mananga ku dzringana 40 wa malembe, ku ya tlhasa loko lixaka hinkwadzru ledzri a dzri yentxa swa ku biha mahlweni ka Yehovha dzri hela. 14 Kutani, n’wine vana va vhanu lava nga vadohi, mi yetisela vapapayi venu, mi djula ku yentxa leswaku Yehovha a tama a hlundzrukela Vaisrayele ngopfu swinene? 15 Loko mi tsrhika ku mu yingiseta a ta tlhela a tsrhika vhanu lava a mananga, kutani mi yentxa leswaku vhanu lava hinkwavu va helisiwa.”

16 Hi ku famba ka nkama va mu yela va tlhasa va ku: “Hi pfumeleli hi yakela swifuyu swezru swib’aya, hi yakela ni vanezru madoropa. 17 Kambe hi ta tsrhama na hi lulamele ku lwa, nakone hi ta famba ni Vaisrayele lavan’wana na hi le mahlweni kwavu ku ya tlhasa loko va titekela mimbangu yavu, kasi vanezru va ta tsrhama madoropeni lama tiyisiwiki nakone ma sizrelelekiki ka vahanyi va tiko ledzri. 18 A hi nge ti tlhelela makaya kwezru ku ya tlhasa loko Vaisrayele hinkwavu va yamukele tiko dzravu swanga pfindla. 19 Hikusa a hi nge ti yamukela pfindla kun’we na vone ka tlhelo ledzrin’wana dzra nambu wa Yordani nambi ku li kun’wana, hikusa hi ta va na hi yamukelile pfindla dzrezru ka tlhelo dzra le wuxeni dzra nambu wa Yordani.”

20 Moxe a va hlamula a ku: “Loko mo yentxa leswo, mi tilulamisela ku lwa mahlweni ka Yehovha; 21 loko mun’wana ni mun’wana wenu o tilulamisela ku lwa a va a tsremakanya nambu wa Yordani a mahlweni ka Yehovha, nkama lowu yene a hlongolaka valala vake a mahlweni kwake 22 ku ya tlhasa loko tiko dzri hluliwa a mahlweni ka Yehovha, mi ta titlhelela mi va mi nga ha vi ni nandzru a mahlweni ka Yehovha ni ka Vaisrayele. Kutani a tiko ledzri dzri ta va pfindla dzrenu a mahlweni ka Yehovha. 23 Kambe loko mi nga swi yentxi leswi, mi ta va mi dohele Yehovha. Hi ndlela leyo, swi tivani leswaku mi ta khatisiwa hi mhaka ya xidoho xenu. 24 Mi nga yakela vanenu madoropa mi yakela ni swifuyu swenu swib’aya, kambe mi fanela ku hetisisa leswi mi swi dumbisiki.”

25 A vana va Gadi ni vana va Rubeni va byela Moxe va ku: “A malandzra yaku ma ta yentxa leswi u swi hlayiki wene hosi yezru. 26 A vanezru, vasati vezru, mintlhambi yezru ni swi swifuyu swezru hinkwaswu swi ta sala a madoropeni ya Giliyadi, 27 kambe hine malandzra yaku hi ta tsremakanya nambu wa Yordani, vavanuna hinkwavu na va lulamele ku lwa yimpi a mahlweni ka Yehovha, hi lani u hlayaka ha kone wene hosi.”

28 Xileswo Moxe a nyikela swileleto mayelanu na vone ka muprista Eliyazari, Yoxuwa n’wana wa Nuni ni le ka tinhloko ta mindangu ya tinxaka ta Israyele. 29 Moxe a va byela a ku: “Loko vana va Gadi ni vana va Rubeni vo tsremakanya nambu wa Yordani na n’wine, na vavanuna hinkwavu va lulamele ku lwa yimpi a mahlweni ka Yehovha, kutani a tiko dzri hluliwa mahlweni kwenu, mi ta va nyika tiko dzra Giliyadi akuva dzri va pfindla dzravu. 30 Kambe loko va nga lulameli ku lwa nakone va nga tsremakanyi na n’wine va ta ya tsrhama na n’wine a tikweni dzra Kanana.”

31 Hiloko vana va Gadi ni vana va Rubeni va hlamula va ku: “Hi ta yentxa leswi Yehovha a hi byeliki swone hine malandzra yaku. 32 Hi ta lulamela ku lwa hi va hi tsremakanya nambu wa Yordani a mahlweni ka Yehovha hi ya tikweni dzra Kanana, kambe a mbangu lowu hi taka nyikiwa wone swanga pfindla dzrezru wu ta va ka tlhelo ledzri dzra le wuxeni dzra nambu wa Yordani.” 33 Xileswo Moxe a nyika vana va Gadi, vana va Rubeni ni hamfu ya lixaka dzra Manasi, n’wana wa Yosefa, a va nyika mfumu wa Sihoni hosi ya Vaamori ni mfumu wa Ogi hosi ya Baxani, leswi liki, mimbangu leyi lumbaka madoropa ya miganga leyo ni madoropa ya miganga ya le kusuhi.

34 Kutani a vana va Gadi va yaka* doropa dzra Diboni, Ataroti, Aroweri, 35 Atiroti-xofani, Yazeri, Yogibeha, 36 Beti-nimira ni Beti-hara, ku nga madoropa lawa ma tiyisiwiki, va patsre ni ku yakela mintlhambi yavu swib’aya hi mazribye. 37 A vana va Rubeni va yaka* doropa dzra Hexiboni, Eleyale, Kiriyatayimi, 38 Nebo, Bali-meyoni ni dzra Sibima, va gama va ma txhula mavito man’wana; a madoropa lawa va ma pfuxetiki va ma txhule mavito man’wana.

39 A vana va Makhiri n’wana wa Manasi, va ye va ya lwa a Giliyadi va va va teka tiko, va hlongola Vaamori lava a va tsrhama tikweni ledzro. 40 Xileswo Moxe a nyika vana va Makhiri, va lixaka dzra Manasi, tiko dzra Giliyadi va va va sungula ku tsrhama ka dzrone. 41 A vana va Yayiri n’wana wa Manasi va ye va ya hlasela swidoropana swa muganga wa Giliyadi va va va swi teka, va gama va swi txhula vito dzra ku Havhoti-yayiri. 42 Noba a ye hlasela doropa dzra Kenata ni swidoropana leswi a swi li kusuhi na dzrone a va a swi teka, kutani a swi vitana hi vito dzrake dzra ku Noba.

33 Leyi ku ve mimbangu leyi Vaisrayele va khalutiki hi ka yone a liyendzrweni dzravu loko va suka tikweni dzra le Egipta na va li hi mintlawa* nakone na va kongomisiwa hi Moxe na Aroni. 2 Hi ku landzra xileleto xa Yehovha, Moxe a a tsrala mimbangu leyi a va yima ka yone loko va yendzra, nakone a mimbangu yoleyo hi ku landzrelelana ka yone hi leyi: 3 Va suke a Ramsesi hi siku dzra wu 15 ka hweti ya ku sungula. Hi siku ledzri tlhantamaka Paxkwa, a Vaisrayele va suke va famba na va nga txhavi ntxhumu,* na va voniwa hi Vaegipta hinkwavu. 4 Hi nkama wolowo a Vaegipta a va li ku lahleni ka mativula yavu hinkwawu lawa Yehovha a ma dlayiki, hikusa Yehovha a a yavanyise swikwembu swavu.

5 Xileswo a Vaisrayele va suke a Ramsesi va ya dzima mintxhatxha a Sukoti. 6 Va suka a Sukoti va ya dzima mintxhatxha a Ethami, lani ku kumekaka a wugan’wini bya mananga. 7 Hi ku landzrela, va suka a Ethami va tlhela, va kongoma a Pihahiroti lani ku kumekaka mahlweni ka Bali-zefoni kutani va dzima mintxhatxha a mahlweni ka Migidoli. 8 Ntsrhaku ka leswo, va suka a Pihahiroti va tsremakanya lwandle va ya tlhasa a mananga, va famba mpfhuka wa masiku mazrazru a mananga ya Ethami, va tlhasa va dzima mintxhatxha a Mara.

9 Ntsrhaku ka leswo, va suka a Mara va ya tlhasa a Elimi. A Elimi a ku ni 12 wa swihlovo swa mati ni 70 wa minsinya ya minkindzru, hiloko va dzima mintxhatxha kolanu. 10 Va gama va suka a Elimi va ya dzima mintxhatxha kusuhi ni Lwandle dzra ku Pshwuka. 11 Va suka Lwandle dzra ku Pshwuka va ya dzima mintxhatxha a mananga ya Sini. 12 Va suka a mananga ya Sini va ya dzima mintxhatxha a Dofika. 13 Hi ku famba ka nkama va suka a Dofika va ya dzima mintxhatxha a Aluxi. 14 Hi ku landzrela, va suka a Aluxi va ya dzima mintxhatxha a Refidimi, lani a ku nga na mati akuva vhanu va nwa. 15 Va gama va suka a Refidimi va ya dzima mintxhatxha a mananga ya Sinayi.

16 Va suka a mananga ya Sinayi va tlhasa va dzima mintxhatxha a Kiberoti-hatavha. 17 Va suka a Kiberoti-hatavha va tlhasa va dzima mintxhatxha a Hazeroti. 18 Va gama va suka a Hazeroti va tlhasa va dzima mintxhatxha a Ritima. 19 Hi ku landzrela, va suka a Ritima va ya dzrima mintxhatxha a Rimoni-perezi. 20 Va suka a Rimoni-perezi va tlhasa va dzima mintxhatxha a Libna. 21 Va suka a Libna va tlhasa va dzima mintxhatxha a Risa. 22 Hi ku landzrela, va suka a Risa va tlhasa va dzima mintxhatxha a Kehelata. 23 Va suka a Kehelata va tlhasa va dzima mintxhatxha a Nhaveni ya Xeferi.

24 Va gama va suka a Nhaveni ya Xeferi va tlhasa va dzima mintxhatxha a Harada. 25 Va suka a Harada va tlhasa va dzima mintxhatxha a Makeloti. 26 Hi ku landzrela, va suka a Makeloti va tlhasa va dzima mintxhatxha a Tahati. 27 Va gama va suka a Tahati va tlhasa va dzima mintxhatxha a Tera. 28 Va suka a Tera va tlhasa va dzima mintxhatxha a Mitika. 29 Hi ku famba ka nkama va suka a Mitika va tlhasa va dzima mintxhatxha a Haximona. 30 Va gama va suka a Haximona va ya dzima mintxhatxha a Mosera. 31 Va suka a Mosera va ya dzima mintxhatxha a Bene-yakani. 32 Va suka a Bene-yakani va ya dzima mintxhatxha a Hori-hagidigadi. 33 Hi ku landzrela, va suka a Hori-hagidigadi va tlhasa va dzima mintxhatxha a Yotibatha. 34 Hi ku famba ka nkama va suka a Yotibatha va tlhasa va dzima mintxhatxha a Abrona. 35 Va suka a Abrona va tlhasa va dzima mintxhatxha a Eziyoni-geberi. 36 Va gama va suka a Eziyoni-geberi va tlhasa va dzima mintxhatxha a mananga ya Zini, leswi liki, a Kadexi.

37 Hi ku famba ka nkama va suka a Kadexi va tlhasa va dzima mintxhatxha a Nhaveni ya Hori, a ndzrelekanwini wa tiko dzra Edomu. 38 Kutani hi ku landzra xileleto xa Yehovha, muprista Aroni a khwela a Nhaveni ya Hori a tlhasa a fela kone hi siku dzra ku sungula ka hweti ya wuntlhanu, ntsrhaku ka 40 wa malembe na Vaisrayele va suke tikweni dzra Egipta. 39 Aroni a fele a Nhaveni ya Hori na a ni 123 wa malembe.

40 A hosi ya Aradi leyi a yi li Mukanana nakone a yi tsrhama a Negebu a tikweni dzra Kanana, yi yingela leswaku a Vaisrayele va le ku teni.

41 Hi ku famba ka nkama, va suka a Nhaveni ya Hori va tlhasa va dzima mintxhatxha a Zalmona. 42 Va gama va suka a Zalmona va tlhasa va dzima mintxhatxha a Punoni. 43 Hi ku landzrela, va suka a Punoni va tlhasa va dzima mintxhatxha a Oboti. 44 Va suka a Oboti va tlhasa va dzima mintxhatxha a Iye-abarimi, a ndzrelekanwini wa Mowabu. 45 Hi ku famba ka nkama va suka a Iyimu va tlhasa va dzima mintxhatxha a Diboni-gadi. 46 Va gama va suka a Diboni-gadi va tlhasa va dzima mintxhatxha a Almoni-diblatayimi. 47 Va suka a Almoni-diblatayimi va tlhasa va dzima mintxhatxha a tinhaveni ta muganga wa Abarimi a mahlweni ka Nebo. 48 Hi wugamu va suka a tinhaveni ta Abarimi va tlhasa va dzima mintxhatxha a mananga ya le Mowabu, a mahlweni ka Yordani lani ku fulazrelaniki ni Yeriko. 49 Va dzime mintxhatxha yavu kusuhi ni Yordani, ku sukela a Beti-yeximoni ku ya tlhasa a Abele-xitimi a mananga ya le Mowabu.

50 A mananga ya le Mowabu kusuhi ni Yordani, a Yeriko, Yehovha a byela Moxe a ku: 51 “Byela Vaisrayele u ku: ‘Mi ta tlulela nambu wa Yordani mi ya tikweni dzra Kanana. 52 Mi fanela ku hlongola vayaki hinkwavu va tiko dzra Kanana, mi hohlota swithombe swavu hinkwaswu leswi hambiwiki hi zribye, ni swithombe swavu leswi hambiwiki hi nsimbi, mi gilhita ni mimbangu yavu hinkwayu ya ku xwenga leyi tlakukiki. 53 Mi ta titekela tiko ledzro mi tsrhama ka dzrone, hikusa nakunene ni ta mi nyika dzrone akuva dzri va pfindla dzrenu. 54 Mi fanela ku yavela tiko hi ku tizrisa wuhlolotwana* akuva dzri va pfindla dzra mindangu yenu. Ka mintlawa leyikulu mi fanela ku nyikela pfindla dzra dzrikulu, ka mintlawa leyitsrongo mi fanela ku nyikela pfindla dzra dzritsrongo. A pfindla dzra mun’wana ni mun’wana dzri ta ya hi lomu wuhlolotwana byi welaka kone. Mi ta yamukela mimbangu swanga pfindla hi ku ya hi tinxaka ta vapapayi wenu.

55 “‘Kambe loko mi nga va hlongoli vayaki va tiko ledzro, lava mi taka va siya va ta fana ni swilavi a matihlweni yenu ni switlhavana a nyameni yenu nakone va ta mi xanisa a tikweni ledzri mi taka tsrhama ka dzrone. 56 Kutani ni ta mi yentxa leswi a ni djula ku va yentxa swone.’”

34 Yehovha a ya mahlweni a byela Moxe a ku: 2 “Nyika Vaisrayele swileleto leswi: ‘A mindzrelekanu ya tiko dzra Kanana ledzri mi taka nyikiwa dzrone swanga pfindla dzrenu hi leyi yi landzrelaka.

3 “‘A ndzrelekanu wa dzrone wa le nyingitimu wu sukela a mananga ya Zini kusuhi ni Edomu, a ndzrelekanu wa dzrone wa le wuxeni hi tlhelo dzra le nyingitimu wu sukela a wugan’wini bya Lwandle dzra Munyu.* 4 A ndzrelekanu wu ta djika wu khaluta hi le nyingitimu wa ganga dzra Akrabimi wu famba wu ya tlhasa a Zini, nakone wu ta ya gamela a nyingitimu wa Kadexi-barineya, wu gama wu famba hi Hazari-adari wu ya tlhasa a Azimoni. 5 Ku sukela a Azimoni a ndzrelekanu wu ta kongoma a Nkoveni* wa Egipta, nakone wu ta ya gamela a Lwandle.*

6 “‘A mpeladambu a ndzrelekanu wenu wu ta tsrema hi Lwandle Ledzrikulu* ni nkinga wa lwandle. Lowu wu ta va ndzrelekanu wenu wa le mpeladambu.

7 “‘A ndzrelekanu wa le ka tlhelo dzra le n’walungu wu ta va lowu: Mi ta hamba ndzrelekanu wenu ku sukela a Lwandle Ledzrikulu ku ya tlhasa a Nhaveni ya Hori; 8 wu sukela a Nhaveni ya Hori wu kongoma Lebo-hamati* wu ya gamela a Zedadi. 9 A ndzrelekanu wu ta khaluta hi Zifironi wu ya gamela a Hazari-enani. Lowu wu ta va ndzrelekanu wenu ka tlhelo dzra le n’walungu.

10 “‘Mi ta hamba ndzrelekanu wenu ka tlhelo dzra le wuxeni, wu sukela a Hazari-enani wu ya tlhasa a Xefami. 11 A ndzrelekanu wu ta suka a Xefami wu ya a Ribla a wuxeni bya Ayini, wu fulamela wu khaluta hi xinkovana xa le wuxeni bya Lwandle dzra Kinereti.* 12 Kutani a ndzrelekanu wu ta tlhasa a lwandle dzra Yordani wu ya gama a Lwandle dzra Munyu. Ledzri dzri ta va tiko dzrenu ni mindzrelekanu ya dzrone.’”

13 Xileswo Moxe a byela Vaisrayele a ku: “Ledzri i tiko ledzri mi taka dzri yava hi ku tizrisa wuhlolotwana* akuva dzri va pfindla dzrenu, hi lani Yehovha a leletiki ha kone akuva dzri nyikiwa 9 wa tinxaka ni hamfu. 14 Hikusa a va lixaka dzra Rubeni, va lixaka dzra Gadi ni hamfu ya va lixaka dzra Manasi kutani va dzri kumile pfindla dzravu. 15 A tinxaka letibidzri ni hamfu kutani ti dzri kumile pfindla dzra tone a wuxeni bya muganga wa Yordani kusuhi ni Yeriko hi tlhelo dzra le wuxeni.”

16 Yehovha a ya mahlweni a byela Moxe a ku: 17 “A mavito ya vavanuna lava va taka mi yavela tiko akuva dzri va pfindla dzrenu hi lawa: Muprista Eliyazari na Yoxuwa n’wana wa Nuni. 18 Kutani n’wine mi ta teka muzrangeli mun’we ka lixaka ha dzrin’we akuva mi yavela tiko dzri va pfindla dzrenu. 19 A mavito ya vavanuna lavo hi lawa: Ka lixaka dzra Yuda, Kalebe n’wana wa Yefune; 20 ka lixaka dzra vana va Simiyoni, Xemuwele n’wana wa Amihudi; 21 ka lixaka dzra Benjamini, Eliyadadi n’wana wa Kisiloni; 22 ka lixaka dzra vana va Dani, muzrangeli mun’we, ku nga Buki n’wana wa Yogili; 23 ka vana va Yosefa ka lixaka dzra vana va Manasi, muzrangeli wun’we, ku nga Haniyele n’wana wa Efodi; 24 ka lixaka dzra vana va Efrayimi, muzrangeli mun’we, ku nga Kemuwele n’wana wa Xiftani; 25 ka lixaka dzra vana va Zebuloni, muzrangeli mun’we, ku nga Elizafani n’wana wa Parnakhi; 26 ka lixaka dzra vana va Yisakari, muzrangeli mun’we, ku nga Palitiyele n’wana wa Azani; 27 ka lixaka dzra vana va Axere, muzrangeli mun’we, ku nga Akhihudi n’wana wa Xelomi; 28 ka lixaka dzra vana va Naftali, muzrangeli mun’we, ku nga Pedayele n’wana wa Amihudi.” 29 Yehovha a lelete leswaku vavanuna lava va yavela Vaisrayele tiko a tikweni dzra Kanana.

35 Yehovha a ya mahlweni a vulavula na Moxe a mananga ya le Mowabu kusuhi ni Yordani, a Yeriko, a ku: 2 “Byela Vaisrayele leswaku ka pfindla ledzri va taka dzri yamukela va fanela ku nyika Valevhi a madoropa akuva va tsrhama ka wone, va fanela ku va nyika ni mbangu wa ku byisela ka wone mintlhambi ka mimbangu leyi nga kusuhi ni madoropa. 3 Va ta tsrhama a madoropeni wolawo nakone a mimbangu ya ku byisela ka yone yi ta va ya mintlhambi yavu, ya mintxhumu yavu ni swifuyu swavu hinkwaswu leswin’wana. 4 A mbangu wa ku byisela ka wone mintlhambi ka madoropa lawa mi taka ma nyika Valevhi, wu ta leha 445 wa mametru* ku sukela ka muru lowu nga matlhelweni ka doropa. 5 Hi le handle ka doropa ka tlhelo dzra le wuxeni mi ta pima 890 wa mametru,* ka tlhelo dzra le nyingitimu mi ta pima 890 wa mametru, ka tlhelo dzra le mpeladambu mi ta pima 890 wa mametru ni le ka tlhelo dzra le n’walungu mi ta pima 890 wa mametru, kutani a doropa dzri kumeka hi le makazri. Leyi yi ta va mimbangu ya ku byisela ka yone a madoropeni yenu.

6 “Handle ka 42 wa madoropa laman’wana mi ta nyika Valevhi 6 wa madoropa ya wutumbelo, akuva lweyi a dlayiki mhunu a tsrutsrumela ka wone. 7 A madoropa hinkwawu lawa mi fanelaka ku nyika Valevhi i 48 wa wone, ku patsra ni mimbangu ya wone ya ku byisela ka yone. 8 A madoropa lawa mi taka nyika Valevhi mi ta ma pambula ka lawa ma nga pfindla dzra Vaisrayele. Ka mintlawa leyikulu mi ta teka ya manyingi, ka mintlawa leyitsrongo mi ta teka ya matsrongo. Ntlawa wun’wana ni wun’wana wu ta nyika Valevhi madoropa ya kukazri hi ku ya hi pfindla ledzri wu taka nyikiwa dzrone.”

9 Yehovha a ya mahlweni a byela Moxe a ku: 10 “Byela Vaisrayele u ku: ‘Mi ta tsremakanya nambu wa Yordani mi ya tikweni dzra Kanana. 11 Tihlawulelani madoropa lawa ma fanelekaka leswaku ma va madoropa ya wutumbelo, akuva mhunu a tsrutsrumela ka wone loko a txhuka a dlaya mhunu mun’wana hi mphazamu.* 12 A madoropa lawo ma ta tizra swanga mbangu wa ku tumbela ka wone loko mhunu wa kukazri a djula ku tidzrihisela hi mhaka ya lweyi a dlayiwiki, akuva lweyi a dlayiki mhunu a nga fi na a nge si na thethisiwa hi nhlengeletanu. 13 A 6 wa madoropa ya wutumbelo lawa mi taka ma hlawula ma ta tizrela swoleswo. 14 Mi ta hlawula madoropa mazrazru ka tlhelo ledzri dzra Yordani, ni madoropa mazrazru a tikweni dzra Kanana akuva ma va madoropa ya wutumbelo. 15 A madoropa wolawo ya 6 ma ta tizra swanga mbangu wa ku tumbela ka wone wa Vaisrayele, wa valuveli ni wa vhanu va matiko man’wana lava tsrhamaka na vone, akuva mun’wana ni mun’wana lweyi a dlayaka mhunu mun’wana hi mphazamu a tsrutsrumela ka wone.

16 “‘Kambe loko e ba mhunu wa kukazri hi ntxhumu wa nsimbi a va a fa, i mudlayi. Nakunene a mudlayi a fanela ku dlayiwa. 17 Loko e ba mhunu hi zribye dzra ku dzri nga dlaya, a va a fa, i mudlayi. Nakunene a mudlayi a fanela ku dlayiwa. 18 Loko e ba mhunu hi ntxhumu wa pulangu wa ku wu nga dlaya, a va a fa, i mudlayi. Nakunene a mudlayi a fanela ku dlayiwa.

19 “‘A mudzrihiseli wa ngati hi yene a taka dlaya mudlayi. A ta mu dlaya loko a mu kuma. 20 Loko o txhovha mhunu wa kukazri a fa, kumbe a fa hi mhaka ya leswi a mu txukumeteliki hi ntxhumu wa kukazri hi nkongometo wa ku biha, 21 kumbe e mu ba hi voko hi mhaka ya leswi a mu nyenyaka, a va a fa, nakunene na yene a ta dlayiwa. I mudlayi. A mudzrihiseli wa ngati a ta mu dlaya loko a mu kuma.

22 “‘Kambe loko e mu txhovha hi mphazamu, nakone a li leswaku a ngo mu nyenya, kumbe e mu txukumetela hi ntxhumu na a nga na nkongometo wa ku biha, 23 kumbe loko e tsrhika zribye dzri wa dzri mu djeka na a nga mu voni, a va a fa, nakone na a nga li nala wake, futsrhi a a nga na nkongometo wa ku mu vavisa, 24 a nhlengeletanu yi fanela ku yavanyisa a makazri kwake ni mudzrihiseli wa ngati, hi ku landzra minkongomiso leyi. 25 Nakone a nhlengeletanu yi fanela ku huluxa mhunu lweyi a dlayiki a mavokweni ya mudzrihiseli wa ngati, yi va yi mu tlhelisela a doropeni dzra ku tumbela ka dzrone lomu a tsrutsrumeliki kone, kutani a fanela ku tsrhama kohala ku ya tlhasa loko ku fa muprista lwenkulu lweyi a hlawuliwiki hi ku totiwa mafuzra ya ku xwenga.

26 “‘Kambe loko mhunu lweyi a dlayiki a huma handle a tlula ndzrelekanu wa doropa dzrake dzra ku tumbela ka dzrone lani a tsrutsrumeliki kone, 27 kutani a mudzrihiseli wa ngati a mu kuma handle ka doropa dzrake dzra ku tumbela ka dzrone, a va a mu dlaya, a mudzrihiseli wa ngati a nge ti va ni nandzru wa kuva a dlaye mhunu.* 28 Hikusa a fanela ku tsrhama a doropeni dzrake dzra ku tumbela ka dzrone ku ya tlhasa loko muprista lwenkulu a fa. Kambe ntsrhaku ka ku fa ka muprista lwenkulu, a nga tlhelela a kaya kwake. 29 A minkongomiso leyi yi ta va nawu wa wuyavanyisi wa hi lani ku nga helikiki a tinxakeni tenu hinkwatu, hinkwaku lomu mi taka tsrhama kone.

30 “‘Mun’wana ni mun’wana lweyi a dlayaka mhunu a fanela ku dlayiwa, loko ku ni wumboni bya timboni; kambe a ku fanelanga ku dlayiwa mhunu loko ko va ni wumboni bya mboni yin’we ntsena. 31 Mi nga ntxhumu mi pfumela leswaku mhunu lweyi a dlayiki mhunu wa kukazri hi maxivomu a tizruliwa, hikusa nakunene a fanela ku dlayiwa. 32 Nakone mi nga txhuki mi pfumela leswaku mhunu lweyi a tsrutsrumeliki doropeni dzrake dzra ku tumbela ka dzrone a tizruliwa a va a tlhelela kaya kwake na muprista lwenkulu a nge si na fa.

33 “‘Mi nga txhuki mi ntxhimisa tiko ledzri mi tsrhamaka ka dzrone, hikusa a ngati yi ntxhimisa tiko, nakone a ku na ku dzrivaleliwa ka ngati leyi halatiwiki a tikweni, ku to va ni ku dzrivaleliwa ntsena loko ku dlayiwa lweyi a halatiki ngati. 34 Mi nga txhuki mi ntxhimisa tiko ledzri mi tsrhamaka ka dzrone, ku nga lani na mine ni tsrhamaka kone; hikusa mine Yehovha ni tsrhama a makazri ka Vaisrayele.’”

36 A vazrangeli va mindangu ya vana va Giliyadi n’wana wa Makhiri n’wana wa Manasi, va mindangu ya vana va Yosefa, va yela Moxe, vakulukumba ni vazrangeli va mindangu ya Vaisrayele. 2 Va tlhasa va ku: “Yehovha a byele wene hosi yanga leswaku u yavela Vaisrayele tiko hi ku tizrisa wuhlolotwana* akuva dzri va pfindla dzravu, nakone Yehovha a byele wene hosi yanga leswaku u teka pfindla dzra makwezru Zelofeyadi u nyika vanake va van’hwanyana. 3 Loko vo txhata ni vavanuna va lixaka dzrimbeni dzra Israyele, a pfindla dzravu dzri ta susiwa ka pfindla dzra vapapayi vezru dzri ya va ka pfindla dzra lixaka ledzri va taka va na va lumba dzrone, hi ndlela leyo, ku ta va na ku pambuliwe xiyenge xa pfindla dzrezru. 4 Ni loko ku tlhasa Jubilewu* ka vhanu va Israyele, a pfindla dzra van’hwanyana lava dzri ta va ka lixaka ledzri va taka va na va lumba dzrone, hi ndlela leyo, a pfindla dzravu dzri ta susiwa ka pfindla dzra lixaka dzra vapapayi vezru.”

5 Kutani hi ku landzra xileleto xa Yehovha, Moxe a byela Vaisrayele a ku: “Leswi a lixaka dzra vana va Yosefa dzri swi hlayaka i ntiyiso. 6 Mayelanu ni vana va van’hwanyana va Zelofeyadi Yehovha a te: ‘Va nga txhata ni lweyi va mu djulaka. Kambe a fanela ku va wa wun’we wa mindangu ya lixaka dzra papayi wavu. 7 A ku na pfindla ni dzrin’we dzra Vaisrayele ledzri fanelaka ku susiwa ka lixaka dzrin’wana dzri yisiwa ka dzrin’wana, hikusa a Vaisrayele va fanela ku tsrhama* ni pfindla dzra lixaka dzra vakokwana vavu. 8 Nakone a n’wana mun’wana ni mun’wana wa xisati lweyi a nga ni pfindla a tinxakeni ta Israyele, a fanela ku va nsati wa wanuna lweyi a nga wa lixaka dzra papayi wake, akuva Vaisrayele va tama va tsrhama ni pfindla dzra vakokwana vavu. 9 A ku na pfindla ni dzrin’we ledzri fanelaka ku susiwa ka lixaka dzrin’wana dzri yisiwa ka lixaka dzrin’wana, hikusa a tinxaka ta Israyele ti fanela ku tsrhama ni pfindla dzra tone.’”

10 A vana va van’hwanyana va Zelofeyadi va yentxa hi lani Yehovha a leletiki Moxe ha kone. 11 Xileswo Makila, Tiriza, Hogla, Milka na Nowa, ku nga vana va van’hwanyana va Zelofeyadi, va txhata ni vana va vamakwavu va papayi wavu, 12 kutani va va vasati va vavanuna va mindangu ya Manasi n’wana wa Yosefa, akuva a pfindla dzravu dzri tama dzri va ka lixaka dzra ndangu wa papayi wavu.

13 Leswi i swileleto ni swiboho swa wuyavanyisi leswi Yehovha a swi nyikiki Vaisrayele hi ku tizrisa Moxe a mananga ya le Mowabu kusuhi ni Yordani, a Yeriko.