Xikwembu Nkulukumba A Hambe Wanuna Ni Wansati Va Ku Sungula

Yehovha a hambe jardim kumbe xizramba lexi vitaniwaka Edeni. A xizramba lexo a xi tale hi swiluva, minsinya ni swihazri. Kutani Xikwembu Nkulukumba a teka ntsrhuzri wa misava a va a hamba wanuna wa ku sungula, a gama a txhela moya ndzreni ka tinhompfu take. Wa swi tiva leswaku ku game ku yentxeka yini? A wanuna lweyo a sungula ku hanya! Yehovha a nyike wanuna lweyo vito dzra ku Adamu, a tlhela a mu nyika ntizro wa ku hlayisa xizramba ni ku txhula swihazri mavito.

Yehovha a tlhele a nyika Adamu a nawu wa lisima, a te: ‘U nga da mihandzru ya minsinya hinkwayu leyi nga lani xizrambeni kambe ku ni nsinya wa ku hlawuleka ngopfu swinene lowu u kalaka u nga fanelanga u da mihandzru ya wone, hikusa loko wo txhuka u da, u ta fa.’

Ntsrhaku ka nkama wa kukazri Yehovha a te: ‘Ni ta hamba mupfunisi wa Adamu.’ A swi yentxise kuyini leswo? Ku sungula a yentxe leswaku Adamu a va ni wuzrongo lebyikulu ngopfu swinene. Ntsrhaku ka leswo a susa livambu dzrin’we dzra Adamu a mu hambela nsati. A vito dzra wansati lweyo a a li Evha. Adamu na Evha va ve vatekani va ku sungula. Xana Adamu a mu nyonxelile Evha? Ina, Adamu a mu nyonxele ngopfu swinene a va a ku: ‘Awee, leswi Yehovha a swi yentxiki hi livambu dzranga, swa hlamalisa! A hambe mhunu wa ku fana na mine.’

Yehovha a byele Adamu na Evha leswaku va pswala vana va vanyingi nakone a vana lavo a va ta pswala vana van’wana ku za ku tala misava. Yehovha a a djula leswaku Adamu na Evha va tizra xikan’we hi ku nyonxa akuva va ndzruluta misava hinkwayu yi va paradeyisi. Paradeyisi i mbangu wa ku xonga ngopfu swinene wa ku fana ni xizramba xa Edeni! Kambe a misava a ya ha li paradeyisi. Ha yini? Hi ta swi vona ka dondzro leyi landzrelaka.