SOFANIYA
1 Leswi, hi leswi Yehovha a swi byeliki Sofaniya,* n’wana wa Kuxi, n’wana wa Gedaliya, n’wana wa Amariya, n’wana wa Ezekiya, a masikwini ya Yosiya n’wana wa Amoni hosi ya Yuda:
2 Yehovha a li: “Ni ta helisa hi ku helela hinkwaswu leswi swi nga misaveni”.
3 “Ni ta helisa mhunu ni xihazri.
Ni ta helisa tinyanyana ni tihlampfi,
Ni ta helisa hinkwaswu leswi phazriyetanaka* ni helisa ni lava va ku biha,
Nakone ni ta helisa vhanu a misaveni”, ku hlaya Yehovha.
4 “Ni ta nalavuta voko dzranga ku lwisana na Yuda
Ni ku lwisana ni vhanu hinkwavu lava va tsrhamaka Yerusalema,
Nakone ni ta helisa hinkwaswu swa Bali leswi swi taka sala a mbangwini lowu,
A vito dzra vaprista va swikwembu swa valuveli kun’we ni vaprista lavan’wana,
5 Ni ta helisa lava khinsamelaka khandzra dzra le matilweni* a henhla ka tiyindlu,
Lava khinsamaka va hlambanya leswaku va ta dumbeka ka Yehovha
Nakasi hi nkama wu li wun’we va hlambanya leswaku va ta dumbeka ka Malkamu,
6 Ni lava va tsrhikaka ku landzrela Yehovha,
Lava kalaka va nga djuleteli Yehovha nambi ku mu vutisa.”
7 Miyelani a mahlweni ka Yehovha Hosi Leyi Tlakukiki, hikusa a siku dzra Yehovha dzri le kusuhi.
Yehovha a lulamisele gandzrelo, a xwengise vazrambiwa vake.
8 “Hi siku dzra gandzrelo dzranga, mine Yehovha ni ta khatisa vazrangeli,
Vana va hosi ni hinkwavu lava yambalaka ku fana ni vhanu va matiko.
9 Hi siku ledzro ni ta khatisa hinkwavu lava va khwelaka xiluvelweni,*
Lava tataka yindlu ya hosi yavu hi madzolonga ni wukanganyisi.
10 Hi siku ledzro,” ku hlaya Yehovha,
“Ku ta va ni xidzrilo lexi xi pfaka hi le Nyangweni wa Hlampfi,
Xidzrilo lexi xi pfaka hi le Doropeni Ledzrimpshwa,*
Ni ku dzrindzra lokukulu loku ku pfaka hi le tinhaveni.
11 Dzrilani n’wine mi tsrhamaka a Makitexi,*
Hikusa a vaxavisi hinkwavu va helisiwile;*
Hinkwavu lava a va pima prata va helisiwile.
12 Hi nkama wolowo ni ta handzra Yerusalema na ni tizrisa mimotsre
Nakone ni ta khatisa lava va tivonaka na va yanelisekile ka ndlela leyi va hanyaka ha yone,* va va va tibyela leswi:
‘Yehovha a nge ti yentxa ntxhumu nambi xa xinene kumbe xa ku biha.’
13 A wukosi byake byi ta phangiwa, ni tiyindlu take ti ta helisiwa.
Va ta yaka tiyindlu, kambe a va nge ti tsrhama ka tone;
Va ta byala minsinya ya mawuvha, kambe a va nge ti nwa vhinyu dzra kone.
14 A siku ledzrikulu dzra Yehovha dzri le kusuhi!
Dzri kusuhi nakone dzri tsrhindzrekela hi ku kahlula ngopfu swinene!
A mpfumawulu wa siku dzra Yehovha wa bava.
Hi siku ledzro nambi mulwi wa yimpi a ta ba nyandha.
15 Siku ledzro, i siku dzra ku hlundzruka,
Siku dzra nhlomulo ni ku xukuvala,
Siku dzra xidzedze ni ku honekela,
Siku dzra munyama ni mphumelo,
Siku dzra matlavi ni mphumelo lowukulu,
16 Siku dzra ku txhayiwa ka limhondzro ni dzra pongwe dzra yimpi,
Dzra ku lwisana ni madoropa lawa ma tiyisiwiki ni swihondzro leswi nga mimbangwini leyi tlakukiki.*
17 Ni ta vangela vhanu swikazratu,
Nakone va ta famba ingiki vo va swifamahlo,
Hikusa i Yehovha lweyi va mu doheliki.
A ngati yavu yi ta txhululiwa ku fana ni ntsrhuzri,
A nyama yavu yi* ta fana ni nswanyu.
18 Nambi prata dzravu kumbe woru dzravu a swi nge ti swi kota ku va huluxa a sikwini dzra ku hlundzruka ka Yehovha.
A misava hinkwayu yi ta helisiwa hi ndzrilo wa ku hiseka kwake,
Hikusa hinkwavu lava va tsrhamaka misaveni a ta va helisa hi ndlela ya ku txhavisa.”
2 Hlengeletanani, ina, hlengeletanani,
Wene tiko ledzri kalaka dzri nga na tingana.
2 Na xileleto xi nge si na hetiseka,
Na siku dzri nge si na khaluta ku fana ni byanyi lebyi hungisiwaka hi moya
Na mahlundzru lamakulu ya Yehovha ma nge si na mi wela,
Na siku dzra mahlundzru ya Yehovha dzri nge si na mi tela,
3 Djulani Yehovha n’wine hinkwenu va ku zrula* misaveni,
Lava yingisetaka milawu yake ya ku lulama.*
Djulani ku lulama, djulani ku zrula,
Kumbexana mi* ta tumbetiwa a sikwini dzra mahlundzru ya Yehovha.
4 Hikusa tiko dzra Gaza dzri ta va doropa ledzri tsrukuliwiki;
Dzra Axkeloni dzri ta va zrumbi.
Lava tsrhamaka a Axidodi va ta hlongoliwa nhlikanhini hi valala vavu,
Nakone dzra Ekroni dzri ta tsruvuliwa.
5 “Khombo ka lava tsrhamaka mugangeni lowu nga kusuhi ni lwandle, tiko dzra Vakereti!
Yehovha a mi vona nandzru.*
Wene Kanana tiko dzra Vafilista, ni ta ku helisa,
Lakakuva ku nga ha vi na mhunu lweyi a tsrhamaka kwaku.
6 A muganga wolowo wu ta va mimbangu ya ku byisela ka yone,
Leyi ku nga ni swihlovo swa vabyisi ni swib’aya swa tihamba, leswi hambiwiki hi mazribye.
7 Wu ta va mbangu wa lava taka sala va yindlu ya Yuda;
Va ta dela ka wone.
Va ta yetlela a mitini ya Axkeloni loko dzri pela.
Hikusa Yehovha Xikwembu Nkulukumba wavu a ta va ni mhaka na vone,*
Nakone a ta buyisa swikazrawa swavu.”
8 “Ni twe swizruku swa Mowabu ni swipoyilo swa Vaamoni,
Lava hlekiki vhanu vanga nakone hi ku tibyela, va va txhavisela hi leswaku va ta va tekela mbangu wavu.
9 Xileswo, swanga hi leswi nakunene ni hanyaka,” ku hlaya Yehovha wa makhandzra, Xikwembu Nkulukumba wa Israyele,
“Mowabu a ta fana na Sodoma,
Nakone a Vaamoni va ta fana na Gomora,
Mbangu lowu ku nga ni swimila leswi nga ni mitwa, xihlovo xa mati ya munyu, tiko ledzri nga zrumbi hi lani ku nga helikiki.
A vhanu vanga lava taka huluka va ta teka mintxhumu yavu,
Ni tiko dzranga ledzri taka huluka dzri ta teka tiko dzravu.
10 Va ta kuma hakelo ledzri hi kola ka ku tikulisa kwavu,
Hikusa va hleke vhanu va Yehovha wa makhandzra va tlhela va tikulisa kwavu.
11 Yehovha a ta lwisana na vone hi ndlela leyi txhavisaka
Hikusa a ta helisa swikwembu hinkwaswu swa le misaveni
Nakone a swihlale hinkwaswu swa matiko swi ta mu khinsamela*
Na xin’wana ni xin’wana xi li mbangwini wa xone.
12 Na n’wine Vaetiyopiya mi ta dlayiwa hi xipada xanga.
13 A ta nalavuta voko dzrake dzri kongoma a n’walungu, kutani a helisa a Asiriya,
A yentxa leswaku Ninivha a sala na a li zrumbi, a woma a fana ni mananga.
14 A mintlhambi yi ta yetlela a makazri kwake, swihazri swa nhova swa mixaka hinkwayu.*
A khungula* ni nhungu* swi ta yetlela a xikazri ka mapilari yavu.
Ku ta twala zritu na dzri yimbelela a janeleni.
A nyangweni ku ta va ni ku honekela;
Hikusa a ta honetela lakakuva ku sala ku voneka mapulangu ya nkedari.
15 Ledzri i doropa ledzri dzri tikulisaka ledzri a dzri tsrhama na dzri sizrelelekile,
Nakone dzri tibyelaka mbilwini ya dzrone dzri ku: ‘Hi mine wa lisima ngopfu, a ku na mun’wana lweyi a fanaka na mine.’
Hinkwavu lava taka vona doropa ledzro va ta tsremeka nhlana,
I mbangu wa kuva ku yetlela swihazri swa nhova!
Hinkwavu lava taka khaluta hi kwake va ta ba noti va hlakahla ni tinhloko.”*
3 Khombo ka doropa ledzri nga ni wupfukeli, ledzri kalaka dzri nga basanga nakone dzri xanisanaka!
2 A dzri yingiseti zritu ni dzrin’we; a dzri yamukeli xilayu ni xin’we.
A dzri mu dumbi Yehovha nambi ku tsrhindzrekela ka Xikwembu Nkulukumba wa dzrone.
3 A vazrangeli lava nga makazri ka dzrone va fana ni tinghonyama leti bongaka.
A vayavanyisi va dzrone va fana ni timbyana ta nhova* a wusikwini;
A va siyi nambi ku li zrambu dzrinene akuva va ta dzri kutsra mundzruku ka kone.
4 A vaprofeta va dzrone i vawongi lava tikulisaka.
A vaprista va dzrone va ntxhimisa mintxhumu leyi xwengiki;
Va dzrela Nawu.
5 Yehovha a lulamile nakone a le xikazri ka dzrone; a nga yentxi mintxhumu ya ku biha.
Ku fana ni leswi dambu dzri humaka mixo wun’wana ni wun’wana, minkama hinkwayu a tivisa milawu yake,
Mixo wun’wana ni wun’wana.
Kambe lweyi a kalaka a nga lulamanga, a nga dani.
6 “Ni helise matiko; a swihondzro swavu* swi sale na swi li mazrumbi.
Ni honetele tindlela tavu nakone a ka ha na mhunu lweyi a khalutaka hi ka tone.
A madoropa yavu ma sale na ma li mazrumbi, ma nga li na mhunu nakone ku nge na mhunu lweyi a tsrhamaka ka wone.
7 Ni dzri byele ni ku: ‘Nakunene u ta ni txhava u va u yamukela xilayu,’*
Akuva mbangu lowu a tsrhamaka ka wone wu nga helisiwi,
Ni ta yentxa leswaku a tihlamulela* hi kola ka swidoho swake hinkwaswu,
Kambe hi lani a va ya va swi hisekela ngopfu ku yentxa mintxhumu ya ku biha;
8 ‘Xileswo zrindzrelani mine,’* ku hlaya Yehovha,
‘Ku ya tlhasa siku ledzri ni taka sekeleka ni ya hlasela vhanu ni va ni teka mintxhumu yavu,
Hikusa a xiboho xanga xa wuyavanyisi i ku va ni hlengeleta matiko ni va ni tlhanganisa mimfumu,
Akuva ni va txhululela mahlundzru yanga, mahlundzru yanga hinkwawu lamakulu;
Hikusa mahlundzru yanga ma fana ni ndzrilo nakone ma ta hisa misava hinkwayu.
9 Hi nkama wolowo, ni ta dondzrisa vhanu hinkwavu akuva va vulavula lidzrimi ledzri xwengiki,*
Akuva hinkwavu va vitana vito dzranga,* mine Yehovha,
Ku yentxela leswaku va ni tizrela hi wumun’we.’
10 Ku sukela a migangeni ya milambu ya Etiyopiya,
A vhanu vanga lava hangalakiki, lava va ni kombelaka, va ta ni buyisela swihanano.
11 Hi siku ledzro a wu nge ti danisiwa
Hi kola ka swiyentxo swaku hinkwaswu leswi u lwisaniki na mine ha swone,
Hikusa ni ta susa lava tikulisaka lava nga xikazri kwaku;
Kutani wene u nge he ti txhuka u tikulisa a nhaveni yanga ya ku xwenga.
12 Ni ta siya lava titsrongahataka ni ku tibeka hansi a makazri kwenu,
Kutani va ta djula wutumbelo ka* Yehovha.
13 Lava va saliki va Israyele a va nge ti yentxa leswi bihiki;
A va nge ti vulavula madzrimi, nakone a milon’wini yavu a ku nge ti kumiwa lidzrimi dzra madzrimi;
Va ta da* va va va yetlela, na ku nga na lweyi a va txhavisaka.”
14 Huwelela hi ku nyonxa, We n’hwanyana wa Siyoni!
Huwelela hi ku hlula, We Israyele!
Nyonxa, u nyonxisisa hi mbilu yaku hinkwayu, We n’hwanyana wa Yerusalema!
15 Yehovha a ku susile ka xikhatiso lexi a wu li ka xone.
A yentxe leswaku nala waku a tlhela.
Yehovha Hosi ya Israyele, a na wene.
U nge he ti txhava khombo ni dzrin’we.
16 Hi siku ledzro, Yerusalema a ta byeliwa leswi:
“U nga txhavi, We Siyoni.
U nga tsrhiki mavoko yaku ma lela.
17 Yehovha Xikwembu Nkulukumba waku a na wene.
Leswi a nga mulwi wa yimpi Lweyi a nga ni ntamu a ta ku huluxa.
A ta nyonxa hi ku nyonxa lokukulu hi mhaka yaku
A ta miyela,* hikuva a ku kombisa lizrandzru dzrake, swi ta yentxa leswaku a titwa na a yanelisekile.
A ta ba nkulungwana wa ku huwelela ka ku nyonxa hi kola kwaku.
18 Ni ta hlengeleta lava khunguvanyekiki hi ku va va nga va nga kone minkhubyini yaku;
Va ve kule na wene nkama lowu a va tiyisela ku dzreliwa hi mhaka yake.
19 Hi nkama wolowo ni ta lwisana ni hinkwavu lava ku xanisaka;
Ni ta huluxa lava khutaka,
Nakone ni ta hlengeleta lava hangalakiki.
Ni ta yentxa leswaku va va vhanu lava hloniphekaka nakone va va ni ndhuma
A matikweni hinkwawu lawa va khomisiwiki tingana ka wone.
20 Hi nkama wolowo ni ta mi tlhelisa hi le wukazraweni,
Hi nkama lowu ni taka mi hlengeleta ha wone.
Hikusa ni ta yentxa leswaku mi va ni ndhuma* ni leswaku mi hlonipheka a xikazri ka vhanu hinkwavu va misava,
Loko ni buyisa vhanu vaku va tlhela hi le wukazraweni na u swi vona,” ku hlaya Yehovha.
Leswi liki, Yehovha a fihlile (a bekisile).
Kumbe: “mazribye ya xikhunguvanyiso”.
Swi tikomba na ku hlayiwa dambu, n’weti ni tinyeleti.
Swi tikomba na ku hlayiwa xiluvelo xa kukazri lani a ku kumeka xitsrhamu xa wuhosi.
Kumbe: “hi le Mugangeni wa Wubidzri”.
Swi tikomba na ku hlayiwa mbangu wa kukazri lowu a wu kumeka a Yerusalema, kusuhi ni Nyangwa wa Hlampfi.
Hi ku kongoma: “va miyetiwile”.
Hi ku kongoma: “lava va tsrhamisekiki,” ku fana ni ka tihotsro ta vhinyu.
Kumbe: “swihondzro leswi kumekaka a makhoneni”.
Hi ku kongoma: “A mazrumbu yavu ma”.
Kumbe: “va ku titsrongahata”.
Hi ku kongoma: “wuyavanyisi byake”.
Kumbe: “Swi nga yentxeka mi”.
Kumbe: “A zritu dzrake dzri lwisana na n’wine”.
Kumbe: “a ta va hlayisa”.
Kumbe: “swi ta mu gandzrela”.
Hi ku kongoma: “swihazri hinkwaswu swa tiko ledzro”.
Ku hlayiwa xihazri lexi vitaniwaka Pelicano hi xiputukezi.
Ku hlayiwa xihazri lexi vitaniwaka Porco-espinho hi xiputukezi.
Hi ku kongoma: “va hlakahla ni nyindhi”.
Kumbe: “va fana ni mabuwana”.
Kumbe: “swihondzro swavu leswi kumekaka a makhoneni”.
Kumbe: “ku lulamisiwa”.
Kumbe: “Ni ta mu khatisa”.
Kumbe: “lehisani mbilu mi ni yimela”.
Kumbe: “ni ta txintxa lidzrimi dzra vhanu dzri va ledzri xwengiki”.
Kumbe: “va ni gandzrela”.
Hi ku kongoma: “va ta djula wutumbelo a vitweni dzra”.
Kumbe: “Va ta byisa”.
Kumbe: “A ta zrula; Swi ta mu nabyalela; A ta yaneliseka”.
Hi ku kongoma: “mi va ni vito”.