MADZRUNGULA LAMANENE LAMA TSRALIWIKI HI MATEWU

1 Buku dzra matimu* ya Yesu Kriste,* n’wana wa Davhida, n’wana wa Abrahamu:

17 Kutani ku sukela ka Abrahamu ku ya tlhasa ka Davhida, ku ve ni 14 wa tinxaka; ku sukela ka Davhida ku ya tlhasa loko va khomiwa va yisiwa a Babilona, ku ve ni 14 wa tinxaka; ku sukela ka loko va khomiwile va yisiwa a Babilona ku ya tlhasa ka Kriste, ku ve ni 14 wa tinxaka.

18 Kambe a ku pswaliwa ka Yesu Kriste ku ve hi ndlela leyi: Hi nkama lowu mamana wake Mariya a dumbisiwiki mutxhatu hi Yosefa, a kume nyimba hi moya wa ku xwenga* na va nga si na txhata. 19 Nambitanu, leswi Yosefa nuna wake a a li mhunu wa ku lulama nakone a a nga djuli ku mu hamba xihlekiso a vhanwini, a kunguhate ku mu tsrhika xihundleni. 20 Kambe ntsrhaku ka loko a yanakanyisise hi mhaka leyi, ntsrumi ya Yehovha* yi humelele kwake a lozrweni yi ku: “Yosefa n’wana wa Davhida, u nga txhavi ku titekela Mariya nsati waku u famba na yene kaya, hikusa a nyimba leyi a nga na yone a yi kume hi moya wa ku xwenga. 21 A ta pswala n’wana wa djaha, u fanela ku mu txhula vito dzra ku Yesu,* hikusa a ta huluxa vhanu vake ka swidoho swavu.” 22 Nakunene hinkwaswu leswi swi yentxeke akuva ku hetiseka mazritu lawa Yehovha a ma hlayiki hi ku tizrisa muprofeta wake, a ku: 23 “Vonani! A n’hwanyana a ta va ni nyimba, a ta pswala n’wana wa djaha, nakone va ta mu txhula vito dzra ku Emanuwele”, leswi loko swi ndzruluteliwa swi liki: “Xikwembu Nkulukumba a na hine.”

24 Kutani Yosefa a pfuka wuzrongweni a va a ya teka nsati wake a famba na yene kaya hi lani ntsrumi ya Yehovha yi mu byeliki ha kone. 25 Kambe a nga yentxanga timhaka ta tinkuku na yene ku ya tlhasa loko a pswala n’wana wa djaha, a va Yosefa a mu txhula leswaku i Yesu.

2 Ntsrhaku ka loko Yesu a pswaliwile* a Betlehema wa Yudeya, a masikwini ya ku fuma ka hosi Heroda,* a Yerusalema ku tlhase vangoma va le Wuxeni lava tizraka hi tinyeleti. 2 Va tlhase va ku: “A kwini lweyi a pswaliwiki akuva a ta va Hosi ya Vayuda? Hikusa hi vone nyeleti yake na ha ha li Wuxeni, kutani hi teli ku ta ta mu khinsamela.” 3 Loko hosi Heroda a twa mhaka leyi, a sungula ku kazrateka kun’we ni vayaki hinkwavu va Yerusalema. 4 Kutani a hlengeleta vaprista hinkwavu lavakulu ni vatsrali, a va vutisa leswaku Kriste* a a ta pswaleliwa kwini. 5 Va mu hlamula va ku: “A Betlehema wa Yudeya, hi lani muprofeta a tsraliki ha kone a ku: 6 ‘Wene Betlehema wa Yuda, a wu ntsrongo ngopfu makazri ka vafumi va Yuda, hikusa ka wene ku ta huma hosi leyi taka byisa vhanu vanga, ku nga tiko dzra Israyele.’”

7 Kutani Heroda a vitana vangoma lava tizraka hi tinyeleti a va vutisa a xihundleni, a djula ku swi kumisisa ha hombe leswaku va sungule siku muni ku vona nyeleti yoleyo. 8 Kutani a va zruma a Betlehema a ku: “Fambani mi ya djulisisa ntsrongwana, loko mi mu kuma tlhelani mi ta ta ni byela akuva na mine ni ta ya mu khinsamela.” 9 Ntsrhaku ka ku twa mazritu ya hosi, va khome ndlela va famba; va ku va lavisa, nyeleti leyi va yi voniki ku sunguleni loko va ha li Wuxeni a yi va kongomisa, yi ya tlhasa yi yima lani ntsrongwana a a li kone. 10 Loko va vona nyeleti yi yima, va nyonxa ngopfu swinene. 11 Loko va nghena ndlwini, va vona ntsrongwana na a na Mariya mamana wake, kutani va wa hi matsrolo va mu khinsamela. Va pfula mintsrhwalu yavu va humesa woru, olibanu* ni mira* va swi hanana ntsrongwana. 12 Nambitanu, leswi Xikwembu Nkulukumba a va byeliki a lozrweni leswaku va nga tlheleli ka Heroda, va muke tikweni dzravu hi ku tizrisa ndlela yimbeni.

13 Loko va mukile, ntsrumi ya Yehovha yi humelele ka Yosefa a lozrweni, yi ku: “Pfuka, teka ntsrongwana ni mamana wake mi tsrutsruma mi ya Egipta, mi ya tsrhama kone ku ya tlhasa loko ni mi byela kuva mi tlhela, hikusa Heroda a ta djuletela ntsrongwana akuva a mu dlaya.” 14 Kutani ni wusiku, Yosefa a pfuka a teka n’wana ni mamana wake va tsrutsruma va ya Egipta. 15 Va tsrhame kone ku ya tlhasa loko Heroda a fa. Leswo swi hetisise leswi hlayiwiki hi Yehovha hi ku tizrisa muprofeta, a ku: “Ni vitane n’wananga a huma a Egipta.”

16 Loko Heroda a vona leswaku vangoma lava tizraka hi tinyeleti va mu kanganyisile, a hlundzruka ngopfu. Kutani a humesa nawu wa leswaku ku dlayiwa vatsrongwana hinkwavu va xinuna a Betlehema ni le migangeni hinkwayu ya le kusuhi, ku sukela ka va malembe mabidzri ku ya hansi, hi ku ya hi nkama lowu a wu kumisisiki ka vangoma lava tizraka hi tinyeleti. 17 Kutani ku hetiseka leswi hlayiwiki hi muprofeta Yeremiya lweyi a nga ku: 18 “Ku twale zritu a Rama, dzra xidzrilo ni nkosi lowukulu. A dzri li dzra Rakeli a dzrilelaka vanake, nakone a a nga djuli ku txhaveleliwa, hikusa a va nga ha li kone.”

19 Ntsrhaku ka ku fa ka Heroda, ntsrumi ya Yehovha yi humelele ka Yosefa a lozrweni na a ha li Egipta, 20 yi ku: “Pfuka, u teka ntsrongwana ni mamana wake mi tlhelela a tikweni dzra Israyele, hikusa lava a va djula ku dlaya ntsrongwana va file.” 21 Kutani a pfuka a teka ntsrongwana na Mariya va tlhelela tikweni dzra Israyele. 22 Kambe loko a yingela leswaku Arkelawu awa fuma a Yudeya a pfaleta papayi wake Heroda, Yosefa a txhava ku ya kone. Handle ka leswo, Xikwembu Nkulukumba a mu byele a lozrweni leswaku a ya Galileya. 23 Kutani a tlhase a tsrhama doropeni ledzri va liki i Nazareta, akuva ku hetiseka leswi hlayiwiki hi vaprofeta loko va ku: “A ta vitaniwa Munazareta.”*

3 A masikwini wolawo, Yohane Mubabatisi a a zrezra a mananga ya le Yudeya, 2 a ku: “Tisolani, hikusa a Mfumu wa matilo wu le kusuhi.” 3 Kunene, lweyi hi lweyi muprofeta Ezaya a vulavuliki ha yene loko a te: “Ku ni lweyi a huwelelaka a mananga a ku: ‘Lulamiselani ndlela ya Yehovha! Basisani tindlela take.’” 4 Yohane a a yambala mpahla leyi hambiwiki hi voya bya kamela a tsrimba ni bandhi ledzri hambiwiki hi xikhumba. Swakuda swake a ku li mintete ni wulombe bya nhova. 5 Kutani vhanu va le Yerusalema ni vhanu hinkwavu va le Yudeya ni va le migangeni hinkwayu ya le kusuhi na Yordani a va ya kwake, 6 kutani a a va babatisa* a Nambyeni wa Yordani, va tihlaya swidoho swavu a mahlweni ka vhanu.

7 Loko a vona Vafarisi ni Vasaduki vavanyingi va ta lani a a babatisela kone vhanu, a va byela a ku: “N’wine vana va tinyoka leti nga ni mahlungu,* i mani a nga mi byela leswaku mi nga huluka mahlundzru lawa ma buyaka? 8 Yentxani mintizro leyi kombisaka leswaku ma tisola. 9 Mi nga tikanganyisi mi ku: ‘Hi vana va Abrahamu.’ Hikusa na mi byela, Xikwembu Nkulukumba a nga swi kota ku hambela Abrahamu vana hi mazribye lawa. 10 A kawula* dzri lulameli ku tsrema timitsru ta minsinya. Kutani nsinya wun’wana ni wun’wana lowu kalaka wu nga pswali mihandzru leyinene wu ta tsremiwa wu txukumeteliwa ndzrilweni. 11 Mine, ni mi babatisa hi mati hi kola ka ku tisola kwenu, kambe lweyi a taka ntsrhaku kwanga a ni ntamu ku ni tlula nakone a swi ni faneli ku mu susa masandaliya. Yene a ta mi babatisa hi moya wa ku xwenga ni hi ndzrilo. 12 A tamele xitizro xa ku hehezra ha xone* akuva a ta hambanisa trigu ni mavivi a va a basisa mbangu wa ku hehezrela ka wone kutani a teka trigu a dzri txhela tsrhaleni kambe a mavivi a ma hisa hi ndzrilo lowu nga timekiki.”

13 Kutani Yesu a suka Galileya a ya Yordani akuva a ya babatisiwa hi Yohane. 14 Kambe Yohane a zama ku mu sivela, a ku: “Ha yini u ta ka mine akuva ni ku babatisa, nakasi hi mine ni fanelaka ku babatisiwa ha wene?” 15 Yesu a mu hlamula a ku: “U nga yali, swoswi a hi swi yentxi hi ndlela leyi akuva hi hetisisa hinkwaswu leswi Xikwembu Nkulukumba a swi djulaka.” Kutani Yohane a pfumela. 16 Ntsrhaku ka loko Yesu a babatisiwile, hi ku kahlula a huma matini, kolanu a matilo ma pfuleka, kutani Yohane a vona moya wa ku xwenga wa Xikwembu Nkulukumba wu xikela henhla ka Yesu na wu fana ni tuva. 17 Ku tlhela ku twala zritu ledzri pfaka hi le matilweni dzri ku: “Lweyi i N’wananga, lweyi a zrandzrekaka, lweyi ni mu yamukelaka.”

4 Ntsrhaku ka leswo, Yesu a yisiwa mananga hi moya wa Xikwembu Nkulukumba. Na a li kohala, Diyavulosi a mu dzringa. 2 Ntsrhaku ka ku heta 40 wa masiku, wusiku ni nhlikanhi na a nga di ntxhumu, a twe ndlala. 3 Kutani Diyavulosi a mu tsrhindzrekelela, a ku: “Loko u li n’wana wa Xikwembu Nkulukumba, byela mazribye lawa leswaku ma ndzruluka ma va mapawu.” 4 Kambe yene a mu hlamula a ku: “Ku tsraliwile: ‘Mhunu a nga fanelanga ku hanya hi pawu ntsena, kambe a fanela ku hanya ni hi zritu dzrin’wana ni dzrin’wana ledzri humaka a non’wini wa Yehovha.’”

5 Kutani Diyavulosi a mu yisa doropeni dzra ku xwenga a tlhasa a mu yimisa henhla ka tempele* 6 a mu byela a ku: “Loko u li n’wana wa Xikwembu Nkulukumba, titxukumeteli hansi, hikusa ku tsraliwe leswi: ‘A ta zrumela tintsrumi take leswaku ti ta ku tlhamukela, akuva a nkondzro waku wu nga bi zribye.’” 7 Yesu a mu hlamula a ku: “Nakone ku tsraliwe leswi: ‘U nga txhuki u dzringa Yehovha Xikwembu Nkulukumba waku.’”

8 Ntsrhaku ka leswo, Diyavulosi a mu yisa nhaveni leyi tlakukiki ngopfu swinene, kutani a mu komba mimfumu hinkwayu ya misava ni ku phatima ka yone. 9 Kutani a mu byela leswi: “Ni ta ku nyika mintxhumu leyi hinkwayu loko wo khinsama kan’we u ni gandzrela.” 10 Kutani Yesu a mu byela leswi: “Suka, Sathana! Hikusa ku tsraliwe leswi: ‘U fanela ku gandzrela Yehovha Xikwembu Nkulukumba waku, u tizrela yene ntsena.’” 11 Kutani Diyavulosi a mu tsrhika, ntsrhaku ka leswo ku ta tintsrumi ti ta mu tiyisa.

12 Loko a yingela leswaku Yohane a khomiwile, a suka a ya Galileya. 13 Nakone loko a suka Nazareta, a ye tsrhama Kapernawume kusuhi ni lwandle a migangeni ya Zebuloni na Naftali, 14 akuva ku hetiseka leswi hlayiwiki hi muprofeta Ezaya, lweyi a nga ku: 15 “Wene tiko dzra Zebuloni ni tiko dzra Naftali, a ndleleni leyi yaka lwandle, ka tlhelo dzrin’wana dzra Yordani, a mbangwini wa Galileya lomu ku tsrhamaka vhanu va matiko man’wana! 16 A vhanu lava tsrhamaka munyameni va vone livaningu ledzrikulu, ni lava tsrhamaka a ntsrhutini wa lifu, a livaningu dzri va vaningelile.” 17 Ku sukela ka nkama wolowo Yesu a sungula ku zrezra a ku: “Tisolani, hikusa a Mfumu wa matilo wu le kusuhi.”

18 Na a famba a tlhelweni ka Lwandle dzra Galileya, a vona Simoni lweyi a vitaniwaka Petro, na Andreya, lava a va li vamakwavu, na va peta nkukutu* wavu a lwandle, hikusa a va li vaphasi va tihlampfi. 19 Kutani a va byela a ku: “Ni landzrani, ni ta mi yentxa vaphasi va vhanu.” 20 Va tekela ku tsrhika minkukutu yavu va mu landzra. 21 Loko a suka kolanu, a vona van’wana vabidzri lava a va li vamakwavu, Yakobe na Yohane vana va Zebedewu. Vone a va li botini ni papayi wavu Zebedewu va lunghisa minkukutu yavu, kutani a va vitana. 22 Kolanu va siya boti ni papayi wavu va mu landzrela.

23 Kutani a famba tikweni hinkwadzru dzra Galileya, a dondzrisa masinagogeni yavu ni ku zrezra madzrungula lamanene ya Mfumu ni ku tlhela a daha vhanu mavabyi ya ku hambanahambana ni wulema bya mixaka hinkwayu. 24 A ndhuma yake yi hangalaka a tikweni hinkwadzru dzra Siriya. Kutani va mu buyisela hinkwavu lava a va ni mavabyi ya ku hambanahambana ni swivavu, lava a va ni mademona, mavabyi ya hweti ni lava a va wome swizro, kutani a va hanyisa. 25 Hi kola ka leswo, a switsrhungu leswikulu leswi humaka Galileya, Dekapolosi,* Yerusalema, Yudeya ni le ka tlhelo dzrin’wana dzra le Yordani swi mu landzrela.

5 Loko a vona switsrhungu, a tlhantukela a nhaveni, kutani loko a tsrhame hansi, a vadondzrisiwa vake va mu tsrhindzrekelela. 2 Kutani a sungula ku va dondzrisa, a ku:

3 “Va nyonxa lava tikazratelaka ku va ni wuxaka na Xikwembu Nkulukumba, hikusa Mfumu wa matilo i wavu.

4 “Va nyonxa lava dzrilaka, hikusa va ta txhaveleliwa.

5 “Va nyonxa lava ku zrula,* hikusa va ta da pfindla dzra misava.

6 “Va nyonxa lava nga ni ndlala ni tozra dzra leswa ku lulama, hikusa va ta xuzrisiwa.*

7 “Va nyonxa lava nga ni timpswalu, hikusa va ta kombisiwa timpswalu.

8 “Va nyonxa lava basiki timbilu, hikusa va ta vona Xikwembu Nkulukumba.

9 “Va nyonxa lava kondletelaka ku zrula,* hikusa va ta vitaniwa vana va Xikwembu Nkulukumba.

10 “Va nyonxa lava xanisiwaka hi kola ka leswa ku lulama, hikusa Mfumu wa matilo i wavu.

11 “Nyonxani loko vhanu va mi zruka, va mi xanisa ni ku mi lumbeta mintxhumu ya yinyingi ya ku biha hi kola kwanga. 12 Nyonxani mi nyonxisisa, hikusa a hakelo dzrenu i dzrikulu a matilweni; na vone vaprofeta lava hanyiki na mi nga si va kone va xanisiwile hi ndlela yoleyo.

13 “N’wine mi fana ni munyu a misaveni, kambe loko munyu wu heleliwa hi ntamu wa wone, xana a ku twala ka wone ku nga pfuxetiwa hi ndlela yini? A wu nge he pfuni ntxhumu loko ku nga li ku va wu txukumetiwa handle wu pswanyeteliwa hi vhanu.

14 “N’wine mi livaningu dzra misava. A doropa a dzri nge fihleki loko dzri kumeka henhla ka nhava. 15 Loko vhanu va tlhavika motsre a va wu tlhoti, kambe va wu tlhanteka henhla ka menza, kutani wu vaningela hinkwavu lava nga ndlwini. 16 Hi ndlela leyi fanaka, a ku vaninga kwenu a ku voniwe hi vhanu hinkwavu, akuva va ta vona mintizro yenu leyinene kutani va dzrumisa Papayi wenu lweyi a nga matilweni.

17 “Mi nga pimisi leswaku ni teli ku ta helisa Nawu kumbe tindondzro ta Vaprofeta. Ni teli ku ta swi hetisisa, ku nga li ku swi helisa. 18 Na mi tiyisekisa leswaku swi nga nabyala ngopfu kuva matilo ni misava swi khaluta ku tlula kuva a letra ledzritsrongo kumbe xintsrhatana xa Nawu xi nyamalala na xi nga hetisekanga. 19 Kambe mun’wana ni mun’wana lweyi a tlulaka wun’we ka milawu leyi vhanu va pimisaka leswaku a hi ya lisima, a tlhela a dondzrisa vambeni ku yentxa leswo, a nga fanekeli ku nghena Mfun’wini wa matilo. Kambe mun’wana ni mun’wana lweyi a yi landzraka a tlhela a dondzrisa vambeni ku yi landzra, a ta fanekela ku nghena Mfun’wini wa matilo. 20 Na mi byela leswaku loko mintizro yenu ya ku lulama yi nga tluli ya vatsrali ni Vafarisi, a mi na ku nghena Mfun’wini wa matilo.

21 “Mi swi twile leswaku lava khale va byeliwe leswi: ‘U nga txhuki u dlaya, kambe mun’wana ni mun’wana lweyi a dlayaka a ta tihlamulela a tribunali.’ 22 Nambitanu, ni mi byela leswi: Mun’wana ni mun’wana lweyi a tamaka a hlundzrukela makwavu, a ta tihlamulela a tribunali; ni lweyi a zruketelaka makwavu a mu poyila, a ta tihlamulela a Tribunali Ledzrikulu; kasi lweyi a liki: ‘Ximphunta ndzriwene!’ a ta petiwa ndzrilweni wa Gehena.*

23 “Xileswo, loko u ya nyikela nyiko a altarini kutani kohala u dzrimuka leswaku makwenu a ku kwatelile, 24 siya nyiko yaku mahlweni ka altari, u famba. U zranga u ya lulamisa mhaka ya kone ni makwenu, u gama u tlhela u ta nyikela nyiko yaku.

25 “Hantla u lulamisa timhaka ni lweyi a nga ku mangalela, na ma ha ya tribunali, akuva hi ndlela ya kukazri lweyi a nga ku mangalela a nga ku yisi ka muyavanyisi, ni leswaku muyavanyisi a nga ku nyikeli ka mulaveleli wa djele kutani u pfaleliwa. 26 Na ku tiyisekisa leswaku a wu na ku huma na u nga si na hakela sentavhu* dzraku dzra wugamu.

27 “Mi swi twile leswaku ku hlayiwe leswi: ‘U nga txhuki u yentxa wumbuye.’ 28 Kambe na mi byela leswaku mun’wana ni mun’wana lweyi a tamaka a langusa wansati lakakuva a mu navela, a va na kutani a mbuyetile na yene a mbilwini yake. 29 Loko tihlo dzraku dzra xinene dzri ku dohisa, dzri xokoli u dzri txukumeta kule na wene. Hikusa swa yampswa u luzekeliwa hi xizro xin’we mizrini waku ku tlula ku va mizri waku hinkwawu wu txukumetiwa a Gehena.* 30 Nakone, loko voko dzraku dzra xinene dzri ku dohisa, dzri tsremi u dzri txukumeta kule na wene. Hikusa swa yampswa kuva u luzekeliwa hi xizro xin’we mizrini waku ku tlula kuva mizri waku hinkwawu wu txukumetiwa a Gehena.*

31 “Handle ka leswo, ku hlayiwe leswi: ‘Mun’wana ni mun’wana lweyi a tsrhikaka* nsati wake a a mu nyiki papela dzra ku dlaya wukati.’ 32 Nambitanu, na mi byela leswaku mun’wana ni mun’wana lweyi a tsrhikaka nsati wake, na ku nga li leswaku e yentxa swa tingana hi tlhelo dzra tinkuku,* a mu beka ndzringweni wa ku yentxa wumbuye, nakone lweyi a txhataka ni wansati lweyi a tsrhikiwiki hi nuna wake hi ndlela leyi, a yentxa wumbuye.

33 “Handle ka leswo, mi swi twile leswaku lava khale va byeliwe leswi: ‘U nga txhuki u funga u gama u nga swi hetisisi, kambe u fanela ku hetisisa leswi u swi dumbisiki a mahlweni ka Yehovha.’ 34 Nambitanu, na mi byela: Mi nga txhuki mi funga, nambi ku li hi tilo, hikusa i xiluvelo xa Xikwembu Nkulukumba, 35 nambi ku li hi misava, hikusa i wunalavutelo bya minkondzro yake, nambi ku li hi Yerusalema, hikusa i doropa dzra Hosi leyikulu. 36 U nga fungi hi nhloko yaku, hikusa a wu nge swi koti ku ndzruluta nsisi wun’we a nhlokweni yaku wu va wa ku basa kumbe wu va wa ntima. 37 A ‘Ina’ wenu a a ve ina, a ‘Im-him’ wenu a a ve im-him, hikusa leswi tlulaka leswo swi huma ka Diyavulosi.*

38 “Mi swi twile leswaku ku hlayiwe leswi: ‘Tihlo hi tihlo ni tinyo hi tinyo.’ 39 Nambitanu, na mi byela: Mi nga lwisani ni mhunu lweyi a mi yentxelaka swa ku biha, kambe lweyi a ku baka mpama ka zrama dzra xinene, tlhela u mu nyika ni ledzra ximatsri. 40 Loko mhunu a djula ku ku yisa a tribunali akuva a ku tekela xin’we xa swiyambalu swaku, tlhela u mu nyika ni xiyambalu xin’wana; 41 nakone loko mhunu lweyi a nga ni wulawuli a ku sindzrisa ku yentxa ntizro lowu djulaka kuva u famba kilometru dzrin’we, famba na yene makilometru mabidzri. 42 Nyika lweyi a ku kombelaka, nakone u nga yali loko mhunu a djula leswaku u mu voleka xa kukazri.*

43 “Mi swi twile leswaku ku hlayiwe leswi: ‘U fanela ku zrandzra vhanu van’wana,* kambe u nyenya nala waku.’ 44 Nambitanu, na mi byela: Yanani mahlweni mi zrandzra valala venu nakone mi khongotelela lava va mi xanisaka, 45 akuva swi ta tikomba leswaku mi vana va Papayi wenu lweyi a nga matilweni, lweyi a humesaka dambu dzrake akuva dzri vaningela lava yentxaka swa ku biha ni lava yentxaka leswinene, a tlhela a nisela mpfula lava ku lulama ni lava kalaka va nga lulamanga. 46 Hikusa loko mi zrandzra ntsena lava va mi zrandzraka, mi pfuneka hi yini? Xana na vone vahakelisi va tinemba a va yentxi leswi fanaka? 47 Nakone loko u losa vamakwenu ntsena, xana u va tlula hi yini van’wana? A hi swone leswi vamatiko va swi yentxaka xana? 48 Mi fanela ku va lava hetisekiki,* swanga hi leswi Papayi wenu wa le tilweni a hetisekiki.

6 “Tivonelani akuva mi nga yentxi mintxhumu ya ku lulama hi ku djula ku voniwa hi vhanu, hikusa loko mi yentxa leswo Papayi wenu lweyi a nga matilweni a nge ti mi tovokisa. 2 Xileswo, loko u hanana swisiwana mintxhumu ya kukazri, u nga zrangi hi ku ba mpepo, hi lani vakanganyisi va yentxaka ha kone a masinagogeni ni le tindleleni akuva va dzrumisiwa hi vhanu. Kunene na mi byela, a va nge ti tovokisiwa hi Xikwembu Nkulukumba. 3 Kambe wene, loko u nyika swisiwana tinyiko ta kukazri, u nga byeli voko dzraku dzra ximatsri leswi yentxiwaka hi ledzra xinene, 4 leswaku ku nyika kwaku ku va ka le xihundleni. Kutani Papayi waku lweyi a lavisisaka swa le xihundleni a ta ku hakela.

5 “Nakone, loko mi khongota mi nga fani ni vakanganyisi, hikusa va zrandzra ku khongota na va yime masinagogeni ni lomu tindlela letikulu ti tlhanganaka kone akuva va voniwa hi vhanu. Kunene na mi byela, a va nge ti tovokisiwa hi Xikwembu Nkulukumba. 6 Kambe loko u khongota, nghena ndlwini u pfala xipfalu, u gama u khongota ka Papayi waku lweyi a kalaka a nga voniwi. Kutani Papayi waku lweyi a lavisisaka swa le xihundleni a ta ku tovokisa. 7 Loko u khongota, u nga phindheteli mazritu wolawa ya man’we hi lani vamatiko va yentxaka ha kone, hikusa va pimisa leswaku va ta yingeliwa loko va tizrisa mazritu ya manyingi. 8 Mi nga fani na vone, hikusa Papayi wenu awa swi tiva leswi mi swi vilelaka nambiloko mi nga si na mu kombela.

9 “Kambe, mi fanela ku khongota hi ndlela leyi:

“‘Papayi wezru lweyi a nga matilweni, a vito dzraku a dzri xwengisiwe.* 10 A Mfumu waku a wu te. A ku zrandzra kwaku a ku yentxeke la misaveni, hi lani ku yentxekaka ha kone matilweni. 11 Hi nyike swakuda swezru swa siku dzra namunhla; 12 nakone hi dzrivaleli swidoho swezru, swanga hi leswi na hine hi dzrivalelaka lava hi dohelaka. 13 U nga hi tsrhiki hi nghena ndzringweni, kambe hi sizreleli* ka lweyi wa ku biha.’

14 “Loko mi dzrivalela vambeni swidoho swavu, na yene Papayi wenu lweyi a nga matilweni a ta mi dzrivalela; 15 kambe loko mi nga va dzrivaleli swidoho swavu, na yene Papayi wenu a nge na ku mi dzrivalela swidoho swenu.

16 “Loko mi titsrona swakuda, tsrhikani ku tixukuvalisa hi lani vakanganyisi va yentxaka ha kone, hikusa va titsrhika* akuva vhanu va ta swi vona leswaku va titsrona swakuda. Kunene na mi byela, a va nge ti tovokisiwa hi Xikwembu Nkulukumba. 17 Kambe n’wine, loko mi titsrona swakuda, tolani mafuzra tinhlokweni tenu mi tlhela mi hlamba wuso, 18 akuva vhanu va nga swi voni leswaku mi titsrona swakuda kambe swi voniwa ntsena hi Papayi wenu lweyi a vonaka hinkwaswu. Kutani Papayi wenu lweyi a lavisisaka swa le xihundleni, a ta mi tovokisa.

19 “Tsrhikani ku tihlengeletelela wukosi a misaveni, ku nga lomu nsumba* ni ku kuzra swi honaka kone ni lomu vayivi va tlhanyaka va yiva. 20 A matsrhan’wini ya leswo, tihlengeletelani wukosi a matilweni lomu a nsumba ni ku kuzra swi nga liki kone akuva swi hona ni lomu vayivi va nga liki kone akuva va tlhanya va yiva. 21 Hikusa lani wukosi byaku byi nga kone, hi lani na yone mbilu yaku yi taka va kone.

22 “A motsre wa mizri i tihlo. Kutani, loko tihlo dzraku dzri li dzrinene, a mizri waku hinkwawu wu ta vaninga.* 23 Kambe loko tihlo dzraku dzri bihile, a mizri waku hinkwawu wu ta va munyama; loko hakunene a ku vaninga loku u nga na kone ku li munyama, a munyama wolowo i wukulu ngopfu.

24 “A nga kone lweyi a nga tizrelaka tihosi tibidzri; hikusa a ta nyenya yin’we a zrandzra leyin’wana, kumbe a namazrela yin’we a dzrela leyin’wana. A mi nge swi koti ku tizrela Xikwembu Nkulukumba ni Wukosi.

25 “Hi kola ka leswi, na mi byela: Tsrhikani ku hlatiyela hi wutomi byenu* mi ku hi ta da yini hi ta nwa yini, kumbe ku hlatiyela hi mizri wenu mi ku hi ta yambala yini. Xana a wutomi* a hi bya lisima ku tlula swakuda ni mizri a hi wa lisima ku tlula mpahla? 26 Lavisisani ha hombe tinyanyana ta tilo, a ti byali mbewu, a ti tsrhoveli nakone a ti hlengeleteli a tsrhaleni, kambe Papayi wenu wa le tilweni awa ti wundla. Xana a mi va lisima ku ti tlula? 27 I mani kwenu lweyi hi ku va a hlatiyela a nga swi kotaka ku lehisanyana wutomi byake? 28 Nangweso ha yini mi hlatiyela hi leswaku mi ta yambala yini? Dondzrani ka ndlela leyi swiluva swa nhova* swi kulaka ha yone, a swi tizri, nakone a swi zrungi mpahla, 29 kambe na mi byela, nambi Solomoni lweyi a a ganye ngopfu* a nga zanga a yambala ku fana ni xin’we xa swone. 30 Kutani loko Xikwembu Nkulukumba a yambexa swimila swa nhova leswi namunhla swi nga kone na mundzruku swi ta yisiwa xitikweni, a nga hlula ha yini ku mi yambexa, n’wine lava nga ni lipfumelo dzritsrongo? 31 Kutani mi nga txhuki mi hlatiyela mi ku: Hi ta da yini? Kumbe, hi ta nwa yini? Kumbe, hi ta yambala yini? 32 Hikusa a mintxhumu leyo hinkwayu hi leyi vamatiko va yi hlongoliselaka hi nkhinkhi. Papayi wenu wa le matilweni awa swi tiva leswaku ma yi vilela mintxhumu leyi hinkwayu.

33 “Xileswo, yanani mahlweni mi zrangisa Mfumu wa Xikwembu Nkulukumba ni ku lulama kwake kutani a mintxhumu leyi hinkwayu mi ta yengeseleliwa yone. 34 Mi nga txhuki mi hlatiyela hi swa mundzruku, hikusa siku dzra mundzruku dzri ta va ni mivilelo ya dzrone. Siku dzrin’wana ni dzrin’wana dzri ni mivilelo ya dzrone.

7 “Tsrhikani ku yavanyisa van’wana akuva na n’wine mi nga yavanyisiwi; 2 hikusa ndlela leyi mi yavanyisaka van’wana ha yone na n’wine mi ta yavanyisiwa ha yone, nakone mpimu lowu mi pimaka van’wana ha wone, na n’wine mi ta pimiwa ha wone. 3 Kutani, ha yini u lavisa xilavi lexi nga tihlweni dzra makwenu kambe u nga xi voni xigodo lexi nga tihlweni dzraku? 4 Kumbe, u nga mu byelisa kuyini makwenu u ku: ‘Ni pfumelele ni ku susa xilavi lexi nga tihlweni dzraku’, nakasi wene u ni xigodo a tihlweni dzraku? 5 Mukanganyisi! Zranga hi ku susa xigodo lexi nga tihlweni dzraku kutani u ta swi kota ha hombe ku susa xilavi lexi nga tihlweni dzra makwenu.

6 “Mi nga nyiki timbyana mintxhumu ya ku xwenga nambi ku teka maperola yenu mi nyika tinguluve, hikusa ti ta ma pswanyetela ti tlhela ti ndzruluka ti mi hahlulela.

7 “Yanani mahlweni mi kombela, kutani mi ta nyikiwa; yanani mahlweni mi djuletela, kutani mi ta swi kuma; yanani mahlweni mi gongondzra, kutani mi ta pfuleliwa; 8 hikusa lweyi a kombelaka awa nyikiwa, lweyi a djuletelaka awa swi kuma, ni lweyi a gongondzraka a ta pfuleliwa. 9 Hi ntiyiso wa kone, i mani kwenu lweyi loko n’wanake a mu kombela pawu a nga mu nyikaka zribye? 10 Kumbe loko a mu kombela hlampfi, a nga mu nyikaka nyoka xana? 11 Kutani leswi n’wine nambileswi mi nga vadohi, mi swi kotaka ku nyika vanenu mintxhumu leyinene, xana Papayi wenu lweyi a nga matilweni a nge swi koti ku va nyika tinyiko letinene hi lani ku tlulisaka lava va mu kombelaka?

12 “Xileswo, hinkwaswu leswi mi djulaka leswaku van’wana va mi yentxela swone, na n’wine mi fanela ku va yentxela swone. Nakunene, leswi hi leswi hlayiwaka hi Nawu ni Vaprofeta.

13 “Nghenani hi nyangwa ya yitsrongo, hikusa nyangwa leyi yisaka ku suvisiweni i yikulu nakone a ndlela ya kone yi yanamile, futsrhi i vanyingi lava va fambaka ha yone; 14 Nakasi nyangwa leyi yisaka wuton’wini i yitsrongo nakone ndlela ya kone yi lalile, futsrhi i vatsrongo lava va yi kumaka.

15 “Tivonelani ka vaprofeta va madzrimi lava mi telaka ingiki i tihamba, kasi hi ntiyiso wa kone i timbyana ta nhova leti hahlulelanaka. 16 Mi ta va tiva hi mihandzru* yavu. A swi yentxeki kuva vhanu va khaya mawuvha ka nsinya wa mitwa, kumbe va khaya makuwa ka nsinya wa mitwa, a hi swone xana? 17 Hi lani ku fanaka, nsinya wun’wana ni wun’wana lowunene wu pswala mihandzru leyinene, kambe nsinya wun’wana ni wun’wana lowu nga liki wunene wu pswala mihandzru ya ku bola. 18 Nsinya lowunene a wu pswali mihandzru ya ku bola, na wone nsinya lowu nga liki wunene a wu pswali mihandzru leyinene. 19 Nsinya wun’wana ni wun’wana lowu nga liki wunene wa tsremiwa wu txukumeteliwa ndzrilweni. 20 Kunene, vhanu lavo mi ta va tiva hi mihandzru* yavu.

21 “A hi vhanu hinkwavu lava ni vitanaka va ku: ‘Hosi, Hosi’, va taka nghena Mfun’wini wa matilo, kambe ku ta nghena ntsena lava yentxaka ku zrandzra ka Papayi wanga lweyi a nga matilweni. 22 Hi siku dzroledzro vanyingi va ta ni byela leswi: ‘Hosi, Hosi’, xana a hi profetanga hi vito dzraku, a hi hlongolanga mademona hi vito dzraku, a hi yentxanga mintizro yinyingi ya ku hlamalisa hi vito dzraku? 23 Kutani ni ta va hlamula ni ku: ‘A ni zanga ni mi tiva! Sukani la, n’wine vayentxi va leswa ku biha!’

24 “Xileswo, mun’wana ni mun’wana lweyi a yingelaka leswi ni swi hlayaka a tlhela a hanya ha swone, a ta fana ni wanuna wa ku tlhazriha lweyi a yakiki yindlu yake henhla ka zribye. 25 Loko ku ne mpfula, ku va ni tindhambhi ku tlhela ku hunga moya lowukulu wu ba yindlu yoleyo, a yi wanga hikusa a yi yakiwe henhla ka zribye. 26 Kambe mun’wana ni mun’wana lweyi a yingelaka leswi ni swi hlayaka kambe a nga hanyi ha swone a ta fana ni wanuna wa ku phunta lweyi a yakiki yindlu yake ka xipfunye. 27 Loko ku ne mpfula, ku va ni tindhambhi ku tlhela ku hunga moya lowukulu wu ba yindlu yoleyo, yi wile, nakone ku hohloka ka yone ku ve kukulu.”

28 Loko Yesu a heta ku hlaya mazritu lawa, a switsrhungu swi hlamala hi madondzrisela yake, 29 hikusa leswi a a swi dondzrisa a swi pfa ka Xikwembu Nkulukumba, a a nga dondzrisi ku fana ni vatsrali.

8 Loko a xike nhaveni, a landzriwe hi switsrhungu leswikulu. 2 Kutani wanuna wa kukazri lweyi a a ni nhlokonho a mu tsrhindzrekelela a mu khinsamela, a ku: “Hosi, loko u swi djula, u nga ni hanyisa.”* 3 Xileswo, Yesu a nalavuta voko a mu khumba a ku: “Na swi djula! Hanyisiwa.”* Kolanu a nhlokonho yake yi daheka. 4 Ntsrhaku ka leswo Yesu a mu byela a ku: “U nga byeli mhunu leswi yentxekiki, kambe famba u ya tikombekisa ka muprista kutani u nyikela nyiko, hi lani Nawu wa Moxe wu hlayaka ha kone, leswaku vaprista va ta tiyiseka leswaku u hanyisiwile.”

5 Loko a nghena Kapernawume, a muzrangeli wa kukazri wa masotxha a mu tsrhindzrekelela, a mu kombela 6 a ku: “Hosi, a nandzra wanga a latiwe ndlwini hikusa a wome swizro, nakone a li ku xanisekeni lokukulu.” 7 Yesu a mu hlamula a ku: “Ni ta famba ni ya mu hanyisa.” 8 A muzrangeli wa masotxha a mu hlamula a ku: “Hosi, a swi ni faneli kuva u ta kaya kwanga, kambe hlaya zritu ntsena kutani a nandzra wanga a ta hanyisiwa. 9 Hikusa na mine nambileswi ni nga mhunu lweyi a fumiwaka, ni ni masotxha lawa ni ma zrangelaka, kutani loko ni byela dzrin’we ni ku: ‘Famba!’ dzra famba, nakone loko ni byela dzrin’wana ni ku: ‘Buya!’ dzra buya, ni loko ni byela nandzra wanga ni ku: ‘Yentxa leswi!’ awa swi yentxa.” 10 Loko Yesu a yingela leswo, a hlamala, kutani a byela lava a va mu landzrela a ku: “Ni mi byela ntiyiso, a Israyele a ni ngi ngi sama ni kuma mhunu wa lipfumelo ledzrikulu dzra ku fana ni dzra wanuna lweyi. 11 Kambe na mi byela leswaku vanyingi va ta ta hi le wuxeni ni hi le mpeladambu kutani va tsrhama menzeni na Abrahamu, Izaki na Yakobe a Mfun’wini wa matilo; 12 kasi loko ku li vana va Mfumu va ta txukumetiwa handle a munyameni. Hala hi kone va taka dzrila va ketsrela ni matinyo.” 13 Kutani Yesu a byela muzrangeli wa masotxha a ku: “Muka, a swi yentxeki hi ku ya hi lipfumelo dzraku.” Kutani hi nkama wolowo a nandzra wake a hanyisiwa.

14 Loko Yesu a tlhasa kaya ka Petro, a vona mamana wa nsati wa Petro na a yetlelile hikusa a a ni dzedzedze.* 15 Kutani a mu khumba voko, a dzedzedze dzri nyamalala a va a pfuka a sungula ku mu swekela swakuda. 16 A madambyeni va buyisela Yesu vhanu vanyingi lava a va ni mademona, kutani a ma hlongola hi zritu ntsena a tlhela a hanyisa hinkwavu lava a va vabya, 17 akuva ku hetiseka mazritu lawa ma hlayiwiki hi muprofeta Ezaya lweyi a tiki: “Yene a tizrwexe mavabyi yezru ni swivavu swezru.”

18 Loko Yesu a vona xitsrhungu lexi a xi mu tsrandzrelile, a byela vadondzrisiwa vake leswaku va tlulela va ya ka tlhelo ledzrin’wana dzra Galileya. 19 Kutani mutsrali wa kukazri a mu tsrhindzrekelela a mu byela a ku: “Mudondzrisi, ni ta ku landzrela kun’wana ni kun’wana lomu u taka ya kone.” 20 Kambe Yesu a mu byela a ku: “A mabuwana* ma ni mimpala, a tinyanyana ti ni swisaka, kambe a N’wana wa mhunu a pfumala ni ka ku tumbeta nhloko.” 21 Kutani mun’wana wa vadondzrisiwa a mu byela a ku: “Hosi, ni pfumelele ni zranga hi ku ya lahla papayi.” 22 Yesu a mu hlamula a ku: “Yana mahlweni u ni landzrela, u tsrhika vafi va lahla vafi vavu.”

23 Ntsrhaku ka leswo a nghena botini, a vadondzrisiwa vake va mu landzra. 24 Kutani ku va ni xidzedze lexikulu a lwandle lakakuva a boti dzri djula ku funeketiwa hi mavimbi; kambe yene a a li ku yetleleni. 25 Kutani va ya mu pfuxa va ku: “Hosi, hi huluxi, ha fa!” 26 Kambe yene a va byela a ku: “Ha yini mi txhava ngopfu, n’wine va lipfumelo dzritsrongo?” Kutani a pfuka a kawuka moya ni lwandle, hiloko ku va ni ku zrula lokukulu. 27 Kutani vhanu va hlamala va ku: “Kasi i mhunu muni lweyi, wa ku nambi moya ni lwandle swa mu yingiseta?”

28 Loko a tlhase ka tlhelo ledzrin’wana dzra lwandle, a mugangeni wa Vagadara, a tsrhindzrekeleliwe hi vavanuna vabidzri lava a va ni mademona lava a va pfa masizreni. A va leva ngopfu swinene, lakakuva a ku nge na mhunu lweyi a a tiya ku famba hi ndlela yoleyo. 29 Kutani va sungula ku bandlukana, va ku: “U djula yini kwezru wene N’wana wa Xikwembu Nkulukumba? Xana u teli ku ta hi xanisa na wu nga si na tlhasa nkama lowu bekiwiki?” 30 A ku ni ntlhambi wa tinguluve kule na vone leti a ti li ku deni. 31 Kutani mademona ma sungula ku mu kombela, ma ku: “Loko u hi hlongola hi zrumeli ka ntlhambi wa tinguluve.” 32 A ma hlamula a ku: “Fambani!” Ma va ma huma ma ya nghena ka tinguluve, kutani ntlhambi hinkwawu wu tsrutsruma wu ya pela lwandle wu fela matini. 33 A vabyisi va tinguluve va tsrutsruma va ya nghena doropeni va dzrungula hinkwaswu, ku patsra ni leswi yentxekeliki vavanuna lava a va ni mademona. 34 Kutani vhanu hinkwavu va doropa va huma va ya lomu Yesu a a li kone, loko va mu vona va mu kombela leswaku a suka mugangeni wavu.

9 Xileswo, a khwela boti a tsremakanya lwandle a ya doropeni dzrake. 2 Na a ha ku tlhasa, va mu buyisela wanuna lweyi a womiki swizro na a yetlelisiwe ka lihlaka.* Loko a vona lipfumelo ledzri a va li na dzrone, Yesu a byela wanuna lweyi a womiki swizro a ku: “Tiya mbilu n’wananga! A swidoho swaku swi dzrivaleliwile.” 3 Hi kola ka leswo, van’we va vatsrali va tibyela leswi: “Wanuna lweyi a yeyisa Xikwembu Nkulukumba.” 4 Hi ku tiva leswi a va swi yanakanya, Yesu a ku: “Ha yini mi pimisa mintxhumu ya ku biha timbilwini tenu? 5 Hi xikombiso, i yini leswi nabyalaka, i ku hlaya u ku: ‘Swidoho swaku swi dzrivaleliwile’, kumbe i ku hlaya u ku: ‘Sekeleka u famba’? 6 Nambitanu, ni djula mi swi tiva leswaku a N’wana wa mhunu a nyikiwe ntamu wa ku dzrivalela swidoho a misaveni . . .”, kutani a byela wanuna lweyi a womiki swizro a ku: “Sekeleka, u teka lihlaka dzraku* u muka kaya.” 7 Xileswo, a sekeleka a muka kaya kwake. 8 Loko switsrhungu swi vona leswo, swi tala hi ku txhava, nakone swi dzrumisa Xikwembu Nkulukumba, lweyi a nga yene a nyikiki vhanu ntamu lowo.

9 Ntsrhaku ka leswo, na a ha li ku fambeni, Yesu a vona wanuna lweyi a vitaniwaka Matewu na a tsrhamile mbangwini lowu vhanu va hakelaka ka wone tinemba, kutani a mu byela a ku: “Vana mulandzreli wanga.” Kolanu a sekeleka a mu landzra. 10 Ntsrhakunyana, na Yesu a ha li ku deni* a kaya ka Matewu, ku te vahakelisi vanyingi va tinemba ni vadohi va sungula ku da kun’we na yene ni vadondzrisiwa vake. 11 Kambe loko Vafarisi va vona leswo, va vutisa vadondzrisiwa vake va ku: “Ha yini mudondzrisi wenu a da ni vahakelisi va tinemba ni vadohi?” 12 Loko Yesu a twa leswo, a va byela leswi: “Vhanu lava kalaka va nga vabyi a va vileli dokodela, kambe lava vabyaka va mu vilela. 13 Kutani, fambani mi ya djula ntlhamuxelo wa mazritu lawa ma liki: ‘Ni djula timpswalu, ku nga li gandzrelo.’ Hikusa ni tele ku ta vitana vadohi, ku nga li vhanu lava lulamiki.”

14 Ntsrhaku ka leswo, a vadondzrisiwa va Yohane va mu tsrhindzrekelela va mu vutisa leswi: “Ha yini hine kun’we ni Vafarisi hi titsrona swakuda kambe a vadondzrisiwa vaku va nga titsroni?” 15 Kutani Yesu a va byela a ku: “Xana vanghanu va muteki va ni xivangelo xa ku dzrila na muteki a ha li na vone xana? Kambe ma ta masiku lawa a muteki a taka va a nga ha li na vone, kutani lanu ke hi kone va taka titsrona swakuda. 16 A nga kone lweyi a zrungelaka xiziva* xa nyiwana ka mpahla ya khale, hikusa xiziva xa nyiwana xi ta yentxa leswaku mpahla yi ya yi handzrukela. 17 Futsrhi a nga kone lweyi a txhelaka vhinyu ledzra ha ka ku hambiwa ka tihotsro* ta khale, hikusa loko a ngo yentxa leswo, a tihotsro ti ta pandzreka a vhinyu dzri halaka nakone a tihotsro a ti nge he londzrovoteki. Kambe vhanu va txhela vhinyu ledzra ha ka ku hambiwa ka tihotsro letimpshwa kutani hinkwaswu swi hlayiseka.”

18 Na a ha va byela mintxhumu leyi, muzrangeli wa kukazri wa sinagoga a mu tsrhindzrekelela a mu khinsamela a ku: “Swi nga yentxeka n’wananga a file nkama lowu, kambe a hi fambi kaya u ya mu ntlhanteka voko leswaku a ta tlhela a hanya.”

19 Xileswo, Yesu ni vadondzrisiwa vake va suka va famba na yene. 20 Kutani wansati wa kukazri, lweyi a a ni 12 wa malembe na a xanisiwa hi mavabyi ya ku humetela ngati, a tsrhindzrekelela Yesu hi le ntsrhaku a tlhasa a khumba ponta ya mpahla yake, 21 hikusa a a tsrhamela ku tibyela leswi: “Loko ntsena no khumba mpahla yake, ni ta hanya.” 22 Loko Yesu a mu vona, a ku: “Tiya mbilu n’wananga! A lipfumelo dzraku dzri ku hanyisile.” Ku sukela ka nkama wolowo wansati yelweyo a daheka.

23 Loko Yesu a tlhasa kaya ka muzrangeli wa sinagoga kutani a vona vhanu lava a va txhaya tinsimu ta xidzrilo ni xitsrhungu lexi a xi ba nkosi, 24 a ku: “Humani hikusa xin’hwanyatana lexi a xi fanga kambe xi le ku yetleleni.” Loko va twa leswo, va sungula ku mu hleka. 25 Ntsrhakunyana ka loko xitsrhungu xi humesiwe handle, Yesu a nghena ndlwini a khoma voko dzra xin’hwanyatana kutani xi pfuka. 26 Nakunene, mhaka leyi yi hangalaka a mugangeni hinkwawu.

27 Loko Yesu a suka mbangwini wolowo, vavanuna vabidzri lava fiki matihlo va mu landzra na va bandlukana va ku: “Hi tweli wusiwana N’wana Davhida.” 28 Loko a nghena mutini wa kukazri, vavanuna lava fiki matihlo va mu landzra, kutani Yesu a va vutisa leswi: “Xana ma kholwa leswaku ni nga swi kota ku mi hanyisa?” Va mu hlamula va ku: “Ina Hosi.” 29 Kutani a va khumba matihlo, a hlaya leswi: “Leswi mi nga kombisa lipfumelo matihlo yenu ma ta pfuliwa.” 30 Kutani va sungula ku vona. Yesu a va leleta a ku: “Mi nga byeli mhunu mhaka leyi.” 31 Kambe ntsrhaku ka loko va humile va sungula ku byeletela vhanu a mugangeni hinkwawu.

32 Na vavanuna lavo va ha suka mbangwini lowo, vhanu va mu buyisela wanuna lweyi a a li mbheveve lweyi a a ni demona. 33 Ntsrhaku ka loko demona dzri hlongoliwile, wanuna lweyo a sungula ku vulavula. A switsrhungu swi hlamala swi ku: “A ku ngi ngi sama ku yentxeka swa ku fana ni leswi a Israyele.” 34 Kambe a Vafarisi a va ku: “A hlongola mademona hi ntamu wa mufumi wa mademona.”

35 Kutani Yesu a sungula ku yendzrela madoropa ni swidoropana hinkwaswu, a dondzrisa masinagogeni yavu, a zrezra madzrungula lamanene ya Mfumu ni ku tlhela a daha vhanu mavabyi ya ku hambanahambana ni wulema bya mixaka hinkwayu. 36 Loko a vona switsrhungu, a swi twela wusiwana, hikusa a swi xanisiwa ni ku pepetsekisiwa ku fana ni tihamba leti kalaka ti nga na mubyisi. 37 Kutani a byela vadondzrisiwa vake a ku: “A ntsrhovelo i wukulu kambe a vatizri i vatsrongo. 38 Xileswo, kombelani n’winyi wa ntsrhovelo leswaku a zrumela vatizri a ntsrhovelweni wake.”

10 Kutani a hlengeleta vadondzrisiwa vake lava 12 a va nyika ntamu wa ku hlongola mimoya leyi nga basangakiki ni ku hanyisa mavabyi hinkwawu ni wulema bya mixaka hinkwayu.

2 Mavito ya vapostola lava 12 hi lawa: Wa ku sungula i Simoni, lweyi a tiviwaka swanga Petro, ni makwavu Andreya; Yakobe na Yohane vana va Zebedewu; 3 Filipi na Bartolomewu; Tomasi na Matewu lweyi wa muhakelisi wa tinemba; Yakobe n’wana Alifewu; Tadewu; 4 Simoni lweyi wa Mukanana;* na Yudasi Iskariyota lweyi a gamiki a mu wonga.

5 Yesu a zruma lava 12 a va leleta a ku: “Mi nga yi ka vamatiko nakone mi nga ngheni ka madoropa ya Vasamariya; 6 Yanani ntsena ka tihamba leti lahlekiki ta yindlu ya Israyele. 7 Loko mi li ku fambeni zrezrani mi ku: ‘A Mfumu wa matilo wu le kusuhi.’ 8 Hanyisani lava vabyaka, pfuxani lava fiki, basisani lava nhlokonho mi tlhela mi hlongola mademona. Mi yamukeli hi mahala, nyikani hi mahala. 9 Mi nga longeni mali ya woru, ya prata kumbe ya kobri a swipatxhini swenu, 10 kumbe minkwama ya manghunghu,* kumbe mpahla ya ku txintxa ha yone, kumbe masandaliya, kumbe nhonga, hikusa mutizri a faneliwa hi ku nyikiwa swakuda.

11 “Ka doropa dzrin’wana ni dzrin’wana kumbe xidoropana xin’wana ni xin’wana mi taka nghena ka xone, djuletelani lava swi va fanelaka kutani mi tsrhama kone ku ya tlhasa loko mi huma. 12 Loko mi nghena mutini, losani lava mi taka va kuma. 13 Loko muti wa kone swi wu fanela, a ku zrula loku mi wu navelelaka kone a ku ve na wone, kambe loko swi nga wu faneli, a ku zrula koloko a ku tlheleli kwenu. 14 Kun’wana ni kun’wana lomu va kalaka va nga mi yamukeli kumbe ku mi yingiseta, loko mi huma mutini wolowo kumbe doropeni dzroledzro, mphumunani ntsrhuzri a minkondzrweni yenu. 15 Ni mi byela ntiyiso, doropa dzroledzro dzri ta khatisiwa ngopfu ku tlula doropa dzra Sodoma ni dzra Gomora hi Siku dzra Yavanyiso.

16 “Ni mi zruma swanga tihamba a makazri ka timhisi; xileswo, vanani ni wuxiyaxiya ku fana ni tinyoka, mi va lava ku zrula ku fana ni matuva. 17 Tivonelani ka vhanu, hikusa va ta mi yisa a matribunali nakone va ta mi pshwita a masinagogeni yavu. 18 Mi ta yisiwa a mahlweni ka vagovhernadori ni ka tihosi hi mhaka yanga, hi ndlela leyo mi ta kota ku nyikela wumboni kwavu ni ka vamatiko. 19 Nambitanu loko va mi khoma, mi nga vindlavindleki hi leswi mi taka hlaya swone kumbe hi ndlela leyi mi taka swi hlaya ha yone, hikusa leswi mi taka swi hlaya mi ta nyikiwa swone hi nkama wolowo; 20 hikusa a mi nge ti vulavula hi ntamu wenu, kambe i moya wa Papayi wu taka mi nyika swa ku swi vulavula. 21 Handle ka leswo, a mhunu a ta nyikela makwavu leswaku a dlayiwa, ni papayi a ta nyikela n’wanake, kasi a vana va ta pfukela vapswele va yentxa leswaku va dlayiwa. 22 Nakone mi ta nyenyiwa hi vhanu hinkwavu hi mhaka ya vito dzranga, kambe lweyi a tiyiselaka* ku ya tlhasa wugamu a ta huluxiwa. 23 Loko va mi xanisa ka doropa dzra kukazri, tsrutsrumelani ka dzrimbeni; hikusa kunene na mi byela: A N’wana wa mhunu a ta tlhasa na mi nga si heta ntizro wenu a madoropeni ya Israyele.

24 “A mudondzri a nga mu tluli mudondzrisi wake, ni nandzra a nga mu tluli n’winyi wake. 25 A mudondzri a ta yentxiwa leswi mudondzrisi wake a yentxiwaka swone, ni nandzra a ta yentxiwa leswi n’winyi wake a yentxiwaka swone. Loko va ni xixixi xa ku vitana n’winyi wa muti va ku i Belzebule,* va ta yentxa leswi tlulisaka hi vandangu wake. 26 Xileswo, mi nga va txhaveni, hikusa a ku na ntxhumu lowu funeketiwiki lowu taka kala wu nga funukuliwi, nakone a ku na xihundla lexi taka kala xi nga tiviwi. 27 Leswi ni mi byelaka a xihundleni swi hlayani a livaleni, leswi mi yentxaka hi ku hleveteliwa swi byelani vhanu hinkwavu.* 28 Mi nga va txhavi lava vo ko kota ku dlaya mizri na va nga swi koti ku helisa wutomi,* kambe txhavani lweyi a nga kotaka ku helisa wutomi ni mizri a Gehena.* 29 Xana a va xavisi swindjengeletana swibidzri hi sentavhu* dzrin’we? Nambitanu a xi kone ni xin’we ka swone lexi waka hansi na Papayi wenu a nga swi tivi. 30 Kambe nambi misisi ya tinhloko tenu yi kontiwile hinkwayu. 31 Xileswo, mi nga txhavi; n’wine mi va lisima ku tlula swindjengeletana swa swinyingi.

32 “Kutani, lweyi a pfumelaka a mahlweni ka vhanu leswaku awa ni tiva, na mine ni ta pfumela a mahlweni ka Papayi wanga lweyi a nga matilweni leswaku na mu tiva. 33 Kambe lweyi a yalaka a mahlweni ka vhanu leswaku awa ni tiva, na mine ni ta mu yala a mahlweni ka Papayi wanga lweyi a nga matilweni. 34 Mi nga pimisi leswaku ni tise ku zrula misaveni; a ni tisanga ku zrula, kambe ni tise ku yavana.* 35 Hikusa ni tele ku ta vanga ku yavana a makazri ka n’wana wa xinuna ni papayi wake, a makazri ka n’wana wa xisati ni mamana wake, ni le makazri ka n’wingi ni n’wingi wake. 36 Kunene, a valala va mhunu va ta va vandangu wake. 37 Lweyi a zrandzraka ngopfu papayi wake kumbe mamana wake ku tlula mine a nga fanekeli ku va mudondzrisiwa wanga; ni lweyi a zrandzraka ngopfu n’wanake wa xinuna kumbe wa xisati ku tlula mine a nga fanekeli ku va mudondzrisiwa wanga. 38 Ni lweyi a nga zrwalikiki mhandzri yake ya nxanisa* a ni landzrela a nga fanekeli ku va mudondzrisiwa wanga. 39 Lweyi a djulaka ku huluxa wutomi byake a ta luzekeliwa hi byone, kambe lweyi a luzekeliwaka hi wutomi byake hi mhaka yanga a ta tlhela a byi kuma.

40 “Lweyi a mi yamukelaka na mine awa ni yamukela, nakone lweyi a ni yamukelaka a yamukela ni Lweyi a ni zrumiki. 41 Lweyi a yamukelaka muprofeta hi leswi a nga muprofeta a ta yamukela hakelo dzra muprofeta, ni lweyi a yamukelaka mhunu wa ku lulama hi leswi a lulamiki a ta yamukela hakelo dzra mhunu wa ku lulama. 42 Nakone lweyi a nyikaka mun’we wa lavatsrongo, nambi ko va matinyana ya ku titimeta leswaku a nwa hi leswi a nga mudondzrisiwa, ni mi byela ntiyiso: A nge ti txhuka a luzekeliwa hi hakelo dzrake.”

11 Loko Yesu a heta ku byela vadondzrisiwa vake va 12 leswi a va fanela ku swi yentxa, a suka kolanu a ya dondzrisa ni ku zrezra a madoropeni yavu.

2 Kambe loko Yohane,* lweyi a a li djele a twa hi ta mintizro ya Kriste, a zruma vadondzrisiwa vake 3 ku ya mu vutisa va ku: “Xana hi wene Lweyi a Taka, kumbe ha ha fanela ku yimela mun’wana?” 4 Yesu a va hlamula a ku: “Fambani mi ya byela Yohane leswi mi swi yingelaka ni ku swi vona: 5 Lava fiki matihlo swoswi va vona, a swilema swa famba, lava nhlokonho va basisiwa,* lava ku fa tindleve va yingela, a vafi va pfuxiwa, ni swisiwana swi byeliwa madzrungula lamanene. 6 Awa nyonxa lweyi a kalaka a nga ganaganeki* ha mine.”

7 Loko va li ndleleni, Yesu a sungula ku khanela ni switsrhungu mayelanu na Yohane a ku: “A mi ya vona yini a mananga? Xana a mi ya vona lihlanga ledzri tsrekatsrekisiwaka hi moya? 8 Kasi a mi ya vona yini? A mi ya vona wanuna lweyi a yambaliki mpahla ya ku dula?* Phela lava yambalaka timpahla ta ku dula va tsrhama tindlwini ta tihosi. 9 Kutani ke, ha yini mi yile? A mi ya vona muprofeta? Kunene na mi byela, Yohane a tlakukile nambi ku tlula muprofeta. 10 Lweyi hi lweyi ku tsraliwiki leswi mayelanu na yene: ‘Lavisa! Ni zruma nandzra* wanga leswaku a zranga a ya ku lulamiselela ndlela na u nga si na tlhasa!’ 11 Ni mi byela ntiyiso: Ka vhanu hinkwavu lava samiki va hanya, a nga kone lweyi a nga nkulu ku tlula Yohane Mubabatisi, kambe lweyi a nga ntsrongo a Mfun’wini wa matilo i nkulu kwake. 12 Ku sukela a masikwini ya Yohane Mubabatisi ku ta tlhasa namunhla, vhanu va lwa hi lani va nga kotaka ha kone akuva va nghena Mfun’wini wa matilo, nakone lava tikazrataka va nghena. 13 Hikusa na Yohane a nga si na tlhasa, a Vaprofeta ni Nawu va profetile leswi a swi ta humelela; 14 kumbe ma kholwa kumbe a mi kholwi, lweyi hi ‘Eliya lweyi a Matsralwa ma hlayiki leswaku a a ta ta.’ 15 Lweyi a nga ni tindleve a a yingiseti.

16 “Ni nga dzri fanisa na mani lixaka ledzri? Dzri fana ni vatsrongwana lava tsrhamiki mabazara lava va huwelelaka vanghanu vavu, 17 va ku: ‘Hi mi txhayele tinsimu, kambe a mi kinanga; hi be nkosi, kambe a mi tlhavekanga.’ 18 Hi lani ku fanaka, Yohane a tile, a nga danga ntxhumu nambi ku nwa, kambe vhanu va li: ‘A ni demona.’ 19 A N’wana wa mhunu a tile, a da a tlhela a nwa, kambe vhanu va li: ‘Vonani! Mhunu lweyi a ni magolo nakone i mpopswi,* i munghanu wa vahakelisi va tinemba ni vadohi.’ Nambitanu, a wutlhazri byi kombisiwa* hi mintizro.”

20 Kutani a sungula ku sola madoropa lawa a nga yentxa mahlolana manyingi ka wone, hikusa a ma tisolanga, a ku: 21 “Khombo ka n’wine mi tsrhamaka Korazini! Khombo ka n’wine mi tsrhamaka Betsaida! Hikusa loko mahlolana lawa mi yentxeliwiki wone a me yentxiwa a Tiri ni le Sidoni, vhanu va kone a va ta va va tisole khale swinene va yambala masaka ni ku tsrhama a nkumeni. 22 Kambe na mi tiyisekisa leswaku, mi ta khatisiwa ngopfu ku tlula Tiri ni Sidoni hi Siku dzra Yavanyiso. 23 N’wine ke, mi tsrhamaka Kapernawume, xana mi ta ya tilweni? Nikutsrongo! Mi ta ya Sizreni;* hikusa loko mahlolana lawa mi yentxeliwiki wone a me yentxeliwa vhanu va le Sodoma, doropa dzravu a dzri ta va dzra ha li kone ku ta tlhasa namunhla. 24 Kambe na mi byela, mi ta khatisiwa ngopfu hi Siku dzra Yavanyiso ku tlula vhanu va le Sodoma.”

25 Hi nkama wolowo Yesu a ku: “Papayi, Hosi ya matilo ni misava, na ku dzrumisa a mahlweni ka vhanu lava, hikusa u fihlele lava ku tlhazriha timhaka leti ni lava dondzriki ngopfu, u ti tlhamuxela lava ku titsrongahata ku fana ni vatsrongwana. 26 Ina Papayi, hikusa loku i ku zrandzra kwaku. 27 Papayi a ni nyike mintxhumu hinkwayu. A nga kone lweyi a tivaka N’wana hi ku helela loko ku nga li Papayi; nakone a nga kone lweyi a tivaka Papayi hi ku helela loko ku nga li N’wana ni lweyi N’wana a zrandzraka ku mu tlhamuxela. 28 Tanani ka mine, n’wine hinkwenu mi kazraliki na n’wine mi bindzriwaka, ni ta mi wisisa. 29 Zrwalani mpinga wanga* mi va mi dondzra kwanga, hikusa ni mhunu wa ku zrula ni wa ku titsrongahata, xileswo mi ta wisisiwa.* 30 Hikusa a mpinga wanga wa zrwaleka na wone ntsrhwalu wanga wa vevuka.”

12 Hi nkama wolowo, Yesu a tsremakanya masimu ya trigu hi Savata. A vadondzrisiwa vake va twa ndlala kutani va sungula ku khayetela tinhleke ta trigu va da. 2 Loko Vafarisi va vona leswo, va ku: “Lavisa! A vadondzrisiwa vaku va yentxa leswi nawu wu kalaka wu nga pfumeli kuva swi yentxiwa hi Savata.” 3 Yesu a va hlamula a ku: “Xana a mi dondzranga leswi Davhida a swi yentxiki loko yene ni vavanuna lava a va li na yene va twe ndlala? 4 Leswaku a nghene ndlwini ya Xikwembu Nkulukumba a teka mapawu* ya magandzrelo a da ni lava a va li na yene, lawa hi ku ya hi Nawu a va nga na mfanelo ya ku ma da, hikusa a ma fanela ku diwa ntsena hi vaprista? 5 Kumbexana, a mi dondzranga ka Nawu wa Moxe leswaku vaprista va tizra tempeleni hi Savata kambe va tama va nga vi na nandzru? 6 Kambe na mi byela leswaku lani mi nga kone swoswi ku ni mhunu wa lisima ngopfu ku tlula tempele. 7 Nambitanu, loko a mi wu twisise ha hombe ntlhamuxelo wa tsralwa ledzri liki: ‘Ni djula timpswalu ku nga li magandzrelo’, a mi nge ti va yavanyisa lava nga liki na nandzru. 8 Hikusa a N’wana wa mhunu i Hosi ya Savata.”

9 Loko a suka mbangwini lowo, a ye sinagogeni* dzravu, 10 nakone kolanu a ku ni wanuna wa kukazri lweyi a a limale* voko! Leswi a va djula xa ku mu zrwexa nandzru ha xone va mu vutisa va ku: “Xana swa pfumeleliwa ku hanyisa mhunu hi Savata?” 11 A va byela a ku: “I mani kwenu lweyi loko a hamba yake ya yin’we yo txhuka yi pela xikheleni hi Savata, a taka kala a nga yi khomi a yi humesa? 12 Xana mhunu a hi wa lisima ngopfu ku tlula hamba? Hi ndlela yoleyo swa pfumeleliwa ku yentxa mintxhumu leyinene hi Savata.” 13 Kutani a byela wanuna lweyi wa ku limala a ku: “Nalavuta voko dzraku.” A dzri nalavuta, kutani dzri wololoka dzri fana ni ledzrin’wana. 14 Kambe a Vafarisi va huma kutani va kunguhata ku mu dlaya. 15 Loko Yesu a gungula leswaku va djula ku mu dlaya, a suka mbangwini wolowo, vanyingi va mu landzra, kutani a daha hinkwavu lava a va vabya, 16 kambe a va leleta leswaku va nga byeli mhunu leswaku hi yene mani, 17 akuva ku hetiseka mazritu ya muprofeta Ezaya lweyi a tiki:

18 “Nandzra wanga lweyi ni mu hlawuliki, lweyi ni mu zrandzraka, lweyi ni* mu yamukeliki! Ni ta mu nyika ntamu wanga, nakone a ta komba matiko ndlela leyinene ya ku yentxa mintxhumu. 19 A nge ti holova na mhunu nambi ku li ku huwelela, nakone a nga kone lweyi a taka yingela zritu dzrake a tindleleni. 20 A ku na lihlanga ledzri gotsrhekiki ledzri a taka dzri tsrhova, nakone a ku na motsre lowu nga kusuhi ni ku timeka lowu a taka wu tima ku ko a tisa wululami. 21 Nakunene, matiko ma ta dumba vito dzrake.”

22 Kutani va mu buyisela wanuna lweyi a a ni demona lweyi a a fe matihlo nakone a a li mbheveve, Yesu a mu daha, xileswo wanuna lweyo a sungula ku vulavula ni ku vona. 23 Kutani vhanu hinkwavu va hlamala va sungula ku vutisana va ku: “Xana lweyi a hi yene N’wana wa Davhida?” 24 Loko va twa leswo, Vafarisi va ku: “Wanuna lweyi a hlongola mademona hi ntamu wa Belzebule,* mufumi wa mademona.” 25 Hi ku tiva leswi a va swi yanakanya, a va byela a ku: “Mfumu wun’wana ni wun’wana lowu yavaniki wu ta hohloka, nakone a doropa kumbe muti lowu yavaniki a wu nge tiyi. 26 Hi ndlela leyi fanaka, loko Sathana a hlongola Sathana, swi hlaya leswaku yene a yavanile; xana ke, a mfumu wake wu ta tiyisa kuyini? 27 Nakone loko a li leswaku mine ni hlongola mademona hi ntamu wa Belzebule, xana a vanenu va ma hlongola hi ntamu wa mani? Hi leswo swi taka yentxa va mi yavanyisa. 28 Kambe loko a li leswaku ni hlongola mademona hi ntamu wa Xikwembu Nkulukumba, a Mfumu wa Xikwembu Nkulukumba kunene wu mi tlhaselile. 29 Kumbe, xana mhunu a nga swi kotisa kuyini ku tlhanya kaya ka wanuna wa ntamu kutani a teka mintxhumu yake na a nga zranganga hi ku mu tsrimbelela? A ngo kota ku teka mintxhumu yake loko ntsena a zrange hi ku mu tsrimbelela. 30 Lweyi a kalaka a nga yimi na mine a lwisana na mine, nakone lweyi a kalaka a nga hlengeleti na mine awa hangalasa.

31 “Vhanu va ta dzrivaleliwa mixaka hinkwayu ya xidoho ni xisandzru, kambe lweyi a sandzraka moya wa ku xwenga a nge na ku dzrivaleliwa. 32 Hi xikombiso, lweyi a vulavulaka ku biha hi N’wana wa mhunu, a ta dzrivaleliwa, kambe lweyi a vulavulaka ku biha hi moya wa ku xwenga, a nge na ku dzrivaleliwa, nambi ka misava leyi* kumbe ka leyi ya ha taka.

33 “Loko mi byala nsinya lowunene, wu ta pswala mihandzru leyinene, kambe loko mi byala nsinya wa ku bola, ni mihandzru ya kone yi ta va ya ku bola. Hikusa nsinya wu tiviwa hi mihandzru ya wone. 34 Vana va tinyoka leti nga ni mahlungu,* xana mi nga khanelisa kuyini mintxhumu leyinene na mi li vhanu lava bihiki? Hikusa a nomu wu vulavula leswi taliki mbilwini. 35 Mhunu lwenene a humesa mintxhumu leyinene a wukosini byake, kasi mhunu lweyi a bihiki a humesa swa ku biha a wukosini byake bya ku biha. 36 Kunene na mi byela leswaku mintxhumu hinkwayu leyi kalaka yi nga pfuni ntxhumu leyi vhanu va yi hlayaka, va ta tiyangulela ha yone hi siku dzra yavanyiso; 37 hikuva u ta hlayiwa lweyi wa ku lulama hi kola ka mazritu yaku, nakone hi kola ka mazritu yaku u ta yavanyisiwa.”

38 Kutani van’we va vatsrali ni Vafarisi va mu hlamula va ku: “Mudondzrisi, hamba hlolana hi ku vona.” 39 A va hlamula a ku: “N’wine lixaka ledzri bihiki ledzri kalaka dzri nga dumbekanga ka Xikwembu Nkulukumba mi djula ku yentxeliwa hlolana, kambe a ku na hlolana ledzri mi taka dzri vona handle ka hlolana ledzri yentxekeliki muprofeta Yonasi. 40 Swanga hi leswi Yonasi a nga va khuzrini dzra hlampfi leyikulu ku dzringana masiku mazrazru, na yene N’wana wa mhunu a ta va sizreni ku dzringana masiku mazrazru. 41 Hi nkama wa yavanyiso, Vaninivha va ta pfuxiwa kun’we ni lixaka ledzri. Vone va tisolile loko va yingela dzrungula dzra Yonasi. Leswo swi kombisa leswaku lixaka ledzri dzri ta khatisiwa. Kambe lani ku ni mhunu lweyi a tlakukiki ku tlula Yonasi. 42 Hi nkama wa yavanyiso, a hosi ya xisati ya le nyingitimu yi ta pfuxiwa kun’we ni lixaka ledzri. Yi suke mbangwini wa le kule yi ta ta yingela wutlhazri bya Solomoni. Leswo swi kombisa leswaku lixaka ledzri dzri ta khatisiwa. Kambe na mi byela, lani ku ni mhunu lweyi a tlakukiki ku tlula Solomoni.

43 “Loko moya lowu nga basangakiki* wu suka mhunwini, wu khaluta hi le mananga wu djuletela mbangu wa ku wisela ka wone kambe wu wu pfumala. 44 Kutani wu tibyela leswi: ‘Ni ta tlhelela a ndlwini kwanga lomu ni buyaka hi kone.’ Loko wu tlhasa, wu kuma yindlu yoleyo na yi nge na ntxhumu, yi kukuliwile yi basa yi tlhela yi xongiseliwa. 45 Hiloko wu famba wu ya teka 7 wa mimoya yin’wana leyi bihiki ngopfu ku tlula wone, yi ta ta nghena yi tsrhama kone; kutani a xiyimu xa mhunu yelweyo xi biha ngopfu ku tlula xa le ku sunguleni. Swi ta va xiswoswo ni le ka lixaka ledzri dzra ku biha.”

46 Na a ha vulavula ni switsrhungu, vamakwavu ni mamana wake a va yime handle va djula ku vulavula na yene. 47 Kutani mhunu wa kukazri a byela Yesu a ku: “Mamana waku ni vamakwenu va yime hala handle, va djula ku vulavula na wene.” 48 Kutani a hlamula mhunu lweyo a ku: “Mamana wanga i mani, nakone vamakwezru i vamani?” 49 Kutani a nalavuta voko a kombetela ka vadondzrisiwa vake, a ku: “Lavisani! Mamana wanga ni vamakwezru hi lava! 50 Hikusa mun’wana ni mun’wana lweyi a yentxaka ku zrandzra ka Papayi wanga lweyi a nga matilweni, lweyo hi yene a nga makwezru ni mamana wanga.”

13 Hi siku dzroledzro, Yesu a suka mutini a ya tsrhama nkingeni wa lwandle. 2 Kutani ku hlengeletana switsrhungu swinyingi kwake lakakuva hi ku tala ka swone a nghena botini a tsrhama na xitsrhungu hinkwaxu xi yime nkingeni wa lwandle. 3 A va dondzrisa mintxhumu ya ku tala hi ku tizrisa swifaniso, a ku: “A mudzrimi wa kukazri a sukile a ya xuvela mbewu. 4 Loko a li ku xuveleni, timbewu ta kukazri ti wele tlhelweni ka ndlela, kutani ti diwa hi tinyanyana. 5 Tin’wana ti wele mazribyeni lani a ku nga na misava ya yinyingi, kutani ti kahlula ku mila hi leswi a misava a yi nga yentanga. 6 Kambe loko dambu dzri tlhava, ti pshwa ti tlhela ti woma hi leswi a ti pfumala timitsru. 7 Tin’wana ti wele xikazri ka mitwa, kutani a mitwa yi kula yi ti kamanyeta lakakuva ti nga kuli ha hombe. 8 Kasi tin’wana ti ye wela a misaveni leyinene kutani ti sungula ku beka mihandzru, yin’we hi lani ku phindhiwiki ka 100, yin’wana ka 60, kasi yin’wana ka 30. 9 Lweyi a nga ni tindleve a a yingiseti.”

10 Kutani vadondzrisiwa va ta kwake va ku: “Ha yini u va dondzrisa hi ku tizrisa swifaniso?” 11 A va hlamula a ku: “N’wine mi nyikiwe ku twisisa swihundla swa ku xwenga swa Mfumu wa matilo, kambe vone a va nyikiwanga. 12 Hikusa lweyi a nga na swone, a ta yengeseliwa swimbeni kutani a ta va ni swinyingi; kambe lweyi a nga liki na swone, a ta tekeliwa ni leswi a nga na swone. 13 Hi leswo swi ni yentxaka ni va dondzrisa hi ku tizrisa swifaniso; hikusa va lavisa, kambe a va voni ntxhumu, va swi twa, kambe vo swi twa mahala, nambi mongo a va wu twisisi. 14 Kutani a wuprofeta bya Ezaya bya hetiseka kwavu, lebyi liki: ‘Nakunene mi ta swi yingela kambe a mi nge ti wu twisisa mongo wa swone nikutsrongo, nakunene mi ta lavisa kambe a mi nge ti swi vona nikutsrongo. 15 Hikusa a timbilu ta vhanu lava ti tlanyalile, va tipfale tindleve tavu ni matihlo yavu leswaku va nga txhuki va vona hi matihlo yavu, leswaku va nga yingeli hi tindleve tavu ni leswaku va nga twisisi mongo hi timbilu tavu xileswo va txintxa, kutani mine ni va daha.’

16 “Kambe n’wine nyonxani hikusa matihlo yenu ma vona ni tindleve tenu ta yingela. 17 Hikusa ni mi byela ntiyiso, vaprofeta vanyingi ni vhanu van’wana va ku lulama va swi navelile ku vona leswi mi swi vonaka kambe a va swi vonanga, ni ku yingela leswi mi swi yingelaka kambe a va swi yingelanga.

18 “Yingelani xifaniso xa wanuna lweyi a xuveliki mbewu. 19 Loko mhunu a yingela dzrungula dzra Mfumu kambe a nga dzri twisisi, ku ta nala kutani a tsruvula leswi byaliwiki mbilwini; leyo i mbewu leyi weliki tlhelweni ka ndlela. 20 A mbewu leyi weliki misaveni leyi nga ni mazribye, hi lweyi a yingelaka zritu kutani a hantla a dzri yamukela hi ku nyonxa. 21 Kambe a nga na timitsru nakone a khomelela swa nkamanyana, kutani loko a kumana ni mindzringo kumbe ku xanisiwa hi kola ka zritu, a tekela ku tsrhika. 22 Leyi weliki xikazri ka mitwa, hi lweyi a yingelaka zritu, kambe a ku vilela hi mintxhumu ya misava leyi* ni wukosi lebyi kanganyisaka swi kamanyeta zritu, kutani dzri nga pswali mihandzru. 23 Kasi loko ku li leyi weliki misaveni leyinene, hi lweyi a yingelaka zritu kutani a twisisa mongo wa dzrone, a va kunene a pswala mihandzru, mun’we hi lani ku phindhiwiki ka 100, mun’wana ka 60, kasi lweyi mun’wana ka 30.”

24 Kutani a va byela xifaniso xin’wana a ku: “A Mfumu wa matilo wu nga fanisiwa ni mhunu lweyi a byaliki mbewu leyinene a nsin’wini yake. 25 Loko vhanu va ha li ku yetleleni, ku ta nala wake a hlwanyela mfava a makazri ka trigu a va a tifambela, 26 kutani loko khava dzri kula dzri pswala mihandzru, ku humelela ni mfava. 27 Kutani vatizri va ya ka n’winyi wa yindlu va mu vutisa va ku: ‘Hosi, xana a wu byalanga mbewu leyinene a nsin’wini yaku? Kutani, a mfava wu pfa kwini?’ 28 A va hlamula a ku: ‘Leswo, swi yentxiwe hi mhunu lweyi a nga nala.’ Kutani vatizri va ku: ‘Xana u djula kuva hi famba hi ya wu tsruvulela?’ 29 A va hlamula a ku: ‘Mi nga fambi, hikusa loko mi li ku tsruvuleleni ka mfava mi nga txhuka mi tsruvula ni trigu. 30 Swi tsrhikani swi kula xikan’we ku ya tlhasa nkameni wa ntsrhovelo, kutani hi nkama wa ntsrhovelo, ni ta byela vatsrhoveli ni ku: Zrangani hi ku suselela mfava mi wu tsrimba hi tinyandzra akuva wu hisiwa; ntsrhaku ka leswo mi ta hlengeleta trigu a tsrhaleni dzranga.’”

31 A va byela xifaniso ximbeni, a ku: “A Mfumu wa matilo wu fana ni mbewu ya sinapi* leyi mhunu wa kukazri a yi tekiki a yi byala nsin’wini yake. 32 Nakunene leyo hi yone mbewu ya yitsrongo ya kone ku tlula timbewu hinkwatu, kambe loko yi milile yi kula yi tlula swimila hinkwaswu leswi diwaka yi va yi ndzruluka nsinya, lakakuva tinyanyana ti kuma mbangu wa ku wisa a mazrwavini ya* wone.”

33 A va byela xifaniso xin’wana, a ku: “A Mfumu wa matilo wu fana ni fermentu* ledzri wansati wa kukazri a dzri tekiki a dzri pfuva ni mimpimu yizrazru leyikulu* ya mapa ku ya tlhasa loko mbila hinkwayu yi kukumuka.”

34 Yesu a dondzrise switsrhungu mintxhumu leyi hinkwayu hi ku tizrisa swifaniso. Nakunene, a ku na ntxhumu lexi a a va byela xone na a nga tizrisi xifaniso, 35 akuva ku hetiseka mazritu lawa ma hlayiwiki hi muprofeta lweyi a tiki: “Ni ta pfula nomu wanga hi ku tizrisa swifaniso; ni ta zrezra mintxhumu leyi fihliwiki ku sukela a ku sunguleni.”*

36 Ntsrhaku ka ku byela switsrhungu leswaku swi famba, a nghena ndlwini. Kutani vadondzrisiwa vake va mu tsrhindzrekelela va ku: “Hi byeli ntlhamuxelo wa xifaniso xa mfava lowu nga masin’wini.” 37 A va hlamula a ku: “A mubyali wa mbewu leyinene i N’wana wa mhunu; 38 A masimu i misava. A mbewu leyinene, i vana va Mfumu, kambe a mfava i vana va Diyavulosi,* 39 nakone a nala lweyi a hlwanyeliki mfava hi Diyavulosi. A ntsrhovelo i masiku ya wugamu ya xiyimu lexi xa misava,* kasi a vatsrhoveli i tintsrumi. 40 Xileswo, swanga hi leswi mfava wu hlengeletiwaka kutani wu hisiwa hi ndzrilo, swi ta va xiswoswo a ku heleni ka xiyimu lexi xa misava. 41 A N’wana wa mhunu a ta zrumela tintsrumi take, kutani a Mfun’wini wake ti ta hlengeleta mintxhumu hinkwayu leyi dohisaka vhanu ni hinkwavu lava yentxaka leswi lwisanaka ni nawu, 42 ti va txukumetela ndzrilweni lowu pfuzraka. Hala hi kone va taka dzrila va ketsrela ni matinyo. 43 Hi nkama wolowo lava ku lulama va ta vaninga ku fana ni dambu a Mfun’wini wa Papayi wavu. Lweyi a nga ni tindleve a a yingiseti.

44 “A Mfumu wa matilo wu fana ni wukosi lebyi fihliwiki masin’wini, lebyi mhunu wa kukazri a byi kumiki kutani a byi fihla. Xileswo hi mhaka ya ku nyonxa loku a viki na kone, a ya xavisa hinkwaswu leswi a nga na swone kutani a ya xava nsimu yoleyo.

45 “Nakone a Mfumu wa matilo wu fana ni muxavisi lweyi a fambafambaka a djuletela maperola ya lisima. 46 Loko a kuma perola dzra lisima ngopfu swinene, a famba a ya xavisa hinkwaswu leswi a nga na swone kutani a dzri xava.

47 “Nangweso a Mfumu wa matilo wu fana ni nkukutu lowu txukumeteliwiki lwandle kutani wu phasa tihlampfi ta mixaka hinkwayu. 48 Loko wu talile, va wu kokela handle kutani va tsrhamisa va hlawula letinene va ti txhela swibyeni, kambe leti ti nga liki tinene va ti txukumeta. 49 Swi ta va xiswoswo a ku heleni ka xiyimu lexi xa misava.* A tintsrumi ti ta zrumiwa ku ya hambanisa lava ku biha ka lava ku lulama, 50 ti va txukumetela ndzrilweni lowu pfuzraka. Hala hi kone va taka dzrila va ketsrela ni matinyo.

51 “Xana mi yi twisisile mintxhumu leyi hinkwayu?” Va mu hlamula va ku: “Ina.” 52 Kutani a va byela leswi: “Loko swi tsrhami hi ndlela leyo, mudondzrisi mun’wana ni mun’wana lweyi a dondzrisiwaka mayelanu ni Mfumu wa matilo a fana ni n’winyi wa muti, lweyi a humesaka mintxhumu leyimpshwa ni ya khale a wukosini byake.”

53 Loko Yesu a heta ku va byela swifaniso leswi, a suka lomu a a li kone. 54 A ku a tlhasa mugangeni lowu a kuleliki ka wone, a sungula ku va dondzrisa a sinagogeni dzravu, kutani va hlamala va ku: “Xana mhunu lweyi a byi kuma kwini wutlhazri ni ntamu wa ku yentxa mahlolana lawa? 55 Xana lweyi a hi n’wana wa muvatli? Mamana wake a hi Mariya, nakone vamakwavu a hi Yakobe, Yosefa, Simoni na Yuda? 56 Vamakwavu hinkwavu va xisati a hi vone lava nga na hine lani? A swi kuma kwini hinkwaswu leswi?” 57 Kutani va sungula ku nyenyentseka* hi leswi a a swi hlaya ni ku swi yentxa. Kambe Yesu a va byela a ku: “A muprofeta awa bekeliwa xitxhavu kun’wana ni kun’wana lomu a yaka kone, kambe lomu a kuleliki kone ni le kaya kwake a nga bekeliwi.” 58 Xileswo, a nga hambanga mahlolana manyingi a mbangwini wolowo hikusa a va nga na lipfumelo.

14 Hi nkama wolowo, Heroda* hosi ya muganga* a twa hi ta ndhuma ya Yesu 2 kutani a byela malandzra yake a ku: “Lweyi i Yohane Mubabatisi. A pfuxiwile ku feni, hi leswo swi yentxaka a kota ku yentxa mahlolana lawa.” 3 Heroda a a khome Yohane a mu tsrimba a mu pfalela djele hi mhaka ya Herodiya nsati wa makwavu Filipi. 4 Hikusa Yohane a a tsrhamela ku mu byela a ku: “A swi pfumeleliwi kuva u teka Herodiya a va nkataku.” 5 Kambe, nambileswi a a djula ku mu dlaya, a a txhava xitsrhungu, hikusa a xi vona Yohane swanga muprofeta. 6 Kambe hi siku ledzri a ku kulungeliwa ku pswaliwa ka Heroda, a n’wana wa Herodiya a kine mahlweni ka vazrambiwa, leswi yentxiki Heroda a nyonxa ngopfu swinene 7 lakakuva a hlambanya leswaku a a ta mu nyika xin’wana ni xin’wana lexi a a ta kombela xone. 8 Kutani hi ku hlohloteliwa hi mamana wake, a ku: “Ni nyiki nhloko ya Yohane Mubabatisi na yi li ka bandetxha.” 9 Nambileswi hosi a yi tlhavekile, yi lelete leswaku a nyikiwa nhloko hi ku hlonipha xihlambanyu lexi yi xi yentxiki, ni hi kola ka vhanu lava a va li ku deni* na yone. 10 Xileswo, yi zrumela leswaku Yohane a tsremiwa nhloko a djele. 11 Hiloko a n’hwanyana a buyiseliwa nhloko ya Yohane na yi li xibyeni, kutani a yi yisa ka mamana wake. 12 Ntsrhaku ka leswo, vadondzrisiwa vake va ta, va teka ntsrumbu wake va ya wu lahla; kutani va ya byela Yesu leswi yentxekiki. 13 Loko a yingela leswo, Yesu a khwela boti a ya mbangwini wa kukazri akuva a ya va wuswake. Kambe loko switsrhungu swi twa leswo, swi suka madoropeni swi mu landzra hi milenge.

14 Loko a xika botini, a vona xitsrhungu lexikulu kutani a xi twela wusiwana, a va a hanyisa lava vabyaka. 15 Kambe loko dzri pela, a vadondzrisiwa vake va mu tsrhindzrekelela va ku: “A mbangu lowu wu le kule ni doropa nakone dzri pelile; byela switsrhungu leswaku swi famba akuva swi ya tixavela swakuda a swidoropanini.” 16 Kambe Yesu a va byela a ku: “Va nga fambi, va nyikani swakuda n’wine.” 17 Va mu hlamula va ku: “Ho va ni ntlhanu wa mapawu ni tihlampfi tibidzri ntsena.” 18 A va byela a ku: “Swi buyisani halenu.” 19 Kutani a byela switsrhungu leswaku swi tsrhama byanyini. A teka ntlhanu wa mapawu ni tihlampfi tibidzri, a lavisa tilweni, a khongota,* ntsrhaku ka leswo a khemelela mapawu, a nyika vadondzrisiwa vake, a vadondzrisiwa vake va yavela switsrhungu. 20 Xileswo hinkwavu va da va xuzra, ntsrhaku ka leswo va hlengeleta leswi saliki va tata 12 wa mintsrhava. 21 Lava diki ku ve kolomu ka 5.000 wa vavanuna, na ku nga kontiwi vavasati ni vana. 22 Hi ku kahlula, Yesu a byela vadondzrisiwa vake leswaku va khwela boti va pfana va famba va ya ka tlhelo ledzrin’wana dzra lwandle, na yene a ha lelelana ni switsrhungu.

23 Ntsrhaku ka loko a lelelani ni switsrhungu, a tlhantuka na a li wuswake a ya nhaveni a ya khongota. A dambu dzri pela na a ha li kohala. 24 Hi nkama wolowo a boti a dzri li kule swinene* ni misava,* nakone a dzri biwa hi mavimbi hi leswi a ku ba moya lowukulu.* 25 Kambe a mpundzrwini* a yela vadondzrisiwa vake, na a famba henhla ka mati. 26 Loko vadondzrisiwa va mu vona na a famba henhla ka mati va txhava, va ku: “I ntxini lexiya!”* Kutani va ba nyandha hi ku txhava. 27 Kambe Yesu a tekela ku va byela a ku: “Tiyani! Hi mine, mi nga txhavi.” 28 Petro a hlamula a ku: “Hosi, loko a li leswaku hi wene, ni pfumelele ni famba henhla ka mati ni ta lanu u nga kone.” 29 A mu hlamula a ku: “Tana!” Kutani Petro a huma botini a famba henhla ka mati a ya ka Yesu. 30 Kambe loko a lavisa xidzedze, a sungula ku txhava. Kutani loko a sungula ku mbombomela, a ba nyandha a ku: “Hosi, ni huluxi!” 31 Hi ku kahlula Yesu a mu khoma hi voko a ku: “Wene wa lipfumelo dzritsrongo, ha yini u ganaganeka?” 32 Loko va nghenile botini, a xidzedze xi yima. 33 Kutani lava a va li botini va mu khinsamela, va ku: “Hakunene u N’wana wa Xikwembu Nkulukumba.” 34 Kutani va tsremakanya lwandle va ya tlhasa Genezareta.

35 Loko vhanu va le mugangeni lowo va gungula leswaku hi yene, va tivisa vhanu hinkwavu va le migangeni ya le kusuhi, kutani va mu buyisela vhanu hinkwavu lava vabyaka. 36 Kutani va mu kombela kuva ntsena va khumba ponta ya mpahla yake. Hinkwavu lava va yi khumbiki va hanyisiwile hi ku helela.

15 Kutani a Vafarisi ni vatsrali lava humaka Yerusalema va ta ka Yesu va ku: 2 “Ha yini vadondzrisiwa vaku va honisa ntumbuluku wa* vakokwana? Hi xikombiso, va da swakuda na va nga hlambanga mavoko.”*

3 A va hlamula a ku: “Ha yini mi tlula nawu wa Xikwembu Nkulukumba hi mhaka ya ntumbuluku wenu? 4 Hi xikombiso, Xikwembu Nkulukumba a te: ‘Hlonipha papayi waku ni mamana waku’, a tlhela a ku: ‘Mun’wana ni mun’wana lweyi a zrukaka* papayi wake kumbe mamana wake a a dlayiwe.’ 5 Kambe n’wine mi li: ‘Mun’wana ni mun’wana lweyi a byelaka papayi wake kumbe mamana wake a ku: “Hinkwaswu leswi ni nga na swone leswi a ni ta ku pfuna hi swone ni swi nyike Xikwembu Nkulukumba”, 6 a swa ha vileleki kuva mhunu yelweyo a hlonipha papayi wake nikutsrongo.’ Hi ndlela leyo mi yentxe zritu dzra Xikwembu Nkulukumba dzri nga ha pfuni ntxhumu hi mhaka ya ntumbuluku wenu. 7 N’wine vakanganyisi, muprofeta Ezaya a a hlaya n’wine loko a ku: 8 ‘Vhanu lava va ni hlonipha hi nomu ntsena, kambe a timbilu tavu ti le kule swinene na mine. 9 A swi pfuni ntxhumu ku tama va ni gandzrela, hikusa leswi va swi dondzrisaka i tindondzro ta vhanu.’” 10 Kutani a vitana xitsrhungu lexi a xi li kusuhi na yene a xi byela leswi: “Yingisetani mi tlhela mi swi twisisa ha hombe leswi ni swi hlayaka: 11 Leswi yentxaka mhunu a va lweyi a ntxhimiki* a mahlweni ka Xikwembu Nkulukumba, a hi leswi nghenaka non’wini wake, kambe a ntxhimisiwa hi leswi swi humaka non’wini wake.”

12 Kutani a vadondzrisiwa va mu tsrhindzrekelela va mu byela leswi: “Xana wa swi tiva leswaku a Vafarisi va khunguvanyekile* hi leswi u swi hlayiki?” 13 A va hlamula a ku: “Nsinya wun’wana ni wun’wana lowu Papayi wanga wa le matilweni a kalaka a nga wu byalanga wu ta tsruvuliwa.* 14 Va tsrhikani, i vakongomisi lava fiki matihlo. Loko mhunu lweyi a fiki matihlo a kongomisa mhunu lweyi a fiki matihlo, hi wubidzri byavu va ta pela xikheleni.” 15 Petro a ku: “Hi tlhamuxeli leswaku swi hlaya yini leswo.”* 16 Hiloko a ku: “Kasi na n’wine a mi si na swi twisisa? 17 A mi swi tivi leswaku hinkwaswu leswi diwaka swi nghena hi le non’wini swi khaluta hi le khuzrini* swi gama swi huma? 18 Kambe hinkwaswu leswi humaka hi le non’wini swi sukela mbilwini, kutani leswo hi swone leswi yentxaka leswaku mhunu a va lweyi a ntxhimiki mahlweni ka Xikwembu Nkulukumba. 19 Hi xikombiso, a mbilwini ku huma ku yanakanya loku bihiki: ku dlaya, wumbuye, swiyentxo swa tingana hi tlhelo dzra tinkuku,* ku yiva, wumboni bya madzrimi ni ku sandzra. 20 Leswo hi swone swi ntxhimisaka mhunu, kambe ku da na u nga hlambanga mavoko* a swi ntxhimisi mhunu.”

21 Loko Yesu a suka kolanu a ye migangeni ya Tiri ni Sidoni. 22 Hi loko ku ta wansati wa Mufenikiya lweyi a pfaka ka wun’we wa miganga yoleyo a huwelela a ku: “Ni tweli wusiwana Hosi, N’wana Davhida. A n’wananga wa n’hwanyana a xaniseka ngopfu hi leswi a nga ni demona.” 23 Kambe Yesu a nga mu hlamulanga. Kutani vadondzrisiwa vake va mu tsrhindzrekelela va mu tsratsriya va ku: “Mu hlongoli, hikusa awa hi tinga.”* 24 A va hlamula a ku: “A ni zrumeliwanga ka mun’wana ni mun’wana, kambe ni zrumeliwe ka tihamba leti lahlekiki ta yindlu ya Israyele.” 25 Nambitanu, wansati lweyo a mu tsrhindzrekelela a mu khinsamela, a ku: “Hosi, ni pfune!” 26 Yesu a mu hlamula a ku: “A hi swinene ku teka pawu dzra vana u nyika swimbyanyana.” 27 Wansati a hlamula a ku: “Ina Hosi, kunene a swimbyanyana swi da matlhantlha lawa ma waka menzeni wa vinyi va swone.” 28 Kutani a mu hlamula a ku: “Wansati, a lipfumelo dzraku i dzrikulu, a swi yentxeki hi lani u navelaka ha kone.” Xileswo hi nkama wolowo a n’wanake a daheka.

29 Yesu a suka kolanu, a ya kusuhi ni Lwandle dzra Galileya, kutani a khandzriya nhaveni a tsrhama kone. 30 Hiloko a tsrhindzrekeleliwa hi switsrhungu swinyingi, swi mu buyisela vhanu va ku khuta, va ku limala, va ku fa matihlo, timbheveve ni van’wana va ku tala, va va beka minkondzrweni yake, kutani a va hanyisa. 31 Kutani xitsrhungu xi hlamala ngopfu hi ku vona timbheveve ti vulavula, lava va ku limala va hanyisiwa, lava khutaka va famba, lava ku fa matihlo va vona, kutani va sungula ku dzrumisa Xikwembu Nkulukumba wa Israyele.

32 Kambe Yesu a vitana vadondzrisiwa vake a va byela leswi: “Ni xi twela wusiwana xitsrhungu lexi, hikusa xi tsrhame na mine masiku mazrazru nakone a xa ha na swakuda. Kutani a ni djuli ku xi mukisa na xi twa ndlala,* hikusa xi nga txhuka xi titivala a ndleleni.” 33 Nambitanu a vadondzrisiwa va ku: “Xana hi ta swi kuma kwini swakuda swa ku yaneta xitsrhungu lexi hinkwaxu kola nhoveni?” 34 Xileswo Yesu a va vutisa a ku: “Mi ni mapawu mangani?” Va mu hlamula va ku: “Hi ni 7 wa wone, ni tihlampfinyana.” 35 Ntsrhaku ka ku byela xitsrhungu leswaku xi tsrhamisa hansi, 36 a teka 7 wa mapawu ni tihlampfi, a khongota, ntsrhaku ka leswo a khemelela mapawu a nyika vadondzrisiwa vake, vadondzrisiwa vake va yavela switsrhungu. 37 Kutani hinkwavu va da va xuzra, ntsrhaku ka leswo va hlengeleta leswi saliki va tata 7 wa mintsrhava ya yikulu. 38 Lava diki ku ve 4.000 wa vavanuna, na ku nga kontiwi vavasati ni vana. 39 Hi wugamu, loko a lelelane ni switsrhungu, a khwela boti a ya mugangeni wa Magadani.

16 Hiloko Vafarisi ni Vasaduki va mu tsrhindzrekelela akuva va mu dzringa, va mu kombela leswaku a va yentxela hlolana ledzri pfaka tilweni. 2 A va hlamula a ku: “Loko dzri pela, mi li: ‘Ku ta va ni maxela manene, hikusa a tilo dzri pshwukile’, 3 a mixweni mi li: ‘Ku ta titimeta ku tlhela ku na mpfula, hikusa a tilo dzri pshwukile nakone ku ni mphumelo.’ Ma swi kota ku tlhamuxela matsrhamela ya tilo, kambe a mi swi koti ku tlhamuxela swikombiso swa minkama. 4 N’wine lixaka ledzri bihiki ledzri kalaka dzri nga dumbekanga ka Xikwembu Nkulukumba* mi djula ku yentxeliwa hlolana, kambe a ku na hlolana ledzri mi taka dzri vona handle ka hlolana ledzri yentxekeliki Yonasi.” Kutani a va siya, a tifambela.

5 Kutani vadondzrisiwa va tlulela ka tlhelo ledzrin’wana dzra lwandle kambe va dzrivala ku teka mapawu. 6 Yesu a va byela a ku: “Tsrhamani na mi pfule matihlo nakone mi tivonela ka fermentu* dzra Vafarisi ni Vasaduki.” 7 Kambe a vadondzrisiwa va sungula ku vulavula hi xivone va ku: “Hi dzrivale mapawu.” 8 Loko Yesu a va yingela, a ku: “Ha yini mi vulavulisana hi leswaku a mi tekanga mapawu, n’wine va lipfumelo ledzritsrongo? 9 Xana a mi si na yi twisisa yinhla ya kone, a ma ha ma dzrimuki ntlhanu wa mapawu lawa ku diki 5.000 wa vhanu, ni leswaku mi tate mintsrhava yingani hi lawa ma saliki? 10 Kumbexana a ma ha ma dzrimuki 7 wa mapawu lawa ku diki 4.000 wa vhanu, ni leswaku mi tate mintsrhava yingani ya yikulu hi lawa ma saliki? 11 Ha yini mi nga swi twisisanga leswaku a ni nga khaneli hi mapawu? Kambe a ni mi byela leswaku mi tivonela ka fermentu dzra Vafarisi ni Vasaduki.” 12 Kutani va swi twisisa leswaku a a va byela leswaku va tivonela ka tindondzro ta Vafarisi ni Vasaduki, ku nga li ka fermentu dzra mapawu.

13 Loko Yesu a tlhasa mugangeni wa Khezariya wa Filipi, a vutisa vadondzrisiwa vake a ku: “Xana vhanu va li a N’wana wa mhunu i mani?” 14 Va mu hlamula va ku: “Van’we va li i Yohane Mubabatisi, van’wana va li i Eliya, nakasi van’wanyana va li i Yeremiya kumbe mun’we wa vaprofeta.” 15 Yene a va vutisa a ku: “N’wine ke, mi li hi mine mani?” 16 Simoni Petro a hlamula a ku: “U Kriste, N’wana wa Xikwembu Nkulukumba lweyi a hanyaka.” 17 Yesu a mu hlamula a ku: “U tovokile Simoni, n’wana Yona, hikusa a wu byeliwanga hi vhanu,* kambe Papayi wanga wa le matilweni hi yene a ku byeliki. 18 Futsrhi na ku byela: Hi wene Petro, ka zribye ledzri ni ta yaka bandla dzranga, nakone tinyangwa ta Sizra* a ti nge dzri hluli. 19 Ni ta ku nyika mimpfungulu ya Mfumu wa matilo. Nakone xin’wana ni xin’wana lexi u taka xi tsrimba lani misaveni xi ta va xi tsrimbiwile matilweni, ni lexi u taka xi tlhantlha lani misaveni xi ta va xi tlhantlhiwile matilweni.” 20 Kutani a tsratsriya vadondzrisiwa vake leswaku va nga byeli mhunu leswaku hi yene Kriste.

21 Ku sukela ka nkama wolowo, Yesu a sungula ku tlhamuxela vadondzrisiwa vake leswaku a fanela ku ya Yerusalema a ya xanisiwa ngopfu hi vakulukumba, vaprista lavakulu ni vatsrali a tlhela a dlayiwa, a gama a pfuxiwa hi siku dzra wuzrazru. 22 Loko a twa leswo, Petro a mu kokela tlhelweni a sungula ku mu kawuka a ku: “Hosi, u nga tivitaneli khombo; a swi nge ti ku humelela leswo.” 23 Kambe Yesu a fulazrela Petro a va a ku: “Suka, Sathana! U xihinga kwanga, hikusa leyo i mimpimiso ya vhanu a hi ya Xikwembu Nkulukumba.”

24 Kutani Yesu a byela vadondzrisiwa vake a ku: “Loko mhunu a djula ku ni landzrela, a a tiyale kutani a zrwala mhandzri yake ya nxanisa* a tama a ni landzrela. 25 Hikusa lweyi a djulaka ku huluxa wutomi* byake a ta luzekeliwa hi byone, kambe lweyi a luzekeliwaka hi wutomi* byake hi mhaka yanga a ta tlhela a byi kuma. 26 Kunene swi siza yini ku va mhunu a kuma mintxhumu hinkwayu ya misava kambe a luzekeliwa hi wutomi* byake? Kone i yini lexi mhunu a nga xi nyikelaka akuva a xava wutomi* byake? 27 Hikusa a N’wana wa mhunu a ta ta hi ku phatima ka Papayi wake ni tintsrumi take, nakone a ta hakela mun’wana ni mun’wana hi ku ya hi mintizro yake. 28 Ni mi byela ntiyiso, van’wana ka lava yimiki lani a va nge ti fa na va nga zranganga va vona N’wana wa mhunu a ta na a li Mfun’wini wake.”

17 Ntsrhaku ka 6 wa masiku, Yesu a teka Petro na Yakobe na Yohane lava a va li vamakwavu, va tlhantukela nhaveni leyi tlakukiki. 2 Kutani a ndzrulutiwa mahlweni kwavu; wuso byake byi phatima ku fana ni dambu, a mpahla yake yi phatima ngopfu* ku fana ni livaningu. 3 Hiloko ku humelela Moxe na Eliya va bulisana na yene. 4 Petro a byela Yesu a ku: “Hosi, swa nyonxisa ku va lani. Loko u swi djula ni nga gwimba matende mazrazru kola, dzrin’we dzri va dzraku, dzrin’wana dzri va dzra Moxe, dzrin’wanyana dzri va dzra Eliya.” 5 Na a ha vulavula, ku humelela tlavi dzra ku phatima dzri va funeketa, kutani ku twala zritu ledzri humaka tlavini dzri ku: “Lweyi i N’wananga, lweyi a zrandzrekaka, lweyi ni mu yamukelaka. Mu yingisetani.” 6 Loko va twa leswo, vadondzrisiwa va txhava ngopfu swinene, va khinsama, a mawuso yavu ma lavisa hansi. 7 Kutani Yesu a va tsrhindzrekelela a va khumba, a ku: “Sekelekani, mi nga txhavi.” 8 Loko va lavisa henhla, a va vonanga mhunu mumbeni handle ka Yesu. 9 Loko va fulamela hi le nhaveni, Yesu a leleta vadondzrisiwa vake a ku: “Mi nga byeli mhunu leswi mi swi voniki ku ya tlhasa loko N’wana wa mhunu a pfuxiwa ku feni.”

10 Nambitanu, vadondzrisiwa va mu vutisa va ku: “Kutani ha yini vatsrali va hlaya leswaku Eliya a fanela ku va wa ku sungula ku ta?” 11 A va hlamula a ku: “Nakunene Eliya awa ta nakone a ta ta lulamisa mintxhumu hinkwayu. 12 Nambitanu na mi byela leswaku Eliya kutani a tile, a va mu tivanga nakone va tizre ku zrandzra ha yene. Na yene N’wana wa mhunu va ta mu xanisa hi lani ku fanaka.” 13 Kutani vadondzrisiwa va swi twisisa leswaku a a vulavula hi Yohane Mubabatisi.

14 Loko va tlhasa lomu a ku ni xitsrhungu, wanuna wa kukazri a mu tsrhindzrekelela a mu khinsamela a ku: 15 “Hosi, mu kombe timpswalu n’wananga, a ni mavabyi ya hweti. Nakone a xaniseka ngopfu, a tsrhamela ku wa ndzrilweni ni le matini. 16 Ni mu yise ka vadondzrisiwa vaku, kambe a va swi kotanga ku mu hanyisa.” 17 Yesu a hlamula a ku: “N’wine lixaka ledzri nga liki na lipfumelo nakone dzri bihiki, xana ni fanela ku tsrhama na n’wine ku ya tlhasa kwini? Xana ni ta mi lehisela mbilu ku ya tlhasa kwini? Mu buyisani halenu.” 18 Yesu a hlongola demona, kutani dzri huma; nakone hi nkama wolowo a xidjahatana xi hanya. 19 Ntsrhaku ka leswo vadondzrisiwa va ya ka Yesu va ya mu vutisa xihundleni va ku: “Ha yini hine hi hlulekile ku dzri hlongola?” 20 A va hlamula a ku: “Hi mhaka ya leswi lipfumelo dzrenu dzri nga dzritsrongo. Hikusa kunene na mi byela leswaku loko lipfumelo dzrenu dzro dzringana ni mbewu ya sinapi,* mi ta swi kota ku byela nhava leyi mi ku: ‘Suka hi lani u ya lahaya’, yi va yi suka, nakone a xi kone xi taka mi hlula.” 21 *——

22 Na va ha hlengeletanile a Galileya, Yesu a va byela a ku: “A N’wana wa mhunu a ta wongiwa a nyikeliwa a mavokweni ya vhanu, 23 kutani va ta mu dlaya, nakone hi siku dzra wuzrazru a ta pfuxiwa.” Xileswo, a vadondzrisiwa vake va tlhaveka swinene.

24 Loko va tlhasa Kapernawume, a vahakelisi va tinemba ta tempele* va tsrhindzrekelela Petro va ku: “Xana mudondzrisi wenu a nga hakeli tinemba ta tempele?” 25 A va hlamula a ku: “Awa hakela.” Kambe loko Petro a nghena ndlwini, Yesu a tekela ku mu vutisa a ku: “U swi vonisa kuyini Simoni? Xana tihosi ta misava ti nyikiwa hi mani mali ya tinemba? Xana ti nyikiwa hi vana va tone kumbe hi vhanu vambeni?” 26 Petro a hlamula a ku: “Hi vhanu vambeni”, Yesu a mu byela leswi: “U tiyisile, a vana va tone a va hakeli tinemba. 27 Kambe akuva hi nga va khunguvanyisi, yana lwandle u ya txukumetela ndzrovo, kutani a hlampfi ya ku sungula leyi u taka yi phasa, loko u pfula nomu wa yone u ta kuma mali ya prata.* Yi teki u ya hakelela mine na wene.”

18 Hi nkama wolowo, a vadondzrisiwa va tsrhindzrekelela Yesu va ku: “I mani lweyi kunene a nga lwenkulu a Mfun’wini wa matilo?” 2 Kutani a vitana ntsrongwana wa kukazri a mu yimisa makazri kwavu 3 a ku: “Ni mi byela ntiyiso, loko mi nga txintxi mi fana ni vatsrongwana, a mi nge txhuki mi nghena Mfun’wini wa matilo. 4 Kambe, lweyi a titsrongahataka ku fana ni ntsrongwana lweyi, hi yene lwenkulu a Mfun’wini wa matilo; 5 ni lweyi a yamukelaka ntsrongwana wa ku fana ni lweyi hi mhaka ya vito dzranga, na mine awa ni yamukela. 6 Kambe mun’wana ni mun’wana lweyi a hambukisaka mun’we ka lavatsrongo lava va nga ni lipfumelo kwanga, a swi ta yampswa kuva a tsrimbeleliwa zribye ledzrikulu* a nhan’wini kutani a txukumeteliwa lwandle dzra ku yenta.

7 “Khombo ka misava hikusa yi yentxa vhanu va doha! Nakunene, leswi dohisaka vhanu a swi nge siveliwi, kambe khombo ka mhunu lweyi swi sukelaka ka yene! 8 Loko voko dzraku kumbe nkondzro waku wu ku dohisa,* wu tsremi u wu txukumeta kule na wene. Hikusa swa yampswa kuva u kuma wutomi na u limalile kumbe na u khuta ku tlula kuva u txukumeteliwa a ndzrilweni lowu nga gamikiki na u ni mavoko mabidzri kumbe minkondzro yibidzri. 9 Ni loko tihlo dzraku dzri ku dohisa,* dzri xokoli u dzri txukumeta kule na wene. Hikusa swa yampswa kuva u kuma wutomi na u ni tihlo dzrin’we ku tlula kuva u txukumeteliwa ndzrilweni wa Gehena* na u ni matihlo mabidzri. 10 Mi nga txhuki mi dzrela mun’we wa lavatsrongo, hikusa na mi byela leswaku tintsrumi tavu leti nga matilweni, minkama hinkwayu ti vona wuso bya Papayi wanga lweyi a nga matilweni. 11 *——

12 “Mi swi vonisa kuyini? Loko mhunu a ni 100 wa tihamba kutani yin’we ya tone yi lahleka, xana a nge siyi leta 99 a tinhaveni kutani a djuletela leyi lahlekiki? 13 Nakone loko a yi kuma, kunene na mi byela, a nyonxa ngopfu swinene ha yone ku tlula leta 99 leti kalaka ti nga lahlekanga. 14 Hi lani ku fanaka, a hi ku zrandzra ka Papayi wanga* lweyi a nga matilweni kuva ku suva nambi ko va mun’we wa lavatsrongo.

15 “Nakone, loko makwenu a ku dohela, famba u ya bulisana na yene u mu komba nandzru wake* na mo va n’wine vabidzri ntsena. Loko a ku yingiseta u ta va u pfune makwenu ku yentxa leswinene. 16 Kambe loko a nga ku yingiseti, teka mhunu mun’we kumbe vabidzri u mu yela, akuva mhaka yin’wana ni yin’wana yi ta tiyisekisiwa hi wumboni bya* timboni tibidzri kumbe tizrazru. 17 Loko a nga va yingiseti, vulavula ni bandla. Loko na dzrone bandla a nga dzri yingiseti mu voni swanga mhunu wa matiko kumbe muhakelisi wa tinemba.

18 “Ni mi byela ntiyiso, xin’wana ni xin’wana lexi mi taka xi tsrimba lani misaveni xi ta va xi tsrimbiwile ni le matilweni, nakone xin’wana ni xin’wana lexi mi taka xi tlhantlha lani misaveni xi ta va xi tlhantlhiwile ni le matilweni. 19 Nangweso ni mi byela ntiyiso, loko vabidzri makazri kwenu lani misaveni va twanana ka mhaka ya kukazri ya lisima leyi va yi kombelaka, va ta nyikiwa yone hi Papayi wanga lweyi a nga matilweni. 20 Hikusa lani ku nga ni vabidzri kumbe vazrazru lava tlhanganiki hi vito dzranga, ni ta va na vone.”

21 Petro a mu tsrhindzrekelela a mu vutisa leswi: “Hosi, loko makwezru a ni dohela ni fanela ku mu dzrivalela kangani? Ka 7?” 22 Yesu a mu hlamula a ku: “Mine ni ku byela leswi, a hi ka 7, kambe ka 77.

23 “Hi yoleyo mhaka Mfumu wa matilo wu nga fanisiwaka ni hosi leyi a yi djula ku londzra swikweneti ka vatizri va yone. 24 Loko va sungula ku yi hakela, ku buyisiwe wanuna lweyi a a yi devha 10.000 wa matalenta.* 25 Kambe leswi a a nge na mali ya ku hakela, a hosi yi lelete leswaku yene, nsati wake ni vanake ni hinkwaswu leswi a a li na swone swi xavisiwa akuva ku hakeliwa xikweneti lexo. 26 Kutani lweyi wa mutizri a mu khinsamela a mu kombela a ku: ‘Ni lehiseli mbilu, ni ta ku hakela hinkwaswu leswi ni ku devhaka swone.’ 27 Hi ku mu twela wusiwana a hosi yi mu tsrhika a famba yi tima xikweneti xake. 28 Kambe lweyi wa mutizri loko a humile, a kumane ni mutizrikulobye lweyi a a mu devha 100 wa madenari, kutani a mu tlimba makolo a mu byela leswi: ‘Ni hakeli hinkwaswu leswi u ni devhaka.’ 29 Kutani mutizrikulobye a mu khinsamela a sungula ku mu kombela a ku: ‘Ni lehiseli mbilu, ni ta ku hakela.’ 30 Nambitanu, a a nga djuli ku twa ntxhumu, kutani a leleta leswaku a pfaleliwa djele ku ya tlhasa loko a hakela xikweneti xake. 31 Loko vatizrikulobye va vona leswi yentxekiki, va vaviseka ngopfu lakakuva va ya dzrungulela hosi hinkwaswu leswi nga yentxeka. 32 Kutani hosi yi mu vitana yi mu byela leswi: ‘Mutizri lweyi a bihiki, ni time swikweneti swaku hinkwaswu nkama lowu u nga ni kombela. 33 Xana na wene a wu nga fanelanga u mu kombisa timpswalu mutizrikuloni hi lani mine ni ku kombisiki ha kone?’ 34 Kutani yi mu nyikela ka valaveleli va djele leswaku a pfaleliwa ku ya tlhasa loko a hakela xikweneti xake hinkwaxu. 35 Papayi wanga wa le matilweni na yene a ta mu yentxisa xiswoswo mun’wana ni mun’wana wenu lweyi a kalaka a nga mu dzrivaleli makwavu hi mbilu hinkwayu.”

19 Loko Yesu a gama ku vulavula hi timhaka leti, a suka Galileya a ya mindzrelekanwini ya Yudeya ka tlhelo dzrin’wana dzra Yordani. 2 Switsrhungu swa swinyingi swi mu landzra, kutani a hanyisa lava a va vabya.

3 Kutani a Vafarisi va mu yela hi nkongometo wa ku mu dzringa, va mu vutisa va ku: “Xana swa pfumeleliwa leswaku wanuna a tsrhika* nsati wake hi xivangelo xin’wana ni xin’wana?” 4 A va hlamula a ku: “A mi dondzranga leswaku lweyi a va vumbiki a ku sunguleni a va hambe na va li wanuna ni wansati, 5 kutani a ku: ‘Hi xivangelo lexo, a wanuna a ta siya papayi wake ni mamana wake a namazrela nsati wake, kutani lavabidzri va ta va nyama yin’we’? 6 Leswo swi hlaya leswaku a va ha li vabidzri, kambe i nyama yin’we. Xileswo, leswi Xikwembu Nkulukumba a swi patsriki, ku nga txhuki ku va ni mhunu lweyi a swi tsravukanisaka.” 7 Va mu vutisa va ku: “Kutani ha yini Moxe a lelete leswaku wanuna a fanela ku mu nyika papela dzra ku dlaya wukati a va a mu hlongola?” 8 Yesu a va hlamula a ku: “Moxe a mi pfumelele ku tsrhika vasati venu hi mhaka ya ku tlanyala ka timbilu tenu, kambe a swi nga li hi ndlela leyo ku sunguleni. 9 Na mi byela leswaku lweyi a tsrhikaka nsati wake, na ku nga li leswaku e yentxa swa tingana hi tlhelo dzra tinkuku,* kutani a ya txhata ni wansati mumbeni, a yentxa wumbuye.”

10 A vadondzrisiwa va ku: “Loko swi tsrhame hi ndlela leyo swa yampswa mhunu a nga txhati.” 11 Yesu a va byela leswi: “A hi vhanu hinkwavu va swi kotaka ku yentxa leswo, kambe swi kotiwa ntsena hi lava va nga ni nyiko yoleyo. 12 Hikusa ku ni vatsrheniwa lava va pswalisiwiki xiswoswo, nakone ku ni vatsrheniwa lava va nga yentxiwa vatsrheniwa hi vhanu, handle ka leswo ku ni vatsrheniwa lava nga tiyentxa vatsrheniwa hi mhaka ya Mfumu wa matilo. Lweyi a swi kotaka ku yentxa leswo a a swi yentxi.”

13 Kutani va mu buyisela vatsrongwana akuva a va tlhanteka mavoko a va khongotelela, kambe a vadondzrisiwa va va kawuka. 14 Nambitanu, Yesu a ku: “Tsrhikani vatsrongwana, mi nga va siveli ku ta kwanga, hikusa a Mfumu wa matilo i wa lava ku fana na vone.” 15 Kutani a va tlhanteka mavoko a gama a suka.

16 Hiloko a tsrhindzrekeleliwa hi mhunu wa kukazri a mu vutisa leswi: “Mudondzrisi, he yini mintxhumu leyinene leyi ni fanelaka ku yi yentxa akuva ni kuma wutomi lebyi nga gamikiki?” 17 Yesu a mu byela a ku: “Ha yini u ni vutisa mayelanu ni leswi nga swinene? A wa munene ko va mun’we ntsena. Kambe loko kunene u djula ku kuma wutomi, nkama hinkwawu landzra milawu.” 18 Mhunu yelweyo a mu vutisa a ku: “He yini ya kone?” Yesu a ku: “U nga txhuki u dlaya, u nga txhuki u yentxa wumbuye, u nga txhuki u yiva, u nga txhuki u nyikela wumboni bya madzrimi, 19 hlonipha papayi waku ni mamana waku, nakone u fanela ku zrandzra vhanu van’wana* hi ndlela leyi u tizrandzraka ha yone.” 20 Kutani mumpshwa lweyo a ku: “Na yi landzra milawu leyo hinkwayu; ni kiyeleliwa hi yini?” 21 Yesu a mu byela leswi: “Loko u djula ku va lweyi a hetisekiki,* famba u ya xavisa mintxhumu yaku kutani u teka mali u nyika swisiwana, xileswo u ta va ni pfindla a tilweni; ntsrhaku ka leswo, tana u ta va mulandzreli wanga.” 22 Loko mumpshwa lweyo a yingela leswo, a suka a famba na a vavisekile, hikusa a a ganye ngopfu. 23 Kutani Yesu a byela vadondzrisiwa vake a ku: “Ni mi byela ntiyiso, swi ta kazrata ngopfu kuva mhunu wa ku ganya* a nghena Mfun’wini wa matilo. 24 Nakone na mi byela, swa nabyala ku va kamela dzri khaluta hi ka mbhovo wa ximazri ku tlula ku va mhunu wa ku ganya a nghena a Mfun’wini wa Xikwembu Nkulukumba.”

25 Loko vadondzrisiwa va twa leswo, va hlamala ngopfu, va ku: “I mani lweyi kunene a nga huluxiwaka?” 26 Kutani Yesu a va lavisisisa wusweni a ku: “Ka vhanu leswo a swi koteki, kambe ka Xikwembu Nkulukumba hinkwaswu swa koteka.”

27 Petro a hlamula a ku: “Lavisa! Hi siye mintxhumu yezru hinkwayu hi ku landzrela; kutani hi ta kuma yini?” 28 Yesu a va byela a ku: “Ni mi byela ntiyiso, loko mintxhumu hinkwayu yi ta yentxiwa leyimpshwa, ni loko N’wana wa mhunu a ta tsrhama xiluvelweni xake lexi phatimaka, n’wine mi viki valandzreli vanga mi ta tsrhama ka 12 wa swiluvelo mi yavanyisa tinxaka ta 12 ta Israyele. 29 Nakone mun’wana ni mun’wana lweyi a siyiki tiyindlu, kumbe vamakwavu va xinuna, kumbe vamakwavu va xisati, kumbe papayi, kumbe mamana, kumbe vana, kumbe masimu hi kola ka vito dzranga, a ta swi kuma hi lani ku phindhiwiki ka 100 a tlhela a kuma wutomi lebyi nga gamikiki.

30 “Kambe vanyingi lava nga va ku sungula va ta va va wugamu, kasi lava va wugamu va ta va va ku sungula.

20 “Hikusa Mfumu wa matilo wu fana ni n’winyi wa muti lweyi a sukiki mpundzrwini a famba a djuletela vatizri leswaku va ta tizra ka masimu yake ya mawuvha. 2 Loko a twananile ni vatizri leswaku a ta va hakela denari dzrin’we hi siku, a va zrumela masin’wini yake ya mawuvha. 3 A tlhela a huma hi ma 9 wora,* a vona van’wana bazara na ve yima va nge na ntizro, 4 kutani a va byela a ku: ‘Na n’wine yanani masin’wini yanga ya mawuvha, ni ta mi hakela leswi mi fanelaka.’ 5 Kutani va famba. A tlhela a suka hi ma 12* ni hi ma 15 wora* a ya yentxa leswi fanaka. 6 Hi wugamu, a huma hi ma 17 wora,* a kuma van’wana na ve yima, a va vutisa a ku: ‘Ha yini mi yima lani siku hinkwadzru na mi nga tizri ntxhumu?’ 7 Va mu hlamula va ku: ‘Hi mhaka a ku na lweyi a hi tholiki.’ Kutani a ku: ‘Na n’wine fambani masin’wini yanga ya mawuvha.’

8 “Loko dzri pelile, n’winyi wa masimu a vitana mulaviseli wa masimu a ku: ‘Vitana vatizri u va nyika muholo wavu, sungula hi lava wugamu u gamisa hi lava ku sungula.’ 9 Loko ku tlhasa lava nga sungula ku tizra hi ma 17 wora, va holeliwa denari dzrin’we. 10 Loko ku tlhasa lava ku sungula, a va pimisa leswaku va ta holeliwa ku tlula van’wana, kambe na vone va holeliwa denari dzrin’we. 11 Loko va yamukela muholo va sungula ku khala ka n’winyi wa masimu 12 va ku: ‘Lava wugamu ve tizra wora dzrin’we ntsena; kambe u va nyike muholo wa ku dzringana ni wezru, hine lava tizriki siku hinkwadzru na hi pshwa hi mumu!’ 13 Kambe a hlamula mun’we wa vone a ku: ‘Nakulozri, a ni ku kanganyisanga. A hi twanananga leswaku ni ta ku hakela denari dzrin’we? 14 Teka muholo waku u famba. A ku zrandzra kwanga i ku holela lava wugamu mali ya ku dzringana ni yenu. 15 Xana a ni na mfanelo ya ku yentxa leswi ni swi djulaka hi mintxhumu yanga? Kumbe wene wo va ni matsrhoho* hi leswi ni va kombisiki wunene?’* 16 Hi ndlela leyo lava wugamu va ta va va ku sungula, kasi va ku sungula va ta va va wugamu.”

17 Loko a tlhantukela a Yerusalema, Yesu a teka vadondzrisiwa vake lava 12 a ya na vone tlhelweni lani a ku nge na vhanu a va byela a ku: 18 “Ma swi twa! Hi tlhantukela a Yerusalema, a N’wana wa mhunu a ta nyikeliwa a mavokweni ya vaprista lavakulu ni vatsrali. Va ta mu yavanyisa akuva va mu dlaya. 19 Va ta mu nyikela ka vamatiko akuva va mu hamba xihlekiso, va mu ba va tlhela va mu dlaya a mhandzrini; kambe hi siku dzra wuzrazru a ta pfuxiwa.”

20 Kutani mamana wa vana va Zebedewu a mu tsrhindzrekelela ni vanake, a mu khinsamela a mu kombela swa kukazri. 21 Yesu a mu vutisa a ku: “U djula yini?” Yene a ku: “Ni kombela leswaku a vananga lavabidzri va tsrhama na wene a Mfun’wini waku, mun’we ka voko dzraku dzra xinene mun’wana ka ledzra ximatsri.” 22 Yesu a hlamula a ku: “A mi swi tivi leswi mi swi kombelaka. Xana mi nga swi kota ku nwa kopo ledzri ni taka dzri nwa ku nga li khale?” Va hlamula va ku: “Hi nga swi kota.” 23 A va byela a ku: “Kunene mi ta nwa kopo dzranga, kambe loko ku li ku tsrhama vokweni dzranga dzra xinene kumbe dzra ximatsri a hi mine ni nga mi nyikaka swone, kambe a mimbangu yoleyo yi lumba lava Papayi wanga a va lulamiseliki yone.”

24 Loko lavan’wana va 10 va twa mhaka leyi, va kwatela lavabidzri va vamakwavu. 25 Kambe Yesu a va vitana a ku: “Ma swi tiva leswaku a tihosi ta matiko ti bindzrisela vhanu nakone lava nga ni wulawuli a henhla ka wone a va ma tsretsreleli. 26 N’wine a mi fanelanga ku yentxisa xileswo; kambe lweyi a djulaka ku va lwenkulu makazri kwenu a fanela ku mi tizrela, 27 nakone lweyi a djulaka ku va wa ku sungula makazri kwenu a fanela ku va nandzra wenu. 28 Ku fana ni leswi a N’wana wa mhunu a kalaka a nga telanga ku ta tizreliwa, kambe a teliki ku ta tizrela ni ku nyikela wutomi* byake byi va xitizrulo ka vhanu vanyingi.”

29 A nkama va humaka hi Yeriko, a landzriwa hi xitsrhungu lexikulu. 30 Kutani vavanuna vabidzri va ku fa matihlo lava a va tsrhame tlhelweni ka ndlela, va twa leswaku Yesu awa khaluta kutani va bandlukana va ku: “Hosi, hi tweli wusiwana, N’wana Davhida!” 31 Kambe xitsrhungu xi va kawuka, xi va byela leswaku va miyela; nambitanu vone va bandlukana ngopfu swinene va ku: “Hosi, hi tweli wusiwana, N’wana Davhida!” 32 Xileswo Yesu a yima a va vitana, kutani a ku: “Mi djula ni mi yentxela yini?” 33 Va mu byela va ku: “Hosi, hi pfule matihlo.” 34 Hi ku susumeteliwa hi ntwelawusiwana, Yesu a khumba matihlo yavu, hi nkama wolowo va tlhela va sungula ku vona kutani va mu landzrela.

21 Loko va tlhasa a Betfage a Nhaveni ya Minhlwazri, kusuhi ni Yerusalema, Yesu a zruma vadondzrisiwa vake vabidzri, 2 a va byela a ku: “Fambani ka xidoropana lexiya xi vonekaka, mi ta kuma mbongolo yi nga ni ximbongolwana na yi tsrimbiwile. Ti tlhantlhani mi buya na tone. 3 Loko mhunu wa kukazri a mi vutisa, mi fanela ku mu hlamula mi ku: ‘Ti djuliwa hi Hosi.’ Kutani a ta tekela ku mi tsrhika mi buya na tone.”

4 Leswi nakunene swi yentxeki akuva ku hetiseka mazritu lawa ma hlayiwiki hi muprofeta, lweyi a tiki: 5 “Byela n’hwanyana wa Siyoni u ku: ‘A Hosi yaku ya ku tela hi ku zrula, na yi khwele henhla ka mbongolo, ina, yi khwele ximbongolwana.’”

6 Xileswo, a vadondzrisiwa va famba va ya yentxa hi lani Yesu a hlayiki ha kone. 7 Va buyisa mbongolo ni ximbongolwana xa yone va ti kapeka timpahla, kutani a khwela ka ximbongolwana. 8 Vanyingi ka lava a va li ka xitsrhungu va yandlala timpahla tavu a ndleleni, na van’wana va tsrema swiphundla swa minsinya va swi beketela ndleleni. 9 Nakone, switsrhungu leswi a swi mu zrangelile ni lava a va mu landzra va ya mahlweni va huwelela va ku: “Ha khongota, a a huluxiwe N’wana wa Davhida! A tovokile lweyi a taka hi vito dzra Yehovha! Ha khongota, mu huluxi, wene u nga henhlahenhla!”

10 Loko Yesu a nghena Yerusalema, vhanu hinkwavu va doropa va talataleka, na va ku: “I mani lweyi?” 11 A switsrhungu a swi phikelela swi ku: “Lweyi hi Yesu, muprofeta lweyi a pfaka Nazareta wa le Galileya!”

12 Yesu a nghena tempeleni a hlongola hinkwavu lava a va li ku xaviseni ni ku xaveni a tempeleni, a hangalasa mimenza ya vatxintxisi va mali ni swibankwana swa lava a va xavisa matuva. 13 Kutani a va byela a ku: “A Matsralwa ma li: ‘A yindlu yanga yi ta vitaniwa yindlu ya xikhongoto’, kambe n’wine mi yi yentxa yindlu ya* vayivi.” 14 A tlhela a hanyisa lava ku fa matihlo ni lava khutaka, lava mu yeliki tempeleni.

15 Kutani vaprista lavakulu ni vatsrali va hlundzruka loko va vona mintxhumu ya ku hlamalisa leyi a yi yentxiki ni swidjahatana leswi a swi huwelela tempeleni swi ku: “Ha khongota, a ku huluxiwe N’wana wa Davhida!” 16 Va mu vutisa va ku: “Xana wa swi yingela leswi va swi hlayaka?” Yesu a va hlamula a ku: “Ina. Xana a mi ngi ngi dondzra leswi: ‘U humese swidzrumiso a minon’wini ya vatsrongwana ni swibebetana’?” 17 Kutani a suka a va siya, a ya ka doropa dzra Betaniya lomu a nga ya yetlela kone wusiku lebyo.

18 Loko a tlhelela doropeni na ka ha li mpundzru, a sungula ku twa ndlala. 19 A vona nsinya wa nkuwa a ndleleni kutani a wu yela, kambe a wo va ni makamba ntsena, kutani a wu byela a ku: “U nga ha txhuki u pswala mihandzru.” Hi nkama wolowo a nsinya wu woma. 20 Loko vadondzrisiwa va vona leswo, va hlamala va ku: “Ha yini nsinya wa nkuwa wu tekele ku woma?” 21 Yesu a va hlamula a ku: “Ni mi byela ntiyiso, loko mo va ni lipfumelo nakone mi nga ganaganeki, a mi nge ti yentxa ntsena leswi ni swi yentxiki ka nkuwa lowu, kambe ni loko mo byela nhava leyi mi ku: ‘Suka u titxukumetela lwandle’, swi ta yentxeka. 22 Nakone hinkwaswu leswi mi swi kombelaka hi xikhongoto, na mi ni lipfumelo, mi ta nyikiwa swone.”

23 Ntsrhaku ka loko a nghenile tempeleni, vaprista lavakulu ni vakulukumba va tiko va mu tela na a li ku dondzriseni va ku: “U yi yentxa hi ntamu wa mani mintxhumu leyi? Nakone i mani a ku nyikiki ntamu lowu?” 24 Yesu a va hlamula a ku: “Na mine ni ni xivutiso. Loko mi ni hlamula na mine ni ta mi byela leswaku ni wu kuma kwini ntamu wa ku yentxa mintxhumu leyi: 25 I mani lweyi a zrumiki Yohane ku babatisa vhanu? I Xikwembu Nkulukumba kumbe i vhanu?” Kambe va sungula ku yanakanyisisa hi xivone, va ku: “Loko hi ku: ‘I Xikwembu Nkulukumba’, a ta ku: ‘Ha yini mi nga pfumelanga kwake?’ 26 Kambe loko hi ku: ‘I vhanu’, hi ta tikokela khombo ka xitsrhungu, hikusa hinkwavu va pfumela leswaku Yohane i muprofeta.” 27 Xileswo va mu hlamula va ku: “A hi swi tivi.” Kutani Yesu a va byela leswi: “Na mine a ni nge ti mi byela leswaku ni wu kuma kwini ntamu wa ku yentxa mintxhumu leyi.

28 “Mi yi vonisa kuyini mhaka leyi? Wanuna wa kukazri a a ni vana vabidzri. A ya ka lweyi wa ku sungula a ku: ‘N’wananga, famba u ya tizra ka nsimu ya mawuvha namunhla.’ 29 A n’wana lweyo a mu hlamula a ku: ‘A ni nge ti famba,’ kambe a sala a tisola a famba. 30 A ya ka n’wana wa wubidzri, a ya mu byela leswi fanaka. N’wana yelweyo a byela papayi wake a ku: ‘Ni ta famba’, kambe a nga fambi. 31 Hi wini ka lavabidzri mi vonaka leswaku a yentxi ku zrandzra ka papayi wake?” Vone va ku: “Hi lweyi wa ku sungula.” Yesu a va byela leswi: “Ni mi byela ntiyiso, vahakelisi va tinemba ni tinghwavana va ta mi zrangela ku nghena Mfun’wini wa Xikwembu Nkulukumba. 32 Hikusa Yohane a mi telile a mi dondzrisa ndlela ya ku lulama, kambe a mi mu kholwanga. Nambitanu, vahakelisi va tinemba ni tinghwavana va mu kholwile, kambe nambiloko mi vone leswi a mi tisolanga mi mu kholwa.

33 “Hi lexi xifaniso ximbeni: A ku ni wanuna wa kukazri lweyi a byaliki mawuvha a masin’wini yake, a biyela masimu wolawo, a kela mbangu wa ku pfuvela vhinyu ka wone a va a yaka xihondzro; kutani a ma volekisa vadzrimi, a gama a yendzra a ya tikweni dzrin’wana. 34 Loko ku tlhasa nkama wa ku khaya mawuvha, a zruma vatizri vake akuva va ya ka vadzrimi va ya mu tekela mihandzru yake. 35 Kambe vadzrimi va khoma vatizri vake, mun’we va mu ba, mun’we va mu dlaya mun’wana va mu khandla hi mazribye. 36 A tlhela a zruma vatizri vambeni, va vanyingi ku tlula va ku sungula, kambe va va yentxa leswi fanaka. 37 Hi wugamu a zruma n’wanake, na a tibyela leswi: ‘Va ta mu hlonipha n’wananga.’ 38 Loko vadzrimi va vona n’wanake va byelana va ku: ‘Lweyi hi ye madapfindla. A hi mu dlayeni hi ta sala ni pfindla dzrake!’ 39 Xileswo, va mu khoma va mu txukumetela handle ka masimu ya mawuvha va gama va mu dlaya. 40 Kutani ke, loko n’winyi wa masimu ya mawuvha a buya, a ta va yentxa yini vadzrimi lava?” 41 Va mu hlamula va ku: “Leswi va bihiki, a ta va dlaya hi ndlela ya ku vavisa kutani a volekisa masimu ya mawuvha ka vadzrimi vambeni, lava va taka mu nyika mihandzru loko ku tlhasa nkama wa yone.”

42 Yesu a va byela a ku: “Xana a mi ngi ngi dondzra a Matsralweni leswaku: ‘A zribye ledzri vayaki va dzri bakanyiki, dzri ndzruluke zribye dzra lisima ku tlula hinkwawu. Dzri pfa ka Yehovha, nakone dzra hlamalisa matihlweni yezru?’ 43 Hi leswo swi ni yentxaka ni mi byela leswaku a Mfumu wa Xikwembu Nkulukumba wu ta susiwa kwenu kutani wu nyikeliwa ka tiko ledzri taka beka mihandzru ya wone. 44 Nakone lweyi a taka wela henhla ka zribye ledzri a ta pshwandlaka. Ni lweyi dzri taka wela henhla kwake, dzri ta mu pshwandlasa.”

45 Loko vaprista lavakulu ni Vafarisi va yingela swifaniso swake, a va swi xiya leswaku a a vulavula hi vone. 46 Nambileswi a va djula ku mu khoma, a va txhava switsrhungu, hikusa a swi mu vona swanga muprofeta.

22 Yesu a tlhela a va dondzrisa hi ku tizrisa swifaniso, a ku: 2 “A Mfumu wa matilo wu nga fanisiwa ni hosi leyi hambeliki n’wana wa yone nkhuvu wa mutxhatu. 3 Yi zrume malandzra ya yone akuva ma ya vitana lava zrambiwiki ku ta mutxhatwini, kambe a va swi djulanga ku ta. 4 Yi tlhela yi zruma malandzra man’wana yi ku: ‘Byelani lava zrambiwiki mi ku: “Ni mi lulamiseli xifihlulu, ni mi dlayeli tihomu ni swifuyu swa ku nona, nakone mintxhumu hinkwayu kutani yi lulamisiwile. Tanani nkhubyini.”’ 5 Kambe leswi a va nga na mhaka na swone, va famba va tiyentxela swavu, mun’we a tiyela masin’wini, mun’wana a tiyela ka mabindzru yake; 6 kasi lavan’wana va khoma malandzra yake va ma xanisa va tlhela va ma dlaya.

7 “A hosi yi hlundzruka ngopfu kutani yi zrumela masotxha ya yone leswaku ma ya dlaya vadlayi volavo ni ku hisa doropa dzravu. 8 Ntsrhaku ka leswo, yi byela malandzra ya yone yi ku: ‘A nkhuvu wu lulamile kambe lava a va zrambiwile a va nga faneleki ku va kone a nkhubyini. 9 Xileswo, fambani ka tindlela letikulu leti nga ni vhanu vanyingi, kutani mi zramba mun’wana ni mun’wana lweyi mi taka mu kuma akuva a ta nkhubyini wa mutxhatu.’ 10 Kutani malandzra ma suka ma ya tindleleni ma zramba hinkwavu lava ma va kumiki, lavanene ni lava bihiki; kutani mbangu lowu a ku ta hambeliwa ka wone mutxhatu wu tala hi vazrambiwa.

11 “Loko hosi yi nghena ku ta vona lava zrambiwiki, yi vona wanuna wa kukazri lweyi a yambaliki mpahla leyi a yi nga faneleki ku ta hi yone mutxhatwini. 12 A hosi yi mu byela yi ku: ‘Nakulozri, u nghenisi kuyini lani na u nga yambalanga mpahla leyi fanelekaka ku ta hi yone mutxhatwini?’ Kambe yene a pfumala xa ku xi hlaya. 13 Kutani hosi yi byela malandzra ya yone yi ku: ‘Mu tsrimbani mavoko ni milenge mi mu txukumetela handle a munyameni. Hala hi kone a taka dzrila a ketsrela ni matinyo.’

14 “Hikusa lava zrambiwiki i vanyingi kambe lava hlawuliwiki i vatsrongo.”

15 Kutani Vafarisi va famba va ya hamba makungu akuva va mu phasa hi mazritu yake. 16 Xileswo, va zruma vadondzrisiwa vavu kwake kun’we ni ntlawa wa kukazri wa vaseketeli va Heroda, va ya ku: “Mudondzrisi, ha swi tiva leswaku u vulavula ntiyiso nakone u dondzrisa ntiyiso mayelanu na Xikwembu Nkulukumba, futsrhi a wu lweli ku nyonxisa vhanu hikusa a wu na xihlawuhlawu. 17 Kutani hi byeli, u swi vonisa kuyini? Xana swa pfumeleliwa* ku hakela tinemba ka Khezari kumbe a swi pfumeleliwi?” 18 Kambe Yesu hi ku tiva maqhinga yavu ya ku biha a ku: “Mi ni dzringela yini vakanganyisi ndzrin’wine? 19 Ni kombani mali ya nsimbi ya ku hakela tinemba.” Kutani va mu buyisela denari. 20 A va vutisa a ku: “Xana a xifaniso lexi ni mazritu lawa i swa mani?” 21 Va mu hlamula va ku: “I swa Khezari.” Kutani a ku: “Tlhelisani swa Khezari ka Khezari, kambe swa Xikwembu Nkulukumba ka Xikwembu Nkulukumba.” 22 Loko va yingela leswo va hlamala, kutani va mu siya va famba.

23 Hi siku dzroledzro, a Vasaduki, lava a va nga kholwi leswaku ku ta va ni ku pfuxiwa ka vafi, va mu tsrhindzrekelela va mu vutisa va ku: 24 “Mudondzrisi, Moxe a te: ‘Loko wanuna a fa na a nga na vana, makwavu a fanela ku sala a teka nsati wake akuva a sala a mu pswalela vana.’* 25 Kutani mhaka hi leyi, a ku ni 7 wa vamakwavu; lweyi wa ku sungula a teke nsati a gama a fa na a nga na vana, a nsati wake a sala a tekiwa hi makwavu. 26 Swi yentxekisa xileswo, lweyi wa wubidzri na yene a fa, lweyi wa wuzrazru na yene a fa, ku ko va hela hinkwavu va 7. 27 Hi wugamu lweyi wansati na yene a fa. 28 Kutani a ku pfuxiweni ka vafi, a ta va nsati wa mani ka lava 7? Hikusa hinkwavu va mu tekile a va nsati wavu.”

29 Yesu a va hlamula a ku: “Mi lahlekile hikusa a mi ma tivi Matsralwa nambi ntamu wa Xikwembu Nkulukumba; 30 hikusa a ku pfuxiweni ka vafi, vavanuna a va nge he ti teka nambi vavasati a va nge he ti tekiwa, kambe va ta fana ni tintsrumi ta le tilweni. 31 Mayelanu ni ku pfuka ka vafi, xana a mi dondzranga leswi Xikwembu Nkulukumba a mi byeliki swone, loko a ku: 32 ‘Hi mine Xikwembu Nkulukumba wa Abrahamu, Xikwembu Nkulukumba wa Izaki na Xikwembu Nkulukumba wa Yakobe’? Yene a hi Xikwembu Nkulukumba wa lava fiki, kambe i Xikwembu Nkulukumba wa lava hanyaka.” 33 Loko switsrhungu swi twa leswo, swi hlamala hi madondzrisela yake.

34 Loko Vafarisi va yingela leswaku a pfale minomu ya Vasaduki, va mu yela na va li hi ntlawa. 35 Mun’we wavu lweyi a a wu tiva ngopfu Nawu, a mu dzringa hi ku mu vutisa a ku: 36 “Mudondzrisi, he wini nawu lowukulu ka hinkwayu leyi nyikeliwiki hi Moxe?” 37 A mu hlamula a ku: “‘U fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi byaku hinkwabyu* ni hi miyanakanyu yaku hinkwayu.’ 38 Lowu hi wo nawu lowukulu ni wa ku sungula ka hinkwayu. 39 Wa wubidzri lowu yelanaka na wone hi lowu: ‘U fanela ku zrandzra vhanu van’wana* hi ndlela leyi u tizrandzraka ha yone.’ 40 Nawu hinkwawu ni tindondzro ta vaprofeta swi tiseketeli ka milawu leyibidzri.”

41 Na Vafarisi va ha hlengeletanile, Yesu a va vutisa a ku: 42 “Xana mi li yini hi Kriste? Mi yanakanya leswaku i n’wana wa mani?” Va mu hlamula va ku: “I n’wana wa Davhida.” 43 A va vutisa a ku: “Kutani, ha yini Davhida hi ku susumeteliwa hi moya wa ku xwenga a mu vitana Hosi, a ku: 44 ‘Yehovha a byele Hosi yanga a ku: “Tsrhamisa vokweni dzranga dzra xinene ku ya tlhasa loko ni beka valala vaku a hansi ka minkondzro yaku”’? 45 Kutani ha yini Davhida a mu vitana Hosi, nakasi i n’wanake?” 46 A nga kone lweyi a swi kotiki ku mu hlamula, nakone ku sukela ka siku dzroledzro, a nga kone lweyi a tiyiki ku mu vutisa swin’wana.

23 Kutani Yesu a byela switsrhungu ni vadondzrisiwa vake a ku: 2 “Vatsrali ni Vafarisi va tibyela leswaku va dondzrisa tindondzro ta Moxe. 3 Kutani ke, yentxani hinkwaswu leswi va mi byelaka swone, kambe mi nga swi yentxi leswi va swi yentxaka, hikusa vo swi hlaya hi nomu ntsena kambe a va swi yentxi. 4 Va tsrimba mintsrhwalu ya ku bindzra va zrwexa vhanu, kambe vone a va swi djuli nambi ku yi khumba hi litiho. 5 Hinkwaswu leswi va swi yentxaka va swi yentxa akuva va voniwa hi vhanu, va kulisa swikaxana leswi nga ni matsralwa lawa va tiyimelelaka ha wone ka swa ku biha va tlhela va lehisa makhaxa ya mpahla yavu. 6 Va zrandzra mimbangu ya ku hlawuleka ngopfu a minkhubyini ni switsrhamu swa le mahlweni a masinagogeni, 7 ni ku loseteliwa a mabazara ni kuva vhanu va va vitana va ku Rabi.* 8 Kambe n’wine mi nga pfumeli ku vitaniwa Rabi, hikusa Mudondzrisi wenu i mun’we nakone hinkwenu mi vamakwavu. 9 Ku yengetela ka leswo, mi nga vitaneni mhunu lani misaveni mi ku papayi, hikusa Papayi wenu i mun’we ntsena, ku nga Lweyi a nga matilweni. 10 Nakone mi nga txhuki mi vitaniwa vazrangeli, hikusa Muzrangeli wenu i mun’we ntsena, ku nga Kriste. 11 Kambe lwenkulu a makazri kwenu a fanela ku va lweyi a mi tizrelaka. 12 Mun’wana ni mun’wana lweyi a titlakuxaka a ta tsrongahatiwa, kambe lweyi a titsrongahataka a ta tlakuxiwa.

13 “Khombo kwenu vatsrali ni Vafarisi, vakanganyisi ndzrin’wine! Hikusa mi sivela vhanu ku nghena a Mfun’wini wa matilo nakasi n’wine a mi ngheni, futsrhi mi sivela nambi lava djulaka ku nghena. 14 *——

15 “Khombo kwenu vatsrali ni Vafarisi, vakanganyisi ndzrin’wine! Hikusa mi yendzrela mimbangu hinkwayu akuva mi ndzruluta mhunu mun’we a nghena ka wukhongoti bya Xiyuda,* kutani loko mi mu ndzrulutile, mi mu yentxa mhunu lweyi a faneliwaka ngopfu hi Gehena* ku mi tlula.

16 “Khombo kwenu vakongomisi lava fiki matihlo, n’wine mi liki: ‘Loko mhunu a funga hi tempele a hi swa ntxhumu; kambe loko mhunu a funga hi woru ledzri nga tempeleni a fanela ku swi hetisisa.’ 17 N’wine swiphunta leswi fiki matihlo! I yini lexi nakunene xi nga xa lisima, i woru kumbe i tempele ledzri nga dzrone dzri yentxaka leswaku a woru dzri hlawuleka a ntizrweni wa Xikwembu Nkulukumba? 18 Mi tlhela mi ku: ‘Loko mhunu a funga hi altari a hi swa ntxhumu, kambe loko a funga hi nyiko leyi nga altarini a fanela ku swi hetisisa.’ 19 N’wine swifamahlu! I yini lexi nakunene xi nga xa lisima, i nyiko kumbe i altari ledzri nga dzrone dzri yentxaka leswaku a nyiko yi va ya ku hlawuleka a ntizrweni wa Xikwembu Nkulukumba? 20 Xileswo, mun’wana ni mun’wana lweyi a fungaka hi altari a funga hi dzrone ni hi hinkwaswu leswi nga ka dzrone; 21 ni lweyi a fungaka hi tempele a funga hi yone ni hi Lweyi a tsrhamaka ka yone; 22 nakone lweyi a fungaka hi matilo a funga hi xiluvelo xa Xikwembu Nkulukumba ni hi Lweyi a tsrhamiki ka xone.

23 “Khombo kwenu vatsrali ni Vafarisi, vakanganyisi ndzrin’wine! Hikusa mi nyikela swa wukhume bya ximbowana, bya anetha ni bya kumini,* kambe mi dzrela mintxhumu leyi nga ya lisima a Nawini, ku nga wululami, timpswalu ni ku dumbeka. Leswi hi leswi mi fanelaka ku swi yentxa, kambe na mi nga dzreli mintxhumu leyin’wana. 24 N’wine vakongomisi lava fiki matihlo, mi wungula nsuna kambe mi minta kamela!

25 “Khombo kwenu vatsrali ni Vafarisi, vakanganyisi ndzrin’wine! Hikusa mi hlampswa handle ka kopo ni handle ka paratu, kambe a ndzreni ka swone swi tale hi wunavenave* ni mintxhumu ya tingana. 26 Mufarisi lweyi a fiki matihlo, zranga u basisa ndzreni ka kopo ni ka paratu, akuva handle ka swone nakone ku basa.

27 “Khombo kwenu vatsrali ni Vafarisi, vakanganyisi ndzrin’wine! Hikusa mi fana ni masizra lawa ma pendiwiki, lawa nakunene hi le handle ma tikombaka ma xongile kambe hi le ndzreni ma tale hi mazrambu ya vhanu va ku fa ni hi mintxhumu hinkwayu ya ku nyenyentsa. 28 Hi ndlela leyi fanaka, hi le handle mi voneka mi li lava ku lulama a vhanwini, kambe hi le ndzreni mi tale hi wukanganyisi ni ku pfumala nawu.

29 “Khombo kwenu vatsrali ni Vafarisi, vakanganyisi ndzrin’wine! Hikusa mi yaka masizra ya vaprofeta mi tlhela mi xongisa masizra ya lava ku lulama, 30 nakone mi li: ‘Loko a he hanya a masikwini ya vakokwana vezru, a hi ta va hi nga hlengelanga na vone a ku halateni ka ngati ya vaprofeta.’ 31 Xileswo, ma tipaluxa ha wuswenu leswaku mi vana va lava dlayiki vaprofeta. 32 Kutani, hetisani mintizro leyi vakokwana venu va yi sunguliki.

33 “N’wine tinyoka, vana va tinyoka leti nga ni mahlungu,* mi nga hulukisa kuyini ku yavanyisiwa ni ku txukumeteliwa a Gehena?* 34 Hi mhaka yoleyo, ni mi zrumela vaprofeta, tintlhazri ni vadondzrisi. Van’we vavu mi ta va dlaya mi va hayeka timhandzrini, van’wana mi ta va ba masinagogeni yenu ni ku tlhela mi va xanisa madoropeni hinkwawu, 35 akuva mi ta va ni nandzru wa ku halata ngati ya vhanu hinkwavu va ku lulama a misaveni, ku sukela ka ngati ya Abele lweyi a a li mhunu wa ku lulama ku ya ka ngati ya Zakariya n’wana wa Barakiya, lweyi mi mu dlayiki a makazri ka tempele ni altari. 36 Kunene na mi byela, lixaka ledzri dzri ta khatisiwa hi mhaka ya swidoho leswi hinkwaswu.

37 “Yerusalema, Yerusalema, mudlayi wa vaprofeta, wene u khandlaka hi mazribye lava zrumeliwiki kwaku . . . makhambi manyingi ni djuli ku hlengeleta vanaku ku fana ni leswi huku yi hlengeletisaka xiswone switxiwana swa yone a hansi ka timpapa ta yone! Kambe wene a wu pfumelanga. 38 Lavisani! Xikwembu Nkulukumba a ta wu fulazrela muti wenu.* 39 Hikusa na mi byela, ku sukela ka namunhla a mi nge he ti ni vona ku ya tlhasa loko mi ku: ‘A tovokile lweyi a taka hi vito dzra Yehovha!’”

24 Loko Yesu a huma tempeleni vadondzrisiwa vake va mu tsrhindzrekelela akuva va mu komba miyaku leyi nga tempeleni. 2 Kutani a va byela a ku: “Xana ma yi vona mintxhumu leyi hinkwayu? Kunene na mi byela, ma ta masiku lawa ku nga tiki sala zribye henhla ka zribye dzrin’wana, ma ta gilhitiwa hinkwawu.”

3 Na a tsrhame Nhaveni ya Minhlwazri, vadondzrisiwa va mu tsrhindzrekelela va mu vutisa xihundleni, va ku: “Hi byeli, xana mintxhumu leyi yi ta yentxeka siku muni, nakone xi ta va xini xikombiso xa ku ta kwaku* ni xa ku hela ka xiyimu lexi xa misava?”*

4 Kutani Yesu a va hlamula a ku: “Tivonelani leswaku mi nga hambukisiwi hi mhunu, 5 hikusa vanyingi va ta ta hi vito dzranga, va ku: ‘Hi mine Kriste,’ nakone va ta hambukisa vanyingi. 6 Mi ta yingela hi ta tiyimpi a mimbangwini ya ku siyanasiyana. Tivonelani akuva mi nga txhavi, hikusa mintxhumu leyo yi fanela ku yentxeka kambe wugamu byi ta va na byi nga si na tlhasa.

7 “Hikusa a tiko dzri ta lwisana ni tiko dzrimbeni ni mfumu wu ta lwisana ni mfumu wumbeni, ku ta pfumaleka swakuda nakone ku ta va ni ku tsrekatsreka ka misava a mimbangwini ya ku siyanasiyana. 8 A mintxhumu leyi hinkwayu i masungulo ya mahlomulo.

9 “Kutani vhanu va ta mi xanisa ni ku mi dlaya, nakone mi ta nyenyiwa hi matiko hinkwawu hi mhaka ya vito dzranga. 10 Handle ka leswo, vanyingi va ta heleliwa hi lipfumelo nakone va ta wonganana va tlhela va venganana. 11 Ku ta humelela vaprofeta vanyingi va madzrimi nakone va ta lahlekisa vanyingi; 12 futsrhi hi kola ka ku yengeteleka ka wubihi, a lizrandzru dzra vhanu vanyingi dzri ta hola. 13 Kambe lweyi a tiyiselaka* ku ya tlhasa wugamu a ta huluxiwa. 14 Nakone madzrungula lawa lamanene ya Mfumu ma ta zrezriwa a misaveni hinkwayu akuva ku va wumboni ka matiko hinkwawu, kutani hi kone wugamu byi taka tlhasa.

15 “Kutani loko mi vona ntxhumu wa ku nyenyentsa lowu honetelaka na wu yime mbangwini wa ku xwenga hi lani muprofeta Daniyele a hlayiki ha kone (mudondzri a a zami ku swi twisisa), 16 lava va nga Yudeya a va tsrutsrumeli a tinhaveni. 17 Lweyi a nga henhla ka yindlu a nga xiki a ya teketela mintxhumu* a ndlwini kwake, 18 ni lweyi a nga masin’wini a nga tlheli a ya teka xiyambalu xake. 19 Khombo ka vavasati lava va taka va na va ni tinyimba ni lava va taka va na va nyan’wisa a masikwini wolawo! 20 Tamani mi khongota leswaku ku tsrutsruma kwenu ku nga vi hi nguva ya wuxika kumbe hi siku dzra Savata; 21 hikusa ku ta va ni nhlomulo lowukulu wa ku a wu ngi ngi sama wu va kone ku sukela misava yi tumbuluxiwa, nakone a wu nge he tlheli wu va kone. 22 Nakunene, loko masiku wolawo a ma nga pumbiwanga, a ku na mhunu lweyi a a ta huluka, kambe hi kola ka vahlawuliwa masiku wolawo ma ta pumbiwa.

23 “Kutani loko mhunu wa kukazri a mi byela a ku: ‘Vonani! Hi lweyi Kriste!’ kumbe a ku: ‘Hi lwiya!’, mi nga swi kholwi. 24 Hikusa ku ta humelela lava va taka hemba va ku hi vone va Kriste nakone ku ta va ni vaprofeta va madzrimi. Va ta yentxa mahlolana lamakulu ni mintxhumu ya ku hlamalisa akuva va hambukisa vhanu, loko swi koteka, nambi ku li vahlawuliwa. 25 Vonani! Ni mi byela na swi nga si na yentxeka. 26 Xileswo, loko va mi byela va ku: ‘Vonani! A le mananga!’, mi nga yi, kumbe va ku: ‘Vonani! A le ndlwini!’, mi nga swi kholwi. 27 Hikusa a ku ta ka N’wana wa mhunu* ku ta fana ni lihati ledzri sukelaka wuxeni dzri phatima ku ya mpeladambu. 28 Lomu ntsrumbu wu nga kone, hi lomu magama ma taka hlengeletana kone.

29 “Na nhlomulo wa masiku wolawo wa ha ku hela, a dambu dzri ta mphuma, a n’weti a wu nge he ti vaninga ni tinyeleti ti ta wa hi le tilweni nakone mintamu ya matilo yi ta tsrekatsrekisiwa. 30 Ntsrhaku ka leswo, ku ta voneka xikombiso xa N’wana wa mhunu a tilweni, kutani a matiko hinkwawu ya misava ma ta ba nkosi, nakone ma ta vona N’wana wa mhunu na a ta hi le matlavini ya le tilweni na a ni ntamu ni ku phatima lokukulu. 31 Kutani a ta zrumela tintsrumi take hi mpfumawulu wa nanga, ti ta hlengeleta vahlawuliwa vake lava pfaka ka mune wa matlhelo ya misava, ku sukela ka tlhelo dzrin’wana dzra tilo ku ya ka ledzrin’wana.

32 “Dondzrani ka xifaniso lexi xa nsinya wa nkuwa: Loko mazrwavi ya wone ma sungula ku hluka, ma swi tiva leswaku malanga ma kusuhi. 33 Hi lani ku fanaka, na n’wine loko mi vona mintxhumu leyi hinkwayu, swi tivani leswaku a le kusuhi, a kola tinyangweni. 34 Kunene na mi byela leswaku a lixaka ledzri a dzri nge fi dzri hela na mintxhumu leyi hinkwayu yi nga si na yentxeka. 35 Tilo ni misava swi ta khaluta, kambe mazritu yanga ma nga ka ma nga khaluti.

36 “Mayelanu ni siku ledzro ni nkama wa kone a ku na lweyi a swi tivaka, nambi tintsrumi ta le matilweni nambi ko va N’wana, kambe swi tiviwa ntsena hi Papayi. 37 A ku ta ka N’wana wa mhunu* ku ta fana ni le masikwini ya Nowa. 38 Hikusa hi lani a swi li ha kone masikwini wolawo na Ndhambhi yi nga si na tlhasa, vhanu a va da, va nwa, vavanuna va teka, vavasati va tekiwa, ku ya tlhasa siku ledzri Nowa a ngheniki ha dzrone a ngalaweni, 39 a va vanga na mhaka ni ntxhumu ku ya tlhasa loko Ndhambhi yi tlhasa yi va kukula hinkwavu, kutani a ku ta ka N’wana wa mhunu ku ta va hi ndlela yoleyo. 40 Vavanuna vabidzri va ta va xikan’we masin’wini; mun’we a ta tekiwa lwemun’wana a siyiwa. 41 Vavasati vabidzri va ta va na va sila xikan’we; mun’we a ta tekiwa lwemun’wana a siyiwa. 42 Xileswo, tsrhamani na mi zrindzrile, hikusa a mi dzri tivi siku ledzri Hosi yenu yi taka ta ha dzrone.

43 “Kambe tivani leswi: Loko n’winyi wa muti a o tiva nkama* lowu muyivi a taka mu nghenela ha wone, a a nge ti yetlela nakone a a nge ti swi pfumelela leswaku a yindlu yake yi tlhanyiwa. 44 Hi ndlela yoleyo, na n’wine tsrhamani na mi tilulamiselile, hikusa N’wana wa mhunu a ta ta hi nkama lowu mi kalaka mi nga wu yanakanyi.

45 “Nakunene i mani nandzra wa ku dumbeka ni ku tlhazriha lweyi a n’winyi wake a mu bekiki kuva a hlayisa malandzra yake, a ma phamela swakuda hi nkama wa kone? 46 Awa nyonxa nandzra yelweyo loko a n’winyi wake a mu kuma na a yentxa swoswo! 47 Kunene na mi byela, a ta mu beka leswaku a lavisela mintxhumu yake hinkwayu.

48 “Kambe loko nandzra yelweyo o yentxa swa ku biha kutani a tibyela leswi: ‘A N’winyi wanga awa hlwela’, 49 a va a sungula ku ba malandzrakulobye, a da ni ku tlhela a nwa ni timpopswi, 50 a n’winyi wake a ta tlhasa hi siku ledzri nandzra lweyo a kalaka a nga dzri laviselanga ni hi nkama lowu a kalaka a nga wu tivi, 51 kutani a ta mu khatisa hi ndlela ya ku vavisa ngopfu swinene a mu txukumetela mbangwini lowu ku nga ni vakanganyisi. Hala hi kone a taka dzrila a ketsrela ni matinyo.

25 “Kutani Mfumu wa matilo wu nga fanisiwa ni 10 wa van’hwanyana* lava tekiki mimotsre yavu va huma va tlhangaveta muteki. 2 Ntlhanu wa vone a va phuntile, kasi lavan’wana va ntlhanu a va tlhazrihile. 3 Lava ku phunta va teke mimotsre yavu kambe a va tekanga mafuzra ya ku yanela, 4 kambe lava ku tlhazriha va teke mimotsre yavu ni swigadzrana swa mafuzra. 5 Kambe leswi muteki a a hlwela, hinkwavu va twe wuzrongo va va va khutsriyela. 6 A xikazri ka wusiku ku twale zritu na dzri bandlukana dzri ku: ‘Hi lweyi muteki! Humani mi mu tlhangaveta.’ 7 Kutani van’hwanyana lavo hinkwavu va pfuka va lulamisela mimotsre yavu. 8 Lava ku phunta va byela lava ku tlhazriha va ku: ‘Hi pumbelani mafuzra yenu hikusa a mimotsre yezru yi kusuhi ni ku timeka.’ 9 Lava ku tlhazriha va va hlamula, va ku: ‘Swi nga yentxeka ma nga hi yaneli hinkwezru loko ho mi pumbela. Swa yampswa mi famba ka vaxavisi mi ya tixavela yenu.’ 10 Na va ha ye ku xaveni, muteki a sala a tlhasa. Van’hwanyana lava a va tilulamiselile, va nghene na yene a nkhubyini wa mutxhatu, kutani ku pfaliwa xipfalu. 11 Ntsrhaku ka leswo, van’hwanyana lavan’wana na vone va buya kutani va ku: ‘Nkulukumba, nkulukumba, hi pfuleli!’ 12 A va hlamula a ku: ‘Ni mi byela ntiyiso, a ni mi tivi.’

13 “Kutani tsrhamani na mi zrindzrile, hikusa a mi dzri tivi siku nambi nkama wa kone.

14 “A Mfumu wa matilo wu nga fanisiwa ni mhunu lweyi a djulaka ku yendzra a ya tikweni dzra le kule, lweyi na a nga si na famba a vitanaka vatizri vake a va siyela mintxhumu yake. 15 A nyika mun’we ntlhanu wa matalenta,* mun’wana a mu nyika mabidzri, kasi lweyi mun’wana a mu nyika dzrin’we. A nyike mun’wana ni mun’wana hi ku ya hi wuswikoti byake, a gama a yendzra. 16 Hi ku hantlisa, lweyi a yamukeliki ntlhanu wa matalenta a famba a ya hamba bindzru ha wone kutani a kuma man’wana ya ntlhanu. 17 Lweyi a kumiki mabidzri a yentxi hi lani ku fanaka kutani a kuma man’wana mabidzri. 18 Kambe mutizri lweyi a yamukeliki dzrin’we a fambe a ya kela xikhele a tlhota mali* ya n’winyi wake.

19 “Ntsrhaku ka nkama wa ku leha, n’winyi wa vatizri volavo a buya. Hiloko a djula ku tiva leswi va swi yentxiki hi mali yake. 20 Kutani lweyi a nyikiwiki ntlhanu wa matalenta a ye ka n’winyi wake na a tamele matalenta man’wana ya ntlhanu, a ku: ‘Nkulukumba, u ni siyele ntlhanu wa matalenta; vona, ni hambe bindzru ni kuma man’wana ya ntlhanu.’ 21 N’winyi wake a mu byela a ku: ‘U yentxe ha hombe, mutizri lwenene lweyi a dumbekaka! U dumbeki ka mintxhumu leyitsrongo. Ni ta ku nyika mintxhumu ya yinyingi akuva u yi hlayisa. Nyonxa ni n’winyi waku.’ 22 Ku landzrela lweyi a a nyikiwe matalenta mabidzri, a tlhasa a ku: ‘Nkulukumba, u ni siyele matalenta mabidzri; vona, ni hambe bindzru ni kuma matalenta man’wana mabidzri.’ 23 N’winyi wake a mu byela a ku: ‘U yentxe ha hombe, mutizri lwenene lweyi a dumbekaka! U dumbeki ka mintxhumu leyitsrongo. Ni ta ku nyika mintxhumu ya yinyingi akuva u yi hlayisa. Nyonxa ni n’winyi waku.’

24 “Hi wugamu mutizri lweyi a a nyikiwe talenta dzrin’we a tlhasa a ku: ‘Nkulukumba, ni ku tiva na u li mhunu lweyi a kazrataka; u tsrhovela lomu u kalaka u nga byalanga kone u tlhela u hlengeleta swakuda leswi u kalaka u nga swi tizrelanga. 25 Kutani hi ku txhava ni ye kelela talenta dzraku ni dzri tlhota. Hi ledzri, teka.’ 26 N’winyi wake a mu hlamula a ku: ‘Wene mutizri wa ku biha lweyi a nga ni wulolo, u li a wu swi tiva leswaku ni tsrhovela lomu ni kalaka ni nga byalanga kone, ni tlhela ni hlengeleta swakuda leswi ni kalaka ni nga swi tizrelanga? 27 Kutani, inaka u yi nyikele ka lava a va ta yi bindzrulisa,* akuva loko ni buya ni ta yi kuma na yi li yinyingi.

28 “‘Hi kola ka leswo, mu tekelani talenta dzroledzro mu nyika lweyi a nga ni 10 wa matalenta. 29 Hikusa lweyi a nga na swone a ta yengeseleliwa, kutani a ta va ni swinyingi. Kambe lweyi a kalaka a nga li na swone, nambi swa switsrongo leswi a nga na swone a ta tekeliwa swone. 30 Kutani mu txukumetelani handle a munyameni mutizri lweyi a nga pfuniki ntxhumu. Hala hi kone a taka dzrila a ketsrela ni matinyo.’

31 “Loko N’wana wa mhunu a ta a ku phatimeni kwake, na a ni tintsrumi hinkwatu, a ta tsrhama xiluvelweni xake lexi phatimaka. 32 A matiko hinkwawu ma ta hlengeletiwa mahlweni kwake, kutani a ta hambanisa vhanu, ku fana ni loko mubyisi a hambanisa tihamba xikazri ka timbuti. 33 A ta beka tihamba a vokweni dzrake dzra xinene, kambe timbuti ka ledzra ximatsri.

34 “Kutani Hosi yi ta byela lava nga xineneni xa yone yi ku: ‘Tanani n’wine lava tovokisiwiki hi Papayi wanga, yamukelani Mfumu lowu mi lulamiseliwiki wone ku sukela a ku tumbuluxiweni ka misava. 35 Hikusa ni ve ni ndlala kutani mi ni nyika swakuda; ni ve ni tozra kutani mi ni nyika mati. A mi nga ni tivi nakone a ni nga na mbangu wa ku tsrhama ka wone kambe mi ni yamukele hi malwandla; 36 a ni nga na swa ku yambala kutani mi ni nyike mpahla. Ni vabyile kutani mi ni hlayisa. A ni le djele, n’wine mi tile mi ta ni pfuxela.’ 37 Kutani lava ku lulama va ta mu hlamula va ku: ‘Hosi, hi ku vone siku muni na u ni ndlala kutani hi ku nyika swakuda, kumbe na u ni tozra kutani hi ku nyika mati? 38 I siku muni hi nga ku vona hi nga ku tivi nakone na u nga na mbangu wa ku tsrhama ka wone kutani hi ku yamukela hi malwandla, kumbe na u nga na swa ku yambala kutani hi ku nyika mpahla? 39 Hi ku vone siku muni na u vabya kumbe na u li djele kutani hi ku pfuxela?’ 40 A Hosi yi ta va hlamula yi ku: ‘Kunene na mi byela, leswi mi swi yentxeliki mun’we wa vamakwezru lavatsrongo, mi yentxele mine.’

41 “Kutani yi ta byela lava nga ximatsrini xa yone yi ku: ‘Sukani lani, n’wine lava yavanyisiwiki hi Xikwembu Nkulukumba, nghenani ndzrilweni lowu nga helikiki lowu lulamiseliwiki Diyavulosi ni tintsrumi take. 42 Hikusa ni twe ndlala, kambe a mi ni nyikanga ntxhumu akuva ni da; nakone ni twe tozra, kambe a mi ni nyikanga mati akuva ni nwa. 43 A mi nga ni tivi futsrhi a ni nga na ka ku tsrhama kone, kambe a mi ni kombanga malwandla; a ni nga na swa ku yambala, kambe a mi ni nyikanga mpahla; a ni vabya nakone ni ve djele, kambe a mi ni hlayisanga.’ 44 Kutani na vone va ta mu hlamula va ku: ‘Hosi, hi ku vone siku muni na u ni ndlala, na u ni tozra, kumbe na hi nga ku tivi futsrhi na u nga na ka ku tsrhama kone, kumbe na u nga na swa ku yambala, kumbe na u vabya, kumbe na u li djele kutani hi nga ku yentxeli ntxhumu?’ 45 A Hosi yi ta va hlamula yi ku: ‘Kunene na mi byela, leswi mi kalaka mi nga swi yentxelanga mun’we wa lavatsrongo, na mine a mi ni yentxelanga.’ 46 Lava va ta heliseliwa magamu, kambe lava ku lulama va ta kuma wutomi lebyi nga helikiki.”

26 Loko Yesu a heta ku hlaya mintxhumu leyi hinkwayu a byela vadondzrisiwa vake a ku: 2 “Ma swi tiva leswaku ke sala masiku mabidzri leswaku ku va ni Paxkwa, nakone N’wana wa mhunu a ta khomiwa leswaku a dlayiwa mhandzrini.”

3 Kutani vaprista lavakulu ni vakulukumba va tiko va hlengeletana mutini wa muprista lwenkulu lweyi a vitaniwaka Kayafasi, 4 va hamba maqhinga akuva va khoma Yesu leswaku va mu dlaya. 5 Kambe a va ku: “Hi nga mu khomeni hi nkama wa nkhuvu, akuva vhanu va nga pfuxi mpfilumpfilu.”

6 Loko Yesu a li Betaniya a kaya ka Simoni lweyi a a ni nhlokonho, 7 a tsrhindzrekeleliwe hi wansati lweyi a a ni xigadzrana xa alabaxta lexi a xi ni mafuzra ya ku nun’hwela ya ku dula, kutani a sugula ku mu txhela nhlokweni na a li ku deni.* 8 Loko vadondzrisiwa va vona leswo, va kazrateka kutani va byelana va ku: “Ha yini a tlanga hi mafuzra? 9 Hikusa a ma ta xavisiwa hi mali ya yinyingi kutani mali yoleyo yi nyikiwa swisiwana.” 10 Loko Yesu a tiva leswi a va vulavula ha swone, a va byela a ku: “Mi mu kazratela yini wansati lweyi? I swinene leswi a ni yentxeliki swone. 11 Hikusa a swisiwana mi tsrhama na swone nkama hinkwawu, kambe mine a mi nge ti va na mine nkama hinkwawu. 12 Loko wansati lweyi a txhele mizri wanga mafuzra lawa ya ku nun’hwela, a a wu lulamiselela ku lahliwa. 13 Kunene na mi byela, kun’wana ni kun’wana lomu madzrungula lamanene ma taka zrezriwa kone a misaveni hinkwayu, leswi wansati lweyi a swi yentxiki swi ta khaneliwa akuva a dzrimukiwa ha swone.”

14 Kutani mun’we wa lava 12, lweyi a vitaniwaka Yudasi Iskariyota, a ya ka vaprista lavakulu 15 a tlhasa a ku: “Mi ta ni nyika yini akuva ni mi pfuna ku mu khoma?” Va mu dumbisa 30 wa mamuweda ya prata. 16 Ku sukela ka siku ledzro, a a tsrhamela ku djuletela mukhandlu lowunene wa ku mu wonga.

17 Hi siku dzra ku sungula dzra Nkhuvu wa Mapawu lawa ma kalaka ma nga txheliwanga Fermentu,* a vadondzrisiwa va tsrhindzrekelela Yesu va mu vutisa va ku: “U djula hi ya ku lulamiselela kwini akuva u ta dela kone Paxkwa?” 18 A va byela a ku: “Fambani ka manyana a doropeni mi tlhasa mi mu byela mi ku: ‘Mudondzrisi a li: “Nkama wanga wa ku fa wu kusuhi; ni ta hamba Paxkwa ni vadondzrisiwa vanga a kaya kwaku.”’” 19 Xileswo, a vadondzrisiwa va ya yentxa hi lani Yesu a va leletiki ha kone kutani va lulamisela Paxkwa.

20 A madambyeni a a tsrhame menzeni ni vadondzrisiwa vake va 12. 21 Loko va li ku deni, a va byela a ku: “Kunene na mi byela, mun’we wenu a ta ni wonga.” 22 Loko va twa leswo va kazrateka ngopfu, kutani mun’wana ni mun’wana wavu a mu vutisa a ku: “Hosi, xana hi mine?” 23 A va hlamula a ku: “Lweyi hi petaka voko xikan’we ka tijela hi yene a taka ni wonga. 24 I ntiyiso leswaku a N’wana wa mhunu awa famba, hi lani swi tsraliwiki ha kone mayelanu na yene, kambe khombo ka lweyi a wongaka N’wana wa mhunu! A swi ta yampswa loko mhunu wa kone a a nga pswaliwanga.” 25 Yudasi, lweyi a a ta va yene muwongi, a vutisa a ku: “Xana hi mine Rabi?” Yesu a mu hlamula a ku: “Wene ha byaku u hlayile.”

26 Na va ha li ku deni, Yesu a teka pawu, loko a khongotile, a dzri khemelela a nyika vadondzrisiwa vake, a ku: “Tekani mi da. Pawu ledzri dzri yimela mizri wanga.” 27 A tlhela a teka kopo dzra vhinyu, a hamba xikhongoto xa ku tlangela a gama a va nyika, a ku: “Nwanani hi dzrone hinkwenu, 28 hikusa dzri yimela ‘ngati yanga ya xipfumelelanu’, leyi taka halatiwa akuva ku pfuneka vhanu vanyingi leswaku swidoho swavu swi dzrivaleliwa. 29 Kambe na mi byela, a ni nge he txhuki ni tlhela ni nwa vhinyu ledzri ku ya tlhasa sikwini ledzri ni taka nwa vhinyu ledzrimpshwa na n’wine a Mfun’wini wa Papayi.” 30 Hi wugamu, ntsrhaku ka loko va yimbelelile va dzrumisa* Xikwembu Nkulukumba, va suka va ya Nhaveni ya Minhlwazri.

31 Kutani Yesu a va byela a ku: “Hinkwenu a lipfumelo dzrenu dzri ta tsrekatsreka hi kola ka leswi taka ni yentxekela wusiku lebyi, hikusa ku tsraliwe leswi: ‘Ni ta ba mubyisi, kutani a tihamba ta ntlhambi wake ti ta hangalaka.’ 32 Kambe loko ni ta pfuxiwa ku feni ni ta ya a Galileya, mi ta ya ni kuma kone.” 33 Kambe Petro a mu hlamula a ku: “Nambiloko lipfumelo dzra hinkwavu dzri ngo tsrekatsreka hi kola ka leswi taka ku yentxekela, dzranga a dzri nge ti txhuka dzri tsrekatsreka!” 34 Yesu a mu hlamula a ku: “Kunene na ku byela, wusiku byolebyi, na nkuku wu nga si na yimba u ta ni landzrula kazrazru.” 35 Petro a mu hlamula a ku: “Nambiloko swi ngo djula ni fa na wene, a ni nge ti txhuka ni ku landzrula.” Vadondzrisiwa lavan’wana hinkwavu na vone va hlaya leswi fanaka.

36 Kutani Yesu a tlhasa na vone a mbangwini lowu vitaniwaka Getsemani, a byela vadondzrisiwa vake a ku: “Tsrhamani kola na ha ya lahaya ni ya khongota.” 37 A teka Petro ni vana vabidzri va Zebedewu a famba navu, kutani a sungula ku va ni gome a tlhela a kazrateka ngopfu swinene. 38 Kutani Yesu a va byela a ku: “Ni tlhaveke ngopfu swinene a mbilwini yanga* lakakuva nambi ku fa ni nga fa. Salani kola mi tama mi zrindzra na mine.” 39 Kutani a tsrhindzreka kulenyana na vone, a khinsama a lavisa hansi, a khongota a ku: “Papayi, loko swi koteka, a kopo ledzri a dzri fambeli kule na mine. Kambe, ku nga yentxeki ku zrandzra kwanga a ku yentxeki ku zrandzra kwaku.”

40 Yesu a tlhela ka vadondzrisiwa vake a va kuma na va khutsriyelile, a byela Petro a ku: “Mi hluleke ku tama mi zrindzra na mine nambi ko va wora dzrin’we? 41 Tsrhamani na mi zrindzrile, mi ya mahlweni mi khongota, akuva mi nga weli ndzringweni. Nakunene, a mbilu ya swi djula kambe a mizri a wu na ntamu.” 42 A tlhela a suka a ya khongota hi khambi dzra wubidzri a ku: “Papayi, loko swi nga koteki kuva a kopo ledzri dzri fambela kule na mine na ni nga nwanga, a ku yentxeki ku zrandzra kwaku.” 43 A tlhela a buya a va kuma na va khutsriyelile, hikusa a matihlo yavu a ma bindzriwa hi wuzrongo. 44 A tlhela a va siya a ya khongota hi khambi dzra wuzrazru, a hlaya mintxhumu yoleyi ya yin’we. 45 Kutani a tlhelela ka vadondzrisiwa vake a va byela leswi: “Mi le ku yetleleni mi wisa hi nkama wa ku fana ni lowu! Lavisani, a nkama wa kuva a N’wana wa mhunu a wongiwa a nyikeliwa a mavokweni ya vadohi wu le kusuhi. 46 Pfukani hi famba. Lweyi a ni wongaka a kola kusuhi.” 47 Na a ha vulavula, Yudasi, lweyi a a li mun’we wa lava va 12, a tlhasa na a ni xitsrhungu lexikulu lexi a xi ni swipada ni tinhonga, lexi a xi zrumeliwe hi vaprista lavakulu ni vakulukumba va tiko.

48 A muwongi wake a a va byele ndlela leyi a a ta va komba ha yone, a ku: “Lweyi ni taka mu n’qunta, hi yelweyo; mu khomani.” 49 A tekela ku kongoma Yesu a ku: “Xawani Rabi!” a gama a mu n’qunta. 50 Kambe Yesu a mu byela leswi: “Nakulozri, u teli yini lani?” Kutani va tsrhindzrekelela Yesu va mu khoma va famba na yene. 51 Kambe hi ku kahlula, mun’we wa lava a va na Yesu a humesa xipada xake a tsrema nandzra wa muprista lwenkulu, a mu susa ndleve. 52 Kutani Yesu a mu byela a ku: “Tlhelisa xipada mbangwini wa xone, hikusa hinkwavu lava lwaka ni van’wana hi xipada va ta dlayiwa hi xipada. 53 Kumbe u yanakanya leswaku a ni nge swi koti ku kombela Papayi akuva swoswi a ni zrumela makhandzra ya tintsrumi ya ku tlula 12 wa wone? 54 Kambe a ma ta hetisekisa kuyini Matsralwa lawa ma hlayaka leswaku swi fanela ku yentxeka hi ndlela leyi?” 55 Hi nkama wolowo Yesu a byela switsrhungu a ku: “Mi buya mi ta ni khoma na mi ni swipada ni tinhonga ingiki hi loko no va muyivi? Siku ni siku a ni tsrhama tempeleni ni dondzrisa, kambe a mi ni khomanga. 56 Kambe hinkwaswu leswi swi yentxeki akuva ku hetiseka leswi tsraliwiki* hi vaprofeta.” Kutani a vadondzrisiwa hinkwavu va mu siya va tsrutsruma.

57 Lava khomiki Yesu va famba na yene ka muprista lwenkulu Kayafasi, lani a vatsrali ni vakulukumba a va hlengeletani kone. 58 Kambe Petro a tama a mu landzra hi le kule, ku ya tlhasa mutini wa muprista lwenkulu. Loko a nghenile a ye tsrhama ni vatizri va muti wolowo akuva a vona leswi a swi ta humelela.

59 A vaprista lavakulu ni Sanedri hinkwadzru, a va djuletela wumboni bya madzrimi bya ku hehla Yesu akuva va mu dlaya. 60 Kambe nambileswi a ku humelela timboni tinyingi ta madzrimi, a va byi kumanga. Hi wugamu ku humelela timboni tin’wana tibidzri 61 ti ku: “Wanuna lweyi a te: ‘Ni nga swi kota ku gilhita tempele dzra Xikwembu Nkulukumba ni tlhela ni dzri yaka hi masiku mazrazru.’” 62 Loko a yingela leswo, a muprista lwenkulu a sekeleka a mu byela leswi: “A wu na xa ku xi hlaya? A wu swi twi leswi vavanuna lava va ku lumbetaka swone?” 63 Kambe Yesu a tama a miyela. Xileswo a muprista lwenkulu a mu byela a ku: “Hlambanya hi Xikwembu Nkulukumba lweyi a hanyaka u hi byela leswaku u Kriste, N’wana wa Xikwembu Nkulukumba!” 64 Yesu a mu byela a ku: “Wene ha byaku u hlayile. Kambe na mi byela: Ku sukela ka swoswi mi ta vona N’wana wa mhunu na a tsrhame a vokweni dzra xinene dzra Xikwembu Nkulukumba wa Ntamu Hinkwawu* na a ta hi le matlavini ya le tilweni.” 65 Kutani a muprista lwenkulu a handzrula mpahla yake a ku: “Wanuna lweyi a yeyisi Xikwembu Nkulukumba! Ha ha ti djulela yini timboni tin’wana? Vonani! Mi mu yingelile loko a yeyisa Xikwembu Nkulukumba. 66 Mi li yini hi yene?” Va hlamula va ku: “A faneliwa hi ku fa.” 67 Kutani va mu thukela mazri wusweni va tlhela va mu ba swibakela. Van’wana va mu yamasela timpama wusweni, 68 va ku: “Profeta wene Kriste, i mani a ku biki?”

69 Na Petro a tsrhame handle a mutini, mutizri mun’we wa xisati a mu tsrhindzrekelela a ku: “Na wene a wu na Yesu wa Mugalileya!” 70 Kambe a yala mahlweni ka vhanu hinkwavu a ku: “A ni swi tivi leswi u khanelaka hi swone.” 71 Loko a huma a ya nyangweni wa muti wolowo, wansati mun’wana a mu vona kutani a byela lava a va li ka mbangu wolowo a ku: “Wanuna lweyi a a na Yesu wa Munazareta.” 72 A tlhela a yala hi ku hlambanya a ku: “A ni mu tivi wanuna lweyi!” 73 Ntsrhakunyana ka leswo, lava a va li mbangwini wolowo va tsrhindzrekelela Petro va ku: “Nakunene na wene u mun’we wa vone, swi tikomba hi mavulavulela yaku.” 74 A sungula ku hlambanya* a tlhela a txhikitxha a ku: “A ni mu tivi wanuna lweyi!” Hi nkama wolowo a nkuku wu yimba. 75 Kutani Petro a dzrimuka leswi hlayiwiki hi Yesu loko a ku: “Na nkuku wu nga si na yimba, u ta ni landzrula kazrazru.” Xileswo, a huma handle a ya dzrila hi xiviti.

27 Loko byi xile, hinkwavu vaprista lavakulu ni vakulukumba va tiko va hlengeletana akuva va vonisana mayelanu na Yesu leswaku va ta mu dlaya. 2 Loko va mu tsrimbile, va mu teka va mu yisa ka Pilatu lweyi a a li govhernadori wa le Yudeya.

3 Loko Yudasi, lweyi a nga mu wonga, a vona leswaku Yesu a yavanyiseliwe lifu, a tisola a gama a tlhelisa 30 wa mamuweda ya prata ka vaprista lavakulu ni vakulukumba, 4 a ku: “Ni dohile hi ku wonga ngati ya mhunu lweyi a kalaka a nge na nandzru.” Va mu hlamula va ku: “Hine hi nghena kwini ka leswo? Swi tivana na wene leswo!” 5 Kutani a txukumeta mamuweda wolawo tempeleni a gama a huma a ya tisunga. 6 Kambe vaprista lavakulu va zrolela mamuweda wolawo va ku: “A hi swinene ku va mali leyi yi petiwa lomu ku hlengeletiwaka kone mali a tempeleni, hikusa yi yentxe leswaku ku dlayiwa mhunu.”* 7 Ntsrhaku ka loko va vonisanile, va teka mali yoleyo va ya xava mbangu lowu a va ta wu tizrisela ku lahla vhanu va matiko mambeni. 8 Hi kola ka leswo, a mbangu wolowo wu vitaniwa mbangu wa ngati ku ta tlhasa namunhla. 9 Hi ndlela yoleyo, ku hetiseka leswi hlayiwiki hi muprofeta Yeremiya loko a ku: “Va teke 30 wa mamuweda ya prata ku nga mali leyi a Vaisrayele van’wana a va xavisa ha yone mhunu, 10 va xava mbangu, hi lani Yehovha a ni byeliki ha kone.”

11 Yesu a yima mahlweni ka Pilatu, kutani Pilatu a mu vutisa a ku: “Xana u Hosi ya Vayuda?” Yesu a mu hlamula a ku: “Wene ha byaku u hlaya swone.” 12 Kambe loko vaprista lavakulu ni vakulukumba va mu lumbeta, Yesu a nga hlamulanga ntxhumu. 13 Xileswo Pilatu a ku: “Xana a wu swi twi hinkwaswu leswi va ku lumbetaka swone?” 14 Kambe a nga mu hlamulanga ntxhumu, nambi ko va zritu dzrin’we, lakakuva Pilatu a hlamala swinene.

15 Ka nkhuvu wun’wana ni wun’wana wa Paxkwa, a swi tolovelekile kuva govhernadori a ntsrhunxa xib’otxhwa lexi xitsrhungu a xi xi hlawula. 16 Hi nkama wolowo, a va khome Barabasi lweyi a a li xigevengu lexi tiviwaka ngopfu. 17 Kutani loko va hlengeletanile, Pilatu a va vutisa a ku: “Mi djula leswaku ni mi ntsrhunxela mani, Barabasi kumbe Yesu lweyi a vitaniwaka Kriste?” 18 Hikusa Pilatu a a swi tiva leswaku va mu nyikele hi mhaka ya leswi a va mu tsrhohoka. 19 Handle ka leswo, na a ha tsrhamile xitsrhan’wini xa wuyavanyisi, nsati wake a mu zrumelela zritu a ku: “U nga mu yentxi ntxhumu wanuna lweyo wa ku lulama, hikusa namunhla ni lozri mintxhumu ya ku txhavisa ngopfu hi mhaka yake.” 20 Kambe a vaprista lavakulu ni vakulukumba, va hlohlotela switsrhungu leswaku swi kombela leswaku ku ntsrhunxiwa Barabasi, kambe ku dlayiwa Yesu. 21 Kutani Pilatu a va vutisa a ku: “Hi wini ka lavabidzri mi djulaka leswaku ni mi ntsrhunxela yene?” Va ku: “Barabasi!” 22 Pilatu a ku: “Kutani ni mu yentxa yini Yesu lweyi a vitaniwaka Kriste?” Hinkwavu va ku: “A a hayekiwi mhandzrini!”* 23 A ku: “Ha yini? A yentxe yini xa ku biha?” Nambitanu, va ya mahlweni va bandlukana ngopfu swinene va ku: “A a hayekiwi mhandzrini!”

24 Loko Pilatu a vona leswaku a swi nga pfuni ntxhumu kambe a swo ya swi pfuxa mpfilumpfilu, a teka mati a hlamba mavoko na a voniwa hi xitsrhungu, a ku: “A ni na nandzru ka ngati ya mhunu lweyi. A nandzru wu ta va wenu.” 25 Loko va twa leswo, vhanu hinkwavu va hlamula va ku: “A ngati yake a yi ve henhla kwezru ni ka vana vezru.” 26 Kutani a va ntsrhunxela Barabasi kambe a zrumisa leswaku Yesu a pshwitiwa ni ku tlhela a dlayiwa a mhandzrini.

27 Kutani a masotxha ya Pilatu ma teka Yesu ma famba na yene kaya ka govhernadori,* ma tlhasa ma patsrana ni ntlawa hinkwawu wa masotxha ma mu tsrandzrela. 28 Ma mu susa mpahla yake ma mu tsrimba kapulana dzra ku pshwuka, 29 ma hamba hazri ya mitwa ma mu tlhanteka nhlokweni, ma mu tamelisa nhonga a vokweni dzrake dzra xinene. Ma mu khinsamela ma mu hamba xihlekiso, ma ku: “Hi loselile* Hosi ya Vayuda!” 30 Kutani ma mu thukela mazri, ma teka nhonga ma sungula ku mu ba a nhlokweni. 31 Loko ma gamile ku mu hamba xihlekiso, ma mu susa kapulana ma mu yambexa mpahla yake kutani ma famba na yene akuva a ya gongondzreliwa a mhandzrini.

32 Loko ma huma, ma kumana ni wanuna wa le Kirene lweyi a vitaniwaka Simoni. Ma mu sindzrisa ku zrwala mhandzri ya Yesu ya nxanisa.* 33 Loko ma tlhasile a mbangwini lowu vitaniwaka Golgota, leswi liki, Mbangu wa Pala, 34 ma mu nyika vhinyu ledzri txheliwiki mintxhumu ya ku bava ngopfu akuva a nwa; kambe loko a dzri dzringile a yala ku nwa. 35 Ntsrhaku ka loko ma mu gongondzrelile a mhandzrini, ma hamba wuhlolotwana akuva ma yavelana mpahla yake, 36 ma gama ma tsrhama kolanu ma mu zrindzra. 37 Ma tlhela ma tsrala mazritu lawa a va mu lumbeta ha wone a henhlanyana ka nhloko yake, lawa ma liki: “Lweyi i Yesu, Hosi ya Vayuda.”

38 Kutani ku gongondzreliwa swigevengu swibidzri a matlhelweni kwake, xin’we ka tlhelo dzra xinene xin’wana ka tlhelo dzra ximatsri. 39 Lava a va khaluta hi ndlela a va zruketela Yesu na va hlakahla tinhloko 40 va ku: “Wene a wu ku u ta gilhita tempele u tlhela u dzri yaka hi masiku mazrazru, tihuluxi ka! Loko u li n’wana wa Xikwembu Nkulukumba, xika a mhandzrini ya nxanisa!”* 41 Hi lani ku fanaka, a vaprista lavakulu ni vatsrali kun’we ni vakulukumba na vone va sungula ku mu poyilela va ku: 42 “Van’wana a va huluxile; kambe yene a nga swi koti ku tihuluxa! I Hosi ya Israyele; a a xiki swoswi a mhandzrini ya nxanisa,* kutani hi ta mu kholwa. 43 A dumbe Xikwembu Nkulukumba; loko a li leswaku Xikwembu Nkulukumba awa mu zrandzra, a a mu huluxi, hikusa yene a te: ‘Ni N’wana wa Xikwembu Nkulukumba.’” 44 Nambi swigevengu leswi a swi gongondzreliwe matlhelweni kwake a swi mu zruka.

45 Ku sukela kolomu ka ma 12* ku ve ni munyama a misaveni hinkwayu ku ya tlhasa kolomu ka ma 15 wora.* 46 Hi nkama wolowo wa ma 15 wora, Yesu a hlaye hi zritu dzra ku tlakuka a ku: “Eli, Eli, lama sabaktani?” leswi liki: “Xikwembu Nkulukumba wanga, Xikwembu Nkulukumba wanga, u ni tsrhikele yini?” 47 Loko va yingela leswo, van’we ka lava a va yime kolanu va ku: “Wanuna lweyi a vitana Eliya.” 48 Hi ku kahlula mun’we wa vone a tsrutsruma a ya teka xipontxhi a xi peta ka vhinyu dzra ku bava, a xi tlhoma ka nhonga a mu nyika akuva a nwa. 49 Kambe lavan’wana va ku: “Mu tsrhiki! Hi djula ku swi vona loko Eliya a ta buya a mu huluxa.” 50 Yesu a tlhela a bandlukana swinene a gama a fa.*

51 Hi nkama wolowo, a kortina ledzri nga tempeleni* dzri handzruka hi xikazri ku sukela henhla ku ya hansi, a misava yi tsrekatsreka ni mazribye lamakulu ma pandzrekela. 52 Kutani a masizra ma pfulekela, a mintsrumbu yinyingi ya vaxwengi yi humetela handle, 53 yi voniwa hi vhanu vanyingi (ntsrhaku ka loko Yesu a pfuxiwile, vhanu lava a va khaluta hi masizreni va nghene ka doropa dzra ku xwenga).* 54 Kambe loko muzrangeli wa masotxha ni lava a va li na yene ka ku zrindzra Yesu va vona ku tsrekatsreka ka misava ni mintxhumu leyi a yi yentxekela, va txhava ngopfu swinene va ku: “Hakunene lweyi a a li N’wana wa Xikwembu Nkulukumba.”

55 Nakone a ku ni vavasati vavanyingi lava a va yime hi kule va hlalela leswi a swi yentxeka; lava a va na Yesu ku sukela Galileya akuva va mu pfuna; 56 a xikazri ka vone a ku na Mariya Magadala, Mariya mamana wa Yakobe na Yose ni mamana wa vana va Zebedewu.

57 Loko dzri ya ku peleni, ku te wanuna wa le Arimateya lweyi a a ganyile, lweyi a vitaniwaka Yosefa, na yene a a ndzruluke mudondzrisiwa wa Yesu. 58 Wanuna lweyi a yeli Pilatu a ya kombela ntsrumbu wa Yesu. Kutani Pilatu a zruma masotxha akuva ma mu nyiketa wone. 59 Yosefa a teka ntsrumbu wolowo a wu tsrondzriyela hi panu ya ku basa ya lisima, 60 kutani a wu beka ka sizra dzrake ledzrimpshwa ledzri a a dzri kovotlile a zribyeni. Loko a pfale nyangwa wa dzrone hi zribye dzra dzrikulu, a suka a famba. 61 Kambe Mariya Magadala na Mariya lwemun’wana va sala kolanu na va tsrhamile mahlweni ka sizra.

62 Leswi swi yentxeki hi siku dzra ku lulamisela Savata, mundzruku ka kone vaprista lavakulu ni Vafarisi va ya hlengeletana ka Pilatu, 63 va ku: “Nkulukumba, hi dzrimuke leswaku mukanganyisi lweyi na a ha hanya a a ku: ‘Ntsrhaku ka masiku mazrazru ni ta pfuxiwa.’ 64 Xileswo, zrumela leswaku ku voneleliwa sizra ku ya tlhasa siku dzra wuzrazru, akuva vadondzrisiwa vake va nga yi va ya mu yiva va gama va byela vhanu va ku: ‘A pfuxiwile ku feni!’ Kutani madzrimi wolawo ya wugamu ma biha ngopfu ku tlula ya ku sungula.” 65 Pilatu a va byela a ku: “Hi lawa masotxha, fambani mi ya sizrelela sizra hi lani mi nga kotaka ha kone.” 66 Xileswo, va famba va ya lema zribye ledzri a dzri pfale sizra va tlhela va beka masotxha.

28 Ntsrhaku ka Savata, Mariya Magadala na Mariya lwemun’wana va fambe va ya vona sizra na byi ya ku xeni hi siku dzra ku sungula dzra vhiki.

2 Ku ve ni ku tsrekatsreka lokukulu ka misava, hikusa ntsrumi ya Yehovha a yi xikile hi le tilweni, yi tlhasa yi vumbuluta zribye ledzri a dzri pfale nyangwa wa sizra yi gama yi tsrhama henhla ka dzrone. 3 A yi phatima ku fana ni lihati nakone mpahla ya yone a yi base yi ku baa!* 4 Hi ku txhava, a vazrindzri va zruzrumela lakakuva va voneka ingiki hi loko ve fa.

5 Loko vavasati va tlhasa, ntsrumi yi va byela yi ku: “Mi nga txhavi, hikusa na swi tiva leswaku mi djuletela Yesu lweyi a dlayiwiki mhandzrini. 6 A nga kone lani, a pfuxiwile hi lani a a hlaye ha kone. Buyani mi ta vona mbangu lowu a a latiwe ka wone. 7 Mi gama mi famba hi ku kahlula mi ya byela vadondzrisiwa vake leswaku a pfuxiwile ku feni, nakone swoswi a li ndleleni ya ku ya a Galileya. Mi ta ya mu vona kohala. A ni buyela ku ta mi byela swoleswo.”

8 Xileswo, va suka hi ku kahlula a sizreni na va txhava kambe na va nyonxe ngopfu, va tsrutsruma va ya byela vadondzrisiwa vake. 9 Kutani, Yesu a yela vavasati volavo, a ku: “Byi xile!” Va mu tsrhindzrekelela, va mu khinsamela va mu khoma minkondzro. 10 Kutani Yesu a va byela a ku: “Mi nga txhavi! Fambani mi ya byela vamakwezru leswaku va ya Galileya, va ta ya ni vona kohala.”

11 Na va ha li ndleleni, van’we ka vazrindzri va ye doropeni va ya dzrungulela vaprista lavakulu hinkwaswu leswi yentxekiki. 12 Ntsrhaku ka loko va hlengeletanile ni vakulukumba akuva va bulisana hi mhaka leyi, va nyika masotxha mali ya yinyingi ya prata, 13 va ku: “Hlayani mi ku: ‘Vadondzrisiwa vake va buye va mu yiva a wusikwini na hi yetlelile.’ 14 Loko swi tlhasa tindleveni ta Pilatu, mi nga vileli hi ta mu tlhamuxela hine.”* 15 Kutani ma teka mali yoleyo ma ya yentxa hi lani va ma byeliki ha kone. A mhaka leyi yi hangalaka ka Vayuda ku ta tlhasa namunhla.

16 Nambitanu, vadondzrisiwa lava 11 va suka va ya Galileya a nhaveni leyi Yesu a a va byeli leswaku va ta tlhangana ka yone. 17 Loko va mu vona, va mu khinsamela kambe van’wana va ganaganeka leswaku hi yene. 18 Yesu a va tsrhindzrekelela a ku: “Ni nyikiwe wulawuli hinkwabyu a tilweni ni lani misaveni. 19 Kutani, fambani mi ya dondzrisa vhanu va matiko hinkwawu akuva va va vadondzrisiwa, mi va babatisa hi vito dzra Papayi ni dzra N’wana ni dzra moya wa ku xwenga, 20 mi va dondzrisa ku yentxa mintxhumu hinkwayu leyi ni mi byeliki yone. Nakone dzrimukani leswaku ni na n’wine ku ya tlhasa ku heleni ka xiyimu lexi xa misava.”*