HOXEYA
1 Lawa i mazritu ya Yehovha lawa Hoxeya, n’wana wa Beheri, a ma yamukeliki a masikwini ya Uziya, Yotamu, Akazi na Ezekiya, lava a va li tihosi ta Yuda, ni le masikwini ya Yerobuwamu, n’wana wa Yowaxi, hosi ya Israyele. 2 Loko Yehovha a sungule ku tizrisa Hoxeya akuva a vulavula ni vhanu, Yehovha a byele Hoxeya a ku: “Famba u ya tekana ni wansati lweyi a taka gama a tiyentxa nghwavana,* nakone yene a ta ku pswalela vana lava a taka va kuma ka vavanuna van’wana, hikusa hi ndlela leyi fanaka a tiko ledzri dzri tsrhike Yehovha hi ku helela hi kola ka wunghwavana.”
3 Xileswo, Hoxeya a famba a ya txhata na Gomeri n’wana wa Dibilayimi, kutani Gomeri a kuma nyimba a va a mu pswalela n’wana wa djaha.
4 Hiloko Yehovha a mu byela a ku: “Mu txhule vito dzra ku Yezriyele,* hikusa ku nga li khale ni ta khatisa yindlu ya Yehu hi mhaka ya ngati leyi halatiwiki ha Yezriyele, nakone ni ta helisa mfumu wa yindlu ya Israyele. 5 Hi siku ledzro ni ta tsrhova wugubu bya Israyele a nkoveni wa Yezriyele.”
6 Gomeri a tlhela a kuma nyimba yin’wana a va a pswala n’wana wa n’hwanyana. Kutani Xikwembu Nkulukumba a byela Hoxeya a ku: “Mu txhule vito dzra ku Lo-ruhama,* hikusa a yindlu ya Israyele a ni nge he ti yi komba timpswalu nakone nakunene ni ta va hlongola. 7 Kambe ni ta komba timpswalu yindlu ya Yuda, nakone mine Yehovha Xikwembu Nkulukumba wavu ni ta va huluxa; a ni nge ti va huluxa hi ku tizrisa wugubu, xipada, yimpi, makavhalu nambi ku li hi vakhandzriyi va wone.”
8 Ntsrhaku ka loko a lumule Lo-ruhama, Gomeri a kume nyimba a va a pswala n’wana wa djaha. 9 Kutani Xikwembu Nkulukumba a byela Hoxeya a ku: “Mu txhule vito dzra ku Lo-ami,* hikusa a mi vhanu vanga, nakone mine a ni nge ti va Xikwembu Nkulukumba wenu.
10 “Nambitanu, a nhlayu ya Vaisrayele* yi ta fana ni misava ya lwandle leyi swi kalaka swi nga koteki ku va yi pimiwa, nambi kuva yi kontiwa. Nakone a mbangwini lowu va byeliwiki leswi: ‘A mi vhanu vanga’, va ta byeliwa leswi: ‘Mi vana va Xikwembu Nkulukumba lweyi a hanyaka.’ 11 Nakone a vhanu va Yuda ni vhanu va Israyele va ta tlhanganisiwa va va ntlawa wun’we, va ta tihlawulela muzrangeli mun’we va va va tlhantuka va suka tikweni ledzro,* hikusa a siku dzra Yezriyele dzri ta va dzrikulu.
2 “Byelani vamakwenu va xinuna mi ku: ‘Mi vhanu vanga!’*
Ni vamakwenu va xisati mi ku: ‘Mi vavasati lava kombiwiki timpswalu!’*
2 Nyikani nandzru mamana wenu; mu nyikani nandzru,
Hikusa yene a hi nkatanga nakone mine a ni nuna wake.
Yene a fanela ku tsrhika wunghwavana*
Nakone a nga ha tlheli a hamba wumbuye.*
3 Loko a nga tsrhiki, ni ta mu hlivila a sala na a nga yambalanga ntxhumu, ku fana ni siku ledzri a pswaliwiki ha dzrone;
Ni ta mu yentxa a va mananga,*
Ni ta mu yentxa a va tiko ledzri womiki,
Nakone ni ta mu dlaya hi tozra.
4 A vanake a ni nge ti va komba timpswalu,
Hi leswi va nga vana va wunghwavana.
5 Hikusa mamana wavu a yentxe wunghwavana.*
Lweyi a va pswaliki a yentxe mintxhumu ya tingana, hikusa a te:
‘Ni ta landzra timbuye tanga
Leti ti ni nyikaka pawu, mati,
Mpahla leyi hambiwiki hi voya ni leyi hambiwiki hi linyu, mafuzra ni swa ku nwa.’
6 Hi mhaka leyo, ni ta hamba muru hi mitwa akuva ni mu pfalela ndlela;
Nakone ni ta hamba muru wa mazribye
Akuva ni mu pfalela leswaku a nga ti kumi tindlela take.
7 A ta hlongolisa timbuye take, kambe a nge ti ti kuma;
A ta ti djuletela, kambe a nge ti ti kuma.
Kutani a ta ku: ‘Ni ta tlhelela ka nuna wanga,
Hikusa xiyimu xanga xa khale a xi yampswa ku tlula xa swoswi.’
8 A nga swi tivanga leswaku hi mine a ni mu nyika tinhleke, vhinyu ledzri dzra ha ka ku hambiwa ni mafuzra,
Ni leswaku hi mine a ni mu nyika prata dzra dzrinyingi
Ni woru, leswi a va swi tizrisela ku gandzrela Bali.
9 ‘Xileswo, ni ta tlhela ni va ni mu tekela tinhleke tanga hi nkama wa ntsrhovelo
Ni vhinyu dzranga ledzri dzra ha ka ku hambiwa, hi nguva ya dzrone;
Nakone ni ta mu tekela a mpahla yanga ya ku hambiwa hi voya ni ya ku hambiwa hi linyu, leyi a a yi tizrisela ku pfala tingana take.
10 Swoswi ni ta mu hlivila mpahla a mahlweni ka timbuye take,
Nakone a ku na mhunu lweyi a taka mu huluxa a mavokweni yanga.
11 Ni ta helisa ku nyonxa kwake hinkwaku,
Minkhuvu yake, ku tlangela kwake ku huma ka n’weti, masavata yake ni tinguva hinkwatu ta minkhuvu yake.
12 Ni ta helisa a minsinya yake ya mawuvha ni minkuwa yake, leyi a hlayiki leswi mayelanu na yone:
“Ledzri i hakelo ledzri ni nyikiwiki dzrone hi timbuye tanga.”
Ni ta yentxa leswaku yi va nhova,
Nakone yi ta diwa hi swihazri swa nhova.
13 Ni ta mu khatisa hi kola ka masiku lawa a nga hisela swithombe swa Bali magandzrelo,
Nkama lowu na a ha tixongisela hi switlan’wana ni majoya yake a va a hlongolisela timbuye take,
Kambe mine a ni dzrivala’, ku hlaya Yehovha.
14 ‘Xileswo, ni ta mu yentxa a pfumela,
Ni ta mu yisa a mananga
Ni ta vulavula hi ndlela leyi taka mu khumba mbilu.
15 Hi nkama wolowo ni ta mu tlhelisela masimu yake ya mawuvha,
Nakone a Nkova wa Akori ni ta wu yentxa wu va nyangwa wa tiko dzra dumbo;
Kohala a ta ni hlamula ku fana ni le masikwini ya wumpshwa byake,
Ku fana ni siku ledzri a humiki ha dzrone a tikweni dzra Egipta.
16 Ku sukela hi siku ledzro’, ku hlaya Yehovha,
‘A ta ni vitana a ku “nuna Wanga”, a nge he ti ni vitana a ku “n’winyi Wanga”’.*
17 ‘A ni nge ti mu pfumelela a vitana mavito ya swithombe swa Bali,
Nakone a mavito ya swone a ma nge he ti dzrimukiwa.
18 Hi siku ledzro, akuva vhanu vanga va pfuneka, ni ta hamba xipfumelelanu ni swihazri swa nhova,
Tinyanyana ni swihazri leswi fambaka hi khuzri;*
Ni ta huluxa tiko ledzri ka wugubu, ka xipada ni le ka yimpi;
Ni ta yentxa leswaku va hanya na va sizrelelekile.
19 Ni ta va waku hi lani ku nga helikiki;
Ni dumbisa ku ku yentxela leswinene ni leswi lulamiki,
Hi lizrandzru dzra ku dumbeka ni timpswalu.
20 Ni dumbisa leswaku ni ta dumbeka kwaku,
Nakone nakunene u ta ni tiva mine Yehovha.’
21 ‘Hi siku ledzro ni ta hlamula’, ku hlaya mine Yehovha,
‘Ni ta hlamula matilo,
Kutani wone ma ta hlamula misava;
22 A misava yi ta bindzrula* tinhleke, vhinyu ni mafuzra;
23 Ni ta byala vhanu vanga ku fana ni mbewu,*
Ni ta komba timpswalu lweyi a kalaka a nga kombiwanga timpswalu;*
Ni ta byela lava nga liki vhanu vanga* ni ku: “N’wine mi vhanu vanga”,
Nakone vone va ta ku: “Wene u Xikwembu Nkulukumba wezru.”’”
3 Hiloko Yehovha a ni byela a ku: “Tlhela u ya zrandzra wansati lweyi a zrandzriwaka hi wanuna mun’wana nakone a yentxaka wumbuye, ku fana ni leswi Yehovha a zrandzraka vhanu va Israyele nambileswi va mu tsrhikaka va ya gandzrela swikwembu swin’wana ni ku zrandzra mabolu lama txheliwiki mawuvha lama womisiwiki.”*
2 Xileswo, ni tixaveli yene hi 15 wa swikhemu swa prata ni homeri* dzrin’we ni hamfu dzra sevhada. 3 Hiloko ni mu byela ni ku: “U ta tama u va wanga hi masiku manyingi. U nga yentxi wunghwavana nakone u nga yentxi swa tinkuku ni wanuna mun’wana, na mine a ni nge ti yentxa swa tinkuku na wene.”
4 Hikusa a vhanu va Israyele va ta hanya nkama wa ku leha na va nga na hosi, na va nga na muzrangeli,* na va nga hambi switlhavelo, na va nga na tinsika ta* ku xwenga, na va nga na efodi* ni swithombe.* 5 Ntsrhaku ka leswo, a vhanu va Israyele va ta tlhelela va va va djuletela Yehovha Xikwembu Nkulukumba wavu na Davhida hosi yavu; nakone a ku heleni ka masiku va ta tlhelela ka Yehovha na va zruzrumela akuva a va komba wunene.
4 Yingelani zritu dzra Yehovha, n’wine vhanu va Israyele,
Hikusa Yehovha a ta yavanyisa vayaki va tiko ledzri
Hi leswi ku kalaka ku nga na ntiyiso, lizrandzru dzra ku dumbeka, nambi wutivi mayelanu na Xikwembu Nkulukumba a tikweni ledzri.
2 Swihlambanyu swa madzrimi, ku hemba, wudlayi,
Wuyivi ni wumbuye swi tale ngopfu swinene;
Nakone vhanu va tsrhamela ku halata ngati ya vhanu van’wana.
3 Hi mhaka ya leswo, a tiko ledzri dzri ta va ni xidzrilo,
Nakone a vayaki va dzrone hinkwavu va ta hela ntamu;
A swihazri swa nhova, tinyanyana
Nambi tihlampfi ta le lwandle swi ta fa.
4 “Nambitanu, ku nga vi na mhunu lweyi a mi layaka nambi ku mi kawuka,
Hikusa n’wine mi fana ni lava va holovaka ni muprista.
5 Xileswo mi ta wa a nhlikanhini ingiki hi loko ko va wusiku,
Nakone a muprofeta a ta wa na n’wine.
Futsrhi ni ta dlaya mamana wenu.
6 A vhanu vanga va ta miyetiwa,* hikusa a va ni tivi.
Leswi mi yaliki ku dondzra mayelanu na mine,
Na mine ni ta yala ku va mi tama mi tizra swanga vaprista vanga;
Nakone leswi mi dzrivaliki nawu* wa Xikwembu Nkulukumba wenu,
Na mine ni ta dzrivala vanenu.
7 Loko va ya mahlweni va yengeseleka, a va ya mahlweni va ni dohela.
Ni ta va susela xitxhavu lexi va kombiwaka xone ni va tisela tingana.*
8 Loko vhanu vanga va doha, a vaprista va tidela nyama leyi vhanu va yi nyikelaka swanga magandzrelo,
Nakone va djula leswaku va tsrhamela ku doha.
9 A vhanu ni vaprista va ta yentxekeliwa hi leswi fanaka;
Ni ta yentxa leswaku va tihlamulela hi kola ka mahanyela yavu,
Nakone ni ta va khatisa hi ku ya hi swiyentxo swavu.
10 Va ta da, kambe a va nge ti xuzra.
Va ta yentxa swa ku nyenyentsa ngopfu swinene hi tlhelo dzra tinkuku,* kambe a va nge ti va ni vana,*
Hikusa a va vanga na mhaka na Yehovha.
11 A swiyentxo swa tingana hi tlhelo dzra tinkuku,* vhinyu dzra khale ni vhinyu ledzri dzra ha ka ku hambiwa
Swi yentxa mhunu a nga swi naveli ku yentxa leswinene.
12 A vhanu vanga va vutisa swithombe swa ku vatliwa,
Nakone va yentxa leswi a nhonga yavu* yi va byelaka swone;
Hikusa a moya wa wunghwavana wu* yentxa leswaku va hambuka,
Nakone hi mhaka ya wunghwavana byavu va yala ku titsrongahata ka Xikwembu Nkulukumba wavu.
13 Va nyikela switlhavelo a henhla wugan’wini ka tinhava,
Nakone va hisa switlhavelo a magangeni,*
A hansi ka nsinya wa kukazri wa ku tiyela,* a hansi ka nsinya wa kukazri lowu pswalaka swiluva swa ku basa* ni le hansi ka nsinya wun’wana ni wun’wana lowukulu,
Hikusa a mintsrhuti ya yone i yinene.
Hi leswo swi yentxaka leswaku a vanavu va xisati va yentxa wunghwavana*
Ni leswaku a vingi vavu va yentxa wumbuye.
14 A ni nge ti va khatisa vanenu va xisati hi mhaka ya leswi va yentxaka wunghwavana
Nambi vingi venu hi mhaka ya leswi va yentxaka wumbuye,
Hikusa vavanuna va famba ni tinghwavana
Nakone va nyikela switlhavelo ni tinghwavana ta le tempeleni.
A vhanu volavo, lava pfumalaka ku twisisa, va ta helisiwa.
15 Nambiloko wene Israyele u yentxa wunghwavana,
Ingiki Yuda a nga ka a nga kumi nandzru lowu fanaka.
Mi nga fambi a Giligala nambi a Beti-avheni,
Nakone mi nga hlambanyi ha Yehovha Xikwembu Nkulukumba lweyi a hanyaka.
16 Hikusa Israyele a ni nkanu ku fana ni homu ya pswele leyi nga ni nkanu.
Xana swoswi Yehovha a ta va byisa ku fana ni xihambana xa* xinuna a mbangwini lowu pfulekiki?
17 Efrayimi a gandzrela swithombe.
Mu tsrhiki wuswake!
A vafumi vake va* yi zrandzra ngopfu mintxhumu leyi khomisaka tingana.
19 A moya wu ta mu kukula wu famba na yene a timpapeni ta wone,
Nakone va ta daniseka hi kola ka switlhavelo swavu.”
5 “Yingelani leswi, n’wine vaprista,
Zreyani ndleve, N’wine yindlu ya Israyele,
N’wine yindlu ya hosi, yingelani,
Hikusa ku yavanyisiwa n’wine
Hi leswi mi nga ntlhamu ka Mizpa
Ni leswi mi nga redi ledzri yandlaliwiki henhla ka Tabori.
2 A vapfukeli va* nghene hi nhloko ka ku dlaya,
Kutani hinkwavu ni va ba ndleve.
3 Efrayimi na mu tiva,
Nakone Israyele a nge ni tumbeleli.
Hikusa swoswi, Wene Efrayimi u sungule ku yentxa wunghwavana;
Israyele a tinyamisile.
4 A swiyentxo swavu a swi va pfumeleli kuva va tlhelela ka Xikwembu Nkulukumba wavu,
Hikusa a xikazri kwavu ku ni moya wa wunghwavana;
Nakone vone a va na mhaka na Yehovha.
5 A ku tikulisa ka Israyele i wumboni bya leswaku yene a bihile;
Israyele na Efrayimi ha wubidzri byavu va wile hi mhaka ya xihoxo xavu,
Nakone Yuda a we navu.
6 Va ye djuletela Yehovha hi ku mu hambela magandzrelo hi tihomu ni tihamba tavu,
Kambe a va mu kumanga.
Hikusa a a tihambanise na vone.
7 A va dumbekanga ka Yehovha,
Hikusa va pswale vana lava kalaka va nga li vake.
Kutani a ndzreni ka hweti yin’we va ta hahluleliwa kun’we ni hinkwaswu leswi va nga na swone.*
8 Txhayani limhondzro a Gibeya, mi txhaya xipalapala a Rama!
Banani pongwe dzra yimpi a Beti-avheni; a ntsrhaku kwaku, Wene Benjamini!
9 We Efrayimi, a vhanu va ta txhava hi kola ka leswi swi taka ku yentxekela hi siku dzra xikhatiso.
Ka tinxaka ta Israyele ni tivise leswi nakunene swi taka yentxeka.
10 A vazrangeli* va Yuda va fana ni lava va txintxaka mindzrelekanu.
Ni ta txhulula mahlundzru yanga henhla kwavu ku fana ni mati.
11 Efrayimi a kazratekile, a pfotlotiwe hi yavanyiso,
Hikusa a a tiyimisele ku hamba ntwananu ni nala wake.
12 Xileswo, ni fane ni nsumba* ka Efrayimi
Nakone ni yentxe leswaku a yindlu ya Yuda yi bola.
13 Loko Efrayimi a vone mavabyi yake, ni loko Yuda a vone xilondzra xake,
Efrayimi a ye a Asiriya a va a zrumela vhanu ka hosi ya ntamu,
Kambe yone a yi nga na wuswikoti bya ku mi daha,
Nakone a yi nge ti swi kota ku holisa xilondzra xenu.
14 Ni ta fana ni xinghonyamana ka Efrayimi,
Nakone ni ta fana ni nghonyama leyi nga ni ntamu ka yindlu ya Yuda.
Ni ta va hahlulela ni va ni famba;
Ni ta va teka, nakone a ku na lweyi a taka va huluxa.
15 Ni ta tlhelela a mbangwini wanga nakone ni ta tsrhama kone ku ya tlhasa loko va tsrhovela mihandzru ya xihoxo xavu,
Kutani va ta djula leswaku ni va komba timpswalu.
Loko va li ku xanisekeni, va ta djuletela mpfunu wanga.”
6 “Tanani, a hi tlheleleni ka Yehovha;
Hikusa nambileswi a hi hahluleliki, a ta hi daha.
Nambileswi a hi biki, a ta banditxha swilondzra swezru.
2 Ntsrhaku ka masiku mabidzri a ta hi yentxa hi tlhela hi hanya.
Hi siku dzra wuzrazru a ta hi sekelekisa,
Kutani hi ta hanya a mahlweni kwake.
3 Hi ta tiva Yehovha, hi ta tikazratela ku mu tiva.
Ku fana ni ku xa ka dambu, ha tiyiseka leswaku a ta tlhasa.
A ta ta ku fana ni mpfula leyi naka ngopfu swinene,
Ku fana ni mpfula leyi naka yi tsrakamisa misava a ku sunguleni ka malanga.”*
4 “Ni nga ku yentxela yini, we Efrayimi?
Ni nga ku yentxela yini, we Yuda?
Hikusa lizrandzru dzrenu dzra ku dumbeka dzri fana ni matlavi ya le mixweni,
Ni mbezre* leyi yi hantlaka yi nyamalala.
5 Xileswo ni ta mi ba hi ku tizrisa vaprofeta;
Ni ta mi dlaya hi mazritu ya nomu wanga.
Nakone a yavanyiso dzranga mayelanu na wene dzri ta phatima ku fana ni livaningu.
6 Hikusa ni nyonxisiwa hi lizrandzru dzra ku dumbeka,* ku nga li hi switlhavelo,
Ni hi kuva ni tiviwa, ku nga li hi magandzrelo ya ku hisiwa.
7 Kambe leswi vone va nga vhanu lava nga ni xidoho, va tlule xipfumelelanu xanga.
A mimbangwini leyo va tsrhike ku dumbeka kwanga.
8 Giliyadi i doropa dzra vhanu lava yentxaka swa ku biha,
I doropa ledzri ku halatiwaka ngati yinyingi.
9 A vaprista va fana ni ntlawa wa swigevengu leswi tumbelelaka vhanu.
Va dlaya vhanu a ndleleni leyi ya ka a Sikeme,
Hikusa mahanyela yavu ma khomisa tingana.
10 Ni vone ntxhumu wa ku nyenyentsa a tikweni dzra Israyele.
Kone Efrayimi a yentxa wunghwavana;
Israyele a tinyamisile.
11 Loko ku li wene Yuda, ni ku bekisele ntsrhovelo,
Loko ni buyisa vhanu vanga lava nga wukazraweni.”
7 “Nkama lowu ni djulaka ku daha Israyele,
Ni vona swihoxo swin’wana swa Efrayimi,
Ni wubihi bya Samariya.
Hikusa va yentxa mintxhumu ya wukanganyisi;
A vayivi va nghena mitini, na mintlawa ya swigevengu yi hlasela hi hala handle.
2 Kambe vone a va pfumeli timbilwini tavu leswaku ni ta dzrimuka wubihi byavu hinkwabyu.
A swiyentxo swavu swi va tsrandzrelile;
A swiyentxo swavu a swi tumbelanga mahlweni kwanga.
3 Va nyonxisa hosi hi wubihi byavu,
Ni vazrangeli,* hi madzrimi yavu.
4 Hinkwavu va yentxa wumbuye,
Va pfuzra ku fana ni xitiko lexi tlhavikiwiki hi muhambi wa mapawu,
Lweyi a yimaka ku hlanganyetela ndzrilo ntsrhaku ka loko a pfuve mbila yi za yi kukumuka.
5 Hi siku dzra hosi yezru, a vazrangeli* va vabyile;
—Va hlundzruke hi mhaka ya vhinyu.
A hosi i munghanu wa lava zrandzraka ku poyila van’wana.
6 Va tsrhindzrekela na timbilu tavu ti pfuzra ku fana ni xitiko.
A muhambi wa mapawu a yetlela wusiku hinkwabyu;
A mixweni, a xitiko xi hisa ku fana ni ndzrilo lowu pfuzraka.
7 Hinkwavu va hisa ku fana ni xitiko,
Nakone va helisa a vafumi vavu.*
A tihosi tavu hinkwatu ti wile;
A ku na ni mun’we kwavu lweyi a kombelaka mpfunu kwanga.
8 Efrayimi a tipatsra ni matiko.
Efrayimi a fana ni pawu dzra redondu, ledzri kalaka dzri nga ndzrulutiwanga.
9 A vhanu va matiko man’wana va hete ntamu wake, kambe yene a nga swi xiyi.
A misisi yake yi ndzruluke yi va ya ku basa, kambe yene a nga swi xiyi.
10 A ku tikulisa ka Israyele i wumboni bya leswaku yene a bihile,
Kambe a va tlhelelanga ka Yehovha, Xikwembu Nkulukumba wavu,
Nambi ku mu djuletela.
11 Efrayimi a fana ni tuva ledzri kalaka dzri nga tlhazrihanga, ledzri kalaka dzri nga na ku twisisa.*
Va kombela mpfunu ka Egipta, va djuletela mpfunu wa Asiriya.
12 “Hinkwaku lomu va taka ya kone ni ta va phasa hi redi dzranga.
Ni ta va phasa ku fana ni tinyanyana.
Ni ta va laya hi ku ya hi swidzrimuxo leswi va swi yamukeliki swanga nhlengeletanu.
13 Khombo kwavu, hikusa va ni tsrutsrumile!
A va helisiwi, hikusa va ni dohelile!
A ni lulamele ku va huluxa, kambe vone va vulavule madzrimi mayelanu na mine.
14 Va kombele mpfunu kwanga na swi nga sukeli mbilwini,
Nambileswi a va tsrhamela ku dzrila a mibedweni yavu.
Va titsremelelile a mizrini akuva va kombela tinhleke ni vhinyu;
Kambe va ni pfukela.
15 Nambileswi ni va layiki nakone ni va nyikiki ntamu,
Va lwisana na mine, hi ku kunguhata swa ku biha.
16 Va tlhelelile, kambe ku nga li ka wugandzreli bya ntiyiso;
A va nga dumbeki, ku fana ni wugubu lebyi gombonyokiki.
A vazrangeli vavu va ta dlayiwa hi xipada hi leswi va nga ni nkanu.
Xileswo va ta va xihlekiso a tikweni dzra Egipta.”
8 “Txhaya limhondzro!
Ku ni lweyi a buyaka ku fana ni gama akuva a lwa ni vhanu va* Yehovha,
Hikusa va tsrhike xipfumelelanu xanga nakone va tlule nawu wanga.
2 Va huwelela va ni byela va ku: ‘We Xikwembu Nkulukumba wezru, hine Israyele ha ku tiva!’
3 Israyele a tsrhike leswi nga swinene.
Ingiki a nga hluliwa hi valala vake.
4 Va beke tihosi, kambe na va nga ni vutisanga.
Va beke vazrangeli, kambe na va nga na mpfumelelo wanga.
Va hambe swikwembu hi prata dzravu ni woru dzravu,
Leswo swi yentxe leswaku va helisiwa.
5 A zrole* dzraku a ni dzri yamukelanga we Samariya.
Ni ku hlundzrukele ngopfu.
Ku ta khaluta nkama wa ku tlhasa kwini akuva u tibasisa?
6 Hikusa a zrole ledzro dzri pfa hi le Israyele.
Dzri hambiwe hi mhunu lweyi a tivaka ntizro wa mavoko; dzrone a hi Xikwembu Nkulukumba wa ntiyiso;
A zrole dzra Samariya dzri ta helisiwa hi ku helela.
Leswi va swi byalaka a swi beki mihandzru;
Leswi hlukaka a swi gami swi pswala ntxhumu.
Nambiloko swo pswala, swi ta diwa hi vhanu va matiko mambeni.
8 Israyele a ta helisiwa.
Swoswi a ta va a makazri ka matiko,
A ta fana ni xibya lexi kalaka xi nga pfuni ntxhumu.
9 Hikusa va tlhantuke va ya Asiriya, ku fana ni mbongolo ya nhova leyi fambaka wuswayone.
Efrayimi a tidjulele timbuya.
10 Nambileswi va tidjulelaka timbuya a makazri ka matiko,
Ni ta va hlengeleta;
Va ta sungula ku xaniseka hi mhaka ya ntsrhwalu lowu va taka zrwexiwa wone hi hosi ni vazrangeli.*
11 Hikusa Efrayimi a yandzrise maaltari, nakone hi mhaka ya leswo a dohile.
A maaltari yake ma yentxe leswaku a doha.
12 Ni mu tsralele mintxhumu ya yinyingi ya nawu wanga,
Kambe a yi vone na yi li leyi kalaka yi nga tolovelekanga.
13 Va ni hambela switlhavelo va va va da nyama ya kone,
Kambe mine Yehovha a ni swi yamukeli.
Ni ta dzrimuka xihoxo xavu ni va ni va khatisa hi mhaka ya swidoho swavu.
Vone va tlhelele* a Egipta.
14 Israyele a dzrivale lweyi a mu vumbiki nakone a yake matempele,
Yuda a hambe madoropa ya manyingi lawa ma nga ni mimuru leyi tiyisiwiki.
Kambe ni ta zrumela ndzrilo ka madoropa wolawo,
A ndzrilo wu ta hisa swihondzro swa doropa dzrin’wana ni dzrin’wana.”
9 “U nga nyonxi wene Israyele.
U nga nyonxi ku fana ni vhanu va matiko man’wana.
Hikusa u tsrhindzreke ka Xikwembu Nkulukumba waku hi kola ka wunghwavana byaku.
U zrandzre muholo lowu u wu kumaka hi kola ka wunghwavana* a mimbangwini hinkwayu ya ku hehezrela ka yone tinhleke.
2 Kambe a mbangu wa ku hehezrela ka wone ni wa ku pfuvela ka wone vhinyu a swi nge ti mi humesela swakuda,
Nakone mi ta pfumala vhinyu.
3 A mi nge ti tama mi tsrhama a tikweni dzra Yehovha;
A matsrhan’wini ya leswo, Efrayimi a ta tlhelela a Egipta,
Nakone a Asiriya a ta da leswi kalaka swi nga basanga.
4 A Vaisrayele a va nge he ti mu hambela Yehovha magandzrelo ya vhinyu;
A switlhavelo swavu a swi nge ti mu nyonxisa.
Swi fana ni swakuda leswi phameliwaka loko ku ni xidzrilo;*
Hinkwavu lava va swi daka va va lava nyamiki.
Hikusa swakuda swavu swi to tizrela ntsena kuva vone va da;
A swi nge ti nghena a tempeleni dzra* Yehovha.
5 Mi ta yentxa yini hi siku dzra kuva mi tlhangana,
Akuva mi tlangela nkhuvu wa Yehovha?
6 Lavisani! Swi ta djula kuva va tsrutsruma hi mhaka ya khombo.
Egipta a ta va hlengeleta, nakone Memfisi a ta va lahla.
A swimila leswi nga ni mitwa swi ta hlasela mintxhumu yavu ya lisima ya prata,
Nakone ku ta mila mitwa a matendeni yavu.
7 A masiku ya kuva va khatisiwa ma ta tlhasa,
Ma ta ta masiku ya kuva va hakelisiwa.
Nakone Israyele a ta swi tiva leswo.
Swi ta tiveka leswaku a muprofeta wake a phuntile, nakone a mhunu lweyi a tibyelaka leswaku a vulavula leswi pfaka ka Xikwembu Nkulukumba a ta hlanya;
Leswi a xihoxo xenu xi nga xikulu, a valala venu i vanyingi.”
8 A muzrindzri wa Efrayimi a a li na Xikwembu Nkulukumba wanga.
Kambe swoswi a tindlela hinkwatu ta vaprofeta vake ti fana ni mintlhamu ya muphasi wa tinyanyana;
Ku ni ku nyenyana a tempeleni dzra* Xikwembu Nkulukumba.
9 A Vaisrayele va nghene hi nhloko a ku yentxeni ka swa ku biha, hi lani vayaki va le Gibeya va yentxiki ha kone khale swinene.
Xikwembu Nkulukumba a ta dzrimuka xihoxo xavu, nakone a ta va khatisa hi kola ka swidoho swavu.
10 “Loko ni kume Israyele, swi fane ni ku kuma a mawuvha a mananga.
Loko ni vone vavhovho venu, swi fane ni ku vona makuwa ya ku sungula a nkuweni.
Kambe vone va ye ka Bali wa Peyori;
Va tinyiketele ka ntxhumu lowo lowu khomisaka tingana,*
Kutani va ve lava nyenyetsaka ku fana ni xikwembu lexi va xi gandzrelaka.
11 A mintxhumu leyi Efrayimi a a yi nyika lisima, yi hahe yi ya kule ku fana ni nyanyana;
A vavasati a va nge ti kuma tinyimba nambi ku pswala.
12 Nambiloko vo wundla vana,
Ni ta va tekela vone ku ya tlhasa loko ku nga ha sali ni wa mun’we.
Ina, khombo kwavu loko ni titsravuxa na vone!
13 Na Efrayimi a byaliwe a mbangwini wa ku byisela ka wone swifuyu, kwanga a a fana na Tiri;
Swoswi Efrayimi a ta sindzriseka ku nyikela vanake akuva va dlayiwa.”
14 We Yehovha, va nyiki leswi swi va fanelaka:
A va humeliwi hi tinyimba nakone a mavele yavu a ma pfumali mafi.
15 “A wubihi byavu hinkwabyu a byi li a Giligala; ku ve kohala ni sunguliki ku va nyenya.
Ni ta va hlongola a tikweni dzranga* hi mhaka ya swiyentxo swavu swa ku biha.
A ni nge he ti va zrandzra;
A vazrangeli vavu* hinkwavu va tiyele tinhloko.
16 Efrayimi a ta tsremiwa.
A limitsru dzravu dzri ta woma, nakone a va nge he ti beka mihandzru.
Nambiloko vo pswala, ni ta dlaya vanavu lava va va zrandzraka.”
17 Xikwembu Nkulukumba wanga a ta va tsrhika,
Hikusa a va mu yingisetanga,
Va ta va vatsrendzreleki a xikazri ka matiko.
10 “Israyele a fana ni nsinya wa mawuvha wa ku bola, lowu wu pswalaka mihandzru.
Loko a ya a pswala mihandzru, a ya a yengesela maaltari yake;
Loko a ya a kuma ntsrhovelo lowunene a tikweni dzrake, a ya a yengesela wuxongi bya mapilari lawa a ma tizriselaka ku gandzrela swikwembu.
2 Timbilu tavu ti ni wukanganyisi;
Va ta voniwa nandzru.
Ku ta va ni lweyi a taka gilhita maaltari yavu ni ku helisa mapilari lawa va ma tizriselaka ku gandzrela swikwembu.
3 Kutani va ta ku: ‘A hi na hosi, hikusa a hi mu txhavanga Yehovha.
Nambiloko a ho va ni hosi a yi ta hi pfuna hi yini?’
4 Va vulavula mazritu lawa ma kalaka ma nga pfuni ntxhumu, va hamba swihlambanyu swa madzrimi, nakone va yentxa swipfumelelanu;
Hi mhaka leyo a yavanyiso dzravu dzri fana ni mabyanyi lawa ma nga ni vhenene lama milaka ka masimu lawa ma dzrimiwiki.
5 A vayaki va le Samariya va ta txhava hi kola ka xikwembu xa zrole xa le Beti-avheni.
A vhanu va ta xi dzrilela,
Ku patsra ni vaprista va swikwembu swa matiko mambeni lava a va nyonxa hi mhaka ya xone ni hi mhaka ya ku phatima ka xone,
Hikusa xi ta ya a wukazraweni kule na vone.
6 Xone xi ta yisiwa a Asiriya swanga xihananu ka hosi leyikulu.
Efrayimi a ta danisiwa,
Nakone Israyele a ta khomiseka tingana hi kola ka xilayu lexi a xi landzriki.
7 Samariya ni hosi yake nakunene va ta helisiwa,*
Ku fana ni xizrwavana lexi xi tsrhovekiki lexi xi nga matini.
8 A mimbangu ya ku tlakuka ya le Beti-avheni, leyi yi yentxaka leswaku Israyele a doha, yi ta helisiwa.
A maaltarini yavu ku ta mila mitwa ni switlhavana.
A vhanu va ta byela tinhava va ku: ‘Hi funeketani!’
Nakone va ta byela maganga va ku: ‘Hi welani!’
9 Wene Israyele, u doha ku sukela a masikwini ya Gibeya.
A vana va Israyele a va txintxanga.
A yimpi a yi va tlhaselanga* vana va ku kala va nga lulamanga a Gibeya.
10 Loko ni ta swi djula, ni ta va khatisa.
Nakone a matiko ma ta hlengeletana akuva ma lwa na vone,
Va ta zrwexiwa swihoxo swavu swibidzri.*
11 Efrayimi a a li xihon’wana xa pswele lexi xi dondzrisiwiki, lexi a xi zrandzra ku hula tinhleke,
Xileswo a ni felela nhamu ya xone ya ku xonga.
Swoswi ni ta yentxa leswaku ku va ni lweyi a khayimaka Efrayimi akuva a dzrima.
Yuda a ta dzrima; Yakobe a ta fuhlutelela* mun’wana mabuvu.
12 Byalani wululami kutani mi tsrhovela lizrandzru dzra ku dumbeka.
Dzrimani masimu lawa ma kalaka ma nga dzrimiwanga
Na ka ha ni nkama wa ku djuletela Yehovha,
Ku ya tlhasa loko a buya a va a mi dondzrisa hi wululami.
13 Kambe n’wine mi byale wubihi,
Mi tsrhovele ku kala wululami,
Nakone mi tsrhovele mihandzru ya madzrimi yenu;
Hikusa mi tidumbile,
Mi dumbe masotxha yenu ya manyingi.
14 Vhanu venu va ta hlaseliwa,
Madoropa yenu lawa ma nga ni mimuru leyi tiyisiwiki ma ta helisiwa,
Hi lani Xalmani a helisiki yindlu ya Arbeli ha kone
Hi siku dzra yimpi, loko vamamana ni vanavu va dlayiwe hi ndlela ya nsele.
15 Leswi hi leswi u taka yentxiwa swone wene Betele, hi kola ka wubihi byaku lebyikulu.
Loko byi xa a hosi ya Israyele nakunene yi ta helisiwa.”*
11 “Na Israyele a ha li mupfana, ni mu zrandzrile;
Ni vitane n’wananga a huma Egipta.
2 Loko va ya va vitaniwa,*
A va tama va ya kule ni lweyi a a va vitana.
Va tame va nyikela magandzrelo ka swifaniso swa Bali
Nakone va tame va hambela swifaniso leswi vatliwiki magandzrelo.
3 Kambe hi mine ni dondzrisiki Efrayimi ku famba, hi mine ni va tlakuliki;
Nambitanu a va pfumelanga leswaku ni va dahile.
4 Ni tame ni tizrisa wunene ni lizrandzru swanga pindzra, akuva ni va kokela kwanga;
A ni fana ni lweyi a a va susa kangi a nhan’wini,
Nakone hi wunene ni nyike mun’wana ni mun’wana wavu swakuda.
5 A va nge ti tlhelela a tikweni dzra Egipta, kambe Asiriya a ta va hosi yavu,
Hikusa va yale ku tlhelela kwanga.
6 A valala va ta hlasela madoropa yake hi xipada,
Va ta tlhanya tinyangwa ta madoropa yake va va va ma helisa, hi mhaka ya makungu yavu ya ku biha.
7 A vhanu vanga va tiyimisele ku kala va nga dumbeki kwanga.
Nambiloko va vitaniwa leswaku va tlhelela ka wugandzreli lebyi tlakukiki, a nga kone ni mun’we lweyi a sekelekaka.
8 Ni nga ku tsrhikisa kuyini, wene Efrayimi?
Ni nga ku nyikelisa kuyini ka van’wana, wene Israyele?
Ni nga ku helisa hi ndlela yini ku fana na Adima?
Ni nga ku yentxa yini akuva u fana na Zeboyimi?
A mbilu yanga yi txintxile;
Hi nkama wolowu wa wun’we ni ku twele wusiwana.
9 A ni nge ti ma kombekisa mahlundzru yanga.
A ni nge ti tlhela ni ku helisa wene Efrayimi,
Hikusa ni Xikwembu Nkulukumba, a ni mhunu,
Ni Muxwengi makazri kwenu;
A ni nge ti mi khatisa na ni hlundzrukile.
10 Va ta landzrela Yehovha nakone yene a ta bonga ku fana ni nghonyama;
Loko a bonga, a vanake va ta ta na va zruzrumela hi le mpeladambu.
11 Loko va buya hi le Egipta, va ta zruzrumela hi ku txhava ku fana ni nyanyana,
Loko va huma hi le tikweni dzra le Asiriya, va ta fana ni tuva ledzri txhavaka;
Ni ta yentxa leswaku va tsrhama makaya kwavu”, ku hlaya Yehovha.
12 “Efrayimi a ni byela madzrimi ntsena;
Kun’wana ni kun’wana lomu ni ndzrulukaka kone ni vona wukanganyisi bya Israyele.
Kambe Yuda a ha tama a famba na Xikwembu Nkulukumba,
Nakone awa dumbeka ka lweyi a Xwengiki Ngopfu Swinene.”
12 “Efrayimi a dumba mintxhumu leyi kalaka yi nga pfuni ntxhumu.*
A hlongolisa moya wa le wuxeni siku hinkwadzru.
A tsrhamela ku hemba ni ku vanga madzolonga.
Va hamba ntwananu na Asiriya nakone va teka mafuzra ya minhlwazri va ma yisa a Egipta.
2 Yehovha a ni mhaka leyi a djulaka ku yi lulamisa na Yuda;
A ta khatisa Yakobe hi ku ya hi tindlela take,
A ta mu hakelisa hi ku ya hi swiyentxo swake.
3 A khome xizrendzre xa makwavu na a ha li khuzrini dzra mamana wake,
Nakone a lwe na Xikwembu Nkulukumba hi ntamu wake hinkwawu.
4 A lwe ni ntsrumi a va a yi hlula.
A dzrilile a va a kombela ku tovokisiwa.”
Xikwembu Nkulukumba a kumane na yene a Betele, nakone kolahayani a vulavule na hine.
5 Yehovha Xikwembu Nkulukumba wa makhandzra,
Yehovha i vito ledzri a tiviwaka hi dzrone.
6 “Xileswo, tlhelela ka Xikwembu Nkulukumba waku,
Kombisa lizrandzru dzra ku dumbeka ni wululami,
Nakone minkama hinkwayu dumba Xikwembu Nkulukumba waku.
7 Kambe a muxavisi a ni mabalansa ya ku kanganyisa
A zrandzra ku kanganyisa.
8 Efrayimi a li: ‘Nakunene ni ganyile;
Ni tikumeli mintxhumu ya lisima.*
A va nge ti kuma xihoxo nambi xidoho ka ntizro wanga hinkwawu.’
9 Kambe hi mine Yehovha Xikwembu Nkulukumba waku ku sukela a tikweni dzra Egipta.
Ni ta yentxa leswaku u tlhela u tsrhama ka matende,
Ku fana ni hi masiku lawa ma bekiwiki ya nkhuvu.
10 A ni vulavula ni vaprofeta,
A ni va yentxa va va ni swivoniso leswi yengeletekiki
Nakone hi ku tizrisa vaprofeta a ni vulavula hi ku tizrisa swifaniso.
11 A Giliyadi ku ni madzrimi ni wukanganyisi.
A Giligala va hamba switlhavelo hi tihomu.
Nakone maaltari yavu ma fana ni tinhulu ta mazribye leti nga ka masimu lawa ma dzrimiwiki.
12 Yakobe a tsrutsrume a ya tikweni dzra* Aramu,*
Kohala, Israyele a tizre akuva a kuma nsati,
A byise tihamba* akuva a kuma nsati.
13 Yehovha a humese Israyele a Egipta hi ku tizrisa muprofeta wa kukazri;
Nakone a tizrise muprofeta wa kukazri akuva a mu hlayisa.
14 Efrayimi a khunguvanyise Xikwembu Nkulukumba ngopfu swinene;
A ha ni nandzru wa ngati.
A n’winyi wake a ta mu hakelisa hi kola ka xizruku lexi a mu tiseliki xone.”
13 “Loko Efrayimi a vulavula, a a vanga ku txhava;
A a li wa lisima a Israyele.
Kambe a ve ni nandzru hi ku gandzrela Bali nakone a file.
2 Swoswi vo ya va doha
Nakone va hamba swithombe hi ku tizrisa prata dzravu;
Va tizrisa wuswikoti byavu akuva va hamba swithombe, hinkwaswu i mintizro ya lava va tivaka ntizro wa mavoko.
Nakone va li: ‘A vhanu lava nyikelaka magandzrelo a va n’qunti mazrole.’*
3 Hi mhaka ya leswo, va ta fana ni matlavi ya le mixweni,
Va ta fana ni mbezre leyi yi hantlaka yi nyamalala,
Va ta fana ni byanyi lebyi hahisiwaka hi moya a mbangwini wa ku hehezrela ka wone,
Nakone va ta fana ni musi lowu humaka hi le ka mbhovo lowu kumekaka a henhla ka yindlu.
4 Kambe hi mine Yehovha Xikwembu Nkulukumba waku ku sukela a tikweni dzra Egipta.
A u tivanga Xikwembu Nkulukumba mun’wana handle kwanga,
Nakone a ku na muhuluxi mun’wana, loko ku nga li mine.
5 Ni ku tive mananga a tikweni dzra dandzra.
6 A vhanu va yanelisekile loko va yisiwa mimbangwini ya ku byisela ka yone mintlhambi,
Va yanelisekile nakone a timbilu tavu ti sungule ku tikulisa.
Kutani hi ndlela leyo va ni dzrivalile.
7 Ni ta fana ni xinghonyamana kwavu,
Ni ta fana ni yingwe* leyi va tumbeleliki a ndleleni.
8 Ni ta va hlasela ku fana ni ursu* ledzri lahlekeliwiki hi vana va dzrone,
Ni ta va handzrula swifuva.
Kolanu ni ta va phozrelela ku fana ni nghonyama;
A xihazri xa kukazri xa nhova xi ta va hahlulela.
9 Leswi u ni xandzrukeliki mine mupfuni waku,
U ta helisiwa wene Israyele.
10 Kutani yi kwini hosi yaku akuva yi ku huluxa ka madoropa yaku hinkwawu,
Ni vafumi* vaku, lava u hlayiki leswi mayelanu na vone:
‘Ni nyiki hosi ni vazrangeli’?*
11 Ni ku nyike hosi na ni hlundzrukile,
Nakone ni ta yi susa na ni hlundzrukile.
12 A xihoxo xa Efrayimi xi phutsreleliwile;*
A xidoho xake xi bekisiwile.
13 A ta twa swivavu swa ku fana ni swa wansati lweyi a nga ku phulukeni.
Kambe yene i n’wana lweyi a kalaka a nga tlhazrihanga;
A nga humi loko ku tlhasa nkama wa kuva a phulukiwa.
14 Ni ta va huluxa ka ntamu wa Sizra;*
Ni ta va tizrula ka lifu.
Yi kwini mintsrhombo* yaku, wene Lifu?
Wu kwini ntamu wa ku helisa, wene Sizra?
A ni nge ti kombisa ntwelawusiwana.
15 Nambiloko o zrumbuka a xikazri ka tinhlanga,
Yehovha a ta yentxa leswaku ku ta moya wa ku hisa wa le wuxeni;
Wu ta ta hi le mananga akuva wu womisa xihlovo xake ni xinambyana xake.
Wu ta phanga* wukosi byake, ku nga mintxhumu yake hinkwayu ya lisima.
16 Samariya a ta voniwa nandzru hikusa a xandzrukele Xikwembu Nkulukumba wake.
Va ta dlayiwa hi xipada.
A vanavu va ta tsremeleliwa va va hi swiyenge,*
Nakone a makhuzri ya vavasati lava nga ni tinyimba ma ta handzruliwa.”
14 “We Israyele tlhelela ka Yehovha Xikwembu Nkulukumba waku,
Hikusa u wile hi mhaka ya xihoxo xaku.
2 Tlhelelani ka Yehovha,
Mi va mi mu byela mi ku: ‘Hi dzrivaleli xihoxo xezru nakone yamukela swiyentxo swezru leswinene,
Kutani hi ta ku dzrumisa hi minomu yezru ku fana ni loko ku nyikeliwa magandzrelo hi swihon’wana.
3 Asiriya a nge ti hi huluxa.
A hi nge he ti ma dumba makavhalu ya yimpi,*
Nakone a hi nge he ti wu byela ntizro wa mavoko yezru hi ku: “U Xikwembu Nkulukumba wezru!”
Hikusa hi wene u kombaka timpswalu n’wana lweyi a feliwiki hi vapswele.’
4 Ni ta va daha, kutani a va nge he ti tsrhika ku dumbeka kwanga.
Ni ta va zrandzra na swi sukela mbilwini,
Hikusa a na ha mu hlundzrukelanga Israyele.
5 Ni ta fana ni mbezre ka Israyele.
A ta zrumbuka ku fana ni xiluva xa nhova*
Nakone a ta va ni mitsru ya ku yenta ya ku fana ni ya minsinya ya le Lebanoni.
6 A swizrwavana swake swi* ta nava,
A ta xonga ku fana ni minhlwazri,
A ta nun’hwela ku fana ni nsinya wa le Lebanoni.
7 Va ta tlhela va tsrhama a ntsrhutini Wake.
Va ta byala tinhleke nakone va ta beka swiluva ku fana ni nsinya wa mawuvha.
A ndhuma ya Xikwembu Nkulukumba yi ta fana ni ya vhinyu dzra le Lebanoni.
8 Efrayimi a ta vutisa a ku: ‘Ni nghena kwini ka ku tizrela swithombe?’
Ni ta hlamula nakone ni ta mu hlayisa.
Ni ta fana ni nsinya wa wukulu wa yunipa.
Hi mine ni taka mi nyika mihandzru.”
9 I mani lwa tlhazrihiki? A a twisisi mintxhumu leyi.
I mani lweyi a nga ni ku twisisa? A a tivi mintxhumu leyi.
Hikusa a tindlela ta Yehovha i tinene,
Nakone lava ku lulama va ta famba ha tone;
Kambe a vadohi va ta wa ka tone.
Kumbe: “lweyi a taka gama a yentxa swa tingana hi tlhelo dzra tinkuku”.
Leswi tlhamuxelaka leswaku “Xikwembu Nkulukumba a ta byala”.
Leswi tlhamuxelaka leswaku “A Nga Kombisiwanga Timpswalu”.
Leswi tlhamuxelaka leswaku “A Hi Vhanu Vanga”.
Hi ku kongoma: “vana va Israyele”.
Swi tikomba na ku hlayiwa tiko dzra wukazrawa.
Vona ntlhamuxelo wa le hansi ka Hoxeya 1:9.
Vona ntlhamuxelo wa le hansi ka Hoxeya 1:6.
Kumbe: “swiyentxo swa tingana hi tlhelo dzra tinkuku”.
Hi ku kongoma: “a a tsrhiki a wumbuye lebyi nga xikazri ka mavele yake”.
Vona Ntlhamuxelo Wa Mazritu.
Kumbe: “a yentxe swa tingana hi tlhelo dzra tinkuku”.
Kumbe: “Bali Wanga”.
Kumbe: “leswi kokovaka”.
Hi ku kongoma: “yi ta hlamula”.
Leswi tlhamuxelaka leswaku “Xikwembu Nkulukumba A Ta Byala”.
Hi ku kongoma: “swi ta hlamula Yezriyele”.
Hi ku kongoma: “Ni ta tibyalela yene misaveni”.
Vona ntlhamuxelo wa le hansi ka Hoxeya 1:6.
Vona ntlhamuxelo wa le hansi ka Hoxeya 1:9.
Ku hlayiwa lawa a ma tizrisiwa ka wugandzreli bya madzrimi.
Homeri dzrin’we a dzri dzringana 220 wa malitru. Yana Ka Dondzra Swin’wana B14.
Kumbe: “na va nga na n’wana wa hosi”.
Kumbe: “mapilari ya”.
Ku hlayiwa ntxhumu wa kukazri wa ku fana ni vhintali lowu a wu yambaliwa hi vaprista. Vona Ntlhamuxelo Wa Mazritu: “efodi”.
Kumbe: “ni swikwembu swa ndangu”. Hi ku kongoma: “materafime”.
Kumbe: “va ta helisiwa”.
Kumbe: “nkongomiso”.
Kumbexana: “Va ni susele xitxhavu lexi ni kombiwaka xone va ni tisela tingana”.
Kumbe: “Va ta yentxa wunghwavana”.
Kumbe: “kambe a va nge ti yengeseleka”.
Kumbe: “A wunghwavana”.
Kumbe: “nhonga yavu ya wupfhumbi”.
Kumbe: “a swiyentxo swa tingana hi tlhelo dzra tinkuku swi”.
Kumbe: “a switsrungeni”.
Lowu hi xiputukezi wu vitaniwaka carvalho.
Lowu hi xiputukezi wu vitaniwaka estoraque.
Kumbe: “swa tingana hi tlhelo dzra tinkuku”.
Kumbe: “mbarara ya”.
Ku hlayiwa byala lebyi hambiwaka hi trigu; cerveja.
Kumbe: “Va yentxa wunghwavana”.
Hi ku kongoma: “A switlhangu swake swi”. Swi nga yentxeka na ku hlayiwa Efrayimi.
Kumbe: “A madukwa ma”.
Kumbe: “kun’we ni masimu yavu”.
Kumbe: “A vana va hosi”.
I muxaka wa kukazri wa swidodwana swa ku haha leswi daka mpahla.
Ku hlayiwa nkama lowu mintxhumu yi sungulaka ku hluka.
Kumbe: “Ni ndzrokati”.
Kumbe: “hi timpswalu”.
Kumbe: “Ni vana va hosi”.
Kumbe: “a vana va hosi”.
Hi ku kongoma: “a vayavanyisi vavu”.
Hi ku kongoma: “ledzri kalaka dzri nga na mbilu”.
Hi ku kongoma: “akuva a lwa ni yindlu ya”.
Ku hlayiwa xithombe lexi hambiwiki xi fana ni xihon’wana.
Kumbe: “va yentxa leswi bihiki”.
Kumbe: “va ta tsrhovela leswi bihiki”.
Kumbe: “ni vana va hosi”.
Kumbexana: “Vone va ta tlhelela”.
Kumbe: “hi kola ka swiyentxo swa tingana hi tlhelo dzra tinkuku”.
Kumbe: “loko ku fe mhunu”.
Hi ku kongoma: “a ndlwini ya”.
Hi ku kongoma: “a ndlwini ya”.
Kumbe: “ka xikwembu lexo lexi khomisaka tingana”.
Hi ku kongoma: “a ndlwini yanga”.
Kumbe: “A vana va hosi”.
Hi ku kongoma: “va ta miyetiwa”.
Kumbe: “a yi va helisanga hi ku helela”.
Leswi liki, va ta lavisana ni xikhatiso xavu lexi fanaka ni kangi.
Kumbe: “a ta bela”.
Hi ku kongoma: “yi ta miyetiwa”.
Leswi liki, hi vaprofeta ni van’wana lava zrumeliwiki akuva va ya dondzrisa Israyele.
Hi ku kongoma: “a tihanyisa hi moya”.
Kumbe: “wukosi”.
Hi ku kongoma: “a ya masin’wini ya”.
Kumbe: “Siriya”.
Kumbe: “timbarara”.
Kumbe: “swihon’wana; makonyana”. Ku hlayiwa swithombe leswi hambiwiki swi fana ni swihon’wana.
Ku hlayiwa xihazri lexi hi xiputukezi xi vitaniwaka leopardo.
Kumbe: “ni bere”.
Hi ku kongoma: “Ni vayavanyisi”.
Kumbe: “ni vana va hosi”.
Kumbe: “xi bekisiwile”.
Kumbe: “Xeyole”. Ku hlayiwa sizra ledzri tolovelekiki dzra vhanu. Vona Ntlhamuxelo Wa Mazritu.
Ku hlayiwa wuswikoti lebyi lifu dzri nga na byone bya ku vanga ku xaniseka.
Kumbe: “Wu ta teka”.
Kumbe: “va ta pulukanyiseliwa”.
Hi ku kongoma: “A hi nge he ti khandzriya makavhalu”.
Hi ku kongoma: “ku fana ni gon’wa”.
Kumbe: “A tinkambu take letitsrongo ti”.