PAPELA LEDZRI YAKA KA VAFILIPIYA

1 Mine Pawulo, na Timotewu, swikazrawa swa* Kriste Yesu, hi tsralela vaxwengi hinkwavu lava lumbaka Kriste Yesu lava nga Filipiya, ku patsra ni vakulu* ni malandzra ya wutizreli:

2 A timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste, a swi ve na n’wine.

3 Minkama hinkwayu loko ni mi dzrimuka ni tlangela Xikwembu Nkulukumba wanga 4 ka xikombelo* xin’wana ni xin’wana lexi ni xi yentxelaka n’wine hinkwenu. Nakone xikombelo xin’wana ni xin’wana ni xi hamba hi ku nyonxa, 5 hi kola ka ntizro* wenu a ku hangalaseni ka madzrungula lamanene ku sukela ka siku ledzri mi ma yamukeliki ha dzrone ku ta tlhasa swoswi. 6 Ni ni ku dumba ka leswaku leswi Xikwembu Nkulukumba a sunguliki ntizro lowunene ka n’wine a ta wu hetisa ku ya tlhasa sikwini dzra Kriste Yesu. 7 I swinene kuva ni pimisa hi ndlela leyi ha n’wine hinkwenu, hikusa mi le mbilwini yanga, nakone hi tikholisa kun’we hi timpswalu letikulu ta Xikwembu Nkulukumba, futsrhi mi ni seketelile nkama lowu a ni li djele ni nkama lowu ni nga lwela ni ku simeka madzrungula lamanene hi ku ya hi nawu.

8 Nambi Xikwembu Nkulukumba awa swi tiva* leswaku ni mi xuva ngopfu swinene, a lizrandzru ledzri ni nga na dzrone ha n’wine dzri fana ni ledzri Kriste Yesu a nga na dzrone ha n’wine. 9 Nakone ni ya mahlweni ni khongota leswaku a lizrandzru dzrenu dzri ya dzri kula swinene hi wutivi bya ntiyiso ni ku twisisa loku yentiki. 10 Ni tlhela ni khongota leswaku mi tiva leswi nga swa lisima ngopfu, akuva mi nga vi na xisolo nakone mi nga khunguvanyisi* van’wana ku ya tlhasa a sikwini dzra Kriste; 11 ni khongota ni leswaku mi tala hi mintizro leyinene leyi* Yesu Kriste a yi yentxaka hi ku tizrisa hine, akuva ku twalisiwa ni ku dzrumisiwa Xikwembu Nkulukumba.

12 Vamakwezru, ni djula mi swi tiva leswaku xiyimu lexi ni nga ka xone swoswi xi yentxa leswaku a madzrungula lamanene ma ya ma hangalasiwa. 13 A ku khomiwa kwanga hi leswi ni nga mulandzreli wa Kriste ku tiviwe hi vazrindzri hinkwavu va yindlu ya wuhosi ni hi vhanu vanyingi. 14 Ntalu wa vamakwezru a Hosini va kuma ku tiyisiwa hi ku khomiwa kwanga, nakone va ya va kombisa xixixi a ku twaliseni ka zritu dzra Xikwembu Nkulukumba na va nga txhavi ntxhumu.

15 I ntiyiso leswaku van’wana va zrezra mayelanu na Kriste hi ku tsrhohokana ni hi ku phikisana, kambe van’wana va zrezra hi nkongometo lowunene. 16 Lava zrezraka hi nkongometo lowunene, va zrezra mayelanu na Kriste hi lizrandzru hikusa va swi tiva leswaku ni bekiwe kuva ni lwela madzrungula lamanene; 17 kambe lava ku sungula va swi yentxa hi ku lwetana, ku nga li hi nkongometo lowunene, va djula ku ni yengetelela mahlomulo leswi ni nga djele. 18 Hi wani mabindzru ya kone? Hi tindlela hinkwatu, ya wukanganyisi ni ya ntiyiso, Kriste a ya mahlweni a twalisiwa, kutani leswo swa ni nyonxisa. Nakunene, ni ta ya mahlweni ni nyonxa, 19 hikusa na swi tiva leswaku leswo swi ta yentxa leswaku ni huluxiwa hi kola ka swikombelo swenu ni hi ku pfuniwa hi moya wa ku xwenga lowu Yesu Kriste a wu tizrisaka akuva a hi pfuna. 20 Leswi swi fambisana ni ku lavisela lokukulu ni ku dumba loku ni nga na kone ka leswaku a ni nge ti khomisiwa tingana nikutsrongo hikusa na tiyiseka leswaku hi ku vulavula hi ku ntsrhunxeka, Kriste a ta twalisiwa swoswi hi lani minkama hinkwayu swi viki ha kone, a ta twalisiwa hi kola ka mizri wanga, nambiloko ni hanya kumbe ni file.

21 Hikusa mine, loko ni hanya ni hanyela Kriste kambe ni loko ni fa swi ta va swinene ngopfu. 22 Loko swi fanela ku tama ni hanya mizrini lowu, swi hlaya leswaku ni ta tama ni bindzrula ntizrweni wa Kriste kambe a ni swi tivi leswaku ni nga hlawula yini. 23 A ni swi tivi leswaku ni ta hlawula yini ka leswibidzri, hikusa na swi navela a ku ntsrhunxiwa ni ya va kun’we na Kriste, leswi nakunene swi nga swone swa ku yampswa ngopfu. 24 Nambitanu, swi vileleka ngopfu kuva ni ya mahlweni ni mizri lowu akuva ku pfuneka n’wine. 25 Kutani hi mhaka leyo, na dumba leswaku ni ta tama ni va na n’wine hinkwenu akuva mi ta ya mahlweni mi kula ni ku nyonxa lipfumelweni, 26 hikusa loko ni tlhela ni va na n’wine a ku nyonxa kwenu swanga vadondzrisiwa va Kriste Yesu ku ta ya ku yengeteleka hi mhaka yanga.

27 Hanyani ntsena hi ndlela leyi fambisanaka ni madzrungula lamanene mayelanu na Kriste, akuva nambiloko ni li na n’wine kumbe ni nga li na n’wine, ni yingela ni ku tiva leswaku mi yima mi tiyile hi moya wun’we mi nga lwisani kambe mi tikazratela ku tizrisana hi kola ka lipfumelo ka madzrungula lamanene. 28 Mi nga txhuki mi txhavisiwa hi valala venu. A ku tiya kwenu ku hlaya ku helisiwa kwavu, kambe ka n’wine ku hlaya ku huluxiwa; leswo swi pfa ka Xikwembu Nkulukumba. 29 Hikusa mi nyikiwe ndjombo hi kola ka Kriste, ku nga li ntsena akuva mi ta kombisa lipfumelo kwake kambe ni ku va mi xaniseka hi kola kwake. 30 Hikusa mi kumana ni swikazratu swa ku fana ni leswi mi tivaka leswaku na mine ni kumane na swone, nakone hi lani mi swi tivaka ha kone ni swoswi na ha lwa na swone.

2 Yentxani hinkwaswu leswi mi nga swi kotaka akuva mi kutxa van’wana ka Kriste, mi txhavelela van’wana hi lizrandzru, mi yavelana nyiko ya moya ni vapfumelikuloni, mi kombana lizrandzru ni ntwelawusiwana, 2 loko mi yentxa leswo mi ta ni yentxa ni nyonxa ngopfu. Hanyani hi wumun’we, mi zrandzranana ni ku tlhela mi va ni wumun’we lebyi heleliki a swiyentxweni ni le ku yanakanyeni. 3 Mi nga yentxi ntxhumu hi ku lwetana kumbe hi ku tidjulela swenu ntsena, kambe hi ku titsrongahata vonani van’wana va li lava tlakukiki ka n’wine, 4 mi nga djuleteli leswi taka pfuna n’wine ntsena, kambe djuletelani ni leswi taka pfuna van’wana.

5 Vanani ni miyanakanyu leyi fanaka ni ya Kriste Yesu, 6 lweyi nambileswi a a ni xivumbeko xa ku fana ni xa Xikwembu Nkulukumba, a kalaka a nga teliwanga hi miyanakanyu ya ku zama ku dzringana na Xikwembu Nkulukumba. 7 A matsrhan’wini ya leswo, a tsrhike hinkwaswu leswi a a li na swone a pfumela ku va nandzra, a va mhunu wa nyama. 8 Ku tlula swoleswo, loko a ve mhunu wa nyama, a titsrongahatile ni ku tlhela a yingiseta ku ya tlhasa ku feni, ina, lifu a mhandzrini ya nxanisa.* 9 Hi kola ka leswo, Xikwembu Nkulukumba a mu beke ka xiyimu lexi tlakukiki ngopfu swinene nakone hi timpswalu a mu nyike vito ledzri tlakukiki henhla ka mavito hinkwawu, 10 akuva matsrolo hinkwawu, ya lava nga tilweni, ya lava nga misaveni ni lava nga hansi ka misava ma khinsama hi vito dzra Yesu. 11 Nakone lidzrimi dzrin’wana ni dzrin’wana dzri fanela ku swi twalisa livaleni leswaku Yesu Kriste i Hosi, akuva ku dzrumisiwa Xikwembu Nkulukumba, Papayi.

12 Xileswo, vazrandzriwa, ku fana ni leswi minkama hinkwayu mi yingisetiki, ku nga li ntsena loko ni li kone kambe ngopfungopfu swoswi ni nga liki kone, yanani mahlweni mi lwela ku huluxiwa kwenu hi ku txhava ni ku zruzrumela. 13 Xikwembu Nkulukumba hi lweyi hi ku ya hi ku zrandzra kwake a tizraka ka n’wine, a mi nyika ku navela ni ntamu wa ku swi yentxa. 14 Yanani mahlweni mi yentxa hinkwaswu na mi nga nguranguri ni ku kanetana, 15 akuva mi va lava basiki ni lava nga liki na nandzru, mi va vana va Xikwembu Nkulukumba lava nga liki ni xa ku soliwa ha xone nambileswi mi hanyaka xikazri ka vhanu lava nga ni mahanyela ya ku biha, lava n’wine mi vaningaka makazri kwavu swanga livaningu a misaveni. 16 Mi khomelela swi tiya a zritwini dzra wutomi. Kutani ni ta va ni xivangelo xa ku nyonxa a sikwini dzra Kriste, hi ku tiva leswaku a ni tsrutsrumanga mahala kumbe ku tikazratela swa mahala. 17 Kambe, nambileswi ni txhululiwaka ku fana ni gandzrelo dzra swa ku nwa, mine ni le ku hlengeleni ka xitlhavelo ni le ka ntizro wa ku xwenga lowu mi wu yentxelaka Xikwembu Nkulukumba hi ku dumbeka, kutani na nyonxa nakone ni nyonxa na n’wine hinkwenu. 18 Hi ndlela leyi fanaka, na n’wine mi fanela ku nyonxa nakone mi nyonxa na mine.

19 Na dumba leswaku loko Hosi Yesu a swi zrandzra ku nga li khale ni ta mi zrumelela Timotewu, akuva ni kota ku tiyisiwa loko ni yamukela madzrungula mayelanu na n’wine. 20 Hikusa a ni na mun’wana lweyi a nga ni ku tiyimisela loku fanaka ni kwake, lweyi a taka mi hlayisa hi mbilu hinkwayu. 21 Hikusa lavan’wana hinkwavu va le ku hlongoliseleni ka leswi pfunaka vone ntsena ku nga li leswi djuliwaka hi Yesu Kriste. 22 Kambe ma swi tiva leswaku yene a nga tsrhamisanga xileswo, a tizre na mine hi nkhinkhi a ku zrezreni ka madzrungula lamanene swanga hi n’wana ni papayi wake. 23 Kutani, hi yene lweyi ni laviseliki kuva ni mu zrumela ntsrhakunyana ka loko ni tiva leswi taka ni humelela. 24 Nakunene, na dumba leswaku loko Hosi yi swi zrandzra na mine ni ta buya ku nga li khale.

25 Kambe swoswi ni vona swi vileleka kuva ni mi zrumelela Epafroditu, lweyi a nga makwezru, mutizrikulozri tlhelo sotxhakulozri, lweyi mi mu zrumeliki akuva a ta ni pfuna ka swivileleko swanga, 26 hikusa a swi navela ngopfu ku buya a ta mi vona hinkwenu nakone a kazratekile hi leswi mi tiviki leswaku a a vabya. 27 Nakunene, a vabye ngopfu lakakuva a va kusuhi ni ku fa; kambe Xikwembu Nkulukumba a mu kombe timpswalu, hi ntiyiso wa kone, a nga kombanga yene ntsena kambe na mine, akuva ni nga tlhantekeliwi nhlomulo wun’wana henhla ka lowu ni nga na wone. 28 Xileswo ni mu zrumela kwenu hi xihantla lexikulu, akuva loko mi mu vona mi tlhela mi nyonxa nakone swi tlhela swi ni pumbela ku hlatiyela kwanga. 29 Kutani mu yamukelani hi lani swi tolovelekiki ha kone a Hosini hi ku nyonxa hinkwaku, nakone yanani mahlweni mi va nyika lisima vamakwezru va ku fana na yene, 30 hikusa kutsrongo a file hi kola ka ntizro wa Kriste,* a beke wutomi byake a nghozini akuva a ta ni pfuna hi leswi a mi nga li lani akuva mi ta ni pfuna.

3 Hi wugamu, vamakwezru, yanani mahlweni mi nyonxa a Hosini. A swi ni kazrateli ku tlhela ni mi tsralela mintxhumu yoleyi ya yin’we, akuva mi sizreleleka.

2 Tivonelani ka lava va hanyaka ku fana ni timbyana; tivonelani ka lava va yentxaka swa ku biha; tivonelani ka lava va hlohlotelaka ku soka.* 3 Hi hine lava sokiki swa swinene, hikusa hi yentxa ntizro wa ku xwenga hi ku pfuniwa hi moya wa Xikwembu Nkulukumba nakone a hi dumbi mintxhumu ya nyama, kambe hi dumba Kriste Yesu, 4 nambileswi mine ni nga ni swivangelo swa ku dumba mintxhumu ya nyama ku tlula vhanu hinkwavu.

Loko ku ni mhunu lweyi a pimisaka leswaku a ni swivangelo swa ku dumba mintxhumu ya nyama, mine na mu tlula: 5 ni soke hi siku dzra wu 8, ni wa tiko dzra Israyele, wa lixaka dzra Benjamini, ni Muheberu lweyi a pswaliwiki hi Vaheberu; a mhakeni ya nawu ni mufarisi; 6 a mhakeni ya ku hiseka, ni xanise bandla; a mhakeni ya ku yentxa leswa ku lulama hi ku ya hi nawu, ni ve lweyi a ngeke na nandzru. 7 Kambe mintxhumu leyi a ni yi vona na yi li ya lisima, swoswi ni yi vona na yi nga li ya ntxhumu* hi kola ka Kriste. 8 Ku tlula hinkwaswu, ni vona mintxhumu hinkwayu na yi nga li ya ntxhumu loko ni yi pimanisa ni lisima dzra ku tiva Kriste Yesu Hosi yanga. Ni pfumele ku lahlekeliwa hi mintxhumu hinkwayu, nakone ni yi vona na yi li nsila, akuva ni ta kota ku va ni wuxaka bya le kusuhi na Kriste 9 ni ku tlhela ni va mulandzreli wake. A ni hlayi leswaku ni lulamile hi kola ka leswi ni yentxiki mintxhumu hinkwayu hi ku landzra nawu, kambe hi kola ka lipfumelo ledzri ni nga na dzrone ka Kriste, a nga ku lulama loku pfaka ka Xikwembu Nkulukumba loku seketeliwiki lipfumelweni. 10 A nkongometo wanga i ku mu tiva ni ku tiva lisima dzra ku pfuxiwa kwake, nakone ni tiyimisele ku xaniseka ku fana na yene, nambi ku langusana ni lifu dzra ku fana ni ledzri a langusaniki na dzrone, 11 akuva loko swi koteka ni ta va mun’we wa lava va taka pfuxiwa a ku pfuxiweni ka ku sungula ka vafi.

12 A ni hlayi swone leswaku kutani ni dzri kumile hakelo kumbe kutani ni hetisekile, kambe ni yentxa hinkwaswu leswi ni nga swi kotaka akuva ni tlhasela leswi Kriste Yesu a ni hlawuleliki swone. 13 Vamakwezru, a ni tivoni na kutani ni dzri kumile hakelo, kambe lexi tiyiki hi leswaku ni dzrivala mintxhumu ya le ntsrhaku ni tikazratela ku kuma leyi ya ha taka. 14 Ni yentxa hinkwaswu leswi ni nga swi kotaka akuva ni kuma hakelo dzra ku vitaneliwa tilweni hi Xikwembu Nkulukumba hi ku tizrisa Kriste Yesu. 15 Xileswo, hine hinkwezru lava wupfiki a hi veneni ni mayanakanyela lawa, kambe loko mi ni mayanakanyela lama hambaniki hi ndlela ya kukazri, Xikwembu Nkulukumba a ta mi pfuna ku twisisa lawa ma nga wone. 16 Kutani, nambiloko hi yentxe nhluvuku ku ya tlhasa kwini, a hi yeneni mahlweni hi famba ndleleni leyi.

17 Vamakwezru, hinkwenu vanani vayetiseli vanga nakone yanani mahlweni mi lavisisa lava fambaka hi ku landzra xikombiso lexi hi mi bekeliki xone. 18 Hikusa ku ni vhanu vanyingi lava a ni tolovela ku vulavula ha vone, kambe swoswi ni vulavula ha vone na ni dzrila hikusa i valala va mhandzri ya nxanisa* ya Kriste. 19 A wugamu byavu i ku helisiwa, a xikwembu xavu i makhuzri yavu, va tikhuza hi mintxhumu ya tingana leyi va yi yentxaka, nakone vo tsrhamela ku yanakanya mintxhumu ya misava ntsena. 20 Kambe hine a kaya kwezru hi le tilweni, hi mu yimele hi manyawu muhuluxi, ku nga Hosi Yesu Kriste, lweyi a nga matilweni, 21 lweyi a taka ndzruluta mizri wezru wa ku tsrana wu fana ni mizri wake lowu phatimaka hi ku tizrisa ntamu wake lowukulu, lowu wu mu pfumelelaka ku fuma mintxhumu hinkwayu.

4 Kutani vamakwezru lava zrandzrekaka, n’wine lava ni mi xuvaka ngopfu, mi nga ku nyonxa kwanga ni ngiyana yanga, tamani mi tiya a Hosini, vazrandzriwa.

2 Ni tsratsriya Evhodiya na Sintike, leswaku va va ni miyanakanyu leyi fanaka a Hosini. 3 Ina, na wene na ku kombela swanga mutizrikulozri wa ku dumbeka, akuva u tama u pfuna vavasati lava, lava hi tikazratiki xikan’we a ku twaliseni ka madzrungula lamanene, na Klementi kun’we ni hinkwavu lava hi tizriki xikan’we, lava mavito ya vone ma nga bukwini dzra wutomi.

4 Nyonxani minkama hinkwayu a Hosini. Ni tlhela ni phindha ni ku: Nyonxani! 5 A ku yanakanyela kwenu a ku tiviwe hi vhanu hinkwavu. A Hosi yi le kusuhi. 6 Mi nga hlatiyeleni hi ntxhumu, kambe ka mintxhumu hinkwayu, hi xikhongoto, kombelani Xikwembu Nkulukumba leswaku a mi pfuna, mi kombela ni ku tlhela mi mu tlangela. 7 Loko mi yentxa leswo, a ku zrula ka Xikwembu Nkulukumba loku tlulaka ku twisisa hinkwaku, ku ta bekisa timbilu tenu ni miyanakanyu yenu* ha Kriste Yesu.

8 Hi wugamu, vamakwezru, hinkwaswu leswi nga swa ntiyiso, hinkwaswu leswi nga swa lisima, hinkwaswu leswi lulamiki, hinkwaswu leswi xwengiki,* hinkwaswu leswi zrandzrekaka, hinkwaswu leswi ku vulavuliwaka ha hombe ha swone, hinkwaswu leswi nga swinene ni hinkwaswu leswi khensekaka, yanani mahlweni mi yanakanyisisa ha swone. 9 Hanyani hi leswi mi nga swi dondzra ni ku swi yamukela ni ku swi yingela ni ku tlhela mi swi vona kwanga, kutani Xikwembu Nkulukumba wa ku zrula a ta va na n’wine.

10 Ni nyonxa ngopfu ni tlhela ni tlangela Hosi, hikusa mi tlhele mi kombisa leswaku ma zron’weka ha mine. Nambileswi a mi zron’weka ha mine, a mi nga na ndlela ya ku swi kombisa leswo. 11 Kambe a ni hlayi leswo hi leswaku no va ku pfumaleni; hikusa ni dondzre ku yaneliseka* hi leswi ni nga na swone ka swiyimu hikwaswu. 12 Na swi tiva ku hanya hi swa switsrongo ni hi swa swinyingi. Ka swiyimu hinkwaswu, ni dondzre leswaku i yini ku xuzra ni ku va ni ndlala, ni leswaku i yini ku va ni swinyingi ni ku pfumala. 13 Ka hinkwaswu na tiya hi kola ka lweyi a ni nyikaka ntamu.

14 Nambitanu, mi yentxe swone hi ku va mi ni pfunile mahlomulweni yanga. 15 Nakunene, n’wine Vafilipiya ma swi tiva leswaku ntsrhaku ka loko mi yamukele madzrungula lamanene hi khambi dzra ku sungula loko ni suke Makedoniya, ko va bandla dzrenu ntsena ledzri dzri ni seketeliki; 16 hikusa nkama lowu a ni le Tesalonika, mi ni zrumelele swa kukazri leswi a ni swi vilela, ku nge kan’we kambe kabidzri. 17 A hi leswaku no djula ku nyikiwa mintxhumu, kambe no djula kuva mi kuma hakelo ledzri pfaka hi ku va mi va lava hananaka. 18 Nambitanu, ni ni hinkwaswu leswi ni swi vilelaka ni hi ku tlulisa. Swoswi ni yanelisekile leswi ni yamukeliki leswi mi ni zrumeliki swone hi ku tizrisa Epafroditu, swa nun’hwela hi ku nandzrika, i gandzrelo ledzri yamukelekaka nakone dzri nyonxisaka swinene mahlweni ka Xikwembu Nkulukumba. 19 Kutani, Xikwembu Nkulukumba wanga lweyi a nga ni wukosi byinyingi, a ta mi nyika hinkwaswu leswi mi swi pfumalaka, hi ku tizrisa Kriste Yesu. 20 A ku dzrumisiwi Xikwembu Nkulukumba tlhelo Papayi wezru hi masiku ni masiku. Amen.

21 Dzrungulani vaxwengi hinkwavu lava lumbaka Kriste Yesu. Vamakwezru lava ni nga na vone halenu na vone va mi dzrungula. 22 A vaxwengi hinkwavu ngopfungopfu vandangu wa Khezari va mi dzrungula.

23 Ni mi navelela timpswalu letikulu ta Hosi Yesu Kriste hi kola ka moya lowu mi wu kombisaka.