PAPELA DZRA YAKOBE

1 Mine Yakobe, xikazrawa xa Xikwembu Nkulukumba na Hosi Yesu Kriste, ni tsralela 12 wa tinxaka leti hangalakiki:

Na mi losa!

2 Nyonxani vamakwezru, loko mi kumana ni mindzringo ya ku siyanasiyana, 3 hi ku tiva leswaku a lipfumelo dzrenu ledzri dzringiwiki hi ndlela leyi, dzri pswala ku tiyisela. 4 Xileswo, pfumelelani ku tiyisela ku hetisa ntizro wa kone, akuva mi va lava hetisekiki ni lava kalaka va nge na xa ku solisa ka mintxhumu hinkwayu, mi nga pfumali ntxhumu.

5 Xileswo, loko mun’we wenu a pfumala wutlhazri, a a tame a byi kombela ka Xikwembu Nkulukumba, hikusa a hanana hinkwavu hi mbilu hinkwayu na a nga va soli, kutani a ta nyikiwa byone. 6 Kambe a a tame a kombela hi lipfumelo, a nga ganaganeki nikutsrongo, hikusa lweyi a ganaganekaka a fana ni vimbi dzra lwandle ledzri yingayingisiwaka hi moya dzri yisiwa hala ni hala; 7 nakunene, mhunu lweyo a nga fanelanga a yimela ku yamukela xa kukazri lexi pfaka ka Yehovha; 8 i mhunu wa timbilu tibidzri, lweyi a kalaka a nga tiyanga tindleleni take hinkwatu.

9 Kambe makwezru lweyi a nga xisiwana a a nyonxi* hi ku tlakuxiwa kwake, 10 lweyi a nga xipfundzri a a nyonxi hi ku tsrongahatiwa kwake, hikusa lweyi a nga xipfundzri a ta nyamalala ku fana ni xiluva xa nhova. 11 Hikusa ku fana ni leswi dambu dzri humaka ni mumu wa dzrone wu hisaka wu bunisa xinsinyana lakakuva a xiluva xa xone xi wa ni ku xonga ka xone ku hela, a xipfundzri na xone xi ta buna na xi hlongolisela wukosi.

12 Awa nyonxa mhunu lweyi a tamaka a tiyisela mindzringo, hikusa loko a yamukeleka ka Xikwembu Nkulukumba a ta kuma ngiyana ya wutomi, leyi Yehovha a yi dumbisiki lava va tamaka va mu zrandzra. 13 Loko mhunu a kumana ni ndzringo a nga hlayi a ku: “Ni dzringiwa hi Xikwembu Nkulukumba.” Hikusa Xikwembu Nkulukumba a nge dzringiwi hi mintxhumu ya ku biha nakone nambi yene a nga dzringi mhunu. 14 Kambe mun’wana ni mun’wana a dzringiwa hi ku kokiwa ni ku wongiwa* hi ku navela kwake. 15 Kutani loko ku navela koloko ku kula ngopfu,* ku yentxa leswaku mhunu a doha;* a xidoho loko xi yentxiwile, xi yisa ku feni.

16 Vamakwezru lava zrandzrekaka, mi nga tikanganyisi. 17 A nyiko yin’wana ni yin’wana leyinene kun’we ni xihiwa xin’wana ni xin’wana lexi hetisekiki swi pfa hi le tilweni, swi xika hi ka Muvumbi* wa livaningu dzra le tilweni, lweyi a kalaka a nga txintxatxintxi ku fana ni ntsrhuti lowu txintxatxintxaka. 18 Leswi a ku li ku zrandzra kwake a hi yentxe hi va kone hi ku tizrisa zritu dzra ntiyiso, a yentxe leswo akuva hi va va ku sungula ku hlawuliwa ka swivumbiwa swake.

19 Vamakwezru lava zrandzrekaka, tivani leswi: Mun’wana ni mun’wana a fanela ku kahlula ku yingela, a hlwela ku vulavula, a hlwela ku hlundzruka, 20 hikusa loko mhunu a hlundzruka, a nga yentxi leswi fambisanaka ni wululami bya Xikwembu Nkulukumba. 21 Xileswo, txukumetani nsila hinkwayu ni ntxhumu wun’wana ni wun’wana lowu bihiki,* hi ku titsrongahata yamukelani zritu dzra Xikwembu Nkulukumba nakone dzri pfumelelani dzri dzima timitsru a timbilwini tenu, hikusa hi dzrone dzri nga mi huluxaka.*

22 Minkama hinkwayu yentxani leswi zritu dzra Xikwembu Nkulukumba dzri hlayaka swone, mi nga vi lava va dzri yingelaka ntsena, mi nga tikanganyisi hi mayanakanyela ya madzrimi. 23 Hikusa loko mhunu a yingela zritu kambe a nga yentxi leswi dzri hlayaka swone, a fana ni mhunu lweyi a tilavisaka wuso ka xipelhu. 24 Hikusa awa tilavisa a gama a suka a famba, kutani hi ku kahlula a dzrivala leswaku a tsrhamisise kuyini. 25 Kambe lweyi a kambisisaka nawu lowu hetisekiki, lowu nyikanaka ntsrhunxeko nakone a tamaka a wu landzra, a hi mhunu lweyi a yingelaka a gama a dzrivala, kambe a yentxa ntizro wa Xikwembu Nkulukumba; nakone a ta nyonxa hi ku wu yentxa.

26 Loko mhunu a pimisa leswaku i mugandzreli wa Xikwembu Nkulukumba* kambe a nga lawuli* lidzrimi dzrake, o tikanganyisa, nakone a wugandzreli byake a byi pfuni ntxhumu. 27 A wugandzreli* lebyi basiki nakone byi kalaka byi nga solisi hi ku ya hi vonela dzra Xikwembu Nkulukumba tlhelo Papayi wezru hi lebyi: Ku pfuna vana lava feliwiki hi vapswele ni vavasati lava kumanaka ni swikazratu lava feliwiki hi vanuna, ni ku tama hi nga vi na bati* dzra misava.

2 Vamakwezru, a mo kombisa xihlawuhlawu na hi nkama wu li wun’we mi kombisa lipfumelo ka Hosi yezru Yesu Kriste lweyi a nga ku phatima kwezru? 2 Hikusa loko a ntlhanganwini wenu ku nghena mhunu lweyi a yambaliki switlan’wana swa woru ka tintiho take nakone a yambaliki timpahla ta ku dula, kambe ku tlhela ku nghena mhunu lweyi a nga xisiwana lweyi a yambaliki mpahla ya ku ntxhima, 3 xana mi yamukela ha hombe lweyi a yambaliki mpahla ya ku dula mi va mi ku: “Tsrhamisa lani mbangwini lowunene”, kambe mi byela lweyi wa xisiwana mi ku: “Wene yima lahaya”, kumbe: “Tsrhamisa lanu hansi kusuhi ni xibankwana lexi ni tlhantekaka ka xone minkondzro yanga”? 4 Loko mi yentxa leswo, mi va na mi teka ntlawa wun’we wu li lowu tlakukiki ku tlula lowumbenyana, nakone mi va na mi yavanyisa vhanu hi ndlela leyi bihiki.

5 Vamakwezru lava zrandzrekaka yingisetani leswi ni djulaka ku mi byela swone. Xana lava Xikwembu Nkulukumba a va hlawuliki leswaku va va lava ganyiki a lipfumelweni ni leswaku va va vamadapfindla va Mfumu lowu a wu dumbisiki lava va mu zrandzraka, a hi vone lava misava yi va vonaka va li swisiwana? 6 Kambe n’wine mi dzrela swisiwana, kasi lava va ganyiki a hi vone va mi xanisaka ni ku mi kokovisela va mi yisa matribunali? 7 A hi vone lava zrukaka vito ledzrinene ledzri mi nyikiwiki dzrone? 8 A Matsralwa ma li: “U fanela ku zrandzra vhanu van’wana hi ndlela leyi u tizrandzraka ha yone”, xileswo mi yentxa swone loko mi yingiseta nawu lowo wa Hosi. 9 Kambe loko mi tama mi kombisa xihlawuhlawu, mi va na mo doha, hikusa a nawu wolowo wu swi beka livaleni leswaku mi vatluli va nawu.

10 Hikusa loko mhunu a yingiseta Nawu hinkwawu kambe a tlula xileleto xin’we, a va na a honise Nawu hinkwawu. 11 Hikusa lweyi a hlayiki swaku: “U nga txhuki u yentxa wumbuye”, a tlhele a ku: “U nga txhuki u dlaya.” Kutani loko u nga yentxi wumbuye kambe u dlaya, u mutluli wa nawu. 12 Yanani mahlweni mi vulavula ni ku hanya hi ndlela leyi lava va taka yavanyisiwa hi ku ya hi nawu lowu kongomisaka vhanu lava ntsrhunxekiki* va hanyaka ha yone. 13 Hikusa lweyi a kalaka a nga kombisi timpswalu a nge ti kombiwa timpswalu loko a yavanyisiwa. A mhunu lweyi a nga ni timpswalu a ta hlula loko a yavanyisiwa.*

14 Swi pfuna yini vamakwezru, kuva mhunu a hlaya leswaku a ni lipfumelo kambe a nga swi kombisi hi mintizro? Xana a lipfumelo dzroledzro dzri nga swi kota ku mu huluxa? 15 Loko vamakwezru va xinuna kumbe va xisati va pfumala mpahla* ni swakuda swa ku yanela swa siku dzrin’wana ni dzrin’wana, 16 kutani mun’we wenu a va byela a ku: “Fambani hi ku zrula, ingiki mi nga kuma mpahla ni swakuda swa siku dzrin’wana ni dzrin’wana”, kambe a nga va nyiki leswi va swi vilelaka akuva va hanya, swi pfuna yini? 17 Hi lani ku fanaka, a lipfumelo ledzri kalaka dzri nga na mintizro dzri file.

18 Nambitanu, mhunu wa kukazri a ta ku: “Wene u ni lipfumelo, mine ni ni mintizro. Ni kombe lipfumelo dzraku ledzri dzri kalaka dzri nga na mintizro, mine ni ta ku komba lipfumelo dzranga hi mintizro.” 19 Wene wa kholwa leswaku Xikwembu Nkulukumba i mun’we a hi swone? U yentxa swone, kambe nambi mademona ma swi kholwa leswo ma patsra ni ku zruzrumela. 20 Ximphunta ndzriwene, a wu swi tivi leswaku a lipfumelo ledzri kalaka dzri nga na mintizro a dzri pfuni ntxhumu? 21 Xana papayi wezru Abrahamu a nga voniwanga a li lweyi a lulamiki hi kola ka mintizro, hi ku va a nyikele n’wanake Izaki a altarini akuva a va gandzrelo? 22 Ma swi xiya leswaku a lipfumelo dzrake dzri longoloke ni mintizro yake, ni leswaku a lipfumelo dzrake dzri yentxiwe ledzri hetisekiki hi mintizro, 23 nakone ku hetiseke tsralwa ledzri liki: “Abrahamu a kombise lipfumelo ka Yehovha, kutani a voniwa a li lweyi a lulamiki”, nakone a vitaniwe munghanu wa Yehovha.

24 Ma swi xiya leswaku mhunu a ta voniwa a li lweyi a lulamiki hi mintizro ku nga li hi lipfumelo ntsena. 25 Hi lani ku fanaka, xana Rahabi lweyi wa nghwavana, na yene a nga voniwanga a li lweyi a lulamiki hi mintizro ntsrhaku ka loko a yamukele vazrumiwa* hi malwandla a va a va tsrutsrumisa hi ndlela yin’wana? 26 Nakunene ku fana ni leswi mizri lowu kalaka wu nga na moya* wu fiki, na dzrone lipfumelo ledzri kalaka dzri nga na mintizro dzri file.

3 Vamakwezru, a swi sindzrisi leswaku ntalu wenu mi va vadondzrisi swanga hi leswi hi swi tivaka leswaku hi ta kuma yavanyiso dzra ku bindzra* ngopfu. 2 Hikusa hinkwezru minkama yinyingi ha phazama.* Lweyi a kalaka a nga phazami a ku vulavuleni a hetisekile, nakone a kota ni ku kongomisa mizri wake hinkwawu. 3 Loko hi tsrimba matomu* ka minomu ya makavhalu akuva ma hi yingiseta, hi kongomisa ni mizri wa wone hinkwawu. 4 Yanakanyisisani ni hi maboti: Nambileswi ma nga makulu nakone ma susumetiwaka hi moya lowukulu, ma fambisiwa hi marema ya matsrongo ma ya lomu lweyi a ma kongomisaka a djulaka leswaku ma ya kone.

5 Hi lani ku fanaka, a lidzrimi i xizro xa xitsrongo xa mizri, kambe dzri tikulisa ngopfu. Phela a ndzrilo nambiloko wu ngo va xinhlahlana wu nga hisa nhova ya yikulu ngopfu swinene! 6 Na dzrone lidzrimi i ndzrilo. Ka swizro hinkwaswu swa mizri wezru a lidzrimi hi dzrone dzri taliki hi mintxhumu leyi bihiki hikusa dzri nyamisa mizri hinkwawu, dzrone dzri nga hohlota wutomi bya mhunu* nakone dzri fana ni Gehena* hikusa dzra hohlota. 7 Hikusa mixaka hinkwayu ya swihazri swa nhova, tinyanyana, swihazri swa ku famba hi khuzri* ni swivumbiwa swa le lwandle swi fanela ku fumiwa hi vhanu nakone va swi fuma. 8 Kambe a ku na mhunu lweyi a nga lawulaka* lidzrimi. A dzri lawuleki* nakone dzri bihile futsrhi dzri tale hi vhenene ledzri dlayaka. 9 Ha dzrone hi dzrumisa Yehovha Papayi wezru, nambitanu, ha dzrone hi zruka vhanu lava hambiwiki a xifanisweni xa Xikwembu Nkulukumba. 10 Ka nomu wolowu wa wun’we ku huma swidzrumiso ni swizruku.

Vamakwezru, leswi a swi fanelanga swi va hi ndlela leyi. 11 Xana a xihlovo xolexi xa xin’we xi nga pfelisa* mati ya ku nandzrika ni ya ku bava ke? 12 Vamakwezru, xana swi nga koteka kuva nkuwa wu pswala minhlwazri, kumbe nsinya wa mawuvha wu pswala makuwa? Nambi ka xihlovo xa mati ya munyu a ku nge pfeli mati ya ku nandzrika.

13 I mani lweyi a tlhazrihiki nakone a nga ni ku twisisa a makazri kwenu? A a swi kombisi hi mahanyela yake lamanene nakone a a yentxe mintxhumu hinkwayu hi ku zrula loku fambisanaka ni wutlhazri. 14 Kambe loko mi ni wukwele ni timholova* a timbilwini tenu, mi nga tikhuzi mi hlaya leswi lwisanaka ni ntiyiso. 15 Lebyi a hi byone wutlhazri lebyi pfaka hi le tilweni; i bya misava, i bya wuhazri nakone i bya wudemona. 16 Hikusa kun’wana ni kun’wana lani ku nga ni wukwele ni timholova,* na ko ku kala ku hleleka ni mintxhumu hinkwayu ya ku biha swi ta va kone.

17 Kambe a wutlhazri bya le tilweni xa ku sungula ka hinkwaswu byi xwengile, byi gama byi va lebyi zruliki, byi yanakanyela, byi lulamela ku yingiseta, byi tale hi timpswalu ni hi mihandzru leyinene, a byi na xihlawuhlawu nakone a byi na wukanganyisi. 18 Handle ka leswo, a handzru wa wululami wu byaliwa ka swiyimu swa ku zrula wu byaleliwa* lava kondletelaka ku zrula.

4 I yini leswi swi mi yentxaka mi lwa mi tlhela mi kanetana? Xana a hi ku navela kwenu ka nyama loku lwisanaka na n’wine a timbilwini tenu?* 2 Ma navela, nambitanu, a mi na ntxhumu. Mi tsrhamela ku dlaya ni ku tsrhohoka, nambitanu, a mi koti ku kuma ntxhumu. Mi tsrhamela ku holova ni ku lwa yimpi. A mi na ntxhumu hikusa a mi kombeli. 3 Loko mi kombela a mi nyikiwi hikusa mi kombela hi nkongometo wa ku biha, akuva mi hetisisa ku navela kwenu ka nyama.

4 N’wine vhanu lava kalaka va nga dumbeki,* xana a mi swi tivi leswaku ku va ni wunghanu ni misava i ku tiyentxa nala wa Xikwembu Nkulukumba? Xileswo, lweyi a djulaka ku va munghanu wa misava a tiyentxa nala wa Xikwembu Nkulukumba. 5 Kumbe mi yanakanya leswaku a hi swa ntxhumu leswi tsralwa dzri swi hlayaka swaku: “A moya wa matsrhoho lowu nga ndzreni kwezru wu tsrhamela ku navela mintxhumu ya ku siyanasiyana”? 6 Nambitanu, a timpswalu letikulu leti Xikwembu Nkulukumba a hi nyikaka tone ti hi pfuna ku hlula ku navela koloko. Xileswo a tsralwa dzri li: “Xikwembu Nkulukumba awa ku nyenya ku tikulisa, kambe a nyika timpswalu letikulu lava titsrongahataka.”

7 Hi ndlela leyo, tibekani hansi ka Xikwembu Nkulukumba; kambe mi yalela Diyavulosi, kutani a ta mi tsrutsruma. 8 Tsrhindzrekelani ka Xikwembu Nkulukumba, kutani na yene a ta mi tsrhindzrekelela. Basisani mavoko yenu n’wine vadohi, mi xwengisa ni timbilu tenu, n’wine vhanu va timbilu tibidzri. 9 Vavisekani, mi ba nkosi mi tlhela mi dzrila. A mahleko yenu a ma ndzruluki swidzrilo, na ko ku nyonxa kwenu a ku ndzruluki ku va gome. 10 Titsrongahatani a mahlweni ka Yehovha, kutani a ta mi tlakuxa.

11 Vamakwezru, tsrhikani ku solasolana. Mun’wana ni mun’wana lweyi a solasolaka makwavu kumbe a yavanyisaka makwavu, a solasola nawu nakone a yavanyisa nawu. Kutani loko u yavanyisa nawu, u muyavanyisi kambe a wu wu landzri nawu. 12 A Munyiki wa Nawu ni Muyavanyisi o va mun’we ntsena, ku nga lweyi a kotaka ku huluxa ni ku helisa. Kambe wene wo va mani akuva u yavanyisa mhunu mun’wana?

13 Yingisetani n’wine mi liki: “Namunhla kumbe mundzruku hi ta yendzra hi ya ka doropa ledzriya hi ya heta lembe kohala, nakone hi ta hamba mabindzru hi kuma mali”, 14 nakasi a mi swi tivi leswaku a wutomi byenu byi ta tsrhamisisa kuyini mundzruku. Hikusa n’wine mi fana ni hunguva leyi humelelaka swa nkamanyana yi gama yi nyamalala. 15 Ku hambana ni leswo, mi fanela ku hlaya mi ku: “Loko Yehovha a swi zrandzra, hi ta hanya, hi yentxa leswi kumbe leswiya.” 16 Kambe n’wine mi tikhuza hi ku tikukumuxa kwenu. A ku tikukumuxa loko hinkwaku ku bihile. 17 Kutani, loko mhunu a tiva ku yentxa leswi nga swinene kambe a nga swi yentxi, o doha.

5 Yingisetani n’wine swipfundzri, dzrilani mi ba nkosi hi kola ka mahlomulo lawa ma mi telaka. 2 A wukosi byenu byi bolile, ni mpahla yenu yi diwe hi nsumba. 3 A woru dzrenu ni prata dzrenu swi kuzrile, nakone a ku kuzra ka swone ku ta kombisa nandzru wenu ku tlhela ku da nyama yenu. Leswi mi swi hlengeletiki swi ta fana ni ndzrilo a masikwini ya wugamu. 4 Lavisani! A muholo lowu mi kalaka mi nga va nyikanga a vatizri lava tsrhoveliki a masin’wini yenu wu le ku dzrileni, nakone a ku dzrila ka vatsrhoveli ka ku kombela mpfunu ku tlhase tindleveni ta Yehovha wa makhandzra. 5 Mi hanye a mafuzreni akuva mi tinyonxisa a misaveni. Mi de mi kulukelana ku fana ni homu leyi daka yi kuluka akuva yi ta dlayiwa. 6 Mi mu vone nandzru mi tlhela mi mu dlaya mhunu lweyi a lulamiki. Xana awa mi nyonxela?

7 Kutani vamakwezru, lehisani mbilu ku ya tlhasa nkama lowu Hosi yi taka tlhela ha wone akuva yi va na hine. A mudzrimi a tama a lehisa mbilu a yimela mihandzru ya lisima ya misava, ku ya tlhasa loko ku na mpfula ya ku sungula ni ya wugamu. 8 Na n’wine lehisani mbilu, mi tiyisa timbilu tenu, hikusa a nkama wa kuva Hosi yi tlhela akuva yi ta va na hine wu le kusuhi.

9 Vamakwezru, mi nga ngurangurelani* akuva mi nga yavanyisiwi. Lavisani! A muyavanyisi a yime nyangweni. 10 Vamakwezru, yetiselani vaprofeta lava vulavuliki hi vito dzra Yehovha, va xaniseke hi tindlela ta ku siyanasiyana nakone va tiyisele hi ku lehisa mbilu. 11 Lavisani! Hi li va nyonxile* lava tiyiseliki. Mi twile hi ta ku tiyisela ka Yobe nakone ma swi tiva leswi Yehovha a mu yentxeliki swone, mi swi vona ha hombe leswaku Yehovha i Xikwembu Nkulukumba lweyi a nga ni ntwelawusiwana ngopfu swinene ni timpswalu.

12 Henhla ka hinkwaswu vamakwezru, tsrhikani ku funga, nambi ku li hi matilo, kumbe hi misava kumbe hi ntxhumu wun’wana. Kambe a “Ina” wenu a a ve ina, a “Im-him” wenu a a ve im-him, akuva mi nga faneliwi hi ku yavanyisiwa.

13 Xana ku ni lweyi a xanisekaka a makazri kwenu? A a tame a khongota. Xana ku ni lweyi a nyonxiki? A a yimbeleli mapsalma. 14 Xana ku ni lweyi a vabyaka makazri kwenu? A a vitani vakulu va bandla, kutani a va mu khongotelele, va mu tota mafuzra hi vito dzra Yehovha. 15 Kutani a xikhongoto xa lipfumelo xi ta mu hanyisa lweyi a vabyaka,* nakone Yehovha a ta mu pfuxa. Handle ka leswo, loko a yentxe swidoho a ta dzrivaleliwa.

16 Xileswo, byelananani swidoho swenu mi tlhela mi khongotelelana akuva mi hanyisiwa. A xikhongoto xa mhunu lweyi a lulamiki xi ni ntamu nakone xi pfuna ngopfu.* 17 Eliya a a li mhunu lweyi a a ni matitwela ya ku fana ni yezru, nambitanu loko a khongote swi phela akuva mpfula yi nga ni, a yi nanga ku dzringana malembe mazrazru ni hamfu. 18 Ntsrhaku ka leswo a tlhele a khongota, kutani matilo ma nisa mpfula yi va misava yi milisa mihandzru.

19 Vamakwezru, loko mhunu wa kukazri a makazri kwenu a hambukisiwa a ntiyisweni, kutani mumbenyani a tlhela a mu buyisa, 20 tivani leswaku lweyi a tlhelisaka mudohi a ndleleni yake ya ku biha a ta mu huluxa ka lifu* nakone Xikwembu Nkulukumba a ta mu dzrivalela swidoho swake* swa swinyingi.