MADZRUNGULA LAMANENE LAMA TSRALIWIKI HI YOHANE

1 A ku sunguleni a a li Zritu, Zritu a a li na Xikwembu Nkulukumba, nakone Zritu a a li xikwembu. 2 Ku sukela a ku sunguleni a a li na Xikwembu Nkulukumba. 3 Xikwembu Nkulukumba a mu tizrise leswaku a vumba mintxhumu hinkwayu.

Nakone a ku na ntxhumu lowu nga kone lowu kalaka wu nga vumbiwanga hi yene. 4 A wutomi byi ve kone hi kola kwake, nakone a wutomi byi ve livaningu dzra vhanu. 5 A livaningu dzri vaninga a munyameni, kambe a munyama a wu swi koti ku dzri hlula.

6 Ku te wanuna wa kukazri lweyi a zrumeliwiki swanga muyimeli wa Xikwembu Nkulukumba, a vito dzrake a a li Yohane. 7 Wanuna lweyi a te swanga mboni akuva a byela vhanu mayelanu ni livaningu, leswaku vhanu va mixaka hinkwayu va ta va ni lipfumelo hi kola kwake. 8 Yene a a nga li livaningu ledzro, kambe a a teli ku ta byela vhanu mayelanu ni livaningu dzroledzro.

9 A livaningu dzra ntiyiso ledzri vaningelaka vhanu va mixaka hinkwayu a dzri li kusuhi ni ku ta a misaveni. 10 A a li misaveni, nakone Xikwembu Nkulukumba a tizrise yene leswaku a vumba misava, kambe a misava a yi mu tivanga. 11 A te ka valekwavu, kambe vone a va mu yamukelanga. 12 Nambitanu, hinkwavu lava mu yamukeliki a va pfulele mukhandlu wa leswaku va va vana va Xikwembu Nkulukumba, hikusa va kombise lipfumelo a vitweni dzrake. 13 Nakone a va pswaliwanga hi ngati, kumbe hi ku zrandzra ka nyama, kumbe hi ku zrandzra ka mhunu, kambe hi Xikwembu Nkulukumba.

14 Xileswo, Zritu a ve mhunu a va a tsrhama na hine, nakone hi vone ku phatima kwake, ku phatima ka ku fana ni ka n’wana lweyi a pswaliwiki a li wuswake ka papayi wake; futsrhi a a tale hi timpswalu letikulu ta Xikwembu Nkulukumba ni ntiyiso. 15 (Yohane a byele vhanu mayelanu na yene, ina, a huwelele a ku: “Lweyi hi lweyi ni hlayiki leswi mayelanu na yene: ‘Lweyi a taka ntsrhaku kwanga a ni zrangelile, hikusa a zrange a va kone na ni nga si na va kone.’”) 16 Nakone hi mhaka ya leswi a taliki hi timpswalu letikulu ni ntiyiso, hi tama hi yamukela timpswalu letikulu hi ntalu. 17 A Nawu wu nyikeliwe hi ku tizrisa Moxe, kambe a timpswalu letikulu ni ntiyiso swi ve kone hi ku tizrisa Yesu Kriste. 18 A nga kone lweyi a samiki a vona Xikwembu Nkulukumba; kambe a N’wana lweyi a pswaliwiki a li wuswake lweyi a fanaka na Xikwembu Nkulukumba nakone a nga tlhelweni ka Papayi wake* hi yene lweyi a mu tlhamuxelaka.

19 Leswi hi leswi Yohane a swi hlayiki loko Vayuda va zrume vaprista ni Valevhi va suka hi le Yerusalema va ya mu vutisa va ku: “Hi wene mani?” 20 Yohane a tekele ku va hlamula a ku: “A hi mine Kriste.” 21 Kutani va mu vutisa va ku: “Hi wene mani? Hi wene Eliya?” A va hlamula a ku: “A ni yene.” “U muprofeta?” A va hlamula a ku: “Im-him!” 22 Xileswo va mu vutisa va ku: “Hi wene mani? Hi byeli akuva hi ta ya nyikela nhlamulo ka lava hi zrumiki. U li u mani?” 23 A va byela a ku: “Hi mine mhunu lweyi a huwelelaka a mananga a ku: ‘Basisani ndlela ya Yehovha’, hi lani muprofeta Ezaya a hlayiki ha kone.” 24 Vhanu lava va mu hambiki swivutiso a va zrumiwe hi Vafarisi. 25 Xileswo va mu vutisa va ku: “Kutani ha yini u babatisa nakasi a wu Kriste, a wu Eliya kumbe muprofeta?” 26 Yohane a va hlamula a ku: “Mine ni babatisa hi mati. A makazri kwenu ku ni mhunu lweyi mi kalaka mi nga mu tivi, 27 a taka ntsrhaku kwanga, lweyi swi kalaka swi nga ni faneli ku tlhantlha tingoti ta masandaliya yake.” 28 Leswi swi yentxeke a Betaniya ka tlhelo dzrin’wana dzra Yordani, lani Yohane a a babatisa vhanu kone.

29 Mundzruku ka kone Yohane a vone Yesu na a mu tela, kutani a ku: “Vonani, Xihambana xa Xikwembu Nkulukumba lexi susaka xidoho a misaveni! 30 Lweyi hi lweyi ni hlayiki leswi mayelanu na yene: ‘A ntsrhaku kwanga ku ta wanuna lweyi a ni zrangeliki, hikusa a zrange a va kone na ni nga si va kone.’ 31 Nambi mine a ni nga mu tivi, kambe ni babatise hi mati ku yentxela leswaku a ta tiviwa a Israyele.” 32 Yohane a tlhele a byela vhanu a ku: “Ni vone moya wa ku xwenga wu xika hi le matilweni swanga tuva, kutani wu tsrhama henhla kwake. 33 Nambi mine a ni nga mu tivi kambe lweyi a ni zrumiki kuva ni babatisa hi mati, a ni byele a ku: ‘Lweyi u taka vona moya wa ku xwenga wu xika wu tsrhama henhla kwake, lweyo hi yene lweyi a babatisaka hi moya wa ku xwenga.’ 34 Kutani ni swi vonile leswo, nakone ni nyikele wumboni bya leswaku lweyi i N’wana wa Xikwembu Nkulukumba.”

35 Hi mundzruku ka kone, Yohane a tlhela a ya yima mbangwini wolowo na a ni vadondzrisiwa vake vabidzri, 36 kutani loko a vona Yesu na a khaluta, a ku: “Vonani, Xihambana xa Xikwembu Nkulukumba!” 37 Loko vadondzrisiwa vake lavabidzri va mu twa na a hlaya leswo, va landzra Yesu. 38 Loko Yesu a ndzruluka, a va vona na va mu landzra, a va vutisa a ku: “Mi djula yini?” Va mu hlamula va ku: “Rabi (leswi loko swi ndzruluteliwa swi liki: “Mudondzrisi”) u tsrhama kwini?” 39 A va byela a ku: “A hi fambeni mi ya ku vona.” Xileswo, va famba va ya vona lani a a tsrhama kone, kutani va tsrhama na yene siku dzroledzro; a ku li kolomu ka ma 16 wora.* 40 Andreya makwavu wa Simoni Petro, a a li mun’we wa lavabidzri lava twiki leswi Yohane a swi hlayiki kutani va landzra Yesu. 41 A zrange a djuletela makwavu Simoni kutani a mu byela a ku: “Hi kume Mesiya” (leswi loko swi ndzruluteliwa swi liki: “Kriste”), 42 kutani a mu yisa ka Yesu. Loko Yesu a mu vona, a ku: “Wene u Simoni, n’wana wa Yohane; ku sukela ka swoswi u ta vitaniwa Khefasi” (leswi loko swi ndzruluteliwa swi liki: “Petro”).

43 Hi mundzruku ka kone, Yesu a djule ku suka a ya a Galileya. Kutani a kuma Filipi a mu byela a ku: “Vana mulandzreli wanga.” 44 Filipi a a li wa le Betsaida, ku nga doropa ledzri Andreya na Petro a va huma ka dzrone. 45 Filipi a kume Nataniyele kutani a mu byela a ku: “Hi kume Yesu n’wana wa Yosefa wa le Nazareta, lweyi ku vulavuliwaka ha yene a Nawini wa Moxe ni ka leswi tsraliwiki hi vaprofeta.” 46 Kambe Nataniyele a ku: “Xana ku nga huma ntxhumu lowunene a Nazareta?” Filipi a mu byela a ku: “Buya u ta swi vona.” 47 Yesu a vona Nataniyele na a mu tela kutani a ku: “Vonani Muisrayele wa kakunene, lweyi a nga liki na wukanganyisi.” 48 Nataniyele a mu vutisa a ku: “U ni tivisa kuyini?” Yesu a mu hlamula a ku: “Na Filipi a nga si na ku vitana, ni ku vonile na wu le hansi ka nsinya wa nkuwa.” 49 Nataniyele a mu byela a ku: “Rabi, wene u N’wana wa Xikwembu Nkulukumba, u Hosi ya Israyele.” 50 Yesu a mu hlamula a ku: “U kholwa hi mhaka ya leswi ni ku byeliki leswaku ni ku vone hansi ka nsinya wa nkuwa? U ta vona mintxhumu ya yikulu ku tlula leyi.” 51 A tlhela a ku: “Ni mi byela ntiyiso, mi ta vona tilo na dzri pfulekile ni tintsrumi ta Xikwembu Nkulukumba na ti tlhantukela tilweni ti tlhela ti xika lani N’wana wa mhunu a nga kone.”

2 Hi siku dzra wuzrazru ku ve ni nkhuvu wa mutxhatu a Kana, ku nga xidoropana lexi kumekaka a Galileya, nakone mamana wa Yesu a a li kone. 2 Yesu ni vadondzrisiwa vake na vone a va zrambiwile a nkhubyini wolowo wa mutxhatu.

3 Loko vhinyu dzri hela, mamana wa Yesu a mu byela a ku: “A va ha na vhinyu.” 4 Kambe Yesu a mu byela a ku: “Wansati, mine na wene hi nghena kwini ka leswo? A nkama wanga a wu si na tlhasa.” 5 Mamana wake a byela lava a va li ku tizreni a ku: “Yentxani hinkwaswu leswi a taka mi byela swone.” 6 A ku ni 6 wa tihotsro ta zribye ta ku txhela mati leti a ti bekiwile kolanu hi ku landzra milawu ya ku tibasisa ya Vayuda, hotsro yin’wana ni yin’wana a yi nghena kolomu ka 44 kumbe 66 wa malitru.* 7 Yesu a va byela a ku: “Tatani tihotsro hi mati.” Xileswo va ti tata hi mati ti ku khapa. 8 Kutani a va byela a ku: “Swoswi kanani mi ya nyika mufambisi wa nkhuvu.” Xileswo, va yentxa hi lani va byeliwiki ha kone. 9 A mufambisi wa nkhuvu a dzringe mati lawa ma ndzrulutiwiki ma va vhinyu, kambe a a nga swi tivi leswaku vhinyu ledzro a dzri pfa kwini (nambileswi lava va keleliki mati a va swi tiva), kutani a vitana muteki 10 a mu byela a ku: “A vhanu van’wana va zranga va humesa vhinyu ledzrinene, kutani loko vhanu va popswile, va humesa lebyi kalaka byi nga nandzriki. Kambe wene u bekise vhinyu ledzrinene ku ta tlhasa swoswi.” 11 Yesu a yentxe hlolana dzra ku sungula a Kana, ku nga xidoropana lexi kumekaka a Galileya; leswo swi yentxe leswaku vhanu va xiya ntamu wake, kutani a vadondzrisiwa vake va va ni lipfumelo kwake.

12 Ntsrhaku ka leswo, Yesu, mamana wake, vamakwavu kun’we ni vadondzrisiwa vake va fulamele va ya Kapernawume, kambe ve ya tsrhama masiku ma nga li mangani.

13 A Paxkwa dzra Vayuda a dzri tsrhindzrekela, kutani Yesu a tlhantuka a ya Yerusalema. 14 Loko a tlhasa a tempeleni, a kuma vhanu na va xavisa tihomu, tihamba ni matuva, nakone a ku ni ni vatxintxisi va mali na va tsrhamile kolanu. 15 Xileswo ntsrhaku ka loko a hambe xisepu hi tingoti, a hlongola hinkwavu lava a va ni tihamba ni tihomu a tempeleni, a tlhela a hangalasa mali ya vatxintxisi va mali a wisetela ni mimenza yavu. 16 Kutani a byela lava xavisaka matuva a ku: “Susani mintxhumu leyi lani! Tsrhikani ku yentxa yindlu ya Papayi wanga yi va bazara!”* 17 Loko a vadondzrisiwa vake va vona leswo hinkwaswu, va dzrimuka leswaku ku tsraliwe leswi: “A ku hisekela yindlu yaku ku ta ni da.”

18 Kutani a Vayuda va mu vutisa va ku: “Hi dzrini hlolana ledzri u nga hi yentxelaka dzrone akuva u kombisa leswaku u ni mfanelo ya ku yentxa leswi?” 19 Yesu a va hlamula a ku: “Gilhitani tempele ledzri, kutani ni ta dzri pfuxa hi masiku mazrazru.” 20 A Vayuda va ku: “A tempele ledzri dzri yakiwe hi 46 wa malembe, kutani wene u ta dzri pfuxa hi masiku mazrazru?” 21 Kambe a tempele ledzri a a vulavula hi dzrone i mizri wake. 22 Loko a pfuxiwe ku feni, a vadondzrisiwa vake va dzrimuke leswaku a a talisa ku hlaya mazritu lawa, kutani va pfumela ka Matsralwa ni ka leswi Yesu a a swi hlayile.

23 Nambitanu, loko a li nkhubyini wa Paxkwa a Yerusalema, vanyingi va kombise lipfumelo ka vito dzrake loko va vona mahlolana lawa a a ma yentxa. 24 Kambe Yesu a a nga va dumbi hi ku helela hikusa a a va tiva hinkwavu 25 nakone a a nga djuli ku tlhamuxeliwa hi mhunu leswaku vhanu va tsrhamisise kuyini, hikusa a a swi tiva leswi nga timbilwini ta vhanu.

3 A ku ni wanuna wa kukazri lweyi a a li Mufarisi nakone a a li muzrangeli wa Vayuda, a vito dzrake a a li Nikodema. 2 Wanuna lweyi a yele Yesu ni wusiku a tlhasa a ku: “Rabi, ha swi tiva leswaku u mudondzrisi lweyi a zrumiwiki hi Xikwembu Nkulukumba, hikusa a nga kone lweyi a nga yentxaka mahlolana lawa u ma yentxaka na a nga pfuniwi hi Xikwembu Nkulukumba.” 3 Yesu a mu hlamula a ku: “Ni ku byela ntiyiso, a nga kone lweyi a taka vona Mfumu wa Xikwembu Nkulukumba loko a nga tlhelanga a pswaliwa ka wubidzri.”* 4 Nikodema a mu vutisa a ku: “Swi nga yentxekisa kuyini ku va mhunu a tlhela a pswaliwa nakasi kutani i mukulu? Xana a nga tlhela a nghena a mbelekweni wa mamana wake akuva a pswaliwa hi khambi dzra wubidzri?” 5 Yesu a mu hlamula a ku: “Ni ku byela ntiyiso, loko mhunu a nga pswaliwi hi mati ni hi moya, a nge ngheni a Mfun’wini wa Xikwembu Nkulukumba. 6 Leswi swi pswaliwiki hi nyama i swa nyama nakone leswi pswaliwiki hi moya i swa moya. 7 U nga hlamali hi mhaka ya leswi ni ku byeliki ni ku: Mi fanela ku tlhela mi pswaliwa ka wubidzri. 8 A moya wu hunga wu ya lomu wu djulaka ku ya kone, kutani u twa mpfumawulu wa wone, kambe a wu swi tivi leswaku wu pfa kwini nakone wu ya kwini. Swi tanu ka hinkwavu lava pswaliwaka hi moya.”

9 Nikodema a mu vutisa a ku: “Swi nga yentxekisa kuyini leswo?” 10 Yesu a mu hlamula a ku: “U mudondzrisi wa Israyele, kutani ha yini u nga yi tivi mintxhumu leyi? 11 Ni ku byela ntiyiso, hi vulavula leswi hi swi tivaka nakone hi nyikela wumboni bya leswi hi swi voniki, kambe n’wine a mi byi yamukeli wumboni lebyi hi mi nyikaka byone. 12 Leswi mi kalaka mi nga kholwi loko ni mi byela mintxhumu ya lani misaveni, xana mi ta kholwisa kuyini loko ni mi byela mintxhumu ya le tilweni? 13 Handle ka leswo, a ku na mhunu lweyi a samiki a tlhantukela tilweni, loko ku nga li lweyi a xikiki hi le tilweni, ku nga N’wana wa mhunu. 14 Ku fana ni leswi Moxe a hayekiki nyoka a mananga, a N’wana wa mhunu a fanela ku hayekiwa, 15 akuva mun’wana ni mun’wana lweyi a kholwaka kwake a kuma wutomi lebyi nga helikiki.

16 “Hikusa Xikwembu Nkulukumba a zrandzre misava ngopfu swinene lakakuva a nyikela N’wanake lweyi a pswaliwiki a li wuswake, akuva mun’wana ni mun’wana lweyi a kombisaka lipfumelo kwake a nga helisiwi kambe a kuma wutomi lebyi nga helikiki. 17 Hikusa Xikwembu Nkulukumba a nga zrumelanga N’wanake a misaveni akuva a ta yavanyisa misava, kambe akuva a ta yi huluxa. 18 Lweyi a kombisaka lipfumelo kwake a nge ti yavanyisiwa. Kambe lweyi a nga kombisikiki lipfumelo kutani a yavanyisiwile, hikusa a nga kombisanga lipfumelo a vitweni dzra N’wana wa Xikwembu Nkulukumba lweyi a pswaliwiki a li wuswake. 19 Hi lexi xi taka va yentxa va yavanyisiwa: A livaningu dzri tile a misaveni, kambe vhanu va zrandzre munyama a matsrhan’wini ya livaningu, hikusa a mintizro yavu a yi bihile. 20 Hikusa lweyi a yentxaka mintxhumu ya ku biha awa dzri venga livaningu nakone a nga tsrhindzrekeli lani ku vaningaka, akuva mintizro yake yi nga soliwi.* 21 Kambe lweyi a yentxaka leswinene awa ta lani ku vaningaka, akuva swi ta voneka ha hombe leswaku mintizro yake yi fambisana ni ku zrandzra ka Xikwembu Nkulukumba.”

22 Ntsrhaku ka leswo, Yesu ni vadondzrisiwa vake va suka va ya ka swidoropana swa le Yudeya, lani a yiki tsrhamanyana na vone a tlhela a babatisa vhanu. 23 Kambe Yohane na yene a a babatisa a Enoni kusuhi ni Salime, hikusa a ku ni mati ya manyingi, nakone vhanu a va tsrhamela ku ya va ya babatisiwa; 24 hikusa a nkameni wolowo Yohane a a nge si na pfaleliwa.

25 A vadondzrisiwa va Yohane va kanetane ni Muyuda wa kukazri mayelanu ni mhaka ya ku tibasisa. 26 Ntsrhaku ka leswo va ya ka Yohane va tlhasa va mu byela va ku: “Rabi, wanuna lweyi a a li na wene ka tlhelo ledzrin’wana dzra Yordani, lweyi u nyikeliki wumboni mayelanu na yene, a le ku babatiseni, nakone vhanu hinkwavu va ya kwake.” 27 Yohane a hlamula a ku: “A xi kone lexi mhunu a nga xi yentxaka loko a nga pfumeleliwanga hi Xikwembu Nkulukumba. 28 N’wine ha wuswenu mi timboni ta leswaku ni te: ‘A hi mine Kriste, kambe Xikwembu Nkulukumba a ni zrume leswaku ni zranga ni ta, na yene a nga si na tlhasa.’ 29 Lweyi a nga ni mutekiwa i muteki. Kambe a munghanu wa muteki, loko a yime kusuhi na yene a va a mu yingela, awa nyonxa ngopfu swinene hi ku twa zritu dzra muteki. Xileswo ni nyonxe hi ku helela. 30 A ntizro wa Kriste wu fanela ku tama wu kula, kambe wanga wu fanela ku tama wu pumbeka.”

31 Lweyi a taka hi le henhla a le henhla ka hinkwavu. Lweyi a nga wa lani misaveni a vulavula mintxhumu ya le misaveni hikusa i wa kola misaveni. Lweyi a taka hi le tilweni a le henhla ka hinkwavu. 32 A nyikela wumboni bya leswi a swi voniki ni ku swi yingela, kambe a nga kone lweyi a kholwaka mazritu yake. 33 Lweyi a yamukelaka wumboni byake a tiyisekisa* leswaku Xikwembu Nkulukumba a ni ntiyiso. 34 Hikusa lweyi a zrumiwiki hi Xikwembu Nkulukumba a vulavula mazritu ya Xikwembu Nkulukumba, hikusa Xikwembu Nkulukumba a nga kengeti* loko a nyikela moya wa ku xwenga. 35 Papayi awa mu zrandzra N’wana nakone a beke mintxhumu hinkwayu a mavokweni yake. 36 Lweyi a kombisaka lipfumelo ka N’wana a ni wutomi lebyi nga helikiki; lweyi a kalaka a nga mu yingiseti N’wana a nge ti byi kuma wutomi, kambe a mahlundzru ya Xikwembu Nkulukumba ma tsrhama henhla kwake.

4 Loko Yesu a swi tivile leswaku a Vafarisi va swi twile leswaku a yentxa vadondzrisiwa vavanyingi a tlhela a va babatisa ku tlula Yohane 2 (nambileswi Yesu a a nga li yene lweyi a a babatisa vhanu kambe a ku li vadondzrisiwa vake), 3 a suka a Yudeya a tlhela a ya Galileya. 4 Kambe a a fanela ku khaluta hi Samariya. 5 Xileswo a tlhase doropeni dzra Samariya ledzri vitaniwaka Sikari, kusuhi ni nsimu leyi Yakobe a nyikiki n’wanake Yosefa. 6 Nakunene a xihlovo xa Yakobe a xi li kolanu. Kutani leswi Yesu a a kazralisiwe hi liyendzro, a tlhase a tsrhama kolanu a xihloveni. A ku li kolomu ka ma 12.*

7 Ku te wansati wa kukazri wa le Samariya a ta ka mati. Yesu a mu byela a ku: “Ni kombela mati ya ku nwa.” 8 (A vadondzrisiwa vake a va ye doropeni va ya xava swakuda.) 9 Xileswo wansati lweyi wa Musamariya a ku: “Ha yini u ni kombela mati ku ve u Muyuda nakasi mine ni Musamariya?” (Hikusa a Vayuda a va nga hanyisani ni Vasamariya.) 10 Yesu a mu hlamula a ku: “Loko a wo yi tiva nyiko ya mahala ya Xikwembu Nkulukumba ni leswaku i mani lweyi a ku byelaka a ku: ‘Ni kombela mati ya ku nwa’, a wu ta va u mu kombele mati, kutani yene a a ta va a ku nyike mati ya wutomi.” 11 Wansati yelweyo a mu byela a ku: “Hosi, nambi xikelelo a wu na xone nakone a xihlovo xi yentile. Kutani u ta ma kuma kwini mati wolawo ya wutomi? 12 Xana u tlula kokwana wezru Yakobe lweyi a hi nyikiki xihlovo lexi, lexi yene, vanake kun’we ni mintlhambi yake va nwiki ka xone?” 13 Yesu a mu hlamula a ku: “Hinkwavu lava nwaka mati lawa va ta tlhela va twa tozra. 14 Lweyi a nwaka mati lawa ni taka mu nyika wone a nge he ti tlhela a twa tozra nikutsrongo, kambe a mati lawa ni taka mu nyika wone, a ndzreni kwake ma ta fana ni xihlovo xa mati lama pfelaka akuva ma mu nyika wutomi lebyi nga helikiki.” 15 Wansati yelweyo a mu byela a ku: “Hosi, ni nyike mati lawo akuva ni nga ha tlheli ni twa tozra nambi ku ta a mbangwini lowu ni ta ka mati.”

16 Yesu a mu byela a ku: “Famba u ya vitana nuna waku u buya na yene.” 17 Wansati lweyo a mu hlamula a ku: “A ni na nuna.” Yesu a ku: “U hlaya swone loko u ku: ‘A ni na nuna.’ 18 Hikusa u ve ni ntlhanu wa vavanuna, nakone wanuna lweyi u nga na yene swoswi a hi nuna waku. Leswi u swi hlayiki i ntiyiso.” 19 Wansati yelweyo a mu byela a ku: “Hosi, na swi vona leswaku u muprofeta. 20 Vakokwana vezru va gandzrele a nhaveni leyi, kambe n’wine mi li a vhanu va fanela ku ya gandzrela a Yerusalema.” 21 Yesu a mu byela a ku: “Wansati, ni ku byela ntiyiso, wa ta nkama lowu Papayi mi nga tiki mu gandzrela a nhaveni leyi nambi ku li a Yerusalema. 22 N’wine mi gandzrela leswi mi kalaka mi nga swi tivi; hine hi gandzrela leswi hi swi tivaka, hikusa a Vayuda hi vone va ku sungula ku tiva leswi Xikwembu Nkulukumba a taka swi yentxa akuva a huluxa vhanu. 23 Nambitanu, a nkama wa ta, nakone wu tlhasile, lowu a vagandzreli va ntiyiso va taka gandzrela Papayi hi moya ni ntiyiso, hikusa nakunene Papayi a djuletela lava djulaka ku mu gandzrela hi ndlela yoleyo. 24 Xikwembu Nkulukumba i Moya, nakone lava va mu gandzrelaka va fanela ku mu gandzrela hi moya ni ntiyiso.” 25 Wansati yelweyo a mu byela a ku: “Na swi tiva leswaku Mesiya lweyi a vitaniwaka Kriste awa ta. Loko a tlhasa, a ta hi tlhamuxela mintxhumu hinkwayu.” 26 Yesu a mu byela a ku: “Hi ye mine ni vulavulaka na wene.”

27 A nkama lowu vadondzrisiwa vake va tlhasaka, va hlamala hi mhaka ya leswi va mu kumiki na a bula ni wansati. Nakunene a nga kone lweyi a mu vutisiki a ku: “U djula yini?” kumbe “Ha yini u vulavula na yene?” 28 Xileswo, wansati yelweyo a siya hotsro yake ya mati a ya doropeni a tlhasa a byela vhanu a ku: 29 “Buyani mi ta vona wanuna lweyi a ni byeliki hinkwaswu leswi ni samiki ni swi yentxa. Xana a nga va a li yene Kriste?” 30 Kutani va suka doropeni va mu yela.

31 Hi nkama wolowo, a vadondzrisiwa vake a va mu tsratsriya va ku: “Rabi, dana.” 32 Kambe a va byela a ku: “Ni ni swakuda leswi mi kalaka mi nga swi tivi.” 33 Xileswo a vadondzrisiwa va vutisana va ku: “Xana ko va ni lweyi a mu buyiseliki swakuda?” 34 Yesu a va byela a ku: “A swakuda swanga i ku yentxa ku zrandzra ka lweyi a ni zrumiki ni ku hetisisa ntizro lowu a ni nyikiki wone. 35 Xana a mi hlayi leswaku ka ha sale mune wa tihweti akuva ntsrhovelo wu sungula? Na mi byela: Tlakuxani matihlo mi lavisa a masimu, ma lulameli ku tsrhoveliwa. 36 A mutsrhoveli a yamukela hakelo dzrake nakone a le ku hlengeleteleni ka mihandzru leyi taka kuma wutomi lebyi nga helikiki, akuva a mudzrimi ni mutsrhoveli va nyonxa xikan’we. 37 Hikusa a mhakeni leyi ma tiyisile mazritu lama liki: Mun’we i mubyali kasi lwemun’wana i mutsrhoveli. 38 Ni mi zrume ku ya tsrhovela leswi mi kalaka mi nga swi tizrelanga. Vambeni va tizrile, kutani n’wine ma pfuneka hi ntizro wavu.”

39 A Vasamariya vanyingi va doropa dzroledzro va ve ni lipfumelo kwake hi mhaka ya wumboni lebyi wansati yelweyo a byi nyikeliki, loko a ku: “A ni byele mintxhumu hinkwayu leyi ni samiki ni yi yentxa.” 40 Xileswo, loko Vasamariya va mu yelile, va mu kombele leswaku a tsrhama na vone, kutani a tsrhama na vone masiku mabidzri. 41 Leswo swi yentxe leswaku vhanu van’wana va vanyingi va va ni lipfumelo kwake hi mhaka ya leswi a swi hlayiki, 42 kutani va byela wansati yelweyo va ku: “A ha ha pfumeli hi mhaka ya leswi u hi byeliki swone ntsena; hikusa hi swi yingelile hi wuswezru nakone ha swi tiva leswaku wanuna lweyi hakunene i muhuluxi wa misava.”

43 Ntsrhaku ka masiku wolawo ya mabidzri, Yesu a suka a ya Galileya. 44 Nambitanu, Yesu ha byake a hlaye leswaku a muprofeta a nga kombiwi xitxhavu a tikweni dzralekwavu. 45 Loko a tlhase a Galileya, a Vagalileya va mu yamukelile, hikusa a va vone mintxhumu hinkwayu leyi a a yi yentxile nkhubyini a Yerusalema, swanga hi leswi na vone a va li kone a nkhubyini wolowo.

46 Kutani a tlhela a ya Kana, ku nga xidoropana lexi kumekaka a Galileya, lomu a samiki a ndzruluta mati ma va vhinyu. A ku ni nandzra wa Hosi lweyi a a vabyeliwa hi n’wana wa djaha a Kapernawume. 47 Loko wanuna yelweyo a twa leswaku Yesu a suke hi le Yudeya a ta Galileya, a mu yela a tlhasa a mu kombela leswaku a fulamela na yene va ya a Kapernawume akuva a ya mu hanyisela n’wana, hikusa a a li kusuhi ni ku fa. 48 Kambe Yesu a mu byela a ku: “Loko mi nga vonanga mahlolana ni swihlamaliso, a mi nge txhuki mi kholwa.” 49 A nandzra wa Hosi a mu byela a ku: “Hosi, a hi fulameli na n’wananga a nga si na fa.” 50 Yesu a mu byela a ku: “Famba a n’wanaku a hanyile.” Wanuna yelweyo a kholwa mazritu lawa Yesu a mu byeliki wone, kutani a famba. 51 Kambe na a ha fulamela, a vatizri vake va mu tlhangaveta va mu byela leswaku a xidjahatana xake xi hanyile. 52 Kutani a va vutisa leswaku swi mu yampsweli hi nkama muni. Va mu hlamula va ku: “A dzedzedze dzri mu tsrhike tolo hi ma 13.”* 53 Kutani a papayi wa xidjahatana lexo a swi xiya leswaku ku ve hi nkama wolowo Yesu a mu byeliki a ku: “A n’wanaku a hanyile.” Xileswo, yene kun’we ni vandangu wake hinkwavu va ndzruluka vapfumeli. 54 Ledzri ku ve hlolana dzra wubidzri ledzri Yesu a dzri yentxiki loko a suke hi le Yudeya a ya Galileya.

5 Ntsrhaku ka leswo, ku va ni nkhuvu wa Vayuda, kutani Yesu a tlhantukela a Yerusalema. 2 A Yerusalema a Nyangweni ya Tihamba a ku ni mbangu wa ku hlambela ka wone, lowu hi Xiheberu wu vitaniwaka Betesda, a matlhelweni ka wone a ku ni mimbangu ya ku fambela ka yone leyi a yi fuleliwile. 3 A mbangwini wolowo a ku yetlele vhanu va vanyingi va ku vabya, va ku fa matihlo, va ku limala ni va ku khwanyala swizro. 4 *—— 5 Kambe a ku ni wanuna lweyi a a vabya ku dzringana 38 wa malembe. 6 Loko Yesu a vona wanuna yelweyo na a yetlelile kolanu ni ku xiya leswaku a ku khaluta nkama wa ku leha na a vabya, a mu vutisa a ku: “Wa swi djula ku hanyisiwa?” 7 Wanuna yelweyo lweyi a a vabya a mu hlamula a ku: “Hosi, a ni na mhunu wa ku ni nghenisa matini loko ma pfindluxiwa, kambe loko ni djula ku ya nghena, mun’wana o ni zrangela a ya nghena.” 8 Yesu a mu byela a ku: “Sekeleka! Teka likuku dzraku* u famba.” 9 Hi ku kahlula wanuna lweyo a hanya, kutani a tlakula likuku dzrake* a sungula ku famba.

A siku ledzro a ku li Savata. 10 Xileswo a Vayuda va sungula ku byela wanuna lweyi a hanyisiwiki va ku: “Namunhla i Savata, a swi pfumeleliwi kuva u tlakula likuku.”* 11 Kambe a va hlamula a ku: “Lweyi a ni hanyisiki hi yene a ni byeliki a ku: ‘Teka likuku dzraku* u famba.’” 12 Va mu vutisa va ku: “I mani lweyi a ku byeliki a ku: ‘Teka likuku* u famba’?” 13 Kambe wanuna lweyi a hanyisiwiki a a nga swi tivi leswaku i mani lweyi a mu hanyisiki, hikusa Yesu a a sukile lani xitsrhungu a xi li kone.

14 Ntsrhaku ka leswo, Yesu a mu kuma a tempeleni kutani a mu byela a ku: “Wa swi vona leswaku u hanyisiwile. U nga ha tlheli u doha akuva u nga humeleliwi hi mintxhumu ya ku biha ku tlulisa.” 15 Wanuna yelweyo a suka a famba kutani a ya byela Vayuda leswaku a hanyisiwe hi Yesu. 16 Xileswo, a Vayuda va pfukela Yesu hikusa a a yentxa mintxhumu leyo hi Savata. 17 Kambe Yesu a va hlamula a ku: “Papayi wanga a le ku tizreni ku ta tlhasa swoswi, na mine ni le ku tizreni.” 18 Leswo hi swone swi yentxiki leswaku a Vayuda va ya va mu djuletela ngopfu swinene akuva va mu dlaya, hikusa a a nga honisi Savata ntsena, kambe a a tlhela a hlaya leswaku Xikwembu Nkulukumba i Papayi wake, a tiyentxa lweyi a fanaka na Xikwembu Nkulukumba.

19 Xileswo, Yesu a va byela a ku: “Kunene ni mi byela ntiyiso, a N’wana a nge yentxi ntxhumu hi ku tisungulela, kambe a yentxa ntsena leswi a vonaka Papayi wake na a swi yentxa. Hikusa hinkwaswu leswi Papayi a swi yentxaka, na yene N’wana a swi yentxa hi lani ku fanaka. 20 Hikusa Papayi awa mu zrandzra N’wana nakone a mu komba hinkwaswu leswi yene a swi yentxaka, nakone a ta mu komba mintizro leyikulu ku tlula leyi, akuva mi hlamala. 21 Hikusa ku fana ni leswi Papayi a pfuxaka vafi, a N’wana na yene a pfuxa lava a djulaka ku va pfuxa. 22 Hikusa Papayi a nga yavanyisi mhunu, kambe a ntizro wa ku yavanyisa a wu nyike N’wana, 23 akuva hinkwavu va hlonipha N’wana ku fana ni leswi va mu hloniphaka Papayi. Lweyi a kalaka a nga mu hloniphi N’wana a nga mu hloniphi Papayi lweyi a mu zrumiki. 24 Kunene na mi byela, lweyi a yingelaka mazritu yanga a tlhela a pfumela ka lweyi a ni zrumiki, a ta kuma wutomi lebyi nga helikiki, nakone a nge he ti yavanyisiwa kambe a suke ku feni a ya wuton’wini.

25 “Kunene ni mi byela ntiyiso, a nkama wa ta, nakone wu tlhasile, lowu vafi va taka twa zritu dzra N’wana wa Xikwembu Nkulukumba, kutani lava va yingisetiki va ta hanya. 26 Hikusa ku fana ni leswi Papayi a nga xihlovo xa wutomi,* a pfumelele N’wana leswaku na yene a va xihlovo xa wutomi. 27 Nakone a mu nyike ntamu wa ku yavanyisa, hikusa i N’wana wa mhunu. 28 Swi nga mi hlamalisi leswi, hikusa wa ta nkama lowu hinkwavu lava nga masizreni va taka twa zritu dzrake 29 kutani va huma, lava yentxiki leswinene va ta pfuxiwa akuva va nyikiwa wutomi, lava yentxiki leswa ku biha va ta pfuxiwa akuva va yavanyisiwa. 30 A ni nge yentxi ntxhumu hi ku tisungulela. Ni yavanyisa vhanu hi ku ya hi lani Papayi a ni byelaka ha kone, ni va yavanyisa hi wululami, hikusa a ni yentxi ku zrandzra kwanga kambe ni yentxa ku zrandzra ka lweyi a ni zrumiki.

31 “Loko mine ha wuswanga ni nyikela wumboni mayelanu na mine, a wumboni byanga a hi bya ntiyiso. 32 Ku ni mun’wana lweyi a nyikelaka wumboni mayelanu na mine, nakone na swi tiva leswaku a wumboni lebyi a byi nyikelaka mayelanu na mine i bya ntiyiso. 33 Mi zrumele vhanu ka Yohane, nakone yene a nyikele wumboni bya ntiyiso mayelanu na mine. 34 Nambitanu, a ni vileli ku nyikeleliwa wumboni hi mhunu, kambe ni mi byela mintxhumu leyi akuva mi huluxiwa. 35 Wanuna lweyi a a fana ni motsre lowu pfuzraka wu tlhela wu vaninga, nakone ku dzringana nkamanyana a mi tiyimisele ku nyonxa ngopfu hi ku vaninga kwake. 36 Kambe ni ni wumboni lebyikulu ku tlula bya Yohane, hikusa yo mintizro leyi Papayi a ni nyikiki akuva ni yi yentxa, ku nga mintizro leyi ni yi yentxaka, yi nyikela wumboni bya leswaku ni zrumiwe hi Papayi. 37 Nakone Papayi lweyi a ni zrumiki yene ha wuswake a nyikela wumboni mayelanu na mine. N’wine a mi ngi ngi sama mi dzri yingela zritu dzrake nambi ku vona leswaku a tsrhamisise kuyini, 38 futsrhi a zritu dzrake a dzri tsrhami ndzreni kwenu, hikusa a mi kholwi ka lweyi a mu zrumiki.

39 “Mi kambisisa Matsralwa hikusa mi yanakanya leswaku mi ta kuma wutomi lebyi nga helikiki ha wone; nakasi hi wone ma nyikelaka wumboni mayelanu na mine. 40 Nambitanu, a mi swi djuli ku ta kwanga akuva mi kuma wutomi. 41 A ni swi djuli ku dzrumisiwa hi vhanu, 42 kambe ni swi tiva ha hombe leswaku a mi mu zrandzri Xikwembu Nkulukumba. 43 Ni ta hi vito dzra Papayi wanga kambe a mi ni yamukeli. Loko a ko ta mhunu mun’wana hi vito dzra yene n’winyi, a mi ta mu yamukela. 44 Mi nga pfumelisa kuyini, leswi mi djulaka ku dzrumisana kambe mi nga djuliki lidzrumu ledzri pfaka ka Xikwembu Nkulukumba lweyi a nga yene ntsena wa ntiyiso? 45 Mi nga pimisi leswaku ni ta mi zrwexa nandzru ka Papayi, kambe Moxe lweyi mi mu dumbaka hi yene lweyi a mi zrwexaka nandzru ka leswi a swi tsraliki. 46 Nakunene, loko a mi pfumela ka Moxe, a mi ta pfumela ni kwanga, hikusa yene a tsrale mayelanu na mine. 47 Kambe leswi mi kalaka mi nga pfumeli ka leswi a swi tsraliki, mi ta pfumelisa kuyini ka leswi ni swi hlayaka?”

6 Ntsrhaku ka leswo, Yesu a tsremakanya Lwandle dzra Galileya, ledzri futsrhi dzri vitaniwaka Lwandle dzra Tiberiya. 2 Nakone a a landzreleliwa hi xitsrhungu xa xikulu, hikusa a xi vona mahlolana lawa a a ma yentxa ya ku hanyisa timbabyi. 3 Xileswo, Yesu a tlhantukela a nhaveni a tlhasa a tsrhama ni vadondzrisiwa vake. 4 A Paxkwa, ku nga nkhuvu wa Vayuda, a dzri li kusuhi. 5 Loko Yesu a lavisa, a vona xitsrhungu xa xikulu na xi mu tela, kutani a vutisa Filipi a ku: “Hi ta va xavela kwini mapawu vhanu lava akuva va da?” 6 Kambe Yesu a hlaye leswo akuva a mu dzringa, hikusa a a swi tiva leswi a a djula ku swi yentxa. 7 Filipi a mu hlamula a ku: “A mapawu ya 200 wa madenari a ma nge va yaneti vhanu lava, nambiloko mun’wana ni mun’wana a ngo khemeliwa dzritsrongo.” 8 Mun’we wa vadondzrisiwa vake, ku nga Andreya makwavu wa Simoni Petro, a ku: 9 “Hi lexi xidjahatana xi nga ni ntlhanu wa mapawu* ni swihlampfana swibidzri. Kambe swi ta pfuna yini ka vhanu hinkwavu lava?”

10 Yesu a ku: “Va byelani va tsrhamisa.” A mbangwini wolowo a ku ni byanyi bya byinyingi, xileswo va tsrhamise hansi. Ka xitsrhungu xolexo a ku ni kolomu ka 5.000 wa vavanuna. 11 Yesu a teka mapawu,* a hamba xikhongoto xa ku tlangela, kutani a yavela hinkwavu lava a va tsrhamise kolanu; a tlhela a va yavela swihlampfana, va da va xuzra. 12 Kambe loko va dile va xuzra, a byela vadondzrisiwa vake a ku: “Hlengeletani hinkwaswu leswi saliki akuva ku nga luzi ntxhumu.” 13 Xileswo, va hlengeleta leswi siyiwiki hi lava diki ntlhanu wa mapawu,* va tata 12 wa mintsrhava.

14 Loko vhanu va vona hlolana ledzri a dzri yentxiki, va sungula ku hlaya va ku: “Lweyi hakunene i muprofeta lweyi ku profetiwiki leswaku a ta ta a misaveni.” 15 Kutani Yesu hi ku tiva leswaku a va djula ku ta mu khoma va mu yentxa hosi, a tlhela a suka a ya nhaveni na a li wuswake.

16 Loko dzri pelile a vadondzrisiwa vake va fulamela va ya lwandle, 17 va tlhasa va khwela boti va tsremakanya va ya Kapernawume. Hi nkama wolowo a ku mphumile, kambe Yesu a a nga si na buya a ta kumana na vone. 18 Nakone a lwandle a dzri sungula ku kwata hikusa a ku ba moya wa wukulu. 19 Nambitanu, ntsrhaku ka loko va wetile mpfhuka wa kolomu ka ntlhanu kumbe 6 wa makilometru* va vona Yesu na a famba henhla ka mati na a tsrhindzrekelela boti, kutani va sungula ku txhava. 20 Kambe a va byela a ku: “Hi mine, mi nga txhavi!” 21 Kutani va mu yamukela a botini na va nyonxile, hi nkama wolowo a boti dzri tlhasa a nhlalukwini dzra lomu a va ya kone.

22 Hi mundzruku ka kone, a xitsrhungu lexi a xi sale ka tlhelo ledzrin’wana dzra lwandle xi vona leswaku a mbangwini wolowo a ku nga na boti. Ku ve ni xibotana, kambe Yesu a nga khwelanga ka xone kun’we ni vadondzrisiwa vake, hikusa a vadondzrisiwa vake a va tifambele wuswavu. 23 Nambitanu, a maboti lawa a ma pfa hi Tiberiya, ma tlhase a mbangwini lowu va deliki ka wone mapawu ntsrhaku ka loko Hosi yi hambe xikhongoto xa ku tlangela. 24 Kutani loko xitsrhungu xi vona leswaku Yesu ni vadondzrisiwa vake a va nga ha li kone a mbangwini wolowo, xi khwela maboti wolawo xi ya a Kapernawume xi ya djuletela Yesu.

25 Loko xi kuma Yesu ka tlhelo ledzrin’wana dzra lwandle, a xitsrhungu xi mu vutisa xi ku: “Rabi, u tlhase siku muni lani?” 26 Yesu a va hlamula a ku: “Kunene ni mi byela ntiyiso, a mi ni djuleteli hi mhaka ya leswi mi voniki mahlolana, kambe mi ni djuletela hi leswi mi diki mapawu mi xuzra. 27 Mi nga tizreli swakuda leswi bolaka, kambe tizrelani swakuda leswi kalaka swi nga boli leswi nyikaka wutomi lebyi nga helikiki, leswi a N’wana wa mhunu a taka mi nyika swone; hikusa Papayi wa le matilweni, ku nga Xikwembu Nkulukumba, a mu bekele mfungu lowu kombisaka leswaku awa mu yamukela.”

28 Va mu vutisa va ku: “He yini mintizro leyi hi fanelaka ku yi yentxa akuva hi yamukeleka ka Xikwembu Nkulukumba?” 29 Yesu a va hlamula a ku: “Akuva mi yamukeleka ka Xikwembu Nkulukumba, mi fanela ku kombisa lipfumelo ka lweyi Xikwembu Nkulukumba a mu zrumiki.” 30 Kutani va mu vutisa va ku: “He dzrini hlolana ledzri u nga dzri yentxaka akuva hi dzri vona kutani hi va ni lipfumelo kwaku? U ta hi yentxela yini? 31 Vakokwana vezru va de mana a mananga, hi lani a Matsralwa ma hlayaka ha kone ma ku: ‘A va nyike pawu dzra le tilweni akuva va da.’” 32 Kutani Yesu a va byela a ku: “Kunene ni mi byela ntiyiso, Moxe a nga mi nyikanga pawu ledzri pfaka tilweni, kambe Papayi wanga a mi nyika pawu dzra ntiyiso ledzri pfaka tilweni. 33 Hikusa a pawu dzra Xikwembu Nkulukumba hi lweyi a xikaka hi le tilweni a tisa wutomi misaveni.” 34 Xileswo va mu byela va ku: “Hosi, hi nyike pawu ledzro minkama hinkwayu.”

35 Yesu a va byela a ku: “Hi mine pawu dzra wutomi. Lweyi a taka kwanga a nge he tlheli a twa ndlala nikutsrongo, nakone lweyi a kombisaka lipfumelo kwanga a nge he txhuki a twa tozra nikutsrongo. 36 Kambe hi lani ni mi byeliki ha kone, mi ni vonile nambitanu a mi pfumeli. 37 Hinkwavu lava Papayi a ni nyikaka vone va ta ta kwanga, nakone lweyi a taka kwanga a ni nge ti txhuka ni mu hlongola; 38 hikusa a ni xikanga hi le tilweni akuva ni ta yentxa ku zrandzra kwanga, kambe ni tele ku ta yentxa ku zrandzra ka lweyi a ni zrumiki. 39 A ku zrandzra ka lweyi a ni zrumiki, i ka leswaku ni nga luzi ni mun’we ka hinkwavu lava a ni nyikiki vone, kambe ni va pfuxa a sikwini dzra wugamu. 40 Hikusa a ku zrandzra ka Papayi wanga, i ka leswaku mun’wana ni mun’wana lweyi a yamukelaka N’wana a tlhela a va ni lipfumelo kwake a kuma wutomi lebyi nga helikiki, kutani ni ta mu pfuxa hi siku dzra wugamu.”

41 Xileswo, a Vayuda va sungula ku n’unun’uta hi mhaka ya leswi a hlayiki a ku: “Hi mine pawu ledzri pfaka tilweni.” 42 Kutani va sungula ku hlaya va ku: “Xana lweyi a hi Yesu n’wana wa Yosefa, lweyi papayi ni mamana wake hi va tivaka? Kutani ha yini swoswi a ku: ‘Ni pfa hi le tilweni’?” 43 Yesu a va byela a ku: “Tsrhikani ku n’unun’uta. 44 A nga kone lweyi a nga taka kwanga loko a nga kokiwanga hi Papayi lweyi a ni zrumiki, kutani ni ta mu pfuxa hi siku dzra wugamu. 45 A vaprofeta va tsrale leswi: ‘Hinkwavu va ta dondzrisiwa hi Yehovha.’ Mun’wana ni mun’wana lweyi a yingisetaka Papayi a tlhela a yamukela leswi a mu dondzrisaka swone awa ta kwanga. 46 Leswo a swi hlayi swone leswaku ku ni mhunu lweyi a samiki a vona Papayi; lweyi a samiki a vona Papayi ko va mun’we ntsena, ku nga lweyi a pfaka hi ka Xikwembu Nkulukumba. 47 Kunene ni mi byela ntiyiso, lweyi a pfumelaka a ta kuma wutomi lebyi nga helikiki.

48 “Hi mine pawu dzra wutomi. 49 Vakokwana venu va de mana a mananga, nambitanu va file. 50 Ledzri i pawu ledzri pfaka tilweni, akuva mun’wana ni mun’wana lweyi a daka dzrone a nga fi. 51 Mine ni pawu ledzri hanyaka ledzri xikiki hi le tilweni. Loko mhunu a da pawu ledzri a ta hanya hi lani ku nga helikiki; nakunene a pawu ledzri, i nyama yanga leyi ni taka yi nyikela akuva vhanu va* kuma wutomi.”

52 Kutani a Vayuda va sungula ku holovisana hi xivone, va ku: “Xana wanuna lweyi a nga hi nyikisa kuyini nyama yake akuva hi da?” 53 Xileswo Yesu a va byela a ku: “Kunene ni mi byela ntiyiso, loko mi nga di nyama ya N’wana wa mhunu ni ku nwa ngati yake, a mi nge ti byi kuma wutomi. 54 Lweyi a daka nyama yanga ni ku nwa ngati yanga a ta kuma wutomi lebyi nga helikiki, kutani ni ta mu pfuxa hi siku dzra wugamu; 55 hikusa a nyama yanga i swakuda swa ntiyiso ni ngati yanga i swa ku nwa swa ntiyiso. 56 Lweyi a daka nyama yanga ni ku nwa ngati yanga a ni wumun’we na mine, na mine ni ni wumun’we na yene. 57 Ku fana ni leswi Papayi lweyi a hanyaka a ni zrumiki nakone ni hanyaka hi kola kwake, na yene lweyi a daka nyama yanga a ta hanya hi kola kwanga. 58 Ledzri i pawu ledzri xikiki hi le tilweni. A dzri fani ni ledzri vakokwana venu va dzri diki nambitanu va fa. Lweyi a daka pawu ledzri a ta hanya hi lani ku nga helikiki.” 59 A mintxhumu leyi a yi hlaye na a li ku dondzriseni a sinagogeni a Kapernawume.

60 Loko va twa leswo, vanyingi va vadondzrisiwa vake va ku: “A mhaka leyi ya txhavisa, i mani lweyi a nga yi yingisetaka?” 61 Kambe Yesu hi ku tiva leswaku a vadondzrisiwa vake a va n’unun’uta hi mhaka leyi, a ku: “Xana leswi swa mi khunguvanyisa? 62 A mi ta ku yini loko a mo vona N’wana wa mhunu na a tlhantukela lomu a a li kone ku sunguleni? 63 A moya wa ku xwenga hi wone wu nyikaka wutomi; a nyama a yi pfuni ntxhumu nikutsrongo. A mazritu lawa ni mi byeliki wone ma huma ka moya wa ku xwenga nakone ma nyikana wutomi. 64 Kambe a makazri kwenu ku ni lava kalaka va nga pfumeli.” Hikusa Yesu a a swi tiva ku sukela a ku sunguleni leswaku i vamani lava a va nga pfumeli ni leswaku i mani lweyi a a ta mu wonga. 65 A ya mahlweni a ku: “Hi leswo swi ni yentxiki ni mi byela ni ku: A nga kone lweyi a nga taka kwanga loko a nga pfumeleliwanga hi Papayi.”

66 Hi mhaka ya leswo, vanyingi va vadondzrisiwa vake va tlheleli ka mintxhumu leyi va yi siyiki ntsrhaku nakone a va ha tlhelanga va mu landzrela. 67 Kutani Yesu a vutisa lava 12 a ku: “Xana na n’wine mi djula ku famba?” 68 Simoni Petro a mu hlamula a ku: “Hosi, hi ta ya ka mani? Hi wene u nga ni mazritu ya wutomi lebyi nga helikiki. 69 Hi pfumelile nakone ha swi tiva leswaku wene u Muxwengi wa Xikwembu Nkulukumba.” 70 Yesu a va hlamula a ku: “Xana a hi mine ni mi hlawuliki n’wine va 12? Nambitanu, mun’we wenu i mulumbeti.”* 71 Nakunene a a vulavula hi Yudasi n’wana wa Simoni Iskariyota, hikusa yene a a ta mu wonga, nambileswi a a li mun’we wa lava 12.

7 Ntsrhaku ka leswo, Yesu a ya mahlweni a zrezra a Galileya,* hikusa a a nga djuli ku ya zrezra a Yudeya hi mhaka ya leswi Vayuda a va djula ku mu dlaya. 2 Nambitanu, a Nkhuvu wa Mintsronga wa Vayuda a wu li kusuhi. 3 Xileswo, vamakwavu va mu byela va ku: “Suka lani u ya Yudeya, akuva a vadondzrisiwa vaku na vone va ta kota ku vona mintizro leyi u yi yentxaka. 4 Hikusa loko mhunu a djula ku tiviwa a mintxhumu a nga yi yentxi a xihundleni. Leswi u swi yentxaka swi yentxi a mahlweni ka vhanu hinkwavu.” 5 Ku hlaya ntiyiso vamakwavu a va nga na lipfumelo kwake. 6 Xileswo Yesu a va byela a ku: “A nkama wanga a wu si na tlhasa, kambe n’wine mi nga ya hi nkama lowu mi wu djulaka. 7 A misava a yi na xivangelo xa ku mi nyenya, kambe mine ya ni nyenya, hikusa ni nyikela wumboni bya leswaku mintizro ya yone yi bihile. 8 N’wine fambani a nkhubyini, mine a ni nge ti ya a nkhubyini lowu, hikusa a nkama wanga a wu si na tlhasa.” 9 Xileswo ntsrhaku ka ku va byela mintxhumu leyi, a sala a Galileya.

10 Kambe ntsrhaku ka loko vamakwavu va tlhantukile va ya nkhubyini, na yene a game a famba, kambe na swi nga tiviwi hi mhunu. 11 Xileswo, a Vayuda va sungula ku mu djuletela a nkhubyini na va ku: “A kwini wanuna lwiyani?” 12 A switsrhungu a swi n’unun’uta ngopfu mayelanu na yene. Van’we a va ku: “I mhunu lwenene.” Van’wana a va ku: “A hi munene. A hambukisa xitsrhungu.” 13 Nakunene a va nga vulavuli hi yene a mahlweni ka vhanu van’wana hikusa a va txhava Vayuda.

14 Loko nkhuvu wu li xikazri, Yesu a ya tempeleni a sungula ku dondzrisa. 15 Kutani a Vayuda va hlamala va ku: “Swi yentxekisa kuyini wanuna lweyi a va ni wutivi lebyi bya Matsralwa nakasi a nga dondzranga a swikole swa wukhongoti?”* 16 Yesu a va hlamula a ku: “Leswi ni swi dondzrisaka a hi swanga, kambe i swa lweyi a ni zrumiki. 17 Loko mhunu a djula ku yentxa ku zrandzra ka Xikwembu Nkulukumba a ta swi tiva leswaku leswi ni swi dondzrisaka swi pfa ka Xikwembu Nkulukumba kumbe no vulavula hi ku tisungulela. 18 Lweyi a vulavulaka hi ku tisungulela a tidjulela ku dzrumisiwa; kambe lweyi a djulaka ku dzrumisa lweyi a mu zrumiki, a vulavula ntiyiso nakone a nga na wukanganyisi. 19 Moxe a mi nyike Nawu, a hi swone ke? Kambe a nga kone ni mun’we kwenu a wu yingisetaka. Ha yini mi djula ku ni dlaya?” 20 A xitsrhungu xi hlamula xi ku: “U ni demona. I mani a djulaka ku ku dlaya?” 21 Yesu a va hlamula a ku: “Ni yentxe hlolana dzrin’we, kutani hinkwenu mi hlamala. 22 Kutani pimisani hi leswi: Moxe a mi nyike Nawu mayelanu ni ku soka (ku nga li leswaku a wu pfa kwake, kambe a wu pfa ka vakokwana) nakone n’wine ma sokisa mhunu hi savata. 23 Kutani loko mhunu a sokisiwa hi savata akuva Nawu wa Moxe wu nga honisiwi, ha yini mi ni kwatela ngopfu hi leswi ni hanyisiki mhunu hi ku helela hi savata? 24 Tsrhikani ku yavanyisa hi ku ya hi leswi mi swi vonaka, kambe yavanyisani hi ku lulama.

25 Kutani vhanu van’wana lava tsrhamaka a Yerusalema va sungula ku hlaya va ku: “A hi yene wanuna lweyi va djulaka ku mu dlaya lweyi? 26 Kambe ma mu vona! o vulavula a vhanwini nakone a va hlayi ntxhumu. Xana a vazrangeli vezru ve tiyiseka leswaku hi yene Kriste? 27 Kambe hine ha swi tiva leswaku wanuna lweyi a pfa kwini; kasi loko Kriste a ta buya a ku na mhunu lweyi a taka tiva lomu a humaka kone.” 28 Kutani na a li ku dondzriseni a tempeleni, Yesu a hlaya hi zritu dzra ku tlakuka a ku: “Ma ni tiva nakone ma swi tiva leswaku ni pfa kwini. A ni tanga hi ku tisungulela, kambe lweyi a ni zrumiki a kone hi kakunene, nakone n’wine a mi mu tivi. 29 Mine na mu tiva hikusa ni muyimeli wake, nakone hi yene a ni zrumiki.” 30 Xileswo va djuletela ku mu khoma, kambe a nga kone ni mun’we lweyi a mu khomiki, hikusa a nkama wake a wu nga si na tlhasa. 31 Nambitanu, vanyingi ka xitsrhungu va kombise lipfumelo kwake, nakone a va ku: “Loko Kriste a buya, xana a ta yentxa mahlolana ya manyingi ya ku tlula lawa wanuna lweyi a ma yentxaka?”

32 A Vafarisi va yingela xitsrhungu na xi n’unun’uta hi mintxhumu leyi mayelanu na yene, kutani a vaprista lavakulu ni Vafarisi va zruma a valaveleli va tempele leswaku va ya mu khoma. 33 Kutani Yesu a ku: “Na ha ta va na n’wine ku dzringana nkamanyana na ni nga si na tlhelela ka lweyi a ni zrumiki. 34 Mi ta ni djuletela kambe a mi nge ti ni kuma, nakone lani ni taka va na ni li kone n’wine a mi nge yi.” 35 Xileswo a Vayuda va sungula ku vutisana va ku: “Xana a wanuna lweyi a pimisa ku ya kwini ka ku a hi nge mu kumi? Xana a ngo pimisa ku ya ka Vayuda lava tsrhamaka ni Vagriki, akuva a dondzrisa Vagriki? 36 A djula ku hlaya swaku yini loko a ku: ‘Mi ta ni djuletela kambe a mi nge ti ni kuma, nakone lani ni taka va na ni li kone n’wine a mi nge ti swi kota ku ya’?”

37 Hi siku dzra wugamu, ku nga siku ledzrikulu dzra nkhuvu, Yesu a sekeleka a hlaya hi zritu dzra ku tlakuka a ku: “Lweyi a nga ni tozra, a a te kwanga a ta nwa mati. 38 Mayelanu ni lweyi a kombisaka lipfumelo kwanga, a Matsralwa ma li: ‘A ndzreni ka mbilu yake ku ta huma mati ya manyingi lawa ma nyikaka wutomi.’”* 39 Nambitanu, Yesu a a hlaya moya, lowu lava kombisaka lipfumelo kwake a va ta wu yamukela; hikusa a va nga si na wu yamukela, swanga hi leswi Yesu a a nga si na tlakuxiwa. 40 Van’we ka xitsrhungu lava twiki mazritu lawo va sungula ku hlaya va ku: “Lweyi hakunene i muprofeta.” 41 Van’wana a va ku: “Lweyi i Kriste.” Kambe van’wanyana a va ku: “Xana Kriste a nga huma a Galileya? 42 Kasi a Matsralwa a ma hlayi swone leswaku Kriste a ta va wa lixaka dzra Davhida, nakone a ta pfa a Betlehema ku nga xidoropana lexi Davhida a a huma ka xone?” 43 Xileswo a xitsrhungu xi sungula ku kala xi nga ha twanani hi mhaka yake. 44 Nambitanu, van’we va vone va djule ku mu khoma, kambe a nga kone ni mun’we wavu lweyi a mu khomiki.

45 Ntsrhaku ka leswo, a valaveleli va tlhelela ka vaprista lavakulu ni Vafarisi, kutani vone va va vutisa va ku: “Ha yini mi nga mu khomanga mi buya na yene lani?” 46 A valaveleli va va hlamula va ku: “A ku na mhunu lweyi a samiki a vulavula ku fana ni wanuna lwiyani.” 47 A Vafarisi va ku: “Xana na n’wine mi hambukisiwile? 48 Xana mi ke mi vona mun’we wa vazrangeli kumbe Mufarisi a kombisa lipfumelo kwake? 49 Kambe a xitsrhungu lexi, lexi kalaka xi nga wu tivi Nawu, xi zrukiwile.” 50 Nikodema lweyi a samiki a yela Yesu nakone a a li mun’we wa vone, a va byela a ku: 51 “A Nawu wezru a wu hi pfumeleli kuva hi yavanyisa mhunu na hi nga zranganga hi ku mu yingela ni ku tiva leswi a swi yentxaka, a hi swone ke?” 52 Va mu hlamula va ku: “Xana na wene wo va Mugalileya? Kambisisa u ta swi vona leswaku a ku na muprofeta lweyi a taka huma a Galileya.”*

8 12 Yesu a tlhela a vulavula na vone a ku: “Mine ni livaningu dzra misava. Lweyi a ni landzrelaka a nge ti txhuka a famba munyameni, kambe a ta va ni livaningu dzra wutomi.” 13 Xileswo, a Vafarisi va mu byela va ku: “Wene u nyikela hi wuswaku a wumboni bya leswaku hi wene mani, xileswo a wumboni byaku a hi bya ntiyiso.” 14 Yesu a va hlamula a ku: “Nambiloko ni nyikela hi wuswanga a wumboni bya leswaku hi mine mani, a wumboni byanga i bya ntiyiso, hikusa na ku tiva lomu ni pfaka kone ni lomu ni yaka kone. Kambe n’wine a mi ku tivi lomu ni pfaka kone ni lomu ni yaka kone. 15 N’wine mi yavanyisa hi ku ya hi mavonela ya vhanu, mine a ni yavanyisi mhunu nikutsrongo. 16 Kambe nambiloko ni yavanyisa, a ku yavanyisa kwanga i ka ntiyiso, hikusa a ni wuswanga, kambe Papayi lweyi a ni zrumiki a na mine. 17 Nakone a Nawu wenu wu li: ‘A wumboni bya vhanu vabidzri byi tiyile.’ 18 Mine ni nyikela wumboni bya leswaku hi mine mani, na yene Papayi lweyi a ni zrumiki a nyikela wumboni mayelanu na mine.” 19 Kutani va mu vutisa va ku: “A kwini Papayi waku?” Yesu a va hlamula a ku: “Mine a mi ni tivi, nambi Papayi wanga a mi mu tivi. Loko a mo ni tiva, na yene Papayi wanga a mi ta mu tiva.” 20 A hlaye mintxhumu leyi nkama lowu a a li ku dondzriseni a tempeleni na a li lani a ku petiwa kone mali. Kambe a ku na mhunu lweyi a mu khomiki, hikusa a nkama wake a wu nga si na tlhasa.

21 A tlhela a va byela a ku: “Na famba, mi ta ni djuletela, kambe mi ta fela a swidohweni swenu. Lomu ni yaka kone, a mi nge yi.” 22 Kutani a Vayuda va ku: “Xana a ngo djula ku tisunga, leswi a liki: ‘Lomu ni yaka kone, a mi nge ti swi kota ku ya’?” 23 Yesu a ya mahlweni a ku: “N’wine mi va lani hansi, kambe mine ni wa le henhla. N’wine mi va misava leyi; kambe mine a ni wa misava leyi. 24 Hi yoleyo mhaka ni liki: Mi ta fela a swidohweni swenu. Hikusa loko mi nga kholwi leswaku hi mine lweyi a a fanela ku ta, mi ta fela a swidohweni swenu.” 25 Xileswo va ku: “Hi wene mani?” Yesu a va hlamula a ku: “No tihetela nkama hi ku vulavula na n’wine. 26 Ni ni mintxhumu yinyingi ya ku yi hlaya mayelanu na n’wine ni ku mi yavanyisa ha yone. Nakunene, Lweyi a ni zrumiki a vulavula ntiyiso nakone hinkwaswu leswi ni swi yingeliki kwake na swi hlaya a misaveni.” 27 A va swi twisisanga leswaku a a vulavula na vone mayelanu na Papayi. 28 Kutani Yesu a va byela a ku: “Ntsrhaku ka loko mi ta va mi hayeke N’wana wa mhunu a mhandzrini, hi kone mi taka swi tiva leswaku ni mani ni leswaku a ni yentxi ntxhumu hi ku tisungulela, kambe ni hlaya leswi Papayi a ni dondzrisiki swone. 29 Nakone lweyi a ni zrumiki a na mine; a nga ni tsrhikanga wuswanga hikusa minkama hinkwayu ni yentxa leswi mu nyonxisaka.” 30 Ntsrhaku ka loko a hlaye mintxhumu leyi, vanyingi va ve ni lipfumelo kwake.

31 Kutani Yesu a byela Vayuda lava viki ni lipfumelo kwake a ku: “Loko mi yingiseta mazritu yanga mi vadondzrisiwa vanga hi kakunene, 32 nakone mi ta tiva ntiyiso, kutani a ntiyiso wu ta mi ntsrhunxa.” 33 Lavan’wana va mu hlamula va ku: “Hi vana va Abrahamu, nakone a hi ngi ngi sama hi va swikazrawa swa mhunu. Kutani ha yini u ku: ‘Mi ta ntsrhunxiwa?’” 34 Yesu a va hlamula a ku: “Kunene ni mi byela ntiyiso, lweyi a dohaka i xikazrawa xa xidoho. 35 Handle ka leswo, a xikazrawa a xi tsrhami mutini wa n’winyi wa xone hi lani ku nga gamikiki; kambe a n’wana wa n’winyi wa muti a tsrhama hi lani ku nga gamikiki. 36 Xileswo loko a N’wana a mi ntsrhunxa, mi ta va lava ntsrhunxekiki hi kakunene. 37 Na swi tiva leswaku mi vana va Abrahamu. Kambe mi djula ku ni dlaya, hikusa a mazritu yanga a ma pfuni ntxhumu kwenu. 38 Ni vulavula mintxhumu leyi ni yi voniki loko na ha li na Papayi wanga, kambe n’wine mi vulavula mintxhumu leyi mi yi twiki ka papayi wenu.” 39 Va mu hlamula va ku: “Papayi wezru hi Abrahamu.” Yesu a va byela a ku: “Loko a mi li vana va Abrahamu, a mi ta yentxa mintizro ya Abrahamu. 40 Kambe swoswi mi djula ku ni dlaya, mine mhunu lweyi a mi byeliki ntiyiso lowu ni wu yingeliki ka Xikwembu Nkulukumba. Abrahamu a nga swi yentxanga leswo. 41 Mi yentxa mintizro ya papayi wenu.” Va mu hlamula va ku: “A hi pswaliwanga wumbuyeni;* hi ni Papayi mun’we, ku nga Xikwembu Nkulukumba.”

42 Yesu a va byela a ku: “Loko Xikwembu Nkulukumba a a li Papayi wenu, a mi ta ni zrandzra hikusa ni ta hi ka Xikwembu Nkulukumba nakone ni lani hi mhaka yake. A ni tanga hi ku tisungulela, kambe hi Yene a ni zrumiki. 43 Ha yini mi nga swi twisisi leswi ni swi hlayaka? Hi leswaku a mi swi djuli ku yingiseta mazritu yanga. 44 Papayi wenu i Diyavulosi, nakone mi djula ku yentxa ku zrandzra kwake. Yene a a li mudlayi ku sukela a ku sunguleni, nakone a nga tsrhamanga a ntiyisweni, hikusa a ntiyiso a wu kone kwake. Loko a vulavula madzrimi a vulavula leswi nga mbilwini yake, hikusa i muhembi nakone i papayi wa madzrimi. 45 Kambe mine ni mi byela ntiyiso, nambitanu a mi ni kholwi. 46 I mani kwenu lweyi a nga ni wumboni bya leswaku mine ni mudohi? Leswi ni vulavulaka ntiyiso, ha yini mi nga ni kholwi? 47 Lweyi a humaka ka Xikwembu Nkulukumba a yingiseta mazritu ya Xikwembu Nkulukumba. N’wine a mi yingiseti, hikusa a mi humi ka Xikwembu Nkulukumba.”

48 A Vayuda va mu hlamula va ku: “Ho hemba loko hi ku: ‘U Musamariya, nakone u ni demona’”? 49 Yesu a hlamula a ku: “A ni na demona, ni hlonipha Papayi wanga, kambe n’wine ma ni yeyisa. 50 Kambe a ni tidjuleli ku dzrumisiwa; Xikwembu Nkulukumba hi yene a djulaka leswaku ni dzrumisiwa nakone hi yene a yavanyisaka. 51 Kunene ni mi byela ntiyiso, lweyi a yingisetaka mazritu yanga, a nge ti txhuka a fa.” 52 A Vayuda va mu byela va ku: “Swoswi ha swi tiva leswaku u ni demona. Abrahamu a file, na vo vaprofeta va file, kambe wene u li: ‘Lweyi a yingisetaka mazritu yanga a nge ti txhuka a dzringa lifu.’ 53 Xana wo tlula papayi wezru Abrahamu, lweyi a fiki? Na vo vaprofeta va file. Xana wene u pimisa leswaku wo va mani?” 54 Yesu a hlamula a ku: “Loko ni tidzrumisa, a lidzrumu dzroledzro a dzri pfuni ntxhumu. Papayi wanga lweyi mi hlayaka leswaku i Xikwembu Nkulukumba wenu hi yene a ni dzrumisaka. 55 N’wine a mi mu tivi, kambe mine na mu tiva. Nakone loko ni ngo hlaya leswaku a ni mu tivi, ni ta va na ni li muhembi ku fana na n’wine. Kambe na mu tiva nakone ni yingiseta mazritu yake. 56 Papayi wenu Abrahamu a nyonxe ngopfu swinene hi ku yimela ku vona siku dzranga, nakone a dzri vonile kutani a nyonxa.” 57 Kutani a Vayuda va ku: “Nambi 50 wa malembe a wu na wone, u mu vonisi kuyini Abrahamu?” 58 Yesu a va byela a ku: “Kunene ni mi byela ntiyiso, na Abrahamu a nga si na va kone, mine a ni li kone.” 59 Xileswo va zrola mazribye akuva va mu txukumetela, kambe Yesu a tumbela, a huma tempeleni.

9 Na a li ku fambeni, Yesu a vona wanuna lweyi a pswaliwiki na a fe matihlo. 2 Kutani a vadondzrisiwa vake va mu vutisa va ku: “Rabi, leswi wanuna lweyi a pswaliwiki na a fe matihlo, i mani a dohiki, hi yene kumbe i vapswele vake?” 3 Yesu a hlamula a ku: “A hi yene nambi ku li vapswele vake a hi vone, kambe swi yentxeke akuva mintizro ya Xikwembu Nkulukumba yi ta vonekisiwa hi kola kwake. 4 Hi fanela ku yentxa mintizro ya lweyi a ni zrumiki na ka ha vona; bya ta wusiku lebyi swi nga ha tiki koteka kuva mhunu a tizra. 5 Loko na ha li lani misaveni, ni livaningu dzra misava.” 6 Ntsrhaku ka loko a hlaye mintxhumu leyi, a thukela hansi a pfuva ntsrokolo hi mazri, kutani a tota wanuna yelweyo a matihlweni 7 a gama a mu byela a ku: “Famba u ya hlamba matihlo a matini ya Silowama” (leswi loko swi ndzruluteliwa swi liki: “Lama zrumiwiki”). Xileswo a famba a ya hlamba, kutani a buya na a vona.

8 Kutani a vayakelani kun’we ni lava a va talisa ku mu vona na a kombela zimola va ku: “Lweyi a hi yene wanuna lweyi a a talisa ku tsrhama a kombela zimola?” 9 Van’we va ku: “Hi yene.” Van’wana va ku: “A hi yene, kambe va fana.” Wanuna yelweyo a a tama a ku: “Hi mine.” 10 Xileswo va mu vutisa va ku: “Swi yentxekise kuyini kuva matihlo yaku ma pfuleka?” 11 A hlamula a ku: “Wanuna lweyi va liki i Yesu a pfuve ntsrokolo a ni tota a matihlweni a gama a ku: ‘Famba u ya hlamba a Silowama.’ Xileswo ni famba ni ya hlamba kutani ni sungula ku vona.” 12 Loko va twa leswo va mu vutisa va ku: “A kwini wanuna yelweyo?” Yene a ku: “A ni swi tivi.”

13 Kutani va teka wanuna yelweyo lweyi a a fe matihlo va mu yisa ka Vafarisi. 14 A siku ledzri Yesu a pfuviki ntsrokolo a mu tota a matihlweni a ku li Savata. 15 Xileswo na vone Vafarisi va sungula ku mu vutisa leswaku swi yentxekise kuyini leswaku a tlhela a vona. A va byela a ku: “A ni tote ntsrokolo a matihlweni ni gama ni ya hlamba, kutani swoswi na vona.” 16 Van’we va Vafarisi va sungula ku hlaya va ku: “Wanuna lweyo a nga humi ka Xikwembu Nkulukumba hikusa a nga dzri bekisi Savata.” Van’wana va ku: “Swi nga yentxekisa kuyini kuva mhunu a yentxa mahlolana ya ku fana ni lawa nakasi i mudohi?” Xileswo va sungula ku kala va nga ha twanani. 17 Va tlhela va vutisa wanuna lweyi a a fe matihlo va ku: “Wene u li yini hi yene, hikusa hi wene u pfuliwiki matihlo?” Wanuna yelweyo a ku: “I muprofeta.”

18 Nambitanu, a Vayuda a va kholwanga leswaku wanuna lweyo a a fe matihlo ni leswaku kutani me pfuliwa, ku ya tlhasa loko va vitana vapswele va wanuna yelweyo lweyi swoswi a a vona. 19 Kutani va va vutisa va ku: “Lweyi hi ye n’wanenu lweyi mi liki a pswaliwe na a fe matihlo? Swi yentxekisa kuyini kuva swoswi a vona?” 20 A vapswele vake va hlamula va ku: “Ha swi tiva leswaku lweyi i n’wanezru ni leswaku a pswaliwe na a fe matihlo. 21 Kambe leswaku swi yentxekise kuyini kuva swoswi a vona, a hi swi tivi; ni leswaku i mani a mu pfuliki matihlo, a hi swi tivi. Mu vutisani. Kutani i mukulu. A nga tihlamulela hi wuswake.” 22 A vapswele vake va hlaye leswo hi ku txhava Vayuda, hikusa a Vayuda a va pfumelelane leswaku mun’wana ni mun’wana lweyi a pfumelaka leswaku Yesu i Kriste, a fanela ku hlongoliwa a sinagogeni. 23 Leswi hi swone swi yentxiki vapswele vake va ku: “Kutani i mukulu, mu vutisani.”

24 Xileswo, va tlhela va vitana wanuna lweyi a a fe matihlo va mu byela va ku: “Dzrumisa Xikwembu Nkulukumba; ha swi tiva leswaku wanuna lweyi i mudohi.” 25 A va hlamula a ku: “Leswaku i mudohi, a ni swi tivi. Lexi ni xi tivaka hi leswaku a ni fe matihlo, kambe swoswi na vona.” 26 Kutani va mu vutisa va ku: “A ku yentxe yini? A ma pfulise kuyini matihlo yaku?” 27 A va hlamula a ku: “Kutani ni mi byelile, nambitanu a mi yingisetanga. Ha yini mi djula ku tlhela mi swi twa? Na n’wine mo djula ku va vadondzrisiwa vake?” 28 Loko va twa leswo, va mu menula va mu byela va ku: “Wene u mudondzrisiwa wa wanuna lwiyani, kambe hine hi vadondzrisiwa va Moxe. 29 Ha swi tiva leswaku Xikwembu Nkulukumba a vulavule na Moxe, kambe wanuna lweyi leswaku a pfa kwini a hi swi tivi hine.” 30 Wanuna lweyi a a fe matihlo a va hlamula a ku: “Leswi swa ni hlamalisa, hikusa mi li a mi swi tivi leswaku a pfa kwini, kambe a ni pfule matihlo. 31 Ha swi tiva leswaku Xikwembu Nkulukumba a nga va yingiseti vadohi, kambe loko mhunu a txhava Xikwembu Nkulukumba a tlhela a yentxa ku zrandzra kwake, Xikwembu Nkulukumba awa mu yingiseta. 32 Ku sukela khale a ku ngi ngi sama ku twala leswaku ku ni lweyi a pfuliki matihlo ya mhunu lweyi a pswaliwiki na a fe matihlo. 33 Loko wanuna lweyi a a nga pfi ka Xikwembu Nkulukumba, a a nge ti kota ku yentxa ntxhumu nikutsrongo.” 34 Va mu hlamula va ku: “U pswaliwe na wu li mudohi, u nga hi dondzrisa yini?” Kutani va mu hlongola!

35 Yesu a twa leswaku va mu hlongolile, kutani loko a mu kuma, a ku: “Xana wa pfumela ka N’wana wa mhunu?” 36 Wanuna yelweyo a mu hlamula a ku: “Hosi, i mani N’wana wa mhunu akuva ni ta pfumela kwake?” 37 Yesu a mu byela a ku: “U mu vonile, nakunene hi yelweyi a vulavulaka na wene.” 38 Wanuna yelweyo a ku: “Hosi, na pfumela kwake.” A va a mu khinsamela. 39 Kutani Yesu a ku: “Ni te misaveni akuva mintxhumu leyi ni yi yentxaka, yi yentxa leswaku lava fiki matihlo va vona ni leswaku lava vonaka va fa matihlo.” 40 Loko a Vafarisi lava a va li kolanu va yingela leswo, va mu vutisa va ku: “U djula ku hlaya leswaku na hine hi fe matihlo?” 41 Yesu a va byela a ku: “Loko a me fa matihlo a mi nge ti va ni xidoho. Kambe leswi mi liki: ‘Ha vona.’ Mi tama mi va ni xidoho.”

10 “Kunene ni mi byela ntiyiso, lweyi a kalaka a nga ngheni hi nyangwa a xib’ayeni xa tihamba kambe a nghena hi mayentxela mambeni, lweyo i muyivi ni muwutli. 2 Kambe lweyi a nghenaka hi nyangwa hi yene a nga mubyisi wa tihamba. 3 A mulaviseli wa nyangwa awa mu pfulela, kutani a tihamba ti yingela zritu dzrake. A ti vitana hi mavito ya tone a va a ti byisa ti huma. 4 Ntsrhaku ka loko a humese tihamba hinkwatu, a zranga phambeni, tone ti mu landzra, hikusa ta dzri tiva zritu dzrake. 5 A ti nge ti txhuka ti landzra mhunu lweyi ti kalaka ti nga mu tivi kambe ti ta mu tsrutsruma hikusa a ti dzri tivi zritu dzrake.” 6 Yesu a va byele xifaniso lexi, kambe a va swi twisisanga leswi a a va byela swone.

7 Xileswo Yesu a tlhela a va byela a ku: “Kunene ni mi byela ntiyiso, mine ni nyangwa leyi tihamba ti nghenaka ha yone. 8 Hinkwavu lava buyiki va tiyentxa ingiki hi mine lavo i vayivi ni vawutli; kambe a tihamba a ti va yingisetanga. 9 Hi mine nyangwa; lweyi a nghenaka ha mine a ta huluxiwa, nakone a ta nghena a tlhela a huma, a va a kuma ni swakuda. 10 A muyivi o tela ku ta yiva, ku dlaya ni ku hohlota. Mine ni teli kuva tihamba ti kuma wutomi lebyi nga helikiki. 11 Ni mubyisi lwenene; a mubyisi lwenene a nyikela wutomi byake* hi kola ka tihamba. 12 A mubyisi lweyi a tholiwiki, lweyi a nga liki n’winyi wa tihamba, loko a vona mbyana ya nhova* na yi ta, a tsrhika tihamba a tsrutsruma kutani a mbyana yoleyo yi ti hlasela yi ti hangalasa; 13 hikusa i mhunu lweyi e ke tholiwa, nakone a nga na mhaka ni tihamba. 14 Ni mubyisi lwenene. Na ti tiva tihamba tanga na tone tihamba tanga ta ni tiva, 15 ku fana ni leswi Papayi a ni tivaka na mine na mu tiva Papayi; nakone ni nyikela wutomi byanga* hi kola ka tihamba.

16 “Ni ni tihamba tin’wana, leti ti nga liki ta xib’aya lexi, na tone ni fanela ku ti buyisa, ti ta yingela zritu dzranga kutani ti va ntlhambi wun’we, lowu nga ni mubyisi mun’we. 17 Hi leswo swi yentxaka leswaku Papayi a ni zrandzra, hikusa ni nyikela wutomi byanga* akuva ni ta tlhela ni byi kuma. 18 A nga kone lweyi a nga ni tekelaka byone, kambe ni byi nyikela hi ku swi zrandzra. Ni ni mfanelo ya ku byi nyikela, nakone ni ni mfanelo ya ku tlhela ni byi kuma. A nawu lowu ni wu kume ka Papayi.”

19 A Vayuda va tlheli va nga ha twanani hi mhaka ya mazritu lawa. 20 Vanyingi vavu a va ku: “A ni demona nakone awa hlanya. Ha yini mi mu yingiseta?” 21 Van’wana a va ku: “Lawa a hi mazritu ya mhunu lweyi a nga ni demona. Xana a demona dzri nga swi kota ku pfula matihlo ya vhanu lava fiki matihlo?”

22 Hi nkama wolowo a Yerusalema a ku ni Nkhuvu wa ku Khangula Tempele. A ku li wuxika, 23 nakone Yesu a a li ku fambeni a tempeleni a mbangwini lowu vitaniwaka Ndlela* ya Solomoni. 24 Kutani a Vayuda va tsrandzrela Yesu va sungula ku hlaya va ku: “Kasi ha yini u nga hi byeli leswaku hi wene mani? Loko u li Kriste, hi tlhamuxeli ha hombe.” 25 Yesu a va hlamula a ku: “Ni mi byelile kambe a mi kholwi. A mintizro leyi ni yi yentxaka hi vito dzra Papayi, yi nyikela wumboni bya leswaku hi mine mani. 26 Kambe a mi kholwi hikusa n’wine a mi tihamba tanga. 27 A tihamba tanga ta dzri yingiseta zritu dzranga, mine na ti tiva, nakone tone ta ni landzrela. 28 Ni ti nyika wutomi lebyi nga helikiki, nakone a ti nge ti txhuka ti suvisiwa, futsrhi a ku na mhunu lweyi a taka ti wutla a vokweni dzranga. 29 Leswi Papayi a ni nyikiki swone i swikulu ngopfu ku tlula mintxhumu yin’wana hinkwayu, nakone a nga kone lweyi a nga swi wutlaka a vokweni dzra Papayi. 30 Mine na Papayi hi ni wumun’we.”*

31 A Vayuda va tlhela va zrola mazribye akuva va mu khandla hi wone. 32 Kutani Yesu a ku: “Ni mi kombe mintizro yinyingi leyinene leyi pfaka ka Papayi. He wini ntizro lowu mi djulaka ku ni khandla hi mhaka ya wone?” 33 A Vayuda va mu hlamula va ku: “A hi djuli ku ku khandla hi mhaka ya ntizro lowunene; kambe hi mhaka ya ku yeyisa Xikwembu Nkulukumba, hikusa nambileswi u nga mhunu u tiyentxa xikwembu.” 34 Yesu a va hlamula a ku: “Xana a swi tsraliwanga a Nawini wenu leswaku: ‘Ni te: “N’wine mi swikwembu”’?* 35 Loko Xikwembu Nkulukumba a va vitane ‘swikwembu’ lava kawukiwiki hi Zritu dzrake, nakasi a Matsralwa a ma nge txintxiwi, 36 ha yini mi byela mine ni xwengisiwiki hi Papayi nakone ni zrumiwiki ha yene a misaveni mi ku: ‘U yeyisa Xikwembu Nkulukumba’, hi mhaka ya leswi ni tiki: ‘Ni N’wana wa Xikwembu Nkulukumba’? 37 Loko a li leswaku a ni yentxi mintizro ya Papayi, mi nga ni kholwi. 38 Kambe loko a li leswaku ni yentxa mintizro yake, nambiloko mi nga kholwi kwanga, kholwani ka leswi ni swi yentxaka, akuva mi ta swi tiva ni ku ya mahlweni mi kholwa leswaku Papayi a ni wumun’we na mine na mine ni ni wumun’we na Papayi.” 39 Xileswo va tlhela va dzringisa ku mu khoma kambe Yesu a phonyoka.

40 Kutani a tlhela a tsremakanya Yordani a ya lomu Yohane a a babatisela kone a ku sunguleni, a tlhasa a tsrhama kone. 41 Hiloko a yeliwa hi vhanu vavanyingi na va byelana va ku: “Yohane a nga yentxanga hlolana ni dzrin’we, kambe hinkwaswu leswi a swi hlayiki mayelanu ni wanuna lweyi i ntiyiso.” 42 Kutani vanyingi va va ni lipfumelo kwake.

11 A ku ni wanuna wa kukazri lweyi a a vabya, lweyi a a vitaniwa Lazaru; a a li wa le Betaniya, ku nga xidoropana lexi Mariya ni makwavu Marta a va tsrhama ka xone. 2 Mariya lweyi, hi lweyi a txheliki Hosi mafuzra ya ku nun’hwela a tlhela a yi sula minkondzro hi misisi yake; Lazaru lweyi a a vabya a a li makwavu. 3 Xileswo, vamakwavu va Lazaru va xisati va zrumela dzrungula ka Yesu va ku: “Hosi, lweyi u mu zrandzraka awa vabya.” 4 Kambe loko Yesu a twa leswo, a ku: “A nkongometo wa mavabyi lawa a hi lifu, kambe i kuva ku dzrumisiwa Xikwembu Nkulukumba, akuva a N’wana wa Xikwembu Nkulukumba a twalisiwa ha wone.”

5 Yesu a a zrandzra Marta, Mariya na Lazaru. 6 Nambitanu loko a twe leswaku Lazaru awa vabya, a tame a tsrhama lomu a a li kone ku dzringana masiku mabidzri. 7 Ntsrhaku ka masiku wolawo mabidzri, Yesu a byela vadondzrisiwa vake a ku: “A hi tlheleni hi ya Yudeya.” 8 A vadondzrisiwa va ku: “Rabi, swoswinyana a vhanu va le Yudeya a va djula ku ku khandla hi mazribye, u djula ku tlhela u ya kone futsrhi?” 9 Yesu a va hlamula a ku: “Xana a dambu a dzri vaningi 12 wa mawora hi siku? Loko mhunu a famba na dambu dzri vaninga a nga wisiwi hi ntxhumu hikusa a vona livaningu dzra misava leyi. 10 Kambe loko mhunu a famba wusikwini awa wa hikusa a nga na livaningu.”

11 Ntsrhaku ka loko a hlaye mintxhumu leyi, Yesu a tlhele a ku: “Munghanu wezru Lazaru a yetlelile kambe ni ya kohala akuva ni ya mu pfuxa.” 12 Kutani a vadondzrisiwa va mu byela va ku: “Hosi, loko a li leswaku a yetlelile, swi ta mu yampswela.” 13 Yesu a a hlaya leswaku Lazaru a file. Kambe vone a va pimisa leswaku a hlaya ku yetlela wuzrongo. 14 Kutani Yesu a va khanyisela a ku: “Lazaru a file, 15 nakone na nyonxa hi leswi ni kalaka ni nga vanga kone hala, hikusa leswi ni taka swi yentxa swi ta tiyisa lipfumelo dzrenu. A hi fambeni lomu a nga kone.” 16 Xileswo, Tomasi lweyi a a vitaniwa Hahla, a byela vadondzrisiwakulobye a ku: “Na hine a hi fambeni akuva hi ta fa na yene.”

17 Loko Yesu a tlhasa, a kuma leswaku a ku khaluta mune wa masiku na Lazaru a lahliwile.* 18 A Betaniya a ku li kusuhi ni Yerusalema, a ku siyana hi mpfhuka wa kolomu ka makilometru mazrazru.* 19 A Vayuda vanyingi a va tile akuva va ta txhavelela Marta na Mariya hi mhaka ya leswi a va luzekeliwe hi makwavu. 20 Loko Marta a twa leswaku Yesu a le ku teni, a mu tlhangaveta, kambe Mariya a sala kaya. 21 Kutani Marta a byela Yesu a ku: “Hosi, loko a wu li kone lani, makwezru inaka a nga fanga. 22 Kambe nambi ku li swoswi, na tiyiseka leswaku xin’wana ni xin’wana lexi u xi kombelaka ka Xikwembu Nkulukumba a ta ku nyika xone.” 23 Yesu a mu byela a ku: “Makwenu a ta pfuka.” 24 Marta a ku: “Na swi tiva leswaku a ta pfuka a ku pfuxiweni ka vafi hi siku dzra wugamu.” 25 Yesu a mu byela a ku: “Hi mine ku pfuka ni wutomi. Lweyi a kombisaka lipfumelo kwanga, nambiloko a fa a ta pfuka; 26 futsrhi mun’wana ni mun’wana lweyi a hanyaka nakone a kombisaka lipfumelo kwanga a nge ti txhuka a fa. Xana wa swi kholwa leswo?” 27 Marta a mu hlamula a ku: “Ina Hosi, na kholwa leswaku u Kriste N’wana wa Xikwembu Nkulukumba, lweyi a a fanela ku ta a misaveni.” 28 Ntsrhaku ka loko Marta a hlaye leswo, a famba a ya vitana Mariya, a tlhasa a mu hlevetela a ku: “Mudondzrisi a tlhasile nakone awa ku vitana.” 29 Loko a twa leswo, a sekeleka hi ku kahlula a mu yela.

30 Yesu a a nga si na nghena xidoropanini, kambe a a ha li lani Marta a mu kumiki kone. 31 Loko a Vayuda lava a va txhavelela Mariya a ndlwini va mu vona a sekeleka hi ku kahlula a huma, va mu landzra, na va pimisa leswaku a ya sizreni a ya dzrila kone. 32 Loko Mariya a tlhasa lani Yesu a a li kone kutani a mu vona, a wela minkondzrweni yake a ku: “Hosi, loko a wu li kone lani, makwezru inaka a nga fanga.” 33 Loko Yesu a vona Mariya na a dzrila kun’we ni Vayuda lava a va te na yene na va dzrila, a tlhaveka ngopfu swinene a mbilwini yake* a tlhela a kazrateka. 34 A va vutisa a ku: “Mi mu lahle kwini?” Va mu hlamula va ku: “Hosi, a hi fambi u ya ku vona.” 35 Yesu a sungula ku dzrila. 36 Xileswo a Vayuda va ku: “Vonani leswi a a mu zrandzrisa xiswone!” 37 Kambe van’we vavu va ku: “Wanuna lweyi a kote ku pfula matihlo ya mhunu lweyi a a nga voni, kutani ha yini a hluleke ku sivela leswaku Lazaru a nga fi?”

38 Yesu a tlhela a tlhaveka mbilwini, a gama a ya sizreni. A sizra dzra kone a ku li mhakwa nakone a wu pfaliwe hi zribye. 39 Yesu a ku: “Susani zribye.” Marta makwavu wa mufi a ku: “Hosi, a nkama lowu awa nun’hwa, hikusa kutani ku khaluta mune wa masiku na a file.” 40 Yesu a mu byela a ku: “A ni ku byelanga leswaku loko u pfumela u ta vona wukulu bya Xikwembu Nkulukumba?” 41 Xileswo va susa zribye. Kutani Yesu a tlakuxa matihlo a langusa tilweni a ku: “Papayi, na ku tlangela hikusa u ni yingelile. 42 Nakunene, na swi tiva leswaku minkama hinkwayu wa ni yingela; kambe ni hlaya leswo hi mhaka ya xitsrhungu lexi yimiki lani, akuva xi ta kholwa leswaku u ni zrumile.” 43 Ntsrhaku ka loko a hlaye leswo, a huwelela hi zritu dzra ku tlakuka a ku: “Lazaru, huma handle!” 44 Wanuna lweyi a a file a huma handle na minkondzro yake ni mavoko yake swi tsrondzriyeliwile, nakone a wuso byake a byi tsrondzriyeliwe hi panu. Yesu a va byela a ku: “Mu tlhantlhelelani mi mu tsrhika a famba.”

45 Kutani a Vayuda vanyingi lava yeliki Mariya nakone va voniki leswi Yesu a swi yentxiki, va ve ni lipfumelo kwake, 46 kambe van’we vavu va suke va yela Vafarisi va ya va byela leswi Yesu a swi yentxiki. 47 Xileswo, a vaprista lavakulu ni Vafarisi va hlengeleta Sanedri, kutani va ku: “Hi ta yentxa yini leswi wanuna lweyi a yentxaka mahlolana manyingi? 48 Loko hi mu tsrhika a tama a yentxetela leswi, hinkwavu va ta va ni lipfumelo kwake, nakone a Varoma va ta hi tela va ta hi tekela mbangu* wezru ni tiko dzrezru.” 49 Kambe Kayafasi lweyi a a li mun’we wavu nakone a a li muprista lwenkulu lembe ledzro, a va byela a ku: “N’wine a mi tivi ntxhumu nikutsrongo, 50 nakone a mi swi voni leswaku swi ta pfuna n’wine kuva mhunu mun’we a fela vhanu a matsrhan’wini ya kuva tiko hinkwadzru dzri helisiwa.” 51 Nambitanu, leswo a nga swi hlayanga hi ku tisungulela, kambe leswi a a li muprista lwenkulu lembeni ledzro, Xikwembu Nkulukumba a mu tizrisile akuva a profeta leswaku Yesu a a ta fela tiko, 52 nakone a a nga ti fela tiko ntsena kambe a a ta tlhela a hlengeleta vana va Xikwembu Nkulukumba lava a va hangalakile. 53 Xileswo, ku sukela ka siku dzroledzro va kunguhata ku mu dlaya.

54 Hi mhaka ya leswo, Yesu a nga ha tlhelanga a fambafamba xikazri ka Vayuda, kambe a suke a ya mugangeni lowu kumekaka kusuhi ni mananga, a doropeni ledzri vitaniwaka Efrayimi, a tlhasa a tsrhama kone ni vadondzrisiwa vake. 55 A Paxkwa dzra Vayuda a dzri li kusuhi, kutani vhanu vanyingi lava a va tsrhama ntlhaveni va tlhantukele a Yerusalema akuva va ya tibasisa hi ku landzra Nawu wa Moxe na Paxkwa dzri nga si na sungula. 56 A va djuletela Yesu, nakone na va le tempeleni a va vutisana va ku: “Mi swi vonisa kuyini? Mi yanakanya leswaku a nge ti ta nkhubyini?” 57 Kambe a vaprista lavakulu ni Vafarisi a va humese nawu wa leswaku loko mhunu wa kukazri a txhuka a tiva lomu Yesu a nga kone, a fanela ku swi hlaya, akuva va ta mu khoma.

12 Na ka ha sali 6 wa masiku akuva ku va ni Paxkwa, Yesu a tlhasa Betaniya, lomu Lazaru lweyi Yesu a mu pfuxiki ku feni a a tsrhama kone. 2 Xileswo va mu lulamiselela swakuda, nakone Marta hi yene a a va phamela, kambe Lazaru a a li mun’we wa lava a va li ku deni* na yene. 3 Kutani Mariya a teka hamfu ya litru dzra mafuzra ya ku nun’hwela, lawa a ma hambiwe hi narda dzra dzrinene ya ku dula ngopfu swinene, a txhela Yesu a minkondzrweni a gama a mu sula hi misisi yake. A yindlu hinkwayu yi sungula ku nun’hwela mafuzra wolawo. 4 Kambe Yudasi Iskariyota, mun’we wa vadondzrisiwa vake lweyi a a li kusuhi ni ku mu wonga, a ku: 5 “Ha yini mafuzra lawa ya ku nun’hwela ma nga xavisiwanga hi 300 wa madenari kutani ma nyikiwa swisiwana?” 6 A a nga hlayi leswo hi leswaku a o va ni mhaka ni swisiwana, kambe hi leswi a a li muyivi, hi yene a a tamela kaxa dzra mali nakone a a tsrhamela ku yiva mali leyi a yi petiwa ka dzrone. 7 Kutani Yesu a ku: “Tsrhikani wansati lweyi a yentxa leswi akuva a lulamisela siku dzra ku lahliwa kwanga. 8 Hikusa a swisiwana mi tsrhama na swone minkama hinkwayu, kambe mine a mi nge ti va na mine minkama hinkwayu.”

9 Hi nkama wolowo, xitsrhungu lexikulu xa Vayuda xi tiva leswaku Yesu a le Betaniya, kutani xi famba ku nga li ntsena kuva xi ya vona Yesu kambe na Lazaru, lweyi Yesu a a mu pfuxe ku feni. 10 Kutani a vaprista lavakulu va hamba makungu ya ku dlaya na Lazaru, 11 hikusa Vayuda vanyingi a va ya Betaniya hi mhaka yake va va va kombisa lipfumelo ka Yesu.

12 Hi mundzruku ka kone, a xitsrhungu lexikulu lexi a xi li nkhubyini a Yerusalema xi twa leswaku Yesu a a li ku teni. 13 Hiloko xi teka swiphundla swa minkindzru xi huma xi mu tlhangaveta, kutani xi sungula ku huwelela xi ku: “Ha ku khongota, a a huluxiwe! Yi tovokile Hosi ya Israyele leyi taka hi vito dzra Yehovha!” 14 Loko Yesu a kuma ximbongolwana, a khwela ka xone, hi lani swi tsraliwiki ha kone: 15 “U nga txhavi, n’hwanyana wa Siyoni. A Hosi yaku ya ta, yi khwele henhla ka ximbongolwana.” 16 A ku sunguleni a vadondzrisiwa vake a va yi twisisanga mintxhumu leyi, kambe loko Yesu a tlakuxiwa, va dzrimuka leswaku mintxhumu leyo a yi tsraliwile mayelanu na yene ni leswaku swi yentxekile kwake.

17 Kutani a xitsrhungu lexi a xi li na yene loko a vitana Lazaru a huma sizreni a mu pfuxa ku feni, xi ya mahlweni xi dzrungulela van’wana leswi yentxekiki. 18 Leswi i swin’wana swa leswi yentxiki leswaku a xitsrhungu xi mu tlhangaveta, hikusa xi twe leswaku a yentxe hlolana ledzri. 19 Xileswo a Vafarisi va byelana va ku: “Ma swi vona leswaku a swi hi yisi mbangu. A misava hinkwayu yi landzrela yene.”

20 Ka lava a va ye ku gandzreleni a nkhubyini a ku ni ni Vagriki. 21 Kutani va tsrhindzrekelela Filipi, lweyi a a li wa Betsaida wa le Galileya, va sungula ku mu kombela va ku: “Nkulukumba, hi djula ku vona Yesu.” 22 Filipi a ya byela Andreya. Kutani hi wubidzri byavu va ya byela Yesu.

23 Kambe Yesu a va hlamula a ku: “A nkama wa leswaku N’wana wa mhunu a tlakuxiwa wu tlhasile. 24 Kunene ni mi byela ntiyiso, loko mbewu ya trigu yi nga weli misaveni yi fa, yi tama yi va mbewu yin’we; kambe loko yi fa, hi kone yi pswalaka mihandzru yinyingi. 25 Lweyi a zrandzraka wutomi byake* a ta lahlekeliwa hi byone, kambe lweyi a vengaka wutomi byake a misaveni leyi a ta byi hlayisela wutomi lebyi nga helikiki. 26 Loko mhunu a djula ku ni tizrela, a a ni landzreli, nakone lomu ni nga kone, na yene a ta va kone. Loko mhunu a djula ku ni tizrela, Papayi a ta mu tovokisa. 27 Ni kazratekile,* ni ta ku yini? Papayi, ni huluxi ka nkama lowu. Nambitanu, hi swoleswi ni teliki swone. 28 Papayi, twalisa vito dzraku.” Kutani ku twala zritu ledzri pfaka hi le tilweni dzri ku: “Ni dzri twalisile nakone ni ta tlhela ni dzri twalisa.”

29 A xitsrhungu lexi a xi yime kolanu xi swi yingela kutani xi sungula ku hlaya leswaku a tilo dzri dzrumile. Van’wana va ku: “I ntsrumi yi vulavuliki na yene.” 30 Yesu a hlamula a ku: “A zritu ledzro a dzri twalanga hi mhaka yanga, kambe hi mhaka yenu. 31 Swoswi a misava leyi yi le ku yavanyisiweni; nakone a mufumi wa yone a ta hlongoliwa. 32 Kambe loko ni ta va ni hayekiwe mhandzrini, ni ta kokela vhanu va mixaka hinkwayu kwanga.” 33 Nakunene a a hlaya leswo akuva a kombisa ndlela leyi a a li kusuhi ni ku fa ha yone. 34 Kutani a xitsrhungu xi mu hlamula xi ku: “A Nawu wu hlaya leswaku Kriste a ta tsrhama hi lani ku nga helikiki. Ha yini u hlaya leswaku a N’wana wa mhunu a fanela ku hayekiwa a mhandzrini? Kasi N’wana yelweyo wa mhunu i mani?” 35 Xileswo Yesu a va byela a ku: “A livaningu dzra ha ta va na n’wine ku dzringana nkamanyana. Fambani na ma ha ni livaningu, akuva mi nga hluliwi hi munyama; lweyi a nga munyameni a nga ku tivi lomu a yaka kone. 36 Na ma ha ni livaningu, kombisani lipfumelo ka livaningu akuva mi ta va vana va livaningu.”

Ntsrhaku ka loko Yesu a hlaye mintxhumu leyo a suka a famba a ya tumbela. 37 Nambileswi a a yentxe mahlolana ya manyingi ngopfu a mahlweni kwavu, a va kombisanga lipfumelo kwake, 38 akuva ku hetiseka mazritu ya muprofeta Ezaya, lweyi a tiki: “Yehovha, i mani lweyi a kombisiki lipfumelo ka mintxhumu leyi a yi yingeliki kwezru?* Nakone i mani lweyi a kombiwiki ntamu wa voko dzra Yehovha?” 39 Ezaya a tlhele a hlaya xivangelo lexi va yentxiki va nga pfumeli, a ku: 40 “A va pfale matihlo a tlhela a tlanyalisa timbilu tavu, leswaku va nga voni hi matihlo yavu ni ku twisisa hi timbilu tavu xileswo va ndzruluka, kutani mine ni va daha.” 41 Ezaya a hlaye mintxhumu leyi hi leswi a voniki ku phatima kwake, kutani a vulavula hi yene. 42 Vhanu vanyingi nambi ku li vafumi va ve ni lipfumelo kwake, kambe a va nga swi hlayi hi mhaka ya leswi a va txhava ku hlongoliwa a sinagogeni hi Vafarisi; 43 hikusa a va zrandzra ngopfu ku twalisiwa hi vhanu ku tlula ku twalisiwa hi Xikwembu Nkulukumba.

44 Nambitanu, Yesu a huwelela a ku: “Lweyi a pfumelaka kwanga a pfumela ni ka lweyi a ni zrumiki; 45 nakone lweyi a ni vonaka a vona ni Lweyi a ni zrumiki. 46 Ni te swanga livaningu a misaveni, akuva mun’wana ni mun’wana lweyi a kombisaka lipfumelo kwanga a nga tami a va munyameni. 47 Kambe loko mhunu a twa mazritu yanga a gama a nga ma yentxi, a ni mu yavanyisi; hikusa a ni telanga ku ta yavanyisa misava, kambe ni teli ku ta yi huluxa. 48 Lweyi a ni dzrelaka nakone a kalaka a nga ma yamukeli mazritu yanga ku ni lweyi a taka mu yavanyisa. A mazritu lawa ni ma hlayiki hi wone ma taka mu yavanyisa hi siku dzra wugamu. 49 Hikusa a ni vulavulanga hi ku tisungulela, kambe Papayi lweyi a ni zrumiki, yene ha byake a ni byele* leswi ni fanelaka ku swi hlaya ni ku swi dondzrisa. 50 Nakone na swi tiva leswaku leswi a ni byeliki* swone swi hlaya wutomi lebyi nga helikiki. Xileswo hinkwaswu leswi ni swi hlayaka, ni swi hlaya hi lani Papayi a ni byeliki ha kone.”

13 Na nkhuvu wa Paxkwa wu nga si na sungula Yesu a a swi tiva leswaku nkama wake wu tlhasile wa kuva a suka lani misaveni a ya ka Papayi wake, kutani leswi a a zrandzra valandzreli vake lava a va li lani misaveni, a tame a va zrandzra ku ya tlhasa wugamu. 2 Na va li ku laleleni, Diyavulosi a a beke miyanakanyu ya ku wonga Yesu a mbilwini ya Yudasi Iskariyota n’wana wa Simoni. 3 Xileswo, Yesu hi ku tiva leswaku Papayi a beke mintxhumu hinkwayu a mavokweni yake ni leswaku a a pfa hi ka Xikwembu Nkulukumba nakone a a ya ka Xikwembu Nkulukumba, 4 a sekeleka a suka menzeni a susa xiyambalu xake, kutani a teka thawula a tikhama masenge ha dzrone. 5 Ntsrhaku ka leswo, a txhela mati ka basiya kutani a sungula ku hlampswa minkondzro ya vadondzrisiwa a tlhela a yi womisa hi thawula ledzri a a tikhame ha dzrone. 6 Loko a tlhasa ka Simoni Petro, yene a ku: “Hosi, u djula ku ni hlampswa minkondzro?” 7 Yesu a mu hlamula a ku: “Leswi ni swi yentxaka a wu swi twisisi swoswi, kambe u ta swi twisisa hi ku famba ka nkama.” 8 Petro a mu byela a ku: “A ni nge ti txhuka ni ku pfumelela u ni hlampswa minkondzro.” Yesu a mu hlamula a ku: “Loko ni nga ku hlampswi, a wu nge ti va na mine.” 9 Simoni Petro a mu byela a ku: “Hosi, u nga ni hlampswi minkondzro ntsena kambe ni hlampswi ni mavoko ni nhloko.” 10 Yesu a mu hlamula a ku: “Lweyi a hlambiki swo djula a hlampswa minkondzro ntsena, hikusa a mizri wake wu basile. N’wine mi basile, kambe a hi hinkwenu.” 11 Leswi swi mu yentxiki a ku: “A hi hinkwenu mi basiki”, hi leswaku a a mu tiva lweyi a a ta mu wonga.

12 Kutani loko a gamile ku va hlampswa minkondzro a va a yambala xiyambalu xake, a tlhela a ya tsrhama menzeni a gama a va vutisa a ku: “Ma swi twisisa leswaku ha yini ni mi hlampswe minkondzro? 13 N’wine mi ni vitana ‘Mudondzrisi’ ni ‘Hosi’, nakone mi tiyisile, hikusa ni yene. 14 Xileswo, loko mine Hosi tlhelo Mudondzrisi, ni mi hlampswe minkondzro, na n’wine mi fanela ku hlampswana minkondzro. 15 Hikusa ni mi bekele xikombiso, akuva leswi ni mi yentxeliki swone, na n’wine mi swi yentxa. 16 Ni mi byela ntiyiso, a nandzra a nga mu tluli n’winyi wake, nambi lweyi a zrumiwiki a nga mu tluli lweyi a mu zrumiki. 17 Leswi mi tivaka mintxhumu leyi, mi ta nyonxa loko mi yi yentxa. 18 A ni hlayi hinkwenu, na va tiva lava ni va hlawuliki. Kambe leswi swi yentxeke akuva ku hetiseka tsralwa ledzri liki: ‘Lweyi a a da pawu na mine a ni djikelile.’* 19 Ku sukela swoswi, na mi byela na swi nga si na yentxeka, akuva loko swi yentxeka mi ta kholwa leswaku hi ye mine. 20 Kunene ni mi byela ntiyiso, lweyi a yamukelaka lweyi ni mu zrumaka na mine awa ni yamukela, nakone lweyi a ni yamukelaka a yamukela ni Lweyi a ni zrumiki.”

21 Ntsrhaku ka ku hlaya mintxhumu leyi, Yesu a kazrateka ngopfu, kutani a ku: “Kunene na mi byela, mun’we wenu a ta ni wonga.” 22 A vadondzrisiwa va sungula ku lavisana na va tivutisa leswaku a nga va a hlaya mani. 23 Mun’we wa vadondzrisiwa lweyi Yesu a a mu zrandzra, a a tsrhame kusuhi na* Yesu. 24 Xileswo Simoni Petro a kwehleta mudondzrisiwa yelweyo a ku: “Hi byeli leswaku a hlaya mani.” 25 Kutani mudondzrisiwa yelweyo a khigetela xifuveni xa Yesu a mu vutisa a ku: “Hosi, i mani lweyi u hlayaka yene?” 26 Yesu a hlamula a ku: “Hi lweyi ni taka mu nyika pawu ledzri ni taka dzri txovela ka tijela.” Xileswo ntsrhaku ka loko a dzri txovelile, a dzri teka a nyika Yudasi n’wana wa Simoni Iskariyota. 27 Ntsrhaku ka loko Yudasi a yamukele pawu, Sathana a nghena mbilwini yake. Xileswo Yesu a byela Yudasi a ku: “Leswi u swi yentxaka, swi yentxi hi ku kahlula.” 28 Nambitanu, a nga kone ni mun’we ka lava a va tsrhame menzeni lweyi a swi tiviki leswaku ha yini a mu byele leswo. 29 Nakunene, van’we a va yanakanya leswaku leswi Yudasi a a li yene lweyi a a khoma kaxa dzra mali, Yesu a o mu byela a ku: “Xava leswi hi taka swi vilela ka nkhuvu”, kumbe leswaku a a fanela ku nyika swisiwana mintxhumu ya kukazri. 30 Xileswo, ntsrhaku ka loko a yamukele pawu, a hume hi ku kahlula. Nakone a dzri pelile.

31 Kutani ntsrhaku ka loko a humile, Yesu a ku: “Swoswi N’wana wa mhunu awa twalisiwa, nakone Xikwembu Nkulukumba awa twalisiwa hi mhaka yake. 32 Xikwembu Nkulukumba ha byake a ta mu twalisa, nakone a ta mu twalisa hi ku kahlula. 33 Vananga, na ha na n’wine ku dzringana nkamanyana. Mi ta ni djuletela; nakone hi lani ni byeliki Vayuda ha kone ni ku: ‘Lomu ni yaka kone a mi nge yi’, na n’wine swoswi ni mi byela swoswo. 34 Ni mi nyika nawu lowumpshwa, wa leswaku mi zrandzrana; ku fana ni leswi mine ni mi zrandzriki, na n’wine zrandzrananani. 35 Hinkwavu va ta swi tiva leswaku mi vadondzrisiwa vanga loko mi zrandzrana.”

36 Simoni Petro a ku: “Hosi, u ya kwini?” Yesu a mu hlamula a ku: “Lomu ni yaka kone, a wu nge ni landzri swoswi, kambe hi ku famba ka nkama u ta ni landzra.” 37 Petro a ku: “Hosi, ha yini swi nga koteki ku va ni ku landzra swoswi? Ni tiyimiseli ku ku fela.” 38 Yesu a mu hlamula a ku: “U li u tiyimiseli ku ni fela? Kunene na ku byela, na nkuku wu nga si na yimba u ta ni landzrula kazrazru.”

14 “Mi nga kazrateki. Kombisani lipfumelo ka Xikwembu Nkulukumba, mi tlhela mi kombisa lipfumelo ni kwanga. 2 A ndlwini ka Papayi wanga ku ni mimbangu yinyingi ya ku tsrhama ka yone. Loko a swi nga li tanu inaka ni mi byelile, hikusa na famba akuva ni ya mi lulamiselela mbangu. 3 Nakone loko ni famba ni ya mi lulamiselela mbangu, ni ta tlhela ni buya ni ta mi teka akuva lani ni taka va kone na n’wine mi va kone. 4 N’wine ma yi tiva ndlela ya lomu ni yaka kone.”

5 Tomasi a ku: “Hosi, a hi ku tivi lomu u yaka kone. Kutani hi ta yi tivisa kuyini ndlela ya kone?”

6 Yesu a mu byela a ku: “Hi mine ndlela ni ntiyiso ni wutomi. A nga kone lweyi a nga yaka ka Papayi loko ku nga li ha mine. 7 Loko a mi ni tiva, na yene Papayi a mi ta mu tiva; ku sukela swoswi ma mu tiva nakone mi mu vonile.”

8 Filipi a mu byela a ku: “Hosi, hi kombe Papayi, kwezru swi ta va swi dzringanile.”

9 Yesu a mu byela a ku: “Nambileswi ni nga ni nkama wunyingi na ni tsrhama na n’wine, a wu si na ni tiva Filipi? Lweyi a ni voniki a vone na Papayi. U hlayisa kuyini u ku: ‘Hi kombe Papayi’? 10 Xana a wu kholwi leswaku ni ni wumun’we na Papayi nakone Papayi a ni wumun’we na mine? Leswi ni mi byelaka swone a ni swi hlayi hi ku tisungulela, kambe Papayi lweyi a tamaka a va ni wumun’we na mine hi yene a ni tizrisaka akuva ni yentxa mintizro yake. 11 Swi kholwani leswi ni mi byelaka swone leswaku ni ni wumun’we na Papayi nakone Papayi a ni wumun’we na mine; kumbe mi kholwa hi ku vona mintizro leyi ni yi yentxaka. 12 Kunene ni mi byela ntiyiso, lweyi a kombisaka lipfumelo kwanga na yene a ta yentxa mintizro leyi ni yi yentxaka; futsrhi a ta yentxa mintizro ya yikulu ku tlula leyi, hikusa na famba ni ya ka Papayi. 13 Nakone xin’wana ni xin’wana lexi mi xi kombelaka hi vito dzranga, ni ta xi yentxa, akuva Papayi a ta twalisiwa hi kola ka N’wana. 14 Loko mi kombela ntxhumu hi vito dzranga, ni ta wu yentxa.

15 “Loko mi ni zrandzra, mi ta yingiseta milawu yanga. 16 Nakone ni ta kombela Papayi kutani a ta mi nyika mupfunisi* mun’wana akuva a va na n’wine hi lani ku nga helikiki, 17 ku nga moya wa ku xwenga lowu paluxaka ntiyiso, lowu a misava yi nga tiki wu yamukela, hikusa a yi ngi ngi wu vona nambi ku wu tiva. N’wine ma wu tiva, hikusa wu na n’wine nakone wu tsrhama na n’wine. 18 A ni nge ti mi tsrhika wuswenu.* Ni ta tlhela ni mi tela. 19 Ntsrhaku ka nkamanyana a misava yi nge he ti ni vona, kambe n’wine mi ta ni vona, hikusa na hanya na n’wine mi ta hanya. 20 Hi siku ledzro mi ta swi tiva leswaku ni ni wumun’we na Papayi ni leswaku mi ni wumun’we na mine nakone mine ni ni wumun’we na n’wine. 21 Lweyi a yamukelaka milawu yanga a tlhela a yi yingiseta hi yene lweyi a ni zrandzraka. Kutani lweyi a ni zrandzraka a ta zrandzriwa hi Papayi wanga nakone mine ni ta mu zrandzra ni tlhela ni tikombekisa hi ku helela a mahlweni kwake.”

22 Yudasi (ku nga li Yudasi Iskariyota) a mu vutisa a ku: “Hosi, ke yentxeka yini a ku za u djula ku tikombekisa a mahlweni kwezru hi ku helela ku nga li ka misava?”

23 Yesu a mu hlamula a ku: “Loko mhunu a ni zrandzra a ta yingiseta zritu dzranga, nakone Papayi wanga a ta mu zrandzra, kutani hi ta mu tela hi ta tsrhama na yene. 24 Lweyi a kalaka a nga ni zrandzri a nga ma yingiseti mazritu yanga. A zritu ledzri mi dzri yingelaka a hi dzranga, kambe i dzra Papayi, lweyi a ni zrumiki.

25 “Ni mi byele mintxhumu leyi na na ha li na n’wine. 26 Kambe a mupfunisi, ku nga moya wa ku xwenga lowu Papayi a taka wu zrumela hi vito dzranga, a ta mi dondzrisa mintxhumu hinkwayu a tlhela a mi dzrimuxa hinkwaswu leswi ni mi byeliki swone. 27 Ni mi siyela ku zrula; ni mi nyika ku zrula kwanga. A ni mi nyiki ku zrula hi ndlela leyi misava yi ku nyikelaka ha yone. Mi nga kazrateki nambi ku txhava. 28 Mi swi twile leswaku ni mi byele ni ku: ‘Na famba nakone ni ta tlhela ni mi buyela.’ Loko a mi ni zrandzra, a mi ta nyonxa hi leswi ni yaka ka Papayi, hikusa Papayi i mukulu kwanga. 29 Xileswo ni mi byele na swi nga si na yentxeka, akuva loko swi yentxeka mi kholwa. 30 A ni nge he vulavuli swinyingi na n’wine, hikusa a mufumi wa misava awa ta, kambe a nga na ntamu ku ni tlula. 31 Nambitanu, akuva misava yi swi tiva leswaku na mu zrandzra Papayi, ni yentxa hi lani Papayi a ni leletiki ha kone. Sekelekani hi suka lani.

15 Mine ni nsinya wa mawuvha wa ntiyiso, nakone a mudzrimi i Papayi wanga. 2 Zrwavi dzrin’wana ni dzrin’wana ledzri nga kwanga ledzri nga pswalikiki mihandzru awa dzri tsrema, a va a basisa hinkwawu lawa ma bekaka mihandzru, akuva ma pswala mihandzru ya yinyingi. 3 N’wine kutani mi basile, hi mhaka ya zritu ledzri ni mi byeliki dzrone. 4 Tamani mi va ni wumun’we na mine, kutani na mine ni ta tama ni va ni wumun’we na n’wine. Ku fana ni leswi zrwavi dzri nga swi kotikiki ku pswala mihandzru loko dzri nga li nsinyeni wa mawuvha, na n’wine a mi nge swi koti loko mi nga tami mi va ni wumun’we na mine. 5 Mine ni nsinya wa mawuvha, n’wine mi mazrwavi. Lweyi a tamaka a va ni wumun’we na mine na mine ni va ni wumun’we na yene, lweyo a pswala mihandzru ya yinyingi; hikusa loko mi tsravukana na mine a mi nge koti ku yentxa ntxhumu nikutsrongo. 6 Loko mhunu a nga tami a va ni wumun’we na mine, a ta fana ni zrwavi ledzri tsremiwaka dzri gama dzri woma. A vhanu va hlengeleta mazrwavi wolawo va ma txhela ndzrilweni ma pshwa. 7 Loko mi tama mi va ni wumun’we na mine nakone mazritu yanga ma tsrhama timbilwini tenu, kombelani xin’wana ni xin’wana lexi mi xi djulaka kutani mi ta yentxeliwa xone. 8 Papayi wanga awa twalisiwa loko mi tama mi pswala mihandzru ya yinyingi mi tlhela mi kombisa leswaku mi vadondzrisiwa vanga. 9 Ku fana ni leswi Papayi a ni zrandzraka, na mine na mi zrandzra; hanyani hi ndlela leyi taka yentxa leswaku ni tama ni mi zrandzra.* 10 Loko mi yingiseta milawu yanga, ni ta tama ni mi zrandzra, ku fana ni leswi ni yingisetaka milawu ya Papayi kutani a tama a ni zrandzra.

11 “Ni mi byele leswi akuva mi va ni ku nyonxa loku ni nga na kone kutani a ku nyonxa kwenu ku va loku heleliki. 12 A nawu wanga hi lowu: Zrandzrananani hi lani mine ni mi zrandzriki ha kone. 13 A nga kone lweyi a nga ni lizrandzru dzra dzrikulu dzra ku tlula ledzri, dzra kuva mhunu a nyikela wutomi byake* hi kola ka vanghanu vake. 14 Loko mi yentxa leswi ni mi byelaka* swone, mi ta va vanghanu vanga. 15 A na ha mi vitani malandzra, hikusa a nandzra a nga swi tivi leswi n’winyi wake a swi yentxaka. Kambe ni mi vitana vanghanu vanga, hikusa ni mi byele hinkwaswu leswi Papayi a ni byeliki swone. 16 A hi n’wine mi ni hlawuliki, kambe hi mine ni mi hlawuliki, akuva mi tama mi pswala mihandzru nakone mihandzru yoleyo yi tsrhama hi lani ku nga helikiki, ku yentxela leswaku xin’wana ni xin’wana lexi mi xi kombelaka ka Papayi hi vito dzranga, a mi nyika xone.

17 “Ni mi byela* mintxhumu leyi akuva mi zrandzrana. 18 Loko misava yi mi nyenya, swi tivani leswaku yi zrange yi ni nyenya na yi nga si na mi nyenya. 19 Loko a mo va va misava, a misava a yi ta mi zrandzra hikusa a mi ta va mi li va yone. Kutani leswi mi nga liki va misava, kambe ni mi hlawuliki a misaveni, a misava ya mi nyenya. 20 Dzrimukani leswi ni mi byeliki swone: A nandzra a nga mu tluli n’winyi wake. Loko va ni xanisile, na n’wine va ta mi xanisa; loko va ni yingisetile, na n’wine va ta mi yingiseta. 21 Kambe va ta mi yentxa mintxhumu leyi hinkwayu hi mhaka ya vito dzranga, hikusa a va mu tivi Lweyi a ni zrumiki. 22 Loko a ni nga tanga ni ta vulavula na vone, a va nge ti va ni xidoho. Kambe swoswi a va nge he tiyimeleli ka xidoho xavu. 23 Lweyi a ni nyenyaka a nyenya na Papayi. 24 Loko a ni nga yentxanga mahlolana a mahlweni kwavu, lawa ku ngeke na mhunu mun’wana lweyi a samiki a ma yentxa, a va nge ti va ni xidoho; kambe va ni vonile va tlhela va ni nyenya va va va nyenya na Papayi. 25 Kambe leswi swi yentxeke akuva ku hetiseka leswi tsraliwiki a Nawini wavu, lowu liki: ‘Va ni nyenyile na ku nga na xivangelo.’ 26 Loko mupfunisi lweyi ni taka mi zrumela yene na a suka ka Papayi, a tlhasa, ku nga moya lowu paluxaka ntiyiso, lowu pfaka hi ka Papayi, mupfunisi yelweyo a ta nyikela wumboni mayelanu na mine; 27 kutani na n’wine, mi ta nyikela wumboni, hikusa mi ve na mine ku sukela a ku sunguleni.

16 “Ni mi byele mintxhumu leyi akuva mi nga hambukisiwi. 2 Vhanu va ta mi hlongola a masinagogeni. Nakunene, a nkama wa ta lowu lava va taka mi dlaya va taka pimisa leswaku vo yentxela Xikwembu Nkulukumba ntizro wa ku xwenga. 3 Kambe va ta yentxa mintxhumu leyi hikusa a va ni tivi nambi Papayi a va mu tivi. 4 Nambitanu, ni mi byele mintxhumu leyi akuva loko nkama wa kuva yi yentxeka wu tlhasa, mi dzrimuka leswaku ni mi byelile.

“A ni mi byelanga mintxhumu leyi a ku sunguleni, hikusa a na ha li na n’wine. 5 Kambe swoswi ni ya ka lweyi a ni zrumiki; nambitanu a nga kone ni mun’we wenu a ni vutisaka a ku: ‘U ya kwini?’ 6 Kambe leswi ni mi byeliki mintxhumu leyi, mi vaviseke ngopfu timbilwini tenu. 7 Nambitanu, ni mi byela ntiyiso, a ku famba kwanga ku ta pfuna n’wine. Hikusa loko ni nga fambi, a mupfunisi* a nge ti ta kwenu kambe loko ni famba ni ta mi zrumelela yene. 8 Kutani loko a tlhasa, a ta khanyisela hinkwavu leswaku a xidoho i yini, a wululami i yini ni leswaku a yavanyiso dzra Xikwembu Nkulukumba i yini: 9 ku sungula a ta khanyisa leswaku a xidoho i yini, hikusa a va kombisi lipfumelo kwanga; 10 ntsrhaku ka leswo a khanyisa leswaku a wululami i yini, hikusa ni ya ka Papayi nakone a mi nge he ti tlhela mi ni vona; 11 hi wugamu a khanyisa leswaku a yavanyiso dzra Xikwembu Nkulukumba i yini, hikusa a mufumi wa misava leyi a yavanyisiwile.

12 “Na ha ni swinyingi swa ku mi byela swone, kambe swoswi a mi nge swi koti ku swi twisisa. 13 Nambitanu, loko mupfunisi yelweyo a tlhasa, ku nga moya wa ku xwenga lowu paluxaka ntiyiso, a ta mi kongomisa, a mi pfuna ku twisisa ntiyiso hi ku helela, hikusa a nge ti vulavula hi ku tisungulela, kambe a ta vulavula leswi a swi yingeliki, nakone a ta mi byela mintxhumu leyi taka yentxeka. 14 Yene a ta ni twalisa, hikusa a ta mi byela leswi a swi twiki kwanga. 15 Hinkwaswu leswi Papayi a nga na swone i swanga. Hi leswo swi ni yentxaka ni ku a mupfunisi a ta mi byela hinkwaswu leswi a swi twiki kwanga. 16 Ntsrhaku ka nkamanyana a mi nge he ti ni vona, kambe ntsrhaku ka nkamanyana mi ta tlhela mi ni vona.”

17 Kutani van’we va vadondzrisiwa vake va sungula ku vutisana va ku: “A djula ku hlaya swa ku yini loko a hi byela a ku: ‘Ntsrhaku ka nkamanyana a mi nge he ti ni vona, kambe ntsrhaku ka nkamanyana mi ta tlhela mi ni vona’, ni loko a ku: ‘Hikusa ni ya ka Papayi’?” 18 Xileswo a va ya mahlweni va ku: “A djula ku hlaya swa ku yini loko a ku: ‘Ntsrhaku ka nkamanyana’? A hi swi tivi leswi a hlayaka swone.” 19 Yesu a swi xiya leswaku va djula ku mu vutisa, kutani a ku: “Mi vutisana leswo hi mhaka ya leswi ni tiki: ‘Ntsrhaku ka nkamanyana a mi nge he ti ni vona, kambe ntsrhaku ka nkamanyana mi ta tlhela mi ni vona’? 20 Kunene ni mi byela ntiyiso, mi ta dzrila mi tlhela mi xukuvala, kambe a misava yi ta nyonxa; mi ta vaviseka, kambe a ku vaviseka kwenu ku ta ndzruluka ku nyonxa. 21 Loko wansati a li ku phulukeni, a twa ku vavisa hikusa a nkama wake wu tlhasile, kambe ntsrhaku ka loko a phulukile, a nga ha wu dzrimuki nhlomulo lowu a viki na wone hi mhaka ya ku nyonxa loku a nga na kone hi leswi ku pswaliwiki n’wana a misaveni. 22 Xileswo na n’wine, swoswi mi vavisekile; kambe ni ta tlhela ni mi vona, kutani a timbilu tenu ti ta nyonxa nakone a nga kone lweyi a taka mi susela ku nyonxa koloko. 23 Hi siku ledzro a mi nge ti ni vutisa ntxhumu nikutsrongo. Kunene ni mi byela ntiyiso, loko mi kombela ntxhumu wa kukazri ka Papayi hi vito dzranga, a ta mi nyika wone. 24 Ku ta tlhasa swoswi a mi si na kombela ntxhumu ni wun’we hi vito dzranga. Kombelani mi ta nyikiwa, akuva ku nyonxa kwenu ku va loku heleliki.

25 “Ni mi byele mintxhumu leyi hi ku tizrisa swifaniso. Wa ta nkama lowu ni nga ha tiki vulavula na n’wine hi ku tizrisa swifaniso, kambe ni taka mi khanyisela hinkwaswu mayelanu na Papayi. 26 Hi siku ledzro mi ta hamba swikombelo ka Papayi hi vito dzranga; kambe leswo a swi hlayi swone leswaku ni ta mi kombelela. 27 Hikusa Papayi awa mi zrandzra hi leswi n’wine mi ni zrandzraka nakone mi kholwaka leswaku ni te swanga muyimeli wa Xikwembu Nkulukumba. 28 Ni te misaveni swanga muyimeli wa Papayi. Swoswi na suka a misaveni ni tlhelela ka Papayi.”

29 A vadondzrisiwa vake va ku: “Yah! Swoswi wa hi khanyisela, awa ha vulavuli na hine hi ku tizrisa swifaniso. 30 Kutani ha swi tiva leswaku u tiva mintxhumu hinkwayu nakone a swi vileli kuva u yentxa hi ku vutiseliwa. Xileswo ha kholwa leswaku u pfa ka Xikwembu Nkulukumba.” 31 Yesu a va hlamula a ku: “Swoswi ma kholwa? 32 Ma swi twa! A nkama wa ta, nakunene wu tlhasile, lowu mi taka hangalasiwa, mun’wana ni mun’wana a muka kaya kwake mi ni siya wuswanga. Kambe a ni wuswanga, hikusa Papayi a na mine. 33 Ni mi byele mintxhumu leyi akuva mi va ni ku zrula hi mhaka yanga. A misaveni mi ta va ni mahlomulo, kambe tiyani! A misava ni yi hlulile.”

17 Ntsrhaku ka loko Yesu a hlaye mintxhumu leyi, a tlakuxa matihlo a langusa tilweni, a ku: “Papayi, a nkama wu tlhasile. Twalisa n’wanaku akuva n’wanaku a ku twalisa, 2 ku fana ni leswi u mu nyikiki ntamu wa ku fuma vhanu hinkwavu, ku yentxela leswaku hinkwavu lava u mu nyikiki vone a va nyika wutomi lebyi nga helikiki. 3 Akuva va kuma wutomi lebyi nga helikiki va fanela ku ku tiva,* wene Xikwembu Nkulukumba u li mun’we wa ntiyiso na Yesu Kriste lweyi u mu zrumiki. 4 Ni ku twalisile a misaveni, hi ku heta ntizro lowu u ni nyikiki wone akuva ni wu tizra. 5 Xileswo, Papayi, ni pfumeleli ku va tlhelweni kwaku, u ni nyika ni ku phatima loku a ni li na kone tlhelweni kwaku na misava yi nga si na va kone.

6 “Ni va tivise vito dzraku vhanu lava u ni nyikiki vone misaveni. A va li vaku, kutani u ni nyike vone, nakone va dzri yingisetile zritu dzraku. 7 Swoswi va swi tiva leswaku mintxhumu hinkwayu leyi u ni nyikiki yone yi pfa kwaku; 8 hikusa ni va byele leswi u ni byeliki swone, va swi yamukelile nakone va swi tiva leswaku ni te swanga muyimeli waku, handle ka leswo va kholwa leswaku hi wene u ni zrumiki. 9 Na va kombelela; kambe a ni kombeleli misava, ni kombelela lava u ni nyikiki vone, hikusa i vaku; 10 hinkwaswu leswi nga swanga i swaku ni leswi nga swaku i swanga, nakone vone va ni twalisile.

11 “A na ha li misaveni, kambe vone va le misaveni, mine ni ta kwaku. Papayi lweyi a Xwengiki, va voneleli hi mhaka ya vito dzraku, ledzri u ni nyikiki dzrone, akuva va va ni wumun’we,* swanga hi leswi mine na wene hi nga ni wumun’we.* 12 Loko na ha li na vone, a ni va vonelela hi mhaka ya vito dzraku ledzri u ni nyikiki dzrone; nakone ni va sizrelelile, a nga kone ni mun’we lweyi a lahlekiki handle ka mun’we ntsena, ku nga lweyi a taka helisiwa, akuva ku hetiseka matsralwa. 13 Kambe swoswi ni ta kwaku nakone leswi ni swi hlaya na na ha li lani misaveni, akuva va va ni ku nyonxa loku ni nga na kone hi lani ku heleliki. 14 Ni va byele zritu dzraku, kambe misava ya va nyenya, hikusa vone a hi va misava, ku fana ni leswi mine ni nga liki wa misava.

15 “A ni kombeli leswaku u va susa misaveni, kambe ni kombela leswaku u va vonelela hi mhaka ya mubihi. 16 Vone a hi va misava, ku fana ni leswi mine ni nga liki wa misava. 17 Va xwengisi* hi ntiyiso, a zritu dzraku i ntiyiso. 18 Swanga hi leswi u ni zrumiki misaveni, na mine ni va zrumile misaveni. 19 Nakone na tixwengisa hi mhaka yavu, akuva na vone va xwengisiwa hi ntiyiso.

20 “A ni kombeleli lava ntsena, kambe ni kombelela ni lava va kombisaka lipfumelo kwanga, hi ku twa leswi va dondzrisiwaka swone hi lava, 21 akuva hinkwavu va va ni wumun’we, ku fana ni leswi wene Papayi u nga ni wumun’we na mine na mine ni nga ni wumun’we na wene, akuva na vone va va ni wumun’we na hine, leswaku a misava yi ta kholwa leswaku ni zrumiwe hi wene. 22 Ni va nyike ku phatima loku u ni nyikiki kone, akuva va va ni wumun’we ku fana ni leswi mine na wene hi nga ni wumun’we. 23 Mine ni va ni wumun’we na vone na wene u va ni wumun’we na mine, akuva va va ni wumun’we lebyi heleliki, ku yentxela leswaku misava yi ta swi tiva leswaku ni zrumiwe hi wene ni leswaku wa va zrandzra xileswi u ni zrandzrisaka xiswone. 24 Papayi, ni djula leswaku lava u ni nyikiki vone va va na mine lani ni taka va na ni li kone, akuva va ta kota ku vona ku phatima loku u ni nyikiki kone, hikusa u ni zrandzrile na misava yi nga si na va kone. 25 Papayi lweyi a Lulamiki, a misava nakunene a yi ku tivi, kambe mine na ku tiva, nakone lava va swi tiva leswaku hi wene u ni zrumiki. 26 Ni va tivise vito dzraku nakone ni ta tama ni dzri tivisa, akuva va zrandzra van’wana ku fana ni leswi wene u ni zrandzraka, ku yentxela leswaku mine na vone hi va ni wumun’we.”

18 Ntsrhaku ka loko a hlaye mintxhumu leyo, Yesu a suka ni vadondzrisiwa vake va tsremakanya Nkova wa Kedroni, va ya mbangwini lowu a ku ni xizramba kutani va tlhasa va nghena ka xone. 2 Yudasi lweyi a a ta mu wonga, na yene a a wu tiva mbangu wolowo, hikusa Yesu a a talisa ku tlhangana kolanu ni vadondzrisiwa vake. 3 Xileswo, Yudasi a buyisa ntlawa wa masotxha ni valaveleli lava zrumiwiki hi vaprista lavakulu ni hi Vafarisi. Va ta na va khome swa ku vona ha swone, swipada ni tinhonga. 4 Kutani Yesu, hi ku tiva hinkwaswu leswi a swi ta mu yentxekela, a va tsrhindzrekelela a va vutisa a ku: “Mi djuletela mani?” 5 Va mu hlamula va ku: “Hi djuletela Yesu wa le Nazareta.” A va byela a ku: “Hi mine lweyi.” Yudasi lweyi a a ta mu wonga na yene a a li na vone.

6 Nambitanu, loko Yesu a va byela a ku: “Hi mine lweyi”, va tlhentlha va wa hansi. 7 Xileswo Yesu a tlhela a va vutisa a ku: “Mi djuletela mani?” Va ku: “Hi djuletela Yesu wa le Nazareta.” 8 Yesu a va hlamula a ku: “Ni mi byelile leswaku hi mine lweyi. Kutani loko mi djuletela mine, tsrhikani vavanuna lava va famba.” 9 Leswi swi yentxeke akuva ku hetiseka leswi a swi hlayiki loko a te: “A ni lahlanga ni mun’we ka lava u ni nyikiki vone.”

10 Kutani Simoni Petro, lweyi a a ni xipada, a xi humesa a tsrema nandzra wa muprista lwenkulu, a mu susa ndleve ya xinene. A vito dzra nandzra yelweyo a ku li Malku. 11 Nambitanu, Yesu a byela Petro a ku: “Tlhoma xipada a mbangwini wa xone. Xana a ni fanelanga ku nwa kopo ledzri Papayi a ni nyikiki dzrone?”

12 Kutani a masotxha ni muzrangeli wa yimpi kun’we ni valaveleli lava a va zrumiwe hi Vayuda va khoma Yesu va mu tsrimba. 13 Va zrange va mu yisa ka Anasi, hikusa Kayafasi lweyi a a li muprista lwenkulu lembe ledzro, a a li mukon’wana wa Anasi. 14 Nakunene, Kayafasi, hi yene a byeliki Vayuda leswaku swi ta pfuna vone kuva mhunu mun’we a fela vhanu.

15 Simoni Petro kun’we ni mudondzrisiwa mun’wana a va landzrelela Yesu. A mudondzrisiwa yelweyo a a tiviwa hi muprista lwenkulu, kutani a nghena na Yesu a kaya ka muprista lwenkulu, 16 kambe Petro a a yime handle a nyangweni. Xileswo, mudondzrisiwa lweyi a a tiviwa hi muprista lwenkulu, a huma handle a ya vulavulisana ni mulaviseli wa nyangwa, kutani a nghenisa Petro. 17 Hiloko n’hwanyana lweyi a a li mulaviseli wa nyangwa a vutisa Petro a ku: “Xana na wene a wu mun’we wa vadondzrisiwa va wanuna lweyi wene?” Petro a ku: “Im-him, a ni mudondzrisiwa wake.” 18 A vatizri ni valaveleli a va yime a mbawuleni va wozra ndzrilo lowu a va wu tsrhivelile, hikusa a ku ni xizrami. Petro na yene a a yime na vone a wozra ndzrilo.

19 Hiloko muprista lwenkulu a vutisa Yesu mayelanu ni vadondzrisiwa vake kun’we ni tindondzro take. 20 Yesu a mu hlamula a ku: “Ni dondzrise mahlweni ka vhanu hinkwavu. A ni tsrhamela ku dondzrisa a sinagogeni ni le tempeleni, lomu Vayuda hinkwavu a va hlengeletana kone, a ni zanga ni hlaya ntxhumu a xihundleni. 21 Ha yini u vutisa mine? Vutisa lava yingeliki leswi ni va byeliki swone. Vone va swi tiva leswi ni swi hlayiki.” 22 Ntsrhaku ka loko Yesu a hlaye leswo, mun’we wa valaveleli lava a va yime kolanu, a mu yamasa hi mpama a wusweni a ku: “I ndlela ya ku hlamula muprista lwenkulu leyo?” 23 Yesu a mu hlamula a ku: “Loko a li leswaku ni hlaye swa ku biha, ni byeli leswaku i mpswini;* kambe loko leswi ni swi hlayiki swi li swinene, u ni bela yini?” 24 Kutani Anasi a mu zrumela ka Kayafasi lweyi a a li muprista lwenkulu, na a tsrimbiwile.

25 Simoni Petro a a yime kolanu a wozra ndzrilo. Kutani va mu vutisa va ku: “Wene a wu mun’we wa vadondzrisiwa vake wene?” Petro a yala a ku: “A ni mudondzrisiwa wake mine.” 26 Mun’we wa vatizri va muprista lwenkulu, lweyi a a li xaka dzra wanuna lweyi Petro a a mu tsreme ndleve, a ku: “A hi wene ni ku voniki na wu li na yene a xizrambeni wene?” 27 Nambitanu, Petro a tlhela a yala, kutani hi nkama wolowo a nkuku wu yimba.

28 Kutani va suka na Yesu a kaya ka Kayafasi va mu yisa mutini wa govhernadori. A ka ha li mpundzru. Kambe a va nghenanga mutini wa govhernadori, akuva va nga nyamisiwi hikusa a va djula ku da Paxkwa. 29 Xileswo, Pilatu a huma handle a va vutisa a ku: “A hone yini wanuna lweyi?” 30 Va mu hlamula va ku: “Loko wanuna lweyi a a nga li muhoni,* a hi nge ti mu buyisa kwaku.” 31 Xileswo, Pilatu a va byela a ku: “Mu tekani n’wine mi ya mu yavanyisa hi ku ya hi nawu wenu.” A Vayuda va mu hlamula va ku: “A nawu wezru a wu hi pfumeleli ku dlaya mhunu.” 32 Leswi swi yentxeke akuva ku hetiseka leswi Yesu a swi hlayiki loko a kombisa ndlela leyi a a ta fa ha yone.

33 Xileswo, Pilatu a tlhela a nghena mutini wa govhernadori kutani a vitana Yesu a mu vutisa a ku: “Xana u Hosi ya Vayuda?” 34 Yesu a mu hlamula a ku: “U ni vutisa leswo hi kuva wo djula ku swi tiva hi kakunene kumbe ko va ni lava va ku byeliki swa kukazri hi mine?” 35 Pilatu a mu hlamula a ku: “No va Muyuda mine? A tiko dzraku kun’we ni vaprista lavakulu va ku nyikele kwanga. Whe yentxa yini?” 36 Yesu a mu hlamula a ku: “A Mfumu wanga a hi wa misava leyi. Loko Mfumu wanga a wo va wa misava leyi, a malandzra yanga inaka ma lwile akuva ni nga nyikeliwi ka Vayuda. Kambe a ntiyiso hi leswaku a Mfumu wanga a hi wa misava leyi.” 37 Xileswo Pilatu a ku: “Hi nga ni byela, u hosi ke?” Yesu a hlamula a ku: “Wene ha byaku u li ni hosi. Leswi ni pswaleliwiki swone ni tlhela ni tela swone a misaveni, i ku nyikela wumboni bya ntiyiso. Lweyi a nga ntiyisweni awa dzri yingiseta zritu dzranga.” 38 Pilatu a ku: “I yini ntiyiso?”

Ntsrhaku ka ku hlaya leswo, a tlhela a huma handle a ya ka Vayuda a tlhasa a va byela a ku : “A ni kumi nandzru kwake. 39 Handle ka leswo, mi talisa ku ni kombela kuva ni mi ntsrhunxela mhunu hi Paxkwa. Kutani mi djula leswaku ni mi ntsrhunxela Hosi ya Vayuda?” 40 Va tlhela va huwelela va ku: “U nga hi ntsrhunxeli wanuna lweyo, hi ntsrhunxele Barabasi!” Barabasi a a li muyivi.

19 Pilatu a byela masotxha leswaku ma teka Yesu ma ya mu ba. 2 Kutani a masotxha ma hamba hazri ya mitwa ma mu tlhanteka nhlokweni, ma va ma mu tsrimba kapulana dzra ku pshwuka, 3 nakone a ma mu tsrhindzrekelela ma ku: “Hi loselile* Hosi ya Vayuda!” Handle ka leswo a ma mu yamasela timpama. 4 Pilatu a tlhela a huma handle a va byela a ku: “Ni mi humesela yene akuva mi ta swi tiva leswaku a ni kumi nandzru kwake.” 5 Xileswo, Yesu a huma handle na a ni hazri ya mitwa nakone a tsrimbe kapulana dzra ku pshwuka. Kutani Pilatu a va byela a ku: “Vonani! Hi lweyi!” 6 Nambitanu, loko vaprista lavakulu ni valaveleli va mu vona, va huwelela va ku: “A a yisiwi mhandzrini! A a yisiwi mhandzrini!”* Pilatu a va byela a ku: “Mu tekani n’wine ha wuswenu mi ya mu dlaya,* hikusa mine a ni kumi nandzru kwake.” 7 A Vayuda va mu hlamula va ku: “Hi ni nawu, nakone hi ku ya hi wone a fanela ku fa, hikusa a tiyentxa n’wana wa Xikwembu Nkulukumba.”

8 Loko Pilatu a yingela leswi a va swi hlaya, a ya a txhava ngopfu swinene, 9 kutani a tlhela a nghena mutini wa govhernadori a vutisa Yesu a ku: “U pfa kwini wene?” Kambe Yesu a nga mu hlamulanga ntxhumu. 10 Xileswo Pilatu a ku: “A wu djuli ku vulavula na mine? A wu swi tivi leswaku ni ni wulawuli bya ku ku ntsrhunxa kumbe ni ku dlaya?”* 11 Yesu a mu hlamula a ku: “Loko Xikwembu Nkulukumba a a nga ku nyikanga wulawuli lebyo, a wu nge ti va ni wulawuli kwanga nikutsrongo. Hi xivangelo lexo, lweyi a ni nyikeliki kwaku a ni xidoho lexikulu.”

12 Xileswo Pilatu a tama a djula ndlela ya ku mu ntsrhunxa, kambe a Vayuda va huwelela va ku: “Loko wo ntsrhunxa wanuna lweyi, a wu munghanu wa Khezari. Lweyi a tiyentxaka hosi a lwisana na Khezari.” 13 Ntsrhaku ka loko Pilatu a yingele mazritu lawa, a humesa Yesu handle, kutani a tsrhamisa ka xitsrhamu xa wuyavanyisi a mbangwini lowu vitaniwaka Wuyandlalu bya Mazribye, lowu hi Xiheberu wu vitaniwaka Gabata. 14 Ledzro a ku li siku dzra ku Lulamisela Paxkwa; a ku li kolomu ka ma 12.* Kutani a byela Vayuda a ku: “Vonani! A hosi yenu hi leyi!” 15 Nambitanu, va huwelela va ku: “Mu dlayi! Mu dlayi! A a yisiwi mhandzrini!”* Pilatu a va vutisa ku: “Xana ni fanela ku dlaya hosi yenu?” A vaprista lavakulu va mu hlamula va ku: “A hi na hosi yin’wana handle ka Khezari.” 16 Kutani a mu nyikela kwavu leswaku a ya dlayiwa a mhandzrini.

Xileswo va teka Yesu va famba na yene. 17 Yesu a huma na a tizrwalele mhandzri ya nxanisa,* a ya mbangwini lowu vitaniwaka Mbangu wa Pala, lowu hi Xiheberu wu vitaniwaka Golgota. 18 Va tlhasa va mu gongondzrela mhandzrini a mbangwini wolowo kun’we ni vavanuna vabidzri, mun’we ka tlhelo dzrin’we, mun’wana ka tlhelo ledzrin’wana, yene a kumeka xikazri. 19 Pilatu a tsrale ni mazritu ya kukazri a ma gongondzrela mhandzrini ya nxanisa.* Wone a ma ku: “Yesu wa Munazareta, Hosi ya Vayuda.” 20 Vayuda vanyingi va ma dondzrile mazritu lawa, hikusa lomu Yesu a a gongondzreliwe kone a ku li kusuhi ni doropa, nakone a ma tsraliwe hi Xiheberu, hi Xilatini ni hi Xigriki. 21 Nambitanu, a vaprista lavakulu va Vayuda va byela Pilatu va ku: “U nga tsrali leswaku: ‘Hosi ya Vayuda’, kambe tsrala leswaku a te: ‘Ni Hosi ya Vayuda.’” 22 Pilatu a va hlamula a ku: “Leswi ni swi tsraliki, ni swi tsralile.”

23 Kutani ntsrhaku ka loko masotxha ma gongondzrele Yesu a mhandzrini, ma teke mpahla yake ma yi yava hi mune wa swiyenge, sotxha dzrin’wana ni dzrin’wana dzri teka xiyenge xin’we ma tlhela ma teka ni nkhantxu wake. Kambe a nkhantxu a wu nga zrungiwanga a we yentxa hi ku lukiwa ku sukela henhla ku ya hansi. 24 Xileswo ma byelana ma ku: “Hi nga wu handzruleni kambe a hi beneni tinhlolo akuva hi tiva leswaku wu ta va wa mani.” Leswo swi yentxeke akuva ku hetiseka tsralwa ledzri liki: “Va yavelane mpahla yanga nakone va hambe wuhlolotwana hi mhaka ya mpahla yanga.” Nakunene hi swoswo masotxha ma swi yentxiki.

25 Nambitanu, mamana wa Yesu, makwavu wa xisati wa mamana wa Yesu, Mariya nsati wa Klopasi, na Mariya Magadala, a va yime kusuhi ni mhandzri ya Yesu ya nxanisa.* 26 Loko Yesu a vona mamana wake, kun’we ni mudondzrisiwa lweyi a a mu zrandzra, a byela mamana wake a ku: “Wansati! Hi lweyi n’wanaku!” 27 A gama a byela mudondzrisiwa yelweyo a ku: “Vona! A mamana waku hi lweyi!” Ku sukela ka nkama wolowo, a mudondzrisiwa yelweyo a mu teka a famba na yene kaya kwake.

28 Loko Yesu a vona leswaku a mintxhumu hinkwayu yi hetisekile, akuva ku hetiseka tsralwa, a hlaye leswi: “Ni twa tozra.” 29 Kolanu a ku ni xigadzrana lexi a xi tale hi vhinyu dzra ku bava. Xileswo, va teka xipontxhi va xi nyuveta ka vhinyu dzroledzro dzra ku bava, va gama va xi tlhoma ka lihlanga dzra hisopa,* va xi tlakuxa va xi yisa non’wini wake. 30 Ntsrhaku ka loko Yesu a dzringe vhinyu dzroledzro dzra ku bava, a ku: “Swi hetisekile!” A gama a kozramisa nhloko a fa.*

31 Leswi a ku li siku dzra ku Lulamisela Savata, a Vayuda va ye kombela Pilatu akuva vhanu lava nga timhandzrini ta nxanisa va tsrhoviwa milenge ni leswaku a mintsrumbu yavu yi susiwa akuva yi nga tami yi va timhandzrini hi siku dzra Savata (hikusa a Savata ledzro a dzri li dzra ku hlawuleka). 32 Xileswo a masotxha ma yile ma tlhasa ma tsrhova milenge ya vavanuna vabidzri lava a va gongondzreliwe kun’we na Yesu. 33 Kambe loko ma tlhasa ka Yesu, ma kuma leswaku kutani a a file, xileswo a ma yi tsrhovanga milenge yake. 34 Kambe mun’we ka masotxha, a mu tlhava zreve hi tlhazri, kutani ku tekela ku huma ngati ni mati. 35 Lweyi a swi voniki a nyikele wumboni lebyi, nakone a wumboni byake i bya ntiyiso, futsrhi yene awa swi tiva leswaku leswi a swi hlayaka i ntiyiso, akuva na n’wine mi ta kholwa. 36 Nakunene a mintxhumu leyi yi yentxeke akuva ku hetiseka tsralwa ledzri liki: “A ku na zrambu dzrake ni dzrin’we ledzri taka tsrhoviwa.”* 37 Ku tlhele ku hetiseka ni tsralwa ledzri liki: “Va ta langusa lweyi va mu tlhaviki.”

38 Ntsrhaku ka loko mintxhumu leyi yi yentxekile, Yosefa wa le Arimateya, lweyi a a li mudondzrisiwa wa Yesu, kambe a a tifihla hi ku txhava Vayuda, a ya kombela Pilatu akuva a mu pfumelela ku teka ntsrumbu wa Yesu. Kutani Pilatu a mu pfumelela. Xileswo a famba a ya wu teka. 39 Nikodema, wanuna lweyi hi khambi dzra ku sungula a yeliki Yesu wusikwini, na yene a famba na a ni mafuzra ya mira lama djuntiwiki ni mhangana, lawa a ma bindzra kolomu ka 33 wa makilu.* 40 Kutani va teka ntsrumbu wa Yesu va wu tsrondzriyela hi tipanu ta lisima* leti a ti txheliwe mafuzra ya ku nun’hwela, hi ku landzra ndlela leyi Vayuda a va lahla vafi ha yone. 41 A mbangwini lowu a dlayeliwiki ka wone, a ku ni xizramba nakone a xizrambeni xolexo a ku ni sizra dzrimpshwa ledzri a ku ngi ngi sama ku lahliwa mhunu ka dzrone. 42 Va lahle Yesu kolanu, hikusa sizra dzroledzro a dzri li kusuhi nakone a ku li siku dzra ku Lulamisela Savata dzra Vayuda.

20 Hi siku dzra ku sungula dzra vhiki, Mariya Magadala a tlhase sizreni a mpundzrwini, na ka ha mphumile, kutani a kuma leswaku a zribye a dzri susiwile sizreni. 2 Xileswo a suka hi ku tsrutsruma a yela Simoni Petro ni mudondzrisiwa mun’wana lweyi Yesu a a mu zrandzra, a tlhasa a va byela a ku: “Va suse Hosi a sizreni nakone a hi swi tivi leswaku va ye yi beka kwini.”

3 Kutani Petro ni mudondzrisiwa yelweyo va suka va ya sizreni. 4 Hi wubidzri byavu va sungula ku tsrutsruma, kambe mudondzrisiwa lwemun’wana a tsrutsruma a siya Petro, a zranga a tlhasa sizreni. 5 A tlhasa a kozrama a hlomela, a vona tipanu na ti li hansi, kambe a nga nghenanga. 6 Hiloko Petro lweyi a a mu landzra hi ntsrhaku a tlhasa, kutani a nghena sizreni, a vona tipanu na ti li hansi. 7 A panu leyi a yi tsrimbelele nhloko ya Yesu a yi nga li xikan’we ni tipanu letimbeni kambe a yi khondleteliwile yi bekiwa hi tlhelo. 8 Kutani a mudondzrisiwa lwemun’wana lweyi a zrangiki a tlhasa sizreni, na yene a nghena a swi vona, kutani a kholwa leswi va byeliwiki swone. 9 Hikusa a va nga si na dzri twisisa tsralwa ledzri hlayaka leswaku a fanela ku pfuxiwa ku feni. 10 Xileswo a vadondzrisiwa va muka makaya kwavu.

11 Nambitanu, Mariya a tama a yima handle kusuhi ni sizra a dzrila. Na a li ku dzrileni, a kozrama a hlomela ndzreni ka sizra, 12 kutani a vona tintsrumi tibidzri na ti yambale mpahla ya ku basa na ti tsrhamise lani ntsrumbu wa Yesu a wu bekiwe kone, yin’we a yi tsrhamise tinhlokweni kasi leyin’wana a yi tsrhamise hi le milengeni. 13 Kutani ti mu vutisa ti ku: “Wansati, u dzrilela yini?” A ti hlamula a ku: “Va teke Hosi yanga nakone a ni swi tivi leswaku va ye yi beka kwini.” 14 Ntsrhaku ka ku hlaya leswi, a ndzruluka a vona Yesu na a yime kolanu, kambe a nga swi xiyi leswaku i Yesu. 15 Yesu a mu vutisa a ku: “Wansati, u dzrilela yini? U djuletela mani?” Mariya, hi ku pimisa leswaku ku nga va ku li mutizri wa kolanu, a mu byela a ku: “Nkulukumba, loko a li leswaku hi wene u mu susiki, ni byele leswaku u mu beke kwini, kutani ni ta ya mu teka.” 16 Yesu a mu yangula a ku: “Mariya!” Loko Mariya a ndzruluka, a mu byela hi Xiheberu a ku: “Raboni!” (leswi loko swi ndzruluteliwa swi liki: “Mudondzrisi!”) 17 Yesu a mu byela a ku: “Tsrhika ku ni namazrela, hikusa a ni si na tlhantuka ni ya ka Papayi. Kambe yana ka vamakwezru u ya va byela u ku: ‘Ni tlhantukela ka Papayi wanga tlhelo Papayi wenu, ni Xikwembu Nkulukumba wanga tlhelo Xikwembu Nkulukumba wenu.’” 18 Mariya Magadala a tlhasa a byela vadondzrisiwa ndzrava leyo a ku: “Ni vone Hosi!” A tlhela a va byela leswi yi mu byeliki swone.

19 A madambyeni ya siku dzroledzro, hi siku dzra ku sungula dzra vhiki, a vadondzrisiwa a va li mbangwini lowu khiyeliwiki hi leswi a va txhava Vayuda. Hiloko Yesu a nghena a yima makazri kwavu a va byela a ku: “A ku zrula a ku ve na n’wine.” 20 Ntsrhaku ka ku hlaya leswo, a va komba mavoko ni zreve dzrake. Kutani a vadondzrisiwa va nyonxa hi ku vona Hosi. 21 Yesu a tlhela a va byela a ku: “A ku zrula a ku ve na n’wine. Ku fana ni leswi Papayi a ni zrumiki, na mine na mi zruma.” 22 Ntsrhaku ka ku hlaya leswo, Yesu a va huhutela,* kutani a va byela a ku: “Yamukelani moya wa ku xwenga. 23 Loko mi dzrivalela vhanu swidoho swavu, va ta dzrivaleliwa; loko mi nga va dzrivaleli, a va nge ti dzrivaleliwa.”

24 Kambe Tomasi, lweyi a a li mun’we wa lava 12, lweyi a a vitaniwa Hahla, a a nga li na vone loko Yesu a humelela kwavu. 25 Xileswo a vadondzrisiwa lavan’wana va mu byela va ku: “Hi vone Hosi!” Kambe yene a va byela a ku: “Loko no kala ni nga voni mintsrhosi ya swipikiri a mavokweni yake ni va ni yi khumba hi litiho dzranga, ni tlhela ni khumba a zreve dzrake hi voko dzranga, a ni nge kholwi nikutsrongo.”

26 Ntsrhaku ka 8 wa masiku a vadondzrisiwa vake a va tlhele va hlengeletana a ndlwini nakone Tomasi a a li na vone. Nambileswi a swipfalu a swi khiyiwile, Yesu a nghena a tlhasa a yima makazri kwavu a ku: “A ku zrula a ku ve na n’wine.” 27 Ntsrhaku ka leswo, a byela Tomasi a ku: “Khumba lani hi litiho dzraku u tlhela u lavisa ni mavoko yanga, nakone khumba zreve dzranga hi voko dzraku. Tsrhika ku ganaganeka, kambe kholwa.” 28 Tomasi a mu hlamula a ku: “Hosi yanga ni Xikwembu Nkulukumba wanga!” 29 Yesu a mu byela a ku: “U kholwa hi leswi u ni voniki? Va nyonxa lava kholwaka nambiloko va nga vonanga ntxhumu.”

30 Nakunene, Yesu a yentxe mahlolana mambeni ya manyingi a mahlweni ka vadondzrisiwa vake, lama kalaka ma nga tsraliwanga a bukwini ledzri. 31 Kambe leswi swi tsraliwe akuva mi ta kholwa leswaku Yesu i Kriste, N’wana wa Xikwembu Nkulukumba, nakone hi ku kholwa koloko mi ta kuma wutomi hi kola ka vito dzrake.

21 Ntsrhaku ka leswo, Yesu a tlhela a humelela mahlweni ka vadondzrisiwa vake a Lwandle dzra Tiberiya. A humelele hi ndlela leyi: 2 Simoni Petro, Tomasi (lweyi a a vitaniwa Hahla), Nataniyele wa le Kana wa Galileya, vana va Zebedewu ni vadondzrisiwa van’wana vabidzri a va li xikan’we. 3 Simoni Petro a va byela a ku: “Ni ya ku phaseni ka tihlampfi.”* Va mu byela va ku: “Hi ta famba na wene.” Kutani va suka va ya khwela boti, kambe a va phasanga ntxhumu wusiku byolebyo.

4 Kambe loko byi ya ku xeni Yesu a yima a lwandle, nambitanu a vadondzrisiwa a va swi xiyanga leswaku a ku li Yesu. 5 Kutani Yesu a va vutisa a ku: “Vananga, mi ni swakuda?”* Va mu hlamula va ku: “Im-him!” 6 A va byela a ku: “Txukumetelani nkukutu hi tlhelo dzra xinene dzra boti, mi ta ti kuma.” Xileswo va wu txukumetela, kambe va hluleka ni ku wu koka hi leswi a wu talisi xiswone hi tihlampfi. 7 Kutani a mudondzrisiwa lweyi Yesu a a mu zrandzra a byela Petro a ku: “I Hosi!” Simoni Petro hi ku twa leswaku i Hosi, a yambala mpahla hikusa a a nga yambalanga,* a va a pela lwandle. 8 Kambe a vadondzrisiwa lavan’wana va ta hi xibotana, na va koka nkukutu lowu a wu tale hi tihlampfi, hikusa a va nga li kule ni hlaluku, a vo va ka mpfhuka wa kolomu ka 90 wa mametru.*

9 Loko va tlhasa nkingeni, va vona ndzrilo wa makhala na ku tlhantekiwi hlampfi ka wone, va tlhela va vona ni pawu. 10 Yesu a va byela a ku: “Pambulani tihlampfi ti nga li tingani ka leti ma ha ka ku tiphasa mi ti buyisa halenu.” 11 Xileswo Simoni Petro a khwela botini a koka nkukutu na wu tale hi tihlampfi ta tikulu. A wu ni 153 wa tone. Nambileswi tihlampfi a ti li tinyingi ngopfu, a nkukutu a wu handzrukanga. 12 Yesu a va byela a ku: “Buyani mi ta fihlula.” A nga kone ni mun’we ka vadondzrisiwa lweyi a tiyiki ku mu vutisa a ku: “Hi wene mani?” hikusa a va swi tiva leswaku a ku li Hosi. 13 Yesu a teka pawu a va nyika, a va nyika ni hlampfi. 14 Ledzri a ku li khambi dzra wuzrazru na Yesu a humelela ka vadondzrisiwa vake ntsrhaku ka loko a pfuxiwe ku feni.

15 Loko va heta ku fihlula, Yesu a vutisa Simoni Petro a ku: “Simoni n’wana wa Yohane, xana wa ni zrandzra ku tlula leswi?” Petro a mu hlamula a ku: “Ina Hosi, wa swi tiva leswaku na ku zrandzra.” Yesu a mu byela a ku: “Phamela tihamba tanga.” 16 Yesu a tlhela a vutisa Petro hi khambi dzra wubidzri a ku: “Simoni n’wana wa Yohane, xana wa ni zrandzra?” Petro a mu hlamula a ku: “Ina Hosi, wa swi tiva leswaku na ku zrandzra.” Yesu a mu byela a ku: “Byisa swihambana swanga.” 17 Yesu a tlhela a mu vutisa hi khambi dzra wuzrazru a ku: “Simoni n’wana wa Yohane, xana wa ni zrandzra?” Petro a kazrateka hi leswi Yesu a mu vutisiki hi khambi dzra wuzrazru a ku: “Xana wa ni zrandzra?” Xileswo a mu byela a ku: “Hosi, u tiva mintxhumu hinkwayu; wa swi tiva leswaku na ku zrandzra.” Yesu a mu byela a ku: “Phamela swihambana swanga. 18 Kunene ni ku byela ntiyiso, a wumpshweni byaku a wo tiyambexa mpahla, u tlhela u ya lomu u ku djulaka. Kambe loko u ta duhwala, u ta nalavuta mavoko yaku kutani mhunu mumbenyana a yentxa hi ku ku yambexa, a tlhela a ku yisa lomu u kalaka u nga djuli ku ya kone.” 19 Yesu a hlaye leswi akuva a kombisa ndlela leyi Petro a a ta fa ha yone ni leswaku a lifu dzrake a dzri ta twalisa Xikwembu Nkulukumba. Ntsrhaku ka loko Yesu a hlaye leswi, a byela Petro a ku: “Tama u ni landzrela.”

20 Petro a ndzruluka, kutani a vona mudondzrisiwa lweyi Yesu a a mu zrandzra na a va landzra, ku nga lweyi loko va li ku laleleni a khigeteliki xifuveni xa Yesu a mu vutisa a ku: “Hosi, i mani lweyi a taka ku wonga?” 21 Xileswo, loko Petro a mu vona, a vutisa Yesu a ku: “Hosi, wanuna lweyi ke, ku ta yentxeka yini hi yene?” 22 Yesu a mu hlamula a ku: “Loko ni djula leswaku a tama a hanya ku ya tlhasa loko ni buya, u djula ku swi tivela yini? Wene tama u ni landzrela.” 23 Kutani a xikazri ka vamakwavu ku hangalaka mhaka ya leswaku a mudondzrisiwa yelweyo a a nge ti fa. Nambitanu, Yesu a nga hlayanga swone leswaku a a nge ti fa, kambe a te: “Loko ni djula leswaku a tama a hanya ku ya tlhasa loko ni buya, u djula ku swi tivela yini?”

24 A mudondzrisiwa lweyo hi yelweyi a nyikelaka wumboni mayelanu ni mintxhumu leyi futsrhi hi yene a yi tsraliki, nakone ha swi tiva leswaku a wumboni byake i bya ntiyiso.

25 Nakunene ku ni mintxhumu yin’wana ya yinyingi leyi Yesu a yi yentxiki, leyi loko a ke tsraliwa wutsrhokotsrhoko hinkwabyu mayelanu na yone, ni yanakanyaka leswaku a misava a yi nge ti va ni mbangu wa ku beka mabuku lawa a ma ta tsraliwa.