YOXUWA

1 Ntsrhaku ka loko Moxe nandzra wa Yehovha a file, Yehovha a byela Yoxuwa n’wana wa Nuni, mupfunisi wa Moxe, a ku: 2 “Nandzra wanga Moxe a file. Swoswi tilulamiseli akuva u tsremakanya Yordani, wene ni vhanu lava hinkwavu, mi ya tikweni ledzri ni taka dzri nyika Vaisrayele. 3 Ni ta mi nyika mbangu hinkwawu lowu mi taka wu kandzretela, hi lani ni dumbisiki Moxe ha kone. 4 Mbangu wenu wu ta sukela a mananga wu tlhantuka wu ya tlhasa Lebanoni ni le ka nambu lowukulu, ku nga nambu wa Ewufrata, wu ya tlhasa a Lwandle Ledzrikulu* a mpeladambu, ku patsra ni tiko hinkwadzru dzra Vaheti. 5 A wuton’wini byaku hinkwabyu a nga kone lweyi a taka lwa na wene a va a ku hlula. Ni ta va na wene hi lani ni viki na Moxe ha kone, a ni nge ti yima ku ku pfuna nakone a ni nge ti ku tsrhika. 6 Vana ni xixixi* u tiya, hikusa hi wene u taka kongomisa vhanu lava akuva va teka tiko ledzri ni taka va nyika dzrone, hi lani ni hlambanyeliki vakokwana vavu ha kone.

7 “Ntsena vana ni xixixi u tiya ngopfu swinene, u va u landzrelelisisa Nawu hinkwawu lowu Moxe nandzra wanga a ku leletiki wone. U nga hambuki ka wone u ya xineneni kumbe u ya ximatsrini, akuva hinkwaswu leswi u taka swi yentxa u swi yentxa hi wutlhazri. 8 A buku ledzri dzra Nawu dzri nga suki non’wini waku, dzri dondzri hi zritu dzra le hansi* wusiku ni nhlikanhi, akuva u ta landzrelelisisa ha hombe hinkwaswu leswi tsraliwiki ka dzrone; hi ndlela leyo leswi u taka swi yentxa swi ta famba ha hombe nakone u ta swi yentxa hi wutlhazri. 9 A ni ku leletanga* leswaku u va ni xixixi u tlhela u tiya? U nga zruzrumeli nambi ku txhava. Hikusa mine Yehovha Xikwembu Nkulukumba waku ni ta va na wene hinkwaku lomu u taka ya kone.”

10 Kutani Yoxuwa a byela valaviseli va vhanu a ku: 11 “Fambani a mintxhatxheni hinkwayu mi byela vhanu mi ku: ‘Lulamiselani swakuda, hikusa ntsrhaku ka masiku mazrazru mi ta tsremakanya nambu wa Yordani akuva mi teka tiko ledzri Yehovha Xikwembu Nkulukumba wenu a mi nyikaka dzrone akuva dzri va dzrenu.’”

12 Hiloko Yoxuwa a byela lixaka dzra Rubeni, lixaka dzra Gadi ni hamfu ya lixaka dzra Manasi a ku: 13 “Dzrimukani leswi Moxe nandzra wa Yehovha a mi leletiki swone. Yehovha Xikwembu Nkulukumba wenu a mi nyike tiko ledzri nakone a mi nyika ku wisa. 14 A vasati venu ni vanenu va ta sala ni swifuyu swenu ka tiko ledzri Moxe a mi nyikiki dzrone ka tlhelo ledzri* dzra nambu wa Yordani, kambe n’wine hinkwenu masotxha ya ntamu, mi fanela ku tsremakanya na mi lulamele ku lwa, nakone mi fanela ku va mahlweni ka vamakwenu. Mi fanela ku va pfuna 15 ku ya tlhasela loko na vone va teke tiko ledzri Yehovha Xikwembu Nkulukumba wenu a va nyikaka dzrone, a va Yehovha a nyika vamakwenu ku wisa, hi lani na n’wine a mi nyikiki ha kone. Ntsrhaku ka leswo, mi ta tlhela akuva mi ta ta tsrhama a tikweni ledzri Moxe nandzra wa Yehovha a mi nyikiki dzrone ka tlhelo dzra le wuxeni dzra nambu wa Yordani.”

16 Va hlamula Yoxuwa va ku: “Hi ta yentxa hinkwaswu leswi u hi leletiki swone, nakone hi ta ya kun’wana ni kun’wana lomu u taka hi zruma kone. 17 Hi ta ku yingiseta hi lani hi yingisetiki hinkwaswu leswi Moxe a swi hlayiki. Henhla ka hinkwaswu, ingiki Yehovha Xikwembu Nkulukumba waku a nga va na wene hi lani a viki na Moxe ha kone. 18 Mun’wana ni mun’wana lweyi a ku xandzrukelaka nakone a kalaka a nga yingiseti hinkwaswu leswi u mu leletaka swone a ta dlayiwa. Ntsena vana ni xixixi u va u tiya.”

2 Kutani Yoxuwa n’wana wa Nuni a zruma vavanuna vabidzri a xihundleni akuva va ya Xitimi swanga tinhloli.* A va byela a ku: “Fambani mi ya hlola tiko, ngopfungopfu doropa dzra Yeriko.” Hiloko va famba va ya tlhasa kaya ka wansati wa kukazri wa nghwavana lweyi a vitaniwaka Rahabi, va va va tsrhama kone. 2 A hosi ya Yeriko yi byeliwa leswi: “Ku ni vavanuna va Israyele lava tiki wusiku bya namunhla akuva va ta ta hlola tiko.” 3 Hiloko hosi ya Yeriko yi zruma vhanu va ya byela Rahabi va ku: “Humesa vavanuna lava tiki nakone va nga kaya kwaku hikusa va tele ku ta hlola tiko hinkwadzru.”

4 Kambe Rahabi a teka vavanuna lavabidzri a ya va tumbeta. A gama a byela vhanu lava zrumiwiki hi hosi a ku: “I ntiyiso, vavanuna va ni telile, kambe a ni nga swi tivi leswaku i va kwini. 5 Nkama lowu ku mphumaka, na xipfalu xa doropa xi li kusuhi ni ku pfaliwa, vavanuna lavo va fambile, a ni swi tivi leswaku va ye kwini, kambe loko mo famba hi ku kahlula mi va landzra, mi ta va kuma.” 6 (Kambe a a va teke a va yisa henhla ka yindlu a gama a va tumbeta a makazri ka mabyanyi* lawa a ma yanekiwe a henhla ka yindlu.) 7 Xileswo, vavanuna lava zrumiwiki hi hosi va va landzra va ya lomu nambu wa Yordani a wu tsremakanyiwa ha kone, kutani loko va humile, a xipfalu xa doropa xi pfaliwa.

8 Na vavanuna lava a va yele ku ya hlola tiko va nga si na yetlela, Rahabi a va yela henhla ka yindlu. 9 A va byela a ku: “Na swi tiva leswaku Yehovha a ta mi nyika tiko ledzri ni leswaku ha mi txhava. Vayaki hinkwavu va tiko ledzri va mi txhava ngopfu swinene, 10 hikusa hi yi twile ndlela leyi Yehovha a pshwisiki ha yone mati ya Lwandle dzra ku Pshwuka a mahlweni kwenu loko mi hume Egipta, ni leswi mi swi yentxiki tihosi tibidzri ta Vaamori, ku nga Sihoni na Ogi, lava mi va dlayiki ka tlhelo dzra le wuxeni dzra Yordani. 11 Loko hi twe leswo, hi hele ntamu* nakone a nga kone ni mun’we lweyi a viki ni xixixi hi kola kwenu, hikusa Yehovha Xikwembu Nkulukumba wenu, i Xikwembu Nkulukumba a henhla a matilweni ni lani hansi a misaveni. 12 Kutani na mi kombela, ni hlambanyelani ha Yehovha leswaku leswi ni mi kombisiki wunene* na n’wine mi ta kombisa wunene* ka va ndangu wa papayi wanga. Ni nyikani xikombiso akuva ni tiyiseka leswaku mi ta ma hetisisa mazritu yenu.* 13 Huluxani papayi wanga, mamana wanga, vamakwezru va xinuna, vamakwezru va xisati ni hinkwavu lava va va lumbaka, hi huluxani* ka lifu.”

14 Hiloko vavanuna lavo va mu byela va ku: “Swi nga yampswa ku fa hine* a matsrhan’wini yenu! Loko u nga paluxi ntxhumu mayelanu ni makungu yezru, hi ta ku komba wunene hi tlhela hi dumbeka kwaku loko Yehovha a hi nyika tiko ledzri.” 15 Ntsrhaku ka leswo a va xixa hi pindzra hi le ka janela, hikusa a muti wake a wu kumeka hi ka dzrin’we dzra matlhelo ya muru wa doropa. Ku hlaya ntiyiso, a a tsrhama hi le henhla ka muru.* 16 Hiloko a va byela a ku: “Fambani a tinhaveni mi ya tumbela kone ku dzringana masiku mazrazru, akuva lava mi hlongolisaka va nga mi kumi. Loko lava va mi hlongolisaka va tlhela, mi nga muka.”

17 Vavanuna va mu byela va ku: “Hi ta va hi nge na nandzru ka xihlambanyu lexi u hi hlambanyisiki xone 18 loko nkama lowu hi nghenaka tikweni ledzri u va na u nga tsrimbanga pindzra ledzri dzra ku pshwuka ka janela ledzri u hi xixiki hi le ka dzrone. U fanela ku hlengeleta papayi waku, mamana waku, vamakwenu ni hinkwavu va ndangu wa papayi waku a kaya kwaku. 19 Loko mhunu wa kukazri o huma ndlwini kwaku, a nandzru wa lifu dzrake wu ta va wake,* kambe hine hi ta va hi nge na nandzru. Kambe loko ko humelela ntxhumu wa ku biha ka mun’we wa lava va taka va na va li na wene a ndlwini kwaku, a nandzru wa lifu dzrake wu ta va wezru. 20 Kambe loko wo paluxa makungu yezru hi ta va hi nge na nandzru ka xihlambanyu lexi u hi hlambanyisiki xone.” 21 A va hlamula a ku: “A swi yentxeki hi lani mi hlayiki ha kone.”

Hiloko a va tsrhika va famba, kutani vone va muka. Ntsrhaku ka leswo a tsrimba pindzra dzra ku pshwuka ka janela. 22 Xileswo va ya tinhaveni va ya tsrhama kone ku dzringana masiku mazrazru, ku ya tlhasa loko lava a va va hlongolisa va tlhela. Lava a va va hlongolisa va va djuletele ka tindlela hinkwatu kambe a va va kumanga. 23 Vavanuna lavabidzri va suka tinhaveni va fulamela va tlulela nambu va ya ka Yoxuwa n’wana wa Nuni, va mu dzrungulela hinkwaswu leswi swi va yentxekeliki. 24 Hiloko va byela Yoxuwa va ku: “Yehovha a hi nyike tiko ledzri hinkwadzru. Ku hlaya ntiyiso, vayaki hinkwavu va tiko ledzri va hele ntamu hikusa va hi txhava.”

3 Kutani Yoxuwa a pfuka na ke he mpundzru, yene ni Vaisrayele hinkwavu va suka Xitimi va ya tlhasa Yordani. Va hete wusiku hinkwabyu kolanu na va nga si tsremakanya nambu.

2 Ntsrhaku ka masiku mazrazru, a valaviseli va vhanu va famba mintxhatxheni hinkwayu 3 va byela vhanu va ku: “Loko mi vona areka dzra xipfumelelanu xa Yehovha Xikwembu Nkulukumba wenu dzri tlakuliwa hi vaprista va Valevhi, mi fanela ku suka ka mbangu lowu mi nga ka wone mi dzri landzra. 4 Kambe fambelani kule na dzrone hi kolomu ka 900 wa mametru;* mi nga tsrhindzrekeli kusuhi ngopfu na dzrone! Hi ku yentxa leswo, mi ta tiva ndlela leyi mi fanelaka ku famba ha yone, hikusa a mi ngi ngi famba hi ndlela leyi.”

5 Hiloko Yoxuwa a byela vhanu a ku: “Tilulamiselani* hikusa mundzruku Yehovha a ta mi hambela mintxhumu ya ku hlamalisa.”

6 Hi ku landzrela Yoxuwa a byela vaprista a ku: “Tekani areka dzra xipfumelelanu mi famba, mi va mahlweni ka vhanu.” Hi ndlela leyo a vaprista va teka areka dzra xipfumelelanu va famba va va mahlweni ka vhanu.

7 Kutani Yehovha a byela Yoxuwa a ku: “Ku sukela ka namunhla a Vaisrayele hinkwavu va ta sungula ku ku komba xitxhavu hikusa ni ta kombisa leswaku na ku pfuna hi lani ni pfuniki Moxe ha kone. 8 U fanela ku nyika vaprista lava va zrwalaka areka dzra xipfumelelanu xileleto lexi: ‘Loko mi tlhasa nkingeni wa nambu wa Yordani mi fanela ku nghena mi yima matini.’”

9 Kutani Yoxuwa a byela Vaisrayele a ku: “Buyani mi ta ta yingiseta zritu dzra Yehovha Xikwembu Nkulukumba wenu.” 10 Yoxuwa a tlhela a ku: “Swoswi mi ta swi vona hi ku helela leswaku Xikwembu Nkulukumba lweyi a hanyaka awa mi pfuna, ni leswaku handle ka ku ganaganeka a ta hlongola Vakanana, Vaheti, Vahivi, Vaperezi, Vagirgaxi, Vaamori ni Vayebusi a mahlweni kwenu. 11 Vonani! A areka dzra xipfumelelanu xa Hosi ya misava hinkwayu dzri zrangela mahlweni kwenu dzri ya nghena Yordani. 12 Kutani hlawulani 12 wa vavanuna ka tinxaka ta Israyele, wanuna mun’we ka lixaka ha dzrin’we, 13 loko milenge ya vaprista lava tlakulaka Areka dzra Yehovha Hosi ya misava hinkwayu yi khumba mati ya Yordani, a mati ya Yordani lama pfaka hi le henhla ma ta yima ma fana ni khumbi.”*

14 Xileswo, loko vhanu va suka mintxhatxheni yavu na va li kusuhi ni ku tsremakanya Yordani, a vaprista lava zrwalaka a areka dzra xipfumelelanu va zranga mahlweni ka vhanu. 15 Loko vaprista lava zrwalaka Areka va tlhasa Yordani nakone va peta minkondzro yavu matini hi le nkingeni (hikusa a nambu wa Yordani wa khapakhapa wu va wu tata matlhelo ya wone hi masiku hinkwawu ya ntsrhovelo), 16 a mati ya nambu ya le henhla ma yima. Ma yime ma fana ni khumbi* hi le kule swinene ni Vaisrayele, a Adamu, doropa ledzri nga kusuhi ni Zaretana. Hi nkama wolowo a mati lawa a ma fulamela ma kongoma a Lwandle dzra Araba, ku nga Lwandle dzra Munyu,* a ma tama ma famba ku ya tlhasela loko nambu wu woma. A mati ma yimisiwile, kutani vhanu va tsremakanya va ya ka mbangu lowu lavisaniki ni Yeriko. 17 Na vaprista lava zrwalaka a areka dzra xipfumelelanu xa Yehovha va yime ka misava ya ku woma a xikazri ka Yordani, a Vaisrayele hinkwavu a va tsremakanya ka misava ya ku woma ku ya tlhasela loko hinkwavu va game ku tsremakanya Yordani.

4 Na vhanu hinkwavu va ha ku gama ku tsremakanya Yordani, Yehovha a byela Yoxuwa a ku: 2 “Hlawula 12 wa vavanuna ka xitsrhungu, wanuna mun’we ka lixaka ha dzrin’we, 3 u va leleta u ku: ‘Tekani 12 wa mazribye a Yordani, ka mbangu lowu a vaprista va yimiki ka wone, mi famba na wone mi ya ma beka ka mbangu lowu mi taka yetlela ka wone.’”

4 Kutani Yoxuwa a vitana 12 wa vavanuna lava a a va hlawulile ka Vaisrayele, wanuna mun’we ka lixaka ha dzrin’we, 5 Yoxuwa a va byela a ku: “Zrangani mahlweni ka Areka dzra Yehovha Xikwembu Nkulukumba wenu mi ya makazri ka Yordani, hikusa mun’wana ni mun’wana wenu a fanela ku beka zribye a katleni hi ku ya hi nhlayu ya tinxaka ta Vaisrayele, 6 akuva ma tizra swanga xikombiso makazri kwenu. Loko nkameni lowu taka vanenu va mi vutisa va ku: ‘Ha yini mazribye lawa ma li lani?’ 7 Mi ta va hlamula mi ku: ‘Hi leswaku a mati ya Yordani ma yimisiwile a mahlweni ka areka dzra xipfumelelanu xa Yehovha. Loko dzri tsremakanya Yordani, a mati ya Yordani ma yimisiwile. A mazribye lawa ma ta tizra swanga xidzrimuxo ka Vaisrayele hi lani ku nga helikiki.’”

8 Xileswo, Vaisrayele va yentxa hi lani Yoxuwa a leletiki ha kone. Va teka 12 wa mazribye a xikazri ka Yordani hi lani Yehovha a a byele Yoxuwa ha kone, zribye dzrin’we dzri va dzra lixaka ha dzrin’we dzra Vaisrayele. Va ma teke va famba na wone ka mbangu lowu a va ta yetlela ka wone va va va ma beka kolanu.

9 Yoxuwa a tlhela a yimisa 12 wa mazribye a xikazri ka Yordani ka mbangu lowu a vaprista lava a va zrwala a areka dzra xipfumelelanu a va yime ka wone, nakone a mazribye ma ha tama ma va kohala ku ta tlhasa namunhla.

10 A vaprista lava a va zrwala a Areka va tama va yima a xikazri ka Yordani ku ya tlhasa loko ku hambiwe hinkwaswu leswi Yehovha a leletiki xitsrhungu hi ku tizrisa Yoxuwa, hi ku pfumelelana ni hinkwaswu leswi Moxe a swi leletiki Yoxuwa. Hi nkama wolowo, a xitsrhungu a xi tsremakanya hi ku kahlula. 11 Na xitsrhungu xa ha ku gama ku tsremakanya, a Areka dzra Yehovha ni vaprista va tsremakanya na va voniwa hi xitsrhungu. 12 A lixaka dzra Rubeni, dzra Gadi ni hamfu ya lixaka dzra Manasi, va tsremakanye na va lulamele ku lwa a mahlweni ka Vaisrayele lavan’wana, hi lani Moxe a a va byele ha kone. 13 Kolomu ka 40.000 wa masotxha lama hlomiki ku ya ku lweni, ma tsremakanye mahlweni ka Yehovha ma kongoma mananga lawa ma nga kusuhi ni Yeriko.

14 Hi siku ledzro Yehovha a tlakuxe Yoxuwa a mahlweni ka Vaisrayele hinkwavu, va mu hloniphe ngopfu swinene* a masikwini hinkwawu ya wutomi byake, hi lani va hloniphiki ngopfu swinene Moxe ha kone.

15 Hiloko Yehovha a byela Yoxuwa a ku: 16 “Leleta vaprista lava zrwalaka areka dzra Wumboni leswaku va huma Yordani.” 17 Hiloko Yoxuwa a leleta vaprista a ku: “Humani Yordani.” 18 Loko vaprista lava a va zrwala a areka dzra xipfumelelanu xa Yehovha va hume Yordani nakone minkondzro ya vaprista yi pswanye nkingeni, a mati ya nambu wa Yordani ma sungula ku khuluka hi lani a ma yentxa ha kone ku sunguleni.

19 A xitsrhungu xi hume Yordani hi siku dzra wu 10 ka hweti ya ku sungula, nakone xi dzime mintxhatxha a Giligala a ndzrelekanwini wa le wuxeni bya Yeriko.

20 Loko ku li 12 wa mazribye lawa va ma tekiki a Yordani, Yoxuwa a ma yimise Giligala. 21 Kutani Yoxuwa a byela Vaisrayele a ku: “Loko nkameni lowu taka a vana va vutisa vapswele vavu va ku: ‘A mazribye lawa ma tlhamuxela yini?’ 22 Mi ta tlhamuxela vanenu mi ku: ‘Israyele a tsremakanye Yordani ka misava ya ku woma 23 loko Yehovha Xikwembu Nkulukumba wenu a womise mati ya Yordani a mahlweni kwavu ku ya tlhasa loko va tsremakanyile, hi lani Yehovha Xikwembu Nkulukumba wenu a yentxiki ha kone a Lwandle dzra ku Pshwuka, loko a womise mati ya dzrone a mahlweni kwezru ku ya tlhasa loko hi dzri tsremakanyile. 24 A yentxe leswo akuva vhanu hinkwavu va misava va ta swi tiva leswaku a voko dzra Yehovha dzri ni ntamu, ni kuva n’wine minkama hinkwayu mi txhava Yehovha Xikwembu Nkulukumba wenu.’”

5 A tihosi hinkwatu ta Vaamori leti a ti li mpeladambu wa Yordani, ni tihosi hinkwatu ta Vakanana leti a ti li kusuhi ni lwandle, ti twe leswaku Yehovha a womise mati ya Yordani a mahlweni ka Vaisrayele ku ya tlhasa loko va tsremakanyile. Loko ti tive leswo, ti hela ntamu* ni xixixi hi kola ka Vaisrayele.

2 A masikwini wolawo, Yehovha a byela Yoxuwa a ku: “Hamba mikwa hi mazribye u sokisa* vavanuna va Israyele hi khambi dzra wubidzri.” 3 Hiloko Yoxuwa a hamba mikwa hi mazribye a va a sokisa vavanuna va Israyele a Gibeyati-haraloti. 4 Yoxuwa a va sokise hi xivangelo lexi: Ka vhanu lava humiki a Egipta, vavanuna hinkwavu lava a va ni ntanga ya ku va masotxha va fe hi ndlela a mananga ntsrhaku ka loko va hume a Egipta. 5 Vavanuna hinkwavu lava humiki a Egipta a va sokisiwile, kambe hinkwavu lava pswaliwiki a mananga, a ndleleni loko va hume a Egipta, a va nga sokisiwanga. 6 A Vaisrayele a va fambe 40 wa malembe a mananga ku ya tlhasa loko vhanu hinkwavu va file, leswi liki, vavanuna hinkwavu lava a va ni ntanga ya ku va masotxha lava humiki Egipta, lava kalaka va nga dzri yingisetanga zritu dzra Yehovha. Yehovha a a va hlambanyelile leswaku a a nge ti va tsrhika va vona tiko ledzri Yehovha a a hlambanyele vakokwana vavu leswaku a a ta hi nyika dzrone, tiko ledzri taliki ngopfu swinene hi leiti ni wulombe. 7 Xileswo, a mbangwini wavu a beke vanavu, lava Yoxuwa a va sokisiki; a va nga sokanga hikusa a va nga sokisiwanga ndleleni.

8 Ntsrhaku ka loko vavanuna hinkwavu va sokisiwile, vhanu va tsrhame a mimbangwini yavu a mintxhatxheni ku ya tlhasa loko swilondzra swavu swi holile.

9 Hiloko Yehovha a byela Yoxuwa a ku: “Namunhla ni mi susele xizruku xa Vaegipta.” Xileswo, a mbangu lowo wu vitaniwa Giligala* ku ta tlhasa namunhla.

10 A Vaisrayele va tame va va Giligala, kutani hi siku dzra wu 14 dzra hweti ya ku sungula, loko dzri pela, va tlangele Paxkwa a mananga lawa ma kumekaka kusuhi ni Yeriko. 11 Nakone hi siku ledzri landzreliki ntsrhaku ka Paxkwa, va sungule ku da mihandzru ya tiko, hi siku dzroledzro va de mapawu lawa ma kalaka ma nga txheliwanga fermentu* ni tinhleke leti woxiwiki. 12 A mana wu yime hi siku ledzri landzreliki ntsrhaku ka loko va de mihandzru ya misava, a ku nga ha na mana, kambe a Vaisrayele va sungule ku da mihandzru ya tiko dzra Kanana hi lembe ledzro.

13 Loko Yoxuwa a yime kusuhi ni Yeriko a tlakuxa matihlo kutani a vona wanuna wa kukazri na a yime a mahlweni kwake na a khome xipada. Yoxuwa a mu tsrhindzrekelela a mu vutisa a ku: “U yima na hine kumbe u yima ni valala vezru?” 14 Wanuna lweyo a mu hlamula a ku: “Ni lani swanga muzrangeli wa khandzra dzra Yehovha.” Loko a twa leswo, Yoxuwa a khinsama a khumba hansi hi mombo, a gama a mu vutisa a ku: “I yini leswi hosi yanga yi djulaka ku swi byela nandzra wa yone?” 15 A muzrangeli wa khandzra dzra Yehovha a hlamula Yoxuwa a ku: “Hlivila masandaliya a minkondzrweni yaku hikusa mbangu lowu u wu kandzretelaka wu xwengile.” Yoxuwa a tekela ku yentxa swoswo.

6 A doropa dzra Yeriko a dzri khiyiwile hi kola ka Vaisrayele, a ku nga humi mhunu nakone a ku nga ngheni mhunu.

2 Xileswo Yehovha a byela Yoxuwa a ku: “Lavisa, ni ku nyike doropa dzra Yeriko, hosi ya dzrone ni masotxha ya dzrone ya ntamu. 3 Hinkwenu, n’wine masotxha, mi fanela ku famba matlhelweni ka doropa mi zrendzrelekela matlhelweni ka dzrone kan’we. Mi fanela ku yentxa leswo ku dzringana 6 wa masiku. 4 Hlawula 7 wa vaprista akuva va khoma 7 wa timhondzro ta tihamba a mahlweni ka Areka. Kambe hi siku dzra wu 7 mi fanela ku famba matlhelweni ka doropa mi zrendzrelekela ka dzrone 7 wa makhambi nakone a vaprista va fanela ku txhaya timhondzro. 5 Loko timhondzro ta tihamba ti txhayiwa, na ma ha ku twa mpfumawulu wa timhondzro, masotxha hinkwawu ma fanela ku ba pongwe ledzrikulu dzra yimpi. Kutani a makhumbi ya doropa ma ta wa nakone a masotxha ma fanela ku famba, dzrin’wana ni dzrin’wana dzri kongoma doropeni.”

6 Xileswo, Yoxuwa n’wana Nuni a hlengeleta vaprista a va byela a ku: “Tekani areka dzra xipfumelelanu nakone 7 wa vaprista va fanela ku khoma 7 wa timhondzro ta tihamba va va mahlweni ka Areka dzra Yehovha.” 7 Kutani a byela masotxha a ku: “Fambani mi zrendzrelekela a matlhelweni ka doropa nakone man’we ka masotxha lawa ma hlomiki ma fanela ku famba mahlweni ka Areka dzra Yehovha.” 8 Hi lani Yoxuwa a leletiki ha kone, a 7 wa vaprista lava a va khome timhondzro ta tihamba a mahlweni ka Yehovha, va zrangela va va va txhaya timhondzro, nakone a areka dzra xipfumelelanu xa Yehovha a dzri va landzra. 9 A masotxha lawa ma hlomiki a ma famba mahlweni ka vaprista lava a va txhaya timhondzro nakone a masotxha laman’wana a ma landzra Areka hi le ntsrhaku nkama lowu a timhondzro a ti tama ti txhayiwa.

10 Yoxuwa a a lelete masotxha a ku: “Mi nga huweleli nambi ku yentxa leswaku mazritu yenu ma twiwa. A ku na zritu ni dzrin’we ledzri fanelaka ku huma milon’wini yenu ku ya tlhasa siku ledzri ni taka mi byela ni ku: ‘Huwelelani!’ Kutani mi huwelela.” 11 A yentxa leswaku a Areka dzra Yehovha dzri famba a matlhelweni hinkwawu ya doropa, dzri zrendzreleka matlhelweni ya dzrone kan’we. Ntsrhaku ka leswo, va tlhelela mintxhatxheni va va va heta wusiku kone.

12 Hi siku ledzri landzreliki, Yoxuwa a pfuka mpundzrwini nakone a vaprista va teka a Areka dzra Yehovha. 13 A 7 wa vaprista lava a va tamele 7 wa timhondzro ta tihamba, a va famba mahlweni ka Areka dzra Yehovha na va tama va txhaya timhondzro. A masotxha lama hlomiki a ma famba mahlweni kwavu, nakone a masotxha laman’wana a ma landzra Areka dzra Yehovha hi le ntsrhaku, na hi nkama wolowo timhondzro ti tama ti txhayiwa. 14 Hi siku dzra wubidzri, va zrendzrelekele doropa kan’we, ntsrhaku ka leswo va tlhelela mintxhatxheni. Va yentxe leswo ku dzringana 6 wa masiku.

15 Hi siku dzra wu 7, va hantle va pfuka, na dzra ha ku xa, va zrendzrelekela ka 7 a matlhelweni ya doropa. A ve hi siku dzroledzro ntsena va zrendzrelekeliki ka 7 a matlhelweni ya doropa. 16 Hi khambi dzra wu 7, loko vaprista va txhaye timhondzro, Yoxuwa a byele masotxha a ku: “Huwelelani, hikusa Yehovha a mi nyike doropa! 17 A doropa ni hinkwaswu leswi nga ka dzrone swi fanela ku helisiwa, hikusa swi lumba Yehovha. Ntsena Rahabi, lweyi wa nghwavana, a fanela ku tama a hanya, ni hinkwavu lava nga na yene kaya, hikusa a fihle tinhloli leti hi ti zrumiki. 18 Kambe fambelani kule ni leswi fanelaka ku helisiwa, akuva mi nga naveli ntxhumu lowu fanelaka ku helisiwa mi va mi wu teka. Leswo a swi ta yentxa ntxhatxha wa Israyele wu va ntxhumu lowu fanelaka ku helisiwa, swi wu buyisela khombo.* 19 A prata hinkwadzru, ni woru hinkwadzru ni mintxhumu hinkwayu ya kobri ni ya nsimbi, i mintxhumu ya ku xwenga leyi lumbaka Yehovha, yi fanela ku bekiwa a mbangwini lowu ku tsrhamaka mintxhumu ya lisima a ndlwini ka Yehovha.”

20 Kutani loko timhondzro ti txhayiwile, a masotxha ma huwelela. Na masotxha ma ha ku twa mpfumawulu wa timhondzro ma va ma ba pongwe ledzrikulu dzra yimpi, a muru wu gilhika. Hi ku landzrela a masotxha ma ya mahlweni, mun’wana ni mun’wana a nghena doropeni, ma va ma titekela doropa. 21 Ma helise hinkwaswu leswi a swi li doropeni hi xipada; vavanuna ni vavasati, vampshwa ni lava kuliki hi ntanga, va helisa ni tihomu, tihamba ni timbongolo.

22 Yoxuwa a byela vavanuna vabidzri lava hloliki tiko a ku: “Nghenani kaya ka wansati lwiyani wa nghwavana mi mu humesa handle, yene ni hinkwavu lava mu lumbaka, hi lani mi mu hlambanyeliki ha kone.” 23 Hiloko tinhloli ti humesa Rahabi, papayi wake, mamana wake, vamakwavu ni hinkwavu lava mu lumbaka, ina, va humese ndangu hinkwawu, va gama va va yisa na va sizrelelekile a mbangwini wa kukazri a handle ka lani Vaisrayele a va dzime kone mintxhatxha.

24 Xileswo va hise doropa ni hinkwaswu leswi a swi li ka dzrone. Kambe a prata, a woru ni mintxhumu ya kobri ni ya nsimbi, yi nyikeliwe a mbangwini lowu ku tsrhamaka mintxhumu ya lisima a ndlwini ka Yehovha. 25 Ko va Rahabi lwe wa nghwavana, va yindlu ya papayi wake ni hinkwavu lava mu lumbaka lava Yoxuwa a kalaka a nga va dlayanga; nakone a tsrhama Israyele ku ta tlhasela namunhla, hikusa a fihle vavanuna lava Yoxuwa a va zrumiki akuva va ya hlola Yeriko.

26 Hi nkama wolowo, Yoxuwa a hambe xihlambanyu lexi:* “A a zrukiwe mahlweni ka Yehovha wanuna lweyi a taka tikazratela ku pfuxeta doropa dzra Yeriko. A ta luzekeliwa hi n’wanake wa mativula loko a hamba mafundasawu ya dzrone, nakone a ta feliwa hi n’wanake lwentsrongo loko a beka swipfalu swa dzrone.”

27 Hi ndlela leyo, Yehovha a a na Yoxuwa, nakone a ndhuma ya Yoxuwa* yi hangalake misaveni hinkwayu.

7 Kambe a Vaisrayele a va dumbekanga mayelanu ni mintxhumu leyi a yi fanela ku helisiwa, hikusa Akani n’wana Karimi, n’wana wa Zabedi, n’wana wa Zara, wa lixaka dzra Yuda, a teke mintxhumu ya kukazri ka leyi a yi fanela ku helisiwa. Kutani Yehovha a hlundzrukela Vaisrayele.

2 Yoxuwa a zrumela vavanuna ku suka a Yeriko va ya doropeni dzra Ayi ledzri kumekaka kusuhi ni Beti-avheni, a wuxeni bya Betele, a va byela a ku: “Fambani mi ya kambela* tiko.” Hiloko vavanuna va famba va ya kambela tiko dzra Ayi. 3 Loko va tlhelele ka Yoxuwa, va mu byela va ku: “A swi vileli kuva ku famba vhanu hinkwavu kambe kolomu ka 2.000 kumbe 3.000 wa vavanuna va dzringana akuva va hlula vayaki va Ayi. U nga kazralisi vhanu hinkwavu hi ku va zruma va famba, hikusa vayaki va Ayi i vatsrongo.”

4 Xileswo, kolomu ka 3.000 wa vavanuna va ya kohala, kambe swi djule va tsrutsruma vavanuna va Ayi. 5 Vavanuna va Ayi va dlaye 36 wa vavanuna va Vaisrayele; va va hlongolise ku sukela ka tlhelo dzra le handle dzra nyangwa ku ya tlhasa Xebarimi,* va va dlayetela nkoveni. Hiloko timbilu ta vhanu ti sungula ku zruzrumela nakone va heleliwa hi xixixi.*

6 Xileswo, Yoxuwa a handzrula mpahla yake a va a khinsama a khumba hansi hi mombo a mahlweni ka Areka dzra Yehovha ku ya tlhasa loko dzri pela, yene ni vakulukumba va Israyele, va titxheletela misava a nhlokweni. 7 Yoxuwa a ku: “Yowee, Yehovha Hosi Leyi Tlakukiki, ha yini u yentxe leswaku xitsrhungu lexi xi tlulela Yordani? A ve kuva u ta hi nyikela ka Vaamori akuva hi ta helisiwa? Ni loko a he yaneliseka hi ku tsrhama ka tlhelo ledzrin’wana dzra Yordani!* 8 Ni dzrivaleli Yehovha, ni nga ha hlaya yini leswi Vaisrayele va tsrutsrumiki valala vavu? 9 Loko Vakanana ni vahanyi hinkwavu va tiko ledzri va twa leswo, va ta hi tsrandzrela va va va helisa vito dzrezru misaveni, u ta yentxa yini akuva u lwela vito dzraku ledzrikulu?”

10 Yehovha a hlamula Yoxuwa a ku: “Sekeleka! Ha yini u khinsama u khumba hansi hi mombo? 11 Israyele a dohile. A va xi hetisisanga xipfumelelanu lexi ni va leletiki kuva va xi bekisa. Va teke mintxhumu ya kukazri ka leswi a swi fanela ku helisiwa,* va yi yiva, va yi beka ka mintxhumu yavu hi xihundla. 12 Hi kola ka leswo, a Vaisrayele a va nge ti swi kota ku tiya va lwa ni valala vavu, va ta fulazrela valala vavu va tsrutsruma, hi leswi va ndzrulukiki ntxhumu lowu fanelaka ku helisiwa. A ni nge he ti va na n’wine handle ka loko mi helisa ntxhumu lowu fanelaka ku helisiwa a makazri kwenu. 13 Famba u ya xwengisa vhanu u va byela u ku: ‘Tixwengiselani siku dzra mundzruku, hikusa Yehovha Xikwembu Nkulukumba wa Israyele a li: “Wene Israyele, a makazri kwaku ku ni ntxhumu lowu fanelaka ku helisiwa. A mi nge ti swi kota ku tiya mi lwa ni valala venu ku ya tlhasa loko mi susa ntxhumu lowu fanelaka ku helisiwa makazri kwenu. 14 Mi fanela ku hlengeletana a mixweni, lixaka hi lixaka, kutani lixaka ledzri Yehovha a taka dzri hlawula dzri ta ta mahlweni. Ndangu hi ndangu, ndangu lowu Yehovha a taka wu hlawula wu ta ta mahlweni. Muti hi muti, muti lowu Yehovha a taka wu hlawula wu ta ta mahlweni. Mhunu hi mhunu. 15 Lweyi a taka kumiwa ni ntxhumu lowu fanelaka ku helisiwa a ta hisiwa ndzrilweni, yene ni hinkwaswu leswi mu lumbaka, hikusa a nga xi hetisisanga xipfumelelanu xa Yehovha, a yentxe ntxhumu lowu khomisaka tingana a makazri ka Vaisrayele.”’”

16 Hi siku ledzri landzreliki, Yoxuwa a pfuka na ka ha li mixo a yentxa leswaku Israyele a tsrhindzrekela kusuhi ni Xikwembu Nkulukumba, lixaka hi lixaka, kutani ku hlawuliwa lixaka dzra Yuda. 17 A yentxa leswaku mindangu ya Vayuda yi ta mahlweni, kutani ku hlawuliwa ndangu wa Vazara, a gama a yentxa leswaku ndangu wa Vazara wu ta mahlweni, mhunu hi mhunu, kutani ku hlawuliwa Zabedi. 18 Hi wugamu a yentxa leswaku va muti wa Zabedi va ta mahlweni, mhunu hi mhunu, kutani ku hlawuliwa Akani n’wana wa Karimi, n’wana wa Zabedi, n’wana wa Zara, wa lixaka dzra Yuda. 19 Hiloko Yoxuwa a byela Akani a ku: “N’wananga, na ku kombela, hlonipha Yehovha Xikwembu Nkulukumba wa Israyele u mu byela xidoho xaku. Na ku kombela, ni byeli leswi u swi yentxiki. U nga ni fihleli ntxhumu.”

20 Akani a byela Yoxuwa a ku: “Nakunene hi mine ni doheliki Yehovha Xikwembu Nkulukumba wa Israyele, leswi ni swi yentxiki hi leswi: 21 Loko ni vone xiyambalu xa ku xonga xa le Xinara, makilu mabidzri* ya prata ni hamfu ya kilu* ya woru ka leswi phangiwiki, ni swi navelile kutani ni swi teka. Swi keleliwe hansi a tendeni dzranga, a mali yi le hansi ka swone.”

22 Yoxuwa a tekela ku zrumela vavanuna va kukazri, kutani va tsrutsruma va ya tendeni; a tendeni a ku tlhotiwe xiyambalu xa ku xonga ni mali hansi ka xone. 23 Hiloko va teka mintxhumu leyo a tendeni va famba na yone ka Yoxuwa ni ka Vaisrayele hinkwavu, kutani va yi beka mahlweni ka Yehovha. 24 Xileswo, Yoxuwa ni Vaisrayele hinkwavu va khoma Akani n’wana wa Zara, va teka ni prata, xiyambalu xa ku xonga, woru, vanake va xinuna, vanake va xisati, tihomu take, timbongolo take, tihamba take, tende dzrake ni hinkwaswu leswi a swi li swake, va va yisa Nkoveni wa Akori. 25 Yoxuwa a ku: “Ha yini u hi tisele khombo? Namunhla Yehovha a ta ku tisela khombo.” Hiloko Vaisrayele hinkwavu va mu khandla hi mazribye, ntsrhaku ka leswo va hisa hinkwavu a ndzrilweni. Xileswo hinkwavu va khandliwe hi mazribye. 26 Kutani va hamba nhulu yikulu ya mazribye a henhla kwake, leyi ya ha liki kone ku ta tlhasa namunhla. Xileswo a mahlundzru lamakulu ya Yehovha ma pumbeka. Hi leswo swi yentxaka leswaku ku ta tlhasa namunhla mbangu luwani wu vitaniwa Nkova wa Akori.*

8 Hiloko Yehovha a byela Yoxuwa a ku: “U nga txhavi nakone u nga zruzrumeli, teka masotxha hinkwawu u tlhantuka na wone u ya lwa ni Ayi. Lavisa! Ni ku nyike hosi ya Ayi, vhanu va yone, doropa dzra yone ni tiko dzra yone. 2 Helisa doropa dzra Ayi ni hosi ya dzrone, hi lani u yentxiki ha kone ka doropa dzra Yeriko ni hosi ya dzrone, kambe ka doropa dzra Ayi mi nga titekela mintxhumu yavu kun’we ni swifuyu swavu. Tumbelelani vhanu va doropa a ntsrhaku ka dzrone.”

3 Xileswo Yoxuwa ni masotxha hinkwawu va tlhantuka va ya lwa ni Ayi. Yoxuwa a hlawula 30.000 wa masotxha ya ntamu a ma zruma wusikwini. 4 A ma nyika xileleto lexi: “Fambani mi ya tumbela a ntsrhaku ka doropa, mi nga yi kule ngopfu na dzrone nakone hinkwenu tsrhamani na mi lulamile. 5 Mine ni vhanu hinkwavu lava nga na mine hi ta tsrhindzrekela a doropeni, kutani loko va buyela ku ta lwa na hine hi lani va yentxiki ha kone ku sunguleni, hi ta va tsrutsruma. 6 Loko va hi hlongolisa hi ta va wonga va ya kule ni doropa. Hikusa va ta ku: ‘Vo hi tsrutsruma hi lani va yentxiki ha kone ku sunguleni.’ Xileswo, hi ta va tsrutsruma. 7 Kutani mi fanela ku huma lomu mi taka va na mi tumbele kone mi teka doropa. Yehovha Xikwembu Nkulukumba wenu a ta mi nyika dzrone. 8 Na ma ha ku teka doropa mi fanela ku dzri hisa. Mi fanela ku yentxa hi lani Yehovha a hlayiki ha kone. Hi leswo swileleto ni mi nyikaka swone.”

9 Kutani Yoxuwa a va zruma, va va va famba ka mbangu lowu a va ta ya tumbela ka wone. Va ye tumbela a xikazri ka Betele ni Ayi, hi tlhelo dzra le mpeladambu ka Ayi, kambe Yoxuwa a hete wusiku lebyo ni masotxha laman’wana.

10 Ntsrhaku ka loko Yoxuwa a pfuke na ka ha li mpundzru a hlengeleta masotxha, yene ni vakulukumba va Israyele va ma zrangela va tlhantuka va ya Ayi. 11 A masotxha hinkwawu lawa a ma li na yene ma tlhantukile ma famba ma za ma ya tlhasa mahlweni ka doropa, ma tlhase ma gova* a n’walungu wa Ayi, a nkova wu kumeka xikazri kwavu ni doropa dzra Ayi. 12 Ndzreni ka nkamanyana wolowo Yoxuwa a a hlawule kolomu ka 5.000 wa vavanuna a va beka leswaku va tumbela xikazri ka Betele ni Ayi, hi tlhelo dzra le mpeladambu dzra doropa. 13 Xileswo ntalu wa masotxha ma kumeke ka tlhelo dzra le n’walungu dzra doropa, nakasi a masotxha laman’wana ma kumeke ka tlhelo dzra le mpeladambu dzra doropa. Ka wusiku byolebyo Yoxuwa a ye xikazri ka nkova.

14 Na hosi ya Ayi ya ha ku vona leswo, yone ni vavanuna va doropa va hume na ka ha li mpundzru akuva va ya lwa ni Vaisrayele a mbangwini wa kukazri lowu a wu lavisane ni nkova, kambe a hosi a yi nga swi tivi leswaku a ku ni lava a va yi tumbelelile a ntsrhaku ka doropa. 15 Loko vavanuna va Ayi va va hlasela, Yoxuwa ni Vaisrayele hinkwavu lava a va li na yene va tsrutsruma hi ndlela leyi kongomaka mananga. 16 Xileswo, a vavanuna hinkwavu lava a va sale doropeni va vitaniwa akuva va va hlongolisa. Kutani nkama lowu va hlongolisaka Yoxuwa va wongiwe va ya kule ni doropa. 17 A ku na wanuna ni wa mun’we a Ayi ni le Betele lweyi a kalaka a nga fambanga a ya hlongolisa Vaisrayele. Va hlongolise Vaisrayele va siya doropa na dzri nga sizrelelekanga.

18 Hiloko Yehovha a byela Yoxuwa a ku: “Tlakuxa tlhazri ledzri nga vokweni dzraku u dzri kongomisa Ayi, hikusa a doropa ledzro ni ta dzri nyikela a mavokweni yaku.” Xileswo Yoxuwa a tlakuxa tlhazri ledzri a dzri li vokweni dzrake a dzri kongomisa doropeni. 19 Nkama lowu a nga nalavuta voko, vavanuna lava a va tumbelile va huma hi ku kahlula ka mbangu lowu a va tumbele ka wone va tsrutsruma va nghena doropeni va dzri teka va va va tekela ku dzri hisa.

20 Loko vavanuna va Ayi va ndzruluka ntsrhaku va vona musi na wu mpukuka doropeni, a ku na lomu va kotiki ku tsrutsruma va ya kone. Kutani a Vaisrayele lava a va tsrutsruma va kongoma mananga va ndzrulukela lava a va va hlongolisa. 21 Loko Yoxuwa ni Vaisrayele hinkwavu lava a va li na yene va vona leswaku vavanuna lava a va tumbelile va teke doropa, ni leswaku ku mpukuka musi a doropeni, va ndzruluka va hlasela vavanuna va Ayi. 22 Lava tekiki doropa na vone va huma va ya va hlasela, a vavanuna va Ayi va kumeka xikazri, a Vaisrayele va va hala ni hala. A Vaisrayele va va dlayetele lakakuva ku nga sali ni wa mun’we lweyi a hanyaka kumbe lweyi a tsrutsrumiki. 23 Kambe va khome hosi ya Ayi na yi hanya, va yi yisa ka Yoxuwa.

24 Ntsrhaku ka loko Vaisrayele va hete ku dlaya vayaki hinkwavu va Ayi a mananga, lani a va humile va ya va hlongolisa kone, a Vaisrayele hinkwavu va tlhelela a Ayi va ya dlaya hi xipada vhanu hinkwavu lava a va salile. 25 A nhlayu ya lava fiki hi siku ledzro, vavanuna ni vavasati, a ve 12.000, ku nga vhanu hinkwavu va Ayi. 26 Yoxuwa a tame a nalavuta voko ledzri a dzri ni tlhazri ku ya tlhasa loko a helise vayaki hinkwavu va Ayi. 27 Kambe a Vaisrayele va titekele swifuyu ni mintxhumu ya le doropeni, hi ku landzra swileleto leswi Yehovha a a swi nyike Yoxuwa.

28 Hiloko Yoxuwa a hisa doropa dzra Ayi a dzri yentxa dzri va zrumbi hi lani ku nga helikiki, hi lani dzri nga ha kone ku ta tlhasa namunhla. 29 A hayeke hosi ya Ayi a mhandzrini* ku ya tlhasa madambyeni. Loko dambu dzri djula ku pela, Yoxuwa a leleta leswaku va susa a ntsrumbu wake a mhandzrini. Hiloko va ya wu txukumetela a nyangweni wa doropa va va va hamba nhulu ya yikulu ya mazribye a henhla ka wone, leyi yi nga kone ku ta tlhasa namunhla.

30 Ku ve hi nkama wolowo lani Yoxuwa a yakiki a altari a Nhaveni ya Ebali a yakela Yehovha Xikwembu Nkulukumba wa Israyele, 31 a yentxe hi lani Moxe nandzra wa Yehovha a a lelete Vaisrayele ha kone ni hi ku landzra leswi tsraliwiki ka buku dzra Nawu wa Moxe, ledzri liki: “Hambani altari hi mazribye lawa ma kalaka ma nga tsremeleliwanga hi xitizro xa nsimbi.” Ka dzrone va hambele Yehovha magandzrelo ya ku hisiwa ni magandzrelo ya ku kombela ku zrula.

32 Ntsrhaku ka leswo, Yoxuwa a tsrala mazribyeni a Nawu lowu Moxe a a wu tsrale mahlweni ka Vaisrayele. 33 A Vaisrayele hinkwavu, vakulukumba, valaviseli ni vayavanyisi a va yime ka matlhelo ha mabidzri ya Areka, a mahlweni ka vaprista va Valevhi lava a va zrwala a areka dzra xipfumelelanu xa Yehovha. A ku ni vhanu lava a va li valuveli ni lava a va li Vaisrayele va mapswaliwa, hamfu yavu a yi li mahlweni ka Nhava ya Gerizimi, kasi hamfu leyin’wana a yi li mahlweni ka Nhava ya Ebali (hi lani Moxe nandzra wa Yehovha a a va lelete ha kone), akuva tiko hinkwadzru dzra Israyele dzri tovokisiwa. 34 Ntsrhaku ka leswo a dondzra hi zritu dzra le henhla mazritu hinkwawu ya Nawu, a mazritu ya matovoko ni ya makhombo,* hi ku landzra hinkwaswu leswi tsraliwiki a bukwini dzra Nawu. 35 A ku na zritu ni dzrin’we ka hinkwaswu leswi Moxe a va leletiki swone, ledzri Yoxuwa a kalaka a nga dzri dondzranga hi zritu dzra le henhla a mahlweni ka nhlengeletanu hinkwayu ya Israyele, ku patsra ni vavasati, vana ni valuveli lava a va tsrhama* xikazri kwavu.

9 Loko madzrungula ma tlhase ka tihosi hinkwatu ta le mpeladambu wa le Yordani, leswi liki, ta le mugangeni wa tinhava, a Xefela, a mbangwini hinkwawu lowu nga kusuhi ni Lwandle ledzrikulu* ni ta le mahlweni ka Lebanoni, ku nga tihosi ta Vaheti, ta Vaamori, ta Vakanana, ta Vaperezi, ta Vahivi ni ta Vayebusi, 2 ti hambe xipfumelelanu akuva ti lwa na Yoxuwa na Israyele.

3 A vayaki va Gibiyoni na vone va swi twile leswaku Yoxuwa a helise Yeriko na Ayi. 4 Xileswo hi wutlhazri va longele swakuda ka masaka lama kazraliki va ma pakela ka timbongolo tavu kun’we ni minkwama ya vhinyu leyi boxekiki yi tlhela yi zrungiwa; 5 va yambala ni masandaliya lama hlakaliki ma tlhela ma zrungeteliwa, va yambala ni mpahla leyi hlakaliki. A mapawu hinkwawu lawa va ma tekiki a ma womile nakone a ma fuhlukela. 6 Ntsrhaku ka leswo, va ya ka Yoxuwa a mintxhatxheni a Giligala va tlhasa va byela Yoxuwa ni vavanuna va Israyele va ku: “Hi buya hi ka tiko dzra le kule. Xileswo hambani xipfumelelanu na hine.” 7 Kambe a vavanuna va Israyele va byela Vahivi volavo va ku: “Swi nga yentxeka mi tsrhama kola kusuhi na hine. Xileswo, hi nga xi hambisa kuyini xipfumelelanu na n’wine?” 8 Va hlamula Yoxuwa va ku: “Hi malandzra yaku.”*

Xileswo Yoxuwa a va vutisa a ku: “Hi n’wine vamani nakone mi buya he kwini?” 9 Va mu hlamula va ku: “Hine malandzra yaku hi buya hi ka tiko dzra le kule ngopfu swinene, hi buya hi kola ka vito dzra Yehovha, Xikwembu Nkulukumba waku, hikusa a ni ndhuma nakone hi twe hi ta hinkwaswu leswi a swi yentxiki a Egipta 10 ni hinkwaswu leswi a swi yentxiki tihosi tibidzri ta Vaamori ka tlhelo ledzrin’wana* dzra Yordani, ku nga Sihoni hosi ya Hexiboni, na Ogi hosi ya Baxani, lweyi a a tsrhama a Axitaroti. 11 Xileswo a vakulukumba vezru ni vayaki hinkwavu va tiko dzrezru va hi byele va ku: ‘Longelani swakuda akuva mi da loko mi yendzra, mi va mi famba mi ya kumana na vone. Mi va byela mi ku: “Hi ta va malandzra yenu; xileswo hambani xipfumelelanu na hine.’” 12 A mapawu lawa, lawa hi ma tekiki akuva hi da loko hi yendzra a ma ha hisa siku ledzri hi sukiki makaya kwezru ha dzrone akuva hi ta ta kumana na n’wine. Kambe swoswi wa swi vona leswaku ma womile nakone ma fuhlukela. 13 Ni minkwama leyi ya vhinyu a ya ha li nyiwana loko hi yi tata hi vhinyu, kambe kutani yi boxekile. A mpahla yezru ni masandaliya yezru na swone swi hlakalile hi mhaka ya liyendzro dzra ku leha ngopfu swinene.”

14 Kutani a vavanuna va Israyele va teke swin’wana swa swakuda swavu va swi kambela, kambe a va mu vutisanga Yehovha. 15 Xileswo, Yoxuwa a yentxe ku zrula na vone ni xipfumelelanu xa leswaku a va nge ti va dlaya, ni vakulukumba va nhlengeletanu va va hlambanyelile.

16 Ntsrhaku ka masiku mazrazru na va hambe xipfumelelanu na vone va tive leswaku a va tsrhama kusuhi na vone, a va vundzramanile. 17 Xileswo a Vaisrayele va suke va ya madoropeni yavu va ya tlhasa hi siku dzra wuzrazru; a madoropa yavu a ku li Gibiyoni, Khefira, Beroti na Kiriyati-yeyarimi. 18 Kambe a Vaisrayele a va va hlaselanga hikusa a vakulukumba va nhlengeletanu a va va hlambanyelile ha Yehovha Xikwembu Nkulukumba wa Israyele. Hiloko a nhlengeletanu hinkwayu yi sungula ku ngurangurela vakulukumba. 19 Kutani a vakulukumba hinkwavu va byela nhlengeletanu hinkwayu va ku: “Leswi hi va hlambanyeliki ha Yehovha Xikwembu Nkulukumba wa Israyele a hi nge va hlaseli. 20 Hi ta yentxa leswi: Hi ta va tsrhika va hanya, akuva Xikwembu Nkulukumba a nga hi kwateli hi kola ka xihlambanyu lexi hi va yentxeliki xone.” 21 A vakulukumba va tlhela va ku: “A va hanyi, kambe va ta tsrema tihunyi ni ku kela mati nhlengeletanu hinkwayu.” Leswo hi leswi vakulukumba va swi kunguhatiki mayelanu na vone.

22 Hiloko Yoxuwa a va vitana a va vutisa a ku: “Ha yini mi hi kanganyisile mi ku: ‘Hi va le mbangwini wa le kule ngopfu swinene na n’wine’, nakasi mi tsrhama kola kusuhi na hine? 23 Ku sukela ka swoswi mi ta khatisiwa, mi ta va swikazrawa hi lani ku nga helikiki, mi ta tizra swanga vatsremi va tihunyi ni vaki va mati va yindlu ya Xikwembu Nkulukumba wanga.” 24 Va byela Yoxuwa va ku: “Hi yentxe leswo hikusa hine malandzra yenu hi byeliwe hi ku khanya leswaku Yehovha Xikwembu Nkulukumba wenu, a lelete Moxe nandzra wake leswaku a mi nyika tiko ledzri ni ku helisa vayaki va dzrone hinkwavu a mahlweni kwenu. Xileswo hi txhave leswaku mi ta hi dlaya,* hi leswo swi yentxiki leswaku hi yentxa leswi. 25 Swoswi hi le mavokweni yaku. Hi yentxi leswi u vonaka swi lulamile swi tlhela swi va swinene.” 26 Yoxuwa a yentxe swoswo, a va huluxe mavokweni ya Vaisrayele, kutani a va va dlayanga. 27 Kambe hi siku ledzriyani Yoxuwa a va yentxe vatsremi va tihunyi ni vakeleli va mati va nhlengeletanu ni va altari dzra Yehovha a mbangwini lowu Xikwembu Nkulukumba a a ta wu hlawula, nakone va ha tama va yentxa swoswo ku ta tlhasela namunhla.

10 Loko Adoni-zedeki hosi ya Yerusalema a twe leswaku Yoxuwa a teke doropa dzra Ayi a tlhela a dzri helisa, a yentxa doropa ledzro ni hosi ya dzrone leswi a yentxiki doropa dzra Yeriko ni hosi ya dzrone, ni leswaku vayaki va Gibiyoni va hambe ku zrula ni Vaisrayele nakone va tama va tsrhama makazri kwavu, 2 a txhava ngopfu swinene, hikusa a doropa dzra Gibiyoni a dzri li doropa dzrikulu ku fana ni madoropa ya le wuhosini. A dzri li dzrikulu ku tlula doropa dzra Ayi, nakone vavanuna hinkwavu va dzrone a va li masotxha. 3 Xileswo, Adoni-zedeki hosi ya Yerusalema a zrumela zritu ka Hohamu hosi ya Hebroni, ka Pirami hosi ya Yarmuti, ka Yafiya hosi ya Lakixi ni ka Debiri hosi ya Egloni, a ku: 4 “Tanani mi ta ni pfuna ku hlasela Gibiyoni hikusa a hambe ku zrula na Yoxuwa ni Vaisrayele.” 5 Hiloko tihosi ta ntlhanu ta Vaamori, ku nga hosi ya Yerusalema, hosi ya Hebroni, hosi ya Yarmuti, hosi ya Lakixi ni hosi ya Egloni, ti patsrana kun’we ni masotxha ya tone, ti ya dzima mintxhatxha akuva ti hlasela Gibiyoni.

6 Kutani vavanuna va Gibiyoni va zrumela zritu ka Yoxuwa a mintxhatxheni a Giligala, va ku: “U nga tsrhiki* swikazrawa swaku, kahlula u buya u ta hi huluxa ni ku hi pfuna! A tihosi hinkwatu ta Vaamori ta le mugangeni wa tinhava ti patsranile akuva ti lwa na hine.” 7 Xileswo, Yoxuwa a suka Giligala ni masotxha hinkwawu ku patsra ni masotxha ya ntamu.

8 Hiloko Yehovha a byela Yoxuwa a ku: “U nga va txhavi, hikusa ni va nyikele kwaku. A nga kone ni mun’we kwavu lweyi a taka yima a tiya a lwa na wene.” 9 Yoxuwa a va hlasela na va nga swi yimelanga ntsrhaku ka loko a hete wusiku hinkwabyu na a famba ku sukela a Giligala. 10 Yehovha a va pfilunganyile mahlweni ka Vaisrayele nakone a Vaisrayele va va dlayetelile a Gibiyoni, va va hlongolisa a ndleleni leyi tlhantukaka ya Beti-horoni va va dlaya ndleleni hinkwayu ku ya tlhasa Azeka ni Makeda. 11 Na va li nkoveni wa Beti-horoni na va tsrutsruma Vaisrayele, Yehovha a nisa mazralana* lamakulu a henhla kwavu ku ya tlhasa a Azeka, kutani va fa. Nakunene ku fe vhanu vanyingi hi mazralana ku tlula lava Vaisrayele va va dlayiki hi xipada.

12 Hi siku ledzri Yehovha a hluliki Vaamori ha dzrone na swi voniwa hi Vaisrayele, Yoxuwa a byele Yehovha mahlweni ka Vaisrayele a ku:

13 Xileswo, a dambu dzri yimile ni n’weti a wu timenxanga ku ya tlhasa loko tiko dzra Israyele dzri tidzrihiselile ka valala va dzrone. Xana leswo a swi tsraliwanga ka buku dzra Yaxari? Hi siku ledzro a dambu a dzri pelanga, a dzri voneka siku hinkwadzru. 14 A ka ha vanga ni siku ledzri fanaka ni ledzriyani ka masiku ya le mahlweni kumbe ka lama khalutiki, lani Yehovha a yingisetiki zritu dzra mhunu, hikusa Yehovha a a lwela Vaisrayele.

15 Ntsrhaku ka leswo, Yoxuwa a tlhelela a mintxhatxheni a Giligala kun’we ni Vaisrayele hinkwavu.

16 Hi nkama wolowo, a tihosi leta ntlhanu ti tsrutsrumile ti ya tumbela a mhakweni ya Makeda. 17 Hiloko Yoxuwa a byeliwa leswi: “A tihosi ta ntlhanu ti kumiwe na ti tumbele mhakweni ya Makeda.” 18 Xileswo Yoxuwa a ku: “Vumbulutelani mazribye ya makulu mi ma yisa non’wini wa mhakwa, mi tlhela mi beka vavanuna akuva va zrindzra. 19 Kambe n’wine van’wana mi nga yimeni, hlongolisani valala venu mi va helisa. Mi nga va tsrhiki va nghena madoropeni yavu hikusa Yehovha Xikwembu Nkulukumba wenu a va nyikele mavokweni yenu.”

20 Yoxuwa ni Vaisrayele va dlaye vhanu vanyingi ngopfu swinene lakakuva va va helisa, ku sale ntsena lava nga huluka va nghena madoropeni lama sizreleliwiki. 21 Kutani masotxha hinkwawu ma tlhelela ka Yoxuwa a mintxhatxheni a Makeda na ma sizrelelekile. A ku vanga ni mun’we wa vone a tiyiki ku hlaya xa kukazri* ka Vaisrayele. 22 Hiloko Yoxuwa a ku: “Pfulani nomu wa mhakwa mi humesa tihosi leta ntlhanu mi ti buyisa halenu.” 23 Xileswo, va humesa tihosi leta ntlhanu a mhakweni: hosi ya Yerusalema, hosi ya Hebroni, hosi ya Yarmuti, hosi ya Lakixi ni hosi ya Egloni. 24 Loko va yise tihosi leto ka Yoxuwa, a vitana vavanuna hinkwavu va Israyele a va a byela vazrangeli va vavanuna va yimpi lava a va fambe na yene a ku: “Tsrhindzrekelani lani. Tlhantekani milenge yenu a swikosini swa tihosi leti.” Hiloko va tsrhindzrekela va tlhanteka milenge yavu a swikosini swa tone. 25 Yoxuwa a va byela a ku: “Mi nga txhavi nakone mi nga zruzrumeli. Vanani ni xixixi mi tiya, hikusa leswi hi leswi Yehovha a taka swi yentxa valala venu hinkwavu lava mi taka lwa na vone.”

26 Kutani Yoxuwa a va dlaya a va hayeka ka ntlhanu wa timhandzri; va ve timhandzrini ku ya tlhasa madambyeni. 27 Loko dambu dzri pela, Yoxuwa a leleta leswaku va susiwa timhandzrini va ya txukumetiwa mhakweni leyi a va tumbele ka yone. Ntsrhaku ka leswo, ku bekiwa mazribye mabidzri ya makulu a non’wini wa mhakwa, nakone mazribye lawo ma ha tama ma va kone ku ta tlhasa ni namunhla.

28 Hi siku ledzro, Yoxuwa a teke doropa dzra Makeda a va a tlhava vhanu va doropa hi xipada, a helise* hosi ya dzrone ni hinkwavu lava a va* li ka dzrone, a nga siyi ni mun’we na a hanya. A yentxe hosi ya Makeda leswi a swi yentxiki hosi ya Yeriko.

29 Xileswo, Yoxuwa ni masotxha hinkwawu ya Israyele va suka Makeda va ya Libna, va ya lwa ni Libna. 30 Yehovha a nyikela doropa ledzro ni hosi ya dzrone a mavokweni ya Vaisrayele, kutani va helisa doropa ni hinkwavu lava a va li ka dzrone hi xipada, va nga siyi ni mun’we na a hanya. Va yentxe hosi ya dzrone leswi va swi yentxiki hosi ya Yeriko.

31 Hi ku landzrela, Yoxuwa a suka hi le Libna a ya Lakixi kun’we ni masotxha hinkwawu ya Israyele, a tlhasa a dzima kone mintxhatxha a va a dzri hlasela. 32 Yehovha a nyikela Lakixi a mavokweni ya Vaisrayele va va va teka doropa ledzro hi siku dzra wubidzri, va dzri hlasele kun’we ni hinkwavu lava a va li ka dzrone hi xipada, hi lani va yentxiki ha kone ka doropa dzra Libna.

33 Horamu, hosi ya Gezeri, a tlhantuke akuva a ya pfuna Lakixi, kambe Yoxuwa a dlaye Horamu ni masotxha yake lakakuva ku nga sali ni mun’we lweyi a hanyaka.

34 Kutani Yoxuwa a suka hi le Lakixi a ya a Egloni kun’we ni masotxha hinkwawu ya Israyele, a tlhasa a dzima kone mintxhatxha a va a dzri hlasela. 35 Hi siku ledzro, va teke doropa va va va dlaya vayaki va dzrone hi xipada. Va helise hinkwavu lava a va li ka dzrone hi lani va yentxiki ha kone ka doropa dzra Lakixi.

36 Ntsrhaku ka leswo, Yoxuwa a suka Egloni a ya ka doropa dzra Hebroni kun’we ni masotxha hinkwawu ya Israyele a va a dzri hlasela. 37 Va teke doropa va tlhela va dlaya a hosi ya dzrone hi xipada ku patsra ni vayaki va swidoropana swa dzrone ni hinkwavu lava a va* li ka dzrone, va nga siyi ni mun’we na a hanya. A dlaye hinkwavu lava a va li ka dzrone hi lani a yentxiki ha kone a Egloni.

38 Hi wugamu, Yoxuwa a ya ka doropa dzra Debiri kun’we ni masotxha hinkwawu ya Israyele, a va a dzri hlasela. 39 Yoxuwa a teke doropa a va a dlaya hosi ya dzrone ni vayaki hinkwavu va swidoropana swa dzrone. Va dlaye hinkwavu hi xipada va nga siyi ni mun’we na a hanya. A helise doropa dzra Debiri ni hosi ya dzrone hi lani a helisiki ha kone doropa dzra Hebroni ni doropa dzra Libna ni hosi ya dzrone.

40 Yoxuwa a hlule tiko hinkwadzru a mugangeni wa tinhava, Negebu, Xefela ni mimbangu leyi kumekaka kusuhi ni muganga wa tinhava, ni tihosi ta yone hinkwatu, a nga siyi ni mun’we na a hanya; a dlaye hinkwaswu leswi a swi hefemula, hi lani Yehovha Xikwembu Nkulukumba wa Israyele a a mu lelete ha kone. 41 Yoxuwa a va hlule ku sukela a Kadexi-barineya ku ya tlhasa Gaza, ni ku sukela ka tiko hinkwadzru dzra Goxeni ku ya tlhasa Gibiyoni. 42 Yoxuwa a hlule tihosi leto hinkwatu ni tiko dzra tone hi kan’we, hikusa i Yehovha Xikwembu Nkulukumba wa Israyele lweyi a a lwela Israyele. 43 Kutani Yoxuwa a tlhelela a mintxhatxheni a Giligala kun’we ni masotxha hinkwawu ya Israyele.

11 Loko Yabini hosi ya Hazori a twa leswo, a zrumela vazrumiwa ka Yobabi hosi ya Madoni, ka hosi ya Ximironi, ka hosi ya Akaxafi, 2 ka tihosi ta le mugangeni wa tinhava wa le n’walungu, ka tihosi ta le mbangwini lowu nga livala* a nyingitimu wa le Kinereti, ka tihosi ta le Xefela, ka tihosi ta le magangeni* ya Dori a mpeladambu, 3 ka Vakanana a wuxeni ni le mpeladambu, ka Vaamori, ka Vaheti, ka Vaperezi, ka Vayebusi a mugangeni wa tinhava ni ka Vahivi lava a va li masungulweni ya Nhava ya Hermoni a tikweni dzra Mizpa. 4 Xileswo a tihosi leto hinkwatu ti huma ni masotxha ya tone. A va li xitsrhungu lexikulu lexi a xi tale ku fana ni misava ya lwandle; a va ni makavhalu ni tin’qolo tinyingi ngopfu swinene ta yimpi. 5 A tihosi leto hinkwatu a ti pfumelelane ku tlhangana nakone ti ye dzima mintxhatxha kusuhi ni mati ya Meromi akuva ti lwa ni Vaisrayele.

6 Kutani Yehovha a byela Yoxuwa a ku: “U nga va txhavi, hikusa mundzruku hi minkama leyi, hinkwavu ni ta va nyikela kwenu nakone mi ta va dlaya. U fanela ku tsrema minsiha ya makavhalu yavu u hisa ni tin’qolo tavu ta yimpi.” 7 Xileswo, Yoxuwa ni masotxha hinkwawu va va hlasela na va nga swi yimelanga kusuhi ni mati ya Meromi. 8 Yehovha a va nyikela mavokweni ya Vaisrayele, kutani va va hlula va tlhela va va hlongolisa ku ya tlhasa a Sidoni Lwenkulu, a Misrefoti-mayimi ni le Nkoveni wa Mizpa a wuxeni, va va dlaya ku nga sali ni mun’we lweyi a hanyaka. 9 Hiloko Yoxuwa a va yentxa hi lani Yehovha a a mu byele ha kone: a tsrema minsiha ya makavhalu yavu ni ku hisa tin’qolo tavu.

10 Kutani Yoxuwa a tlhela, a va a teka doropa dzra Hazori, a dlaya ni hosi ya dzrone hi xipada, swanga hi leswi Hazori a ku li doropa dzra lisima ngopfu swinene ka mimfumu leyi hinkwayu. 11 Va dlaye hinkwavu lava a va* li doropeni ledzro hi xipada, va va helisa.* A ku salanga ntxhumu ni wun’we lowu hefemulaka. Kutani a hisa doropa dzra Hazori. 12 Yoxuwa a hlule tihosi leto hinkwatu a ti dlaya hi xipada a va a teka madoropa ya tone hinkwawu. A va helisile,* hi lani Moxe nandzra wa Yehovha a a lelete ha kone. 13 Kambe a Vaisrayele a va hisanga doropa ni dzrin’we ka lawa a ma kumeka tinhaveni; Yoxuwa e hisa ntsena doropa dzra Hazori. 14 A Vaisrayele va tiphangele mintxhumu hinkwayu ni mintlhambi ya madoropa wolawo. Kambe va dlaye vhanu hinkwavu hi xipada ku ya tlhasa loko va helise hinkwavu, a va siyanga ni mun’we lweyi a hefemulaka. 15 Va yentxe hi lani Yehovha a a lelete nandzra wake Moxe ha kone, a va Moxe a leleta Yoxuwa, kutani Yoxuwa a swi yentxisa xiswoswo. Ina, Yoxuwa a yentxe hinkwaswu leswi Yehovha a swi leletiki Moxe.

16 Yoxuwa a teke mbangu wa wukulu. A teke muganga wa tinhava, Negebu hinkwaku, tiko hinkwadzru dzra Goxeni, Xefela, Araba ni muganga hinkwawu wa tinhava wa le Israyele kun’we ni Xefela wa kone, 17 ku sukela ka Nhava ya Halaki leyi nga kusuhi ni Seyiri ku ya tlhasa Bali-gadi a Nkoveni wa Lebanoni a masungulweni ya Nhava ya Hermoni; a khome tihosi ta mimbangu leyo hinkwayu a ti dlaya. 18 Yoxuwa a lwe ni tihosi leto hinkwatu ku dzringana nkama wa ku leha. 19 A ku vanga ni doropa ni dzrin’we ledzri hambiki ku zrula ni Vaisrayele, ko va ntsena Vahivi lava a va tsrhama a Gibiyoni. Va titekele madoropa laman’wana hinkwawu hi ku lwa yimpi. 20 Ku ve Yehovha lweyi a pfumeleliki leswaku a timbilu tavu ti tlanyala akuva va lwa ni Vaisrayele, ku yentxela leswaku a va helisa* na a nga va tsretsreleli. A va fanela ku helisiwa hi lani Yehovha a a lelete Moxe ha kone.

21 A nkameni wolowo, Yoxuwa a helise Vaanakimi va le mugangeni wa tinhava ku patsra ni va le Hebroni, Debiri ni le Anabi, a helise ni va le mugangeni hinkwawu wa tinhava wa le Yuda ni va le mugangeni hinkwawu wa tinhava wa le Israyele. Yoxuwa a helise vone ni madoropa yavu. 22 A ku salanga Muanakimi ni wa mun’we a tikweni dzra Vaisrayele, ve sala ntsena a Gaza, a Gati ni le Axidodi. 23 Hi ndlela leyo, Yoxuwa a sungula ku lawula tiko hinkwadzru hi lani Yehovha a a dumbise Moxe ha kone. Xileswo Yoxuwa a dzri nyika Vaisrayele swanga pfindla, akuva dzri yaveliwa tinxaka tavu hi ku ya hi ntsrengo wa lixaka dzrin’wana ni dzrin’wana. Kutani a tiko dzri wisa ku lwa.

12 A tihosi ta tiko leti a Vaisrayele va ti hluliki nakone va tekiki mimbangu ya tone ka tlhelo dzra le wuxeni bya Yordani, ku sukela a Nambyeni wa Arnoni ku ya tlhasa a Nhaveni ya Hermoni, ni mbangu hinkwawu wa le wuxeni ka Araba, hi leti: 2 Sihoni, hosi ya Vaamori, lweyi a a tsrhama a Hexiboni nakone a a fuma ku sukela a Aroweri, lani a ku kumeka a nkingeni wa Nambu wa Arnoni, ku sukela a xikazri ka nambu ku ya tlhasa a Nambyeni wa Yaboki, lani a ku tlhela ku va ndzrelekanu wa mbangu wa Vaamoni. A a tlhela a fuma ni hamfu ya Giliyadi. 3 Sihoni a a fuma ni le Araba ku ya tlhasa a wuxeni bya Lwandle dzra Kinereti,* a mfumu wake a wu tlhela wu famba wu khaluta a Beti-yeximoni lani a ku li kusuhi ni Lwandle dzra Munyu,* ni ku ya tlhasa a masungulweni ya maganga* ya Pisga a nyingitimu.

4 Va tlhele va teka mbangu wa Ogi, hosi ya Baxani, lweyi a a li mun’we wa Varefayimi lava a va ha li kone, lweyi a a tsrhama Axitaroti ni le Edreyi, 5 nakone a a fuma Nhaveni ya Hermoni, a Saleka ni le Baxani hinkwaku, ku ya tlhasa ndzrelekanwini wa mbangu wa Vagexuri ni Vamakati, ku patsra ni hamfu ya Giliyadi, ku ya tlhasa ndzrelekanwini wa Sihoni, hosi ya Hexiboni.

6 Va hluliwe ha Moxe nandzra wa Yehovha ni hi Vaisrayele. Ntsrhaku ka leswo, Moxe nandzra wa Yehovha a nyikele tiko dzravu ka Varubeni, Vagadi ni ka hamfu ya lixaka dzra Manasi akuva dzri va mbangu wavu.

7 Leti i tihosi ta tiko leti Yoxuwa ni Vaisrayele va ti hluliki a mpeladambu wa Yordani, ku sukela a Bali-gadi a Nkoveni wa Lebanoni ku ya tlhasa a Nhaveni ya Halaki leyi nga kusuhi ni Seyiri, ku nga tiko ledzri Yoxuwa a gamiki a yavela tinxaka ta Israyele akuva dzri va mbangu wa tone. 8 A mimbangu ya kone i muganga wa tinhava, Xefela, Araba, a magangeni, a mananga ni le Negebu, ku nga tiko dzra Vaheti, dzra Vaamori, dzra Vakanana, dzra Vaperezi, dzra Vahivi ni dzra Vayebusi.

13 Yoxuwa kutani a a duhwalile nakone a a li kusuhi ni ku fa. Xileswo, Yehovha a mu byela a ku: “U duhwalile nakone awa ha na malembe manyingi ya ku hanya, kambe ka ha sale mbangu wa wukulu a tikweni akuva wu tekiwa. 2 A xiyenge xa tiko lexi xa ha saliki hi lexi: miganga hinkwayu ya Vafilista ni ya Vagexuri 3 (ku sukela ka xiyenge xa Nilo lexi* kumekaka wuxeni bya* Egipta ku ya tlhasa a ndzrelekanwini wa Ekroni, a n’walungu, lani a ku tiviwa swanga mbangu wa Vakanana), ku patsra ni miganga ya ntlhanu wa tihosi ta Vafilista, leswi liki, Vagaza, Vaaxidodi, Vaaxkeloni, Vagati ni Vaekroni; a muganga wa Vaavhimi, 4 a nyingitimu; tiko hinkwadzru dzra Vakanana; a Meyara lani ku lumbaka Vasidoni, ku ya tlhasa a Afeki, ni le ndzrelekanwini wa Vaamori; 5 tiko hinkwadzru dzra Vagebali ni mbangu hinkwawu wa le wuxeni bya Lebanoni, ku sukela a Bali-gadi a masungulweni ya Nhava ya Hermoni ku ya tlhasa Lebo-hamati;* 6 muganga hinkwawu wa le tinhaveni, ku sukela a Lebanoni ku ya tlhasa a Misrefoti-mayimi; ni tiko hinkwadzru dzra Vasidoni. Ni ta va hlongola mahlweni ka Vaisrayele. U fanela ku dzri yavela ntsena Vaisrayele swanga pfindla, hi lani ni ku byeliki ha kone. 7 Xileswo, u fanela ku yavela tiko ledzri akuva dzri va pfindla dzra 9 wa tinxaka, ni hamfu ya lixaka dzra Manasi.”

8 A hamfu leyin’wana ya lixaka dzra Manasi, Varubeni ni Vagadi va teke pfindla ledzri Moxe a a va nyike dzrone ka tlhelo dzra le wuxeni bya Yordani, hi lani Moxe, nandzra wa Yehovha, a a va nyike ha kone: 9 ku sukela a Aroweri, lani ku kumekaka a nkingeni wa Nambu wa Arnoni, ni doropa ledzri kumekaka xikazri ka nambu, ni mbangu hinkwawu wa ku tlakuka wa le Medeba ku ya tlhasa Diboni; 10 madoropa hinkwawu ya Sihoni, hosi ya Vaamori, lweyi a fumiki a Hexiboni, ku ya tlhasa ndzrelekanwini wa Vaamoni; 11 kun’we ni Giliyadi, ni mbangu wa Vagexuri ni wa Vamakati; ni Nhava hinkwayu ya Hermoni ni Baxani hinkwaku ku ya tlhasa a Saleka, 12 leswi liki, mfumu hinkwawu wa Ogi a Baxani, lweyi a fumiki Axitaroti ni le Edreyi. (Yene a a li mun’we wa Varefayimi lava a va ha salile.) Moxe a va hlulile a tlhela a va hlongola. 13 Kambe a Vaisrayele a va va hlongolanga Vagexuri ni Vamakati, hikusa Gexuri na Makati va ha tsrhama xikazri ka Vaisrayele ku ta tlhasa namunhla.

14 Ko va ntsena lixaka dzra Valevhi ledzri Moxe a kalaka a nga dzri nyikanga pfindla, a pfindla dzravu a dzri ta va swin’we swa swihanano leswi a vhanu a va ta swi hisela Yehovha Xikwembu Nkulukumba wa Israyele, hi lani a a va dumbise ha kone.

15 Kutani Moxe a nyike pfindla lixaka dzra Rubeni, hi ku ya hi mindangu yavu, 16 nakone mbangu wavu a wu famba wu sukela Aroweri, lani ku kumekaka a nkingeni wa Nambu wa Arnoni, ku sukela ka doropa ledzri a dzri kumeka xikazri ka nambu, ku patsra ni mbangu hinkwawu lowu tlakukiki, kusuhi ni Medeba; 17 Hexiboni ni madoropa ya kone hinkwawu lama kumekaka a mbangwini lowu tlakukiki, Diboni, Bamoti-bali, Beti-bali-meyoni, 18 Yahazi, Kademoti, Mefati, 19 Kiriyatayimi, Sibima, Zereti-xahari lani ku kumekaka ka nhava leyi nga kusuhi ni mbangu wa le hansi lowu nga livala, 20 Beti-peyori, maganga* ya Pisga, Beti-yeximoni, 21 madoropa hinkwawu ya mbangu lowu tlakukiki ni mfumu hinkwawu wa Sihoni, hosi ya Vaamori, leyi fumiki a Hexiboni. Moxe a hlule hosi leyo ni vakulukumba va Vamidiyani, ku nga: Evhi, Rekemu, Zuri, Huru na Reba, lava a va li tihosi leti a ti fumiwa ha Sihoni nakone a va tsrhama tikweni ledzro. 22 Ka lava a Vaisrayele va va dlayiki hi xipada a ku na Balama lweyi wa mupfhumbi, n’wana wa Beyori. 23 A ndzrelekanu wa Varubeni a ku li Yordani; a pfindla dzravu hi ku ya hi mindangu yavu a ku li mbangu wolowo, ku patsra ni madoropa ni swidoropana swa wone.

24 Handle ka leswo, Moxe a nyike pfindla lixaka dzra Gadi, hi ku ya hi mindangu yavu. 25 Mbangu wavu a wu patsra Yazeri, madoropa hinkwawu ya Giliyadi ni hamfu ya tiko dzra Vaamoni ku ya tlhasa a Aroweri, lani ku kumekaka mahlweni ka Raba; 26 nakone a wu sukela a Hexiboni ku ya tlhasa a Ramati-mizpe ni Betonimi, ni ku sukela a Mahanayimi ku ya tlhasa ndzrelekanwini wa Debiri. 27 A nkoveni,* a wu patsra Beti-hara, Beti-nimira, Sukoti ni Zafoni, ku nga lani ku saliki ka mfumu wa Sihoni hosi ya Hexiboni. A ndzrelekanu wa kone a ku li Yordani ku sukela ka tlhelo dzra nyingitimu dzra nambu wa Kinereti, hi tlhelo dzra le wuxeni bya Yordani. 28 Ledzri a ve pfindla dzra Vagadi, hi ku ya hi mindangu yavu, kun’we ni madoropa ni swidoropana swa wone.

29 Handle ka leswo, Moxe a nyike pfindla hamfu ya lixaka dzra Manasi, hi ku ya hi mindangu yavu. 30 A mbangu wavu a wu sukela a Mahanayimi nakone a wu patsra ni Baxani hinkwaku, leswi liki, mfumu hinkwawu wa Ogi, hosi ya Baxani, ni swidoropana hinkwaswu swa matende swa Yayiri leswi nga Baxani, ni 60 wa madoropa. 31 A hamfu ya Giliyadi, Axitaroti ni Edreyi, ku nga madoropa ya mfumu wa Ogi a Baxani, ma nyikiwe vana va Makhiri n’wana wa Manasi, leswi liki, ma nyikiwe hamfu ya vana va Makhiri hi ku ya hi mindangu yavu.

32 Ledzri i pfindla ledzri Moxe a va nyikiki dzrone a mananga ya le Mowabu, ka tlhelo ledzrin’wana dzra Yordani, a wuxeni bya Yeriko.

33 Kambe a lixaka dzra Valevhi, Moxe a nga dzri nyikanga pfindla. Yehovha Xikwembu Nkulukumba wa Israyele i pfindla dzravu, hi lani a va dumbisiki ha kone.

14 Leyi i mimbangu leyi Vaisrayele va yi yamukeliki swanga pfindla a tikweni dzra Kanana, leyi va nyikiwiki yone hi muprista Eliyazari, Yoxuwa n’wana wa Nuni ni hi tinhloko ta mindangu ya tinxaka ta Israyele. 2 A pfindla dzra 9 wa tinxaka ni hamfu dzri yaveliwe hi ku tizrisa wuhlolotwana,* hi lani Yehovha a a lelete ha kone hi ku tizrisa Moxe. 3 A tinxaka letin’wana tibidzri ni hamfu, Moxe a a ti nyike pfindla ka tlhelo ledzrin’wana* dzra Yordani, a Valevhi a nga va nyikanga pfindla a xikazri ka tinxaka letin’wana. 4 A vatukulu va Yosefa va voniwe swanga tinxaka tibidzri, ku nga Manasi na Efrayimi; a Valevhi a va yamukelanga xiyenge ni xin’we xa tiko, ve nyikiwa ntsena madoropa akuva va tsrhama ka wone ni mimbangu ya kuva va byisela ka yone mintlhambi yavu ni ku beka mintxhumu yavu. 5 Hi ndlela leyo, a Vaisrayele va yavelani tiko hi lani Yehovha a a lelete Moxe ha kone.

6 Hiloko vavanuna va Yuda va tsrhindzrekelela Yoxuwa a Giligala na va na Kalebe n’wana wa Yefune wa Mukenezi, kutani Kalebe a ku: “Wa swi tiva leswi Yehovha a swi byeliki Moxe, mhunu wa Xikwembu Nkulukumba, mayelanu na mine na wene a Kadexi-barineya. 7 A ni ni 40 wa malembe loko na hi li Kadexi-barineya, Moxe, nandzra wa Yehovha, a ni zrume akuva ni ya kambela* tiko, ni va ni buya ni dzrungula dzra ntiyiso ni ledzri dumbekaka. 8 Nambileswi vamakwezru lava fambiki na mine va godolisiki xitsrhungu, mine ni yingisete Yehovha Xikwembu Nkulukumba wanga hi mbilu yanga hinkwayu.* 9 Moxe a hlambanyile hi siku ledzro a ku: ‘A tiko ledzri u fambiki ka dzrone dzri ta va pfindla dzraku ni dzra vanaku hi lani ku nga helikiki, hikusa u yingisete Yehovha Xikwembu Nkulukumba wanga hi mbilu yaku hinkwayu.’ 10 Kutani hi lani a dumbisiki ha kone, Yehovha a ni sizrelelile ndzreni ka malembe lawa ya 45, ku sukela ka loko Yehovha a yentxe xidumbiso lexo hi ku tizrisa Moxe, nkama lowu Israyele a a li mananga; ni namunhla na ha li kone, ni ni 85 wa malembe. 11 Ni namunhla na ha tiyile ku fana ni siku ledzri Moxe a ni zrumiki ha dzrone. Ni swoswi na ha ni ntamu wa ku fana ni lowu a ni li na wone a nkameni wolowo, akuva ni ya yimpini ni ku yentxa mintizro yimbeni. 12 Xileswo, ni nyike muganga lowu wa tinhava lowu Yehovha a ni dumbisiki wone siku ledzriyani. Nambileswi hi siku dzroledzro u tiviki leswaku a mbangwini lowo a ku ni Vaanakimi ni madoropa lamakulu lama tiyisiwiki, nakunene Yehovha a ta va na mine nakone ni ta va hlongola* hi lani Yehovha a dumbisiki ha kone.”

13 Xileswo, Yoxuwa a kombela Xikwembu Nkulukumba akuva a tovokisa Kalebe n’wana wa Yefune, a gama a mu nyika muganga wa Hebroni swanga pfindla. 14 Hi leswi yentxaka kuva muganga wa Hebroni wu va pfindla dzra Kalebe n’wana wa Yefune lwe wa Mukenezi ku ta tlhasa namunhla, hikusa a yingisete Yehovha Xikwembu Nkulukumba wa Israyele hi mbilu yake hinkwayu. 15 A ku sunguleni a vito dzra muganga wa Hebroni a ku li Kiriyati-arba (Arba a ku li wanuna wa lisima ngopfu swinene a xikazri ka Vaanakimi). Kutani a tiko dzri wisa ku lwa.

15 A mindangu ya lixaka dzra Yuda yi nyikiwe mbangu* lowu a wu famba wu ya tlhasa a ndzrelekanwini wa Edomu, a mananga ya Zini wu ya tlhasa ni le wugan’wini bya Negebu hi tlhelo dzra nyingitimu. 2 A ndzrelekanu wa le n’walungu a wu sukela wugan’wini bya Lwandle dzra Munyu,* ku sukela ka xiyenge lexi lavisiki a nyingitimu. 3 Kutani a wu famba wu kongoma nyingitimu, ka ganga dzra Akrabimi, wu khaluta hi le Zini wu gama wu tlhantuka ku sukela a nyingitimu wu ya a Kadexi-barineya, wu gama wu khaluta hi le Hesromi wu tlhantuka wu ya tlhasa a Adari wu gama wu djika wu ya Karika. 4 Ntsrhaku ka leswo a wu khaluta wu ya a Azimoni nakone a wu famba wu ya tlhasa a nkoveni* wa Egipta, wu ya gamela a Lwandle.* Lowo a wu li ndzrelekanu wa le nyingitimu.

5 A ndzrelekanu wa le wuxeni a ku li Lwandle dzra Munyu* ku ya tlhasa a wugan’wini bya Yordani. A ndzrelekanu wa le n’walungu a wu sungulela a nsongweni* ya lwandle, a wugan’wini bya Yordani. 6 A ndzrelekanu a wu tlhantuka wu ya tlhasa a Beti-hogla, a wu khaluta hi le n’walungu wa Beti-araba, nakone a wu tlhantuka wu ya tlhasa ka zribye dzra Bohani, n’wana wa Rubeni. 7 A ndzrelekanu a wu tlhantuka wu ya tlhasa a Debiri, a Nkoveni wa Akori, wu gama wu djika wu ya a n’walungu wu kongoma a Giligala, lani ku kumekaka a mahlweni ka ganga dzra Adumimi, a nyingitimu wa nkova,* nakone a ndzrelekanu a wu khaluta hi le ka mati ya Eni-xemexi wu ya gamela a Eni-rogeli. 8 A ndzrelekanu a wu tlhantuka wu ya tlhasa a Nkoveni wa Hinomu, ka ganga* dzra le nyingitimu wa doropa dzra Vayebusi, leswi liki, a Yerusalema, nakone a wu tlhantuka wu ya henhla a wugan’wini bya nhava leyi nga mpeladambu, a mahlweni ka Nkova ya Hinomu, a wugan’wini bya Nkova wa Refayimi hi le n’walungu. 9 Nakone a ndzrelekanu a wu sukela a henhla a wugan’wini bya nhava wu ya tlhasa xihloveni xa Nefitowa, a wu tama wu famba wu ya tlhasa ka madoropa lawa ma nga ka Nhava ya Efroni; a wu tlhela wu famba wu ya tlhasa a Bahala, leswi liki, a Kiriyati-yeyarimi. 10 Ku sukela a Bahala, a ndzrelekanu a wu djika wu kongoma mpeladambu wu ya tlhasa a Nhaveni ya Seyiri, nakone a wu khaluta hi le ka ganga dzra le n’walungu wa Nhava ya Yeyarimi, leswi liki, a Kesaloni, wu va wu xika wu ya a Beti-xemexi wu gama wu khaluta wu ya a Timina. 11 Nakone a ndzrelekanu a wu famba wu kongoma ka ganga dzra le n’walungu wa Ekroni, a wu famba wu ya tlhasa a Xikeroni, wu khaluta wu ya Nhaveni ya Bahala wu va wu tama wu famba wu ya tlhasa a Yabinele, wu ya gamela a lwandle.

12 A ndzrelekanu wa le mpeladambu a ku li nkinga wa Lwandle Ledzrikulu.* Leyo a ku li mindzrelekanu hinkwayu ya mbangu wa vatukulu va Yuda, hi ku ya hi mindangu yavu.

13 Kutani Yoxuwa a nyika Kalebe, n’wana Yefune, a mbangu a makazri ka vatukulu va Yuda, ku nga muganga wa Kiriyati-arba, leswi liki, Hebroni, hi ku ya hi nawu lowu Yehovha a nyikiki Yoxuwa. (Arba a a li papayi wa Anaki.) 14 Xileswo Kalebe a hlongola vana vazrazru va Anaki a mbangwini wolowo, ku nga Xexayi, Akhimani na Talmayi. 15 Ntsrhaku ka leswo a suka lahayani a ya lwa ni vahanyi va le Debiri. (A khale a Debiri a ku vitaniwa Kiriyati-seferi.) 16 Hiloko Kalebe a ku: “Wanuna lweyi a taka hlasela vhanu va Kiriyati-seferi a va a teka doropa dzravu, ni ta mu nyika n’wananga Akhisa akuva a va nsati wake.” 17 Xileswo, Otiniyele n’wana wa Kenazi, makwavu wa Kalebe, a teka doropa. Kutani Kalebe a mu nyika n’wanake Akhisa akuva a va nsati wake. 18 Na va li ndleleni ya ku muka, Akhisa a byela Otiniyele akuva a kombela nsimu ka papayi wake. Hiloko Akhisa a xika ka mbongolo,* kutani Kalebe a mu vutisa a ku: “U djula yini?” 19 Akhisa a hlamula a ku: “Ni kombela u ni tovokisa hikusa u ni nyike hamfu ya mbangu lowu kumekaka a nyingitimu,* ni nyiki ni Guloti-mayimu.”* Xileswo Kalebe a mu nyika Guloti wa le Henhla ni Guloti wa le Hansi.

20 Ledzro a ve pfindla dzra lixaka dzra Yuda, hi ku ya hi mindangu yavu.

21 A madoropa lawa ma viki ya lixaka dzra Yuda hi tlhelo dzra le nyingitimu ku ya tlhasa a ndzrelekanwini wa Edomu a ku li lawa: Kabizeyele, Ederi, Yaguri, 22 Kina, Dimona, Adada, 23 Kedexi, Hazori, Itinani, 24 Zifi, Telemu, Beyaloti, 25 Hazori-hadata, Keriyoti-hezroni, leswi liki, Hazori, 26 Amami, Xema, Molada, 27 Hazari-gada, Heximoni, Beti-peleti, 28 Hazari-xuwali, Berxeba, Biziyotiya, 29 Bahala, Yimi, Ezemu, 30 Eltoladi, Kesili, Horma, 31 Ziklagi, Madimana, Sansana, 32 Lebayoti, Xilihimi, Ayini ni doropa dzra Rimoni, hinkwawu a ma li 29 wa madoropa kun’we ni swidoropana swa wone.

33 A madoropa ya Xefela a ku li lawa: Extawoli, Zora, Axina, 34 Zanowa, Eni-ganimi, Tapuwa, Enami, 35 Yarmuti, Adulamu, Soko, Azeka, 36 Xarayimi, Aditayimi, Gedera ni Gederotayimi,* 14 wa madoropa ni swidoropana swa wone.

37 Zenani, Hadaxa, Migidalgadi, 38 Dileyani, Mizpa, Yokiteyeli , 39 Lakixi, Bazkati, Egloni, 40 Kaboni, Lahimasi, Kitilixi, 41 Gederoti, Beti-dagoni, Nahama ni doropa dzra Makeda, 16 wa madoropa ni swidoropana swa wone.

42 Libna, Eteri, Axani, 43 Ifita, Axina, Nezibi, 44 Keila, Akezibi ni doropa dzra Marexa, 9 wa madoropa ni swidoropana swa wone.

45 Ekroni, ni swidoropana leswi a swi li kusuhi na kone. 46 Mimbangu hinkwayu leyi nga tlhelweni ka Axidodi, ku sukela a Ekroni ku ya a mpeladambu, ni swidoropana swa kone.

47 Axidodi, ni swidoropana leswi a swi li kusuhi na kone; Gaza ni swidoropana leswi a swi li kusuhi na kone, ku ya tlhasa a nkoveni* wa Egipta, a Lwandle Ledzrikulu,* ni le matlhelweni ka dzrone.

48 A mugangeni wa tinhava a ku li doropa dzra Xamiri, Yatiri, Soko, 49 Dana, Kiriyati-sana, leswi liki, Debiri, 50 Anabi, Extemo, Animi, 51 Goxeni, Holoni ni doropa dzra Gilo, 11 wa madoropa ni swidoropana swa wone.

52 Arabiya, Duma, Exani, 53 Yanimi, Beti-tapuwa, Afeka, 54 Humita, Kiriyati-arba, leswi liki, Hebroni ni doropa dzra Ziyori, 9 wa madoropa ni swidoropana swa wone.

55 Mawoni, Karmeli, Zifi, Yuta, 56 Yezriyele, Yokideyamu, Zanowa, 57 Kayini, Gibeya ni doropa dzra Timina, 10 wa madoropa ni swidoropana swa wone.

58 Khalikhuli, Beti-zuri, Gedori, 59 Marati, Beti-anoti ni doropa dzra Eltekoni , 6 wa madoropa ni swidoropana swa wone.

60 Kiriyati-bali, leswi liki, Kiriyati-yeyarimi ni doropa dzra Raba, madoropa mabidzri ni swidoropana swa wone.

61 A mananga a ku li doropa dzra Beti-araba, Midini, Sakaka, 62 Nibixani, Doropa dzra Munyu ni dzra Eni-gedi, 6 wa madoropa ni swidoropana swa wone.

63 Loko ku li Vayebusi lava a va tsrhama Yerusalema, a vavanuna va Yuda a va swi kotanga ku va hlongola, hi kola ka leswo a Vayebusi va ha tama va tsrhama ni lixaka dzra Yuda ku ta ta tlhasa namunhla.

16 A mbangu lowu yaveliwiki lixaka dzra Yosefa hi ku tizrisa wuhlolotwana* a wu sukela a Yordani kusuhi ni Yeriko wu ya tlhasa ka mati lawa ma nga wuxeni bya Yeriko, nakone a wu famba hi le mananga lawa ma tlhantukaka ku sukela a Yeriko, wu va wu famba wu ya tlhasa a mugangeni wa tinhava wa le Betele. 2 Ku sukela Betele lani a ku li kusuhi ni Luzi, a wu tama wu famba wu ya tlhasa a ndzrelekanwini wa mbangu wa Vaarkhiti, a Ataroti. 3 Kutani wu xika wu kongoma ka tlhelo dzra le mpeladambu wu ya ndzrelekanwini wa mbangu wa Vayafayele, wu ya tlhasa ni le ndzrelekanwini wa Beti-horoni wa le Hansi ni le Gezeri, wu ya gamela a lwandle.

4 Hiloko lixaka dzra Manasi ni lixaka dzra Efrayimi, ku nga vatukulu va Yosefa, va teka tiko ledzri va yaveliwiki dzrone. 5 A ndzrelekanu wa mbangu wa vana va Efrayimi, hi ku ya hi mindangu yavu, hi lowu: A ndzrelekanu wa le wuxeni wa pfindla dzravu a wu sukela a Ataroti-adari wu ya tlhasa a Beti-horoni wa le Henhla, 6 nakone a ndzrelekanu a wu famba wu ya tlhasa a lwandle. Mikimetati a ku kumeka a n’walungu; kutani a ndzrelekanu a wu djika wu kongoma wuxeni, wu ya tlhasa a Tanati-xilo, nakone a wu tama wu famba wu kongoma wuxeni wu ya tlhasa a Yanowa. 7 Ku sukela a Yanowa a wu fulamela wu ya a Ataroti ni le Nahara, wu khaluta hi le Yeriko wu tama wu famba wu ya tlhasa a Yordani. 8 Ku sukela a Tapuwa, a ndzrelekanu a wu famba wu kongoma mpeladambu wu ya tlhasa a nkoveni* wa Kana nakone a wu gamela a lwandle. Ledzro a ve pfindla dzra lixaka dzra Efrayimi, hi ku ya hi mindangu yavu; 9 a pfindla dzra vana va Efrayimi a dzri patsra ni madoropa ni swidoropana hinkwaswu leswi a va li na swone a xikazri ka pfindla dzra vana va Manasi.

10 Kambe a va va hlongolanga Vakanana lava a va tsrhama a Gezeri, nakone a Vakanana volavo va ha tama va tsrhama xikazri ka Efrayimi ku ta tlhasa namunhla, na va yentxa mintizro ya wukazrawa.

17 Kutani a wuhlolotwana byi* kombetela ka lixaka dzra Manasi, hikusa Manasi a a li mativula ya Yosefa. Leswi Makhiri mativula ya Manasi tlhelo papayi wa Giliyadi a a li mulwi wa yimpi, a nyikiwe Giliyadi ni le Baxani. 2 A vatukulu lava saliki va Manasi va yaveliwe mbangu hi ku tizrisa wuhlolotwana* hi ku ya hi mindangu yavu, ku nga vana va Abiyezeri, vana va Heleki, vana va Asiriyele, vana va Sikeme, vana va Heferi ni vana va Xemida. Lavo i vavanuna lava a va li vatukulu va Manasi n’wana wa Yosefa, hi ku ya hi mindangu yavu. 3 Kambe Zelofeyadi, n’wana wa Heferi, n’wana wa Giliyadi, n’wana wa Makhiri, n’wana wa Manasi, a nga va nga ni vana va xinuna, e va ni vana va xisati, nakone mavito yavu a ku li: Makila, Nowa, Hogla, Milka na Tiriza. 4 Xileswo vana volavo va yela muprista Eliyazari, Yoxuwa n’wana wa Nuni ni vakulukumba va va byela va ku: “Ku ve Yehovha lweyi a leletiki Moxe leswaku a hi nyika pfindla a makazri ka vamakwezru.” Kutani hi ku landzra xileleto xa Yehovha va nyikiwe pfindla a makazri ka vamakwavu va papayi wavu.

5 Kutani Manasi a nyikiwe 10 wa mimbangu na ku nga kontiwi Giliyadi ni le Baxani, lani a ku kumeka ka tlhelo ledzrin’wana* dzra Yordani, 6 hikusa a vana va xisati va Manasi va nyikiwe pfindla kun’we ni vanake va xinuna, nakone a tiko dzra Giliyadi dzri ve mbangu wa vatukulu lavan’wana va Manasi.

7 A ndzrelekanu wa mbangu wa lixaka dzra Manasi a wu famba ku sukela a ndzrelekanwini wa Axere wu ya tlhasa a Mikimetati lani ku kumekaka a mahlweni ka Sikeme, nakone a wu tama wu famba wu kongoma nyingitimu* wu ya tlhasa a tikweni ledzri vhanu va Eni-tapuwa a va tsrhama ka dzrone. 8 A tiko dzra Tapuwa dzri ve dzra Manasi, kambe a doropa dzra Tapuwa ledzri a dzri kumeka a ndzrelekanwini wa mbangu wa Manasi, a dzri lumba vatukulu va Efrayimi. 9 Nakone a ndzrelekanu a wu fulamela wu ya tlhasa a nkoveni* wa Kana, a nyingitimu wa nkhinsi. Ka mbangu wa Manasi a ku ni madoropa ya Efrayimi, nakone a ndzrelekanu wa mbangu wa Manasi a wu kumeka hi le n’walungu wa nkova* wu ya gamela a lwandle. 10 A mbangu wa le n’walungu a wu lumba Efrayimi, a mbangu wa le nyingitimu a wu li wa Manasi nakone a ndzrelekanu a ku li lwandle, a mbangu wa Manasi a wu famba wu ya tlhasa* ka mbangu wa Axere hi le n’walungu, hi le wuxeni a wu ya tlhasa ka mbangu wa Yisakari.

11 Ka mimbangu ya Yisakari ni ya Axere, Manasi a nyikiwe Beti-xeyani ni swidoropana swa dzrone,* Ibileyamu ni swidoropana swa dzrone, doropa dzra Dori, vayaki va dzrone kun’we ni swidoropana swa dzrone; doropa dzra Eni-dori, vayaki va dzrone kun’we ni swidoropana swa dzrone; doropa dzra Tanaki, vayaki va dzrone kun’we ni swidoropana swa dzrone; doropa dzra Megido, vayaki va dzrone kun’we ni swidoropana swa dzrone, lani mazrazru ka wone a ma li mbangwini wa swinhavana.*

12 Kambe a vatukulu va Manasi a va swi kotanga ku teka madoropa wolawo, hikusa a Vakanana a va ha tama va tsrhama a mimbangwini yoleyo. 13 Loko Vaisrayele va ve ni ntamu va sindzrise Vakanana ku hamba mintizro ya wukazrawa, kambe a va va hlongolanga* hi lani ku heleliki.

14 A vatukulu va Yosefa va byele Yoxuwa va ku: “Ha yini u hi nyike* xiyenge xin’we xa tiko? Hi xitsrhungu xa xikulu, hikusa Yehovha a hi tovokisile ku ta tlhasa swoswi.” 15 Yoxuwa a va hlamula a ku: “Loko mi li xitsrhungu xa xikulu, nakone a muganga wa tinhava wa Efrayimi wu li wutsrongo swinene kwenu, fambani a nhoveni, a tikweni dzra Vaperezi ni dzra Varefayimi mi ya tibasisela mbangu.” 16 Hiloko vatukulu va Yosefa va mu byela va ku: “A muganga wa tinhava a wu hi yaneli, nakone Vakanana hinkwavu lava tsrhamaka a nkoveni va ni tin’qolo ta yimpi leti nga ni mikwa ya ku leha ya nsimbi ka maroda,* nambi lava tsrhamaka Beti-xeyani ni le ka swidoropana swa dzrone ni lava tsrhamaka a Nkoveni wa Yezriyele.” 17 Xileswo, Yoxuwa a byela ndangu wa Yosefa, ku nga lixaka dzra Efrayimi ni dzra Manasi, a ku: “N’wine mi xitsrhungu lexikulu, nakone mi ni ntamu lowukulu. Mi nga ti yamukela ntsena xiyenge xin’we, 18 kambe a muganga wa tinhava na wone wu ta va wenu. Nambileswi wu nga nhova, mi ta wu basisa, wone wu ta va ndzrelekanu wa mbangu wenu. Hikusa n’wine mi ta hlongola Vakanana, nambileswi vone va nga ni ntamu va tlhela va va ni tin’qolo ta yimpi leti nga ni mikwa ya ku leha ya nsimbi ka maroda.”*

18 Kutani a nhlengeletanu hinkwayu ya Israyele yi hlengeletana a Xilo yi va yi dzima kone a tende dzra ntlhanganu, hikusa a tiko kutani a va dzri tekile. 2 Kambe a ka ha ni 7 wa tinxaka ta Vaisrayele leti a ti nga si na dzri yamukela pfindla. 3 Hiloko Yoxuwa a byela Vaisrayele a ku: “Mi ta hlwela ku ya teka tiko ledzri Yehovha Xikwembu Nkulukumba wa vakokwana venu a mi nyikiki dzrone ku ya tlhasa dzrini? 4 Hlawulani vavanuna vazrazru ka lixaka dzrin’wana ni dzrin’wana akuva ni va zruma va famba va zrendzreleka tikweni, va tsrala leswaku dzri tsrhamisise kuyini hi ku ya hi pfindla dzra lixaka dzrin’wana ni dzrin’wana. Ntsrhaku ka leswo va ta tlhelela kwanga. 5 Va fanela ku yava tiko hi 7 wa swiyenge. A lixaka dzra Yuda dzri ta tama dzri va mbangwini wa dzrone a nyingitimu, nakone a vatukulu va Yosefa va ta tama va va mbangwini wavu a n’walungu. 6 Tsralani leswi a tiko dzri tsrhamisisiki xiswone mi dzri yava hi 7 wa swiyenge; ntsrhaku ka leswo mi ta ni buyisela leswi mi swi tsraliki, kutani mine ni ta hamba wuhlolotwana* lani mahlweni ka Yehovha Xikwembu Nkulukumba wezru. 7 Kambe a Valevhi a va nge ti nyikiwa tiko a makazri kwenu, hikusa a pfindla dzravu i ku tizra swanga vaprista va Yehovha; a lixaka dzra Gadi, lixaka dzra Rubeni ni hamfu ya lixaka dzra Manasi kutani va dzri yamukelile pfindla dzravu ka tlhelo dzra le wuxeni bya Yordani, ledzri Moxe nandzra wa Yehovha a va nyikiki dzrone.”

8 A vavanuna lava a va ta ya tsrala leswi a tiko dzri tsrhamisisiki xiswone va tilulamisela akuva va famba, kutani Yoxuwa a va leleta a ku: “Fambani mi zrendzreleka a tikweni mi va mi tsrala leswi dzri tsrhamisisiki xiswone; ntsrhaku ka leswo mi ta tlhelela kwanga, kutani ni ta mi hambela wuhlolotwana* a mahlweni ka Yehovha lani a Xilo.” 9 Xileswo a vavanuna volavo va famba va zrendzreleka a tikweni, va tsrala leswi dzri tsrhamisisiki xiswone. Va dzri yava hi 7 wa swiyenge hi ku ya hi madoropa, va tsrala hinkwaswu a bukwini. Ntsrhaku ka leswo va tlhelela ka Yoxuwa a mintxhatxheni a Xilo. 10 Kutani Yoxuwa a va hambela wuhlolotwana* a mahlweni ka Yehovha, a Xilo. A yavela Vaisrayele tiko a mbangwini wolowo hi ku ya hi xiyenge lexi a xi fanela lixaka dzrin’wana ni dzrin’wana.

11 A wuhlolotwana byi zrange byi* kombetela ka lixaka dzra Benjamini hi ku ya hi mindangu yavu, nakone a mbangu lowu va yaveliwiki wone hi ku tizrisa wuhlolotwana a wu kumeka a xikazri ka vatukulu va Yuda ni vatukulu va Yosefa. 12 Hi tlhelo dzra le n’walungu a ndzrelekanu a wu sungulela Yordani nakone a wu famba wu ya tlhasa ka ganga* dzra le n’walungu wa Yeriko, wu gama wu tlhantuka hi le mugangeni wa tinhava a mpeladambu, wu va wu famba wu ya tlhasa mananga ya Beti-avheni. 13 Ku sukela kolanu a ndzrelekanu a wu tama wu famba wu ya tlhasa a Luzi, ka ganga dzra le nyingitimu wa Luzi, leswi liki, a Betele; a ndzrelekanu a wu fulamela wu ya tlhasa a Ataroti-adari, lani ku kumekaka a nhaveni, a nyingitimu wa Beti-horoni wa le Hansi. 14 A ndzrelekanu a wu famba hi tlhelo dzra le mpeladambu wu gama wu djika wu kongoma nyingitimu ku sukela a nhaveni leyi kumekaka a nyingitimu a mahlweni ka Beti-horoni, a wu ya gamela a Kiriyati-bali, leswi liki, Kiriyati-yeyarimi, ku nga doropa dzra Yuda. Ledzro a ku li tlhelo dzra mpeladambu.

15 A ndzrelekanu wa le nyingitimu a wu sungulela a wugan’wini bya Kiriyati-yeyarimi nakone a wu famba wu kongoma mpeladambu; a wu tama wu famba wu ya tlhasa a xihloveni xa Nefitowa. 16 A ndzrelekanu a wu fulamela wu ya tlhasa a wugan’wini bya nhava leyi kumekaka a mahlweni ka Nkova wa Hinomu, a n’walungu wa Nkova wa Refayimi, a wu fulamela wu ya tlhasa ka Nkova wa Hinomu, ka ganga dzra le nyingitimu wa doropa dzra Vayebusi, wu gama wu fulamela wu ya a Eni-rogeli. 17 Ntsrhaku ka leswo a wu famba wu kongoma n’walungu wu ya tlhasa a Eni-xemexi, wu gama wu famba wu ya tlhasa a Geliloti, lani ku kumekaka mahlweni ka ganga dzra Adumimi, wu gama wu fulamela wu ya tlhasa ka zribye dzra Bohani n’wana wa Rubeni. 18 Nakone a wu tama wu famba wu ya ka ganga dzra le n’walungu a mahlweni ka Araba, wu va wu fulamela wu ya tlhasa a Araba. 19 A ndzrelekanu a wu tama wu famba wu ya tlhasa ka ganga dzra le n’walungu wa Beti-hogla, nakone a wu ya gamela a nsongweni* ya le n’walungu ya Lwandle dzra Munyu,* a wugan’wini bya le nyingitimu bya Yordani. Lowu a ku li ndzrelekanu wa le nyingitimu. 20 Ka tlhelo dzra le wuxeni a ndzrelekanu a ku li nambu wa Yordani. Leyo a ku li mindzrelekanu hinkwayu ya pfindla dzra vatukulu va Benjamini, hi ku ya hi mindangu yavu.

21 A madoropa ya lixaka dzra Benjamini, hi ku ya hi mindangu yavu, a ku li lawa: Yeriko, Beti-hogla, Emeki-kezizi, 22 Beti-araba, Zemarayimi, Betele, 23 Avhimi, Para, Ofra, 24 Khefari-amoni, Ofini ni doropa dzra Geba, 12 wa madoropa ni swidoropana swa wone.

25 Gibiyoni, Rama, Beroti, 26 Mizpa, Khefira, Moza, 27 Rekemu, Irpeyeli, Tarala, 28 Zelahi, Ha-elefi, Yebusi, leswi liki, Yerusalema, Gibeya ni doropa dzra Kiriyati, 14 wa madoropa ni swidoropana swa wone.

Ledzro ku ve pfindla dzra vatukulu va Benjamini, hi ku ya hi mindangu yavu.

19 A wuhlolotwana* bya wubidzri byi kombetele ka Simiyoni, leswi liki, ka lixaka dzra Simiyoni, hi ku ya hi mindangu yavu. Nakone a pfindla dzravu a dzri li ndzreni ka mbangu lowu a wu li pfindla dzra lixaka dzra Yuda. 2 A pfindla dzravu a ku li Berxeba na Xeba, doropa dzra Molada, 3 dzra Hazari-xuwali, dzra Bala, dzra Ezemu, 4 dzra Eltoladi, dzra Betuli, dzra Horma, 5 dzra Ziklagi, dzra Beti-markaboti, dzra Hazari-susa, 6 dzra Beti-lebayoti ni dzra Xaruheni, hinkwawu a ma li 13 wa madoropa ni swidoropana swa wone; 7 ku patsra ni doropa dzra Ayini, dzra Rimoni, dzra Eteri ni dzra Axani, mune wa madoropa ni swidoropana swa wone; 8 ka pfindla dzravu a ku patsreka ni swidoropana hinkwaswu leswi a swi li matlhelweni ka madoropa lawo ku ya tlhasa a Balati-beri lani a ku tlhela ku vitaniwa Rama wa le nyingitimu. Ledzri a ku li pfindla dzra lixaka dzra Simiyoni hi ku ya hi mindangu yavu. 9 A pfindla dzra vatukulu va Simiyoni dzri susiwe ka mbangu lowu a wu nyikiwe lixaka dzra Yuda, hikusa a mbangu lowu a wu nyikiwe lixaka dzra Yuda a wu li wukulu ngopfu swinene. Xileswo, a vatukulu va Simiyoni va nyikiwe mbangu a ndzreni ka pfindla dzra lixaka dzra Yuda.

10 Hi ku landzrela, a wuhlolotwana bya wuzrazru byi kombetele ka vatukulu va Zebuloni, hi ku ya hi mindangu yavu, nakone a ndzrelekanu wa pfindla dzravu a wu famba wu ya tlhasa Saridi. 11 A ndzrelekanu wavu a wu famba wu kongoma mpeladambu wu ya tlhasa a Mareyali, a wu khaluta hi le Dabexeti wu gama wu famba wu ya tlhasa a nkoveni lowu kumekaka a mahlweni ka Yokineyamu. 12 Nakone ku sukela a Saridi a wu famba wu kongoma wuxeni, wu ya tlhasa a ndzrelekanwini wa Kixloti-tabori, wu tama wu famba wu ya tlhasa Daberati wu gama wu tlhantuka wu ya tlhasa Yafiya. 13 Ku sukela kolanu a wu tama wu famba wu kongoma wuxeni, wu ya tlhasa Gati-heferi ni le Eti-kazini nakone a wu tama wu famba wu ya tlhasa a Rimoni ni le Neya. 14 A ndzrelekanu a wu djika hi le n’walungu wu ya tlhasa a Hanatoni wu ya gamela a Nkoveni wa Iftayele, 15 a mbangu wavu a wu patsra ni doropa dzra Katati, dzra Nahalali, dzra Ximironi, dzra Idala ni dzra Betlehema, hinkwawu a ma li 12 wa madoropa ni swidoropana swa wone. 16 Ledzro dzri ve pfindla dzra vatukulu va Zebuloni, hi ku ya hi mindangu yavu. Lawo ma ve madoropa yavu ni swidoropana swavu.

17 A wuhlolotwana bya wumune byi kombetele ka Yisakari, leswi liki, ka vatukulu va Yisakari, hi ku ya hi mindangu yavu. 18 Nakone a ndzrelekanu wavu a wu famba wu ya tlhasa a Yezriyele, Kesuloti, Xunemi, 19 Hafarayimi, Xiyoni, Anaharati, 20 Rabiti, Kixiyoni, Ebezi, 21 Remeti, Eni-ganimi, Eni-hada ni le Beti-paze. 22 A ndzrelekanu a wu famba wu ya tlhasa Tabori, Xahazuma, ni le Beti-xemexi nakone a wu ya gamela a Yordani, hinkwawu a ma li 16 wa madoropa ni swidoropana swa wone. 23 A madoropa lawo ni swidoropana swa wone ma ve pfindla dzra lixaka dzra Yisakari, hi ku ya hi mindangu yavu.

24 A wuhlolotwana bya wuntlhanu byi kombetele ka lixaka dzra Axere, hi ku ya hi mindangu yavu. 25 Nakone ndzrelekanu wavu a ku li Helkati, Hali, Beteni, Akaxafi, 26 Alameleki, Amadi ni le Mixali. Hi tlhelo dzra le mpeladambu a wu ya tlhasa a Karmeli ni le Xihori-libinati, 27 a wu gama wu tlhela wu kongoma wuxeni wu ya tlhasa Beti-dagoni, ka mbangu wa Zebuloni ni le ka tlhelo dzra le n’walungu dzra Nkova wa Iftayele, a wu ya tlhasa ni le Beti-emeki ni le Neyiyele. Nakone a wu famba wu ya tlhasa a Kabuli, hi le ximatsrini, 28 wu ya tlhasa ni le Ebroni, Rehobe, Hamoni ni le Kana, wu tama wu famba wu ya tlhasa Sidoni Lwenkulu. 29 Nakone ndzrelekanu a wu gama wu tlhela wu ya Rama ni le ka doropa dzra Tiri ledzri a dzri ni mimuru leyi tiyiki. Ntsrhaku ka leswo, a ndzrelekanu a wu tlhela wu ya a Hosa, nakone a wu ya gamela a lwandle, a mugangeni wa Akezibi, 30 Uma, Afeki ni le Rehobe, hinkwawu a ma li 22 wa madoropa ni swidoropana swa wone. 31 Ledzri ku ve pfindla dzra lixaka dzra Axere, hi ku ya hi mindangu yavu. Lawa ku ve madoropa ni swidoropana swa wone.

32 A wuhlolotwana bya wu 6 byi kombetele ka vatukulu va Naftali, hi ku ya hi mindangu yavu. 33 A ndzrelekanu wa mbangu wavu a wu sungulela Helefa, ka nsinya lowukulu wa le Zananimi, wu khaluta hi le Adami-nekebi ni le Yabinele, wu famba wu ya tlhasa Lakumi wu ya gamela a Yordani. 34 A ndzrelekanu a wu gama wu djika wu ya mpeladambu wu ya tlhasa a Azinoti-tabori, ku sukela kolanu a wu famba wu ya Hukikoki wu ya tlhasa ka mbangu wa Zebuloni hi le nyingitimu, wa Axere hi le mpeladambu ni wa Yuda, a Yordani, hi le wuxeni. 35 A madoropa lawa a ma ni mimuru leyi tiyiki a ku li doropa dzra Zidimi, dzra Zera, dzra Hamati, dzra Rakati, dzra Kinereti, 36 dzra Adama, dzra Rama, dzra Hazori, 37 dzra Kedexi, dzra Edreyi, dzra Eni-hazori, 38 dzra Yironi, dzra Migidaleli, dzra Horemi, dzra Beti-anati ni dzra Beti-xemexi, hinkwawu a ma li 19 wa madoropa ni swidoropana swa wone. 39 Ledzro ku ve pfindla dzra lixaka dzra Naftali, hi ku ya hi mindangu yavu, madoropa ni swidoropana swa wone.

40 A wuhlolotwana bya wu 7 byi kombetele ka lixaka dzra Dani, hi ku ya hi mindangu yavu. 41 A ndzrelekanu wa pfindla dzravu a ku li Zora, Extawoli, Irxemexi, 42 Xalabini, Ayaloni, Itila, 43 Eloni, Timina, Ekroni, 44 Elteke, Gibetoni, Balati, 45 Yehude, Bene-beraki, Gati-rimoni, 46 Me-yarikoni ni le Rakoni, nakone a ndzrelekanu a wu khaluta hi le kusuhi ni Yopa. 47 Kambe a mbangu wa lixaka dzra Dani a wu li wutsrongo ngopfu swinene. Xileswo va ye lwa ni vhanu va le doropeni dzra Lexemi va va dlaya hi xipada kutani va teka doropa. Ntsrhaku ka loko va teke doropa va sungule ku tsrhama ka dzrone, va nyika doropa dzra Lexemi vito dzra ku Dani, ku nga vito dzra kokwana wavu Dani. 48 Ledzro ku ve pfindla dzra lixaka dzra Dani hi ku ya hi mindangu yavu. Lawo ma ve madoropa ni swidoropana swa wone.

49 Xileswo va gama ku yavela tiko akuva lixaka dzrin’wana ni dzrin’wana dzri va ni mbangu wa dzrone swanga pfindla. Kutani a Vaisrayele va nyike Yoxuwa n’wana wa Nuni a pfindla a makazri kwavu. 50 Va mu nyike doropa ledzri a dzri kombeliki, ku nga Timinati-sera, a mugangeni wa tinhava wa Efrayimi, hi lani Yehovha a leletiki ha kone, a va a pfuxeta doropa a tsrhama ka dzrone.

51 Lawa ma ve mapfindla lawa muprista Eliyazari, Yoxuwa n’wana wa Nuni ni tinhloko ta mindangu ya tinxaka ta Israyele va ma yaveliki hi wuhlolotwana* a Xilo a mahlweni ka Yehovha, a nyangweni wa tende dzra ntlhanganu. Hi ndlela leyo va game ku yavela tiko.

20 Kutani Yehovha a byela Yoxuwa a ku: 2 “Byela Vaisrayele u ku: ‘Tihlawulelani madoropa ya wutumbelo lawa ni vulavuliki na n’wine mayelanu na wone hi ku tizrisa Moxe, 3 akuva lweyi a dlayaka mhunu mun’wana hi mphazamu* a tsrutsrumela ka wone. Ma ta va mbangu lowu mi taka tumbela ka wone akuva mi nga kumiwi hi mhunu lweyi a taka djula ku dzrihisela mufi.* 4 Lweyi a dlayiki mhunu a fanela ku tsrutsrumela ka dzrin’we dzra madoropa wolawo a tlhasa a yima nyangweni ya doropa a va a hlaya mhaka yake a mahlweni ka vakulu va doropa dzroledzro. Kutani va fanela ku mu yamukela doropeni va va va mu nyika mbangu wa ku tsrhama ka wone a makazri kwavu. 5 Loko lweyi a djulaka ku dzrihisela mufi* o txhuka a mu hlongolisa, a va fanelanga va mu nyikela kwake hikusa a nga mu dlayanga hi maxivomu, nakone a a nga mu nyenyi. 6 A fanela ku tsrhama ka doropa dzroledzro ku ya tlhasa loko a ya mahlweni ka nhlengeletanu akuva a thethisiwa, nakone a fanela ku tama a tsrhama ka dzrone ku ya tlhasa loko ku fa muprista lwenkulu lweyi a tizraka a masikwini wolawo. Ntsrhaku ka leswo, lweyi a dlayiki mhunu a nga tlhelela ka doropa ledzri a tsrutsrumiki ka dzrone, a nga nghena doropeni dzrake ni le kaya kwake.’”

7 Xileswo va hlawulekise doropa dzra Kedexi, a Galileya, a mugangeni wa tinhava wa Naftali; dzra Sikeme, a mugangeni wa tinhava wa Efrayimi; ni dzra Kiriyati-arba, leswi liki, Hebroni, a mugangeni wa tinhava wa Yuda. 8 A mugangeni wa Yordani, a wuxeni bya Yeriko, va hlawule doropa dzra Bezeri, ledzri kumekaka mananga a mbangwini wa ku tlakuka, ka lixaka dzra Rubeni; va hlawula doropa dzra Ramoti, a Giliyadi, ka lixaka dzra Gadi; ni doropa dzra Golani, a Baxani, ka lixaka dzra Manasi.

9 Lawa ma ve madoropa lawa ma hlawuleliwiki Vaisrayele hinkwavu ni vhanu va matiko man’wana lava a va tsrhama makazri kwavu, akuva mun’wana ni mun’wana lweyi a dlayaka mhunu mun’wana hi mphazamu a tsrutsrumela kone akuva a nga dlayiwi hi mudzrihiseli wa mufi* na a nge si ya mahlweni ka nhlengeletanu akuva a thethisiwa.

21 Kutani a tinhloko ta mindangu ya Valevhi ti tsrhindzrekelela muprista Eliyazari, Yoxuwa n’wana wa Nuni, ni tinhloko ta mindangu ya tinxaka ta Israyele, 2 na va li a Xilo, a tikweni dzra Kanana, ti va byela ti ku: “Hi ku tizrisa Moxe, Yehovha a lelete leswaku hi nyikiwa madoropa akuva hi tsrhama ka wone ni mimbangu ya kuva hi byisela ka yone mintlhambi yezru.” 3 Xileswo hi lani Yehovha a leletiki ha kone, a Vaisrayele va suse madoropa ya kukazri ka pfindla dzravu ni mimbangu ya ku byisela ka yone mintlhambi va swi nyika Valevhi.

4 A wuhlolotwana byi* kombetele ka mindangu ya Vakohati, kutani a Valevhi lava a va li vana va muprista Aroni, va nyikiwe 13 wa madoropa hi ku tizrisa wuhlolotwana ka tinxaka ta Yuda, Simiyoni na Benjamini.

5 A Vakohati lavan’wana hinkwavu va yamukele* 10 wa madoropa ka mindangu ya lixaka dzra Efrayimi, ya lixaka dzra Dani ni ya hamfu ya lixaka dzra Manasi.

6 A Vagerixoni va yamukele 13 wa madoropa ka mindangu ya lixaka dzra Yisakari, ya lixaka dzra Axere, ya lixaka dzra Naftali ni ya hamfu ya lixaka dzra Manasi a Baxani.

7 A Vamerari, hi ku ya hi mindangu yavu, va nyikiwe 12 wa madoropa ka lixaka dzra Rubeni, lixaka dzra Gadi ni ka lixaka dzra Zebuloni.

8 Xileswo, a Vaisrayele va nyike Valevhi madoropa wolawo ni mimbangu ya ku byisela ka yone mintlhambi hi ku tizrisa wuhlolotwana,* hi lani Yehovha a a lelete ha kone hi ku tizrisa Moxe.

9 Ka lixaka dzra Yuda ni ka lixaka dzra Simiyoni, va va nyike madoropa lawa ma longoloxiwiki lani hi mavito; 10 ma nyikiwe vana va Aroni, lava a va li va mindangu ya Vakohati, ka Valevhi, hikusa a wuhlolotwana bya ku sungula byi kombetele kwavu. 11 Va va nyike Kiriyati-arba, leswi liki, Hebroni, a mugangeni wa tinhava wa le Yuda, ni mimbangu ya ku byisela ka yone mintlhambi leyi nga matlhelweni ya dzrone. (Arba a a li papayi wa Anaki.) 12 Kambe a masimu ni swidoropana swa dzrone swi nyikiwe Kalebe n’wana wa Yefune, akuva swi va swake.

13 Nakone a vana va muprista Aroni va nyikiwe doropa dzra wutumbelo, akuva lweyi a dlayaka mhunu a tsrutsrumela ka dzrone, ku nga doropa dzra Hebroni, ni mimbangu ya dzrone ya ku byisela ka yone mintlhambi, ni doropa dzra Libna ni mimbangu ya dzrone ya ku byisela ka yone mintlhambi, 14 doropa dzra Yatiri ni mimbangu ya dzrone ya ku byisela ka yone mintlhambi, doropa dzra Extemowa ni mimbangu ya dzrone ya ku byisela ka yone mintlhambi, 15 doropa dzra Holoni ni mimbangu ya dzrone ya ku byisela ka yone mintlhambi, doropa dzra Debiri ni mimbangu ya dzrone ya ku byisela ka yone mintlhambi, 16 doropa dzra Ayini ni mimbangu ya dzrone ya ku byisela ka yone mintlhambi, doropa dzra Yuta ni mimbangu ya dzrone ya ku byisela ka yone mintlhambi ni doropa dzra Beti-xemexi ni mimbangu ya dzrone ya ku byisela ka yone mintlhambi, a ma li 9 wa madoropa ya tinxaka leto tibidzri.

17 Ka lixaka dzra Benjamini va nyikiwe doropa dzra Gibiyoni ni mimbangu ya dzrone ya ku byisela ka yone mintlhambi, doropa dzra Geba ni mimbangu ya dzrone ya ku byisela ka yone mintlhambi, 18 doropa dzra Anatoti ni mimbangu ya dzrone ya ku byisela ka yone mintlhambi ni doropa dzra Almoni ni mimbangu ya dzrone ya ku byisela ka yone mintlhambi, a ma li mune wa madoropa.

19 Madoropa hinkwawu lawa ma nga nyikiwa vana va Aroni, lava a va li vaprista, a ma li 13 wa wone ni mimbangu ya wone ya ku byisela ka yone mintlhambi.

20 A mindangu leyin’wana hinkwayu ya Vakohati, ka Valevhi, yi yamukele madoropa ka lixaka dzra Efrayimi, hi ku tizrisa wuhlolotwana.* 21 Yi yamukele doropa dzra wutumbelo akuva lweyi a dlayaka mhunu a tsrutsrumela ka dzrone, ku nga doropa dzra Sikeme ni mimbangu ya dzrone ya ku byisela ka yone mintlhambi, a mugangeni wa tinhava wa Efrayimi; ku patsra ni doropa dzra Gezeri ni mimbangu ya dzrone ya ku byisela ka yone mintlhambi, 22 doropa dzra Kibizayimi ni mimbangu ya dzrone ya ku byisela ka yone mintlhambi ni doropa dzra Beti-horoni ni mimbangu ya dzrone ya ku byisela ka yone mintlhambi, a ma li mune wa madoropa.

23 Ka lixaka dzra Dani va nyikiwe doropa dzra Elteke ni mimbangu ya dzrone ya ku byisela ka yone mintlhambi, doropa dzra Gibetoni ni mimbangu ya dzrone ya ku byisela ka yone mintlhambi, 24 doropa dzra Ayaloni ni mimbangu ya dzrone ya ku byisela ka yone mintlhambi ni doropa dzra Gati-rimoni ni mimbangu ya dzrone ya ku byisela ka yone mintlhambi, a ma li mune wa madoropa.

25 Nakone ka hamfu ya lixaka dzra Manasi va nyikiwe doropa dzra Tanaki ni mimbangu ya dzrone ya ku byisela ka yone mintlhambi ni doropa dzra Gati-rimoni ni mimbangu ya dzrone ya ku byisela ka yone mintlhambi, a ma li madoropa mabidzri.

26 A mindangu leyin’wana hinkwayu ya Vakohati yi nyikiwe 10 wa madoropa ni mimbangu ya wone ya ku byisela ka yone mintlhambi.

27 A Vagerixoni va mindangu ya Valevhi, va nyikiwe a doropa dzra wutumbelo ka hamfu ya lixaka dzra Manasi akuva lweyi a dlayaka mhunu a tsrutsrumela ka dzrone, ku nga doropa dzra Golani a Baxani ni mimbangu ya dzrone ya ku byisela ka yone mintlhambi, va va nyike ni doropa dzra Behextera ni mimbangu ya dzrone ya ku byisela ka yone mintlhambi, a ma li madoropa mabidzri.

28 Ka lixaka dzra Yisakari va nyikiwe doropa dzra Kixiyoni ni mimbangu ya dzrone ya ku byisela ka yone mintlhambi, doropa dzra Daberati ni mimbangu ya dzrone ya ku byisela ka yone mintlhambi, 29 doropa dzra Yarmuti ni mimbangu ya dzrone ya ku byisela ka yone mintlhambi ni doropa dzra Eni-ganimi ni mimbangu ya dzrone ya ku byisela ka yone mintlhambi, a ma li mune wa madoropa.

30 Ka lixaka dzra Axere va nyikiwe doropa dzra Mixali ni mimbangu ya dzrone ya ku byisela ka yone mintlhambi, doropa dzra Abidoni ni mimbangu ya dzrone ya ku byisela ka yone mintlhambi, 31 doropa dzra Helkati ni mimbangu ya dzrone ya ku byisela ka yone mintlhambi ni doropa dzra Rehobe ni mimbangu ya dzrone ya ku byisela ka yone mintlhambi, a ma li mune wa madoropa.

32 Ka lixaka dzra Naftali va nyikiwe doropa dzra wutumbelo akuva lweyi a dlayaka mhunu a tsrutsrumela ka dzrone, ku nga doropa dzra Kedexi a Galileya ni mimbangu ya dzrone ya ku byisela ka yone mintlhambi; ku patsra ni doropa dzra Hamoti-dori ni mimbangu ya dzrone ya ku byisela ka yone mintlhambi ni doropa dzra Karitani ni mimbangu ya dzrone ya ku byisela ka yone mintlhambi, a ma li madoropa mazrazru.

33 A madoropa hinkwawu lawa Vagerixoni va nyikiwiki wone, hi ku ya hi mindangu yavu, a ma li 13 wa wone ni mimbangu ya wone ya ku byisela ka yone mintlhambi.

34 A mindangu ya Vamerari, ku nga Valevhi lavan’wana hinkwavu, va nyikiwe ka lixaka dzra Zebuloni a doropa dzra Yokineyamu ni mimbangu ya dzrone ya ku byisela ka yone mintlhambi, doropa dzra Karita ni mimbangu ya dzrone ya ku byisela ka yone mintlhambi, 35 doropa dzra Dimina ni mimbangu ya dzrone ya ku byisela ka yone mintlhambi ni doropa dzra Nahalali ni mimbangu ya dzrone ya ku byisela ka yone mintlhambi, a ma li mune wa madoropa.

36 Ka lixaka dzra Rubeni va nyikiwe doropa dzra Bezeri ni mimbangu ya dzrone ya ku byisela ka yone mintlhambi, doropa dzra Yahazi ni mimbangu ya dzrone ya ku byisela ka yone mintlhambi, 37 doropa dzra Kademoti ni mimbangu ya dzrone ya ku byisela ka yone mintlhambi ni doropa dzra Mefati ni mimbangu ya dzrone ya ku byisela ka yone mintlhambi, a ma li mune wa madoropa.

38 Ka lixaka dzra Gadi va nyikiwe doropa dzra wutumbelo akuva lweyi a dlayaka mhunu a tsrutsrumela ka dzrone, ku nga doropa dzra Ramoti a Giliyadi ni mimbangu ya dzrone ya ku byisela ka yone mintlhambi; ku patsra ni doropa dzra Mahanayimi ni mimbangu ya dzrone ya ku byisela ka yone mintlhambi, 39 doropa dzra Hexiboni ni mimbangu ya dzrone ya ku byisela ka yone mintlhambi ni doropa dzra Yazeri ni mimbangu ya dzrone ya ku byisela ka yone mintlhambi, hinkwawu a ma li mune wa madoropa.

40 A madoropa hinkwawu lawa a Valevhi lavan’wana hinkwavu, ku nga Vamerari, va nyikiwiki wone hi ku ya hi mindangu yavu, a ma li 12 wa wone.

41 A madoropa hinkwawu lawa Valevhi va nyikiwiki wone ka mbangu wa Vaisrayele a ma li 48 wa wone, kun’we ni mimbangu ya wone ya ku byisela ka yone mintlhambi. 42 Doropa ha dzrin’we a dzri ni mimbangu ya dzrone ya ku byisela ka yone mintlhambi a matlhelweni ya dzrone, a madoropa hinkwawu a ma tsrhamisise xileswo.

43 Hi ndlela leyo, Yehovha a nyike Israyele tiko hinkwadzru ledzri a a hlambanye ku dzri nyika vakokwana vavu, kutani va dzri teka va sungula ku tsrhama ka dzrone. 44 Handle ka leswo, Yehovha a va nyike ku wisa ka valala vavu hinkwavu hi lani a hlambanyeliki vakokwana vavu ha kone, a nga kone ni mun’we ka valala vavu hinkwavu lweyi a tiyiki ku lwa na vone a va a va hlula, Yehovha a nyikele valala vavu hinkwavu a mavokweni yavu. 45 Ka swidumbiso hinkwaswu leswinene leswi Yehovha a a swi hambele yindlu ya Israyele, a xi kone ni xin’we lexi kalaka xi nga hetisekanga;* hinkwaswu swi hetisekile.

22 Kutani Yoxuwa a vitana lixaka dzra Rubeni, dzra Gadi ni hamfu ya lixaka dzra Manasi, 2 a va byela a ku: “Mi yentxe hinkwaswu leswi Moxe nandzra wa Yehovha a mi leletiki swone, nakone mi yingisete zritu dzranga ka hinkwaswu leswi ni mi leletiki swone. 3 Ka nkama lowu hinkwawu a mi va tsrhikanga vamakwenu ku ta ta tlhasa namunhla nakone mi landzre nawu wa Yehovha Xikwembu Nkulukumba wenu. 4 Swoswi Yehovha Xikwembu Nkulukumba wenu a nyike vamakwenu ku wisa, hi lani a va dumbisiki ha kone. Xileswo, mi nga tlhelela a matendeni yenu, a tikweni ledzri Moxe nandzra wa Yehovha a mi nyikiki dzrone akuva dzri va dzrenu, ka tlhelo ledzrin’wana* dzra Yordani. 5 Kambe yingisetisisani ha hombe swileleto ni nawu lowu Moxe, nandzra wa Yehovha, a mi nyikiki wone, hi ku zrandzra Yehovha Xikwembu Nkulukumba wenu, mi famba tindleleni take hinkwatu, mi bekisa swileleto swake, mi mu namazrela ni ku mu tizrela hi timbilu tenu hinkwatu ni hi wutomi* byenu hinkwabyu.”

6 Hiloko Yoxuwa a va tovokisa a gama a va tsrhika va famba, kutani va tlhelela a matendeni yavu. 7 A hamfu ya lixaka dzra Manasi, Moxe a a yi nyike pfindla a Baxani, kasi a hamfu leyin’wana Yoxuwa a yi nyike tiko a mpeladambu wa Yordani, kun’we ni vamakwavu. Nakone loko Yoxuwa a va tsrhike va tlhelela matendeni yavu, a va tovokisile, 8 a va byela a ku: “Tlhelelani a matendeni yenu na mi ni wupfundzri bya byinyingi ni mintlhambi ya yinyingi ngopfu swinene ni prata, woru, kobri, nsimbi ni mpahla ya yinyingi ngopfu swinene. Yavelanani ni vamakwenu leswi mi swi phangiki ka valala venu.”

9 Ntsrhaku ka leswo, a Varubeni, a Vagadi ni hamfu ya lixaka dzra Manasi va siye Vaisrayele lavan’wana a Xilo, a tikweni dzra Kanana, va tlhelela a tikweni dzra Giliyadi, ku nga tiko ledzri va nyikiwiki dzrone akuva va dzri teka va tsrhama ka dzrone, hi ku landzra xileleto xa Yehovha lexi a xi nyikeliki hi ku tizrisa Moxe. 10 Loko va tlhase a mugangeni wa Yordani a tikweni dzra Kanana, a Varubeni, a Vagadi ni hamfu ya lixaka dzra Manasi, va yake a altari a tlhelweni ka Yordani, altari dzra dzrikulu dzri tlhela dzri hlamalisa. 11 A Vaisrayele lavan’wana va game va twa leswi: “Lavisani! A Varubeni, a Vagadi ni hamfu ya lixaka dzra Manasi va yake a altari a ndzrelekanwini wa tiko dzra Kanana, a mugangeni wa Yordani, ka tlhelo ledzri lumbaka Vaisrayele.” 12 Loko Vaisrayele va twe leswo, nhlengeletanu hinkwayu ya Israyele yi hlengeletane a Xilo akuva yi ya lwa yimpi na vone.

13 Kutani a Vaisrayele va zrumela Feniyasi n’wana wa muprista Eliyazari ka Varubeni, ka Vagadi ni ka hamfu ya lixaka dzra Manasi a tikweni dzra Giliyadi, 14 va mu zrumele na a ni 10 wa vazrangeli, muzrangeli ha mun’we a a li wa ndangu ha wun’we wa tinxaka hinkwatu ta Israyele, na ha mun’we kwavu a li nhloko ya ndangu a xikazri ka magidigidi ya Israyele. 15 Loko va tlhase ka Varubeni, ka Vagadi ni ka hamfu ya lixaka dzra Manasi, a tikweni dzra Giliyadi, va va byele va ku:

16 “Nhlengeletanu hinkwayu ya Yehovha yi li: ‘Ha yini mi nga dumbekanga ka Xikwembu Nkulukumba wa Israyele hi ku yentxa leswi? Mi tsrhike ku landzra Yehovha hi ku tiyakela a altari, mi va mi pfukela Yehovha. 17 A xihoxo lexi hi xi yentxiki a Peyori a xi hi dzringananga? Ku ta tlhasa namunhla a hi si na tibasisa ka xone, nambileswi nhlengeletanu hinkwayu ya Yehovha yi weliwiki hi ntungu. 18 Kutani mi djula ku tsrhika ku landzra Yehovha? Loko mi pfukela Yehovha a ta gama a hlundzrukela nhlengeletanu hinkwayu ya Israyele. 19 Swoswi, loko a li leswaku a tiko ledzri mi dzri yamukeliki akuva dzri va dzrenu a dzri basanga, tlulelani mi ya ka tlhelo ledzrin’wana, ka tiko ledzri lumbaka Yehovha, lani ku nga ni tabernakela dzra Yehovha, mi ya tsrhama makazri kwezru, kambe mi nga pfukeli Yehovha nakone mi nga hi yentxi vapfukeli hi ku tiyakela altari, handle ka altari dzra Yehovha Xikwembu Nkulukumba wezru. 20 Loko Akani n’wana Zara a nga dumbekanga mayelanu ni mintxhumu leyi a yi fanela ku helisiwa,* nhlengeletanu hinkwayu ya Israyele a yi hlundzrukeliwanga? Nakone a hi yene wuswake lweyi a fiki hi kola ka xihoxo xake.’”

21 Kutani Varubeni, Vagadi ni hamfu ya lixaka dzra Manasi va hlamula tinhloko ta mindangu ta magidigidi ya Israyele va ku: 22 “Yehovha, Xikwembu Nkulukumba wa swikwembu! Yehovha, Xikwembu Nkulukumba wa swikwembu! Awa swi tiva, Israyele na yene a ta swi tiva. Loko hi ve vapfukeli nakone hi nga dumbekanga ka Yehovha, a nga hi tsretsreleli hi siku ledzri. 23 Loko hi tiyakele altari akuva hi tsrhika ku landzra Yehovha ni kuva hi hamba ka dzrone magandzrelo ya ku hisiwa, magandzrelo ya tinhleke ni magandzrelo ya ku kombela ku zrula, Yehovha a ta hi khatisa hi kola ka leswo. 24 Ku hambana ni leswo, hi dzri hambe hi ku txhava leswaku a nkameni lowu taka a vanenu va nga byela vanezru va ku: ‘I wuxaka muni lebyi mi nga na byone na Yehovha Xikwembu Nkulukumba wa Israyele? 25 Yehovha a beke Yordani swanga ndzrelekanu a xikazri kwezru na n’wine, n’wine Varubeni ni Vagadi. A mi na xiyenge a wugandzrelwini bya Yehovha.’ Kutani vanenu va ta sivela vanezru ku gandzrela* Yehovha.”

26 “Xileswo hi te: ‘A hi yakeni altari, ku nga li dzra kuva hi ta nyikela ka dzrone magandzrelo ya ku hisiwa, nambi ku li magandzrelo man’wana, 27 kambe akuva dzri va wumboni a xikazri kwezru na n’wine, ni le xikazri ka vatukulu vezru ni vatukulu venu, bya leswaku hi ta tizrela Yehovha a mahlweni kwake hi magandzrelo yezru ya ku hisiwa, magandzrelo yezru ya ku kombela ku zrula ni magandzrelo man’wana, akuva a nkameni lowu taka a vanenu va nga byeli vanezru va ku: “N’wine a mi na xiyenge a wugandzrelwini bya Yehovha.”’ 28 Hi kola ka leswo hi te: ‘Loko a nkameni lowu taka va txhuka va hi byela leswo, hine ni vatukulu vezru, hi ta ku: “Vonani altari ledzri fanaka ni dzra Yehovha ledzri hambiwiki hi vakokwana vezru, na ku nga li akuva ku hambeliwa ka dzrone magandzrelo ya ku hisiwa nambi ku li magandzrelo man’wana, kambe akuva dzri va wumboni a xikazri kwezru na n’wine.”’ 29 A hi nge ti txhuka hi pfukela Yehovha, nambi kuva swoswi hi tsrhika ku landzrela Yehovha hi ku yaka altari akuva hi hamba magandzrelo ya ku hisiwa, magandzrelo ya tindzroho ni magandzrelo man’wana, handle ka altari dzra Yehovha Xikwembu Nkulukumba wezru, ledzri nga mahlweni ka tabernakela dzrake!”

30 Loko muprista Feniyasi, vakulukumba va nhlengeletanu ni tinhloko ta mindangu ta magidigidi ya Israyele lava a va li na yene va twe mazritu lama hlayiwiki hi vatukulu va Rubeni, va Gadi ni va Manasi, va nyonxa. 31 Xileswo Feniyasi n’wana wa muprista Eliyazari, a byela vatukulu va Rubeni, va Gadi ni va Manasi a ku: “Namunhla ha swi tiva leswaku Yehovha a le xikazri kwezru, hikusa n’wine a mi mu pfukelanga Yehovha. Mi huluxe Vaisrayele a mavokweni ya Yehovha.”

32 Kutani a vakulukumba na Feniyasi n’wana wa muprista Eliyazari va tsrhika Varubeni ni Vagadi a tikweni dzra Giliyadi, va tlhelela a tikweni dzra Kanana va ya dzrungulela Vaisrayele lavan’wana mhaka leyi. 33 A Vaisrayele va nyonxa hi madzrungula lawo. Kutani Vaisrayele va dzrumisa Xikwembu Nkulukumba, nakone a va ha tlhelanga va vulavula hi ku ya lwa yimpi ni Varubeni ni Vagadi akuva va helisa tiko ledzri a va tsrhama ka dzrone.

34 Hiloko Varubeni ni Vagadi va txhula altari vito,* hikusa va te: “A altari ledzri i wumboni makazri kwezru, bya leswaku Yehovha i Xikwembu Nkulukumba wa ntiyiso.”

23 Ntsrhaku ka nkama wa ku leha na Yehovha a wisise Vaisrayele ka valala vavu lava a va li matlhelweni kwavu, loko Yoxuwa kutani a duhwalile, 2 Yoxuwa a vitana Vaisrayele hinkwavu, vakulukumba, vazrangeli, vayavanyisi ni valaviseli, a va byela a ku: “Kutani ni duhwalile. 3 Nakone mi swi vonile ha wuswenu hinkwaswu leswi Yehovha, Xikwembu Nkulukumba wenu, a swi yentxiki matiko lawa hinkwawu hi kola kwenu, hikusa ku ve Yehovha, Xikwembu Nkulukumba wenu, lweyi a mi lweliki. 4 Lavisani, ni hlongole vhanu lava a va tsrhama ka tlhelo dzra le mpeladambu ku sukela a Yordani ku ya tlhasa Lwandle Ledzrikulu,* nakone ni mi yavele tiko ledzro hi ku tizrisa wuhlolotwana,* vhanu van’wana va ha tama va tsrhama tikweni, kambe a tiko dzra mi lumba. 5 Ku ve Yehovha, Xikwembu Nkulukumba wenu, lweyi a va hlongoliki a mahlweni kwenu; a va hlongole hi kola kwenu nakone n’wine mi teke tiko dzravu hi lani Yehovha, Xikwembu Nkulukumba wenu, a mi dumbisiki ha kone.

6 “Swoswi vanani ni xixixi lexikulu akuva mi yingiseta ni ku yentxa hinkwaswu leswi tsraliwiki a bukwini dzra Nawu wa Moxe, hi ku va mi nga txhuki mi hambuka ka wone mi ya xineneni kumbe mi ya ximatsrini, 7 hi ku va mi nga txhuki mi tipatsra ni vhanu lava saliki makazri kwenu. Mi nga hlayi nambi ku li mavito ya swikwembu swavu nambi ku hlambanya ha swone nakone mi nga txhuki mi swi tizrela nambi ku swi khinsamela. 8 Kambe womelelani* ka Yehovha, Xikwembu Nkulukumba wenu, hi lani mi yentxiki ha kone ku ta tlhasa namunhla. 9 Hikusa Yehovha a ta hlongola matiko lamakulu ni ya ntamu a mahlweni kwenu; ku ta tlhasa namunhla a nga kone ni mun’we lweyi a lwiki na n’wine a va a mi hlula. 10 Mhunu mun’we kwenu a ta hlongolisa 1.000 wa vhanu, hikusa Yehovha, Xikwembu Nkulukumba wenu, awa mi lwela, hi lani a mi dumbisiki ha kone. 11 Xileswo minkama hinkwayu tivonelani* hi ku va mi nga tsrhiki ku zrandzra Yehovha, Xikwembu Nkulukumba wenu.

12 “Kambe loko mo hambuka mi va mi namazrela vhanu va matiko lava saliki makazri kwenu, nakone mi tekana* na vone mi va mi tipatsra na vone, na vone va tipatsra na n’wine, 13 tiyisekani leswaku Yehovha, Xikwembu Nkulukumba wenu, a nge he ti tama a mi hlongolela vhanu lavo, va ta va ntlhamu kwenu. Va ta va xisepu lexi mi kwapaka nhlanini nakone va ta va mitwa matihlweni yenu ku ya tlhasa loko mi nyamalalile ka tiko ledzri ledzrinene, ledzri Yehovha Xikwembu Nkulukumba wenu a mi nyikiki dzrone.

14 “Lavisani! Ni kusuhi ni ku fa, nakone n’wine mi swi tiva ha hombe hi timbilu tenu hinkwatu ni hi wutomi* byenu hinkwabyu leswaku a ku na zritu ni dzrin’we ledzri kalaka dzri nga hetisekanga ka swidumbiso hinkwaswu leswinene leswi Yehovha, Xikwembu Nkulukumba wenu, a mi dumbisiki swone. Hinkwaswu swi hetisekile akuva mi pfuneka. A ku na zritu ni dzrin’we ka swone ledzri kalaka dzri nga hetisekanga. 15 Kambe hi lani swi hetisekiki ha kone swidumbiso hinkwaswu leswinene leswi Yehovha, Xikwembu Nkulukumba wenu, a mi dumbisiki swone, hi lani ku fanaka Yehovha a ta mi tisela makhombo hinkwawu lawa a dumbisiki ku mi tisela wone, nakone a ta mi helisa a tikweni ledzri ledzrinene ledzri Yehovha, Xikwembu Nkulukumba wenu, a mi nyikiki dzrone. 16 Loko mi tlula xipfumelelanu lexi Yehovha, Xikwembu Nkulukumba wenu, a mi leletiki leswaku mi xi bekisa, ni loko mi ya tizrela swikwembu swin’wana mi va mi swi khinsamela, a mahlundzru ya Yehovha ma ta mi pfuzrela, nakone mi ta hantla mi helisiwa tikweni ledzrinene ledzri a mi nyikiki dzrone.”

24 Hiloko Yoxuwa a hlengeleta tinxaka hinkwatu ta Israyele a Sikeme nakone a vitana vakulukumba va Israyele, vazrangeli, vayavanyisi ni valaviseli, kutani va yima a mahlweni ka Xikwembu Nkulukumba wa ntiyiso. 2 Yoxuwa a byela vhanu hinkwavu a ku: “Yehovha Xikwembu Nkulukumba wa Israyele a li: ‘Vakokwana venu, ku patsra na Tera, papayi wa Abrahamu na Nakori, khale va tsrhame ka tlhelo ledzrin’wana dzra Nambu* nakone a va tizrela swikwembu swin’wana.

3 “‘Hi ku famba ka nkama, ni suse kokwana wenu Abrahamu ka tlhelo ledzrin’wana dzra nambu wa Ewufrata* ni va ni mu fambisa tikweni hinkwadzru dzra Kanana, nakone ni yandzrise vatukulu vake.* Ni mu nyike Izaki, 4 Izaki ni mu nyika Yakobe na Esawu. Ntsrhaku ka leswo ni nyike Esawu muganga wa tinhava wa Seyiri akuva wu va wake; nakone Yakobe ni vanake va fulamele va ya Egipta. 5 Hi ku famba ka nkama ni zrumele Moxe na Aroni, ni va ni ba Egipta hi makhombo; kutani ni mi humesa kone. 6 Loko ni humese vapapayi venu a Egipta mi va mi tlhasa a lwandle, a Vaegipta va hlongolise vapapayi venu na va ni tin’qolo ta yimpi ni vakhandzriyi va makavhalu, ku ya tlhasa a Lwandle dzra ku Pshwuka. 7 Kutani a vapapayi venu va sungule ku ni dzrilela, mine Yehovha, xileswo ni beke munyama a xikazri kwenu ni Vaegipta, nakone ni funekete Vaegipta hi mati ya lwandle, a matihlo yenu ma swi vonile leswi ni swi yentxiki Egipta. Ntsrhaku ka leswo mi tsrhame malembe manyingi a mananga.

8 “‘Ni game ni mi yisa a tikweni dzra Vaamori, lava a va tsrhama ka tlhelo ledzrin’wana* dzra Yordani, kutani vone va lwe na n’wine. Kambe ni va nyikele a mavokweni yenu akuva mi teka tiko dzravu, nakone ni va helisile a mahlweni kwenu. 9 Balaki, n’wana wa Zipori tlhelo hosi ya Mowabu, a ye lwa ni Vaisrayele. A vitane Balama n’wana wa Beyori akuva a mi zruka. 10 Kambe a ni swi djulanga ku yingiseta Balama. Xileswo, a mi tovokisile hi ku phindaphinda, nakone ni mi huluxile a mavokweni yake.

11 “‘Ntsrhaku ka leswo mi tsremakanye Yordani mi va mi tlhasa Yeriko, kutani a vazrangeli* va le Yeriko, Vaamori, Vaperezi, Vakanana, Vaheti, Vagirgaxi, Vahivi ni Vayebusi, va lwe na n’wine, kambe ni va nyikele a mavokweni yenu. 12 Ni va yentxe va hela ntamu* na mi nga si na tlhasa, leswo swi yentxe leswaku va mi tsrutsruma, hi lani a ni yentxe ha kone ka tihosi tibidzri ta Vaamori. A mi va hlulanga hi xipada xenu nambi ku li hi wugubu byenu. 13 Hi ndlela leyo ni mi nyike tiko ledzri mi kalaka mi nga dzri tizrelanga ni madoropa lawa mi kalaka mi nga ma yakanga, mi va mi tsrhama ka wone. Mi da mawuvha ni minhlwazri, leswi mi kalaka mi nga swi byalanga.’

14 “Xileswo, txhavani Yehovha mi va mi mu tizrela hi ku dumbeka ni hi ntiyiso; helisani a makazri kwenu a swikwembu leswi vakokwana venu va swi tizreliki ka tlhelo ledzrin’wana dzra Nambu* ni le Egipta, mi va mi tizrela Yehovha. 15 Loko mi swi vona na swi nga li swinene ku tizrela Yehovha, tihlawulelani namunhla leswaku mi ta tizrela mani, ku nga ha va swikwembu leswi vakokwana venu va swi tizreliki ka tlhelo ledzrin’wana dzra nambu wa Ewufrata, kumbe swikwembu swa Vaamori, lava mi tsrhamaka tikweni dzravu. Kambe loko ku li mine ni ndangu wanga, hi ta tizrela Yehovha.”

16 Hiloko a vhanu va ku: “A hi nge ti txhuka hi tsrhika Yehovha akuva hi ya tizrela swikwembu swin’wana. 17 Ku ve Yehovha Xikwembu Nkulukumba wezru lweyi a hi humesiki, hine ni vapapayi vezru a tikweni dzra Egipta, tiko dzra wukazrawa, nakone a yentxiki a mahlolana lamakulu a mahlweni kwezru, futsrhi a hi sizreleliki a ndleleni hinkwayu leyi hi fambiki ha yone ni le ka vhanu hinkwavu lava hi khalutiki hi le xikazri kwavu. 18 Yehovha a hlongole vhanu hinkwavu, ku patsra ni Vaamori, lava a va tsrhama tikweni ledzri, na hine hi nga si na tsrhama ka dzrone. Xileswo na hine hi ta tizrela Yehovha hikusa i Xikwembu Nkulukumba wezru.”

19 Kutani Yoxuwa a byela vhanu a ku: “A mi nge swi koti ku tizrela Yehovha, hikusa i Xikwembu Nkulukumba lweyi a xwengiki; i Xikwembu Nkulukumba lweyi a djulaka ku tinyiketela loku heleliki. A nge ti mi dzrivalela loko mi mu xandzrukela ni loko mi mu dohela. 20 Loko mi tsrhika Yehovha mi tizrela swikwembu swin’wana, a ta ndzruluka a lwisana na n’wine a va a mi helisa, nambileswi a mi yentxeliki leswinene.”

21 Kambe a vhanu va byela Yoxuwa va ku: “Im-him, hi ta tizrela Yehovha!” 22 Kutani Yoxuwa a byela vhanu a ku: “N’wine mi timboni ta leswaku mi tihlawulele ha wuswenu ku tizrela Yehovha.” Va hlamula va ku: “Ina, hi timboni!”

23 “Loko swi li tanu, susani swikwembu swin’wana leswi nga makazri kwenu, mi va mi tizrela Yehovha Xikwembu Nkulukumba wa Israyele hi timbilu tenu hinkwatu.” 24 A vhanu va byela Yoxuwa va ku: “Hi ta tizrela Yehovha Xikwembu Nkulukumba wezru, nakone hi ta yingiseta zritu dzrake!”

25 Xileswo hi siku ledzro Yoxuwa a yentxe ntwananu ni vhanu a va a va bekela nawu ni xileleto a Sikeme. 26 Kutani Yoxuwa a tsrala mazritu wolawo ka buku dzra Nawu wa Xikwembu Nkulukumba, ntsrhaku ka leswo a teka zribye dzra dzrikulu a dzri beka hansi ka nsinya wa wukulu lowu kumekaka kusuhi ni mbangu wa ku xwenga wa Yehovha.

27 Yoxuwa a ya mahlweni a byela vhanu hinkwavu a ku: “Lavisani! A zribye ledzri dzri ta va mboni yezru, hikusa dzri swi yingelile hinkwaswu leswi Yehovha a hi byeliki swone; loko mi yala Xikwembu Nkulukumba wenu, a zribye ledzri dzri ta va mboni leyi lwisanaka na n’wine.” 28 Ntsrhaku ka leswo Yoxuwa a byela vhanu leswaku va famba, mun’wana ni mun’wana a ya pfindleni dzrake.

29 Ntsrhaku ka nkama wa kukazri, Yoxuwa n’wana wa Nuni, nandzra wa Yehovha, a fa na a ni 110 wa malembe. 30 Kutani va mu lahla ka mbangu lowu wu nga pfindla dzrake a Timinati-sera, lani ku kumekaka a mugangeni wa tinhava wa Efrayimi, hi le n’walungu wa Nhava ya Gaxi. 31 A Vaisrayele va tame va tizrela Yehovha a masikwini hinkwawu ya Yoxuwa ni le masikwini hinkwawu ya vakulukumba lava tamiki va hanya ntsrhaku ka loko Yoxuwa a file, lava voniki hinkwaswu leswi Yehovha a swi yentxeliki Israyele.

32 A mazrambu ya Yosefa, lawa a Vaisrayele va buyiki na wone hi le Egipta, ma keleliwe a Sikeme ka mbangu lowu Yakobe a a wu xave ka vana va Hemori, papayi wa Sikeme, hi 100 wa makesita. Mbangu wolowo wu ve pfindla dzra vana va Yosefa.

33 Eliyazari n’wana wa Aroni, na yene a fa. Kutani va mu lahla ka ganga dzra n’wanake Feniyasi, ledzri a a nyikiwe dzrone a mugangeni wa tinhava wa Efrayimi.