PAPELA DZRA WUBIDZRI LEDZRI YAKA KA VAKORINTE

1 Mine Pawulo, mupostola wa Kriste Yesu hi ku zrandzra ka Xikwembu Nkulukumba, ni na makwezru Timotewu. Ni tsralela bandla dzra Xikwembu Nkulukumba ledzri nga Korinte ku patsra ni vaxwengi hinkwavu lava nga Akaya.

2 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.

3 A ku dzrumisiwi Xikwembu Nkulukumba tlhelo Papayi wa Hosi yezru Yesu Kriste, Papayi lweyi a taliki hi timpswalu nakone a nga Xikwembu Nkulukumba wa ntxhavelelo hinkwawu, 4 lweyi a hi txhavelelaka* ka swikazratu* hinkwaswu leswi hi kumanaka na swone, akuva hi ntxhavelelo lowu hi wu kumaka ka Xikwembu Nkulukumba hi kota ku txhavelela van’wana ka swikazratu* swin’wana ni swin’wana leswi va kumanaka na swone. 5 Hikusa ku fana ni leswi tinxanisa leti hi kumanaka na tone hi mhaka ya leswi hi nga valandzreli va Kriste ti nga tinyingi, na wone ntxhavelelo lowu hi wu kumaka hi kola ka Kriste i wunyingi. 6 Loko hi kumana ni swikazratu,* swi yentxa leswaku mi txhaveleliwa mi tlhela mi huluxiwa; nakone loko hi txhaveleliwa, swi yentxa leswaku mi kuma ntxhavelelo lowu mi pfunaka ku tiyiselela tinxanisa ta ku fana ni leti na hine hi kumanaka na tone. 7 Nakone hi mi dumba hi ku helela hikusa ha swi tiva leswaku swanga hi leswi mi xanisekaka ku fana na hine, na n’wine mi ta txhaveleliwa ku fana na hine.

8 Hikusa vamakwezru, hi djula mi swi tiva leswaku hi kumane ni mahlomulo a xifundzreni xa Aziya, ma hi bindzrele ngopfu ma tlula ni ntamu wezru lakakuva hi nga ha dumbi leswaku hi ta huluka. 9 Nakunene hi tibyele leswaku hi ta fa. Kambe leswi hi kumaniki na swone swi hi dondzrise ku va hi nga tidumbi, kambe hi dumba Xikwembu Nkulukumba lweyi a pfuxaka vafi. 10 A hi huluxile ka nghozi leyikulu leyi a yi ta hi dlaya nakone a ta tlhela a hi huluxa, futsrhi ha dumba leswaku minkama hinkwayu a ta hi huluxa. 11 Na n’wine, mi nga hi pfuna hi swikhongoto swenu swa ku hi kombelela, hikusa loko vanyingi va hi kombelela, Xikwembu Nkulukumba a ta swi yingela a va a hi pfuna nakone hi mhaka ya leswo vanyingi va ta tlangela.

12 Ha tikhuza hikusa lipfalu dzrezru dzri nyikela wumboni bya leswaku a misaveni leyi, ngopfungopfu a mahlweni kwenu, hi hanye hi ndlela leyi xwengiki ni leyi ngeke na wukanganyisi hi ku ya hi langusela dzra Xikwembu Nkulukumba ku nga li hi ku ya hi wutlhazri bya misava, hi hanye hi ku ya hi timpswalu letikulu ta Xikwembu Nkulukumba. 13 Hikusa nakunene hi mi tsralela ntsena leswi mi taka kota ku swi dondzra* ni ku swi twisisa, nakone na dumba leswaku mi ta ya mahlweni mi yi twisisa ha hombe* mintxhumu leyi, 14 hi lani van’we venu va swi twisisiki ha kone leswaku hine hi xivangelo xa kuva mi tikhuza, swanga hi leswi na n’wine mi nga xivangelo xa kuva hi tikhuza a sikwini dzra Hosi yezru Yesu.

15 Leswi a ni tiyiseka hi leswo, a ni tiyimisele ku zranga ni ta kwenu, akuva mi ta va ni mukhandlu wa wubidzri wa kuva mi nyonxa;* 16 hikusa a ni tiyimisele ku mi yendzrela loko ni ya a Makedoniya ni loko ni tlhela, akuva mi ta gama mi ni heleketanyana loko ni ya Yudeya. 17 Xana mi yanakanya leswaku a nkama ni nga hamba makungu lawa a no tlanga ke? Kumbe mo yanakanya leswaku a no ma hamba hi ku ya hi ku navela kwanga, lakakuva ni ku: “Ina, ina” ni gama ni tlhela ni ku “im-him, im-him”? 18 Ku fana ni leswi Xikwembu Nkulukumba a dumbekaka, a mazritu yezru na wone ma dumbeka, a hi nge ti hlaya swaku “ina” hi gama hi ku “im-him”. 19 Hikusa Yesu Kriste N’wana wa Xikwembu Nkulukumba, lweyi mine, Silvhanu* na Timotewu hi mi zrezreliki mayelanu na yene, a nga vanga “ina” a gama a va “im-him” kambe minkama hinkwayu i “ina”. 20 Hikusa a swidumbiso hinkwaswu swa Xikwembu Nkulukumba swi ve “ina” hi kola kwake, hi leswo swi hi yentxaka hi tlhela hi ku “Amen” hi vito dzrake loko hi khongota ka Xikwembu Nkulukumba akuva ku twalisiwa Xikwembu Nkulukumba. 21 Kambe lweyi a tiyisekisaka leswaku n’wine na hine hi lumba Kriste, i Xikwembu Nkulukumba nakone hi yene a hi hlawuliki. 22 A patsre ni ku hi funga, a hi nyika ni moya wa ku xwenga a timbilwini tezru, lowu nga xitiyisekiso xa leswa ha taka.

23 Xikwembu Nkulukumba i mboni yanga ka leswaku a ni si ta Korinte hi leswi ni kalaka ni nga djuli ku mi yengesela ku vavisa.* 24 A hi leswaku ho fuma lipfumelo dzrenu, kambe hi tizra xikan’we na n’wine akuva mi nyonxa, hikusa mi yime mi tiya hi kola ka lipfumelo dzrenu.

2 Hikusa ni tiyimisele ku kala ni nga mi kwatisi loko ni tlhela ni mi yendzrela. 2 Hikusa loko ni mi kwatisa, i mani lweyi a taka ni nyonxisa loko ku nga li lweyi ni mu kwatisiki? 3 Ni mi tsralele papela akuva loko ni ta halanu ni nga kwatisiwi hi lava a va fanela ku ni nyonxisa, hikusa na tiyiseka leswaku leswi swi ni yentxaka ni nyonxa, na n’wine hinkwenu swi mi nyika ku nyonxa loku fanaka. 4 Hikusa ni mi tsralele na ni kazrateke ngopfu nakone na ni vavisekile a mbilwini, futsrhi na ni xiririka ni minyembeti, kambe a ni ngo djula ku mi kwatisa, a ni djula kuva mi swi tiva leswaku ni mi zrandzra ngopfu swinene.

5 Loko mhunu wa kukazri a mi kwatisile, a nga kwatisanga mine, kambe a kwatise n’wine hinkwenu. Kambe a ni djuli ku khanela swinyingi hi mhaka leyi. 6 A xilayu lexi vanyingi venu va mu nyikiki xone mhunu yelweyo xa yanela; 7 swoswi mi fanela ku mu dzrivalela hi mbilu hinkwayu mi tlhela mi mu txhavelela akuva a nga vaviseki ngopfu a za a godola.* 8 Xileswo ni mi tsratsriya kuva mi mu komba leswaku ma mu zrandzra. 9 Leswo i swin’wana swa leswi swi ni yentxiki ni mi tsralela papela: akuva mi ni tiyisekisa leswaku ma yingiseta ka mintxhumu hinkwayu. 10 Loko mi dzrivalela mhunu ntxhumu wa kukazri, na mine na mu dzrivalela. Nakunene, xin’wana ni xin’wana lexi ni xi dzrivaleliki (loko a li leswaku xi kone) ni swi yentxe akuva ku pfuneka n’wine nakone Kriste a ve mboni ya swone; 11 akuva hi nga hluliwi* hi Sathana, hikusa ha ma tiva mazrengu yake.*

12 Loko ni tlhase a Trowasi akuva ni zrezra madzrungula lamanene mayelanu na Kriste ni va ni pfulekeliwa hi mukhandlu* a ntizrweni wa Hosi, 13 a ni zrulanga* hi leswi ni kalaka ni nga mu kumanga Tito makwezru. Xileswo ni va lelelile ni gama ni suka ni ya a Makedoniya.

14 Kambe a ku tlangeliwi Xikwembu Nkulukumba, lweyi minkama hinkwayu a hi kongomisaka swanga masotxha lawa ma tlhelaka hi le yimpini na ma hlulile na hi li xikan’we na Kriste nakone hi ku tizrisa hine a hangalasaka ku nun’hwela ka wutivi byake* a mimbangwini hinkwayu! 15 Hikusa ka Xikwembu Nkulukumba hi ku nun’hwela loku nandzrikaka ka Kriste a xikazri ka lava yaka ku huluxiweni ni le xikazri ka lava yaka ku helisiweni; 16 ka lava wugamu,* hi ku nun’hwela ka lifu loku yisaka ku feni, ka lava ku sungula* hi ku nun’hwela ka wutomi loku yisaka a wuton’wini. I mani lweyi a faneliwaka hi mintxhumu leyi? 17 Hi hine, hikusa a hi vaxavisi* va zritu dzra Xikwembu Nkulukumba hi lani vanyingi va yentxaka ha kone, kambe hi vulavula ntiyiso swanga vhanu lava zrumiwiki hi Xikwembu Nkulukumba, ina, a mahlweni ka Xikwembu Nkulukumba na hi li kun’we na Kriste.

3 Xana swi vilela kuva hi tlhela hi mi byela leswaku hi hine vamani? Kumbe, xana swi vilela kuva hi mi nyika mapapela lawa ma hlayaka leswaku hi hine vamani kumbe n’wine mi hi nyika wone hi lani swi vilelekaka ha kone ka vhanu vambeni? Nikutsrongo. 2 N’wine mi papela dzrezru, ledzri tsraliwiki a timbilwini tezru nakone dzri tiviwaka dzri tlhela dzri dondzriwa hi vhanu hinkwavu. 3 Hikusa swi le livaleni leswaku n’wine mi papela dzra Kriste, ledzri tsraliwiki ha hine swanga vatizreli va Xikwembu Nkulukumba, a dzri tsraliwanga hi tinta, kambe dzri tsraliwe hi moya wa Xikwembu Nkulukumba lweyi a hanyaka, nakone a dzri tsraliwanga a mazribyeni, kambe dzri tsraliwe a timbilwini.

4 Xikwembu Nkulukumba a hi nyike ku dumba koloko hi ku tizrisa Kriste. 5 A hi leswaku ho faneleka ku yentxa ntizro wa Xikwembu Nkulukumba, kambe Xikwembu Nkulukumba hi yene a hi yentxaka hi fanekela ku yentxa ntizro lowu, 6 hi yene lweyi nakunene a hi yentxiki hi fanekela ku va vatizreli va xipfumelelanu leximpshwa, na hi nga kongomisiwi hi Nawu, kambe hi kongomisiwa hi moya; hikusa a Nawu wu yisa ku feni, kambe a moya wu nyika wutomi.

7 Loko Nawu lowu yisaka ku feni, lowu a wu tsraliwe mazribyeni, wu ve ni ku phatima lokukulu lakakuva a vana va Israyele va hluleka ni ku lavisisa wuso bya Moxe hi mhaka ya ku phatima ka wuso byake nambileswi a ku phatima koloko a ku ta helisiwa, 8 xana a ntizro wa moya a wu fanelanga wu va lowu phatimaka ngopfu swinene ku tlula wa Nawu? 9 Loko Nawu lowu tisaka lifu wu ve lowu phatimaka, a ku phatima loku taka tisiwa hi ntizro lowu yentxaka leswaku vhanu va voniwa va li lava lulamiki ku ta va kukulu ngopfu swinene! 10 Nakunene, nambi ku phatima ka Nawu ku ve loku ku kalaka ku nga li ka ntxhumu loko ku pimanisiwa ni ku phatima ka xipfumelelanu leximpshwa. 11 Hikusa loko Nawu lowu a wu ta helisiwa wu buyisiwe na wu li lowu phatimaka, a ku phatima ka xipfumelelanu leximpshwa lexi taka va kone hi lani ku nga helikiki i kukulu ngopfu swinene.

12 Leswi hi nga ni dumbo ledzro, hi vulavula na hi ntsrhunxekile, 13 nakone a hi yentxi leswi Moxe a swi yentxiki swa ku va a funeketa wuso byake akuva a vana va Israyele va nga langusisi leswi a swi ta yentxekela leswi a swi ta gama swi helisiwa. 14 Kambe a miyanakanyu yavu a yi tlanyalile. Hikusa ku ta tlhasa namunhla a panu yoleyo a yi susiwi loko ku dondzriwa xipfumelelanu xa khale, hikusa yi ngo susiwa hi Kriste ntsena. 15 Ku hlaya ntiyiso, ku ta tlhasa namunhla a timbilu tavu ta ha tama ti va leti funeketiwiki hi panu loko ku dondzriwa leswi tsraliwiki hi Moxe. 16 Kambe loko mhunu a txintxa mahanyela yake akuva a gandzrela Yehovha, a panu yo susiwa. 17 Yehovha i Moya,* nakone lani ku nga ni moya wa Yehovha ku ni ntsrhunxeko. 18 Futsrhi hinkwezru hi funukuliwiki wuso, hi fana ni swipelhu leswi kombekisaka ku phatima ka Yehovha, hi txintxiwa akuva hi fana na Xikwembu Nkulukumba ni ku va hi ya hi kombekisa ku phatima ka Xikwembu Nkulukumba akuva hi va xileswi Yehovha lweyi a nga Moya a* swi djulisaka xiswone.

4 Xileswo, leswi hi nga ni wutizreli lebyi hi kola ka timpswalu leti hi kombisiwiki tone, a hi godoli. 2 Kambe hi tsrhike mintxhumu ya tingana, leyi yentxiwaka a ku tumbeleni, a hi hanyi hi ku kanganyisa kumbe ku soholota zritu dzra Xikwembu Nkulukumba; kambe hi komba vhanu leswi nakunene a zritu dzra Xikwembu Nkulukumba dzri swi hlayaka. Nakone hi ku yentxa leswo, ka Xikwembu Nkulukumba hi xikombiso lexinene akuva mapfalu ya vhanu hinkwavu ma ta swi xiya. 3 Loko nakunene a madzrungula lamanene lawa hi ma zrezraka ma funeketiwile, ma funeketiwe ka lava va yaka ku helisiweni 4 lava nga liki vapfumeli, lava xikwembu xa misava leyi* xi va dlayiki matihlo ya miyanakanyu akuva ku vaninga loku phatimaka ka madzrungula lamanene mayelanu na Kriste, lweyi a nga xifaniso xa Xikwembu Nkulukumba, ku nga va vaningeli. 5 Hikusa a hi zrezri mayelanu na hine, kambe hi zrezra mayelanu ni leswaku Yesu Kriste i Hosi, ni ndlela leyi hi tiyentxiki swikazrawa swenu ha yone hi kola ka Kriste. 6 Hikusa Xikwembu Nkulukumba hi yene lweyi a hlayiki leswi: “A livaningu a dzri vaningi a munyameni”, nakone hi ku tizrisa wuso bya Kriste a vaninga a timbilwini tezru, akuva hi va vaningela hi wutivi lebyi hlamalisaka mayelanu na Xikwembu Nkulukumba.

7 Nambitanu, hi ni wukosi lebyi a swibyeni swa vumba,* akuva ntamu lowu tlulaka lowu tolovelekiki wu pfa hi ka Xikwembu Nkulukumba ku nga li kwezru. 8 Hi kamiwa hi swikazratu swa ku siyanasiyana hi matlhelo hinkwawu, kambe a hi kamiwi lakakuva hi hluleka ni ku timenxa; ha pfilunganyeka, kambe a hi pfilunganyeki lakakuva hi pfumala ni ndlela ya ku huma;* 9 ha xanisiwa, kambe Xikwembu Nkulukumba a nga hi tsrhiki wuswezru; ha tlatlalatiwa,* kambe a hi helisiwi.* 10 Kun’wana ni kun’wana lomu hi yaka kone hi langusana ni nghozi ya lifu hi lani swi viki ha kone ka Yesu, akuva hi va ni wutomi bya ku fana ni byake. 11 Hikusa hine hi hanyaka minkama hinkwayu hi langusana ni lifu hi kola ka Yesu, akuva vhanu va ta swi vona leswaku hi xaniseka ku fana na Yesu. 12 Xileswo, a lifu dzri tizra kwezru kambe a wutomi byi tizra kwenu.

13 Kutani leswi hi nga ni moya wa lipfumelo wa ku fana ni lowu ku tsraliwiki leswi mayelanu na wone: “Ni kombise lipfumelo, xileswo ni vulavulile”, na hine hi kombisa lipfumelo, xileswo ha vulavula, 14 na hi tiva leswaku lweyi a pfuxiki Yesu na hine a ta hi pfuxa kun’we na Yesu akuva hi ta va xikan’we na yene.* 15 Hikusa hinkwaswu leswi swi yentxeke hi mhaka yenu, akuva a timpswalu letikulu ti ya ti yengeseleka hikusa ku ya ku va ni vhanu vanyingi lava dzrumisaka Xikwembu Nkulukumba hi ku mu tlangela.

16 Xileswo a hi godoli, kambe nambiloko mhunu lweyi hi nga yene he handle a wonyeka, nakunene mhunu lweyi hi nga yene he ndzreni a ya a pfuxetiwa siku ni siku. 17 Hikusa nambiloko nhlomulo* wu li wa nkamanyana nakone wu vevuka, wu hi tisela lidzrumu ledzrikulu ngopfu swinene ledzri nga helikiki; 18 na hi nga tsrhameli ku pimisa hi mintxhumu leyi voniwaka, kambe hi pimisa hi mintxhumu leyi kalaka yi nga voniwi. Hikusa mintxhumu leyi voniwaka i ya nkamanyana, kambe leyi kalaka yi nga voniwi i ya hi lani ku nga helikiki.

5 Hikusa ha swi tiva leswaku a yindlu yezru ya lani misaveni, ku nga tende ledzri, yi ta hohlotiwa,* ni leswaku Xikwembu Nkulukumba a ta hi nyika yindlu a tilweni leyi taka tsrhama hi lani ku nga helikiki leyi kalaka yi nga yakiwanga hi mavoko. 2 Hikusa lani ka yindlu leyi* nakunene ha konya, hi swi navela ngopfu ku yambala yindlu yezru ya le tilweni, 3 akuva loko ku tlhasa nkama wa kuva hi yi yambala hi nga kumiwi na he dla. 4 Nakunene, hine hi konyaka ka tende ledzri, ha bindzriwa, hikusa a hi swi djuli ku dzri susa, kambe hi djula ku yambala dzrimbeni akuva leswi swi faka swi mintiwa hi wutomi. 5 Lweyi a hi lulamiseliki swoleswo i Xikwembu Nkulukumba, lweyi a nga yene a hi nyikiki moya wake swanga xitiyisekiso xa leswi swa ha taka.

6 Xileswo, minkama hinkwayu hi tiyiseka hi ku helela nakone ha swi tiva leswaku loko ha ha tsrhama ka mizri lowu, hi kule ni Hosi. 7 Hikusa hi famba hi lipfumelo ku nga li hi ku vona. 8 Kambe a hi ganaganeki, nakone a hi ta hlawula ku hanya ni Hosi hi suka ka mizri lowu. 9 Xileswo nambi hi hanya ni Hosi kumbe hi le kule na yone, hi tikazratela ku va lava yamukelekaka ka yone. 10 Hikusa hinkwezru hi fanela ku yima mahlweni ka xitsrhamu xa wuyavanyisi xa Kriste, akuva mun’wana ni mun’wana a hakeliwa hi ku ya hi leswi a swi yentxiki na a ha li mizrini, swi nga ha va swi li swinene kumbe swi li leswi bihiki.*

11 Xileswo, leswi hi tivaka leswi a ku txhava Hosi swi hlayaka swone, hi tama hi kholwisa vhanu leswi hi swi dondzrisaka, kambe Xikwembu Nkulukumba a hi tiva ha hombe. Nambitanu, ni laviseli kuva na wone mapfalu yenu ma hi tiva ha hombe. 12 A ho djula ku va hi tlhela hi tikulungela a mahlweni kwenu, kambe ho mi kutxa leswaku mi tikhuza ha hine akuva mi ta kota ku hlamula lava tikhuzaka hi ku ya hi leswi va nga xiswone he handle ku nga li hi leswi nga mbilwini. 13 Loko a li leswaku a ho hlanya, a hi hlanyela Xikwembu Nkulukumba; loko hi tiva, hi swi yentxela n’wine. 14 Hikusa a lizrandzru dzra Kriste dzra hi susumeta,* hikusa hi tlhasele wugamu bya leswaku: Mhunu mun’we a fele vhanu hinkwavu; xileswo hinkwavu a va file. 15 Nakone a fele hinkwavu akuva lava hanyaka va nga ha tihanyeli, kambe va hanyela lweyi a va feliki a tlhela a pfuxiwa.

16 Xileswo, ku sukela swoswi a ha ha va yavanyisi vhanu hi ku ya hi leswi va langutekisaka xiswone. Nambileswi hi samiki hi langusa Kriste hi ku ya hi leswi a langutekisaka xiswone, a ha ha swi yentxi leswo. 17 Xileswo lweyi a nga ni wumun’we na Kriste i xivumbiwa ximpshwa; a mintxhumu ya khale yi khalutile; lavisani! ku ni mintxhumu leyimpshwa. 18 Kambe a mintxhumu hinkwayu yi pfa ka Xikwembu Nkulukumba, lweyi a yentxiki leswaku hi tlhelelana na yene hi ku tizrisa Kriste nakone a hi nyikiki ntizro wa kuva hi pfuna vhanu akuva va tlhelelana na yene, 19 leswi liki, ntizro wa ku hlaya leswaku Xikwembu Nkulukumba hi ku tizrisa Kriste a a yentxa leswaku misava yi tlhelelana na yene, na a nga swi tekeli nhlokweni swihoxo swavu, nakone a hi nyiki dzrungula dzra ku yentxa leswaku vhanu va tlhelelana na yene.

20 Xileswo hi vayimeli lava sivaka Kriste, ingiki hi loko Xikwembu Nkulukumba a o tizrisa hine akuva a yentxa xikombelo. Swanga vhanu lava sivaka Kriste hi kombela leswi: “Tlhelelanani na Xikwembu Nkulukumba.” 21 Lweyi a a nga xi tivi xidoho, a ve mhamba ya xidoho hi mhaka yezru akuva hi kola kwake hi va lava lulamiki a mahlweni ka Xikwembu Nkulukumba.

6 Leswi hi tizrisanaka na yene, hi tlhela hi mi tsratsriya kuva mi nga yamukeli timpswalu letikulu ta Xikwembu Nkulukumba mi gama mi tlanga hi tone. 2 Hikusa a li: “Hi nkama lowu fanelekaka ni ku yingelile, nakone ni ku pfunile hi siku dzra ku huluxiwa.” Lavisani! Lowu hi wo nkama lowu fanelekaka. Lavisani! Ledzri hi dzro siku dzra ku huluxiwa.

3 A hi yentxi ntxhumu ni wun’we lowu taka yentxa van’wana va khunguvanyeka, akuva ku nga vi na mhunu lweyi a vulavulaka ku biha hi ntizro lowu hi wu yentxelaka Xikwembu Nkulukumba; 4 kambe ka hinkwaswu hi kombisa leswaku hi vatizreli va Xikwembu Nkulukumba, hi ku va hi tiyisela mindzringo yinyingi, mahlomulo, ku pfumala, swikazratu, 5 ku biwa, ku petiwa madjele, ku pfukeliwa hi switsrhungu leswi nga ni madzolonga, ku tizra yi nga txhayi, ku pfumala wuzrongo ni ku pfumala swakuda. 6 Hi tlhela hi swi kombisa hi ku hanya wutomi lebyi basiki, hi ku tiva ntiyiso, hi ku lehisa mbilu, hi wunene, hi ku pfumelela moya wa ku xwenga wu kongomisa wutomi byezru, hi ku kombisa lizrandzru dzra ntiyiso, 7 hi ku vulavula ntiyiso, hi ku dumba ntamu wa Xikwembu Nkulukumba, hi ku tamela matlhazri ya wululami a vokweni dzra xinene* ni dzra ximatsri,* 8 hi ku twalisiwa ni ku dzreliwa, hi ku va vhanu va vulavula swa ku biha va tlhela va vulavula swa swinene ha hine. A vhanu va li hi vakanganyisi nambileswi hi vulavulaka ntiyiso, 9 va li a hi tiviwi nambileswi hi tiviwaka, va li hi file* nambileswi hi hanyaka, va li ha khatisiwa* kambe a hi dlayiwi, 10 va yanakanya leswaku hi kwatile nambileswi hi tsrhamaka na hi nyonxile, va li hi swisiwana nambileswi hi ganyisaka vhanu vanyingi, va li a hi na ntxhumu nambileswi hi nga ni mintxhumu hinkwayu.

11 Hi pfule minomu yezru akuva hi vulavula na n’wine* vamakwezru va le Korinte, nakone hi mi pfulele timbilu tezru hi ku helela. 12 Hine a hi feleli ka ndlela leyi hi mi kombaka ha yone lizrandzru,* kambe n’wine ma felela ka ndlela leyi mi hi kombaka ha yone lizrandzru. 13 Ni vulavula na n’wine ingiki hi loko mi li vananga. Hi yentxelani leswi fanaka. Na n’wine hi pfulelani timbilu tenu hi ku helela.*

14 Mi nga zrwali mpinga wun’we* ni lava kalaka va nga li vapfumeli. Hikusa he kwini ku yelana loku nga kone a xikazri ka leswi lulamiki ni leswi bihiki?* Kumbe a livaningu ni munyama swi kumana kwini? 15 Kone he kwini ku twanana loku Kriste a nga na kone na Beliyali?* Kumbe he kwini ku kumana loku nga kone ka lweyi a nga mupfumeli* ni lweyi a kalaka a nga li mupfumeli? 16 Nakone he kwini ku twanana loku nga kone a xikazri ka tempele dzra Xikwembu Nkulukumba ni swikwembu swa madzrimi? Hikusa hine hi tempele dzra Xikwembu Nkulukumba lweyi a hanyaka; hi lani Xikwembu Nkulukumba a hlayiki ha kone a ku: “Ni ta tsrhama a makazri kwavu ni tlhela ni fambafamba a makazri kwavu, nakone ni ta va Xikwembu Nkulukumba wavu, vone va ta va vhanu vanga.” 17 “‘Xileswo sukani a makazri kwavu, mi titsravuxa kwavu’, ku hlaya Yehovha, ‘nakone tsrhikani ku khumba ntxhumu lowu kalaka wu nga basanga’”; “‘kutani ni ta mi yamukela’”. 18 “‘Ni ta va papayi wenu, n’wine mi ta va vana vanga va xinuna ni va xisati’, ku hlaya Yehovha, wa Ntamu Hinkwawu.”

7 Xileswo vazrandzriwa, leswi hi nga ni swidumbiso leswi, a hi tibasiseni ka hinkwaswu leswi ntxhimisaka mizri* ni moya, akuva hi va lava xwengiki hi ku helela swanga hi leswi hi txhavaka Xikwembu Nkulukumba.

2 Hi nyikani mbangu a timbilwini tenu. A hi dohelanga mhunu, a hi honanga miyanakanyu ni mbilu ya mhunu, a hi xololanga mhunu. 3 Leswi a ni swi hlayeli kuva ni mi nyika nandzru. Hikusa a ku sunguleni ni hlaye leswaku mi le timbilwini tezru nambiloko hi hanya kumbe hi fa. 4 Ni vulavula na n’wine na ni ntsrhunxeke ngopfu swinene. Ni tikhuza ngopfu swinene ha n’wine. Ni txhaveleleke ngopfu; ni tale hi ku nyonxa a mahlomulweni yezru hinkwawu.

5 Nakunene loko hi tlhase a Makedoniya a hi kumanga ku wisa, kambe hi tame hi kazrateka hi tindlela hinkwatu, leswi liki, a handle a ku ni ku lwa, a ndzreni a ku ni ku txhava. 6 Kambe Xikwembu Nkulukumba lweyi a txhavelelaka lava tsrhovekiki timbilu, a hi txhavelelile hi ku va Tito a hi yendzrela; 7 ku nga li ntsena hi ku va a hi yendzrelile, kambe ni hi ntxhavelelo lowu a wu kumiki kwenu, a hi byele leswaku mi swi djula ngopfu ku ni vona, leswaku mi khumbeke ngopfu, ni leswaku mi zron’weka ngopfu ha mine;* xileswo ni ye ni nyonxa ngopfu swinene.

8 Hikusa nambiloko ni mi kwatisile hi papela dzranga, a ni tisoli. Nambileswi a ku sunguleni ni tisoliki (hi ku vona leswaku a papela dzranga dzri mi kwatisile, nambileswi swi viki swa nkamanyana), 9 swoswi na nyonxa, na ku nga li hi leswi a mi kwatisiwile, kambe hi leswi a ku kwata kwenu ku mi yentxiki mi tisola. Hikusa a mi kwatisiwe hi ku ya hi ku zrandzra ka Xikwembu Nkulukumba, akuva mi nga luzekeliwi hi ntxhumu hi mhaka yezru. 10 Hikusa a ku kwata loku fambisanaka ni ku zrandzra ka Xikwembu Nkulukumba ku pswala ku tisola loku yisaka ku huluxiweni, nakone a ku yentxi mhunu a tilaya ha kone; kambe a ku kwata ka misava ku vanga lifu. 11 Vonani mabindzru lama viki kone hi leswi mi kwatiki hi ndlela leyi fambisanaka ni ku zrandzra ka Xikwembu Nkulukumba: Mi tibasisile, mi vaviseka hi mintxhumu ya ku biha leyi mi yi yentxiki, mi va ni xitxhavu lexikulu hi Xikwembu Nkulukumba, mi djula ku tisola, mi tizrela Xikwembu Nkulukumba hi mbilu yenu hinkwayu ni ku lulamisa swihoxo swenu! Mi tikombise mi li lava basiki* hi tindlela hinkwatu ka mintxhumu leyi. 12 Nambileswi ni mi tsraleliki, a ni mi tsralelanga hi mhaka ya lweyi a yentxiki xidoho kumbe hi mhaka ya lweyi a doheliwiki, kambe ni mi tsralele akuva a nkhinkhi wenu wa ku hi yingiseta wu voneka a mahlweni ka Xikwembu Nkulukumba. 13 Hi leswo swi hi yentxiki hi txhaveleleka.

Kambe handle ka ku va hi txhavelelekile, hi nyonxe ngopfu swinene hi ku nyonxa loku Tito a viki na kone, hi leswi hinkwenu mi mu tiyisiki. 14 Loko ni tikhuze a mahlweni kwake ha n’wine, a ni gamanga ni daniseka; kambe ku fana ni leswi a mintxhumu hinkwayu leyi hi mi byeliki yone a yi li ntiyiso, na ko ku tikhuza kwezru a mahlweni ka Tito ku tikombe ku li ka ntiyiso. 15 Nakone loko a dzrimuka ku yingiseta kwenu hinkwenu ni ndlela leyi mi mu yamukeliki ha yone hi xitxhavu lexikulu, swi mu yentxa a mi zrandzra ngopfu swinene. 16 Na nyonxa hi leswi ni nga mi dumbaka* ka mintxhumu hinkwayu.

8 Vamakwezru, swoswi hi djula mi tiva leswi timpswalu letikulu ta Xikwembu Nkulukumba ti swi hetisisiki a mabandleni ya le Makedoniya. 2 Hi nkama lowu a va kumana ni ku xaniseka a hansi ka ndzringo lowukulu, va hanane hi ku nyonxa lokukulu nambileswi a va li wusiwanini lebyikulu ngopfu swinene, leswo swi kombisa leswaku va hanana ngopfu. 3 Hikusa va hanane hi ku ya hi leswi a va li na swone, ina, futsrhi ni mboni ya leswaku va hanane ku tlula ni leswi a va li na swone, 4 hi ku swi zrandzra va hi kombele hi ku phindaphinda akuva va va ni ndjombo ya ku humesa swihanano leswaku va seketela ntizro wa ku pfuna vaxwengi. 5 Nakone va yentxe swa ku tlula leswi a hi swi laviselile, hikusa va zrange hi ku tikazratela ku tizrela Hosi hi mbilu yavu hinkwayu ni ku hi pfuna hi ku ya hi ku zrandzra ka Xikwembu Nkulukumba. 6 Xileswo hi kutxe Tito akuva a hetisa ntizro wa ku hlengeleta swihanano swenu swa ku tizrandzrela, swanga hi leswi ku nga yene lweyi a wu sunguliki. 7 Mi yentxa ha hombe ka hinkwaswu: a lipfumelo dzrenu dzri tiyile, mi ni wuswikoti ka ku vulavula, mi ni wutivi byinyingi, mi tikazrata ngopfu swinene ka hinkwaswu leswi mi swi yentxaka nakone mi va zrandzra hi kakunene van’wana ku fana ni leswi na hine hi mi zrandzraka, xileswo ingiki mi nga ya mahlweni mi tiyimisela ni ku hanana.

8 A hi leswaku no mi bekela nawu, kambe leswi ni swi hlayela kuva mi swi tiva leswi van’wana va tikazratisaka xiswone ni kuva ni vona leswaku ma va zrandzra vhanu van’wana hi kakunene ke. 9 Hikusa ma ti tiva timpswalu letikulu ta Hosi yezru Yesu Kriste, leswaku nambileswi a a ganyile, a ve xisiwana hi kola kwenu, akuva mi va lava ganyiki hi kola ka wusiwana byake.

10 Kutani a mhakeni leyi, a mavonela yanga hi lawa: Ku yentxa ntizro lowo swi pfuna n’wine, hikusa lembe ledzri khalutiki a me wu sungula ntsena kambe mi tlhele mi swi kombisa leswaku mi tiyimisele ku wu yentxa. 11 Xileswo swoswi, hetisani leswi mi swi sunguliki, akuva a ku tiyimisela kwenu ka ku wu yentxa ku hetiseka hi ku ya hi leswi mi nga na swone. 12 A nyiko leyi nyikeliwaka na swi sukela mbilwini yi yamukeleka ngopfu swinene ka Xikwembu Nkulukumba, hikusa Xikwembu Nkulukumba a yimela kuva mhunu a nyikela hi ku ya hi leswi swi nga ntan’wini wake ku nga li hi leswi nga liki ntan’wini wake. 13 Hikusa a ni djuli kuva ni nabyalisela van’wana kambe ni bindzrisela n’wine 14 kambe no djula leswaku ku va ni ku dzringana, akuva a ku taleliwa loku mi nga na kone swoswi ku yaneta swivileleko swavu, ku yentxela leswaku na ko ku taleliwa kwavu ku yaneta leswi swi mi kiyelelaka, hi ndlela leyo ku va ni ku dzringana. 15 Hi lani swi tsraliwiki ha kone: “Lweyi a a ni swinyingi a nga vanga ni swa swinyingi ngopfu, ni lweyi a a ni switsrongo a nga vanga ni swa switsrongo ngopfu.”

16 A ku tlangeliwi Xikwembu Nkulukumba hi leswi a nyikiki Tito mbilu ya ku mi zron’wekela ya ku fana ni leyi hine hi nga na yone ha n’wine, 17 hikusa nakunene a swi yamukelile leswi a kutxiwiki ku yentxa swone, nakone a swi djule ngopfu ku yentxa leswi hi mu kombeliki swone, xileswo awa mi tela hi ku swi zrandzra. 18 Kambe hi mu zrumela kun’we ni makwezru lweyi a tiviwaka a mabandleni hinkwawu hi mhaka ya leswi a swi yentxaka hi kola ka madzrungula lamanene. 19 Ku nga li leswo ntsena, kambe a patsre ni kuva a hlawuliwa hi mabandla akuva a yendzra na hine loko hi buyisa nyiko leyi akuva ku twalisiwa Hosi ni kuva ku tiyisekisiwa leswaku hi tiyimisele ku pfuna van’wana. 20 Kutani hi yentxa hinkwaswu akuva ku nga vi na lweyi a hi solaka ka swihanano leswi hi nyikiwiki ntizro wa kuva hi swi yavela. 21 Hikusa ‘hinkwaswu hi swi yentxa hi ku dumbeka, ku nga li ntsena mahlweni ka Yehovha kambe ni le mahlweni ka vhanu’.

22 Handle ka leswo, hi va zrumela na va li xikan’we ni makwezru lweyi a kambeliwiki makhambi manyingi ku va ku kumiwa leswaku awa hiseka ka mintxhumu yinyingi, kambe swoswi a hisekaka ngopfu swinene hi leswi a mi dumbaka ngopfu. 23 Loko ku ni ku ganaganeka ka kukazri mayelanu na Tito, yene i munghanu wanga nakone hi tizra xikan’we akuva ku pfuneka n’wine; kumbe loko ku ni ku ganaganeka ka kukazri mayelanu ni vamakwezru lava nga na yene, vone i vapostola va mabandla ni ku phatima ka Kriste. 24 Xileswo kombani vamakwezru lavo leswaku ma va zrandzra, mi tlhela mi komba ni mabandla leswaku ha yini hi tikhuze ha n’wine.

9 A swi vileli kuva ni mi tsralela akuva mi tiva leswaku mi fanela ku pfuna vaxwengi, 2 hikusa na ku tiva ku tiyimisela kwenu loku ni tikhuzaka ha kone ka Vamakedoniya, ka leswaku ku khaluta lembe na vamakwezru va le Akaya va tiyimiseli ku pfuna, nakone hi mhaka ya nkhinkhi wenu vanyingi vavu va ve ni ku tiyimisela loku fanaka. 3 Kambe ni zrumela vamakwezru akuva ku tikhuza kwezru ha n’wine a mhakeni leyi ku nga vi ka mahala, ni leswaku mi tiyimisela ku pfuna, hi lani ni va byeliki ha kone ni ku mi tiyimiselile. 4 Hikusa loko a no ta halanu ni Vamakedoniya hi gama hi mi kuma na mi nga tiyimiselanga, a hi ta daniseka hi leswi hi mi dumbaka, kambe na n’wine a mi ta daniseka. 5 Xileswo, ni swi vone na swi vileleka kuva ni kutxa vamakwezru akuva va zranga va buya na ka ha li ni nkama leswaku va ta hlengeleta swihanano leswi mi swi dumbisiki, akuva swi tsrhama na swi lulamile swanga mintxhumu leyi nyikeliwiki hi ku swi zrandzra ku nga li hi ku sindzrisiwa.

6 Kambe dzrimukani leswi, lweyi a byalaka kutsrongo a ta tsrhovela switsrongo, nakone lweyi a byalaka ngopfu a ta tsrhovela swinyingi. 7 Mun’wana ni mun’wana a a yentxi hi lani a titsrimbeliki ha kone a mbilwini yake, na a nga nguranguri* kumbe ku sindzriseka, hikusa Xikwembu Nkulukumba a zrandzra lweyi a hananaka na a nyonxile.

8 Handle ka leswo, Xikwembu Nkulukumba awa swi kota ku yentxa leswaku mi taleliwa hi timpswalu take letikulu akuva minkama hinkwayu mi va ni hinkwaswu leswi mi swi vilelaka, leswaku mi va ni swinyingi akuva mi kota ku yentxa ntizro lowunene. 9 (Hi lani swi tsraliwiki ha kone: “A hanana ngopfu; a nyika swisiwana. A wululami byake byi tsrhama hi lani ku nga helikiki.” 10 Kutani lweyi a hananaka mudzrimi a mbewu ya yinyingi a tlhela a mu nyika pawu akuva a da, a ta mi nyika mbewu a tlhela a mi yandzrisela yone akuva mi yi byala nakone a ta mi pfuna leswaku mi tsrhovela swinyingi a mintizrweni yenu ya ku lulama.) 11 Xikwembu Nkulukumba a mi tovokisa ngopfu swinene akuva mi ta kota ku hanana hi tindlela hinkwatu, nakone vhanu va ta tlangela Xikwembu Nkulukumba hi kola ka nyiko yenu leyi hi taka va nyika yone; 12 hikusa a mpfunu lowu a wu yentxeliwanga ku yanelisa swivileleko swa vaxwengi ntsena kambe ni ku yentxa leswaku vhanu vanyingi va kota ku tlangela Xikwembu Nkulukumba hi kola ka wone. 13 Leswi mi swi yentxiki swi kombisa wumhunu byenu, nakone hi kola ka swone va dzrumisa Xikwembu Nkulukumba hikusa ma ma yingiseta madzrungula lamanene lawa mi ma zrezraka mayelanu na Kriste, ni hi leswi mi va hananaka ngopfu, vone kun’we ni vhanu hinkwavu. 14 Nakone hi ku mi khongotelela, va kombisa leswaku va mi zrandzra hi kola ka timpswalu letikulu ta Xikwembu Nkulukumba leti mi kombisiwiki tone.

15 A ku tlangeliwi Xikwembu Nkulukumba hi kola ka nyiko yake ya mahala leyi swi nga kotekiki ku yi tlhamuxela.

10 Mine Pawulo, na mi tsratsriya hi ku zrula ni wunene bya Kriste, mine lweyi van’we venu va liki a ni wa ntxhumu loko ni li na n’wine halanu, kambe va liki ni ni xixixi loko ni yentxa hi ku mi tsralela. 2 Ni yimela leswaku loko ni ta halanu, lava yanakanyaka leswaku hi ni mayanakanyela ya misava* va va na va txintxile akuva swi nge ti vilela kuva ni va laya hi ndlela ya ku vavisa. 3 Nambileswi hi hanyaka misaveni leyi,* a hi lwi yimpi hi ku ya hi mayanakanyela ya vhanu va misava. 4 Hikusa a matlhazri ya yimpi yezru a hi ya misava leyi,* kambe i matlhazri ya ntamu lawa Xikwembu Nkulukumba a hi nyikiki wone akuva ku tsruvuliwa mintxhumu leyi dzimiki ni timitsru. 5 Hikusa hi hahlulela miyanakanyu ni swihinga hinkwaswu leswi va ka kone akuva swi lwisana ni wutivi bya Xikwembu Nkulukumba, nakone hi yentxa miyanakanyu hinkwayu yi va swib’otxhwa akuva yi yingiseta Kriste; 6 nakone lani mi taka kombisa leswaku mi yingiseta hi ku helela, hi ta va na hi lulameli ku khatisa mun’wana ni mun’wana lweyi a kalaka a nga yingiseti.

7 Mi yavanyisa mintxhumu hi ku ya hi leswi yi langutekisaka xiswone. Loko mhunu a tiyiseka leswaku a lumba Kriste a a tlheli a yanakanyisisa hi leswi: Ku fana ni leswi yene a lumbaka Kriste na hine hi lumba Kriste. 8 Hikusa nambiloko a no tikulisa ni tlulanyana ni mpimu hi mhaka ya wulawuli lebyi Hosi yi hi nyikiki byone akuva hi mi yaka ku nga li ku mi hohlota, a ni nge ti va ni tingana ha swone. 9 Hikusa a ni djuli ku voneka ingiki hi loko no zama ku mi txhavisela hi mapapela yanga. 10 Hikusa va li: “A mapapela yake ma ni lisima nakone i ya ntamu, kambe loko a yentxa hi ku ta a hi wa ntxhumu, ni leswi a swi vulavulaka a swi pfuni ntxhumu.” 11 A vhanu lava hlayaka leswo, a va swi tivi leswaku leswi hi swi hlayaka* hi mapapela na hi nga li kone hi swoswo hi taka swi yentxa* loko hi buya. 12 Hikusa a hi nge txhuki hi tidzringanisa kumbe ku tifananisa ni lava va tikulungelaka hi wuswavu. Kambe hi ku va va tipimanisa ni ku tiyavanyisa hi wuswavu hi ku ya hi leswi vone va tibyelaka leswaku i swinene, swi kombisa leswaku a va na ku twisisa.

13 Nambitanu, hine a hi nge ti tikhuza hi leswi swi nga handle ka ndzrilakanu lowu hi tsremeliwiki wone,* kambe hi to tikhuza ntsena hi leswi nga ndzreni ka ndzrilakanu lowu Xikwembu Nkulukumba a hi bekeliki wone, lowu fambaka nambi ku ya tlhasa lomu n’wine mi nga kone. 14 Nakunene loko hi mi yendzrelile a hi ngo yentxa swa ku tlula leswi Xikwembu Nkulukumba a hi yaveliki swone, hikusa hi hine hi viki va ku sungula ku mi zrezrela madzrungula lamanene mayelanu na Kriste. 15 A hi tikhuzi hi leswi swi nga handle ka ndzrilakanu wezru, leswi liki, hi ntizro wa vambeni, kambe hi yimela leswaku a nkama lowu a lipfumelo dzrenu dzri yaka dzri kula, a ntizro lowu hi wu yentxiki wu ya wu kula a ndzreni ka mindzrilakanu yezru. Kutani hi ta va ni mintizro yinyingi, 16 akuva hi ta zrezra madzrungula lamanene a matikweni ya le kule ku tlula lani n’wine mi nga kone, ku yentxela leswaku hi nga tikhuzi hi leswi van’wana va swi yentxiki a mimbangwini yavu. 17 “Kambe lweyi a tikhuzaka, a a tikhuzi ha Yehovha.” 18 Hikusa lweyi a yamukeliwaka a hi lweyi a tikulungelaka ha wuswake kambe hi lweyi a kulungeliwaka hi Yehovha.

11 Nambileswi ni tikombaka ni li xiphunta, ni navela leswaku mi ni lehisela mbilu. Kambe nakunene na swi vona leswaku ma ni lehisela mbilu! 2 Ni ni wukwele ha n’wine, ku fana ni leswi Xikwembu Nkulukumba a nga ni wukwele,* hikusa ni mi dumbise leswaku mi ta txhatiwa hi wanuna mun’we, ku nga Kriste, nakone ni djula ku mi nyikela kwake na mi li van’hwanyana* lava basiki. 3 Kambe ku fana ni leswi nyoka yi kanganyisiki Evha hi maqhinga ya yone, ni txhava leswaku a miyanakanyu yenu yi honiwa lakakuva mi nga ha dumbeki nakone mi nga ha hanyi hi ndlela leyi basiki hi lani mi fanelaka ku tikombekisa ha kone mahlweni ka Kriste. 4 Ni hlaya leswo hikusa loko ku humelela mhunu wa kukazri, a ta zrezra hi ta Yesu wa ku hambana ni lweyi hi zrezraka mayelanu na yene, kumbe a mi tisela moya wa ku hambana ni lowu mi yamukeliki wone, kumbe madzrungula lamanene ya ku hambana ni lawa mi ma yamukeliki, ma mu yingiseta. 5 Hikusa a vapostola venu lava tiyentxaka vapostola lavakulu, a ni va voni na va ni tlula hi ntxhumu. 6 Kambe nambiloko ni nga na wuswikoti ka ku vulavula, ni ni wutivi; nakunene leswo hi mi kombe ha hombe hi tindlela hinkwatu ni le ka mintxhumu hinkwayu.

7 Kumbe ne doha hi ku va ni mi zrezrele madzrungula lamanene ya Xikwembu Nkulukumba hi ku swi zrandzra ni hi mahala, ni hi leswi ni titsrongahatiki akuva mi kota ku tlakuxiwa? 8 Ni yamukele mpfunu lowu mabandla man’wana ma ni nyikiki wone, nakone leswo swi fana ni loko ne ma yivela akuva ni tizrela n’wine. 9 Nambitanu, loko ni ve na n’wine halanu ni va ni pfumala swa kukazri, a nga kone ni mun’we wenu lweyi ni viki ntsrhwalu kwake, hikusa vamakwezru lava a va ta hi le Makedoniya va ni pfune ka swivileleko swanga hinkwaswu. Ina, ni yentxe hinkwaswu leswi a ni swi kota akuva ni nga vi ntsrhwalu kwenu nakone ni ta tama ni yentxa swoswo. 10 Loko na ha li mulandzreli wa Kriste, a ni nge ti tsrhika ku tikhuza hi leswo a migangeni ya Akaya. 11 Ha yini ni nga djulanga ku va ntsrhwalu kwenu? No kala ni nga mi zrandzri? Xikwembu Nkulukumba awa swi tiva leswaku na mi zrandzra.

12 Kambe leswi ni swi yentxaka ni ta tama ni swi yentxa, akuva lava va djulaka ku voniwa va li lava fanaka na hine, nakone va tikhuzaka hi mintxhumu leyi va yi yentxaka, va nga kumi xivangelo xa ku swi yentxa. 13 Hikusa vhanu volavo i vapostola va madzrimi, vatizri lava kanganyisaka, lava tiyentxaka ingiki i vapostola va Kriste. 14 Nakone leswo a swi hlamalisi, hikusa nambi Sathana a tsrhamela ku tiyentxa ntsrumi ya yinene.* 15 Xileswo a swi hlamalisi loko na vone vatizri vake va tsrhamela ku tiyentxa vatizri va leswa ku lulama. Kambe hi wugamu va ta tsrhovela leswi va swi byalaka.

16 Ni tlhela ni hlaya: Mi nga yanakanyeni leswaku ni xiphunta. Kambe nambiloko mi ni vona ingiki no va xiphunta ni yamukelani, akuva na mine ni ta kota ku tikhuzanyana. 17 Leswi ni swi hlayaka swoswi a ni swi hlayi hi ku landzrela xikombiso xa Hosi, kambe ni swi hlaya ku fana ni mhunu lweyi a nga xiphunta lweyi a tidumbaka a tlhela a tikhuza. 18 Leswi vanyingi va tikhuzaka hi mintxhumu ya misava leyi,* na mine ni ta tikhuza. 19 Leswi n’wine mi liki ma “tiva”, ha yini mi nga va lehiseli mbilu lava va nga swiphunta. 20 Nakunene, mi lehisela mbilu mun’wana ni mun’wana lweyi a mi yentxaka swikazrawa, lweyi a mi xololaka, lweyi a mi wutlelaka mintxhumu yenu, lweyi a tibyelaka mahlweni kwenu, ni lweyi a mi baka wuso.

21 Swa danisa ku va hi hlaya leswi, hikusa mi nga ha hi vona ingiki he tsrana.*

Kambe loko van’wana va nga dani ku tikhuza, na mine a ni dani, nambileswi van’wana va nga ha ni vonaka ingiki no va xiphunta. 22 Xana vone i Vaheberu? Na mine ni yene. Xana i Vaisrayele? Na mine ni yene. Xana i vana va* Abrahamu? Na mine ni yene. 23 Xana i vatizreli va Kriste? Ni hlamula ku fana ni mhunu lweyi a hlanyaka ni ku: Hi mine mutizri lwenkulu ku tlula hinkwavu: Ni tizre ngopfu swinene, ni pfaleliwe djele makhambi manyingi, ni biwe makhambi manyingi lawa ni hlulekaka ni ku ma hlaya, nakone makhambi manyingi ni ve kusuhi swinene ni ku fa. 24 Ku dzringana ntlhanu wa makhambi ni biwe 39 wa minkhavi, 25 makhambi mazrazru ni biwe hi tinhonga, khambi dzrin’we ni khandliwe hi mazribye, ni tsrhovekeliwe hi boti kazrazru, ni hete siku dzrin’we ni wusiku bya kone a makazri ka lwandle; 26 ni yendzre makhambi manyingi, ni ve tinghozini tinyingi ta milambu, ta vayivi, ta vhanu va tiko dzranga, ta vhanu va matiko man’wana, ni ve tinghozini a doropeni, a mananga, a lwandle, ni ve tinghozini a xikazri ka vamakwezru va madzrimi, 27 ni tizre yi nga txhayi, ni ve ni wusiku byinyingi na ni nga yetleli, ni biwe hi ndlala ni tozra, makhambi manyingi ni pfumali swakuda, ni biwe hi xizrami ni pfumala ni xa ku xi yambala.*

28 Handle ka mintxhumu leyo ya le handle, ku ni lexi xi ni bindzraka siku ni siku, ku nga: Ku kazrateka* hi mabandla hinkwawu. 29 I mani a helaka ntamu mine swi nga ni khumbi leswo?* I mani lweyi a hambukaka swi gama swi nga ni kwatisi?

30 Loko swi djula kuva ni tikhuza ni ta tikhuza hi mintxhumu leyi kombisaka ku tsrana kwanga. 31 Xikwembu Nkulukumba tlhelo Papayi wa Hosi Yesu, lweyi a faneliwaka hi ku dzrumisiwa hi lani ku nga helikiki, awa swi tiva leswaku a ni hembi. 32 A Damaska, govhernadori lweyi a a fumiwa hi hosi Areta a beke vazrindzri a tinyangweni ta doropa akuva a ni khoma, 33 kambe ni game ni xixiwa hi janela ledzri a dzri li ka khumbi dzra doropa na ni li ndzreni ka ntsrhava,* kutani ni hulukisa xiswoswo a mavokweni yake.

12 Ni fanela ku tikhuza, nambileswi ni kalaka ni nge ti ganya ntxhumu ha swone. Nambitanu ni ta mi byela swivoniso leswi Hosi yi ni kombiki swone ni madzrungula lawa yi ni nyikiki wone. 2 Ni tiva wanuna wa kukazri lweyi a nga mudondzrisiwa wa Kriste,* lweyi ka 14 wa malembe lawa ma khalutiki a tekiwiki a yisiwa ka tilo dzra wuzrazru, leswaku a tekiwe na a ni mizri wa nyama kumbe im-him a ni swi tivi, kambe Xikwembu Nkulukumba awa swi tiva. 3 Ina, na mu tiva wanuna lweyo, leswaku a a ni mizri wa nyama kumbe im-him a ni swi tivi, kambe Xikwembu Nkulukumba awa swi tiva. 4 A tekiwe a yisiwa paradeyisi, nakone a yingele mazritu ya ku a ma nge hlayiwi futsrhi swi kalaka swi nga pfumeleliwi kuva mhunu a ma hlaya. 5 Ni ta tikhuza hi wanuna lweyo, kambe a ni nge ti tikhuza hi mine n’winyi, loko ku nga li ntsena hi ku tsrana kwanga. 6 Nambiloko a no tikhuza, a ni nge ti va xiphunta, hikusa a ni ta hlaya ntiyiso. Kambe a ni swi yentxi leswo, akuva ku nga vi na mhunu lweyi a ni nyikaka lidzrumu dzra dzrikulu dzra ku tlula leswi a swi vonaka kumbe ku swi twa kwanga, 7 ntsena hi leswi ni pfuleteliwiki* madzrungula lawa ya ku hlamalisa.

Akuva ni nga tikulisi, ni nyikiwe mutwa a nyameni, ku nga ntsrumi ya kukazri ya Sathana, akuva yi tsrhamela ku ni yamasela,* ku yentxela leswaku ni nga tikulisi ngopfu. 8 Ni kombele Hosi mayelanu ni mhaka leyi ku dzringana makhambi mazrazru, akuva yi ni susa mutwa wolowo. 9 Kambe a Hosi yi ni byele yi ku: “A timpswalu letikulu leti ni ku kombiki tone ta ku dzringana, hikusa ntamu wanga wu kombisiwa hi ku helela loko u tsranile.” Kutani ni ta tikhuza hi ku tsrana kwanga na ni nyonxe ngopfu swinene, akuva ntamu wa Kriste wu tama wu va henhla kwanga ku fana ni tende. 10 Xileswo na nyonxa loko ni tsrana, loko ni zrukiwa, loko ni li ku pfumaleni, loko ni xanisiwa ni loko ni kumana ni swikazratu hi kola ka Kriste. Hikusa loko ni tsranile, hi kone ni nga ni ntamu.

11 Ni vulavule ingiki no va xiphunta hi mhaka yenu. Hikusa a mi fanela ku va mi ni kulungelile. Hikusa a ku na ntxhumu ni wun’we lowu ka wone ni tikombiki ni li ntsrongo ka vapostola venu lava tiyentxaka vapostola lavakulu, nambiloko ni nga li wa ntxhumu a matihlweni yenu. 12 Nakunene, n’wine ha wuswenu mi swi vonile switiyisekiso swa leswaku ni mupostola, leswi ni swi kombisiki hi ku tiyisela lokukulu, mahlolana, swihlamaliso ni hi mintizro ya ntamu. 13 Ntxhumu wun’we lowu wu yentxiki leswaku mi va vatsrongo loko mi pimanisiwa ni mabandla man’wana, i kuva ni nga vanga ntsrhwalu kwenu. Ni dzrivalelani ka xihoxo lexo.

14 Lavisani! Ledzri i khambi dzra wuzrazru na ni tiyimisele ku mi yendzrela, nakone a ni nge ti va ntsrhwalu kwenu. Hikusa a ni djuli mintxhumu yenu, kambe ni djula n’wine; hikusa a vana a hi vone va fanelaka ku hlengeletelela vapswele vavu pfindla, kambe a vapswele hi vone va fanelaka ku hlengeletelela vanavu pfindla. 15 Ni ta nyikela hinkwaswu leswi ni nga na swone ni tlhela ni nyikela ni wutomi byanga hi kola kwenu.* Leswi mine ni mi zrandzraka ngopfu swinene, xana mine ni fanela ku zrandzriwa kutsrongo ke? 16 Nambileswi ni kalaka ni nga vanga ntsrhwalu kwenu, mi li “ni mi kanganyisile” ni tlhela ni mi phasa “hi maqhinga”. 17 Xana ku ni leswi ni mi londzrovotiki ka swone hi ku tizrisa vhanu lava ni va zrumeliki halanu kwenu? 18 Ni tsratsriye Tito leswaku a ta halanu, nakone ni mu zrumele xikan’we ni makwezru mun’wana. Tito a nga zanga a mi londzrovota, a hi swone ke? Mine na Tito hi ve ni wumun’we ka leswi hi swi yentxiki, a hi swone ke? Hi yentxe mintxhumu hi ndlela leyi fanaka, a hi swone ke?

19 Xana nkama lowu hinkwawu a mi pimisa leswaku a ho tiyimelela kwenu? Hine hi valandzreli va Kriste nakone Xikwembu Nkulukumba awa swi tiva leswaku leswi hi swi hlayaka i ntiyiso. Kambe vazrandzriwa, hinkwaswu leswi hi swi yentxaka hi swi yentxela ku mi tiyisa. 20 Hikusa ni txhava leswaku loko ni tlhasa halanu, ni txhuka ni nga mi kumisi xileswi a ni navela ku mi kumisa xiswone nakone ni nga vi xileswi a mi navela kuva ni va xiswone, kambe ku hambana ni leswo, ni txhuka ni kuma na ku ni timholova, wukwele, mahlundzru, ku kanetana, ku lumbetana, mahlevo, ku tikukumuxa ni mpfilumpfilu. 21 Kumbexana loko ni tlhela ni ta, Xikwembu Nkulukumba wanga a ta ni tsrhika ni daniseka makazri kwenu, lakakuva swi sindzrisa kuva ni xukuvala hi mhaka vhanu vanyingi lava samiki va doha kambe va kalaka va nga tisolanga a nsileni yavu, ka swiyentxo swa tingana hi tlhelo dzra tinkuku* ni le ka mahanyela ya ku biha* lawa va viki na wone.

13 Ledzri i khambi dzra wuzrazru na ni tilulamiselela ku mi yendzrela. “A mhaka yin’wana ni yin’wana yi fanela ku tiyisekisiwa hi wumboni bya* timboni tibidzri kumbe tizrazru.” 2 Nambileswi swoswi ni kalaka ni nga li halanu, swi fana ni loko ni li kwahalanu hi khambi dzra wubidzri, kutani ni basopisa lava samiki va doha ni lavan’wana hinkwavu, leswaku loko no txhuka ni tlhela ni ta halanu, a ni nge ti va tsretsrelela, 3 swanga hi leswi mi djulaka xitiyisekiso xa leswaku Kriste, lweyi a kalaka a nga tsrananga kambe a kombisaka ntamu wake lowukulu a makazri kwenu, kunenenene a vulavula hi ku tizrisa mine. 4 Hikusa nakunene, a dlayiwile a mhandzrini na a li mhunu lweyi a tsraniki, kambe awa hanya hi kola ka ntamu wa Xikwembu Nkulukumba. I ntiyiso, na hine swoswi hi tsranile ku fana ni leswi yene a a tsranile, kambe hi ta hanya xikan’we na yene hi kola ka ntamu wa Xikwembu Nkulukumba lowu tizraka kwenu.

5 Tamani mi tikambela, akuva mi vona leswaku ma ha li lipfumelweni ke; tamani mi kombisa leswi nakunene mi nga swone. Kumbe mo kala mi nga swi tivi leswaku Yesu Kriste a ni wumun’we na n’wine? Nambitanu, Kriste a a ta va a nge na wumun’we na n’wine loko a li ku a mi yamukeleki. 6 Na dumba leswaku mi ta swi xiya leswaku hine ha yamukeleka.

7 Hi khongota ka Xikwembu Nkulukumba akuva mi nga yentxi ntxhumu lowu hoxekiki, ku nga li kuva hi ta tikomba hi li lava yamukelekaka, kambe akuva mi yentxa leswinene, nambiloko hi tikomba hi li lava kalaka va nga yamukeleki. 8 Hikusa a hi nge yentxi ntxhumu lowu lwisanaka ni ntiyiso, kambe ntsena lowu wu wu seketelaka. 9 Nakunene ha nyonxa loko hine hi tsranile kambe n’wine mi ni ntamu. Nakone leswi hi swi khongotelelaka, i kuva mi tlhela mi lulamisa mayanakanyela yenu. 10 Hi leswo swi ni yentxaka ni mi tsralela mintxhumu leyi, akuva loko ni li na n’wine halanu, ni nga sindzriseki ku byi tizrisa hi ndlela ya ku biha wulawuli lebyi ni nyikiwiki byone hi Hosi akuva ni mi tiyisa ku nga li kuva ni mi hohlota.

11 Hi wugamu vamakwezru, yanani mahlweni mi nyonxa, mi lulamisa mayanakanyela yenu, mi pfumela ku txhaveleliwa hi van’wana, mi va ni mimpimiso yin’we, mi hanya hi ku zrula; kutani Xikwembu Nkulukumba wa lizrandzru ni ku zrula a ta va na n’wine. 12 Losananani hi ku n’quntana ka ku xwenga. 13 A vaxwengi hinkwavu va mi dzrungula.

14 A timpswalu letikulu ta Hosi Yesu Kriste, a lizrandzru dzra Xikwembu Nkulukumba ni moya wa ku xwenga lowu mi pfunekaka ha wone, a swi ve na n’wine.