Yesu A Fele A Golgota

A vaprista lavakulu va teke Yesu va mu yisa ndlwini ya wuhosi. Kutani Pilatu a vutisa a ku: ‘He wini nandzru lowu wanuna lweyi a nga na wone?’ Va hlamula va ku: ‘A tiyentxa Hosi.’ A hiloko Pilatu a vutisa Yesu a ku: “Xana u Hosi ya Vayuda?” Kambe Yesu a mu hlamula a ku: “A Mfumu wanga a hi wa misava leyi.”

Kutani Pilatu a yisa Yesu ka Heroda govhernadori wa le Galileya, akuva a kambela leswaku Yesu a ni nandzru kumbe im-him. Kambe Heroda na yene a nga kumanga xihoxo ka Yesu, xileswo a mu tlhelisela ka Pilatu. Kutani Pilatu a byela xitsrhungu a ku: ‘Mine na Heroda a hi kumanga nandzru ka wanuna lweyi, xileswo ni ta mu ntsrhunxa.’ Kambe a xitsrhungu xi sungula ku huwelela xi ku: ‘A a dlayiwi, a a dlayiwi!’ Hiloko a masotxha ma kwapa Yesu, ma mu thukela mazri ma tlhela ma mu ba swibakela, nakone ma mu tlhanteka hazri ya mitwa a nhlokweni yake ma va ma mu poyila ma ku: ‘Xawani Hosi Ya Vayuda.’ Pilatu a tlhela a byela xitsrhungu a ku: ‘A ni kumi nandzru ka wanuna lweyi.’ Kambe a xitsrhungu xi huwelela xi ku: “A a yisiwi mhandzrini.” Xileswo Pilatu a mu nyikela akuva a dlayiwa.

Kutani va teka Yesu va mu yisa mbangwini lowu vitaniwaka Golgota. Va ya mu gongondzrela a mhandzrini. Hiloko Yesu a khongota a ku: ‘Papayi, va dzrivaleli, a va swi tivi leswi va swi yentxaka.’ A vhanu va tama va hleka Yesu va tlhela va mu poyila va ku: ‘Loko u li N’wana wa Xikwembu Nkulukumba xika a mhandzrini, tihuluxi!’

A hiloko xin’we xa swigevengu lexi a xi hayekiwi a tlhelweni ka Yesu xi ku: “Ni dzrimuki loko u nghena Mfun’wini waku.” Kutani Yesu a xi dumbisa a ku: “U ta va na mine a Paradeyisini.” Hiloko ku suketana ku va ni munyama misaveni hinkwayu ku dzringana mawora mazrazru. Mariya mamana wa Yesu ni van’we va vadondzrisiwa a va li kusuhi ni mhandzri. Kutani Yesu a kombela Yohane akuva a hlayisa Mariya swanga hiloko a hlayisa mamana wake.

Hi wugamu Yesu a ku: “Swi hetisekile!” Kutani Yesu a kozramisa nhloko a va a fela kolanu. Hi nkama wolowo ku va ni ku tsrekatsreka lokukulu ka misava. Kutani a kortina ledzri a dzri le tempeleni ledzri a dzri hambanisa Mbangu Wa Ku Xwenga ni Wa Ku Xwengisisa, dzri handzruka he xikazri. Hiloko muzrangeli wa masotxha a ku: ‘Lweyi nakunene a a li n’wana wa Xikwembu Nkulukumba.’