DONDZRO 2

Ku Vulavula Swanga Wo Bula

2 Ba-le-Korinte 2:17

NKATSRAKANYU: Vulavula na swi pfela mbilwini, hi ndlela ya ntumbuluku, leyi kombisaka leswaku u titwisa kuyini hi mhaka ni hi vayingiseti vaku.

Lulamisela hi xikhongoto ni hi wunyaminyami. Khongota u kombela mpfuno leswaku u nga taleli kwaku kambe u talela ka dzrungula. Twisisa tinhla ta lisima leti u fanelaka ku ti tlhamuxela. Vulavula hi mazritu yaku; u nga gamele ntsena ka ku phindhetela swiga leswi nga ka xibosu hi ku swi dondzra hi zritu ni zritu.

Loko u kunguhata ku dondzrela vayingiseti ndzrimana ya kukazri ya Bibele kumbe xiyenge xa kukazri xa buku dzrin’wana, u fanela ku titoloveta ha hombe leswi u djulaka ku swi dondzra akuva u nga tilumalumi. Loko ku tsrhahiwa vhanu va kukazri, dondzra mazritu yavu hi ndlela leyi humexaka matitwela yavu kambe na u nga tlulisi mpimu.
Vulavula swi sukela mbilwini. Pimisa hi leswaku ha yini vayingiseti va fanela ku twa leswi u nga naswu. Talela ka vone. Loko u yentxa tanu, mayimela yaku ni leswi u taka swi hlaya hi mizri waku ni wuso byaku swi ta byela vayingiseti leswaku u khanela swa mbilu nakone wa va zrandzra.

U nga pimise leswaku ku vulavula hi ndlela ya ntumbuluku i swin’we ni ku kuma ntxhumu u hlaya. Yentxa leswaku leswi u khanelaka ha swone swi hlonipheka hi ku tizrisa mazritu lama khanyaka ni ku landzra nawu wa mavulavulela ya lidzrimi.
Languta vayingiseti. Va langute matihlweni loko ku yentxa leswo swi nga va khunguvanyisi. Loko u nyikela wukaneli, pima nkama u languta muyingiseti ha mun’we, a matsrhan’wini ya ku languta ntlawa hinkwawu.