3. Ha Yini Vhanu Lavanene Va Xaniseka?

Ha Yini Swi Li Swa Lisima Ku Tiva Nhlamulo?

A swi nga fanelanga leswaku vhanu lavanene va xaniseka. Xileswo, vhanu van’wana va pimisa leswaku ku tikazratela ku va mhunu lwenene a swi pfune ntxhumu.

Yanakanyisisa Hi Leswi

Vambeni va pimisa leswaku vhanu va tsrhamela ku fa va tlhela va pswaliwa. Vone va hlaya leswaku lava yentxaka leswinene va tlhela va pswaliwa ka wutomi bya ku yampswa, kambe lava yentxeka swa ku biha va tlhela va pswaliwa ka wutomi lebyi va xanisekaka ngopfu. Hi ku ya hi miyanakanyu leyo, nambi mhunu lwenene a nga xaniseka hi mhaka ya mintxhumu ya ku biha leyi a yi yentxiki ka “wutomi lebyi khalutiki”. Kambe . . .

• Ha yini mhunu a xaniseka na kasi a nga swi dzrimuki leswi a swi yentxiki ka wutomi lebyi khalutiki?

• Ha yini hi tikazratela ku va hi nga kumi mavabyi kumbe hi nga kumani ni tinghozi na kasi wuhlayiseki byezru byi ya hi leswi hi swi yentxiki ka wutomi lebyi khalutiki?

  AKUVA U TIVA SWIN’WANA

  Vona vídeo ledzri liki Ha Yini Xikwembu Nkulukumba A Tsrhiki Ku Xaniseka Ku Va Kone Ku Ta Tlhasa Swoswi?, ka jw.org.

Leswi Bibele Dzri Swi Hlayaka

Ku xaniseka a hi xikhatiso xa Xikwembu Nkulukumba.

Makhambi manyingi, ko va ntsena hi leswi hi kumekiki ka mbangu lowu hoxekiki hi nkama lowu hoxekiki.

‘Lwe wa matsrambu a nga hluli, ni le yimpini lwe wa ntamu, ni leswaku a swakuda a hi swa lava ku tlhazriha, nambi wukosi a hi bya lava nga ni ku yingelisisa; ni wumbilu a hi bya lava wun’anga; hikuva nkama ni humelelo i swa hinkwavu.’​—EKLESIASTA 9:11.

Xidoho i xin’we xa swivangelo xa kuva hi xaniseka.

Hi ntolovelo, loko vhanu va tizrisa zritu ledzri liki “xidoho”, va khanela hi ntxhumu wa ku biha lowu mhunu a wu yentxiki. Kambe Bibele dzri tizrisa zritu xidoho akuva dzri tlhamuxela xiyimu lexi vhanu hinkwavu, lava yentxaka leswinene kumbe leswa ku biha, va xi kumiki ka Adamu na Evha.

‘Ndzri belekiweli wusombolokini, mamana a ndzri pswaleli xihonweni.’​—AMAPSALMA 51:5.

Xidoho xi tise mihandzru ya ku biha swinene ka vhanu.

Xidoho xi honetele wuxaka byezru na Yehovha nakone xi honetele wuxaka lebyi vhanu va nga na byone hi xivone kun’we ni lebyi va nga na byone ni mintxhumu yin’wana leyi Xikwembu Nkulukumba a yi tumbuluxiki. Hinkwaswu leswo swi tisa ku xaniseka ka mhunu mun’wana ni mun’wana ni ka vhanu hinkwavu.

‘Ndzra ku ndzri zrandzra ku yentxa leswinene, na leswimfani swa ku ndzri namazrela.’​—BA-LE-ROMA 7:21.

‘A swivumbiwa hinkwaswu swa konya, ingi swa lun’wa ni swoswi.’​—BA-LE-ROMA 8:22.