MADZRUNGULA LAMANENE LAMA TSRALIWIKI HI LUKA

1 Vanyingi va tikazrateli ku hlengeleta ni ku tsrala timhaka leti hi ti dumbaka* hi ku helela, 2 hi lani hi dzrunguleliwiki ha kone hi lava ku sukela a ku sunguleni va viki timboni leti voniki timhaka leto ni ku tlhela va ti zrezra, 3 na mine, ntsrhaku ka loko ni kambisise timhaka hinkwatu ha hombe ku sukela a ku sunguleni, ni vone swi yampswa ku ku tsralela tone hi ku longoloka ka tone, wene mutxhaviseki Teyofilo, 4 akuva u ta wu twisisa ha hombe ntiyiso wa timhaka leti u dondzrisiwiki tone.

5 A masikwini ya ku fuma ka Heroda,* hosi ya Yudeya, a ku ni muprista lweyi a a vitaniwa Zakariya, wa ntlawa wa Abiya. A nsati wa Zakariya a a li mun’we wa vatukulu va Aroni, a vito dzrake a a li Elizabeti. 6 Hi wubidzri byavu a va lulamile a mahlweni ka Xikwembu Nkulukumba nakone a va nga na xa ku soliwa hi xone, a va landzra milawu ni swileleto hinkwaswu swa Yehovha. 7 Kambe a va nga na n’wana hikusa Elizabeti a a nga beleki,* nakone hi wubidzri byavu a va duhwalile.

8 Nkama lowu Zakariya a a yentxa ntizro wake wa wuprista a mahlweni ka Xikwembu Nkulukumba hi masiku lawa ntlawa wake a wu yaveliwe ku tizra ha wone, 9 hi ku landzra matizrela ya* wuprista, ku tlhase khambi dzrake dzra ku hisa muzri wa ku nun’hwela a tempeleni dzra Yehovha. 10 Hi nkama lowu a ku hisiwa muzri wa ku nun’hwela, a xitsrhungu hinkwaxu a xi li ku khongoteni hala handle. 11 Kutani ku humelela ntsrumi ya Yehovha a mahlweni kwake, yi yima ka tlhelo dzra xinene dzra altari ledzri a ku hiseliwa ka dzrone muzri wa ku nun’hwela. 12 Kambe loko Zakariya a yi vona, a sungula ku kazrateka a tlhela a txhava ngopfu swinene. 13 Nambitanu, a ntsrumi yi mu byela yi ku: “U nga txhavi Zakariya, hikusa Xikwembu Nkulukumba a swi yingelile swikombelo swaku, nakone a nsati waku Elizabeti a ta ku pswalela n’wana wa djaha, u ta mu txhula vito dzra ku Yohane. 14 U ta nyonxa ngopfu swinene, nakone vanyingi va ta nyonxa hi ku pswaliwa kwake, 15 hikusa a ta va nkulu a matihlweni ya Yehovha. Kambe a nga fanelanga a nwa vhinyu nikutsrongo kumbe byala byin’wana lebyi popswisanaka, a ta tala hi moya wa ku xwenga nambiloko a nga si na pswaliwa,* 16 nakone a ta pfuna Vaisrayele vanyingi akuva va tlhelela ka Yehovha Xikwembu Nkulukumba wavu. 17 Handle ka leswo, Xikwembu Nkulukumba a ta zranga a zruma n’wanaku, a ta mu zruma na a ni ntamu wa ku fana ni wa Eliya, akuva a txintxa timbilu ta vapswele ti fana ni ta vana ni ku pfuna lava nga yingisetiki leswaku va yentxa mintxhumu hi wutlhazri va tlhela va yentxa leswinene, akuva a va yentxa va va vhanu lava lulameliki ku tizrela Yehovha.”

18 Zakariya a byela ntsrumi a ku: “Ni nga swi kholwisa kuyini swoleswo? Hikusa ni duhwalile, na yene nkatanga a duhwalile.” 19 A ntsrumi yi mu hlamula yi ku: “Hi mine Gabriyele, ni yima mahlweni ka Xikwembu Nkulukumba nakone ni zrumiwe ku ta khanela na wene ni ku ku nyika ndzrava leyi leyinene. 20 Kambe swoswi u ta va mbheveve, a wu nge he ti swi kota ku khanela ku ya tlhasa loko mintxhumu leyi yi hetiseka, hikusa a wu ma kholwanga mazritu yanga, lawa ma taka hetiseka hi nkama lowu bekisiwiki.” 21 Hi nkama wolowo, vhanu a va tama va yimela Zakariya, nakone a va hlamalisiwa hi leswi a a hlwela ngopfu a tempeleni. 22 Loko a huma, a a nga ha swi koti ku khanela na vone, kutani va swi xiya leswaku loko a li tempeleni a vone ntxhumu lowu kalaka wu nga tolovelekanga.* A a ya mahlweni a vulavula na vone hi ku kombetela hi mavoko kambe a a tama a va mbheveve. 23 Loko a tlhanganisile masiku yake ya ku tizra a tempeleni, a muke kaya.

24 Ntsrhaku ka masikunyana, nkatake Elizabeti a kume nyimba, nakone a tsrhamise kaya kwake ku dzringana ntlhanu wa tihweti na a nga humahumi, a a ku: 25 “Yehovha a yentxe leswi akuva a ni pfuna. A ni dzrimukile akuva a susa tingana tanga a vhanwini.”

26 Na nyimba yake yi ni 6 wa tihweti, Xikwembu Nkulukumba a zrumeli ntsrumi Gabriyele ka doropa dzra le Galileya ledzri vitaniwaka Nazareta, 27 yi ya ka n’hwanyana* lweyi a a dumbisiwe mutxhatu hi wanuna lweyi a vitaniwaka Yosefa, wa ndangu wa Davhida, nakone a vito dzra n’hwanyana lweyo a a li Mariya. 28 Loko ntsrumi yi tlhasile lani a a li kone, yi te: “Xawani, wene lweyi a nyonxeliwaka ngopfu swinene, Yehovha a na wene.” 29 Kambe Mariya a kazrateka ngopfu hi ku twa mazritu lawo, lakakuva a tivutisa leswaku a malosela wolawo ma nga va na ma tlhamuxela swaku yini. 30 Xileswo, a ntsrumi yi mu byela yi ku: “U nga txhavi Mariya, hikusa Xikwembu Nkulukumba awa ku nyonxela. 31 Nakone swoswi u ta va ni nyimba, u ta pswala n’wana wa djaha, u ta mu txhula vito dzra ku Yesu. 32 N’wana lweyi a ta va nkulu nakone a ta vitaniwa N’wana wa Lweyi a Tlakukiki Ngopfu, Yehovha Xikwembu Nkulukumba a ta mu nyika xiluvelo xa papayi wake Davhida, 33 a ta fuma yindlu ya Yakobe hi lani ku nga helikiki, nakone a Mfumu wake a wu nge ti va ni wugamu.”

34 Kambe Mariya a vutisa ntsrumi a ku: “Xana leswo swi ta yentxekisa kuyini hikusa a ni ngi ngi sama ni yetlela ni wanuna?” 35 A ntsrumi yi mu hlamula yi ku: “A moya wa ku xwenga wu ta va henhla kwaku, nakone a ntamu wa Lweyi a Tlakukiki Ngopfu wu ta ku funeketa. Hi ndlela leyo, lweyi a taka pswaliwa a ta vitaniwa lweyi wa ku xwenga, N’wana wa Xikwembu Nkulukumba. 36 Nakone a xaka dzraku Elizabeti lweyi va liki i mhika, na yene a ni nyimba nambileswi a duhwaliki, a ta pswala n’wana wa djaha, leyi i hweti yake ya wu 6; 37 hikusa a xi kone lexi Xikwembu Nkulukumba a xi hlayaka xi taka kala xi nga hetiseki.”* 38 Kutani Mariya a ku: “Ni nandzra wa Yehovha! A swi yentxeki hi ku ya hi mazritu yaku.” Xileswo, a ntsrumi yi suka yi famba.

39 Ntsrhakunyana a masikwini wolawo, Mariya a yendzre a ya tikweni dzra tinhava a doropeni dzra Yuda, 40 a tlhasa a nghena kaya ka Zakariya kutani a losa Elizabeti. 41 Loko Elizabeti a yingela Mariya na a mu losa, a n’wana lweyi a a li khuzrini dzrake a sungula ku txhukatxhuka, kutani Elizabeti a tala hi moya wa ku xwenga, 42 a hlaya hi zritu dzra ku tlakuka a ku: “U tovokile a xikazri ka vavasati, nakone a tovokile n’wana lweyi a nga khuzrini dzraku! 43 No va mani mine akuva ni yendzreliwa hi mamana wa Hosi yanga? 44 Hikusa loko ni yingele zritu dzraku loko u ni losa, a n’wana lweyi a nga khuzrini dzranga a ntlulantlulile hi ku nyonxa. 45 Nakone awa nyonxa lweyi a kholwiki, hikusa mazritu hinkwawu lawa a byeliwiki wone hi Yehovha ma ta hetiseka hi ku helela.”

46 Kutani Mariya a ku: “Ni* dzrumisa Yehovha, 47 nakone a mbilu yanga ya nyonxa swinene hi mhaka ya leswi Xikwembu Nkulukumba, Muhuluxi wanga, a ni yentxeliki swone, 48 hikusa Xikwembu Nkulukumba a vone wusiwana byanga, mine nandzra wake. Ku sukela ka swoswi tinxaka hinkwatu ti ta hlaya leswaku ni tovokile, 49 hikusa Lweyi wa ntamu hinkwawu a ni yentxele mintxhumu ya ku hlamalisa, nakone a vito dzrake dzri xwengile, 50 futsrhi minkama hinkwayu lava mu txhavaka a va komba timpswalu. 51 A yentxe mintxhumu leyikulu ngopfu swinene hi voko dzrake, a hangalase lava tikulisaka. 52 A suse lava nga ni wulawuli a switsrhan’wini swavu, a tlakuxa lava titsrongahataka; 53 lava nga ni ndlala a va xuzrisile hi mintxhumu leyinene kasi lava ku ganya a va tlhelise na va nga na ntxhumu. 54 A pfune Israyele nandzra wake, nakone hi ku yentxa leswo a kombisi leswaku awa xi dzrimuka xidumbiso xake, 55 a dumbise leswaku a a ta kombisa timpswalu Abrahamu ni vanake* hi lani ku nga helikiki, ku nga leswi a swi byeliki vakokwana vezru.” 56 Mariya a tsrhame na Elizabeti kolomu ka tihweti tizrazru a gama a tlhelela kaya kwake.

57 Kutani ku tlhasa nkama wa kuva Elizabeti a phuluka, a va a phuluka n’wana wa djaha. 58 Loko vayakelani ni maxaka yake va yingela leswaku Yehovha a mu kombe wunene* lebyikulu, va nyonxa kun’we na yene. 59 Hi siku dzra wu 8 va ye sokisa n’wana, nakone a va djula ku mu txhula vito dzra papayi wake, Zakariya. 60 Kambe mamana wake a ku: “Im-him! A vito dzrake a ta va Yohane.” 61 Loko va twa leswo, va mu byela va ku: “Ka maxaka yaku a ku na mhunu ni mun’we a nga ni vito ledzro.” 62 Kutani va vutisa papayi wa n’wana hi ku tizrisa mavoko leswaku hi dzrini vito ledzri a djulaka leswaku a n’wana a txhuliwa dzrone. 63 Xileswo, a kombela xipulangwana a va a tsrala a ku: “A vito dzrake i Yohane.” Kutani hinkwavu va hlamala. 64 Hi nkama wolowo a lidzrimi dzrake dzri ntsrhunxeka, kutani a sungula ku vulavula a dzrumisa Xikwembu Nkulukumba. 65 A vayakelani vavu hinkwavu va sungula ku txhava, nakone hinkwaswu leswi yentxekiki swi sungula ku hangalaka a tikweni hinkwadzru dzra le Yudeya ledzri nga ni tinhava. 66 Hinkwavu lava a va swi yingela a va tama va yanakanyisisa hi swone, na va tivutisa va ku: “Kasi a n’wana lweyi a ta va yini?” Hikusa nakunene a voko dzra Yehovha a dzri li na yene.

67 Kutani Zakariya papayi wa n’wana a tala hi moya wa ku xwenga a profeta, a ku: 68 “A ku dzrumisiwi Yehovha Xikwembu Nkulukumba wa Israyele, hikusa a dzrimuki vhanu vake kutani a va huluxa. 69 A hi nyike muhuluxi* lweyi a nga ni ntamu lweyi a nga wa ndangu wa nandzra wake Davhida, 70 hi lani a hlayiki ha kone hi ku tizrisa vaprofeta vake va ku xwenga va khale, 71 akuva hi huluxiwa ka valala vezru ni le mavokweni ya hinkwavu lava hi vengaka; 72 akuva a hi kombisa timpswalu hi lani a dumbisiki vakokwana vezru ha kone ni ku dzrimuka xipfumelelanu xake xa ku xwenga, 73 ku nga xihlambanyu lexi a xi yentxeliki kokwana wezru Abrahamu, 74 xa ku va ntsrhaku ka loko a hi tizrulile a mavokweni ya valala vezru hi mu gandzrela na hi nga txhavi ntxhumu 75 hi ku dumbeka ni hi wululami, wutomi byezru hinkwabyu. 76 Kambe wene n’wananga, u ta vitaniwa muprofeta wa Lweyi a Tlakukiki ngopfu, hikusa Yehovha a ta ku zruma leswaku u zranga u ya mu lulamisela tindlela take, 77 akuva u byela vhanu vake leswaku a ta va huluxa hi ku va dzrivalela swidoho swavu, 78 hi kola ka ntwelawusiwana lowukulu wa Xikwembu Nkulukumba wezru. Xikwembu Nkulukumba a ta hi vaningela hi ntwelawusiwana wolowo ku fana ni ku huma ka dambu, 79 akuva a vaningela lava tsrhamiki munyameni ni lava nga ntsrhutini wa lifu ni ku hi komba leswi hi fanelaka ku swi yentxa akuva hi va ni ku zrula.”

80 A n’wana yelweyo a kulile a tlhela a tala hi moya wa Xikwembu Nkulukumba, nakone a tame a tsrhama a mananga ku ya tlhasa siku ledzri a humeleliki ha dzrone ka Vaisrayele.

2 A masikwini wolawo, Khezari Aguxtu a humese nawu wa leswaku vhanu hinkwavu va ya tsralisiwa. 2 (A ku tsralisiwa loku ka ku sungula ku yentxiwi nkama lowu Kirino a a li govhernadori wa Siriya.) 3 Vhanu hinkwavu va yile akuva va ya tsralisiwa, mun’wana ni mun’wana a doropeni dzrake. 4 Nakunene, na yene Yosefa a sukile hi Galileya, a doropeni dzra Nazareta, a ya Yudeya a doropeni dzra Davhida, ledzri vitaniwaka Betlehema, hi leswi a a li xizro xa ndangu wa Davhida. 5 Yosefa a fambe a ya titsralisa na Mariya, lweyi a va dumbisane mutxhatu nakone a a li kusuhi ni ku phuluka. 6 Na va ha li kohala, ku tlhase nkama wa kuva a phuluka. 7 Kutani a phuluka n’wana wake wa djaha wa mativula, a mu tsrondzriyela hi makapulana a mu lata mbangwini lowu swihazri swi delaka ka wone, hikusa mimbangu ya ku zruzrela vayeni a yi talile.

8 A mugangeni wolowo a ku ni ni vabyisi lava a va tsrhama nhoveni va vonelela mintlhambi yavu a wusikwini. 9 Kutani ku suketana ku humelela ntsrumi ya Yehovha yi yima a mahlweni kwavu, a ku phatima ka Yehovha ku va vaningela kutani va sungula ku txhava ngopfu swinene. 10 Kambe a ntsrumi yi va byela yi ku: “Mi nga txhavi, hikusa ni teli ku ta mi byela madzrungula lamanene ya ku nyonxa lokukulu loku vhanu hinkwavu va taka va na kone. 11 Hikusa namunhla a doropeni dzra Davhida mi belekeliwe muhuluxi, lweyi a nga Kriste Hosi. 12 Mi ta mu tiva hi leswi: Mi ta kuma xin’wanana na xi tsrondzriyeliwi hi makapulana na xi latiwe lomu swihazri swi delaka kone.” 13 Hi nkama wolowo, ku suketana ku humelela tintsrumi ta tinyingi ti yima ni ntsrumi yoleyo, ti sungula ku dzrumisa Xikwembu Nkulukumba ti ku: 14 “Dzrumisani Xikwembu Nkulukumba lweyi a nga matilweni, nakone a misaveni a ku ve ni ku zrula a xikazri ka vhanu lava a va yamukelaka.”

15 Loko tintsrumi ti sukile lani a va li kone ti tlhelela a matilweni, a vabyisi va sungula ku byelana va ku: “A hi fambeni swoswi a Betlehema hi ya vona leswi yentxekiki, leswi Yehovha a hi byeliki swone.” 16 Kutani va famba hi ku kahlula va tlhasa va kuma Mariya na Yosefa, kun’we ni xibebetana na xi latiwe lani swihazri swi delaka kone. 17 Loko va swi vonile, va va dzrungulela leswi va byeliwiki swone mayelanu ni n’wana lweyi. 18 Hinkwavu lava twiki leswi hlayiwiki hi vabyisi, va hlamala ngopfu, 19 kambe Mariya a sungula ku bekisa mazritu lawa a mbilwini yake ni ku yanakanyisisa hi leswi ma tlhamuxelaka swone. 20 Kutani a vabyisi va tlhelela lomu a mintlhambi yavu a yi li kone, na va twalisa ni ku dzrumisa Xikwembu Nkulukumba hi mhaka ya hinkwaswu leswi va swi twiki ni ku swi vona, hi lani va byeliwiki ha kone.

21 Hi siku dzra wu 8, ledzri a a ta sokisiwa* ha dzrone, va mu txhuli vito dzra ku Yesu, ku nga vito ledzri a ntsrumi yi mu nyikiki dzrone na mamana wake a nga si na kuma nyimba.

22 Nakone loko ku tlhase nkama wa kuva va tibasisa hi ku landzra Nawu wa Moxe, va fambe na yene a Yerusalema akuva va ya mu kombekisa ka Yehovha, 23 hi lani swi tsraliwiki ha kone a Nawini wa Yehovha lowu liki: “N’wana mun’wana ni mun’wana wa xinuna wa mativula* a fanela ku nyikeliwa ka Yehovha.” 24 Va humese magandzrelo hi ku landzra Nawu wa Yehovha lowu liki: “U fanela ku nyikela matuva mabidzri kumbe mavondlo mabidzri ya matuva.”

25 A Yerusalema a ku ni wanuna lweyi a vitaniwaka Simiyoni, wanuna lweyi a a lulamile nakone a a txhava Xikwembu Nkulukumba, a a yimela nkama lowu Vaisrayele a va ta txhaveleliwa ha wone, futsrhi a a kongomisiwa hi moya wa ku xwenga. 26 Handle ka leswo, Xikwembu Nkulukumba a a mu byelile hi ku tizrisa moya wa ku xwenga leswaku a a nge ti fa na a nga si na vona muhlawuliwa wa Yehovha. 27 Hi ku kongomisiwa hi moya, a ye tempeleni hi nkama lowu vapswele va Yesu va fambiki na Yesu akuva va ya yentxa leswi Nawu a wu djula swone. 28 Simiyoni a tlakule n’wana kutani a dzrumisa Xikwembu Nkulukumba a ku: 29 “Hosi Leyi Tlakukiki, ni mu vonile n’wana hi lani u hlayiki ha kone, kutani swoswi ni nga fa na ni nyonxile, 30 hikusa a matihlo yanga ma vone lweyi a tisaka huluku 31 lweyi u mu zrumeliki akuva a ta voniwa hi vhanu hinkwavu, 32 yene i livaningu ledzri taka susa munyama lowu funeketiki matiko nakone a vhanu vaku, ku nga Vaisrayele, va ta tlakuxiwa hi mhaka yake.” 33 Papayi ni mamana wa n’wana a va ya mahlweni va hlamalisiwa hi mintxhumu leyi a yi hlayiwa mayelanu na yene. 34 Kutani, Simiyoni a va tovokisa a tlhela a byela Mariya mamana wa n’wana a ku: “Wa swi twa! A n’wana lweyi a hlawuliwe akuva a ta wisa ni ku pfuxa vanyingi a Israyele ni ku va xikombiso lexi taka yaliwa 35 (kambe wene u ta tlhaviwa hi xipada xa ku leha) akuva ku ta paluxeka mintxhumu leyi vhanu vanyingi va yi yanakanyaka a timbilwini tavu.”

36 A ku ni muprofeta wa xisati lweyi a vitaniwaka Ana, wa lixaka dzra Axere. Wansati lweyi a a duhwalile nakone e hanya ntsena 7 wa malembe ni nuna wake ntsrhaku ka loko va txhatile,* 37 a a ni 84 wa malembe nakone a a feliwe hi nuna. A a nga lovhi tempeleni, a a yentxa ntizro wa ku xwenga wusiku ni nhlikanhi, na a titsrona swakuda ni ku khongota hi ku hiseka. 38 Hi nkama wolowo a va tsrhindzrekelela a sungula ku tlangela Xikwembu Nkulukumba ni ku vulavula hi n’wana mahlweni ka hinkwavu lava a va yimela ku huluxiwa ka Yerusalema.

39 Kutani ntsrhaku ka loko va yentxe hinkwaswu hi ku landzra Nawu wa Yehovha, va tlhelele a Galileya a doropeni dzravu dzra Nazareta. 40 A n’wana a a ya mahlweni a kula, a tiya ni ku tala hi wutlhazri, nakone Xikwembu Nkulukumba a a tama a mu seketela.

41 Lembe dzrin’wana ni dzrin’wana, a vapswele vake a va tolovela ku ya Yerusalema ka nkhuvu wa Paxkwa. 42 Kutani loko a ni 12 wa malembe, va ye nkhubyini a Yerusalema hi lani a va tolovela ku yentxa ha kone. 43 Na va li ku mukeni loko masiku ya nkhuvu ma helile, Yesu a sale Yerusalema, kambe a vapswele vake a va swi xiyanga. 44 Na va tibyela leswaku a a li ka ntlawa wa vhanu lava a va yendzra na vone, va fambe mpfhuka wa ku dzringana siku kutani va sungula ku mu djuletela a xikazri ka maxaka ni le ka vhanu lava a va va tiva. 45 Kambe leswi a va nga mu kumi, va tlhelele a Yerusalema va ya mu djulisisa ha hombe. 46 Ntsrhaku ka masiku mazrazru va mu kume a tempeleni na a tsrhamile xikazri ka vadondzrisi, na a va yingiseta ni ku va hamba swivutiso. 47 Kambe hinkwavu lava a va mu yingiseta a va tsrhamela ku hlamalisiwa hi ku twisisa loku a a li na kone ni hi tinhlamulo take. 48 Loko vapswele vake va mu vona va hlamala ngopfu, kutani mamana wake a ku: “N’wananga, ha yini u hi yentxi leswi? Mine ni papayi waku hi fambe hi ku djuletela na hi kazrateki ngopfu swinene.” 49 Kambe Yesu a ku: “Ha yini mi famba mi ni djuletela? A mi swi tivi leswaku ni fanela ku va ndlwini ka Papayi wanga?” 50 Nambitanu, a va swi twisisanga leswi a a va byela swone.

51 Kutani a tlhelela na vone a Nazareta, nakone a a tama a va yingiseta.* Mamana wake a ma bekise ha hombe mazritu lawo a mbilwini yake. 52 Yesu a a ya mahlweni a va ni wutlhazri a tlhela a kula hi le mizrini nakone a a nyonxeliwa hi Xikwembu Nkulukumba ni hi vhanu.

3 Hi lembe dzra wu 15 dzra ku fuma ka Tiberiyu Khezari, na Pontiyu Pilatu a li govhernadori wa Yudeya, Heroda* a li govhernadori* wa muganga wa Galileya, Filipi makwavu wa Heroda a li govhernadori wa miganga ya Ituriya ni Trakonita, nakone na Luzaniya a li govhernadori wa muganga wa Abilene, 2 a masikwini ya muprista lwenkulu Anasi na Kayafasi, Xikwembu Nkulukumba a khanele na Yohane n’wana wa Zakariya a mananga.

3 Xileswo Yohane a fambafambe a migangeni hinkwayu leyi nga matlhelweni ka Yordani, a zrezrela vhanu leswaku va babatisiwa va kombisa leswaku va tisolile akuva va ta dzrivaleliwa swidoho swavu, 4 hi lani swi tsraliwiki ha kone ka buku dzra muprofeta Ezaya lweyi a tiki: “Ku ni lweyi a huwelelaka a mananga a ku: ‘Lulamiselani ndlela ya Yehovha! Basisani tindlela take. 5 Seletelani minkova hinkwayu, mi hohlota tinhava hinkwatu ni maganga; wololoxani tindlela leti gombonyokiki, mi lunghisa ni tindlela leti nga ni swikhele; 6 kutani vhanu hinkwavu va ta vona ndlela leyi Xikwembu Nkulukumba a taka huluxa ha yone.’”

7 Xileswo a sungula ku byela switsrhungu leswi a swi buya akuva a ta swi babatisa, a ku: “N’wine vana va tinyoka leti nga ni mahlungu,* i mani a nga mi byela leswaku mi nga huluka mahlundzru lawa ma buyaka? 8 Yentxani mintizro leyi kombisaka leswaku ma tisola. Mi nga tibyeli mi ku: ‘Hi vana va Abrahamu.’ Hikusa na mi byela, Xikwembu Nkulukumba a nga swi kota ku hambela Abrahamu vana hi mazribye lawa. 9 Nakunene, a kawula* dzri lulameli ku tsrema timitsru ta minsinya. Kutani nsinya wun’wana ni wun’wana lowu kalaka wu nga pswali mihandzru leyinene wu ta tsremiwa wu txukumeteliwa ndzrilweni.”

10 Kutani a switsrhungu a swi mu vutisa swi ku: “Hi fanela ku yentxa yini?” 11 A va hlamula a ku: “Lweyi a nga ni swiyambalu swibidzri a a teki xin’we a nyika lweyi a xi pfumalaka, nakone lweyi a nga ni swakuda a a pumbelani ni lweyi a nga liki na swone.” 12 Nambi vahakelisi va tinemba va tile akuva va babatisiwa, kutani va mu vutisa va ku: “Mudondzrisi, hi fanela ku yentxa yini?” 13 A va hlamula a ku: “Mi nga hakelisi vhanu swa ku tlula leswi mi zrumiwiki swone.” 14 A masotxha na wone a ma mu vutisa ma ku: “Hi fanela ku yentxa yini?” Kutani a a ma hlamula a ku: “Mi nga tekeli vhanu mali hi nkanu kumbe ku lumbeta van’wana, kambe yanelisekani hi leswi mi holeliwaka swone.”*

15 Leswi vhanu a va yimeli Kriste, hinkwavu a va tivutisa mayelanu na Yohane va ku: “Xana a hi yene Kriste lweyi?” 16 Yohane a va hlamula hinkwavu a ku: “Mine, ni mi babatisa hi mati, kambe lweyi a nga ni ntamu ku ni tlula awa ta, nakone a swi ni faneli ku tlhantlha tingoti ta masandaliya yake. Yene a ta mi babatisa hi moya wa ku xwenga ni hi ndzrilo. 17 A tamele xitizro xa ku hehezra ha xone* akuva a hambanisa trigu ni mavivi a va a basisa mbangu wa ku hehezrela ka wone kutani a teka trigu a dzri txhela tsrhaleni kambe a mavivi a ma hisa hi ndzrilo lowu nga timekiki.”

18 A hlaye mintxhumu yin’wana ya yinyingi leyi tiyisiki vhanu, a tlhela a ya mahlweni a va zrezrela madzrungula lamanene. 19 Kambe leswi Heroda lweyi a a li govhernadori a kawukiwiki hi Yohane hi mhaka ya Herodiya nsati wa makwavu wa Heroda ni hi mhaka ya mintxhumu hinkwayu ya ku biha leyi Heroda a a yi yentxile, 20 Heroda a tlhele a yentxa swin’wana swa ku biha: A pfalele Yohane a djele.

21 Nkama lowu vhanu hinkwavu va babatisiwiki, Yesu na yene a babatisiwile. Loko a li ku khongoteni, a matilo ma pfuleka 22 a moya wa ku xwenga wu xikela henhla kwake na wu ni xivumbeko xa tuva, ku gama ku twala zritu ledzri humaka hi le tilweni dzri ku: “U N’wananga lweyi a zrandzrekaka; ni ku yamukelile.”

4 Kutani Yesu na a tale hi moya wa ku xwenga, a suke Yordani a yisiwa mananga hi moya wa Xikwembu Nkulukumba, 2 a hete 40 wa masiku. Na a li kohala a dzringiwe hi Diyavulosi. A nga danga ntxhumu ku dzringana masiku wolawo hinkwawu, xileswo loko ma helile a twe ndlala. 3 Hiloko Diyavulosi a mu byela a ku: “Loko u li n’wana wa Xikwembu Nkulukumba, byela zribye ledzri leswaku dzri ndzruluka dzri va pawu.” 4 Kambe Yesu a mu hlamula a ku: “Ku tsraliwile: ‘Mhunu a nga fanelanga ku hanya hi pawu ntsena.’”

5 Kutani Diyavulosi a mu yisa mbangwini lowu tlakukiki hi nkamanyana wutsrongo a mu komba mimfumu hinkwayu ya misava. 6 Diyavulosi a mu byela a ku: “Ni ta ku nyika wulawuli lebyi hinkwabyu ni ku phatima loku mimfumu leyi yi nga na kone, hikusa ni nyikiwe byone, nakone ni byi nyika mun’wana ni mun’wana lweyi ni mu djulaka. 7 Xileswo, loko wo khinsama kan’we u ni gandzrela, ni ta ku nyika mintxhumu leyi hinkwayu.” 8 Yesu a mu hlamula a ku: “Ku tsraliwe leswi: ‘U fanela ku gandzrela Yehovha Xikwembu Nkulukumba waku, u tizrela yene ntsena.’”

9 Kutani Diyavulosi a mu yisa Yerusalema a tlhasa a mu yimisa henhla ka tempele* a mu byela a ku: “Loko u li n’wana wa Xikwembu Nkulukumba, titxukumeteli hansi, 10 hikusa ku tsraliwe leswi: ‘A ta zrumela tintsrumi take leswaku ti ku sizrelela’, 11 kutani ‘ti ta ku tlhamukela* akuva a nkondzro waku wu nga bi zribye.’” 12 Yesu a mu hlamula a ku: “Ku tsraliwe leswi: ‘U nga txhuki u dzringa Yehovha Xikwembu Nkulukumba waku.’” 13 Loko Diyavulosi a gamile ku mu dzringa, a suka a famba, a yimela mukhandlu wumbeni wa leswaku a ta tlhela a mu dzringa.

14 Kutani Yesu a tlhelela Galileya na a kongomisiwa hi moya wa Xikwembu Nkulukumba. A ndhuma yake leyinene yi hangalaka a migangeni hinkwayu ya le kusuhi. 15 A sungula ku dondzrisa a masinagogeni yavu, nakone vhanu hinkwavu a va mu hlonipha.

16 A gama a ya Nazareta lomu a kuleliki kone, nakone hi ku ya hi lani a a tolovela ku yentxa ha kone hi Savata, a nghena a sinagogeni kutani a sekeleka akuva a dondzra Matsralwa. 17 Xileswo va mu nyiketa buku dzra muprofeta Ezaya, kutani a dzri pfula a kuma lomu a ku tsraliwe leswi: 18 “A moya wa Yehovha wu le henhla kwanga, hikusa a ni hlawulile akuva ni twalisa madzrungula lamanene ka swisiwana. A ni zrume kuva ni byela lava nga swikazrawa leswaku va ta ntsrhunxiwa, ku yentxa leswaku lava fiki matihlo va vona, ku pfuna lava hluphekaka, 19 ni ku zrezra mayelanu ni nkama lowu Yehovha a taka kombisa timpswalu ha wone.” 20 Ntsrhaku ka leswo, Yesu a songa buku a dzri tlhelisela ka nandzra kutani a ya tsrhama; hinkwavu lava a va li sinagogeni va mu lavisisisa. 21 Kutani a va byela a ku: “Namunhla a tsralwa ledzri ma ha ka ku dzri yingela dzri hetisekile.”

22 Kutani hinkwavu va sungula ku vulavula ha hombe ha yene ni ku hlamalisiwa hi mazritu ya ku nyonxisa lawa a ma huma non’wini wake, va ku: “A hi yene n’wana wa Yosefa lweyi?” 23 Xileswo a va byela a ku: “Handle ka ku ganaganeka mi ta tizrisa xihlayahlaya lexi kwanga: ‘Dokodela, tihanyisi. Swi yentxi ni lani mugangeni waku leswi hi yingeliki leswaku u swi yentxile a Kapernawume.’” 24 Kutani a ku: “Kunene na mi byela, a ku na muprofeta lweyi a yamukelekaka a mugangeni walekwavu. 25 Ni mi byela ntiyiso: A ku ni vavasati va vanyingi va ku feliwa hi vanuna a Israyele a masikwini ya Eliya, loko ku pfumaleke mpfula* ku dzringana malembe mazrazru ni 6 wa tihweti, lakakuva ku va ni ndlala leyikulu a tikweni hinkwadzru. 26 Nambitanu, Eliya a nga zrumeliwanga ni ka mun’we wa vavasati volavo, kambe e zrumeliwa ntsena ka wansati wa le Sarepta a tikweni dzra Sidoni lweyi na yene a a feliwe hi nuna. 27 A Israyele a ku ni vhanu va vanyingi lava a va ni mavabyi ya nhlokonho a masikwini ya muprofeta Elixa; nambitanu, a nga kone ni mun’we wavu lweyi a hanyisiwiki, kambe ke hanyisiwa* ntsena Namani wa Musiriya.” 28 Kutani hinkwavu lava a va yingiseta a mintxhumu leyi a sinagogeni va hlundzruka ngopfu swinene, 29 va sekeleka va mu humesa handle ka doropa hi ku kahlula, va mu yisa ka nhava leyi a doropa dzravu a dzri kumeka ka yone, akuva va mu txukumetela a ya wa hi nhloko. 30 Kambe Yesu a kunyuluta makazri kwavu a tifambela.

31 Kutani a fulamela a ya Kapernawume, ka doropa dzra le Galileya. A a dondzrisa vhanu hi Savata, 32 nakone vone a va hlamalisiwa hi madondzrisela yake, hikusa leswi a a va dondzrisa swone a swi pfa ka Xikwembu Nkulukumba. 33 A sinagogeni a ku ni wanuna lweyi a a ni demona,* hi loko a bandlukana a ku: 34 “Ha! U djula yini kwezru, wene Yesu wa le Nazareta? Xana u tele ku ta hi suvisa? Ni ku tiva ha hombe leswaku u mani, u Muxwengi wa Xikwembu Nkulukumba.” 35 Kambe Yesu a dzri kawuka a ku: “Miyela, u va u huma kwake.” Kutani ntsrhaku ka loko dzri mu tlatlalatile makazri kwavu, a demona dzri huma ka wanuna yelweyo na dzri nga zanga dzri mu vavisa. 36 Loko va vona leswo, hinkwavu va hlamala kutani va sungula ku byelana va ku: “Ma wu vona ntamu ni wulawuli bya mazritu yake! Nambi mimoya leyi nga basangakiki ya mu yingiseta yi huma ka vhanu!” 37 Kutani a ndhuma yake yi ya mahlweni yi hangalaka a migangeni hinkwayu ya le kusuhi.

38 Loko a hume sinagogeni, a ye kaya ka Simoni. Mamana wa nsati wa Simoni a a ni dzedzedze, a mizri wake a wu hiseta ngopfu swinene, kutani va kombela Yesu akuva a mu pfuna. 39 Xileswo, Yesu a mu yela lani a a li kone a tlhasa a mu daha. Kutani hi ku kahlula a pfuka a sungula ku va swekela swakuda.

40 Kambe na dambu dzri ya ku peleni, hinkwavu lava a va vabyeliwa va mu buyisela timbabyi tavu leti a ti ni mavabyi ya ku siyanasiyana. Kutani a tlhanteka mavoko yake ka mun’wana ni mun’wana wavu, a mu hanyisa. 41 Handle ka leswo, Yesu a hlongole mademona ka vhanu vanyingi, wone a ma huma na ma bandlukana ma ku: “Wene u N’wana wa Xikwembu Nkulukumba.” Kambe a a ma kawuka, a nga ma pfumeleli kuva ma vulavula, hikusa a ma swi tiva leswaku hi yene Kriste.

42 Loko byi xile a suke a ya a mbangwini lowu zruliki. Kambe a switsrhungu swi sungula ku mu djuletela swi za swi ya mu kuma lani a a li kone, kutani swi zama ku mu sivela akuva a nga fambi a swi siya. 43 Kambe a va byela a ku: “Ni fanela ku zrezra madzrungula lamanene ya Mfumu wa Xikwembu Nkulukumba ni le ka madoropa man’wana, hikusa hi leswi ni zrumeliwiki swone.” 44 Xileswo a ya mahlweni a zrezra a masinagogeni ya le Yudeya.

5 Siku dzrin’wana, na Yesu a yimile a nkingeni wa tiva dzra Genezareta,* a xitsrhungu a xi kamanyetana akuva xi tsrhindzrekela kusuhi na yene leswaku xi yingiseta zritu dzra Xikwembu Nkulukumba. 2 Kutani Yesu a vona maboti na ma tsrimbiwile a hlalukweni dzra tiva, kambe a vaphasi va tihlampfi a va li handle ka wone va hlampswa minkukutu yavu. 3 Kutani a nghena ka dzrin’we dzra maboti wolawo, ledzri a dzri li dzra Simoni, a mu kombela leswaku a dzri weta dzri nghenanyana matini. Kutani a tsrhamisa a sungula ku dondzrisa switsrhungu na a li matini. 4 Loko a gamile ku khanela, a byela Simoni a ku: “Dzri weti dzri ya nsingeni,* kutani mi peta minkukutu yenu akuva mi phasa.” 5 Kambe Simoni a hlamula a ku: “Mudondzrisi, hi tizre wusiku hinkwabyu kambe a hi phasanga ntxhumu, nambitanu ni ta yi peta minkukutu hi lani u hlayiki ha kone.” 6 Kutani loko va yentxi leswo, va phase* tihlampfi ta tinyingi ngopfu swinene lakakuva a minkukutu yavu yi sungula ku handzruka. 7 Xileswo, va kombela vaphasikulobye lava a va li ka boti dzrimbeni akuva va va pfuna, kutani va buya va tata maboti ha mabidzri lakakuva ma sungula ni ku mbombomela. 8 Loko Simoni Petro a vona leswo, a khinsama mahlweni ka Yesu a ku: “Tsrhindzreka kule na mine, Hosi, hikusa ni mudohi.” 9 A hlaye leswo hikusa yene kun’we ni lava a va li na yene a va hlamalisiwa ngopfu hi ku tala ka tihlampfi leti va ti phasiki, 10 swi ve hi ndlela leyi fanaka hi Yakobe na Yohane vana va Zebedewu, lava a va li vaphasikulobye na Simoni. Kambe Yesu a byela Simoni a ku: “U nga txhavi. Ku sukela ka swoswi u ta va muphasi wa vhanu.” 11 Xileswo va tlhelisa maboti yavu a hlalukweni, kutani va tsrhika hinkwaswu va sungula ku mu landzrela.

12 Khambi dzrin’wana na a li doropeni dzra kukazri, ku humeleli wanuna lweyi a a ni nhlokonho ya ku txhavisa! Loko a vona Yesu a khinsama a mu kombela a ku: “Hosi, loko u swi djula, u nga ni hanyisa.”* 13 Xileswo, Yesu a nalavuta voko a mu khumba a ku: “Na swi djula! Hanyisiwa.”* Kolanu a nhlokonho yake yi nyamalala. 14 A gama a byela wanuna yelweyo leswaku a nga byeli mhunu leswi yentxekiki, a tlhela a ku: “Kambe famba u ya tikombekisa ka muprista kutani u nyikela nyiko leyi Moxe a hlayiki leswaku yi fanela ku humesiwa hi mhunu lweyi a hanyisiwiki mavabyi ya nhlokonho, leswaku a vaprista va ta tiyiseka leswaku u hanyisiwile.” 15 Kambe a madzrungula lamanene mayelanu na yene a ma ya ma hangalaka, nakone a switsrhungu leswikulu a swi hlengeletana akuva swi mu yingiseta ni ku hanyisiwa mavabyi. 16 Nambitanu, a a talisa ku ya mimbangwini leyi zruliki akuva a ya khongota.

17 Siku dzrin’wana na a li ku dondzriseni, a Vafarisi ni vadondzrisi va Nawu lava a va pfa ka swidoropana hinkwaswu swa le Galileya, Yudeya ni le Yerusalema a va tsrhamile kolanu; nakone Yehovha a a mu nyike ntamu wa leswaku a hanyisa vhanu. 18 Kutani ku tlhase vavanuna lava a va tlakule wanuna wa kukazri hi lihlaka,* lweyi a a wome swizro, nakone a va zama ku mu nghenisa a ndlwini akuva va mu beka mahlweni ka Yesu. 19 Kambe leswi a va hluleka ku mu nghenisa a ndlwini hi mhaka ya xitsrhungu, va khweli henhla ka yindlu, va gwavula swa ku fulela hi swone kutani va mu yehlisa na a li ka lihlaka, va mu beka xikazri ka lava a va li mahlweni ka Yesu. 20 Loko a vona lipfumelo ledzri a va li na dzrone, Yesu a ku: “Wanuna, a swidoho swaku swi dzrivaleliwile.” 21 Kutani a vatsrali ni Vafarisi va sungula ku bulisana hi xivone va ku: “I mani lweyi, wa ku yeyisa Xikwembu Nkulukumba? I mani lweyi a nga dzrivalelaka swidoho loko ku nga li Xikwembu Nkulukumba ntsena?” 22 Kambe Yesu hi ku xiya leswi a va swi yanakanya, a va hlamula a ku: “Ha yini mi yanakanya hi ndlela leyo? 23 I yini leswi nabyalaka, i ku hlaya u ku: ‘Swidoho swaku swi dzrivaleliwile’, kumbe i ku hlaya u ku: ‘Sekeleka u famba’? 24 Kambe akuva mi swi tiva leswaku a N’wana wa mhunu a nyikiwe ntamu wa ku dzrivalela swidoho a misaveni . . .” a byela wanuna lweyi a womiki swizro a ku: “Na ku byela, sekeleka, u teka lihlaka dzraku u muka kaya.” 25 Xileswo a sekeleka a yima mahlweni kwavu, a teka lihlaka dzrake a muka kaya kwake na a dzrumisa Xikwembu Nkulukumba. 26 Kutani hinkwavu va hlamala, va sungula ku dzrumisa Xikwembu Nkulukumba, va tlhela va tala hi ku txhava va ku: “Namunhla hi vone mintxhumu ya ku hlamalisa!”

27 Ntsrhaku ka leswo a suka a famba, kutani a vona muhakelisi wa tinemba lweyi a vitaniwaka Levhi na a tsrhamile a mbangwini lowu vhanu va hakelaka ka wone tinemba, kutani a mu byela a ku: “Vana mulandzreli wanga.” 28 Xileswo, Levhi a sekeleka a tsrhika mintxhumu hinkwayu a mu landzrela. 29 Kutani Levhi a hambela Yesu nkhuvu wa wukulu a kaya kwake, nakone ka nkhuvu wolowo a ku ni vahakelisi vanyingi va tinemba ni vhanu van’wana lava a va da na vone.* 30 Xileswo, a Vafarisi ni vatsrali va sungula ku ngurangurela vadondzrisiwa vake, va ku: “Ha yini mi da mi tlhela mi nwa ni vahakelisi va tinemba ni vadohi?” 31 Yesu a va hlamula a ku: “Vhanu lava kalaka va nga vabyi a va vileli dokodela, kambe lava vabyaka va mu vilela. 32 A ni telanga ku ta vitana vhanu lava lulamiki, kambe ni tele ku ta vitana vadohi akuva va tisola.”

33 Va mu byela va ku: “A vadondzrisiwa va Yohane va tsrhamela ku titsrona swakuda va tlhela va khongota hi ku hiseka, ni vadondzrisiwa va Vafarisi va yentxa leswi fanaka, kambe a vadondzrisiwa vaku va da va tlhela va nwa.” 34 Yesu a va byela a ku: “Xana mi nga sindzrisa vanghanu va muteki leswaku va titsrona swakuda na muteki a ha li na vone? 35 Kambe ma ta masiku lawa nakunene a muteki a taka va na a nga ha li na vone; kutani va ta titsrona swakuda hi masiku wolawo.”

36 A tlhela a va byela xifaniso a ku: “A nga kone lweyi a tsremaka xiziva* ka mpahla ya nyiwana a xi zrungela ka mpahla ya khale. Hikusa loko a ngo yentxa leswo, a xiziva xa nyiwana xi ta yentxa leswaku a mpahla ya khale yi ya yi handzrukela, nakone a xi nge yelani ni mpahla ya khale. 37 Futsrhi a nga kone lweyi a txhelaka vhinyu ledzri dzra ha ka ku hambiwa ka tihotsro ta khale. Hikusa loko a ngo yentxa leswo, a vhinyu ledzri dzra ha ka ku hambiwa dzri ta yentxa leswaku a tihotsro ti pandzreka dzri va dzri halaka nakone a tihotsro a ti nge he londzrovoteki. 38 Kambe a vhinyu ledzri dzra ha ka ku hambiwa dzri fanela ku txheliwa ka tihotsro letimpshwa. 39 A nga kone lweyi ntsrhaku ka loko a nwe vhinyu dzra khale, a djulaka ledzra ha ka ku hambiwa, hikusa a li: ‘Ku nandzrika ledzra khale.’”

6 Na Yesu a tsremakanya masimu ya trigu hi savata, a vadondzrisiwa vake va sungula ku khayetela tinhleke ta trigu, va ti txhukutxhela hi mavoko va da. 2 Loko van’we va Vafarisi va vona leswo, va ku: “Ha yini mi yentxa leswi nawu wu kalaka wu nga pfumeli kuva swi yentxiwa hi Savata?” 3 Kambe Yesu a va hlamula a ku: “Xana a mi ngi ngi sama mi dondzra leswi Davhida a swi yentxiki loko yene ni vavanuna lava a va li na yene va twe ndlala? 4 Leswaku a nghene ndlwini ya Xikwembu Nkulukumba a yamukela mapawu* ya magandzrelo a da, man’wana ya wone a nyika vavanuna lava a va li na yene, lawa hi ku ya hi Nawu a ma fanela ku diwa ntsena hi vaprista?” 5 Kutani a va byela a ku: “A N’wana wa mhunu i Hosi ya Savata.”

6 Hi Savata dzrin’wana a nghene sinagogeni a sungula ku dondzrisa. Nakone kolanu a ku ni wanuna wa kukazri lweyi a a limale* voko dzra xinene. 7 A vatsrali ni Vafarisi a va xondzrolota Yesu ku vona loko a ta hanyisa mhunu hi Savata, akuva va kuma xa ku mu lumbeta hi xone. 8 Nambitanu, yene a a swi tiva leswi a va swi yanakanya, xileswo a byela wanuna lweyi wa ku limala voko a ku: “Sekeleka u buya u yima lani makazri.” Kutani a sekeleka a ya yima. 9 Yesu a va vutisa a ku: “Xana swa pfumeleliwa ku yentxa leswinene kumbe swa ku biha, ku huluxa wutomi kumbe ku dlaya hi Savata?” 10 Ntsrhaku ka loko a va lavisile hinkwavu, a byela wanuna yelweyo a ku: “Nalavuta voko dzraku.” A dzri nalavuta, kutani dzri wololoka. 11 Kambe a vatsrali ni Vafarisi va hlundzruka ngopfu swinene, kutani va sungula ku vonisana leswaku va nga mu yentxa yini Yesu.

12 Siku dzrin’wana a ye nhaveni a ya khongota, a khongote wusiku hinkwabyu ka Xikwembu Nkulukumba. 13 Loko byi xile, a vitane vadondzrisiwa vake kutani a hlawula 12 wa vone, lava a patsriki ni ku va vitana vapostola, a mavito yavu a ku li lawa: 14 Simoni lweyi a mu txhuliki leswaku hi Petro, ni makwavu Andreya, Yakobe, Yohane, Filipi, Bartolomewu, 15 Matewu, Tomasi, Yakobe n’wana wa Alifewu, Simoni lweyi a vitaniwaka “lweyi wa nkhinkhi”, 16 Yudasi n’wana wa Yakobe, na Yudasi Iskariyota lweyi a gamiki a va muwongi.

17 Kutani a xika na vone hi le nhaveni a tlhasa a yima a livaleni, kolanu a ku ni xitsrhungu xa xikulu xa vadondzrisiwa vake, ni xitsrhungu xin’wana xa xikulu xa vhanu lava a va huma a migangeni hinkwayu ya Yudeya, Yerusalema ni le nkingeni wa lwandle a migangeni ya Tiri ni Sidoni, lava a va teli ku ta mu yingela ni ku hanyisiwa mavabyi yavu. 18 Nambi lava a va kazratiwa hi mademona a va hanyisiwa. 19 Nakone a xitsrhungu hinkwaxu a xi zama ku mu khumba, hikusa a ku huma ntamu kwake wu va hanyisa hinkwavu.

20 Kutani a lavisa vadondzrisiwa vake a sungula ku va byela a ku:

“Ma nyonxa n’wine mi nga swisiwana, hikusa a Mfumu wa Xikwembu Nkulukumba i wenu.

21 “Ma nyonxa n’wine swoswi mi nga ni ndlala, hikusa mi ta xuzrisiwa.

“Ma nyonxa n’wine swoswi mi dzrilaka, hikusa mi ta hlekelela.

22 “Nyonxani loko vhanu va mi nyenya, va mi hlongola, va mi zruka ni ku mi hona vito hi mhaka ya N’wana wa mhunu. 23 Nyonxani loko leswo swi mi yentxekela, mi ba ni minkulungwana, hikusa a hakelo dzrenu i dzrikulu a matilweni, nakone mintxhumu leyi hi leyi vakokwana vavu a va yi yentxa ka vaprofeta.

24 “Kambe khombo ka n’wine va ku ganya,* hikusa kutani mi dzri kumile a hakelo dzrenu.

25 “Khombo ka n’wine mi xuzriki swoswi, hikusa mi ta va ni ndlala.

“Khombo, ka n’wine mi hlekelelaka swoswi, hikusa mi ta hlatiyela mi tlhela mi dzrila.

26 “Khombo kwenu loko vhanu hinkwavu va mi kulungela, hikusa hi leswi vakokwana vavu va swi yentxiki ka vaprofeta va madzrimi.

27 “Kambe na mi byela n’wine mi ni yingisetaka: Yanani mahlweni mi zrandzra valala venu, mi va yentxela leswinene lava mi nyenyaka, 28 kombelani Xikwembu Nkulukumba leswaku a tovokisa lava va mi navelelaka swa ku biha, mi khongotelela ni lava va mi zruketelaka. 29 Lweyi a ku baka ka zrama dzrin’we, mu nyike ni ledzrin’wana; nakone loko mhunu wa kukazri a ku tekela xin’we xa swiyambalu swaku, tlhela u mu nyika ni xin’wana lexi u xi yambaliki. 30 Nyika mun’wana ni mun’wana lweyi a ku kombelaka, nakone lweyi a ku tekelaka mintxhumu yaku, u nga mu londzri.

31 “Leswi mi djulaka leswaku van’wana va mi yentxela swone, na n’wine va yentxelani hi lani ku fanaka.

32 “Loko mi zrandzra ntsena lava va mi zrandzraka, mi pfuneka hi yini? Hikusa nambi vadohi va zrandzra lava va va zrandzraka. 33 Nakone loko mi yentxa leswinene ntsena ka lava va mi yentxelaka leswinene, mi pfuneka hi yini? Nambi vadohi va swi yentxa leswo. 34 Handle ka leswo, loko mi voleka* ntsena lava mi tivaka leswaku va ta mi hakela, mi pfuneka hi yini? Nambi vadohi va voleka vadohikulobye hi ku tiva leswaku va ta va tlhelisela hinkwaswu leswi va va volekiki. 35 Kambe n’wine, yanani mahlweni mi zrandzra valala venu, mi yentxa leswinene mi tlhela mi volekisa na mi nga yimeli ku hakeliwa kutani a hakelo dzrenu dzri ta va dzrikulu, nakone mi ta va vana va Lweyi a Tlakukiki Ngopfu, hikusa yene a va yentxela wunene lava nga swi kotikiki ku tlangela ni lava bihiki. 36 Yanani mahlweni mi va ni timpswalu, ku fana ni Papayi wenu a nga ni timpswalu.

37 “Handle ka leswo, tsrhikani ku yavanyisa van’wana, akuva na n’wine mi nga txhuki mi yavanyisiwa; nakone tsrhikani ku nyika van’wana minandzru, akuva na n’wine mi nga txhuki mi nyikiwa minandzru. Tamani mi dzrivalela,* kutani na n’wine mi ta dzrivaleliwa.* 38 Yanani mahlweni mi hanana, kutani na n’wine mi ta hananiwa. Va ta mi txhelela ka mpahla yenu mpimu lowunene, lowu djindjiwiki, wu hlukuhletiwiki wu tlhela wu dibekela. Hikusa a mpimu lowu mi pimaka van’wana ha wone na n’wine mi ta tlhela mi pimiwa ha wone.”

39 A tlhela a va byela xifaniso a ku: “Xana mhunu lweyi a fiki matihlo a nga mu kongomisa mhunu lweyi na yene a fiki matihlo? Xana a va nge ti pela xikheleni hi wubidzri byavu? 40 A mudondzri* a nga mu tluli mudondzrisi wake. Kambe mun’wana ni mun’wana lweyi a dondzrisiwaka ha hombe a ta fana ni mudondzrisi wake. 41 Kutani, ha yini u lavisa xilavi lexi nga tihlweni dzra makwenu kambe u nga xi voni xigodo lexi nga tihlweni dzraku? 42 U nga mu byelisa kuyini makwenu u ku: ‘Makwezru, ni pfumelele ni ku susa xilavi lexi nga tihlweni dzraku’, nakasi wene ha byaku a wu xi voni xigodo lexi nga tihlweni dzraku? Mukanganyisi! Zranga hi ku susa xigodo lexi nga tihlweni dzraku, kutani u ta swi kota ha hombe ku susa xilavi lexi nga tihlweni dzra makwenu.

43 “Hikusa a nsinya lowu nga wunene a wu pswali mihandzru ya ku bola, nakone a nsinya lowu nga liki wunene a wu pswali mihandzru leyinene. 44 Hikusa nsinya wun’wana ni wun’wana wu tiviwa hi mihandzru ya wone. Hi xikombiso, a swi yentxeki leswaku vhanu va khaya makuwa ka nsinya wa mitwa, nambi kuva va khaya mawuvha ka nsinya wa mitwa. 45 Mhunu lwenene a humesa mintxhumu leyinene a wukosini lebyinene lebyi nga mbilwini yake, kambe mhunu lweyi a bihiki a humesa swa ku biha a wukosini byake bya ku biha; hikusa a nomu wake wu vulavula leswi taliki mbilwini.

46 “Kutani, ha yini mi ni vitana mi ku: ‘Hosi! Hosi!’ Kambe mi nga yentxi leswi ni swi hlayaka? 47 Mun’wana ni mun’wana lweyi a ni telaka a yingela mazritu yanga a tlhela a ma yentxa, ni ta mi komba leswaku a fana na mani: 48 A fana ni wanuna lweyi loko a yaka yindlu, a keliki hansi ku yenta a beka masungulo ya yone a zribyeni. Kutani loko ku ve ni ndhambhi, a mati ya nambu ma be yindlu yoleyo, kambe a yi tsrekatsrekanga hikusa a yi yakiwe yi tiya. 49 Kasi lweyi a yingelaka mazritu yanga kambe a nga yentxi ntxhumu, a fana ni wanuna lweyi a yakiki yindlu a xipfunyeni na yi nga na masungulo lamanene. Kutani loko mati ya nambu ma be yindlu yoleyo yi tekeli ku wa, nakone ku hohloka ka yone ku ve kukulu.”

7 Loko a hetile ku byela vhanu mintxhumu leyo, a nghena Kapernawume. 2 Kone a ku ni muzrangeli wa masotxha lweyi a a vabyeliwa hi nandzra wake lweyi a a mu zrandzra, a a vabya ngopfu swinene lakakuva a a li kusuhi ni ku fa. 3 Loko muzrangeli yelweyo a twa leswi a va swi hlaya hi Yesu, a zruma vakulukumba va kukazri va Vayuda akuva va ya mu kombela leswaku a ta a ta hanyisa nandzra wake. 4 Kutani va yela Yesu va sungula ku mu tsratsriya, va ku: “Swa mu fanela ku va u mu pfuna, 5 hikusa awa dzri zrandzra lixaka dzrezru nakone a hi yakele sinagoga.” 6 Xileswo Yesu a famba na vone. Kambe na va li kusuhi ni ku tlhasa mutini, a muzrangeli wa masotxha a zruma vanghanu vake va ya mu byela va ku: “Hosi, u nga tikazrati, hikusa a swi ni faneli kuva u ta kaya kwanga. 7 Hi leswo swi ni yentxiki ni tivona ni nga fanekeli ku ku tela. Kambe hlaya zritu, kutani a nandzra wanga a ta hanyisiwa. 8 Hikusa na mine nambileswi ni nga mhunu lweyi a fumiwaka, ni ni masotxha lawa ni ma zrangelaka, kutani loko ni byela dzrin’we ni ku: ‘Famba!’ dzra famba, nakone loko ni byela dzrin’wana ni ku: ‘Buya!’ dzra buya, ni loko ni byela nandzra wanga ni ku: ‘Yentxa leswi!’ awa swi yentxa.” 9 Loko Yesu a yingela leswo, a hlamala, kutani a ndzruluka a lavisa xitsrhungu lexi a xi mu landzrela a ku: “Na mi byela, nambi a Israyele a ni ngi ngi sama ni kuma mhunu wa lipfumelo ledzrikulu dzra ku fana ni dzra wanuna lweyi.” 10 Kutani loko lava a va zrumiwile va tlhelela mutini, va ye kuma nandzra na a hanyile.

11 Ntsrhakunyana ka leswo, a yendzra a ya doropeni ledzri vitaniwaka Nayini, nakone a vadondzrisiwa vake ni xitsrhungu xa xikulu a va yendzra na yene. 12 Na a li kusuhi ni nyangwa wa doropa ledzro, a tlhangane ni vhanu na va tlakule ntsrumbu va ya ku lahleni, a ku li ntsrumbu wa djaha dzra kukazri ledzri a dzri li n’wana wa mun’we ka mamana wa dzrone. Handle ka leswo, mamana wa dzrone a a feliwe hi nuna. Nakone a ku ni xitsrhungu xa xikulu xa doropa ledzro lexi a xi famba na yene. 13 Loko Hosi yi mu vona, yi mu twela wusiwana, kutani yi mu byela yi ku: “U nga dzrili.” 14 Yi tsrhindzrekela yi khumba lihlaka,* kutani lava a va tlakule mufi va yima. Ntsrhaku ka leswo yi ku: “Djaha, na ku byela, pfuka!” 15 Xileswo a djaha ledzri a dzri file dzri pfuka dzri sungula ku vulavula, kutani Yesu a dzri nyikela ka mamana wa dzrone. 16 Hinkwavu va txhava va sungula ku dzrumisa Xikwembu Nkulukumba va ku: “Ku humelele muprofeta lwenkulu makazri kwezru.” Nakone, “Xikwembu Nkulukumba a twele wusiwana vhanu vake.” 17 A madzrungula lawa mayelanu na yene ma hangalaka a Yudeya hinkwaku ni le mimbangwini hinkwayu ya le kusuhi na kone.

18 A vadondzrisiwa va Yohane va ye mu dzrungulela mintxhumu leyo hinkwayu. 19 Kutani Yohane a vitana vadondzrisiwa vake vabidzri a va zruma leswaku va ya ka Hosi va ya yi vutisa va ku: “Xana hi wene Lweyi a Taka, kumbe ha ha fanela ku yimela mun’wana?” 20 Loko va tlhasa lani a a li kone, vavanuna volavo va ku: “Yohane Mubabatisi a hi zrume ku ta ku vutisa leswaku: ‘Xana hi wene Lweyi a Taka, kumbe ha ha fanela ku yimela mun’wana?’” 21 Hi nkama wolowo a hanyise vhanu vanyingi lava a va ni mavabyi ya ku siyanasiyana, a hlongola mademona, ni ku yentxa leswaku vhanu va vanyingi lava a va fe matihlo va kota ku vona. 22 Yesu a va hlamula a ku: “Fambani mi ya byela Yohane leswi mi swi voniki ni ku swi yingela: Lava fiki matihlo swoswi va vona, a swilema swa famba, lava nhlokonho va basisiwa,* lava ku fa tindleve va yingela, a vafi va pfuxiwa, ni swisiwana swi byeliwa madzrungula lamanene. 23 Awa nyonxa lweyi a kalaka a nga ganaganeki* ha mine.”

24 Loko lava a va zrumiwe hi Yohane va fambile, Yesu a sungula ku khanela ni switsrhungu mayelanu na Yohane a ku: “A mi ya vona yini a mananga? Xana a mi ya vona lihlanga ledzri tsrekatsrekisiwaka hi moya? 25 Kasi a mi ya vona yini? A mi ya vona wanuna lweyi a yambaliki mpahla ya ku dula?* Phela lava yambalaka timpahla ta ku dula ni ku hanya wutomi bya xiyimu xa le henhla va tsrhama tindlwini ta wuhosi. 26 Kutani ke, a mi ya vona yini? A muprofeta? Kunene na mi byela, Yohane a tlakukile ngopfu nambi ku tlula muprofeta. 27 Lweyi hi lweyi ku tsraliwiki leswi mayelanu na yene: ‘Lavisa! Ni zruma nandzra wanga leswaku a zranga a ya ku lulamiselela ndlela na u nga si na tlhasa.’ 28 Na mi byela, ka vhanu hinkwavu lava samiki va hanya a nga kone lweyi a nga nkulu ku tlula Yohane, kambe lweyi a nga ntsrongo a Mfun’wini wa Xikwembu Nkulukumba i nkulu kwake.” 29 (Loko vhanu hinkwavu kun’we ni vahakelisi va tinemba va twa leswo, va hlaya leswaku Xikwembu Nkulukumba a lulamile, hikusa a va babatisiwe hi babatiso dzra Yohane. 30 Kambe a Vafarisi ni vativi va Nawu va dzrele nkongomiso wa Xikwembu Nkulukumba, hikusa a va nga babatisiwanga hi Yohane.)

31 “Kutani, ni nga va fanisa na mani vhanu va lixaka ledzri, kasi va fana na mani? 32 Va fana ni vatsrongwana lava tsrhamiki bazara lava vitananaka va ku: ‘Hi mi txhayele tinsimu, kambe a mi kinanga; hi be nkosi, kambe a mi dzrilanga.’ 33 Hi lani ku fanaka, Yohane Mubabatisi a tile, a nga danga pawu nambi ku nwa vhinyu, kambe mi li: ‘A ni demona.’ 34 A N’wana wa mhunu a tile, a da a tlhela a nwa, kambe mi li: ‘Vonani! Mhunu lweyi a ni magolo nakone i mpopswi, i munghanu wa vahakelisi va tinemba ni vadohi!’ 35 Nambitanu, a wutlhazri byi kombisiwa hi mintizro.”*

36 Kutani mun’we wa Vafarisi a tama a mu kombela leswaku va ya da xikan’we. Xileswo, a nghena kaya ka Mufarisi yelweyo a ya tsrhama menzeni. 37 Loko wansati wa kukazri lweyi a doropeni ledzro a a tiviwa swanga mudohi a twa leswaku Yesu a li ku deni a kaya ka Mufarisi, a buya ni xigadzrana xa alabaxta lexi a xi ni mafuzra ya ku nun’hwela. 38 A tlhasa a khinsama a minkondzrweni yake a sungula ku dzrila, a minyembeti yake yi tsrakamisa minkondzro ya Yesu, kutani a yi sula hi misisi yake a tlhela a yi n’qunta, a gama a yi tota mafuzra ya ku nun’hwela. 39 Loko Mufarisi lweyi a a mu zrambile a vona leswo, a vulavula mbilwini yake, a ku: “Loko hakunene wanuna lweyi a a li muprofeta a a ta swi tiva leswaku wansati lweyi a mu khumbaka i mhunu muni, a a ta swi tiva leswaku i mudohi.” 40 Kambe Yesu a mu hlamula a ku: “Simoni, ku ni leswi ni djulaka ku ku byela swone.” Yene a ku: “Mudondzrisi, swi hlayi!”

41 “A ku ni vavanuna vabidzri lava a va devha mhunu lweyi a a volekisa mali, mun’we a a mu devha 500 wa madenari, kambe lwemun’wana a a mu devha 50 wa wone. 42 Leswi hi wubidzri byavu a va nga na swa ku mu hakela hi swone, hi timpswalu a time swikweneti swavu. Kutani ke, he wini kwavu lweyi a taka mu zrandzra ngopfu?” 43 Simoni a mu hlamula a ku: “Ni yanakanya leswaku hi lweyi a a mu devha mali ya yinyingi.” Yesu a ku: “I ntiyiso.”* 44 Kutani a lavisa wansati yelweyo a byela Simoni a ku: “Wa mu vona wansati lweyi? Loko ni nghena kaya kwaku, a wu ni nyikanga mati ya ku hlamba minkondzro. Kambe yene a tsrakamise minkondzro yanga hi minyembeti yake a tlhela a yi sula hi misisi yake. 45 Wene a wu ni n’quntanga, kambe wansati lweyi ku sukela loko ni nghenile lani, a nga tsrhikanga ku n’qunta minkondzro yanga. 46 Wene a wu ni txhelanga mafuzra nhlokweni, kambe wansati lweyi a tote minkondzro yanga mafuzra ya ku nun’hwela. 47 Xileswo, na ku byela, nambileswi swidoho swake swi nga swinyingi* swi dzrivaleliwile. Hi mhaka ya leswo, a kombisa lizrandzru ledzrikulu. Kambe lweyi a dzrivaleliwaka switsrongo, a kombisa kutsrongo lizrandzru.” 48 A gama a byela wansati yelweyo a ku: “A swidoho swaku swi dzrivaleliwile.” 49 Lava a va tsrhame na yene a menzeni va sungula ku byelana hi xivone va ku: “I mani wanuna lweyi, wa ku kota ni ku dzrivalela swidoho?” 50 Kambe a byela lweyi wansati a ku: “A lipfumelo dzraku dzri ku huluxile; famba hi ku zrula.”

8 Ntsrhakunyana ka leswo a yendzra hi doropa ni doropa ni hi xidoropana ni xidoropana a zrezra madzrungula lamanene ya Mfumu wa Xikwembu Nkulukumba. Nakone lava 12 a va li na yene, 2 kun’we ni vavasati va kukazri lava van’we va vone va humesiwiki mademona van’wana va hanyisiwiki mavabyi, ku nga lava: Mariya lweyi a vitaniwaka Magadala, lweyi ku humesiwiki 7 wa mademona kwake; 3 Jowana nsati wa Kuza, wanuna lweyi a a lavisela muti wa Heroda; Suzana ni vavasati van’wana va vanyingi lava a va va pfuna hi mintxhumu yavu.

4 Loko a xitsrhungu lexikulu kun’we ni lava a va mu landzrelela loko a suka ka doropa dzrin’wana ni dzrin’wana va hlengeletanile, Yesu a sungula ku va dondzrisa hi ku tizrisa xifaniso a ku: 5 “A mudzrimi wa kukazri a sukile a ya xuvela mbewu. Loko a li ku xuveleni, timbewu ta kukazri ti wele tlhelweni ka ndlela ti kandzreteliwa, kutani ti diwa hi tinyanyana. 6 Tin’wana ti wele mazribyeni, kutani ntsrhaku ka loko ti milile, ti game ti woma hikusa a ku nga na ntsrhongo. 7 Tin’wana ti wele a xikazri ka mitwa, kutani a mitwa leyi kuliki kun’we na tone yi ti kamanyeta. 8 Kambe tin’wana ti ye wela a misaveni leyinene, kutani loko ti milile ti beka mihandzru hi lani ku phindhiwiki ka 100.” Ntsrhaku ka loko a hlaye mintxhumu yoleyo, a hlaya hi zritu dzra ku tlakuka, a ku: “Lweyi a nga ni tindleve ta ku yingela, a a yingiseti.”

9 Kambe a vadondzrisiwa vake va mu vutisa leswaku hi wini ntlhamuxelo wa xifaniso lexi. 10 A va byela a ku: “N’wine mi nyikiwe ku twisisa swihundla swa ku xwenga swa Mfumu wa Xikwembu Nkulukumba, kambe van’wana ni va dondzrisa hi ku tizrisa swifaniso, akuva nambiloko va lavisa, va nga voni ntxhumu, ni loko va swi twa, va nga wu twisisi mongo. 11 A ntlhamuxelo wa xifaniso lexi hi lowu: A mbewu i zritu dzra Xikwembu Nkulukumba. 12 A leti weliki tlhelweni ka ndlela hi lava va yingeliki zritu dzra Xikwembu Nkulukumba, kutani Diyavulosi a ta a teka zritu ledzro a timbilwini tavu akuva va nga kholwi kutani va huluxiwa. 13 Leti weliki mazribyeni, hi lava loko va yingela zritu, va dzri yamukelaka hi ku nyonxa, kambe a va na timitsru. Va pfumela swa nkamanyana kambe loko va kumana ni mindzringo, va tsrhika. 14 Leti ti weliki xikazri ka mitwa, hi lava va yingeliki zritu, kambe hi mhaka ya ku vilela hi wutomi, ku kokiwa hi wukosi, ni ku djula ku tinyonxisa, va kamanyeteka hi ku helela kutani va nga beki mihandzru leyinene. 15 Kasi leti weliki a misaveni leyinene, hi lava loko va yingela zritu hi mbilu leyinene, va dzri bekisaka kutani va pswala mihandzru hi ku tiyisela.

16 “A nga kone lweyi loko a tlhavika motsre a wu funeketaka hi ntxhumu kumbe a wu beka hansi ka mubede, kambe a wu tlhanteka henhla ka menza akuva wu vaningela lava nghenaka. 17 Hikusa a ku na ntxhumu lowu tumbetiwiki lowu taka kala wu nga paluxiwi, nambi lowu fihliwiki ha hombe lowu taka kala wu nga tiviwi ni ku humesiwa a livaleni. 18 Xileswo mi fanela ku yingiseta ha hombe, hikusa lweyi a nga na swone a ta yengeseleliwa swimbeni, kambe lweyi a kalaka a nga li na swone a ta tekeliwa nambileswi a yanakanyaka leswaku a na swone.”

19 Kutani vamakwavu ni mamana wake va mu tela, kambe va hluleka ku tsrhindzrekela kusuhi na yene hi mhaka ya xitsrhungu. 20 Xileswo va mu byela va ku: “Mamana waku ni vamakwenu va yime hala handle, va djula ku ku vona.” 21 A va hlamula a ku: “Mamana wanga ni vamakwezru hi lava va yingelaka zritu dzra Xikwembu Nkulukumba va tlhela va dzri landzra.”

22 Siku dzrin’wana yene kun’we ni vadondzrisiwa vake va nghene botini, kutani a va byela a ku: “A hi tluleleni hi ya ka tlhelo ledzrin’wana dzra lwandle.” Kutani va famba. 23 Kambe na va li ku tsremakanyeni, Yesu a khomiwa hi wuzrongo. Kutani ku va ni xidzedze lexikulu a lwandle, a boti dzravu dzri sungula ku tala hi mati dzri djula ni ku mbombomela. 24 Xileswo va ya mu pfuxa va ku: “Mudondzrisi, Mudondzrisi, ha fa!” Hiloko a pfuka a kawuka moya ni mavimbi, kutani swi miyela, ku va ni ku zrula. 25 Kutani a va vutisa a ku: “Dzri kwini lipfumelo dzrenu?” Kambe a va tale hi ku txhava va tlhela va hlamala, va vutisana va ku: “Kasi i mani mhunu lweyi, wa ku kota ku kawuka nambi ku li moya ni lwandle nakone swi mu yingiseta?”

26 Kutani va tlhasa a nkingeni wa lwandle a mugangeni wa Vagerasa, lowu lavisaniki ni Galileya. 27 Loko Yesu a huma botini, wanuna wa kukazri lweyi a a ni mademona lweyi a a huma doropeni ledzro a mu tela. A ku khalute nkama wa ku leha na a nga yambali ntxhumu, nakone a a nga tsrhami kaya, kambe a a tsrhama masizreni. 28 Loko a vona Yesu a bandlukana a khinsama mahlweni kwake, a hlaya hi zritu dzra ku tlakuka a ku: “U djula yini kwanga wene Yesu, N’wana wa Xikwembu Nkulukumba Lweyi a Tlakukiki Ngopfu? Na ku kombela, u nga ni xanisi.” 29 (Hikusa Yesu a a byeli demona ledzro leswaku dzri huma ka wanuna lweyo. Minkama yinyingi a dzri mu hlasela,* nakone a a tsrhamela ku tsrimbiwa hi matxhini ni hi tinghomondho a tlhela a voneleliwa, kambe a a swi phinya, nakone a demona a dzri mu kongomisa leswaku a ya tsrhama nhoveni.) 30 Yesu a mu vutisa a ku: “Hi wene mani vito dzraku?” A ku: “Ni butsrhu”, hikusa a a ngheniwe hi mademona ya manyingi. 31 Nakone a ma mu kombela leswaku a nga ma zrumi kuva ma ya a xikheleni xa ku yenta. 32 A ku ni ntlhambi wa tinguluve lowu a wu li ku deni a nhaveni, xileswo ma mu kombela leswaku a ma pfumelela kuva ma nghena a tinguluveni, kutani a ma pfumelela. 33 Kutani a mademona ma huma ka wanuna yelweyo ma ya nghena ka tinguluve, a ntlhambi hinkwawu wu tsrutsruma wu ya pela tiveni wu mbombomela. 34 Kambe loko a vabyisi va vona leswi yentxekiki, va tsrutsruma va ya byela vhanu lava tsrhamaka doropeni ni lava a va tsrhama kusuhi ni doropa dzroledzro.

35 Kutani a vhanu va huma akuva va ya vona leswi yentxekiki. Loko va tlhasa lomu Yesu a a li kone va vona wanuna lweyi a humesiwiki mademona, na a yambale mpahla nakone na a hanyisiwile a miyanakanywini, yene a a tsrhame minkondzrweni ya Yesu, kutani va sungula ku txhava ngopfu swinene. 36 Lava va swi voniki va va dzrungulela ndlela leyi wanuna lweyi a a ni mademona a hanyisiwiki ha yone. 37 Kutani vhanu va vanyingi va le tikweni dzra Vagerasa va kombela Yesu leswaku a suka tikweni dzravu, hikusa a va txhava ngopfu swinene. Kutani a khwela boti leswaku a tifambela. 38 Nambitanu, wanuna lweyi a humesiwiki mademona a kombela ku famba na yene, kambe Yesu a mu tlhelisa a ku: 39 “Tlhela u muka kaya, u tama u byela hinkwavu leswi Xikwembu Nkulukumba a ku yentxeliki swone.” Xileswo a tlhela, a sungula ku dzrungula a doropeni hinkwadzru leswi Yesu a mu yentxeliki swone.

40 Loko Yesu a tlhelela a Galileya, a xitsrhungu xi mu yamukela hi ku nyonxa, hikusa hinkwavu a va mu yimelile. 41 Hiloko ku tlhasa wanuna lweyi a vitaniwaka Yayiro; wanuna lweyi a a li muzrangeli wa sinagoga. A tlhasa a khinsama minkondzrweni ya Yesu a sungula ku mu kombela leswaku a famba na yene a kaya kwake, 42 hikusa a xin’hwanyatana xake xa xin’we, lexi a xi ni kolomu ka 12 wa malembe, a xi li kusuhi ni ku fa.

A nkama lowu Yesu a fambaka, a switsrhungu a swi mu kamanyetela. 43 A ku ni wansati lweyi a a ni 12 wa malembe na a ni mavabyi ya ku humetela ngati, nakone a ku vanga na mhunu lweyi a swi kotiki ku mu daha. 44 Kutani a tsrhindzrekelela Yesu hi le ntsrhaku a tlhasa a khumba mponta ya mpahla yake, hi nkama wolowo a ngati yake yi yima ku humetela. 45 Xileswo Yesu a ku: “I mani lweyi a ni khumbiki?” Leswi a ku nga na mhunu lweyi a a pfumela, Petro a ku: “Mudondzrisi, wa swi vona leswaku a switsrhungu swi hi matlhelo hinkwawu nakone swa ku kamanyetela.” 46 Kambe Yesu a ku: “Ku ni lweyi a ni khumbiki, hikusa ni twe ntamu wu huma kwanga.” 47 Loko wansati lweyo a xiya leswaku va mu vonile, a tsrhindzrekela na a zruzrumela a tlhasa a khinsama mahlweni kwake a hlaya mahlweni ka vhanu hinkwavu leswaku ha yini a mu khumbile ni ndlela leyi a hanyisiwiki ha yone hi ku kahlula. 48 Kambe Yesu a mu byela a ku: “N’wananga, a lipfumelo dzraku dzri ku hanyisile. Famba hi ku zrula.”

49 Na a ha vulavula, ku tlhasa muyimeli wa muzrangeli wa sinagoga a ku: “A xin’hwanyatana xaku xi file; u nga ha mu kazrati Mudondzrisi.” 50 Loko Yesu a twa leswo, a byela Yayiro a ku: “U nga txhavi, ntsena kombisa lipfumelo, a xin’hwanyatana xaku xi ta hanya.” 51 Loko a tlhasile mutini, a nga pfumelelanga mhunu leswaku a nghena na yene ndlwini handle ka Petro, Yohane, Yakobe kun’we ni vapswele va xin’hwanyatana. 52 Kambe hinkwavu a va li ku dzrileni, va ti ba ni swifuva hi ku vaviseka hi mhaka ya n’wana lweyi a fiki. Xileswo Yesu a ku: “Yimani ku dzrila, hikusa a xin’hwanyatana lexi a xi fanga kambe xi le ku yetleleni.” 53 Loko va twa leswo, va sungula ku mu hleka, hikusa a va swi tiva leswaku a xin’hwanyatana xi file. 54 Kambe Yesu a xi khoma hi voko a xi yangula a ku: “N’wananga, pfuka!” 55 A xin’hwanyatana xi pfuka* xi sekeleka hi ku kahlula, kutani a va byela leswaku va xi nyika swakuda. 56 A vapswele va xone a va nga ha tikoti hi ku nyonxa, kambe a va byela leswaku va nga byeli mhunu leswi yentxekiki.

9 Kutani Yesu a vitana lava 12 a va nyika ntamu ni wulawuli bya ku hlongola mademona ni ku hanyisa mavabyi. 2 A va zruma ku ya zrezra hi ta Mfumu wa Xikwembu Nkulukumba ni ku hanyisa lava vabyaka, 3 kutani a va byela a ku: “Mi nga fambi ni ntxhumu, nambi ku li nhonga, nkwama wa manghunghu, pawu, mali,* nambi ko va mpahla ya ku txintxa hi yone. 4 Kambe ka muti wun’wana ni wun’wana lowu mi taka nghena ka wone, tsrhamani ka wone ku ya tlhasa loko mi huma ka doropa dzroledzro. 5 Nakone kun’wana ni kun’wana lomu vhanu va kalaka va nga mi yamukeli, loko mi huma ka doropa dzroledzro, mphumunani ntsrhuzri a minkondzrweni yenu leswaku swi ta va wumboni kwavu.” 6 Kutani va suka va famba hi xidoropana ni xidoropana, va twalisa madzrungula lamanene ni ku hanyisa a mimbangwini hinkwayu.

7 Loko Heroda* hosi ya muganga* a twa hinkwaswu leswi a swi yentxeka, a kazrateka ngopfu swinene hikusa van’we a va hlaya leswaku Yohane a pfuxiwile a ku feni, 8 kambe van’wana a va ku i Eliya lweyi a humeleliki, nakasi van’wanyana a va hlaya leswaku i mun’we wa vaprofeta va khale lweyi a pfuxiwiki. 9 Heroda a ku: “Yohane ni mu tsreme nhloko, kutani i mani lweyi a yentxetelaka mintxhumu leyi ni yi yingelaka?” Xileswo a a swi djula ngopfu ku mu vona.

10 Loko vapostola va tlhela, va byela Yesu hinkwaswu leswi va swi yentxiki. Kutani a va teka a famba na vone a doropeni ledzri vitaniwaka Betsaida va ya va wuswavu. 11 Kambe loko switsrhungu swi swi tiva, swi mu landzra. A swi yamukela hi lizrandzru kutani a sungula ku swi dondzrisa mayelanu ni Mfumu wa Xikwembu Nkulukumba ni ku hanyisa lava a va vilela ku hanyisiwa. 12 A madambyeni lava 12 va yela Yesu va ku: “Byela xitsrhungu leswaku xi famba akuva xi ya swidoropanini ni le mimbangwini yimbeni ya le kusuhi xi ya tikumela mbangu wa ku yetlela ni swakuda, hikusa lani hi le kule ni doropa.” 13 Kambe a va byela a ku: “Va nyikani swakuda n’wine.” Va mu hlamula va ku: “Ho va ni ntlhanu wa mapawu ni tihlampfi tibidzri ntsena, handle ka loko hine hi ngo famba hi ya xavela vhanu lava hinkwavu swakuda.” 14 Nakunene, a va li kolomu ka 5.000 wa vavanuna. Kambe a byela vadondzrisiwa vake a ku: “Va tsrhamisisani hi mintlawa ya kolomu ka 50 wa vhanu.” 15 Kutani va yentxa swoleswo, va va byela leswaku va tsrhamisa. 16 A teka ntlhanu wa mapawu ni tihlampfi tibidzri, a lavisa tilweni a khongota.* Ntsrhaku ka leswo a ma khemelela a nyika vadondzrisiwa vake akuva va yavela xitsrhungu. 17 Xileswo hinkwavu va da va xuzra, ntsrhaku ka leswo va hlengeleta leswi saliki va tata 12 wa mintsrhava.

18 Siku dzrimbeni na Yesu a li ku khongoteni wuswake, a vadondzrisiwa va mu yela kutani a va vutisa a ku: “Xana a switsrhungu swi li hi mine mani?” 19 Va mu hlamula va ku: “Va li u Yohane Mubabatisi, kambe van’wana va li u Eliya, nakasi van’wanyana va li u mun’we wa vaprofeta va khale a pfuxiwiki.” 20 Kutani a va vutisa a ku: “N’wine ke, mi li hi mine mani?” Petro a hlamula a ku: “U Kriste lweyi a zrumiwiki hi Xikwembu Nkulukumba.” 21 Kutani a va tsratsriya leswaku va nga byeli mhunu mhaka leyo, 22 kambe a va byela a ku: “A N’wana wa mhunu a fanela ku xanisiwa ngopfu ni ku dzreliwa hi vakulukumba, vaprista lavakulu ni vatsrali a tlhela a dlayiwa, a gama a pfuxiwa hi siku dzra wuzrazru.”

23 Kutani a ya mahlweni a byela hinkwavu a ku: “Loko mhunu a djula ku ni landzrela, a a tiyale kutani a zrwala mhandzri yake ya nxanisa* siku ni siku a tama a ni landzrela. 24 Hikusa lweyi a djulaka ku huluxa wutomi* byake a ta luzekeliwa hi byone, kambe lweyi a luzekeliwaka hi wutomi* byake hi mhaka yanga a ta tlhela a byi kuma. 25 Kunene swi siza yini kuva mhunu a kuma mintxhumu hinkwayu ya misava kambe a luzekeliwa hi wutomi byake kumbe a tivavisa? 26 Hikusa lweyi a nga ni tingana ha mine ni hi mazritu yanga, a N’wana wa mhunu a ta va ni tingana hi mhunu yelweyo loko a ta hi ku phatima kwake ni ka Papayi wake ni ka tintsrumi ta ku xwenga. 27 Kambe ni mi byela ntiyiso, van’wana ka lava yimiki lani a va nge ti fa na va nga zranganga va vona Mfumu wa Xikwembu Nkulukumba.”

28 Ntsrhaku ka loko ku khalute kolomu ka 8 wa masiku na a hlaye mazritu lawa, a teka Petro, Yohane na Yakobe a tlhantukela a nhaveni na vone akuva a ya khongota. 29 Kutani loko a li ku khongoteni, a wuso byake byi txintxa, ni mpahla yake yi basa yi ku baaa. 30 Hiloko ku humelela vavanuna vabidzri va bulisana na yene; a ku li Moxe na Eliya. 31 Vone a va phatima swinene kutani va sungula ku vulavula hi ku famba kwake, loku a a li kusuhi ni ku ku hetisisa a Yerusalema. 32 Petro ni lava a va li na yene a va yetlelile, kambe loko va pfukile, va vone ku phatima kwake ni vavanuna vabidzri lava a va yimi na yene. 33 A nkama lowu vavanuna volavo va sukaka lani a a li kone, Petro a byela Yesu a ku: “Mudondzrisi, swa nyonxisa ku va lani. Hi pfumelele hi gwimba matende mazrazru, dzrin’we dzri va dzraku, dzrin’wana dzri va dzra Moxe, dzrin’wanyana dzri va dzra Eliya.” Petro a a nga swi tivi leswi a a swi hlaya. 34 Kambe na a ha hlaya mazritu lawo, ku vumbeka tlavi dzri sungula ku va funeketa, loko dzri va funeketile va sungula ku txhava. 35 Kutani ku twala zritu ledzri humaka tlavini dzri ku: “Lweyi i N’wananga, lweyi ni mu hlawuliki. Mu yingisetani.” 36 Na zritu dzra ha twala, va vona leswaku Yesu a sale wuswake. Kambe va tsrhama na swone va nga byeli mhunu a masikwini wolawo leswi va swi voniki.

37 Hi mundzruku ka kone loko va fulamelile hi le nhaveni, a tlhangavetiwe hi xitsrhungu lexikulu. 38 Hiloko wanuna wa kukazri lweyi a a li makazri ka xitsrhungu a hlaya hi zritu dzra ku tlakuka a ku: “Mudondzrisi, ni kombela u pfuna n’wananga, hikusa a ni na mumbeni handle kwake. 39 Ku ni demona* ledzri mu hlaselaka, kutani a suketana a bandlukana, dzri mu tlatlalatela hansi a tlhutlha duvi, nakone nambiloko kutani dzri mu vavisile swi kazrata ngopfu kuva dzri mu tsrhika. 40 Ni kombele vadondzrisiwa vaku akuva va dzri hlongola, kambe va hlulekile.” 41 Yesu a hlamula a ku: “N’wine lixaka ledzri nga liki na lipfumelo nakone dzri bihiki, xana ni fanela ku tsrhama na n’wine ni ku mi lehisela mbilu ku ya tlhasa kwini? Buyisa n’wanaku halenu.” 42 Kambe a nkama lowu djaha dzri mu tsrhindzrekelelaka, a demona dzri dzri wisa hansi dzri dzri tlatlalatela. Nambitanu, Yesu a kawuka demona* kutani a hanyisa djaha ledzri a va a dzri tlhelisa ka papayi wa dzrone. 43 Kutani hinkwavu va hlamalisiwa hi wukulu bya ntamu wa Xikwembu Nkulukumba.

Na va ha hlamalisiwa hi hinkwaswu leswi a a swi yentxa, a byela vadondzrisiwa vake a ku: 44 “Yingisetani ha hombe mi tlhela mi dzrimuka mazritu lawa: A N’wana wa mhunu a ta wongiwa a nyikeliwa a mavokweni ya vhanu.” 45 Kambe a va swi twisisanga leswi a a swi hlaya. Nakunene a va fihleliwe swone akuva va nga swi twisisi, nakone a va txhava ku mu vutisa ntlhamunxelo wa mazritu wolawo.

46 Kutani va sungula ku phikisana hi leswaku i mani lwenkulu kwavu. 47 Hi ku tiva leswi a va swi yanakanya a timbilwini tavu, Yesu a teka ntsrongwana wa kukazri a mu yimisa tlhelweni kwake, 48 kutani a va byela a ku: “Lweyi a yamukelaka ntsrongwana lweyi hi mhaka ya vito dzranga, na mine awa ni yamukela; nakone mun’wana ni mun’wana lweyi a ni yamukelaka a yamukela ni Lweyi a ni zrumiki. Hikusa lweyi a tivonaka a li lwentsrongo a makazri kwenu hinkwenu hi yene a nga lwenkulu.”

49 Yohane a hlamula a ku: “Mudondzrisi, hi vone mhunu na a hlongola mademona hi vito dzraku, hi zame ku mu sivela hikusa a nga fambafambi na hine.” 50 Kambe Yesu a mu byela a ku: “Mi nga mu siveli, hikusa lweyi a kalaka a nga lwisani na n’wine a yima na n’wine.”

51 Leswi nkama wa leswaku Yesu a tlhantukela tilweni a wu li kusuhi, a tiyimisele hi ku helela ku ya a Yerusalema. 52 Xileswo, a zruma van’we ka vadondzrisiwa vake leswaku va zranga va famba. Va ye xidoropanini xa Samariya akuva va ya mu lulamiselela lomu a a ta tlhasela kone. 53 Kambe a Vasamariya a va mu yamukelanga hikusa a a tiyimisele ku ya a Yerusalema. 54 Loko mudondzrisiwa Yakobe na Yohane va vona leswo, va ku: “Hosi, wa swi djula kuva hi vitana ndzrilo wu xika hi le tilweni wu va helisa?” 55 Kambe a ndzruluka a va kawuka. 56 Xileswo va suka va ya xidoropanini ximbeni.

57 Na va li ndleleni, mhunu wa kukazri a mu byela a ku: “Ni ta ku landzrela kun’wana ni kun’wana lani u taka ya kone.” 58 Kambe Yesu a mu byela a ku: “A mabuwana* ma ni mimpala, a tinyanyana ti ni swisaka, kambe a N’wana wa mhunu a pfumala ni ka ku tumbeta nhloko.” 59 Kutani a byela lwemun’wana a ku: “Vana mulandzreli wanga.” Wanuna yelweyo a ku: “Hosi, ni pfumelele ni zranga hi ku ya lahla papayi.” 60 Kambe Yesu a mu hlamula a ku: “Tsrhika vafi va lahla vafi vavu, kambe wene famba u ya zrezra madzrungula ya Mfumu wa Xikwembu Nkulukumba a mimbangwini hinkwayu.” 61 A mun’wana a ku: “Hosi, ni ta ku landzrela, kambe ni pfumelele ni zranga hi ku ya lelela va le kaya.” 62 Yesu a mu byela a ku: “A mhunu lweyi a dzrimaka hi gedjo a gama a lavisa ntsrhaku a nga faneliwi hi ku nghena a Mfun’wini wa Xikwembu Nkulukumba.”

10 Ntsrhaku ka leswo, a Hosi yi hlawula van’wana va 70 yi va zruma hi vabidzrivabidzri leswaku va zranga va famba a madoropeni ni le mimbangwini hinkwayu leyi a yi ta famba ka yone. 2 Kutani yi va byela yi ku: “A ntsrhovelo i wukulu kambe a vatizri i vatsrongo. Xileswo, kombelani n’winyi wa ntsrhovelo leswaku a zrumela vatizri a ntsrhovelweni wake. 3 Fambani! Ni mi zruma swanga tihamba a makazri ka timhisi. 4 Mi nga teki swipatxhi swa mali kumbe manghunghu kumbe masandaliya, nakone mi nga losi mhunu* a ndleleni. 5 Ka muti wun’wana ni wun’wana lowu mi taka nghena ka wone, ku sungula hlayani mi ku: ‘A ku zrula a ku ve ni muti lowu.’ 6 Loko ku ni lava va zrandzraka ku zrula a va ve ni ku zrula loku mi va navelelaka kone. Kambe loko va nga li kone, a ku zrula koloko ku ta tlhelela kwenu. 7 Kutani tsrhamani mutini wolowo, mi da ni ku nwa mintxhumu leyi va taka mi nyika yone, hikusa a mutizri a faneliwa hi hakelo dzrake. Mi nga tsrhameli ku zruzrazruzra.

8 “Handle ka leswo, ka doropa dzrin’wana ni dzrin’wana ledzri mi taka nghena ka dzrone kutani va mi yamukela, danani leswi va taka mi nyika swone 9 nakone hanyisani lava vabyaka mi va byela mi ku: ‘A Mfumu wa Xikwembu Nkulukumba wu le kusuhi.’ 10 Kambe ka doropa dzrin’wana ni dzrin’wana ledzri mi taka nghena ka dzrone kutani va nga mi yamukeli, yanani ka tindlela letikulu ta kone ta doropa ledzro mi tlhasa mi ku: 11 ‘Ha mi mphumunela nambi ku li ntsrhuzri wa doropa dzrenu lowu namazreliki minkondzrweni yezru. Kambe swi tivani leswaku Mfumu wa Xikwembu Nkulukumba wu le kusuhi.’ 12 Na mi byela leswaku hi Siku dzra Yavanyiso a doropa dzroledzro dzri ta khatisiwa ngopfu ku tlula doropa dzra Sodoma.

13 “Khombo ka n’wine mi tsrhamaka Korazini! Khombo ka n’wine mi tsrhamaka Betsaida! Hikusa loko mahlolana lawa mi yentxeliwiki wone a me yentxiwa a Tiri ni le Sidoni, vhanu va kone a va ta va va tisole khale swinene, va yambala masaka ni ku tsrhama a nkumeni. 14 Xileswo mi ta khatisiwa ngopfu ku tlula Tiri ni Sidoni hi Siku dzra Yavanyiso. 15 N’wine ke, mi tsrhamaka Kapernawume, xana mi ta ya tilweni? Nikutsrongo! Mi ta ya Sizreni!*

16 “Lweyi a mi yingisetaka na mine awa ni yingiseta. Ni lweyi a mi dzrelaka na mine awa ni dzrela. Futsrhi lweyi a ni dzrelaka a dzrela ni Lweyi a ni zrumiki.”

17 Kutani lava 70 va tlhela na va nyonxile, va ku: “Hosi, nambi mademona ma hi yingiseta loko hi tizrisa vito dzraku.” 18 Loko a twa leswo a va byela a ku: “Ni vona Sathana na a wile hi le tilweni ku fana ni lihati. 19 Yingisetani! Ni mi nyike ntamu wa ku kandzretela tinyoka ni swizavanana,* ni ntamu wa ku hlula nala, nakone a ku na ntxhumu lowu taka mi vavisa. 20 Nambitanu, mi nga nyonxisiwe hi leswi mademona ma mi yingisetaka, kambe nyonxani hi leswi a mavito yenu ma tsraliwiki a tilweni.” 21 Hi nkama wolowo a moya wa ku xwenga wu mu yentxa a nyonxa kutani a ku: “Papayi, Hosi ya matilo ni misava, na ku dzrumisa a mahlweni ka vhanu lava, hikusa lava ku tlhazriha ni lava dondzriki ngopfu u va fihleli ha hombe timhaka leti, u ti tlhamuxela lava ku titsrongahata ku fana ni vatsrongwana. Ina Papayi, hikusa loku i ku zrandzra kwaku. 22 Papayi a ni nyike mintxhumu hinkwayu. A nga kone lweyi a tivaka leswaku a N’wana i mani loko ku nga li Papayi, nakone a nga kone lweyi a tivaka leswaku Papayi i mani loko ku nga li N’wana ni lweyi N’wana a zrandzraka ku mu tlhamuxela.”

23 Xileswo a byela vadondzrisiwa vake na va li wuswavu a ku: “Va nyonxa vhanu lava matihlo yavu ma kotaka ku vona mintxhumu leyi mi yi vonaka. 24 Hikusa na mi byela, vaprofeta vanyingi ni tihosi va swi navelile ku vona leswi mi swi vonaka kambe a va swi vonanga, ni ku yingela leswi mi swi yingelaka kambe a va swi yingelanga.”

25 Kutani wanuna wa kukazri lweyi a a li mudondzrisi wa Nawu a sekeleka a yima akuva a mu dzringa, a ku: “Mudondzrisi, ni fanela ku yentxa yini akuva ni kuma wutomi lebyi nga helikiki?” 26 Yesu a ku: “Ku tsraliwe yini a Nawini? Xana wa swi twisisa leswi wu hlayaka swone?” 27 A hlamula a ku: “‘U fanela ku zrandzra Yehovha Xikwembu Nkulukumba waku hi mbilu yaku hinkwayu, hi wutomi* byaku hinkwabyu, hi ntamu waku hinkwawu ni hi miyanakanyu yaku hinkwayu’ nakone ‘u fanela ku zrandzra vhanu van’wana hi ndlela leyi u tizrandzraka ha yone’.” 28 Yesu a mu byela a ku: “U hlamule ha hombe, tama u yentxa swoleswo u ta kuma wutomi.”

29 Kambe hi ku djula ku tiyentxa wa munene, wanuna lweyi a vutisa Yesu a ku: “Kasi i vamani vhanu van’wana* lava ni fanelaka ku va zrandzra?” 30 Yesu a hlamula a ku: “Wanuna wa kukazri a a suka Yerusalema a fulamela a ya Yeriko kutani a hlaseliwa hi swigevengu, va mu tekela mpahla ni mintxhumu yake hinkwayu, va mu ba, va gama va tsrutsruma va mu siya na a li kusuhi ni ku fa. 31 Kutani swi hantlana na muprista wa kukazri a famba hi ndlela yoleyo, kambe loko a mu vona a dedeka a mu khaluta. 32 Hi lani ku fanaka, ku te Mulevhi wa kukazri, na yene loko a mu vona a dedeka a mu khaluta. 33 Kambe a Musamariya wa kukazri lweyi a a yendzra hi ku tizrisa ndlela yoleyo a tlhase lani a a li kone, kutani loko a mu vona, a mu twela wusiwana. 34 Xileswo a mu tsrhindzrekelela a mu tota mafuzra ni vhinyu ka timbanga, a tlhela a mu banditxha. Ntsrhaku ka leswo, a mu khwelisa ka xifuyu xake kutani a famba na yene ka yindlu ya kukazri ya ku yamukela vayeni a ya mu hlayisa. 35 Hi mundzruku ka kone a teka madenari mabidzri a nyika n’winyi wa yindlu, a mu byela a ku: ‘Mu hlayisi, loko u tizrisa mali ya ku tlula leyo ni ta ta ku hakela loko ni tlhela.’ 36 U vona leswaku i mani ka lavazrazru a kombisiki lizrandzru ka wanuna lweyi a hlaseliwiki hi swigevengu?” 37 A hlamula a ku: “Hi lweyi a mu kombisiki timpswalu.” Xileswo Yesu a mu byela a ku: “Kutani na wene yentxa leswi fanaka.”

38 Loko va li ku fambeni, Yesu a nghena ka xidoropana xa kukazri. Kutani wansati wa kukazri lweyi a vitaniwaka Marta a mu yamukela a kaya kwake. 39 Marta a a ni makwavu lweyi a vitaniwaka Mariya, lweyi a yiki tsrhama a minkondzrweni ya Hosi a yingiseta leswi a yi swi hlaya.* 40 Nakasi Marta a a dzrivatiwa hi mintizro yinyingi. Xileswo a mu yela a mu byela a ku: “Hosi, xana a wu na mhaka leswi makwezru a ni tsrhikaka ni tizra wuswanga? Mu byeli a buya a ni pfuna.” 41 A Hosi yi mu hlamula yi ku: “Marta, Marta, u vilelisiwa ni ku kazrateka hi mintxhumu ya yinyingi. 42 Kambe ko vileleka mintxhumu ya yitsrongo ntsena, kumbe wun’we. Leswi Mariya a langiki swone i swinene nakone a nge ti txhuka a tekeliwa swone.”

11 Khambi dzrimbeni a a li mbangwini wa kukazri na a khongota, loko a gamile, mun’we wa vadondzrisiwa vake a ku: “Hosi, hi dondzrisi ku khongota, swanga hi leswi Yohane na yene a dondzrisiki vadondzrisiwa vake.”

2 Xileswo a va byela a ku: “Loko mi khongota hlayani mi ku: ‘Papayi, a vito dzraku a dzri xwengisiwe.* A Mfumu waku a wu te. 3 Siku ni siku hi nyike swakuda swezru hi ku ya hi swivileleko swa siku dzroledzro. 4 Hi dzrivaleli swidoho swezru, hikusa na hine ha va dzrivalela hinkwavu lava hi dohelaka; nakone u nga hi tsrhiki hi nghena ndzringweni.’”

5 A tlhela a va byela a ku: “A hi nge u ni munghanu, kutani u mu yela a xikazri ka wusiku u tlhasa u mu byela u ku: ‘Nakulozri, ni kombela u ni nyika* mapawu mazrazru, 6 hikusa na ha ku yendzreliwa hi mun’we wa vanghanu vanga, kambe a ni na xa ku mu hanana xone.’ 7 Nambitanu a ku hlamula na a li ndlwini a ku: ‘U nga ni kazrati. Futsrhi a xipfalu xi ve xi khiyiwa, nakone mine ni vananga hi le ku yetleleni. A ni nge pfuki ni ku nyika ntxhumu.’ 8 Na mi byela, a ta pfuka a ku nyika hinkwaswu leswi u swi djulaka, ku nga li hi leswi u nga munghanu wake kambe hi mhaka ya ku phikelela kwaku. 9 Xileswo na mi byela, yanani mahlweni mi kombela, kutani mi ta nyikiwa; yanani mahlweni mi djuletela, kutani mi ta swi kuma; yanani mahlweni mi gongondzra, kutani mi ta pfuleliwa. 10 Hikusa lweyi a kombelaka awa nyikiwa, lweyi a djuletelaka awa swi kuma, ni lweyi a gongondzraka a ta pfuleliwa. 11 Nakunene hi wini papayi lweyi loko n’wanake a kombela hlampfi, a nga mu nyikaka nyoka a matsrhan’wini ya ku mu nyika hlampfi? 12 Kumbe lweyi loko a mu kombela tandzra, a nga mu nyikaka xizavanana?* 13 Kutani leswi n’wine nambileswi mi nga vadohi, mi swi kotaka ku nyika vanenu mintxhumu leyinene, xana Papayi wenu lweyi a nga tilweni a nge swi koti ku va nyika moya wa ku xwenga lava va mu kombelaka?”

14 Ntsrhaku ka leswo, a hlongola demona ledzri a dzri yentxa wanuna wa kukazri a va mbheveve. Loko demona dzri humile, wanuna yelweyo a sungula ku vulavula, kutani a switsrhungu swi hlamala. 15 Kambe van’we va ku: “A hlongola mademona hi ntamu wa Belzebule,* mufumi wa mademona.” 16 Kasi van’wana, hi ku djula ku mu dzringa, va sungula ku mu sindzrisa leswaku a va yentxela hlolana ledzri pfaka tilweni. 17 Hi ku tiva leswi a va swi yanakanya, a va byela a ku: “Mfumu wun’wana ni wun’wana lowu yavaniki wu ta hohloka, ni muti lowu yavaniki wu ta hohloka. 18 Hi ndlela leyi fanaka, loko Sathana na yene a yavanile, xana a mfumu wake wu ta tiyisa kuyini? Hikusa n’wine mi li ni hlongola mademona hi ntamu wa Belzebule. 19 Loko a li leswaku mine ni hlongola mademona hi ntamu wa Belzebule, xana a vanenu va ma hlongola hi ntamu wa mani? Hi leswo swi taka yentxa va mi yavanyisa. 20 Kambe loko a li leswaku ni hlongola mademona hi ntamu wa Xikwembu Nkulukumba,* a Mfumu wa Xikwembu Nkulukumba kunene wu mi tlhaselile. 21 Loko wanuna wa ntamu, lweyi a hlomiki ha hombe a vonelela yindlu yake, a mintxhumu yake yi tsrhama na yi sizrelelekile. 22 Kambe loko mhunu lweyi a nga ni ntamu ku mu tlula a lwa na yene a va a mu hlula, mhunu yelweyo a mu tekela matlhazri yake hinkwawu lawa a a ma dumba a tlhela a yavela vhanu van’wana leswi a mu tekeliki swone. 23 Lweyi a kalaka a nga yimi na mine a lwisana na mine, nakone lweyi a kalaka a nga hlengeleti na mine awa hangalasa.

24 “Loko moya lowu nga basangakiki wu suka mhunwini, wu khaluta hi le mananga wu djuletela mbangu wa ku wisela ka wone, loko wu wu pfumala, wu tibyela leswi: ‘Ni ta tlhelela a ndlwini kwanga lomu ni buyaka hi kone.’ 25 Loko wu tlhasa, wu kuma yindlu yoleyo na yi kukuliwile yi basa yi tlhela yi xongiseliwa. 26 Hiloko wu famba wu ya teka 7 wa mimoya yin’wana leyi bihiki ngopfu ku tlula wone, yi ta ta nghena yi tsrhama kone. Xileswo a xiyimu xa mhunu yelweyo xi biha ngopfu ku tlula xa le ku sunguleni.”

27 Na a ha hlaya mintxhumu leyo, wansati wa kukazri lweyi a a li xikazri ka xitsrhungu a mu byela hi zritu dzra ku tlakuka a ku: “Awa nyonxa wansati lweyi a ku pswaliki a tlhela a ku nyan’wisa!” 28 Kambe Yesu a ku: “Im-him, ku nyonxa lava twaka zritu dzra Xikwembu Nkulukumba va tlhela va hanya hi dzrone!”

29 Loko switsrhungu swi hlengeletanile, a ku: “A lixaka ledzri dzri bihile, dzri djula ku yentxeliwa hlolana, kambe a ku na hlolana ledzri taka yentxeliwa dzrone handle ka hlolana ledzri yentxekeliki Yonasi. 30 Swanga hi leswi Yonasi a viki xikombiso ka Vaninivha, na yene N’wana wa mhunu a ta va xikombiso ka lixaka ledzri. 31 Hi nkama wa yavanyiso, a hosi ya xisati ya le nyingitimu yi ta pfuxiwa kun’we ni vhanu va lixaka ledzri. Yi suke mbangwini wa le kule yi ta ta yingela wutlhazri bya Solomoni. Leswo swi kombisa leswaku a lixaka ledzri dzri ta khatisiwa. Kambe na mi byela, lani ku ni mhunu lweyi a tlakukiki ku tlula Solomoni. 32 Hi nkama wa yavanyiso, Vaninivha va ta pfuxiwa kun’we ni lixaka ledzri. Vone va tisolile loko va yingela dzrungula dzra Yonasi. Leswo swi kombisa leswaku lixaka ledzri dzri ta khatisiwa. Kambe lani ku ni mhunu lweyi a tlakukiki ku tlula Yonasi. 33 Loko mhunu a tlhavika motsre, a nga wu tlhoti nambi ku wu beka hansi ka mubede, kambe a wu tlhanteka henhla ka menza akuva wu vaningela lava nghenaka. 34 A motsre wa mizri i tihlo dzraku. Loko tihlo dzraku dzri li dzrinene, a mizri waku hinkwawu na wone wa vaninga,* kambe loko tihlo dzraku dzri bihile,* a mizri waku na wone i munyama. 35 Xileswo, tivoneli leswaku a ku vaninga loku u nga na kone ku nga vi munyama. 36 Kutani, loko mizri waku hinkwawu wu vaninga, wu nge na mbangu lowu nga munyama, hinkwawu wu ta vaninga ku fana ni loko motsre wu ku vaninga hi minseve ya wone.”

37 Loko a heta ku hlaya leswo, Mufarisi wa kukazri a mu zramba leswaku va ya da kun’we. Xileswo a ya kaya kwake a tsrhama menzeni. 38 Kambe a Mufarisi a hlamala loko a vona leswaku Yesu a de na a nga hlambanga mavoko.* 39 Kambe a Hosi yi mu byela yi ku: “N’wine Vafarisi, mi hlampswa handle ka kopo ni handle ka paratu, kambe a ndzreni mi tale hi wunavenave ni wubihi. 40 N’wine vhanu lava kalaka va nga yanakanyi! Xana lweyi a hambiki handle, a nga hambanga ni ndzreni? 41 Loko mi nyika swisiwana ntxhumu wa kukazri* mi fanela ku swi nyika na swi sukela mbilwini, loko mi yentxa leswo, mi ta va lava basiki hi ku helela. 42 Kambe khombo kwenu Vafarisi, hikusa mi nyikela swa wukhume bya ximbowana, bya mbowa ni bya swimilamilana swimbeni hinkwaswu, kambe mi dzrela wululami ni xileleto xa ku zrandzra Xikwembu Nkulukumba! Leswi hi leswi a mi fanela ku swi yentxa, kambe na mi nga dzreli mintxhumu leyin’wana. 43 Khombo kwenu Vafarisi, hikusa mi zrandzra switsrhamu swa le mahlweni a masinagogeni ni ku loseteliwa a mabazara! 44 Khombo kwenu, hikusa mi fana ni masizra lawa ma nga vonekiki ha hombe,* lawa vhanu va fambaka henhla ka wone na va nga swi tivi!”

45 Mun’we wa vadondzrisi va Nawu a mu hlamula a ku: “Mudondzrisi, loko u hlaya leswo, u zruka na hine.” 46 Kutani Yesu a ku: “Khombo kwenu na n’wine vadondzrisi va Nawu, hikusa mi zrwexa vhanu mintsrhwalu ya ku bindzra, kambe n’wine a mi swi djuli nambi ku yi khumba hi litiho!

47 “Khombo kwenu, hikusa mi yaka masizra ya vaprofeta, lava dlayiwiki hi vakokwana venu! 48 Nakunene ma yi tiva mintizro ya vakokwana venu, nambitanu ma yi seketela, hikusa vone va dlaye vaprofeta, n’wine mi yaka masizra ya vone. 49 Hi leswo swi yentxiki Xikwembu Nkulukumba lweyi a tlhazrihiki a hlaya leswi: ‘Ni ta va zrumela vaprofeta ni vapostola, kutani va ta va dlaya va tlhela va xanisa van’we va vone, 50 akuva a ngati ya vaprofeta hinkwavu leyi halatiwiki ku sukela a ku tumbuluxiweni ka misava yi londzriwa ka lixaka ledzri, 51 ku sukela ka ngati ya Abele ku ya ka ngati ya Zakariya, lweyi a dlayiwiki a makazri ka altari ni tempele.’ Ina, na mi byela, yi ta londzriwa ka lixaka ledzri.

52 “Khombo kwenu n’wine vadondzrisi va Nawu, hikusa mi teke mpfungulu lowu pfulelaka vhanu leswaku va tiva Xikwembu Nkulukumba. N’wine a mi nghenanga, nakone mi sivela lava djulaka ku nghena!”

53 Loko a huma mbangwini wolowo, a Vafarisi ni vatsrali va sungula ku mu kazrata ngopfu swinene ni ku mu tata hi swivutiso, 54 na va djuletela mukhandlu wa leswaku a hlaya xa kukazri akuva va mu phasa hi xone.

12 Hi nkama wolowo, ku hlengeletani xitsrhungu xa makume ya madzana lakakuva xi patsra ni ku pswanyetelana, kutani Yesu a zranga hi ku byela vadondzrisiwa vake a ku: “Tivonelani ka fermentu* dzra Vafarisi, ku nga wukanganyisi. 2 Kambe a ku na ntxhumu lowu fihliwiki ha hombe lowu taka kala wu nga paluxiwi, nakone a ku na xihundla lexi taka kala xi nga tiviwi. 3 Xileswo, leswi mi swi hlayaka a munyameni swi ta yingeliwa a ku vonakaleni, nakone leswi mi yentxaka hi ku hlevetelana na mi li tindlwini swi ta byeliwa vhanu hinkwavu.* 4 Futsrhi na mi byela vanakulozri, mi nga va txhavi lava vo ko kota ku dlaya mizri kambe ntsrhaku ka leswo va kalaka va nga koti ku yentxa swin’wana. 5 Kambe ni ta mi komba lweyi mi fanelaka ku mu txhava. Txhavani lweyi a kotaka ku dlaya a tlhela a txukumetela a Gehena.* Ina, na mi byela, hi lweyo mi fanelaka ku mu txhava. 6 Xana a va xavisi ntlhanu wa swindjengeletana hi masentavhu mabidzri?* Nambitanu a xi kone ni xin’we ka swone lexi dzrivaliwaka* hi Xikwembu Nkulukumba. 7 Kambe nambi misisi ya tinhloko tenu yi kontiwile hinkwayu. Mi nga txhavi; n’wine mi va lisima ku tlula swindjengeletana swa swinyingi.

8 “Na mi byela, lweyi a pfumelaka a mahlweni ka vhanu leswaku awa ni tiva, a N’wana wa mhunu na yene a ta pfumela a mahlweni ka tintsrumi ta Xikwembu Nkulukumba leswaku awa mu tiva. 9 Kambe lweyi a yalaka a mahlweni ka vhanu leswaku awa ni tiva na yene a ta yaliwa a mahlweni ka tintsrumi ta Xikwembu Nkulukumba. 10 Nakone lweyi a vulavulaka ku biha hi N’wana wa mhunu, a ta dzrivaleliwa, kambe lweyi a zrukaka moya wa ku xwenga a nge ti dzrivaleliwa. 11 Loko va ya mi thethisa a livaleni,* kumbe va mi yisa mahlweni ka lava bekiwiki hi tihosi, kumbe ka tihosi, mi nga vileli hi leswi mi taka hlaya swone kumbe hi ndlela leyi mi taka swi hlaya ha yone akuva mi tiyimelela, 12 hikusa hi nkama wolowo a moya wa ku xwenga wu ta mi dondzrisa leswi mi fanelaka ku swi hlaya.”

13 Mhunu wa kukazri lweyi a a li xikazri ka xitsrhungu a mu byela a ku: “Mudondzrisi, byela makwezru a yavelana pfindla na mine.” 14 Yesu a mu byela a ku: “I mani a nga ni beka leswaku ni va muyavanyisi kumbe muyaveli wa pfindla dzrenu?” 15 Kutani a byela xitsrhungu a ku: “Tsrhamani na mi pfule matihlo, nakone mi tivonela ka wunavenave hinkwabyu,* hikusa nambiloko mhunu a ni mintxhumu ya yinyingi, a wutomi byake a byi pfi ka mintxhumu leyi a nga na yone.” 16 Xileswo a va byela xifaniso a ku: “A nsimu ya wanuna wa kukazri lweyi a a ganyile,* yi pfune ngopfu. 17 Kutani a sungula ku yanakanyisisa a mbilwini yake a ku: ‘Ni ta yentxa yini leswi ni kalaka ni nga ha na mbangu wa kuva ni ta hlengeleta ntsrhovelo wanga?’ 18 Hiloko a ku: ‘Ni ta yentxa leswi: ‘Ni ta hahlula matsrhala yanga ni yaka man’wana ya makulu, kutani ni hlengeleta kone trigu dzranga hinkwadzru ni mintxhumu yanga hinkwayu, 19 ni gama ni tibyela leswi:* “U hlengelete mintxhumu ya yinyingi leyinene leyi taka ku pfuna ku dzringana malembe manyingi; wisa, u da, u nwa, u tikholisa.’” 20 Kambe Xikwembu Nkulukumba a mu byela leswi: ‘Wene mhunu lweyi a nga yanakanyikiki, wusiku byolebyi u ta fa. Kutani i mani lweyi a taka sala ni mintxhumu leyi u yi hlengeleteliki? 21 Leswo hi leswi swi yentxekelaka wanuna lweyi a tihlengeletelaka wukosi kambe a li xisiwana a mahlweni ka Xikwembu Nkulukumba.”

22 Kutani a byela vadondzrisiwa vake a ku: “Hi leswo swi ni yentxaka ni ku: Tsrhikani ku hlatiyela hi wutomi byenu* mi ku hi ta da yini kumbe ku hlatiyela hi mizri wenu mi ku hi ta yambala yini. 23 Hikusa a wutomi i bya* lisima ku tlula swakuda, na wo mizri i wa lisima ku tlula mpahla. 24 Yanakanyani magwavava:* A ma byali mbewu nambi ku tsrhovela; futsrhi a ma hlengeleti tsrhaleni; nambitanu Xikwembu Nkulukumba awa ma wundla. Xana a mi va lisima ngopfu ku tlula tinyanyana? 25 I mani kwenu lweyi hi ku va a hlatiyela a nga swi kotaka ku lehisanyana wutomi byake? 26 Kutani loko mi hluliwa hi ntxhumu wa wutsrongo wa ku fana ni lowo, ha yini mi hlatiyela hi mintxhumu leyin’wana? 27 Yanakanyani ndlela leyi swiluva* swi kulaka ha yone: A swi tizri nambi ku zrunga mpahla; kambe na mi byela leswaku nambi Solomoni lweyi a a ganye ngopfu* a nga zanga a yambala ku fana ni xin’we xa swone. 28 Kutani loko Xikwembu Nkulukumba a yambexa swimila swa nhova leswi namunhla swi nga kone na mundzruku swi ta yisiwa xitikweni, a nga hlula ha yini ku mi yambexa, n’wine lava nga ni lipfumelo dzritsrongo! 29 Xileswo, tsrhikani ku hlatiyela hi leswaku mi ta da yini ni leswaku mi ta nwa yini, nakone tsrhikani ku vilela ku tlula mpimu; 30 hikusa a mintxhumu leyo hinkwayu hi leyi vamatiko va yi hlongoliselaka hi nkhinkhi, kambe Papayi wenu awa swi tiva leswaku ma yi vilela mintxhumu leyi. 31 A matsrhan’wini ya leswo, yanani mahlweni mi djula Mfumu, kutani a mintxhumu leyi mi ta yengeseleliwa yone.

32 “Mi nga txhavi n’wine lava ntlhambinyana, hikusa Papayi wenu a nyonxela ku mi nyika Mfumu. 33 Xavisani mintxhumu yenu mi pfuna lava vilelaka.* Hambani swipatxhi swa mali leswi kalaka swi nga honeki, ku nga wukosi lebyi nga helikiki a tilweni, lani a muyivi a nga tsrhindzrekelikiki nakone a nsumba* wu nga dikiki kone. 34 Hikusa lani wukosi byenu byi nga kone, hi lani na tone timbilu tenu ti taka va kone.

35 “Yambalani mi tilulamisela* mi tlhela mi tlhavika ni mimotsre yenu, 36 nakone mi fanela ku fana ni vavanuna lava yimelaka leswaku n’winyi wavu a buya hi mutxhatwini, akuva loko a tlhasa a gongondzra, va tekela ku mu pfulela. 37 Va nyonxa a vatizri lava loko n’winyi wavu a tlhela, a va kumaka na va zrindzrile! Ni mi byela ntiyiso, a ta tilulamisela* kutani a va byela leswaku va tsrhama menzeni a gama a va phamela. 38 Nakone va ta nyonxa loko n’winyi wavu a tlhasa xikazri ka wusiku* kumbe a mpundzrwini* a va kuma na va zrindzrile! 39 Kambe tivani leswi, loko n’winyi wa muti a e tiva nkama lowu muyivi a a ta buya ha wone, a a ta va a nga swi pfumelelanga leswaku a yindlu yake yi tlhanyiwa. 40 Na n’wine, tsrhamani na mi tilulamiselile, hikusa a N’wana wa mhunu a ta tlhasa hi nkama lowu mi kalaka mi nga wu yanakanyi.”

41 Kutani Petro a ku: “Hosi, a xifaniso lexi u byela hine ntsena kumbe u byela ni lavan’wana?” 42 A Hosi yi ku: “Nakunene i mani nandzra wa ku dumbeka ni ku tlhazriha,* lweyi a n’winyi wake a taka mu beka leswaku a mu laviselela malandzra yake, akuva a tama a ma nyika swakuda leswi swi ma yanelaka hi nkama wa kone? 43 Awa nyonxa nandzra yelweyo loko a n’winyi wake a mu kuma na a yentxa swoswo! 44 Ni mi byela ntiyiso, a ta mu beka leswaku a lavisela mintxhumu yake hinkwayu. 45 Kambe loko nandzra yelweyo o txhuka a tibyela leswi: ‘A N’winyi wanga awa hlwela ku buya’, a va a sungula ku ba malandzrakulobye, a da a nwa a tlhela a popswa, 46 a n’winyi wake a ta tlhasa hi siku ledzri nandzra lweyo a kalaka a nga mu laviselanga ni hi nkama lowu a kalaka a nga wu tivi, kutani a ta mu khatisa hi ndlela ya ku vavisa ngopfu swinene a mu txukumetela mbangwini lowu ku nga ni lava kalaka va nga dumbekanga. 47 Kutani a nandzra yelweyo, lweyi a twisisiki ku zrandzra ka n’winyi wake kambe a nga tilulamiseli kumbe ku yentxa leswi n’winyi wake a mu kombeliki swone* a ta biwa ngopfu swinene. 48 Kambe lweyi a kalaka a nga swi twisisanga nambitanu a yentxa leswi faneliwaka hi ku va a biwa, a ta biwa kutsrongo. Nakunene lweyi a nyikiwaka swinyingi, ku ta yimeliwa leswinyingi kwake, nakone lweyi a nyikiwiki swinyingi akuva a swi lavisela, kwake ku ta yimeliwa leswi tlulaka leswi tolovelekiki.

49 “Ni teli ku ta tlhavika ndzrilo a misaveni, nakone ni nga ha djula yini swin’wana leswi kutani wu tlhavikiwiki? 50 Nakunene, ku ni babatiso ledzri ni fanelaka ku babatisiwa ha dzrone, nakone na ha ta kazrateka ngopfu ku ya tlhasa loko dzri hetiseka! 51 Xana mi pimisa leswaku ni tise ku zrula a misaveni? Na mi byela leswaku a ni tisanga ku zrula, kambe ni tise ku yavana. 52 Hikusa ku sukela ka swoswi ku ta va ni timholova a ndangwini, loko ka wone ku ni ntlhanu wa vhanu, vazrazru va ta holova ni vabidzri, lavabidzri va ta holova ni lavazrazru. 53 Va ta yavana, papayi a ta lwisana ni n’wanake wa xinuna, a n’wana wa xinuna a ta lwisana ni papayi wake, mamana a ta lwisana ni n’wanake wa xisati, a n’wana wa xisati a ta lwisana ni mamana wake, a n’wingi a ta lwisana ni n’wingi wake.”

54 A tlhela a byela switsrhungu a ku: “Loko mi vona tlavi dzri huma mpeladambu, mi tekela ku hlaya mi ku: ‘Ku ta va ni xidzedze’, swi va vhela swi yentxeka. 55 Ni loko mi vona moya wu hunga wu pfa hi le nyingitimu, mi li: ‘Ku ta hisa’, swi va swi yentxekisa xiswoswo. 56 Vakanganyisi, ma swi tiva ku tlhamuxela maxela, kambe ha yini swi mi hlula ku twisisa leswi swi yentxekaka a nkameni lowu? 57 Ha yini mi nga swi koti ku xiya leswi lulamiki ha wuswenu? 58 Hi xikombiso, loko lweyi a ku mangaleliki a ku yisa wuhosini, lwela ku lulamisa timhaka na yene, na ma ha li ndleleni, akuva a nga ku yisi ka muyavanyisi kutani a muyavanyisi a ku nyikela ka mulaveleli, yene a ku pfalela djele. 59 Na ku byela, a wu na ku huma na u nga si na hakela sentavhu dzraku dzra wugamu.”*

13 Hi nkama wolowo ku ve ni vhanu lava byeliki Yesu hi ta Vagalileya lava Pilatu a va dlayiki na va li ku nyikeleni ka magandzrelo. 2 Kutani Yesu a va hlamula a ku: “Xana mi pimisa leswaku a Vagalileya volavo a ve doha ngopfu ku tlula Vagalileya lavan’wana hinkwavu a ku za va kumana ni khombo ledzro? 3 Nakunene a hi swone, kambe loko mi nga tisoli hinkwenu mi ta suvisiwa ku fana na vone. 4 Kumbe lava 18 va weliwiki hi xihondzro xa le Silowama xi va dlaya, xana mi pimisa leswaku a vo va ni nandzru lowukulu ku tlula vhanu hinkwavu lava tsrhamaka Yerusalema? 5 Nakunene a hi swone, kambe loko mi nga tisoli na n’wine hinkwenu mi ta dlayiwa ku fana na vone.”

6 Ntsrhaku ka leswo a va byela xifaniso lexi: “Wanuna wa kukazri a a ni nsinya wa nkuwa lowu a a wu byalile a masin’wini yake ya mawuvha, hi loko a ya djula mihandzru ka wone kambe a nga kumi ntxhumu. 7 Kutani a byela lweyi a a mu hlayisela nsimu ya mawuvha a ku: ‘Ledzri i lembe dzra wuzrazru na ni buya ni ta djula mihandzru ka nkuwa lowu kambe a ni kumi ntxhumu. Wu tsremi hikusa wo pfala mbangu mahala!’ 8 Lweyi a a mu hlayisela nsimu a mu hlamula a ku: ‘Hosi yanga, tlhela u wu nyika lembe dzrin’we, ni ta kela a matlhelweni ka wone ni txhela xitrumi. 9 Loko hi ku famba ka nkama wu pswala mihandzru, swi ta va swinene, kambe loko wu nga pswali u ta wu tsrema.’”

10 Na Yesu a li ku dondzriseni ka dzrin’we dzra masinagoga hi Savata, 11 a ku ni wansati lweyi a ku khaluta 18 wa malembe na a vabyisiwa hi demona,* a a tsrhama na a gotsrhekile nakone a a nga swi koti ku wololoka nikutsrongo. 12 Loko Yesu a mu vona, a mu byela a ku: “Wansati, u hanyisiwile ka mavabyi yaku.” 13 Kutani a mu tlhanteka mavoko, hi ku kahlula wansati yelweyo a wololoka a sungula ku dzrumisa Xikwembu Nkulukumba. 14 Kambe a muzrangeli wa sinagoga hi ku hlundzrukisiwa hi leswi Yesu a hanyisiki hi Savata, a byela xitsrhungu a ku: “Ku ni 6 wa masiku lawa ntizro wu fanelaka ku yentxiwa ha wone; xileswo tanani mi ta hanyisiwa hi masiku wolawo ku nga li hi siku dzra Savata.” 15 Nambitanu a Hosi yi mu hlamula yi ku: “Vakanganyisi, xana mun’wana ni mun’wana wenu a nga yi tlhantlhi homu yake kumbe mbongolo yake hi Savata akuva a ya yi nwisa mati? 16 Xana a swi fanekeli kuva wansati lweyi, lweyi a nga ntukulu wa Abrahamu nakone a tsrimbiwiki hi Sathana ku dzringana 18 wa malembe, a ntsrhunxiwa hi siku dzra Savata?” 17 Ntsrhaku ka loko a hlaye mintxhumu leyo, a vakaneti vake hinkwavu va sungula ku dana, kambe a xitsrhungu hinkwaxu xi sungula ku nyonxa hi kola ka mintxhumu hinkwayu ya ku hlamalisa leyi a yi yentxiki.

18 Xileswo a ya mahlweni a ku: “Xana a Mfumu wa Xikwembu Nkulukumba wu fana na yini, nakone ni nga wu fanisa na yini? 19 Wu fana ni mbewu ya sinapi leyi mhunu wa kukazri a yi tekiki a yi byala nsin’wini yake, kutani yi kula yi va nsinya lakakuva tinyanyana ti hamba swisaka a mazrwavini ya wone.”

20 A tlhela a ku: “Ni nga wu fanisa na yini Mfumu wa Xikwembu Nkulukumba? 21 Wu fana ni fermentu* ledzri wansati wa kukazri a dzri tekiki a dzri pfuva ni mimpimu yizrazru leyikulu* ya mapa ku ya tlhasa loko mbila hinkwayu yi kukumuka.”

22 Na a li ku yendzreni a ya Yerusalema, a fambe hi doropa ni doropa ni hi xidoropana ni xidoropana a dondzrisa. 23 Kutani wanuna wa kukazri a mu vutisa a ku: “Hosi, i ntiyiso leswaku i vatsrongo lava taka huluxiwa?” Yesu a va byela a ku: 24 “Tikazratelani ku nghena hi nyangwa ya yitsrongo, hikusa na mi byela, vanyingi va ta zama ku nghena kambe va ta hluleka. 25 Hikusa loko n’winyi wa muti o za a sekeleka a khiya xipfalu, mi ta yima handle mi gongondzra xipfalu mi ku: ‘Hosi, hi pfuleli.’ Kambe a ta mi hlamula a ku: ‘A ni swi tivi leswaku mi pfa kwini.’ 26 Kutani mi ta sungula ku hlaya mi ku: ‘Hi de hi tlhela hi nwa kun’we na wene, nakone a wu dondzrisa ka tindlela letikulu ta doropa dzrezru.’ 27 Kambe a ta mi byela a ku: ‘A ni swi tivi leswaku mi pfa kwini. Sukani la, hinkwenu n’wine vayentxi va leswa ku biha!’ 28 Mi ta dzrila mi ketsrela ni matinyo loko mi vona Abrahamu, Izaki, Yakobe, ni vaprofeta hinkwavu a Mfun’wini wa Xikwembu Nkulukumba, kambe n’wine mi txukumeteliwe handle. 29 Handle ka leswo, vhanu va ta ta hi le wuxeni, mpeladambu, n’walungu* ni le nyingitimu,* kutani va tsrhama menzeni a Mfun’wini wa Xikwembu Nkulukumba. 30 Van’we ka lava va wugamu va ta va va ku sungula, nakone van’we ka lava va ku sungula va ta va va wugamu.”

31 Hi nkama wolowo van’we va Vafarisi va mu tsrhindzrekelela va mu byela va ku: “Huma u famba, hikusa Heroda a djula ku ku dlaya.” 32 Kutani a va byela a ku: “Fambani mi ya byela buwana* ledzro mi ku: ‘Namunhla ni mundzruku ni le ku hlongoleni ka mademona ni hanyisa ni vhanu, kutani mundlwana ni ta va ni hetile.’ 33 Kambe namunhla, mundzruku ni mundlwana ni ta tama ni yentxa ntizro wanga, hikusa a muprofeta a nga fanelanga ku dlayiwa* handle ka Yerusalema. 34 Yerusalema, Yerusalema, mudlayi wa vaprofeta wene u khandlaka hi mazribye lava zrumeliwiki kwaku . . . makhambi manyingi ni djuli ku hlengeleta vanaku ku fana ni leswi huku yi hlengeletisaka xiswone a switxiwana swa yone a hansi ka timpapa ta yone! Kambe wene a wu pfumelanga. 35 Lavisani! Xikwembu Nkulukumba a ta wu fulazrela muti wenu.* Na mi byela a mi nge he ti ni vona ku ya tlhasa loko mi ku: ‘A tovokile lweyi a taka hi vito dzra Yehovha!’”

14 Khambi dzrimbeni hi Savata a ye da swakuda kaya ka mun’we wa vazrangeli wa Vafarisi, nakone hinkwavu lava a va li kolanu a va mu pondzrolela. 2 A mahlweni kwake a ku ni wanuna lweyi a a ni mavabyi ya ku pfimba mizri.* 3 Xileswo, Yesu a vutisa vadondzrisi va Nawu ni Vafarisi a ku: “Xana swa pfumeleliwa ku hanyisa mhunu hi Savata kumbe a swi pfumeleliwi?” 4 Kambe va miyela va nga mu hlamuli ntxhumu, kutani a khoma wanuna yelweyo a mu hanyisa a gama a mu tsrhika a famba. 5 Ntsrhaku ka leswo a va byela a ku: “I mani kwenu lweyi loko n’wanake kumbe homu yake yo txhuka yi pela xihloveni hi siku dzra Savata, a taka kala a nga kahluli a yi humesa?” 6 Kambe a va swi kotanga ku mu hlamula xivutiso lexo.

7 Kutani loko a vona vhanu lava a va zrambiwile na va tihlawulela mimbangu ya ku hlawuleka ngopfu, a va byela* a ku: 8 “Loko mhunu a ku zramba nkhubyini wa mutxhatu, u nga yi tsrhama mimbangwini ya ku hlawuleka ya kone. Hikusa swi nga yentxeka ku zrambiwe mhunu mumbeni wa ku hlawuleka ngopfu ku tlula wene. 9 Kutani lweyi a mi zrambiki hi wubidzri byenu a ta ku tela a ku: ‘Nyisela wanuna lweyi a tsrhama mbangwini lowu.’ Kutani u ta suka na u ni tingana u ya tsrhama mbangwini lowu kalaka wu nga hlawulekanga ngopfu. 10 Kambe loko u zrambiwa, famba u ya tsrhama mbangwini lowu kalaka wu nga hlawulekanga ngopfu, akuva loko lweyi a ku zrambiki a ku tela, a ku byela leswi: ‘Nakulozri, buya u ta tsrhama mbangwini lowu wa ku hlawuleka ngopfu.’ Kutani a vazrambiwakuloni va ta ku hlonipha. 11 Hikusa hinkwavu lava va titlakuxaka va ta tsrongahatiwa, kambe lava va titsrongahataka va ta tlakuxiwa.”

12 Ntsrhaku ka leswo, a byela wanuna lweyi a mu zrambiki a ku: “Loko u hamba nkhuvu, u nga zrambi lava nga vanghanu vaku, vamakwenu, maxaka kumbe vayakelani vaku lava ganyiki.* Hikusa va ta ku zramba na wene, kutani va ta va na vo ku hakela. 13 Kambe loko u hamba nkhuvu, zramba swisiwana, lava limaliki, ni lava fiki matihlo; 14 kutani u ta nyonxa hikusa a va na xa ku ku hakela hi xone. Nakone Xikwembu Nkulukumba a ta ku hakela a ku pfuxiweni ka lava ku lulama.”

15 Loko mun’we wa vazrambiwa a twa leswo, a mu byela a ku: “Awa nyonxa lweyi a daka* a Mfun’wini wa Xikwembu Nkulukumba.”

16 Yesu a mu byela a ku: “Wanuna wa kukazri a lulamisele nkhuvu wa wukulu, kutani a zramba vhanu va vanyingi. 17 Hi nkama wa nkhuvu a zrume nandzra wake ku ya byela lava zrambiwiki a ku: ‘Buyani, hikusa hinkwaswu swi lulamile.’ 18 Kambe hinkwavu va sungula ku tiyimelela akuva va nga yi. Wa ku sungula a mu byela a ku: ‘Ni xave nsimu nakone ni fanela ku ya yi vona; ni dzrivaleli, a ni nge ti swi kotisa ku ta.’ 19 Mun’wana a ku: ‘Ni xave 10 wa tihomu* nakone ni ya kambela leswaku ti dzrimisa kuyini; ni dzrivaleli, a ni nge ti swi kotisa ku ta.’ 20 Kasi mun’wanyana a ku: ‘Na ha ku txhata, xileswo a ni nge ti swi kotisa ku ta.’ 21 Xileswo a nandzra lweyo a tlhela, a ya byela n’winyi wake mintxhumu leyo. Kutani a n’winyi wa muti a kwata, a byela nandzra wake a ku: ‘Kahlula u ya ka tindlela letikulu ni ka swindlelana swa doropa, u ya vitana swisiwana, lava ku fa matihlo ni lava limaliki.’ 22 Ntsrhaku ka loko nandzra lweyo a yentxile leswi a byeliwiki swone, a ku: ‘N’winyi wanga, ni yentxile leswi u ni zrumiki swone, kambe ka ha ni mbangu.’ 23 Xileswo a n’winyi wake a mu byela a ku: ‘Famba ka tindlela tin’wana leti kumekaka handle ka doropa u kombela vhanu leswaku va buya, akuva yindlu yanga yi ta tala. 24 Ni hlaya ni tiyisile leswaku a nga kone ni mun’we wa lava a va zrambiwile lweyi a taka da swakuda swa nkhuvu wanga.’”

25 A ku ni switsrhungu leswikulu leswi a swi yendzra na yene, kutani a ndzruluka a swi byela a ku: 26 “Loko mhunu a ta kwanga, kambe a nga vengi* papayi wake, mamana wake, nsati wake, vanake ni vamakwavu, ina, a nga vengi nambi ku li wutomi byake,* a nge vi mudondzrisiwa wanga. 27 Lweyi a kalaka a nga zrwali mhandzri yake ya nxanisa* a ni landzrela, a nge vi mudondzrisiwa wanga. 28 Hi xikombiso, i mani kwenu lweyi loko a djula ku yaka yindlu* a nga zrangikiki hi ku tsrhama hansi a kontela hinkwaswu leswi djulekaka ku vona loko a li na yone mali leyi dzringanaka akuva a heta ku yaka? 29 Hikusa loko o kala a nga yentxi leswo, a nga sungula ku yaka yindlu kambe a hluleka ku yi heta, kutani a vahlaleli hinkwavu va mu hleka, 30 va ku: ‘Wanuna lweyi a sungule ku yaka kambe a hluleki ku heta.’ 31 Kumbe he yini hosi leyi loko yi djula ku ya lwa ni hosi yin’wana yi kalaka yi nga zrangi yi tsrhama hansi yi kambisisa leswaku yi nga swi kota ku lwa ni hosi leyi nga ni 20.000 wa masotxha nakasi yone yo va ni 10.000 wa wone? 32 Nakunene, loko yi vona leswaku a yi nge ti swi kota, yi zrumela vayimeli va yone ka hosi leyin’wana na ya ha li kule leswaku va ya hamba ku zrula. 33 Hi lani ku fanaka, tiyisekani leswaku lweyi a kalaka a nga tsrhiki hinkwaswu leswi a nga na swone, a nge vi mudondzrisiwa wanga.

34 “Nakunene a munyu i wunene, kambe loko wu heleliwa hi ntamu wa wone, xana a ku twala ka wone ku nga pfuxetiwa hi ndlela yini? 35 A wu nge he pfuni ntxhumu, nambi ku va wu hlwanyiwa ka misava kumbe ku hamba xitrumi. A vhanu vo wu txukumeta. Lweyi a nga ni tindleve ta ku yingela, a a yingiseti.”

15 A vahakelisi hinkwavu va tinemba ni vadohi a va ya mahlweni va hlengeletana lomu a a li kone akuva va mu yingiseta. 2 Kutani a Vafarisi ni vatsrali a va n’unun’uta va ku: “Wanuna lweyi a yamukela vadohi a tlhela a da na vone.” 3 Kutani a va byela xifaniso a ku: 4 “I mani kwenu lweyi loko a ni 100 wa tihamba, kutani a lahlekeliwa hi yin’we ka tone, a taka kala a nga siyi leta 99 a nhoveni a famba a ya djuletela leyi lahlekiki a za a yi kuma? 5 Loko a yi kuma a yi pakatsra na a nyonxile. 6 Kutani loko a tlhasa kaya a vitana vanghanu vake ni vayakelani a va byela a ku: ‘Nyonxani na mine, hikusa ni kume hamba yanga leyi a yi lahlekile.’ 7 Hi lani ku fanaka na mi byela leswaku ku ta va ni ku nyonxa lokukulu a tilweni hi mhaka ya mudohi mun’we lweyi a tisoliki, ku tlula lava 99 va ku lulama lava swi nga vilelekiki kuva va tisola.

8 “Nakone hi wini wansati lweyi loko a ni 10 wa madrakma,* kutani a lahlekeliwa hi dzrin’we, a taka kala a nga tlhaviki motsre a kukula yindlu yake a tlhela a djulisisa hi wunyaminyami a za a dzri kuma? 9 Loko a dzri kumile, a vitana vanghanu vake* ni vayakelani a va byela a ku: ‘Nyonxani na mine, hikusa ni kume drakma dzranga ledzri a dzri ni lahlekelile.’ 10 Hi lani ku fanaka, na mi byela leswaku a tintsrumi ta Xikwembu Nkulukumba ta nyonxa loko mudohi mun’we a tisola.”

11 A tlhela a ku: “A ku ni wanuna wa kukazri lweyi a a ni vana vabidzri va madjaha. 12 Kutani lwentsrongo a byela papayi wake a ku: ‘Papayi, ni nyiki pfindla ledzri ni lumbaka.’ Xileswo papayi wavu a va yavela wukosi byake. 13 Ntsrhaku ka masikunyana, n’wana yelweyo lwentsrongo a longela mintxhumu yake hinkwayu kutani a yendzra a ya tikweni dzra le kule a ya tlanga hi pfindla dzrake hi ku hanya hi ndlela ya ku biha.* 14 Loko hinkwaswu leswi a a li na swone swi mu helelile, ku ve ni ndlala yikulu a tikweni dzroledzro, kutani a sungula ku hlupheka. 15 A patsre ni ku ya tizrela wanuna wa kukazri wa tiko dzroledzro, lweyi a mu tholiki leswaku a byisa tinguluve a masin’wini yake. 16 A a navela nambi ku da swakuda swa tinguluve, kambe a ku nga na mhunu lweyi a a mu nyika swone.

17 “Loko a yanakanyisise ha hombe, a ku: ‘I vangani vatizri va papayi va daka va xuzra swi tlhela swi sala nakasi mine no fa hi ndlala lani! 18 Na ha yendzra ni ya ka papayi ni tlhasa ni mu byela ni ku: “Papayi, ni doheli Xikwembu Nkulukumba lweyi a nga tilweni ni tlhela ni dohela na wene. 19 A swa ha ni faneli ku vitaniwa n’wanaku, ni yamukeli swanga mun’we wa vatizri vaku.”’ 20 Xileswo, a tlhelela ka papayi wake. Na a ha li kule, papayi wake a mu vona a mu twela wusiwana, a tsrutsruma a mu tlhangaveta a tlhasa a mu xingazra* a mu n’qunta. 21 Kutani a byela papayi wake a ku: ‘Papayi, ni doheli Xikwembu Nkulukumba lweyi a nga tilweni ni tlhela ni dohela na wene. A swa ha ni faneli ku vitaniwa n’wanaku.’ 22 Kambe papayi wake a byela vatizri a ku: ‘Kahlulani mi buya ni mpahla ya yinene ku tlula hinkwayu mi mu yambexa, mi mu yambexa ni masandaliya mi tlhela mi mu bekela xitlan’wana. 23 Mi buyisa ni xihon’wana* xa ku nona mi xi xindla, akuva hi da hi kulungela, 24 hikusa n’wananga lweyi, a a file, kambe swoswi awa hanya; a a lahlekile kutani a kumekile.’ Xileswo, va sungula ku tikholisa.

25 “A n’wanake wa mativula a a li masin’wini, kutani a nkama lowu a tlhelaka, na a li kusuhi ni ku tlhasa a kaya, a twa leswaku ko yimbeleliwa ku tlhela ku kiniwa. 26 Xileswo a vitana mun’we wa vatizri a mu vutisa leswaku ku yentxeka yini. 27 A mu byela a ku: ‘Makwenu a buyile, nakone papayi waku a mu xindleli xihon’wana xa ku nona hikusa a buye na a hlayisekile.’* 28 Kambe a kwata a yala ni ku nghena ndlwini. Xileswo papayi wake a huma a ya mu kombela leswaku a nghena. 29 A hlamula papayi wake a ku: ‘Papayi! Ni ku tizrele ku dzringana malembe lawa hinkwawu nakone a ni ngi ngi sama ni tsrhika ku ku yingiseta, nambitanu a wu ngi ngi sama u ni nyika ximbutana akuva ni ya tikholisa ni vanghanu vanga. 30 Kambe ke na tlhasa n’wanaku lweyi a tlangiki hi mintxhumu yaku ni tinghwavana, u mu xindlela xihon’wana xa ku nona.’ 31 Kutani a mu byela a ku: ‘N’wananga, u tsrhame na mine minkama hinkwayu, nakone mintxhumu hinkwayu leyi nga yanga i yaku. 32 Kambe swa fanela ku va hi kulungela hi tlhela hi nyonxa, hikusa makwenu a a file kambe swoswi awa hanya; a a lahlekile kutani a kumekile.’”

16 Ntsrhaku ka leswo, Yesu a byela vadondzrisiwa vake a ku: “A ku ni wanuna wa kukazri lweyi a a ganyile,* yene a a ni mulaviseli wa yindlu lweyi a a lumbetiwa leswaku a tlanga hi mintxhumu yake. 2 Xileswo, a mu vitana a mu byela a ku: ‘Ni twe mintxhumu ya ku biha hi wene, tsrala papela u tlhamuxela leswi u nga yi tizrisisa xiswone mali yanga, hikusa a wu nge he ti va mulaviseli wa yindlu yanga.’ 3 Kutani a mulaviseli lweyo a sungula ku yanakanyisisa a ku: ‘Ni ta yentxa yini leswi hosi yanga yi nga ha djulikiki leswaku ni lavisela yindlu ya yone? A ni na ntamu wa ku kota ku dzrima, nakone ni ni tingana ta ku kombela zimola. 4 Yahh! Na swi tiva leswi ni taka swi yentxa, akuva loko ni hlongoliwa lani ka ntizro wa wulaviseli, a vhanu va ni yamukela a makaya kwavu.’ 5 Kutani a vitana mun’wana ni mun’wana lweyi a a devha hosi yake, a vutisa wa ku sungula a ku: ‘U yi devha mali muni hosi yanga?’ 6 A mu hlamula a ku: ‘Ni yi devha 100 wa tihotsro* ta mafuzra ya minhlwazri.’ Kutani a mu byela a ku: ‘Hi ledzri papela ledzri u dzri sinariki na mine, tsrhamisa u kahlula u tsrala 50.’ 7 Ntsrhaku ka leswo a vutisa mun’wana a ku: ‘Wene ke, u yi devha yini?’ A mu hlamula a ku: ‘100 wa matambori* ya makulu ya trigu.’ Kutani a mu byela a ku: ‘Hi ledzri papela ledzri u dzri sinariki na mine, tsrala 80.’ 8 Nambileswi a mulaviseli lweyi a yentxiki swa ku biha, a hosi yake yi mu kulungelile hi leswi a yentxiki mintxhumu leyi kombisaka leswaku a tlhazrihile; hikusa vhanu va misava leyi* va tlhazrihile ka ku lulamisa timhaka tavu ku tlula vhanu lava nga ku vaningeni.

9 “Na n’wine na mi byela: Tiyentxelani vanghanu hi wukosi lebyi nga lulamangakiki, akuva loko byi mi helela, va mi yamukela a mimbangwini leyi nga helikiki. 10 Lweyi a dumbekaka ka swa switsrongo awa dumbeka ni ka swa swinyingi, nakone lweyi a kalaka a nga lulamanga ka swa switsrongo ni ka swa swinyingi a nga lulamanga. 11 Kutani, loko mi nga dumbeki ka ndlela leyi mi byi tizrisaka ha yone wukosi lebyi nga lulamangakiki, i mani lweyi a taka mi tamelisa wukosi bya ntiyiso? 12 Nakone loko mi nga dumbeki ka ndlela leyi mi yi tizrisaka ha yone mintxhumu ya vambeni, i mani lweyi a taka mi nyika leswi lulamiseliwiki n’wine? 13 A nga kone lweyi a nga tizrelaka tihosi tibidzri, hikusa a ta nyenya yin’we a zrandzra leyin’wana, kumbe a namazrela yin’we a dzrela leyin’wana. A mi nge swi koti ku tizrela Xikwembu Nkulukumba ni Wukosi.”

14 A Vafarisi, lava a va li vazrandzri va mali, a va yingela mintxhumu leyo hinkwayu, kutani va sungula ku mu menula. 15 Xileswo, Yesu a va byela a ku: “N’wine mi tiyentxa lava lulamiki a mahlweni ka vhanu, kambe Xikwembu Nkulukumba awa ti tiva timbilu tenu. Hikusa leswi vhanu va swi vonaka na swi li swa lisima, swa nyenyentsa a mahlweni ka Xikwembu Nkulukumba.

16 “A Nawu ni vaprofeta swi zrezriwile ku ya tlhasa loko Yohane a sungula wutizreli byake. Ku sukela ka kolanu ku ya mahlweni, ku zrezriwa a madzrungula lamanene ya Mfumu wa Xikwembu Nkulukumba, nakone vhanu hinkwavu va tikazratela ku nghena ka wone. 17 Nakunene, swi nga nabyala ngopfu ku va matilo ni misava swi khaluta ku tlula ku va xintsrhatana xin’we xa letra dzra Nawu xi nyamalala na xi nga hetisekanga.

18 “Lweyi a tsrhikaka nsati wake a ya txhata ni wansati mumbeni a yentxa wumbuye, ni lweyi a txhataka ni wansati lweyi a tsrhikaniki ni nuna, a yentxa wumbuye.

19 “A ku ni wanuna wa kukazri lweyi a a ganyile,* yene a a yambala mpahla ya ku dula nakone a a hanya wutomi bya xiyimu xa le henhla. 20 A nyangweni ya kaya kwake a va talisa ku beka wanuna wa xisiwana* lweyi a a tale hi swilondzra a mizrini wake, a vito dzrake a a li Lazaru; 21 yene a a navela ku da matlhantlha lawa a ma wa hi le menzeni wa wanuna lweyi wa ku ganya.* Nambi timbyana a ti buya ti ta mu nampswela swilondzra. 22 Hi ku famba ka nkama, wanuna lweyi wa xisiwana a fa, kutani a tintsrumi ti mu tlakula ti mu yisa ka Abrahamu.*

“Na yene wanuna lweyi wa ku ganya* a game a fa a va a lahliwa. 23 Na a li ku xanisekeni a Sizreni,* a vona Abrahamu hi kule na a na Lazaru a tlhelweni kwake.* 24 Xileswo a mu vitana a ku: ‘Papayi Abrahamu, ni twele wusiwana, zruma Lazaru leswaku a ya peta litiho dzrake ka mati kutani a buya a ta timula lidzrimi dzranga, hikusa na xaniseka a ndzrilweni lowu, lowu pfuzraka ngopfu.’ 25 Kambe Abrahamu a ku: ‘N’wananga, dzrimuka leswaku u tikholisile hi mintxhumu yinyingi ya yinene na wa ha hanya, kambe Lazaru a xaniseke ngopfu. Nambitanu, swoswi a le ku txhaveleliweni, kambe wene u le ku xanisekeni. 26 Handle ka leswo, ku ni xikhele xa xikulu lexi hi tsravukanisaka na n’wine, lakakuva lava djulaka ku ta halanu, a va nge swi koti, nambi lava nga halanu a va nge swi koti ku tlulela va ta halenu hine hi nga kone.’ 27 Kutani a ku: ‘Loko swi tsrhame hi ndlela leyo, na ku kombela papayi, leswaku u mu zruma a ya kaya ka papayi wanga, 28 hikusa ni ni ntlhanu wa vamakwezru, akuva a ya va tlhamuxela ha hombe, ku yentxela leswaku na vone va nge ti buya ka mbangu lowu va ta xaniseka.’ 29 Kambe Abrahamu a ku: ‘Va na Moxe ni vaprofeta; a va yingiseti vone.’ 30 Kutani a ku: ‘Papayi Abrahamu, a va nge ti va yingiseta, kambe loko vo yeliwa hi mun’we ka lava fiki va ta tisola.’ 31 Kambe Abrahamu a ku: ‘Loko va nga mu yingiseti Moxe ni vaprofeta, nambiloko va ngo yeliwa hi mun’we wa lava pfuxiwiki ku feni a va nge mu yingiseti.’”

17 Kutani a byela vadondzrisiwa vake a ku: “Minkama hinkwayu swa ku hambukisa vhanu swi kone. Kambe khombo ka lweyi swi sukelaka kwake! 2 A swi ta yampswa ngopfu ku va a tsrimbeleliwa zribye ledzrikulu* a nhan’wini kutani a txukumeteliwa lwandle ku tlula ku va a hambukisa mun’we ka lavatsrongo. 3 Tivonelani. Loko makwenu a yentxa xidoho, mu kawuki, nakone loko a tisola, mu dzrivaleli. 4 Nambiloko a ngo ku dohela ka 7 hi siku, a tlhela a ku tela ka 7 a ku: ‘Ni dzrivaleli’, u fanela ku mu dzrivalela.”

5 Kutani a vapostola va byela Hosi va ku: “Hi yengeseleli lipfumelo.” 6 A Hosi yi ku: “Loko a mo va ni lipfumelo dzra ku dzringana ni mbewu ya sinapi, a mi ta byela nsinya lowu wa timora ta ntima mi ku: ‘Titsruvuli u ya tisimeka lwandle!’ Kutani wone a wu ta mi yingiseta.

7 “I mani kwenu lweyi loko mutizri wake a buya hi ku dzrimeni kumbe hi ku byiseni a nga mu byelaka a ku: ‘Tekela ku buya u tsrhamisa lani menzeni hi da’? 8 A matsrhan’wini ya leswo, xana a a nge ti mu byela a ku: ‘Famba u ya txintxa mpahla u ni lulamisela leswi ni taka lalela ha swone, u gama u ni phamela ni da ni nwa ni heta, ntsrhaku ka leswo u nga da u tlhela u nwa’? 9 Xana a ta mu tlangela mutizri lweyo hi leswi a hetisisiki leswi a a li mfanelo yake ku swi yentxa? Nikutsrongo! 10 Hi ndlela leyi fanaka, loko mi yentxe hinkwaswu leswi mi zrumiwiki swone, hlayani mi ku: ‘Hi malandzra lawa ma kalaka ma nga pfuni ntxhumu. Leswi hi swi yentxiki hi leswi a hi fanela ku swi yentxa.’”

11 Na a ya Yerusalema a khalute hi le ndzrelekanwini wa Samariya ni Galileya. 12 Loko a nghena ka xidoropana xa kukazri, a tlhangavetiwa hi 10 wa vavanuna lava a va ni nhlokonho, kambe va tlhasa va yima he kule. 13 Kutani va hlaya hi zritu dzra ku tlakuka va ku: “Yesu, Mudondzrisi, hi tweli wusiwana!” 14 Loko a va vona, a va byela a ku: “Fambani mi ya tikombekisa ka vaprista.” Kutani a nkama lowu va fambaka, va hanyisiwa.* 15 Mun’we wavu loko a vona leswaku a hanyisiwile, a tlhela, a dzrumisa Xikwembu Nkulukumba hi zritu dzra ku tlakuka. 16 A tlhasa a khinsama a minkondzrweni ya Yesu, a mu tlangela. Wanuna lweyo a a li Musamariya. 17 Yesu a ku: “Hinkwavu va 10 va hanyisiwile, a hi swone? Kutani va kwini lavan’wana va 9? 18 A ku na mhunu mun’wana lweyi a tlheliki a ta dzrumisa Xikwembu Nkulukumba, handle ka wanuna lweyi wa tiko dzrimbeni.” 19 Ntsrhaku ka leswo a mu byela a ku: “Sekeleka u famba, a lipfumelo dzraku dzri ku hanyisile.”

20 Loko Vafarisi va mu vutisa leswaku Mfumu wa Xikwembu Nkulukumba wu ta ta siku muni, a va hlamula a ku: “Loko Mfumu wa Xikwembu Nkulukumba wu ta, a wu nge ti voniwa hi hinkwavu; 21 nambi vhanu a va nge ti hlaya leswaku: ‘Hi lowu!’ Kumbe: ‘Hi luwa!’ Hikusa a Mfumu wa Xikwembu Nkulukumba wu le makazri kwenu.”

22 Ntsrhaku ka leswo, a byela vadondzrisiwa vake a ku: “Ma ta masiku lawa mi taka navela ku va xikan’we ni N’wana wa mhunu, kambe a swi nge ti koteka. 23 Nakone a vhanu va ta mi byela va ku: ‘Vonani hi lwiya!’ Kumbe va ku: ‘Vonani hi lweyi!’ Mi nga yi kumbe ku va landzra. 24 Ku fana ni leswi a lihati dzri hatimaka ku sukela ka tlhelo dzrin’we dzra tilo ku ya ka dzrin’wana, swi ta va xiswoswo hi N’wana wa mhunu hi siku dzra ku ta kwake. 25 Nambitanu, ku sungula a fanela ku xaniseka ngopfu a tlhela a yaliwa hi lixaka ledzri. 26 Handle ka leswo, hi lani swi viki ha kone a masikwini ya Nowa, swi ta va hi ndlela yoleyo a masikwini ya N’wana wa mhunu: 27 Vhanu a va da, va nwa, vavanuna va teka, vavasati va tekiwa, ku ya tlhasa siku ledzri Nowa a ngheniki ha dzrone a ngalaweni, kutani a ndhambhi yi tlhasa yi va helisa hinkwavu. 28 Hi lani ku fanaka, swi ta va hi lani swi viki ha kone a masikwini ya Loti: Vhanu a va da, va nwa, va xava, va xavisa, va byala ni ku yaka. 29 Kambe hi siku ledzri Loti a humiki ha dzrone Sodoma, ku ne ndzrilo ni xivavula hi le tilweni swi va helisa hinkwavu. 30 Swi ta va xiswoswo hi siku ledzri a N’wana wa mhunu a taka tikombekisa ha dzrone a vhanwini.

31 “Hi siku dzroledzro, lweyi a nga henhla ka yindlu na mintxhumu yake yi le ndlwini, a nga xiki a ya yi teka, hi lani ku fanaka, lweyi a nga masin’wini a nga tlheli a ya kaya a ya teka mintxhumu leyi saliki. 32 Dzrimukani nsati wa Loti. 33 Lweyi a zamaka ku huluxa wutomi byake,* a ta luzekeliwa hi byone, kambe lweyi a luzekeliwaka hi byone, a ta byi huluxa. 34 Na mi byela, hi wusiku byolebyo vhanu vabidzri va ta va na va li ka mubede wun’we, mun’we a ta tekiwa, kambe lwemun’wana a ta siyiwa. 35 Vavasati vabidzri va ta va na va sila xikan’we, mun’we a ta tekiwa, kambe lwemun’wana a ta siyiwa.” 36 *—— 37 Xileswo va mu vutisa va ku: “Swi ta yentxeka kwini Hosi?” A va hlamula a ku: “Lomu ntsrumbu wu nga kone, hi lomu magama ma taka hlengeletana kone.”

18 Kutani a ya mahlweni a va byela xifaniso mayelanu ni lisima dzra kuva minkama hinkwayu va khongota va nga godoli, 2 a ku: “A doropeni dzra kukazri a ku ni muyavanyisi lweyi a a nga mu txhavi Xikwembu Nkulukumba futsrhi a a nga hloniphi mhunu. 3 Nakone a doropeni dzroledzro a ku ni wansati lweyi a a feliwe hi nuna lweyi a a tsrhamela ku yela muyavanyisi yelweyo a ya ku: ‘Ni kombela leswaku a mhaka yanga ni lweyi ni kanetanaka na yene yi lulamisiwa hi ndlela leyinene.’* 4 Ku khalute nkama wa kukazri na a yala ku mu pfuna, kambe ntsrhaku ka leswo a tibyela leswi: ‘Nambileswi ni kalaka ni nga mu txhavi Xikwembu Nkulukumba nakone ni nga hloniphikiki mhunu, 5 leswi wansati lweyi wa mufelwa a tamaka a ni kazrata, ni ta yentxa leswaku a mhaka yake yi lulamisiwa ha hombe* akuva a nga ha tsrhameli ku ni tela a ta ni tlhanyisa nhloko hi xikombelo xake.’” 6 Kutani a Hosi yi ku: “Mi swi twile leswi muyavanyisi a swi hlayiki nambileswi a kalaka a nga lulamanga? 7 Xana kunenene Xikwembu Nkulukumba a nge yentxi leswaku a vahlawuliwa vake lava mu dzrilelaka wusiku ni nhlikanhi va yentxeliwa wululami, nakasi a va lehisela mbilu? 8 Na mi byela, a ta yentxa leswaku va hantla va yentxeliwa wululami. Nambitanu, loko a N’wana wa mhunu a tlhasa, xana hakunene a ta dzri kuma lipfumelo dzra muxaka lowu* a misaveni?”

9 A tlhela a va byela xifaniso lava a va tibyela leswaku va lulamile ni ku vona van’wana na va nga li va ntxhumu, a ku: 10 “Vavanuna vabidzri va tlhantuke va ya tempeleni akuva va ya khongota, mun’we a a li Mufarisi kasi lwemun’wana a a li muhakelisi wa tinemba. 11 Lweyi wa Mufarisi a yima a sungula ku khongota hi le mbilwini a ku: ‘Oh, Xikwembu Nkulukumba na ku tlangela hi leswi ni kalaka ni nga fani ni lavan’wana hinkwavu—lava nga vayivi, lava nga lulamangakiki, lava yentxaka wumbuye—nambi ku fana ni muhakelisi lweyi wa tinemba. 12 Ni titsrona swakuda kabidzri hi vhiki; ni nyikela swa wukhume bya hinkwaswu leswi ni swi kumaka.’ 13 Kambe a muhakelisi wa tinemba a a yime hi kule, nakone a a nga swi djuli nambi ku tlakuxa matihlo a lavisa a tilweni kambe a a tama a tibetetela xifuva a ku: ‘Oh, Xikwembu Nkulukumba, ni tweli wusiwana,* mine mudohi.’ 14 Na mi byela, wanuna lweyi a muke kaya kwake na a lulame ngopfu a mahlweni ka Xikwembu Nkulukumba ku tlula Mufarisi. Hikusa hinkwavu lava va titlakuxaka va ta tsrongahatiwa, kambe lava va titsrongahataka va ta tlakuxiwa.”

15 A vhanu a va mu buyisela vatsrongwana akuva a va khumba, kambe loko a vadondzrisiwa va va vona, va sungula ku va kawuka. 16 Nambitanu, Yesu a vitana vatsrongwana a ku: “Tsrhikani vatsrongwana va ta kwanga, mi nga va siveli, hikusa a Mfumu wa Xikwembu Nkulukumba i wa lava ku fana na vone. 17 Ni mi byela ntiyiso, lweyi a kalaka a nga yamukeli Mfumu wa Xikwembu Nkulukumba ku fana ni ntsrongwana, a nge txhuki a nghena ka wone.”

18 Kutani mun’we wa vafumi a mu vutisa a ku: “Mudondzrisi lwenene, i yini leswi ni fanelaka ku swi yentxa akuva ni kuma wutomi lebyi nga gamikiki?” 19 Yesu a mu byela a ku: “Ha yini u ni vitana lwenene? A ku na lweyi a nga munene handle ka Xikwembu Nkulukumba ntsena. 20 Wa yi tiva milawu leyi liki: ‘U nga yentxi wumbuye, u nga dlayi, u nga yivi, u nga nyikeli wumboni bya madzrimi, hlonipha papayi waku ni mamana waku.’” 21 Kutani wanuna lweyo a ku: “Milawu leyo hinkwayu na yi landzra ku sukela a wutsrongwanini.” 22 Loko Yesu a yingela leswo, a mu byela leswi: “Ka ha ni ntxhumu wun’we lowu ku kiyelelaka: Xavisa mintxhumu hinkwayu leyi u nga na yone u teka mali ya kone u yavela swisiwana, xileswo u ta va ni pfindla a matilweni; ntsrhaku ka leswo, tana u ta va mulandzreli wanga.” 23 Loko a yingela leswo, a vaviseka ngopfu swinene, hikusa a a ganye ngopfu.

24 Yesu a mu lavisa kutani a ku: “Lava nga ni mali swi ta va kazratela ngopfu ku nghena Mfun’wini wa Xikwembu Nkulukumba! 25 Nakunene swa nabyala ku va kamela dzri khaluta hi ka mbhovo wa ximazri ku tlula ku va mhunu wa ku ganya* a nghena a Mfun’wini wa Xikwembu Nkulukumba.” 26 Lava va yingeliki leswo va ku: “I mani lweyi a nga huluxiwaka?” 27 Yene a ku: “Leswi swi hlulaka vhanu, ka Xikwembu Nkulukumba swa koteka.” 28 Kambe Petro a ku: “Lavisa! Hi siye mintxhumu yezru hi ku landzrela.” 29 Yesu a va byela a ku: “Ni mi byela ntiyiso, a ku na mhunu lweyi a siyiki yindlu, kumbe nsati, kumbe vamakwavu, kumbe vapswele, kumbe vana hi kola ka Mfumu wa Xikwembu Nkulukumba 30 lweyi a nkameni lowu a kalaka a nge ti swi kuma hi lani ku phindhiwiki, a tlhela a kuma wutomi lebyi nga gamikiki a nkameni lowu taka.”*

31 Ntsrhaku ka leswo, a teka lava 12 a ya na vone tlhelweni a va byela a ku: “Ma swi twa! Hi tlhantukela a Yerusalema, kutani a mintxhumu hinkwayu leyi tsraliwiki hi vaprofeta mayelanu ni N’wana wa mhunu yi ta hetiseka. 32 Hi xikombiso, a ta nyikeliwa ka vamatiko nakone va ta mu yentxa xihlekiso, va mu zruka va tlhela va mu thukela mazri. 33 Ntsrhaku ka ku mu pshwita, va ta mu dlaya, kambe hi siku dzra wuzrazru a ta pfuka.” 34 Nambitanu, a va wu twisisanga ntlhamuxelo wa mintxhumu leyo hinkwayu, hikusa a va fihleliwe wone, a va yi twisisanga mintxhumu leyi hlayiwiki.

35 Na Yesu a li kusuhi ni ku tlhasa a Yeriko, a ku ni wanuna lweyi a fiki matihlo lweyi a a tsrhame tlhelweni ka ndlela a kombela zimola. 36 Loko a twa pongwe dzra xitsrhungu lexi a xi khaluta hi ndlela, a sungula ku vutisa leswaku ku yentxeka yini. 37 Va mu byela va ku: “Hi Yesu wa Munazareta a khalutaka!” 38 Xileswo a huwelela a ku: “Yesu, N’wana Davhida, ni tweli wusiwana!” 39 Kutani lava a va yime mahlweni kwake va sungula ku mu kawuka va mu byela leswaku a miyela, kambe yene a a ya mahlweni a bandlukana ngopfu swinene a ku: “N’wana Davhida, ni tweli wusiwana!” 40 Xileswo Yesu a yima a va byela leswaku va mu buyisa kwake. Loko a tsrhindzrekelile, Yesu a mu vutisa a ku: 41 “U djula ni ku yentxela yini?” Yene a ku: “Hosi, yentxa leswaku ni tlhela ni vona.” 42 Xileswo Yesu a mu byela a ku: “Tlhela u vona, a lipfumelo dzraku dzri ku hanyisile.” 43 Hi nkama wolowo a tlhela a sungula ku vona, kutani a sungula ku mu landzrela na a dzrumisa Xikwembu Nkulukumba. Hinkwavu lava voniki leswo, na vone va dzrumisa Xikwembu Nkulukumba.

19 Kutani Yesu a nghena Yeriko a tsremakanya hi kone. 2 Ka doropa dzroledzro a ku ni wanuna lweyi a vitaniwaka Zakewu; lweyi a a li muzrangeli wa vahakelisi va tinemba nakone a a ganyile.* 3 A a zama ku vona Yesu, kambe a a hluleka hi mhaka ya xitsrhungu hikusa a a gomile. 4 Xileswo, a zranga a tsrutsruma a ya khwela henhla ka nsinya wa nkuwa akuva a mu vona hikusa a a li kusuhi ni ku khaluta hi kolanu. 5 Loko Yesu a tlhasa mbangwini wolowo, a lavisa henhla kutani a mu byela a ku: “Zakewu, kahlula u xika hikusa namunhla ni fanela ku ya kaya kwaku.” 6 Xileswo a xika hi ku kahlula a mu yamukela kaya kwake na a nyonxe ngopfu. 7 Loko va vona leswo, hinkwavu va sungula ku n’unun’uta va ku: “A yendzrele wanuna lwiyani wa mudohi.” 8 Kambe Zakewu a sekeleka a byela Yesu a ku: “Hosi, ni ta nyika swisiwana hamfu ya leswi nga swanga, nakone mun’wana ni mun’wana lweyi ni mu tekeliki mintxhumu hi ku kanganyisa,* ni ta mu tlhelisela hi lani ku phindhiwiki ka mune.” 9 Loko Yesu a twa leswo, a mu byela a ku: “Namunhla muti lowu wu tlhaseliwi hi huluku, hikusa na wene u n’wana wa Abrahamu. 10 Hikusa a N’wana wa mhunu a tele ku ta djuletela ni ku huluxa lava lahlekiki.”

11 Na vadondzrisiwa va ha li ku yingiseteni ka mintxhumu leyo, a hlaya xifaniso xin’wana, hikusa a a li kusuhi ni Yerusalema nakone vone a va yanakanya leswaku a Mfumu wa Xikwembu Nkulukumba a wu ta tlhasa hi nkama wolowo. 12 Xileswo a te: “Wanuna wa kukazri lweyi a a li n’wana wa hosi a yendzre a ya tikweni dzra le kule akuva a ya yamukela wuhosi a gama a tlhela. 13 Kutani a vitana 10 wa vatizri vake, a va nyika 10 wa mamina* a va byela a ku: ‘Salani mi hamba mabindzru hi wone ku ya tlhasa loko ni buya.’ 14 Kambe a vhanu va tiko dzrake a va mu nyenya, xileswo va zrumela ntlawa wa kukazri wa vayimeli leswaku va ya tikweni ledzri a yiki ka dzrone va ya ku: ‘A hi swi djuli leswaku wanuna lweyi a va hosi yezru.’

15 “Loko a buyile na kutani a kume wuhosi, a vitana vatizri lava a va nyikiki mali* akuva a tiva leswaku va kume yini ka mabindzru lawa va ma hambiki. 16 Xileswo wa ku sungula a mu tsrhindzrekelela a mu byela a ku: ‘Hosi, a mina dzraku dzri bindzrule 10 wa mamina.’ 17 A hosi yi mu byela yi ku: ‘U yentxi ha hombe, mutizri lwenene! Leswi u dumbekiki ka mintxhumu ya yitsrongo ngopfu swinene, u ta fuma 10 wa madoropa.’ 18 Wa wubidzri a mu tsrhindzrekelela a ku: ‘Hosi, a mina dzraku dzri bindzrule ntlhanu wa mamina.’ 19 A mu byela hi lani ku fanaka a ku: ‘Na wene u ta fuma ntlhanu wa madoropa.’ 20 Kambe a mutizri mun’wana a tlhasa a ku: ‘Hosi, hi ledzri mina dzraku, a ni dzri tsrimbele hi panu ni dzri tlhota. 21 Nakunene ni yentxi leswo hi mhaka ya ku ku txhava, hikusa u mhunu wa ku kazrata, u teka leswi u kalaka u nga swi bekanga u tlhela u tsrhovela leswi u kalaka u nga swi byalanga.’ 22 Kutani a hosi yi mu byela yi ku: ‘Ni ta ku yavanyisa hi mazritu yaku, wene mutizri lweyi a bihiki. U li a wu swi tiva leswaku ni mhunu wa ku kazrata, ni teka leswi ni kalaka ni nga swi bekanga ni tlhela ni tsrhovela leswi ni kalaka ni nga swi byalanga? 23 Kutani ha yini u nga tekanga mali* yanga u ya yi beka banku akuva loko ni buya ni ta yi kuma na yi li yinyingi?’

24 “Xileswo, a hosi yi byela lava yimiki kolanu yi ku: ‘Mu tekelani mina mi nyika lweyi a nga ni 10 wa mamina.’ 25 Kambe va yi byela va ku: ‘Hosi, phela kutani a ni 10 wa mamina!’ 26 ‘Na mi byela, lweyi a nga na swone, a ta yengeseleliwa, kambe lweyi a kalaka a nga li na swone, nambi swa switsrongo leswi a nga na swone a ta tekeliwa swone. 27 Handle ka leswo, buyisani valala vanga, lava kalaka va nga swi djulanga leswaku ni va hosi yavu, mi va dlaya a mahlweni kwanga.’”

28 Ntsrhaku ka ku hlaya mintxhumu leyi, Yesu a ya mahlweni a tlhantukela a Yerusalema. 29 Loko a li kusuhi ni ku tlhasa a Betfage ni Betaniya a nhaveni leyi vitaniwaka Nhava ya Minhlwazri, a zruma vadondzrisiwa vake vabidzri, 30 a ku: “Fambani ka xidoropana lexiya xi vonekaka, loko mi nghenile ka xone, mi ta kuma ximbongolwana na xi tsrimbiwile, lexi ku nga liki na mhunu lweyi a samiki a khwela ka xone. Xi tlhantlhani mi buya na xone. 31 Kambe loko mhunu wa kukazri a mi vutisa a ku: ‘Mi xi tlhantlhela yini?’ Mi fanela ku mu hlamula mi ku: ‘Xi djuliwa hi Hosi.’” 32 Xileswo, lava a va zrumiwile va suka va famba va ya swi kumisa xiswoswi a va byelisiki xiswone. 33 Kambe a nkama lowu va xi tlhantlhaka, a vinyi va xone va va vutisa va ku: “Mi xi tlhantlhela yini ximbongolwana lexi?” 34 Va ku: “Xi djuliwa hi Hosi.” 35 Xileswo va xi buyisa ka Yesu, va xi kapeka timpahla tavu kutani Yesu a khwela ka xone.

36 A nkama lowu a fambaka, a vhanu a va yandlala timpahla tavu a ndleleni. 37 Na a ha ku tlhasa kusuhi ni ndlela leyi fulamelaka hi le Nhaveni ya Minhlwazri, a xitsrhungu hinkwaxu xa vadondzrisiwa xi sungula ku nyonxa ni ku dzrumisa Xikwembu Nkulukumba hi zritu ledzri tlakukiki, hi mhaka ya mintxhumu hinkwayu ya ku hlamalisa leyi xi yi voniki, 38 xi ku: “A tovokile lweyi a taka swanga Hosi hi vito dzra Yehovha! A ku ve ni ku zrula a matilweni, nakone a ku dzrumisiwi Xikwembu Nkulukumba lweyi a nga henhlahenhla!” 39 Nambitanu, van’we va Vafarisi lava a va li ka xitsrhungu xolexo va ku: “Mudondzrisi, kawuka vadondzrisiwa vaku.” 40 Kambe a va hlamula a ku: “Na mi byela, loko lava va miyela, a mazribye ma ta huwelela.”

41 Loko a tlhasa kusuhi ni Yerusalema, a vona doropa kutani a dzri dzrilela, 42 a ku: “Loko wene a wu yi xiyile mintxhumu leyi a yi ta ku tisela ku zrula . . . kambe swoswi u fihleliwe yone. 43 Hikusa ma ta masiku lawa a valala vaku va taka ku biyela hi timhandzri ta ku n’qidja* kutani va ku tsrandzrela va ku hlasela hi matlhelo hinkwawu. 44 Va ta ku tlatlalata hansi kun’we ni vanaku, a ku na zribye ledzri va taka dzri siya a henhla ka zribye dzrin’wana a doropeni ledzri, hikusa Xikwembu Nkulukumba a tile leswaku a ta ku yavanyisa, kambe wene a wu swi xiyanga.”

45 Ntsrhaku ka leswo, a nghena tempeleni a sungula ku hlongola lava a va li ku xaviseni, 46 a va byela a ku: “A Matsralwa ma li: ‘A yindlu yanga yi ta va yindlu ya xikhongoto’, kambe n’wine mi yi yentxa yindlu ya* vayivi.”

47 Siku ni siku a a ya mahlweni a dondzrisa tempeleni. Kambe a vaprista lavakulu, vatsrali kun’we ni vakulukumba va tiko a va djula ku mu dlaya; 48 kambe a va nga swi tivi leswaku va nga yentxisa kuyini, hikusa vhanu hinkwavu a va ku namanama na yene akuva va mu yingiseta loko a dondzrisa.

20 Siku dzrin’wana na a li ku dondzriseni ni ku twalisa madzrungula lamanene a tempeleni, ku te vaprista lavakulu, vatsrali kun’we ni vakulukumba 2 va tlhasa va ku: “Hi byeli, u yi yentxa hi ntamu wa mani mintxhumu leyi? Nakone i mani a ku nyikiki ntamu lowu?” 3 A va hlamula a ku: “Na mine ni ta mi hamba xivutiso, ni hlamulani; 4 Lweyi a zrumiki Yohane ku babatisa vhanu i Xikwembu Nkulukumba kumbe i vhanu?” 5 Xileswo, va sungula ku yanakanyisisa hi xivone, va ku: “Loko hi ku: ‘I Xikwembu Nkulukumba’, a ta ku: ‘Ha yini mi nga pfumelanga kwake?’ 6 Kambe loko hi ku: ‘I vhanu’, a vhanu hinkwavu va ta hi khandla hi mazribye, hikusa va kholwiseka leswaku Yohane a a li muprofeta.” 7 Xileswo va mu byela leswaku a va swi tivi leswaku a zrumiwe hi mani. 8 Yesu a va byela a ku: “Na mine a ni nge ti mi byela leswaku ni wu kuma kwini ntamu wa ku yentxa mintxhumu leyi.”

9 Kutani a sungula ku byela vhanu xifaniso lexi: “Wanuna wa kukazri a byali mawuvha a masin’wini yake kutani a ma volekisa vadzrimi, a gama a yendzra a ya tikweni dzrin’wana a ya heta nkama wa ku leha. 10 Hi nkama wa ntsrhovelo, a zruma mutizri leswaku a ya ka vadzrimi akuva va ya mu nyiketa mihandzru ya kukazri leyi va yi kumiki ka masimu wolawo ya mawuvha. Nambitanu, a vadzrimi va mu ba va gama va mu tlhelisa na a nga na ntxhumu. 11 Kambe a tlhela a zruma mutizri mun’wana. Na yene va ya mu ba, va mu danisa* va gama va mu tlhelisa na a nga na ntxhumu. 12 A tlhela a zruma wa wuzrazru; kambe na yene va ya mu ba va gama va mu hlongola. 13 Xileswo a n’winyi wa masimu ya mawuvha a ku: ‘Ni nga yentxa yini? Ni ta zruma n’wananga, lweyi ni mu zrandzraka. Kumbexana va ta ya mu hlonipha.’ 14 Loko vadzrimi va mu vona, va sungula ku byelana va ku: ‘Lweyi hi ye madapfindla. A hi mu dlayeni akuva a pfindla dzri ta va dzrezru.’ 15 Xileswo, va mu txukumetela handle ka masimu ya mawuvha va gama va mu dlaya. Kutani ke, i yini leswi n’winyi wa masimu ya mawuvha a taka va yentxa swone? 16 A ta buya a dlaya vadzrimi volavo kutani a teka masimu ya mawuvha a nyika vambeni.”

Loko va twa leswo, va ku: “Swi nga txhuki swi yentxeka leswo!” 17 Kambe a va lavisa hi ku kongoma a va byela a ku: “Kutani ke, hi wini ntlhamuxelo wa tsralwa ledzri liki: ‘A zribye ledzri vayaki va dzri bakanyiki, dzri ndzruluke zribye dzra lisima ku tlula hinkwawu’? 18 Lweyi a taka wela henhla ka zribye ledzri a ta pshwandlaka. Ni lweyi dzri taka wela henhla kwake, dzri ta mu pshwandlasa.”

19 A vatsrali ni vaprista lavakulu a va djula ku mu khoma hi nkama wolowo, hikusa va swi xiyile leswaku a a vulavula hi vone ka xifaniso lexo, kambe a va txhava vhanu. 20 Ntsrhaku ka loko va mu lavisise ha hombe, va zruma vavanuna va kukazri lava a va va xavile leswaku va ya tiyentxa vhanu lavanene akuva va mu phasa hi mazritu yake, ku yentxela leswaku va ta mu yisa wuhosini ni le ka govhernadori. 21 Kutani va mu vutisa va ku: “Mudondzrisi, ha swi tiva leswaku u vulavula ni ku dondzrisa ntiyiso nakone a wu na xihlawuhlawu, kambe u dondzrisa ntiyiso mayelanu na Xikwembu Nkulukumba: 22 Xana swa pfumeleliwa* kuva hi hakela tinemba ka Khezari kumbe a swi pfumeleliwi?” 23 Kambe a xiya maqhinga yavu kutani a va byela a ku: 24 “Ni kombani denari. Xana xifaniso lexi ni mazritu lawa i swa mani?” Va ku: “I swa Khezari.” 25 A va byela a ku: “Kutani ke, tlhelisani swa Khezari ka Khezari, kambe swa Xikwembu Nkulukumba ka Xikwembu Nkulukumba.” 26 Xileswo va hluleka ku mu phasa hi mazritu yake a mahlweni ka vhanu, kambe hi ku hlamalisiwa hi nhlamulo yake, va miyela.

27 Nambitanu, van’we va Vasaduki, lava a va hlaya leswaku a ku pfuxiwa ka vafi a ku nge ti va kone, va mu tsrhindzrekelela va mu vutisa va ku: 28 “Mudondzrisi, Moxe a hi tsraleli a ku: ‘Loko wanuna wa kukazri a fa a siya nsati kambe na a nga na vana, makwavu a fanela ku sala a teka nsati wake akuva a sala a mu pswalela vana.’* 29 Kutani mhaka hi leyi, a ku ni 7 wa vamakwavu. Lweyi wa ku sungula a teke nsati, kambe a fe na a nga na vana. 30 Kutani lweyi wa wubidzri 31 ni wa wuzrazru va txhate na yene. Swi ve hi ndlela yoleyo ka hinkwavu va 7; va fe na va nga siyanga vana. 32 Hi wugamu lweyi wansati na yene a fa. 33 Kutani a ku pfuxiweni ka vafi, a ta va nsati wa mani? Hikusa hinkwavu va 7 va mu tekile a va nsati wavu.”

34 Yesu a va byela a ku: “A vhanu va misava leyi* va teka va tlhela va tekiwa, 35 kambe lava Xikwembu Nkulukumba a taka va pfuxa ni ku va pfumelela ku hanya a xiyin’wini lexi taka, a va nge ti teka nambi ku tekiwa. 36 Nakunene a va nge he fi, hikusa va fana ni tintsrumi, nakone leswi va taka pfuxiwa ku feni va ta va vana va Xikwembu Nkulukumba. 37 Kambe mayelanu ni ku pfuka ka vafi, nambi Moxe a swi kombisile ka dzrungula dzra mayelanu ni xinsinyana xa mitwa, loko a hlaye leswaku Yehovha i ‘Xikwembu Nkulukumba wa Abrahamu, Xikwembu Nkulukumba wa Izaki ni Xikwembu Nkulukumba wa Yakobe’. 38 Yene a hi Xikwembu Nkulukumba wa lava fiki, kambe i Xikwembu Nkulukumba wa lava hanyaka, hikusa kwake* hinkwavu va hanya.” 39 Kutani van’we va vatsrali va ku: “Mudondzrisi, u hlaye swone.” 40 Ntsrhaku ka leswo, a va ha vanga ni xixixi xa ku mu hamba xivutiso xin’wana.

41 Kutani Yesu a va vutisa a ku: “Ha yini va hlaya leswaku Kriste i n’wana wa Davhida? 42 Hikusa ka buku dzra Mapsalma Davhida ha wuswake a te: ‘Yehovha a byeli Hosi yanga a ku: “Tsrhamisa vokweni dzranga dzra xinene 43 ku ya tlhasa loko ni beka valala vaku va va wunalavutelo bya minkondzro yaku.”’ 44 Davhida ha byake, a mu vitana Hosi; kutani swi yentxekisa kuyini a va n’wanake?”

45 Ntsrhaku ka leswo, na vhanu hinkwavu va li ku mu yingiseteni, a byela vadondzrisiwa vake a ku: 46 “Tivonelani ka vatsrali lava zrandzraka ku fambafamba na va yambali timpahla ta ku leha ni ku loseteliwa a mabazara nakone va zrandzraka switsrhamu swa le mahlweni a masinagogeni ni mimbangu ya ku hlawuleka ngopfu a minkhubyini, 47 lava va phangaka tiyindlu ta* vavasati lava feliwiki hi vanuna nakone va zrandzraka ku hamba swikhongoto swa ku leha akuva va voniwa hi vhanu.* Va ta khatisiwa hi ndlela ya ku vavisa ngopfu swinene.”

21 Loko Yesu a lavisa, a vona vhanu va ku ganya na va peta mali ka makaxa ya swihanano.* 2 Hiloko a vona wansati wa xisiwana lweyi a feliwiki hi nuna na a peta swimalana swibidzri swa lisima dzritsrongo,* 3 kutani a ku: “Ni mi byela ntiyiso, wansati lweyi wa xisiwana nakone a feliwiki hi nuna a hanane ngopfu ku tlula lavan’wana hinkwavu. 4 Hikusa hinkwavu va hanane leswi va swi pambuliki ka leswi swi va taleliki, kambe yene nambileswi a nga xisiwana* a nyikeli hinkwaswu leswi a a li na swone, leswi a a ta tihanyisa hi swone.”

5 Ntsrhaku ka leswo, na van’we va bulisana hi ndlela leyi tempele dzri xongisiwiki ha yone hi mazribye lamanene ni hi mintxhumu leyi nyikeliwiki ka Xikwembu Nkulukumba, 6 Yesu a ku: “Mayelanu ni mintxhumu leyi mi yi vonaka swoswi, ma ta masiku lawa ku nga tiki sala zribye henhla ka zribye dzrin’wana, ma ta gilhitiwa hinkwawu.” 7 Kutani va mu vutisa va ku: “Mudondzrisi, xana leswo swi ta yentxeka siku muni, nakone xi ta va xini xikombiso xa leswaku mintxhumu leyi yi kusuhi ni ku yentxeka?” 8 Yesu a ku: “Tivonelani leswaku mi nga hambukisiwi, hikusa vanyingi va ta ta hi vito dzranga va ku: ‘Hi mine Kriste’, va tlhela va ku: ‘Nkama lowu bekisiwiki wu kusuhi.’ Mi nga va landzri. 9 Handle ka leswo, loko mi yingela hi ta tiyimpi ni mpfilumpfilu, mi nga txhavi. Hikusa a mintxhumu leyo yi fanela ku zranga yi yentxeka, kambe a wugamu a byi nge ti tekela ku tlhasa.”

10 A ya mahlweni a va byela a ku: “A tiko dzri ta lwisana ni tiko dzrimbeni, ni mfumu wu ta lwisana ni mfumu wumbeni. 11 Ku ta va ni ku tsrekatsreka lokukulu ka misava, nakone a mimbangwini ya ku siyanasiyana ku ta va ni ku pfumaleka ka swakuda ni mintungu; a vhanu va ta vona mintxhumu leyi taka va txhavisa ni swikombiso leswikulu a tilweni.

12 “Kambe na mintxhumu leyo hinkwayu yi nga si na yentxeka, vhanu va ta mi khoma ni ku mi xanisa, va mi nyikela masinagogeni ni le madjele. Mi ta yisiwa a mahlweni ka tihosi ni ka vagovhernadori hi kola ka vito dzranga. 13 Leswo swi ta mi pfulela mukhandlu wa kuva mi nyikela wumboni. 14 Xileswo, mi nga vilelisiwi hi ndlela leyi mi taka va hlamula ha yone akuva mi tiyimelela, 15 hikusa ni ta mi nyika mazritu ni wutlhazri; a valala venu hinkwavu va ta hluleka ku mi kaneta kumbe ku mi hlamula. 16 Handle ka leswo, mi ta nyikeliwa nambi hi vapswele venu, vamakwenu, maxaka ni vanghanu, nakone va ta yentxa leswaku van’we venu va dlayiwa, 17 mi ta nyenyiwa hi vhanu hinkwavu hi mhaka ya vito dzranga. 18 Kambe a mi nge luzekeliwe nambi ku li hi nsisi wun’we a tinhlokweni tenu. 19 Loko mi tiyisela mi ta huluxa wutomi byenu.

20 “Nambitanu, loko mi vona doropa dzra Yerusalema na dzri tsrandzreliwi hi masotxha, swi tivani leswaku a ku helisiwa ka dzrone ku kusuhi. 21 Kutani lava nga a Yudeya a va tsrutsrumeli a tinhaveni, lava nga Yerusalema a va humi, kasi lava nga handle ka Yerusalema va nga ha ngheni, 22 hikusa lawa i masiku ya kuva Xikwembu Nkulukumba a khatisa vhanu* leswaku ku hetiseka hinkwaswu leswi tsraliwiki. 23 Khombo ka vavasati lava va taka va na va ni tinyimba ni lava va taka va na va nyan’wisa a masikwini wolawo! Hikusa ku ta xanisekiwa ngopfu a tikweni nakone vhanu lava va ta khatisiwa. 24 Va ta dlayiwa hi xipada, nakone va ta ya yentxiwa swikazrawa a matikweni hinkwawu; Yerusalema a ta kandzreteliwa hi matiko* ku ya tlhasa loko nkama lowu bekiwiki wa matiko* wu hela.

25 “Nakone ku ta va ni swikombiso ka dambu, ka n’weti ni ka tinyeleti; a misaveni, a matiko ma ta dzrila ma nga xi tivi ni xa ku xi yentxa hi mhaka ya ku dzruma ka lwandle ledzri kwatiki. 26 A vhanu va ta titivala* hi ku txhava ni hi ku lavisela leswi taka yentxeka a misaveni, hikusa a mintamu ya matilo yi ta tsrekatsrekisiwa. 27 Ntsrhaku ka leswo, va ta vona N’wana wa mhunu na a ta hi le tlavini na a ni ntamu ni ku phatima lokukulu. 28 Kambe loko mi vona mintxhumu leyi yi sungula ku yentxeka, wololokani mi tlakuxa tinhloko tenu, hikusa a ku huluxiwa kwenu ka tsrhindzrekela.”

29 Xileswo a va byela xifaniso a ku: “Xiyisisani nsinya wa nkuwa ni minsinya leyin’wana hinkwayu. 30 Loko yi sungula ku hluka, ma swi vona mi tlhela mi swi tiva hi wuswenu leswaku a malanga ma kusuhi. 31 Hi lani ku fanaka, na n’wine loko mi vona mintxhumu leyi yi yentxeka, swi tivani leswaku a Mfumu wa Xikwembu Nkulukumba wu kusuhi. 32 Kunene na mi byela leswaku a lixaka ledzri a dzri nge fi dzri hela na mintxhumu leyi hinkwayu yi nga si na yentxeka. 33 Tilo ni misava swi ta khaluta, kambe a mazritu yanga ma nga ka ma nga khaluti.

34 “Kambe tivonelani leswaku a timbilu tenu ti nga txhuki ti bindzriwa hi ku da ngopfu, ku nwa ngopfu ni hi mivilelo ya wutomi, kutani a siku ledzro dzri suketana dzri mi tlhasela na mi nga swi yimelanga 35 ku fana ni ntlhamu. Hikusa dzri ta wela hinkwavu lava tsrhamaka a misaveni. 36 Kutani tsrhamani na mi zrindzrile, minkama hinkwayu mi kombela ka Xikwembu Nkulukumba akuva mi kota ku huluka ka hinkwaswu leswi fanelaka ku yentxeka ni kuva mi kota ku yima a mahlweni ka N’wana wa mhunu.”

37 Loko byi xa a a dondzrisa tempeleni, kambe loko dzri pela a a ya tsrhama a nhaveni leyi vitaniwaka Nhava ya Minhlwazri.* 38 Nakone vhanu hinkwavu a va mu yela a tempeleni na ka ha li mpundzru akuva va ya mu yingiseta.

22 A Nkhuvu wa Mapawu lawa ma kalaka ma nga txheliwanga Fermentu,* lowu vitaniwaka Paxkwa, a wu li kusuhi. 2 Nakone a vaprista lavakulu ni vatsrali a va djula ku dlaya Yesu, kambe a va djuletela ndlela leyinene ya ku yentxa leswo hikusa a va txhava vhanu. 3 Kutani Sathana a nghena ka Yudasi Iskariyota, lweyi a a li mun’we wa lava 12, 4 hiloko a suka a ya khanelisana ni vaprista lavakulu kun’we ni valaviseli va tempele mayelanu ni ndlela leyi a nga mu wongaka ha yone a mu nyikela kwavu. 5 Va nyonxa ngopfu hi swone kutani va pfumelelana ku mu nyika mali ya prata. 6 Xileswo a pfumela a va a sungula ku djuletela mukhandlu lowunene wa ku mu wonga a mu nyikela kwavu na ku nga na xitsrhungu.

7 Kutani ku tlhase siku dzra Nkhuvu wa Mapawu lawa ma kalaka ma nga txheliwanga Fermentu,* ku nga siku ledzri a magandzrelo ya Paxkwa a ma fanela ku nyikeliwa hi dzrone; 8 xileswo Yesu a zruma Petro na Yohane a ku: “Fambani mi ya lulamisela a Paxkwa akuva hi da.” 9 Va mu vutisa va ku: “U djula hi ya dzri lulamisela kwini?” 10 A va byela a ku: “Loko mi nghena doropeni, mi ta tlhangana ni wanuna lweyi a zrwaliki hotsro ya mati. Mu landzrani ka yindlu leyi a taka nghena ka yone. 11 Kutani mi byela n’winyi wa muti mi ku: ‘Mudondzrisi a li: “Dzri kwini a sala dzra vayeni ledzri ni nga delaka ka dzrone a Paxkwa ni vadondzrisiwa vanga?”’ 12 A ta mi komba a sala dzra dzrikulu ledzri kumekaka henhla, ledzri nga ni leswi vilelekaka akuva hi dzri tizrisa. Hi lulamiselelani Paxkwa kolanu.” 13 Xileswo va suka va famba, va ya swi kumisa xileswi a va byelisiki xiswone, kutani va lulamisela Paxkwa.

14 Loko nkama wu tlhasa, a tsrhama menzeni ni vapostola vake. 15 Kutani a va byela a ku: “A ni swi navela ngopfu ku da Paxkwa ledzri na n’wine na ni nga si na xaniseka; 16 hikusa na mi byela, a ni nge he ti tlhela ni da Paxkwa ku ya tlhasa loko Mfumu wa Xikwembu Nkulukumba wu fuma kutani ku hetiseka leswi Paxkwa dzri yimelaka swone.” 17 Yesu a teka kopo a hamba xikhongoto xa ku tlangela kutani a ku: “Tekani mi siyelisana, 18 hikusa na mi byela, ku sukela swoswi, a ni nge he tlheli ni nwa vhinyu ku ya tlhasa loko Mfumu wa Xikwembu Nkulukumba wu ta.”

19 A tlhela a teka pawu, a hamba xikhongoto xa ku tlangela, a dzri khemelela a gama a va nyika a ku: “Pawu ledzri dzri yimela mizri wanga lowu taka nyikeliwa hi nkonta yenu. Tamani mi yentxa leswi akuva mi ni dzrimuka ha swone.” 20 Kutani ntsrhaku ka loko va lalelile, a yentxa leswi fanaka hi kopo, a ku: “A kopo ledzri dzri yimela xipfumelelanu leximpshwa lexi tiyisekisiwaka hi ngati yanga leyi taka halatiwa hi nkonta yenu.

21 “Kambe vonani! Lweyi a taka ni wonga a tsrhame na mine kola menzeni. 22 Nakunene a N’wana wa mhunu awa famba hi lani swi profetiwiki ha kone; kambe khombo ka lweyi a taka mu wonga!” 23 Xileswo, va sungula ku vutisana hi xivone leswaku i mani kwavu lweyi a pimisaka ku yentxa leswo.

24 Nambitanu, va sungula ku holovisana hi leswaku i mani lwenkulu a makazri kwavu. 25 Kambe a va byela a ku: “A tihosi ta matiko ti bindzrisela vhanu, nakone lava nga ni wulawuli a henhla ka wone va nyikiwa mavito ya ku hlawuleka. 26 Kambe n’wine a mi fanelanga mi fana na vone. Lweyi a nga nkulu a makazri kwenu a a fani ni lwentsrongo, nakone lweyi a zrangelaka a a fani ni lweyi a tizrelaka. 27 Ka lweyi a tsrhamiki menzeni* ni lweyi a phamelaka* hi wini lwenkulu? Xana a hi lweyi a tsrhamiki menzeni?* Kambe mine ni le makazri kwenu swanga lweyi a mi tizrelaka.

28 “Nambitanu, n’wine hi n’wine mi tamiki mi va na mine a mahlomulweni yanga; 29 nakone ni yentxa xipfumelelanu xa mfumu na n’wine swanga hi leswi Papayi wanga a yentxiki xipfumelelanu na mine, 30 akuva a Mfun’wini wanga mi da mi tlhela mi nwa na mine a menzeni wanga, mi tlhela mi tsrhama a swiluvelweni akuva mi yavanyisa tinxaka ta 12 ta Israyele.

31 “Simoni, Simoni, Sathana a hlaye leswaku a djula ku mi hehezra ku fana ni trigu. 32 Kambe ni ku kombelelile ka Xikwembu Nkulukumba leswaku a lipfumelo dzraku dzri nga holi; kutani loko a lipfumelo dzraku dzri tlhela dzri tiya, tiyisa lipfumelo dzra vamakwenu.” 33 Kutani Petro a mu byela a ku: “Hosi, ni tibekiselile ku pfaleliwa na wene a djele nambi ku li ku fa.” 34 Kambe Yesu a ku: “Na ku byela Petro, namunhla na nkuku wu nga si na yimba, u ta yala kazrazru leswaku wa ni tiva.”

35 A tlhela a va byela a ku: “A nkama ni mi zrumiki na mi nga na xipatxhi xa mali, nkwama wa manghunghu* ni masandaliya, xana mi pfumali swa kukazri?” Va ku: “Im-him!” 36 Kutani a va byela a ku: “Kambe swoswi lweyi a nga ni xipatxhi xa mali a a xi teki, ni lweyi a nga ni nkwama wa manghunghu a a wu teki, nakone lweyi a kalaka a nga na xipada a a xavisi xiyambalu xake a xi xava. 37 Na mi byela, a tsralwa ledzri liki: ‘A tekiwe a li mudohi.’ Dzri fanela ku hetiseka kwanga.” Hikusa leswi tsraliwiki mayelanu na mine swi le ku hetisekeni.” 38 Kutani va ku: “Hosi, lavisa! Hi ni swipada swibidzri lani.” Yesu a va byela a ku: “Swa yanela.”

39 A suka a ya Nhaveni ya Minhlwazri hi lani a a tolovela ku yentxa ha kone, kutani a vadondzrisiwa na vone va mu landzra. 40 Loko va tlhasa a nhaveni, a va byela a ku: “Yanani mahlweni mi khongota akuva mi nga weli ndzringweni.” 41 Kutani a tsrhindzreka kulenyana na vone, a khinsama hi matsrolo a sungula ku khongota, 42 a ku: “Papayi, loko u swi djula, susa kopo ledzri kwanga. Kambe ku nga yentxeki ku zrandzra kwanga, a ku yentxeki ku zrandzra kwaku.” 43 Kutani ku humelela ntsrumi leyi pfaka hi le tilweni yi tlhasa yi mu tiyisa. 44 Kambe a a kazratekile ngopfu swinene lakakuva a ya mahlweni a khongota hi mbilu hinkwayu, nakone a nyuku wake lowu a wu nthonela hansi a wu fana ni ngati. 45 Loko a heta ku khongota a suka a ya ka vadondzrisiwa, a va kuma na va khutsriyelile, hikusa a va kazralile hi leswi a va ni gome. 46 A va byela ku: “Ha yini mi le ku yetleleni? Pfukani, yanani mahlweni mi khongota, akuva mi nga weli ndzringweni.”

47 Na a ha vulavula, ku humelela xitsrhungu lexi a xi kongomisiwa hi wanuna mun’we lweyi a vitaniwaka Yudasi, lweyi a a li mun’we wa lava 12, kutani a tsrhindzrekelela Yesu a tlhasa a mu n’qunta. 48 Kambe Yesu a mu byela leswi: “Yudasi, u wonga N’wana wa mhunu hi ku mu n’qunta?” 49 Loko lava a va li matlhelweni kwake va vona leswi a swi djula ku yentxeka, va ku: “Hosi, xana hi nga lwa na vone hi swipada?” 50 A va mun’we wavu a tsrema nandzra wa muprista lwenkulu a mu susa ndleve ya xinene. 51 Kambe Yesu a ku: “Mi nga yentxi leswo.” Kutani a khumba ndleve ya nandzra yelweyo a mu hanyisa. 52 Ntsrhaku ka leswo, Yesu a byela vaprista lavakulu, valaviseli va tempele kun’we ni vakulukumba lava a va mu yelile akuva va ya mu khoma, a ku: “Mi ta na mi ni swipada ni tinhonga ingiki hi loko no va muyivi? 53 Nkama lowu a ni li na n’wine siku ni siku a tempeleni a mi ni khomanga. Kambe lowu i nkama wenu ni nkama wa kuva lava nga munyameni va fuma.”

54 Kutani va mu khoma va famba na yene, va mu yisa kaya ka muprista lwenkulu; kambe Petro a a va landzra hi le kule. 55 Loko va tlhavike ndzrilo a xikazri ka muti kutani va tsrhama xikan’we, Petro na yene a ye tsrhama na vone. 56 Kambe loko mutizri mun’we wa xisati a mu vona na a wozra ndzrilo, a mu pondzrolela kutani a ku: “Wanuna lweyi na yene a a li na yene.” 57 Kambe a yala a ku: “Wansati, a ni mu tivi.” 58 Ntsrhaku ka nkamanyana, wanuna mun’wana a mu vona a ku: “Na wene u mun’we wa vone.” Kambe Petro a ku: “Nanduwe, a ni yene.” 59 Ntsrhaku ka loko ku khalute kolomu ka wora, wanuna mun’wana a sungula ku sindzrisa a ku: “Nakunene wanuna lweyi a a li na yene, hikusa vhela i Mugalileya!” 60 Kambe Petro a ku: “Nanduwe, a ni swi tivi leswi u swi hlayaka.” Kutani hi nkama wolowo, na a ha vulavula, a nkuku wu yimba. 61 Hiloko a Hosi yi ndzruluka yi lavisa Petro hi ku kongoma, kutani Petro a dzrimuka mazritu ya Hosi loko yi mu byela yi ku: “Namunhla na nkuku wu nga si na yimba, u ta ni landzrula kazrazru.” 62 Xileswo, a huma handle a ya dzrila hi xiviti.

63 A vavanuna lava khomiki Yesu va sungula ku mu hamba xihlekiso ni ku mu ba; 64 nakone ntsrhaku ka loko va mu funeketi wuso, a va mu vutisa va ku: “Profeta ka! I mani a ku biki?” 65 Va tlhela va hlaya mintxhumu ya yinyingi ya ku mu zruka.

66 Loko byi xa, ku hlengeletana ntlawa hinkwawu wa vakulukumba va tiko, leswi liki, vaprista lavakulu ni vatsrali, kutani va buyisa Yesu ka Sanedri dzravu, va ku: 67 “Loko u li Kriste, hi byeli.” Kambe Yesu a va byela a ku: “Nambiloko ni ngo mi byela a mi nge ti kholwa nikutsrongo. 68 Handle ka leswo, loko ni ngo mi vutisa swa kukazri a mi nge ni hlamuli. 69 Nambitanu, ku sukela ka swoswi, a N’wana wa mhunu a ta tsrhama a vokweni dzra xinene dzra ntamu dzra Xikwembu Nkulukumba.” 70 Xileswo hinkwavu va ku: “Kutani ke, xana u N’wana wa Xikwembu Nkulukumba?” A va hlamula a ku: “N’wine ha wuswenu mi hlaya leswaku ni N’wana wa Xikwembu Nkulukumba.” 71 Va ku: “Ha ha byi djulela yini wumboni byin’wana? Hikusa hi swi twile ha wuswezru na a swi hlaya hi nomu wake.”

23 Xileswo, a xitsrhungu hinkwaxu xi sekeleka xi mu yisa ka Pilatu. 2 Kutani va sungula ku mu lumbeta va ku: “Hi kume wanuna lweyi na a hlohlotela vhanu leswaku va pfukela mfumu, a va yalisa ku hakela tinemba ka Khezari, nakone a hlaya leswaku yene i Kriste hosi.” 3 Pilatu a mu vutisa a ku: “Xana u Hosi ya Vayuda?” Yesu a mu hlamula a ku: “Wene ha byaku u hlaya swone.” 4 Kutani Pilatu a byela vaprista lavakulu ni switsrhungu a ku: “A ni kumi nandzru ka wanuna lweyi.” 5 Kambe va sindzrisa va ku: “Leswi a swi dondzrisaka vhanu a Yudeya hinkwaku, ku sukela a Galileya nambi ku ta tlhasa lomu swi vanga mpfilumpfilu.” 6 Loko Pilatu a twa leswo, a vutisa a ku: Xana a wanuna lweyi i Mugalileya? 7 Ntsrhaku ka loko a xiye leswaku Yesu a a ta hi ka muganga lowu a wu fumiwa hi Heroda, a mu zrumela ka Heroda, lweyi na yene a a li Yerusalema a masikwini wolawo.

8 Loko Heroda a vona Yesu, a nyonxa ngopfu swinene. Hikusa a ku khaluta nkama wa ku leha na a djula ku vona Yesu hi mhaka ya leswi a a yingele mintxhumu ya yinyingi mayelanu na yene, nakone a a yimela ku mu vona na a yentxa hlolana dzra kukazri. 9 Xileswo a sungula ku mu hamba swivutiso swa swinyingi, kambe yene a nga mu hlamulanga ntxhumu. 10 Nambitanu, a vaprista lavakulu ni vatsrali va ya va tsrhindzrekela va mu lumbeta na va hlundzruki ngopfu swinene. 11 Kutani Heroda kun’we ni masotxha yake va mu dzrela va tlhela va mu hamba xihlekiso hi ku mu yambexa mpahla ya ku xonga, ntsrhaku ka leswo va mu tlhelisa ka Pilatu. 12 Ku sukela ka siku dzroledzro, Heroda na Pilatu lava a va li valala va ndzruluke vanghanu.

13 Kutani Pilatu a hlengeleta vaprista lavakulu, vafumi kun’we ni xitsrhungu, 14 a va byela a ku: “Mi ni buyisele wanuna lweyi na mi hlaya leswaku a hlohlotela xitsrhungu leswaku xi pfukela mfumu. Mi ni vonile loko ni mu hamba swivutiso kambe a ni kumanga ntxhumu xa ku seketela leswi mi mu lumbetaka hi swone. 15 Nakunene, nambi Heroda a nga kumanga nandzru kwake, hikusa a mu tlhelise kwezru. Kutani wanuna lweyi a nga yentxanga ntxhumu lexi mu yentxaka a faneliwa hi lifu. 16 Xileswo ni ta mu ba ni gama ni mu ntsrhunxa.” 17 *—— 18 Kambe a xitsrhungu hinkwaxu xi bandlukana xi ku: “Mu dlayi,* u hi ntsrhunxela Barabasi!” 19 (Barabasi a a pfaleliwe djele hi leswi a hlengeliki ka ku pfukela mfumu ni ku dlaya vhanu.) 20 Pilatu a tlhela a vulavula na vone, hikusa a a djula ku ntsrhunxa Yesu. 21 Kutani va sungula ku bandlukana va ku: “A a yisiwi mhandzrini! A a yisiwi mhandzrini!”* 22 A tlhela a vulavula na vone hi khambi dzra wuzrazru a ku: “Ha yini? Wanuna lweyi a yentxe yini xa ku biha? A ni kumanga ntxhumu kwake lexi mu yentxaka a faneliwa hi lifu; xileswo ni ta mu ba ni gama ni mu ntsrhunxa.” 23 Loko va twa leswo, va sungula ku sindzrisa hi mazritu ya ku tlakuka, va kombela leswaku a dlayiwa.* Kutani a xikombelo xavu xi pfumeliwa. 24 Xileswo Pilatu a teka xiboho xa leswaku ku yentxiwa leswi va swi kombeliki. 25 A ntsrhunxa wanuna lweyi va mu kombeliki, lweyi a a pfaleliwe djele hi mhaka ya ku pfukela mfumu ni ku dlaya vhanu, kambe a nyikela Yesu leswaku a ya dlayiwa hi lani a va swi djula ha kone.

26 A nkama lowu masotxha ma humaka na Yesu, ma khoma Simoni wa le Kirene, lweyi a a buya hi ntlhaveni kutani ma mu zrwexa mhandzri ya nxanisa* a landzra Yesu hi ntsrhaku. 27 A a landzriwa hi vhanu va vanyingi, ku patsra ni vavasati lava a va tiba swifuva hi ku vaviseka va mu dzrilela. 28 Yesu a ndzruluka a byela vavasati volavo a ku: “Van’hwanyana va Yerusalema, tsrhikani ku ni dzrilela. Kambe tidzrilelani n’wine ni vanenu; 29 hikusa ma ta masiku lawa vhanu va taka hlaya va ku: ‘Va nyonxa vavasati lava nga timhika,* ni mbeleko lowu kalaka wu nga belekanga kun’we ni mavele lawa ma kalaka ma nga nyan’wisanga!’ 30 Kutani va ta sungula ku byela a tinhava va ku: ‘Hi welani!’ Va tlhela va byela maganga va ku: ‘Hi funeketani!’ 31 Loko va yentxa leswi na nsinya wa ha tsrakama, ku ta yentxeka yini loko kutani wu womile?”

32 A ku ni vavanuna van’wana vabidzri va swigevengu, lava na vone a va ya ku dlayiweni kun’we na yene. 33 Kutani loko va tlhasa a mbangwini lowu vitaniwaka Pala, va mu gongondzrela a mhandzrini kun’we ni swigevengu leswo, xin’we ka tlhelo dzrake dzra xinene xin’wana ka tlhelo ledzra ximatsri. 34 Kambe Yesu a a ku: “Papayi, va dzrivaleli hikusa a va swi tivi leswi va swi yentxaka.” Handle ka leswo, va hamba wuhlolotwana leswaku va yavelana timpahla take. 35 A vhanu a vo yima va hlalela. Kambe a vafumi a va mu poyilela va ku: “Van’wana a va huluxile; kutani a a tihuluxi loko a li Kriste lweyi a hlawuliwiki hi Xikwembu Nkulukumba.” 36 Nambi masotxha a ma mu poyilela, ma mu tsrhindzrekelela ma mu nyika vhinyu dzra ku bava 37 na ma ku: “Loko u li Hosi ya Vayuda, tihuluxi.” 38 A henhlanyana ka nhloko yake a ku tsraliwe mazritu lawa ma liki: “Leyi i Hosi ya Vayuda.”

39 Xin’we xa swigevengu leswi a swi hayekiwe kolanu xi sungula ku mu zruka xi ku: “Kasi a wu Kriste wene? Tihuluxi ka, u tlhela u huluxa na hine!” 40 A xigevengu lexin’wana xi mu kawuka xi ku: “A wu mu txhavi Xikwembu Nkulukumba nambileswi u khatisiwiki* hi ndlela leyi fanaka ni ya wanuna lweyi? 41 Loko ku li hine swa hi fanela, hikusa hi khatisiwa hi mhaka ya leswi hi swi yentxiki; kambe a wanuna lweyi a nga yentxanga ntxhumu wa ku biha.” 42 Kutani xi ku: “Yesu, ni dzrimuki loko u nghena a Mfun’wini waku.” 43 Xileswo, Yesu a mu byela a ku: “Kunene na ku byela namunhla, u ta va na mine a Paradeyisini.”

44 A ku li kolomu ka ma 12,* kambe ku ve ni munyama a misaveni hinkwayu ku ya tlhasa kolomu ka ma 15 wora,* 45 hikusa a dambu dzri yime ku vaninga; kutani a kortina ledzri nga tempeleni* dzri handzruka hi xikazri. 46 Yesu a bandlukana swinene a ku: “Papayi, a moya wanga ni wu nyikela a mavokweni yaku.” Ntsrhaku ka loko a hlaye leswo, a fa.* 47 Loko muzrangeli wa masotxha a vona leswi a swi yentxeka, a sungula ku dzrumisa Xikwembu Nkulukumba a ku: “Hakunene, a wanuna lweyi a a lulamile.”* 48 Nakone loko a switsrhungu leswi a swi hlengeletanile kolanu leswaku swi hlalela ku dlayiwa kwake swi vona mintxhumu leyi a yi yentxeka, swi muka na swi tiba swifuva hi ku vaviseka. 49 Vhanu hinkwavu lava a va mu tiva ku patsra ni vavasati lava a va li na yene ku sukela a Galileya, a va yime he kule va hlalela mintxhumu leyi.

50 A ku ni wanuna lweyi a vitaniwaka Yosefa, lweyi a a li xizro xa Tribunali Ledzrikulu dzra Vayuda, yene a a li munene nakone a a lulamile. 51 (Wanuna lweyi a nga yimanga na vone kumbe ku va pfuna ka zrengu dzravu dzra ku dlaya Yesu.) Yene a a li wa le Arimateya, ku nga doropa dzra kukazri dzra le Yudeya, nakone a a yimela ku ta ka Mfumu wa Xikwembu Nkulukumba. 52 Wanuna lweyi a ye ka Pilatu a ya kombela ntsrumbu wa Yesu. 53 Kutani a wu hawula a wu tsrondzriyela hi panu ya lisima,* a gama a wu beka ka sizra ledzri kovotliwiki a zribyeni, ledzri a ku ngi ngi sama ku lahliwa mhunu ka dzrone. 54 A ku li siku dzra ku Lulamisela Savata,* nakone a Savata a dzri li kusuhi ni ku sungula. 55 Kambe a vavasati lava tiki na Yesu ku sukela a Galileya, va fambe na yene nakone va dzri vonile sizra ni ndlela leyi ntsrumbu wake wu latiwiki ha yone, 56 kutani va tlhela akuva va ya lulamisela a mizri ni mafuzra ya ku nun’hwela. Kambe nakunene, va wisile hi Savata hi lani Nawu a wu hlaya ha kone.

24 Kambe hi siku dzra ku sungula dzra vhiki, va tlhase a sizreni na ka ha li mpundzru, na va ni mizri ya ku nun’hwela leyi a va yi lulamiselile. 2 Kambe va tlhasa va kuma leswaku a zribye ledzri a dzri pfali nyangwa wa sizra a dzri vumbulutiwile dzri susiwa, 3 nakone loko va nghena, a va wu kumanga ntsrumbu wa Hosi Yesu. 4 Na va ha kazrateka hi swone, ku humelela vavanuna vabidzri lava yambaliki mpahla ya ku phatima va yima lani a va li kone. 5 Kutani vavasati volavo va txhava va kozramisa tinhloko tavu ti lavisa hansi, xileswo vavanuna volavo va ku: “Ha yini mi buya a sizreni mi ta djula mhunu lweyi a hanyaka? 6 A nga kone lani hikusa a pfuxiwile. Dzrimukani leswi a mi byeliki swone na a ha li Galileya, 7 leswaku a N’wana wa mhunu a fanela ku nyikeliwa a mavokweni ya vadohi, a dlayiwa a mhandzrini a gama a pfuxiwa hi siku dzra wuzrazru.” 8 Hi loko va dzrimuka a mazritu yake, 9 kutani va suka a sizreni va ya byela vapostola lava 11 ni vadondzrisiwa hinkwavu a mintxhumu leyi hinkwayu. 10 Vavasati volavo a ku li Mariya Magadala, Jowana kun’we na Mariya mamana wa Yakobe. Ni vavasati van’wana lava a va li na vone a va dzrungulela vapostola mintxhumu leyi. 11 Nambitanu, leswi vavasati volavo a va swi hlaya a swi tikomba na swi nga twali ka vapostola ni ka vadondzrisiwa lavan’wana, xileswo a va va kholwanga.

12 Kambe Petro a sekeleka a tsrutsruma a ya sizreni, loko a tlhasa a hlomela, a vona ntsena mpahla leyi a va mu tsrondzriyeli ha yone. Xileswo a suka a famba na a tivutisa leswaku ku nga va ku yentxeki yini.

13 Kambe hi siku dzroledzro, vadondzrisiwa vabidzri a va yendzra va ya ka xidoropana lexi vitaniwaka Emawusi, lexi kumekaka ka mpfhuka wa kolomu ka 11 wa makilometru* ku suka a Yerusalema ku ya kone, 14 nakone a va bulisana mayelanu ni mintxhumu hinkwayu leyi a yi yentxekile.

15 Kutani na va ha bulisana hi mintxhumu leyo, Yesu a tsrhindzrekela a sungula ku longoloka na vone, 16 va mu vonile kambe a va swi tsrumbulanga leswaku hi yene. 17 A va vutisa a ku: “Mi bula hi yini?” Kutani va yima na va xukuvalile. 18 Kutani mun’we lweyi a vitaniwaka Kleyopasi a mu hlamula a ku: “Xana u mupfi lweyi a tsrhamaka wuswake a Yerusalema nakone a kalaka a nga swi tivi* leswi yentxekiki kohala a masikwini lawa?” 19 A va vutisa a ku: “Swini swa kone?” Va mu byela va ku: “Leswi yentxekeliki Yesu wa Munazareta, lweyi a a li muprofeta wa ntamu hi mintizro ni hi mazritu a mahlweni ka Xikwembu Nkulukumba ni le ka vhanu hinkwavu; 20 ni leswaku a vaprista lavakulu ni vafumi va mu nyikelile leswaku a dlayiwa, kutani va mu gongondzrela a mhandzrini. 21 Kambe a hi yimela leswaku wanuna lweyi ku va yene lweyi a huluxaka Israyele. Handle ka leswo, ledzri i siku dzra wuzrazru na mintxhumu leyo yi yentxekile. 22 Nakone vavasati va kukazri a makazri kwezru va hi hlamalisile hikusa va suke a mpundzrwini va ya a sizreni 23 kutani loko va nga wu kumanga a ntsrumbu wake, va tlhelile va patsra ni ku hlaya leswaku va vone tintsrumi leti va byeliki leswaku awa hanya. 24 Kutani van’we ka lava a va li na hine va ye sizreni, va tlhasa va swi kuma hi lani vavasati lavo va hlayiki ha kone, kambe a va mu vonanga.”

25 Xileswo Yesu a va byela a ku: “N’wine vhanu lava kalaka va nga twisisi nakone mi nga ni timbilu leti hlwelaka ku kholwa hinkwaswu leswi vaprofeta va swi hlayiki! 26 Xana a swi nga vileleki kuva Kriste a xaniseka hi ndlela leyi akuva a nghena a ku phatimeni kwake?” 27 Kutani a va tlhamuxela hinkwaswu leswi a Matsralwa ma swi hlayaka mayelanu na yene, ku sukela ka leswi tsraliwiki hi Moxe ni hi vaprofeta hinkwavu.

28 Hiloko va tlhasa kusuhi ni xidoropana lexi a va yendzra va ya ka xone, kutani Yesu a yentxa ingiki hi loko o yendzra a ya ka kule. 29 Kambe va mu tsratsriya leswaku a nga fambi, va ku: “Tsrhama na hine, hikusa dzri pelile.” Xileswo a nghena a tsrhama na vone. 30 Kutani na va li ku deni,* a teka pawu, a hamba xikhongoto xa ku tlangela, a dzri khemelela kutani a va nyika. 31 Xileswo, a matihlo yavu ma pfuleka hi ku helela kutani va swi xiya leswaku hi yene; kambe a nyamalala lani a va li kone. 32 Kutani va byelana va ku: “Xana a timbilu tezru a ti nga pfuzri a ndzreni kwezru loko a vulavula na hine a ndleleni, a hi tlhamuxela Matsralwa hi ku helela?”* 33 Kutani va tekela ku sekeleka hi nkama wolowo va tlhelela a Yerusalema, va tlhasa va kuma vapostola lava 11 kun’we ni vadondzrisiwa lavan’wana lava a va hlengeletani na vone, 34 na va ku: “Nakunene a Hosi yi pfuxiwile, nakone yi humeleli ka Simoni!” 35 Kutani va va byela leswi yentxekiki loko va li ndleleni ni ndlela leyi va mu tiviki ha yone loko a khemeleli pawu.

36 Na va ha vulavula hi mintxhumu leyi, a humelela a makazri kwavu a va byela a ku: “A ku zrula a ku ve na n’wine.” 37 Kambe leswi a va txhava ni ku zruzrumela, a va yanakanya leswaku vo vona xivumbiwa xa moya. 38 Xileswo a ku: “Ha yini mi kazrateka, nakone ha yini mi ganaganeka a timbilwini tenu? 39 Vonani mavoko yanga ni minkondzro yanga, leswaku hi ye mine; ni khumbani mi swi vona, hikusa a xivumbiwa xa moya a xi na mizri wa nyama* kambe mine ni na wone.” 40 A va byeli leswo na a va komba mavoko ni minkondzro yake. 41 Kambe leswi a swi tama swi va kazratela ku kholwa hi mhaka ya leswi a va nyonxe ngopfu ni ku hlamala, Yesu a va vutisa a ku: “Mi ni swakuda lani?” 42 Xileswo va mu nyika hlampfi ya ku woxiwa, 43 kutani a yamukela a da na va mu vona.

44 Ntsrhaku ka leswo a va byela a ku: “Dzrimukani leswaku na na ha li na n’wine, ni mi byele leswaku hinkwaswu leswi tsraliwiki mayelanu na mine ka Nawu wa Moxe, ka leswi tsraliwiki hi vaprofeta ni ka Mapsalma swi fanela ku hetiseka.” 45 Kutani a va pfula miyanakanyu hi ku helela leswaku va twisisa ntlhamuxelo wa Matsralwa, 46 a tlhela a va byela a ku: “A Matsralwa ma li: Kriste a ta xaniseka a gama a pfuxiwa ka lava fiki hi siku dzra wuzrazru, 47 ni leswaku hi vito dzrake, a dzrungula dzra leswaku vhanu va fanela ku tisola akuva va ta dzrivaleliwa swidoho swavu, dzri ta zrezriwa a matikweni hinkwawu, ku sukela a Yerusalema. 48 N’wine mi ta nyikela wumboni bya mintxhumu leyi. 49 Ni ta mi zrumela leswi Papayi wanga a swi dumbisiki. Kambe n’wine, tsrhamani a doropeni ku ya tlhasa loko mi yamukela ntamu lowu pfaka hi le tilweni.”

50 Ntsrhaku ka leswo, a famba na vone ku ya tlhasa a Betaniya, kutani a va tlhanteka mavoko a va tovokisa. 51 Na a ha va tovokisa, a tsravukanisiwa na vone a tlhantukelisiwa tilweni. 52 Kutani va khinsama a mahlweni kwake, ntsrhaku ka leswo va tlhelela a Yerusalema na va nyonxe ngopfu swinene. 53 Nakone siku ni siku a va li tempeleni, va dzrumisa Xikwembu Nkulukumba.