DETERONOMA

1 Lawa i mazritu lawa Moxe a ma byeliki Vaisrayele hinkwavu a mugangeni wa Yordani a mananga, lani ku lavisaniki ni Sufu, a xikazri ka Parani, Tofeli, Labani, Hazeroti ni Dizahabi. 2 (A mpfhuka wa ku suka a Horebe ku ya a Kadexi-barineya, hi ku tizrisa ndlela ya muganga wa tinhava wa Seyiri, i wa 11 wa masiku.) 3 Hi siku dzra ku sungula dzra hweti ya wu 11 ka lembe dzra wu 40, Moxe a byela Vaisrayele* hinkwaswu leswi Yehovha a mu leletiki leswaku a va byela swone. 4 Leswo swi yentxeke ntsrhaku ka loko a hlule Sihoni hosi ya Vaamori, lweyi a a tsrhama Hexiboni, ni ntsrhaku ka loko a Edreyi a hlule Ogi hosi ya Baxani, lweyi a a tsrhama a Axitaroti. 5 Na va li mugangeni wa Yordani, a tikweni dzra Mowabu, Moxe a sungula ku tlhamuxela Nawu lowu a ku:

6 “Na hi li Horebe, Yehovha Xikwembu Nkulukumba wezru a hi byele leswi: ‘Mi tsrhame ngopfu a mugangeni lowu wa tinhava. 7 Tilulamiselani akuva mi zruzra mi ya a mugangeni wa tinhava wa Vaamori, mi kongoma vayakelani vavu a Araba, a mugangeni wa tinhava, a Xefela, a Negebu, a mugangeni lowu nga kusuhi ni lwandle, a tikweni dzra Vakanana ni le Lebanoni* ku ya tlhasa ka nambu lowukulu, ku nga nambu wa Ewufrata. 8 Lavisani! Ni mi nyika tiko ledzri. Nghenani mi va mi teka tiko ledzri Yehovha a hlambanyiki ku dzri nyika vapapayi venu, ku nga Abrahamu, Izaki na Yakobe kun’we ni vatukulu vavu.*’

9 “A nkameni lowo ni mi byele ni ku, ‘a ni nge swi koti ku mi zrangela na ni li wuswanga. 10 Yehovha Xikwembu Nkulukumba wenu a mi yandzrisile lakakuva namunhla mi tale ngopfu ku fana ni tinyeleti ta matilo. 11 Ingiki Yehovha Xikwembu Nkulukumba wa vakokwana venu a nga mi yandzrisa hi lani ku phindhiwiki ka 1.000, ku tlula leswi mi nga swone swoswi, a va a mi tovokisa hi lani a mi dumbisiki ha kone. 12 Ni nga swi kotisa kuyini ku mi kongomisa na ni li wuswanga leswi mi tsrhamelaka ku ngurangura? 13 Hlawulani vavanuna a tinxakeni tenu, lava va tlhazrihiki, va ku dumbeka nakone va nga ni wuswikoti, kutani ni ta va beka akuva va va vazrangeli venu.’ 14 Hiloko n’wine mi ku: ‘Leswi u hi byelaka kuva hi swi yentxa i swinene.’ 15 Kutani ni teke vazrangeli va tinxaka tenu, ku nga vavanuna lava va tlhazrihiki nakone va nga ni wuswikoti, ni va beka va va vazrangeli va 1.000 wa vhanu, 100 wa vhanu, 50 wa vhanu, 10 wa vhanu, ni tindzruna ta tinxaka tenu.

16 “Hi nkama wolowo, ni nyike vayavanyisi venu minkongomiso leyi: ‘Loko mi yingela leswaku vamakwenu va ni mhaka ya kukazri, mi fanela ku yavanyisa hi ku lulama a makazri ka mhunu wa kukazri ni makwavu kumbe ni muluveli. 17 A mi fanelanga mi va ni xihlawuhlawu loko mi yavanyisa. Mi fanela ku yavanyisa mhunu wa xiyimu xa le hansi ni mhunu wa xiyimu xa le henhla hi ndlela leyi fanaka. Mi nga txhavisiwi hi mhunu ni mun’we, hikusa a ku yavanyisa ku lumba Xikwembu Nkulukumba. Nakone loko mhaka ya kone yi mi kazratela mi fanela ku yi buyisa kwanga akuva ni ta yi yingela.’ 18 A nkameni luwani ni mi lelete hinkwaswu leswi a mi fanela ku swi yentxa.

19 “Kutani hi sukile a Horebe hi va hi tsremakanya mananga lawayani ya makulu ya ku txhavisa lawa mi ma voniki a ndleleni leyi yaka a mugangeni wa tinhava wa Vaamori, hi lani Yehovha Xikwembu Nkulukumba wezru a hi leletiki ha kone. Hi wugamu hi tlhase a Kadexi-barineya. 20 Kutani ni mi byela ni ku: ‘Hi tlhasile a mugangeni wa tinhava wa Vaamori lowu Yehovha Xikwembu Nkulukumba wezru a hi nyikaka wone. 21 Lavisani, Yehovha Xikwembu Nkulukumba wenu a mi nyike tiko, fambani mi ya dzri teka hi lani Yehovha Xikwembu Nkulukumba wa vakokwana venu a mi byeliki ha kone. Mi nga txhavi, futsrhi mi nga zruzrumeli.’

22 “Kambe hinkwenu mi ni tsrhindzrekelelile mi va mi ku: ‘A hi zrumeni vavanuna va zranga va ya tikweni dzroledzro akuva va ya dzri kambela va va va hi buyisela ndzrava ya ndlela leyi hi fanelaka ku yi tizrisa ni madoropa lawa hi taka tlhasela ka wone.’ 23 A vonela ledzro dzri ve dzrinene lakakuva ni hlawule 12 wa vavanuna, mun’we ka lixaka ha dzrin’we. 24 Va suke va famba va tlhantuka va ya a mugangeni wa tinhava, va tlhasa Nkoveni wa Exikoli va va va wu kambela. 25 Va teke mihandzru ya kukazri ya tiko ledzro va hi buyela na yone, va tlhele va hi buyisela ndzrava, va ku: ‘A tiko ledzri Yehovha Xikwembu Nkulukumba wezru a hi nyikaka dzrone i dzrinene.’ 26 Kambe n’wine a mi swi djulanga ku ya kone, nakone mi yale nkongomiso wa Yehovha Xikwembu Nkulukumba wenu. 27 A mi ngurangura a mintxhatxheni yenu mi ku: ‘Yehovha awa hi nyenya, hi leswi yentxiki a hi susa tikweni dzra Egipta akuva a hi nyikela ka Vaamori leswaku va hi helisa. 28 Kasi hi ya kwini? A vamakwezru va hi hete ntamu* va ku: “Va ni ntamu nakone va lehile ku hi tlula, a madoropa yavu i makulu nakone ma tiyisiwe ku ya tlhasa matilweni,* hi vone ni Vaanaki kohala.”’

29 “Kutani ni mi byele ni ku: ‘Mi nga zruzrumeli nakone mi nga va txhavi. 30 Yehovha Xikwembu Nkulukumba wenu a ta mi zrangela nakone a ta mi lwela, hi lani a yentxiki ha kone a Egipta na mi swi vona. 31 Nakone a mananga mi yi vonile ndlela leyi Yehovha Xikwembu Nkulukumba wenu a mi hlayisiki ha yone,* hi lani mhunu a hlayisaka ha kone n’wanake, hinkwaku lomu a mi ya kone mi za mi ta ta tlhasa a mbangwini lowu.’ 32 Kambe nambileswi mi yentxeliwiki hinkwaswu leswi, a mi zanga mi kombisa lipfumelo ka Yehovha Xikwembu Nkulukumba wenu, 33 lweyi a a mi zrangela, akuva a mi kumela mbangu wa ku dzima ka wone mintxhatxha. A wusikwini a a humelela ndzrilweni, kasi a nhlikanhini a a humelela tlavini akuva a mi komba ndlela leyi a mi fanela ku famba ha yone.

34 “Hi nkama wolowo, Yehovha a a swi twa leswi a mi swi hlaya xileswo a mi hlundzrukelile a va a funga a ku: 35 ‘A nga kone ni mun’we ka lixaka ledzri dzra ku biha, lweyi a taka vona tiko ledzrinene ledzri ni hlambanyiki ku dzri nyika vapapayi venu, 36 handle ka Kalebe n’wana wa Yefune. Yene a ta dzri vona, nakone yene ni vanake ni ta va nyika tiko ledzri a fambiki ka dzrone hikusa a landzre Yehovha hi mbilu yake hinkwayu.* 37 (Nambi mine ni kwateliwile hi Yehovha hi mhaka yenu a va a ku: “Na wene u nge ti nghena hala. 38 A nandzra waku, Yoxuwa n’wana wa Nuni hi yene a taka nghena ka tiko ledzriyani. Mu tiyisi, hikusa hi yene a taka yentxa Israyele a dzri teka swanga pfindla.”) 39 A vana venu lava mi hlayiki leswaku a va ta tekiwa hi valala, ni vana venu lava swoswi va kalaka va nga swi tivi swa swinene ni swa ku biha va ta nghena tikweni nakone ni ta va nyika dzrone akuva dzri va dzravu. 40 Loko ku li n’wine, djikani mi kongoma mananga hi ndlela ya le Lwandle dzra ku Pshwuka.’

41 “Hiloko n’wine mi ni byela mi ku: ‘Hi dohele Yehovha, swoswi a hi tlhantukeni hi ya lwa hi lani Yehovha Xikwembu Nkulukumba wezru a hi byeliki ha kone!’ Kutani mun’wana ni mun’wana wenu a khoma tlhazri dzrake, na mi pimisa leswaku a swi ta nabyala ku tlhantuka mi ya mugangeni wa tinhava. 42 Kambe Yehovha a ni byele a ku: ‘Va byeli u ku: “Mi nga tlhantuki mi ya ku lweni, loko mo famba mi ta ya hluliwa hi valala venu.”’ 43 Ni mi byelile kambe a mi ni yingisetanga. Mi lwisane ni nawu wa Yehovha nakone mi ve ni nkanu, mi tlhantuka mi ya a mugangeni wa tinhava. 44 Kutani a Vaamori lava a va tsrhama ka muganga luwani va mi tlhangavetile va va va mi hlongolisa, hi lani tinyonxi ti yentxaka ha kone, va mi hlongolise mi kongoma Seyiri ku ya tlhasa a Horma. 45 Mi game mi tlhela, mi va mi sungula ku dzrila mahlweni ka Yehovha, kambe Yehovha a nga zanga a mi yingiseta. 46 Hi leswi swi nga yentxa mi tama mi tsrhama nkama wa ku leha a Kadexi.

2 “Kutani, hi ku landzra leswi Yehovha a ni leletiki swone, hi djike hi kongoma a mananga hi ndlela ya Lwandle dzra ku Pshwuka nakone hi yendzre nkama wa ku leha na hi gega muganga wa tinhava wa Seyiri. 2 Hi wugamu Yehovha a ni byele a ku: 3 ‘Mi ni nkama wa ku leha swinene na mi gega muganga lowu wa tinhava. Swoswi kongomani a n’walungu. 4 Byela vhanu u ku: “Mi ta khaluta hi le ndzrelekanwini wa tiko dzra vamakwenu, ku nga vana va Esawu, lava va tsrhamaka a Seyiri nakone va ta mi txhava, xileswo tivonelani ngopfu swinene. 5 Mi nga va hlaseli,* hikusa a ni nge ti mi nyika ni ntxhumu ni wun’we wa tiko dzravu, nambi mbangunyana wa ku beka nkondzro, hikusa a muganga wa tinhava wa Seyiri ni wu nyike Esawu. 6 A swakuda leswi mi taka swi da ni mati lawa mi taka ma nwa, mi fanela ku swi hakela. 7 Hikusa Yehovha Xikwembu Nkulukumba wenu awa mi tovokisa ka hinkwaswu leswi mi swi yentxaka, a swi tiva ha hombe leswi mi fambisiki xiswone ka mananga lawa ya makulu. Yehovha Xikwembu Nkulukumba wenu a ve na n’wine malembe lawa ya 40 futsrhi a mi pfumalanga ntxhumu.”’ 8 Hi ndlela leyo, hi khalute hi le ka vamakwezru, ku nga vana va Esawu, lava va tsrhamaka a Seyiri, hi tsrhika ndlela ya Araba, Elati ni Eziyoni-geberi.

“Hi game hi djika hi ya mahlweni hi famba hi ndlela ya mananga ya le Mowabu. 9 Kutani Yehovha a ni byele a ku: ‘U nga hlaseli tiko dzra Mowabu nakone u nga lwi navu hikusa a ni nge ti ku nyika ntxhumu a tikweni dzravu, hi leswi ni dzri nyikiki Ari, akuva dzri va pfindla dzra vana va Loti. 10 (Khale ka kone a mbangwini lowo a ku tsrhama Vaemimi, lava a va ni ntamu, a va li vanyingi nakone a va lehile ku fana ni Vaanaki. 11 A Varefayimi na vone a va fanisiwa ni Vaanaki, nakone a Vamowabu a va va vitana Vaemimi. 12 A khale a Vahori a va tsrhama a Seyiri, kambe a vatukulu va Esawu va va hlaselile va va helisa va va va tsrhama mbangwini wavu, hi lani Israyele a taka yentxa ha kone a tikweni ledzri dzri taka mu lumba, ledzri nakunene Yehovha a taka mi nyika dzrone.) 13 Swoswi tsremakanyani Nkova* wa Zeredi.’ Hiloko hi tsremakanya Nkova wa Zeredi. 14 A nkama lowu hi wu hetiki na hi famba ku sukela a Kadexi-barineya ku ya tlhasa loko hi tsremakanya Nkova wa Zeredi, wu ve wa 38 wa malembe ku ya tlhasa loko lixaka hinkwadzru dzra vavanuna va yimpi dzri nga ha vi kone a mintxhatxheni, hi lani Yehovha a a hlambanye ha kone. 15 A voko dzra Yehovha a dzri lwisana na vone akuva a va helisa a mintxhatxheni va za va hela.

16 “A nkama lowu vavanuna hinkwavu va yimpi va fiki, 17 Yehovha a ni byele a ku: 18 ‘Namunhla u ta khaluta hi le mugangeni wa Mowabu, leswi liki, hi le Ari. 19 Loko u tlhasa kusuhi ni Vaamoni, u nga va khomi hi ndlela ya nsele nakone u nga va pfuki, hikusa a ni nge ti ku nyika pfindla a tikweni dzra Vaamoni, hi leswi ni dzri nyikiki vatukulu va Loti. 20 A tiko ledzriyani a dzri tlhela dzri tiviwa swanga tiko dzra Varefayimi. (A khale a Varefayimi a va tsrhama kohala nakone a Vaamoni a va va vitana Vazamazumimi. 21 A va li vhanu va ntamu, vavanyingi nakone a va lehile ku fana ni Vaanaki, kambe Yehovha a va helisile a mahlweni ka Vaamoni, lava va va hlongoliki va va va tsrhama a mbangwini wavu. 22 Hi leswi a swi yentxeliki vatukulu va Esawu lava swoswi va tsrhamaka a Seyiri, loko a helise Vahori a mahlweni kwavu, lakakuva a vatukulu va Esawu va kota ku teka tiko dzra Vahori va va va tsrhama mbangwini wavu ku ta ta tlhasa namunhla. 23 Loko ku li Vaavhimi a va tsrhama hi mintlawa a mugangeni wa Gaza ku ya tlhasa loko va helisiwa hi Vakaftori, ku nga vana va Kaftori;* a Vakaftori va tsrhame mbangwini wa Vaavhimi.)

24 “‘Tilulamiselani mi tsremakanya Nkova* wa Arnoni. Lavisani! Ni nyikele Sihoni wa Muamori, hosi ya le Hexiboni, a mavokweni yenu. Xileswo sungulani ku teka tiko mi va mi lwa na yene. 25 Namunhla, ni ta sungula ku yentxa leswaku vhanu hinkwavu a hansi ka tilo lava taka yingela na ku vulavuliwa ha n’wine va zruzrumela va va va mi txhava, va ta pfilunganyeka va va va zruzrumela* hi mhaka yenu.

26 “Kutani na hi le a Kademoti ni zrumele vazrumiwa ka Sihoni Hosi ya le Hexiboni akuva va ya mu byela mazritu lawa ya ku zrula: 27 ‘Ni pfumeleli ni tsremakanya hi le tikweni dzraku, a ni nge ti suka a ndleleni nakone a ni nge ti djika ni ya xineneni kumbe a ximatsrini. 28 Ni to da ni ku nwa ntsena leswi u taka ni xavisela. Ni pfumeleli ni khaluta ni tifambela hi milenge. 29 Leswo hi leswi vatukulu va Esawu lava va tsrhamaka a Seyiri ni Vamowabu lava va tsrhamaka a Ari va swi yentxiki, ku ya tlhasa loko ni tsremakanya nambu wa Yordani ni nghena tikweni ledzri Yehovha Xikwembu Nkulukumba wezru a hi nyikaka dzrone.’ 30 Kambe Sihoni, Hosi ya le Hexiboni, a nga hi pfumelelanga kuva hi khaluta, hikusa Yehovha Xikwembu Nkulukumba wezru* a pfumelele leswaku a tiwomisa nhloko ni ku tlanyalisa mbilu yake akuva a mu nyikela a mavokweni yezru* hi lani swi vonekaka ha kone namunhla.

31 “Kutani Yehovha a ni byele a ku: ‘Lavisa! Ni sungule ku ku nyika Sihoni ni tiko dzrake. Sungula ku teka tiko dzrake.’ 32 Loko Sihoni ni masotxha yake hinkwawu va hi tlhangavetile akuva va lwa na hine a Yahazi, 33 Yehovha Xikwembu Nkulukumba wezru a mu nyikele kwezru, lakakuva hi mu hlula, yene, vana vake ni masotxha hinkwawu. 34 Ka khambi ledzro, hi teke madoropa yake hinkwawu hi va hi ma helisa,* ku patsra ni vavanuna, vavasati ni vatsrongwana. Hi helise hinkwavu. 35 He teka ntsena mintlhambi ni nhundzru ya madoropa lawa hi ma tekiki. 36 A ku vanga ni doropa ledzri viki ni ntamu ku hi tlula, ku sukela a Aroweri, lani ku kumekaka kusuhi ni Nkova* wa Arnoni (ku patsra ni doropa ledzri nga Nkoveni) ku ya tlhasa a Giliyadi, hinkwawu Yehovha Xikwembu Nkulukumba wezru a ma nyikele kwezru. 37 Nambitasu a mi tsrhindzrekelanga a tikweni dzra Vaamoni, leswi liki, mimbangu leyi nga kusuhi ni Nkova wa Yaboki ni le madoropeni ya muganga wa tinhava, nambi a mbangwini wun’wana lowu Yehovha Xikwembu Nkulukumba wezru a hlayiki leswaku hi nga yi ka wone.

3 “Ntsrhaku ka leswo hi djike hi famba hi Ndlela ya Baxani. Kutani Ogi, hosi ya Baxani, a suka ni masotxha yake hinkwawu a hi tela a ta ta lwa na hine a Edreyi. 2 Nambitasu, Yehovha a ni byele leswi: ‘U nga mu txhavi, hikusa ni ta mu nyikela a mavokweni yaku, yene ni vhanu vake hinkwavu kun’we ni tiko dzrake, u ta mu yentxa leswi u swi yentxiki Sihoni, hosi ya Vaamori, lweyi a a tsrhama a Hexiboni.’ 3 Xileswo, Yehovha Xikwembu Nkulukumba wezru a tlhele a nyikela Ogi, hosi ya Baxani, kun’we ni vhanu vake hinkwavu a mavokweni yezru lakakuva hi va dlaya ku nga sali mhunu ni mun’we. 4 Kutani hi teke madoropa yavu hinkwawu, a ku vanga ni doropa ledzri hi nga dzri siya. Ku ve 60 wa madoropa a mugangeni hinkwawu wa Arigobi, a mfun’wini wa Ogi, a Baxani. 5 A madoropa hinkwawu lawa a ma tiyisiwile hi mimuru ya ku leha, swipfalu ni swa ku khiya hi swone, nakone ndzreni ka madoropa lawo a ku ni miganga yinyingi leyitsrongo. 6 Nambitasu hi ma helisile* hi lani hi yentxiki ha kone ka Sihoni Hosi ya le Hexiboni, hi helise madoropa yake hinkwawu, ku patsra ni vavanuna, vavasati ni vatsrongwana. 7 Hi teke mintlhambi yavu ni nhundzru ya madoropa yavu.

8 “Hi nkama wolowo, hi teke mimbangu ya tihosi tibidzri ta Vaamori leti a ti fuma muganga wa Yordani, ku sukela a Nkoveni wa Arnoni* ku ya tlhasa a Nhaveni ya Hermoni, 9 (ku nga nhava leyi a Vasidoni a va yi vitana Siriyoni, kasi a Vaamori a va yi vitana Seniri). 10 Hi teke madoropa hinkwawu ya le gangeni, muganga hinkwawu wa Giliyadi ni muganga hinkwawu wa Baxani ku ya tlhasa a Saleka ni Edreyi, madoropa ya mfumu wa Ogi a Baxani. 11 Hikusa Ogi, hosi ya Baxani, a a li yene wa wugamu lweyi a a salile ka Varefayimi. (A nkaxa wake lowu hambiwiki hi nsimbi wa ha li a Raba a tikweni dzra Vaamoni. Wu lehe 4 wa mametru, wu yanama 1,8 wa mametru,* hi ku ya hi mapimela lawa ma tolovelekiki.) 12 A nkameni lowo hi teke tiko ledzro, ku sukela a Aroweri lani ku nga kusuhi ni Nkova wa Arnoni ni hamfu ya muganga wa tinhava ta Giliyadi. A madoropa ya tiko ledzro ni ma nyike vana va Rubeni ni vana va Gadi. 13 Kutani a mbangu lowu saliki wa Giliyadi ni tiko hinkwadzru dzra Baxani, ledzri a dzri hamba xiyenge xa mfumu wa Ogi ni wu nyike hamfu ya lixaka dzra Manasi. A muganga hinkwawu wa Arigobi lowu lumbaka Baxani a wu tiviwa swanga tiko dzra Varefayimi.

14 “Yayiri n’wana wa Manasi a teke muganga wa Arigobi ku ya tlhasa a ndzrelekanwini wa Gexuri ni wa Vamakati a va a txhula miganga leyitsrongo ya Baxani vito dzrake, ku nga Havhoti-yayiri, nakone yi vitanisiwa xileswo ku ta ta tlhasa namunhla. 15 Makhiri ni mu nyike tiko dzra Giliyadi. 16 Nakone a vana va Rubeni ni vana va Gadi ni va nyike muganga lowu sukelaka a Giliyadi ku ya tlhasa a Nkoveni wa Arnoni (a makazri ka nkova hi lani va gamelaka kone) ni ku ya tlhasa a nkoveni wa Yaboki, lani ku nga ndzrelekanu wa tiko dzra Vaamoni. 17 Ni va nyike ni Araba, nambu wa Yordani ni nkinga wa wone, ku sukela a Kinereti ku ya tlhasa Lwandle dzra Araba, ku nga Lwandle dzra Munyu, kusuhi ni switsrunga swa Pisga leswi swi kumekaka wuxeni.

18 “Kutani ni mi nyike xileleto lexi: ‘Yehovha Xikwembu Nkulukumba wenu a mi nyike tiko ledzri akuva mi dzri teka. Vavanuna hinkwavu va ntamu va ta tilulamiselela yimpi va va va tsremakanya nambu wa Yordani a mahlweni ka vamakwavu, ku nga Vaisrayele. 19 Ntsena vasati venu, vatsrongwana venu, ni mintlhambi yenu (hikusa na swi tiva leswaku mi ni mintlhambi ya yinyingi) hi vone va taka tama va tsrhama a madoropeni lawa ni mi nyikiki wone, 20 ku ya tlhasa loko Yehovha a nyika vamakwenu ku wisa hi lani a mi nyikiki ha kone, ni ku ya tlhasa loko va teke tiko ledzri Yehovha Xikwembu Nkulukumba wavu a taka va nyika dzrone ka tlhelo ledzrin’wana dzra nambu. Kutani mi ta tlhela, mun’wana ni mun’wana a timukela mbangwini wake lowu ni mu nyikiki wone.’

21 “A nkameni lowo ni byele Yoxuwa ni ku: ‘U tivonele hi wuswaku leswi Yehovha Xikwembu Nkulukumba wenu a swi yentxiki tihosi letiyani tibidzri. Yehovha a ta yentxa leswi fanaka hi mimfumu hinkwayu leyi mi taka yi hlasela ka tlhelo ledzrin’wana dzra Yordani. 22 Mi nga va txhavi hikusa Yehovha Xikwembu Nkulukumba wenu hi yene a mi lwelaka.’

23 “A nkameni lowo ni kombele Yehovha* ni ku: 24 ‘We Yehovha Hosi Leyi Nga Henhlahenhla, u sungule ku komba nandzra waku a wukulu byaku ni voko dzraku dzra ntamu, hikusa a ku na xikwembu matilweni kumbe a misaveni, lexi yentxaka mintizro leyikulu ya ku fana ni yaku. 25 No kombela, ni tsrhike ni tsremakanya ni ya ka tlhelo ledzrin’wana dzra nambu wa Yordani akuva ni ya vona tiko ledzrinene, muganga lowunene wa tinhava ni le Lebanoni.’ 26 Kambe Yehovha a a ha ni hlundzrukelile hi mhaka yenu, xileswo a nga ni yingisetanga. A matsrhan’wini ya leswo Yehovha a te: ‘Swi dzringanile! U nga ha tlheli u khanela na mine hi mhaka leyi. 27 Tlhantuka u ya henhla ka nhava ya Pisga u lavisa wuxeni, mpeladambu, nyingitimu ni n’walungu, u vona tiko, hikusa a wu nga ti tlulela nambu wa Yordani. 28 Beka Yoxuwa a va muzrangeli, mu kutxi u va u mu tiyisa hikusa hi yene a taka tsremakanya mahlweni ka vhanu lava, nakone hi yene a taka va yentxa va teka tiko ledzri u taka dzri vona.’ 29 Leswo swi yentxeke nkama lowu a hi tsrhama a nkoveni a mahlweni ka Beti-peyori.

4 “Swoswi n’wine Vaisrayele, yingisetani milawu ni swiboho swa wuyavanyisi leswi ni mi dondzrisaka ku swi landzra akuva mi hanya, mi nghena ka tiko ledzri Yehovha Xikwembu Nkulukumba wa vakokwana venu a mi nyikaka dzrone akuva mi dzri teka. 2 Mi nga yengeseli ntxhumu kumbe ku pumba ka mazritu lawa ni mi byelaka wone. Bekisani milawu ya Yehovha Xikwembu Nkulukumba wenu, leyi ni mi leletaka yone.

3 “Mi swi vonile leswi Yehovha a swi yentxiki a mhakeni ya Bali wa le Peyori; Yehovha Xikwembu Nkulukumba wenu a helise vavanuna hinkwavu a makazri kwenu lava va landzreliki Bali wa le Peyori. 4 Kambe n’wine mi namazrelaka Yehovha Xikwembu Nkulukumba wenu ma ha hanya ku ta ta tlhasa ni namunhla. 5 Lavisani, ni mi dondzrise milawu ni swiboho swa wuyavanyisi hi lani Yehovha Xikwembu Nkulukumba wanga a ni leletiki ha kone, akuva mi hanya ha swone a tikweni ledzri mi taka titekela dzrone. 6 Mi fanela ku swi landzrelelisisa ha hombe, hikusa leswo swi ta kombisa leswaku mi ni wutivi ni ku twisisa a mahlweni ka vhanu lava taka twa hi ta milawu leyo, nakone va ta ku: ‘Nakunene a tiko ledzri ledzrikulu dzri ni wutlhazri ni ku twisisa.’ 7 Hikusa he dzrini tiko ledzrikulu ledzri swikwembu swa dzrone swi nga kusuhi na dzrone, ku fana ni leswi Yehovha Xikwembu Nkulukumba wezru a nga kusuhi na hine minkama hinkwayu loko hi mu vitana? 8 Nakone he dzrini tiko ledzrikulu ledzri nga ni milawu ya ku lulama ni swiboho swa wuyavanyisi leswi fanaka ni Nawu lowu hinkwawu, lowu ni wu bekaka mahlweni kwenu namunhla?

9 “Ntsena tivonelani mi va mi zreya ndleve, akuva mi nga dzrivali mintxhumu leyi mi yi voniki ni kuva yi nga suki a timbilwini tenu wutomi byenu hinkwabyu. Handle ka leswo, yi dzrungulelani vanenu ni vatukulu venu. 10 A siku ledzri mi viki mahlweni ka Yehovha Xikwembu Nkulukumba wenu a Horebe, Yehovha a ni byele a ku: ‘Hlengeleta vhanu a mahlweni kwanga akuva va yingela mazritu yanga, leswaku va ta dondzra ku ni txhava masiku hinkwawu lawa va taka va na va hanya a misaveni, ni leswaku va ta dondzrisa vanavu.’

11 “Xileswo mi tsrhindzrekelile mi ya kusuhi ni nhava, nakone a nhava a yi pfuzra lakakuva a malangavi ma tlhasa matilweni; a ku mphume ngopfu nakone a ku ni tlavi dzra ku txhavisa. 12 Kutani Yehovha a sungule ku vulavula na n’wine na a li ndzrilweni. Mi yingele mpfumawulu wa mazritu, kambe a mi swi vonanga leswaku lweyi a a ma hlaya a a tsrhamisise kuyini, me yingela zritu ntsena. 13 Nakone a mi byele xipfumelelanu xake lexi a mi leletiki kuva mi xi landzra, ku nga 10 wa Milawu, a gama a yi tsrala ka swipepezrele swibidzri swa mazribye. 14 A nkameni lowo Yehovha a ni zrume kuva ni mi dondzrisa milawu ni swiboho swa wuyavanyisi leswi mi taka hanya ha swone a tikweni ledzri mi taka nghena akuva mi dzri teka.

15 “Swanga hi leswi mi kalaka mi nga swi vonanga leswaku Yehovha a tsrhamisise kuyini siku ledzri a khaneliki na n’wine a Horebe na a li ndzrilweni, tivonelani ngopfu swinene 16 akuva mi nga wongeki, mi tihambela xithombe xa ku vatliwa lexi nga ni xivumbeko xa ntxhumu wun’wana ni wun’wana, xi nga ha va xa ku fana ni wanuna kumbe ni wansati, 17 xi nga ha va xa ku fana ni xihazri xin’wana ni xin’wana xa la misaveni, kumbe xa ku fana ni nyanyana yin’wana ni yin’wana leyi hahaka, 18 xi nga ha va xa ku fana ni xihazri xin’wana ni xin’wana lexi fambaka hi khuzri kumbe nhlampfi yin’wana ni yin’wana leyi nga matini a hansi ka misava. 19 Nakone loko u lavisa henhla u vona khandzra hinkwadzru dzra le tilweni, ku nga dambu, n’weti ni tinyeleti, u nga wongeki nakone u nga swi khinsameli, futsrhi u nga swi tizreli. Yehovha Xikwembu Nkulukumba waku a swi nyike hinkwavu lava nga hansi ka tilo. 20 Kambe hi n’wine lava Yehovha a mi tekiki a va a mi susa xitikweni xa ku hisela ka xone tinsimbi a Egipta, akuva mi va vhanu vake lava lumbaka yene ntsena, hi lani swi nga ha kone ni namunhla.

21 “Yehovha a ni kwatelile hi mhaka yenu, a va a ni hlambanyela leswaku a ni nga ti tsremakanya nambu wa Yordani nambi ku nghena tikweni ledzrinene ledzri Yehovha Xikwembu Nkulukumba wenu a mi nyikaka dzrone swanga pfindla. 22 Phela ni ta fela kola tikweni ledzri; a ni nga ti tsremakanya nambu wa Yordani, kambe n’wine mi ta tsremakanya mi va mi titekela tiko ledzrinene. 23 Tivonelani akuva mi nga dzrivali xipfumelelanu lexi Yehovha Xikwembu Nkulukumba wenu a xi yentxiki na n’wine, nakone mi nga tivatleli swithombe swa ku fana ni mintxhumu leyi Yehovha Xikwembu Nkulukumba wenu a yi yilisaka. 24 Hikusa Yehovha Xikwembu Nkulukumba wenu i ndzrilo lowu helisaka, i Xikwembu Nkulukumba lweyi a djulaka kuva ku gandzreliwa yene ntsena.

25 “Loko mi va ni vana ni vatukulu nakone mi va na mi tsrhame nkama wa ku leha a tikweni, kutani mi doha hi ku hamba xithombe xa muxaka wun’wana ni wun’wana, mi yentxa leswi bihiki mahlweni ka Yehovha Xikwembu Nkulukumba wenu ni ku mu khunguvanyisa, 26 namunhla hinkwavu lava nga matilweni ni la misaveni i timboni ta leswaku nakunene mi ta nyamalala hi ku kahlula a tikweni ledzri mi taka dzri teka loko mi tsremakanya nambu wa Yordani. A mi nge ti tsrhama nkama wa ku leha ka dzrone, mi ta helisiwa mi nga ha vi kone. 27 Yehovha a ta mi hangalasa a matikweni man’wana nakone i vatsrongo lava va taka huluka a matikweni lawa Yehovha a taka va na a mi hangalaseli ka wone. 28 A matikweni wolawo mi ta sindzriseka ku tizrela swikwembu leswi hambiwiki hi vhanu, swa pulangu ni swa zribye, swikwembu leswi swi kalaka swi nga voni, swi nga yingeli, swi nga di nambi ku nun’hwetela.

29 “Loko na u li kohala u djuletela Yehovha Xikwembu Nkulukumba waku nakunene u ta mu kuma, loko u mu djuletela hi mbilu yaku hinkwayu ni hi wutomi byaku hinkwabyu.* 30 Hi nkama wolowo loko u lavisana ni mahlomulo lamakulu ni loko u ta va u humeleliwe hi mintxhumu leyi hinkwayu, lanu ke, u ta tlhelela ka Yehovha Xikwembu Nkulukumba waku kutani yene a ta yingela zritu dzraku. 31 Hikusa Yehovha Xikwembu Nkulukumba waku, i Xikwembu Nkulukumba lweyi a nga ni timpswalu. A nge ti ku tsrhika nambi ku ku helisa, nakone a nga ti helisa xipfumelelanu lexi a xi hambiki ni vakokwana vaku hi ku tizrisa xihlambanyu.

32 “Swoswi vutisa hi ta minkama leyi khalutiki na u nge si va kone, ku sukela nkama lowu Xikwembu Nkulukumba a tumbuluxiki mhunu ha wone a misaveni, ku sukela a wugan’wini byin’wana bya matilo ku ya tlhasa a wugan’wini byin’wana bya matilo. Xana ku sama ku yentxeka ntxhumu wa wukulu wa ku fana ni lowu? 33 Xana ku sama ku yingeliwa swa ku fana ni leswi? Xana ku ni vhanu lava samiki va yingela zritu dzra Xikwembu Nkulukumba na a vulavula makazri ka ndzrilo ku fana ni leswi wene u dzri yingeliki u va u tama u hanya? 34 Kumbexana Xikwembu Nkulukumba a same a humesa tiko dzrake a makazri ka tiko dzrimbeni hi ku tizrisa makhombo, swikombiso, mahlolana, yimpi, voko dzra ntamu ni hi mintizro leyi txhavisaka, hi lani Yehovha Xikwembu Nkulukumba waku a swi yentxiki ha kone kwenu a Egipta na mi swi vona? 35 Hi n’wine mi kombiwiki mintxhumu leyi, akuva mi ta swi tiva leswaku Yehovha hi yene Xikwembu Nkulukumba wa ntiyiso, a ku na mun’wana handle kwake. 36 A yentxe leswaku mi yingela zritu dzrake na dzri huma a tilweni akuva a mi kawuka, nakone a mi yentxe mi vona ndzrilo wake lowukulu mi va mi yingela mazritu yake a makazri ka ndzrilo.

37 “Hi yene a mi humesiki a Egipta hi ntamu wake lowukulu, hikusa a zrandzre vakokwana venu, nakone a hlawule vatukulu vavu. 38 A mahlweni kwenu a hlongole vhanu va matiko lamakulu nakone va nga ni ntamu ku mi tlula, akuva a mi nyika tiko dzravu leswaku dzri va pfindla dzrenu, hi lani swi nga ha kone namunhla. 39 Xileswo, ku sukela ka namunhla swi tivani mi tlhela mi swi beka a timbilwini leswaku Yehovha i Xikwembu Nkulukumba wa ntiyiso, a henhla matilweni ni le hansi misaveni. A ku na mun’wana. 40 Bekisani milawu yake ni swileleto swake leswi ni mi byelaka swone namunhla, akuva hinkwaswu swi mi fambela ha hombe n’wine ni vanenu, ni kuva mi ta kota ku hanya nkama wa ku leha a tikweni ledzri Yehovha Xikwembu Nkulukumba wenu a mi nyikaka dzrone.”

41 A nkameni wolowo, Moxe a hlawule madoropa mazrazru ka tlhelo ledzrin’wana dzra Yordani. 42 Loko mhunu wa kukazri o txhuka a phazama a dlaya mhunu mumbeni na ku li leswaku a a nga mu nyenyi, a fanela ku tsrutsrumela ka dzrin’we dzra madoropa lawo akuva a hanya. 43 A madoropa ya kone hi lawa: Doropa dzra Bezeri, ledzri kumekaka a mananga a mbangwini wa ku tlakuka, dzrone dzri nyikiwe lixaka dzra Rubeni; a doropa dzra Ramoti a Giliyadi, dzri nyikiwe lixaka dzra Gadi, kasi a doropa dzra Golani a Baxani, dzri nyikiwe lixaka dzra Manasi.

44 Moxe a nyikele Nawu wa Xikwembu Nkulukumba ka vhanu va Israyele. 45 Leswi i swidzrimuxo, milawu ni swiboho swa wuyavanyisi leswi Moxe a swi nyikiki Vaisrayele ntsrhaku ka loko va hume a Egipta, 46 a mugangeni wa Yordani, a nkoveni lowu nga a mahlweni ka Beti-peyori, a tikweni dzra Sihoni Hosi ya Vaamori, lweyi a a tsrhama a Hexiboni, lweyi Moxe kun’we ni Vaisrayele va mu hluliki ntsrhaku ka loko va hume a Egipta. 47 Va teke tiko dzrake ni tiko dzra Ogi Hosi ya Baxani, ku nga tihosi tibidzri ta Vaamori leti a ti fuma muganga wa le wuxeni wa Yordani, 48 ku sukela a Aroweri, ku nga muganga lowu kumekaka kusuhi ni Nkova wa Arnoni,* ku ya a Nhaveni ya Siyoni, leswi liki, a Nhaveni ya Hermoni, 49 ni tiko hinkwadzru dzra Araba, a mugangeni wa le wuxeni bya Yordani, ku ya tlhasa Lwandle dzra Araba, kusuhi ni Pisga.

5 Kutani Moxe a hlengeleta Vaisrayele hinkwavu a va byela a ku: “Wene Israyele, yingiseta milawu ni swiboho swa wuyavanyisi leswi ni ku byelaka swone namunhla. Mi fanela ku swi dondzra ni ku swi yingiseta ha hombe. 2 Yehovha Xikwembu Nkulukumba wezru a hambe xipfumelelanu na hine a Horebe. 3 Yehovha a nga hambanga xipfumelelanu lexi ni vakokwana vezru, kambe a xi hambe na hine, hine hinkwezru hi nga kone lani namunhla. 4 Yehovha a vulavule na n’wine hi ku kongoma a nhaveni, a makazri ka ndzrilo. 5 Ka khambi ledzriyani leswi a mi txhava hi mhaka ya ndzrilo, a mi tlhantukelanga nhaveni, xileswo a ni li makazri ka n’wine na Yehovha, akuva ni mi tlhasisela zritu dzra Yehovha. Yene a te:

6 “‘Hi mine Yehovha Xikwembu Nkulukumba waku, lweyi a ku humesiki a tikweni dzra Egipta, a tikweni dzra wukazrawa.* 7 U nga txhuki u gandzrela swikwembu swin’wana,* gandzrela mine ntsena.

8 “‘U nga txhuki u tihambela xithombe lexi vatliwiki kumbe lexi fanekiselaka ntxhumu wa kukazri lowu nga henhla a tilweni, kumbe lowu nga hansi a misaveni, kumbe lowu nga matini a hansi ka misava. 9 U nga txhuki u swi khinsamela, nambi ku susumeteleka ku swi tizrela, hikusa mine Yehovha Xikwembu Nkulukumba waku, ni Xikwembu Nkulukumba lweyi a djulaka leswaku u tinyiketela kwanga hi ku helela, ni khatisaka vana hi kola ka swihoxo swa vapapayi vavu, nakone ni khatisaka lixaka dzra wuzrazru ni lixaka dzra wumune dzra lava va ni nyenyaka, 10 kambe ni kombisaka lizrandzru dzra ku dumbeka* ku ya tlhasa ka lixaka dzra wu 1.000 dzra lava va ni zrandzraka nakone va tamaka va bekisa swileleto swanga.

11 “‘U nga txhuki u tlanga hi vito dzra Yehovha Xikwembu Nkulukumba waku, hikusa Yehovha a nge ti tsrhika ku mu khatisa lweyi a tlangaka hi vito dzrake.

12 “‘Bekisa siku dzra Savata nakone dzri voni dzri li ledzri xwengiki, hi lani Yehovha Xikwembu Nkulukumba waku a ku leletiki ha kone. 13 Yentxa mintizro yaku hinkwayu ku dzringana 6 wa masiku, 14 kambe a siku dzra wu 7 i savata ka Yehovha Xikwembu Nkulukumba waku. Wene, n’wanaku wa djaha, n’wanaku wa n’hwanyana, mutizri waku wa xinuna, mutizri waku wa xisati, homu yaku, mbongolo yaku, swifuyu swaku ni muluveli lweyi a tsrhamaka na wene a madoropeni yaku, mi nga txhuki mi hamba ntizro ni wun’we, akuva mutizri waku wa xinuna ni mutizri waku wa xisati va kota ku wisa ku fana na wene. 15 Dzrimuka leswaku a u li xikazrawa a tikweni dzra Egipta, ni leswaku Yehovha Xikwembu Nkulukumba waku a ku humese kone hi voko dzra ntamu ni ledzri nalavukiki. Hi leswi swi yentxiki leswaku Yehovha Xikwembu Nkulukumba waku a ku zruma kuva u bekisa siku dzra Savata.

16 “‘Hlonipha papayi waku ni mamana waku hi lani Yehovha Xikwembu Nkulukumba waku a ku leletiki ha kone, akuva u ta hanya nkama wa ku leha ni leswaku swi ku fambela ha hombe* a tikweni ledzri Yehovha Xikwembu Nkulukumba waku a ku nyikaka dzrone.

17 “‘U nga txhuki u dlaya.

18 “‘U nga txhuki u yentxa wumbuye.

19 “‘U nga txhuki u yiva.

20 “‘U nga txhuki u nyikela wumboni bya madzrimi mayelanu ni mhunu mun’wana.

21 “‘U nga txhuki u navela nsati wa mhunu mun’wana. U nga txhuki u navela yindlu ya mhunu mun’wana lakakuva u mu tsrhohoka; u nga txhuki u navela masimu yake, xikazrawa xake xa xinuna, xikazrawa xake xa xisati, homu yake, bongolo yake, kumbe ntxhumu wun’wana ni wun’wana lowu wu mu lumbaka.’

22 “Yehovha a hlaye milawu leyi hi zritu dzra ku tlakuka a nhaveni, a mahlweni ka nhlengeletanu hinkwayu na a li makazri ka ndzrilo, a tlavini nakone na ku mphume ngopfu, futsrhi a nga yengeselanga ntxhumu; ntsrhaku ka leswo a ma tsrale ka swipepezrele swibidzri swa mazribye, a va a ni nyika.

23 “Kambe loko mi yingele zritu a makazri ka munyama, na nhava yi pfuzra, a vazrangeli hinkwavu va tinxaka tenu ni vakulukumba hinkwavu va ni tsrhindzrekelelile. 24 N’wine mi te: ‘Yehovha Xikwembu Nkulukumba wezru a hi kombe ku phatima kwake ni wukulu byake, nakone hi yingele zritu dzrake a makazri ka ndzrilo. Namunhla hi swi vonile leswaku Xikwembu Nkulukumba a nga vulavula ni mhunu a va mhunu lweyo a tama a hanya. 25 Kambe swoswi ha yini hi fanela ku fa? Phela ndzrilo lowu lowukulu wu nga hi helisa. Loko ho tama hi yingela zritu dzra Yehovha Xikwembu Nkulukumba wezru, nakunene hi ta fa. 26 Hikusa i mani a makazri ka vhanu lweyi a samiki a yingela zritu dzra Xikwembu Nkulukumba lweyi a hanyaka na a vulavula makazri ka ndzrilo, hi lani hi dzri yingeliki ha kone, a va a tama a hanya? 27 Tsrhindzrekela wene u ya yingela hinkwaswu leswi Yehovha Xikwembu Nkulukumba wezru a taka swi hlaya; hi wene u taka hi byela hinkwaswu leswi Yehovha Xikwembu Nkulukumba wezru a taka ku byela swone, kutani hine hi ta swi yingiseta hi va hi swi yentxa.

28 “Xileswo Yehovha a yingele mazritu lawa mi ni byeliki wone, nakone Yehovha a te: ‘Ni ma yingelile mazritu lawa vhanu lava va ma hlayiki. Leswi va swi hlayiki i swinene. 29 Ni loko minkama hinkwayu a va to va ni mbilu leyi yi ni txhavaka ni ku bekisa swileleto swanga hinkwaswu, hinkwaswu a swi ta va fambela ha hombe, vone kun’we ni vanavu hi lani ku nga helikiki! 30 Famba u ya va byela u ku: “Tlhelelani mintxhatxheni yenu.” 31 Kambe wene u ta sala kola na mine, ni ta ku nyika swileleto hinkwaswu, milawu ni swiboho swa wuyavanyisi leswi u fanelaka ku va dondzrisa swone nakone va fanelaka ku hanya ha swone a tikweni ledzri ni va nyikaka dzrone akuva dzri va dzravu.’ 32 Kutani n’wine mi fanela ku swi landzra ha hombe hi lani Yehovha Xikwembu Nkulukumba wenu a mi leletiki ha kone. Mi nga djiki mi ya a xineneni kumbe a ximatsrini. 33 Nkama hinkwawu mi fanela ku famba a ndleleni leyi Yehovha Xikwembu Nkulukumba wenu a mi leletiki yone, akuva mi hanya, swi mi fambela ha hombe ni leswaku mi hanya nkama wa ku leha a tikweni ledzri mi taka dzri teka.

6 “Leswi i swileleto, milawu ni swiboho swa wuyavanyisi leswi Yehovha Xikwembu Nkulukumba wenu a ni leletiki kuva ni mi dondzrisa, leswaku mi ta swi landzra loko mi tsremakanya tiko ledzri mi taka dzri teka akuva dzri va dzrenu. 2 A yentxe leswo akuva u txhava Yehovha Xikwembu Nkulukumba waku, u va a wuton’wini byaku hinkwabyu u bekisa swileleto hinkwaswu ni milawu leyi ni ku byelaka yone, akuva u hanya nkama wa ku leha, wene, vanaku ni vatukulu vaku. 3 Yingela Wene Israyele, u va u swi landzrelelisisa ha hombe akuva swi ku fambela ha hombe ni leswaku mi yandzra a tikweni ledzri taliki ngopfu swinene hi leiti ni wulombe, hi lani Yehovha Xikwembu Nkulukumba wa vakokwana venu a mi dumbisiki ha kone.

4 “Yingela Wene Israyele, Yehovha Xikwembu Nkulukumba wezru i Yehovha mun’we. 5 U fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi byaku hinkwabyu* ni hi ntamu waku hinkwawu.* 6 A mazritu lawa ni ku byelaka wone namunhla ma fanela ku va mbilwini yaku, 7 nakone u fanela ku ma dondzrisa* vanaku u va u vulavula ha wone loko u tsrhamile kaya kwaku, loko u famba a ndleleni, loko u yetlela ni loko u pfuka. 8 Ma tsrimbe a vokweni dzraku akuva ma ta va xidzrimuxo nakone ma fanela ku va mfungu a mombyeni waku.* 9 Ma tsrali a matlhelweni ka swipfalu swa yindlu yaku* ni le swipfalwini swa tinyangwa ta doropa dzraku.

10 “Loko Yehovha Xikwembu Nkulukumba waku a ku yentxa u nghena a tikweni ledzri a hlambanyeliki vakokwana vaku, ku nga Abrahamu, Izaki na Yakobe, leswaku a ta ku nyika dzrone, ku nga tiko ledzri nga ni madoropa lamakulu ni lamanene lawa u kalaka u nga ma yakanga, 11 ledzri nga ni tiyindlu leti taliki hi mintxhumu leyinene ya mixaka hinkwayu, leyi u kalaka u nga yi tizrelanga, ledzri nga ni swihlovo leswi u kalaka u nga swi kelanga nakone dzri nga ni minsinya ya mawuvha ni minhlwazri leswi u kalaka u nga swi byalanga, kutani u da u va u xuzra, 12 tivoneli akuva u nga mu dzrivali Yehovha lweyi a ku humesiki tikweni dzra Egipta, tiko dzra wukazrawa.* 13 U fanela ku txhava Yehovha Xikwembu Nkulukumba waku, u va u gandzrela yene ntsena, nakone u fanela ku hlambanya hi vito dzrake. 14 U nga txhuki u landzra swikwembu swin’wana, swikwembu swa matiko lawa ma ku tsrandzreliki, 15 hikusa Yehovha Xikwembu Nkulukumba waku, lweyi a nga makazri kwaku, i Xikwembu Nkulukumba lweyi a djulaka leswaku ku gandzreliwa yene ntsena, hikusa loko wo landzra swikwembu swimbeni, Yehovha Xikwembu Nkulukumba waku a ta ku hlundzrukela a va a ku helisa a misaveni.

16 “Mi nga txhuki mi dzringa Yehovha Xikwembu Nkulukumba wenu, hi lani mi mu dzringiki ha kone a Masa. 17 Mi fanela ku yi yingiseta ha hombe milawu ya Yehovha Xikwembu Nkulukumba wenu, swilayu swake* ni swileleto swake leswi a mi zrumiki kuva mi swi landzra. 18 Yentxa leswinene ni leswi lulamiki mahlweni ka Yehovha, akuva swi ku fambela ha hombe u va u nghena a tikweni ledzrinene ledzri Yehovha a dzri hlambanyeliki vakokwana vaku, u titekela dzrone, 19 u hlongola valala vaku hinkwavu, hi lani Yehovha a ku dumbisiki ha kone.

20 “Loko a nkameni lowu taka n’wanaku a ku vutisa leswi: ‘Swi tlhamuxela yini swidzrimuxo, milawu ni swiboho swa wuyavanyisi leswi Yehovha Xikwembu Nkulukumba wezru a mi leletiki swone?’ 21 U ta mu hlamula u ku: ‘Hi ve swikazrawa swa Faro a Egipta, kambe Yehovha a hi humese a Egipta hi voko dzra ntamu. 22 Yehovha a hambe mintxhumu ya ku hlamalisa ni mahlolana lamakulu akuva a hlasela tiko dzra Egipta, Faro ni hinkwavu va muti wake, na hi swi vona. 23 A hi suse tikweni dzra Egipta a hi buyisa halenu akuva a hi nyika tiko ledzri a dzri hlambanyeliki vakokwana vezru. 24 Kutani Yehovha a lelete leswaku hi landzra swileleto leswi hinkwaswu hi va hi txhava Yehovha Xikwembu Nkulukumba wezru, akuva swi hi fambela ha hombe hi lani ku nga helikiki ni kuva hi tama hi hanya hi lani swi nga ha kone namunhla. 25 Kutani hi ta hlayiwa lava lulamiki loko hi landzra swileleto hinkwaswu leswi, hi kombisa leswaku hi yingiseta Yehovha Xikwembu Nkulukumba wezru hi lani a hi leletiki ha kone.’

7 “Loko Yehovha Xikwembu Nkulukumba waku a ku yisa tikweni ledzri u nga kusuhi ni ku nghena ka dzrone akuva u dzri teka, a ta tlhela a hlongola matiko lawa ma nga ni vhanu va vanyingi: Vaheti, Vagirgaxi, Vaamori, Vakanana, Vaperezi, Vahivi ni Vayebusi, ku nga 7 wa matiko lawa ma nga ni vhanu vanyingi nakone ma nga ni ntamu ku ku tlula. 2 Yehovha Xikwembu Nkulukumba waku a ta ma nyikela kwaku, kutani wene u ta ma hlula. Nakunene u fanela ku ma helisa.* A u fanelanga u hamba xipfumelelanu na wone nambi ku ma tsretsrelela. 3 U nga txhuki u tekana na vone.* U nga txhuki u nyikela vanaku va xisati ka vanavu va xinuna nambi ku teka vanavu va xisati u nyika vanaku va xinuna. 4 Hikusa va ta wonga vanenu va nga ha ni landzri kambe va ya gandzrela swikwembu swin’wana; kutani Yehovha a ta mi hlundzrukela a va a mi helisa hi ku kahlula.

5 “A matsrhan’wini ya leswo, mi fanela ku yentxa leswi: Mi gilhita maaltari yavu, mi gilhita tinsika tavu ta ku xwenga, mi wisetela timhandzri tavu ta ku xwenga* mi va mi hisa swithombe swavu swa ku vatliwa leswi va swi gandzrelaka. 6 Hikusa mi vhanu lava xwengiki ka Yehovha Xikwembu Nkulukumba wenu nakone Yehovha Xikwembu Nkulukumba wenu a mi hlawule akuva mi va vhanu vake, pfindla dzrake dzra ku hlawuleka* a makazri ka vhanu hinkwavu lava nga misaveni.

7 “Yehovha a kombise leswaku awa mi zrandzra a va a mi hlawula, ku nga li hi leswaku mo va vanyingi ku tlula matiko laman’wana, hikusa a mi li vatsrongo loko mi dzringanisiwa ni matiko laman’wana hinkwawu. 8 Kambe ku ve hi leswi Yehovha a mi zrandzriki ni hi leswi a hetisisiki leswi a swi hlambanyeliki vakokwana venu, xileswo Yehovha a mi humese a tikweni dzra Egipta hi voko dzra ntamu, a mi tizrula a tikweni dzra wukazrawa,* a mavokweni ya Faro hosi ya Egipta. 9 Wene u swi tiva ha hombe leswaku Yehovha Xikwembu Nkulukumba waku i Xikwembu Nkulukumba wa ntiyiso, Xikwembu Nkulukumba wa ku dumbeka, lweyi a bekisaka xipfumelelanu lexi a xi yentxiki na wene ni lizrandzru dzra ku dumbeka ku ya tlhasa ka lixaka dzra wu 1.000, dzra lava va mu zrandzraka va tlhela va bekisa swileleto swake. 10 Kambe a ta tidzrihisela hi ku kongoma ka lava va mu nyenyaka, ni ku va helisa. A nga ti hlwela ku yentxa xa kukazri ka lava va mu nyenyaka; a ta tidzrihisela hi ku kongoma. 11 Xileswo, bekisani ha hombe milawu, swileleto ni swiboho swa wuyavanyisi leswi ni mi byelaka swone namunhla, mi va mi hanya ha swone.

12 “Loko mi tama mi yingiseta swiboho leswi swa wuyavanyisi mi va mi swi landzra ni ku swi hetisisa, Yehovha Xikwembu Nkulukumba wenu a ta bekisa xipfumelelanu ni lizrandzru dzra ku dumbeka, leswi a swi hlambanyeliki vakokwana venu. 13 A ta ku zrandzra, a ku tovokisa a va a ku yandzrisa. Ina, a ta ku tovokisa hi ku ku nyika vana va vanyingi ni hi mihandzru leyi misava yaku yi taka yi bindzrula, ku nga mavele yaku, vhinyu dzraku ledzrimpshwa ni mafuzra yaku, a ku tovokisa ni hi swihon’wana ni swihambana, a tikweni ledzri a taka ku nyika dzrone hi lani a va hlambanyeliki ha kone vakokwana vaku. 14 U ta va lweyi a tovokisiwiki ku tlula matiko hinkwawu; a ku na wanuna kumbe wansati a makazri kwenu lweyi a taka kala a nga pswali. Nambi mintlhambi yenu swi nga ti yentxeka kuva yi nga pswali. 15 Yehovha a ta mi susela mavabyi hinkwawu, nakone a nge ti mi tisela mavabyi ya ku txhavisa lawa mi ma tiviki a Egipta. A matsrhan’wini ya leswo, a ta ma tisela hinkwavu lava va ku nyenyaka. 16 U fanela ku helisa* matiko hinkwawu lawa Yehovha Xikwembu Nkulukumba waku a ma nyikelaka kwaku. A u fanelanga u ma tsretsrelela nakone a u fanelanga u tizrela swikwembu swa wone, hikusa leswo swi nga va ntlhamu kwaku.

17 “Loko wo tibyela leswi a mbilwini yaku: ‘A matiko lawa ma ni vhanu va vanyingi ku hi tlula. Ni nga swi kotisa kuyini ku ma hlongola?’ 18 U nga ma txhavi. U fanela ku dzrimuka leswi Yehovha Xikwembu Nkulukumba waku a swi yentxiki Faro ni Vaegipta hinkwavu, 19 wuyavanyisi lebyikulu lebyi u byi voniki hi matihlo yaku, swikombiso, mahlolana, voko dzra ntamu ni voko ledzri nalavukiki, ledzri Yehovha Xikwembu Nkulukumba waku a ku humesiki ha dzrone kohala. Leswo hi leswi Yehovha Xikwembu Nkulukumba waku a taka swi yentxa ka matiko hinkwawu lawa u ma txhavaka. 20 Yehovha Xikwembu Nkulukumba waku a ta va yentxa va hela ntamu ku ya tlhasa loko ku fa lava saliki ni lava va tumbeliki. 21 U nga txhavisiwi ha vone, hikusa Yehovha Xikwembu Nkulukumba waku, Xikwembu Nkulukumba lwenkulu ni lweyi a txhavisaka, a na wene.

22 “Nakunene Yehovha Xikwembu Nkulukumba waku a ta hlongola matiko lawa a mahlweni kwaku ha katsrongokatsrongo. A u nge ti pfumeleliwa kuva u va helisa hi nkama wun’we akuva ku nga tali swihazri swa nhova swi va swi ku hlasela. 23 Yehovha Xikwembu Nkulukumba waku a ta va nyikela a mavokweni yaku a va a va hlula hi ku helela ku ya tlhasa loko va helisiwa. 24 A ta nyikela tihosi ta matiko lawa a mavokweni yaku, kutani wene u ta helisa mavito ya tone a hansi ka matilo. A nga kone ni mun’we lweyi a taka yima a tiya a mahlweni kwaku, ku ya tlhasa loko u va helisile. 25 A swithombe swa ku vatliwa leswi va swi gandzrelaka mi fanela ku swi hisa hi ndzrilo. A u fanelanga u navela prata kumbe woru dzra swithombe, nambi ku titekela swone, akuva swi nga vi ntlhamu kwaku. Hikusa i mintxhumu leyi nyenyentsaka a mahlweni ka Yehovha Xikwembu Nkulukumba waku. 26 U nga txhuki u muka ni ntxhumu lowu nyenyentsaka a kaya kwaku, akuva wene u nga vi ntxhumu lowu nyikeliwiki ku helisiweni* ku fana na wone. U fanela ku wu hambula hi ku helela, u wu nyenya hi mbilu yaku hinkwayu hikusa i ntxhumu lowu nyikeliwiki ku helisiweni.

8 “Mi fanela ku yingiseta ha hombe nawu wun’wana ni wun’wana lowu ni mi byelaka wone namunhla akuva mi ta tama mi hanya, mi yandzra mi va mi nghena mi teka tiko ledzri Yehovha a dzri hlambanyeliki vakokwana venu. 2 Dzrimuka ndlela ya ku leha leyi Yehovha Xikwembu Nkulukumba waku a ku yentxiki u famba ha yone malembe lawa ya 40 a mananga, akuva a ku yentxa u va lweyi a titsrongahataka ni ku ku dzringa akuva a ta tiva leswi nga mbilwini yaku ni kuva a tiva leswaku u ta bekisa swileleto swake kumbe im-him. 3 A ku dondzrise ku titsrongahata a va a ku tsrhika u biwa hi ndlala, a ku phamela mana, ku nga swakuda leswi a u nga swi tivi, nambi vapswele vaku a va nga swi tivi, akuva u ta tiva leswaku mhunu a nga fanelanga ku hanya hi pawu ntsena kambe a fanela ku hanya ni hi zritu dzrin’wana ni dzrin’wana ledzri humaka a non’wini wa Yehovha. 4 Ndzreni ka malembe lawa ya 40 a mpahla yaku a yi handzrukelanga nambi minkondzro yaku a yi zanga yi pfimba. 5 U swi tiva ha hombe a mbilwini yaku leswaku Yehovha Xikwembu Nkulukumba waku a a ku laya hi lani mhunu a layaka ha kone n’wanake.

6 “Xileswo, bekisa milawu ya Yehovha Xikwembu Nkulukumba waku hi ku famba a tindleleni take u va u mu txhava. 7 Hikusa Yehovha Xikwembu Nkulukumba waku a ku nghenisa tikweni ledzrinene, tiko ledzri nga ni mimfula ya mati, swihlovo ni mimbangu leyi ku pfelaka mati ma va ma tsrutsruma hi minkova ni hi lomu ku nga ni tinhava, 8 tiko ledzri nga ni trigu ni sevhada, minsinya ya mawuvha, minkuwa ni minsinya ya magranada,* tiko ledzri nga ni mafuzra ni wulombe, 9 tiko ledzri taka va ni swakuda swa swinyingi nakone u nga tiki pfumala ntxhumu, tiko ledzri mazribye ya kone ma nga ni nsimbi nakone ka tinhava ta kone u taka kuma kobri.

10 “Loko u ta va u dile u xuzra, u fanela ku dzrumisa Yehovha Xikwembu Nkulukumba waku hi leswi a ku nyikiki tiko ledzrinene. 11 Tivoneli akuva u nga dzrivali Yehovha Xikwembu Nkulukumba waku, u tsrhika ku bekisa milawu yake, swiboho swake swa wuyavanyisi ni swileleto swake leswi ni ku byelaka swone namunhla. 12 Loko u da u xuzra, u yaka tiyindlu letinene u va u tsrhama ka tone, 13 loko tihomu taku ni tihamba taku swi ya swi yengeseleka, ni prata dzraku ni woru dzraku swi ya swi yengeseleka, ni loko u ta va ni mintxhumu yinyingi, 14 u nga tsrhiki mbilu yaku yi tikulisa ni ku ku yentxa u dzrivala Yehovha Xikwembu Nkulukumba waku lweyi a ku humesiki tikweni dzra Egipta, tiko dzra wukazrawa,* 15 lweyi a ku kongomisiki ka mananga ya makulu ya ku txhavisa, lawa ma nga ni tinyoka leti nga ni mahlungu* ni swizavanana, tiko ledzri womiki, dzra ku pfumala mati, a ku humesele mati a zribyeni, 16 a va a ku phamela mana a mananga, ku nga swakuda leswi a vapswele vaku a va nga swi tivi, akuva a ku dondzrisa ku titsrongahata ni kuva a ku dzringa, leswaku u ta va ni wumundzruku lebyinene. 17 Loko wo txhuka u tibyela leswi a mbilwini yaku: ‘Ni kume wukosi hinkwabyu lebyi hi wuswikoti byanga ni hi ntamu wa mavoko yanga,’ 18 dzrimuka leswaku i Yehovha Xikwembu Nkulukumba waku lweyi a ku nyikaka wuswikoti bya kuva u va ni wukosi, akuva a hetisisa xipfumelelanu lexi a xi hambiki ni vakokwana vaku a va a hlambanya, hi lani swi vonekaka ha kone namunhla.

19 “Loko mo txhuka mi dzrivala Yehovha Xikwembu Nkulukumba wenu, mi landzra swikwembu swin’wana, mi swi tizrela ni ku swi khinsamela, na mi byela namunhla leswaku nakunene mi ta fa. 20 Loko mo kala mi nga yingiseti zritu dzra Yehovha Xikwembu Nkulukumba wenu, mi ta fa ku fana ni vhanu va matiko lawa Yehovha a ma helisaka mahlweni kwenu.

9 “Yingela We Israyele, namunhla u tsremakanya nambu wa Yordani akuva u nghena tikweni ledzri u va u hlongola matiko lamakulu ni lawa ma nga ni ntamu ku ku tlula, madoropa lamakulu ni lawa ma tiyisiwiki ku ya tlhasa matilweni,* 2 vhanu lava nga ni ntamu nakone va lehiki, vana va Vaanaki lava u va tivaka nakone u yingeliki ku hlayiwa leswi ha vone: ‘I mani lweyi a nga yimaka a tiya a mahlweni ka vana va Anaki?’ 3 Xileswo swi tivi namunhla leswaku Yehovha Xikwembu Nkulukumba waku a ta ku zrangela. Yene i ndzrilo lowu helisaka nakone a ta va helisa. A ta va hlula na u swi vona akuva u va hlongola* hi ku kahlula ni ku va helisa, hi lani Yehovha a ku dumbisiki ha kone.

4 “Loko Yehovha Xikwembu Nkulukumba waku a hlongola matiko lawa mahlweni kwaku, u nga txhuki u tibyela leswi a mbilwini yaku: ‘Yehovha a ni yentxe ni nghena a tikweni ledzri ni dzri teka hi leswi ni lulamiki.’ A matsrhan’wini ya leswo, Yehovha a hlongola matiko lawa a mahlweni kwaku hi mhaka ya wubihi bya wone. 5 A u ngheni tikweni dzravu u dzri teka hi mhaka ya leswi u lulamiki, kumbe hi mhaka ya ku lulama ka mbilu yaku. Kambe Yehovha Xikwembu Nkulukumba waku a hlongola matiko lawa a mahlweni kwaku hi mhaka ya wubihi bya wone ni leswaku yene Yehovha a ta hetisisa leswi a swi hlambanyeliki vakokwana vaku, ku nga Abrahamu, Izaki na Yakobe. 6 Xileswo, swi tivani leswaku Yehovha Xikwembu Nkulukumba wenu a nga mi nyiki tiko ledzri ledzrinene akuva mi dzri teka hi mhaka ya leswi mi lulamiki, hikusa n’wine mi vhanu lava tlanyaliki timbilu.*

7 “Dzrimukani, mi nga txhuki mi dzrivala ndlela leyi mi mu pfukiki ha yone Yehovha Xikwembu Nkulukumba wenu a mananga. Ku sukela siku ledzri mi humiki ha dzrone a tikweni dzra Egipta ku ta ta tlhasa mbangwini lowu, mi tsrhamele ku pfukela Yehovha. 8 Nambi a Horebe mi pfuke Yehovha nakone Yehovha a mi hlundzrukele ngopfu lakakuva a a lulamele ku mi helisa. 9 Loko ni tlhantukele nhaveni akuva ni ya yamukela swipepezrele swa mazribye, ku nga swipepezrele swa xipfumelelanu lexi Yehovha a xi yentxiki na n’wine, ni tsrhame a nhaveni ku dzringana 40 wa masiku, wusiku ni nhlikanhi, na ni nga di ntxhumu* nambi ku nwa mati. 10 Kutani Yehovha a ni nyike swipepezrele swibidzri swa mazribye leswi tsraliwiki hi litiho dzra Xikwembu Nkulukumba; ka swone a ku ni mazritu hinkwawu lawa Yehovha a mi byeliki wone a nhaveni na a li makazri ka ndzrilo, hi siku ledzri a mi hlengeletane ha dzrone.* 11 A ku heleni ka masiku wolawo ya 40, wusiku ni nhlikanhi, Yehovha a ni nyike swipepezrele swibidzri swa mazribye, ku nga swipepezrele swa xipfumelelanu. 12 Kutani Yehovha a ni byele a ku: ‘Fulamela hi ku kahlula, hikusa a vhanu vaku lava u va humesiki a Egipta, va dohile. Va hambuke hi ku kahlula a ndleleni leyi ni va leletiki ku famba ha yone. Va tihambele xithombe.’ 13 Nakone Yehovha a ye mahlweni a ku: ‘Na swi vona leswaku a vhanu lava nakunene va tlanyale timbilu. 14 U nga zami ku ni sivela ku va helisa, ni va ni tima vito dzravu a hansi ka matilo ni gama ni yentxa leswaku wene u va tiko ledzri nga ni ntamu ni ledzri nga ni vhanu va vanyingi ku va tlula.’

15 “Kutani ni fulamelile a nhaveni, hi nkama lowu nhava a yi pfuzra nakone a ni tamele swipepezrele swibidzri swa xipfumelelanu. 16 Loko ni lavisile, ni vone leswaku a mi dohele Yehovha Xikwembu Nkulukumba wenu. A mi tihambele zrole,* a mi hambuke hi ku kahlula a ndleleni leyi Yehovha a mi leletiki ku famba ha yone. 17 Xileswo, ni teke swipepezrele leswiya swibidzri ni swi txukumetela hansi swi pandzrekela na mi swi vona. 18 Kutani ni khinsame mahlweni ka Yehovha hi lani ni yentxiki ha kone a ku sunguleni, ku dzringana 40 wa masiku, wusiku ni nhlikanhi. A ni danga ntxhumu nambi ku nwa mati, hi mhaka ya swidoho hinkwaswu leswi a mi swi yentxile, hi ku yentxa leswi bihiki a mahlweni ka Yehovha ni ku mu khunguvanyisa. 19 Hikusa a ni txhava hi mhaka ya leswi Yehovha a a mi hlundzrukele ngopfu swinene, a a lulamele ku mi helisa. Nambitasu, ni ka khambi ledzro Yehovha a ni yingisetile.

20 “Yehovha a a mu hlundzrukele ngopfu Aroni lakakuva a a lulamele ku mu helisa, kambe ni ka khambi ledzro ni khongote ni kombela leswaku a dzrivaleliwa. 21 Kutani ni teke ntxhumu lowu a mi doha ha wone, ku nga zrole ledzri a mi dzri hambile, ni dzri hisa; ni dzri pfotlotela ni dzri sila hi ku helela dzri za dzri hamba mpupu, kutani ni teka mpupu lowo ni wu txukumetela a matini lawa ma fulamelaka hi le nhaveni.

22 “Handle ka leswo, a Tabera, a Masa ni le Kiberoti-hatavha mi tlhele mi pfuka Yehovha, mi mu hlundzrukisa. 23 Loko Yehovha a mi zrumile na mi sukela a Kadexi-barineya, a ku: ‘Fambani mi ya teka tiko ledzri nakunene ni taka mi nyika dzrone!’ N’wine mi tlhele mi yentxa swa ku hambana ni leswi Yehovha Xikwembu Nkulukumba wenu a mi leletiki swone, nakone a mi kombisanga lipfumelo kwake nambi ku mu yingiseta. 24 Ku sukela ni mi tiva, n’wine mi va ku pfukela Yehovha.

25 “Kutani ni khinsame a mahlweni ka Yehovha ku dzringana 40 wa masiku, wusiku ni nhlikanhi, nakone ni yentxe leswo hi leswi Yehovha a hlayiki leswaku a ta mi helisa. 26 Ni sungule ku tsratsriya Yehovha ni ku: ‘We Yehovha Hosi Leyi Nga Henhlahenhla, u nga va helisi vhanu vaku. Phela vone i vhanu vaku,* lava u va tizruliki hi wukulu byaku nakone u va humesiki a Egipta hi voko dzra ntamu. 27 Dzrimuka malandzra yaku, ku nga Abrahamu, Izaki na Yakobe. U nga yi hi ku tlanyala ka timbilu ta vhanu lava nambi hi wubihi byavu ni xidoho xavu. 28 Hikusa vhanu va tiko ledzri u hi humesiki ka dzrone va nga ku: “Yehovha swi mu hlulile ku tlhasisa vhanu lava a tikweni ledzri a va dumbisiki dzrone nakone leswi a va nyenyaka a va humese lani akuva a ya va dlaya a mananga.” 29 Hikusa vone i vhanu vaku lava lumbaka wene ntsena, nakone u va humesiki hala hi ntamu waku ni hi voko dzraku ledzri nalavukiki.’

10 “Hi nkama wolowo Yehovha a ni byele a ku: ‘Phapha swipepezrele swibidzri swa mazribye swa ku fana ni leswi a u swi hambile a ku sunguleni, u va u tlhantuka u ya kumana na mine a nhaveni; hamba ni areka hi mapulangu. 2 Kutani ka swipepezrele leswo ni ta tsrala mazritu lawa a ma li ka swipepezrele swa ku sungula leswi wene u nga swi dlaya, ntsrhaku ka leswo u fanela ku swi beka ndzreni ka areka.’* 3 Xileswo ni hambe areka hi mapulangu ya nsinya wa munga, ni hamba swipepezrele swibidzri swa mazribye swa ku fana ni leswi a ni swi hambile ku sunguleni ni va ni tlhantukela nhaveni na ni ni swipepezrele swibidzri mavokweni. 4 Kutani ka swipepezrele leswo Yehovha a tsrale mazritu lawa a a ma tsralile ka swipepezrele swa ku sungula a va a ni nyika, ku nga 10 wa Milawu leyi Yehovha a a mi byele yone a nhaveni na a li makazri ka ndzrilo hi siku ledzri a mi hlengeletanile.* 5 Kutani ni fulamele a nhaveni ni va ni beka swipepezrele a ndzreni ka areka ledzri a ni dzri hambile, nakone swa ha tama swi va kolahayani hi lani Yehovha a ni byeliki ha kone.

6 “Kutani Vaisrayele va suka a Beroti Bene-yakani va ya tlhasa a Mosera, lani Aroni a tlhasiki a fela kone a va a lahliwa; kutani Eliyazari n’wanake a sungula ku tizra swanga muprista, a mu pfaleta; 7 Va suke kolanu va ya Gudigoda, va suka Gudigoda va kongoma Yotibatha, ku nga tiko dzra mimfula ya mati.

8 “Hi nkama wolowo, Yehovha a hlawule va lixaka dzra Levhi akuva va tlakula areka dzra xipfumelelanu xa Yehovha, va va mahlweni ka Yehovha va mu tizrela ni ku tlhela va tovokisa vhanu hi vito dzrake hi lani va yentxaka ha kone ku ta ta tlhasa ni namunhla. 9 Hi leswi yentxiki kuva Levhi a nga nyikiwi ntxhumu a xikazri ka vamakwavu. A pfindla dzrake i Yehovha, hi lani Yehovha Xikwembu Nkulukumba wake a hlayiki ha kone. 10 Loko ku li mine, ni tsrhame nhaveni 40 wa masiku, wusiku ni nhlikanhi, hi lani swi viki ha kone ka khambi dzra ku sungula. Nakone ni ka khambi ledzri Yehovha a ni yingisetile; Yehovha a nga djulanga ku ku helisa. 11 Kutani Yehovha a ni byele a ku: ‘Zrangela vhanu lava, u tilulamisela akuva mi famba leswaku va nghena ka tiko ledzri ni taka va nyika dzrone akuva va dzri teka, hi lani ni hlambanyeliki vakokwana vavu ha kone.’

12 “Swoswi We Israyele, i yini leswi Yehovha Xikwembu Nkulukumba waku a ku kombelaka swone? Hi leswi ntsena a ku kombelaka swone: Kuva u txhava Yehovha Xikwembu Nkulukumba waku, u tama u famba tindleleni take, u mu zrandzra, u tizrela Yehovha Xikwembu Nkulukumba waku hi mbilu yaku hinkwayu ni hi wutomi byaku hinkwabyu, 13 ni kuva u bekisa milawu ni swileleto swa Yehovha leswi ni ku byelaka swone namunhla, akuva swi ku fambela ha hombe. 14 Lavisa! A matilo, ina, matilo ya matilo,* misava ni hinkwaswu leswi nga ka yone, swi lumba Yehovha Xikwembu Nkulukumba waku. 15 Kambe ko va ntsena vakokwana vaku lava Yehovha a viki kusuhi na vone a tlhela a va zrandzra, nakone a xikazri ka matiko hinkwawu a hlawule n’wine mi nga vatukulu vavu,* hi lani swi vonekaka ha kone namunhla. 16 Swoswi basisani* timbilu tenu, mi tsrhika ku titlanyalisa.* 17 Hikusa Yehovha Xikwembu Nkulukumba waku, i Xikwembu Nkulukumba wa swikwembu ni Hosi ya tihosi, Xikwembu Nkulukumba lweyi a nga ni ntamu nakone a txhavisaka, a nga na xihlawuhlawu nakone a nga pfumeli ku xaviwa.* 18 Yene a kombisa wululami ka n’wana lweyi a feliwiki hi vapswele* ni ka wansati lweyi a feliwiki hi nuna, nakone a zrandzra muluveli, a mu nyika swakuda ni mpahla. 19 Na n’wine mi fanela ku zrandzra muluveli hikusa ma ve valuveli a tikweni dzra Egipta.

20 “U fanela ku txhava Yehovha Xikwembu Nkulukumba waku ntsena, u mu tizrela, u mu namazrela u va u hlambanya hi vito dzrake. 21 U fanela ku dzrumisa Yene ntsena. Yene i Xikwembu Nkulukumba waku, lweyi a ku hambeliki mintxhumu hinkwayu leyi leyikulu ni leyi txhavisaka leyi u yi voniki hi matihlo yaku. 22 Nkama lowu vakokwana venu va fulameliki va ya Egipta, a va li 70 wa vhanu.* Kambe swoswi Yehovha Xikwembu Nkulukumba waku a mi yentxe mi tala ku fana ni tinyeleti ta matilo.

11 “Zrandzra Yehovha Xikwembu Nkulukumba waku u va u landzra swileleto swake, swiboho swake swa wuyavanyisi ni milawu yake, minkama hinkwayu. 2 Ma swi tiva leswaku namunhla ni vulavula na n’wine, ku nga li vana venu lava va kalaka va nga vonanga nambi ku tiva xilayu xa Yehovha Xikwembu Nkulukumba wenu, nambi wukulu byake, voko dzrake dzra ntamu ni voko dzrake ledzri nalavukiki. 3 A va swi vonanga swikombiso ni mintizro leyi a yi yentxiki a Egipta akuva a lwisana na Faro hosi ya Egipta ni tiko dzrake hinkwadzru; 4 nambileswi a swi yentxiki masotxha ya le Egipta, makavhalu ni tin’qolo ta yimpi ta Faro, leswi mintiwiki hi mati ya Lwandle dzra ku Pshwuka nkama lowu na va mi hlongolisa, a va Yehovha a va helisela wugamu.* 5 A va swi vonanga leswi a mi yentxeliki swone nkama lowu a mi li mananga, ku ta ta tlhasa loko mi tlhase mbangwini lowu, 6 ni leswi a swi yentxiki Dathani na Abiramu, vana va Eliyabi, n’wana wa Rubeni, loko misava yi pfulekile yi va yi va minta na Vaisrayele hinkwavu va swi vona, yi minte vone kun’we ni mindangu yavu ni vhanu hinkwavu lava va yimiki na vone, ku patsra ni matende yavu ni swihazri swavu hinkwaswu. 7 Mi tivonele ha wuswenu mintizro leyikulu leyi Yehovha a yi yentxiki.

8 “Bekisani milawu hinkwayu leyi ni mi byelaka yone namunhla, akuva mi tiya mi va mi tsremakanya mi ya teka tiko, 9 ni kuva mi ta hanya nkama wa ku leha a tikweni ledzri Yehovha a hlambanyiki ku dzri nyika vakokwana venu ni vatukulu vavu, tiko ledzri taliki ngopfu swinene hi leiti ni wulombe.

10 “A tiko ledzri mi taka ya dzri teka a dzri fani ni tiko dzra Egipta ledzri mi humiki ka dzrone, lani a mi byala timbewu mi va mi wupfa hi ku txheletela* ku fana ni loko mi txheletela masimu ya matsavu. 11 Kambe a tiko ledzri mi nga kusuhi ni ku tsremakanya mi nghena ka dzrone mi va mi dzri teka, i tiko dzra tinhava ni minkova; dzri nwa mati ya mpfula ya matilo. 12 I tiko ledzri hlayisiwaka ha Yehovha Xikwembu Nkulukumba waku. Minkama hinkwayu Yehovha awa dzri vonelela, loko lembe dzra ha sungula ku ya tlhasa loko dzri hela.

13 “Kutani loko mo yingiseta ha hombe milawu leyi ni mi byelaka yone namunhla, mi zrandzra Yehovha Xikwembu Nkulukumba wenu mi va mi mu tizrela hi mbilu yenu hinkwayu, ni hi wutomi byenu* hinkwabyu, 14 ni ta mi nyika mpfula hi nkama lowu faneliki, mpfula ya ku nghena ka wuxika ni mpfula ya ku nghena ka malanga, kutani mi ta tihlengeletelela mavele, vhinyu ledzrimpshwa ni mafuzra. 15 Nakone a swifuyu swenu ni ta swi nyika byanyi, na n’wine mi ta da mi xuzra. 16 Tivonelani akuva timbilu tenu ti nga wongiwi mi va mi hambuka, mi ya gandzrela swikwembu swimbeni kumbe ku swi khinsamela. 17 Loko swi nga li leswo, Yehovha a ta mi hlundzrukela a va a pfala matilo akuva ku nga ni mpfula, kutani a misava a yi nga ti bindzrula nakone mi ta nyamalala hi ku kahlula a tikweni ledzrinene ledzri Yehovha a mi nyikaka dzrone.

18 “Bekisani mazritu yanga a timbilwini tenu ne miyanakanywini yenu mi va mi ma tsrimba swanga xidzrimuxo a mavokweni yenu, ni ku tlhela mi ma beka swanga mfungu a mimombyeni* yenu. 19 Ma dondzrisani vanenu, mi vulavula ha wone loko mi tsrhame kaya kwenu, loko mi famba ndleleni, loko mi yetlela ni loko mi pfuka. 20 Ma tsralani ka maaru ya swipfalu swa tiyindlu tenu ni le swipfalwini swa tinyangwa ta madoropa yenu, 21 akuva n’wine kun’we ni vana venu mi hanya nkama wa ku leha a tikweni ledzri Yehovha a hlambanyiki ku dzri nyika vakokwana venu, masiku hinkwawu lawa matilo ma taka va ma ha le henhla ka misava.

22 “Loko mo yi yingiseta hi ku helela milawu leyi ni mi nyikaka yone mi va mi yi landzra, mi zrandzra Yehovha Xikwembu Nkulukumba wenu, mi famba a tindleleni take minkama hinkwayu ni ku mu namazrela, 23 Yehovha a ta hlongola matiko lawa ma nga mahlweni kwenu, nakone n’wine mi ta teka tiko dzra matiko lama nga makulu nakone ma nga ni vhanu vanyingi ku mi tlula. 24 Mbangu wun’wana ni wun’wana lowu mi taka wu pswanya wu ta mi lumba. Ku sukela a mananga ku ya tlhasa a Lebanoni, ni ku sukela a Nambyeni, ku nga nambu wa Ewufrata ku ya tlhasa lwandle ledzri nga mpeladambu;* leyi ku ta va mindzrelekanu ya tiko dzrenu. 25 A nga kone lweyi a taka yima a tiya mahlweni kwenu, Yehovha Xikwembu Nkulukumba wenu a ta yentxa leswaku hinkwaku lomu mi taka khaluta ha kone va txhava va tlhela va zruzrumela, hi lani a mi dumbisiki ha kone.

26 “Lavisani! Ni beka tovoko ni xizruku a mahlweni kwenu namunhla; 27 Loko mi yingiseta milawu ya Yehovha Xikwembu Nkulukumba wenu, leyi ni mi byelaka yone namunhla, mi ta kuma tovoko 28 kasi ke, loko mi nga yingiseti milawu ya Yehovha Xikwembu Nkulukumba wenu, mi hambuka a ndleleni leyi ni mi leletaka yone namunhla mi va mi landzra swikwembu leswi mi kalaka mi nga swi tivi, mi ta kuma xizruku.

29 “Loko Yehovha Xikwembu Nkulukumba waku a ku nghenisa tikweni ledzri u taka dzri teka, u ta hlaya tovoko a Nhaveni ya Gerizimi u va u hlaya xizruku a Nhaveni ya Ebali. 30 Tinhava leto ti kumeka ka tlhelo dzrin’wana dzra Yordani, a mpeladambu, a tikweni dzra Vakanana lava va tsrhamaka a Araba a mahlweni ka Giligala, kusuhi ni minsinya leyikulu ya More. 31 Hikusa mi ta tsremakanya tiko dzra Yordani akuva mi nghena a tikweni ledzri Yehovha Xikwembu Nkulukumba wenu a mi nyikaka dzrone akuva mi dzri teka. Loko mi ta va mi dzri tekile nakone mi tsrhama ka dzrone, 32 mi nga dzrivali ku landzra swileleto ni swiboho hinkwaswu swa wuyavanyisi leswi ni mi byelaka swone namunhla.

12 “Leswi i swileleto ni swiboho swa wuyavanyisi leswi mi fanelaka ku swi landzrelelisa ha hombe wutomi byenu hinkwabyu a tikweni ledzri Yehovha, Xikwembu Nkulukumba wa vakokwana venu, a taka mi nyika dzrone swanga pfindla. 2 Loko mi hlongola vhanu lava nga ka tiko ledzri mi taka dzri teka, mi fanela ku helisa hi ku helela mimbangu hinkwayu leyi vhanu lavo va gandzrelaka ka yone swikwembu swavu, ku nga ha va a tinhaveni leti tlakukiki, a magangeni kumbe a hansi ka minsinya leyikulu. 3 Mi fanela ku gilhita a maaltari yavu, mi tsremelela timhandzri tavu ta ku xwenga, mi gilhita tinsika tavu ta ku xwenga* mi va mi wisetela swithombe leswi vatliwiki swa swikwembu swavu, hi ndlela leyo, mi tima mavito ya swikwembu leswo a mbangwini lowo.

4 “Mi nga gandzreli Yehovha Xikwembu Nkulukumba wenu hi ndlela leyi vhanu va matiko va swi gandzrelaka ha yone swikwembu swavu. 5 A matsrhan’wini ya leswo, mi fanela ku ya a mbangwini lowu Yehovha Xikwembu Nkulukumba wenu a taka wu hlawula akuva ku twalisiwa vito dzrake ka wone, lowu wu taka va wutsrhamu byake a tinxakeni take hinkwatu, nakone mi fanela ku mu gandzrela a mbangwini wolowo. 6 Hi kohala mi taka ya nyikela kone a magandzrelo yenu ya ku hisiwa, switlhavelo swenu,* wukhume byenu,* minyikelo yenu, magandzrelo yenu ya ku hetisisa xihlambanyu, magandzrelo yenu ya ku tizrandzrela ni mativula ya tihomu, timbuti ni tihamba tenu. 7 N’wine kun’we ni mindangu yenu mi fanela ku dela kone a mahlweni ka Yehovha Xikwembu Nkulukumba wenu, mi va mi nyonxa hi hinkwaswu leswi mi taka va mi swi yentxile, hikusa Yehovha Xikwembu Nkulukumba wenu a ta va na a mi tovokisile.

8 “Mi nga yentxi swa ku fana ni leswi hi swi yentxaka namunhla lani, swa kuva mun’wana ni mun’wana a yentxa leswi lulamiki hi ku ya hi mavonela yake, 9 hikusa a mi si nghena a mbangwini wa ku wisela ka wone ni le tikweni ledzri Yehovha Xikwembu Nkulukumba wenu a mi nyikaka dzrone. 10 Loko mi ta va na mi tluleli nambu wa Yordani nakone mi va na mi tsrhama tikweni ledzri Yehovha Xikwembu Nkulukumba wenu a mi nyikaka dzrone swanga pfindla, a ta mi wisisa ka valala venu hinkwavu lava mi tsrandzreliki, kutani mi ta hanya na mi sizrelelekile. 11 Mi ta famba ni hinkwaswu leswi ni mi leletaka swone a mbangwini lowu Yehovha Xikwembu Nkulukumba wenu a wu hlawulaka akuva ku twalisiwa vito dzrake ka wone, ku nga magandzrelo yenu ya ku hisiwa, switlhavelo swenu, wukhume byenu, swihanano swenu ni magandzrelo hinkwawu, akuva mi hetisisa xihlambanyu lexi mi xi yentxeliki Yehovha. 12 Mi ta nyonxa a mahlweni ka Yehovha Xikwembu Nkulukumba wenu, n’wine ni vanenu va xinuna ni va xisati, swikazrawa swenu swa xinuna ni swa xisati ni Valevhi lava tsrhamaka a madoropeni yenu, hikusa a va nyikiwanga xiyenge kumbe pfindla a makazri kwenu. 13 Tivoneli akuva u nga hambi magandzrelo yaku ya ku hisiwa kun’wana ni kun’wana lomu u ku kumaka. 14 U fanela ku nyikela magandzrelo yaku ya ku hisiwa ntsena a mbangwini lowu Yehovha a taka wu hlawula a mugangeni lowu wu lumbaka dzrin’we dzra tinxaka tenu, nakone kolanu u fanela ku yentxa hinkwaswu leswi ni ku byelaka swone.

15 “Kambe minkama hinkwayu, loko u swi djula, u nga tidlayela swihazri a madoropeni yaku akuva u da, hi ku ya hi tovoko ledzri Yehovha Xikwembu Nkulukumba waku a taka ku nyika dzrone. A mhunu lweyi a basiki ni lweyi a kalaka a nga basanga va nga da, hi lani a u ta da ha kone mhunti* kumbe nhlangu. 16 Kambe mi nga txhuki mi da ngati, mi fanela ku yi halata a misaveni ku fana ni mati. 17 A ndzreni ka madoropa yaku a u nge ti pfumeleliwa kuva u da swa wukhume bya mavele yaku, swa vhinyu dzraku ledzrimpshwa, swa mafuzra yaku, swa mativula ya tihomu, timbuti ni tihamba taku, nambi magandzrelo ya ku hetisisa xihlambanyu, magandzrelo ya ku tizrandzrela kumbe swihanano swaku. 18 U ta swi da a mahlweni ka Yehovha Xikwembu Nkulukumba waku a mbangwini lowu Yehovha Xikwembu Nkulukumba waku a taka wu hlawula, wene, n’wanaku wa xinuna, n’wanaku wa xisati, nandzra waku wa xinuna, nandzra waku wa xisati ni Valevhi lava nga ndzreni ka madoropa yaku; nakone wene u ta nyonxa a mahlweni ka Yehovha Xikwembu Nkulukumba waku hi kola ka hinkwaswu leswi u taka va na u swi yentxile. 19 A nkama lowu u taka va na u hanya a tikweni dzraku, tivoneli akuva u nga txhuki u tsrhika ku hlayisa Mulevhi.

20 “Loko Yehovha Xikwembu Nkulukumba waku a yengesela a tiko dzraku hi lani a ku dumbisiki ha kone, kutani wene u* navela ku da nyama, u va u hlaya leswi: ‘Ni djula ku da nyama’, u nga tidela nyama nkama wun’wana ni wun’wana lowu u wu djulaka.* 21 Loko mbangu lowu Yehovha Xikwembu Nkulukumba waku a wu hlawuliki akuva ku twalisiwa vito dzrake ka wone wu kumeka kule, lanu ke, ka tihomu, timbuti ni tihamba u fanela ku dlaya swin’we swa swone leswi Yehovha a taka va na a ku nyike swone, u va u swi dela ndzreni ka madoropa yaku nkama wun’wana ni wun’wana loko u swi djula, hi lani ni mi byeliki ha kone. 22 U nga da hi lani a wu ta da ha kone a mhunti ni nhlangu; lweyi a basiki ni lweyi a kalaka a nga basanga va nga da. 23 Ntsena u nga txhuki u da ngati, hikusa a ngati i wutomi; u nga di wutomi* kun’we ni nyama. 24 U nga txhuki u yi da. U fanela ku yi halata a hansi ku fana ni mati. 25 U nga txhuki u yi da akuva swi ku fambela ha hombe, wene ni vanaku, hi ku va mi yentxa leswi lulamiki a mahlweni ka Yehovha. 26 Loko u ya mbangwini lowu Yehovha a wu hlawuliki, u fanela ku teka ntsena mintxhumu yaku leyi xwengiki ni magandzrelo yaku ya ku hetisisa xihlambanyu. 27 Kohala u ta nyikela magandzrelo yaku ya ku hisiwa, nyama ni ngati, ka altari dzra Yehovha Xikwembu Nkulukumba waku nakone a ngati ya switlhavelo yi fanela ku halateliwa a altarini dzra Yehovha Xikwembu Nkulukumba waku, kambe a nyama u nga tidela yone.

28 “Ma landzrelelisise ha hombe mazritu lawa ni ku byelaka wone akuva minkama hinkwayu swi ku fambela ha hombe wene kun’we ni vanaku, hikusa hi ku yentxa leswo u ta va na u yentxa leswi lulamiki a mahlweni ka Yehovha Xikwembu Nkulukumba waku.

29 “Loko Yehovha a helisa matiko lawa u taka ma hlongola nakone u va na u tsrhama tikweni dzra wone, 30 ntsrhaku ka loko ma helisiwile a mahlweni kwaku, tivoneli akuva u nga phasiwi. U nga txhuki u vutisa mayelanu ni swikwembu swa wone u ku: ‘Kasi matiko lawa a ma swi gandzrelisa kuyini swikwembu swa wone? Na mine ni djula ku yentxisa xiswoswo.’ 31 U nga txhuki u yentxela Yehovha Xikwembu Nkulukumba waku mintxhumu leyo, hikusa hinkwaswu leswi a matiko ma swi yentxelaka swikwembu swa wone, swa nyenyentsa mahlweni ka Yehovha; i mintxhumu leyi a yi nyenyaka. Phela va patsra ni ku hisa vanavu va madjaha ni va van’hwanyana a ndzrilweni, va hisela swikwembu swavu. 32 Mi fanela ku yentxa hinkwaswu leswi ni mi byelaka swone. Mi nga txhuki mi yengesela kumbe ku pumba ntxhumu.

13 “Loko makazri kwenu ko txhuka ku humelela muprofeta wa kukazri kumbe mhunu lweyi a hlayaka ta wumundzruku hi ku tizrisa milozro a va a mi hambela xikombiso kumbe a pfhumbata, 2 swi va leswi a swi hlayiki swi yentxeka, a va a ku wonga a ku: ‘A hi landzri ni ku tizrela swikwembu swimbeni’, swikwembu leswi u kalaka u nga swi tivi, 3 u nga ma yingiseti mazritu ya muprofeta lweyo, kumbe ya mhunu lweyi a pfhumbataka hi ku tizrisa milozro, hikusa Yehovha Xikwembu Nkulukumba wenu o mi dzringa akuva a tiva leswaku ma mu zrandzra Yehovha Xikwembu Nkulukumba wenu hi mbilu yenu hinkwayu ni hi wutomi byenu hinkwabyu* kumbe im-him. 4 I Yehovha Xikwembu Nkulukumba wenu ntsena lweyi mi fanelaka ku mu landzra nakone mi fanela ku txhava yene ntsena, mi fanela ku bekisa milawu yake mi va mi yingiseta zritu dzrake nakone mi fanela ku tizrela ni ku namazrela yene ntsena. 5 Kambe a muprofeta lweyo kumbe mhunu lweyi a pfhumbataka hi ku tizrisa milozro, a fanela ku dlayiwa, hikusa a mi hlohlotela ku pfukela Yehovha Xikwembu Nkulukumba wenu akuva a mi hambukisa a ndleleni leyi Yehovha Xikwembu Nkulukumba wenu a mi byeliki kuva mi famba ha yone, ku nga lweyi a mi humesiki a tikweni dzra Egipta nakone a mi tizruliki a tikweni dzra wukazrawa.* Hi ndlela leyo, helisani wubihi a makazri kwenu.

6 “Loko makwenu, n’wana wa mamana waku, kumbe n’wanaku wa xinuna, kumbe n’wanaku wa xisati, kumbe nkataku lweyi u mu zrandzraka, kumbe munghanu waku lwenkulu a ku hlohlotela xihundleni, a ku: ‘A hi fambi hi ya tizrela swikwembu swimbeni,’ ku nga swikwembu leswi u kalaka u nga swi tivi nambi vakokwana vaku va kalaka va nga swi tivanga, 7 swikwembu swa matiko lawa ma mi tsrandzreliki, ku nga va ya le kusuhi kumbe ya le kule, ku sukela ka wugamu bya misava ku ya ka wugamu byin’wana bya misava, 8 u nga mu pfumeleli a ku wonga, nakone u nga mu yingiseti, u nga txhuki u mu twela wusiwana nambi ku mu sizrelela; 9 a matsrhan’wini ya leswo, u fanela ku mu dlaya. U ta va wa ku sungula ku mu khandla hi mazribye, ntsrhaku ka leswo ku ta landzrela vhanu vambeni. 10 Mu khandli a za a fa, hikusa a dzringise ku ku hambukisa ka Yehovha Xikwembu Nkulukumba waku, lweyi a ku humesiki a tikweni dzra Egipta, tiko dzra wukazrawa. 11 Kutani a Vaisrayele hinkwavu va ta yingela mhaka leyo va va va txhava, xileswo va nga ha ti yentxa wubihi bya ku fana ni lebyo a makazri kwenu.

12 “Loko ka dzrin’we dzra madoropa lawa Yehovha Xikwembu Nkulukumba waku a ku nyikaka akuva u tsrhama ka wone u yingela leswi: 13 ‘A makazri kwenu ku humelele vavanuna va ku kala va nga pfuni ntxhumu akuva va hambukisa lava va tsrhamaka doropeni dzraku, va ku: “A hi fambeni hi ya tizrela swikwembu swimbeni”, ku nga swikwembu leswi wene u kalaka u nga swi tivi’, 14 u fanela ku kambela mhaka, u yi setxhisisa u va u yi kambisisa ha hombe; loko ku tiyisekisiwa leswaku ntxhumu lowo lowu nyenyentsaka wu yentxiwile a makazri kwenu, 15 nakunene u fanela ku helisa* vhanu va doropa ledzro hi xipada. Helisa doropa ledzro ni hinkwaswu leswi nga ka dzrone hi xipada ku patsra ni mintlhambi yavu. 16 Ntsrhaku ka leswo, u fanela ku hlengeleta nhundzru hinkwayu ya dzrone a makazri ka dzrone u va u dzri hisa, kutani a nhundzru ya dzrone yi ta va gandzrelo ledzri heleliki ka Yehovha Xikwembu Nkulukumba waku. A doropa ledzro dzri ta va zrumbi hi lani ku nga helikiki. A dzri fanelanga dzri pfuxetiwa. 17 Ka mintxhumu leyi fanelaka ku helisiwa a u fanelanga u pambula ntxhumu ni wun’we, akuva Yehovha a nga ku hlundzrukeli, kambe a ku twela wusiwana, a ku komba timpswalu a va a ku yandzrisa, hi lani a va hlambanyeliki ha kone vakokwana vaku. 18 Hikusa u fanela ku yingiseta* Yehovha Xikwembu Nkulukumba waku, u hanya hi ku landzra milawu hinkwayu leyi ni ku leletaka yone namunhla; hi ndlela leyo u ta va na u yentxa leswi lulamiki a mahlweni ka Yehovha Xikwembu Nkulukumba waku.

14 “N’wine mi vana va Yehovha Xikwembu Nkulukumba wenu. Mi nga txhuki mi tsremeta nambi ku khwaya tinxiyi* hi mhaka ya mufi. 2 Hikusa mi vhanu lava xwengiki ka Yehovha Xikwembu Nkulukumba wenu; Yehovha a mi hlawule akuva mi va vhanu vake, pfindla dzrake dzra ku hlawuleka* a makazri ka vhanu hinkwavu lava nga misaveni.

3 “Mi nga txhuki mi da ntxhumu lowu nyenyentsaka. 4 Hi leswi swihazri leswi mi nga swi daka: Homu, hamba, mbuti, 5 nhlangu, mhunti, mhitlwa,* mbuti ya le tinhaveni, nhlengana,* hamba ya le nhoveni ni hamba ya le tinhaveni. 6 Mi nga da xihazri xin’wana ni xin’wana lexi nga ni sondzro ledzri yavaniki hi swiyenge swibidzri nakone xi gayelaka loko xi dile. 7 Kambe a swihazri leswi swi daka swi gama swi gayela, kumbe swi nga ni sondzro ledzri yavaniki hi swiyenge swibidzri, leswi mi kalaka mi nga fanelanga ku swi da, hi leswi: Kamela, mpfundla ni mpfundla wa le mazribyeni, hikusa swa da swi gama swi gayela kambe a swi na sondzro ledzri yavaniki hi swiyenge swibidzri. Swi nyamile kwenu. 8 Nambi nguluve a yi fanelanga yi diwa hikusa yi ni sondzro ledzri yavaniki hi swiyenge swibidzri kambe a yi gayeli loko yi dile. Yi nyamile kwenu. Mi nga txhuki mi da nyama ya swihazri leswi nambi ku khumba mintsrumbu ya swone.

9 “Ka swihazri hinkwaswu leswi nga matini, mi nga da leswi swi nga ni swihupa ni mayaya. 10 Kambe leswi swi kalaka swi nga na mayaya kumbe swihupa a mi fanelanga mi swi da. Swi nyamile kwenu.

11 “A nyanyana yin’wana ni yin’wana leyi kalaka yi nga nyamanga mi nga da. 12 Kambe hi leti tinyanyana leti mi kalaka mi nga fanelanga mi ti da: Gama, gama ledzri daka tihlampfi, gama dzra ku leha dzra ntima ledzri nga ni nhloko ya ku leha ya ku pfumala mavoya, 13 mangatlu ya ku pshwuka, mangatlu wa ntima ni mixaka leyin’wana hinkwayu ya mangatlu, 14 mixaka hinkwayu ya magwavava, 15 yintxa, xikhovha, n’wantsrekute, mixaka hinkwayu ya swikotana, 16 xikhovha xa xitsrongo, xikhovha xa ku leha, sekwa, 17 khungula, gama dzra ku leha dzra nhloko ya ku pfumala mavoya,* n’wampekupeku, 18 yindwa, mixaka hinkwayu ya nyakukolwa, n’wamahlanga ni ntengeledjana. 19 A swihazrahazrana hinkwaswu leswi hahaka, leswi fambafambaka misaveni na swone swi nyamile kwenu. A swi fanelanga swi diwa. 20 Kambe a xihazri xin’wana ni xin’wana lexi hahaka, lexi kalaka xi nga nyamanga, mi nga da.

21 “Mi nga txhuki mi da xihazri lexi kumiwiki na xi file. Mi nga xi nyika muluveli lweyi a tsrhamaka madoropeni yenu kutani yene a nga da, kumbe ku xi xavisela mhunu wa tiko dzrimbeni. Hikusa n’wine mi vhanu lava xwengiki ka Yehovha Xikwembu Nkulukumba wenu.

“U nga txhuki u sweka ximbutana hi leiti dzra mamana wa xone.

22 “U fanela ku nyikela swa wukhume bya* hinkwaswu leswi mbewu yaku yi swi bindzrulaka a masin’wini lembe dzrin’wana ni dzrin’wana. 23 U ta da swa wukhume bya mavele yaku, vhinyu dzraku ledzrimpshwa, mafuzra yaku ni bya mativula ya tihomu, tihamba ni timbuti taku, a mahlweni ka Yehovha Xikwembu Nkulukumba waku, a mbangwini lowu yene a taka wu hlawula akuva ku twalisiwa vito dzrake ka wone, leswaku u dondzra ku txhava Yehovha Xikwembu Nkulukumba waku hi lani ku nga helikiki.

24 “Kambe loko a liyendzro dzra kone dzri lehe ngopfu kutani wene u nga swi koti ku famba ni mintxhumu hinkwayu leyi (hikusa Yehovha Xikwembu Nkulukumba waku a ta ku tovokisa), a mbangwini lowu Yehovha Xikwembu Nkulukumba waku a wu hlawuliki akuva ku twalisiwa vito dzrake ka wone, leswi mbangu wa kone wu kumekaka kule 25 u nga txintxisa mintxhumu leyo hi mali, u va u teka mali leyo u famba na yone a mbangwini lowu Yehovha Xikwembu Nkulukumba waku a taka wu hlawula. 26 Kutani hi mali leyo u nga xava hinkwaswu leswi u swi navelaka, swa ku fana ni tihomu, tihamba, timbuti, vhinyu ni mixaka yin’wana ya mabyala, hinkwaswu leswi u swi navelaka,* u va u swi dela kolanu a mahlweni ka Yehovha Xikwembu Nkulukumba waku, u nyonxa, wene ni va ndangu waku. 27 U nga tsrhiki ku hlayisa Mulevhi lweyi a nga madoropeni yaku, hikusa wene u nyikiwe pfindla kumbe xiyenge, kambe yene a nga nyikiwanga.

28 “A ku heleni ka lembe dzrin’wana ni dzrin’wana dzra wuzrazru, u fanela ku buyisa swa wukhume hinkwabyu bya leswi u swi bindzruliki a lembeni ledzro. 29 Kutani leswi Mulevhi a kalaka a nga nyikiwanga xiyenge kumbe pfindla kun’we na wene, ni muluveli, n’wana lweyi a feliwiki hi vapswele* ni wansati lweyi a feliwiki hi nuna, lava va tsrhamaka a madoropeni yaku, va ta buya va va va da va xuzra, akuva Yehovha Xikwembu Nkulukumba waku a ku tovokisa ka hinkwaswu leswi u taka swi yentxa.

15 A ku heleni ka lembe dzrin’wana ni dzrin’wana dzra wu 7, u fanela ku tima swikweneti. 2 U ta yentxisa xileswi: Mun’wana ni mun’wana lweyi a devhiwaka a fanela ku dzrivalela lweyi a mu devhaka. A nga fanelanga a londzra mhunu mun’wana nambi makwavu, hikusa ku ta twalisiwa ku timiwa ka swikweneti a mahlweni ka Yehovha. 3 U nga ha londzra muluveli kambe a xikweneti xa makwenu u fanela ku xi tima. 4 Nambitanu, a ku fanelanga ku va ni xisiwana a makazri kwenu hikusa Yehovha, nakunene, a ta mi tovokisa a tikweni ledzri Yehovha Xikwembu Nkulukumba wenu a mi nyikaka dzrone swanga pfindla. 5 Leswo swi to koteka ntsena loko u yingiseta zritu dzra Yehovha Xikwembu Nkulukumba waku hi ku dumbeka u va u hanya hi milawu leyi ni ku nyikaka yone namunhla. 6 Hikusa Yehovha Xikwembu Nkulukumba waku a ta ku tovokisa hi lani a ku dumbisiki ha kone, nakone a matiko manyingi ma ta ta kwaku akuva ma ta ta voleka,* kambe wene a u nge ti voleka ntxhumu; handle ka leswo, u ta fuma matiko manyingi kambe wone a ma nge ti ku fuma.

7 Loko mun’we ka vamakwenu o txhuka a va xisiwana ka dzrin’we dzra madoropa ya tiko ledzri Yehovha Xikwembu Nkulukumba waku a ku nyikaka dzrone, u nga txhuki u tlanyalisa mbilu yaku nambi ku tsrona makwenu lweyi a nga xisiwana. 8 Kambe u fanela ku mu komba malwandla u va u mu voleka hinkwaswu leswi a swi vilelaka kumbe leswi swi mu kiyelelaka. 9 Tivoneli akuva u nga txhuki u va ni mimpimiso ya ku biha a mbilwini yaku u tibyela leswi: ‘A lembe dzra wu 7, ku nga lembe dzra ku tima swikweneti, dzri le kusuhi’, u va u tsrhika ku hanana makwenu lweyi a nga xisiwana, u nga mu nyiki ntxhumu. Loko o dzrila ha wene ka Yehovha u ta va na u dohile. 10 U nga mu hanani na u ngurangura kambe mu hanani hi mbilu hinkwayu, hikusa hi leswo swi yentxaka kuva Yehovha Xikwembu Nkulukumba waku a tovokisa mintizro yaku hinkwayu ni hinkwaswu leswi u swi yentxaka. 11 Minkama hinkwayu ku ta va ni swisiwana a tikweni ledzri. Xileswo ni ku byela leswi: ‘U fanela ku hanana makwenu lweyi a pfumalaka u va u hanana ni xisiwana, a tikweni dzraku.’

12 “Loko wo txhuka u xaviseliwa mun’we ka vamakwenu, Muheberu wa xinuna kumbe wa xisati, a va a ku tizrela 6 wa malembe, hi lembe dzra wu 7 u fanela ku mu ntsrhunxa. 13 Nakone loko u mu ntsrhunxa u nga mu tsrhike a muka hi mavoko.* 14 Hi ku swi zrandzra, u fanela ku mu hanana swa kukazri ka ntlhambi waku, ka mavele yaku, mafuzra yaku ni vhinyu dzraku. U fanela ku mu hanana hi mpimu lowu Yehovha Xikwembu Nkulukumba waku a ku tovokisiki ha wone. 15 Dzrimuka leswaku a u li xikazrawa a tikweni dzra Egipta ni leswaku Yehovha Xikwembu Nkulukumba waku a ku huluxile, hi leswo swi yentxaka ni ku nyika xileleto lexi namunhla.

16 “Kambe loko a ku: ‘A ni nge ti ku tsrhika!’ hi leswi a zrandzraka wene ni va ndangu waku nakone a nyonxaka ha wene, 17 u ta mu ginetelisa ka xipfalu u va u mu boxa ndleve hi lisungunu* kutani a ta va xikazrawa xaku wutomi byake hinkwabyu. U fanela ku yentxa leswi fanaka ka xikazrawa xaku xa xisati. 18 U nga mu soli loko u mu ntsrhunxa kutani a tifambela, hikusa a ntizro lowu a ku hambeliki wone ku dzringana 6 wa malembe, wu phindha ha kabidzri ntizro lowu wu hambiwaka hi mutizri lweyi a tholiwiki nakone Yehovha Xikwembu Nkulukumba waku a ku tovokisile ka hinkwaswu leswi yentxiwiki.

19 U fanela ku xwengisela Yehovha Xikwembu Nkulukumba waku a mativula hinkwawu ya xinuna ya tihomu taku, timbuti taku ni tihamba taku. A u fanelanga u hamba ntizro wa kukazri hi mativula ya tihomu taku nambi ku tsremeta voya bya mativula ya timbuti taku ni tihamba taku. 20 Wene ni va ndangu waku mi fanela ku swi da a mahlweni ka Yehovha Xikwembu Nkulukumba waku lembe ni lembe a mbangwini lowu Yehovha a taka wu hlawula. 21 Kambe, loko xihazri xa kone xo va ni wulema bya kukazri, leswi liki, xi khuta, xi fe matihlo kumbe xi ni wulema lebyikulu, u nga xi nyikeli swanga gandzrelo ka Yehovha Xikwembu Nkulukumba waku. 22 U fanela ku xi da a ndzreni ka madoropa yaku; lweyi a nyamiki ni lweyi a kalaka a nga nyamanga va nga da, hi lani mhunti ni nhlangu a swi ta diwa ha kone. 23 Kambe u nga di ngati; u fanela ku yi halata hansi ku fana ni mati.

16 “Dzrimuka leswaku a hweti ya Abibi* i ya lisima, xileswo, u fanela ku tlangela Paxkwa dzra Yehovha Xikwembu Nkulukumba waku, hikusa Yehovha Xikwembu Nkulukumba waku a ku humese a Egipta ka wusiku bya kukazri hi hweti ya Abibi. 2 Ka tihamba taku, timbuti taku ni tihomu taku, u ta pambula ta kukazri u hamba ha tone gandzrelo dzra Paxkwa dzra Yehovha Xikwembu Nkulukumba waku, a mbangwini lowu Yehovha a taka wu hlawula akuva ku twalisiwa vito dzrake ka wone. 3 A gandzrelo a dzri fanelanga dzri diwa ni ntxhumu lowu wu nga ni fermentu;* u ta da mapawu lawa ma kalaka ma nga txheliwanga fermentu ku dzringana 7 wa masiku, ku nga pawu dzra mahlomulo, hikusa u humesiwe a tikweni dzra Egipta hi xihantla. Yentxa leswo akuva a wuton’wini byaku hinkwabyu u dzrimuka siku ledzri u humiki ha dzrone a Egipta. 4 Ku dzringana 7 wa masiku, a ku fanelanga ku kumiwa mbila leyi biliki a mugangeni waku hinkwawu nakone ka nyama leyi u taka hamba ha yone magandzrelo hi madambu ya siku dzra ku sungula, a u fanelanga u siya ntxhumu ka yone ku ya tlhasa mundzruku ka kone ni mixo. 5 A u nge ti pfumeleliwa ku hamba gandzrelo dzra Paxkwa a madoropeni lawa Yehovha Xikwembu Nkulukumba waku a ku nyikaka wone, 6 kambe u to ma hambela ntsena a mbangwini lowu Yehovha Xikwembu Nkulukumba waku a taka wu hlawula akuva ku twalisiwa ka wone vito dzrake. U fanela ku nyikela gandzrelo dzra Paxkwa a madambyeni na dambu dzra ha ku pela, hi siku dzra ku fana ni ledzri u humiki ha dzrone a Egipta.* 7 U fanela ku sweka gandzrelo u va u dzri da a mbangwini lowu Yehovha Xikwembu Nkulukumba waku a taka wu hlawula, kutani a mundzruku ka kone a mixweni u nga tlhelela kaya kwaku. 8 Ku dzringana 6 wa masiku, u fanela ku da mapawu lawa ma kalaka ma nga txheliwanga fermentu nakone hi siku dzra wu 7 u ta hambela Yehovha Xikwembu Nkulukumba waku nhlengeletanu ya ku xwenga. A u fanelanga u hamba ntizro ni wun’we.

9 “U fanela ku konta 7 wa mavhiki nakone u ta sungula ku konta mavhiki wolawo ya 7 ku sukela loko ku sunguliwa ntsrhovelo wa trigu a masin’wini. 10 Kutani u fanela ku tlangela Nkhuvu wa Mavhiki ka Yehovha Xikwembu Nkulukumba waku, hi ku buyisa magandzrelo yaku ya ku tizrandzrela lawa u taka ma nyikela hi ku ya hi lani Yehovha Xikwembu Nkulukumba waku a taka va na a ku tovokise ha kone. 11 Kutani wene, n’wanaku wa xinuna, n’wanaku wa xisati, nandzra waku wa xinuna, nandzra waku wa xisati, Mulevhi lweyi a nga le madoropeni yaku,* muluveli, n’wana lweyi a feliwiki hi vapswele* ni wansati lweyi a feliwiki hi nuna, lava va tsrhamaka na wene, mi fanela ku nyonxa a mahlweni ka Yehovha Xikwembu Nkulukumba waku a mbangwini lowu Yehovha Xikwembu Nkulukumba waku a taka wu hlawula akuva ku twalisiwa ka wone vito dzrake. 12 Dzrimuka leswaku a u li xikazrawa a Egipta nakone yingiseta u tlhela u hanya hi ku landzra swileleto leswi.

13 “A nkama lowu u taka hlengeleta leswi u swi bindzruliki a mbangwini waku lowu u hehezrelaka ka wone, ni le mbangwini waku wa ku pfuvela ka wone vhinyu ni mafuzra, u fanela ku tlangela Nkhuvu wa Mintsronga ku dzringana 7 wa masiku. 14 Kutani wene, n’wanaku wa xinuna, n’wanaku wa xisati, nandzra waku wa xinuna, nandzra waku wa xisati, Mulevhi, muluveli, n’wana lweyi a feliwiki hi vapswele ni wansati lweyi a feliwiki hi nuna, lava va tsrhamaka na wene madoropeni yaku, mi fanela ku nyonxa hi nkama wa nkhuvu. 15 Ku dzringana 7 wa masiku, u fanela ku tlangela nkhuvu wa Yehovha Xikwembu Nkulukumba waku, a mbangwini lowu Yehovha a taka wu hlawula, hikusa Yehovha Xikwembu Nkulukumba waku a ta tovokisa ntsrhovelo waku hinkwawu ni hinkwaswu leswi u taka swi yentxa nakone u ta tala hi ku nyonxa.

16 “Kazrazru hi lembe, vavanuna hinkwavu va fanela ku ya mahlweni ka Yehovha Xikwembu Nkulukumba waku a mbangwini lowu a taka wu hlawula, leswi liki, ka Nkhuvu wa Mapawu lawa ma kalaka ma nga txheliwanga Fermentu, ka Nkhuvu wa Mavhiki ni le ka Nkhuvu wa Mintsronga, nakone a ku na mhunu lweyi a fanelaka ku ya mahlweni ka Yehovha na nga tamelanga ntxhumu. 17 A xihanano lexi mun’wana ni mun’wana a taka famba na xone xi fanela ku fambisana ni ndlela leyi Yehovha Xikwembu Nkulukumba waku a mu tovokisiki ha yone.

18 “U fanela ku beka vayavanyisi ni vazrangeli ka lixaka dzrin’wana ni dzrin’wana, a madoropeni hinkwawu* lawa Yehovha Xikwembu Nkulukumba waku a ku nyikaka wone nakone vone va fanela ku yavanyisa vhanu hi wululami. 19 A u fanelanga u soholota wululami nambi ku va ni xihlawuhlawu, futsrhi u nga pfumeli ku xaviwa, hikusa a ku xaviwa swi dlaya matihlo ya lweyi a tlhazrihiki swi tlhela swi soholota mazritu ya lweyi a lulamiki. 20 Wululami, ina, u fanela ku landzra wululami akuva u tama u hanya u va u teka tiko ledzri Yehovha Xikwembu Nkulukumba waku a ku nyikaka dzrone.

21 “A u fanelanga u byala nsinya ni wun’we akuva wu tizra swanga nsika ya ku xwenga* kusuhi ni altari ledzri u taka dzri hambela Yehovha Xikwembu Nkulukumba waku.

22 “Nakone a u fanelanga u tiyimisela nsika ya ku xwenga, ku nga ntxhumu lowu Yehovha Xikwembu Nkulukumba waku a wu nyenyaka.

17 “U nga hambeli Yehovha Xikwembu Nkulukumba waku magandzrelo hi homu kumbe hamba leyi limaliki kumbe yi kalaka yi nga tsrhamisekanga hikusa a ku ta va ntxhumu wa ku nyenyentsa ka Yehovha Xikwembu Nkulukumba waku.

2 “Loko a makazri kwaku, ka dzrin’we dzra madoropa lawa Yehovha Xikwembu Nkulukumba waku a ku nyikaka wone, ko txhuka ku kumeka wanuna kumbe wansati lweyi a yentxaka leswi bihiki a mahlweni ka Yehovha Xikwembu Nkulukumba waku a va a tlula nawu wake, 3 kumbe loko mhunu lweyo o hambuka a gandzrela swikwembu swimbeni a va a swi khinsamela, kumbe a khinsamela dambu, n’weti kumbe ntxhumu wun’wana lowu kumekaka matilweni, ku nga leswi ni kalaka ni nga mi leletanga kuva mi swi yentxa; 4 loko wo byeliwa mhaka ya ku fana ni leyo kumbe u yi tiva, u fanela ku yi kambela ha hombe. Loko swi tiyisekisiwa leswaku ku yentxiwe ntxhumu lowu nyenyentsaka a Israyele, 5 u fanela ku humesa a handle a swipfalwini swa doropa, wanuna kumbe wansati lweyi a yentxiki ntxhumu wa ku biha, kutani a mhunu lweyo a fanela ku khandliwa hi mazribye a za a fa. 6 A mhunu a to dlayiwa ntsena hi wumboni bya timboni tibidzri kumbe tizrazru; a nga fanelanga a dlayiwa hi wumboni lebyi nyikeliwiki hi mboni yin’we. 7 Lava va nyikeliki wumboni va fanela ku va va ku zranga ku mu khandla hi mazribye, ntsrhaku ka leswo, ku ta landzrela xitsrhungu. U fanela ku helisa wubihi makazri kwaku.

8 “Loko a madoropeni yenu ko txhuka ku va ni mhaka leyi kazrataka ngopfu ku yi yavanyisa, mhaka leyi yelanaka ni ku halatiwa ka ngati, leyi yelanaka ni nandzru wa kukazri lowu fanelaka ku thethiwa, madzolonga kumbe mhaka yin’wana, lanu ke, u fanela ku ya a mbangwini lowu Yehovha Xikwembu Nkulukumba waku a taka wu hlawula. 9 Yana ka Valevhi lava nga vaprista ni le ka muyavanyisi lweyi a taka va na a tizra a masikwini wolawo u va u hlaya mhaka yaku a mahlweni kwavu, kutani vone va ta ku byela leswi u fanelaka ku swi yentxa. 10 Ntsrhaku ka leswo, u fanela ku yentxa hinkwaswu leswi va taka ku byela swone a mbangwini lowu Yehovha a wu hlawuliki. U fanela ku yi landzrelelisisa ha hombe minkongomiso hinkwayu leyi va taka ku nyika yone. 11 U fanela ku landzra nawu lowu va taka ku komba wone ni ku landzra xiboho lexi va taka xi teka; u nga hambuki ka leswi va taka ku byela swone u ya xineneni kumbe u ya ximatsrini. 12 A mhunu lweyi a taka tikulisa a va a nga yingiseti muyavanyisi nambi muprista lweyi a taka va na a tizrela Yehovha Xikwembu Nkulukumba waku, a fanela ku dlayiwa. U fanela ku helisa a wubihi a Israyele. 13 Kutani tiko hinkwadzru dzri ta yingela mhaka leyo dzri va dzri txhava nakone a nga kone lweyi a ha taka tikulisa.

14 “Loko u ta nghena tikweni ledzri Yehovha Xikwembu Nkulukumba waku a ku nyikaka dzrone u va u dzri teka nakone u va na u tsrhama ka dzrone, kutani u tibyela leswi: ‘Ni navela ku tibekela hosi hi lani matiko lawa ma ni tsrandzreliki ma yentxaka ha kone’, 15 u fanela ku beka hosi leyi hlawuliwiki hi Yehovha Xikwembu Nkulukumba waku. A hosi leyi u taka yi beka yi fanela ku va mun’we ka vamakwenu. A u pfumeleliwi ku hlawula mhunu wa tiko dzrin’wana akuva a ku fuma kumbe mhunu lweyi a ngeke makwenu. 16 Kambe a hosi a yi fanelanga yi tihlengeletelela makavhalu manyingi nambi ku yentxa leswaku a vhanu va tlhelela Egipta hi nkongometo wolowo, hikusa Yehovha a ni byele a ku: ‘Mi nga tlheleli a Egipta.’ 17 Nakone a yi fanelanga yi va ni vasati vanyingi akuva mbilu ya yone yi nga hambuki futsrhi a yi fanelanga yi tihlengeletelela woru ni prata dzra dzrinyingi. 18 Loko yi sungula ku fuma a mfun’wini wa yone, yi fanela ku teka Nawu lowu nga mabukwini lawa ma bekisiwiki hi Valevhi lava va nga vaprista, yi wu tsrala ka buku.

19 “Yi fanela ku tsrhama ni buku ledzro yi va yi dzri dondzra masiku hinkwawu ya wutomi bya yone, akuva yi dondzra ku txhava Yehovha Xikwembu Nkulukumba wa yone ni ku landzra mazritu ya nawu lowu ni swileleto leswi, yi swi hetisisa. 20 Hi ndlela leyo, a mbilu ya yone a yi nge ti tikulisa ka vamakwavu nakone a yi nge ti hambuka ka milawu, yi ya xineneni kumbe yi ya ximatsrini, akuva yi fuma nkama wa ku leha, yone ni vana va yone a makazri ka Vaisrayele.

18 “A Valevhi lava nga vaprista nambi lixaka hinkwadzru dzra Levhi, a va fanelanga va nyikiwa xiyenge xa kukazri kumbe pfindla kun’we ni Vaisrayele. Va ta da magandzrelo lama hiseliwiki Yehovha hi ndzrilo, lawa ma nga pfindla dzrake. 2 Xileswo a va fanelanga va va ni pfindla a xikazri ka vamakwavu. Yehovha hi yene pfindla dzravu hi lani a va byeliki ha kone.

3 “Mun’wana ni mun’wana lweyi a hambaka gandzrelo, ku nga ha va hi homu kumbe hi hamba, a fanela ku nyika muprista a mintxhumu leyi: Xiphanga, tinhlaya ni nkofu. 4 U fanela ku mu nyika a ntsrhovelo waku wa ku sungula wa mavele, vhinyu dzraku ledzrimpshwa ni mafuzra yaku ku patsra ni voya bya ku sungula lebyi tsremetiwiki ka ntlhambi waku. 5 Yehovha Xikwembu Nkulukumba waku a hlawule Valevhi ni vanavu a makazri ka tinxaka taku akuva va tizra swanga vayimeli va Yehovha hi lani ku nga helikiki.

6 “Kambe loko Mulevhi wa kukazri a zruzra ka dzrin’we dzra madoropa ya Israyele lani a a tsrhama kone nakone a djula* ku ya a mbangwini lowu Yehovha a taka wu hlawula,* 7 a nga ya tizrela ka mbangu wolowo swanga muyimeli wa Yehovha Xikwembu Nkulukumba wake hi lani vamakwavu hinkwavu lava nga Valevhi va yentxaka ha kone a mbangwini wolowo, a mahlweni ka Yehovha. 8 Handle ka leswi a taka swi kuma loko a xavisa nhundzru ya vakokwana vake, a ta tlhela a yamukela swakuda swa ku fana ni leswi swi kumiwaka hi vamakwavu.

9 “Loko kutani u nghenile a tikweni ledzri Yehovha Xikwembu Nkulukumba waku a ku nyikaka dzrone, u nga txhuki u yetisela swihena swa ku nyenyentsa swa matiko wolawo. 10 Ku nga txhuki ku kumeka mhunu a makazri kwaku lweyi a hambaka magandzrelo hi n’wanake wa xinuna kumbe wa xisati hi ndzrilo,* kumbe lweyi a pfhumbataka, kumbe lweyi a hambaka masalamusi, kumbe lweyi a hlahluvaka,* kumbe muloyi, 11 kumbe lweyi a loyaka van’wana, kumbe lweyi a vutisaka vangoma, kumbe mupfhumbati, nambi lweyi a vutisaka vafi. 12 Hikusa lweyi a yentxaka mintxhumu leyo awa nyenyentsa a mahlweni ka Yehovha nakone hi kola ka swiyentxo leswo swa ku nyenyentsa, Yehovha Xikwembu Nkulukumba waku awa ma hlongola matiko lawa a mahlweni kwaku. 13 U fanela kuva lweyi a basiki hi ku helela a mahlweni ka Yehovha Xikwembu Nkulukumba waku.

14 “Hikusa a matiko lawa u taka ma hlongola ma yingiseta lava va yentxaka masalamusi ni lava va pfhumbataka, kambe Yehovha Xikwembu Nkulukumba waku a nga ku pfumeleli ku yentxa leswo. 15 A makazri ka vamakwenu, Yehovha Xikwembu Nkulukumba wenu a ta mi hlawulela muprofeta wa ku fana na mine. Mi fanela ku mu yingiseta. 16 Hikusa hi leswi u swi kombeliki Yehovha Xikwembu Nkulukumba waku a Horebe, hi siku ledzri a mi hlengeletanile, loko u te: ‘U nga ha tlheli u hi yentxa hi twa zritu dzra Yehovha Xikwembu Nkulukumba wezru kumbe hi vona ndzrilo lowu lowukulu, akuva hi nga fi. 17 Kutani Yehovha a ni byele a ku: ‘Leswi va swi hlayaka i swinene. 18 A xikazri ka vamakwavu ni ta va hlawulela muprofeta lweyi a fanaka na wene nakone ni ta beka mazritu yanga a non’wini wake, kutani a ta va byela hinkwaswu leswi ni taka mu leleta swone. 19 Nakunene, lweyi a taka kala a nga ma yingiseti mazritu yanga, lawa muprofeta a taka ma hlaya hi vito dzranga, a ta tihlamulela a mahlweni kwanga.

20 “‘Loko muprofeta wa kukazri, hi ku tikulisa, a hlaya swa kukazri na a ku a zrumiwe ha mine nakasi a ni mu zrumanga, kumbe a ku a zrumiwe hi swikwembu swin’wana, muprofeta yelweyo a fanela ku dlayiwa. 21 Kambe swi nga yentxeka u tivutisa leswi a mbilwini yaku: “Hi ta swi tivisa kuyini leswaku a hi Yehovha lweyi a hlayiki mazritu lawa?” 22 Loko muprofeta a hlaya swa kukazri na a ku a zrumiwe ha Yehovha swi gama swi nga humeleli, ku ta va ku nge Yehovha lweyi a mu leletiki. Leswi muprofeta lweyo a taka swi hlaya a ta va na o tisungulela. U nga txhuki u mu txhava.’

19 “Loko Yehovha Xikwembu Nkulukumba waku a helisa vhanu va tiko ledzri Yehovha Xikwembu Nkulukumba waku a ku nyikaka dzrone nakone u va na u tsrhama ka tiko dzravu, a madoropeni yavu ni le ka tiyindlu tavu, 2 u fanela ku tihlawulela madoropa mazrazru a tikweni ledzri Yehovha Xikwembu Nkulukumba waku a ku nyikaka dzrone akuva dzri va dzraku. 3 A tiko ledzri Yehovha Xikwembu Nkulukumba waku a ku nyikaka dzrone akuva dzri va dzraku u fanela ku dzri yava hi swiyenge swizrazru, nakone u fanela ku lulamisa switaratu akuva lweyi a dlayiki mhunu a tsrutsrumela ka dzrin’we dzra madoropa lawo.

4 “Leswi hi leswi swi fanelaka ku yentxiwa loko lweyi a dlayiki mhunu a tsrutsrumela kohala akuva a tama a hanya: Loko mhunu o txhuka a dlaya mumbeni hi mphazamu na ku nga li leswaku a o mu nyenya, 5 hi xikombiso, loko o famba ni makwavu a nhoveni akuva va ya tsrema tihunyi kutani a tlakula kawula* akuva a tsrema nsinya, a kawula dzri hlomuka ka mphinyu dzri ba mhunu yelweyo a fa, lanu ke, lweyi a dlayiki makwavu a fanela ku tsrutsrumela ka dzrin’we dzra madoropa wolawo akuva a nga dlayiwi. 6 Loko swi nga li tasu, a mudzrihiseli wa ngati lweyi a hlundzrukiki* a nga ha mu hlongolisa a mu kuma a va a mu dlaya hi leswi a mpfhuka wa ku ya a doropeni dzra wutumbelo wu nga wukulu; kambe a mudlayi a a nga fanelanga a dlayiwa hikusa a a nga mu nyenyi mhunu lweyi a mu dlayiki. 7 Hi leswi yentxaka ni ku byela leswi: ‘Hlawula madoropa mazrazru.’

8 “Yehovha Xikwembu Nkulukumba waku a ta yengesela mbangu waku hi lani a hlambanyeliki vakokwana vaku ha kone nakone a ta ku nyika tiko ledzri a dzri dumbisiki vakokwana vaku. 9 Kambe akuva leswo swi yentxeka, u fanela ku yingiseta hi ku dumbeka milawu hinkwayu leyi ni ku nyikaka yone namunhla, u zrandzra Yehovha Xikwembu Nkulukumba waku u va minkama hinkwayu u famba a tindleleni take. Kutani loko tiko dzraku dzri va dzrikulu, lanu ke, ka madoropa mazrazru ya wutumbelo lawa u nga na wone u fanela ku yengesela mazrazru. 10 Hi ndlela leyo, a ku nga ti halatiwa ngati leyi ngeke na nandzru nakone u nge ti va ni nandzru wa ngati a tikweni ledzri Yehovha Xikwembu Nkulukumba waku a ku nyikaka dzrone swanga pfindla.

11 “Kambe loko mhunu wa kukazri lweyi a a nyenya makwavu, a mu yimela a mu dumela a va a mu vavisa* lakakuva a fa, a gama mhunu lweyo a tsrutsruma a ya ka dzrin’we dzra madoropa wolawo, 12 a vakulukumba va le doropeni dzrake va fanela ku zruma vhanu va mu landzra nakone va fanela ku mu nyikela a mavokweni ya mudzrihiseli wa ngati, kutani wanuna lweyo a fanela ku fa. 13 A u fanelanga u mu tsretsrelela;* u fanela ku helisa xidoho xa mhunu lweyi a dlayiki mhunu lweyi a ngeke na nandzru a Israyele akuva swi ku fambela ha hombe.

14 “Loko u yaveliwa pfindla dzraku a tikweni ledzri Yehovha Xikwembu Nkulukumba waku a ku nyikaka dzrone akuva dzri va dzraku, u nga txhuki u txintxa mindzrelekanu ya muyakelani waku, lani vakokwana vaku a va tsremelane ha kone.

15 “A mhunu a nga fanelanga a nyikiwa nandzru loko ko va ni mboni yin’we ya xihoxo xin’wana ni xin’wana kumbe xidoho xin’wana ni xin’wana lexi a nga ha vaka a xi yentxile. A mhaka yi to tiyisekisiwa ntsena loko ku va ni wumboni bya timboni tibidzri kumbe tizrazru. 16 Loko mboni ya kukazri yo hehla mhunu mun’wana hi leswi yi mu nyenyaka, 17 a vhanu volavo vabidzri lava va holovaka va ta ya ka Yehovha a mahlweni ka vaprista ni vayavanyisi lava va taka va na va tizra a masikwini wolawo. 18 A vayavanyisi va ta kambisisa mhaka leyo hi wunyaminyami, kutani loko va kuma leswaku mhunu lweyo i mboni ya madzrimi nakone leswi a hehliki makwavu ha swone i madzrimi, 19 mi fanela ku mu yentxa leswi a a kunguhata ku swi yentxa makwavu. Hi ndlela leyo, mi fanela ku helisa wubihi a makazri kwenu. 20 A vhanu van’wana va ta yingela mhaka leyo va va va txhava, xileswo a va nge he ti txhuka va yentxa wubihi bya ku fana ni lebyo a makazri kwenu. 21 A u fanelanga u tsretsrelela mhunu lweyo, ku ta va wutomi hi wutomi, tihlo hi tihlo, tinyo hi tinyo, voko hi voko, nkondzro hi nkondzro.

20 “Loko u ya yimpini u ya lwa ni valala vaku kutani u xiya leswaku a masotxha yavu, makavhalu yavu ni tin’qolo tavu ta yimpi i swinyingi ku tlula leswi u nga na swone, u nga va txhavi hikusa Yehovha Xikwembu Nkulukumba waku lweyi a ku humesiki a Egipta a na wene. 2 Loko mi li kusuhi ni ku sungula ku lwa, a muprista a fanela ku tsrhindzrekela a vulavula ni vhanu. 3 A fanela ku va byela a ku: ‘Yingela We Israyele, swoswi mi ta sungula ku lwa ni valala venu. Mi nga heli ntamu, mi nga txhavi nakone mi nga pfilunganyeki, futsrhi mi nga zruzrumeli hi mhaka yavu. 4 Hikusa Yehovha Xikwembu Nkulukumba wenu a na n’wine akuva a mi lwela ka valala venu a va a mi huluxa.’

5 “A vazrangeli va yimpi na vone va fanela ku byela xitsrhungu va ku: ‘I mani lweyi a yakiki yindlu kambe a nga siki yi khangula? A a muki, hikusa a nga txhuka a ya fa yimpini kutani a yindlu yake yi sala yi khanguliwa hi mhunu mun’wana. 6 I mani lweyi a byaliki minsinya ya mawuvha kambe a nga siki khaya mihandzru ya kone? A a muki, hikusa a nga txhuka a ya fa yimpini kutani mhunu mun’wana a sala a khaya mihandzru yake. 7 I mani lweyi a dumbisiki wansati wa kukazri mutxhatu kambe a nga siki txhata na yene? A a muki, hikusa a nga txhuka a ya fa yimpini kutani wanuna mun’wana a sala a txhata ni wansati lweyo.’ 8 A vazrangeli va yimpi va fanela ku tlhela va vutisa xitsrhungu va ku: ‘I mani lweyi a txhavaka nakone a heliki ntamu? A a muki akuva a nga yentxi leswaku vamakwavu va hela ntamu ku fana na yene.’ 9 Loko vazrangeli va yimpi va heta ku vulavula ni xitsrhungu, va fanela ku beka vazrangeli va masotxha akuva va zrangela xitsrhungu a ku lweni.

10 “Loko u tsrhindzrekela ka doropa dzra kukazri akuva u lwa na dzrone, ku sungula u fanela ku byela vhanu va kone leswaku u djula ku hamba ku zrula na vone. 11 Loko va ku yangula hi ndlela ya ku zrula va va va ku pfulela tinyangwa, a vhanu hinkwavu va doropa ledzro va ta va swikazrawa swaku, va va va ku tizrela. 12 Kambe loko va yala ku hamba ku zrula na wene nakone va lwa na wene, u fanela ku tsrandzrela doropa dzravu, 13 kutani Yehovha Xikwembu Nkulukumba waku nakunene a ta dzri nyikela a mavokweni yaku. Dlaya vavanuna hinkwavu lava nga doropeni ledzro. 14 Kambe u nga teka vavasati, vatsrongwana, mintlhambi ni hinkwaswu leswi nga doropeni, nhundzru hinkwayu, nakone u ta da leswi u swi phangiki ka valala vaku lava Yehovha Xikwembu Nkulukumba waku a va nyikeliki kwaku.

15 “U ta yentxa leswo ka madoropa hinkwawu lawa ma nga kule na wene, ku nga li ka madoropa ya matiko lawa ma nga kusuhi na wene. 16 Kambe ka madoropa ya vhanu lava, lawa Yehovha Xikwembu Nkulukumba waku a ku nyikaka wone swanga pfindla, a u fanelanga u pfumelela ntxhumu wun’wana ni wun’wana lowu hefemulaka wu tama wu hanya. 17 A Vaheti, Vaamori, Vakanana, Vaperezi, Vahivi ni Vayebusi, u fanela ku va helisa* hi lani Yehovha Xikwembu Nkulukumba waku a ku leletiki ha kone; 18 akuva va nga mi yentxi mi dohela Yehovha Xikwembu Nkulukumba wenu, hi kuva va mi dondzrisa ku yentxa mintxhumu ya ku nyenyentsa leyi va yi yentxelaka swikwembu swavu.

19 “Loko u tsrandzrela doropa dzra kukazri akuva u dzri teka, nakone u li ku lweni na dzrone ku dzringana nkama wa ku leha, a u fanelanga u helisa minsinya ya dzrone hi ku yi tsremelela hi kawula. U nga da mihandzru ya yone kambe a u fanelanga u yi tsrema. Xana swa sindzrisa kuva u dumela nsinya hi lani u mu dumelaka ha kone mhunu? 20 U nga ha helisa ntsena minsinya leyi u tivaka leswaku a yi diwi. U nga ha yi tsrema akuva u yaka swa ku tsrandzrela ha swone doropa ledzri dzri lwaka na wene ku ya tlhasela loko u dzri hlula.

21 “Loko wo ya kuma ntsrumbu wa mhunu wa kukazri a nhoveni ya tiko ledzri Yehovha Xikwembu Nkulukumba waku a ku nyikaka dzrone akuva dzri va dzraku kambe swi nga tiveki leswaku a dlayiwe hi mani, 2 a vakulukumba ni vayavanyisi vaku va fanela ku ya pima mpfhuka lowu nga kone ku sukela lomu ntsrumbu wu nga kone ku ya tlhasa a madoropeni lawa ma kumekaka kusuhi. 3 Kutani a vakulukumba lava va tsrhamaka ka doropa ledzri nga kusuhi ni ntsrumbu va fanela ku teka a xihon’wana xa pswele a ntlhambini, lexi kalaka xi ngi ngi sama xi tizrisiwa nakone xi kalaka xi ngi ngi sama xi koka gedjo. 4 A vakulukumba va doropa ledzro va fanela ku teka xihon’wana va fulamela na xone a nkoveni, lani ku nga ni mati lama tsrutsrumaka, ka mbangu lowu ku kalaka ku ngi ngi sama ku dzrimiwa nambi ku byaliwa, kutani va fanela ku xi tsrhova nhamu a nkoveni wolowo.

5 “Kutani a vaprista lava nga Valevhi va ta ta, hikusa Yehovha Xikwembu Nkulukumba waku a va hlawulile akuva va ku tizrela, akuva va tovokisa hi vito dzra Yehovha. Va ta mi byela ndlela ya ku lulamisa timhaka hinkwatu leti ti yelanaka ni madzolonga. 6 Kutani a vakulukumba hinkwavu va doropa ledzri nga kusuhi ni ntsrumbu va fanela ku hlamba mavoko a henhla ka xihon’wana lexi tsrhoviwiki nhamu a nkoveni. 7 Nakone va fanela ku hlaya leswi: ‘A mavoko yezru a hi wone ma halatiki ngati leyi, futsrhi a matihlo yezru a ma ku vonanga ku halatiwa ka yone. 8 We Yehovha, u nga dzri voni nandzru tiko dzraku dzra Israyele ledzri u dzri tizruliki, nakone u nga yentxi leswaku vhanu vaku, ku nga Vaisrayele, va zrwala nandzru wa ngati leyi ngeke na nandzru.’ 9 Hi ndlela leyo, u ta helisa nandzru wa ngati leyi ngeke na nandzru a makazri kwaku, u yentxa leswi lulamiki a mahlweni ka Yehovha.

10 “Loko wo txhuka u ya yimpini u ya lwa ni valala vaku, a va Yehovha Xikwembu Nkulukumba waku a ku hlulela vone kutani u va teka akuva va ya va swikazrawa, 11 kutani ka swikazrawa u vona wansati wa ku xonga, u mu navela nakone u djula ku mu teka akuva a va nsati waku, 12 u nga mu teka u muka na yene, kutani yene a fanela ku tsremeta mpandlha, a tsremeta min’wala, 13 a susa mpahla ya wukazrawa kutani a tsrhama kaya kwaku. Wansati lweyo a ta dzrila papayi wake ni mamana wake ku dzringana hweti, ntsrhaku ka leswo, u nga yetlela na yene; u ta va nuna wake, kutani yene a ta va nsati waku. 14 Kambe loko a nga ha ku nyonxisi u fanela ku mu tsrhika a ya lomu a ku djulaka.* Kambe a u fanelanga u mu xavisa hi mali nambi ku mu khoma hi ndlela ya nsele, hikusa u mu khomisi tingana.

15 “Loko wanuna wa kukazri o va ni vasati vabidzri a va a zrandzra mun’we ku tlula lwemun’wana nakone ha vabidzri va mu pswalele vana, na n’wana wa mativula a pswaliwe hi nsati lweyi a kalaka a nga zrandzriwi ngopfu, 16 a siku ledzri a taka yavela vanake pfindla a nge ti pfumeleliwa ku zrangisa mativula ya nsati lweyi a zrandzriwaka ngopfu a matsrhan’wini ya mativula ya nsati lweyi a kalaka a nga zrandzriwi ngopfu, lweyi nakunene a nga mativula yake. 17 A fanela ku swi kombisa leswaku a n’wana wa nsati lweyi a kalaka a nga zrandzriwi ngopfu hi yene a nga mativula, hi ku mu nyika pfindla ledzri phindhiwiki kabidzri ka hinkwaswu leswi a nga na swone, hikusa a n’wana lweyo i handzru wa ku sungula wa wuswikoti byake bya ku beleka. A mfanelo ya ku va mativula i yake.

18 “Loko mhunu wa kukazri a ni n’wana lweyi a tiyeliki nhloko nakone a nga dukwa, a kalaka a nga yingiseti papayi wake nambi mamana wake, nakone vone va zame ku mu kawuka kambe a yale ku va yingiseta, 19 a vapswele vake va fanela ku mu khoma va huma na yene va ya ka vakulukumba a nyangweni ya doropa 20 va tlhasa va byela vakulukumba va ku: ‘A n’wanezru lweyi a tiwomisa nhloko nakone i dukwa, a nga hi yingiseti. A ni magolo futsrhi i mpopswi.’ 21 Kutani a vhanu hinkwavu a doropeni va ta mu khandla hi mazribye a za a fa. Hi ndlela leyo, susa leswi bihiki a makazri kwaku.

22 “Loko mhunu a hamba xidoho lexi yentxaka a faneliwa hi ku dlayiwa kutani a dlayiwa u va u mu hayeka a mhandzrini, 23 a ntsrumbu wake a wu fanelanga wu tsrhama wusiku hinkwabyu a mhandzrini. Nakunene u fanela ku mu lahla hi siku dzroledzro hikusa lweyi a hayekiwaka a mhandzrini a zrukiwile ha Xikwembu Nkulukumba. A u fanelanga u nyamisa tiko ledzri Yehovha Xikwembu Nkulukumba a ku nyikaka dzrone swanga pfindla.

22 “Loko u vona hamba kumbe homu ya makwenu na yi lahlekile u nga tiphungalati u yentxa ingiki wo kala u nga yi voni. U fanela ku yi teka u yi tlhelisa ka makwenu. 2 Kambe loko a n’winyi* a tsrhama kule na wene kumbe u nga mu tivi, u fanela ku teka xifuyu lexo u ya tsrhama na xone nakone xi fanela ku tsrhama na wene ku ya tlhasa loko n’winyi wa xone a xi landzra. Lanu ke, u fanela ku mu tlhelisela xone. 3 Leswi hi leswi u fanelaka ku swi yentxa loko u kuma mbongolo, mpahla kumbe ntxhumu wun’wana ni wun’wana lowu nga ha vaka na wu lahlekele makwenu. U nga tiphungalati u yentxa ingiki wo kala u nga wu vonanga.

4 “Loko u vona mbongolo kumbe homu ya makwenu na yi wa ndleleni, u nga tiphungalati u yentxa ingiki hi loko u nga yi voni. U fanela ku mu pfuna ku sekelekisa xihazri lexo.

5 “A wansati a nga fanelanga a yambala mpahla ya va xinuna, ni wanuna a nga fanelanga a yambala mpahla ya va xisati. Hikusa hinkwavu lava yentxaka leswo va nyenyentsa a mahlweni ka Yehovha Xikwembu Nkulukumba waku.

6 “Loko u famba ndleleni kutani u kuma xisaka xa nyanyana a nsinyeni kumbe a hansi na xi ni mavondlo kumbe matandzra, nakone mamana wa kone a li ku fukwameleni, a u fanelanga u teka mamana wa kone kun’we ni mavondlo ya kone. 7 U nga ha titekela mavondlo kambe tsrhika mamana wa kone a famba. Yentxa leswo akuva swi ku fambela ha hombe ni kuva u hanya nkama wa ku leha.

8 “Loko u yaka yindlu u fanela ku yaka swa ku biyela lwangu, akuva wene kun’we ni va ndangu waku mi nga kumi nandzru wa ngati loko ko txhuka ku wa mhunu na a li henhla ka yone.

9 “Ka nsimu yaku ya minsinya ya mawuvha u nga byali muxaka wumbeni wa swibewu. Hikusa loko wo yentxa leswo hinkwaswu leswi taka bindzruliwa hi leswi u swi byaliki ni hinkwaswu leswi taka bindzruliwa hi minsinya ya mawuvha, swi ta tekiwa swi yisiwa mbangwini wa ku xwenga.

10 “U nga txhuki u kangela homu ni mbongolo akuva swi dzrima xikan’we.

11 “U nga txhuki u yambala mpahla leyi hambiwiki hi voya lebyi patsriwiki ni linyu.

12 “U fanela ku hamba mafundzru lawa ma nga ni matxhakala ka mune wa tiponta ta xiyambalu xaku.

13 “Loko wanuna wa kukazri o teka nsati, a yetlela na yene ntsrhaku ka leswo a sungula ku mu nyenya* 14 a va a mu lumbeta leswaku a ni mahanyela ya ku biha, a tlhela a ntxhimisa vito dzrake hi ku hlaya leswi: ‘Ni teke wansati lweyi akuva a va nsati wanga, kambe nkama lowu ni yetleliki na yene ni gungule leswaku a same a yetlela ni wanuna,’ 15 a vapswele va n’hwanyana va fanela ku ya ka vakulukumba a nyangweni wa doropa va ya kombisa wumboni bya leswaku n’wanavu a a ngi ngi sama a yetlela ni wanuna. 16 A papayi wa n’hwanyana a fanela ku byela vakulukumba a ku: ‘Ni teke n’wananga wa n’hwanyana ni nyika wanuna lweyi akuva a va nsati wake kambe swoswi awa mu nyenya* 17 futsrhi a mu lumbeta ku va ni mahanyela ya ku biha, a li: “Ni gungule leswaku n’wanaku a same a yetlela ni wanuna.” Na swi twa leswi a swi hlayaka, kambe hi lebyi wumboni bya leswaku n’wananga a a ngi ngi yetlela ni wanuna.’ Kutani va ta yandlala lensori a mahlweni ka vakulukumba va doropa. 18 A vakulukumba va doropa va ta khoma wanuna yelweyo va mu ba. 19 A ta tlhela a dzriha hi 100 wa maxekele* ya prata va va va teka maxekele lawo va ma nyika papayi wa n’hwanyana hikusa a wanuna yelweyo a ntxhimise vito dzra n’hwanyana wa Israyele nakone a n’hwanyana yelweyo a ta tama a va nsati wake. A nga ti pfumeleliwa ku mu tsrhika; a ta tsrhama naye wutomi byake hinkwabyu.

20 “Kambe loko leswi a mu lumbetaka ha swone ku li ntiyiso, ku nga kumeki wumboni bya leswaku a wansati yelweyo a a ngi ngi yetlela ni wanuna, 21 va fanela ku teka wansati lweyo va mu humesa handle, a nyangweni ya yindlu ya papayi wake, kutani a vavanuna va doropa ledzro va fanela ku mu khandla hi mazribye a za a fa, hikusa a yentxe ntxhumu lowu danisaka a Israyele hi ku yentxa wunghwavana* na a li kaya ka papayi wake. Hi ndlela leyo, helisa wubihi a makazri kwaku.

22 “Loko wanuna wa kukazri o kumiwa na a yetlele ni nsati wa wanuna mumbeni, ha wubidzri byavu, lwe wanuna ni lwe wansati va yetleliki xikan’we, va fanela ku dlayiwa. Hi ndlela leyo, helisa a wubihi a Israyele.

23 “Loko n’hwanyana lweyi a nga siki yetlela ni wanuna a dumbisiwe mutxhatu hi wanuna wa kukazri kutani wanuna mun’wana a mu kuma doropeni a va a yetlela na yene, 24 ha wubidzri byavu mi fanela ku va humesa handle ka nyangwa wa doropa mi va mi va khandla hi mazribye va za va fa, lwe wansati a dlawela ku va a nga banga nyandha a doropeni kasi lweyi wanuna a ta dlawela ku va a danise nsati wa makwavu. Hi ndlela leyo, helisa wubihi a makazri kwaku.

25 “Kambe loko wanuna o kuma n’hwanyana a nhoveni, lweyi a dumbisiwiki mutxhatu a va a mu hamba nsele, ka xiyimu lexo ku to dlayiwa lwe wanuna ntsena. 26 U nga mu yentxi ntxhumu lwe wa n’hwanyana hikusa a nga yentxanga xidoho lexi mu yentxaka a faneliwa hi ku fa. A xiyimu lexo xi fana ni xa wanuna lweyi a dumelaka makwavu a va a mu dlaya.* 27 Hikusa e mu kuma nhoveni nakone nh’wanyana lweyi a dumbisiwiki mutxhatu a be nyandha kambe a nga kone lweyi a mu lamuleliki.

28 “Loko wanuna o kuma wansati lweyi a nga siki yetlela ni wanuna nakone a nga siki dumbisiwa mutxhatu, a mu khoma a yetlela na yene va va va gunguliwa, 29 a wanuna lweyi a yetleliki na yene a ta hakela 50 wa maxekele ya prata ka papayi wa n’hwanyana, kutani a n’hwanyana a ta va nsati wake. Hi mhaka ya leswi a mu danisiki, a nga ti pfumeleliwa kuva a hambana na yene, a ta tsrhama na yene wutomi byake hinkwabyu.

30 “Ku nga txhuki ku va ni wanuna lweyi a yentxaka swa tinkuku ni nsati wa papayi wake, akuva a nga txheli papayi wake tingana.

23 “A ku na wanuna lweyi a tsrheniwiki hi ku pshwandlasiwa mazranga yake ya wununa kumbe hi ku tsremiwa xizro xake xa wununa, a fanelaka ku nghena a nhlengeletanwini ya Yehovha.*

2 “A ku na n’wana ni mun’we wa le wumbuyeni lweyi a fanelaka ku nghena a nhlengeletanwini ya Yehovha. A nga kone ni mun’we ka vatukulu vake, nambi ka lixaka dzra wu 10, lweyi a fanelaka ku nghena a nhlengeletanwini ya Yehovha.

3 “A ku na Muamoni ni mun’we nambi Mumowabu lweyi a fanelaka ku nghena a nhlengeletanwini ya Yehovha. A nga kone ni mun’we ka vatukulu vake, nambi ka lixaka dzra wu 10, lweyi a fanelaka ku nghena a nhlengeletanwini ya Yehovha, 4 hikusa a va mi tlhangavetanga akuva va ta ta mi pfuna hi swakuda ni mati nkama lowu mi humiki a Egipta, ni hi mhaka ya leswi va xaviki Balama n’wana wa Beyori wa le Petori a Mezopotamiya akuva a ku zruka. 5 Kambe Yehovha Xikwembu Nkulukumba waku a nga djulanga ku yingiseta Balama. A matsrhan’wini ya leswo, Yehovha Xikwembu Nkulukumba waku a ndzrulute xizruku xi va tovoko kwaku, hikusa Yehovha Xikwembu Nkulukumba waku a a ku zrandzra. 6 A u fanelanga u va navelela leswinene kumbe leswaku swi va fambela ha hombe wutomi byaku hinkwabyu.

7 “U nga nyenyi Muedomu hikusa i makwenu.

“U nga nyenyi Muegipta, hikusa wa ve muluveli a tikweni dzrake. 8 Ku sukela ka lixaka dzra wuzrazru, a vana vavu va nga nghena a nhlengeletanwini ya Yehovha.

9 “Loko u gwimbe mintxhatxha akuva u lwa ni valala vaku, u fanela ku va lweyi a basiki hi tindlela hinkwatu.* 10 Loko wanuna wa kukazri o txhuka a va lweyi a kalaka a nga basanga hi ku va a hume mbewu ya wununa a wusikwini, a fanela ku huma a mbangwini lowu ku dzimiwiki ka wone mintxhatxha nakone a nga fanelanga a tlhela. 11 A nhlikanhini a fanela ku hlamba nakone a madambyeni a nga ha tlhelela a ntxhatxheni. 12 U fanela ku bekisa mbangu lowu tumbeliki a handle ka mbangu lowu ku dzimiwiki ka wone mintxhatxha nakone u ta ya ka mbangu wolowo.* 13 Ka switizro swaku, u fanela ku va ni ntxhumu wa ku kela ha wone. Loko u ya tizruma, ku sungula u fanela ku kela xikhele hi ntxhumu lowo u gama u seletela nsila yaku. 14 Hikusa Yehovha Xikwembu Nkulukumba waku a fambafamba a mintxhatxheni yaku akuva a ku huluxa ni ku nyikela valala vaku a mavokweni yaku. Xileswo a mintxhatxha yaku yi fanela kuva leyi xwengiki akuva a nga voni ntxhumu lowu kalaka wu nga basanga a makazri kwaku a va a ku tsrhika.

15 “Loko mhunu wa kukazri lweyi a nga xikazrawa a tsrutsruma ka n’winyi wake a ta kwaku, a u fanelanga u mu tlhelisela ka n’winyi wake. 16 A nga tsrhama na wene kun’wana ni kun’wana lomu a ku djulaka ka dzrin’we dzra madoropa yaku, u nga mu xanisi.

17 “A ku na n’wana ni mun’we wa Israyele lweyi a fanelaka ku tiyentxa nghwavana ya le tempeleni, nakone a ku fanelanga ku va ni n’wana ni mun’we wa xinuna wa le Israyele lweyi a fanelaka ku tiyentxa nghwavana ya le tempeleni. 18 A mali leyi hakeliwiki* nghwavana ya xinuna* kumbe ya xisati a yi fanelanga yi yisiwa a ndlwini ka Yehovha Xikwembu Nkulukumba waku akuva yi ya hakela leswi dumbisiwiki, hikusa i mintxhumu leyi nyenyentsaka ka Yehovha Xikwembu Nkulukumba waku.

19 “A u fanelanga u djula ku bindzrula* ka makwenu loko u mu voleke mali, swakuda kumbe ntxhumu wun’wana ni wun’wana lowu mhunu a nga ha bindzrulaka ha wone. 20 U nga ha bindzrula hi muluveli, kambe a u fanelanga u bindzrula hi makwenu akuva Yehovha Xikwembu Nkulukumba waku a ku tovokisa ka hinkwaswu leswi u taka swi yentxa ka tiko ledzri u taka dzri teka.

21 “Loko u hamba xidumbiso xa kukazri ka Yehovha Xikwembu Nkulukumba waku, u nga hlweli ku xi hetisisa, hikusa Yehovha Xikwembu Nkulukumba waku nakunene a ta ku londzra. Loko u nga xi hetisisi u ta va na wo doha. 22 Kambe loko u nga hambi xidumbiso a u nga ti va ni nandzru. 23 U fanela ku yentxa leswi u hlayiki leswaku u ta swi yentxa ni ku hetisisa leswi a nomu waku wu swi dumbisiki swanga gandzrelo ka Yehovha Xikwembu Nkulukumba waku.

24 “Loko u nghena ka nsimu ya mawuvha leyi lumbaka mhunu mumbeni, u nga da mawuvha u xuzra, kambe u nga txhuki u teka ni dzrin’we u muka na dzrone.

25 “Loko u nghena ka nsimu ya makwenu u nga tsrhova switxatxa swa trigu ledzri wupfiki, hi mavoko, kambe u nga txhuki u tizrisa sikela akuva u tsrhovela trigu dzra makwenu.

24 “Loko wanuna wa kukazri o txhata ni wansati kutani a sungula kuva a nga ha mu nyonxeli hi mhaka ya leswi a gunguliki ntxhumu wa kukazri lowu kalaka wu nga basanga kwake, a fanela ku mu tsralela papela dzra ku dlaya wukati a mu nyika a va a mu hlongola. 2 Loko a sukile kaya ka wanuna lweyo a nga ha tlhela a txhata ni wanuna mun’wana. 3 Loko ni yelweyo wa wubidzri a mu nyenya, a tsrala papela dzra ku dlaya wukati a nyika lweyi wansati a va a mu hlongola kaya kwake,* kumbe loko wanuna lweyo wa wubidzri lweyi lwe wansati a txhatiki na yene o fa, 4 a nuna wa ku sungula lweyi a mu hlongoliki a nga fanelanga a tlhela a txhata ni wansati yelweyo ntsrhaku ka loko a ntxhimisiwile,* hikusa lowo i ntxhumu lowu nyenyentsaka ka Yehovha. U nga buyisi xidoho a tikweni ledzri Yehovha Xikwembu Nkulukumba waku a ku nyikaka dzrone swanga pfindla.

5 “Loko wanuna a ha ku txhata a nga fanelanga a ya wusotxhweni nambi ku nyikiwa mintizro yin’wana. A fanela ku va lweyi a ntsrhunxekiki ku dzringana lembe, a va a tsrhama kaya akuva a nyonxisa nsati wake.

6 “A nga kone lweyi a fanelaka ku teka zribye dzra ku sila ha dzrone kumbe dzra ku silela ka dzrone dzra lweyi a mu txenekiki swanga xitiyisekiso xa ku hakela xikweneti, hikusa hi ku yentxa leswo a ta va na a khome leswi mhunu lweyo a tihanyisaka ha swone.

7 “Loko ko gunguliwa leswaku mhunu wa kukazri a yive mun’we ka* vamakwavu, ku nga Vaisrayele, a va a mu hlupha a tlhela a mu xavisa, a muyivi yelweyo a fanela ku dlayiwa. U fanela ku helisa wubihi a makazri kwaku.

8 “Loko ko txhuka ku va ni ntungu wa mavabyi ya nhlokonho,* u fanela ku landzrelelisisa ha hombe minkongomiso hinkwayu leyi vaprista lava va nga Valevhi va taka ku nyika yone. Mi fanela ku yi landzrelelisisa hi lani ni va leletiki kuva mi swi yentxa ha kone. 9 Dzrimukani leswi Yehovha Xikwembu Nkulukumba wenu a swi yentxiki Miriyamu a ndleleni, nkama lowu mi nga huma a Egipta.

10 “Loko u txeneke makwenu ntxhumu wa kukazri, a u fanelanga u ya nghena ndlwini kwake u teka ntxhumu lowu a ku tiyisekisiki ha wone leswaku a ta ku hakela. 11 U fanela ku yima handle, kutani lweyi a ku devhaka a ta ku buyisela ntxhumu lowu a ku tiyisekisiki ha wone leswaku a ta ku hakela. 12 Kutani loko lweyi a ku devhaka a li xisiwana, a u fanelanga u yetlela na u ni gumana ledzri a ku nyikiki swanga xitiyisekiso xa leswaku a ta ku hakela. 13 Loko dambu dzri pela, u fanela ku mu tlhelisela gumana ledzri u dzri tekiki swanga xitiyisekiso xa leswaku a ta hakela xikweneti, kutani a ta kota ku funekela a va a ku tovokisa; hi ndlela leyo, u ta voniwa u li lweyi a lulamiki a mahlweni ka Yehovha Xikwembu Nkulukumba waku.

14 “U nga txhuki u kanganyisa mutizri lweyi u mu tholiki, lweyi a pfumalaka nakone a nga xisiwana, ku nga ha va makwenu kumbe muluveli a tikweni dzraku, a ndzreni ka madoropa yaku.* 15 U fanela ku mu holela hi siku dzroledzro na dambu dzri nga si pela, hikusa awa pfumala nakone a vilela muholo wolowo akuva a kuma swa ku tihanyisa. Loko u nga yentxi leswo, a ta ku dzrilela ka Yehovha kutani u ta va ni nandzru.

16 “A vapswele a va fanelanga va fa hi mhaka ya swidoho leswi yentxiwiki hi vanavu, ni vana a va fanelanga va fa hi mhaka ya swidoho leswi yentxiwiki hi vapswele. A mhunu a to fa ntsena hi mhaka ya xidoho xake.

17 “A u fanelanga u mu yavanyisa hi ndlela ya ku biha muluveli kumbe n’wana lweyi a feliwiki hi vapswele* nambi ku teka gumana dzra wansati lweyi a feliwiki hi nuna swanga xitiyisekiso xa leswaku a ta hakela xikweneti. 18 Dzrimuka leswaku a u li xikazrawa a Egipta ni leswaku Yehovha Xikwembu Nkulukumba waku a ku huluxile kohala. Hi leswi swi yentxaka ni ku nyika xileleto lexi.

19 “Loko u li ku tsrhoveleni a masin’wini kwaku u gama u dzrivala nyandzra, u nga tlheli u ya yi teka. Yi tsrhiki akuva yi ta kumiwa hi muluveli, n’wana lweyi a feliwiki hi vapswele ni wansati lweyi a feliwiki hi nuna, leswaku Yehovha Xikwembu Nkulukumba waku a ku tovokisa ka hinkwaswu leswi u taka swi yentxa.

20 “Loko u hlakahla mazrwavi ya* nsinya waku wa minhlwazri a u fanelanga u tlhela u phindha. Leswi swi taka sala swi ta salela muluveli, n’wana lweyi a feliwiki hi vapswele ni wansati lweyi a feliwiki hi nuna.

21 “Loko u li ku khayeleni ka mawuvha a masin’wini yaku ya mawuvha, a u fanelanga u tlhela hi le ntsrhaku akuva u ya khaya lawa ma saliki. Ma ta salela muluveli, n’wana lweyi a feliwiki hi vapswele ni wansati lweyi a feliwiki hi nuna. 22 Dzrimuka leswaku a u li xikazrawa a tikweni dzra Egipta. Hi leswi swi yentxaka ni ku nyika xileleto lexi.

25 “Loko vhanu va holova va fanela ku ya a mahlweni ka vayavanyisi, kutani vone va ta yavanyisa, va hlaya leswaku i mani lweyi a nga ni nandzru nakone i mani lweyi a ngeke na nandzru. 2 Loko lweyi a nga ni nandzru a fanela ku biwa, a muyavanyisi a ta mu bavalasisa a va a biwa na a li mahlweni ka muyavanyisi. A makhambi lawa a fanelaka ku biwa wone ma ta ya hi leswaku leswi a swi yentxiki swi bihe ku ya tlhasa kwini. 3 A nga ha biwa ku ya tlhasa 40 wa makhambi* kambe a swi fanelanga swi tlula nhlayu leyo. Loko o biwa makhambi ya ku tlula lawo, a makwenu a ta va na o danisiwa a mahlweni kwaku.

4 “U nga pfali nomu wa homu loko yi li ku huleni ka mavele.

5 “Loko vamakwavu va tsrhama xikan’we kutani mun’we a fa na a nga na vana, a nsati wa wanuna lweyi a fiki a nga fanelanga a txhata ni mhunu lweyi a ngeke wa ndangu lowo. A makwavu wa wanuna lweyi a fiki a fanela ku mu txinga, a va nsati wake. 6 A n’wana wa mativula lweyi va taka mu pswala a ta txhuliwa vito dzra mufi, akuva vito dzra mufi dzri nga nyamalali a Israyele.

7 “Loko wanuna lweyo a yala ku txinga nsati wa makwavu lweyi a fiki, a wansati lweyi a feliwiki hi nuna a fanela ku yela vakulukumba a nyangweni ya doropa a tlhasa a ku: ‘A makwavu wa nkatanga awa yala ku pfuxa vito dzra makwavu a Israyele. A nga swi djuli ku ni txinga.’ 8 A vakulukumba va doropa dzra wanuna lweyo va fanela ku mu vitana va bula na yene. Loko a ya mahlweni a sindzrisa a ku: ‘A ni djuli ku txhata na yene wansati lweyi,’ 9 a wansati lweyi a feliwiki a fanela ku tsrhindzrekelela wanuna lweyo a mahlweni ka vakulukumba, a mu hlivila sandaliya a nkondzrweni wake, a mu thukela wusweni a va a ku: ‘Leswi hi leswi swi fanelaka ku yentxiwa wanuna lweyi a nga djulikiki ku pfuxa ndangu wa makwavu.’ 10 Ntsrhaku ka leswo, a Israyele a vito dzra ndangu wa wanuna lweyo* dzri ta tiviwa swanga; ‘Muti wa lweyi a hliviliwiki sandaliya.’

11 “Loko vavanuna vabidzri va sungula ku lwa kutani a nsati wa mun’we wavu a nghenelela ka mpfilumpfilu yoleyo akuva a sizrelela nuna wake ka lweyi a mu baka, a va lweyi wansati a khoma swizro swa wununa swa wanuna lweyo, 12 u fanela ku mu tsrema voko, a u fanelanga u mu tsretsrelela.

13 “A nkwameni waku u nga txhuki u peta mazribye mabidzri ya ku pima ha wone, lawa ma nga ni mpimu lowu hambaniki, dzrin’we dzra dzrikulu ni dzrin’we dzra dzritsrongo. 14 A kaya kwaku a u fanelanga u va ni swibya swibidzri swa ku pima ha swone leswi nga ni mimpimu leyi hambaniki, xa xitsrongo ni xa xikulu. 15 Nkama hinkwawu u fanela ku va ni swa ku pima ha swone leswi pimaka mpimu lowu nga wone, akuva u hanya nkama wa ku leha a tikweni ledzri Yehovha Xikwembu Nkulukumba waku a ku nyikaka dzrone. 16 Hikusa mun’wana ni mun’wana lweyi a nga mukanganyisi, lweyi a yentxaka mintxhumu leyo, awa nyenyentsa a mahlweni ka Yehovha Xikwembu Nkulukumba waku.

17 “Dzrimuka leswi Amaleki a ku yentxiki swone a ndleleni loko n’wine mi hume a Egipta, 18 a ku landzrile a ndleleni a va a hlasela lava a va salela ntsrhaku nkama lowu a u kazralile u nge na ntamu. A nga mu txhavanga Xikwembu Nkulukumba. 19 Loko Yehovha Xikwembu Nkulukumba waku a ta va na a ku nyike ku wisa ka valala vaku hinkwavu lava va ku tsrandzreliki, a tikweni ledzri yene Yehovha Xikwembu Nkulukumba waku a ku nyikaka dzrone akuva u dzri teka swanga pfindla, u fanela ku helisa Amaleki a hansi ka tilo. U nga dzrivali.

26 “Loko u ta va u nghene a tikweni ledzri Yehovha Xikwembu Nkulukumba waku a ku nyikaka dzrone swanga pfindla, u dzri tekile nakone u va na u tsrhama ka dzrone, 2 u fanela ku teka mihandzru* ya ku sungula ya hinkwaswu leswi taka bindzruliwa hi tiko ledzro, ku nga mihandzru leyi u taka yi tsrhovela a tikweni ledzri Yehovha Xikwembu Nkulukumba waku a ku nyikaka dzrone, u yi txhela ntsrhaveni u famba na yone a mbangwini lowu Yehovha Xikwembu Nkulukumba waku a taka wu hlawula akuva ku twalisiwa vito dzrake ka wone. 3 U fanela ku ya ka muprista lweyi a taka va na a tizra a masikwini wolawo, u tlhasa u mu byela u ku: ‘Namunhla ni hlaya leswi a mahlweni ka Yehovha Xikwembu Nkulukumba wezru, leswaku ni nghenile a tikweni ledzri Yehovha a hi nyikiki dzrone hi lani a va hlambanyeliki ha kone vakokwana vezru.’

4 “Kutani a muprista a ta teka ntsrhava lowu u mu nyikaka wone a wu beka a mahlweni ka altari dzra Yehovha Xikwembu Nkulukumba waku. 5 Ntsrhaku ka leswo, u fanela ku hlaya leswi a mahlweni ka Yehovha Xikwembu Nkulukumba waku: ‘A papayi wanga a a li Muaramu lweyi a a li mutsrendzreleki, nakone a fulamele a Egipta ni ndangu wake lowutsrongo akuva a ya tsrhama kohala swanga muluveli. Kambe na a li kohala, a ndzruluke tiko ledzrikulu dzra ntamu nakone dzri nga ni vhanu vanyingi. 6 Kutani a Vaegipta a va hi xanisa, va hi khoma hi ndlela ya nsele, va va va hi tizrisa yi nga txhayi swanga swikazrawa. 7 Xileswo hi sungule ku dzrilela Yehovha Xikwembu Nkulukumba wa vakokwana vezru nakone Yehovha a yingele zritu dzrezru, a vona ku vilela kwezru, ku xaniseka kwezru ni nsele lowu a hi yentxiwa wone. 8 Hi wugamu, Yehovha a hi humexe a Egipta hi voko dzrake dzra ntamu ni ledzri nalavukiki, hi swiyentxo leswi txhavisaka, swikombiso ni mahlolana. 9 Kutani a hi buyise a mbangwini lowu a va a hi nyika tiko ledzri, ku nga tiko ledzri taliki ngopfu swinene hi leiti ni wulombe. 10 Swoswi ni buye ni mihandzru ya ku sungula ya tiko ledzri Yehovha a ni nyikiki dzrone.’

“Kutani u fanela ku beka ntsrhava a mahlweni ka Yehovha Xikwembu Nkulukumba waku u va u khinsama a mahlweni ka Yehovha Xikwembu Nkulukumba waku. 11 Xileswo wene, Mulevhi ni muluveli lweyi a tsrhamaka na wene, mi ta nyonxa hi mhaka ya mintxhumu hinkwayu leyinene leyi Yehovha Xikwembu Nkulukumba waku a nyikiki wene ni va ndangu waku.

12 “Loko u ta va u hete ku hlengeleta wukhume bya mihandzru yaku hinkwayu ya lembe dzra wuzrazru, ku nga lembe dzra swa wukhume, u ta swi teka u nyika Mulevhi, muluveli, n’wana lweyi a feliwiki hi vapswele* ni wansati lweyi a feliwiki hi nuna, kutani vone va ta da va xuzra a madoropeni yaku.* 13 U ta ya a mahlweni ka Yehovha Xikwembu Nkulukumba waku u ya mu byela leswi: ‘A kaya kwanga ni teke xiyenge xa ku xwenga ni nyika Mulevhi, muluveli, n’wana lweyi a feliwiki hi vapswele ni wansati lweyi a feliwiki hi nuna hi lani u ni leletiki ha kone, a ni yi tlulanga milawu yaku nambi ku yi honisa. 14 A xiyenge lexo a ni xi danga na ni le xidzrilweni nambi ku xi khumba na ni nga basanga, futsrhi a ni nyikelanga ni xin’we xa xiyenge xa xone ka vafi. Ni yingisete zritu dzra Yehovha Xikwembu Nkulukumba wanga ni va ni yentxa hinkwaswu leswi u ni leletiki swone. 15 Swoswi, na u li kolanu a matilweni, a wutsrhan’wini byaku bya ku xwenga, ni kombela u lavisa hansi u tovokisa vhanu vaku va Israyele ni tiko ledzri u hi nyikiki dzrone, tiko ledzri taliki ngopfu swinene hi leiti ni wulombe, hi lani u hlambanyeliki vakokwana vezru ha kone.’

16 “Namunhla Yehovha Xikwembu Nkulukumba waku a ku zruma leswaku u hetisisa milawu ni swiboho leswi swa wuyavanyisi. U fanela ku hanya ha swone, u swi hetisisa hi mbilu yaku hinkwayu ni hi wutomi byaku hinkwabyu.* 17 Namunhla u mu yingelile Yehovha loko a hlaya leswaku a to va Xikwembu Nkulukumba waku, ntsena loko u famba tindleleni take, u hanya hi ku landzra milawu yake, swileleto swake ni swiboho swake swa wuyavanyisi u tlhela u yingiseta zritu dzrake. 18 Nakone namunhla u byele Yehovha leswaku u ta va wake, u va tiko dzrake dzra ku hlawuleka* hi lani a ku dumbisiki ha kone ni leswaku u ta hanya hi ku landzra milawu yake hinkwayu; 19 kutani yene a hlaye leswaku a ta ku tlakuxa a henhla ka matiko hinkwawu lawa a yentxiki leswaku ma va kone, hi lani a ku dumbisiki ha kone, a ku nyika lidzrumu, ndhuma ni ku phatima, ntsena loko wa ha li tiko dzra ku xwenga ka Yehovha Xikwembu Nkulukumba waku.”

27 Na a ni vakulukumba va Israyele, Moxe a byele vhanu a ku: “Mi fanela ku yingiseta nawu wun’wana ni wun’wana lowu ni mi nyikaka wone namunhla. 2 A siku ledzri mi taka tsremakanya nambu wa Yordani mi ya tikweni ledzri Yehovha Xikwembu Nkulukumba wenu a mi nyikaka dzrone, yimisani mazribye lamakulu mi va mi ma sindzra. 3 Kutani loko u ta va u tsremakanye Yordani, a mazribyeni lawo tsrala mazritu hinkwawu ya Nawu lowu, akuva u nghena ka tiko ledzri Yehovha Xikwembu Nkulukumba waku a ku nyikaka dzrone, tiko ledzri taliki ngopfu swinene hi leiti ni wulombe, hi lani Yehovha Xikwembu Nkulukumba wa vakokwana vaku a ku dumbisiki ha kone. 4 Loko kutani mi tsremakanyile Yordani mi fanela ku yimisa mazribye lawo a Nhaveni ya Ebali, mi va mi ma sindzra, hi lani ni mi leletaka ha kone namunhla. 5 A mbangwini lowo u fanela ku tlhela u yaka altari dzra mazribye, u yakela Yehovha Xikwembu Nkulukumba waku. A u fanelanga u yaka hi mazribye lama tsremiwiki hi switizro. 6 U fanela ku yakela Yehovha Xikwembu Nkulukumba waku a altari hi mazribye lawa ma kalaka ma nga zanga ma tsremiwa u va u hambela Yehovha Xikwembu Nkulukumba waku magandzrelo ya ku hisiwa ka altari dzroledzro. 7 U fanela ku nyikela magandzrelo ya ku kombela ku zrula u va u ma dela kolanu, kutani u nyonxa mahlweni ka Yehovha Xikwembu Nkulukumba waku. 8 Nakone u fanela ku tsrala mazritu hinkwawu ya Nawu lowu a mazribyeni, hi ndlela leyi vonekaka.”

9 Kutani Moxe ni vaprista lava va nga Valevhi va byela tiko hinkwadzru dzra Israyele va ku: “Miyela u va u yingiseta We Israyele. Namunhla u ndzruluke tiko dzra Yehovha Xikwembu Nkulukumba waku. 10 Yingiseta zritu dzra Yehovha Xikwembu Nkulukumba waku u va u landzra swileleto ni milawu leyi ni ku byelaka yone namunhla.”

11 Hi siku ledzro, Moxe a byela Vaisrayele a ku: 12 “Loko mi ta va na mi tsremakanye nambu wa Yordani, a tinxaka leti ti landzrelaka ti ta yima Nhaveni ya Gerizimi akuva ti tovokisa tiko: Lixaka dzra Simiyoni, dzra Levhi, dzra Yuda, dzra Yisakari, dzra Yosefa ni dzra Benjamini. 13 Nakone a tinxaka leti landzrelaka ti ta yima Nhaveni ya Ebali akuva ti hlaya xizruku: Lixaka dzra Rubeni, dzra Gadi, dzra Axeri, dzra Zebuloni, dzra Dani ni dzra Naftali. 14 Kutani a Valevhi va ta byela Vaisrayele hinkwavu hi zritu dzra ku tlakuka va ku:

15 “‘A ku zrukiwi mun’wana ni mun’wana lweyi a tivatlelaka xithombe kumbe a tihambelaka xifaniso xa nsimbi a gama a xi fihla. A mintxhumu yoleyo leyi hambiwaka hi muvatli* ya nyenyentsa a mahlweni ka Yehovha.’ (Kutani vhanu hinkwavu va ta ku: ‘Amen!’*)

16 “‘A ku zrukiwi mun’wana ni mun’wana lweyi a yeyisaka papayi wake ni mamana wake.’ (Kutani vhanu hinkwavu va ta ku: ‘Amen!’)

17 “‘A ku zrukiwe mun’wana ni mun’wana lweyi a txintxaka mindzrelekanu ya muyakelani wake.’ (Kutani vhanu hinkwavu va ta ku: ‘Amen!’)

18 “‘A ku zrukiwe mun’wana ni mun’wana lweyi a lahlekisaka lweyi a fiki matihlo.’ (Kutani vhanu hinkwavu va ta ku: ‘Amen!’)

19 “‘A ku zrukiwe lweyi a yavanyisaka muluveli hi ndlela ya ku biha, n’wana lweyi a feliwiki hi vapswele* kumbe wansati lweyi a feliwiki hi nuna.’ (Kutani vhanu hinkwavu va ta ku: ‘Amen!’)

20 “‘A ku zrukiwe lweyi a yentxaka swa tinkuku ni nsati wa papayi wake, hikusa a txhela papayi wake tingana.’* (Kutani vhanu hinkwavu va ta ku: ‘Amen!’)

21 “‘A ku zrukiwe lweyi a yentxaka swa tinkuku ni xihazri.’ (Kutani vhanu hinkwavu va ta ku: ‘Amen!’)

22 “‘A ku zrukiwe lweyi a yentxaka swa tinkuku ni makwavu wa xisati, ku nga ha va makwavu hi papayi kumbe hi mamana.’ (Kutani vhanu hinkwavu va ta ku: ‘Amen!’)

23 “‘A ku zrukiwe lweyi a yentxaka swa tinkuku ni n’wingi wake.’ (Kutani vhanu hinkwavu va ta ku: ‘Amen!’)

24 “‘A ku zrukiwe lweyi a tumbelelaka makwavu akuva a mu dlaya.’ (Kutani vhanu hinkwavu va ta ku: ‘Amen!’)

25 “‘A ku zrukiwe lweyi a pfumelaka ku xaviwa akuva a dlaya* mhunu lweyi a ngeke na nandzru.’* (Kutani vhanu hinkwavu va ta ku: ‘Amen!’)

26 “‘A ku zrukiwe lweyi a tsrhikaka ku yingiseta mazritu ya Nawu lowu, a nga ma landzri.’ (Kutani vhanu hinkwavu va ta ku: ‘Amen!’)

28 “Loko nakunene u yingiseta zritu dzra Yehovha Xikwembu Nkulukumba waku, u bekisa ni ku landzrelelisisa milawu hinkwayu leyi ni ku byelaka yone namunhla, nakunene Yehovha Xikwembu Nkulukumba waku a ta ku tlakuxa a henhla ka matiko hinkwawu lawa ma nga kone misaveni. 2 A matovoko hinkwawu lawa u taka ma kuma loko u tama u yingiseta zritu dzra Yehovha Xikwembu Nkulukumba waku hi lawa:

3 “U ta tovokisiwa a doropeni u tlhela u tovokisiwa ni le handle ka doropa.

4 “Ku ta tovokisiwa vanaku,* mihandzru ya tiko dzraku ni vana va mintlhambi yaku, tihomu ni tihamba taku.

5 “Ku ta tovokisiwa ntsrhava waku ni lexi u pfuvelaka ka xone mbila yaku.

6 “U ta tovokisiwa ka mintizro yaku hinkwayu.*

7 “Yehovha a ta yentxa leswaku u hlula valala vaku lava va ku pfukelaka. Va ta buya hi ndlela yin’we akuva va ku hlasela, kambe va ta ku tsrutsruma hi 7 wa tindlela. 8 Yehovha a ta tovokisa matsrhala yaku ni hinkwaswu leswi u swi yentxaka, nakone nakunene a ta tovokisa tiko ledzri yene Yehovha Xikwembu Nkulukumba waku a ku nyikaka dzrone. 9 Yehovha a ta ku yentxa u va tiko dzrake dzra ku xwenga hi lani a ku hlambanyeliki ha kone, hi mhaka ya leswi u tamaka u bekisa milawu ya Yehovha Xikwembu Nkulukumba waku nakone u tamaka u famba tindleleni take. 10 Hinkwavu a misaveni va ta swi vona leswaku u vitaniwa hi vito dzra Yehovha nakone va ta ku txhava.

11 “Yehovha a ta ku nyika vana va vanyingi, mintlhambi ya yinyingi ni misava leyi bindzrulaka, a tikweni ledzri Yehovha a ku nyikaka dzrone hi lani a hlambanyeliki vakokwana vaku ha kone. 12 Yehovha a ta pfula matilo akuva a ku nisela mpfula hi nguva ya kone ni ku tovokisa hinkwaswu leswi u swi yentxaka. A matiko manyingi ma ta voleka kwaku kambe wene a u nga ti voleka ntxhumu. 13 Yehovha a ta ku yentxa nhloko ku nga li nkila nakone u ta va henhla ku nga li hansi, loko u tama u yingiseta milawu ya Yehovha Xikwembu Nkulukumba waku leyi namunhla ni ku byelaka kuva u yi yingiseta ni ku yi landzra. 14 U nga hambuki ka mazritu hinkwawu lawa ni ku byelaka wone namunhla u ya xineneni kumbe u ya a ximatsrini, hi kuva u landzra swikwembu swin’wana u va u swi tizrela.

15 “Kambe loko u nga yingiseti zritu dzra Yehovha Xikwembu Nkulukumba waku, ni ku landzrelelisisa milawu ni swileleto hinkwaswu leswi ni ku byelaka swone namunhla, hi lawa makhombo hinkwawu lawa ma taka ku wela:

16 “U ta zrukiwa a doropeni ni le handle ka doropa.

17 “Ku ta zrukiwa a ntsrhava waku ni lexi u pfuvelaka ka xone.

18 “Ku ta zrukiwa vana vaku,* mihandzru ya tiko dzraku, tihomu ni tihamba taku.

19 “U ta zrukiwa ka mintizro yaku hinkwayu.*

20 “Yehovha a ta ku zrumela xizruku ni mpfilumpfilu a va a ku khatisa ka hinkwaswu leswi u taka swi yentxa ku ya tlhasa loko a ku helisa u va u nyamalala hi ku kahlula, hi mhaka ya swiyentxo swaku swa ku biha ni hi kola ka leswi u ni tsrhikiki. 21 Yehovha a ta yentxa leswaku u hlaseliwa hi mavabyi ya ku kala ma nga khaluti, ku ya tlhasa loko a ku helisa a tikweni ledzri u taka dzri teka. 22 Yehovha a ta ku ba hi nkohlela, hi dzedzedze, hi ku pfimba, hi ku hisa loku vangiwaka hi dzedzedze, hi xipada, hi mumu lowu hisaka ngopfu ni hi nkuzre nakone mintxhumu leyi yi ta ku landzrelela u za u helisiwa. 23 A matilo yaku ma ta ndzruluka kobri, kasi a misava yi ta ndzruluka nsimbi. 24 Yehovha a ta yentxa leswaku a mpfula yaku yi va misava ni ntsrhuzri leswi swi taka xika hi le tilweni ku ya tlhasa loko u helisiwa. 25 Yehovha a ta yentxa leswaku u hluliwa hi valala vaku. U ta tizrisa ndlela yin’we akuva u va hlasela kambe u ta tsrutsruma hi 7 wa tindlela nakone a mimfumu hinkwayu ya misava yi ta txhava loko yi ku vona. 26 Futsrhi a ntsrumbu waku wu ta va swakuda swa tinyanyana hinkwatu ta tilo ni swa swihazri hinkwaswu swa misava nakone a nga kone lweyi a taka swi swikita.

27 “Yehovha a ta ku ba hi mazrumba ya le Egipta, mavabyi ya ku pfimba hala ntsrhaku, xin’wayana ni mavabyi ya xikhumba nakone a mavabyi lawa a ma nga ti daheka. 28 Yehovha a ta ku ba hi lihlanyi, ku fa matihlo ni mpfilumpfilu. 29 Loko u famba nhlikanhini u ta yentxa hi ku hulumetela ku fana ni mhunu lweyi a fiki matihlo nakone hinkwaswu leswi u taka swi yentxa a swi nge te ku fambela ha hombe, futsrhi minkama hinkwayu u ta tsrhamela ku xololiwa* ni ku yiveliwa nakone a ku nge ti va ni mhunu lweyi a taka ku huluxa. 30 U ta dumbisa wansati mutxhatu, kambe a ta pfinyiwa hi wanuna mun’wana. U ta yaka yindlu, kambe a u nge ti tsrhama ka yone. U ta byala minsinya ya mawuvha, kambe a u nge ti za u de mihandzru ya yone. 31 A homu yaku yi ta dlayiwa na u yi vona kambe u nge ti za u dile nyama ya yone. A mbongolo yaku yi ta yiviwa na u swi vona kambe a u nga ha ti yi kuma. A tihamba taku ti ta nyikiwa valala vaku kambe a nga kone lweyi a taka ku huluxa. 32 A vanaku va xinuna ni va xisati va ta nyikeliwa ka vamatiko na u swi vona nakone u ta tsrhamela ku va xuva kambe a xi kone lexi u taka kota ku xi yentxa. 33 A mihandzru ya tiko dzraku ni hinkwaswu leswi u taka swi bindzrula swi ta diwa hi vhanu lava u kalaka u nga va tivi nakone wene u ta tsrhamela ku xololiwa ni ku xanisiwa. 34 Leswi u taka swi vona swi ta ku hlanyisa.

35 “Yehovha a ta ku ba hi mazrumba ya ku vavisa ma tlhela ma nga daheki, a matsrolweni ni le milengeni, ku sukela a hansi ka nkondzro ku ya tlhasa a nhlokweni. 36 Yehovha a ta yentxa leswaku wene ni hosi leyi u yi bekiki a mahlweni kwaku mi tekiwa mi yisiwa a tikweni ledzri wene nambi vakokwana vaku mi kalaka mi nga dzri tivanga, nakone kohala u ta tizrela swikwembu swin’wana, swikwembu swa pulangu ni swa zribye. 37 Nakone vhanu hinkwavu va lomu Yehovha a taka ku yisa kone va ta ku txhava, va ku dzrela* va tlhela va ku poyila.

38 “U ta byala mbewu yinyingi masin’wini kambe u ta tsrhovela switsrongo hikusa swi ta diwa hi mintete. 39 U ta byala minsinya ya mawuvha kambe u nga ti khaya ntxhumu nambi ku nwa vhinyu dzra kone, hikusa swi ta diwa hi xipungwana. 40 U ta va ni minsinya yinyingi ya minhlwazri kambe a u nga ti tola mafuzra ya yone hikusa a mihandzru ya minsinya yoleyo yi ta hohloka. 41 U ta va ni vana va xinuna ni va xisati, kambe a u nge ti tsrhama na vone hikusa va ta yisiwa wukazraweni. 42 A swidodwana swi ta hlasela minsinya yaku hinkwayu ni mihandzru ya le tikweni dzraku. 43 A muluveli lweyi a nga makazri kwaku a ta tama a hluvuka ku ku tlula, kambe wene u ta tama u ya ka xiyimu xa le hansi. 44 Yene a ta ku txeneka kambe wene a u nge ti va ni ntxhumu akuva u mu txeneka. Yene a ta va nhloko, kambe wene u ta va nkila.

45 “A makhombo hinkwawu lawa ma ta ta henhla kwaku, ma ku hlongolisela ma va ma ku kuma ku ya tlhasa loko u helisiwa, hikusa a u dzri yingisetanga zritu dzra Yehovha Xikwembu Nkulukumba waku, futsrhi a u bekisanga milawu ni swileleto leswi a ku byeliki swone. 46 Nakone ma ta tama ma va henhla kwaku ni le henhla ka vatukulu vaku swanga mfungu wa hi lani ku nga helikiki ni xibasopiso, 47 hikusa nkama lowu a u ni hinkwaswu a u mu tizrelanga Yehovha Xikwembu Nkulukumba waku hi ku nyonxa ni hi ku yaneliseka hi mbilu hinkwayu. 48 Yehovha a ta zrumela valala vaku akuva va lwa na wene nakone u ta va tizrela na u biwa hi ndlala, tozra, u nge na mpahla leyi yaneliki nakone na u pfumala. A ta ku pakatsrisa kangi dzra nsimbi ku ya tlhasa loko a ku helisa.

49 “Yehovha a ta buyisa tiko dzra le kule ngopfu swinene na wene akuva dzri ku hlasela, dzri ta ku hlasela hi ku kahlula ku fana ni gama; i tiko ledzri vulavulaka lidzrimi ledzri u kalaka u nga dzri twisisi, 50 tiko ledzri txhavisaka hi tihanyi ta dzrone, ledzri nga tiki hlonipha lweyi a kuliki hi ntanga nambi ku tsretsrelela mumpshwa. 51 A vhanu va tiko ledzro va ta da vana va mintlhambi yenu ni mihandzru ya tiko dzrenu ku ya tlhasa loko u helisiwa, a va nga ti ku siyela mavele, vhinyu ledzrimpshwa, mafuzra, tihomu nambi tihamba, ku ya tlhasa loko u helisiwa. 52 Va ta ku tsrandzrela va yentxa leswaku u nga humi a madoropeni hinkwawu ya tiko dzraku* ku ya tlhasa loko ku wa mimuru ya ku leha leyi tiyisiwiki leyi u yi dumbaka. Ina, nakunene va ta ku tsrandzrela a madoropeni hinkwawu ya tiko dzraku ledzri Yehovha Xikwembu Nkulukumba waku a ku nyikaka dzrone. 53 Kutani hi kola ka ku tsrandzreliwa ni ku xaniseka loku valala vaku va taka ku vangela kone, u ta da nyama ya vanaku,* nyama ya vanaku va madjaha ni va van’hwanyana, lava Yehovha Xikwembu Nkulukumba waku a ku nyikiki vone.

54 “Nambi wanuna lweyi a nga ni wumbilu nakone a ganyiki makazri kwenu, a nge ti mu tsretsrelela makwavu, nkatake lweyi a zrandzrekaka kumbe vanake lava saliki, 55 nakone a nyama ya vanake leyi a taka yi da a nge ti yavelana ni mhunu, hikusa a ta sala na a nga ha na ntxhumu hi mhaka ya leswi a tsrandzreliwiki ni hi mhaka ya nhlomulo lowu taka vangiwa hi nala wake a madoropeni yake. 56 Nambi wansati lweyi a nga ni wumbilu nakone a ganyiki makazri kwenu, lweyi a kalaka a ngi ngi sama a pimisa nambi ku beka nkondzro wake hansi hi leswi a ganyisiki xiswone, a nge ti mu twela wusiwana nuna wake lweyi a zrandzrekaka nambi n’wanake wa djaha ni wa n’hwanyana, 57 nakone a nge ti yavelana ni mhunu magulu* lama taka huma a makazri ka minenge yake ni vana lava a taka va pswala. A ta swi dela xihundleni hi mhaka ya ku tsrandzreliwa ni hi mhaka ya nhlomulo lowu a taka vangeliwa wone hi valala vake a madoropeni yake.

58 “Loko u nga ma landzrelelisisi ha hombe mazritu hinkwawu ya Nawu lowu, lawa ma tsraliwiki ka buku ledzri nakone u nga txhavi vito ledzri phatimaka ni ledzri txhavisaka dzra Yehovha Xikwembu Nkulukumba waku, 59 Yehovha Xikwembu Nkulukumba waku a ta hlasela wene ni vatukulu vaku hi makhombo ya ku txhavisa, makhombo lamakulu lawa ma kalaka ma nga khaluti ni hi mavabyi ya ku txhavisa lawa ma kalaka ma nga daheki. 60 A ta tlhela a ku tisela mavabyi hinkwawu ya le Egipta lawa wene a u ma txhava, futsrhi nakunene a mavabyi lawa ma ta ku namazrela, ma nga ti suka kwaku. 61 Handle ka leswo, Yehovha a ta ku tisela mavabyi hinkwawu ni khombo, leswi kalaka swi nga tsraliwanga a bukwini dzra Nawu lowu ku ya tlhasa loko u helisiwa. 62 Nambileswi mi taliki ku fana ni tinyeleti ta tilo, mi ta sala na mi li vatsrongo hikusa a u dzri yingisetanga zritu dzra Yehovha Xikwembu Nkulukumba waku.

63 “Nakone swanga hi leswi Yehovha a nyonxeliki ku mi yentxa mi hluvuka ni ku mi yandzrisa, hi lani ku fanaka Yehovha a ta nyonxela ku mi hohlota ni ku mi helisa nakone mi ta susiwa a tikweni ledzri u taka dzri teka.

64 “Yehovha a ta ku hangalasa a matikweni hinkwawu ku sukela a wugan’wini byin’wana bya misava ku ya tlhasa a wugan’wini byin’wana bya misava, nakone na u li kohala u ta tizrela swikwembu swa pulangu ni swa zribye, swikwembu leswi wene ni vakokwana vaku mi kalaka mi nga swi tivi. 65 A u nge ti kuma ku zrula a xikazri ka matiko wolawo nambi hi ku kuma mbangu wa ku wisisa milenge yaku. A matsrhan’wini ya leswo, Yehovha a ta yentxa leswaku u tsrhamela ku hlatiyela, u kazrala matihlo u va u heleliwa hi dumbo. 66 A wutomi byaku byi ta va nghozini ya yikulu, wusiku ni nhlikanhi u ta tsrhamela ku txhava nakone a u nge ti va ni dumbo dzra leswaku u ta huluka. 67 Loko byi xa u ta ku: ‘Ni loko a byo va wusiku!’ Ni le wusikwini u ta ku: ‘Ni loko a bye xa!’ Hi mhaka ya ku txhava loku u taka va na kone a mbilwini ni hi mhaka ya leswi matihlo yaku ma taka swi vona. 68 Nakone nakunene Yehovha a ta mi tlhelisa a Egipta hi boti,* hi ndlela leyi ni mi byeliki leswi mayelanu na yone: ‘A mi nge he ti yi vona ni siku ni dzrin’we,’ a Egipta mi ta tixavisa swanga swikazrawa swa xinuna ni swa xisati ka valala venu kambe a ku na lweyi a taka mi xava.”

29 Lawa i mazritu ya xipfumelelanu lexi Yehovha a zrumiki Moxe leswaku a xi hamba ni Vaisrayele a tikweni dzra Mowabu, handle ka xipfumelelanu lexi a a xi hambe na vone a Horebe.

2 Kutani Moxe a vitana Vaisrayele hinkwavu a va byela a ku: “Mi swi vonile hinkwaswu leswi Yehovha a swi yentxiki a mahlweni kwenu a tikweni dzra Egipta, ka Faro, ka malandzra yake hinkwawu ni le tikweni dzrake hinkwadzru, 3 wuyavanyisi lebyikulu* lebyi u byi voniki hi matihlo yaku, swikombiso leswiyani leswikulu ni mahlolana. 4 Kambe Yehovha a nga mi nyikanga mbilu ya ku swi twisisa, matihlo ya ku swi vona nambi tindleve ta ku swi yingela ku ta ta tlhasa namunhla. 5 ‘A nkama lowu a ni mi kongomisa ku dzringana 40 wa malembe a mananga, a mpahla yenu leyi a mi yi yambala a yi hahlukelanga ni masandaliya yenu a ma hlakalanga milengeni yenu. 6 A mi danga pawu, a mi nwanga vhinyu nambi byala byin’wana akuva mi ta swi tiva leswaku hi mine Yehovha Xikwembu Nkulukumba wenu.’ 7 Hi wugamu mi tlhase a mbangwini lowu, kutani Sihoni hosi ya Hexiboni na Ogi hosi ya Baxani va hi telile akuva va ta lwa na hine kambe hi va hlulile. 8 Hi game hi teka tiko dzravu hi dzri nyika vana va Rubeni, vana va Gadi ni hamfu ya lixaka dzra vana va Manasi, hi va nyika dzrone swanga pfindla. 9 Xileswo, bekisani mazritu ya xipfumelelanu lexi mi va mi ma landzra akuva hinkwaswu leswi mi taka swi yentxa swi famba ha hombe.

10 “Namunhla hinkwenu mi le mahlweni ka Yehovha Xikwembu Nkulukumba wenu: Vazrangeli va tinxaka tenu, vakulukumba venu, vavanuna lava va nyikiwiki wulawuli, vavanuna hinkwavu va Israyele, 11 vatsrongwana venu, vasati venu ni muluveli lweyi a nga mintxhatxheni yenu, ku sukela ka lweyi a mi djulelaka tihunyi ku ya tlhasa ka lweyi a mi kelaka mati. 12 Namunhla mi lani akuva mi hamba xipfumelelanu na Yehovha Xikwembu Nkulukumba wenu ni kuva mi hamba xihlambanyu na Yehovha Xikwembu Nkulukumba wenu, 13 akuva namunhla a mi yentxa tiko dzrake ni leswaku yene a va Xikwembu Nkulukumba wenu hi lani a mi dumbisiki ha kone ni hi lani a hlambanyeliki vakokwana venu ha kone, ku nga Abrahamu, Izaki na Yakobe.

14 “A xipfumelelanu lexi ni xihlambanyu lexi, a ni swi hambi na n’wine ntsena, 15 kambe ni swi hamba ni lava va nga na hine lani namunhla a mahlweni ka Yehovha Xikwembu Nkulukumba wezru, kun’we ni lava va ngeke na hine lani namunhla. 16 (Hikusa mi swi tiva ha hombe leswi a wutomi byezru a byi li xiswone nkama lowu a hi tsrhama a tikweni dzra Egipta ni leswaku swi ve hi ndlela yini ku tsremakanya matiko ya ku siyanasiyana a liyendzrweni dzrezru. 17 Nakone a matikweni lawo mi vone mintxhumu ni swikwembu swa ku nyenyentsa,* swithombe swa ku vatliwa, swa ku hambiwa hi zribye, hi prata ni hi woru.) 18 Xileswo tivonelani akuva namunhla, a makazri kwenu ku nga txhuki ku va ni wanuna, wansati, ndangu kumbe lixaka, lava a mbilu yavu yi hambukaka ka Yehovha Xikwembu Nkulukumba wezru va ya tizrela swikwembu swa matiko wolawo, ni leswaku a makazri kwenu ku nga vi ni limitsru ledzri bindzrulaka nsinya lowu nga ni vhenene ni lowu bavaka ngopfu.

19 “Loko mhunu o yingela mazritu ya xihlambanyu lexi, kambe a tibyela a mbilwini yake a ku: ‘Ni ta va ni ku zrula nambiloko no tama ni famba tindleleni ta mbilu yanga’, kutani a honetela hinkwaswu leswi nga mahlweni kwake, 20 Yehovha a nge ti mu dzrivalela, a matsrhan’wini ya leswo, a mahlundzru lamakulu ya Yehovha ma ta mu pfuzrela, nakone a swizruku hinkwaswu leswi tsraliwiki bukwini ledzri nakunene swi ta va henhla kwake, futsrhi Yehovha a ta tima vito dzra mhunu lweyo a hansi ka matilo. 21 Kutani Yehovha a ta mu tsravukanisa ni tinxaka hinkwatu ta Israyele akuva a xaniseka, hi ku fambisana ni swizruku hinkwaswu swa xipfumelelanu lexi tsraliwiki bukwini ledzri dzra Nawu.

22 “Loko a vatukulu va vana venu ni muluveli wa le tikweni dzra le kule va vona makhombo ya tiko ledzri ni mavabyi lawa Yehovha a taka va na a ma tisile ka dzrone, 23 leswi liki, va vona xivavula, munyu ni ndzrilo lowu honetelaka, lakakuva a tikweni dzraku hinkwadzru ku nga byaleki, ku nga mili ntxhumu nambi byanyi byinene, hi lani swi viki ha kone loko ku helisiwa Sodoma ni Gomora, Adima ni Zeboyimi, ku nga mimbangu leyi Yehovha a yi helisiki hi leswi a a kwatile a tlhela a a hlundzruka, 24 vone kun’we ni matiko hinkwawu va ta ku: ‘Ha yini Yehovha a dzri yentxe leswi tiko ledzri? I yini leswi yentxiki mahlundzru yake ma pfuzra hi ndlela leyi leyikulu?’ 25 Kutani a vhanu va ta hlamula va ku: ‘Hi mhaka ya leswi va tsrhikiki xipfumelelanu lexi Yehovha Xikwembu Nkulukumba wa vakokwana vavu a xi hambiki na vone nkama lowu a va humesiki a tikweni dzra Egipta, 26 va ya tizrela ni ku khinsamela swikwembu swin’wana, swikwembu leswi a va nga swi tivi nakone Xikwembu Nkulukumba a va tsimbisiki ku swi gandzrela. 27 Kutani a mahlundzru ya Yehovha ma pfuzrele tiko ledzri, ma tisa swizruku hinkwaswu leswi tsraliwiki bukwini ledzri. 28 Xileswo, leswi Yehovha a kwatiki a tlhela a khunguvanyeka ngopfu a va suse tikweni dzravu a va yisa tikweni dzrin’wana, lani va nga kone namunhla.’

29 “A mintxhumu leyi yi nga xihundla yi lumba Yehovha Xikwembu Nkulukumba wezru, kambe a mintxhumu leyi yi bekiwiki livaleni yi lumba hine ni vatukulu vezru hi lani ku nga helikiki, akuva hi hetisisa mazritu hinkwawu ya Nawu lowu.

30 “Loko mintxhumu hinkwayu leyi ni ku byeliki yone yi ku yentxekela, ku nga tovoko ni xizruku leswi ni swi bekiki a mahlweni kwaku, u va u yi dzrimuka* a matikweni hinkwawu lawa Yehovha Xikwembu Nkulukumba a taka va na a ku hangalase ka wone, 2 nakone u tlhelela ka Yehovha Xikwembu Nkulukumba waku u va u yingiseta zritu dzrake hi ku landzra hinkwaswu leswi ni ku leletaka swone namunhla, wene ni vanaku, hi mbilu yaku hinkwayu ni hi wutomi byaku hinkwabyu,* 3 Yehovha Xikwembu Nkulukumba waku a ta ku humesa wukazraweni, a ta ku twela wusiwana a va a ku hlengeleta u suka ka matiko lawa Yehovha Xikwembu Nkulukumba waku a taka va na a ku hangalase ka wone. 4 Nambiloko a vhanu vaku ve hangalaka ku ya tlhasa wugan’wini bya matilo, Yehovha Xikwembu Nkulukumba waku a ta ku hlengeleta a va a ku tlhelisa. 5 Yehovha Xikwembu Nkulukumba waku a ta yentxa leswaku u nghena tikweni ledzri vapapayi vaku va dzri tekiki nakone u ta tsrhama ka dzrone, futsrhi a ta ku hluvukisa u yandzra ku tlula vapapayi vaku. 6 Yehovha Xikwembu Nkulukumba waku a ta xwengisa* mbilu yaku ni mbilu ya vatukulu vaku leswaku u zrandzra Yehovha Xikwembu Nkulukumba waku hi mbilu yaku hinkwayu ni hi wutomi byaku hinkwabyu akuva u hanya. 7 Xileswo, Yehovha Xikwembu Nkulukumba waku a ta yentxa leswaku swizruku hinkwaswu leswi swi va henhla ka valala vaku lava va ku nyenyiki va tlhela va ku xanisa.

8 “Kutani wene u ta tlhelela ka Yehovha, u yingiseta zritu dzrake u tlhela u landzra milawu yake leyi ni ku byelaka yone namunhla. 9 Yehovha Xikwembu Nkulukumba waku a ta yentxa leswaku hinkwaswu leswi u swi yentxaka swi famba ha hombe, a ta yandzrisa vana vaku, mintlhambi yaku ni mihandzru ya tiko dzraku, hikusa Yehovha a ta nyonxela ku ku hluvukisa hi lani a va nyonxeliki ha kone vakokwana vaku. 10 Kutani u ta yingiseta zritu dzra Yehovha Xikwembu Nkulukumba waku, u bekisa milawu yake ni swileleto swake leswi tsraliwiki bukwini ledzri dzra Nawu, u va u tlhelela ka Yehovha Xikwembu Nkulukumba waku hi mbilu yaku hinkwayu ni hi wutomi byaku hinkwabyu.*

11 “A nawu lowu ni ku byelaka wone namunhla a wu kazrati ngopfu kuva u wu hetisisa nakone a wu nge ku hluli. 12 A wu le tilweni, lakakuva u nga ku: ‘I mani a taka tlhantukela matilweni a ya hi tekela wone akuva hi ta wu yingiseta ni ku wu landzra?’ 13 Nakone a wu le ka tlhelo ledzrin’wana dzra nambu lakakuva u nga ku: ‘I mani lweyi a taka wela* a ya hi tekela wone akuva hi ta wu yingiseta ni ku wu landzra?’ 14 Hikusa a zritu dzri le kusuhi ngopfu swinene na wene, a non’wini waku ni le mbilwini yaku akuva u dzri hetisisa.

15 “Lavisa! Namunhla ni beka mahlweni kwaku wutomi ni wunene, lifu ni wubihi. 16 Loko u yingiseta milawu ya Yehovha Xikwembu Nkulukumba waku leyi ni ku byelaka yone namunhla, u zrandzra Yehovha Xikwembu Nkulukumba waku, u famba tindleleni take, u bekisa milawu yake, swileleto swake ni swiboho swake swa wuyavanyisi, u ta hanya u va u yandzra nakone Yehovha Xikwembu Nkulukumba waku a ta ku tovokisa a tikweni ledzri u taka dzri teka.

17 “Kambe loko mbilu yaku yo hambuka, u nga yingiseti, u wongiwa, u khinsama a mahlweni ka swikwembu swin’wana u va u swi tizrela, 18 namunhla na mi byela leswaku nakunene mi ta fa. A mi nge ti hanya nkama wa ku leha ka tiko ledzri mi taka tsremakanya nambu wa Yordani akuva mi ya dzri teka. 19 Namunhla ni beka matilo ni misava swanga timboni leti kanetanaka na n’wine, ta leswaku a mahlweni kwaku ni beke wutomi ni lifu, tovoko ni xizruku, hlawula wutomi akuva u tama u hanya, wene ni vatukulu vaku, 20 hi ku zrandzra Yehovha Xikwembu Nkulukumba waku, u yingiseta zritu dzrake ni ku mu namazrela hikusa yene i wutomi byaku, nakone hi kola kwake u ta hanya nkama wa ku leha a tikweni ledzri Yehovha a hlambanyiki ku dzri nyika vakokwana vaku, ku nga Abrahamu, Izaki na Yakobe.”

31 Hiloko Moxe a huma a byela Vaisrayele hinkwavu 2 mazritu lawa: “Swoswi ni ni 120 wa malembe. A ni nge he mi zrangeli,* hikusa Yehovha a ni byele a ku: ‘U nge ti wu tsremakanya nambu lowu wa Yordani.’ 3 Yehovha Xikwembu Nkulukumba waku hi yene lweyi a taka ku zrangela u tsremakanya, nakone a ta helisa matiko hinkwawu lawa ma nga mahlweni kwaku u va u teka tiko dzra wone. Yoxuwa a ta mi zrangela nkama lowu mi tsremakanyaka hi lani Yehovha a hlayiki ha kone. 4 A matiko lawo, Yehovha a ta ma yentxa leswi a swi yentxiki Sihoni na Ogi tihosi ta Vaamori ni tiko dzra tone nkama lowu a nga va helisa. 5 Yehovha a ta mi hlulela wone, kutani n’wine mi fanela ku ma yentxa leswi ni mi leletiki swone. 6 Vana ni xixixi u tiya, u nga txhavi nakone u nga zruzrumeli a mahlweni ka wone, hikusa Yehovha Xikwembu Nkulukumba waku hi yene a ku zrangelaka. A nge ti ku tsrhika nakone a nge ti yima ku ku pfuna.”

7 Hiloko Moxe a vitana Yoxuwa a va a mu byela leswi a mahlweni ka Vaisrayele hinkwavu: “Vana ni xixixi u tiya, hikusa hi wene u taka nghenisa vhanu lava a tikweni ledzri Yehovha a hlambanyiki ku dzri nyika vakokwana vavu nakone hi wene u taka va nyika dzrone akuva dzri va pfindla dzravu. 8 Yehovha hi yene lweyi a ku zrangelaka nakone a ta tama a va na wene. A nge ti ku tsrhika nakone a nge ti yima ku ku pfuna. U nga txhavi nakone u nga zruzrumeli.”

9 Kutani Moxe a tsrala Nawu lowu a va a wu nyika vaprista, Valevhi lava tlakulaka areka dzra xipfumelelanu xa Yehovha ni vakulukumba hinkwavu va Israyele. 10 Moxe a va byela a ku: “A ku heleni ka lembe dzrin’wana ni dzrin’wana dzra wu 7, hi nguva leyi bekisiwiki ya lembe dzra ku tima swikweneti, hi nkama wa Nkhuvu wa Mintsronga,* 11 loko Vaisrayele hinkwavu va humelela a mahlweni ka Yehovha Xikwembu Nkulukumba wenu a mbangwini lowu a wu hlawuliki, mi fanela ku dondzra Nawu lowu akuva Vaisrayele hinkwavu va wu twa. 12 Hlengeletani vhanu, leswi liki, vavanuna, vavasati, vatsrongwana ni valuveli lava va tsrhamaka na n’wine a madoropeni yenu,* akuva va yingiseta ni ku dondzra mayelanu na Yehovha Xikwembu Nkulukumba wenu, va mu txhava ni leswaku va ta hetisisa mazritu hinkwawu ya Nawu lowu. 13 Kutani a vana vavu lava a va nga wu tivi Nawu lowu, va ta wu twa va va va dondzra ku txhava Yehovha Xikwembu Nkulukumba wenu masiku hinkwawu lawa mi taka va na mi hanya a tikweni ledzri mi taka dzri teka loko mi tsremakanya nambu wa Yordani.”

14 Kutani Yehovha a byela Moxe a ku: “A siku dzra ku fa kwaku dzri kusuhi. Vitana Yoxuwa mi va mi ya* tendeni dzra ntlhanganu akuva ni ta mu beka swanga muzrangeli.” Xileswo Moxe na Yoxuwa va ya a tendeni dzra ntlhanganu. 15 Kutani Yehovha a humelela a tendeni na a li tlavini, a tlavi dzri yima a nyangweni wa tende.

16 Hiloko Yehovha a byela Moxe a ku: “Ku nge khali u ta fa,* nakone a vhanu lava va ta sala va gandzrela swikwembu swa matiko lawa ma tsrandzreliki tiko ledzri va taka ya ka dzrone. Va ta ni fulazrela va va va tlula xipfumelelanu lexi ni xi hambiki na vone. 17 A nkameni wolowo a mahlundzru yanga ma ta va pfuzrela nakone ni ta va tsrhika. Ni ta va tumbetela wuso byanga ku ya tlhasa loko va helisiwa, kutani ntsrhaku ka loko va ta va na va kumane ni makhombo manyingi ni ku xaniseka, va ta ku: ‘Indjhe a makhombo lawa a mo hi wela hi leswi Xikwembu Nkulukumba wezru a nge he ke kone makazri kwezru?’ 18 Kambe a sikwini dzroledzro ni ta tama ni va tumbetela wuso byanga hi kola ka wubihi hinkwabyu lebyi va taka va na va byi yentxile hi ku tizrela swikwembu swin’wana.

19 “Swoswi tsralani lisimu ledzri mi va mi dzri dondzrisa Vaisrayele.* Va dondzrisani akuva a lisimu ledzri dzri va dzrimuxa leswi swi humelelaka loko va nga mu yingiseti Xikwembu Nkulukumba. 20 Loko ni ta va yisa tikweni ledzri ni dzri hlambanyeliki vakokwana vavu, tiko ledzri taliki ngopfu swinene hi leiti ni wulombe, kutani va ya da va xuzra va tlhela va hluvuka,* va ta ya tizrela swikwembu swin’wana va va va sungula ku ni yeyisa, va honisa xipfumelelanu xanga. 21 Loko va ta kumana ni makhombo manyingi ni ku xaniseka, a lisimu ledzri dzri ta va xidzrimuxo kwavu (hikusa a vatukulu vavu a va fanelanga va dzri dzrivala), hikusa na swi vona leswaku a mahanyela yavu ma ya kwini, na ni ku va nghenisa tikweni ledzri ni va dumbisiki dzrone ni nga si va nghenisa.”

22 Xileswo, hi siku ledzro Moxe a tsrala lisimu ledzri a va a dzri dondzrisa Vaisrayele.

23 Xileswo a* beke Yoxuwa n’wana wa Nuni akuva a va muzrangeli a gama a mu byela leswi: “Vana ni xixixi u tiya, hikusa hi wene u taka nghenisa Vaisrayele a tikweni ledzri ni va hlambanyeliki ku va nyika dzrone, nakone ni ta tama ni va na wene.”

24 Ntsrhaku ka loko Moxe a hete ku tsrala mazritu hinkwawu ya Nawu lowu a bukwini, 25 Moxe a byela Valevhi lava a va tlakula a areka dzra xipfumelelanu xa Yehovha a ku: 26 “Tekani buku ledzri dzra Nawu mi dzri beka tlhelweni ka areka dzra xipfumelelanu xa Yehovha Xikwembu Nkulukumba wenu, nakone kolahayani dzri ta tizra swanga xidzrimuxo kwenu. 27 Hikusa ni swi tiva ha hombe leswaku mi tiyele tinhloko* nakone mi vapfukeli. Leswi mi mu pfukelaka hi ndlela leyi Yehovha na na ha hanya, loko ni ta fa swi ta ya he kwini? 28 Tlhanganisani vakulukumba hinkwavu va tinxaka tenu ni vazrangeli venu, nakone ni ta hlaya mazritu lawa a mahlweni kwavu ni va ni tizrisa matilo ni misava swanga timboni leti kanetanaka na vone. 29 Hikusa ni swi tiva ha hombe leswaku loko ni ta fa, nakunene mi ta yentxa leswi bihiki nakone mi ta hambuka a ndleleni leyi ni mi leletiki yone. Futsrhi nakunene mi ta weliwa hi makhombo a nkameni lowu taka, hikusa mi ta yentxa leswi bihiki a mahlweni ka Yehovha nakone mi ta mu kwatisa hi swiyentxo swenu.”

30 Kutani a mahlweni ka nhlengeletanu hinkwayu ya Israyele, Moxe a phindha mazritu ya lisimu ledzri ku sukela a masungulweni ya dzrone ku ya tlhasa a wugan’wini, a ku:

 3 Hikusa ni ta twalisa vito dzra Yehovha.

Tivisani wukulu bya Xikwembu Nkulukumba wezru!

 5 Hi vone va yentxiki swa ku biha.

A hi vanavu, a xihoxo i xavu.

I lixaka dzra ku biha ni dzra ku gombonyoka!*

15 Loko Yexuruni* a sungule ku kuluka a dukile.

Ina, u kulukile, u va ni ntamu u va u xuzra ku tlhanya ni khuzri,

29 Ni loko a ve tlhazriha! A va ta yanakanyisisa hi mintxhumu leyi.

A va ta yanakanya hi leswi a swi ta va humelela.

A swi buyi swi ta ta mi pfuna.

A swi ve wutumbelo byenu.

Mine na dlaya ni tlhela ni hanyisa.

44 Kutani Moxe a tlhasa a hlaya mazritu hinkwawu ya lisimu ledzri, a mahlweni ka vhanu, na a na Hoxeya* n’wana wa Nuni. 45 Loko Moxe a hete ku byela Vaisrayele hinkwavu mazritu lawa hinkwawu, 46 a te: “Yanakanyisisani hi mazritu lawa hinkwawu ya xibasopiso lawa ni mi byelaka wone namunhla, akuva mi ta kota ku byela vanenu leswaku va hetisisa mazritu hinkwawu ya Nawu lowu. 47 Hikusa a hi mazritu lawa ma nga pfunikiki ntxhumu kwenu, kambe mazritu lawa i wutomi byenu, nakone hi kola ka wone mi ta kota ku hanya nkama wa ku leha a tikweni ledzri mi taka dzri teka loko mi ta tsremakanya nambu wa Yordani.”

48 Hi siku dzroledzro Yehovha a byela Moxe a ku: 49 “Tlhantukela a nhaveni leyi ya muganga wa Abarimi, ku nga Nhava ya Nebo, leyi kumekaka a tikweni dzra Mowabu a mahlweni ka Yeriko, u ta vona tiko dzra Kanana ledzri ni dzri nyikaka Vaisrayele akuva dzri va pfindla dzravu. 50 Kutani u ta ya fela a nhaveni leyi u taka tlhantukela ka yone, u va u tlhanganisiwa ni vakokwana vaku* hi lani swi viki ha kone ka makwenu Aroni, lweyi a fiki a Nhaveni ya Hori a va a tlhanganisiwa ni vhanu vake, 51 hikusa a mi dumbekanga kwanga a makazri ka Vaisrayele na mi li a matini ya Meriba a Kadexi, a mananga ya Zini; a mi ni xwengisanga a mahlweni ka Vaisrayele. 52 U ta vona tiko na u yime hi le kule, kambe a u nge ti nghena a tikweni ledzri ni dzri nyikaka Vaisrayele.”

33 Leswi hi leswi Moxe mhunu wa Xikwembu Nkulukumba a swi hlayiki loko a tovokisa Vaisrayele na a nge si fa. 2 A te:

 7 A tovokise Yuda a ku:

 8 Mayelanu na Levhi a hlaye leswi:

12 Mayelanu na Benjamini a hlaye leswi:

13 Mayelanu na Yosefa a hlaye leswi:

18 Mayelanu na Zebuloni a te:

19 Va ta hlengeleta matiko a nhaveni.

Kolanu va ta nyikela magandzrelo hi ku lulama.

20 Mayelanu na Gadi a hlaye leswi:

“A tovokile lweyi a yengeselaka mbangu wa Gadi.

A vazrangeli va tiko va ta tlhangana,

22 Mayelanu na Dani a hlaye leswi:

“Dani i xinghonyamana,

A ta tlula ku sukela a Baxani.”

23 Mayelanu na Naftali a hlaye leswi:

Titekele a mpeladambu ni nyingitimu.”

24 Mayelanu na Axere a hlaye leswi:

“Axere a tovokisiwa hi ku nyikiwa vana.

29 U nyonxile, We Israyele!

34 Kutani na a li mananga ya Mowabu, Moxe a tlhantukela a Nhaveni ya Nebo, a henhla ka nhava ya Pisga leyi kumekaka a mahlweni ka Yeriko. Hiloko Yehovha a mu komba tiko hinkwadzru, ku sukela a Giliyadi ku ya a Dani, 2 tiko hinkwadzru dzra Naftali, tiko dzra Efrayimi na Manasi, tiko hinkwadzru dzra Yuda ku ya tlhasa lwandle ledzri nga mpeladambu,* 3 kun’we ni Negebu ni Muganga,* ku patsra ni nkova wa Yeriko a doropeni dzra minkindzru ku ya tlhasa a Zowari.

4 Kutani Yehovha a mu byela a ku: “Ledzri i tiko ledzri ni hlambanyeliki Abrahamu, Izaki na Yakobe ni ku: ‘Ni ta dzri nyika vatukulu vaku.’* Ni yentxa leswaku u tivonela dzrone, kambe a u nge ti nghena ka dzrone.”

5 Ntsrhaku ka leswo, Moxe nandzra wa Yehovha a fela kolanu a tikweni dzra Mowabu, hi lani Yehovha a a hlaye ha kone. 6 Xikwembu Nkulukumba a mu lahle a nkoveni lowu kumekaka a tikweni dzra Mowabu, a mahlweni ka Beti-peyori, nakone ku ta ta tlhasa namunhla a nga kone lweyi a tivaka lomu a sizra dzra Moxe dzri kumekaka kone. 7 Moxe a fe na a ni 120 wa malembe. A a ha vona ha hombe nakone a a ha tiyile. 8 A Vaisrayele va hete 30 wa masiku na va dzrila Moxe a mananga ya Mowabu. Ntsrhaku ka leswo, ku hela masiku ya ku dzrila Moxe.

9 Yoxuwa n’wana wa Nuni a a tale hi moya wa wutlhazri, hikusa Moxe a a mu tlhanteke voko; nakone a Vaisrayele va sungule ku mu yingiseta, va va va yentxa hi lani Yehovha a a lelete Moxe ha kone. 10 Kambe a Israyele a ka ha humelelanga muprofeta ni mun’we lweyi a faniki na Moxe, lweyi Yehovha a a mu tiva ha hombe.* 11 Moxe a hambe swikombiso ni mahlolana hinkwawu lawa Yehovha a a mu zrume ku ma yentxa a tikweni dzra Egipta, ka Faro, ka malandzra ya Faro ni le tikweni dzrake hinkwadzru. 12 Handle ka leswo, Moxe a kombise ntamu lowukulu lowu hlamalisaka a mahlweni ka Vaisrayele hinkwavu.