Swivutiso Swa Vadondzri
Ha yini vhanu van’wana va hlaya leswaku leswi swi hlayiwaka ka buku dzra Amapsalma 12:7 swi kombetela ka ‘mazritu ya Yehovha’, lawa ku vulavuliwaka ha wone ka ndzrimana 6, nakasi a wundzruluteli bya misava leyimpshwa byi kombisa leswaku a mongo wu kombetela ka ‘swisiwana ni vapfumali’ lava ku vulavuliwaka ha vone ka ndzrimana 5?
A mongo wu kombisa leswaku a ndzrimana leyi yi khanela hi vhanu.
Ka Amapsalma 12:1-4, hi dondzra leswaku ‘lava ku lulama va helile; a ve he kone a makazri ka vana va vhanu’. Kutani ka Amapsalma 12:5-7, yene a li:
‘Hi nkonta ya ku xaniseka ka swisiwana,
Ni swidzrilo swa vapfumali,
Ndzri ta pfuka swoswi, ku hlaya Yehovha,
Ndzri ta nhingenisa lwa hlunyelaka ku huluxiwa a ku huluxiweni.
A mazritu ya Yehovha hi mazritu lama basiki,
I silivhela ledzri munyekiki a xidzridzrini, dzri halakelaka a misaveni, ledzri xwengisiwiki ku ntlhanu na kubidzri.
Wene, Yehovha, u ta va bekisa,
U ta va mpfekela ku lixaka lolu, hi la ku nga helikiki.’
A ndzrimana 5 yi hlaya leswaku Yehovha a ta huluxa ‘swisiwana’.
A ndzrimana 6 yi hlaya leswaku ‘a mazritu ya Yehovha hi mazritu lama basiki’, ‘ku fana ni silivhela ledzri munyekiki’. Leswi hi leswi hi titwisaka xiswone hi zritu dzra Xikwembu Nkulukumba.—Amaps. 18:30; 119:140.
Kutani swoswi vona leswi ndzrimana 7 yi swi hlayaka, yone yi li: ‘Wene, Yehovha, u ta va bekisa, u ta va mpfekela ku lixaka lolu, hi la ku nga helikiki.’ I va mani lava taka bekisiwa kumbe ku mpfekeliwa?
Swanga hi leswi a ndzrimana 7 yi buyaka ntsrhaku ka xiga lexi liki ‘a mazritu ya Yehovha’ lexi nga ka ndzrimana 6, vhanu va kukazri va yanakanya leswaku a ndzrimana 7 yi vulavula hi mazritu ya Xikwembu Nkulukumba. I ntiyiso leswaku Xikwembu Nkulukumba a sizrelele zritu dzrake ku nga Bibele nambileswi a valala vake a va dzringisa ku dzri helisa kumbe ku sivela leswaku dzri hangalasiwa.—Eza. 40:8; 1 Pet. 1:25.
Kambe leswi nga ka ndzrimana 5 na swone i ntiyiso. Yehovha minkama hinkwayu a va pfunile nakone a ta tama a pfuna lava ku ‘xaniseka’ ni ‘swisiwana’.—Yb. 36:15; Amaps. 6:4; 31:1, 2; 54:7; 145:20.
Kutani, i vamani lava ku khaneliwaka ha vone ka ndzrimana 7?
Loko hi kambisisa Amapsalma 12, swi va livaleni leswaku ku khaneliwa hi vhanu.
A ku sunguleni ka Amapsalma 12:1, Davhida a khanela hi ‘lava ku dumbeka’ va Yehovha lava kanganyisiwiki hi vhanu va ku biha. Ntsrhaku ka leswo, hi dondzra leswaku Yehovha a ta yentxa xa kukazri hi lava khanelaka madzrimi. Hi nga tiyiseka hikusa a ndzrimana 6 yi hlaya leswaku a mazritu ya Yehovha, i mazritu ya ku basa.
Kutani, a ndzrimana 7 yi hlaya leswaku Yehovha a ta bekisa kumbe ku mpfenkela lava xanisiwaka hi vabihi.
Xiga lexi liki ‘va’ lexi tizrisiwiki ka ndzrimana 7 xi tizrisiwe ka makopiya manyingi lama tsraliwiki hi voko ka Matsralwa ya Xiheberu. Ka wundzruluteli bya ku sungula bya Xigriki, ku tizrisiwe zritu ‘hine’ makhambi manyingi na dzri khanyisa leswaku a ndzrimana leyi yi khanela hi malandzra manyingi lama xanisiwaka. A ndzrimana 7 yi hlaya leswaku ‘va’ kumbe lava ku dumbeka va ta mpfenkeliwa ka ‘lixaka’ dzra vhanu lava yentxaka swa ku biha. (Amaps. 12:7, 8) Wundzruluteli bya kukazri bya matsralwa ya Xiheberu hi lidzrimi dzra Xiyaramayika byi hlaya leswi ka ndzrimana 7: ‘Wene, WE HOSI, bekisa lava ku lulama. Wene u ta va bekisa ka lixaka ledzri sombolokiki hi lani ku nga helikiki.’ A wundzruluteli lebyo hinkwabyu byi swi beka livaleni leswaku Amapsalma 12:7 a dzri khaneli hi mazritu ya Xikwembu Nkulukumba.
Hi kola ka xivangelo lexo, Amapsalma lawa ma hi nyika dumbo dzra leswaku Xikwembu Nkulukumba a ta yentxa swa kukazri akuva a pfuna ‘lava ku dumbeka’.