BIBELE DZRI TXINTXA WUTOMI BYA VHANU
Wutomi Byanga A Byi Ya Byi Biha Ku Tlula Mpimu
LEMBE DZRA KU PSWALIWA: 1952
TIKO: ESTADOS UNIDOS
FAMBU: A NI LI WA MADZOLONGA
KHALE KWANGA:
Ni kulele a Los Angeles, Califórnia, le a E.U.A., lani a hi tiviwa hi ku dzraha timbangi ni ku va xiyenge xa mintlawa ya wugevengu. Vapswali vanga a va ni 6 wa vana, mine a ni li wa wubidzri.
Nkama lowu hi kuliki ha wone mamana a a famba na hine gereja dzra Evangélica. Kambe, loko na ha li mumpshwa, a ni hanya wutomi byibidzri. Sonto yin’wana ni yin’wana a ni yimbelela tinsimu ta makwayela a gereja. Kambe a xikazri ka vhiki a ni tsrhama ndleleni, ni dzraha timbangi ni mahanyela ya ku biha hi tlhelo dzra tinkuku.
A ni kahlula ku hlundzruka ni tlhela ni kwata. A ni tizrisa xin’wana ni xin’wana akuva ni lwa ni vhanu. Leswi a ni swi dondzra a gereja a swi nga ni pfuni ha ntxhumu. A ni zrandzra ku hlaya leswaku, “Ku dzrihisela i ka hosi—kambe yone yi tizrisa mine akuva ni dzrihisela!” Loko ni le a xikola sekundariya hi 1960’, ni tipatsre ka ntlawa wa politika lowu a hi tiviwa hi ku lebya, loko swi ta a mhakeni ya ku lwela timfanelo ta vhanu. Ni tlhele ni nghena ka tlhanganu lowu a wu yimela timfanelo ta va-alunu. Minkama ya ku tala a hi tereka, leswo swi yentxe leswaku a xikole xi pfaliwa swa nkamanyana.
Kambe a swi tikomba ingiki a ni nga yaneliseki hi ku tereka. Xileswo ni sungule ku va ka mintlawa leyi nyenyaka valungu. Hi xikombiso, siku dzrin’wana mine ni vanghanu vanga hi hlalele mafilme lawa a ma kombisa ndlela leyi swikazrawa swa África a swi xanisiwa ha yone a Estados Unidos. Hi sungule ku ba vampswa va valungu lava a hi hlalela na vone, hi mhaka ya ku hlundzrukisiwa hi leswi a hi swi hlalela. Ntsrhaku ka leswo, hi ye lani a ku kumeka valungu akuva hi ya va ba.
Na na ha li djaha, mine ni vamakwezru a hi li swigevengu leswa ku lebya. Leswo swi hi nghenisi khombyeni bya ku khomiwa hi mapholisa . Mupfana wanga a li xizro xa ntlawa lowu a wu tiviwa hi ku yentxa mintxhumu ya ku biha, nakone mine ni tipatsrile ka wone. Wutomi byanga a byi ya byi biha ku tlula mpimu.
NDLELA LEYI BIBELE DZRI TXINTXIKI WUTOMI BYANGA HA YONE:
Vapswele va munghanu wanga a va li Timboni ta Yehovha. Va ni zrambe a mintlhanganwini yavu, nakone ni fambile . Hi siku dzra ku sungula, ni swi vonile leswaku a Timboni ta Yehovha a ti fani ni vhanu van’wana. Ni swi vonile leswaku hambe vampswha a va swi kota ku tlhamuxela matsralwa ya Bibele! Ni nyonxe ngopfu loko ni dondzra leswaku vito dzra Xikwembu hi Yehovha, ni tlhela ni twa va vulavula hi dzrone. (Amapsalma 83:18) Ka mintlhanganu yoleyo a ku ni vhanu vanyingi va tinxaka ta ku hambanahambana, kambe a ku nga na xihlawuhlawu.
Na swa ha sungula, a ni nga swi djuli ku dondzra Bibele ni Timboni ta Yehovha, a no zrandzra ku va kone mintlhanganwini yavu. Hi wusiku byin’wana, ni ye mintlhanganwini ya Timboni ta Yehovha, kasi vanghanu vanga va ye xipetakulu. Na va li hala, va be djaha dzrin’wana dzri za dzri fa hikusa a dzri nga swi djuli ku va nyika mundjasi wa dzrone wa ku hambiwa hi xikhumba. Hi siku ledzri landzrelaka, a va tikuzela hi leswi va dlayiki mhunu. Loko va li tribunali a va nga tivoni va ni nandzru hi leswi va nga swi yentxa. Vanyingi va vone va tsremeliwe wutomi hinkwabyu a djele. Ni nyonxe swinene, hi leswi wusiku ledzriyani ni kalaka ni nga fambanga na vone. Ni tiyentxele xiboho xa ku txintxa wutomi byanga, kutani ni sungula ku dondzra Bibele.
Leswi a ni hanya ni vhanu lava a va ni xihlawuhlawu, Ni hlamalisiwe hi leswi a ni swi vona ka Timboni. Hi xikombiso, loko mboni yin’wana ya mulungu loko yi yendzrela a tikweni dzrin’wana , a yi siya vana va yone ni ndangu wa valandi. Kasi, ndangu wun’wana wa valungu a wu tsrhama ni wana wa mulandi. Ni swi vonile leswaku Timboni ta Yehovha a ti hetisisa mazritu ya Yesu lawa ma kumekaka ka Yohan 13:35 lawa ma liki: ‘Hi la hinkwavu va taka tiva leswaku n’wi vadondzrisiwa vanga, loko n’wi zrandzrana.’ Hakunene a ni tikumeli vamakwezru va ntiyiso.
Loko ni li kazri ni dondzra Bibele ni vone leswaku a swi djula ni txintxa wutomi byanga. Ni txintxile ni va ni sungula ku hanya wutomi bya ku zrula nakone leswo swi ni pfunile a wuton’wini byanga. (Ba-le-Roma 12:2) Ni hambe nhluvuku ha katsrongo kutsrongo. Hi Janeru wa 1974, ni babatisiwile ni va Mboni ya Yehovha
Ni txintxile ni va ni sungula ku hanya hi ndlela ya ku zrula nakone leswo swi ni pfunile a wuton’wini byanga
Loko ni babatisiwile, a ni fanela ku tikazratela ku tsrhika ximbilwambilwana. Hi xikombiso, siku dzrin’wana a ni zrezra hi muti ni muti, ni tsrutsrumisi xigevengu lexi a xi yivi rádio dzra movha wanga. A ni li kusuhi ni ku xi khoma, xi tsrhiketele rádio kutani xi tama xi tsrutsruma. Loko ni byela van’wana hi mhaka leyi, makwezru wa xinuna a ni vutisile a ku: “Stephen, loko a we kota ku xi khoma xigevengu lexiyani i yini leswi a wu ta va u swi yentxile?” Xivutiso lexiyani xi ni yentxe ni swi vona leswaku a swa ha djula ni tikazratela ku hanya hi ndlela ya ku zrula.
Hi Otubru wa 1974, ni sungule ku heta nkama wa ku tala ni li kazri ni dondzrisa vhanu Bibele. Wheti yin’wana ni yin’wana a ni heta mawora ya 100. Hi ku famba ka nkama, ni ve ni tovoko dzra ku ya pfuneta a ntsindzra wa misava hinkwayu wa Timboni ta Yehovha a Brooklyn, Nova York. Hi 1978, ni tlhelele a Los Angeles akuva ni ya hlayisa mamana wanga hikusa a a vabya. Ntsrhaku ka malembe mabidzri, ni tekani na Aarhonda. A ni seketelile swinene ka ku hlayisa mamana a za a ya fa. Hi ku famba ka nkama, mine na Aarhonda hi ye xikole xa Bibele a Giliyade xa Watchtower nakone loko hi heta, hi zrumeliwe a Panamá, swanga vazrumiwa.
Ku sukela loko ni babatisiwa, ni kumani ni swiyimu swa ku tala leswi swi ni dzringiki akuva ni hlundzruka. Ni sungule ku fambela kule ni vhanu lava a va ni pfuka. Vhanu va ku tala ku patsra ni nsati wanga va ni kulungelile hi mhaka ya leswi ni kotiki ku lwisana ni swiyimu leswo. Nambi mine ni tihlamalile! A no tibyela hi mhaka ya leswo. Kambe leswo ko va swikombiso swa leswaku Bibele dzri ni ntamu wa ku txintxa wutomi bya vhanu—Ba-Heberu 4:12.
NDLELA LEYI NI PFUNEKIKI HA YONE:
Bibele dzri ni pfunile leswaku ni hanya wutomi lebyi nga ni nkongometo ni ku hanya hi ndlela ya ku zrula. Swoswi a na ha bi vhanu, kambe no va pfuna akuva va va ni wuxaka na Xikwembu Nkulukumba. Nambi khale ka nala wanga wa xikole ni mu dondzrisile Bibele! Ntsrhaku ka loko a babatisiwile a hi tsrhama ka kwartu dzrin’we a xikole. Nambi swoswi, ya li vanghanu lavakulu. Mine ni nsati wanga hi dondzre Bibele ni vhanu lava va tlulaka 80 akuva va va Timboni ta Yehovha.
Ni mu tlangela ngopfu Yehovha hi leswi kutani ni hanyaka wutomi lebyi nga ni nkongometo ni ku nyonxela akuva ni va ni vamakwezru va ntiyiso.