Malandzra Ya Wutizreli Ma Hamba Ntizro Wa Lisima

MUPOSTOLA Pawulo a tsralele bandla dzra le Filipi a ku: “Pawulo na Timotewu, swikazrawa swa Kriste Yesu, ku tinsasi hinkwatu a wumun’weni na Kriste Yesu leti tsrhamaka Filipi, kun’we ni valaviseli ni malandzra ya wutizreli.” (Flp 1:1, NM) Xiya leswaku a lose malandzra ya wutizreli. Swa tikomba leswaku vavanuna lava afa va hamba ntizro wa lisima hi ku pfuna vakulu a bandleni hi nkama wolowo. Swi tanu ni namunhla. Malandzra ya wutizreli ma hamba mintizro leyi pfunaka valaviseli yi tlhela yi pfunisa a ku hlelekeni lokunene ka bandla.

² Xana wa ma tiva malandzra ya wutizreli lama nga a bandleni dzraku? Xana wa yi tiva mintizro leyi ma yi yentxaka leswaku ma pfuna wene ni bandla hinkwadzru? A swi ganaganekisi leswaku Yehovha a ku tlangela swinene ku tikazrata ka vavanuna lavo. Pawulo a tsrale leswi: “Hikusa vavanuna lava tizrelaka hi ndlela leyinene va tikumela xiyimu lexinene ni ntsrhunxeko lowukulu wa ku vulavula a lipfumelweni mayelanu na Kriste Yesu.”​—1Tm 3:13, NM.

SWIVILELEKO SWA MATSRALWA KU MALANDZRA YA WUTIZRELI

³ Malandzra ya wutizreli ma fanela ku hanya wutomi bya wukriste, ma va ni wutiyanguleli, ma tamela hi lani swi djulekaka ha kone mintizro leyi ma nyikiwaka yone. Leswo swi tikomba livaleni loko hi kambisisa leswi Pawulo a swi hlayiki mayelanu ni timfanelo tavu ka papela ledzri a dzri tsraleliki Timotewu: “Malandzra ya wutizreli hi ndlela leyi fanaka ma fanela ku va lama tiyimiseliki, ma nga vi na tindzrimi tibidzri, ma nga kukutleli vhinyu, ma nga naveli ku bindzrula hi wukanganyisi, ma tamela xihundla xa ku xwenga xa lipfumelo hi lipfalu ledzri basiki. Nakone, a ma zrange hi ku kambeliwa loko ma faneleka, hi kone ma taka tizrela swanga malandzra, loko ma pfumala xisolo. Malandzra ya wutizreli a ma ve vanuna va nsati mun’we, ma zrangela vana ni mindangu yavu hi ndlela leyinene.” (1Tm 3:8-10, 12, NM) Ku landzrelelisa milawu leyi tlakukiki leyi bekeliwiki malandzra ya wutizreli swi sizrelela bandla leswaku dzri nga hehliwi hi kola ka muxaka wa mhunu lweyi a tamelisiwiki mintizro ya ku kheteka.

⁴ Nambi ma li mampshwa kumbe ma kulile, malandzra ya wutizreli ma hisekela ntizro wa nsimu hweti ni hweti. Hi ku yetisela Yesu, ma hiseka a ku zrezreni. Loko ma hiseka, ma kombisa ku zron’weka ka Yehovha hi ku huluxa vhanu.​—Eza 9:7.

⁵ Vavanuna lava tizraka swanga malandzra ya wutizreli va tlhela va va xikombiso lexinene hi mayambalela, ku bekisa, mavulavulela, vonela dzravu hi mintxhumu ni hanyela dzravu. Va hlutekile a miyanakanywini, leswi yentxaka va bekeliwa xitxhavu hi vambeni. Handle ka leswo, va byi bekela lisima dzrikulu wuxaka byavu na Yehovha kun’we ni tovoko dzravu dzra ku tizrela bandla.​—Ti 2:2, 6-8.

⁶ Vavanuna lava va ‘zrange hi ku kambeliwa loko va faneleka’. Nambi loko va nge si na bekiwa swanga malandzra, va zrange hi ku tikombisa swanga vavanuna lava tinyiketeliki hakunene. Va swi kombisile leswaku va zrangisa timhaka ta Mfumu a wuton’wini byavu, mfuzri va lwela ku tlhaselela swiyavelo swini na swini leswi swi va pfulekeliki. Nakunene i swikombiso leswi djulaka ku yetiseliwa hi vambeni a bandleni.​—1Tm 3:10.

MINTIZRO YA MALANDZRA YA WUTIZRELI

⁷ Malandzra ya wutizreli ma hambela vamakwezru mintizro ya ku hambana-hambana ya mavoko; xileswo valaviseli va kuma nkama lowu yengeselekiki wa ku dondzrisa ni ku byisa. Loko huvo ya vakulu yi va nyika mintizro, yi zranga hi ku kambisisa wuswikoti bya mun’wana ni mun’wana wavu kun’we ni swivileleko swa bandla.

⁸ Yanakanya hi yin’wana ya mintizro leyi: Mun’we wa malandzra ya wutizreli a nga ha yaveliwa ku lavisela mabuku leswaku hi kota ku ma kuma hi ma tizrisela timhaka tezru kumbe ku ma tizrisa a nsin’wini. Vambeni va yaveliwa ku lavisela tinkonta ta bandla kumbe mimapa ya nsimu. Vambeni va yaveliwa ku lavisela mamikrofoni, ku tizrisa switizro swa mpfumawulu, ku va vakongomisi, ni ku pfuna vakulu hi tindlela timbeni. Ku djuleka ntizro wunyingi leswaku a Yindlu ya Mfumu yi tsrhama na yi basile; xileswo malandzra ya wutizreli minkama yinyingi ma kombeliwa ku lavisela mintizro leyi.

⁹ A mabandleni mambeni, swi nga ha koteka kuva nandzra ha mun’we a nyikiwa ntsena wun’we wa mintizro leyo. Ka mambeni, a nandzra wa wutizreli a nga ha bekisa mintizro ya ku hambana-hambana. Ka swiyimu swimbeni, ku nga ha va ni malandzra mabidzri kumbe ku tlula lama bekisaka ntizro wun’we. Loko ku nge na malandzra lama dzringanaka leswaku ma bekisa yin’wana ya mintizro leyi, huvo ya vakulu yi nga ha hlela leswaku vamakwezru va xinuna lava babatisiwiki, lava nga xikombiso lexinene, va hamba ntizro lowu djulekaka. Xileswo va ta kuma wuswikoti lebyi taka djuleka loko va tlhaselele timfanelo leti djulekaka kutani va bekiwa swanga malandzra ya wutizreli. Loko ku nge na vamakwezru va xinuna, makwezru wa xisati lweyi a nga xikombiso lexinene a nga kombeliwa leswaku a pfunisa ka mintizro ya kukazri, nambi leswi hi ntiyiso wa kone a nge tiki bekiwa swanga nandzra wa wutizreli. Mhunu lweyi a nga xikombiso ku hlayiwa lweyi mahanyela ni wugandzreli byakwe swi voniwaka na swi fanela ku yetiseliwa. Ndlela leyi a vonaka mintlhanganu ha yone, maseketelela yakwe ya nsimu, wutomi bya ndangu, swihungatiso swakwe, mayambalela, matixongisela ni swimbeni, i xikombiso lexinene ku vambeni.

¹⁰ A mabandleni lawa vakulu va nga vatsrongo swinene, malandzra ya wutizreli lama nga ni wuswikoti ma nga ha kombeliwa ku kambela vazrezri ka swivutiso swa lava djulaka ku babatisiwa, leswi fambisanaka ni tindondzro ta Bibele. Swi kumeka ka Xiyengetelo, “Xiyenge 1—Leswi Vakriste Va Swi Kholwaka”. Leswi “Xiyenge 2—Mahanyela Ya Vakriste”, xi khumbaka timhaka ta ximhunu leti nga ha bindzraka, xi fanela ku kambeliwa hi nkulu.

¹¹ Loko ku ni xivangelo lexi twalaka, huvo ya vakulu yi nga ha swi vona swi pfuna ku pfana yi txintxa swiyavelo swa kukazri swa nandzra wa wutizreli swi ya ka nandzra mumbeni. Kambe, ku ni mabindzru makulu loko makwezru yelweyi wa mun’we a hamba ntizro wolowo wa wun’we ku dzringana nkama wa kukazri leswaku a wupfa ka mayentxela ya wone.

¹² Hi ku ya hi swiyimu swa mbangu, ku nga ha va ni wutiyanguleli byimbeni lebyi nga ha nyikiwaka nandzra wa wutizreli lweyi nhluvuku wakwe wu ‘vonekaka ku hinkwavu’. (1Tm 4:15) Loko ku nge na vakulu lava dzringanaka, nandzra wa wutizreli a nga ha nyikiwa wutiyanguleli bya ku va mupfunisi wa mulaviseli wa ntlawa wa nsimu; minkama yimbeni a nga tizra swanga nandzra wa ntlawa wa nsimu, lweyi a languseliwaka hi nkulu. Malandzra ya wutizreli ma nga ha yaveliwa ku fambisa swiyenge swimbeni swa Ntlhanganu Wa Wutomi Ni Wutizreli, nambi ku fambisa Dondzro ya Bibele ya Bandla loko swi vileleka, ni ku nyikela wukaneli bya le livaleni. Malandzra ya wutizreli ma nga ha va ni matovoko ya ku nyikiwa mintizro yimbeni loko ku ni xivileleko xa kukazri, kambe ntsena loko ma tlhaselela timfanelo leti vilelekaka ka ntizro lowo. (1Pe 4:10) Loko ma pfuna vakulu, malandzra ya wutizreli ma fanela ku tinyiketela hi ku swi zrandzra.

¹³ Nambi leswi ntizro wavu wu hambaniki ni wa vakulu, wu xwengile ka Xikwembu Nkulukumba nakone i wa lisima wu tlhela wu yentxa leswaku a bandla dzri tizra ha hombe. Hi ku famba ka nkama, loko malandzra ya wutizreli ma hetisisa mintizro ya wone hi ndlela leyinene ma tlhela ma fanelekela ku tizra swanga vabyisi ni vadondzrisi, va nga hlawuliwa leswaku va tizra swanga vakulu.

¹⁴ Loko u li makwezru wa xinuna lweyi a nga mumpshwa kumbe a haka ku babatisiwa, xana u lwela ku faneleka ku va nandzra wa wutizreli? (1Tm 3:1) Leswi lembe ni lembe ku nhingenaka vhanu vanyingi a xihlayelamfuzrini, ku djuleka vavanuna va moya lava fanelekaka leswaku va byatsrha wutiyanguleli a bandleni. U nga tlhaselela ntizro lowo hi ku txutxela moya wa ku navela ku hanana vambeni. Ndlela yimbeni ya ku yentxa leswo i ku yanakanyisisa hi xikombiso lexinene xa Yesu. (Mt 20:28; Yh 4:6, 7; 13:4, 5) Ku navela kwaku ku ta ya ku kula loko u twa leswaku ku hanana swa nyonxisa. (Min 20:35) Xileswo, tinyikele akuva u tizrela vambeni, u pfunisa a ku hlayiseni ka Yindlu ya Mfumu kumbe u tinyikela ku pfaleta mhunu ka Ntlhanganu Wa Wutomi Ni Wutizreli. Ku lwela ku va nandzra wa wutizreli swi tlhela swi patsra ku txutxela timfanelo ta moya hi ku tibekela xiyimiso lexinene xa xidondzro xa ximhunu. (Ps 1:1, 2; Ga 5:22, 23) Hi ku tlhantekela, makwezru lweyi a lwelaka ku va nandzra wa wutizreli a kombisa ku dumbeka loko a nyikiwa swiyavelo a bandleni.​—1Ko 4:2.

¹⁵ Malandzra ya wutizreli ma bekiwa hi moya wa ku xwenga leswaku ma pfuna bandla. Hinkwavu a bandleni va nga kombisa leswaku va ma tlangela malandzra ya wutizreli hi nkonta ya ntizro lowukulu ma wu yentxaka hi ku tizrisana na wone loko ma hetisisa mintizro leyi ma nyikiwiki yone. Xileswo, bandla dzri ta va na dzri tlangela lulamiselo dzra Yehovha dzra ku va ni ndangu lowu hlelekiki.​—Ga 6:10.