MALAKIYA

1 Madzrungula lawa ma pfaka hi ka Xikwembu Nkulukumba:

Hi ku tizrisa Malakiya,* Yehovha a byela Israyele mazritu lawa:

2 “Ni mi kombise lizrandzru”, ku hlaya Yehovha.

Kambe n’wine mi li: “U hi kombisise kuyini lizrandzru?”

“Xana Esawu a a nga li makwavu wa Yakobe?” Ku hlaya Yehovha. “Kambe ni zrandzre Yakobe, 3 ni va ni nyenya Esawu, ni yentxa tinhava take ti va mazrumbi nakone ni nyikete pfindla dzrake ka timbyana ta nhova.”*

4 “Nambileswi Edomu a liki: ‘Hi helisiwile, kambe hi ta tlhela, hi va hi ya pfuxeta mimbangu leyi nga mazrumbi’, Yehovha wa makhandzra a li: ‘Va ta yi pfuxeta kambe ni ta yi helisa, nakone va ta vitaniwa “mbangu lowu taliki hi vhanu lava yentxaka swa ku biha” ni “vhanu lava Yehovha a va hlundzrukeliki hi lani ku nga helikiki”. 5 Mi ta swi vona hi matihlo yenu, mi va mi ku: “Yehovha a a dzrumisiwe a Israyele hinkwaku.”’”

6 “‘A n’wana a hlonipha papayi wake ni nandzra a hlonipha n’winyi wake. Kutani loko ni li papayi wenu, xi kwini xitxhavu lexi mi fanelaka ku ni komba xone? Nakone loko ni li n’winyi wenu* xi kwini xitxhavu lexi mi fanelaka ku ni komba xone?’ Mine Yehovha wa makhandzra ni byela n’wine vaprista lava dzrelaka vito dzranga.

“‘Kambe n’wine mi li: “Hi dzri dzrele hi ndlela yini vito dzraku?”’

7 “‘Mi nyikela swakuda leswi* nyamiki a altarini dzranga.’

“‘Nakone n’wine mi li: “Hi ku nyamise hi ndlela yini?”’

“‘Mi li: “A menza wa Yehovha a hi wa ntxhumu.”* 8 Loko mi nyikela xihazri lexi fiki matihlo mi li: “A ku na mhaka.” Ni loko mi nyikela xihazri lexi khutaka kumbe lexi vabyaka mi li: “A ku na mhaka.”’”

“Yehovha wa makhandzra a li: “Ni kombela mi zama ku swi nyikela ka govhernadori wenu. Xana a ta mi nyonxela kumbe a ta mi yamukela hi ku nyonxa?”

9 “Kombelani Xikwembu Nkulukumba leswaku a hi komba timpswalu. Xana a ta mi komba timpswalu na mi nyikela magandzrelo lawo?” ku hlaya Yehovha wa makhandzra.

10 “I mani kwenu a tiyimiseliki ku pfala swipfalu?* Hikusa nambi ndzrilo wa le altarini dzranga a mi wu tlhaviki na mi nga hakeliwanga. A ni nyonxi hi n’wine”, ku hlaya Yehovha wa makhandzra, “nakone a ni nyonxeli ntxhumu ka magandzrelo yenu ya swihanano”.

11 “Hikusa a vito dzranga dzri ta va dzrikulu a matikweni. Ku sukela a wuxeni ku ya a mpeladambu, a mimbangwini hinkwayu ku ta hisiwa magandzrelo ku va ku nyikeliwa magandzrelo ka vito dzranga swanga magandzrelo lawa ma yamukelekaka; hikusa a vito dzranga dzri ta va dzrikulu a matikweni,” ku hlaya Yehovha wa makhandzra.

12 “Kambe n’wine ma dzri nyamisa* hi ku hlaya mi ku: ‘A menza wa Yehovha wu nyamile, nakone a magandzrelo lawa ma* nga ka wone ni swakuda swa kone a hi swa ntxhumu.’ 13 Mi tlhela mi ku: ‘A hi ku kazralisana ka swone!’ mi va mi yi dzrela”, ku hlaya Yehovha wa makhandzra. “Mi buyisa swihazri swa ku yiviwa, swa ku khuta ni swa ku vabya. Ina, mi tisa mintxhumu leyo swanga swihanano! Xana ni fanela ku yi yamukela mintxhumu leyo?” ku hlaya Yehovha.

14 “A ku zrukiwe mhunu lweyi a kanganyisaka, lweyi a ntlhambini wake a nga ni xihazri xa xinuna lexi hanyiki ha hombe kambe a hamba xihlambanyu ni ku nyikela gandzrelo ka Yehovha hi xihazri lexi limaliki. Hikusa ni Hosi ya yikulu ngopfu swinene”, ku hlaya Yehovha wa makhandzra, “nakone matiko ma ta txhava ma tlhela ma hlonipha vito dzranga”.

2 “N’wine vaprista, a xileleto lexi xi ya kwenu. 2 Loko mi nga yingiseti nakone mi nga swi tekeli nhlokweni ku dzrumisa vito dzranga,” ku hlaya Yehovha wa makhandzra, “ni ta mi zrumela swizruku, ni yentxa leswaku a matovoko yenu ma va swizruku. Ina, ni ta yentxa matovoko ma va swizruku, hikusa a mi swi tekeli nhlokweni.”

3 “Ma swi twa! Hi mhaka yenu ni ta helisa* timbewu leti byaliwiki ni hangalasa ni nswanyu a mawusweni yenu ku nga nswanyu wa swihazri leswi mi swi dlayiki a minkhubyini yenu; kutani mi ta yisiwa kohala.* 4 Xileswo, mi ta swi tiva leswaku ni mi nyike xileleto lexi akuva xipfumelelanu xanga na Levhi xi tama xi tizra”, ku hlaya Yehovha wa makhandzra.

5 “A xipfumelelanu xanga na yene xi ve xipfumelelanu xa wutomi ni ku zrula, lexi ni mu nyikiki akuva a ni hlonipha. A ni hloniphile, ina, a kombise xitxhavu ka vito dzranga. 6 A dondzrisa ntiyiso, nakone a ngi ngi sama a vulavula mintxhumu ya ku biha. A a famba na mine hi ku zrula ni wululami nakone a yentxe vanyingi va tsrhika ku yentxa swihoxo. 7 Hikusa a muprista a fanela ku dondzrisa vhanu mayelanu na Xikwembu Nkulukumba nakone a vhanu va fanela ku mu yela akuva va ya dondzrisiwa, hikusa i muzrumiwa wa Yehovha wa makhandzra.

8 “Kambe n’wine mi hambukile ndleleni. Mi yentxe vanyingi va tlula nawu.* Mi tlule xipfumelelanu xa Levhi”, ku hlaya Yehovha wa makhandzra. 9 “Xileswo ni ta yentxa leswaku mi dzreliwa ni ku voneliwa hansi hi vhanu hinkwavu, hikusa a mi ti bekisanga tindlela tanga, kambe mi kombise xihlawuhlawu a mhakeni leyi fambisanaka ni nawu.”

10 “Xana papayi wezru hinkwezru a hi mun’we? Xana a hi vumbiwanga ha Xikwembu Nkulukumba mun’we? Kutani ha yini hi kanganyisana, hi honisa xipfumelelanu xa vakokwana vezru? 11 Yuda a yentxe wukanganyisi, nakone a Israyele ni le Yerusalema ku yentxiwa ntxhumu lowu nyenyentsaka; hikusa Yuda a nyamisa wuxwengi* bya Yehovha lebyi Yene a byi zrandzraka, a ve a tekana ni n’wana wa xisati wa xikwembu xa tiko dzrin’wana. 12 Yehovha a ta helisa a matendeni ya Yakobe hinkwavu lava yentxaka leswo, swi nge na mhaka leswaku i mani,* nambiloko a nyikela gandzrelo dzra xihanano ka Yehovha wa makhandzra.”

13 “Nakone mi yentxa swin’wana leswi* yentxaka leswaku a altari dzra Yehovha dzri funeketiwa hi minyembeti, hi swidzrilo ni hi ku konya lakakuva a nga ha vi na mhaka ni magandzrelo yenu nambi ku nyonxela ntxhumu wini na wini lowu pfaka mavokweni yenu. 14 Nakone mi li: ‘Ha yini?’ Hikusa Yehovha i mboni a xikazri kwaku ni nsati wa wumpshwa byaku, lweyi u mu kanganyisiki nambileswi a viki munghanu tlhelo nkataku hi kola ka xipfumelelanu.* 15 Kambe ku ni lweyi a kalaka a nga swi yentxanga leswo hikusa a a ni moya wa Xikwembu Nkulukumba.* Kutani a a djuletela yini? A vana va* Xikwembu Nkulukumba. Xileswo, tivonelani ka miyanakanyu yenu,* nakone mi nga kanganyisi vasati va wumpshwa byenu. 16 Hikusa na ku nyenya* ku dlaya wukati”, ku hlaya Yehovha Xikwembu Nkulukumba wa Israyele, “ni nyenya ni hinkwavu lava va nga ni madzolonga”,* ku hlaya Yehovha wa makhandzra. “Tivonelani ka miyanakanyu yenu nakone mi nga kanganyisi.

17 “Mi kazralisa Yehovha hi mazritu yenu, kambe mi li: ‘Hi mu kazralisisa ku yini?’ Hi ku hlaya mi ku: ‘Mun’wana ni mun’wana lweyi a yentxaka swa ku biha, ka Yehovha i munene nakone awa mu nyonxela’, kumbe hi ku hlaya mi ku: ‘A kwini Xikwembu Nkulukumba lweyi a nga ni wululami?’”

3 “Lavisani! Ni zrumela muzrumiwa wanga, a ta ni lulamisela* ndlela. Nakone na mi nga swi yimelanga a Hosi ya ntiyiso leyi mi yi djulaka, yi ta ta a tempeleni dzra yone, nakone a muzrumiwa wa xipfumelelanu a ta ta, lweyi mi nyonxaka ha yene. Nakunene a ta ta”, ku hlaya Yehovha wa makhandzra.

2 “Kambe i mani lweyi a taka va na a lulamile hi siku dzra ku ta kwake, nakone i mani lweyi a taka yima a tiya loko a humelela? Hikusa a ta fana ni ndzrilo wa munyivilikisi wa tinsimbi ni sabawu dzra vahlampswi. 3 Nakone a ta tsrhama swanga munyivilikisi ni mubasisi wa prata, kutani a ta basisa vana va Levhi; a ta va basisa ku fana ni woru ni prata, nakunene va ta va vhanu va Yehovha lava nyikelaka gandzrelo dzra xihanano hi ku lulama. 4 Kutani a gandzrelo dzra xihanano dzra Yuda ni dzra Yerusalema, nakunene dzri ta va ledzri nyonxisaka ka Yehovha, ku fana ni le masikwini ya khale kun’we ni le minkameni ya khale.

5 “Ni ta mi tela akuva ni mi yavanyisa nakone ni ta tekela ku nyikela wumboni lebyi lwisanaka ni valoyi, lava yentxaka wumbuye, lava hlambanyaka madzrimi, lava kanganyisaka mutizri lweyi a tholiwiki, lava xanisaka wansati lweyi a feliwiki hi nuna kumbe n’wana lweyi a feliwiki hi vapswele ni lebyi lwisanaka ni lava va yalaka ku pfuna muluveli. Vhanu lavo a va ni txhavi”, ku hlaya Yehovha wa makhandzra.

6 “Hikusa mine ni Yehovha; a ni txintxi. Nakone n’wine mi vana va Yakobe; hi leswi swi yentxaka ku va mi nga si na helisiwa. 7 Ku sukela a masikwini ya vakokwana venu mi tsrhike ku landzra swileleto swanga nakone a mi swi bekisi. Tlhelelani kwanga, na mine ni ta tlhelela kwenu”, ku hlaya Yehovha wa makhandzra.

Kambe n’wine mi li: “Hi ta tlhelelisa kuyini?”

8 “Xana mhunu wa nyama a nga yivela Xikwembu Nkulukumba? Kambe n’wine ma ni yivela.”

Nakone mi li: “Hi ku yivelisa kuyini?”

“Hi ku va mi nga buyisi swa wukhume* ni swihanano. 9 Nakunene mi ta weliwa hi khombo* hikusa ma ni yivela, ina, tiko hinkwadzru dzri yentxa swoswo. 10 Buyisani swa wukhume* hinkwaswu a xitlhanteni* akuva ku ta va ni swakuda a ndlwini kwanga; nakone na mi kombela ni dzringani a mhakeni leyi”, ku hlaya Yehovha wa makhandzra, “mi vona loko ni nge ti mi pfulela tinyangwa ta matilo ni loko ni nge ti mi txhululela tovoko a henhla kwenu ku ya tlhasela loko ku nga ha kiyeli ntxhumu”.

11 “Nakone a ni nge he ti swi pfumelela swidodwana swi detetela ntsrhovelo wa tiko dzraku, ni nsinya wa mawuvha wa le masin’wini yaku a wu nge ti va lowu nga pswalikiki mihandzru”, ku hlaya Yehovha wa makhandzra.

12 “A matiko hinkwawu ma ta sindzriseka ku hlaya leswaku mi vhanu lava nyonxiki, hikusa mi ta va tiko dzra ku nyonxa”, ku hlaya Yehovha wa makhandzra.

13 Yehovha a li: “mi khanela ku biha ha mine nakone ma ni khunguvanyisa.”

Mi tlhela mi ku: “Hi ku khunguvanyise hi swa kuyini?”

14 “N’wine mi li: ‘Ku tizrela Xikwembu Nkulukumba a swi pfuni ntxhumu. Hi pfuneka hi yini loko hi yentxa leswi a swi yimeliki kwezru ni ku va hi komba Yehovha wa makhandzra leswaku hi xukuvalile hi kola ka swidoho swezru? 15 Kutani hi li va nyonxile lava va tikulisaka. Handle ka leswo, lava va yentxaka leswi bihiki swi va fambela ha hombe. Va tiya va dzringa Xikwembu Nkulukumba va va va nga khatisiwi.’”

16 Hi nkama wolowo lava txhavaka Yehovha a va bulisana, mun’wana ni mun’wana a a bulisana ni mhunu mun’wana, nakone Yehovha a a zreyelisisa ndleve a yingiseta. Kutani a mahlweni kwake ku tsraliwe buku dzra xidzrimuxo, dzri tsraleliwa lava va txhavaka Yehovha ni lava va yanakanyisisaka* hi vito dzrake.

17 “Va ta va vanga”, ku hlaya Yehovha wa makhandzra, “hi siku ledzri ni taka va yentxa va va vhanu vanga va ku hlawuleka.* Ni ta va twela wusiwana ku fana ni papayi lweyi a twelaka wusiwana n’wanake lweyi a yingisetaka. 18 Kutani mi ta tlhela mi vona ku hambana xikazri ka mhunu lweyi a lulamiki ni lweyi a bihiki, ka lweyi a tizrelaka Xikwembu Nkulukumba ni lweyi a kalaka a nga mu tizreli”.

4 “Ma swi twa! Dzra ta siku ledzri taka hisa ngopfu swinene ku fana ni ndzrilo lowukulu, ledzri hinkwavu lava va tikulisaka ni hinkwavu lava yentxaka swa ku biha va taka fana ni byanyi. Nakunene va ta helisiwa hi siku ledzro ledzri buyaka, a ku na limitsru kumbe likambu ledzri taka sala”, ku hlaya Yehovha wa makhandzra. 2 Kambe n’wine lava hloniphaka* vito dzranga mi ta vaningeliwa hi dambu ledzri tisaka wululami nakone a minseve ya dzrone yi ta mi hanyisa,* mi va mi ntlulantlula ku fana ni mazrole ya* ku nona”.

3 “Hi siku ledzri ni taka swi yentxa hi dzrone mi ta kandzretela lava ku biha, hikusa va ta fana ni ntsrhuzri lowu nga hansi ka minkondzro yenu”, ku hlaya Yehovha wa makhandzra.

4 “Dzrimukani Nawu lowu ni wu nyikiki nandzra wanga Moxe a Horebe lowu patsraka swileleto ni swiboho swa wuyavanyisi, leswi ni byeliki Vaisrayele hinkwavu leswaku va swi yingiseta.

5 “Ma swi twa! Ni ta mi zrumela muprofeta Eliya na siku ledzrikulu dzra Yehovha ledzri txhavisaka dzri nge si na tlhasa. 6 Kutani a ta yentxa leswaku a timbilu ta vapswele ti fana ni ta vana* ni timbilu ta vana ti fana ni ta vapswele;* akuva ni nga buyi ni ta ba misava ni yi helisa.”*

(A wundzruluteli bya Matsralwa ya Xiheberu ni ya Xiyaramayika byi gama kola, byi ta landzreliwa hi Matsralwa ya Wukriste ya Xigriki)