ZAKARIYA
1 Hi lembe dzra wubidzri dzra ku fuma ka Dariyosi hi hweti ya wu 8, muprofeta Zakariya* n’wana wa Berekiya, n’wana wa Idido a yamukela mazritu lawa, lawa ma pfaka hi ka Yehovha: 2 “Yehovha a va kwatele ngopfu vapapayi venu.
3 “Va byeli u ku: ‘Yehovha wa makhandzra a li: “‘Tlhelelani kwanga’, ku hlaya Yehovha wa makhandzra, ‘na mine ni ta tlhelela kwenu’, ku hlaya Yehovha wa makhandzra.”’
4 “‘Mi nga fani ni vapapayi venu lava a vaprofeta va khale va va byeliki va ku: “Yehovha wa makhandzra a li: ‘Ni kombela mi tsrhika tindlela tenu leti bihiki ni swiyentxo swenu leswi bihiki.’”’
“‘Kambe a va ni yingisetanga nambi ku zreyelisisa ndleve ka mazritu yanga’, ku hlaya Yehovha.
5 “‘A vapapayi venu va kwini swoswi? A vaprofeta ke, xana va hanye hi lani ku nga helikiki? 6 Kambe a mazritu yanga ni swileleto swanga, leswi ni swi byeliki malandzra yanga ku nga vaprofeta, xana a va swi vonanga ku hetiseka ka swone?’ Va va va tlhelela kwanga va ku: ‘Yehovha wa makhandzra a hi khome hi ku ya hi tindlela tezru ni swiyentxo swezru, hi lani a a kunguhate ku yentxa ha kone.’”
7 Hi siku dzra wu 24 ka hweti ya wu 11, ku nga hweti ya Xebati, hi lembe dzra wubidzri dzra ku fuma ka Dariyosi, muprofeta Zakariya, n’wana wa Berekiya, n’wana wa Idido a yamukela mazritu lawa, lawa ma pfaka hi ka Yehovha: 8 “Ni ve ni xivoniso a wusikwini. A ku ni wanuna lweyi a a khwele ka kavhalu dzra ku pshwuka, a a yime makazri ka minsinya ya mirta; a ntsrhaku kwake a ku ni makavhalu ya ku pshwuka, ya nkwalala ni ya ku basa.”
9 Hiloko ni mu vutisa ni ku: “I vamani lava hosi yanga?”
A ntsrumi leyi a yi vulavula na mine yi ni hlamula yi ku: “Ni ta ku komba leswaku i vamani lava.”
10 Kutani wanuna lweyi a a yime makazri ka minsinya ya mirta a ku: “Lava hi lava Yehovha a va zrumeliki leswaku va fambafamba a misaveni.” 11 Hiloko va byela ntsrumi ya Yehovha leyi a yi li makazri ka minsinya ya mirta, va ku: “Hi fambafambe misaveni nakone hi xiye leswaku misava hinkwayu yi tsrhamisekile futsrhi yi ni ku zrula.”
12 Xileswo a ntsrumi ya Yehovha yi ku: “We Yehovha wa makhandzra, xana u ta yala ku komba timpswalu taku doropa dzra Yerusalema ni madoropa ya Yuda ku ya tlhasa kwini, lawa u ma kwateliki ku dzringana 70 wa malembe?”
13 Yehovha a hlamula ntsrumi leyi a yi vulavula na mine, hi mazritu lamanene nakone ma txhavelelanaka. 14 Kutani a ntsrumi leyi a yi vulavula na mine yi ni byela yi ku: “Huwelela u ku: ‘Yehovha wa makhandzra a li: “Ni hisekela Yerusalema ni Siyoni hi ku hiseka lokukulu. 15 Ni kwatile, ni ma kwatele ngopfu matiko lawa ma titwaka na ma sizrelelekile; hikusa nkama lowu ni kwatiki katsrongo ma yengesele khombo.”’
16 “Xileswo, Yehovha a li: ‘“Ni ta tlhela ni kombisa Yerusalema timpswalu, nakone a yindlu yanga yi ta pfuxetiwa kone”, ku hlaya Yehovha wa makhandzra, “a ngoti ya ku pima ha yone yi ta gwimbiwa a henhla ka Yerusalema”.’
17 “Tlhela u huwelela u ku: ‘Yehovha wa makhandzra a li: “A madoropa yanga ma ta tlhela ma tala hi mintxhumu leyinene, lakakuva yi yentxa hi ku dibekela; Yehovha a ta tlhela a txhavelela Siyoni ni ku tlhela a hlawula Yerusalema.”’”
18 Hiloko ni lavisa, ni vona mune wa timhondzro. 19 Kutani ni vutisa ntsrumi leyi a yi vulavula na mine ni ku: “A timhondzro leti ti tlhamuxela yini?” Yi hlamula yi ku: “A timhondzro leti, hi leti ti hangalasiki Yuda, Israyele ni Yerusalema.”
20 Ntsrhaku ka leswo, Yehovha a ni kombe mune wa vavanuna lava tivaka ku yentxa mintizro ya mavoko. 21 Ni vutisa ni ku: “A vavanuna lava va buya va yentxa yini?”
A ku: “A timhondzro leti, hi leti ti hangalasiki Yuda lakakuva ku nga vi na mhunu lweyi a tiyaka ku lwisana na tone. Vavanuna lava, va ta ta akuva va va txhavisa, va helisa timhondzro ta matiko lawa ma tlakuxiki timhondzro ta wone ku lwisana ni tiko dzra Yuda, ku yentxela leswaku va hangalasa lava va tsrhamaka ka dzrone.”
2 Kutani ni lavisa, ni vona wanuna lweyi a a tamele ngoti ya ku pima ha yone. 2 Hiloko ni mu vutisa ni ku: “U ya kwini?”
A hlamula a ku: “Ni ya pima Yerusalema akuva ni tiva ku yanama ni ku leha kwake.”
3 Hiloko ntsrumi leyi a yi vulavula na mine yi famba, kutani ku ta ntsrumi yin’wana akuva yi ta tlhangana na yone. 4 Yi yi byela yi ku: “Tsrutsruma u ya byela mumpshwa lwiyani u ku: ‘“A Yerusalema ku ta tsrhama vhanu ku fana ni doropa ledzri kalaka dzri nga na mimuru, hikusa vhanu va ta va vanyingi ku patsra ni swifuyu. 5 Kutani mine”, ku hlaya Yehovha, “ni ta va muru wa ndzrilo lowu nga matlhelweni kwake nakone ni ta tata Yerusalema hi ku phatima kwanga”.’”
6 “Tanani! Tanani! Tsrutsrumani mi suka a tikweni dzra le n’walungu”, ku hlaya Yehovha.
“Hikusa ni mi hangalase ka matlhelo hinkwawu”,* ku hlaya Yehovha.
7 “Tanani, n’wine vhanu va Siyoni! Tsrutsrumani, n’wine mi tsrhamaka ni n’hwanyana wa Babilona.* 8 Hikusa Yehovha wa makhandzra, lweyi ntsrhaku ka loko a dzrumisiwile* a ni zrumeliki ka matiko lawa a ma mi tekela mintxhumu yenu, a li: ‘Lweyi a mi khumbaka, a khumba ndzrololo ya tihlo dzranga.* 9 Hikusa ni ta tlakuxa* voko dzranga ku lwisana na vone, kutani va ta tekeliwa mintxhumu yavu hi swikazrawa swavu.’ Nakunene mi ta swi tiva leswaku i Yehovha wa makhandzra lweyi a ni zrumiki.
10 “Huwelela hi ku nyonxa, wene n’hwanyana wa Siyoni; hikusa na tlhasa nakone ni ta tsrhama makazri kwenu”, ku hlaya Yehovha. 11 “A sikwini ledzro matiko manyingi ma ta tipatsra na mine ma va vhanu vanga, kutani mine Yehovha ni ta tsrhama a makazri kwenu.” Xileswo mi ta swi tiva leswaku i Yehovha wa makhandzra lweyi a ni zrumiki kwenu. 12 Yehovha a ta teka Yuda swanga pfindla dzrake a mbangwini wa ku xwenga, nakone a ta tlhela a hlawula Yerusalema. 13 A vhanu hinkwavu a va miyeli a mahlweni ka Yehovha, hikusa a yentxa swa kukazri na a li mbangwini wake wa ku xwenga lowu a tsrhamaka ka wone.
3 Hiloko a ni komba Yoxuwa muprista lwenkulu na a yime mahlweni ka ntsrumi ya Yehovha nakone Sathana a a yime xineneni xake akuva a lwisana na yene. 2 Kutani a ntsrumi ya Yehovha yi byela Sathana yi ku: “We Sathana, ingiki Yehovha a nga ku khatisa, ina, ingiki Yehovha lweyi a hlawuliki Yerusalema, a nga ku khatisa! Xana Yoxuwa a hi xisa lexi susiwiki ndzrilweni?”
3 Yoxuwa a a yambale mpahla leyi ntxhimiki nakone a a yime mahlweni ka ntsrumi. 4 A ntsrumi yi byela lava a va yime kolanu yi ku: “Mu susani mpahla ya ku ntxhima.” Yi gama yi mu byela yi ku: “Waswivo, ni ku suse xihoxo xaku* kutani u ta yambexiwa mpahla ya ku hlawuleka.”*
5 Xileswo ni ku: “A a tsrimbiwi ntuzru* lowu basiki a nhlokweni.” Hiloko va mu tsrimba ntuzru lowu basiki nhlokweni, va mu yambexa ni mpahla yin’wana; a ntsrumi ya Yehovha a yi li kusuhi. 6 Ntsrhaku ka leswo, a ntsrumi ya Yehovha yi byela Yoxuwa yi ku: 7 “Yehovha wa makhandzra a li: ‘Loko u famba tindleleni tanga u va u hetisisa wutiyanguleli lebyi ni ku nyikiki byone, u ta va muyavanyisi wa vhanu vanga u va u hlayisa* ni yindlu yanga. Nakunene ni ta ku nyika mpfumelelo lowu heleliki ka lava va nga kola mahlweni kwanga.’
8 “‘Ni kombela u yingiseta, We Yoxuwa Muprista Lwenkulu, wene ni lava va nga na wene lava va tsrhamaka mahlweni kwaku, hikusa vavanuna lava va tizra swanga xikombiso! Ni tisa nandzra wanga lweyi a vitaniwaka Xihluke! 9 Vonani zribye ledzri ni dzri bekiki mahlweni ka Yoxuwa! Ka zribye dzroledzro dzra dzrin’we, ku ni 7 wa matihlo; nakone ni ta kevetla mazritu ya kukazri ka dzrone’, ku hlaya Yehovha wa makhandzra, ‘ni va hi siku dzrin’we ntsena ni susa nandzru wa tiko ledzro’.
10 “‘Hi siku dzroledzro’, ku hlaya Yehovha wa makhandzra, ‘mun’wana ni mun’wana wenu a ta zramba mhunu mun’wana akuva a ta a ta tsrhama hansi ka nsinya wake wa mawuvha ni le hansi ka nsinya wake wa nkuwa’.”
4 A ntsrumi leyi yi vulavuliki na mine yi tlhela yi buya yi va yi ni pfuxa, ku fana ni loko ku pfuxiwa mhunu lweyi a khutsriyeliki. 2 Hiloko yi ni vutisa yi ku: “U vona yini?”
Ni yi hlamula ni ku: “Ni vona xa ku tlhoma mimotsre xa woru lexi ku nga ni tijela a henhla ka xone. Xi ni 7 wa mimotsre, ina, 7 wa yone, nakone a mimotsre leyi kumekaka hi le henhla ka xone yi ni 7 wa matubu*. 3 Ku ni minsinya yibidzri ya minhlwazri a matlhelweni ka xone, wun’we wu le ka tlhelo dzra xinene dzra tijela, kasi lowun’wana wu le ka tlhelo dzra ximatsri.”
4 Hiloko ni vutisa ntsrumi leyi a yi vulavula na mine ni ku: “Hosi yanga, a mintxhumu leyi yi tlhamuxela yini?” 5 A ntsrumi leyi a yi vulavula na mine yi ni hlamula yi ku: “A u swi tivi leswaku mintxhumu leyi yi tlhamuxela yini?”
Kutani ni ku: “Ina, a ni swi tivi hosi yanga.”
6 Ntsrhaku ka leswo yi ni byela yi ku: “Yehovha a byela Zerubabele a ku: ‘“Ku nga li hi ntamu wa masotxha nambi hi ntamu wa vhanu, kambe hi moya wanga”, ku hlaya Yehovha wa makhandzra. 7 U mani wene, Wene nhava leyikulu? A mahlweni ka Zerubabele u ta va livala.* A ta beka zribye dzra wugamu a henhla ka tempele na va huwelela va ku: “Xongani ka dzrone! Xongani ka dzrone!”’”
8 Ni tlhela ni yamukela zritu dzra Yehovha ledzri liki: 9 “Zerubabele hi yene a nga sungula ku yaka yindlu leyi nakone a ta yi hetisa, mi ta swi tiva leswaku i Yehovha wa makhandzra lweyi a ni zrumiki kwenu. 10 I mani lweyi a dzreliki siku dzra masungulo lamatsrongo?* Hikusa va ta nyonxa loko va vona Zerubabele na a khome ngoti ya ku pima ha yone.* A mimotsre leyi* ya 7 i matihlo ya Yehovha lawa ma fambafambaka a misaveni hinkwayu.”
11 Kutani ni yi vutisa ni ku: “Xana minsinya leyibidzri ya minhlwazri, lowu nga xineneni ni lowu nga ximatsrini ka xa ku tlhoma mimotsre, yi tlhamuxela yini?” 12 Ni yi vutisa ni leswi: “A tinyandzra tibidzri ta mazrwavi* ya minsinya ya minhlwazri leyi txhululaka mafuzra ya woru hi ku tizrisa matubu mabidzri ya woru, yi tlhamuxela yini?”
13 Hiloko yi ni vutisa yi ku: “A u swi tivi leswaku mintxhumu leyi yi tlhamuxela yini?”
Ni hlamula ni ku: “Ina, a ni swi tivi hosi yanga.”
14 Yi ku: “Lava i vahlawuliwa vabidzri, lava yimiki tlhelweni ka Hosi ya misava hinkwayu.”
5 Ni tlhela ni lavisa, ni vona buku na dzri haha. 2 A ntsrumi yi ni vutisa yi ku: “U vona yini?”
Ni hlamula ni ku: “Ni vona buku dzri hahaka, dzri nga ni kolomu ka 9 wa mametru hi ku leha ni 4,5 wa mametru hi ku yanama.”*
3 Hiloko yi ni byela yi ku: “Lexi i xizruku lexi ya ka misaveni hinkwayu, hikusa hinkwavu lava yivaka, hi lani swi tsraliwiki ha kone ka tlhelo dzrin’we dzra buku, ku sukela a va khatisiwi; ni hinkwavu lava hlambanyaka madzrimi hi lani swi tsraliwiki ha kone ka tlhelo ledzrin’wana dzra buku, ku sukela a va khatisiwi. 4 ‘Hi mine ni xi zrumeliki’, ku hlaya Yehovha wa makhandzra, ‘nakone xi ta nghena ndlwini ya muyivi ni le ndlwini ya lweyi a hlambanyaka madzrimi hi vito dzranga; xi ta tsrhama ka yindlu yoleyo xi yi helisa, xi helisa mapulangu ya yone ni mazribye ya yone’.”
5 Ntsrhaku ka leswo, a ntsrumi leyi a yi vulavula na mine yi ni tsrhindzrekelela yi tlhasa yi ni byela yi ku: “Ni kombela u lavisa u vona lexi humelelaka.”
6 Xileswo ni yi vutisa ni ku: “I yini lexiyani?”
Yi ni hlamula yi ku: “I xibya xa ku pima ha xone tinhleke xi* humelelaka.” Yi yengesela yi ku: “Leyi i ndlela leyi lava va yentxaka swa ku biha va vonekaka ha yone a misaveni hinkwayu.” 7 Kutani ni vona leswaku a tampa ya redondu leyi a yi hambiwe hi muthofu yi pfuliwile, nakone a ndzreni ka xibya xolexo a ku tsrhame wansati. 8 Yi ku: “Wansati lweyi a fanekisela wubihi.” Yi gama yi txhovha lweyi wansati yi mu tlhelisela ndzreni ka xibya xolexo, ntsrhaku ka leswo yi xi pfala hi tampa ya ku bindzra leyi hambiwiki hi muthofu.
9 Hiloko ni lavisa, ni vona vavasati vabidzri na va ta, na va haha moyeni, a va ni timpapa ta ku fana ni ta yindwa.* Va tlakula xibya lexo va famba na xone a mpfhukeni.* 10 Kutani ni vutisa ntsrumi leyi a yi vulavula na mine ni ku: “Va xi yisa kwini xibya lexiyani?”
11 Yi hlamula yi ku: “Va xi yisa tikweni dzra Xinara, lani va taka yakela wansati lwiyani yindlu; kutani loko yindlu yi hela a wansati lweyi a ta nghenisiwa ka yone, a mbangwini wake.”
6 Kutani ni tlhela ni lavisa, ni vona mune wa tin’qolo ta yimpi leti a ti buya hi le xikazri ka tinhava tibidzri nakone a tinhava leto a ti li ta kobri. 2 A n’qolo ya ku sungula a yi kokiwa hi makavhalu ya ku pshwuka, a n’qolo ya wubidzri a yi kokiwa hi makavhalu ya ntima. 3 A n’qolo ya wuzrazru a yi kokiwa hi makavhalu ya ku basa, kasi a n’qolo ya wumune a yi kokiwa hi makavhalu ya mabatibati ni ya mivala ya ku siyanasiyana.
4 Ni vutisa ntsrumi leyi a yi vulavula na mine ni ku: “I yini leswi hosi yanga?”
5 A ntsrumi yi ni hlamula yi ku: “Leswi i mune wa swivumbiwa swa moya swa le matilweni leswi humaka ntsrhaku ka loko swi yime mahlweni ka Hosi ya misava hinkwayu. 6 A n’qolo leyi kokiwaka hi makavhalu ya ntima yi ya tikweni dzra le n’walungu, lawa ya ku basa ma ya ka tlhelo ledzrin’wana dzra* lwandle; lawa ya mabatibati ma huma ma ya tikweni dzra le n’walungu. 7 Kasi ke lawa ya mivala ya ku siyanasiyana, a ma swi yimele ngopfu ku ya misaveni ma ya fambafamba ka yone.” Hiloko yi ku: “Fambani, mi ya fambafamba misaveni.” Kutani ma sungula ku fambafamba misaveni.
8 Yi gama yi ni vitana yi ni byela yi ku: “Lavisa, lawa ma yaka tikweni dzra le n’walungu ma yentxe leswaku a mahlundzru lawa Yehovha a a li na wone hi tiko dzra le n’walungu ma pumbeka.”
9 Ni tlhela ni yamukela zritu dzra Yehovha dzri ku: 10 “Yamukela ka Heldayi, Tobiyahu na Yedaya, leswi pfaka hi ka vhanu lava nga wukazraweni, nakone hi siku dzroledzro famba kaya ka Yosiya n’wana wa Sofaniya na u li xikan’we ni lava va buyiki hi le Babilona. 11 U fanela ku teka prata ni woru u hamba hazri, u yi tlhanteka nhlokweni ya muprista lwenkulu Yoxuwa n’wana Yehozadaki. 12 Mu byeli u ku:
“‘Yehovha wa makhandzra a li: “Hi lweyi wanuna lweyi vito dzrake a nga Xihluke. A ta hluka a mbangwini wake a va a yaka tempele dzra Yehovha. 13 Hi yene a taka yaka tempele dzra Yehovha nakone hi yene a taka va mutxhaviseki. A ta tsrhama xitsrhan’wini xake xa wuhosi a fuma, a patsra ni ku va muprista a xitsrhan’wini xake xa wuhosi, futsrhi ku ta va ni xipfumelelanu xa ku zrula a xikazri ka swone ha swibidzri. 14 A hazri* yi ta tsrhama a tempeleni dzra Yehovha akuva ku dzrimukiwa Heleme, Tobiyahu, Yedaya na Heni n’wana wa Sofaniya. 15 Lava va nga le kule va ta ta akuva va ta patsreka a ku yakeni ka tempele dzra Yehovha.” Kutani mi ta swi tiva leswaku i Yehovha wa makhandzra lweyi a ni zrumeliki kwenu. Leswo swi to yentxeka loko nakunene mi yingiseta zritu dzra Yehovha Xikwembu Nkulukumba wenu.’”
7 Hi lembe dzra wumune dzra ku fuma ka Hosi Dariyosi, Zakariya a yamukele zritu dzra Yehovha hi siku dzra wumune ka hweti ya wu 9, leswi liki, ka hweti ya Kijlewu.* 2 A vhanu va le Betele va zrumele Xarezere na Regemu-meleki kun’we ni vhanu vake akuva va ya kombela Yehovha leswaku a va tovokisa, 3 va byela vaprista va yindlu ya* Yehovha wa makhandzra ni vaprofeta va ku: “Xana hi hweti ya wuntlhanu ni fanela ku dzrila ni tlhela ni titsrona swakuda hi lani ni buyaka na ni yentxa ha kone ku dzringana malembe manyingi?”
4 Yehovha wa makhandzra a tlhela a vulavula na mine a ku: 5 “Byela vhanu hinkwavu va tiko ledzri ni vaprista u ku: ‘Hi nkama lowu a mi titsrona swakuda mi tlhela mi dzrila hi hweti ya wuntlhanu ni hi hweti ya wu 7 ku dzringana 70 wa malembe, xana a mi swi yentxela mine hakunene? 6 Ni loko mi da mi tlhela mi nwa, xana a mi nga swi yentxeli n’wine? 7 Xana a mi nga fanelanga mi yingiseta mazritu lawa Yehovha a ma hlayiki hi ku tizrisa vaprofeta va khale, nkama lowu a Yerusalema ni le madoropeni lawa ma nga matlhelweni kwake a ku tsrhama vhanu nakone a ku ni ku zrula ni nkama lowu a ku tsrhama vhanu a Negebu ni le Xefela?’”
8 Yehovha a tlhela a vulavula na Zakariya a ku: 9 “Yehovha wa makhandzra a li: ‘Yavanyisani hi ku lulama ka ntiyiso mi tlhela mi hanyisana ni van’wana hi lizrandzru ni hi timpswalu. 10 Mi nga kanganyisi wansati lweyi a feliwiki hi nuna,* n’wana lweyi a nga liki na vapswele* kumbe mhunu lweyi a nga muluveli nambi xisiwana nakone mi nga kunguhatelani swa ku biha.’ 11 Kambe va tame va nga mu yingiseti Xikwembu Nkulukumba, va tiwomise tinhloko va mu fulazrela, va va va tipfala tindleve. 12 Va tlanyalisa timbilu tavu ku fana ni diyamanti, va nga wu yingiseti nawu ni mazritu lawa Yehovha wa makhandzra a ma zrumeliki hi ku tizrisa moya wake ni vaprofeta va khale. Leswo swi mu hlundzrukise ngopfu swinene Yehovha wa makhandzra.”
13 “‘Ku fana ni leswi va kalaka va nga ni yingisetanga nkama lowu ni vulavuliki na vone,* na mine a ni nga va yingiseti loko va ni kombela mpfunu’, ku hlaya Yehovha wa makhandzra. 14 ‘Ni va hangalase hi xidzedze a matikweni hinkwawu lawa a va nga ma tivi, nakone a tiko ledzri va dzri siyiki dzri sale dzri va zrumbi, ku nga ha khaluti mhunu hi ka dzrone nambi ku tlhelela ka dzrone, hikusa va yentxe leswaku a tiko ledzri a dzri naveleka ngopfu swinene dzri va ntxhumu lowu txhavisaka.’”
8 Yehovha wa makhandzra a tlhela a vulavula na mine a ku: 2 “Yehovha wa makhandzra a li: ‘Ni ta hisekela Siyoni hi ku hiseka lokukulu, nakone ni ta hisekela Siyoni hi ku hlundzruka lokukulu.’”
3 “Yehovha a li: ‘Ni ta tlhelela a Siyoni, ni tsrhama a Yerusalema; Yerusalema a ta vitaniwa doropa ledzri nga ni ntiyiso,* kutani a nhava ya Yehovha wa makhandzra yi ta vitaniwa nhava ya ku xwenga.’”
4 “Yehovha wa makhandzra a li: ‘Vavanuna ni vavasati lava duhwaliki va ta tlhela va tsrhama mimbangwini leyi pfulekiki ya mani na mani a Yerusalema, mun’wana ni mun’wana wavu na a khome ntxhongotelo wake hi mhaka ya leswi a duhwaliki.* 5 Nakone a mimbangu yoleyo ya doropa yi ta tala hi swidjahatana ni swin’hwanyatana na swi tlanga.’”
6 “Yehovha wa makhandzra a li: ‘Nambileswi swi nga tikombaka na swi kazrata ngopfu ka vhanu lava saliki a masikwini wolawo, xana swi fanela ku tikomba na swi kazrata ngopfu ni kwanga?’ Ku hlaya Yehovha wa makhandzra.”
7 “Yehovha wa makhandzra a li: ‘Ni huluxa vhanu vanga ni va susa a matikweni ya le wuxeni ni ya le mpeladambu. 8 Ni ta tlhela ni va buyisa, kutani va ta tsrhama a Yerusalema, va ta va vhanu vanga, mine ni ta va Xikwembu Nkulukumba wavu hi ntiyiso* ni hi wululami.’”
9 “Yehovha wa makhandzra a li: ‘Tiyisani mavoko yenu, n’wine lava yingelaka mazritu lawa ya vaprofeta a masikwini lawa, lawa i mazritu lawa va ma hlayiki a sikwini ledzri ku simekiwiki masungulo ya yindlu ya* Yehovha wa makhandzra. 10 Hikusa na nkama wolowo wu nga si na tlhasa a ku nga na muholo lowu a wu nyikiwa vhanu nambi ku li swihazri; hi kola ka nala a swi nga sizrelelekanga ku humahuma, hikusa a ni yentxe leswaku vhanu hinkwavu va lwisana hi xivone.’
11 “‘Kambe swoswi a vhanu lava saliki ka vhanu lava a ni nge he ti va khoma hi ndlela leyi ni va khomiki ha yone khale’, ku hlaya Yehovha wa makhandzra. 12 ‘Hikusa ku ta byaliwa mbewu ya ku zrula; a nsinya wa mawuvha wu ta pswala mihandzru ya wone, a misava yi ta humesa ntsrhovelo wa yone, a matilo ma ta wisa mbezre ya wone nakone ni ta yentxa leswaku vhanu lava saliki ka vhanu lava va tikholisa hi hinkwaswu leswi. 13 Ku fana ni leswi matiko a ma tizrisa xikombiso xenu akuva ma hlaya xizruku, Wene yindlu ya Yuda ni ya Israyele, hi lani ku fanaka ni ta mi huluxa, kutani a matiko ma ta tizrisa xikombiso xenu akuva ma hlaya matovoko. Mi nga txhavi! Tiyisani mavoko yenu akuva mi tizra.’*
14 “Hikusa Yehovha wa makhandzra a li: ‘“Ku fana ni leswi ni tekiki xiboho xa ku mi tisela khombo loko vakokwana venu va ni hlundzrukisile”, ku hlaya Yehovha wa makhandzra, “nakone a ni tisolanga ha swone, 15 swoswi ni tiyimisele ku yentxela Yerusalema ni yindlu ya Yuda mintxhumu leyinene. Mi nga txhavi!”’
16 “‘Mi fanela ku yentxa leswi: Mun’wana ni mun’wana a a vulavule ntiyiso ni mun’wana, loko mi yavanyisa a tinyangweni ta madoropa yenu, yavanyisani hi ndlela leyi lulamiki nakone pfunani vhanu leswaku va va ni ku zrula. 17 Mi nga kunguhatelani swa ku biha, nakone mi nga zrandzri ku hlambanya mi gama mi nga swi hetisisi; hikusa hinkwaswu leswo na swi nyenya’, ku hlaya Yehovha.”
18 Yehovha wa makhandzra a tlhela a vulavula na mine a ku: 19 “Yehovha wa makhandzra a li: ‘A ku titsrona swakuda ka hweti ya wumune, ku titsrona swakuda ka hweti ya wuntlhanu, ku titsrona swakuda ka hweti ya wu 7 ni ku titsrona swakuda ka hweti ya wu 10 ku ta va minkama ya ku nyonxa ni ku nyonxisisa ka vhanu va Yuda, ku nga minkhuvu ya ku nyonxa. Xileswo, zrandzrani ntiyiso ni ku zrula.’
20 “Yehovha wa makhandzra a li: ‘Wa ta nkama lowu vhanu ni lava tsrhamaka ka madoropa ya manyingi va taka ta; 21 lava tsrhamaka ka doropa dzra kukazri va ta yela lava tsrhamaka ka doropa dzrin’wana va tlhasa va ku: “A hi fambeni, a hi fambeni hi ya kombela tovoko ka Yehovha ni ku tizrela Yehovha wa makhandzra. Na hine hi ya kone.” 22 Kutani vhanu vanyingi ni matiko ya ntamu va ta ta akuva va ta tizrela Yehovha wa makhandzra a Yerusalema ni ku kombela tovoko dzra Yehovha.’
23 “Yehovha wa makhandzra a li: ‘A masikwini wolawo, 10 wa vhanu lava pfaka ka matiko hinkwawu ni tindzrimi hinkwatu va ta khoma, ina, va ta khoma swi tiya mpahla* ya ku leha ya Muyuda* va ku: “Hi djula ku famba na n’wine, hikusa hi swi twile leswaku Xikwembu Nkulukumba a na n’wine.”’”
9 Madzrungula lawa ma pfaka hi ka Xikwembu Nkulukumba:
“A zritu dzra Yehovha dzri lwisana ni tiko dzra Hadraki
Nakone dzri ta wela Damaska
Hikusa a matihlo ya Yehovha ma lavisisa vhanu
Ni tinxaka hinkwatu ta Israyele
2 Dzri lwisana na Hamati, lweyi a hambaka ndzrelekanu na yene;
Nakone dzri lwisana na Tiri na Sidoni, hi leswi va tlhazrihiki ngopfu swinene.
3 A vayaki va doropa dzra Tiri va yake mimuru* akuva va tisizrelela.
Va hlengelete prata ku fana ni ntsrhuzri,
Ni woru ku fana ni nsila ya le switaratwini.
4 Lavisani! Yehovha a ta teka mintxhumu yavu
A helisa khandzra dzravu hi ku dzri txukumetela lwandle;
Nakone a doropa dzri ta hisiwa hi ndzrilo.
5 Lava va tsrhamaka a Axkeloni va ta swi vona leswo va va va txhava;
Lava va tsrhamaka a Gaza va ta vaviseka ngopfu swinene,
Ni lava va tsrhamaka a Ekroni, hikusa lweyi va dumbaka yene a ta danisiwa.
Lava va tsrhamaka a Gaza va ta luza hosi yavu,
Nakone a doropeni dzra Axkeloni a ku nge he ti tsrhama mhunu.
6 A Axidodi ku ta tsrhama vhanu va matiko man’wana,
Ni ta helisa ku tikulisa ka Mufilista.
7 Ni ta susa ngati* leyi nga non’wini wake,*
Ni swakuda swa ku nyenyentsa leswi nga xikazri ka matinyo yake,
A ta salela Xikwembu Nkulukumba wezru;
A ta fana ni muzrangeli a Yuda,
Nakone vhanu va le Ekroni va ta fana ni Vayebusi.
8 Ni ta yima a handle ka muti wanga ni wu zrindzra
A ni nge ti pfumelela nala ni mun’we a nghena kumbe a huma;
Nakone a ni nge ti pfumelela muxanisi a tlhela a khaluta hi kone,
Hikusa kutani ni swi vonile leswo* hi matihlo yanga.
9 Nyonxa ngopfu swinene, Wene n’hwanyana wa Siyoni.
Huwelela hi ku hlula, Wene n’hwanyana wa Yerusalema.
Lavisa! A hosi yaku ya ku tela.
Yi lulamile nakone yi tisa ku hlula,*
Ya titsrongahata nakone yi buya na yi khwele ka mbongolo,
Ka ximbongolwana, n’wana wa mbongolo ya xisati.
10 Ni ta susa tin’qolo ta yimpi a mugangeni wa Efrayimi,
Ni makavhalu a Yerusalema
A wugubu bya yimpi byi ta susiwa.
A hosi yenu yi ta huwelela ku zrula a matikweni;
A wuhosi bya yone byi ta sukela ka lwandle ku ya ka lwandle dzrin’wana,
Ni ku sukela a Nambyeni* ku ya tlhasa a wugan’wini bya misava.
11 Loko ku li Wene Siyoni,* hi ngati ya xipfumelelanu xaku,
Ni ta ntsrhunxa swib’otxhwa leswi nga xihloveni lexi kalaka xi nga na mati.
12 Tlhelelani khokholweni, n’wine swib’otxhwa leswi nga ni dumbo.
Namunhla ni ku byela ni ku:
‘Ni ta ku hakela hi lani ku phindhiwiki kabidzri, Wene Siyoni.
13 Hikusa ni ta gotsrha* Yuda ku fana ni wugubu byanga.
Ni ta yentxa Efrayimi a va nseve ka wugubu,
Ni ta pfuxa vanaku, Wene Siyoni,
Akuva va lwa ni vanaku, Wene Grikiya,
Nakone ni ta ku yentxa u fana ni xipada xa mulwi wa yimpi.’
14 Yehovha a ta swi beka livaleni leswaku a ni vhanu vake,
Nakone a nseve wake wu ta huma ku fana ni lihati.
Yehovha Hosi Leyi Tlakukiki a ta txhaya limhondzro,
A ta ya yimpini na a ni moya lowukulu wa le nyingitimu.
15 Yehovha wa makhandzra a ta lwela vhanu vake,
A valala va ta va hlasela hi mazribye,* kambe vone va ta va hlula,
Va ta nyonxa va patsra ni ku huwelela ingiki hi loko ve nwa vhinyu;
Nakone va ta fana ni tijela ledzri taliki hi vhinyu
Ku fana ni ngati leyi txheliwiki makhoneni ya altari.
16 Hi siku ledzro, Yehovha Xikwembu Nkulukumba wavu a ta va huluxa
Swanga vhanu vake tlhelo ntlhambi wake;
Hikusa va ta fana ni mazribye ya lisima lawa ma kumekaka ka hazri* nakone ma phatimaka henhla ka misava yake.
17 A hi ku kula ka wunene byake,
A hi ku xonga kwake!
A swakuda ni vhinyu ledzrimpshwa swi ta yentxa leswaku madjaha ni van’hwanyana* va tiya.”
10 “Kombelani mpfula ka Yehovha, hi nguva ya mpfula ya ku nghena ka malanga.
I Yehovha lweyi a vangaka mphumelo,
Lweyi a niselaka vhanu mpfula ya yikulu,
A tlhela a nyika vhanu hinkwavu swimilana swa nhova.*
2 Hikusa a swithombe swi* hlaya madzrimi;
Ni vapfhumbi va vona swivoniso swa wukanganyisi;
Va vulavula hi milozro leyi kalaka yi nga pfuni ntxhumu,
Va zama ku txhavelela kambe a ku na lweyi a txhavelelekaka.
Hi leswo swi yentxiki leswaku vhanu va yingayinga ku fana ni tihamba.
Va ta xaniseka hi ku va va nga na mubyisi.
3 Ni va hlundzrukele ngopfu swinene vabyisi,
Nakone a vazrangeli lava xanisaka va* ta tihlamulela kwanga;
Hikusa Yehovha wa makhandzra a tlhele a va ni mhaka ni vhanu vake, ku nga vhanu va Yuda,
Nakone a va yentxe va fana ni kavhalu dzrake dzra yimpi ledzri nga ni ntamu nakone dzri hloniphekaka.
4 Kwake ku huma muzrangeli,*
Kwake ku huma mupfunisi wa mufumi,*
Kwake ku huma wugubu bya yimpi;
Kwake ku huma valaviseli hinkwavu,* hinkwavu na va li xikan’we.
5 Va ta fana ni valwi va yimpi,
Lava pswanyaka ntsraka* a tindleleni na va le ku lweni.
Va ta lwa, hikusa Yehovha a na vone;
Nakone lava va fambaka hi makavhalu va ta danisiwa.
6 Ni ta yentxa leswaku vhanu va Yuda va va ni ntamu,
Ni huluxa ni yindlu ya Yosefa.
Ni ta tlhela ni va tlhelisela a tikweni dzravu,
Hikusa ni ta va twela wusiwana;
Va ta va swanga hi loko ni ngi ngi sama ni va tsrhika;
Hikusa mine ni Yehovha Xikwembu Nkulukumba wavu, kutani ni ta va hlamula.
7 A va le Efrayimi va ta fana ni mulwi wa yimpi lweyi a nga ni ntamu,
A mbilu yavu yi ta nyonxa ku fana ni mhunu lweyi a nyonxaka hi ku va a nwe vhinyu.
A vanavu va ta swi vona leswo va va va nyonxa;
A mbilu yavu yi ta nyonxa hi mhaka ya leswi mine Yehovha ni swi yentxiki.
8 ‘Ni ta va txhayela noti akuva ni va hlengeleta;
Hikusa ni ta va huluxa, kutani va ta va vanyingi,
Va va va tama va yengeseleka.
9 Nambileswi ni taka va hangalasa a xikazri ka vhanu ku fana ni mbewu,
Va ta ni dzrimuka na va li mimbangwini ya le kule;
Vone ni vanavu va ta tiyisiwa kutani va tlhela.
10 Ni ta va tlhelisa, va suka tikweni dzra Egipta
Nakone ni ta va susa a Asiriya, ni va hlengeleta;
Ni ta va buyisa a tikweni dzra Giliyadi ni dzra Lebanoni,
Nakone a ku nge he ti va ni mbangu wa ku va yanela.
11 Loko lwandle dzri va pfalela ndlela,
Ni ta khaluta ni ba mavimbi ya dzrone;
A mati hinkwawu ya nambu wa Nilo ma ta woma.
A ku tikulisa ka Asiriya ku ta tsrongahatiwa,
Kutani a nhonga ya wuhosi ya Egipta yi ta susiwa.
12 Mine Yehovha ni ta va yentxa va va lava tlakukiki ku tlula lavan’wana hinkwavu,
Va ta hanya hi ndlela leyi twalisaka vito dzranga’, ku hlaya Yehovha.”
11 “Pfula swipfalu swaku, Wene Lebanoni,
Akuva ndzrilo wu hisa minsinya yaku ya minkedari.
2 Dzrila, wene nsinya wa yunipa, hikusa a nsinya wa nkedari wu wile;
A minsinya leyikulu ya ku xonga yi helisiwile!
Dzrilani, n’wine minsinya ya karvhalhu ya le Baxani,
Hikusa a nhova ya ku tlhuma ngopfu yi helisiwile.
3 Yingisetani! A vabyisi va le ku dzrileni,
Hikusa a lidzrumu dzravu dzri helisiwile.
Yingisetani! A swinghonyamana swi le ku bongeni,
Hikusa a tinhova letitsrongo leti tlhumiki leti nga matlhelweni ka Yordani ti helisiwile.
4 “Yehovha Xikwembu Nkulukumba wanga, a li: ‘Byisani ntlhambi wa tihamba leti bekisiwiki akuva ti dlayiwa, 5 lava xavaka tihamba leto va ti dlaya kambe a va voniwi nandzru. Nakone lava xavisaka tihamba leto va li: “A ku dzrumisiwi Yehovha, hikusa ni ta ganya.”* A vabyisi va tone a va ti tweli wusiwana nikutsrongo.’
6 “‘Lava va tsrhamaka tikweni ledzri a ni nge he ti va twela wusiwana’, ku hlaya Yehovha. ‘Ni ta yentxa leswaku vhanu va xanisana hi xivone ni hosi yavu yi ta va xanisa; va ta helisa tiko ledzri nakone a ni nge ti va huluxa mavokweni yavu.’”
7 Kutani akuva mi pfuneka, N’wine ntlhambi lowu xanisiwaka, ni sungule ku byisa ntlhambi lowu bekiseliwiki ku dlayiwa. Ni teke tinhonga tibidzri, yin’we ni yi txhula leswaku i Wunene,* kasi leyin’wana ni yi txhula leswaku i Wumun’we, kutani ni sungula ku byisa ntlhambi. 8 Ndzreni ka hweti yin’we ntsena ni hlongole vabyisi vazrazru, hikusa ni* va helele mbilu, futsrhi na vone a va ni nyenya*. 9 Kutani ni te: “A ni nge he ti tlhela ni mi byisa. Leyi faka a yi fi, ni leyi helisiwaka a yi helisiwi. Leti ti salaka a ti hahlulelani.” 10 Hiloko ni teka nhonga yanga leyi a ni yi txhule leswaku Wunene ni yi tsremelela hi swiyenge, ni helisa xipfumelelanu lexi a ni xi yentxe ni vhanu hinkwavu. 11 Hi ndlela leyo, ni helisa xipfumelelanu hi siku ledzro, kutani lava a va xanisiwa ntlhambini nakone a va ni vona, va swi twisisile leswaku a ku li zritu dzra Yehovha.
12 Ni va byela ni ku: “Loko mi swi vona na swi li swinene kwenu, ni nyikani muholo wanga; kambe loko mi nga swi vonisi xileswo, mi nga ni nyiki.” Kutani va hakela* muholo wanga, 30 wa mamuweda ya prata.
13 Hiloko Yehovha a ni byela a ku: “Hi swoleswi swimalana leswi va pimisaka leswaku ni faneliwa ha swone? Swi txukumetele mbangwini lowu ku bekiwaka mintxhumu ya lisima a ndlwini kwanga.” Hiloko ni teka 30 wa mamuweda ya prata ni ma txukumetela mbangwini lowu ku bekiwaka mintxhumu ya lisima a ndlwini ka Yehovha.
14 Ntsrhaku ka leswo, ni tsremelela nhonga ya wubidzri leyi ni yi txhuliki leswaku Wumun’we, yi va hi swiyenge, ni helisa wuxaka a xikazri ka Yuda na Israyele.
15 Hiloko Yehovha a ni byela a ku: “Swoswi teka switizro leswi a swi ta tizrisiwa hi mubyisi lweyi a nga pfunikiki ntxhumu. 16 Hikusa ni ta pfumelela leswaku ku va ni mubyisi tikweni ledzri. A nge te ti hlayisa tihamba leti to ko fa; a nge ti xi djuletela xihambana lexi lahlekiki kumbe ku daha hamba leyi vavisiwiki nambi ku wundla leyi hanyiki ha hombe. Ku hambana ni leswo, a ta da nyama ya tihamba leti ta ku nona, a tlomula ni masondzro ya tone.
17 Khombo ka mubyisi wanga lweyi a nga pfunikiki ntxhumu, lweyi a tsrutsrumaka ntlhambi!
A voko dzrake ni tihlo dzrake dzra xinene swi ta hlaseliwa hi xipada.
A voko dzrake dzri ta woma hi lani ku heleliki,
Ni tihlo dzrake dzri ta fa hi ku helela.”
12 Madzrungula lawa ma pfaka hi ka Xikwembu Nkulukumba:
“Ledzri i zritu dzra Yehovha mayelanu na Israyele”, ku hlaya Yehovha,
Lweyi a yandlaliki matilo,
Lweyi a bekiki masungulo ya misava,
Nakone a nyikiki mhunu moya wa wutomi.*
2 “Ni ta yentxa leswaku doropa dzra Yerusalema dzri va kopo* dzra vhinyu ledzri taka dederekisa vhanu hinkwavu lava nga matlhelweni ka dzrone; nakone a doropa dzra Yuda ni dzra Yerusalema ma ta tsrandzreliwa. 3 Hi siku ledzro, ni ta yentxa leswaku Yerusalema a va zribye dzra ku bindzra ka vhanu hinkwavu. Nakunene hinkwavu lava va dzri tlakulaka va ta vavisiwa ngopfu swinene; nakone matiko hinkwawu ya misava ma ta hlengeletiwa akuva ma lwisana na yene. 4 Hi siku dzroledzro”, ku hlaya Yehovha, “ni ta yentxa leswaku makavhalu hinkwawu ma va ni ntxhavu, ni lava va fambaka ha wone va va ni lihlanyi. Ni ta pfula matihlo yanga ni vonelela yindlu ya Yuda, kambe ni ta yentxa leswaku a makavhalu hinkwawu ya vhanu ma fa matihlo. 5 A vazrangeli va Yuda va ta hlaya leswi a timbilwini tavu: ‘Lava va tsrhamaka a Yerusalema i ntamu wezru hi kola ka Yehovha wa makhandzra, Xikwembu Nkulukumba wavu.’ 6 Hi siku ledzro, ni ta yentxa leswaku a vazrangeli va Yuda va fana ni makhala ya ndzrilo lawa ma nga xikazri ka tihunyi, ku fana ni xisa lexi pfuzraka a xikazri ka swinsinyana swa tinhleke leswi hlengeletiwiki, va ta helisa vhanu hinkwavu lava nga matlhelweni kwavu, lava nga xineneni ni le ximatsrini; lava va tsrhamaka a Yerusalema va ta tama va tsrhama mimbangwini yavu,* ina, a Yerusalema.
7 “Yehovha a ta sungula hi ku huluxa mintsronga ya Yuda akuva muti wa Davhida ni lava va tsrhamaka a Yerusalema va nga hloniphiwi ngopfu* ku tlula va le Yuda. 8 Hi siku dzroledzro Yehovha a ta sizrelela lava va tsrhamaka a Yerusalema; kwavu lweyi a waka hi siku ledzro a ta tiya ku fana na Davhida, nakone muti wa Davhida wu ta va ni ntamu ku fana na Xikwembu Nkulukumba ni ku fana ni ntsrumi ya Yehovha leyi yi va zrangelaka. 9 Hi siku dzroledzro nakunene ni ta helisa matiko hinkwawu lawa ma hlaselaka Yerusalema.
10 “Ni ta txhulula moya wanga a mutini wa Davhida ni ka vhanu lava va tsrhamaka a Yerusalema, va ta yamukeleka kwanga va va va hamba swikombelo, va ta lavisa lweyi va mu tlhaviki va mu dzrilela, ku fana ni ndlela leyi a va ta mu dzrilela ha yone n’wana lweyi a pswaliwiki a li wuswake; va ta mu dzrilela ngopfu swinene ku fana ni ndlela leyi a va ta mu dzrilela ha yone n’wana wa mativula. 11 Hi siku dzroledzro, ku ta va ni xidzrilo xikulu a Yerusalema, ku fana ni xidzrilo xa le Hadadrimoni, a Nkoveni wa le Megido. 12 Kutani a tiko ledzri dzri ta dzrila, lixaka dzrin’wana ni dzrin’wana na dzri li wu swa dzrone; lixaka dzra Davhida na dzri li wu swa dzrone, ni vavasati vavu na va li wuswavu, lixaka dzra Natani na dzri li wu swa dzrone ni vavasati vavu na va li wuswavu; 13 lixaka dzra Levhi na dzri li wu swa dzrone ni vavasati vavu na va li wuswavu, lixaka dzra Vaximeyi na dzri li wu swa dzrone ni vavasati vavu na va li wuswavu; 14 tinxaka hinkwatu leti saliki, lixaka dzrin’wana ni dzrin’wana na dzri li wu swa dzrone ni vavasati vavu na va li wuswavu.
13 “Hi siku ledzro, va muti wa Davhida ni lava va tsrhamaka a Yerusalema va ta keleliwa xihlovo akuva va basisiwa ka xidoho ni ka ku nyama.
2 “Hi siku ledzro”, ku hlaya Yehovha wa makhandzra, “ni ta tima mavito ya swithombe a tikweni ledzri, a swi nge he ti dzrimukiwa; nakone a tikweni ledzri ni ta susa vaprofeta ni moya wa ku biha. 3 Loko mhunu wa kukazri a tlhela a profeta, papayi wake ni mamana wake lava va mu pswaliki va ta mu byela va ku: ‘A wu nge he ti tama u hanya hikusa u vulavule madzrimi hi vito dzra Yehovha.’ Papayi wake ni mamana wake lava va mu pswaliki va ta mu tlhava hi mhaka ya leswi a profetiki.
4 “Hi siku dzroledzro, muprofeta mun’wana ni mun’wana a ta daniseka hi kola ka swivoniso swake loko a profeta; a va nge he ti yambala mpahla ya wuprofeta akuva va kanganyisa van’wana. 5 Nakone mun’wana ni mun’wana wavu a ta ku: ‘A ni muprofeta. Ni mudzrimi, hikusa ku ni mhunu wa kukazri lweyi a ni xaviki leswaku ni va xikazrawa na na ha li ntsrongo.’ 6 Kutani loko mhunu wa kukazri a vutisa a ku: ‘A swilondzra leswi ke a makatleni yaku?’* A ta hlamula a ku: ‘Ni vavisiwe kaya ka vanghanu vanga.’”*
7 “Wene u nga ni xipada, pfuka,
U hlasela mubyisi wanga tlhelo munghanu wanga”, ku hlaya Yehovha wa makhandzra.
“Bana mubyisi u tsrhika ntlhambi wu hangalaka;*
Ni ta lwisana ni lava va kalaka va nga pfuni ntxhumu.”
8 “A tikweni hinkwadzru”, ku hlaya Yehovha,
“Ku tlula hamfu ya vhanu ka xitsrhungu va ta dlayiwa;
Ku to huluka vatsrongo ntsena.
9 Ni ta yentxa leswaku volavo, lavatsrongo, va khaluta hi le ndzrilweni;
Ni ta va basisa, ku fana ni loko ku basisiwa prata
Nakone ni ta va kambela ku fana ni loko ku kambeliwa woru.
Va ta vitana vito dzranga,
Kutani ni ta va hlamula.
Ni ta ku: ‘I vhanu vanga’,
Vone va ta ku: ‘Yehovha i Xikwembu Nkulukumba wezru.’”
14 “Lavisa! Dzra ta siku dzra Yehovha lani a mintxhumu leyi u tekeliwiki yone yi taka yaviwa a xikazri kwaku. 2 Ni ta hlengeleta matiko hinkwawu akuva ma lwa yimpi na Yerusalema; kutani a doropa dzri ta tekiwa, a tiyindlu ti ta phangiwa, vavasati va ta pfinyiwa. Hamfu ya lava va tsrhamaka doropeni va ta yisiwa a wukazraweni kambe vhanu lava taka sala a doropeni a va nge ti helisiwa.
3 “Yehovha a ta ya lwa ni matiko wolawo ku fana ni loko a lwa hi siku dzra yimpi. 4 Hi siku dzroledzro, a minkondzro yake yi ta yima Nhaveni ya Minhlwazri leyi lavisaniki na Yerusalema hi le wuxeni, a Nhava ya Minhlwazri yi ta pandzriwa hi le xikazri, ku sukela a wuxeni ku ya a mpeladambu,* ku hambeka nkova wa wukulu ngopfu swinene, a hamfu ya nhava yi ta tsrhindzreka yi ya n’walungu, kasi leyin’wana yi ya nyingitimu. 5 Mi ta tsrutsruma mi ya nkoveni wa tinhava tanga, hikusa a nkova wa tinhava wu ta famba wu ya tlhasa a Azele. Mi ta sindzriseka ku tsrutsruma hi lani mi tsrutsrumiki ha kone hi kola ka ku tsrekatsreka ka misava ka le masikwini ya Uziya Hosi ya Yuda. Kutani Yehovha Xikwembu Nkulukumba wanga a ta ta na vaxwengi hinkwavu va li xikan’we na yene.
6 “Hi siku ledzro, a ku nge ti va ni livaningu ni dzrin’we dzra lisima, a mintxhumu yi ta woma.* 7 Dzri ta va siku dzra ku hlawuleka ledzri taka tiviwa swanga siku dzra Yehovha. A ku nge ti va ni ku hambana a xikazri ka wusiku ni nhlikanhi, nambiloko dzri pela ka ha ta tama ku vona. 8 Hi siku ledzro, ku ta fulamela mati ya wutomi ku sukela a Yerusalema, a hamfu yi ya lwandle ledzri kumekaka wuxeni* leyin’wana yi ya lwandle ledzri kumekaka mpeladambu.* Leswo swi ta yentxeka hi nkama wa malanga ni hi nkama wa wuxika. 9 Yehovha a ta va Hosi a misaveni hinkwayu. Hi siku ledzro hinkwavu va ta gandzrela Yehovha ntsena nakone va ta dzrumisa vito dzrake ntsena.
10 “A tiko ledzri hinkwadzru ku sukela a Geba ku ya a Rimoni; hi le nyingitimu wa le Yerusalema; dzri ta fana ni nkova wa le Araba, Yerusalema a ta va lweyi a tlakukiki ku va ku tsrhama vhanu a mbangwini wake, ku sukela a Nyangweni wa Benjamini ku ya tlhasa a mbangwini wa Nyangwa wa ku Sungula, ku sukela kolanu ku ya tlhasa Nyangweni wa le Khoneni, ni ku sukela ka xihondzro xa Hananeli ku ya tlhasa lomu ku pfuveliwaka kone vhinyu dzra hosi. 11 A vhanu va ta tsrhama kwake nakone a nge he txhuki a voniwa nandzru wa kuva a helisiwa, va ta tsrhama a Yerusalema na va sizrelelekile.
12 “Vhanu hinkwavu lava taka lwisana na Yerusalema, Yehovha a ta va ba hi ntungu. A nyama yavu yi ta bola na ve yima hi milenge, a matihlo yavu ma ta bola a timbhoveni ta wone ni lidzrimi dzravu dzri ta bolela a minon’wini yavu.
13 “Hi siku ledzro Yehovha a ta yentxa leswaku va pfilunganyeka ngopfu swinene kutani mun’wana ni mun’wana a ta djikela munghanu, a lwisana na yene. 14 Na yene Yuda a ta patsreka a ku lweni ka yimpi a Yerusalema; ku va ku hlengeletiwa pfindla dzra matiko hinkwawu lawa ma nga kusuhi na yene, woru, prata ni mpahla hi mpimu wa wukulu ngopfu swinene.
15 “A ntungu lowu fanaka ni luwani wu ta ba makavhalu, mamulwa,* makamela, timbongolo ni swifuyu hinkwaswu leswi taka va na swi li mintxhatxheni yoleyo.
16 “Hinkwavu lava taka huluka ka matiko hinkwawu lawa ma taka tela ku ta lwisana na Yerusalema, lembe ni lembe va ta tlhantuka akuva va ya khinsamela* Hosi, ku nga Yehovha wa makhandzra ni ku tlangela Nkhuvu wa Mintsronga.* 17 Kambe loko mhunu wa kukazri ka matiko ya misava a nga tlhantuki a ya Yerusalema akuva a ya khinsamela Hosi, ku nga Yehovha wa makhandzra, va nge ti va ni mpfula. 18 Ni loko vhanu va le Egipta va nga tlhantuki nakone va nga ngheni doropeni, a va nge ti va ni mpfula. Ku hambana ni leswo, va ta weliwa hi ntungu lowu Yehovha a taka ba matiko ha wone lawa ma taka kala ma nga tlhantuki akuva ma ya tlangela Nkhuvu wa Mintsronga. 19 Lexo xi ta va xikhatiso hi kola ka xidoho xa Egipta ni xidoho xa matiko hinkwawu lawa ma taka kala ma nga tlhantuki akuva ma ya tlangela Nkhuvu wa Mintsronga.
20 “Hi siku ledzro, ka swingelengele leswi gatliwiki hi makavhalu ku ta tsraliwa leswi: ‘Yehovha a Xwengile!’ A mapanela ya ku sweka ha wone lawa ma nga ndlwini ka Yehovha ma ta fana ni matijela a mahlweni ka altari. 21 A mapanela hinkwawu ya ku sweka ha wone, lawa ma nga a Yerusalema ni le Yuda, ma ta va lawa ma xwengiki nakone ma ta lumba Yehovha wa makhandzra, hinkwavu lava nyikelaka magandzrelo va ta ta kutani va tizrisa man’we ya mapanela wolawo akuva va sweka ha wone. Hi siku ledzro a ku nge he ti va ni Mukanana* ni mun’we a ndlwini ka Yehovha wa makhandzra.
Vito ledzri dzri tlhamuxela leswaku “Yehovha a dzrimukile”.
Hi ku kongoma: “ka mune wa mimoya ya matilo”.
A mazritu lawa ma liki “n’hwanyana wa Babilona” i xithokozelo lexi tizriseliwaka ku hlaya doropa dzra Babilona kumbe vhanu lava tsrhamaka ka dzrone.
Hi ku kongoma: “ntsrhaku ka lidzrumu”.
Kumbe: “a khumba nyingi ya tihlo dzranga”.
Kumbe: “ni ta hlakahla”.
Kumbe: “nandzru waku”.
Kumbe: “ya xiyimu xa le henhla”.
A ku li xa ku funeketa nhloko lexi a xi hambiwe hi panu, lexi a xi tizrisiwa hi muprista.
Kumbe: “u vonelela”.
Kumbe: “wa maphayiphi”.
Ku hlayiwa mbangu wa ku dzringanana.
Kumbe: “dzra mintxhumu leyitsrongo”.
Hi ku kongoma: “zribye, xtanyu”.
Kumbexana: “A matihlo lawa”.
Ku hlayiwa mazrwavi lawa ma taliki hi mihandzru.
Hi ku kongoma: “dzri nga ni 20 wa minkono hi ku leha ni 10 wa minkono hi ku yanama”. A nkono wun’we wu ni 44,5 wa masentimetru. Yana ka Dondzra Swin’wana B14.
Hi ku kongoma: “I efa dzri”. Ku hlayiwa xibya kumbe ntsrhava lowu a wu tizriseliwa ku pima ha wone. A mpimu wun’we wa efa wu ni 22 wa malitru. Yana ka Dondzra Swin’wana B14.
Ku hlayiwa xihazri lexi hi xiputukezi xi vitaniwaka Cegonha.
Hi ku kongoma: “a xikazri ka matilo ni misava”.
Kumbe: “ma ya phexele ka”.
Kumbe: “A hazri leyikulu”.
Yana Ka Dondzra Swin’wana B15.
Kumbe: “tempele dzra”.
Kumbe: “mufelwa”.
Kumbe: “a kalaka a nga na papayi”.
Hi ku kongoma: “nkama lowu a vulavuliki na vone”.
Kumbe: “ledzri dumbekaka”.
Hi ku kongoma: “hi mhaka ya leswi a nga ni masiku ya manyingi”.
Kumbe: “hi ku dumbeka”.
Kumbe: “ya tempele dzra”.
Kumbe: “Vanani ni xixixi”.
Kumbe: “ponta ya mpahla”.
Hi ku kongoma: “ya wanuna lweyi a nga Muyuda”.
Kumbe: “khokholo”.
Kumbe: “mintxhumu leyi nga ni ngati”.
Ku hlayiwa Mufilista.
Swi ti komba ku hlayiwa ku xaniseka ka vhanu vake.
Kumbe: “ku huluka”.
Ku hlayiwa nambu wa Ewufrata.
Kumbexana: “Yerusalema”. Hi ku kongoma: “Wene”.
Hi ku kongoma: “ni ta pswanya”.
Kumbe: “hi mazribye ya xibalakatsra”.
Kumbe: “ngiyana”.
Kumbe: “van’hwanyana lava kalaka va nga si na yentxa swa tinkuku”.
Ku hlayiwa swakuda swa vhanu ni swa swihazri.
Kumbe: “swikwembu swa ndangu swi”. Hi ku kongoma: “materafimi ma”.
Hi ku kongoma: “a swiphongo swi”.
Hi ku kongoma: “xihondzro xa le khoneni”. Lawa i mavitanela lawa ma tizriseliwaka ku hlaya mhunu lweyi a nga wa lisima kumbe a nga muzrangeli.
Hi ku kongoma: “mhandzri ya ku khigetela ka yone”. Ku hlayiwa museketeli kumbe mufumi.
Kumbe: “muzrangeli wa ntizro”.
Kumbe: “ntsronkolo”.
Kumbe: “hikusa ni ta va xipfundzri”.
Kumbe: “leswaku i ku Nyonxisa”.
Kumbe: “hikusa hika dzranga dzri”.
Kumbe: “na wone mahika yavu a ma ni nyenya”.
Hi ku kongoma: “va pima”.
Kumbe: “moya wa ku hefemula”.
Kumbe: “dzri va tijela”.
Kumbe: “a mimbangwini leyi yi va lumbaka”.
Kumbe: “va nga phatimisiwi”.
Hi ku kongoma: “a xikazri ka mavoko yaku”. Ku nga a xifuveni kumbe a nhlanini.
Kumbe: “kaya ka lava va ni zrandzraka”.
Kumbe: “a tihamba a ti hangalasiwe”.
Hi ku kongoma: “ku ya tlhasa lwandle”.
Kumbe: “yi nge he ti txhukatxhuka”. Yi ta fana ni loko yi womisiwe hi ku titimeta.
Ku hlayiwa Lwandle ledzri Fiki.
Ku hlayiwa Lwandle dzra Mediteraniyu.
Ku hlayiwa swihazri leswi pswaliwaka hi ku tlhangana ka kavhalu ni mbongolo.
Kumbe: “akuva va ya gandzrela”.
Kumbe: “wa matabernakela; wa mintxhatxha”.
Kumbexana: “muxavisi”.