Papela Ledzri Pfaka Hi Ka Huvo Leyi Zrangelaka

Vamakwezru lava zrandzrekaka:

A ku zrandzra Xikwembu Nkulukumba ni vhanu swi hi kutxa ku ‘famba hi ya dondzrisa vhanu va matiko hinkwawu akuva va va vadondzrisiwa, hi va babatisa’. (Mat. 28:19, 20; Mar. 12:28-31) A lizrandzru dzra ntiyiso dzri ni ntamu. Dzri nga khumba timbilu ta ‘lava kombisaka leswaku va swi djula ku kuma wutomi lebyi nga helikiki’.—Mint. 13:48.

Khale a hi womelela ngopfu ka ku tizrisa swingheniso ni ku siyela vhanu mabuku. Swoswi hi fanela ku yampswisa wuswikoti byezru bya ku bula ni vhanu. Hi djula ku komba vhanu swaku ha va zrandzra hi ku bula na vone hi mintxhumu leyi yi va zron’waka. Leswo swi hlaya leswaku hi ta titwananisa ni swiyimu ni kuva hi tikazratela ku yanakanyisisa hi swikazratu leswi mun’wana ni mun’wana a kumanaka na swone kun’we ni mintxhumu leyi yi mu zron’waka. Xana xibukwana lexi xi ta hi pfuna hi ndlela yini akuva hi yentxa leswo?

A xibukwana lexi xi ni 12 wa tidondzro leti ti hi kombaka matsrhamela lawa hi fanelaka ku ma txutxela akuva hi kota ku komba vhanu swa ku ha va zrandzra ni ku va dondzrisa akuva va va vadondzrisiwa. Nhlokomhaka yin’wana ni yin’wana yi seketeliwe ka dzrungula dzra le Bibeleni ledzri kombisaka tsrhamela ledzri Yesu kumbe vazrezri van’wana va le dzaneni dzra ku sungula va dzri kombisiki a nsin’wini. A nkongometo wezru a hi ku womelela ka swingheniso kambe i ku djuletela tindlela ta ku komba vhanu swa ku ha va zrandzra. I ntiyiso leswaku tsrhamela dzrin’wana ni dzrin’wana ka lawa ya 12 dzra vileleka ka swiyenge hinkwaswu a ntizrweni wezru wa ku zrezra, kambe hi ta vona ndlela leyi matsrhamela ya kukazri ma nga ya lisima ha yone akuva hi kota ku sungula mabulu, ku hamba timpinda kumbe ku fambisa swidondzro swa Bibele.

Nkama lowu u kambisisaka dondzro yin’wana ni yin’wana, yanakanyisisa hi tsrhamela ledzri u nga dzri kombisaka loko u khanela ni vhanu va lomu u tsrhamaka kone. Tikazrateli ku kulisa lizrandzru dzraku ha Yehovha ni hi vhanu. Ku tlula yentxela dzrin’wana ni dzrin’wana, a lizrandzru ledzro hi dzrone dzri ta ka ku pfuna ku tlhaselela nkongometo waku wa ku dondzrisa vhanu akuva va va vadondzrisiwa.

Nakunene, i tovoko dzrikulu ku tizrisana na wene. (Tsef. 3:5) Ingiki Yehovha a nga ku tovokisa ngopfu swinene nkama lowu u yaka mahlweni u zrandzra vhanu ni ku va pfuna akuva va va vadondzrisiwa!