YUWELE
1 A zritu dzra Yehovha ledzri Yuwele* n’wana wa Pethuwele a dzri yamukeliki hi ledzri:
2 “Twanani leswi n’wine vakulukumba,
Zreyani ndleve n’wine hinkwenu lava tsrhamaka tikweni ledzri.
Xana ku humelele ntxhumu wa ku fana ni lowu a masikwini yenu
Kumbe a masikwini ya vakokwana venu?
3 Leswo swi byelani vanenu,
Kutani vanenu va ta byela vanavu,
Nakone vanavu va ta byela lixaka ledzri landzrelaka.
4 Leswi mintete leyi honetelaka yi swi siyiki, swi diwe hi mintete leyi hahaka hi ntlawa;
Leswi mintete leyi hahaka hi ntlawa yi swi siyiki, swi diwe hi mintete leyi kalaka yi nga na timpapa;
Nakone leswi mintete leyi kalaka yi nga na timpapa yi swi siyiki swi diwe hi mintete leyi nga ni magolo.
5 Pfukani n’wine timpopswi nakone dzrilani!
Dzrilani hinkwenu n’wine vakukutleli va vhinyu,*
Hi mhaka ya leswi mi tekeliwiki vhinyu.
6 Hikusa ku ni ntlawa lowukulu wa mintete, lowu fanaka ni tiko lowu hlaseliki tiko dzranga, wu ni ntamu nakone i wukulu lakakuva a wu konteki.
A matinyo ya yone ma fana ni ya nghonyama ni tinhlaya ta yone ti fana ni ta nghonyama.
7 Wu de nsinya wanga wa mawuvha wu hela wu tlhela wu yentxa leswaku a nkuwa wanga wu va xikundzru.
Wu yi siye na yi nga na ntxhumu wu va wu yi txukumeta,
Wu siye mazrwavi ya yone lamampshwa na ma nga na ntxhumu.
8 Dzrila ku fana ni mumpshwa* lweyi a yambaliki masaka
Hi kola ka ku feliwa hi lweyi a a ta va nuna wake.
9 A tempeleni dzra Yehovha ku hele gandzrelo dzra tinhleke ni gandzrelo dzra swa ku nwa;
A vaprista ku nga malandzra ya Yehovha, va le xidzrilweni.
10 A masimu ma hohlotiwile, a misava yi le xidzrilweni;
Hikusa a tinhleke ti helisiwile, a vhinyu dzri womile, a mafuzra ma helile.
11 A vadzrimi va hele ntamu, a vakhayi va mawuvha va le ku dzrileni,
Hi mhaka ya trigu ni sevhada;
Hikusa a ntsrhovelo wa masimu wu helisiwile.
12 A nsinya wa mawuvha wu womile,
A nkuwa wu bunile.
A nsinya wa magranada, a nkindzru ni nsinya wa mansam,
Minsinya hinkwayu ya le masin’wini yi womile;
Hikusa a ku nyonxa ka tiko ku ndzruluke tingana.
13 Yambalani masaka mi va mi dzrila* n’wine vaprista.
Dzrilani n’wine malandzra ya le altarini.
Nghenani tempeleni nakone hetani wusiku hinkwabyu na mi yambale masaka, n’wine malandzra ya Xikwembu Nkulukumba wanga;
Hikusa a ka ha na mhunu lweyi a buyisaka magandzrelo ya tinhleke ni magandzrelo ya swa ku nwa a tempeleni dzra Xikwembu Nkulukumba wenu.
14 Tilulamiselani akuva mi ta titsrona swakuda; vitanani vhanu akuva va ta nhlengeletanwini ya ku xwenga.
Hlengeletani vakulukumba ni vahanyi hinkwavu va tiko ledzri
A tempeleni dzra Yehovha Xikwembu Nkulukumba wenu, mi va mi kombela leswaku Yehovha a mi pfuna.
15 Khombo hi mhaka ya siku ledzro!
Hikusa a siku dzra Yehovha dzri le kusuhi
Hi siku ledzro Lweyi wa Ntamu Hinkwawu a ta helisa!
16 Xana a ku susiwanga swakuda mahlweni kwezru;
Ni ku nyonxa a ndlwini ya Xikwembu Nkulukumba wezru?
17 Va byale timbewu ti va ti buna.*
A ka ku beketela kone swakuda ke baa.
A matsrhala ma hohlotiwile, hikusa a ku tsrhoveliwanga ntxhumu.
18 Nambi swifuyu swa konya!
A tihomu ta zrendzrelekela na ti pfilunganyekile, hikusa lomu swihazri swi byiseliwaka kone a ku na byanyi!
Nakone a mintlhambi ya tihamba ya xaniseka hi mhaka ya xidoho xa vhanu.
19 Ni ta ku vitana, We Yehovha;
Hikusa ndzrilo wu hise mimbangu ya ku byisela ka yone swihazri, ya le mananga,*
Nakone a malangavi ma hise minsinya hinkwayu ya le masin’wini.
20 Nambi swihazri swa nhova swa ku dzrilela,
Hikusa a swinambyana swi womile,
Nakone ndzrilo wu hise mimbangu ya ku byisela ka yone swifuyu ya le mananga.”*
2 “Txhayani xipalapala a Siyoni!
Hambani pongwe dzra yimpi a nhaveni yanga ya ku xwenga.
A vhanu hinkwavu va tiko a va zruzrumeli,
Hikusa siku dzra Yehovha dzra tsrhindzrekela! Dzri le kusuhi!
2 I siku dzra munyama ni mphumelo,
Siku dzra matlavi ni mphumelo lowukulu.
Dzri fana ni ku tlhava ka dambu loku hangalakaka tinhaveni.
Ku ni khandzra ledzrikulu dzra vhanu nakone dzri nga ni ntamu;
A ku ngi ngi sama ku va ni khandzra dzra ku fana ni ledzro,
Nakone a ku nge he tlheli ku va ni dzrin’wana dzra ku fana na dzrone,
A malembeni hinkwawu ya tinxaka leti ta ha taka.
3 A mahlweni ka dzrone ku ni ndzrilo lowu honetelaka,
Nakone a ntsrhaku ka dzrone ku ni malangavi lama hisetelaka.
A mbangu lowu nga mahlweni ka dzrone wu fana ni xizramba xa Edeni,
Kambe a ntsrhaku ka dzrone i mananga lama honekiki,
A ku huluki ntxhumu ni wun’we.
4 A matsrhamela ya dzrone ma fana ni matsrhamela ya makavhalu,
Va tsrutsruma ku fana ni makavhalu ya yimpi.
5 A mpfumawulu wa vone wu fana ni wa tin’qolo ta yimpi loko ti ntlula a henhla a wugan’wini ka tinhava,
Wu fana ni mpfumawulu wa ndzrilo lowu pfuzraka lowu hisaka byanyi bya ku woma.
Va fana ni vhanu va ntamu lava lulameliki ku ya yimpini.
6 A matiko ma ta vindlavindleka hi mhaka yavu.
A mawuso hinkwawu ma ta kombisa ku kazrateka.*
7 Va hlasela ku fana ni valwi va yimpi,
Va khwela mimuru ku fana ni masotxha,
Mun’wana ni mun’wana a tama a famba a ndleleni yake,
Nakone a va hambuki a ndleleni yavu.
8 A va txhovhananani;
Mun’wana ni mun’wana a famba a ndleleni yake.
Loko lavan’wana va vavisiwa hi matlhazri kumbe va fa,
Lavan’wana va ha tama va fambisa xileswi a va fambisa xiswone.
9 Va hlasela doropa, va tsrutsruma henhla ka muru.
Va khwela ka tiyindlu va nghena hi majanela ku fana ni vayivi.
10 A mahlweni kwavu a misava ya tsrekatsreka ni matilo ma zrekazreka.
A dambu ni n’weti swi mphuma,
Nakone tinyeleti ti nga ha phatimi.
11 Yehovha a ta huwelela hi zritu ledzrikulu a mahlweni ka khandzra dzrake, hikusa khandzra dzrake i dzrikulu ngopfu swinene.
Hikusa Lweyi a yentxaka leswi a swi hlayaka a ni ntamu;
Hikusa siku dzra Yehovha i dzrikulu nakone dzri txhavisa ngopfu swinene.
I mani lweyi a nga kotaka ku dzri tiyiselela?
12 “Xileswo, na ka ha li nkama, Yehovha a li: “Tlhelelani kwanga hi mbilu hinkwayu,
Hi ku titsrona swakuda, ku dzrila ni hi xidzrilo.
13 Handzrulani timbilu tenu, ku nga li mpahla yenu,
Mi va mi tlhelela ka Yehovha Xikwembu Nkulukumba wenu,
Hikusa a ni ntwelawusiwana* ni timpswalu, a lehe mbilu* nakone a tale lizrandzru dzra ku dumbeka,
Kutani a ta tsrhika ku buyisa* khombo ledzri a djulaka ku dzri buyisa.
14 Swi tiva hi mani kumbe a nga tlhelela ntsrhaku a va a txintxa *xiboho xake,
Kutani a siya tovoko,
Hi ku yentxa leswaku ku sala swa ku hambela Yehovha Xikwembu Nkulukumba wenu a gandzrelo dzra tinhleke ni gandzrelo dzra swa ku nwa?
15 Txhayani limhondzro a Siyoni!
Tilulamiselani akuva mi titsrona swakuda; vitanani vhanu akuva va ta nhlengeletanwini ya ku xwenga.
16 Hlengeletani vhanu; xwengisani nhlengeletanu.
Vitanani vavanuna lava duhwaliki,* hlengeletani vatsrongwana ni swibebetana.
A muteki ni mutekiwa a va hume kwartu dzravu.
17 Na va li makazri ka koredori ni altari,
A vaprista, ku nga lava tizrelaka Yehovha, a va dzrili, va ku:
‘We Yehovha, va tweli wusiwana vhanu vaku,
U nga yentxi leswaku pfindla dzraku dzri va xihlekiso,
Hi ku pfumelela leswaku matiko ma va fuma.
Ha yini matiko ma fanela ku hlaya leswaku: “A kwini Xikwembu Nkulukumba wavu?”’
18 Yehovha a ta hisekela ku sizrelela tiko dzrake
Nakone a ta kombisa ntwelawusiwana ka vhanu vake.
19 Yehovha a ta hlamula vhanu vake a ku:
‘Ni mi nyika tinhleke, vhinyu ni mafuzra,
Nakone mi ta yaneliseka hi ku helela;
Ni nge he mi yentxi mi va xihlekiso a xikazri ka matiko.
20 Ni ta mu tsrhindzreta kule na n’wine lweyi a buyaka hi le n’walungu;
Ni ta mu hlongola, ni mu yisa tikweni ledzri kalaka dzri nga na mati nakone ku kalaka ku nga tsrhami mhunu,
A khandzra dzrake ledzri dzri nga mahlweni dzri ta ya lwandle dzra le wuxeni*
Kasi a khandzra dzrake ledzri dzri nga ntsrhaku, dzri ta ya lwandle ledzri nga mpeladambu,*
A mizri wake wu ta nun’hwa,
Nakone a ku nun’hwa kwake ku ta tama ku hangalaka a tikweni
Hikusa Xikwembu Nkulukumba a ta yentxa mintxhumu leyikulu ngopfu.’
21 U nga txhavi, We tiko.
Nyonxa u nyonxisisa, hikusa Yehovha a ta yentxa mintxhumu leyikulu ngopfu.
22 Mi nga txhavi, n’wine swihazri swa nhova,
Hikusa mimbangu ya ku byisela ka yone swifuyu ya le mananga* yi ta va ni byanyi,
Nakone a minsinya yi ta beka mihandzru;
A nkuwa ni nsinya wa mawuvha swi ta pswala ngopfu swinene.
23 Nyonxani mi nyonxisisa ka Yehovha Xikwembu Nkulukumba wenu, n’wine vana va Siyoni;
Hikusa a ta mi nyika mpfula ya ku sungula ka wuxika hi mpimu wa kone
Ni ta mi nisela mpfula leyikulu ngopfu,
Mpfula ya ku nghena ka wuxika ni mpfula ya ku nghena ka malanga hi lani a swili ha kone khale.
24 A mimbangu ya ku hehezrela ka yone yi ta tala hi tinhleke,
Ni mimbangu ya ku pfuvela ka yone yi ta tala hi vhinyu ni mafuzra.
25 Ni ta mi hakela malembe hinkwawu
Lawa a ntsrhovelo wenu wu hlaseliwiki hi mintete leyi hahaka hi ntlawa, mintete ya ku kala timpapa, mintete ya magolo ni hi mintete leyi honetelaka,
Ku nga khandzra dzranga ledzrikulu ledzri ni dzri zrumeliki kwenu.
26 Nakunene mi ta da mi xuzra
Nakone mi ta dzrumisa vito dzra Yehovha Xikwembu Nkulukumba wenu,
Lweyi a mi yentxeliki mintxhumu ya ku hlamalisa;
A vhanu vanga va nge he txhuki va khomisiwa tingana.
27 Nakone mi ta swi tiva leswaku ni na n’wine vhanu va Israyele
Ni leswaku hi mine Yehovha, Xikwembu Nkulukumba wenu — a ku na mun’wana!
A vhanu vanga va nge he txhuki va khomisiwa tingana.
28 Ntsrhaku ka leswo, ni ta txhulula moya wanga ka vhanu hinkwavu,*
Kutani a vana venu va xinuna ni va xisati va ta profeta,
Vavanuna lava duhwaliki va ta va ni milozro,
Nakone a vana venu va madjaha va ta vona swivoniso.
29 Nambi ka swikazrawa swanga swa xinuna ni swa xisati
Ni ta txhulula moya wanga a masikwini wolawo.
30 Ni ta yentxa mintxhumu ya ku hlamalisa a matilweni ni le misaveni,
Mintxhumu yoleyo ku ta va ngati, ndzrilo ni matlavi ya ximusi.
31 Na siku ledzrikulu dzra ku phatima dzra Yehovha dzri nga si na tlhasa,
A dambu dzri ta ndzrulutiwa dzri va munyama ni n’weti wu ta pshwuka wu fana ni ngati.
32 Kutani, mun’wana ni mun’wana lweyi a vitanaka vito dzra Yehovha a ta huluxiwa;
Hikusa a Nhaveni ya Siyoni ni le Yerusalema ku ta va ni lava taka huluka hi lani Yehovha a hlayiki ha kone,
Lava taka huluka hi lava Yehovha a va vitanaka.”
3 “Vonani! A masikwini wolawo ni le nkameni wolowo,
Loko lava nga swikazrawa ni va tlhelisela Yuda ni le Yerusalema,
2 Ni ta hlengeleta ni matiko hinkwawu
Ni va ni ma yentxa ma fulamela a Nkoveni wa Yehoxafati.*
Ni ta va yavanyisa kolanu
Akuva ku pfuneka vhanu vanga ni pfindla dzranga, ku nga Israyele,
Hikusa va va hangalase a xikazri ka va matiko,
Va tlhela va yavelana tiko dzranga.
3 Va hambele vhanu vanga mpshwampshwa;*
A va xavisa xidjahatana akuva va thola nghwavana,
Nakone a va xavisa xin’hwanyatana hi vhinyu akuva va nwa.
4 Wene Tiri na Sidoni ni miganga hinkwayu ya Filistiya,
Mi na yini na mine?
Mi nga va na mo ni hakelisa hi ntxhumu wa kukazri wa ku biha lowu ni mi yentxeliki wone?
Loko a li leswaku mo ni hakelisa,
Hi ku kahlula na mine ni ta mi hakelisa hi lani na n’wine mi ni yentxeliki ha kone.
5 Leswi mi tekiki prata ni woru dzranga,
Mi tekiki ni wukosi byanga bya lisima ngopfu mi swi yisa a matempeleni yenu,
6 Nakone mi xavisiki vhanu va le Yuda ni va le Yerusalema ka Vagriki,
Akuva mi va yisa kule ni tiko dzravu,
7 Ni ta yentxa leswaku vhanu vanga va suka a mbangwini lowu va xavisiwiki ka wone,
Nakone ni ta mi yentxa mi hakela hi ku ya hi leswi mi nga va yentxa swone.
8 Ni ta nyikela* vana venu va madjaha ni vana venu va van’hwanyana a mavokweni ya vhanu va le Yuda,
Kutani vone va ta va nyikela* ka vhanu va le Xeba, ka tiko dzra le kule;
Hikusa Yehovha a hlaye swoswo.
9 Huwelelani a xikazri ka matiko mi ku:
‘Tilulamiselani* akuva mi ya yimpini! Pfuxani lava nga ni ntamu!
Tsrhikani masotxha hinkwawu ma tsrhindzrekela ma va ma hlasela!
10 Yentxani swikomu swenu swi* va swipada ni masikela yenu ma va matlhazri.
Lweyi a tsraniki a a ku: “Ni ni ntamu.”
11 Buyani mi pfunanana, n’wine hinkwenu, matiko lama nga matlhelweni, hlengeletanani!’”
We Yehovha, yentxa leswaku a masotxha yaku ma fulamela.
12 “A matiko hinkwawu a ma pfuki ma ta a Nkoveni wa Yehoxafati,
Hikusa ni ta tsrhama kone akuva ni yavanyisa matiko hinkwawu lama nga matlhelweni.
13 Petani sikela, hikusa a ntsrhovelo wu wupfile.
Buyani mi pswanyetela, hikusa xa ku pfuvela ka xone vhinyu xi talile.
A swipfuvelo swa dibekela, hikusa a wubihi bya matiko i byikulu ngopfu.
14 Switsrhungu, switsrhungu swi le nkoveni lani vhanu va taka yavanyiseliwa kone,
Hikusa a siku dzra Yehovha dzri le kusuhi.
15 A dambu ni n’weti swi ta mphuma,
Nakone tinyeleti ti nga ha phatimi.
16 Yehovha a ta bonga na a li Siyoni,
Na a li Yerusalema a ta tlakuxa zritu dzrake.
A matilo ni misava swi ta zruzrumela;
Kambe Yehovha a ta va wutumbelo bya vhanu vake,
Khokholo ka vhanu va Israyele.
17 Mi ta tiva leswaku hi mine Yehovha Xikwembu Nkulukumba wenu, lweyi a tsrhamaka a Siyoni, a nhaveni yanga ya ku xwenga.
A Yerusalema a ta va mbangu wa ku xwenga,
Nakone a vapfi a va nge ti khaluta ha kone.
18 A masikwini wolawo a tinhava ti ta nthona vhinyu dzra ku tsrokotsra,
A maganga ma ta va ni leiti,
A swinambyana swa Yuda swi ta tala hi mati lama tsrutsrumaka.
A ndlwini ya Yehovha ku ta va ni xihlovo,
Xi ta txheletela Nkova lowu nga ni Minsinya ya Munga.*
19 Kambe a Egipta ku ta va zrumbi,
Nakone a Edomu ku ta va mananga lawa ku kalaka ku nga tsrhami mhunu,
Hi mhaka wubihi lebyi yentxeliwiki vhanu va le Yuda,
Lava a tikweni dzravu va nga dlaya vhanu lava kalaka va nga na nandzru.
20 Kambe a Yuda ku ta tsrhama vhanu minkama hinkwayu;
Ni le Yerusalema a tinxakeni hinkwatu.
21 A ngati yavu leyi a ni yi vona nandzru, a ni nge he ti yi vona nandzru;
Yehovha a ta tsrhama Siyoni.”
Leswi tlhamuxelaka leswaku “Yehovha i Xikwembu Nkulukumba”.
Hi ku kongoma: “va vhinyu ledzrimpshwa”. Kumbe: “va vhinyu dzra ku tsrokotsra”.
Kumbe: “n’hwanyana wa ku a ngi ngi sama a yentxa swa tinkuku”.
Kumbe: “mi va mi ti ba swifuva”.
Kumbe: “ti buna mafotxholweni yavu”.
Vona Ntlhamuxelo Wa Mazritu.
Vona Ntlhamuxelo Wa Mazritu.
Kumbe: “ma ta pshwuka”.
Kumbe: “a ni wunene”.
Kumbe: “a hlwela ku hlundzruka”.
Kumbe: “a ta tisola hi mhaka ya”.
Kumbe: “a nga tisola hi mhaka ya”.
Kumbe: “Vitanani vakulukumba”.
Leswi liki “Lwandle ledzri fiki”.
Leswi liki “Lwandle dzra Mediteraniyu”.
Vona Ntlhamuxelo Wa Mazritu.
Hi ku kongoma: “ka nyama hinkwayu”.
Leswi tlhamuxelaka leswaku “Yehovha i muyavanyisi”.
Kumbe: “wuhlolotwana”.
Hi ku kongoma: “Ni ta xavisa”.
Hi ku kongoma: “va ta va xavisa”.
Kumbe: “Tixwengisani”.
Hi ku kongoma: “magedjo yenu ma”.
Lowu hi xiputukezi wu vitaniwaka Acácia.