Djula Vanghanu Lavampswha

Xikazratu

Loko hi ni vonela ledzri hoxekiki hi ntlawa wa kukazri wa vhanu hi tlhela hi nga tikazrateli ku va tiva, xihlawuhlawu xezru xi nga kula. Handle ka leswo, loko ntsena ho va ni wunghanu ni vhanu lava fanaka na hine, leswo swi nga ha hi yentxa hi pimisa leswaku ndlela leyi hi yentxaka mintxhumu ha yone hi yone ntsena yi nga yinene.

Leswi Bibele Dzri Swi Hlayaka

‘Tiyanamisani [timbilu].’—2 BA-LE-KORINTE 6:13.

Xana hi dondzra yini? Ka ndzrimana leyi, zritu ledzri liki ‘mbilu’ dzri tlhamuxela matitwela yezru. Loko hi hamba ntsena xinghanu ni vhanu lava fanaka na hine, leswo swi ta hi sivela ku hamba vanghanu vambeni. Akuva hi tingawula xikazratu lexo, hi fanela ku hamba xinghanu ni vhanu va tinxaka hinkwatu nambi lava hambaniki na hine.

Xana U Pfuneka Hi Ndlela Yini Loko U Hamba Vanghanu Lavampswha?

Loko hi ya hi va tiva ku yampswa vhanu vambeni hi sungula ku twisisa leswaku ha yini va pimisa hi ndlela leyi hambaniki ni yezru. Loko hi ya hi va tsrhindzrekelela swi ya swi hi nabyalela ku hamba xinghanu na vone nakone hi ya hi dzrivala leswaku hi va lixaka ledzri hambaniki na vone. Loko hi twa swikazratu leswi va langutanaka na swone hi ta ya hi va zrandzra ni ku va kombisa ntwelawusiwana.

Vona xikombiso xa Nazaré lweyi a a ni xihlawuhlawu ka vahlapfa. A tlhamuxela ndlela leyi a hluliki xihlawuhlawu xakwe ha yone, a li: “Ni tinyike nkama wa ku va ni vahlapfa nakone a ni tizra na vone. Van’wana a va hambanile ni leswi ni swi twiki ha vone. Loko u hamba xinghanu ni vhanu lava nga ni mahanyela mambeni, u dondzra leswaku vone a va fani, nakone hi wugamu u sungula ku va zrandzra ni ku va vona swanga vhanu lava tolovelekiki.”

Xana U Fanela Ku Yentxa Yini?

Djula mukhandlu wa ku bulisana ni vhanu va matiko mambeni, mahanyela mambeni ni tindzrimi leti hambaniki ni dzraku. U nga ha

Va kombela leswaku va ku tlhamuxela swimbeni hi ta wutomi byavu.
Va zramba leswaku mi da xikan’we.
Yingela mimfambu yavu akuva u gungula leswi va swi zrandzraka.

Loko u tiva leswi va humeleliki a wuton’wini swi ta ku nabyalela ku twisisa wumhunu byavu. Xileswo, u ta va zrandzra vhanu lavo u tlhela u zrandzra vhanu va lixaka dzravu.

Leswi Yentxekeliki Van’wana: Kandasamy ni nsati wakwe (Canadá)

“Hi kulisiwe a Djoni hi nkama lowu a ku ni aparteyidi, ku nga ku hambanisiwa ka mintlawa. Vhanu va nhlonge leyi hambaniki a va sindzrisiwa kuva va nga tsrhami xikan’we, kutani leswo a swo yengesela xihlawuhlawu ka vhanu volavo. Vhanu vambeni va nhlonge ya ku basa a va hi vona hi nga li va ntxhumu, kutani leswo a swi hi yentxa hi nga va zrandzri va nhlonge ya ku basa. Kambe hine a hi tivona ingiki a hi nga na xihlawuhlawu. A matsrhan’wini ya leswo, a hi tivona na hi khomiwa hi ndlela leyi nga liki yinene.

“Akuva hi txintxa mavonela yezru hi sungule ku hamba xinghanu ni vhanu va nhlonge ni mahanyela lama hambaniki. Loko hi sungule ku tinyika nkama wa ku tsrhama ni vhanu va nhlonge ya ku basa hi sungule ku vona leswaku a hi ni mintxhumu yinyingi leyi fanaka. Hi vone leswaku a ku yentxeka mintxhumu leyi fanaka a wuton’wini byezru nakone hi ni swikazratu leswi fanaka.

“Hi ve ni mukhandlu wa ku zruzrela vatekani va nhlonge ya ku basa hi nkama wa ku leha, hi tekele ku va vanghanu nakone a hi vonanga ku hambana ka hine na vone. Hi mhaka ya leswo, hi sungule ku vona vhanu va nhlonge ya ku basa hi ndlela leyinene.”