PAPELA DZRA WUBIDZRI LEDZRI YAKA KA TIMOTEWU

1 Mine Pawulo, mupostola wa Kriste Yesu hi ku ya hi ku zrandzra ka Xikwembu Nkulukumba, loku fambisanaka ni xidumbiso xa wutomi lebyi taka hi ku tizrisa Kriste Yesu, 2 ni tsralela Timotewu, n’wananga lwa zrandzrekaka:

Ingiki u nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Kriste Yesu Hosi yezru.

3 Ni tlangela Xikwembu Nkulukumba lweyi ni mu yentxelaka ntizro wa ku xwenga hi lani vakokwana vanga va mu yentxeliki ha kone, ni wu yentxa hi lipfalu ledzri basiki; a ni tsrhiki ku ku dzrimuka ka swikombelo swanga wusiku ni nhlikanhi. 4 Loko ni dzrimuka minyembeti yaku swi ni yentxa ni navela ku ku vona, akuva ni ta kota ku nyonxa ngopfu swinene. 5 Hikusa ni dzrimuka lipfumelo dzraku ledzri kalaka dzri nga na wukanganyisi, ledzri vhovho waku Luwiza na mamana waku Ewunisi va zrangiki va va na dzrone kambe ni dumbaka leswaku na wene u na dzrone.

6 Hi xivangelo lexi, ni ku dzrimuxa leswaku u tsrhivelela nyiko ya Xikwembu Nkulukumba leyi u yi kumiki nkama lowu ni ku tlhantekiki mavoko. 7 Hikusa Xikwembu Nkulukumba a nga hi nyikanga moya wa wutoya, kambe wa kuva hi va ni ntamu, hi kombisa lizrandzru ni ku va ni miyanakanyu leyinene.* 8 Xileswo u nga dani ku zrezra mayelanu ni Hosi yezru kumbe ku va ni tingana mayelanu na mine ni nga xib’otxhwa hi mhaka ya yone, kambe tiyimiseli ku xaniseka hi kola ka madzrungula lamanene na u dumbela ka ntamu wa Xikwembu Nkulukumba. 9 Xikwembu Nkulukumba a nga hi huluxanga a tlhela a hi vitana kuva hi va vaxwengi hi mhaka ya mintizro yezru, kambe hi mhaka ya nkongometo wake ni hi mhaka ya timpswalu take letikulu. A timpswalu leto a hi kombe khale ngopfu swinene hi ku tizrisa Kriste Yesu, 10 kambe swoswi ti vonekisiwa hi ku khanya hi kola ka ku humelela ka Muhuluxi wezru, Kriste Yesu, lweyi a helisiki lifu nakone hi ku tizrisa madzrungula lamanene a hi paluxeliki ndlela ya ku va ni wutomi ni ya ku va ni mizri lowu kalaka wu nga boli. 11 Hi nkongometo wa kuva ku twalisiwa madzrungula wolawo lamanene, Xikwembu Nkulukumba a ni hlawule akuva ni va muzrezri, mupostola ni mudondzrisi.

12 Hi leswo swi yentxaka na mine ni kumana ni tinxanisa leti, kambe a ni dani. Hikusa na mu tiva Xikwembu Nkulukumba lweyi ni pfumeliki kwake, nakone na tiyiseka leswaku awa swi kota ku sizrelela hinkwaswu leswi ni mu tamelisiki swone akuva a swi bekisa ku ya tlhasa siku ledzri bekisiwiki. 13 Yana mahlweni u landzrela xikombiso xa mazritu lama pfunaka, lawa u ma twiki kwanga, na u kombisa lipfumelo ni lizrandzru leswi pfelaka ka ku va ni wumun’we na Kriste Yesu. 14 Bekisa wukosi lebyi u tamelisiwiki byone hi mpfunu wa moya wa ku xwenga lowu nga kwezru.*

15 Wa swi tiva leswaku vhanu va xifundzra hinkwaxu xa Aziya va ni tsrutsrumile, ku patsra na Figelo na Hermogeni. 16 Ingiki a Hosi yi nga komba timpswalu vandangu wa Oneziforo, hikusa a a talisa ku ni tiyisa nakone a nga danisekanga hi mhaka ya leswi ni tsrimbiwiki hi matxhini. 17 Ku hambana ni leswo, a nkama lowu na a li Roma, a ni djuletele ngopfu swinene a va a ni kuma. 18 Ingiki Hosi Yehovha a nga mu komba timpswalu take hi siku ledzro. Futsrhi wene u yi tiva ha hombe mintizro hinkwayu leyi a yi yentxiki a Efesa.

2 Xileswo n’wananga, yana mahlweni u kuma ntamu ka timpswalu letikulu leti Kriste Yesu a ti kombisaka; 2 ni mintxhumu leyi u yi twiki kwanga leyi seketeliwiki hi timboni tinyingi, yi dondzrisi vhanu lava dumbekaka, lava va taka gama va fanelekela ha hombe ku yi dondzrisa van’wana. 3 Swanga sotxha ledzrinene dzra Kriste Yesu, tiyimiseli ku xaniseka. 4 A dzri kone sotxha dzri tipatsraka ka mabindzru* ya wutomi lebyi, loko a li leswaku dzri djula ku nyonxisa lweyi a dzri nghenisiki a wusotxhweni. 5 Nambi ka mintlangu ya mpalisanu, a ku na mutlangi lweyi a kumaka hakelo* na a nga landzranga milawu ya ntlangu wolowo. 6 Swa fanela kuva mudzrimi lweyi a tizraka ngopfu swinene a va wa ku sungula ku da mihandzru ya nsimu yake. 7 Leswi ni swi hlayaka tsrhamela ku pimisa ha swone; a Hosi yi ta ku yentxa u twisisa mintxhumu leyi hinkwayu.

8 Dzrimuka leswaku Yesu Kriste a pfuxiwile a ku feni nakone a a li ntukulu wa Davhida,* hi ku ya hi madzrungula lamanene lawa ni ma zrezraka, 9 lawa hi kola ka wone ni xanisiwaka ni tlhela ni pfaleliwa djele ingiki hi loko no va xigevengu. Nambitanu, a zritu dzra Xikwembu Nkulukumba a dzri tsrimbiwanga. 10 Hi leswo swi ni yentxaka ni tiyiselela swikazratu hinkwaswu akuva ku pfuneka vahlawuliwa, ku yentxela leswaku na vone va kota ku kuma ku huluxiwa loku pfelaka ka ku va ni wuxaka na Kriste Yesu va tlhela va kuma matovoko lawa ma nga helikiki. 11 A mazritu lawa ma dumbeka: Nakunene loko hi fe na yene hi ta tlhela hi hanya na yene; 12 loko hi ya mahlweni hi tiyisela, na hine hi ta va tihosi kun’we na yene; loko hi ku a hi mu tivi,* na yene a ta ku a nga hi tivi;* 13 nambiloko hi nga yentxi leswi Xikwembu Nkulukumba a swi hlayaka, yene minkama hinkwayu awa swi yentxa, hikusa a nge tiyali.

14 Tsrhamela ku va dzrimuxa mintxhumu leyi, u va dondzrisa* a mahlweni ka Xikwembu Nkulukumba leswaku va nga lwisani hi mazritu, ku nga leswi kalaka swi nga pfuni ntxhumu nikutsrongo kambe swo ko vavisa* lava va swi yingelaka ntsem. 15 Yentxa hinkwaswu leswi u nga swi kotaka akuva u yamukeleka ka Xikwembu Nkulukumba, u va mutizri lweyi a kalaka a nga na ntxhumu lowu a nga khomisekaka tingana ha wone, u dondzrisa zritu dzra Xikwembu Nkulukumba u tlhela u dzri tlhamuxela ha hombe, 16 kambe fambela kule ni mabulu lawa ma kalaka ma nga pfuni ntxhumu lawa ma lwisanaka ni leswi xwengiki, hikusa ma yisa vhanu kule ngopfu swinene na Xikwembu Nkulukumba, 17 nakone a mazritu yavu ma ta hangalaka ku fana ni xilondzra lexi kalaka xi nga holi kambe xo ko tama xi kula. Himinewu na Filetu i van’we va vone. 18 Vavanuna lava va tsrhike ntiyiso, va hlaya leswaku a ku pfuka ka vafi kutani ku yentxekile, va hohlota lipfumelo dzra vambeni. 19 Nambitanu, a masungulo lawa ma tiyiki ya Xikwembu Nkulukumba, ma tama ma va kone na ma ni mfungu lowu liki: “Yehovha awa va tiva lava va nga vake”, nakone “mun’wana ni mun’wana lweyi a vitanaka vito dzra Yehovha a a tsrhiki leswi kalaka swi nga lulamanga”.

20 Hi lani mi swi tivaka ha kone, ka yindlu ya yikulu a ko va ni swibya* swa woru ni swa prata ntsena, kambe ku ni ni swa ku swe vatliwa ni swa ku hambiwa hi vumba, nakone swin’we swa swone swi tizrisiwa ka swiyimu swa ku hlawuleka nakasi leswin’wana swi tizrisiwa siku ni siku. 21 Xileswo loko mhunu a fambela kule ni vhanu va ku fana ni swibya* leswi swa wugamu, a ta fana ni xibya lexi tizrisiwaka ka swiyimu swa ku hlawuleka, a ta va xibya lexi hlawulekisiwiki lexi nga xa lisima ka n’winyi wa xone nakone xi bekiseliwiki mintizro hinkwayu leyinene. 22 Xileswo, tsrutsruma ku navela loku vampshwa va nga na kone, kambe lwela ku yentxa leswi lulamiki, u kombisa lipfumelo, lizrandzru, ku zrula, na u namazrela lava vitanaka Hosi hi mbilu leyi basiki.

23 Handle ka leswo, fambela kule ni mabulu ya wuphunta lawa ma kalaka ma nga pfuni ntxhumu, swanga hi leswi u swi tivaka leswaku ma vanga ku lwa. 24 Hikusa a nandzra wa Hosi a nga fanelanga a lwa, kambe a fanela ku kombisa wunene ka hinkwavu, a fanelekela ku dondzrisa, a tiva ku tikhoma loko va mu yentxela wubihi,* 25 a tlhela a va dondzrisa hi ku zrula lava kalaka va nga pfumelelani ni leswi a swi dondzrisaka; kumbexana Xikwembu Nkulukumba a nga va pfumelela akuva va tisola,* leswaku va kota ku wu tiva ha hombe ntiyiso, 26 xileswo va tilaya va va va huluka a ntlhan’wini wa Diyavulosi, swanga hi leswi a a va phasile akuva va yentxa ku zrandzra kwake.

3 Kambe tiva leswaku a masikwini ya wugamu ku ta tlhasa minkama ya ku bindzra leyi swi kazrataka ku langusana na yone. 2 Hikusa vhanu va ta va lava tizrandzraka, va va lava zrandzraka mali, lava tibyelaka, lava tikulisaka, vazruketeli, lava kalaka va nga yingiseti vapswele, lava kalaka va nga tivi ku tlangela, lava kalaka va nga dumbeki, 3 lava kalaka va nga na lizrandzru, lava kalaka va nga djuli ntwananu, valumbeti, lava kalaka va nga tikhomi, va ta va lava levaka, va nyenya leswi nga swinene, 4 va ta va vawongi, vhanu va nkanu, vhanu lava tikukumuxaka, lava zrandzraka ku tinyonxisa a matsrhan’wini ya ku zrandzra Xikwembu Nkulukumba, 5 lava hlayaka leswaku va gandzrela Xikwembu Nkulukumba kambe swi kalaka swi nga tikombi ka mahanyela yavu; kutani fambela kule ni vhanu va ku tsrhamisa xileswo. 6 A makazri ka vhanu lavo ku humelela vavanuna lava nyanimelaka va nghena a mindangwini va kanganyisa vavasati lava tsraniki lava bindzriwaka hi swidoho; vavasati lavo i swikazrawa swa ku navela ka ku siyanasiyana. 7 Minkama hinkwayu va le ku dondzreni kambe a va ngi ngi sama va wu twisisa ha hombe ntiyiso.

8 Ku fana ni leswi Yane na Yambre va lwisaniki na Moxe, na vone va ya mahlweni va lwisana ni ntiyiso. Vhanu va ku tanu va honeke miyanakanyu, nakone a va yamukeleki ka Xikwembu Nkulukumba hikusa va lwisana ni lipfumelo. 9 Nambitanu, a va nge ti tlhasa mbangu, hikusa a wuphunta byavu byi ta paluxeka ha hombe ka hinkwavu, hi lani swi viki ha kone ka vavanuna lavayani vabidzri. 10 Kambe wene u swi landzrele ha hombe leswi ni swi dondzrisiki, u landzrele ni ndlela leyi ni hanyaka ha yone, hi ve ni nkongometo wolowu wa wun’we, u yetisele xikombiso xanga a mhakeni ya lipfumelo, ku lehisa mbilu, lizrandzru ni ku tiyisela, 11 wa ti tiva tinxanisa ni swikazratu leswi ni kumaniki na swone, swa ku fana ni leswi ni kumaniki na swone a Antiyokiya, a Ikoniya ni le Listra. Ni tiyiselele tinxanisa leto, nakone a Hosi yi ni huluxile ka tone hinkwatu. 12 Ku hlaya ntiyiso, hinkwavu lava djulaka ku hanya na va gandzrela Xikwembu Nkulukumba swanga vadondzrisiwa va Kriste Yesu, na vone va ta xanisiwa. 13 Kambe a vhanu lava bihiki kun’we ni vakanganyisi va ta ya va bihisisa, va hambukisa na vone va hambukisiwa.

14 Kambe wene tama u landzrelela mintxhumu leyi u yi dondzriki leyi u kholwisiwiki yone, futsrhi u swi tivaka leswaku u yi dondzri ka vamani, 15 nakone ku sukela a wutsrongwanini u tive leswi tsraliwiki ka mabuku ya ku xwenga, leswi nga ku tlhazrihisaka akuva u kota ku huluxiwa hi kola ka leswi u nga ni lipfumelo ka Kriste Yesu. 16 A Matsralwa hinkwawu ma huhuteliwe hi Xikwembu Nkulukumba nakone ma pfuna ku dondzrisa, ku kawuka, ku lulamisa mintxhumu, ku laya hi ndlela leyi lulamiki, 17 akuva mhunu wa Xikwembu Nkulukumba a va lweyi a heleliki, a tlhela a va lweyi a lulameliki ku yentxa ntizro wun’wana ni wun’wana lowunene.

4 A mahlweni ka Xikwembu Nkulukumba ni le mahlweni ka Kriste Yesu, lweyi a taka yavanyisa lava hanyaka ni lava fiki a ku vonekisiweni kwake ni hi ku tizrisa Mfumu wake, ni ku zruma leswi: 2 Zrezra zritu; u swi yentxa hi xihantla a minkameni leyinene ni le minkameni leyi kazrataka; laya, u kawuka, u tsratsriya, na u lehisa ngopfu swinene mbilu u tlhela u dondzrisa hi ndlela leyinene ku fana ni mudondzrisi lwenene. 3 Hikusa ku ta va ni nkama lowu vhanu va nga tiki yi yingiseta dondzro leyinene* kambe va taka landzrelela ku navela kwavu, va tidjulela vadondzrisi lava va taka va nyangalatela tindleve.* 4 Va ta tsrhika ku yingiseta ntiyiso va yingiseta swihitana swa madzrimi. 5 Kambe wene, tizrisa wuswikoti byaku bya ku yanakanya ka mintxhumu hinkwayu, tiyiselela swikazratu, yana mahlweni u zrezra madzrungula lamanene,* u byi hetisisa hi ndlela leyinene wutizreli byaku.

6 Hikusa mine kutani ni le ku txhululiweni ku fana ni gandzrelo dzra swa ku nwa, nakone a nkama wa kuva ni ntsrhunxiwa wu le kusuhi. 7 Ni lwe yimpi leyinene, ni tsrutsrume mpalisanu ku ya tlhasa wugamu, ni hlayise lipfumelo. 8 Ku sukela swoswi ku ya mahlweni, ni hlayiseliwe ngiyana ya ku lulama, leyi a Hosi leyi nga muyavanyisi lwenene, yi taka ni nyika yone swanga hakelo a sikwini ledzro. Nambitanu, a yi nge ti nyika mine ntsena, kambe ni hinkwavu lava yimeliki ku ta ka yone.

9 Yentxa hinkwaswu leswi u nga swi kotaka akuva u hantla u ta halenu kwanga. 10 Hikusa Demasi a ni tsrhikile hi leswi a zrandzriki misava leyi,* a ye Tesalonika, Kresenti a ye Galatiya, Tito a ya Dalmatiya. 11 Halenu no va na Luka ntsem. Buya na Marka, hikusa a ta ni pfuna ngopfu swinene a ntizrweni lowu ni wu yentxelaka Xikwembu Nkulukumba. 12 Kambe Tikiko ni mu zrumele a Efesa. 13 Loko u ta, ni tele ni mudjansi lowu ni wu siyiki na Karpu a Trowasi, ni mabuku, ngopfungopfu lawa ya xikhumba.*

14 Alexandri lweyi wa ku nyivilikisa kobri, a ni yentxele mintxhumu yinyingi ya ku biha. Yehovha a ta mu dzrihisela hi ku ya hi swiyentxo swake. 15 Na wene tivoneli kwake, hikusa a dzri kanete ngopfu swinene dzrungula dzrezru.

16 Loko ni ye tihlamulela hi khambi dzra ku sungula a wuhosini a nga kone lweyi a yimiki na mine kambe hinkwavu va ni tsrhikile, ingiki Xikwembu Nkulukumba a nga va dzrivalela. 17 Kambe a Hosi yi ni pfunile yi ni nyika ntamu, akuva ni zrezra madzrungula lamanene hi ku helela, ku yentxela leswaku matiko hinkwawu ma kota ku ma yingela; nakone ni huluxiwe a non’wini wa nghonyama.* 18 A Hosi yi ta ni huluxa ka wubihi hinkwabyu, yi ta ni hlayisa akuva ni nghena Mfun’wini wa yone wa le tilweni. A yi dzrumisiwi hi masiku ni masiku. Amen.

19 Ni dzrungulele Prixka* na Akila ni vandangu wa Oneziforo.

20 Eraxtu a sale Korinte kambe Trofimo ni mu siye Mileto na a vabya. 21 Yentxa hinkwaswu leswi u nga swi kotaka akuva u ta halenu na wuxika byi nga si na sungula.

Yubulu, Pude, Linu, Klawudiya, ni vamakwezru hinkwavu, va ku dzrungula.

22 Ingiki a Hosi yi nga tovokisa moya lowu u nga na wone. A timpswalu take letikulu a ti ve na n’wine.