NEHEMIYA

1 Mazritu ya Nehemiya* n’wana wa Hakaliya: Hi hweti ya Kijlewu,* hi lembe dzra wu 20 a ni le ndlwini ya wuhosi ya* le Xuxani.* 2 Hiloko ku tlhasa Hanani, mun’we wa vamakwezru na a ni vavanuna van’wana va le Yuda kutani ni va vutisa mayelanu ni Vayuda lava buyiki hi le wukazraweni ni hi mayelanu ni doropa dzra Yerusalema. 3 Va ni hlamula va ku: “Lava va nga hala xifundzrankulu* lava va buyiki hi le wukazraweni, va kumana ni swikazratu swa swikulu futsrhi va twelisa wusiwana. A makhumbi ya muru wa Yerusalema ma gilhitiwile nakone a swipfalu swi hisiwile.”

4 Loko ni twe mazritu lawo ni tsrhamise hansi ni sungula ku dzrila nakone ni hete masiku manyingi na ni le xidzrilweni. Ni titsrone swakuda ni va ni khongota ka Xikwembu Nkulukumba wa le matilweni. 5 Ni te: “We Yehovha, Xikwembu Nkulukumba wa matilo, u Xikwembu Nkulukumba lwenkulu ni lweyi a txhavisekaka, lweyi a bekisaka xipfumelelanu xake ni ku kombisa lizrandzru dzra ku dumbeka ka lava va mu zrandzraka ni ka lava va landzraka milawu yake, 6 na ku kombela, a matihlo yaku a ma ni langusi, ni tindleve taku a ti yingeli xikhongoto lexi mine nandzra waku ni xi hambaka mahlweni kwaku namunhla, ni khongota kwaku wusiku ni nhlikanhi mayelanu ni malandzra yaku, ku nga Vaisrayele, nakone ni hlaya swidoho leswi vhanu va Israyele va ku yentxeliki swone. Hi dohile, mine kun’we ni ndangu wa papayi wanga. 7 Nakunene hi ku khunguvanyisile hi ku va hi nga yingiseti milawu yaku, swileleto swaku ni swiboho swaku swa wuyavanyisi leswi u swi nyikiki nandzra waku Moxe.

8 “Na ku kombela, dzrimuka mazritu lawa u ma byeliki nandzra waku Moxe loko u te: ‘Loko mo kala mi nga dumbeki kwanga, ni ta mi hangalasa a matikweni man’wana. 9 Kambe loko mi tlhelela kwanga, mi yingiseta milawu yanga ni ku yi landzra, nambiloko vhanu vaku ve hangalaka ku ya tlhasa wugan’wini bya misava, na mi li kohala ni ta mi tlhanganisa ni va ni mi buyisa a mbangwini lowu ni wu hlawuliki akuva ku twalisiwa vito dzranga ka wone.’ 10 Vone i malandzra yaku ni vhanu vaku lava u va tizruliki hi ntamu waku lowukulu ni hi voko dzraku dzra ntamu. 11 We Yehovha na ku kombela, zreyela ndleve ka xikhongoto xanga, mine nandzra waku, ni ka swikhongoto swa malandzra yaku lawa ma nyonxisiwaka hi ku txhava vito dzraku, na ku kombela, yentxa leswaku a hosi yi ni komba ntwelawusiwana ni kuva yi pfumela leswi ni taka yi kombela swone namunhla.”

Hi nkama lowo a ku li mine lweyi a a txhelela hosi vhinyu.

2 Hi hweti ya Nisani, hi lembe dzra wu 20 dzra ku fuma ka Hosi Artaxerxi, ku bekiwe vhinyu a mahlweni kwake, kutani ni teke vhinyu ni dzri txhelela hosi hi lani a ni tolovela ku yentxa ha kone. Kambe a ni ngi ngi sama ni ya mahlweni kwake na ni xukuvalile. 2 Hi kola ka leswo a hosi yi ni vutisa yi ku: “Ha yini u xukuvalile nakasi a u vabyi? Leswo swi tikomba na a li ku vaviseka ka mbilu.” Hiloko ni khomiwa hi ntxhavu lowukulu.

3 Kutani ni hlamula hosi ni ku: “We hosi, hanya hi masiku, ni ta kala ni nga xukuvali ha yini, nakasi a doropa ledzri vakokwana vanga va nga lahliwa ka dzrone i zrumbi nakone a swipfalu swa dzrone swi hisiwile?” 4 A hosi yi ni vutisa yi ku: “U djula ku kombela yini?” Kolanu ni tekela ku khongota ka Xikwembu Nkulukumba wa le matilweni. 5 Kutani ni hlamula hosi ni ku: “Loko u swi zrandzra we hosi, nakone loko ni kume ku nyonxeliwa a mahlweni kwaku ni zrumele a Yuda, ku nga doropa ledzri vakokwana vanga va lahliwiki ka dzrone, akuva ni ya dzri pfuxeta.” 6 Hiloko hosi, na hosi ya xisati yi tsrhame tlhelweni ka yone, yi ni vutisa yi ku: “U ta heta nkama wa ku gama kwini na u yendzrile nakone u ta tlhela siku muni?” Xileswo ni yi byela swaku ni ta tlhela siku muni, kutani a hosi yi ni ntsrhunxa ni famba.

7 Hiloko ni byela hosi ni ku: “Loko u swi zrandzra we hosi, ni nyike mapapela lawa ni taka ya nyiketa vagovhernadori va muganga lowu nga ka Tlhelo dzra le Mpeladambu dzra Nambu wa Ewufrata, akuva va ni tsrhika ni khaluta hi ku zrula ni za ni ya tlhasa Yuda. 8 Ni papela dzrin’wana akuva ni ya nyiketa Azafi muzrindzri wa Nhova ya le Wuhosini, akuva a ni nyika timhandzri leswaku ni ya hamba ha tone mavhiga ya tinyangwa ta Khokholo dzra Tempele, ya mimuru ya doropa ni ya yindlu leyi ni taka tsrhama ka yone.” Xileswo a hosi yi ni nyika mapapela, swanga hi leswi Xikwembu Nkulukumba wanga lwenene a a ni pfuna.*

9 Hi wugamu ni ye tlhasa mugangeni lowu nga ka Tlhelo dzra le Mpeladambu dzra Nambu wa Ewufrata ni va ni nyika vagovhernadori mapapela ya hosi. A hosi a yi ni zrumele ni vazrangeli va masotxha ni vakhandzriyi va makavhalu. 10 Loko Sanibalati wa Muhoroni na Tobiya wa Muamoni lweyi a nga muzrangeli va tive leswo, va hlundzruke ngopfu hi ku tlhasa ka mhunu lweyi a a ta yentxela Vaisrayele ntxhumu lowunene.

11 Hi wugamu ni tlhase a Yerusalema ni va ni tsrhama kone ku dzringana masiku mazrazru. 12 Hiloko ni pfuka ni wusiku, mine ni vavanuna van’wanyana, kambe a ni byelanga mhunu leswi Xikwembu Nkulukumba a a swi beke mbilwini yanga akuva ni swi yentxa a Yerusalema, nakone a ni tekanga xihazri xin’wana handle ka lexi a ni khwele ka xone. 13 Kutani ni huma ni wusiku hi Nyangwa wa le Nkoveni, ni khaluta hi le mahlweni ka Xihlovo xa Nyoka Leyikulu ni famba ni ya tlhasa ka Nyangwa wa Swidulu swa Nkuma. Ni kambisise makhumbi ya muru wa Yerusalema lawa a ma gilhitiwile, ni swipfalu swa wone leswi a swi hisiwile. 14 Ni tama ni famba ni ya tlhasa ka Nyangwa wa Xihlovo ni lani ku Hlayisiwaka kone Mati ya Hosi,* kambe a mbangu a wu li wutsrongo akuva a xihazri lexi a ni khwele ka xone xi khaluta. 15 Nambitanu, ni tame ni famba hi le nkoveni* wusiku byolebyo na ni kambisisa makhumbi ya muru. Ntsrhaku ka leswo ni nghena hi Nyangwa wa le Nkoveni ni va ni tlhelela lomu a ni li kone.

16 A vapfunisi va govhernadori a va swi tivanga leswaku a ni ye kwini ni leswi a ni hamba swone, hikusa a ni nga si na va byela ntxhumu Vayuda nambi vaprista, vhanu va xiyimu xa le henhla, vapfunisi va govhernadori nambi ku li vatizri lavan’wana. 17 Hi wugamu, ni va byela ni ku: “Ma swi vona leswaku hi le ka xiyimu xa ku kazrata ngopfu swinene, a makhumbi ya muru wa Yerusalema ma gilhitiwile nakone a swipfalu swa wone swi hisiwile. Buyani, a hi pfuxeteni muru wa Yerusalema, akuva hi huma tinganeni leti.” 18 Hiloko ni va byela ndlela leyi Xikwembu Nkulukumba wanga a ni pfuniki ha yone ni leswi hosi yi ni byeliki swone. Loko va twa leswo va ku: “Hi nga ha tekeni nkama, a hi vheleni hi sungula ku wu pfuxeta!” Xileswo va kutxana akuva va yentxa ntizro lowu lowunene.

19 Loko Sanibalati wa Muhoroni, Tobiya wa Muamoni lweyi a nga muzrangeli, na Gexemu wa Muarabiya va tive mhaka leyo, va sungule ku hi hleka ni ku hi poyila va ku: “Mi yentxa yini? Mo pfukela hosi?” 20 Kambe ni va hlamula ni ku: “Xikwembu Nkulukumba wa le matilweni hi Yene a taka yentxa leswaku swi famba ha hombe, nakone hine malandzra yake hi ta sungula ku pfuxeta; kambe n’wine a mi nge ti patsreka hikusa a mi na mfanelo nambi ku li xiyenge a Yerusalema.”

3 A muprista lwenkulu Eliyaxibi ni vamakwavu, ku nga vaprista, va sungule ku pfuxeta a Nyangwa wa Tihamba. Va wu xwengisile va va va wu bekela swipfalu; va xwengise ni xiyenge lexi sukelaka ka Xihondzro xa Meya ku ya ka Xihondzro xa Hananiya. 2 A vavanuna va le Yeriko va pfuxete xiyenge lexi landzreliki; nakone Zakuri n’wana wa Imiri a sunguleli kolanu a pfuxeta xiyenge lexi a xi landzrela.

3 A vana va Hasenaya va pfuxete a Nyangwa wa Tihlampfi; va wu yake hi timhandzri va gama va bekela swipfalu ni swa ku khiya ha swone. 4 Meremoti n’wana wa Uriya, n’wana wa Hakozi, a lunghise xiyenge lexi landzreliki, Mixulamu n’wana wa Berekiya, n’wana wa Mixezabele, a lunghise xiyenge lexi landzreliki, Sadoki n’wana wa Bana, a lunghise xiyenge lexi landzreliki. 5 Nakone a Vatekowa va lunghise xiyenge lexi landzreliki, kambe a vavanuna lava a va ni ndhuma a va pfumelanga ku titsrongahata akuva va tizra na va kongomisiwa hi vavanuna lava a va lavisela ntizro.

6 Yoyada n’wana wa Paseya na Mixulamu n’wana wa Besodeya, va lunghise a Nyangwa wa Doropa dzra Khale; va wu bekele timhandzri ni swipfalu ni swa ku khiya ha swone. 7 Melatiya lweyi wa Mugibiyoni na Yadoni lweyi wa Mumeronoti, vavanuna va le Gibiyoni ni va le Mizpa, lava a va li hansi ka wulawuli bya* govhernadori wa muganga lowu nga ka Tlhelo dzra le Mpeladambu dzra Nambu wa Ewufrata, va lunghise xiyenge lexi landzreliki. 8 Uziyele mun’we wa lava tizraka hi woru, n’wana wa Haraya, a lunghise xiyenge lexi landzreliki; Hananiya, mun’we wa vahambi va mafuzra ya ku nun’hwela, a lunghise xiyenge lexi landzreliki nakone va beketele mazribye a hansi a Yerusalema ku ya tlhasa ka Muru wa ku Yanama. 9 Refaya n’wana wa Huru, muzrangeli wa hamfu ya xifundzra xa Yerusalema, a lunghise xiyenge lexi landzreliki. 10 Yedaya n’wana wa Harumafi, a lunghise xiyenge lexi landzreliki lexi a xi li mahlweni ka kaya kwake; nakone Hatuxi n’wana wa Haxabineya a lunghise xiyenge lexi landzreliki.

11 Malikiya n’wana wa Harimi na Haxubi n’wana wa Pahati-mowabi, va lunghise xiyenge xin’wana xa muru ni xihondzro xa switiko swa ku hamba mapawu. 12 Nakone Xalumu n’wana wa Halohexi muzrangeli wa hamfu ya xifundzra xa Yerusalema, kun’we ni vanake va xisati, va lunghise xiyenge lexi landzreliki.

13 Hanuni ni lava va tsrhamaka a Zanowa va lunghise Nyangwa wa le Nkoveni, va wu pfuxetile, va bekela swipfalu ni swa ku khiya ha swone nakone va lunghise 450 wa mametru ya muru ku ya tlhasa ka Nyangwa wa Swidulu swa Nkuma. 14 Malikiya n’wana wa Rekabi, muzrangeli wa xifundzra xa Beti-hakeremi, a lunghise Nyangwa wa Swidulu swa Nkuma, a wu pfuxetile a bekela swipfalu ni swa ku khiya ha swone.

15 Xaluni n’wana wa Kolihoze muzrangeli wa xifundzra xa Mizpa, a lunghise Nyangwa wa Xihlovo; a pfuxete nyangwa ni lwangu, a bekela swipfalu ni swa ku khiya ha swone, a lunghise muru wa lomu ku Hlayisiwaka kone Mati ya Musele kusuhi ni Jaradi dzra Hosi ku ya tlhasa ka swikada leswi swi fulamelaka na swi sukela ka doropa dzra Davhida.

16 Nehemiya n’wana wa Azibuki, muzrangeli wa hamfu ya xifundzra xa Beti-zuri, a lunghise xiyenge lexi landzreliki, ku sukela a mahlweni ka Masizra ya Davhida a kongoma mbangwini lowu hambeliwiki ku hlayisa mati ku ya tlhasa ka Yindlu ya Tinhenha.

17 A Valevhi va lunghise xiyenge lexi landzreliki na va kongomisiwa hi Rekhumu n’wana wa Bani; Haxabiya, muzrangeli wa hamfu ya xifundzra xa Keila, a lunghise xiyenge lexi landzreliki na a yimela xifundzra xake. 18 Nakone a Valevhi lavan’wana va lunghise xiyenge lexi landzreliki na va kongomisiwa ha Bawayi n’wana wa Henadadi, muzrangeli wa hamfu ya xifundzra xa Keila.

19 Ezeri n’wana wa Yexuwa muzrangeli wa Mizpa, a lunghise xiyenge lexi landzreliki a mahlweni ka ganga ledzri yaka lani ku bekiwaka kone matlhazri, kusuhi ni lani ku nga ni xa ku seketela muru wa doropa.

20 Baruki n’wana wa Zabayi, a tizre hi ku hiseka a lunghisa xiyenge lexi landzreliki, ku sukela lani ku nga ni Xa Ku Seketela Muru wa doropa ku ya tlhasa a nyangweni wa yindlu ya Eliyaxibi muprista lwenkulu.

21 Meremoti n’wana wa Uriya, n’wana wa Hakozi, a lunghise xiyenge lexi landzreliki ku sukela a nyangweni wa yindlu ya Eliyaxibi ku ya tlhasa a wugan’wini bya yindlu ya Eliyaxibi.

22 A vaprista va le xifundzreni xa Yordani* va lunghise xiyenge lexi landzreliki. 23 Benjamini na Haxubi va lunghise xiyenge lexi landzreliki lexi a xi le mahlweni ka yindlu yavu. Azariya n’wana wa Mahaseya, n’wana wa Ananeya a lunghise xiyenge lexi landzreliki lexi a xi li kusuhi ni kaya kwake. 24 Binuyi n’wana wa Henadadi a lunghise xiyenge lexi landzreliki, ku sukela a kaya ka Azariya a kongoma lani ku nga ni Xa Ku Seketela Muru a famba ku ya tlhasa ka khona dzra muru.

25 Palali n’wana wa Uzayi a lunghise xiyenge lexi landzreliki lexi nga kusuhi ni Xa Ku Seketela Muru a mahlweni ka xihondzro lexi sukelaka ka Yindlu ya Hosi leyi nga henhla, leyi kumekaka ka Mbangu wa Vazrindzri. Pedaya n’wana wa Paroxi a lunghise xiyenge lexi landzreliki.

26 A malandzra ya le tempeleni lawa a ma tsrhama a Ofeli ma lunghise ku ya tlhasa kusuhi ni Nyangwa wa Mati ka tlhelo dzra le wuxeni ni le ka xihondzro lexi nga humela ka muru.

27 A Vatekowa va lunghise xiyenge lexi landzreliki ku sukela a kusuhi ni xihondzro lexikulu lexi humeliki ka muru ku ya tlhasa ka muru wa le Ofeli.

28 A vaprista va lunghise xiyenge xa le henhla xa Nyangwa wa Makavhalu, mun’wana ni mun’wana a mahlweni ka kaya kwake.

29 Sadoki n’wana wa Imeri a lunghise xiyenge lexi landzreliki lexi nga mahlweni ka kaya kwake.

Xemaya n’wana wa Xekaniya tlhelo muzrindzri wa Nyangwa wa tlhelo dzra le Wuxeni a lunghise xiyenge lexi landzreliki.

30 Hananiya n’wana wa Xelemiya, na Hanuni n’wana wa wu 6 wa Zalafi, va lunghise xiyenge lexi landzreliki.

Mixulamu n’wana wa Berekiya a lunghise xiyenge lexi landzreliki lexi nga mahlweni ka kaya kwake.

31 Malikiya lweyi a a tizra hi woru a lunghise xiyenge lexi landzreliki ku ya tlhasa ka yindlu ya malandzra ya le tempeleni* ni ya vaxavisi, leyi kumekaka kusuhi ni Nyangwa wa ku Kambela ni ku ya tlhasa ka sala ledzri kumekaka a henhla ka khona dzra muru.

32 Nakone lava tizraka hi woru ni vaxavisi, va lunghise xiyenge lexi sukelaka ka sala ledzri kumekaka hi le henhla ka khona dzra muru ku ya tlhasa ka Nyangwa wa Tihamba.

4 Loko Sanibalati a yingele leswaku a hi le ku pfuxeteni ka muru, a hlundzruke ngopfu swinene a va a sungula ku poyila Vayuda. 2 Kutani a hlaya leswi na a li mahlweni ka vamakwavu ni le ka khandzra dzra Samariya a ku: “Va yentxa yini van’wambuyangwana lava va Vayuda, va pimisa leswaku va ta wu yentxa wuswavu ntizro luwani? Xana va ta nyikela magandzrelo? Xana va ta heta ku yaka hi siku dzrin’we ntsena? Va ta tizrisa mazribye lawa ma pshwiki lawa ma nga tinhulwini?”

3 Tobiya lweyi wa Muamoni a a li tlhelweni kwake, futsrhi a te: “Nambi Buwana loko dzro khwela ka muru lowu va wu yakaka dzri nga swi kota ku wu wisa.”

4 Ni khongote ni ku: “We Xikwembu Nkulukumba wezru, ni kombela u va yingela, hikusa ha dzreliwa, yentxa leswaku a swipoyilo swavu swi tlhela ha vone, ingiki va nga tekiwa hi valala vavu va yisiwa wukazraweni a tikweni dzrin’wana. 5 U nga xi bakanyi xihoxo xavu nambi ku tsrhika xidoho xavu xi timeka a mahlweni kwaku, hikusa va zruke vayaki.”

6 Kutani hi ye mahlweni hi yaka muru, hi pfaletele mimbangu hinkwayu leyi a yi gilhitiwile kambe a wu nga si gama ku ya henhla, nakone vhanu va ye mahlweni va tizra hi ku hiseka.

7 Loko Sanibalati, Tobiya, Vaarabiya, Vaamoni ni Vaaxidodi va tive leswaku a muru wa Yerusalema a wu ya mahlweni wu yakiwa ni leswaku a mimbangu leyi a yi gilhitiwile a yi ya mahlweni yi pfaleteliwa, va kwate ngopfu swinene. 8 Hinkwavu va luke makungu ya ku ta lwa ni Yerusalema ni ku vanga mpfilumpfilu. 9 Kambe hi khongote ka Xikwembu Nkulukumba wezru hi va hi beka vazrindzri akuva va hi sizrelela kwavu, wusiku ni nhlikanhi.

10 Nambitanu van’we ka vhanu va le Yuda a va ku: “A vatizri* va kazrale ngopfu swinene nakone ku ni tinhulu tinyingi ta mazribye, a hi nge ti txhuka hi swi kota ku pfuxeta muru.”

11 Nakone a valala vezru a va ku: “A hi va djumeni, hi nghena makazri kwavu na va nga hi voni, hi va dlaya hi va hi yimisa ntizro wa ku yaka.”

12 Makhambi hinkwawu lawa a Vayuda lava a va tsrhama kusuhi navu a va nghena doropeni, a va hi byela va ku: “Va ta hi hlasela hi matlhelo hinkwawu.”

13 Kutani ni beki vazrindzri kusuhi ni muru, ka mimbangu ya le hansi leyi a yi nga sizrelelekanga, ni va yave hi mindangu na va hlome hi swipada, matlhazri ni wugubu. 14 Loko ni xiye leswaku va txhava, ni tekele ku famba ni vhanu va xiyimu xa le henhla, vapfunisi va govhernadori ni vhanu lavan’wana hinkwavu, ni ku: “Mi nga va txhavi, dzrimukani leswaku Yehovha i mukulu nakone awa txhaviseka; kutani lwelani vamakwenu, vanenu va xisati ni va xinuna, vasati venu ni miti yenu.”

15 Ntsrhaku ka loko valala vezru va tive leswaku hi ma gungulile maqhinga yavu, ni leswaku Xikwembu Nkulukumba wa ntiyiso a honetele makungu yavu, hinkwezru hi tlhele hi ya ku yakeni ka muru. 16 Ku sukela siku ledzro ku ya mahlweni, a hamfu ya vhanu vanga a yi tizra ku yakeni, kasi a hamfu leyin’wana a yi tizra swanga vazrindzri, na va ni matlhazri, switlhangu, wugubu ni mpahla ya ku hambiwa hi swinsimbana nakone a vazrangeli a va seketela* Vayuda hinkwavu 17 lava a va pfuxeta a muru. A vatizri a va tizra hi voko dzrin’we, kasi ledzrin’wana a va khoma tlhazri* ha dzrone. 18 Muyaki ha mun’we a a tizra na a ni xipada a nyongeni, nakone wanuna lweyi a a txhaya xipalapala a a kumeka tlhelweni kwanga.

19 Kutani ni byele vhanu va xiyimu xa le henhla, vapfunisi va govhernadori ni vhanu lavan’wana hinkwavu ni ku: “A ntizro i wukulu futsrhi i wunyingi nakone hi hangalake ni muru, hi kule na kule. 20 Loko mi twa ku txhayiwa ka xipalapala, tipatsrani na hine lomu hi taka va na hi li kone. Xikwembu Nkulukumba wezru a ta hi lwela.”

21 Xileswo hi tame hi tizra na hamfu leyin’wana yi tamele matlhazri ku sukela loko byi xa ku ya tlhasa loko ku huma tinyeleti. 22 Hi nkama wolowo ni byele vhanu ni ku: “Vavanuna hinkwavu ni vapfunisi vavu va nga suki Yerusalema, a wusikwini va ta tizra swanga vazrindzri kasi loko byi xile va ta tizra ka ku yaka.” 23 Hi kola ka leswo, mine, vamakwezru, vapfunisi vanga ni vazrindzri lava a va li na mine a hi nga txintxi mpahla, mun’wana ni mun’wana a a tsrhama na a ni tlhazri a vokweni dzrake dzra xinene.

5 Nambitanu a vavanuna ni vasati vavu va sungule ku dzrila hi kola ka vamakwavu, ku nga Vayuda. 2 Van’we a va ku: “Hine ni vanezru va xinuna ni va xisati hi vanyingi, hi vilela swakuda akuva hi da leswaku hi tama hi hanya.” 3 Van’wana a va ku: “Hi nyikela masimu yezru ya trigu ni ya mawuvha ni tiyindlu tezru swanga xitiyisekiso akuva hi kuma swakuda hi kola ka ku pfumaleka ka swakuda.” 4 Kasi van’wana a va ku: “Hi txeneke mali akuva hi hakela tinemba ta hosi, hi nyikela masimu yezru ya trigu ni ya mawuvha swanga xitiyisekiso. 5 Phela hine ni vamakwezru hi pswaliwe hi mhunu mun’we nakone a ku na ku hambana a xikazri ka vanezru ni vanavu, nambitanu, hi sindzriseka ku nyikela vanezru va xinuna ni va xisati swanga swikazrawa, futsrhi van’we ka vanezru va xisati kutani i swikazrawa. Nakone a hi nge yentxi ntxhumu akuva hi swi sivela leswo, hikusa a masimu yezru ya trigu ni ya mawuvha kutani ma lumba van’wana.”

6 Loko ni twe xidzrilo xavu ni mazritu lawa, ni hlundzruke ngopfu swinene. 7 Hiloko ni yanakanyisisa ha hombe hi mhaka leyi ni va ni sungula ku bulisana ni vhanu va xiyimu xa le henhla ni vapfunisi va govhernadori ni ku: “Hinkwenu mi koxa majuru ka* vamakwenu.”

Handle ka leswo, ni hambe ntlhanganu wa wukulu hi mhaka yavu. 8 Ni va byela ni ku: “Hi yentxe hinkwaswu leswi hi nga swi kota akuva hi huluxa vamakwezru, ku nga Vayuda lava a va xavisiwile ka matiko man’wana, kambe swoswi mi ta xavisa vamakwenu akuva hi tlhela hi va huluxa?” Loko va twe leswo va miyela, hi kuva va nga swi tivi leswaku va ta hlaya swa kuyini. 9 Hiloko ni ku: “Leswi mi swi yentxaka a hi swinene. Xana a mi nga fanelanga mi txhava Xikwembu Nkulukumba wezru akuva vhanu vamatiko, ku nga valala vezru, va nga hi poyili? 10 Na mine, vamakwezru ni vapfunisi vanga, hi va txeneke mali ni swakuda. Na kombela, a hi tsrhikeni ku va txeneka hi majuru. 11 Na kombela, va tlheliselani namunhla masimu yavu ya trigu, ya mawuvha, ya minhlwazri ni tiyindlu tavu ku patsra ni majuru ya* mali, swakuda, vhinyu ledzrimpshwa ni mafuzra, leswi mi va tekeliki swone.”

12 Xileswo va hlamula va ku: “Hi ta va tlhelisela mintxhumu yavu nakone a hi nge he ti va koxa ntxhumu. Hi ta yentxisa xileswi u hi byelisiki xiswone.” Kutani ni vitana vaprista ni va ni yentxa leswaku vavanuna lavayani va funga leswaku a va ta swi hetisisa leswi va swi dumbisiki. 13 Ntsrhaku ka leswo ni hlakahla mpahla yanga ni va ni ku: “Hi ndlela leyi fanaka, Xikwembu Nkulukumba a a va hlakahli a makaya kwavu ni le ka mintxhumu yavu, hinkwavu lava kalaka va nga landzri xidumbiso lexi, nakone hi ndlela leyi a va hlakahliwi va sala na va nge ha na ntxhumu.” Hiloko nhlengeletanu yi ku: “Amen!” Va dzrumisa Yehovha, kutani a vhanu va yentxa leswi va swi dumbisiki.

14 Handle ka leswo, ku sukela hi siku ledzri hosi yi ni bekiki leswaku ni va govhernadori wa le Yuda, ku sukela hi lembe dzra wu 20 ku ya ka lembe dzra wu 32 dzra ku fuma ka hosi Artaxerxi, leswi liki, ku dzringana 12 wa malembe, mine ni vamakwezru a hi koxanga swakuda leswi hi mfanelo a swi nyikiwa govhernadori. 15 Kambe vagovhernadori lava viki kone na mine ni nga si va govhernadori, siku ni siku a va koxa vhanu 456 wa magrama* ya prata akuva va xava swakuda ni vhinyu. Nambi vapfunisi vavu a va xanisa vhanu. Kambe mine a ni zanga ni swi yentxa leswo hikusa a ni txhava Xikwembu Nkulukumba.

16 Handle ka leswo, ni patsreke ka ntizro wa ku yaka muru, nakone a hi xavanga masimu, a vapfunisi vanga hinkwavu a va li ku yakeni. 17 A ku ni 150 wa Vayuda ni vapfunisi va govhernadori lava a va da menzeni wanga, na ku nga hlayiwi vhanu va matiko lawa hi vundzramaniki na wone, lava a va ta akuva va ta hi vona. 18 Siku ni siku a va ni lulamisela homu yin’we, 6 wa tihamba leta ku nona ta kone ni tihuku, nakone ntsrhaku ka 10 wa masiku man’wana ni man’wana a hi ni mixaka hinkwayu ya vhinyu hi ntalu, nambitanu a ni koxanga leswi hi mfanelo a swi nyikiwa govhernadori, hikusa vhanu a va ni ntizro wa wunyingi. 19 U nga ni dzrivali nakone ni tovokisi, We Xikwembu Nkulukumba wanga, hi kola ka mintxhumu hinkwayu leyi ni yi yentxeliki vhanu lava.

6 Loko Sanibalati, Tobiya, Gexemu lweyi wa Muarabiya ni van’wana va valala vezru va byeliwe leswaku a ni pfuxete muru ni leswaku a ku pfaleteliwe mimbangu hinkwayu leyi a yi gilhitiwile (nambileswi a ni nge si na bekela swipfalu ka tinyangwa), 2 Sanibalati na Gexemu hi ku kahlula va ni zrumelele dzrungula ledzri: “Buya hi tlhangana ka xin’we xa swidoropana swa le nkoveni wa Ono.” Ku hlaya ntiyiso a va ni lukela makungu ya ku biha. 3 Lakakuva ni zrume vazrumiwa va ya va byela leswi: “Ni khomekile hi ntizro lowukulu wa ku yaka, a ni nge buyi. Ha yini ntizro wa ku yaka wu fanela ku tsremelisiwa akuva ni suka ni ta ta kumana na n’wine?” 4 Va ni zrumele dzrungula dzroledzro dzra dzrin’we ku dzringana mune wa makhambi kambe ka makhambi hinkwawu ni va nyike nhlamulo yoleyi ya yin’we.

5 Hiloko Sanibalati a ni zrumelela mupfunisi wake na a ni dzrungula dzroledzri dzra dzrin’we hi khambi dzra wuntlhanu, na a tamele papela ledzri pfuliwiki. 6 Ka dzrone a ku tsraliwe leswi: “Ku ni mavalivali ka vhanu va matiko ya leswaku wene ni Vayuda mi kunguhata ku pfukela hosi, nakone Gexemu na yene awa yi tiyisekisa mhaka leyi. Hi leswo swi yentxaka mi pfuxeta muru, nakone hi lani swi hlayiwaka ha kone wene u tava hosi yavu. 7 Handle ka leswo u beke vaprofeta akuva va huwelela a doropeni hinkwadzru dzra Yerusalema mayelanu na wene va ku: ‘Ku ni hosi a Yuda!’ Phela mhaka leyi yi ta tlhasisiwa ka hosi. Xileswo tana akuva hi ta bula mayelanu ni mhaka leyi.”

8 Kutani ni mu zrumelele nhlamulo ni ku: “Leswi u swi hlayaka a swi zanga swi yentxeka; hinkwaswu leswo wo swi luka.”* 9 Hikusa hinkwavu a va zama ku hi txhavisela, a va ku: “Va ta hela ntamu,* nakone a va nge ti heta ku yaka.” Xileswo we Xikwembu Nkulukumba wanga ni tiyisi.

10 Hiloko ni ya kaya ka Xemaya, n’wana wa Delaya, n’wana wa Mehetabela, hi nkama lowu a a nga humahumi kaya. A ni byele leswi: “A hi beki nkama akuva hi tlhangana a ndlwini ka Xikwembu Nkulukumba wa ntiyiso, a ndzreni ka tempele, hi pfala swipfalu swa tempele, hikusa va ta ta ku dlaya. Va ta ta ni wusiku akuva va ku dlaya.” 11 Ni mu hlamula ni ku: “Xana mhunu wa nge hi mine a fanela ku tsrutsruma? Xana mhunu wa nge hi mine a nga nghena tempeleni a va a tama a hanya? A ni nge ti nghena!” 12 Kutani ni xiye leswaku a a nga zrumeliwanga ha Xikwembu Nkulukumba, kambe a a xaviwe hi Tobiya na Sanibalati akuva a profeta mintxhumu leyi ya ku biha mayelanu na mine. 13 A va mu xave akuva a ni txhavisela ni ku ni yentxa ni doha, xileswo a va ta va ni xa ku txhimisa vito dzranga ha xone ni ku ni danisa.

14 We Xikwembu Nkulukumba wanga, dzrimuka Tobiya na Sanibalati ni leswi va swi yentxiki, dzrimuka na Nowadiya muprofeta wa xisati ni vaprofeta lavan’wana, lava hi makhambi ya ku siyanasiyana va zamiki ku ni txhavisela.

15 A muru wu hetiwe hi 52 wa masiku, hi siku dzra wu 25 ka hweti ya Eluli.*

16 Loko valala vezru va tive leswo ni matiko hinkwawu lawa hi vundzramaniki na wone ma vone leswo, va daniseke ngopfu swinene nakone va pfumelile leswaku ntizro lowu wu hambiwe hi ku pfuniwa ha Xikwembu Nkulukumba. 17 A masikwini wolawo, a vhanu va xiyimu xa le henhla va Yuda a va zrumela mapapela manyingi ka Tobiya, nakone Tobiya a a ma hlamula. 18 A vhanu vanyingi a Yuda a va hlambanye leswaku va ta dumbeka ka Tobiya, hikusa yene a a li mukon’wana wa Xekaniya, n’wana wa Araki nakone Yehohanani n’wana wa Tobiya a a teke n’wana wa xisati wa Mixulamu n’wana wa Berekiya. 19 Handle ka leswo minkama hinkwayu a va vulavula leswinene ha yene, nakone a va mu byela leswi ni swi hlayaka. Kutani Tobiya a a zrumela mapapela akuva a ni txhavisela.

7 Na ha ha ku heta ku yaka muru ni bekele swipfalu; ntsrhaku ka leswo a vazrindzri, vayimbeleli ni Valevhi va yaveliwi mintizro. 2 Hiloko ni beka makwezru Hanani kun’we na Hananiya muzrangeli wa Khokholo akuva va va vazrangeli a Yerusalema, hikusa Hanani a a li wanuna wa ku dumbeka ngopfu swinene nakone a a txhava Xikwembu Nkulukumba wa ntiyiso ku tlula lavan’wana hinkwavu. 3 Xileswo ni va byele ni ku: “A swipfalu swa Yerusalema a swi fanelanga swi pfuliwa ku ya tlhasa loko dambu dzri sungula ku hisa, futsrhi a vazrindzri va fanela ku swi pfala ni ku swi khiya loko va ha li ku tizreni nakone bekani lava tsrhamaka a Yerusalema akuva va tizra swanga vazrindzri, van’we ka mimbangu ya ku zrindzra ka yone kasi van’wana a mahlweni ka makaya kwavu.” 4 A doropa a dzri li dzrikulu nakone a ku hanya vhanu vatsrongo ka dzrone, futsrhi a tiyindlu ta kone a ti nga si pfuxetiwa.

5 Xileswo Xikwembu Nkulukumba wanga a beke mbilwini yanga kuva ni tlhanganisa vhanu va xiyimu xa le henhla, vapfunisi va govhernadori ni vhanu hinkwavu akuva va tsralisiwa hi ku ya hi mindangu yavu. Ni kume buku dzra tinxaka na dzri ni mavito ya vhanu va ku sungula lava buyiki hi le wukazraweni, nakone ka dzrone a ku tsraliwe leswi:

6 Lava i vhanu va le xifundzrankulu lava humiki a Babilona ntsrhaku ka loko Hosi Nebukadnetsara a yise Vayuda a wukazraweni, va tlhelele a Yerusalema ni le Yuda, mun’wana ni mun’wana a doropeni dzrake. 7 A vazrangeli vavu a ku li Zerubabele, Yexuwa, Nehemiya, Azariya, Rahamiya, Nahamani, Mordekayi, Bilixani, Misipereti, Bigivhayi, Nehumi na Bahana.

A nhlayu ya vhanu va Israyele a yi patsra: 8 2.172 wa vana va Paroxi; 9 372 wa vana va Xefatiya; 10 652 wa vana va Araki; 11 2.818 wa vana va Yexuwa na Yowabu, vana va Pahati-mowabi. 12 1.254 wa vana va Elamu; 13 845 wa vana va Zatu; 14 760 wa vana va Zakayi; 15 648 wa vana va Binuyi; 16 628 wa vana va Bebayi; 17 2.322 wa vana va Azigadi; 18 667 wa vana va Adonikamu; 19 2.067 wa vana va Bigivhayi; 20 655 wa vana va Adini; 21 98 wa vana va Atere lava nga vatukulu va Ezekiya; 22 328 wa vana va Haxumi; 23 324 wa vana va Bezayi; 24 112 wa vana va Harifi; 25 95 wa vana va Gibiyoni; 26 188 wa vavanuna va le Betlehema ni le Netofa; 27 128 wa vavanuna va le Anatoti; 28 42 wa vavanuna va le Beti-azmavheti; 29 743 wa vavanuna va le Kiriyati-yeyarimi, Khefira ni va le Beroti; 30 621 wa vavanuna va le Rama ni va le Geba; 31 122 wa vavanuna va le Mikimasi; 32 123 wa vavanuna va le Betele ni va le Ayi; 33 52 wa vavanuna va le Nebo lwemun’wana; 34 1.254 wa vana va Elamu lwemun’wana; 35 320 wa vana va Harimi; 36 345 wa vana va le Yeriko; 37 721 wa vana va Lodi, Hadidi na Ono; 38 ni 3.930 wa vana va le Senaya.

39 A nhlayu ya vaprista a ku li: 973 wa vana va Yedaya, va ndangu wa Yexuwa; 40 1.052 wa vana va Imeri; 41 1.247 wa vana va Paxahuru; 42 ni 1.017 wa vana va Harimi.

43 A nhlayu ya Valevhi a ku li 74 wa vana va Yexuwa, va ndangu wa Kadimiyele ka vana va Hodevha. 44 A nhlayu ya vayimbeleli a ku li 148 wa vana va Azafi. 45 A vazrindzri va tinyangwa a ku li: Vana va Xalumu, vana va Atere, vana va Talmoni, vana va Akube, vana va Hatita ni vana va Xobayi, hinkwavu a va li 138 wa vone.

46 A malandzra ya le tempeleni* a ku li: vana va Ziha, vana va Hasufa, vana va Tabawoti, 47 vana va Kerosi, vana va Siya, vana va Padoni, 48 vana va Lebana, vana va Hagaba, vana va Salmayi, 49 vana va Khanani, vana va Gideli, vana va Gakhari, 50 vana va Reyaya, vana va Rezini, vana va Nekoda, 51 vana va Gazamu, vana va Uza, vana va Paseya, 52 vana va Besayi, vana va Mewunimi, vana va Nefuxesimi, 53 vana va Bakibuki, vana va Hakufa, vana va Harihuri, 54 vana va Baziliti, vana va Mehida, vana va Harixa, 55 vana va Barikosi, vana va Sisera, vana va Tema, 56 vana va Neziya ni vana va Hatifa.

57 A vana va malandzra ya Solomoni a ku li: vana va Sotayi, vana va Sofereti, vana va Perida, 58 vana va Yahala, vana va Darkoni vana va Gideli, 59 vana va Xefatiya, vana va Hatili, vana va Pokhereti-hazebayimi ni vana va Amoni. 60 A malandzra hinkwawu ya le tempeleni* ni vana va malandzra ya Solomoni a va li 392 wa vone.

61 A nxaxamelo wa lava va tlhantukiki na va sukela a Tela-mela, a Tela-harixa, a Kerubi, a Adoni ni le Imeri, kambe va kalaka va nga swi kotanga ku tiyisekisa a lixaka dzravu ni lomu va humaka kone, ni leswaku a va li Vaisrayele kumbe im-him, hi lava: 62 Vana va Delaya, vana va Tobiya ni vana va Nekoda, a va li 642 wa vone. 63 Nakone ka vaprista a ku li vana va Habaya, vana va Hakozi ni vana va Barzilayi lweyi a tekiki nsati ka vana va Barzilayi lweyi wa Mugiliyadi nakone a txhuliwe vito dzra papayi wa nsati wake. 64 Hinkwavu lava va djuletele lomu a mavito ya tinxaka tavu a ma tsraliwe kone akuva va tiyisekisa leswaku i va lixaka dzrini, kambe a va kumanga ntxhumu, xileswo va tsrhikisiwe ku tizra swanga vaprista. 65 A govhernadori* a va byele leswaku loko ku nga si kumeka muprista wa kuva a vutisa Urimi ni Tumimi, a va fanelanga va da mintxhumu ya ku xwengisisa.

66 A nhlayu ya nhlengeletanu hinkwayu a yi li 42.360, 67 na ku nga kontiwi swikazrawa swa xinuna ni swa xisati leswi a swi dzringana 7.337 wa swone nakone a ku ni 245 wa vayimbeleli va xinuna ni va xisati. 68 A va ni 736 wa makavhalu, 245 wa mamulwa,* 69 435 wa makamela, ni 6.720 wa timbongolo.

70 Van’we ka tinhloko ta mindangu va hambe minyikelo ya ku tizrandzrela akuva va pfunisa ka ntizro wa ku yaka. A govhernadori a nyikele 1.000 wa madrakma ya woru,* 50 wa matijela ni 530 wa swiyambalu swa ku leha swa vaprista, a swi nyikele lani ku bekiwaka kone wukosi bya le tempeleni. 71 Van’we ka tinhloko ta mindangu va nyikele 20.000 wa madrakma ya woru ni 2.200 wa mamina ya prata,* lani ku bekisiwaka kone wukosi bya le tempeleni. 72 Nakone a vhanu lavan’wana hinkwavu va nyikele 20.000 wa madrakma ya woru, 2.000 wa mamina ya prata, ni 67 wa swiyambalu swa ku leha swa vaprista.

73 Hiloko vaprista, Valevhi, vazrindzri va tinyangwa, vayimbeleli, vhanu van’wana, malandzra ya le tempeleni kun’we ni Vaisrayele lavan’wana hinkwavu va tsrhama madoropeni yavu. Loko ku tlhase hweti ya wu 7 a Vaisrayele kutani a va tsrhama madoropeni yavu.

8 Hiloko vhanu hinkwavu va hlengeletana hi nkongometo wun’we a mbangwini lowu wu pfulekiki a mahlweni ka Nyangwa wa Mati, kutani va byela Ezra lweyi wa mukopiyari* leswaku a buyisa buku dzra Nawu wa Moxe lowu Yehovha a a wu nyike Vaisrayele. 2 Xileswo hi siku dzra ku sungula ka hweti ya wu 7, Ezra lweyi wa muprista a buyise buku dzra Nawu a nhlengeletanwini, leyi a yi vumbiwa hi vavanuna, vavasati ni hinkwavu lava a va ta twisisa leswi a swi hlayiwa. 3 Kutani a wu dondzre hi zritu ledzri tlakukiki a mbangwini lowu pfulekiki a mahlweni ka Nyangwa wa Mati, ku sukela a mixweni ku ya tlhasa nhlikanhini; a wu dondzrele vavanuna, vavasati ni hinkwavu lava a va ta kota ku wu twisisa, nakone a vhanu va yingisete ha hombe loko ku dondzriwa buku dzra Nawu. 4 Ezra lweyi wa mukopiyari* a a yime ka palku dzra mapulangu ledzri hambeliwiki ntlhanganu wolowo; ka tlhelo dzrake dzra xinene a ku yime Matitiya, Xema, Anaya, Uriya, Hilkiya na Mahaseya, kasi ka tlhelo dzrake dzra ximatsri a ku na Pedaya, Mixayele, Malikiya, Haxumi, Haxi-badana, Zakariya na Mixulamu.

5 Ezra a pfule buku na vhanu hinkwavu va mu vona, hikusa a a yime henhla ka palku. Loko a pfula buku, hinkwavu va sekeleka. 6 Hiloko Ezra a dzrumisa Yehovha, Xikwembu Nkulukumba wa ntiyiso, Lweyi a nga Mukulu, kutani vhanu hinkwavu va hlamula va ku, “Amen!* Amen!” va va va tlakuxa mavoko. Hiloko va khinsama a mahlweni ka Yehovha na wuso byavu byi lavise hansi. 7 Kutani Yexuwa, Bani, Xerebiya, Yamini, Akube, Xabetayi, Hodiya, Mahaseya, Kelita, Azariya, Yozabadi, Khanani na Pelaya, lava a va li Valevhi, a va tlhamuxela Nawu na vhanu hinkwavu va yimile. 8 Kutani va dondzra buku, ku nga Nawu wa Xikwembu Nkulukumba wa ntiyiso, hi zritu dzra ku tlakuka va wu tlhamuxela ha hombe ni ku wu yentxa wu twisiseka; hi ndlela leyo va pfuna vhanu ku twisisa leswi a swi dondzriwa.

9 Nehemiya lweyi hi nkama lowo a a li govhernadori,* na Ezra lweyi a a li muprista tlhelo mukopiyari ni Valevhi lava a va dondzrisa vhanu, va byela vhanu hinkwavu va ku: “A siku dzra namunhla dzri xwengile ka Yehovha, Xikwembu Nkulukumba wenu. Mi nga vavisekeni nakone mi nga dzrili.” Hikusa vhanu hinkwavu a vo dzrila hi ku twa mazritu ya Nawu. 10 Hiloko a va byela a ku: “Fambani mi ya da swakuda leswinene swa kone,* ni ku nwa swa ku tsrokotsra mi va mi zrumela swakuda ka lava va kalaka va nga lulamiselanga ntxhumu; hikusa a siku ledzri dzri xwengile ka Hosi yezru, mi nga kwati, hikusa a ku nyonxa ka Yehovha i ntamu wenu.” 11 A Valevhi a va miyetela vhanu hinkwavu va ku: “Mi nga dzrili! Hikusa siku ledzri dzri xwengile, mi nga kwati.” 12 Xileswo a vhanu hinkwavu va fambe va ya da ni ku nwa nakone va zrumele van’wana swakuda futsrhi a va nyonxe ngopfu, hikusa va ma twisisile mazritu lawa va byeliwiki wone.

13 Nakone hi siku dzra wubidzri a tinhloko ta mindangu ya vhanu hinkwavu, ku patsra ni vaprista ni Valevhi, va hlengeletanile va tsrandzrela Ezra lweyi wa mukopiyari akuva va ma twisisa ha hombe mazritu ya Nawu. 14 Kutani va kume leswaku ka Nawu lowu Yehovha a nga wu leleta Vaisrayele hi ku tizrisa Moxe, a ku tsraliwe leswaku a va fanela ku tsrhama ka mintsronga* hi nkama wa nkhuvu wa hweti ya wu 7, 15 ni leswaku va huwelela ni ku tivisa a madoropeni yavu hinkwawu ni le Yerusalema va ku: “Fambani migangeni ya tinhava mi va mi buya ni tinkambu ta minhlwazri, ta minsinya ya pinyu,* ya mirta, ya minkindzru, ni tinkambu ta minsinya yin’wana akuva mi hamba mintsronga hi lani swi tsraliwiki ha kone.”

16 Hiloko vhanu va famba va ya buya ni tinkambu akuva va tihambela mintsronga, mun’wana ni mun’wana a henhla ka lwangu dzra yindlu yake, a magqekeni ya makaya kwavu, a magqekeni ya yindlu ya Xikwembu Nkulukumba wa ntiyiso, a mbangwini lowu pfulekiki wa Nyangwa wa Mati ni le mbangwini lowu pfulekiki wa Nyangwa wa Efrayimi. 17 Hi ndlela leyo a nhlengeletanu hinkwayu leyi buyiki hi le wukazraweni yi hambe mintsronga yi va yi ya tsrhama ka yone. A Vaisrayele a va ngi ngi sama va tlangela nkhuvu lowo hi ndlela leyo, ku sukela a masikwini ya Yoxuwa n’wana wa Nuni ku ya tlhasa ka siku ledzriyani, lakakuva ku nyonxiwe ngopfu swinene. 18 Nakone a Nawu wa Xikwembu Nkulukumba wa ntiyiso wu dondzriwe masiku hinkwawu, ku sukela ka siku dzra ku sungula ku ya tlhasa ka siku dzra wugamu. Va tlangele nkhuvu wolowo ku dzringana 7 wa masiku, nakone ku ve ni nhlengeletanu ya ku hlawuleka hi siku dzra wu 8 hi lani Nawu a wu hlaya ha kone.

9 Hi siku dzra wu 24 ka hweti ya wu 7, a Vaisrayele va tlhanganile akuva va titsrona swakuda, na va yambale masaka nakone na va titxheletele misava. 2 Hiloko vhanu va lixaka dzra Israyele va tihambanisa ni vhanu hinkwavu va matiko, va sekeleka va yima va hlaya swidoho swavu ni swihoxo swa vapapayi vavu. 3 Va sekeleka va yima lani a va li kone, va dondzra buku dzra Nawu wa Yehovha Xikwembu Nkulukumba wavu hi zritu dzra ku tlakuka ku dzringana mawora mazrazru, nakone va hete mawora man’wana mazrazru na va hlaya swidoho swavu ni ku khinsama a mahlweni ka Yehovha Xikwembu Nkulukumba wavu.

4 Yexuwa, Bani, Kadimiyele, Xebaniya, Buni, Xerebiya, Bani na Khenani, va yime ka palku dzra ku tlakuka dzra Valevhi va va va huwelela ka Yehovha Xikwembu Nkulukumba wavu hi zritu dzra ku tlakuka. 5 Kutani Yexuwa, Kadimiyele, Bani, Haxabineya, Xerebiya, Hodiya, Xebaniya na Petahiya lava nga Valevhi, va ku: “Sekelekani mi dzrumisa Yehovha Xikwembu Nkulukumba wenu hi lani ku nga helikiki. We Xikwembu Nkulukumba wezru, a va dzrumisi vito dzraku ledzri phatimaka, ledzri faneliwaka hi swidzrumiso hinkwaswu, nakone dzri phatimaka ngopfu swinene ku tlula mazritu hinkwawu lawa vhanu va nga ma hlayaka.

6 “Hi wene ntsena u nga Yehovha. U hambe matilo, ina, matilo ya matilo ni hinkwaswu leswi nga ka wone,* misava ni hinkwaswu leswi nga ka yone, malwandle ni hinkwaswu leswi nga ka wone. U yentxa leswaku hinkwaswu swi tama swi hanya nakone hinkwaswu leswi nga matilweni swa* ku khinsamela. 7 Hi wene Yehovha Xikwembu Nkulukumba wa ntiyiso lweyi a hlawuliki Abramu u mu susa a Uri a doropeni dzra Vakaldeya, u va u mu nyika vito dzra ku Abrahamu. 8 U vone leswaku mbilu yake a yi dumbekile kwaku, hi kola ka leswo u hambe xipfumelelanu na yene akuva u nyika yene kun’we ni vatukulu vake* tiko dzra Vakanana, Vaheti, Vaamori, Vaperezi, Vayebusi ni dzra Vagirgaxi, nakone u hetisise swidumbiso swaku, hikusa u lulamile.

9 “U vone ku xaniseka ka vakokwana vezru a Egipta nakone u yingele xidzrilo xavu na va li Lwandle dzra ku Pshwuka. 10 Hiloko u hamba swihlamaliso ni mahlolana ku lwisana na Faro, malandzra yake hinkwawu ni vhanu hinkwavu va tiko dzrake, hikusa va xanise vhanu vaku. U yentxe leswaku vito dzraku dzri tiviwa nakone dzra ha tama dzri tiviwa ku ta tlhasa ni namunhla. 11 U yave Lwandle dzra ku Pshwuka mahlweni kwavu, u yentxa leswaku va tsremakanya Lwandle hi le ka misava leyi womiki, u txukumetele lava a va va hlongolisa a ndzreni ka mati ya ku yenta, ku fana ni zribye loko dzri txukumeteliwa ka lwandle ledzri kwatiki. 12 A nhlikanhini u va kongomise hi tlavi,* nakone a wusikwini u va kongomise hi ndzrilo* akuva u va vaningela ndlela leyi a va fanela ku famba ha yone. 13 U xike a nhaveni ya Sinayi nakone u vulavule na vone na u li matilweni, u va nyika milawu leyi lulamiki, milawu ya ntiyiso,* swiboho swa wuyavanyisi ni milawu leyinene. 14 U va dondzrise ku bekisa siku dzra Savata akuva dzri tama dzri va ledzri xwengiki nakone u va nyike swileleto ni milawu hi ku tizrisa nandzra waku Moxe. 15 Loko va twa ndlala u va nyike pawu dzra le matilweni, loko va twa tozra u va humesele mati hi le mazribyeni nakone u va byele leswaku va nghena va teka tiko ledzri u va hlambanyeliki* ku va nyika dzrone.

16 “Nambitanu, vakokwana vezru va tikulisile, va tiwomise tinhloko nakone a va swi yingisetanga swileleto swaku. 17 A va djulanga ku ku yingiseta nakone a va yi dzrimukanga mintizro ya ku hlamalisa leyi u va yentxeliki yone, kambe va titlanyalisile nakone va tibekele muzrangeli akuva va tlhelela wukazraweni a Egipta. Nambitanu, wene u Xikwembu Nkulukumba lweyi minkama hinkwayu a lulameliki ku dzrivalela, lweyi a nga ni wunene ni timpswalu, a hlwelaka ku hlundzruka* nakone a taliki lizrandzru dzra ku dumbeka,* xileswo a u va tsrhikanga. 18 Nambiloko va tihambele xithombe xa zrole va va va ku: ‘Lweyi i Xikwembu Nkulukumba waku, lweyi a ku humesiki a Egipta’, nakone va ku yeyisile hi mintizro yavu, 19 hi timpswalu taku letikulu a u va tsrhikanga a mananga, a tlavi ledzri a dzri va kongomisa a nhlikanhini a dzri sukanga kwavu, nambi ku li ndzrilo lowu a wusikwini a wu voninga ndlela leyi a va fanela ku famba ha yone. 20 U va nyike moya waku lowunene akuva u va tlhazrihisa, u va nyike mana, nakone u va nyike mati loko va twa tozra. 21 Ku dzringana 40 wa malembe u va nyike swakuda a mananga. A va nga pfumali ntxhumu. Mpahla yavu a yi handzrukelanga nakone a minkondzro yavu a yi pfimbanga.

22 “U va nyike mimfumu ni vhanu, u va yavela matiko ma va yavu, hi ndlela leyo va teke tiko dzra Sihoni, leswi liki, tiko dzra hosi ya Hexiboni, ni tiko dzra Ogi hosi ya Baxani. 23 U yentxe leswaku vanavu va va vanyingi ku fana ni tinyeleti ta matilo. Kutani u va yise tikweni ledzri u dumbisiki vakokwana vavu leswaku a va ta nghena ka dzrone va va va dzri teka. 24 Lakakuva va nghenile va teka tiko, nakone u helise Vakanana, ku nga vahanyi va tiko ledzriyani lava u va nyikeliki mavokweni yavu, tihosi tavu ni vhanu lava va tsrhama tikweni dzroledzro, akuva va yentxa ku zrandzra ha vone. 25 Va teke madoropa lawa ma nga ni mimuru leyi tiyisiwiki ni masimu lawa ma noniki, nakone va teke tiyindlu leti ti taliki hi mintxhumu hinkwayu leyinene, swihlovo leswi keliwiki, masimu ya mawuvha, masimu ya minhlwazri ni minsinya ya yinyingi leyi pswalaka mihandzru. Lakakuva va dile va xuzra, va kuluka ni ku tikholisa hi wunene byaku lebyikulu.

26 “Nambitanu, a va ku yingisetanga, va ku djikelile va va va fulazrela Nawu waku.* Va dlaye vaprofeta vaku lava a va va ba ndleve leswaku va tlhelela kwaku, nakone va ku yeyise ngopfu swinene. 27 Hi kola ka leswo u va nyikete a mavokweni ya valala vavu lava a va va xanisa, kambe loko va le ku xanisekeni a va ku dzrilela nakone wene a u va yingela na u li matilweni; kutani hi kola ka timpswalu taku letikulu a u va nyika vahuluxi akuva va va huluxa a mavokweni ya valala vavu.

28 “Nambitanu, loko va huluxiwile a va tlhela va ku yentxela mintxhumu ya ku biha, kutani wene a u va tsrhika mavokweni ya valala vavu lava a va va xanisa. Xileswo a va tlhela va ku dzrilela va kombela mpfunu, kutani wene a u va yingela ku sukela matilweni nakone a u va huluxa nkama wun’wana ni wun’wana hi kola ka timpswalu taku letikulu. 29 U va bi ndleve leswaku va tlhelela ka Nawu waku, kambe va tikulisile nakone a va swi djulanga ku yingiseta swileleto swaku; va dohile hi kuva va nga yi yingiseti milawu yaku leyi mhunu a taka hanya hi kola ka yone loko a yi landzra. Va hambe nkanu va ku fulazrela, va tiwomise tinhloko, nakone a va djulanga ku ku yingiseta. 30 U va lehisele mbilu ku dzringana malembe ya manyingi nakone u tame u va ba ndleve hi moya waku hi ku tizrisa vaprofeta, kambe a va swi djulanga ku ku yingiseta. Hi wugamu u va nyikete mavokweni ya vhanu va matiko lawa va vundzramaniki na wone. 31 Kutani hi kola ka timpswalu taku letikulu a u va helisanga nambi ku va tsrhika, hikusa u Xikwembu Nkulukumba lweyi a nga ni wunene ni timpswalu.

32 “Kutani swoswi, We Xikwembu Nkulukumba wezru, Xikwembu Nkulukumba Lwenkulu, lweyi a nga ni ntamu nakone a txhavisekaka, lweyi a bekisaka xipfumelelanu ni ku kombisa lizrandzru dzra ku dumbeka, u nga dzrivali swikazratu hinkwaswu leswi hine, tihosi tezru, vazrangeli vezru, vaprista vezru, vaprofeta vezru, vakokwana vezru ni vhanu vaku hinkwavu va kumaniki na swone ku sukela a masikwini ya tihosi ta a Asiriya ku ta tlhasa ni namunhla. 33 U ve lweyi a lulamiki ka hinkwaswu leswi swi hi yentxekeliki hikusa u dumbekile, kambe hi hine hi yentxiki leswi bihiki. 34 A tihosi tezru, vazrangeli vezru, vaprista vezru ni vakokwana vezru, a va wu yingisetanga Nawu waku nambi ku yingiseta swileleto swaku ni swidzrimuxo swaku leswi u va nyikiki swone. 35 Nambi nkama lowu a va li mfun’wini wavu na va tikholisa hi wunene lebyikulu lebyi u va kombiki byone ka tiko ledzrikulu ni ledzri noniki ledzri u va nyikiki dzrone, a va ku tizrelanga nambi ku tsrhika mintizro yavu ya ku biha. 36 Hi kola ka leswo, namunhla hi swikazrawa, ina hi swikazrawa a tikweni ledzri u dzri nyikiki vakokwana vezru akuva va da mihandzru ya dzrone ni mintxhumu ya dzrone leyinene. 37 A ntsrhovelo lowukulu wa tiko ledzri wu ya ka tihosi leti ti hi fumaka hi kola ka swidoho swezru. Va fuma hine ni swifuyu swezru hi lani va djulaka ha kone, nakone hi xaniseka ngopfu swinene.

38 “Xileswo hi kola ka hinkwaswu leswo, hi hamba xipfumelelanu xa ku hlawuleka lexi xe ke yentxa hi ku tsraliwa, lexi xi tiyisekisiwaka hi xilemo xa vazrangeli vezru, xa Valevhi vezru ni xa vaprista vezru.”

10 Lava tiyisekisiki xipfumelelanu hi ku beka xa ku funga ha xone, hi lava:

9 A Valevhi a ku li lava: Yexuwa n’wana wa Azaniya, Binuyi mun’we wa vana va Henadadi, Kadimiyele, 10 nakone vamakwavu hi lava: Xebaniya, Hodiya, Kelita, Pelaya, Khanani, 11 Mika, Beti-rehobe, Haxabiya, 12 Zakuri, Xerebiya, Xebaniya, 13 Hodiya, Bani na Beninu.

14 A tinhloko ta mindangu a ku li leti: Paroxi, Pahati-mowabi, Elamu, Zatu, Bani, 15 Buni, Azigadi, Bebayi, 16 Adoniya, Bigivhayi, Adini, 17 Atere, Ezekiya, Azuri, 18 Hodiya, Haxumi, Bezayi, 19 Harifi, Anatoti, Nebayi, 20 Magipiyaxi, Mixulamu, Heziri, 21 Mexezabele, Sadoki, Yaduwa, 22 Pelatiya, Khanani, Anaya, 23 Hoxeya, Hananiya, Haxubi, 24 Halohexi, Piliha, Xobeki, 25 Rekhumu, Haxabina, Mahaseya, 26 Ahiya, Khanani, Anane, 27 Maluki, Harimi na Bahana.

28 A vhanu lavan’wana, ku nga vaprista, Valevhi, vazrindzri va tinyangwa, vayimbeleli, malandzra ya le tempeleni* ni vhanu hinkwavu lava a va tihambanise ni vhanu va matiko lawa a va vundzramane na wone akuva va landzra Nawu wa Xikwembu Nkulukumba wa ntiyiso, ku patsra ni vasati vavu, vanavu va xinuna ni va xisati ni hinkwavu lava a va li ka ntanga ya ku twisisa hinkwaswu leswi a swi hlambanyiwa;* 29 hinkwavu va tipatsre ni vamakwavu, ku nga vavanuna va ndhuma, nakone va hlambanye leswaku a va weliwi hi makhombo loko va nga wu landzri Nawu wa Xikwembu Nkulukumba wa ntiyiso, lowu a va nyikiki hi ku tizrisa Moxe nandzra wa Xikwembu Nkulukumba wa ntiyiso, ni leswaku a va ta swi landzrelelisisa ha hombe a swileleto hinkwaswu swa Yehovha Hosi yezru, swiboho swake swa wuyavanyisi ni milawu yake. 30 A hi nge ti teka vanezru va xisati hi va nyika vhanu va matiko lawa hi vundzramaniki na wone nambi ku teka vanavu va xisati hi va nyika vanezru va xinuna.

31 Loko vhanu va matiko lawa hi vundzramaniki na wone va buya ni mintxhumu kun’we ni mixaka hinkwayu ya tinhleke akuva va ta hi xavisela hi Savata, a hi nga ti xava ntxhumu kwavu hi Masavata nambi hi masiku ya ku xwenga. Nakone a hi nga ti tsrhovela hi lembe dzra wu 7, futsrhi hi ta dzrivalela lava va hi devhaka.

32 Handle ka leswo, mun’wana ni mun’wana wezru a tibohele kuva lembe dzrin’wana ni dzrin’wana a nyikela mune wa magrama ya prata akuva swi pfunisa ka mintizro leyi yentxiwaka ndlwini ka Xikwembu Nkulukumba wezru, 33 leswaku dzri tizriseliwa ka mapawu, magandzrelo ya tinhleke ya siku ni siku, magandzrelo ya ku hisiwa ya masavata ya siku ni siku, ni ya ku huma ka n’weti, magandzrelo ya minkhuvu, magandzrelo ya mintxhumu ya ku xwenga, magandzrelo ya swidoho, magandzrelo ya ku kombele ku dzrivaleliwa ka Israyele ni mintizro hinkwayu leyi yentxiwaka ka yindlu ya Xikwembu Nkulukumba wezru.

34 Nakone hi hambe wuhlolotwana* akuva hi tiva leswaku i ntsrengo muni wa tihunyi lowu a ndangu wun’wana ni wun’wana wa vaprista, wa Valevhi ni wa vhanu lavan’wana wu fanelaka ku wu buyisa lembe ni lembe a ndlwini ka Xikwembu Nkulukumba wezru hi nkama lowu bekiwiki akuva ti hisiwa a altarini dzra Yehovha, Xikwembu Nkulukumba wezru, hi lani swi tsraliwiki ha kone ka Nawu. 35 Nakone lembe dzrin’wana ni dzrin’wana hi ta buyisa a mihandzru ya ku sungula ya ku wupfa ya tiko dzrezru ni mihandzru ya ku sungula ya ku wupfa ya minsinya ya mixaka hinkwayu, a ndlwini ka Yehovha. 36 Ku patsra ni vanezru va mativula va xinuna ni mativula ya swifuyu swezru kun’we ni mativula ya tihomu tezru ni ya tihamba tezru, hi lani swi tsraliwiki ha kone ka Nawu. Hi ta swi buyisa a ndlwini ka Xikwembu Nkulukumba wezru, ka vaprista lava tizraka ka yindlu ya Xikwembu Nkulukumba wezru. 37 Handle ka leswo hi ta buyisa a mpupu wa ku sungula, minyikelo yezru, mihandzru ya mixaka hinkwayu ya minsinya, vhinyu ledzrimpshwa ni mafuzra, hi swi nyika vaprista lani ku bekiwaka kone mintxhumu,* ka yindlu ya Xikwembu Nkulukumba wezru, ku patsra ni wukhume bya ntsrhovelo wa masimu yezru akuva hi byi nyika Valevhi, hikusa ka madoropa yezru hinkwawu lawa hi dzrimaka ka wone i Valevhi lava va yamukelaka wukhume bya leswi hi swi byalaka.

38 Nakone a muprista mun’we ka vana va Aroni, a fanela ku va ni Valevhi loko va yamukela swa wukhume; futsrhi ka swa wukhume swoleswo a Valevhi va fanela ku susa swa wukhume akuva va swi nyikela ka yindlu ya Xikwembu Nkulukumba wezru, ka mimbangu leyi ku bekiwaka ka yone mintxhumu.* 39 Hikusa a Vaisrayele ni vana va Valevhi va fanela ku ya beka a minyikelo ya tinhleke, vhinyu ledzrimpshwa ni mafuzra ka mimbangu leyi ku bekiwaka ka yone mintxhumu, nakone i ka mimbangu yoleyo ku nga ni swibya swa le tempeleni, vaprista lava nga ku tizreni, vazrindzri va tinyangwa ni vayimbeleli. A hi nge ti tsrhika ku hlayisa yindlu ya Xikwembu Nkulukumba wezru.

11 A vazrangeli va vhanu a va tsrhama a Yerusalema, nakone a vhanu lavan’wana va hambe mpshwampshwa* akuva wanuna mun’we ka 10 wa vone a ta ta tsrhama a Yerusalema, ku nga doropa dzra ku xwenga, kasi lavan’wana va 9 va sala ka madoropa man’wana. 2 Handle ka leswo, a vhanu va tovokise vavanuna lava tinyikeliki hi ku swi zrandzra akuva va ya tsrhama a Yerusalema.

3 A mavito ya vazrangeli va xifundzrankulu lava a va tsrhama a Yerusalema hi lawa: (A Vaisrayele lavan’wana, vaprista, Valevhi, malandzra ya le tempeleni ni vana va malandzra ya Solomoni, va tame va tsrhama ka madoropa laman’wana ya Yuda, mun’wana ni mun’wana a mbangwini wake a doropeni dzrake.

4 Handle ka leswo, vhanu van’wana va le Yuda ni va le Benjamini a va tsrhama a Yerusalema.) Ka vhanu va Yuda, a ku na Athaya n’wana wa Uziya, n’wana wa Zakariya, n’wana wa Amariya, n’wana wa Xefatiya, n’wana wa Mahalaleli, ka vana va Faresi, 5 na Mahaseya n’wana wa Baruki, n’wana wa Kolihoze, n’wana wa Hazaya, n’wana wa Adaya, n’wana wa Yoyaribi, n’wana wa Zakariya, lweyi papayi wake a a li wa le Sala. 6 A vana va Faresi lava a va tsrhama Yerusalema a va li 468 wa vone, hinkwavu a va li vavanuna va ntamu.

7 Ka vhanu va le Benjamini a ku na Salu n’wana wa Mixulamu, n’wana wa Yowedi, n’wana wa Pedaya, n’wana wa Kolaya, n’wana wa Mahaseya, n’wana wa Itiyele, n’wana wa Yexaya, 8 a ku na na Gabayi na Salayi, hinkwavu a va li 928 wa vone; 9 Yuwele n’wana wa Zikiri a a li mulaviseli wavu kasi Yuda n’wana wa Hasenuwa a a li mupfunisi wake ka ku lavisela Doropa.

10 Ka vaprista, a ku li Yedaya n’wana wa Yoyaribi, Yakhini, 11 Seraya n’wana wa Hilkiya, n’wana wa Mixulamu, n’wana wa Sadoki, n’wana wa Merayoti, n’wana wa Ahitubi muzrangeli wa yindlu ya* Xikwembu Nkulukumba wa ntiyiso, 12 ni vamakwavu lava a va hamba mintizro ya le tempeleni, hinkwavu a va li 822 wa vone; Adaya n’wana wa Yerohamu, n’wana wa Pelaliya n’wana wa Amitsi n’wana wa Zakariya, n’wana wa Paxahuru, n’wana wa Malikiya, 13 ni vamakwavu lava a va li vazrangeli va mindangu, hinkwavu a va li 242 wa vone; nakone Amaxayi, n’wana wa Azarele, n’wana wa Akhizayi, n’wana wa Mixilemoti, n’wana wa Imeri, 14 ni vamakwavu ku nga vavanuna va ntamu ni va xixixi, hinkwavu a va li 128 wa vone; nakone a mulaviseli wavu a a li Zabediyele, lweyi a a huma ka ndangu lowu a wu ni ndhuma.

15 Ka Valevhi, a ku li Xemaya n’wana wa Haxubi, n’wana wa Azirikamu, n’wana wa Haxabiya, n’wana wa Buni, 16 Xabetayi na Yozabadi tinhloko ta mindangu ta Valevhi, leti a ti lavisela mintizro leyi a yi yentxiwa a handle ka yindlu ya Xikwembu Nkulukumba wa ntiyiso; 17 Mataniya lweyi a a li mukongomisi wa vayimbeleli, lweyi a a zrangela ntlawa wa vayimbeleli hi nkama wa swikhongoto, n’wana wa Mika, n’wana wa Zabedi, n’wana wa Azafi, Bakibukiya lweyi a a li wa wubidzri ka vamakwavu na Abida n’wana wa Xamimuwa, n’wana wa Galali, n’wana wa Yedutuni. 18 A Valevhi hinkwavu lava a va li doropeni dzra ku xwenga a va li 284 wa vone.

19 A vazrindzri va tinyangwa, a ku li Akube, Talmoni ni vamakwavu, hinkwavu a va li 172 wa vone.

20 A Vaisrayele, vaprista ni Valevhi, va tsrhame ka madoropa laman’wana hinkwawu ya le Yuda, mun’wana ni mun’wana a mbangwini lowu a nyikiwiki wone. 21 A malandzra ya le tempeleni a ma tsrhama a Ofeli nakone Ziha na Gixipa a va li valaviseli va malandzra ya le tempeleni.

22 Lweyi a a lavisela Valevhi a Yerusalema a ku li Uzi n’wana wa Bani, n’wana wa Haxabiya, n’wana wa Mataniya, n’wana wa Mika, ka vana va Azafi lava a va li vayimbeleli, a a lavisela ntizro wa le ndlwini ka Xikwembu Nkulukumba wa ntiyiso. 23 A hosi a yi lelete leswaku a vayimbeleli siku ni siku va fanela ku nyikiwa leswi a va swi vilela. 24 Nakone Petahiya n’wana wa Mexezabele wa vana va Zera, n’wana wa Yuda, a a li mutlhavukanyisi wa hosi ka timhaka hinkwatu leti khumbaka vhanu.

25 Kasi mimbangu yin’wana ni masimu ya yone, van’we ka Vayuda va ye tsrhama a Kiriyati-arba ni swidoropana swa kone, Diboni ni swidoropana swa kone, Yekabizele ni swidoropana swa kone, 26 a Yexuwa, a Molada, a Beti-peleti, 27 a Hazari-xuwali, a Berxeba ni swidoropana swa kone. 28 a Ziklagi, a Mekona ni swidoropana swa kone, 29 a Eni-rimoni, a Zora, a Yarmuti, 30 a Zanowa, a Adulamu ni swidoropana swa kone, a Lakixi ni masimu ya kone ni le Azeka ni swidoropana swa kone; va yake ku sukela a Berxeba ku ya tlhasa a nkoveni wa Hinomu.

31 Kasi a vaka Benjamini, va yake a Geba, a Mikimaxi, a Ayi, a Betele ni swidoropana swa kone, 32 a Anatoti, a Nobe, a Ananeya, 33 a Hazori, a Rama, a Gitayimu, 34 a Hadidi, a Zeboyimi, a Nebalati, 35 a Lodi ni le Ono, ku nga nkova wa lava va tivaka ku hamba mintizro ya mavoko. 36 Nakone van’we ka Valevhi va le Yuda va yaveliwe ku ya tsrhama a Benjamini.

12 A vaprista ni Valevhi lava va buyiki na Zerubabele n’wana wa Salatiyele, na Yexuwa, hi lava: Seraya, Yeremiya, Ezra, 2 Amariya, Maluki, Hatuxi, 3 Xekaniya, Rekhumu, Meremoti, 4 Idido, Ginethoyi, Abiya, 5 Miyamini, Mahadiya, Bilga, 6 Xemaya, Yoyaribi, Yedaya, 7 Salu, Amoki, Hilkiya na Yedaya. Lava a va li vazrangeli va vaprista ni vamakwavu, a masikwini ya Yexuwa.

8 A Valevhi, a ku li Yexuwa, Binuyi, Kadimiyele, Xerebiya, Yuda na Mataniya, lweyi a a zrangela loko ku yimbeleliwa tinsimu ta ku khensa kun’we ni vamakwavu. 9 Vamakwavu, ku nga Bakibukiya na Uni, a va yima mahlweni kwavu na va tizra swanga vazrindzri.* 10 Yexuwa a ve papayi wa Yoyakimi, Yoyakimi a ve papayi wa Eliyaxibi, Eliyaxibi a ve papayi wa Yoyada, 11 Yoyada a ve papayi wa Yonathani nakone Yonathani a ve papayi wa Yaduwa.

12 Lava a va li vaprista ni tinhloko ta mindangu a masikwini ya Yoyakimi hi lava: Meraya, wa ndangu wa Seraya; Hananiya, wa ndangu wa Yeremiya; 13 Mixulamu, wa ndangu wa Ezra; Yehohanani, wa ndangu wa Amariya; 14 Yonathani, wa ndangu wa Malukhi; Yosefa, wa ndangu wa Xebaniya; 15 Adhina, wa ndangu wa Harimi; Helkayi, wa ndangu wa Merayoti; 16 Zakariya, wa ndangu wa Idido; Mixulamu, wa ndangu wa Ginethoni; 17 Zikiri, wa ndangu wa Abiya, . . . wa ndangu wa Miniyamini; Pilitayi, wa ndangu wa Mowadiya; 18 Xamimuwa, wa ndangu wa Bilga; Yehonathani, wa ndangu wa Xemaya, 19 Matenayi, wa ndangu wa Yoyaribi; Uzi, wa ndangu wa Yedaya; 20 Kalayi, wa ndangu wa Salayi; Ebere, wa ndangu wa Amoki; 21 Haxabiya, wa ndangu wa Hilkiya na Nethanele, wa ndangu wa Yedaya.

22 A tinhloko ta mindangu ta Valevhi ku patsra ni vaprista va tsralisiwe a masikwini ya Eliyaxibi, Yoyada, Yohanani, na Yaduwa, leswi liki, ku ya tlhasa a ku fumeni ka Dariyosi lweyi wa Mupersiya.

23 A mavito ya Valevhi lava a va li tinhloko ta mindangu, ma tsraliwe ka buku dzra matimu ku ya tlhasa a masikwini ya Yohanani n’wana wa Eliyaxibi. 24 A vazrangeli va Valevhi a ku li, Haxabiya, Xerebiya, na Yexuwa n’wana wa Kadimiyele nakone vamakwavu lava va nga vazrindzri a va yima mahlweni kwavu hi mintlawa akuva va dzrumisa ni ku khensa hi ku landzra minkongomiso ya Davhida mhunu wa Xikwembu Nkulukumba wa ntiyiso. 25 Mataniya, Bakibukiya, Obadiya, Mixulamu, Talmoni na Akube a va li vazrindzri, a va vonelela mimbangu ya ku beka ka yone mintxhumu, leyi a yi li kusuhi ni tinyangwa. 26 Vone va tizre a masikwini ya Yoyakimi n’wana wa Yexuwa, n’wana wa Yozadaki, ni le masikwini ya Nehemiya lweyi wa govhernadori ni le masikwini ya Ezra lweyi wa muprista tlhelo mukopiyari.*

27 A ku khanguliweni ka muru wa Yerusalema, ku djuleteliwe Valevhi va va buyisa a Yerusalema na va sukela ka mimbangu hinkwayu leyi a va tsrhama ka yone akuva va ta tlangela a ku khanguliwa ka muru hi ku nyonxa ni hi tinsimu ta ku khensa, hi matimbali,* switxhayatxhayana leswi swi nga ni tingoti ni maarpa. 28 nakone a vana va vayimbeleli* va tlhanganile na va ta hi le xifundzreni* ni le ka mimbangu hinkwayu leyi nga kusuhi ni Yerusalema ni le ka swidoropana swa Vanetofa, 29 a Beti-giligala, a masin’wini ya Geba, ni le Azmavheti, hikusa a vayimbeleli a va tiyakele swidoropana swavu a kusuhi ni Yerusalema. 30 Nakone a vaprista ni Valevhi va tibasisile va basisa ni vhanu, tinyangwa ni muru.

31 Hiloko ni byela vazrangeli va le Yuda leswaku va khwela ka muru; ni vumbe mintlawa yibidzri ya yikulu ya vayimbeleli ni mintlawa yibidzri ya vhanu akuva yi va landzrela he ntsrhaku, a ntlawa wun’we wu ye xineneni na wu famba hi le henhla ka muru wu kongoma ka Nyangwa wa Swidulu swa Nkuma. 32 Hoxaya ni hamfu ya vazrangeli va Yuda va wu landzra he ntsrhaku, 33 kun’we na Azariya, Ezra, Mixulamu, 34 Yuda, Benjamini, Xemaya na Yeremiya. 35 A va ni van’we ka vana va vaprista lava a va ni swipalapala, ku nga lava: Zakariya, n’wana wa Yonathani, n’wana wa Xemaya, n’wana wa Mataniya, n’wana wa Mikaya, n’wana wa Zakuri, n’wana wa Azafi, 36 ni vamakwavu ku nga Xemaya, Azarele, Milalayi, Gilalayi, Mahayi, Nethanele, Yuda na Hanani; a va tizrisa switxhayatxhayana swa Davhida mhunu wa Xikwembu Nkulukumba wa ntiyiso, nakone Ezra lweyi wa mukopiyari* a a li mahlweni kwavu. 37 Nkama lowu va nga tlhasa ka Nyangwa wa Xihlovo, va ye mahlweni va famba hi le henhla ka muru, va khaluta hi le henhla ka Swikada leswi fulamelaka swi ya Doropeni dzra Davhida, a henhla ka Yindlu ya Davhida, va ya mahlweni va ya tlhasa ka Nyangwa wa Mati, ka tlhelo dzra le wuxeni.

38 A ntlawa lowun’wana wa vayimbeleli, wu fambe hi tlhelo ledzrin’wana nakone mine ni wu landzre he ntsrhaku ni hamfu ya vhanu lavan’wana, wu tame wu famba he henhla ka muru wu khaluta he ka Xihondzro xa Switiko, wu ya tlhasa ka Muru Lowu Yanamiki, 39 wu khaluta hi le ka Nyangwa wa Efrayimi wu ya ka Nyangwa wa Doropa dzra Khale wu ya tlhasa ka Nyangwa wa Tihlampfi ka Xihondzro xa Hananeli, ka Xihondzro xa Meya ni le ka Nyangwa wa Tihamba wu ya yima ka Nyangwa wa Vazrindzri.

40 Hi wugamu, a mintlawa ha yibidzri ya vayimbeleli, yi ye yima mahlweni ka yindlu ya Xikwembu Nkulukumba wa ntiyiso, nakone mine ni hamfu ya vapfunisi va govhernadori a hi li na vone, 41 ni vaprista lava a va khome swipalapala ku nga Eliyakimi, Mahaseya, Miniyamini, Mikaya, Eliyohenayi, Zakariya na Hananiya, 42 kun’we na Mahaseya, Xemaya, Eliyazari, Uzi, Yehohanani, Malikiya, Elamu na Ezeri, nakone a vayimbeleli va yimbelele hi zritu dzra ku tlakuka na va kongomisiwa ha Izirakhi.

43 Hi siku ledzriyani va nyikele magandzrelo ya manyingi ngopfu swinene nakone a va nyonxile, hikusa Xikwembu Nkulukumba wa ntiyiso a va yentxe va nyonxa ngopfu swinene, a vavasati ni vatsrongwana na vone a va nyonxile; lakakuva a ku nyonxa ka vhanu va le Yerusalema a ku twala ni le kule.

44 Hi siku ledzriyani, ku hlawuliwe vhanu akuva va lavisela lani ku hlayisiwaka kone a swihanano, mihandzru ya ku sungula ni swa wukhume. A va fanela ku yamukela leswi a swi buyisiwa he masin’wini lawa a ma li kusuhi ni madoropa, swanga xiyenge lexi a xi koxiwa hi Nawu akuva swi nyikiwa vaprista ni Valevhi, hikusa a ku nyonxiwile a Yuda hi kola ka ntizro wa vaprista ni Valevhi. 45 Kutani va sungula ku hamba ntizro wa Xikwembu Nkulukumba ni ntizro wa ku basisa, nakone a vayimbeleli ni vazrindzri va tinyangwa va yentxe leswi fanaka hi ku landzra minkongomiso ya Davhida ni ya n’wanake Solomoni. 46 Hikusa khale swinene, a masikwini ya Davhida ni ya Azafi a ku ni vakongomisi va vayimbeleli* ni va tinsimu ta ku dzrumisa ni ta ku khensa Xikwembu Nkulukumba. 47 A masikwini ya Zerubabele ni le masikwini ya Nehemiya, a Vaisrayele hinkwavu a va nyika vayimbeleli ni vazrindzri va tinyangwa swakuda leswi a va swi vilela siku ni siku, a va tlhela va nyika Valevhi swakuda nakone a Valevhi a va susa xiyenge xa kukazri ka swakuda leswi a va swi yamukela va swi nyika vatukulu va Aroni.

13 Hi siku ledzro, a buku dzra Moxe dzri dondzriwe a mahlweni ka vhanu, nakone ka dzrone a ku tsraliwe leswaku a Vaamoni ni Vamowabu va nga txhuki va va xiyenge xa nhlengeletanu ya Xikwembu Nkulukumba wa ntiyiso, 2 hikusa a va va nyikanga Vaisrayele a pawu ni mati kambe a matsrhan’wini ya leswo, va xave Balama akuva a ya va zruka. Nambitanu, Xikwembu Nkulukumba wezru, a ndzrulute xizruku xolexo xi va tovoko. 3 Vo na ku yingela Nawu, a vhanu hinkwavu va matiko man’wana, va sungula ku titsravuxa a xikazri ka Vaisrayele.

4 Na leswo swi nga si na yentxeka, a muprista lweyi a a vonelela lani a ku bekiwa kone mintxhumu* ka yindlu ya* Xikwembu Nkulukumba wezru, a ku li Eliyaxibi xaka dzra Tobiya. 5 A a nyike Tobiya mbangu wa wukulu wa ku beka mintxhumu ka wone,* lani khale a ku bekiwa gandzrelo dzra tinhleke, olibanu, swibya, wukhume bya tinhleke, bya vhinyu ledzrimpshwa ni bya mafuzra leswi hi mfanelo a swi lumba Valevhi, vayimbeleli, vazrindzri va tinyangwa kun’we ni swihanano leswi a swi nyikiwa vaprista.

6 Ka nkama lowo hinkwawu a ni nga li kone a Yerusalema hikusa a ni tlhelele ka hosi hi lembe dzra wu 32 dzra ku fuma ka Artaxerxi Hosi ya Babilona; ntsrhaku ka nkamanyana ni kombele mpfumelelo ka hosi akuva ni sukanyana. 7 Kutani ni tlhase a Yerusalema ni vona wubihi byikulu lebyi Eliyaxibi a byi yentxiki, a a nyike Tobiya mbangu wa ku beka ka wone mintxhumu, a gqekeni dzra yindlu ya Xikwembu Nkulukumba wa ntiyiso. 8 Ni vaviseke ngopfu swinene hi leswi a swi yentxiki lakakuva ni txukumetele mintxhumu hinkwayu ya Tobiya a handle ka mbangu lowu ku bekiwaka ka wone mintxhumu. 9 Ntsrhaku ka leswo, ni lelete leswaku ku basisiwa mimbangu leyi ku bekiwaka ka yone mintxhumu ni va ni tlhelisa swibya swa yindlu ya Xikwembu Nkulukumba wa ntiyiso, gandzrelo dzra tinhleke ni olibanu.

10 Ni byeliwe ni leswaku a Valevhi a va nga ha nyikiwi swakuda, lakakuva a Valevhi ni vayimbeleli lava a va tizra a va fambile, mun’wana ni mun’wana a a tlhelele ka masimu yake. 11 Hiloko ni sungula ku kawuka vapfunisi va govhernadori ni ku: “Ha yini mi tsrhika ku hlayisa yindlu ya Xikwembu Nkulukumba wa ntiyiso?” Xileswo ni hlengelete Valevhi ni va ni tlhela ni va yavela mintizro yavu. 12 Kutani Vayuda hinkwavu va buyisa wukhume bya tinhleke, bya vhinyu ledzrimpshwa ni bya mafuzra a mimbangwini ya ku beka ka yone mintxhumu. 13 Hiloko ni beka Xelemiya lweyi wa muprista, Sadoki lweyi wa mukopiyari, na Pedaya mun’we wa Valevhi swanga va voneleli va mimbangu ya ku beka ka yone mintxhumu nakone ni beke Khanani, n’wana wa Zakuri, n’wana wa Mataniya swanga mupfunisi wavu hikusa a va li vavanuna lava dumbekaka. A va ni wutiyanguleli bya ku phakela vamakwavu swakuda.

14 Ni dzrimuke, We Xikwembu Nkulukumba wanga, nakone u nga dzrivali mintizro leyi ni yi yentxeliki yindlu yaku, ni lava va tizraka ka yone.

15 A masikwini wolawo, ni vone vhanu a Yuda na va hamba vhinyu* hi Savata, va hlengeleta tinhleke ta tinyingi va va va ti zrwalela hi timbongolo, va buyise vhinyu, mawuvha, makuwa ni mixaka hinkwayu ya mintsrhwalu a Yerusalema hi Savata. Ni va be ndleve hi khombo dzra ku xavisa mintxhumu hi siku ledzro. 16 Nakone a Vatiri lava a va tsrhama doropeni a va buyisa tihlampfi ni mintxhumu ya mixaka hinkwayu va va va yi xavisela vhanu va le Yuda, a Yerusalema hi Savata. 17 Hiloko ni kawuka vhanu va xiyimu xa le henhla va le Yuda ni ku: “Hi mhaka muni mi yentxa mintxhumu ya ku biha ya ku fana ni leyi, a mi swi voni leswaku mi ntxhimisa a siku dzra Savata? 18 Xana a hi swone leswi vakokwana venu va swi yentxiki, lakakuva Xikwembu Nkulukumba wezru a tisa khombo ledzri kwezru ni ka doropa ledzri? Hikusa swoswi mi yentxa leswaku Xikwembu Nkulukumba a ya a mu hlundzrukela ngopfu Israyele hi kuva mi ntxhimisa Savata.”

19 Loko dzri li kusuhi ni ku mphuma na Savata dzri nge si na tlhasa, ni lelete leswaku ku pfaliwa swipfalu swa doropa dzra Yerusalema nakone ni lelete leswaku swi nga pfuliwi ku ya tlhasa loko Savata dzri khalutile nakone ni beke van’we va vapfunisi vanga a swipfalwini akuva ku nga nghenisiwi mintsrhwalu hi siku dzra Savata. 20 Xileswo, a vaxavi ni vaxavisi va mintxhumu ya mixaka hinkwayu va yetlele handle ka Yerusalema khambi dzrin’we kumbe mabidzri. 21 Hiloko ni va kawuka ni ku: “Ha yini mi yetlela a mahlweni ka muru? Loko mo tlhela mi yentxa leswo, ni ta mi hlongola.” Ku sukela siku ledzro ku ya mahlweni, a va ha tlhelanga va ta hi Savata.

22 Nakone ni byele Valevhi leswaku va tibasisa nkama ni nkama ni ku ta ta zrindzra tinyangwa akuva a siku dzra Savata dzri tama dzri va ledzri xwengiki. Ni le mhakeni leyi, ni dzrimuke We Xikwembu Nkulukumba wanga, ni kombe timpswalu hi kuya hi lizrandzru dzraku ledzrikulu dzra ku dumbeka.

23 A masikwini wolawo ni vone ni Vayuda lava a va teke vavasati va Vaaxidodi, va Vaamoni ni va Vamowabu. 24 Hamfu ya vanavu a yi vulavula a Xiaxidodi kasi hamfu leyin’wana a yi vulavula tindzrimi ta matiko man’wana kambe ni mun’we wavu a a tiva ku vulavula lidzrimi dzra Vayuda. 25 Hiloko ni va kawuka ni ku va zruka, van’wana ni va ba ni va tsruvula ni misisi ni va ni va hlambanyisa hi vito dzra Xikwembu Nkulukumba, ni ku: “A mi fanelanga mi teka vanenu va xisati mi va nyika vanavu va xinuna nambi ku yamukela vanavu va xisati mi va nyika vanenu va xinuna kumbe akuva va va vasati venu. 26 Xana a ku vanga hi kola kwavu Solomoni hosi ya Israyele a dohiki? Ka matiko manyingi a ku nga na hosi leyi a yi fana na yene, a a zrandzriwa ha Xikwembu Nkulukumba wake, lakakuva Xikwembu Nkulukumba a mu hambe hosi ya tiko hinkwadzru dzra Israyele, kambe nambi yene a dohile hi kola ka vavasati va matiko man’wana. 27 A swi kholwisi leswaku mi yentxe ntxhumu wa ku biha ngopfu wa ku fana ni lowu, wa kuva mi nga dumbeki ka Xikwembu Nkulukumba wezru, hikuva mi teka vavasati va matiko man’wana!”

28 Mun’we ka vana va Yoyada, n’wana wa Eliyaxibi lweyi wa muprista lwenkulu, a a li mukon’wana wa Sanibalati lweyi wa Muhoroni.

29 Dzrimuka We Xikwembu Nkulukumba wanga leswaku va nyamise wuprista ni xipfumelelanu xa wuprista ni xa Valevhi.

30 Ni va ntsrunxe ka nkutxetelo hinkwawu wa ku biha wa vanhu va matiko man’wana ni va ni yavela vaprista ni Valevhi a mintizro, mun’wana ni mun’wana ni mu yavele ntizro wake. 31 Nakone ni hambe malulamiselo ya leswaku ku buyisiwa tihunyi, hi nkama lowu wu bekisiwiki ni leswaku ku buyisiwa mihandzru ya ku sungula ya ku wupfa.

We Xikwembu Nkulukumba wanga, dzrimuka leswi ni swi yentxiki u va u ni katekisa.