Elizabeti A Va Ni N’wana

A ku khaluta ku tlula 400 wa malembe na mimuru ya doropa dzra Yerusalema yi pfuxetiwile. Muprista Zakariya ni nsati wake Elizabeti a va tsrhama kusuhi ni doropa ledzro. A va ni malembe manyingi na va txhatile kambe a va nga na vana. Siku dzrin’wana, Zakariya a nghene mbangwini wa ku xwenga a tempeleni akuva a hisela Yehovha muzri wa ku nun’hwela. Hiloko ntsrumi leyi vitaniwaka Gabriyele yi humelela kwake, kutani Zakariya a txhava. Kambe a ntsrumi yi ku: ‘U nga txhavi Zakariya hikusa Yehovha a ni zrume kuva ni ta ta ku byela madzrungula lamanene. A nsati waku Elizabeti a ta ku pswalela n’wana wa djaha nakone u ta mu txhula vito dzra ku Yohane. Yehovha a lange Yohane kuva a yentxa ntizro wa ku hlawuleka.’ Hiloko Zakariya a vutisa ntsrumi Gabriyele a ku: ‘Ni nga swi kholwisa kuyini swoleswo? Hikusa ni duhwalile, na yene nkatanga a duhwalile akuva hi va ni vana.’ Kutani ntsrumi yi mu byela leswi: ‘I Xikwembu Nkulukumba lweyi a ni zrumiki kuva ni ku byela leswaku u ta va ni n’wana, kambe leswi u kalaka u nga kholwanga, u ta va mbheveve ku ya tlhasa loko n’wana a pswaliwa.’

Zakariya a hlwele ngopfu a mbangwini wa ku xwenga wa le tempeleni. Hi wugamu, loko Zakariya kutani a humile hi le tempeleni, a vhanu lava a va mu yimelile a handle ka tempele, va djule ku tiva leswi humeleliki, kambe Zakariya a a nga ha swi koti ku khanela, a a vulavula na vone hi ku tizrisa mavoko. Hi ndlela leyo, vhanu va swi xiyile leswaku Zakariya a yamukele dzrungula ledzri a dzri pfa he ka Xikwembu Nkulukumba.

Ntsrhaku ka loko ku khalute nkama wa kukazri, Elizabeti a ve ni nyimba a va a pswala n’wana wa djaha, hi lani ntsrumi yi hlayiki ha kone. A vanghanu ni maxaka va nyonxe ngopfu va va va ya kaya kwake akuva va ya vona xibebetana. Elizabeti a hlaye leswaku n’wana a a ta txhuliwa vito dzra ku Yohane, kambe vone va te: ‘A ku na mhunu ka maxaka yenu lweyi a nga ni vito dzra ku Yohane, mu txhulani vito dzra ku Zakariya a nga vito dzra papayi wake. Hiloko Zakariya a teka xipulangwana a tsrala leswi: ‘A vito dzrake a ta va Yohane.’ E na ku yentxa leswo, Zakariya a tlhela a sungula ku vulavula! Vhanu hinkwavu lava a va tsrhama Yudeya va swi tivile leswi yentxekiki nakone a va tivutisa leswi: ‘Kasi ye n’wana lweyi a ta va yini xana?’

Yehovha a yentxe leswaku Zakariya a tala hi moya wa ku xwenga, a va a profeta a ku: ‘Yehovha i Xikwembu Nkulukumba lweyi a hlamalisaka. A dumbise Abrahamu leswaku a a ta zrumela Mesiya akuva a ta hi huluxa. Yohane a ta va muprofeta nakone a ntizro wake a ta va ku lulamisela ndlela ya ku ta ka Mesiya.’

Ku tlhele ku yentxeka ntxhumu wun’wana wa ku hlawuleka ka wansati wa kukazri lweyi a a li xaka dzra Elizabeti, lweyi a a vitaniwa Mariya. Xana a nga va a li yini ntxhumu wa kone? Hi ta swi gungula ka nhlokomhaka leyi landzrelaka.