A N’wana Wa Wansati Lweyi A Feliwiki Hi Nuna A Tlhela A Hanya

Hi nkama wa ndlala, Yehovha a byele Eliya a ku: ‘Yana a Sarepta, u ta kuma wansati lweyi a feliwiki hi nuna nakone a nga xisiwana, a ta ku nyika swakuda.’ Loko Eliya a tlhasa ka doropa ledzro a vona wansati lweyo na a zrolela tihunyi, kutani a mu kombela mati. Na a ha ya teka mati, Eliya a mu byela a ku: ‘Ni kombela u ni nyika ni pawu.’ Hiloko wansati lweyo a ku: ‘A ni na pawu, no va ni trigu ni mafuzra leswi dzringanaka mine ni n’wananga ntsena.’ Kambe Eliya a ku: ‘Yehovha a dumbise leswaku loko u ni hambela pawu, u ta va ni trigu ni mafuzra ku ya tlhasa loko mpfula yi tlhela yi na.’

Xileswo wansati lweyo a ya kaya kwake a ya hamba pawu akuva a nyika muprofeta wa Yehovha. Hi lani Yehovha a dumbisiki ha kone, wansati lweyo kun’we ni n’wanake va tame va va ni swakuda nkama lowu a ku ni ndlala. A tihotsro leti a ti ni mafuzra ni trigu a ti tsrhama na ti talile.

Ntsrhaku ka leswo, ku yentxeka ntxhumu wa ku vavisa ngopfu swinene, a n’wana wa wansati lweyi a feliwiki hi nuna a vabye ngopfu a gama a fa. Kutani wansati lweyo a kombela mpfunu ka Eliya. Hiloko Eliya a teka n’wana lwiyani a mavokweni ya mamana wake a famba na yene ka kwartu ledzri a dzri kumeka henhla. Loko a tlhasile, Eliya a mu lata ka mubede a va a khongota a ku: ‘Oho Yehovha, ni kombela u pfuxa n’wana lweyi.’ Wa swi tiva leswaku ha yini ku pfuxiwa ka n’wana lwiyani a ku ta va ntxhumu wa ku hlamalisa lowu Yehovha a a ta wu yentxa? A ku ta va ntxhumu wa ku hlamalisa hikusa a nkameni lowo a ku ngi ngi sama ku va ni mhunu lweyi a nga pfuxiwa ku feni, nakone wansati lweyo ni n’wanake a va nga li Vaisrayele.

Hiloko a n’wana lwiyani a tlhela a hanya, kutani Eliya a byela mamana wake a ku: ‘Vona, a n’wanaku awa hanya!’ Kutani wansati lweyo a nyonxa ngopfu a va a byela Eliya a ku: ‘Nakunene, wene u muprofeta wa Xikwembu Nkulukumba, na swi tiva hikusa u vulavula leswi Yehovha a ku byelaka swone.’