PAPELA LEDZRI YAKA KA VAHEBERU

1 Khale swinene, Xikwembu Nkulukumba a vulavule ni vakokwana vezru hi ku tizrisa vaprofeta hi makhambi manyingi ni hi tindlela ta ku siyanasiyana. 2 Kutani a masikwini lawa ya wugamu a vulavule na hine hi ku tizrisa N’wana lweyi a mu bekiki leswaku a va madapfindla wa mintxhumu hinkwayu nakone a yentxiki swiyimu swa misava* hi ku tizrisa yene. 3 Yene i xifaniso xa ku phatima ka Xikwembu Nkulukumba ni xikombiso lexi heleliki xa wumhunu byake, nakone hi yene a khomiki mintxhumu hinkwayu hi ntamu wa zritu dzra Xikwembu Nkulukumba. Ntsrhaku ka loko a basise swidoho swezru, a tsrhame vokweni dzra xinene dzra Lweyi a Tlakukiki Ngopfu Swinene a tilweni. 4 Xileswo a ve lweyi a tlakukiki ku tlula tintsrumi lakakuva a nyikiwa wulawuli bya ku tlula bya tone.

5 Hi xikombiso, he yini ntsrumi leyi Xikwembu Nkulukumba a samiki a yi byela a ku: “Wene u n’wananga, namunhla ni ndzruluke papayi waku”? A tlhela a hlaya leswi mayelanu na yone: “Ni ta va papayi wake, yene a ta va n’wananga”? 6 Kambe hi nkama lowu a taka tlhela a buyisa N’wanake wa mativula a misaveni, a hlaya leswi: “A tintsrumi hinkwatu ta Xikwembu Nkulukumba a ti mu khinsameli.”

7 Nakone mayelanu ni tintsrumi a hlaya leswi: “A yentxa tintsrumi take ti va mimoya leyi nga ni ntamu, ni vatizri lava fanaka ni malangavi ya ndzrilo.” 8 Kambe mayelanu ni N’wana, a hlaya leswi: “Xikwembu Nkulukumba i xiluvelo xaku hi lani ku nga helikiki, nakone a nhonga ya wuhosi ya Mfumu waku i nhonga ya wululami. 9 U zrandzre wululami u nyenya wubihi. Hi leswo swi yentxiki leswaku Xikwembu Nkulukumba, Xikwembu Nkulukumba waku, a ku tota mafuzra a tlhela a ku nyika ku nyonxa lokukulu ku tlula tihosi tin’wana.” 10 Nakone: “A ku sunguleni, we Hosi, u beke masungulo ya misava, a matilo i mintizro ya mavoko yaku. 11 Swone swi ta nyamalala kambe wene u ta tama u va kone, nakone ku fana ni mpahla, hinkwaswu swi ta hlathukela, 12 u ta swi khondletela ku fana ni mudjansi nakone swi ta txintxiwa ku fana ni mpahla. Kambe wene a wu nge ti txhuka u txintxa, nakone a malembe yaku a ma nge ti za ma hela.”

13 Kambe he yini ka tintsrumi leyi a samiki a yi byela a ku: “Tsrhamisa vokweni dzranga dzra xinene ku ya tlhasa loko ni beka valala vaku va va wunalavutelo bya minkondzro yaku”? 14 Xana hinkwatu a hi tintsrumi leti yentxaka ntizro wa ku xwenga, leti zrumeliwiki ku tizrela lava taka huluxiwa?

2 Xileswo hi fanela ku swi nyika lisima ngopfu leswi hi swi twiki ku tlula ndlela leyi hi buyaka na hi swi nyika lisima ha yone, akuva hi nga txhuki hi hambuka. 2 Hikusa loko zritu ledzri hlayiwiki hi ku tizrisa tintsrumi dzri ve ledzri tiyiki, ni ko ku tlula nawu hinkwaku ni ku kala ku yingiseta hinkwaku swi kume xikhatiso lexi lulamiki, 3 hine hi nga hulukisa kuyini loko hi dzrela ku huluxa lokukulu ka ku tasi? Hikusa ku zrange ku tivisiwa hi Hosi yezru nakone lava va yi yingeliki va tlhele va hi tiyisekisa leswaku i ntiyiso, 4 na yene Xikwembu Nkulukumba a nyikele wumboni hi ku tizrisa swihlamaliso, mahlolana, mintizro ya ku siyanasiyana ya ku hlamalisa ni hi moya wa ku xwenga lowu a wu yaveliki hi ku ya hi ku zrandzra kwake.

5 Hikusa a misava leyi taka leyi hi vulavulaka ha yone a nga yi bekanga hansi ka tintsrumi. 6 Kambe a mboni ya kukazri yi same yi tsrala leswi: “A mhunu o va yini lakakuva u tama u mu dzrimuka, kumbe a n’wana wa mhunu o va yini lakakuva u mu hlayisa? 7 U mu yentxe a va hansinyana ka tintsrumi; u mu nyike ku phatima ni xitxhavu, u tlhele u mu beka akuva a fuma mintizro ya mavoko yaku. 8 Mintxhumu hinkwayu u yi beke hansi ka minkondzro yake.” Hikusa nkama lowu Xikwembu Nkulukumba a mu bekiki akuva a fuma mintxhumu hinkwayu, a ku na lexi a xi siyiki akuva xi nga fumiwi hi yene. Nambitanu, a hi si na swi vona leswaku Yesu a le ku fumeni ka mintxhumu hinkwayu. 9 Kambe Yesu lweyi a a li hansinyana ka tintsrumi, ha mu vona na a nyikiwe ku phatima ni xitxhavu hi leswi a xanisekiki a za a ya fa, akuva hi kola ka timpswalu letikulu ta Xikwembu Nkulukumba a kota ku dzringa lifu leswaku ku pfuneka vhanu hinkwavu.

10 Hikusa akuva a phatimisa vana vanyingi, a swi fanela kuva Xikwembu Nkulukumba lweyi mintxhumu hinkwayu yi yentxeliwiki yene nakone yi yentxiwiki hi yene, a pfumelela leswaku Muzrangeli wa wutomi* a xaniseka; hi ndlela leyo a ve lweyi a fanekelaka ku va huluxa. 11 Hikusa lava xwengisiwaka ni lweyi a va xwengisaka hinkwavu va pfa ka mhunu mun’we, hi leswo swi mu yentxaka a nga dani ku va vitana vamakwavu, 12 loko a ku: “Ni ta twalisa vito dzraku ka vamakwezru; ni ta ku dzrumisa hi lisimu a xikazri ka bandla.” 13 A tlhela a ku: “Ni ta dumbela kwake.” Ni loko a ku: “Hi mine lweyi, ni vatsrongwana lava Yehovha a ni nyikiki vone.”

14 Xileswo, leswi a “vatsrongwana” va nga va ngati ni nyama, na yene a ve ngati ni nyama, akuva hi lifu dzrake a kota ku helisa lweyi a nga ni wuswikoti bya ku vanga lifu, ku nga Diyavulosi, 15 ni kuva a ta ntsrhunxa hinkwavu lava viki swikazrawa wutomi byavu hinkwabyu hi mhaka ya ku txhava lifu. 16 Hikusa nakunene a hi tintsrumi leti a ti pfunaka, kambe a pfuna vana va* Abrahamu. 17 Hi xivangelo lexo, swi djule a fana ni “vamakwavu” hi tindlela hinkwatu, akuva ka mintxhumu leyi fambisanaka na Xikwembu Nkulukumba, a va muprista lwenkulu lweyi a nga ni timpswalu nakone a dumbekaka, ku yentxela leswaku a nyikela mhamba hi kola ka swidoho swa vhanu, akuva va tlhelelana na Xikwembu Nkulukumba. 18 Swanga hi leswi a xanisekiki loko a dzringiwa, awa swi kota ku ta lamulela lava dzringiwaka.

3 Xileswo, vamakwezru lava xwengiki, n’wine mi patsrekaka ka lava vitaneliwiki* ku ya tilweni, yanakanyani hi mupostola tlhelo muprista lwenkulu lweyi hi pfumelaka kwake, ku nga Yesu. 2 A dumbeke ka Xikwembu Nkulukumba lweyi a mu hlawuliki, ku fana ni leswi Moxe na yene a dumbekiki ka Xikwembu Nkulukumba nkama lowu a a tizrela ndlwini Kwake. 3 Hikusa a voniwa* a li lweyi a faneliwaka hi ku phatimisiwa ngopfu ku tlula Moxe, swanga hi leswi lweyi a yakaka yindlu a hloniphiwaka ngopfu ku tlula yindlu ya kone. 4 Nakunene, yindlu yin’wana ni yin’wana yi yakiwa hi mhunu, kambe lweyi a yakiki mintxhumu hinkwayu i Xikwembu Nkulukumba. 5 Moxe a a li mutizri lweyi a dumbekaka a ndlwini hinkwaku ka Xikwembu Nkulukumba, a ntizro wake wu ve wumboni bya mintxhumu leyi a yi ta khaneliwa hi ku famba ka nkama, 6 kambe Kriste a a li n’wana lweyi a dumbekaka a ku hlayiseni ka yindlu ya Xikwembu Nkulukumba. Hine hi yindlu yake loko nakunene hi khoma swi tiya ka ntsrhunxeko lowu hi nga na wone wa ku vulavula ni le ka dumbo ledzri hi tikhuzaka ha dzrone ku ya tlhasa wugamu.

7 Xileswo, ku fana ni leswi a moya wa ku xwenga wu liki: “Namunhla loko mi yingiseta zritu dzrake, 8 mi nga tlanyaliseni timbilu tenu ku fana ni leswi vakokwana venu va ni yentxiki ni hlundzruka ngopfu swinene; ku fana ni leswi va swi yentxiki loko va ni dzringa a mananga, 9 lani vakokwana venu va ni dzringiki nambileswi va voniki mintizro yanga ku dzringana 40 wa malembe. 10 Hi leswo swi ni yentxiki ni nyenyentseka hi lixaka ledzro kutani ni ku: ‘A timbilwini tavu va tsrhamela ku yala leswi ni va byelaka swone, nakone a va ti tivi tindlela tanga.’ 11 Kutani ni hlambanye na ni hlundzrukile ni ku: ‘A va nge ti nghena a ku wiseni kwanga.’”

12 Vamakwezru, tivonelani leswaku ku nga vi na mhunu kwenu lweyi a vaka ni mbilu leyi bihiki ya ku pfumala lipfumelo hi ku va a tsravukana na Xikwembu Nkulukumba lweyi a hanyaka; 13 kambe siku ni siku yanani mahlweni mi kutxanana, na nkama wolowo wa ha vitaniwa “Namunhla”, akuva ku nga vi na mhunu kwenu lweyi a tlanyalisiwaka mbilu hi ntamu wa xidoho lowu kanganyisanaka. 14 Hikusa nakunene hi to hlengela na Kriste ntsena loko hi khoma swi tiya ku ya tlhasa wugamu ka leswi hi tiyiki ka swone ku sukela a sikwini ledzri hi pfumeliki kwake. 15 Hi lani ku hlayiwaka ha kone: “Namunhla loko mi yingiseta zritu dzrake, mi nga tlanyaliseni timbilu tenu ku fana ni leswi vakokwana venu va ni yentxiki ni hlundzruka ngopfu swinene.”

16 Hikusa i vamani lava twiki zritu dzra Xikwembu Nkulukumba nambitanu va mu hlundzrukisa ngopfu? Xana a ku vanga vone hinkwavu lava humiki na Moxe a Egipta? 17 Handle ka leswo, i vamani lava nyenyentsiki Xikwembu Nkulukumba ku dzringana 40 wa malembe? Xana a ku va nga vone lava dohiki, lava feliki a mananga? 18 Nakone i vamani lava Xikwembu Nkulukumba a hlambanyiki a ku a va nge ti nghena a ku wiseni kwake? Xana a ku va nga vone lava kalaka va nga yingisetanga? 19 Xileswo ha swi vona leswaku a va swi kotanga ku nghena hi leswi a va nga na lipfumelo.

4 Xileswo, leswi a xidumbiso xa ku nghena a ku wiseni kwake xa ha liki kone, a hi tivoneleni* akuva ku nga vi na mhunu kwezru lweyi a xi luzaka. 2 Hikusa na hine hi zrezreliwe madzrungula lamanene, hi lani swi viki ha kone ka vakokwana vezru; kambe a zritu ledzri va dzri yingeliki a dzri va pfunanga, hikusa a va nga na lipfumelo dzra ku fana ni dzra lava va yingisetiki. 3 Hine hi kombisaka lipfumelo ha nghena a ku wiseni kwake, kambe mayelanu na vone a hlaye leswi: “Kutani ni hlambanye na ni hlundzrukile ni ku: ‘A va nge ti nghena a ku wiseni kwanga’”, a hlaye leswo nambileswi ntsrhaku ka loko a hete mintizro yake a a li ku wiseni, ku sukela a ku tumbuluxiweni ka misava. 4 Hikusa mayelanu ni siku dzra wu 7 ka tsralwa dzra kukazri a tsrale leswi: “Xikwembu Nkulukumba a wise hi siku dzra wu 7 ka mintizro yake hinkwayu”, 5 nakone a tlhele a ku: “A va nge ti nghena a ku wiseni kwanga.”

6 Xileswo, leswi ka ha liki ni van’wana va kalaka va nga si na nghena, ni hi leswi lava zrangiki ku zrezreliwa madzrungula lamanene va kalaka va nga nghenanga hi mhaka ya ku kala ku yingiseta, 7 a tlhele a beka siku dzra kukazri hi ku hlaya ka psalma dzra Davhida ntsrhaku ka loko ku khalute nkama wa ku leha a ku: “Namunhla loko mi yingiseta zritu dzrake, mi nga tlanyaliseni timbilu tenu.” 8 Hikusa loko Yoxuwa a e va yisa mbangwini lowu a va ta wisela ka wone, Xikwembu Nkulukumba a a ta va a nga vulavulanga hi siku dzrin’wana. 9 Xileswo a vhanu va Xikwembu Nkulukumba va ha saleliwe hi siku dzra ku wisa ledzri fanaka ni siku dzra Savata. 10 Hikusa mhunu lweyi a ngheniki ku wiseni ka Xikwembu Nkulukumba a wise ni le mintizrweni yake ku fana ni leswi Xikwembu Nkulukumba a wisiki a mintizrweni yake.

11 Xileswo a hi yentxeni hinkwaswu leswi hi nga swi kotaka akuva hi nghena a ku wiseni koloko, akuva ku nga vi na mhunu lweyi a waka a va a landzrela xikombiso xavu xa ku kala ku yingiseta. 12 Hikusa a zritu dzra Xikwembu Nkulukumba dzra hanya nakone dzri ni ntamu, dzri lotiwe ku tlula xipada xin’wana ni xin’wana lexi tsremaka hi matlhelo ha mabidzri, dzri tlhava dzri nghena ndzreni ka mhunu lakakuva dzri kombisa leswi a nga xiswone hi le ndzreni* ni hi le handle,* dzri nghena ni ka mazrambu* ni le ndzrenindzreni ka wone nakone dzra swi kota ku twisisa miyanakanyu ni makungu ya mbilu. 13 A ku na mhunu nakone a ku na ntxhumu lexi fihlekiki a mahlweni kwake, kambe a mintxhumu hinkwayu ye dla yi paluxeka a mahlweni ka lweyi hi fanelaka ku tihlamulela kwake.

14 Xileswo, leswi hi nga ni muprista lwenkulu lweyi a tsremakanyiki matilo, ku nga Yesu N’wana wa Xikwembu Nkulukumba, a hi yeneni mahlweni hi vulavula hi ta lipfumelo ledzri hi nga na dzrone kwake. 15 Hikusa a muprista wezru lwenkulu awa ku twisisa ku tsrana kwezru hikusa a dzringiwe hi tindlela hinkwatu ku fana na hine, nambitanu a nga dohanga. 16 Kutani, a hi tsrhindzrekeleleni xiluvelo xa timpswalu letikulu hi khongota na hi ntsrhunxekile, akuva hi yamukela ntwelawusiwana ni timpswalu letikulu leswaku swi hi pfuna hi nkama wa kone.

5 Hikusa a muprista mun’wana ni mun’wana lwenkulu lweyi a hlawuliwaka vhanwini, a hlawuleliwa kuva a tizrela vhanu ka mintxhumu leyi fambisanaka na Xikwembu Nkulukumba, akuva a nyikela tinyiko ni magandzrelo ya swidoho. 2 Awa swi kota ku va komba ntwelawusiwana* lava kalaka va nga na wutivi ni lava dohaka,* swanga hi leswi na yene a lwisanaka ni ku tsrana kwake, 3 nakone hi mhaka ya leswo, a fanela ku tiyentxela magandzrelo hi kola ka swidoho swake ku fana ni leswi a ma yentxelaka vhanu van’wana.

4 A mhunu a nge tibeki ha wuswake ku va muprista lwenkulu, kambe ko va Xikwembu Nkulukumba lweyi a nga mu bekaka, ku fana ni leswi a bekiki Aroni. 5 Swi ve hi lani ku fanaka hi Kriste, a nga tibekanga ha wuswake ku va muprista lwenkulu, ina, a nga tidzrumisanga, kambe a dzrumisiwe hi Xikwembu Nkulukumba, lweyi a mu byeliki a ku: “Wene u n’wananga, namunhla ni ndzruluke papayi waku.” 6 Hi lani a tlhelaka a hlaya ha kone mbangwini wun’wana a ku: “U muprista hi lani ku nga helikiki wa ku fana na Melkisedeki.”

7 Nkama lowu a a li misaveni, Kriste a yentxe swikombelo leswi sukelaka mbilwini, hi zritu ledzrikulu ni hi minyembeti, ka lweyi a a kota ku mu huluxa ka lifu, nakone a yingeliwile hikusa a a txhava Xikwembu Nkulukumba. 8 Nambileswi a a li N’wanake, a dondzre ku yingiseta hi tinxanisa leti a kumaniki na tone. 9 Nakone ntsrhaku ka loko a ve lweyi a fanelekaka hi ku helela, a yentxe leswaku swi koteka kuva hinkwavu lava va mu yingisetaka va kuma ku huluxiwa loku nga helikiki, 10 hikusa a bekiwe hi Xikwembu Nkulukumba akuva a va muprista lwenkulu wa ku fana na Melkisedeki.

11 Hi ni swinyingi swa ku swi hlaya mayelanu na yene, nakone swi kazrata ni ku swi tlhamuxela, hikusa loko mi yingela ntxhumu ma hlwela ku wu twisisa. 12 Nambileswi swoswi* a mi fanela ku va vadondzrisi, ma ha vilela mhunu wa ku mi dondzrisa zritu dzra Xikwembu Nkulukumba ku sukela ka mintxhumu ya masungulo nakone ma ha djula mafi, ku nga li swakuda leswi tiyiki. 13 Hikusa mun’wana ni mun’wana lweyi a tamaka a tiwundla hi mafi a nga dzri tivi zritu dzra Xikwembu Nkulukumba,* hikusa i ntsrongwana. 14 Kambe swakuda leswi tiyiki i swa vhanu lava wupfiki, lava dondzrisaka wuswikoti byavu bya ku yanakanya* akuva va kota ku hambanisa leswinene ni leswi bihiki.

6 Leswi kutani hi khalutiki ka tidondzro ta masungulo mayelanu na Kriste, a hi tikazrateleni ku va lava wupfiki, hi nga ha tlheleni ka tidondzro ta masungulo, ku nga ku tisola ka mintxhumu leyi kalaka yi nga pfuni ntxhumu, ku va ni lipfumelo ka Xikwembu Nkulukumba, 2 dondzro ya mayelanu ni babatiso, dondzro ya ku tlhanteka ka mavoko, dondzro ya ku pfuxiwa ka vafi ni dondzro ya ku yavanyisiwa ka wugamu. 3 Leswo hi ta swi yentxa loko nakunene Xikwembu Nkulukumba a swi pfumelela.

4 Hikusa mayelanu ni lava va samiki va vaningeliwa, va dzringiki nyiko ya mahala ya le tilweni, va yamukeliki moya wa ku xwenga, 5 nakone va yamukeliki zritu ledzrinene dzra Xikwembu Nkulukumba ni matovoko lawa ma* taka nyikiwa misava leyi taka,* 6 kambe va gamiki va hambuka a lipfumelweni, a swi koteki ku va yentxa va tlhela va tisola, hikusa va tlhela va tigongondzrelela N’wana wa Xikwembu Nkulukumba a mhandzrini ni ku mu danisa a mahlweni ka vhanu. 7 Hikusa a misava yi yamukela tovoko ledzri pfaka ka Xikwembu Nkulukumba loko yi pswompswa mati ya mpfula leyi tsrhamelaka ku yi nela kutani ku va ni swibewu leswi pfunaka lava yi dzrimaka. 8 Kambe loko yi pswala mimitwa ni switlhavana a yi pfuni ntxhumu nakone yi kusuhi ni ku zrukiwa yi va hi wugamu yi hisiwa.

9 Kambe n’wine vazrandzriwa, nambileswi hi vulavulaka hi ndlela leyi, ha tiyiseka leswaku n’wine mi le ka xiyimu lexinene, mi yentxa mintxhumu leyi yi mi yisaka ku huluxiweni. 10 Hikusa Xikwembu Nkulukumba a lulamile nakone a nge wu dzrivali ntizro wenu ni lizrandzru ledzri mi dzri kombisiki hi kola ka vito dzrake, hi ku tizrela vaxwengi nakone ma ha tamaka mi va tizrela. 11 Kambe hi navela leswaku mun’wana ni mun’wana wenu a tama a kombisa ku hiseka loku fanaka akuva a dumbo dzrake dzri va ledzri tiyiki ku ya tlhasa wugamu, 12 ku yentxela leswaku mi nga lolohwi kambe mi yetisela lava yamukelaka leswi dumbisiwiki hi kola ka lipfumelo ni ku lehisa mbilu.

13 Hikusa nkama lowu Xikwembu Nkulukumba a dumbisiki Abrahamu a hlambanye hi yene n’winyi swanga hi leswi a a nge na ku hlambanya hi mhunu mun’wana, 14 a ku: “Nakunene ni ta ku tovokisa nakone ni ta yentxa leswaku vatukulu vaku va yandzra.” 15 Xileswo ntsrhaku ka loko Abrahamu a lehise mbilu a yamukele xidumbiso lexi. 16 Hikusa vhanu va hlambanya hi mhunu lweyi a tlakukiki kwavu, nakone a xihlambanyu xavu xi helisa ku kanetana hinkwaku, swanga hi leswi xi tiyisekisaka leswi va swi hlayaka. 17 Hi lani ku fanaka, loko Xikwembu Nkulukumba a teke xiboho xa ku swi kombisa ha hombe ka vamadapfindla va xidumbiso leswaku a nkongometo wake a wu nge txintxi,* a swi tiyisekise* hi xihlambanyu, 18 akuva hi kola ka mintxhumu leyibidzri leyi kalaka yi nga txintxi nakone Xikwembu Nkulukumba a ngeke na ku hemba ka yone, hine hi tsrutsrumeliki ku tumbeleni, hi kuma ku tiyisiwa lokukulu akuva hi khoma swi tiya ka dumbo dzrezru. 19 A dumbo ledzri hi nga na dzrone dzri fana ni hangi ya wutomi byezru,* dzri tiyile nakone dzra dumbeka, dzri hi nghenisa ndzreni hi le ntsrhaku ka kortina, 20 lomu Yesu a hi zrangeliki a nghena kone hi kola kwezru, yene a ve muprista lwenkulu wa ku fana na Melkisedeki hi lani ku nga helikiki.

7 Hikusa Melkisedeki, hosi ya Salema tlhelo muprista wa Xikwembu Nkulukumba Lweyi a Tlakukiki, a tlhangavete Abrahamu loko Abrahamu a buya hi ku dlayeni ka tihosi a va a mu tovokisa, 2 kutani Abrahamu a mu nyika* wukhume bya hinkwaswu. Xa ku sungula, a vito dzrake dzri tlhamuxela leswaku: “Hosi ya ku Lulama”, handle ka leswo, yene i hosi ya Salema, leswi liki: “Hosi ya ku Zrula.” 3 A swi tiveki leswaku papayi wake ni mamana wake i vamani, a ku na wudzrunguli bya lixaka dzrake, swaku a pswaliwe siku muni ni leswaku a fe siku muni a swi tiviwi, hi kola ka leswo yene a fana ni N’wana wa Xikwembu Nkulukumba, a tama a va muprista hi lani ku nga helikiki.

4 Vonani ndlela leyi Melkisedeki a tlakukiki ha yone, wanuna lweyi Abrahamu, nhloko ya ndangu,* a mu nyikiki wukhume bya mintxhumu leyinene leyi a yi phangiki. 5 Nakunene, hi ku ya hi nawu, a vana va Levhi lava yamukelaka wuprista, va leletiwe ku yamukela swa wukhume ka vhanu, ku nga vamakwavu, nambileswi va nga vatukulu va Abrahamu.* 6 Kambe wanuna lweyi, lweyi a a nga li wa lixaka dzra ka Levhi, a yamukele swa wukhume ka Abrahamu nakone a tovokise lweyi a a ni swidumbiso. 7 I ntiyiso leswaku lwentsrongo hi yene a tovokisiwaka hi lwenkulu. 8 A Valevhi va yamukele swa wukhume, nakone vone i vhanu lava faka, kambe wanuna lwemun’wana lweyi a yamukeliki swa wukhume, a Matsralwa ma tiyisekisa leswaku awa hanya. 9 Nakone ku nga hlayiwa leswaku hi ku tizrisa Abrahamu, nambi Levhi lweyi a yamukelaka swa wukhume, a humese swa wukhume, 10 hikusa Levhi a a nga si na pswaliwa* hi vhovho wake Abrahamu loko Melkisedeki a tlhangaveta Abrahamu.

11 Loko a wuprista bya Levhi a byo swi kota ku yentxa leswaku vhanu va va lava hetisekiki, swanga hi leswi byone byi hambaka xiyenge xa Nawu lowu nyikiwiki Vaisrayele, ha yini a ka ha ta vileleka muprista mun’wana wa ku fana na Melkisedeki ku nga li wa ku fana na Aroni? 12 Hikusa loko wuprista byi txintxiwa, swa fanela kuva na wo Nawu wu txintxiwa. 13 Hikusa wanuna lweyi ku hlayiwaka mintxhumu leyi mayelanu na yene a pfa hi ka lixaka dzrimbeni, ledzri ka dzrone ku kalaka ku nge na mhunu lweyi a samiki a tizra a altarini. 14 Hikusa swi le livaleni leswaku a Hosi yezru yi pfa hi ka lixaka dzra Yuda, kambe Moxe a nga zanga a hlaya leswaku ka lixaka ledzro a ku ta huma vaprista.

15 Nakone leswo swi khanya ha hombe hi ku va ku humelela muprista mun’wana wa ku fana na Melkisedeki, 16 lweyi a nga muprista, na ku nga li hi kola ka lixaka ledzri a pfaka ka dzrone, hi lani Nawu wu hlayaka ha kone, kambe hi leswi a nga ni ntamu lowu mu nyikaka wutomi lebyi ngeke na ku helisiwa. 17 Hikusa a tsralwa dzrin’wana dzri hlaya leswi mayelanu na yene: “U muprista hi lani ku nga helikiki wa ku fana na Melkisedeki.”

18 Xileswo, a Nawu wa khale wu helisiwile hikusa a wu na ntamu nakone a wu nge hi pfuni. 19 Hikusa a xi kone lexi Nawu wu xi yentxiki xi va lexi hetisekiki, kambe a dumbo dzra ku yampswa ledzri Xikwembu Nkulukumba a hi nyikaka dzrone, dzri yentxe mintxhumu yi va leyi hetisekiki nakone hi kola ka dzrone hi tsrhindzrekela kusuhi na Xikwembu Nkulukumba. 20 Handle ka leswo, a muprista lweyi a nga bekiwanga na ku nga yentxiwanga xihlambanyu xa kukazri 21 (hikusa nakunene ku ve ni vhanu lava viki vaprista na ku nga yentxiwanga xihlambanyu, kambe lweyi a ve muprista hi kola ka xihlambanyu lexi yentxiwiki mayelanu na yene hi lweyi a hlayiki leswi: “Yehovha a hlambanyile, nakone a nge ti txintxa miyanakanyu yake:* ‘Wene u muprista hi lani ku nga helikiki’”), 22 Yesu a ve xitiyisekiso xa xipfumelelanu xa ku yampswa. 23 Handle ka leswo, vanyingi swi djule va va vaprista hi ku pfaleta van’wana hi leswi lifu dzri va siveliki ku ya mahlweni va tizra swanga vaprista, 24 kambe leswi Yesu a yaka mahlweni a hanya hi lani ku nga helikiki, a wuprista byake a byi na wa ku byi siva. 25 Xileswo a kota ni ku va huluxa hi ku helela hinkwavu lava va khongotaka ka Xikwembu Nkulukumba hi vito dzrake, hikusa minkama hinkwayu awa hanya akuva a va kombelela.

26 Hikusa swa fanela kuva hi va ni muprista lwenkulu wa ku tasu, lweyi a dumbekaka, a kalaka a nga na nandzru, lweyi a kalaka a nga na bati, lweyi a kalaka a nga fani ni vadohi nikutsrongo, nakone a tlakuxiwiki henhla ka matilo. 27 Ku hambana ni vaprista lavo lavakulu, a swi vileli kuva a nyikela magandzrelo siku ni siku, a zranga hi ya swidoho swake a gama a yentxela vhanu van’wana, hikusa a swi yentxe kan’we swi helela kolanu, nkama lowu a tinyikeliki. 28 Hikusa a Nawu wu beka vhanu lava tsraniki va va vaprista lavakulu, kambe a zritu dzra xihlambanyu lexi yentxiwiki ntsrhaku ka Nawu dzri beka N’wana leswaku a va muprista, lweyi a yentxiwiki a va lweyi a hetisekiki hi lani ku nga helikiki.

8 A yinhlankulu ya leswi hi vulavulaka hi swone hi leyi: Hi ni muprista lwenkulu wa ku tasi, nakone a tsrhame vokweni dzra xinene dzra xiluvelo xa Xikwembu Nkulukumba a matilweni, 2 a tizra mbangwini wa ku xwenga ni le ka tende dzra ntiyiso ledzri yimisiwiki hi Yehovha, ku nga li hi mhunu. 3 Hikusa muprista mun’wana ni mun’wana lwenkulu a bekiwa akuva a nyikela swihanano ni magandzrelo; xileswo a swi vileleka leswaku lweyi na yene a va ni xa kukazri xa ku xi nyikela. 4 Loko a o va misaveni a a nge ti va muprista, swanga hi leswi kutani va nga kone vhanu lava nyikelaka swihanano hi ku ya hi Nawu. 5 A ntizro lowu vavanuna lava va wu yentxaka wo fanekisela ni ku kombisa mintxhumu ya le tilweni; ku fana ni leswi nkama lowu Moxe a a djula ku yaka tende, Xikwembu Nkulukumba a mu nyikiki xileleto lexi: “Tiyiseka leswaku hinkwaswu u swi yentxa hi ku landzra leswi u kombiwiki swone a nhaveni.” 6 Kambe swoswi Yesu a kume ntizro lowunene ngopfu hikusa a tlhela a va mutlhanganisi wa xipfumelelanu xa ku yampswa lexi simekiwiki na xi seketeliwe ka swidumbiso swa ku yampswa.

7 Loko a xipfumelelanu lexiyani xa ku sungula a xo kala xi nga na xihoxo, a xa wubidzri a xi ta va xi nga ha vilelekanga. 8 Hikusa a kuma xihoxo a vhanwini loko a ku: “‘Lavisani! A masiku ma ta’, ku hlaya Yehovha, lani ni taka yentxa xipfumelelanu leximpshwa ni yindlu ya Israyele kun’we ni yindlu ya Yuda. 9 A xi nge ti fana ni xipfumelelanu lexi ni xi yentxiki ni vakokwana vavu a sikwini ledzri ni va khomiki hi voko ni va humesa a tikweni dzra Egipta, hikusa va tsrhike xipfumelelanu xanga, xileswo ni tsrhike ku va hlayisa”, ku hlaya Yehovha.

10 “‘Hikusa lexi i xipfumelelanu lexi ni taka xi yentxa ni yindlu ya Israyele ntsrhaku ka masiku wolawo’, ku hlaya Yehovha. ‘Ni ta nghenisa milawu yanga a miyanakan’wini yavu, nakone ni ta yi tsrala ni le timbilwini tavu. Kutani ni ta va Xikwembu Nkulukumba wavu, na vone va ta va vhanu vanga.

11 “‘Nakone a nga kone lweyi a taka dondzrisa muyakitiko ni lweyi a taka byela makwavu a ku: “Tiva Yehovha!” Hikusa hinkwavu va ta ni tiva, ku sukela ka lwentsrongo ku ya ka lwenkulu. 12 Hikusa ni ta va dzrivalela mintizro yavu leyi kalaka yi nga lulamanga, ni swidoho swavu a ni nge he ti swi dzrimuki.’”

13 Hi ku va a vulavula hi “xipfumelelanu leximpshwa”, a yentxe leswaku lexa khale xi khaluteliwa hi nkama. Lexi xi khaluteliwaka hi nkama xi tlhela xi va xa khale xi kusuhi ni ku nyamalala.

9 A xipfumelelanu xa khale a xi ni milawu leyi a yi fanela ku landzriwa loko ku yentxiwa ntizro wa ku xwenga nakone a xi ni ni mbangu wa ku xwenga a misaveni. 2 Hikusa ka sala dzra ku sungula ledzri a dzri kumeka ndzreni ka tende, ledzri a va dzri vitana Mbangu wa ku Xwenga, a ku ni motsre kun’we ni menza ni mapawu* ya magandzrelo. 3 Kambe a ntsrhaku ka kortina dzra wubidzri a ku ni sala ledzri a dzri vitaniwa Mbangu wa ku Xwengisisa. 4 Ka sala ledzro a ku ni xibya xa woru xa ku hisela ka xone muzri wa ku nun’hwela ni areka dzra xipfumelelanu ledzri a dzri pambeliwe matlhelo hinkwawu hi woru. A ndzreni ka areka a ku ni nhonga ya Aroni leyi nga sama yi hluka, ni mazribye lawa a ma ni milawu ya Xikwembu Nkulukumba kun’we ni xibya xa woru lexi a xi ni mana; 5 nakone a henhla ka dzrone a ku ni makerubimi mabidzri lama phatimaka lawa a ma funekete mbangu wa ku kombela lidzrivalelo. Kambe swoswi a hi wone nkama wa ku tsrhokovetela timhaka leti.

6 Ntsrhaku ka loko mintxhumu leyi yi lulamiseliwe hi ndlela leyi, a vaprista a va nghena nkama ni nkama ka sala dzra ku sungula dzra tende akuva va yentxa mintizro ya ku xwenga; 7 kambe ka sala dzra wubidzri a ku nghena muprista lwenkulu na a li wuswake, kan’we hi lembe, nakone a a fanela ku nghena ni ngati, leyi a a yi nyikela hi kola kwake ni hi kola ka swidoho leswi vhanu va kalaka va nga swi yentxanga hi maxivomu. 8 Xileswo a moya wa ku xwenga wu swi khanyisa ha hombe leswaku nkama lowu na ka ha ni tende dzra ku sungula a ku na mhunu lweyi a kombiwiki ndlela ya ku ya mbangwini wa ku xwenga. 9 A tende ledzri dzri yimela mintxhumu leyi yentxekaka swoswi, nakone ku ta tlhasa swoswi, a swihanano ni magandzrelo swa ha nyikeliwa. Nambitanu, a swi swi koti ku yentxa leswaku a lipfalu dzra mhunu lweyi a yentxaka ntizro wa ku xwenga dzri va ledzri basiki hi ku helela. 10 Swo fambisana ntsena ni swakuda ni swa ku nwa kun’we ni tindlela ta ku siyanasiyana ta ku basisa vhanu ni mintxhumu.* Hinkwaswu leswo hi leswi Nawu a wu swi vilela nakone a swi fambisana ni mizri, swi tizre ku ya tlhasa loko ku tlhasa nkama wa ku lulamisa mintxhumu.

11 Nambitanu, loko Kriste a te swanga muprista lwenkulu akuva a hi tisela mintxhumu leyinene leyi kutani hi nga na yone, a nghene ka tende dzra lisima ngopfu swinene nakone dzri hetisekiki ledzri kalaka dzri nga hambiwanga hi mavoko ya vhanu, leswi liki, ledzri kalaka dzri nga li misaveni. 12 A nga nghenanga a mbangwini wa ku xwenga na a ni ngati ya timbuti ni swihon’wana kambe a nghene ni ngati yake, kan’we swi helela kolanu, a va a hi ntsrhunxa* hi lani ku nga helikiki. 13 Hikusa loko ngati ya timbuti ni ya tihomu ni nkuma wa xihon’wana xa pswele lowu xwanyiwaka lava va ntxhimiki, swi kota ku basisa mizri, 14 a ha ha hlayi ngati ya Kriste lweyi hi ku kongomisiwa hi moya wa ku xwenga lowu nga helikiki, a tinyikeliki ka Xikwembu Nkulukumba na a nga na xa ku solisa, a ngati yake yi basisa mapfalu yezru ka mintxhumu ya ku biha leyi hi yi yentxiki khale, akuva hi kota ku gandzrela Xikwembu Nkulukumba lweyi a hanyaka!

15 Hi leswo swi yentxaka a va mutlhanganisi wa xipfumelelanu leximpshwa, akuva vhanu va kota ku vitaneliwa ku kuma pfindla ledzri nga helikiki hikusa a file akuva a va tizrula ka swidoho leswi va swi yentxiki na va li hansi ka xipfumelelanu xa khale. 16 Hikusa lani ku nga ni xipfumelelanu, lweyi a nga yene a tlhanganisaka xipfumelelanu xolexo a fanela ku fa, 17 swanga hi leswi xipfumelelanu xi sungulaka ku tizra ntsrhaku ka lifu, hikusa a xi tizri na mutlhanganisi wa xone a ha hanya. 18 Hi mhaka ya leswo, nambi xipfumelelanu xa khale a swi kotekanga ku va xi tizra* na ku nga humesiwanga ngati. 19 Hikusa ntsrhaku ka loko Moxe a byele vhanu hinkwavu swileleto hinkwaswu swa Nawu, a teke ngati ya swihon’wana ni ya timbuti a swi djunta ni mati, a gama a tizrisa nhonga ya hisopa leyi tsrimbiwiki mavoya ya ku pshwuka akuva a xwanya buku* ni vhanu hinkwavu hi ngati, 20 na a ku: “Leyi i ngati ya xipfumelelanu lexi Xikwembu Nkulukumba a mi leletiki leswaku mi xi hlayisa.” 21 Hi lani ku fanaka a xwanye ngati ka tende ni ka swibya hinkwaswu leswi tizrisiwaka ka ntizro wa ku xwenga. 22 Ina, hi ku ya hi Nawu ntalu wa mintxhumu yi basisiwa hi ngati, nakone loko ku nga halatiwanga ngati a swidoho a swi nge dzrivaleliwi.

23 Xileswo a ku vileleka leswaku leswi swi nga xikombiso xa mintxhumu ya le tilweni swi basisiwa hi tindlela leti, kambe a mintxhumu ya le tilweni yi basisiwa hi magandzrelo ya ku yampswa ya ku tlula magandzrelo lawa. 24 Hikusa Kriste a nga nghenanga mbangwini wa ku xwenga lowu hambiwiki hi mavoko ya vhanu, lowu nga xikombiso xa mbangu lowu nga wone wa ku xwenga ha kakunene, kambe a nghene tilweni nakone swoswi a le mahlweni ka* Xikwembu Nkulukumba akuva ku pfuneka hine. 25 Leswo a swi nga yentxeliwi leswaku a tsrhamela ku tinyikela, ku fana ni loko muprista lwenkulu a nghena mbangwini wa ku xwenga lembe ni lembe ni ngati leyi kalaka yi nga li yake. 26 Loko a swi li hi ndlela leyo, ku sukela a ku tumbuluxiweni ka misava a a ta tsrhamela ku xaniseka nkama ni nkama. Kambe swoswi a ku heleni ka xiyimu xa misava* a humelele kan’we swi helela kolanu akuva a susa xidoho hi ku tiyentxa gandzrelo. 27 Nakone ku fana ni leswi ku yimeliwaka leswaku vhanu va fa kan’we swi helela kolanu kambe ntsrhaku ka leswo va yavanyisiwa, 28 na ye Kriste a tinyikele kan’we swi helela kolanu akuva a susa swidoho swa vhanu vanyingi; nakone ka khambi dzra wubidzri ledzri a taka humelela a ta va na a nga teli ku ta susa xidoho, kambe a tela ku ta huluxa lava mu yimelaka.

10 Hikusa leswi Nawu wo ko va ntsrhuti ntsena wa mintxhumu leyinene leyi ya ha taka, wone* kun’we ni magandzrelo lama fanaka lawa ma tsrhamelaka ku nyikeliwa lembe ni lembe, a swi nge swi koti ku yentxa leswaku lava va gandzrelaka Xikwembu Nkulukumba va va lava hetisekiki. 2 Loko a magandzrelo a mo swi kota ku va yentxa va va lava hetisekiki, a swi nge he ti vileleka leswaku ku yiwa mahlweni ku nyikeliwa magandzrelo, hikusa lava va yentxaka ntizro wa ku xwenga leswi a va ta va na va basisiwile, a va nge he ti titwa nandzru hi mhaka ya swidoho swavu. 3 Ku hambana ni leswo, lembe ni lembe a magandzrelo lawo ma dzrimuxa vhanu leswaku vone i vadohi, 4 hikusa a ngati ya tihomu ni ya timbuti a yi nge swi koti ku susa swidoho.

5 Xileswo nkama lowu Kriste a tiki misaveni, a te: “‘A wu djulanga magandzrelo ni minyikelo, kambe u ni lulamisele mizri. 6 A wu ma yamukelanga magandzrelo ya ku hisiwa ni magandzrelo ya xidoho.’ 7 Kutani ni te: ‘Hi mine lweyi! Ni tele ku ta yentxa ku zrandzra kwaku, wene Xikwembu Nkulukumba, (a bukwini* ku tsraliwe leswo mayelanu na mine).’” 8 Ntsrhaku ka loko a zrange a hlaya leswi: “A wu djulanga nambi ku yamukela magandzrelo, minyikelo, magandzrelo ya ku hisiwa ni magandzrelo ya xidoho”, ku nga magandzrelo lama nyikeliwaka hi ku ya hi Nawu, 9 a game a ku: “Hi mine lweyi! Ni tele ku ta yentxa ku zrandzra kwaku.” A helise lulamiselo dzra ku sungula akuva a simeka dzra wubidzri. 10 Hi ku ya hi ku “zrandzra” koloko ka Xikwembu Nkulukumba hi xwengisiwile hi ku tizrisa mizri wa Yesu Kriste lowu nyikeliwiki kan’we swi helela kolanu.

11 Handle ka leswo, siku ni siku muprista mun’wana ni mun’wana a ya mbangwini lowu a tizrelaka ka wone, leswaku a yentxa ntizro wa ku xwenga ni kuva a yentxa magandzrelo lama fanaka hi ku phindaphinda, ya ku a ma nge ti txhuka ma swi kota ku susa swidoho hi ku helela. 12 Kambe wanuna lweyi, a nyikele gandzrelo dzrin’we hi lani ku nga helikiki hi kola ka swidoho nakone a tsrhamise vokweni dzra xinene dzra Xikwembu Nkulukumba, 13 ku sukela kolanu ku ya mahlweni a yimela leswaku valala vake va bekiwa hansi ka minkondzro yake. 14 Hikusa ku ve hi gandzrelo dzrin’we lani a yentxiki leswaku hinkwavu lava xwengisiwaka va va lava hetisekiki hi lani ku nga helikiki. 15 Handle ka leswo, na wone moya wa ku xwenga wu hi nyika wumboni mayelanu na swone hi ku hlaya wu ku: 16 “‘Lexi i xipfumelelanu lexi ni taka xi yentxa na vone ntsrhaku ka masiku lawo, ku hlaya Yehovha. ‘Ni ta nghenisa a milawu yanga a timbilwini tavu, nakone ni ta yi tsrala ni le miyanakan’wini yavu.’” 17 Wu tlhele wu ku: “A ni nge he ti swi dzrimuka swidoho swavu kun’we ni swiyentxo swavu swa ku biha. 18 Loko Xikwembu Nkulukumba a dzrivalela swidoho leswi hinkwaswu, a ka ha vileleki gandzrelo dzra xidoho.

19 Xileswo vamakwezru, leswi hi kola ka ngati ya Yesu hi tiyaka ku tizrisa ndlela ya ku nghena a mbangwini wa ku xwenga, 20 leyi a hi pfuleliki* yone swanga ndlela leyimpshwa leyi yisaka a wuton’wini hi ku tizrisa kortina ledzri fanekiselaka nyama yake, 21 nakone leswi hi nga ni muprista lwenkulu lweyi a laviselaka yindlu ya Xikwembu Nkulukumba, 22 a hi tsrhindzrekeleleni Xikwembu Nkulukumba hi timbilu leti basiki ni hi ku kholwiseka lokukulu swanga hi leswi a timbilu tezru ti basisiwiki ka lipfalu ledzri bihiki, ni mizri wezru wu hlampswiwiki hi mati lama basiki. 23 A hi yeneni mahlweni hi khoma swi tiya ka ku zrezra hi ta dumbo dzrezru na hi nga ganaganeki, hikusa lweyi a hi dumbisiki awa dumbeka. 24 Nakone a hi zron’wekelelaneni akuva hi susumetelana ku kombisa lizrandzru ni ku yentxa mintizro leyinene, 25 na hi nga tsrhiki ku hlengeletana hi lani van’we va swi toloveliki ha kone, kambe hi tiyisanana, ngopfungopfu leswi siku dzri tsrhindzrekelaka.

26 Hikusa loko hi yentxa xidoho hi maxivomu ntsrhaku ka loko hi yamukele wutivi lebyi nga byone bya ntiyiso, a ka ha na gandzrelo ledzri nga nyikeliwaka hi kola ka swidoho swezru, 27 kambe leswi saliki i ku yimela yavanyiso ledzri txhavisaka ni mahlundzru lama pfuzraka ku fana ni ndzrilo, lama taka helisa valala va Xikwembu Nkulukumba. 28 Mun’wana ni mun’wana lweyi a tlulaka Nawu wa Moxe a dlayiwa na a nga tsretsreleliwi, loko ku kumeka wumboni bya vhanu vabidzri kumbe vazrazru. 29 Mi swi vonisa kuyini? Loko mhunu a pswanye N’wana wa Xikwembu Nkulukumba a tlhela a dzrela ngati ya xipfumelelanu leyi a xwengisiwiki ha yone nakone a yeyise moya wa Xikwembu Nkulukumba lweyi a nyikanaka timpswalu letikulu, xana a nga faneliwi hi yavanyiso ledzrikulu ngopfu swinene? 30 Hikusa ha mu tiva lweyi a hlayiki a ku: “A ku dzrihisela i kwanga; ni ta va hakelisa.” A tlhela a ku: “Yehovha a ta yavanyisa vhanu vake.” 31 Swa txhavisa ku wela mavokweni ya Xikwembu Nkulukumba lweyi a hanyaka.

32 Kambe tsrhamelani ku dzrimuka masiku ya khale, lawa ntsrhaku ka loko mi vaningeliwile, mi tiyiseleliki yimpi leyikulu na mi kumana ni tinxanisa. 33 Minkama yin’wana a mi xanisiwa ni ku zrukiwa vhanwini, nakone minkama yin’wanyana mi ve tlhelweni ka lava a va kumana ni mintxhumu yoleyo. 34 Hikusa mi va twele wusiwana lava a va li madjele nakone mi pfumele ku phangeliwa mintxhumu yenu na mi nyonxile hi ku tiva leswaku mi ni pfindla dzra ku yampswa ledzri nga helikiki.

35 Xileswo mi nga tsrhiki ku va ni xixixi,* hikusa hi kola ka xone mi ta hakeliwa ngopfu swinene. 36 Hikusa swi djula mi tiyisela akuva ntsrhaku ka loko mi yentxe ku zrandzra ka Xikwembu Nkulukumba, mi yamukela leswi a swi dumbisiki. 37 Hikusa ke salanyana “nkama wutsrongo”, “lweyi a taka a ta tlhasa nakone a nge ti hlwela.” 38 “Kambe a nandzra wanga lweyi a lulamiki a ta hanya hi kola ka lipfumelo”, “loko a tlhelela ntsrhaku, a ni* nge ti mu nyonxela.” 39 Hine a hi vhanu lava tlhelelaka ntsrhaku va ya ku helisiweni, kambe hi vhanu lava nga ni lipfumelo akuva hi huluxa wutomi byezru.*

11 Lipfumelo i ku dumba loku tiyiki ka leswaku leswi yimeliwaka swi ta yentxeka, ni xitiyisekiso xa leswaku leswi kalaka swi nga voniwi swi kone hakunene. 2 Hikusa hi kola ka dzrone, vhanu va khale* va yamukele wumboni bya leswaku Xikwembu Nkulukumba a a va nyonxela.

3 Hi lipfumelo, hi kota ku twisisa leswaku hinkwaswu leswi nga kone* swi bekiwe hi ndlela ya ku hleleka hi zritu dzra Xikwembu Nkulukumba, xileswo leswi swi voniwaka swi ve kone hi ku tizrisa mintxhumu leyi yi kalaka yi nga voniwi.

4 Hi lipfumelo, Abele a yentxele Xikwembu Nkulukumba gandzrelo dzra lisima ngopfu swinene ku tlula dzra Khayini, nakone hi kola ka lipfumelo ledzro a yamukele wumboni bya leswaku a a lulamile, hikusa Xikwembu Nkulukumba a swi yamukelile* swihanano swake, nakone nambileswi a fiki a ha vulavula hi kola ka lipfumelo dzrake.

5 Hi lipfumelo, Enoki a zruzrisiwile hi Xikwembu Nkulukumba, xileswo a nga fanga hi ndlela leyi tolovelekiki, nakone a nga kumiwanga hikusa Xikwembu Nkulukumba a a mu zruzrisile; na a nga si na zruzrisiwa a yamukele wumboni bya leswaku a a nyonxise Xikwembu Nkulukumba. 6 Handle ka leswo, loko mhunu a nga na lipfumelo a nge swi koti ku nyonxisa Xikwembu Nkulukumba, hikusa mun’wana ni mun’wana lweyi a tsrhindzrekelaka ka Xikwembu Nkulukumba a fanela ku kholwa leswaku Xikwembu Nkulukumba a kone ni leswaku awa va hakela lava mu djuletelaka hi timbilu tavu hinkwatu.

7 Hi lipfumelo, Nowa, nkama lowu Xikwembu Nkulukumba a mu byeliki mintxhumu leyi a yi ta yentxeka leyi a yi nga si na voniwa, a mu yingisetile Xikwembu Nkulukumba* kutani a yaka ngalawa akuva a huluxa ndangu wake, nakone hi kola ka lipfumelo dzrake a yavanyise misava, handle ka leswo a voniwe a li lweyi a lulamiki hi mhaka ya lipfumelo dzrake.

8 Hi lipfumelo, Abrahamu loko a vitaniwile a yingisetile hi ku va a famba mbangwini lowu a a ta wu yamukela swanga pfindla; a suke a famba nambileswi a a nga ku tivi lomu a a ya kone. 9 Hi lipfumelo, a hanye swanga muluveli a tikweni dzra xidumbiso ingiki hi loko o va tikweni dzra vambeni, a tsrhame matendeni na Izaki kun’we na Yakobe, lava na vone va yamukeliki xidumbiso lexi fanaka. 10 Hikusa a a yimela doropa ledzri nga ni masungulo lama tiyiki, ledzri a muhambi ni muyaki wa dzrone ku nga Xikwembu Nkulukumba.

11 Hi lipfumelo, na yene Sara a kume nyimba, nambileswi a a khalutile ka malembe ya kuva a nga va ni n’wana, swanga hi leswi a kholwiki leswaku lweyi a yentxiki xidumbiso awa dumbeka. 12 Xileswo, ka wanuna mun’we lweyi a swi tikomba ingiki a swi nge he ti koteka kuva a va ni vana, ku hume vhanu vanyingi va ku tala ku fana ni tinyeleti ta tilo lava swi kalaka swi nga koteki kuva va kontiwa ku fana ni misava ya lwandle.

13 Hinkwavu va fe na va ni lipfumelo ledzri tiyiki nambileswi va kalaka va nga yamukelanga ku hetiseka ka swidumbiso; kambe va swi vonile hi le kule va va va swi nyonxela nakone va zrezre a livaleni leswaku vone a va li valuveli ni vatsrhami va nkamanyana a tikweni ledzro. 14 Hikusa lava vulavulaka hi ndlela leyo va swi kombisa ha hombe leswaku va wu djula hi mbilu hinkwayu mbangu lowo, lowu taka va mbangu wavu. 15 Nambitanu, loko a ve tsrhamela ku dzrimukela mbangu lowu va sukiki ka wone, a va ta va va wu kumile mukhandlu wa ku tlhela. 16 Kambe swoswi va navela mbangu wa ku yampswa, ku nga mbangu lowu lumbaka matilo. Xileswo, Xikwembu Nkulukumba a nga dani ku vitaniwa Xikwembu Nkulukumba wavu, hikusa a va lulamiselele doropa.

17 Hi lipfumelo, nkama lowu Abrahamu a dzringiwiki, a djule ni ku nyikela Izaki; a ke sala kutsrongo kuva wanuna lweyi a a yamukele swidumbiso hi ku nyonxa a nyikela n’wanake wa mun’we, 18 nambileswi a a byeliwe leswi: “Lava va taka vitaniwa vana* vaku va ta pfa hi ka Izaki.” 19 Kambe a a kholwa leswaku Xikwembu Nkulukumba a a ta swi kota ku mu pfuxa nambi ku feni, nakone a mu yamukelile hi ndlela ya ku fanekisela ka lava ku fa.

20 Hi lipfumelo, na yene Izaki a tovokise Yakobe na Esawu hi ku va byela leswi a swi ta yentxeka a nkameni lowu taka.

21 Hi lipfumelo, nkama lowu Yakobe a a li kusuhi ni ku fa, a tovokise vana va Yosefa nakone a khinsame a gandzrela Xikwembu Nkulukumba na a sime hi nhonga yake.

22 Hi lipfumelo, nkama lowu Yosefa a a li kusuhi ni ku fa, a vulavule hi ku suka ka vana va Israyele a Egipta nakone a va lelete* leswi a va fanela ku swi yentxa hi mazrambu yake.*

23 Hi lipfumelo, a vapswele va Moxe va mu tumbetile ku dzringana tihweti tizrazru ntsrhaku ka loko a pswaliwile, hikusa va vone leswaku a a li n’wana wa ku xonga nakone a va wu txhavanga nawu wa hosi. 24 Hi lipfumelo, loko Moxe a kulile, a yale ku vitaniwa n’wana wa n’wana wa xisati wa Faro, 25 a hlawule ku xanisiwa ni vhanu va Xikwembu Nkulukumba a matsrhan’wini ya kuva a tikholisa hi xidoho swa nkamanyana, 26 hikusa a a vona ku dzreliwa hi ku va a li mutotiwa* na ku li ka lisima ngopfu swinene ku tlula wukosi bya le Egipta, hikusa a a swi yimele hi mbilu hinkwayu ku yamukela hakelo. 27 Hi lipfumelo, a suke Egipta na a nga txhavi mahlundzru ya hosi, hikusa a tame a yima a tiyile ingiki hi loko o vona lweyi a kalaka a nga voniwi. 28 Hi lipfumelo, a hambe paxkwa a tlhela a xwanya ngati ka xipfalu, akuva a ntsrumi ya Xikwembu Nkulukumba yi nga dlayi* vana vavu va mativula.

29 Hi lipfumelo, va tsremakanye Lwandle dzra ku Pshwuka ingiki hi loko vo famba ka misava ya ku woma, kambe loko Vaegipta va zame ku yentxa leswi fanaka, va mitiwe hi lwandle.

30 Hi lipfumelo, a Vaisrayele va zrendzrelekele makhumbi ya Yeriko ku dzringana 7 wa masiku ma gama ma wa. 31 Hi lipfumelo, Rahabi lweyi wa nghwavana, a nga fanga ni lava kalaka va nga yingisetanga, hikusa a va yamukele hi ku zrula vavanuna* lava a va zrumeliwe akuva va ya kambela tiko.

32 Na ha ta hlaya yini swin’wana? Hikusa ni nga heleliwa hi nkama loko ni ngo tama ni vulavula hi Gidiyoni, Baraki, Samsoni, Yefta, Davhida kun’we na Samuwele ni vaprofeta van’wana. 33 Hi lipfumelo, va hlule mimfumu, va yentxa leswaku ku va ni wululami, va yamukela swidumbiso, va pfala minomu ya tinghonyama, 34 va tima ntamu wa ndzrilo, va huluka ku dlayiwa hi xipada, loko va ve ni gome va nyikiwe ntamu, va ve ni ntamu a yimpini, va hlule masotxha ya valala. 35 Vavasati va pfuxeliwe maxaka yavu lawa a ma file, kambe vavanuna van’wana va xanisiwile hi leswi va kalaka va nga tsrhikanga lipfumelo dzravu ntsena hi ku djula ku ntsrhunxiwa, ku yentxela leswaku va kuma ku pfuxiwa loku yampswaka. 36 Ina, van’wana va dzringiwile hi ku poyiliwa ni ku biwa, ku tlula leswo, va tsrimbiwe hi matxhini ni ku pfaleliwa madjele. 37 Va khandliwe hi mazribye, va dzringiwile, va sahiwe hi le xikazri, va dlayiwe hi xipada, va fambafambe na va yambale swikhumba swa tihamba ni swa timbuti. Va ve ku pfumaleni, a mahlomulweni ni le ku xanisiweni; 38 nakone a misava a yi nga va faneli. Va yingayinge a mananga, a tinhaveni, a timhakweni ni le mimpaleni.

39 Nambileswi hinkwavu va yamukeliki wumboni lebyinene hi mhaka ya lipfumelo dzravu, a va swi kumanga leswi va dumbisiwiki swone, 40 hikusa Xikwembu Nkulukumba a a ni makungu ya ku zranga a nyika hine ntxhumu wa ku yampswa, akuva va nga vi va ku sungula ku yentxiwa lava hetisekiki.

12 Xileswo, leswi hi nga ni tlavi ledzrikulu dzra timboni ledzri hi tsrandzreliki, na hine a hi txukumeteni hinkwaswu leswi swi hi bindzraka ni xidoho lexi xi hi phasaka hi ku nabyala, a hi tsrutsrumeni hi ku tiyisela ka mpalisanu lowu hi nga ka wone, 2 na hi lavisisisa Yesu, Muzrangeli wa wutomi tlhelo Muhetisisi wa lipfumelo dzrezru. Hi kola ka ku nyonxa lokukulu loku a a ta ku kuma a tiyiselele mhandzri ya nxanisa,* a dzrela tingana, nakone swoswi a tsrhame vokweni dzra xinene dzra xiluvelo xa Xikwembu Nkulukumba. 3 Xileswo yanakanyani ha hombe hi xikombiso xa lweyi a tiyiseleliki swizruku swa vadohi, lava hi ku yentxa leswo a vo tiyavanyisa ha wuswavu, akuva mi nga kazrali mi tsrhika.

4 Ka ku lwa kwenu ni xidoho lexo, a mi ngi ngi sama mi lwa lakakuva mi huma ni ngati. 5 Nakone mi xi dzrivale hi ku helela a xitsratsriyo lexi mi byeliwiki xone swanga vana, xa ku: “N’wananga, u nga dzreli ku laya loku pfaka ka Yehovha, nambi ku hela ntamu loko a ku kawuka; 6 hikusa lava Yehovha a va zrandzraka awa va laya, nakunene a kwapa* mun’wana ni mun’wana lweyi a mu vonaka swanga n’wanake.”

7 Tiyiselelani tinxanisa leti mi kumanaka na tone nakone ti vonani swanga ndlela ya kuva mi layiwa.* Leyi hi yo ndlela leyi Xikwembu Nkulukumba a va khomaka ha yone vanake. Hikusa he wini n’wana lweyi papayi wake a kalaka a nga mu layi? 8 Kambe loko Xikwembu Nkulukumba a nga mi layi ku fana ni leswi a layaka van’wana, swi hlaya leswaku a mi vanake va kakunene kambe mi vana va mhunu mun’wana. 9 Handle ka leswo, vapapayi vezru* a va hi laya, nakone hi va kombise xitxhavu. Xana a hi fanelanga hi hantla hi tibeka hansi ka Papayi lweyi a kongomisaka wutomi byezru hi ntamu wake wa ku xwenga akuva hi hanya? 10 Hikusa vapapayi vezru va hi laye swa nkamanyana hi ku ya hi leswi va swi voniki swi li swinene, kambe Xikwembu Nkulukumba a hi laya akuva hi pfuneka, ku yentxela leswaku hi va lava xwengiki ku fana ni leswi na yene a xwengiki. 11 Ku hlaya ntiyiso, a nga kone a nyonxaka loko a layiwa, ku hambana ni leswo, awa kwata hikusa swa vavisa; kambe a ku layiwa ku pfuna ngopfu ka lava tiyimiseliki ku dondzra swa kukazri nakone ntsrhaku ka leswo va nga hanya hi ndlela leyi lulamiki va tlhela va va ni ku zrula.

12 Xileswo tiyisani mavoko lama lelaka ni matsrolo lama gudlagudlaka, 13 nakone yanani mahlweni mi lulamiselela minkondzro yenu tindlela ta ku lulama, leswaku lweyi a nga xilima a wulima byake byi nga pfisi, kambe a matsrhan’wini ya leswo, a dahiwa. 14 Lwelani ku va ni ku zrula ni vhanu hinkwavu ni ku hanya wutomi lebyi xwengiki, hikusa loko mhunu a nga li na byone a nge yi voni Hosi. 15 Tivonelani leswaku ku nga vi na mhunu lweyi a hlulekaka ku kuma timpswalu letikulu ta Xikwembu Nkulukumba, ni leswaku a makazri kwenu ku nga hluki a limitsru dzra vhenene dzri vanga swikazratu ni ku yentxa leswaku vanyingi va nyama;* 16 nakone tivonelani leswaku a makazri kwenu ku nga vi na mhunu lweyi a nga muyentxi wa swiyentxo swa tingana hi tlhelo dzra tinkuku* nambi lweyi a kalaka a nga yi nyiki lisima mintxhumu leyi xwengiki, ku fana na Esawu lweyi a txintxisiki mfanelo yake ya ku va mativula hi swakuda. 17 Hikusa ma swi tiva leswaku hi ku famba ka nkama, loko a djule ku tovokisiwa, a yaleliwile; nambileswi a zamiki ku txintxa miyanakanyu ya papayi wake hi ku dzrila, a swi pfunanga ntxhumu.

18 Hikusa n’wine a mi tsrhindzrekelelanga nhava leyi mi nga yi khumbaka, leyi tlhavikiwiki ndzrilo, leyi viki ni tlavi dzra ntima ni munyama lowukulu nakone yi tsrandzreliwiki hi xidzedze, 19 hi mpfumawulu wa xipalapala ni hi zritu ledzri twiwiki na dzri pfa tilweni, ledzri loko va dzri twile va kombeliki leswaku dzri nga ha va byeli ntxhumu. 20 Hikusa va txhavisiwe ngopfu hi nawu lowu liki: “Nambi xihazri loko xi khumba nhava xi fanela ku khandliwa hi mazribye.” 21 Nakone leswi a swi voniwa a swi txhavisa lakakuva Moxe a ku: “No zruzrumela hi ku txhava.” 22 Kambe mi tsrhindzrekelele Nhava ya Siyoni ni doropa ledzri hanyaka dzra Xikwembu Nkulukumba, ku nga Yerusalema wa le tilweni, ni makume ya magidi* ya tintsrumi 23 leti hlengeletaniki, mi tsrhindzrekelele ni bandla dzra mativula lama tsraliwiki a tilweni, mi tsrhindzrekelela Xikwembu Nkulukumba lweyi a nga Muyavanyisi wa hinkwavu, mi tsrhindzrekelela ni valulami lava hanyaka hi ku fambisana ni ntamu lowu xwengiki nakone va yentxiwiki lava hetisekiki, 24 mi tsrhindzrekelela na Yesu lweyi a nga mutlhanganisi wa xipfumelelanu leximpshwa, nakone mi tsrhindzrekelele ni ngati leyi xwanyiwiki, leyi vulavulaka hi swa ku yampswa ku tlula ngati ya Abele.

25 Tivonelani kuva mi nga tsrhiki ku yingiseta* lweyi a vulavulaka. Hikusa loko lava tsrhikiki ku yingiseta lweyi a nyikelaka xibasopiso lexi xwengiki a misaveni va nga hulukanga, hine ke hi ta hulukisa kuyini loko hi nga dzri yingiseti zritu dzra lweyi a vulavulaka na a li tilweni? 26 Hi nkama wolowo a zritu dzrake dzri tsrekatsrekise misava, kambe swoswi a dumbise leswi: “Ni ta tlhela ni tsrekatsrekisa misava kambe ku nga li misava ntsena, ni matilo.” 27 A zritu ledzri liki “ni ta tlhela” dzri kombisa leswaku Xikwembu Nkulukumba a ta susa mintxhumu leyi tsrekatsrekaka, ku nga mintxhumu leyi kalaka yi nga yentxiwanga hi Xikwembu Nkulukumba, akuva mintxhumu leyi kalaka yi nga tsrekatsreki yi tama yi va kone. 28 Xileswo leswi hi taka yamukela Mfumu wa ku a wu nge tsrekatsrekisiwi, a hi yeneni mahlweni hi yamukela timpswalu letikulu, leti hi kola ka tone hi nga yentxelaka Xikwembu Nkulukumba ntizro wa ku xwenga hi ndlela leyi yamukelekaka, hi ku txhava ni ku zruzrumela. 29 Hikusa Xikwembu Nkulukumba wezru i ndzrilo lowu helisaka.

13 Yanani mahlweni mi zrandzranana ingiki hi loko mi li vamakwavu. 2 Mi nga dzrivali ku kombisa malwandla, hikusa hi ku yentxa leswo van’wana na va nga swi tivi va yamukele tintsrumi. 3 Dzrimukani lava nga madjele, ingiki hi loko mi pfaleliwe na vone, mi dzrimuka ni lava va xanisiwaka, ingiki hi loko na n’wine mi le ku xanisekeni na vone. 4 A mutxhatu a wu* hloniphiwe hi vhanu hinkwavu nakone a mubede wa lava va txhatiki a wu ve lowu basiki,* hikusa Xikwembu Nkulukumba a ta va yavanyisa lava va yentxaka swiyentxo swa tingana hi tlhelo dzra tinkuku kun’we ni lava va mbuyetaka. 5 Mi nga zrandzri mali, ku hambana ni leswo, nyonxani hi leswi mi nga na swone. Hikusa Xikwembu Nkulukumba a te: “A ni nge ti txhuka ni ku tsrhika, nakone a ni nge ti txhuka ni yima ku ku pfuna.” 6 Xileswo hi nga hlaya na hi tiyile hi ku helela hi ku: “Yehovha i mupfuni wanga; a ni nge txhavi. A mhunu a nga ni yentxa yini?”

7 Dzrimukani lava mi zrangelaka, lava mi byeliki zritu dzra Xikwembu Nkulukumba, nakone nkama lowu mi xiyisisaka mahanyela yavu lamanene, yetiselani lipfumelo dzravu.

8 Yesu Kriste hi yelweyi wa mun’we, tolo, namunhla ni hi lani ku nga helikiki.

9 Mi nga hambukisiwi hi tidondzro ta ku siyanasiyana ta ku hambana ni leti mi ti pfumeliki, hikusa swa yampswa kuva mbilu yi tiyisiwa hi timpswalu letikulu ku tlula ku va yi tiyisiwa hi swakuda, leswi kalaka swi nga va pfuni hi ntxhumu lava va swi landzrelelaka.

10 Hi ni altari ledzri lava va yentxaka ntizro wa ku xwenga a tendeni va kalaka va nga na mfanelo ya ku da leswi nga ka dzrone. 11 Hikusa a mizri wa swihazri leswi ngati ya swone yi tekiwaka hi muprista lwenkulu yi yisiwa a mbangwini wa ku xwenga swanga gandzrelo dzra xidoho, yi hiseliwa kule ni lomu vhanu va tsrhamaka kone. 12 Xileswo na yene Yesu a xaniseke handle ka doropa* akuva a xwengisa vhanu hi ngati yake. 13 Xileswo a hi mu yeleni lomu a nga kone, kule ni lomu vhanu va tsrhamaka kone, na hi zrwale xizruku lexi na yene a xi zrwaliki, 14 hikusa lani a hi na dzrone doropa ledzri taka tsrhamisa hi lani ku nga helikiki, kambe hi dzri lavisele ngopfu ledzra ha taka. 15 Hi ku tizrisa lipfumelo ledzri hi nga na dzrone ka Yesu, minkama hinkwayu a hi nyikeleni gandzrelo dzra xidzrumiso ka Xikwembu Nkulukumba, ku nga mazritu lama humaka a minon’wini yezru* lawa hi ma humeselaka ku twalisa vito dzrake. 16 Handle ka leswo, mi nga dzrivali ku yentxa leswinene ni ku yavela van’wana leswi mi nga na swone, hikusa Xikwembu Nkulukumba a nyonxa ngopfu swinene hi magandzrelo ya ku tasu.

17 Yingisetani lava va mi zrangelaka mi tlhela mi tibeka hansi kwavu, hikusa minkama hinkwayu va mi hlayisa nakone va ta tihlamulela hi kola ka swone, akuva va nga swi yentxi na va kazratekile kambe va swi yentxa na va nyonxile, hikusa leswo a swi nge ti mi pfuna.

18 Tamani mi hi khongotelela hikusa ha dumba leswaku hi ni lipfalu ledzrinene, nakone hi djula ku hanya hi ku dumbeka ka mintxhumu hinkwayu. 19 Kambe ngopfungopfu ni mi tsratsriya leswaku mi hi khongotelela akuva ni ta hantla ni mi tela.

20 Ingiki Xikwembu Nkulukumba wa ku zrula, lweyi a pfuxiki mubyisi lwenkulu wa tihamba, Hosi yezru Yesu, na a ni ngati leyi yentxaka leswaku a xipfumelelanu lexi nga helikiki xi tizra, 21 a nga mi nyika mintxhumu hinkwayu leyinene akuva mi yentxa ku zrandzra kwake, nakone ni khongota leswaku hi ku tizrisa Yesu Kriste a nga hi susumetela ku yentxa ku zrandzra kwake, a a dzrumisiwi Xikwembu Nkulukumba hi masiku ni masiku. Amen.

22 Kutani vamakwezru, ni mi tsratsriya leswaku mi yamukela mazritu lawa lama kutxanaka, hikusa ni mi tsralele papela dzra ku goma. 23 Ni djula ku mi tivisa leswaku makwezru Timotewu a ntsrhunxiwile. Loko a hantla a tlhasa, hi ta buya xikan’we akuva hi ta mi vona.

24 Ni dzrungulelani hinkwavu lava mi zrangelaka kun’we ni vaxwengi hinkwavu. Vamakwezru lava nga halenu Italiya va mi dzrungula.

25 A timpswalu letikulu a ti ve na n’wine hinkwenu.