Xana Ndangu Waku Wu Nga Yentxa Yini Akuva Wu Nyonxa?—Xiyenge 1

Vhanu lava ha ka ku tekana va navela ku tsrhama na va nyonxile wutomi byavu hinkwabyu, ku fana ni ku nyonxa loku va ku twiki hi siku dzra mutxhatu wavu. Leswo swi nga koteka. Vakriste lava tekaniki khale, lava tikazratelaka ku hanya hi swilayu swa Bibele, va swi tiva leswaku swa koteka ku va ni wukati lebyi nyonxisaka.

1. He xini xilayu xa Bibele lexi yaka ka vanuna?

Yehovha a beke nuna leswaku a va nhloko ya ndangu. (Dondzra Ba-le-Efesa 5:23.) Yehovha a lavisele leswaku nuna a teka swiboho leswi taka pfuna ndangu. A Bibele dzri byela vanuna minkama hinkwayu dzri ku: ‘Zrandzrani vasati venu.’ (Ba-le-Efesa 5:25) Swi hlaya yini leswo? Nuna lweyi a nga ni lizrandzru a khoma nsati wake hi ndlela leyinene, ku nga va a kaya kumbe a vhanwini. Awa mu sizrelela a tlhela a yentxa leswi a nga swi kotaka leswaku a mu hlayisa hi tlhelo dzra nyama ni matitwela. (1 Timoteo 5:8) Ku tlula hinkwaswu, a fanela ku lwela ku mu pfuna ku va ni wunghanu lebyi tiyiki na Yehovha. (Matewu 4:4) Hi xikombiso, a nga khongota a tlhela a dondzra Bibele ni nsati wake. Loko nuna a khoma nsati wake hi lizrandzru, wunghanu byake na Yehovha bya tiya.—Dondzra 1 Petros 3:7.

2. He xini xilayu xa Bibele lexi yaka ka vasati?

Zritu dzra Xikwembu Nkulukumba dzri leleta nsati ku ‘txhava nuna wakwe’ hi xitxhavu lexi yentiki. (Ba-le-Efesa 5:33) A nga swi yentxisa kuyini leswo? A nga pimisa hi matsrhamela lamanene ya nuna wake ni ndlela leyi a tikazrataka ha yone leswaku a mu hlayisa a tlhela a hlayisa vanavu. A nga tlhela a mu komba xitxhavu hi ku seketela swiboho swake, a mu yangula hi ndlela leyinene a tlhela a vulavula leswinene ha yene, nambiloko a nga gandzreli Yehovha.

3. Xana vatekani va nga byi tiyisisa kuyini wukati byavu?

Loko dzri vulavula hi vatekani, Bibele dzri li: “Lavabidzri va ta va nyama yin’we.” (Matewu 19:5) Leswi swi hlaya leswaku va fanela ku lwisana ni xini na xini lexi djulaka ku holisa lizrandzru dzravu, xi va tsravukanisa. Leswo va nga swi kota hi ku tolovela ku heta nkama xikan’we va tlhela va phofulelana ta le mbilwini hi lizrandzru, va nga fihlelani ntxhumu. A va fanelanga ku pfumelela mhunu kumbe ntxhumu, handle ka Yehovha, wu va wa lisima ku tlula mhunu lweyi va tekaniki na yene. Va fanela ku tivonela swinene ku tolovelana ku tlula mpimu ni mhunu lweyi va kalaka va nga txhatanga na yene.

KELISISA

4. Vanuna, zrandzrani vasati venu mi tlhela mi va khoma ha hombe

VHIDIYU: Vanuna, Zrandzrani Vasati Venu Xileswi Mi Tizrandzrisaka Xiswone (9:53)

• He tini tindlela timbeni leti nuna a nga kombisaka ha tone leswaku a zrandzra nsati wake nakone awa mu hlayisa?

Dondzrani Ba-le-Kolosa 3:12, mi gama mi bulisana hi xivutiso lexi:

• Xana nuna a nga ma kombisisa kuyini matsrhamela lawa a wukatini?

5. Vasati, zrandzrani vanuna venu mi tlhela mi va bekela xitxhavu

Bibele dzri kutxa nsati ku bekela xitxhavu nuna wake, nambi a gandzrela Yehovha kumbe im-him. Dondzrani 1 Petros 3:1, 2, mi gama mi bulisana hi swivutiso leswi:

• Loko nuna waku a nga li mugandzreli wa Yehovha, handle ka ku ganaganeka u swi navela swinene kuva a mu gandzrela. U vona leswaku u nga mu pfuna ku yampswa hi ku va u ku khoo u mu zrezrela, kumbe hi ku va ni mahanyela lamanene u tlhela u mu bekela xitxhavu? Ha yini u hlamulisa xileswo?

Loko nuna ni nsati va tizrisana, va nga teka swiboho leswinene. Nambitanu, swi nga yentxeka minkama yimbeni a nsati a nga yimi ni nuna. A nga ha phofula mavonela yake hi xitxhavu ni hi moya wa ku zrula, kambe a fanela ku dzrimuka leswaku Yehovha a nyike nuna wutiyanguleli bya ku teka swiboho leswi nga pfunaka ndangu. Nsati a fanela ku seketela xiboho lexo hi mbilu hinkwayu. Loko a yentxa leswo, a byala moya lowunene a ndangwini leswaku wu nyonxa. Dondzrani 1 Petros 3:3-5, mi gama mi bulisana hi xivutiso lexi:

• Xana Yehovha a titwisa kuyini loko nsati a bekela xitxhavu nuna wake?

6. U nga swi kota ku hlula swikazratu a wukatini byaku

VHIDIYU: Ndlela Ya Ku Tiyisa Xiboho Xa Wukati (5:44)

• Ka vhidiyu, i yini leswi kombisaka leswaku lizrandzru dzra nuna ni nsati a dzri sungule ku hola?

• Xana va yentxe yini leswaku va tiyisa wukati byavu?

Dondzrani 1 Ba-le-Korinte 10:24 ni Ba-le-Kolosa 3:13. Ntsrhaku ka ku dondzra tsralwa ha dzrin’we, bulisanani hi xivutiso lexi:

• Xana ku tizrisa xilayu lexi swi nga byi tiyisisa kuyini wukati?

Bibele dzri li hi fanela ku bekelana xitxhavu. Ku bekelana xitxhavu swi patsra ku khoma mhunu hi wunene ni lizrandzru. Dondzrani Ba-le-Roma 12:10, mi gama mi bulisana hi swivutiso leswi:

• Xana nuna kumbe nsati a fanela ku yimela nkatake leswaku a zranga a mu kombisa xihluwa? Ha yini?

NKATSRAKANYU

Nuna ni nsati va nga nyonxa loko va zrandzranana, va bekelana xitxhavu va tlhela va tizrisa minsinya ya milawu ya Bibele.

Mpfuxeto

• Xana nuna a nga yentxa yini leswaku wukati byi nyonxisa?

• Xana nsati a nga yentxa yini leswaku wukati byi nyonxisa?

• Loko u txhatile, u vona leswaku he wini nsinya wa nawu wa Bibele lowu nga ku pfunaka ku tiyisa wukati byaku?

HANDZRISISA

Dondzra swidzringanyeto leswi tizraka, leswi nga ku pfunaka ku va ni wutomi bya ndangu lebyi nyonxisaka.

U Nga Va Ni Ndangu Lowu Nyonxiki (xibukwana)

Hlalela vhidiyu dzra wuyimbeleli ledzri kombisaka matovoko ya ku tizrisa milawu ya Xikwembu Nkulukumba a wukatini byaku.

Na Ku Zrandzra (4:26)

Kambisisa leswi ku tibeka hansi ka wunhloko bya nuna swi tlhamuxelaka swone.

“Vavasati, Ha Yini Mi Fanela Ku Titsrongahatela Wunhloko?” (Xihondzro Xa Ku Zrindzra, 15 ka Mayu wa 2010)

Xana vatekani va kukazri va swi hlulise kuyini swikazratu swikulu leswi a va kumana na swone, swinʼwe swa swone a nga ku dlaya wukati?

Hi Pfuxeti Mutxhatu Wezru Hi Ku Pfuniwa Hi Yehovha (5:14)