MADZRUNGULA LAMANENE LAMA TSRALIWIKI HI MARKA

1 A madzrungula lamanene mayelanu na Yesu Kriste, N’wana wa Xikwembu Nkulukumba, ma sungulisa xileswi: 2 Hi lani muprofeta Ezaya a tsraliki ha kone, a ku: “(Lavisa! Ni zruma nandzra* wanga leswaku a zranga a ya ku lulamiselela ndlela.) 3 Ku ni lweyi a huwelelaka a mananga a ku: ‘Lulamiselani ndlela ya Yehovha! Basisani tindlela take.’” 4 Yohane Mubabatisi a a li mananga, a zrezrela vhanu leswaku va babatisiwa va kombisa leswaku va tisolile akuva va ta dzrivaleliwa swidoho swavu. 5 Vhanu hinkwavu va le Yudeya ni vayaki hinkwavu va le Yerusalema a va ya kwake, kutani a a va babatisa* a Nambyeni wa Yordani, va tihlaya swidoho swavu a mahlweni ka vhanu. 6 Yohane a a yambala mpahla leyi hambiwiki hi voya bya kamela, a tsrimba bandhi ledzri hambiwiki hi xikhumba nakone a a da mintete ni wulombe bya nhova. 7 Yene a a zrezra a ku: “Ku ni lweyi a taka ntsrhaku kwanga nakone a ni ntamu ku ni tlula, lweyi swi kalaka swi nga ni faneli ku kozrama ni tlhantlha tingoti ta masandaliya yake. 8 Mine ni mi babatise hi mati kambe yene a ta mi babatisa hi moya wa ku xwenga.”

9 A masikwini wolawo, Yesu a suke a Nazareta wa le Galileya a ya babatisiwa hi Yohane a Nambyeni wa Yordani. 10 Hi ku kahlula loko a huma matini, a vona matilo ma pfuleka ni moya wa ku xwenga wu xikela henhla kwake na wu fana ni tuva. 11 Ku gama ku twala zritu ledzri humaka hi le matilweni dzri ku: “U N’wananga lweyi a zrandzrekaka; ni ku yamukelile.”

12 Hi nkama wolowo, a moya wa Xikwembu Nkulukumba wu mu susumetela kuva a ya mananga. 13 Kutani a tsrhame 40 wa masiku a mananga, na a li kohala a dzringiwe hi Sathana. A a tsrhama ni swihazri swa nhova, kambe a tintsrumi a ti mu tiyisa.

14 Ntsrhaku ka loko Yohane a khomiwile, Yesu a ya Galileya a ya zrezra madzrungula lamanene ya Xikwembu Nkulukumba, 15 a ku: “Nkama lowu profetiwiki wu tlhasile, nakone a Mfumu wa Xikwembu Nkulukumba wu le kusuhi. Tisolani, mi va ni lipfumelo ka madzrungula lamanene.”

16 Na a famba tlhelweni ka Lwandle dzra Galileya, a vona Simoni ni makwavu Andreya na va peta minkukutu yavu a lwandle, hikusa a va li vaphasi va tihlampfi. 17 Kutani Yesu a va byela a ku: “Ni landzrani, ni ta mi yentxa vaphasi va vhanu.” 18 Va tekela ku tsrhika minkukutu yavu va mu landzra. 19 Loko a fambanyana kutsrongo, a vona Yakobe ni makwavu Yohane, lava a va li vana va Zebedewu, vone a va li botini dzravu na va lunghisa minkukutu yavu, 20 kutani a tekela ku va vitana. Xileswo, va siya papayi wavu Zebedewu a botini ni vatizri vake, va mu landzrela. 21 Kutani va ya Kapernawume.

Loko ku sungula Savata, Yesu a nghena a sinagogeni a sungula ku dondzrisa. 22 Vhanu a va hlamalisiwa hi madondzrisela yake, hikusa leswi a a swi dondzrisa a swi pfa ka Xikwembu Nkulukumba, a a nga dondzrisi ku fana ni vatsrali. 23 Hi nkama wolowo, a sinagogeni dzravu a ku ni wanuna lweyi a a ni demona, kutani a bandlukana a ku: 24 “Xana u djula yini kwezru, wene Yesu wa le Nazareta? Xana u teli ku ta hi helisa? Ni ku tiva ha hombe leswaku u mani, u Muxwengi wa Xikwembu Nkulukumba!” 25 Kambe Yesu a dzri kawuka a ku: “Miyela, u va u huma kwake!” 26 Kutani ntsrhaku ka loko demona dzri tlatlaleteli wanuna lweyo dzri va dzri bandlukana swinene, dzri huma kwake. 27 A vhanu hinkwavu va hlamala ngopfu swinene va sungula ku bulisana ha swone, va ku: “Ku yentxeka yini lani? I ndondzro leyimpshwa! A ni ntamu wa ku hlongola ni mademona, nakone ma mu yingiseta.” 28 Kutani a ndhuma yake yi hangalaka hi ku kahlula a mimbangwini hinkwayu ya muganga wa Galileya.

29 Loko va hume sinagogeni, Yesu, Yakobe na Yohane va ye kaya ka Simoni na Andreya. 30 Mamana wa nsati wa Simoni a a yetlelile hikusa a a ni dzedzedze, kutani va tekela ku byela Yesu mhaka leyo. 31 Yesu a mu tsrhindzrekelela, a mu khoma hi voko a mu pfuxa. Kutani a dzedzedze dzri nyamalala a va a sungula ku va swekela swakuda.

32 Loko dambu dzri pelile, vhanu va mu buyisela hinkwavu lava a va vabya, ni lava a va ni mademona; 33 nakone vhanu hinkwavu va doropa a va hlengeletanile a nyangweni. 34 Xileswo, a hanyisa vhanu vanyingi lava a va ni mavabyi ya ku hambanahambana, a tlhela a hlongola mademona manyingi, kambe a a nga ma pfumeleli kuva ma vulavula, hikusa a ma swi tiva leswaku hi yene Kriste.*

35 A mpundzrwini, na ke he mphum, a pfuka a huma handle, a ya mbangwini lowu zruliki, kutani a sungula ku khongota. 36 Kambe Simoni ni vadondzrisiwa lavan’wana, va famba va mu djuletela. 37 Loko va mu kumile, va mu byela leswi: “Hinkwavu va le ku ku djuleteleni.” 38 Kambe a va byela a ku: “A hi yeneni mbangwini wun’wana, ka madoropa lama kumekaka lani kusuhi, akuva na kone ni ya zrezra hikusa ni teli swoswo.” 39 Kutani a famba tikweni hinkwadzru dzra Galileya, a zrezra masinagogeni yavu a hlongola ni mademona.

40 Kutani a teliwa hi mhunu lweyi a a ni nhlokonho, a tlhasa a mu kombela na a khinsame hi matsrolo, a ku: “Loko u swi djula, u nga ni hanyisa.”* 41 Kutani Yesu hi ku susumetiwa hi ntwelawusiwana, a nalavuta voko a mu khumba a ku: “Na swi djula! Hanyisiwa.”* 42 Kolanu a nhlokonho yake yi nyamalala, kutani a hanya. 43 Na Yesu a nga si na byela mhunu yelweyo leswaku a famba, a mu leleta 44 a ku: “U nga byeli mhunu leswi yentxekiki, kambe famba u ya tikombekisa ka muprista kutani u nyikela nyiko leyi Moxe a hlayiki leswaku yi fanela ku humesiwa hi mhunu lweyi a hanyisiwiki mavabyi ya nhlokonho, leswaku a vaprista va ta tiyiseka leswaku u hanyisiwile.” 45 Kambe loko wanuna yelweyo a suka kolanu, a sungula ku byeletela vhanu mhaka leyi hinkwaku lomu a a ya kone, lakakuva Yesu a nga ha swi koti ku nghena doropeni na swi nga tiviwi hi mhunu, kambe a a tsrhama handle ka doropa lomu a ku nga na vhanu. Nambitanu, vhanu a va tama va mu yela na va pfa ka matlhelo hinkwawu.

2 Kambe ntsrhaku ka masikunyana a tlhelela Kapernawume, kutani vhanu va swi yingela leswaku a le kaya. 2 Ku ta vhanu va vanyingi va nghena ndlwini lakakuva ku nga ha vi na mbangu nambi nyangweni, kutani a sungula ku bulisana na vone hi zritu dzra Xikwembu Nkulukumba. 3 Va mu buyisela mhunu lweyi a womiki swizro na a tlakuliwe hi mune wa vhanu. 4 Kambe a va hluleka ku mu yisa lani Yesu a a li kone hi mhaka ya xitsrhungu; xileswo va gwavula swa ku fulela ha swone ka tlhelo ledzri Yesu a a li ka dzrone, loko va swi susile, va yehlisa lihlaka* ledzri mhunu lweyi a womiki swizro a a latiwe ka dzrone. 5 Loko Yesu a vona lipfumelo ledzri a va li na dzrone, a byela mhuna lweyi a womiki swizro a ku: “N’wananga a swidoho swaku swi dzrivaleliwile.” 6 Kutani van’we va vatsrali lava a va tsrhamile kolanu, va yanakanyisisa timbilwini tavu va ku: 7 “Ha yini wanuna lweyi a vulavula hi ndlela leyi? A yeyisa Xikwembu Nkulukumba. I mani lweyi a nga dzrivalelaka swidoho loko ku nga li Xikwembu Nkulukumba ntsena?” 8 Kambe Yesu a hantla a swi xiya leswi a va swi yanakanya timbilwini tavu, kutani a va byela a ku: “Ha yini mi yanakanya leswo timbilwini tenu? 9 I yini leswi nabyalaka, i ku byela mhunu lweyi wa ku woma swizro u ku: ‘Swidoho swaku swi dzrivaleliwile’ kumbe i ku mu byela u ku: ‘Sekeleka u teka lihlaka* dzraku u famba?’ 10 Kambe ni djula mi swi tiva leswaku a N’wana wa mhunu a nyikiwe ntamu wa ku dzrivalela swidoho a misaveni . . .”, kutani a byela wanuna lweyi a womiki swizro a ku: 11 “Na ku byela: Sekeleka, u teka lihlaka* dzraku u muka kaya.” 12 Hi ndlela yoleyo a sekeleka a tekela ku teka lihlaka* dzrake a famba na a voniwa hi vhanu hinkwavu. Kutani hinkwavu va hlamala, va sungula ku dzrumisa Xikwembu Nkulukumba, va ku: “A hi ngi sama hi swi vona swa ku fana ni leswi.”

13 Siku dzrin’wana, Yesu a tlhela a ya nkingeni wa lwandle, a xitsrhungu hinkwaxu a xi tama xi mu yela, kutani a sungula ku va dondzrisa. 14 Na a li ku fambeni, Yesu a vona Levhi n’wana wa Alifewu na a tsrhamile mbangwini lowu vhanu va hakelaka ka wone tinemba, kutani a mu byela a ku: “Vana mulandzreli wanga.” Kolanu a sekeleka a mu landzra. 15 Ntsrhakunyana, Yesu a a li ku deni* a kaya ka Levhi, nakone a vahakelisi vanyingi va tinemba ni vadohi a va da kun’we na yene ni vadondzrisiwa vake, hikusa vanyingi vavu a va sungule ku mu landzrela. 16 Kambe loko vatsrali ni Vafarisi va vona leswaku a a li ku deni kun’we ni vadohi ni vahakelisi va tinemba, va vutisa vadondzrisiwa vake va ku: “Ha yini mudondzrisi wenu a da ni vahakelisi va tinemba ni vadohi?” 17 Loko Yesu a twa leswo, a va byela leswi: “Vhanu lava kalaka va nga vabyi a va vileli dokodela, kambe lava vabyaka va mu vilela. Ni tele ku ta vitana vadohi, ku nga li vhanu lava lulamiki.”

18 A vadondzrisiwa va Yohane ni Vafarisi a va titsrona swakuda. Xileswo va mu tsrhindzrekelela va mu vutisa leswi: “Ha yini vadondzrisiwa va Yohane ni vadondzrisiwa va Vafarisi va titsrona swakuda kambe a vadondzrisiwa vaku va nga titsroni?” 19 Kutani Yesu a va byela a ku: “A vanghanu va muteki a va na xivangelo xa ku titsrona swakuda na muteki a ha li na vone, a hi swone ke? Loko muteki a ha li na vone a va nge titsroni swakuda. 20 Kambe ma ta masiku lawa a muteki a taka va a nga ha li na vone, kutani lanu ke hi kone va taka titsrona swakuda. 21 A nga kone lweyi a zrungelaka xiziva* xa nyiwana ka mpahla ya khale. Hikusa loko a ngo yentxa leswo, xiziva xa nyiwana xi ta yentxa leswaku leyi ya khale yi ya yi handzrukela. 22 Futsrhi a nga kone lweyi a txhelaka vhinyu ledzri dzra ha ka ku hambiwa ka tihotsro ta khale, hikusa loko a ngo yentxa leswo, a vhinyu dzri ta yentxa leswaku a tihotsro ti pandzreka kutani a luzekeliwa hi vhinyu ni tihotsro ta kone. Kambe a vhinyu ledzri dzra ha ka ku hambiwa dzri txheliwa ka tihotsro letimpshwa.”

23 Na a tsremakanya masimu ya trigu hi Savata, a vadondzrisiwa vake va sungula ku khayetela tinhleke ta trigu na va li ku fambeni. 24 Xileswo a Vafarisi va ku: “Lavisa! Ha yini vadondzrisiwa vaku va yentxa leswi nawu wu kalaka wu nga pfumeli kuva swi yentxiwa hi Savata?” 25 Kambe a va hlamula a ku: “Xana a mi ngi ngi sama mi dondzra leswi Davhida a swi yentxiki nkama lowu a nga heleliwa hi swakuda, loko yene ni vavanuna lava a va li na yene va twe ndlala? 26 Xana a mi dondzranga leswaku nkama lowu Abiyatari a a li muprista lwenkulu, Davhida a nghene ndlwini ya Xikwembu Nkulukumba a da mapawu* ya magandzrelo, lawa hi ku ya hi Nawu a ma fanela ku diwa ntsena hi vaprista, ni leswaku a teke man’we ya wone a nyika vavanuna lava a va li na yene?” 27 Kutani a va byela a ku: “A Savata dzri ve kone hi kola ka vhanu, a hi vhanu va viki kone hi kola ka Savata. 28 Xileswo, a N’wana wa mhunu i Hosi nambi ya Savata.”

3 A tlhela a nghena sinagogeni, kone a ku ni wanuna wa kukazri lweyi a a limale* voko. 2 Xileswo a va mu xondzrolota ku vona loko a ta hanyisa wanuna lweyo hi Savata, akuva va ta mu lumbeta ha swone. 3 Yesu a byela wanuna lweyi wa ku limala voko a ku: “Sekeleka u buya u yima lani makazri.” 4 Kutani a va vutisa a ku: “Xana swa pfumeleliwa ku yentxa leswinene kumbe swa ku biha, ku huluxa wutomi kumbe ku dlaya hi Savata?” Kambe va miyela va nga mu hlamuli. 5 Ntsrhaku ka loko a va lavisile na a hlundzrukile ni ku kazrateka swinene hi leswi a timbilu tavu a ti tlanyalile, a byela wanuna yelweyo a ku: “Nalavuta voko dzraku.” A dzri nalavuta, kutani dzri wololoka. 6 Xileswo a Vafarisi va huma va tekela ku ya tlhangana ni ntlawa wa valandzreli va Heroda, va kunguhata ku mu dlaya.

7 Kambe Yesu a suka ni vadondzrisiwa vake va ya nkingeni wa lwandle, kutani a landzriwa hi xitsrhungu lexikulu xa vhanu lava humaka Galileya ni le Yudeya. 8 A yeliwe ni hi xitsrhungu lexikulu xa vhanu lava humaka Yerusalema, Idumeya, a wuxeni bya Yordani ni va le kusuhi ni Tiri ni Sidoni, loko va yingele hi ta mintizro ya yinyingi leyi a a yi yentxa. 9 Kutani Yesu a byela vadondzrisiwa vake leswaku va mu djulela xibotana akuva a xitsrhungu xi nga mu kamanyeti. 10 Leswi a a daha vhanu vavanyingi, hinkwavu lava a va ni mavabyi ya ku txhavisa a va ya tala lomu a a li kone akuva va mu khumba. 11 Nambi mademona loko ma mu vona, a ma wela hansi mahlweni kwake ma bandlukana ma ku: “Wene u N’wana wa Xikwembu Nkulukumba.” 12 Kambe minkama yinyingi Yesu a a ma kawuka akuva ma nga hlayi leswaku hi yene mani.

13 Loko Yesu a tlhantukele nhaveni, a vitane van’we ka vadondzrisiwa vake, kutani va mu landzra. 14 Kutani a vumba ntlawa wa* 12 wa vavanuna, lava a patsriki ni ku va vitana vapostola, lava a va ta fambafamba na yene nakone a a ta va zruma leswaku va famba va zrezra. 15 A tlhela a va nyika ntamu wa kuva va kota ku hlongola mademona.

16 Ka lava va 12 a va langiki, a ku na Simoni lweyi a nga mu txhula leswaku i Petro, 17 Yakobe na Yohane vana va Zebedewu (lava Yesu a nga va txhula leswaku Bowanergesi, leswi tlhamuxelaka leswaku: “Vana lava fanaka ni ku dzrindzra ka tilo”), 18 Andreya, Filipi, Bartolomewu, Matewu, Tomasi, Yakobe n’wana wa Alifewu, Tadewu, Simoni lweyi wa Mukanana,* 19 na Yudasi Iskariyota, lweyi a gamiki a mu wonga.

Kutani Yesu a nghena ka yindlu ya kukazri, 20 ku tlhela ku ta xitsrhungu lakakuva Yesu ni vadondzrisiwa vake va pfumala ni nkama wa ku da. 21 Kambe loko maxaka yake ma yingela mhaka leyi, ma mu yela akuva ma ya mu khoma, hikusa a ma ku: “Awa hlanya.” 22 Ni vatsrali lava a va pfa Yerusalema a va ku: “A kongomisiwa hi Belzebule,* nakone a hlongola mademona hi ntamu wa mufumi wa mademona.” 23 Kutani a va vitana a vulavula na vone hi ku tizrisa swifaniso a ku: “Xana Sathana a nga mu hlongolisa kuyini Sathana? 24 Loko mfumu wu yavanile, mfumu wolowo wu ta hohloka; 25 nakone loko muti wu yavanile, muti wolowo a wu nge tiyi. 26 Loko Sathana a tihlongolela mademona yake, a mfumu wake a wu nge tiyi, wu ta hohloka. 27 Nakunene, a nga kone lweyi a nga kotaka ku nghena kaya ka wanuna wa ntamu a yiva mintxhumu yake na a nga zranganga hi ku mu tsrimbelela. A ngo kota ku teka mintxhumu yake loko ntsena a zrange hi ku mu tsrimbelela. 28 Kunene na mi byela leswaku vhanu va ta dzrivaleliwa hinkwaswu leswi va swi yentxaka, swi nga li na mhaka leswaku i swidoho muni leswi va swi yentxaka kumbe mavulavulela yavu ya nhlambha. 29 Kambe lweyi a zrukaka moya wa ku xwenga a nge txhuki a dzrivaleliwa kambe a ta va ni nandzru hi lani ku nga helikiki.” 30 Yesu a hlaye leswo hikusa a va ku: “A ni demona.”*

31 Kutani mamana wake ni vamakwavu va tlhasa va yima handle, va zruma mhunu leswaku a ya mu vitana. 32 Leswi a ku ni xitsrhungu lexi a xi tsrhamile xi mu tsrandzrela, va mu byele va ku: “Mamana waku ni vamakwenu va hala handle va ku djula.” 33 Kambe Yesu a va hlamula a ku: “Mamana wanga ni vamakwezru i vamani?” 34 Kutani a lavisa lava a va tsrhamile va mu tsrandzrela a ku: “Mamana wanga ni vamakwezru hi lava! 35 Mun’wana ni mun’wana lweyi a yentxaka ku zrandzra ka Xikwembu Nkulukumba, lweyo hi yene a nga makwezru ni mamana wanga.”

4 A tlhela a ya dondzrisa kusuhi ni lwandle, kutani xitsrhungu lexikulu ngopfu swinene xi hlengeletana kusuhi na yene. Xileswo, a nghena botini a tsrhama, kutani dzri wetiwa dzri nghenanyana matini, kambe a xitsrhungu hinkwaxu a xi yime nkingeni wa lwandle. 2 A sungula ku va dondzrisa mintxhumu ya yinyingi hi ku tizrisa swifaniso, loko a li ku va dondzriseni, a va byela leswi: 3 “Yingisetani. A mudzrimi a sukile a ya xuvela mbewu. 4 Loko a li ku xuveleni, timbewu ta kukazri ti wele tlhelweni ka ndlela, kutani ti diwa hi tinyanyana. 5 Tin’wana ti wele mazribyeni lani a ku nga na misava ya yinyingi, kutani ti kahlula ku mila hi leswi a misava a yi nga yentanga. 6 Kambe loko dambu dzri tlhava, ti pshwa ti tlhela ti woma hi leswi a ti pfumala timitsru. 7 Timbewu tin’wana ti wele xikazri ka mitwa, kutani a mitwa yi kula yi ti kamanyeta ti va ti nga beki mihandzru. 8 Kambe tin’wana ti ye wela a misaveni leyinene kutani ti mila ti tlhela ti kula, ti sungula ku beka mihandzru, yin’we hi lani ku phindhiwiki ka 30, yin’wana ka 60, kasi yin’wanyana ka 100.” 9 Yesu a tlhela a ku: “Lweyi a nga ni tindleve ta ku yingela, a a yingiseti.”

10 Loko xitsrhungu xi fambile, van’we ka vadondzrisiwa vake kun’we ni lava 12 va sungula ku mu vutisa mayelanu ni swifaniso. 11 A va byela a ku: “N’wine mi nyikiwe ku twisisa xihundla xa ku xwenga xa Mfumu wa Xikwembu Nkulukumba, kambe vone mintxhumu hinkwayu ni va dondzrisa hi ku tizrisa swifaniso, 12 akuva nambiloko va lavisa, va lavisa kambe va nga voni ntxhumu, nambiloko va swi twa, va swi twa kambe va nga wu twisisi mongo wa swone, akuva nambi ku ndzruluka va nga ndzruluki leswaku va dzrivaleliwa.” 13 A tlhela a va byela a ku: “Loko mi nga xi twisisi xifaniso lexi, xana mi ta swi twisisisa kuyini swifaniso leswin’wana hinkwaswu?

14 “A mudzrimi a xuvela zritu. 15 A timbewu leti ti weliki tlhelweni ka ndlela ku nga lomu zritu dzri byaliwiki kone, hi lava loko va ha ku yingela zritu, Sathana a taka kutani a teka zritu ledzri dzri byaliwiki ka vone. 16 Hi ndlela leyi fanaka, leti ti weliki misaveni leyi nga ni mazribye, hi lava loko va ha ku yingela zritu, va dzri yamukelaka hi ku nyonxa. 17 Nambitanu a va na timitsru, kambe va khomelela swa nkamanyana; kutani loko va kumana ni mindzringo kumbe ku xanisiwa hi kola ka zritu, va tekela ku tsrhika. 18 Ku ni tin’wana leti ti weliki xikazri ka mitwa. Leto hi lava va yingeliki zritu, 19 kambe a ku vilela hi mintxhumu ya misava leyi* ni wukosi lebyi kanganyisaka ni ku navela kun’wana ka ku hambanahambana swi kamanyeta zritu, kutani dzri nga pswali mihandzru. 20 Hi wugamu, leti ti weliki misaveni leyinene, hi lava yingelaka zritu kutani va dzri yamukela ha hombe va beka mihandzru hi lani ku phindhiwiki ka 30, ka 60 ni ka 100.”

21 A tlhela a va byela a ku: “A motsre a wu tlhavikiwi akuva wu tlhotiwa kumbe wu bekiwa hansi ka mubede, a hi swone ke? Kambe wu tlhavikiwa wu tlhantekiwa henhla ka menza. 22 A ku na ntxhumu lowu tumbetiwiki lowu taka kala wu nga paluxiwi; nakone a ku na ntxhumu lowu fihliwiki ha hombe lowu taka kala wu nga humesiwi a livaleni. 23 Lweyi a nga ni tindleve ta ku yingela, a a yingiseti.”

24 Yesu a tlhela a va byela a ku: “Swi yingisetani ha hombe leswi ni mi byelaka swone. A mpimu lowu mi pimaka van’wana ha wone, na n’wine mi ta pimiwa ha wone, futsrhi mi ta yengeseleliwa hi lani ku tlulisaka. 25 Hikusa lweyi a nga na swone a ta yengeseleliwa swimbeni, kambe lweyi a kalaka a nga li na swone a ta tekeliwa nambi leswi a nga na swone.”

26 A ya mahlweni a ku: “A Mfumu wa Xikwembu Nkulukumba wu nga fanisiwa ni mhunu lweyi a hlwanyaka mbewu a misaveni. 27 A yetlela wusikwini a pfuka mixweni a kuma leswaku a timbewu ti milile ti tlhela ti kula, kambe a nga swi tivi leswaku swi yentxekise kuyini. 28 A misava yi kulisa mbewu hi kutsrongokutsrongo, yi sungula hi ku humesa khava, ku landzrela moko, hi wugamu a moko wu beka tinhleke. 29 Kambe loko tinhleke ti wupfile, awa ti tsrhovela, hikusa nkama wa ntsrhovelo wu tlhasile.”

30 A tlhela a ku: “Hi nga wu fanisa ni yini Mfumu wa Xikwembu Nkulukumba, kumbe hi xini xifaniso lexi hi nga wu tlhamuxelaka ha xone? 31 Wu fana ni mbewu ya sinapi, leyi byaliwaka na yi li yone ya yitsrongo ya kone ku tlula timbewu hinkwatu a misaveni. 32 Kambe loko yi milile, yi kula yi tlula swimila hinkwaswu leswi diwaka yi humesa mazrwavi ya makulu, lakakuva tinyanyana ti kuma mbangu wa ku wisa a ntsrhutini wa wone.”

33 Hi ku tizrisa swifaniso swinyingi swa muxaka lowo, a a va byela zritu hi ku ya hi wuswikoti byavu bya ku twisisa. 34 Nakunene, a ku na ntxhumu lexi a a va byela xone na a nga tizrisi xifaniso, kambe a vadondzrisiwa vake a a va tlhamuxela mintxhumu hinkwayu na va li wuswavu.

35 Hi siku dzroledzro, ni madambu, a va byela a ku: “A hi tluleleni hi ya ka tlhelo ledzrin’wana dzra lwandle.” 36 Kutani ntsrhaku ka loko va lelelani ni xitsrhungu, leswi kutani a a li botini, va fambe na yene, nakone a ku ni maboti man’wana lawa a ma longoloka na vone. 37 Kutani ku sungula xidzedze lexikulu, a mavimbi ma betetela boti lakakuva dzri va kusuhi ni ku mbombomela. 38 Kambe Yesu a a li nkileni wa boti,* na a yetlelile a khigetela xidamu.* Kutani va mu pfuxa va mu byela va ku: “Mudondzrisi, xana a wu swi voni leswaku ha fa?” 39 Hiloko a pfuka a kawuka moya kutani a byela lwandle a ku: “Miyela u ku hwiii!” A moya wu yima, ku va ni ku zrula lokukulu. 40 Kutani a va byela a ku: “Ha yini mi txhava ngopfu? Xana a mi si va ni lipfumelo?” 41 Kambe va sungula ku txhava ngopfu swinene, va byelana hi xivone va ku: “Kasi i mhunu muni lweyi? Wa ku nambi moya ni lwandle swa mu yingiseta.”

5 Kutani va tlhasa ka tlhelo ledzrin’wana dzra lwandle a mugangeni wa Vagerasa. 2 Loko Yesu a huma botini, a teliwa hi wanuna wa kukazri lweyi a a ni demona lweyi a a pfa masizreni. 3 Wanuna lweyo a a tsrhama a masizreni, nakone ku ta tlhasa nkama wolowo a ku nga na mhunu lweyi a a kota ku mu tsrimba swi tiya, nambi ku li hi matxhini. 4 A va talisa ku mu tsrimba hi tinghomondho ni hi matxhini, kambe a a swi phinya, nakone a ku nga na mhunu lweyi a a kota ku mu khoma swi tiya. 5 Wusiku ni nhlikanhi, a a tsrhamela ku bandlukana a masizreni ni le tinhaveni a tlhela a titsremelela hi mazribye. 6 Kambe loko a vona Yesu na a ha li kule, a tsrutsruma a tlhasa a mu khinsamela. 7 Kutani a bandlukana a ku: “U djula yini kwanga wene Yesu, N’wana wa Xikwembu Nkulukumba Lweyi a Tlakukiki Ngopfu? Funga hi Xikwembu Nkulukumba leswaku a wu nge ti ni xanisa.” 8 Hikusa Yesu a a dzri byeli a ku: “Demona ndzriwene, huma ka mhunu lweyi.” 9 Kambe Yesu a mu vutisa a ku: “Hi wene mani vito dzraku?” A mu hlamula a ku: “Hi mine butsrhu, hikusa hi vanyingi.” 10 Kutani a kombela Yesu hi ku phindhaphindha leswaku a nga ma hlongoli mugangeni luwani.

11 A ku ni ntlhambi wa wukulu wa tinguluve leti a ti li ku deni a nhaveni. 12 Xileswo, mademona ma mu kombela ma ku: “Hi zrumeli tinguluveni, akuva hi nghena ka tone.” 13 Kutani a ma pfumelela. Hiloko mademona ma huma ma ya nghena ka tinguluve, ntlhambi hinkwawu wu tsrutsruma wu ya pela lwandle, kolomu ka 2.000 wa tinguluve ti mbombomela a lwandle. 14 Kambe a vabyisi va tone va tsrutsruma va ya byela vhanu lava tsrhamaka doropeni ni lava a va tsrhama kusuhi ni doropa dzroledzro, kutani vhanu va ta va ta vona leswi yentxekiki. 15 Loko va tlhasa lomu Yesu a a li kone, va vona wanuna lweyi a a ngheniwe hi butsrhu dzra mademona, na a tsrhamile, a yambale mpahla nakone na a hanyisiwile a miyanakanywini, kutani va sungula ku txhava ngopfu swinene. 16 Lava va swi voniki va va dzrungulela leswi yentxekisiki xiswone ka wanuna lweyi a a ni mademona ni leswi yentxekisiki xiswone ka tinguluve. 17 Kutani va sungula ku kombela Yesu leswaku a suka mugangeni wavu.

18 Kutani loko a khweli boti, wanuna lweyi a a ni demona a kombela ku famba na yene. 19 Nambitanu, a nga mu pfumelelanga kambe a mu byeli leswi: “Muka kaya kwaku a maxakeni yaku, u ya va byela hinkwaswu leswi Yehovha a ku yentxeliki swone ni timpswalu leti a ku kombisiki tone.” 20 Wanuna lweyo a suka a famba, a sungula ku byeletela vhanu a Dekapolosi* mintxhumu hinkwayu leyi Yesu a mu yentxeliki yone, kutani vhanu hinkwavu va hlamala.

21 Ntsrhaku ka loko Yesu a tlheli a tlulela lwandle hi boti a ya ka tlhelo dzrin’wana, a xitsrhungu lexikulu xi hlengeletana kwake, na yene a ha li nkingeni wa lwandle. 22 Ku ta mun’we wa vazrangeli va sinagoga, lweyi a vitaniwaka Yayiro, kutani loko a vona Yesu, a khinsama a minkondzrweni yake. 23 A mu kombela hi ku phindhaphindha a ku: “Xin’hwanyatana xanga xi vabya ngopfu swinene.* Ni kombela u ta, u ta xi tlhanteka mavoko akuva xi hanya.” 24 Kutani Yesu a famba na yene, nakone a xitsrhungu lexikulu a xi mu landzra na xi mu kamanyetela.

25 A ku ni wansati lweyi a a ni 12 wa malembe na a hluphiwa hi mavabyi ya ku humetela ngati. 26 A a xaniseki ngopfu a mavokweni ya vadokodela vanyingi a tlhela a heta mali yake hinkwayu, kambe a swi sizanga ntxhumu, a matsrhan’wini ya leswo a mavabyi me ya ma kula. 27 Loko a twa hi ta Yesu, wansati lweyo a mu yela, a nyanimela hi le ntsrhaku makazri ka xitsrhungu a khumba mpahla yake, 28 hikusa a a tsrhamela ku hlaya leswi: “Loko ntsena no khumba mpahla yake, ni ta hanya.” 29 Hi nkama wolowo a ngati yake yi yima ku humetela, kutani a swi twa a mizrini leswaku a hanyisiwile ka mavabyi ya ku txhavisa lawa a a li na wone.

30 Yesu a tekela ku swi xiya leswaku ku hume ntamu kwake, kutani a ndzruluka a vutisa xitsrhungu a ku: “I mani lweyi a khumbiki mpahla yanga?” 31 Kambe a vadondzrisiwa vake va mu byela leswi: “Wa swi vona leswaku a xitsrhungu xa ku kamanyetela, kutani ha yini u vutisa leswaku: ‘I mani lweyi a ni khumbiki?’” 32 Nambitanu, a a zralazrala a djula ku vona leswaku i mani lweyi a mu khumbiki. 33 Hi ku tiva leswi nga mu yentxekela, wansati lweyo a txhava a tlhela a zruzrumela, a mu yela a tlhasa a khinsama mahlweni kwake a mu byela ntiyiso hinkwawu. 34 Yesu a mu byela a ku: “N’wananga, a lipfumelo dzraku dzri ku hanyisile. Famba hi ku zrula, nakone u hanya ka mavabyi yaku ya ku txhavisa.”

35 Na a ha vulavula, vavanuna va kukazri lava a va huma a mutini wa muzrangeli wa sinagoga va tlhasa va ku: “A xin’hwanyatana xaku xi file! Wa ha mu kazratela yini Mudondzrisi?” 36 Kambe Yesu a yingela mazritu yavu, kutani a byela muzrangeli wa sinagoga a ku: “U nga txhavi,* ntsena kombisa lipfumelo.” 37 A nga pfumelelanga mhunu mun’wana leswaku a mu landzra handle ka Petro, Yakobe na Yohane makwavu wa Yakobe.

38 Loko va tlhasa kaya ka muzrangeli wa sinagoga, a vona mpfilumpfilu ya lava a va li ku dzrileni ni ku ba nkosi. 39 Loko a nghena ndlwini, a va byela a ku: “Ha yini mi dzrila ni ku pfuxa mpfilumpfilu? A n’wana lweyi a nga fanga kambe e yetlela.” 40 Loko va twa leswo, va sungula ku mu hleka. Kambe ntsrhaku ka loko a humesi hinkwavu a handle, a teka papayi wa n’wana ni mamana wa kone kun’we ni lava a va li na yene, kutani a nghena na vone lani n’wana a a li kone. 41 Kutani a khoma voko dzra n’wana, a mu byela a ku: “Thalitha kumi”, leswi loko swi ndzruluteliwa swi liki: “Xin’hwanyatana, na ku byela, pfuka!” 42 A xin’hwanyatana xi tekela ku sekeleka xi sungula ku fambafamba. (A xi ni 12 wa malembe.) Kutani a vapswele va xone a va nga ha tikoti hi ku nyonxa. 43 Kambe a va byela hi ku phindhaphindha leswaku va nga byeli mhunu leswi yentxekiki, a tlhela a va byela leswaku va xi nyika swakuda.

6 Kutani a suka kolanu a ya mugangeni lowu a kuleliki ka wone, a vadondzrisiwa vake va famba na yene. 2 Hi siku dzra Savata, a sungula ku dondzrisa a sinagogeni, kutani vanyingi ka lava a va mu yingela va hlamala va ku: “Xana mhunu lweyi a swi dondzre kwini leswi? Nakone ha yini a nyikiwe wutlhazri lebyi ni ntamu wa ku yentxa mahlolana lawa? 3 Xana lweyi a hi yene lweyi wa muvatli, n’wana wa Mariya, nakone vamakwavu a hi Yakobe, Yosefa, Yuda na Simoni? Ni vamakwavu va xisati a hi vone lava nga na hine lani?” Kutani va sungula ku nyenyentseka hi leswi a a swi hlaya ni ku swi yentxa. 4 Kambe Yesu a va byela a ku: “A muprofeta awa bekeliwa xitxhavu kun’wana ni kun’wana lomu a yaka kone kambe lomu a kuleliki kone, ka maxaka yake ni le kaya kwake a nga bekeliwi.” 5 Hi mhaka ya leswo, a nga yentxanga mahlolana manyingi ka mbangu lowo, e hanyisa vhanu va nga li vangani lava a va vabya hi ku va tlhanteka mavoko. 6 Nakunene, a hlamala hi ku vona leswaku a va nga na lipfumelo. Kutani a famba a zrendzrelekela hi swidoropana a dondzrisa.

7 A hlengeleta vadondzrisiwa vake lava 12 a sungula ku va zruma na va li vabidzrivabidzri, a va nyika ntamu wa ku hlongola mademona. 8 A tlhela a va byela leswaku va nga fambi ni ntxhumu, nambi ku li pawu, minkwama ya manghunghu,* kumbe mali* a swipatxhini swavu kambe va teka nhonga ntsena, 9 ni leswaku va yambala masandaliya kambe va nga teki mpahla ya ku txintxa hi yone. 10 A gama a va byela a ku: “Muti wun’wana ni wun’wana lowu mi taka nghena ka wone, tsrhamani ka wone ku ya tlhasa loko mi huma ka doropa dzroledzro. 11 Nakone kun’wana ni kun’wana lomu va taka kala va nga mi yamukeli kumbe ku mi yingiseta, loko mi huma, mphumunani ntsrhuzri a minkondzrweni yenu leswaku swi ta va wumboni kwavu.” 12 Kutani va famba va ya zrezra, va byela vhanu leswaku va fanela ku tisola, 13 va tlhela va hlongola mademona manyingi, va tota mafuzra vhanu vanyingi lava a va vabya va va va va hanyisa.

14 Kutani Hosi Heroda a twa mhaka leyi, hikusa a vito dzra Yesu a dzri hangalaki ngopfu, nakone vhanu a va ku: “Yohane Mubabatisi a pfuxiwile ku feni, hi leswo swi yentxaka a kota ku yentxa mahlolana lawa.” 15 Kambe van’wana a va ku: “I Eliya.” Kasi van’wana a va ku: “I muprofeta ku fana ni mun’wana wa vaprofeta va khale.” 16 Kambe loko Heroda a yingela leswo, a ku: “I Yohane lweyi ni nga mu tsrema nhloko, a pfuxiwile ku feni.” 17 Phela Heroda a a zrume vhanu leswaku va ya khoma Yohane va mu tsrimba va mu pfalela djele hi mhaka ya Herodiya nsati wa makwavu Filipi, hi leswi Heroda a a txhate na yene. 18 Hikusa Yohane a a tsrhamela ku byela Heroda a ku: “A swi pfumeleliwi kuva u teka nsati wa makwenu.” 19 Hi mhaka ya leswo, Herodiya a a mu bedjelile nakone a a djula ku mu dlaya, kambe a a nga na ndlela ya ku mu dlaya. 20 Hikusa Heroda a a txhava Yohane hi ku tiva leswaku a a li wanuna wa ku lulama, lweyi a gandzrelaka Xikwembu Nkulukumba, kutani a a mu sizrelela. Loko a mu yingela a a dludleka miyanakanyu lakakuva a nga xi tivi ni xa ku xi yentxa, nambitanu a a tama a mu yingela na a nyonxile.

21 Kambe siku dzrin’wana Herodiya a kume mukhandlu lowunene loko Heroda a hambe nkhuvu hi leswi a a tlhanganisa malembe, a hambela vatizri vake lavakulu, vazrangeli va yimpi ni vavanuna lava a va ni ndhuma ngopfu swinene a Galileya. 22 A n’wana wa Herodiya a tlhase a kina kutani a nyonxisa Heroda ni lava a va li ku deni na yene.* Hiloko hosi yi byela n’hwanyana yi ku: “Kombela xin’wana ni xin’wana lexi u xi djulaka, ni ta ku nyika.” 23 Ina, a mu hlambanyela a ku: “Xin’wana ni xin’wana lexi u taka ni kombela xone, nambi ko va hamfu ya mfumu wanga, ni ta ku nyika.” 24 Kutani n’hwanyana a suka a ya vutisa mamana wake a ku: “Ni kombela yini?” Yene a hlamula a ku: “Kombela nhloko ya Yohane Mubabatisi.” 25 Hi ku kahlula n’hwanyana a ya vulavula ni hosi a hamba xikombelo a ku: “Ni djula leswaku u ni nyika nhloko ya Yohane Mubabatisi hi xihantla na yi li ka bandetxha.” 26 Nambileswi mhaka leyi yi yentxiki leswaku hosi yi tlhaveka ngopfu swinene, a yi nga djuli ku yala xikombelo xa n’hwanyana, hi mhaka ya leswi yi hlambanyiki ni hi mhaka ya vazrambiwa.* 27 Kutani a hosi yi tekela ku zruma muzrindzri yi mu byela leswaku a buyisa nhloko ya Yohane. Xileswo, a ya djele a ya mu tsrema nhloko 28 kutani a yi buyisa na yi li ka bandetxha a nyika n’hwanyana, kutani a n’hwanyana a ya nyika mamana wake. 29 Loko vadondzrisiwa vake va twa leswo, va ta kutani va teka ntsrumbu wake va ya wu lahla sizreni.

30 Loko vapostola va tlhelile, va byela Yesu hinkwaswu leswi va swi yentxiki ni leswi va dondzrisiki swone. 31 Yesu a va byela a ku: “A hi fambeni, hi ya ka mbangu lowu ku kalaka ku nga na vhanu hi ya wisanyana kutsrongo.” Hikusa a ku ni vhanu vanyingi lava a va ta na va famba, lakakuva va pfumala ni nkama wa ku da. 32 Xileswo, va suka hi boti va ya ka mbangu lowu ku kalaka ku nga na vhanu akuva va ya va wuswavu. 33 Kambe vhanu va va vona loko va famba nakone swi tiviwa hi vhanu vanyingi, kutani vhanu va madoropa hinkwawu va tsrutsruma hi milenge va zranga va tlhasa ka mbangu wolowo. 34 Loko a ku awa xika botini, a vona xitsrhungu lexikulu kutani a xi twela wusiwana hikusa a xi fana ni tihamba leti kalaka ti nga na mubyisi. Hiloko a sungula ku va dondzrisa mintxhumu ya yinyingi.

35 Loko dzri pelile, a vadondzrisiwa vake va mu tsrhindzrekelela va ku: “A mbangu lowu wu le kule ni doropa nakone dzri pelile. 36 Va byeli va famba akuva va ya swidoropanini ni le mimbangwini yimbeni ya le kusuhi va ya tixavela swakuda.” 37 Yesu a va hlamula a ku: “Va nyikani swakuda n’wine.” Va mu hlamula va ku: “U djula leswaku hi famba hi ya xava mapawu hi mali ya 200 wa madenari akuva hi nyika vhanu leswaku va da?” 38 A va hlamula a ku: “Mi ni mapawu mangani? Fambani mi ya kamba!” Loko va kambile va mu byela va ku: “Hi ni ntlhanu wa mapawu ni tihlampfi tibidzri.” 39 Kutani a byela vhanu hinkwavu leswaku va tsrhama hi mintlawa a byanyini. 40 Xileswo, va tsrhama hi mintlawa ya 100 ni ya 50 wa vhanu. 41 A teka ntlhanu wa mapawu ni tihlampfi tibidzri, a lavisa tilweni a khongota. Ntsrhaku ka leswo a khemelela mapawu a nyika vadondzrisiwa vake akuva va yavela vhanu, a tlhela a teka tihlampfi tibidzri a va yavela hinkwavu. 42 Xileswo hinkwavu va da va xuzra, 43 ntsrhaku ka leswo va hlengeleta leswi saliki va tata 12 wa mintsrhava, na ku nga kontiwi ni tihlampfi. 44 Lava va nga da mapawu a va li 5.000 wa vavanuna.

45 Hi ku kahlula, Yesu a byela vadondzrisiwa vake leswaku va khwela boti va pfana va famba va ya ka tlhelo ledzrin’wana dzra lwandle kusuhi ni Betsaida, na yene a ha lelelana ni xitsrhungu. 46 Kambe ntsrhaku ka loko a lelelani na xone, a ye nhaveni a ya khongota. 47 A wusikwini a boti a dzri li makazri ka lwandle, kambe yene a a ha li wuswake a nhaveni. 48 Loko a vona leswaku a swi va kazratela ku weta, hi leswi a ku ba moya lowukulu,* a va yela mpundzrwini* na a famba henhla ka mati; kambe a yentxa ingiki o djula ku va khaluta. 49 Loko va mu vona na a famba henhla ka mati, va ku: “I ntxini lexiya!”* Kutani va ba nyandha, 50 hikusa hinkwavu va mu vonile kutani va txhava. Kambe yene a tekela ku va byela a ku: “Tiyani! Hi mine, mi nga txhavi.” 51 A gama a nghena botini ledzri a va li ka dzrone, kutani a moya wu yima. Loko va vona leswo, va hlamala ngopfu swinene, 52 hikusa a va nga wu twisisanga ntlhamuxelo wa hlolana ledzri a dzri yentxiki hi mapawu. A timbilu tavu a ti tama ti nga swi twisisi.

53 Loko va tlhasile ka tlhelo ledzrin’wana dzra lwandle, a Genezareta, va tsrimbe boti kolanu. 54 Kambe na va ha ku xika botini, vhanu va vona Yesu va tekela ku mu tiva. 55 Hiloko va tsrutsruma va ya tivisa vhanu lava tsrhamaka mbangwini lowo kutani va sungula ku tlakulela vhanu lava vabyaka va va yisa lani Yesu a a li kone. 56 Kun’wana ni kun’wana lomu a a nghena kone, ka madoropa, ka swidoropana ni le ntlhaveni, a va beka lava vabyaka a mabazara, va mu kombela leswaku a tsrhika timbabyi ti khumba ntsena ponta ya mpahla yake. Hinkwavu lava a va yi khumba a va hanyisiwa.

7 A Vafarisi ni vatsrali va kukazri lava a va pfa hi le Yerusalema va tlhase va hlengeletana lani Yesu a a li kone. 2 Kutani va vona van’wana va vadondzrisiwa va Yesu na va da na va nga basisanga mavoko, leswi liki, na va nga hlambanga mavoko.* 3 (Hikusa a Vafarisi ni Vayuda hinkwavu a va di na va nga hlambanga mavoko,* hi ku landzra ntumbuluku wa* vakokwana, 4 futsrhi loko va buya hi bazara a va di na va nga hlambanga. Ku ni swihena swin’wana swa swinyingi leswi va khomelelaka ka swone, swa ku fana ni ku nyuveta tikopo, majaru ni swibya swa kobri ka mati.) 5 Kutani a Vafarisi ni vatsrali volavo va mu vutisa va ku: “Ha yini vadondzrisiwa vaku va nga wu landzrelelisisi ntumbuluku wa vakokwana, kambe va da na va nga basisanga mavoko?” 6 A va hlamula a ku: “Vakanganyisi ndzrin’wine! Muprofeta Ezaya a a hlaya n’wine loko a tsrala a ku: ‘Vhanu lava va ni hlonipha hi nomu ntsena, kambe a timbilu tavu ti le kule swinene na mine. 7 A swi pfuni ntxhumu ku tama va ni gandzrela, hikusa leswi va swi dondzrisaka i tindondzro ta vhanu.’ 8 N’wine mi tsrhika milawu ya Xikwembu Nkulukumba mi landzrelela swihena swa vhanu.”

9 A tlhela a va byela a ku: “Mi tlula milawu ya Xikwembu Nkulukumba hi maqhinga akuva mi landzrelela swihena swenu. 10 Hi xikombiso, Moxe a te: ‘Hlonipha papayi waku ni mamana waku’, a tlhela a ku: ‘Mun’wana ni mun’wana lweyi a zrukaka* papayi wake kumbe mamana wake a a dlayiwe.’ 11 Kambe n’wine mi li: ‘Loko mhunu a byela papayi wake kumbe mamana wake a ku: “Hinkwaswu leswi ni nga na swone leswi a ni ta ku pfuna hi swone i korbani (leswi liki, nyiko leyi nyikeliwiki ka Xikwembu Nkulukumba),”’ 12 a ma ha mu pfumeleli ku yentxela ntxhumu papayi wake kumbe mamana wake. 13 Hi ndlela leyo, mi yentxa zritu dzra Xikwembu Nkulukumba dzri nga ha pfuni ntxhumu hi mhaka ya swihena swenu leswi mi swi dondzrisaka van’wana. Nakone mi yentxa mintxhumu ya yinyingi ya ku fana ni leyi.” 14 Xileswo a tlhela a vitana xitsrhungu, a xi byela a ku: “Ni yingisetani hinkwenu, nakone swi twisisani ha hombe leswi ni mi byelaka swone. 15 A ku na ntxhumu lexi nghenaka ndzreni ka mhunu xi nga mu yentxaka a va lweyi a ntxhimiki, kambe mintxhumu leyi humaka ndzreni ka mhunu hi yone yi mu yentxaka a va lweyi a ntxhimiki.” 16 *——

17 Loko a suke lomu xitsrhungu a xi li kone kutani a nghena ndlwini, a vadondzrisiwa vake va mu vutisa ntlhamuxelo wa xifaniso lexi. 18 Xileswo a va byela a ku: “Kasi na n’wine a mi si na swi twisisa ku fana na vone? A mi swi tivi leswaku a ku na ntxhumu lexi nghenaka ndzreni ka mhunu xi nga mu yentxaka a va lweyi a ntxhimiki, 19 swanga hi leswi loko swi nghena swi kalaka swi nga yi mbilwini yake kambe swi yaka khuzrini dzrake* swi gama swi huma?” Hi ku hlaya leswo, Yesu a a kombisa leswaku swakuda hinkwaswu swi basile. 20 A tlhela a ku: “A mintxhumu leyi humaka ndzreni ka mhunu hi yone yi mu yentxaka a va lweyi a ntxhimiki. 21 Hikusa a mbilwini ya mhunu, ku huma a mimpimiso ya ku biha: swiyentxo swa tingana hi tlhelo dzra tinkuku,* ku yiva, ku dlaya, 22 wumbuye, wunavenave, wubihi, ku kanganyisa, mahanyela ya ku biha,* matsrhoho, ku zruketela, ku tikulisa ni wuphunta. 23 Mintxhumu leyi hinkwayu ya ku biha yi huma hi ndzreni nakone yi yentxa mhunu a va lweyi a ntxhimiki.”

24 Kutani a suka kolanu a ya mugangeni wa Tiri ni Sidoni. A tlhasa a nghena ndlwini hikusa a a nga djuli kuva swi tiviwa hi mhunu leswaku a tlhasile, kambe vhanu va swi tivile. 25 Na a ha ku tlhasa, wansati wa kukazri lweyi xin’hwanyatana xake a xi ni demona* a twa leswaku Yesu a tlhasile, kutani a mu yela a tlhasa a khinsama a minkondzrweni yake. 26 Wansati lweyo a a li Mugriki, wa doropa dzra le Fenikiya ledzri kumekaka a Siriya, a a kombela Yesu hi ku phindhaphindha leswaku a hlongola demona ledzri a dzri li ka n’wanake. 27 Kambe Yesu a mu byela a ku: “Ku sungula tsrhika vana va da va xuzra, hikusa a hi swinene ku teka pawu dzra vana u nyika swimbyanyana.” 28 Nambitanu, wansati lweyo a mu hlamula a ku: “Ina hosi, kambe nambi swimbyanyana leswi nga hansi ka menza swa da matlhantlha lawa ma wiseteliwaka hi vatsrongwana.” 29 Kutani Yesu a mu byela a ku: “Hi mhaka ya leswi u swi hlayiki, famba; a demona dzri sukile ka n’wanaku.” 30 Xileswo, wansati lweyo a muka a tlhasa a kuma xin’hwanyatana na xi yetlelile a mubedweni, na demona dzri sukile ka xone.

31 Loko Yesu a suka mugangeni wa Tiri, a khaluta hi Sidoni, a tsremakanya muganga wa Dekapolisi* a ya Lwandle dzra Galileya. 32 Kutani va mu buyisela wanuna lweyi a fiki tindleve a tlhela a va ni xikazratu ka ku vulavula, va mu kombela leswaku a mu hanyisa. 33 Yesu a mu teka a suka na yene lani a ku ni xitsrhungu, va ya tlhelweni. Kutani a nghenisa tintiho take a tindleveni ta wanuna lweyo, a gama a thuka mazri a mu khumba lidzrimi. 34 Na a langusi matilweni, a hefemulela henhla a ku: “Efata”, leswi liki: “Pfuleka.” 35 Kutani a tindleve take ti pfuleka, a va a sungula ni ku vulavula ha hombe. 36 Yesu a va tsratsriya leswaku va nga byeli mhunu leswi yentxekiki, kambe nkama lowu Yesu a a ya a va leleta, hi lani vone a va ya mahlweni va swi hangalasa kone. 37 Nakunene, va hlamale ngopfu va ku: “Hinkwaswu a swi yentxa ha hombe. A kota ni ku yentxa leswaku lava va ku fa tindleve va yingela ni leswaku timbheveve ti vulavula.”

8 A masikwini wolawo, ku tlhele ku hlengeletana xitsrhungu xa xikulu nakone a xi nga na swakuda. Kutani a vitana vadondzrisiwa vake a va byela leswi: 2 “Ni xi twela wusiwana xitsrhungu lexi, hikusa xi tsrhame na mine masiku mazrazru nakone a xa ha na swakuda. 3 Loko no va mukisa na va twa ndlala, va ta titivala a ndleleni nakone van’wana va vone va buya hi kule.” 4 Kambe a vadondzrisiwa vake va mu hlamula va ku: “Xana hi ta swi kuma kwini swakuda swa ku yaneta vhanu hinkwavu lava kola nhoveni?” 5 Xileswo a va vutisa a ku: “Mi ni mapawu mangani?” Va hlamula va ku: “Hi ni 7 wa wone.” 6 Kutani a byela xitsrhungu leswaku xi tsrhamisa hansi. Ntsrhaku ka leswo a teka 7 wa mapawu, a khongota, a ma khemelela a gama a nyika vadondzrisiwa vake kutani vone va yavela xitsrhungu. 7 Nakone a va ni swihlampfana swi nga li swingani. Ntsrhaku ka loko a khongotile a tlangela, a byela vadondzrisiwa vake leswaku na swone va swi yavela xitsrhungu. 8 Xileswo, va da va xuzra, ntsrhaku ka leswo va hlengeleta leswi saliki va tata 7 wa mintsrhava ya yikulu. 9 Ka lava diki a ku ni kolomu ka 4.000 wa vavanuna. Ntsrhaku ka leswo a va ntsrhunxa va muka.

10 Hi ku kahlula a khwela boti ni vadondzrisiwa vake va ya a mugangeni wa Dalmanuta. 11 Hiloko Vafarisi va mu tsrhindzrekelela va sungula ku phikisana na yene, va mu dzringa hi ku mu sindzrisa leswaku a va yentxela hlolana ledzri pfaka tilweni. 12 Kutani Yesu a vaviseka ngopfu swinene a mbilwini, a ku: “Ha yini lixaka ledzri dzri djula ku yentxeliwa hlolana? Kunene na mi byela, a ku na hlolana ledzri taka yentxeliwa lixaka ledzri.” 13 Kutani a va siya a tlhela a khwela boti a ya ka tlhelo ledzrin’wana dzra lwandle.

14 Kambe a vadondzrisiwa a va dzrivale ku teka mapawu. Nakone a botini a va nga ha na ntxhumu wun’wana handle ka pawu dzrin’we ntsena. 15 Kutani a va basopisa a ku: “Tsrhamani na mi pfule matihlo, tivonelani ka fermentu* dzra Vafarisi ni dzra Heroda.” 16 Xileswo va sungula ku phikisana hi leswi a va nga tekanga mapawu. 17 Loko Yesu a swi xiya, a ku: “Ha yini mi phikisana hi leswi mi kalaka mi nga tekanga mapawu? Xana a mi si na swi twisisa? Swa ha mi kazratela timbilwini tenu ku swi twisisa? 18 ‘Nambileswi mi nga ni matihlo, a mi voni, nakone nambileswi mi nga ni tindleve, a mi yingeli?’ Xana a ma ha dzrimuki 19 leswaku mi tate mintsrhava yingani hi leswi saliki, loko ni phamele 5.000 wa vavanuna hi ntlhanu wa mapawu?” Va mu hlamula va ku: “12 wa mintsrhava.” 20 A tlhela a ku: “Mi tate mintsrhava yingani ya yikulu hi leswi saliki loko ni phamele 4.000 wa vavanuna hi 7 wa mapawu?” Va mu hlamula va ku: “7 wa mintsrhava.” 21 Kutani a va vutisa a ku: “Xana a mi si na wu twisisa ntlhamuxelo wa kone?”

22 Loko va tlhase Betsaida, vhanu va tisele Yesu wanuna wa kukazri lweyi a fiki matihlo kutani va mu kombela leswaku a mu khumba. 23 Kutani a khoma wanuna yelweyo wa ku fa matihlo hi voko a huma na yene ka xidoropana xolexo. Ntsrhaku ka loko a mu tote mazri matihlweni, a mu tlhanteka mavoko kutani a mu vutisa a ku: “U vona yini?” 24 Wanuna lweyo a langusa henhla kutani a ku: “Ni vona vhanu, kambe va voneka ingiki i minsinya yi fambafambaka.” 25 Yesu a tlhela a mu khumba matihlo, kutani wanuna yelweyo a hanyisiwa a sungula ku vona hinkwaswu ha hombe. 26 Xileswo, a mu byela leswaku a muka, kambe a ku: “U nga ngheni ka xidoropana lexi.”

27 Kutani Yesu ni vadondzrisiwa vake va suka va ya ka swidoropana swa Khezariya wa Filipi. Na va li ku fambeni a vutisa vadondzrisiwa vake a ku: “Kasi vhanu va li hi mine mani?” 28 Va mu hlamula va ku: “Va li u Yohane Mubabatisi, kambe van’wana va li u Eliya, nakasi van’wanyana va li u mun’we wa vaprofeta.” 29 Kutani a va vutisa a ku: “N’wine ke, mi li hi mine mani?” Petro a mu hlamula a ku: “U Kriste.” 30 Kutani a va tsratsriya leswaku va nga byeli mhunu leswaku hi yene mani. 31 A gama a sungula ku va byela leswaku a N’wana wa mhunu a fanela ku xanisiwa ngopfu ni ku dzreliwa hi vakulukumba, vaprista lavakulu ni vatsrali a tlhela a dlayiwa, a gama a pfuxiwa hi siku dzra wuzrazru. 32 Kunene, a a va byela mhaka leyi na a ntsrhunxekile. Kambe Petro a mu kokela tlhelweni a sungula ku mu kawuka. 33 Xileswo, Yesu a ndzruluka a langusa vadondzrisiwa vake kutani a kawuka Petro a ku: “Suka, Sathana! Hikusa leyo i mimpimiso ya vhanu a hi ya Xikwembu Nkulukumba.”

34 Yesu a vitana xitsrhungu ni vadondzrisiwa vake, a va byela a ku: “Loko mhunu a djula ku ni landzrela, a a tiyale kutani a zrwala mhandzri yake ya nxanisa* a tama a ni landzrela. 35 Hikusa lweyi a djulaka ku huluxa wutomi* byake a ta luzekeliwa hi byone, kambe lweyi a luzekeliwaka hi wutomi byake hi mhaka yanga ni hi mhaka ya madzrungula lamanene, a ta tlhela a byi kuma. 36 Kunene swi siza yini kuva mhunu a kuma mintxhumu hinkwayu ya misava kambe a luzekeliwa hi wutomi byake? 37 Kunene i yini lexi mhunu a nga xi nyikelaka akuva a xava wutomi byake? 38 Hikusa lweyi a nga ni tingana ha mine nakone a nga swi djulikiki leswaku lixaka ledzri dzra ku kala ku dumbeka* ni dzra ku doha dzri swi tiva leswaku i mudondzrisiwa wanga, ni leswaku awa pfumela ka mazritu yanga, loko a N’wana wa mhunu a ta hi ku phatima ka Papayi wake na a ni tintsrumi ta ku xwenga na yene a ta va ni tingana ta ku hlaya leswaku i mudondzrisiwa wake.”

9 A ya mahlweni a va byela a ku: “Ni mi byela ntiyiso, van’wana ka lava yimiki lani a va nge ti fa na va nga zranganga va vona Mfumu wa Xikwembu Nkulukumba na wu fuma.” 2 Ntsrhaku ka 6 wa masiku, Yesu a teka Petro na Yakobe na Yohane va tlhantukela nhaveni leyi tlakukiki. Kutani a ndzrulutiwa mahlweni kwavu; 3 A mpahla yake yi sungula ku phatima yi tlhela yi basa yi ku baaa, lakakuva lani misaveni a ku na muhlampswi lweyi a nga kotaka ku hlampswa mpahla yi va ya ku basa ku fana na yone. 4 Handle ka leswo, ku humelela Eliya na Moxe, va sungula ku bulisana na Yesu. 5 Petro a byela Yesu a ku: “Rabi, swa nyonxisa ku va lani. Hi pfumelele hi gwimba matende mazrazru, dzrin’we dzri va dzraku, dzrin’wana dzri va dzra Moxe, dzrin’wanyana dzri va dzra Eliya.” 6 Ku hlaya ntiyiso, Petro a a nga swi tivi leswaku a ta ku yini hikusa a va txhava ngopfu swinene. 7 Kutani ku vumbeka tlavi dzri va funeketa, ku tlhela ku twala zritu ledzri humaka tlavini dzri ku: “Lweyi i N’wananga, lweyi a zrandzrekaka. Mu yingisetani.” 8 Loko va lavisa matlhelweni, va vona leswaku a ku nga ha na mhunu mumbeni handle ka Yesu.

9 Loko va fulamela hi le nhaveni, Yesu a va leleta leswaku va nga byeli mhunu leswi va swi voniki ku ya tlhasa loko N’wana wa mhunu a pfuxiwa ku feni. 10 Va bekisa mazritu lawa a timbilwini tavu* kambe va vutisana hi xivone leswaku a a djula ku hlaya swa kuyini loko a ku a ta pfuxiwa ku feni. 11 Kutani va sungula ku mu vutisa va ku: “Ha yini vatsrali va hlaya leswaku Eliya a fanela ku va wa ku sungula ku ta?” 12 A va hlamula a ku: “Nakunene Eliya a fanela ku va wa ku sungula ku ta kutani a lulamisa mintxhumu hinkwayu. Kambe ha yini ku tsraliwe leswaku a N’wana wa mhunu a ta xanisiwa ngopfu swinene a tlhela a poyiliwa? 13 Nambitanu, na mi byela leswaku kunene Eliya kutani a tile, nakone va tizre ku zrandzra ha yene hi lani swi tsraliwiki ha kone mayelanu na yene.”

14 Loko va tlhasa lani vadondzrisiwa lavan’wana a va li kone, va vona leswaku a ku ni xitsrhungu lexikulu lexi a xi va tsrandzrelile nakone a ku ni vatsrali lava a va va holovisa. 15 Kambe loko xitsrhungu hinkwaxu xi vona Yesu, xi hlamala, xi tsrutsruma xi mu tlhangaveta akuva xi mu losa. 16 Yesu a va vutisa a ku: “I yini lexi mi yentxaka mi holovisana na vone?” 17 Mun’we ka lava a va li ka xitsrhungu, a mu hlamula a ku: “Mudondzrisi, ni ku buyisele n’wananga hikusa a ni demona ledzri mu yentxaka a va mbheveve. 18 Loko dzri mu hlasela, dzri mu tlatlalatela hansi, a tlhutlha duvi, a ketsrela matinyo a tlhela a hela ntamu. Ni kombele vadondzrisiwa vaku akuva va dzri hlongola, kambe a va swi kotanga.” 19 Kutani a va byela a ku: “N’wine lixaka ledzri nga liki na lipfumelo, xana ni fanela ku tsrhama na n’wine ku ya tlhasa kwini? Xana ni ta mi lehisela mbilu ku ya tlhasa kwini? Mu buyisani halenu.” 20 Xileswo, va teka djaha ledzro va dzri yisa kwake, kambe loko demona dzri vona Yesu, dzri sungula ku hlasela djaha ledzro. Kutani a djaha dzri wa hansi, dzri vumbulukela na dzri tlhutlha duvi. 21 Kutani Yesu a vutisa papayi wa dzrone a ku: “Swi mu sungule siku muni leswi?” Yene a mu hlamula a ku: “Ku sukela a wutsrongwanini byake, 22 nakone dzri talisa ku mu txukumetela ndzrilweni ni le matini akuva dzri mu dlaya. Kambe loko u swi kota ku yentxa xa kukazri, hi tweli wusiwana u hi pfuna.” 23 Yesu a mu byela a ku: “Ha yini u ku: ‘Loko u swi kota’? Phela mintxhumu hinkwayu ya koteka ka lweyi a nga ni lipfumelo.” 24 Papayi wa djaha a tekela ku hlaya hi zritu dzra ku tlakuka a ku: “Ni ni lipfumelo! Ni pfune akuva ni va ni lipfumelo ledzri yengetelekiki!”

25 Loko Yesu a vona leswaku a xitsrhungu a xi tsrutsruma xi buya lani a va li kone, a kawuka demona* a ku: “Demona ndzriwene u yentxaka leswaku djaha ledzri dzri nga vulavuli ni ku twa, na ku byela: Huma, nakone u nga ha tlheli u nghena ka djaha ledzri!” 26 Ntsrhaku ka loko dzri bandlukanile ni ku yentxa leswaku djaha ledzro dzri zruzrumela ngopfu swinene, a demona dzri huma nakone a djaha a dzri voneka ingiki dzre fa, lakakuva ntalu wa lava a va li kone a va ku: “A file!” 27 Kambe Yesu a dzri khoma hi voko, a dzri sekelekisa kutani dzri sekeleka dzri yima. 28 Ntsrhaku ka loko a nghene ndlwini, a vadondzrisiwa va mu vutisa xihundleni va ku: “Ha yini hine hi hlulekile ku dzri hlongola?” 29 A va hlamula a ku: “Demona dzra muxaka lowu, dzri huma ntsena hi xikhongoto.”

30 Kutani va suka kolanu va ya Galileya, kambe a a nga djuli kuva swi tiviwa hi mhunu. 31 Hikusa a a li ku dondzriseni ka vadondzrisiwa vake, a a va byela a ku: “A N’wana wa mhunu a ta wongiwa a nyikeliwa a mavokweni ya vhanu, kutani va ta mu dlaya, kambe nambiloko a dlayiwa a ta pfuxiwa ntsrhaku ka masiku mazrazru.” 32 Nambitanu a va swi twisisanga leswi a swi hlayiki, kambe a va txhava ku mu vutisa.

33 Va tlhase Kapernawume. Kutani loko a li ndlwini a va vutisa a ku: “A mi phikisana hi yini ndleleni?” 34 A va mu hlamulanga ntxhumu, hikusa loko va ha li ndleleni a va phikisana hi leswaku i mani lwenkulu kwavu. 35 Kutani a tsrhamisa hansi, a vitana lava 12 a va byela a ku: “Lweyi a djulaka ku va wa ku sungula, a fanela ku va wa wugamu ka hinkwavu ni ku tlhela a tizrela hinkwavu.” 36 Kutani a teka ntsrongwana wa kukazri a mu yimisa makazri kwavu, a mu xingazra, a va byela a ku: 37 “Lweyi a yamukelaka ntsrongwana wa ku fana ni lweyi hi mhaka ya vito dzranga, na mine awa ni yamukela; nakone mun’wana ni mun’wana lweyi a ni yamukelaka, a nga yamukeli mine ntsena, kambe a yamukela ni Lweyi a ni zrumiki.”

38 Yohane a mu byela a ku: “Mudondzrisi, hi vone mhunu na a hlongola mademona hi vito dzraku, hi zame ku mu sivela hikusa a a nga fambafambi na hine.” 39 Kambe Yesu a ku: “Mi nga mu siveli, hikusa a nga kone lweyi a nga yentxaka mahlolana hi vito dzranga kambe hi ku kahlula a djika a vulavula ku biha hi mine. 40 Hikusa lweyi a kalaka a nga lwisani na hine a yima na hine. 41 Nakone mun’wana ni mun’wana lweyi a mi nyikaka mati ya ku nwa, hi leswi mi nga vadondzrisiwa va Kriste, ni mi byela ntiyiso, a nge ti txhuka a luzekeliwa hi hakelo dzrake. 42 Kambe mun’wana ni mun’wana lweyi a hambukisaka mun’we ka lavatsrongo lava nga ni lipfumelo, a swi ta yampswa kuva a tsrimbeleliwa zribye ledzrikulu* a nhan’wini kutani a txukumeteliwa lwandle.

43 “Loko voko dzraku dzri ku dohisa, dzri tsremi. Hikusa swa yampswa kuva u kuma wutomi na u limalile ku tlula kuva u nghena a Gehena* na u ni mavoko mabidzri, a ndzrilweni lowu ngeke na ku timeka. 44 *—— 45 Nakone loko nkondzro waku wu ku dohisa, wu tsremi. Hikusa swa yampswa kuva u kuma wutomi na u limalile ku tlula kuva u txukumeteliwa a Gehena* na u ni minkondzro yibidzri. 46 *—— 47 Ni loko tihlo dzraku dzri ku dohisa, dzri txukumeti kule. Hikusa swa yampswa kuva u nghena Mfun’wini wa Xikwembu Nkulukumba na u ni tihlo dzrin’we ku tlula kuva u txukumeteliwa a Gehena* na u ni matihlo mabidzri, 48 lomu a swipungwana swa kone swi kalaka swi nga fi ni ndzrilo wa kone wu kalaka wu nga timeki.

49 “A ndzrilo wu ta txhululiwa a henhla ka vhanu lava hinkwavu ku fana ni loko munyu wu txheliwa ka swakuda. 50 A munyu i wunene, kambe loko wu heleliwa hi ntamu wa wone, xana a ku twala ka wone mi ta ku pfuxeta hi ndlela yini? Lungani ku fana ni munyu mi hanyisana hi ku zrula ni van’wana.”

10 Loko a suka kolanu a ya mindzrelekanwini ya Yudeya ka tlhelo dzrin’wana dzra Yordani, a switsrhungu swi tlhela swi hlengeletana lani a a li kone. Hiloko a sungula ku va dondzrisa hi lani a a tolovela ku yentxa ha kone. 2 Kutani a Vafarisi va mu tsrhindzrekelela hi nkongometo wa ku mu dzringa, va mu vutisa leswaku swa pfumeleliwa kumbe a swi pfumeleliwi leswaku wanuna a tsrhika* nsati wake. 3 A va hlamula a ku: “Xana Moxe a mi dondzrise yini?” 4 Va ku: “Moxe a swi pfumelelile leswaku wanuna a tsrala papela dzra ku dlaya wukati a va a mu hlongola.” 5 Kambe Yesu a va hlamula a ku: “Moxe a mi tsralele nawu lowo hi mhaka ya ku tlanyala ka timbilu tenu. 6 Nambitanu, ku sukela a ku sunguleni ka ntumbuluku, ‘Xikwembu Nkulukumba a va hambe na va li wanuna ni wansati. 7 Hi xivangelo lexo, a wanuna a ta siya papayi wake ni mamana wake, 8 kutani hi wubidzri byavu va ta va nyama yin’we’, leswo swi hlaya leswaku a va ha li vabidzri, kambe i nyama yin’we. 9 Xileswo, leswi Xikwembu Nkulukumba a swi patsriki, ku nga txhuki ku va ni mhunu lweyi a swi tsravukanisaka.” 10 Loko va li ndlwini, a vadondzrisiwa va sungula ku mu hamba swivutiso mayelanu ni mhaka leyi. 11 A va byela a ku: “Lweyi a tsrhikaka* nsati wake a ya txhata ni wansati mumbeni, a yentxa wumbuye nakone a dohela nsati wake, 12 ni loko wansati o txhuka a tsrhika nuna wake a ya txhata ni wanuna mumbeni, a yentxa wumbuye.”

13 Kutani vhanu va sungula ku mu buyisela vatsrongwana akuva a va khumba, kambe a vadondzrisiwa va va kawuka. 14 Loko Yesu a vona leswo, swi nga mu nyonxisi kutani a va byela a ku: “Tsrhikani vatsrongwana va ta kwanga; mi nga va siveli, hikusa a Mfumu wa Xikwembu Nkulukumba i wa lava ku fana na vone. 15 Ni mi byela ntiyiso, lweyi a kalaka a nga yamukeli Mfumu wa Xikwembu Nkulukumba ku fana ni ntsrongwana, a nge txhuki a nghena ka wone.” 16 Kutani a tlakula vatsrongwana a va tovokisa hi ku va tlhanteka mavoko.

17 Loko Yesu a suka a famba, wanuna wa kukazri a buya hi ku tsrutsruma a tlhasa a khinsama mahlweni kwake a mu vutisa a ku: “Mudondzrisi lwenene, i yini leswi ni fanelaka ku swi yentxa akuva ni kuma wutomi lebyi nga gamikiki?” 18 Yesu a mu byela a ku: “Ha yini u ni vitana lwenene? A ku na lweyi a nga munene handle ka Xikwembu Nkulukumba ntsena. 19 Wa yi tiva milawu leyi liki: ‘U nga dlayi, u nga yentxi wumbuye, u nga yivi, u nga nyikeli wumboni bya madzrimi, u nga kanganyisi van’wana, hlonipha papayi waku ni mamana waku.’” 20 Wanuna yelweyo a ku: “Mudondzrisi, milawu leyo hinkwayu na yi landzra ku sukela a wutsrongwanini.” 21 Yesu a mu languta a mu zrandzra kutani a mu byela leswi: “Ku ni ntxhumu wun’we wu ku kiyelelaka: Famba u ya xavisa mintxhumu leyi u nga na yone kutani u teka mali ya kone u nyika swisiwana, xileswo u ta va ni pfindla a tilweni; ntsrhaku ka leswo, tana u ta va mulandzreli wanga.” 22 Kambe loko a yingela nhlamulo leyo, a kazrateka kutani a suka a famba na a vavisekile, hikusa a a ganye ngopfu.

23 Ntsrhaku ka loko Yesu a langusi matlhelweni, a byela vadondzrisiwa vake a ku: “Lava va nga ni mali swi ta va kazratela ngopfu ku nghena Mfun’wini wa Xikwembu Nkulukumba!” 24 Kambe a vadondzrisiwa va hlamalisiwa hi mazritu wolawo. Kutani Yesu a ku: “Vananga, swi kazrata ngopfu ku nghena Mfun’wini wa Xikwembu Nkulukumba! 25 Swa nabyala kuva kamela dzri khaluta hi ka mbhovo wa ximazri ku tlula ku va mhunu wa ku ganya* a nghena a Mfun’wini wa Xikwembu Nkulukumba.” 26 Va ya va hlamala ngopfu, va mu vutisa* va ku: “I mani lweyi a nga huluxiwaka?” 27 Kutani Yesu a va lavisisisa wusweni a ku: “Ka vhanu leswo a swi koteki kambe a swi hi ndlela leyo ka Xikwembu Nkulukumba, hikusa ka Xikwembu Nkulukumba hinkwaswu swa koteka.” 28 Petro a hlamula a ku: “Lavisa! Hi siye mintxhumu yezru hinkwayu hi ku landzrela.” 29 Yesu a ku: “Ni mi byela ntiyiso, a nga kone lweyi a siyiki yindlu kumbe vamakwavu va xinuna, kumbe vamakwavu va xisati, kumbe mamana, kumbe papayi, kumbe vana, kumbe masimu hi kola kwanga kumbe hi kola ka madzrungula lamanene 30 lweyi a nkameni lowu a kalaka a nge ti kuma tiyindlu, vamakwavu va xinuna, vamakwavu va xisati, vamamana, vana, ni masimu hi lani ku phindhiwiki ka 100, na a xanisiwa—kutani a nkameni lowu taka* a kuma wutomi lebyi nga gamikiki. 31 Kambe vanyingi lava va nga va ku sungula va ta va va wugamu, kasi lava va wugamu va ta va va ku sungula.”

32 Na va li ndleleni va tlhantukela a Yerusalema, Yesu a a va zrangelile, a vadondzrisiwa a va hlamala, kambe lava a va va landzrela va sungula ku txhava. A tlhela a teka lava 12 a ya na vone tlhelweni, kutani a sungula ku va byela mintxhumu leyi a yi li kusuhi ni ku mu yentxekela, a ku: 33 “Ma swi twa! Hi tlhantukela a Yerusalema, a N’wana wa mhunu a ta nyikeliwa a mavokweni ya vaprista lavakulu ni vatsrali. Va ta mu yavanyisa akuva va mu dlaya. Va ta mu nyikela ka vamatiko, 34 kutani vone va ta mu hamba xihlekiso, va mu thukela, va mu ba va tlhela va mu dlaya, kambe ntsrhaku ka masiku mazrazru a ta pfuka.”

35 Yakobe na Yohane, vana va Zebedewu, va mu tsrhindzrekelela va ku: “Mudondzrisi, hi djula u hi yentxela xin’wana ni xin’wana lexi hi taka ku kombela xone.” 36 Yesu a va vutisa a ku: “Mi djula ni mi yentxela yini?” 37 Va mu hlamula va ku: “Hi pfumeleli ku tsrhama na wene a Mfun’wini waku, mun’we ka voko dzraku dzra xinene mun’wana ka ledzra ximatsri.” 38 Kambe Yesu a va byela a ku: “A mi swi tivi leswi mi swi kombelaka. Xana mi nga swi kota ku nwa kopo ledzri ni nwaka dzrone kumbe ku babatisiwa hi babatiso ledzri ni babatisiwaka dzrone?” 39 Va mu hlamula va ku: “Hi nga swi kota.” Loko a twa leswo, Yesu a va byela a ku: “A kopo ledzri ni nwaka dzrone mi ta dzri nwa, nakone a babatiso ledzri ni babatisiwaka dzrone mi ta babatisiwa dzrone. 40 Nambitanu, loko ku li ku tsrhama a vokweni dzranga dzra xinene kumbe dzra ximatsri a hi mine ni nga mi nyikaka swone, kambe a mimbangu yoleyo yi lumba lava lulamiseliwiki yone.”

41 Loko lavan’wana va 10 va twa mhaka leyi, va kwatela Yakobe na Yohane. 42 Kambe Yesu a va vitana a va byela a ku: “Ma swi tiva leswaku a tihosi ta matiko ti bindzrisela vhanu nakone lava nga ni wulawuli a henhla ka wone a va ma tsretsreleli. 43 N’wine a mi fanelanga ku yentxisa xileswo; kambe lweyi a djulaka ku va lwenkulu makazri kwenu a fanela ku mi tizrela, 44 nakone lweyi a djulaka ku va wa ku sungula makazri kwenu a fanela ku va nandzra wenu hinkwenu. 45 Hikusa nambi N’wana wa mhunu a nga telanga ku ta tizreliwa, kambe a tele ku ta tizrela ni ku nyikela wutomi* byake byi va xitizrulo ka vhanu vanyingi.”

46 Kutani va nghena a Yeriko. Kambe a nkama lowu Yesu ni vadondzrisiwa vake kun’we ni xitsrhungu lexikulunyana a va huma Yeriko, Bartimeya (n’wana wa Timeya), lweyi a a fe matihlo nakone a a li mukombeli wa zimola, a a tsrhame tlhelweni ka ndlela. 47 Loko a twa leswaku Yesu wa Munazareta awa khaluta hi ndlela, a sungula ku bandlukana a ku: “Yesu, N’wana Davhida, ni tweli wusiwana!” 48 Kutani vhanu vanyingi va sungula ku mu kawuka va mu byela leswaku a miyela, kambe yene a a ya mahlweni a bandlukana ngopfu swinene a ku: “N’wana Davhida, ni tweli wusiwana!” 49 Xileswo Yesu a yima a ku: “Mu vitanani a buya halenu.” Kutani va vitana wanuna yelweyo wa ku fa matihlo, va mu byela va ku: “U nga txhavi! Sekeleka; Yesu awa ku vitana.” 50 Kutani a susa xiyambalu xake, a ku vhuthu a ya ka Yesu. 51 Yesu a mu vutisa a ku: “U djula ni ku yentxela yini?” Wanuna yelweyo wa ku fa matihlo a mu hlamula a ku: “Raboni,* yentxa leswaku ni tlhela ni vona.” 52 Kutani Yesu a mu byela a ku: “Famba. A lipfumelo dzraku dzri ku hanyisile.” Hi nkama wolowo wanuna yelweyo a tlhela a sungula ku vona, kutani a sungula ku mu landzrela.

11 Loko va li kusuhi ni Yerusalema, va tlhase a Nhaveni ya Minhlwazri, lani a swidoropana swa Betfage ni Betaniya a swi kumeka kone, kutani Yesu a zruma vadondzrisiwa vake vabidzri 2 a va byela a ku: “Fambani ka xidoropana lexiya xi vonekaka, na ma ha ku nghena mi ta kuma ximbongolwana na xi tsrimbiwile, lexi ku nga liki na mhunu lwa samiki a khwela ka xone. Xi tlhantlhani mi buya na xone. 3 Loko mhunu wa kukazri a mi vutisa a ku: ‘Ha yini mi yentxa leswo?’ Mu byelani mi ku: ‘Xi djuliwa hi Hosi nakone yi ta hantla yi xi buyisa.’” 4 Xileswo va suka va famba, va tlhasa va kuma ximbongolwana na xi tsrimbiwile ka xipfalu xa yindlu leyi a yi li kusuhi ni ndlela, kutani va xi tlhantlha. 5 Kambe van’we ka lava a va yime kolanu va va vutisa va ku: “Mi xi tlhantlhela yini ximbongolwana lexi?” 6 Kutani va va byela leswi Yesu a va byeliki swone, xileswo va va tsrhika va famba.

7 Va buyisela Yesu ximbongolwana, va xi kapeka timpahla tavu, kutani a khwela ka xone. 8 Handle ka leswo, vhanu va vanyingi va yandlala timpahla tavu a ndleleni, kambe van’wana va tsrema swiphundla swa minsinya a masin’wini. 9 Nakone lava a va mu zrangelile ni lava a va mu landzra a va ya mahlweni va huwelela va ku: “Ha khongota, a a huluxiwe! A tovokile lweyi a taka hi vito dzra Yehovha! 10 Wu tovokile Mfumu lowu taka wa papayi wezru Davhida! Ha khongota, mu huluxi, wene u nga henhlahenhla!” 11 Kutani a nghena Yerusalema a ya tempeleni, a sungula ku lavisa hinkwaswu leswi a swi li kolanu, kambe leswi kutani a dzri pelile, a huma ni lava 12 va ya Betaniya.

12 Mundzruku ka kone, loko va huma Betaniya, a sungula ku twa ndlala. 13 Na a ha li kule, a vona nsinya wa nkuwa lowu a wu ni makamba, kutani a wu yela ku ya vona kumbe a ta kuma mihandzru. Loko a tlhasa, a kuma leswaku a wo va ni makamba ntsena, hikusa a ku nga li nguva ya makuwa. 14 Xileswo a wu byela a ku: “Ku nga ha txhuki ku va ni mhunu lweyi a daka mihandzru yaku.” A vadondzrisiwa vake a va swi yingela.

15 Kutani loko va tlhase Yerusalema, a nghene tempeleni a sungula ku hlongola lava a va li ku xaviseni ni ku xaveni a tempeleni, a hangalasa mimenza ya vatxintxisi va mali ni swibankwana swa lava a va xavisa matuva, 16 nakone a a nga pfumeleli mhunu akuva a tsremakanya tempele na a zrwali mintxhumu. 17 A a va dondzrisa a ku: “Xana a swi tsraliwanga leswaku: ‘A yindlu yanga yi ta va yindlu ya xikhongoto ya vhanu hinkwavu’? Kambe n’wine mi yi yentxa yindlu ya* vayivi.” 18 Loko vaprista lavakulu ni vatsrali va twa leswo, va sungula ku djuletela ndlela ya ku mu dlaya hi leswi a va mu txhava ni leswi a xitsrhungu hinkwaxu a xi hlamalisiwa hi madondzrisela yake.

19 Loko dzri pelile, Yesu ni vadondzrisiwa vake va huma doropeni. 20 Kutani loko va khaluta hi ndlela mundzruku ka kone a mpundzrwini, va vona nsinya wa nkuwa na wu womile hinkwawu ni timitsru ta wone. 21 Petro a dzrimuka leswi yentxekiki kutani a mu byela a ku: “Rabi, lavisa! a nsinya wa nkuwa lowu u nga wu zruka wu womile.” 22 Yesu a va hlamula a ku: “Vanani ni lipfumelo ka Xikwembu Nkulukumba. 23 Ni mi byela ntiyiso, mun’wana ni mun’wana lweyi a byelaka nhava leyi a ku: ‘Suka u titxukumetela lwandle’, na a nga ganaganeki a mbilwini yake, kambe na a ni lipfumelo dzra leswaku leswi a swi hlayaka swi ta yentxeka, kunene swi ta yentxeka. 24 Hi mhaka yoleyo ni mi byelaka leswaku hinkwaswu leswi mi swi kombelaka hi xikhongoto, vanani ni lipfumelo dzra leswaku mi ta swi kuma, kutani mi ta swi kuma. 25 Nakone loko mi khongota, dzrivalelani van’wana swihono swavu, akuva Papayi wenu lweyi a nga matilweni na yene a ta mi dzrivalela swidoho swenu.” 26 *——

27 Kutani va tlhela va ya Yerusalema. Na a fambafamba tempeleni, a vaprista lavakulu ni vatsrali ni vakulukumba va tlhasa 28 va ku: “U yi yentxa hi ntamu wa mani mintxhumu leyi? Nakone i mani a ku nyikiki ntamu wa ku yentxa mintxhumu leyi?” 29 Yesu a va hlamula a ku: “Ni ta mi hamba xivutiso. Ni hlamulani, kutani ni ta mi byela leswaku ni wu kuma kwini ntamu wa ku yentxa mintxhumu leyi. 30 Lweyi a zrumiki Yohane ku babatisa vhanu, i Xikwembu Nkulukumba kumbe i vhanu? Ni hlamulani.” 31 Xileswo va sungula ku yanakanyisisa hi xivone va ku: “Loko hi ku: ‘I Xikwembu Nkulukumba’, a ta ku: ‘Ha yini mi nga pfumelanga kwake?’ 32 Kambe loko hi ku: ‘I vhanu’ ku ta yentxeka yini hi hine?” A va txhava xitsrhungu, hikusa xitsrhungu hinkwaxu a xi pfumela leswaku Yohane hakunene a a li muprofeta. 33 Xileswo va hlamula Yesu va ku: “A hi swi tivi.” Kutani a va byela a ku: “Na mine a ni nge ti mi byela leswaku ni wu kuma kwini ntamu wa ku yentxa mintxhumu leyi.”

12 Kutani a sungula ku va dondzrisa hi ku tizrisa swifaniso, a ku: “A ku ni wanuna wa kukazri lweyi a byaliki mawuvha a masin’wini yake, a biyela masimu wolawo, a kela mbangu wa ku pfuvela vhinyu ka wone a va a yaka xihondzro; kutani a ma volekisa vadzrimi, a gama a yendzra a ya tikweni dzrin’wana. 2 Hi nkama wa ntsrhovelo, a zruma mutizri leswaku a ya ka vadzrimi a ya mu tekela mihandzru ya kukazri leyi mu lumbaka leyi va yi kumiki ka masimu wolawo ya mawuvha. 3 Kambe va khoma mutizri yelweyo va mu ba, va gama va mu tlhelisa na a nga na ntxhumu. 4 A tlhela a zruma mutizri mun’wana kwavu, na yene va mu bukutela nhloko va tlhela va mu zruketela. 5 A zruma mun’wana, va mu dlaya; a tlhela a zruma van’wana va vanyingi, van’we vavu va va ba van’wana va va dlaya. 6 Hi wugamu a n’winyi wa masimu a zruma n’wanake lweyi a mu zrandzraka, na a tibyela leswi: ‘Va ta mu hlonipha n’wananga.’ 7 Kambe a vadzrimi volavo va byelana va ku: ‘Lweyi hi ye madapfindla. A hi mu dlayeni kutani a pfindla dzri ta va dzrezru.’ 8 Xileswo, va mu khoma va mu dlaya va gama va mu txukumetela handle ka masimu ya mawuvha. 9 Kutani ke, i yini leswi n’winyi wa masimu ya mawuvha a taka swi yentxa? A ta buya a dlaya vadzrimi volavo kutani a teka masimu ya mawuvha a nyika vambeni. 10 Xana a mi ngi ngi dondzra tsralwa ledzri liki: ‘A zribye ledzri vayaki va dzri bakanyiki dzri ndzruluke zribye dzra lisima ku tlula hinkwawu. 11 Dzri pfa ka Yehovha nakone dzra hlamalisa matihlweni yezru’?”

12 Loko valala vake va twa xifaniso lexo, a va djula ku mu khoma hikusa a va swi xiya leswaku a a vulavula hi vone ka xifaniso lexo, kambe a va txhava xitsrhungu. Xileswo va mu tsrhika va suka va famba.

13 Ntsrhaku ka leswo, va zruma Vafarisi van’wana ni ntlawa wa kukazri wa vaseketeli va Heroda akuva va ya mu phasa hi mazritu yake. 14 Loko va tlhasile, va ku: “Mudondzrisi, ha swi tiva leswaku u vulavula ntiyiso futsrhi a wu lweli ku nyonxisa vhanu, hikusa a wu na xihlawuhlawu, kambe u dondzrisa ntiyiso mayelanu na Xikwembu Nkulukumba. Kutani hi byeli, xana swa pfumeleliwa* ku hakela tinemba ka Khezari kumbe a swi pfumeleliwi? 15 Xana swi fanelile ku va hi hakela kumbe a swi fanelanga?” Hi ku xiya wukanganyisi byavu, Yesu a ku: “Mi ni dzringela yini? Ni nyiketani denari leswaku ni dzri vona.” 16 Va mu buyisela dzrone, kutani a va vutisa a ku: “Xana xifaniso lexi ni mazritu lawa i swa mani?” Va mu hlamula va ku: “I swa Khezari.” 17 Kutani Yesu a ku: “Tlhelisani swa Khezari ka Khezari, kambe swa Xikwembu Nkulukumba ka Xikwembu Nkulukumba.” Hiloko va hlamala swinene.

18 A Vasaduki, lava a va nga kholwi leswaku ku ta va ni ku pfuxiwa ka vafi, va mu tsrhindzrekelela va mu vutisa va ku: 19 “Mudondzrisi, Moxe a hi tsraleli leswaku loko mhunu wa kukazri a fa a siya nsati kambe na a nga na vana, makwavu a fanela ku sala a teka nsati wake akuva a sala a mu pswalela vana.* 20 Kutani mhaka hi leyi, a ku ni 7 wa vamakwavu. Lweyi wa ku sungula a teke nsati, kambe a fe na a nga na vana. 21 Kutani a tekiwa hi lweyi wa wubidzri kambe na yene a fa na a nga na vana, swi yentxekisa xiswoswo ni ka lweyi wa wuzrazru. 22 Hinkwavu va 7 a va siyanga vana. Hi wugamu lweyi wansati na yene a fa. 23 Kutani a ku pfuxiweni ka vafi a ta va nsati wa mani? Hikusa hinkwavu va 7 va mu tekile a va nsati wavu.” 24 Yesu a va vutisa a ku: “Lexi xi mi yentxaka mi lahleka a hi mhaka ya leswi mi kalaka mi nga ma tivi Matsralwa nambi ntamu wa Xikwembu Nkulukumba? 25 Hikusa loko va pfuxiwa ku feni, vavanuna a va nge he ti teka nambi vavasati a va nge he ti tekiwa, kambe va ta fana ni tintsrumi ta le tilweni. 26 Kambe mayelanu ni ku pfuka ka vafi, xana a mi dondzranga dzrungula ledzri Moxe a dzri tsraliki mayelanu ni xinsinyana xa mitwa, leswaku Xikwembu Nkulukumba a mu byeli a ku: ‘Hi mine Xikwembu Nkulukumba wa Abrahamu, Xikwembu Nkulukumba wa Izaki na Xikwembu Nkulukumba wa Yakobe?’ 27 Yene a hi Xikwembu Nkulukumba wa lava fiki, kambe i Xikwembu Nkulukumba wa lava hanyaka. Mi lahleki ngopfu swinene.”

28 Mun’we wa vatsrali lweyi a a tile a va a yingela leswi a va bulisana hi swone, hi ku vona leswaku a va hlamuli ha hombe, a mu vutisa a ku: “Hi wini nawu lowukulu* ka hinkwayu?” 29 Yesu a hlamula a ku: “Wa ku sungula hi lowu: ‘Yingela wene Israyele, Yehovha Xikwembu Nkulukumba wezru i Yehovha mun’we, 30 u fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi byaku* hinkwabyu, hi miyanakanyu yaku hinkwayu ni hi ntamu waku hinkwawu.’ 31 Wa wubidzri hi lowu: ‘U fanela ku zrandzra vhanu van’wana hi ndlela leyi u tizrandzraka ha yone.’ A ku na nawu wun’wana lowu wu nga wukulu ku tlula leyi.” 32 Kutani mutsrali yelweyo a mu byela a ku: “Mudondzrisi, u hlaye ntiyiso, ‘Xikwembu Nkulukumba i mun’we, nakone a ku na mun’wana wa ku fana na yene’; 33 futsrhi ku mu zrandzra hi mbilu hinkwayu, hi ku twisisa hinkwaku, hi ntamu hinkwawu ni ku zrandzra vhanu van’wana hi ndlela leyi hi tizrandzraka ha yone, i swa lisima ngopfu swinene ku tlula ku nyikela magandzrelo ya ku hisiwa ni magandzrelo man’wana.” 34 Loko Yesu a swi xiya leswaku wanuna lweyo a hlamuli hi wutlhazri, a mu byela a ku: “A wu le kuli ni Mfumu wa Xikwembu Nkulukumba.” Ntsrhaku ka leswo, a ka ha vanga ni mhunu lweyi a tiyiki ku mu hamba swivutiso swimbeni.

35 Nambitanu, na Yesu a li ku dondzriseni a tempeleni, a vutisa a ku: “Ha yini vatsrali va hlaya leswaku Kriste i n’wana wa Davhida? 36 Hi ku susumeteliwa hi moya wa ku xwenga, Davhida ha byake a te: ‘Yehovha a byele Hosi yanga a ku: “Tsrhamisa vokweni dzranga dzra xinene ku ya tlhasa loko ni beka valala vaku a hansi ka minkondzro yaku.”’ 37 Davhida ha byake a mu vitana Hosi, kutani swi yentxekisa kuyini a va n’wanake?”

A xitsrhungu xa xikulu lexi a xi li kolanu a xi nyonxa hi ku yingela mazritu yake. 38 Na a ya mahlweni a dondzrisa a te: “Tivonelani ka vatsrali lava va zrandzraka ku fambafamba na va yambali timpahla ta ku leha ni ku loseteliwa a mabazara, 39 nakone va zrandzraka switsrhamu swa le mahlweni a masinagogeni ni mimbangu ya ku hlawuleka ngopfu a minkhubyini. 40 Va phanga tiyindlu ta* vavasati lava feliwiki hi vanuna nakone va zrandzra ku hamba swikhongoto swa ku leha akuva va voniwa hi vhanu.* Va ta khatisiwa hi ndlela ya ku vavisa ngopfu swinene.”

41 Yesu a ya tsrhamisa ka mbangu lowu a swi koteka kuva a vona makaxa ya swihanano,* kutani a sungula ku vona ndlela leyi a xitsrhungu a xi peta ha yone mali ka makaxa wolawo, vhanu vanyingi lava a va ganyile a va peta mali ya yinyingi. 42 Kutani ku ta wansati lweyi a a li xisiwana nakone a a feliwe hi nuna, a tlhasa a peta swimalana swibidzri swa lisima dzritsrongo.* 43 Xileswo, a vitana vadondzrisiwa vake a va byela a ku: “Ni mi byela ntiyiso, wansati lweyi wa xisiwana nakone a feliwiki hi nuna a hanane ngopfu ku tlula lavan’wana hinkwavu lava petiki mali ka makaxa ya swihanano. 44 Hikusa hinkwavu va hanane leswi va swi pambuliki ka leswi swi va taleliki, kambe yene, nambileswi a nga xisiwana,* a nyikele hinkwaswu leswi a a li na swone leswi a a ta tihanyisa hi swone.”

13 Loko Yesu a huma tempeleni, mun’we wa vadondzrisiwa vake a mu byela a ku: “Mudondzrisi, vona ku xonga ka mazribye lawa ni miyaku leyi nga tempeleni!” 2 Nambitanu, Yesu a mu byela a ku: “Wa yi vona miyaku leyi leyikulu? Ma ta masiku lawa ku nga tiki sala zribye henhla ka zribye dzrin’wana, ma ta gilhitiwa hinkwawu.”

3 Na a tsrhame Nhaveni ya Minhlwazri, lani a swi koteka ku vona tempele, Petro, Yakobe, Yohane na Andreya va mu vutisa xihundleni va ku: 4 “Hi byeli, xana mintxhumu leyi yi ta yentxeka siku muni, nakone xi ta va xini xikombiso xa leswaku mintxhumu leyi hinkwayu yi kusuhi ni ku hela?” 5 Xileswo, Yesu a sungula ku va byela a ku: “Tivonelani leswaku mi nga hambukisiwi hi mhunu. 6 Vanyingi va ta ta hi vito dzranga va ku: ‘Hi mine Kriste’, nakone va ta hambukisa vanyingi. 7 Handle ka leswo, loko mi yingela hi ta tiyimpi a mimbangwini ya ku siyanasiyana, mi nga txhavi; a mintxhumu leyo yi fanela ku yentxeka, kambe a wugamu byi ta va na byi nga si na tlhasa.

8 “Hikusa a tiko dzri ta lwisana ni tiko dzrimbeni ni mfumu wu ta lwisana ni mfumu wumbeni; ku ta va ni ku tsrekatsreka ka misava a mimbangwini ya ku siyanasiyana, ku tlhela ku va ni ku pfumaleka ka swakuda. A mintxhumu leyi i masungulo ya mahlomulo.

9 “Kambe n’wine tivonelani. Vhanu va ta mi yisa a matribunali, mi ta biwa a masinagogeni nakone mi ta yisiwa mahlweni ka vagovhernadori ni ka tihosi hi mhaka yanga, hi ndlela leyo mi ta kota ku nyikela wumboni kwavu. 10 Nakone a madzrungula lamanene ma fanela ku zranga ma zrezriwa a matikweni hinkwawu. 11 Loko va mi khoma va mi yisa wuhosini, mi nga vileli hi leswi mi taka hlaya swone; kambe hlayani leswi mi taka nyikiwa swone hi nkama wolowo, hikusa a hi n’wine mi vulavulaka, kambe i moya wa ku xwenga. 12 Handle ka leswo, a mhunu a ta nyikela makwavu leswaku a dlayiwa, ni papayi a ta nyikela n’wanake, kasi a vana va ta pfukela vapswele va yentxa leswaku va dlayiwa. 13 Nakone mi ta nyenyiwa hi vhanu hinkwavu hi mhaka ya vito dzranga. Kambe lweyi a tiyiselaka* ku ya tlhasa wugamu a ta huluxiwa.

14 “Nambitanu, loko mi vona ntxhumu wa ku nyenyentsa lowu honetelaka na wu yimi mbangwini lowu a wu nga fanelanga ku yima ka wone (mudondzri a a zami ku swi twisisa), lava va nga Yudeya a va tsrutsrumeli a tinhaveni. 15 Lweyi a nga henhla ka yindlu a nga xiki nambi ku nghena ndlwini kwake a teka ntxhumu wa kukazri; 16 ni lweyi a nga masin’wini a nga tlheli a ya kaya a ya teka xiyambalu xake. 17 Khombo ka vavasati lava va taka va na va ni tinyimba ni lava va taka va na va nyan’wisa a masikwini wolawo! 18 Tamani mi khongota leswaku leswo swi nga yentxeki hi nguva ya wuxika; 19 hikusa masiku wolawo ma ta va masiku ya nhlomulo wa ku a wu ngi ngi sama wu va kone ku sukela loko Xikwembu Nkulukumba a tumbuluxa mintxhumu hinkwayu ku ya tlhasa nkameni wolowo, nakone a wu nge he ti tlhela wu va kone. 20 Nakunene, loko Yehovha a a nga ma pumbanga masiku wolawo, a ku na mhunu lweyi a a ta huluka. Kambe a masiku wolawo a ma pumbile hi mhaka ya vahlawuliwa lava a va hlawuliki.

21 “Kutani loko mhunu wa kukazri a mi byela a ku: ‘Vonani! Hi lweyi Kriste’, kumbe a ku: ‘Vonani! Hi lwiya’, mi nga swi kholwi. 22 Hikusa ku ta humelela lava va taka hemba va hlaya leswaku hi vone Kriste nakone ku ta va ni vaprofeta va madzrimi. Va ta yentxa mahlolana ni mintxhumu ya ku hlamalisa, akuva loko swi koteka, va hambukisa vahlawuliwa. 23 Kambe n’wine tivonelani, ni mi byeli mintxhumu hinkwayu na yi nga si na yentxeka.

24 “Kambe a masikwini wolawo, ntsrhaku ka loko nhlomulo wu helile, a dambu dzri ta mphuma, a n’weti a wu nge he ti vaninga, 25 ni tinyeleti ti ta wa hi le tilweni nakone mintamu ya le tilweni yi ta tsrekatsrekisiwa. 26 Ntsrhaku ka leswo, va ta vona N’wana wa mhunu na a ta hi le matlavini na a ni ntamu lowukulu ni ku phatima. 27 Kutani a ta zruma tintsrumi ti ta hlengeleta vahlawuliwa vake lava humaka ka matlhelo hinkwawu ya misava,* ku sukela a wugan’wini bya misava ku ya tlhasa wugan’wini bya matilo.

28 “Dondzrani ka xifaniso lexi xa nsinya wa nkuwa: Loko mazrwavi ya wone ma sungula ku hluka, ma swi tiva leswaku malanga ma kusuhi. 29 Hi lani ku fanaka, na n’wine loko mi vona mintxhumu leyi hinkwayu yi yentxeka, swi tivani leswaku a le kusuhi a kola tinyangweni. 30 Kunene na mi byela leswaku a lixaka ledzri a dzri nge fi dzri hela na mintxhumu leyi hinkwayu yi nga si na yentxeka. 31 Tilo ni misava swi ta khaluta, kambe mazritu yanga ma nga ka ma nga khaluti.

32 “Mayelanu ni siku ledzro kumbe nkama wa kone a ku na lweyi a swi tivaka, nambi tintsrumi ta le tilweni nambi ko va N’wana, kambe swi tiviwa hi Papayi. 33 Tsrhamani na mi zrindzrile, tsrhamani na mi pfule matihlo, hikusa a mi wu tivi nkama lowu bekisiwiki. 34 Swi fana ni wanuna lweyi a yendzrelaka mbangwini wa le kule, lweyi a siyelaka yindlu yake vatizri vake, a nyika mun’wana ni mun’wana ntizro lowu a fanelaka ku sala a wu yentxa, a tlhela a zruma mulaviseli wa nyangwa leswaku a tsrhama na a zrindzrile. 35 Xileswo, tsrhamani na mi zrindzrile, hikusa a mi wu tivi nkama lowu n’winyi wa muti a taka ta ha wone, swi nga yentxeka a tlhasa a madambyeni, a xikazri ka wusiku, a mpundzrwini* kumbe a mixweni, 36 akuva loko a tlhasa na mi nga swi yimelanga, a nga mi kumi na mi yetlelile. 37 Kambe leswi ni mi byelaka swone, ni byela hinkwavu: Tsrhamani na mi zrindzrile.”

14 A ku sale masiku mabidzri akuva ku va ni Paxkwa ni Nkhuvu wa Mapawu lawa ma kalaka ma nga txheliwanga Fermentu.* Nakone a vaprista lavakulu ni vatsrali a va djuletela maqhinga ya kuva va mu khoma akuva va mu dlaya; 2 hikusa a va ku: “Hi nga mu khomeni hi nkama wa nkhuvu, hikusa vhanu va nga txhuka va pfuxa mpfilumpfilu.”

3 Loko Yesu a li ku deni* a Betaniya a kaya ka Simoni lweyi a a ni nhlokonho, ku te wansati lweyi a a ni xigadzrana xa alabaxta lexi a xi ni mafuzra ya ku nun’hwela, lawa a ma hambiwe hi narda dzra dzrinene, ya ku dula ngopfu swinene. Kutani a pfula xigadzrana xolexo xa alabaxta a sungula ku mu txhela nhlokweni. 4 Loko va vona leswo, van’we va byelana na va kazratekile va ku: “Ha yini ku tlangiwa hi mafuzra lawa ya ku nun’hwela? 5 Hikusa a mafuzra lawa a ma ta xavisiwa hi mali ya ku tlula 300 wa madenari kutani mali ya kone yi nyikiwa swisiwana!” Xileswo, va mu kwatela ngopfu wansati yelweyo.* 6 Kambe Yesu a ku: “Tsrhikani wansati lweyi. Mi mu kazratela yini? I swinene leswi a ni yentxeliki swone. 7 Hikusa a swisiwana mi tsrhama na swone nkama hinkwawu, nakone mi nga swi yentxela wunene nkama wun’wana ni wun’wana lowu mi wu djulaka, kambe mine a mi nge ti va na mine nkama hinkwawu. 8 A yentxe leswi a swi kotiki, a txheli mizri wanga mafuzra ya ku nun’hwela, akuva a wu lulamisela na ni nge si na lahliwa. 9 Kunene na mi byela, kun’wana ni kun’wana lomu madzrungula lamanene ma taka zrezriwa kone a misaveni hinkwayu, leswi wansati lweyi a swi yentxiki swi ta khaneliwa akuva a dzrimukiwa ha swone.”

10 Kutani Yudasi Iskariyota lweyi a a li mun’we wa lava 12, a suke a ya khanelisana ni vaprista lavakulu hi nkongometo wa ku mu wonga a mu nyikela kwavu. 11 Loko va twa leswo, va nyonxa ngopfu, kutani va mu dumbisa ku mu nyika a mali ya prata. Xileswo a sungula ku djuletela mukhandlu wa ku mu wonga.

12 Kutani hi siku dzra ku sungula dzra Nkhuvu wa Mapawu lawa ma kalaka ma nga txheliwanga Fermentu,* ledzri a va tolovela ku nyikela magandzrelo ya Paxkwa hi dzrone, a vadondzrisiwa vake va mu vutisa va ku: “U djula hi ya ku lulamiselela kwini akuva u ta dela kone Paxkwa?” 13 Xileswo, a zruma vadondzrisiwa vake vabidzri a va byela a ku: “Fambani doropeni, mi ta tlhangana ni wanuna lweyi a zrwaliki hotsro ya mati. Mu landzrani, 14 lomu a taka nghena kone, byelani n’winyi wa muti mi ku: ‘Mudondzrisi a li: “Dzri kwini a sala dzra vayeni ledzri ni nga delaka ka dzrone a Paxkwa ni vadondzrisiwa vanga?”’ 15 Kutani a ta mi komba sala dzra dzrikulu ledzri kumekaka henhla, ledzri dzri nga ni leswi vilelekaka akuva hi dzri tizrisa. Hi lulamiselelani Paxkwa kolanu.” 16 Xileswo a vadondzrisiwa va famba, va nghena doropeni va swi kumisa xileswi Yesu a va byelisiki xiswone, kutani va lulamisela Paxkwa.

17 Loko dzri pelile, a ta ni lava 12. 18 Loko va tsrhame menzeni va li ku deni, Yesu a va byela a ku: “Kunene na mi byela, mun’we wenu lweyi a daka na mine a ta ni wonga.” 19 Kutani va sungula ku kazrateka va mu vutisa ha mun’we mun’we va ku: “Xana hi mine?” 20 A va hlamula a ku: “I mun’we wenu n’wine va 12, lweyi hi petaka voko xikan’we ka tijela. 21 Hikusa a N’wana wa mhunu awa famba, hi lani swi tsraliwiki ha kone mayelanu na yene, kambe khombo ka lweyi a wongaka N’wana wa mhunu! A swi ta yampswa loko mhunu wa kone a a nga pswaliwanga.”

22 Na va ha li ku deni, a teka pawu, a khongota, a dzri khemelela a gama a va nyika a ku: “Tekani mi da; dzri yimela mizri wanga.” 23 A tlhela a teka kopo dzra vhinyu, a hamba xikhongoto xa ku tlangela a gama a va nyika, kutani hinkwavu va nwa hi dzrone. 24 A va byela a ku: “Vhinyu ledzri dzri yimela ‘ngati yanga ya xipfumelelanu’, leyi taka halatiwa akuva ku pfuneka vhanu vanyingi. 25 Kunene na mi byela, a ni nge he txhuki ni nwa vhinyu ledzri ku ya tlhasa siku ledzri ni taka nwa vhinyu ledzrimpshwa a Mfun’wini wa Xikwembu Nkulukumba.” 26 Hi wugamu, ntsrhaku ka loko va yimbelelile va dzrumisa Xikwembu Nkulukumba,* va suka va ya Nhaveni ya Minhlwazri.

27 Kutani Yesu a va byela a ku: “Hinkwenu a lipfumelo dzrenu dzri ta tsrekatsreka,* hikusa ku tsraliwe leswi: ‘Ni ta ba mubyisi, kutani a tihamba ti ta hangalaka.’ 28 Kambe loko ni ta pfuxiwa ku feni ni ta ya Galileya, mi ta ya ni kuma kone.” 29 Kambe Petro a mu byela a ku: “Nambiloko lipfumelo dzra hinkwavu dzri ngo tsrekatsreka, dzranga a dzri nge ti tsrekatsreka.” 30 Loko Yesu a twa leswo, a mu byela a ku: “Kunene na ku byela leswaku namunhla, ina, wusiku byolebyi, na nkuku wu nga si na yimba kabidzri, u ta ni landzrula kazrazru.” 31 Kambe Petro a tama a phikelela a ku: “Nambiloko swi ngo djula ni fa na wene, a ni nge ti txhuka ni ku landzrula.” Ni lavan’wana hinkwavu na vone va sungula ku hlaya leswi fanaka.

32 Hiloko va tlhasa a mbangwini lowu vitaniwaka Getsemani, a byela vadondzrisiwa vake a ku: “Tsrhamani kola na ha ya khongota.” 33 A teka Petro, Yakobe na Yohane a famba na vone, kutani a sungula ku va ni gome ledzrikulu a tlhela a kazrateka ngopfu swinene. 34 A va byela a ku: “Ni tlhaveke ngopfu swinene a mbilwini yanga lakakuva nambi ku fa ni nga fa. Salani kola mi tama mi zrindzra.” 35 Kutani a tsrhindzreka kulenyana na vone, a khinsama a sungula ku khongota leswaku loko swi koteka, a nkama wolowo wa ku kazrata wu nga mu tlhaseli. 36 A ku: “Abba,* Papayi, mintxhumu hinkwayu ya koteka kwaku, susa kopo ledzri kwanga. Kambe, ku nga yentxeki ku zrandzra kwanga, a ku yentxeki ku zrandzra kwaku.” 37 Kutani loko a tlhela, a va kuma na va khutsriyelile, a byela Petro a ku: “Simoni, u le ku yetleleni? U hluleke ku tama u zrindzra nambi ko va wora dzrin’we? 38 Tsrhamani na mi zrindzrile, mi ya mahlweni mi khongota akuva mi nga weli ndzringweni. Nakunene, a mbilu ya swi djula, kambe a mizri a wu na ntamu.” 39 A tlhela a suka a ya khongota, a hlaya mintxhumu yoleyi ya yin’we. 40 A tlhela a buya a va kuma na va khutsriyelile, hikusa a matihlo yavu a ma bindzriwa hi wuzrongo, xileswo va pfumali ni xa ku mu byela xone. 41 Kutani a tlhela a buya ka vadondzrisiwa vake hi khambi dzra wuzrazru a va byela leswi: “Mi le ku yetleleni mi wisa hi nkama wa ku fana ni lowu! Tsrhikani ku yetlela! A nkama wu tlhasile! Lavisani, a N’wana wa mhunu awa wongiwa a nyikeliwa a mavokweni ya vadohi. 42 Pfukani hi famba. Lweyi a ni wongaka a kola kusuhi.”

43 Hi ku kahlula, na a ha vulavula, Yudasi, lweyi a a li mun’we wa lava 12, a tlhasa na a ni xitsrhungu lexi a xi ni swipada ni tinhonga, lexi a xi zrumiwe hi vaprista lavakulu, vatsrali ni vakulukumba. 44 A muwongi wake a a va byele ndlela leyi a a ta va komba ha yone, a ku: “Lweyi ni taka mu n’qunta, hi yelweyo, mu khomani mi famba na yene na a voneleliwa.” 45 A kongoma Yesu a mu tsrhindzrekelela a ku: “Rabi!” a gama a mu n’qunta. 46 Xileswo va mu khoma va famba na yene. 47 Nambitanu, mun’we wa lava a va yimi kolanu a humesa xipada xake a tsrema nandzra wa muprista lwenkulu, a mu susa ndleve. 48 Kambe Yesu a va byela a ku: “Mi buya mi ta ni khoma na mi ni swipada ni tinhonga ingiki hi loko no va muyivi? 49 Siku ni siku a ni na n’wine tempeleni ni dondzrisa, kambe a mi ni khomanga. Nambitanu, leswi swi yentxeka akuva ku hetiseka matsralwa.”

50 Kutani a vadondzrisiwa hinkwavu va mu siya va tsrutsruma. 51 Kambe djaha dzra kukazri ledzri a dzri yambale xiyambalu xin’we ntsena lexi a xi hambiwe hi panu ya lisima,* dzri sungula ku mu landzrelela hi le kusuhi, kutani vhanu va dzringisa ku dzri khoma, 52 kambe dzri siya xiyambalu xa dzrone xa linyu dzri tsrutsruma na dzri nga yambalanga ntxhumu.*

53 Kutani va yisa Yesu ka muprista lwenkulu, hi loko ku hlengeletana hinkwavu vaprista lavakulu, vakulukumba kun’we ni vatsrali. 54 Kambe Petro a tama a mu landzra hi le kule ku ya tlhasa a mutini wa muprista lwenkulu; kutani a ya tsrhama ni vatizri va muti wolowo a wozra ndzrilo. 55 A vaprista lavakulu ni Sanedri hinkwadzru a va djuletela wumboni bya ku hehla Yesu akuva va mu dlaya, kambe a va nga byi kumi. 56 Nakunene, vanyingi a va nyikela wumboni bya madzrimi mayelanu na yene akuva va mu hehla, kambe a wumboni byavu a byi lwisana. 57 Futsrhi a ku ni van’wana lava a va sekeleka va nyikela wumboni bya madzrimi mayelanu na yene, va ku: 58 “Hi mu yingeli na a ku: ‘Ni ta gilhita tempele ledzri, ledzri yakiwiki hi mavoko, kutani ni ta yaka dzrin’wana hi masiku mazrazru ledzri kalaka dzri nga yakiwanga hi mavoko.’” 59 Kambe nambi ka mhaka leyi a wumboni byavu a byi lwisana.

60 Kutani a muprista lwenkulu a sekeleka a yima makazri kwavu a vutisa Yesu a ku: “A wu na xa ku xi hlaya? A wu swi twi leswi vavanuna lava va ku lumbetaka swone?” 61 Kambe Yesu a tama a miyela a nga mu hlamuli ntxhumu. A muprista lwenkulu a tlhela a mu vutisa a ku: “Xana hi wene Kriste N’wana wa Xikwembu Nkulukumba Lweyi a Xwengiki?” 62 Kutani Yesu a hlamula a ku: “Hi mine, nakone u ta vona N’wana wa mhunu na a tsrhame a vokweni dzra xinene dzra Xikwembu Nkulukumba wa Ntamu Hinkwawu* na a ta hi le matlavini ya le tilweni.” 63 Loko a twa leswo, muprista lwenkulu a handzrula mpahla yake a ku: “Ha ha ti djulela yini timboni tin’wana? 64 Mi mu yingelile loko a yeyisa Xikwembu Nkulukumba. Mi li yini hi swone?” Hinkwavu va hlaya leswaku a faneliwa hi lifu. 65 Kutani van’wana va sungula ku mu thukela mazri va tlhela va mu funeketa wuso va mu ba swibakela va ku: “Profeta ka!” Ntsrhaku ka loko vazrindzri va le tribunali va mu yamaseli timpama a wusweni, va mu teka va famba na yene.

66 Na Petro a ha tsrhame mutini, ku tlhasa mun’we wa vatizri va xisati va muprista lwenkulu. 67 Loko nandzra lweyo a vona Petro na a wozra ndzrilo, a mu lavisisisa kutani a ku: “Na wene a wu na Yesu wa Munazareta.” 68 Kambe a yala a ku: “A ni mu tivi ni ku mu tiva, nambileswi u khanelaka hi swone a ni swi twisisi”, kutani a suka a ya nyangweni. 69 Na a li nyangweni, a tlhela a voniwa hi nandzra lweyo wa xisati kutani a byela lava a va yimi kolanu a ku: “Lweyi i mun’we wa vone.” 70 A tlhela a yala. Ntsrhakunyana ka leswo, lava a va li mbangwini wolowo va tlhela va byela Petro va ku: “Nakunene u mun’we wa vone, hikusa vhela u Mugalileya.” 71 Kambe a sungula ku hlambanya a tlhela a txhikitxha a ku: “A ni mu tivi wanuna lweyi mi vulavulaka hi yene!” 72 Hi nkama wolowo a nkuku wu yimba hi khambi dzra wubidzri, kutani Petro a dzrimuka leswi Yesu a mu byeliki swone loko a ku: “Na nkuku wu nga si na yimba kabidzri, u ta ni landzrula kazrazru.” Kutani a tlhaveka ngopfu swinene a sungula ku dzrila.

15 Na bya ha ku xa, a vaprista lavakulu, vakulukumba ni vatsrali, ina, Sanedri hinkwadzru, va hlengeletanile akuva va vonisana leswaku va nga yentxa yini hi Yesu. Ntsrhaku ka loko va mu tsrimbile, va mu teke va mu yisa ka Pilatu. 2 Kutani Pilatu a mu vutisa a ku: “Xana u Hosi ya Vayuda?” Yesu a mu hlamula a ku: “Wene ha byaku u hlaya swone.” 3 Kambe a vaprista lavakulu a va mu lumbeta mintxhumu ya yinyingi. 4 Kutani Pilatu a tlhela a mu vutisa a ku: “A wu na xa ku xi hlaya? A wu swi twi hinkwaswu leswi va ku lumbetaka swone?” 5 Kambe Yesu a nga mu hlamulanga ntxhumu, lakakuva Pilatu a hlamala.

6 Ka nkhuvu wun’wana ni wun’wana, a a talisa ku ntsrhunxela vhanu xib’otxhwa xin’we lexi a va xi hlawula. 7 Hi nkama wolowo a ku ni wanuna lweyi a vitaniwaka Barabasi lweyi a a pfaleliwe djele kun’we ni vapfukeli van’wana va mfumu, lava loko va pfukele mfumu va dlayeteliki vhanu. 8 Kutani a xitsrhungu xi ya ka Pilatu xi sungula ku mu kombela leswaku a xi yentxela leswi a a talisa ku xi yentxela swone. 9 A va vutisa a ku: “Mi djula leswaku ni mi ntsrhunxela Hosi ya Vayuda?” 10 Hikusa Pilatu a a swi tiva leswaku a vaprista lavakulu va mu nyikele hi leswi a va mu tsrhohoka. 11 Kambe a vaprista lavakulu va hlohlotela a xitsrhungu leswaku xi kombela kuva ku ntsrhunxiwa Barabasi a matsrhan’wini ya Yesu. 12 Pilatu a tlhela a ku: “Kutani ni mu yentxa yini lweyi mi mu vitanaka Hosi ya Vayuda?” 13 Va tlhela va bandlukana va ku: “A a hayekiwi mhandzrini!”* 14 Kambe Pilatu a ya mahlweni a va vutisa a ku: “Ha yini? A yentxe yini xa ku biha?” Nambitanu, va bandlukana ngopfu swinene va ku: “A a hayekiwi mhandzrini!”* 15 Kutani Pilatu, hi ku djula ku nyonxisa xitsrhungu, a va ntsrhunxela Barabasi; nakone ntsrhaku ka loko a zrumise leswaku Yesu a pshwitiwa, a mu nyikeli leswaku a ya dlayiwa a mhandzrini.

16 Kutani a masotxha ma mu teka ma famba na yene kaya ka govhernadori,* ma tlhasa ma vitana ntlawa hinkwawu wa masotxha. 17 Kutani ma mu tsrimba kapulana dzra ku pshwuka ma tlhela ma hamba hazri ya mitwa ma mu tlhanteka nhlokweni; 18 ma sungula ku mu losa ma ku: “Hi loselile* Hosi ya Vayuda!” 19 Nakone ma mu ba nhloko hi nhonga, ma mu thukela mazri ma gama ma mu khinsamela. 20 Loko ma heta ku mu hamba xihlekiso, ma mu susa kapulana dzra ku pshwuka ma mu yambexa mpahla yake. Kutani ma famba na yene akuva a ya gongondzreliwa a mhandzrini. 21 Ma tlhela ma sindzrisa Simoni wa le Kirene, lweyi a a li papayi wa Alexandri na Rufu, leswaku a zrwala mhandzri ya Yesu ya nxanisa.* Yene a o khaluta hi ndlela na a buya hi ntlhaveni.

22 Xileswo va yisa Yesu a mbangwini lowu vitaniwaka Golgota, leswi loko swi ndzruluteliwa swi liki: “Mbangu wa Pala.” 23 A mbangwini wolowo, a masotxha ma dzringise ku mu nyika vhinyu ledzri txheliwiki mintxhumu ya ku bava ngopfu, kambe a yale ku nwa. 24 Kutani ma mu gongondzrela a mhandzrini ma gama ma hamba wuhlolotwana akuva ma tiva leswaku loko ma yavelana mpahla yake i mani a taka teka yini. 25 A ku li kolomu ka ma 9 wora* loko va mu gongondzrela a mhandzrini. 26 Nakone a mazritu lawa a va mu lumbeta ha wone lawa a ma tsraliwile, a ma ku: “Hosi ya Vayuda.” 27 Va patsre ni ku gongondzrela swigevengu swibidzri a matlhelweni kwake, xin’we ka tlhelo dzra xinene, xin’wana ka tlhelo dzra ximatsri. 28 *—— 29 Lava a va khaluta hi ndlela a va zruketela Yesu na va hlakahla tinhloko va ku: “Ha! Wene a wu ku u ta gilhita tempele u tlhela u dzri yaka hi masiku mazrazru, 30 tihuluxi ka, u xika a mhandzrini ya nxanisa.”* 31 Hi lani ku fanaka, a vaprista lavakulu ni vatsrali na vone a va mu poyilela va ku: “Van’wana a va huluxile; kambe yene a nga swi koti ku tihuluxa! 32 A a xiki a mhandzrini ya nxanisa* swoswi, yene Kriste, Hosi ya Israyele, akuva hi ta swi vona kutani hi mu kholwa.” Nambi lava a va gongondzreliwe matlhelweni kwake a va mu zruka.

33 Ku sukela kolomu ka ma 12* ku ve ni munyama a misaveni hinkwayu ku ya tlhasa kolomu ka ma 15 wora.* 34 Hi nkama wolowo wa ma 15 wora, Yesu a hlaye hi zritu dzra ku tlakuka a ku: “Eli, Eli, lama sabaktani?” Leswi loko swi ndzruluteliwa swi liki: “Xikwembu Nkulukumba wanga, Xikwembu Nkulukumba wanga, u ni tsrhikele yini?” 35 Loko van’we ka lava a va yime kolanu va twa leswo, va ku: “Ma mu twa! A vitana Eliya.” 36 Kutani mhunu wa kukazri a tsrutsruma a ya teka xipontxhi a xi peta ka vhinyu dzra ku bava, a xi tlhoma ka nhonga a mu nyika akuva a nwa, a ku: “Mu tsrhikani! Hi djula ku swi vona loko Eliya a ta buya a mu xixa.” 37 Kambe Yesu a bandlukana swinene a gama a fa.* 38 A kortina ledzri nga tempeleni* dzri handzruka hi xikazri ku sukela henhla ku ya hansi. 39 Kutani loko muzrangeli wa masotxha lweyi a a yime mahlweni kwake a vona leswi yentxekiki loko a fa, a ku: “Hakunene wanuna lweyi a a li N’wana wa Xikwembu Nkulukumba.”

40 A ku ni vavasati lava a va yime hi kule va hlalela leswi a swi yentxeka, a xikazri ka vone a ku na Mariya Magadala, Mariya mamana wa Yakobe Lwentsrongo na Yose, kun’we na Salome. 41 Vavasati lava a va fambafamba na yene nakone a va mu pfuna nkama lowu a a li Galileya. Futsrhi a ku ni vavasati van’wana vavanyingi lava fambiki na yene a Yerusalema.

42 Leswi kutani a dzri ya ku peleni, nakone a ku li siku dzra ku Lulamisela Savata,* 43 ku te Yosefa wa le Arimateya, lweyi a a li xizro lexi hloniphiwaka xa Tribunali Ledzrikulu dzra Vayuda, lweyi na yene a a yimela ku ta ka Mfumu wa Xikwembu Nkulukumba. Wanuna lweyi a kanye mbilu a ya ka Pilatu a ya kombela ntsrumbu wa Yesu. 44 Kambe loko Pilatu a byeliwa leswaku Yesu a file, a nga kholwanga, xileswo a vitana muzrangeli wa masotxha a mu vutisa leswaku Yesu a file kumbe a ha hanya. 45 Ntsrhaku ka loko muzrangeli wa masotxha a mu kholwisile leswaku a file, Pilatu a nyike Yosefa ntsrumbu wa Yesu. 46 Loko Yosefa a xave panu ya ku basa ya lisima,* a ye mu hawula a mu tsrondzriyela hi panu yoleyo kutani a mu beka ka sizra ledzri a dzri kovotliwile a zribyeni; a gama a vumbulutela zribye a pfala nyangwa wa sizra. 47 Kambe Mariya Magadala na Mariya mamana wa Yose va tame va lavisa lani a a lahliwe kone.

16 Loko Savata dzri khalutile, Mariya Magadala, Mariya mamana wa Yakobe, kun’we na Salome va xave mizri ya ku nun’hwela akuva va ya tota ntsrumbu wa Yesu. 2 Hi siku dzra ku sungula dzra vhiki va suke mpundzrwini va ya sizreni, va ya tlhasa na dambu dzri sungula ku huma. 3 A va vutisana va ku: “I mani a taka hi vumbulutela zribye ledzri pfaliki nyangwa wa sizra?” 4 Kambe loko va langute nyangwa wa sizra, va vone leswaku a zribye a dzri vumbuluteliwile dzri susiwa, nambileswi a dzri li dzrikulu swinene. 5 Loko va nghene sizreni, va vone djaha na dzri tsrhamise ka tlhelo dzra xinene dzra sizra, na dzri yambale mpahla ya ku basa ya ku leha, kutani va hlamala. 6 Dzri va byeli dzri ku: “Mi nga hlamali. Mi djuletela Yesu wa Munazareta lweyi a dlayiwiki mhandzrini. A pfuxiwile. A nga kone lani. Lavisani, a a latiwe lani. 7 Kambe fambani mi ya byela vadondzrisiwa vake kun’we na Petro mi ku: ‘Swoswi a le ndleleni ya ku ya a Galileya. Mi ta ya mu vona kohala, hi lani a mi byeliki ha kone.’” 8 Xileswo, loko va hume hi sizreni, va fambe hi ku tsrutsruma na va txhava va tlhela va hlamala ngopfu swinene. A va byelanga mhunu mhaka leyi, hikusa a va txhava.*