XIDONDZRO 51
U Nga Vulavulisa Kuyini Ni Vambeni Hi Ndlela Leyi Nyonxisaka Yehovha?
Yehovha a hi vumbe na hi ni wuswikoti bya ku hlamalisa swinene, ku nga nyiko ya ku vulavula. Xana ya mu zron’wa ndlela leyi hi tizrisaka nyiko leyo ha yone? Nakunene! (Dondzra Yakob 1:26.) Na swi li tanu, hi nga yi tizrisisa kuyini nyiko yezru ya ku vulavula hi ndlela leyi taka nyonxisa Yehovha?
1. Hi fanela ku yi tizrisisa kuyini nyiko ya ku vulavula?
A Bibele dzri li hi fanela ku ya mahlweni hi ‘khongotelanana, hi yakisana’. (1 Ba-le-Thesalonika 5:11) Ku ni vhanu va kukazri lava u va tivaka va djulaka ku tiyisiwa? U nga yentxa yini leswaku va titwa ha hombe? U nga ha va byela leswi u swi zrandzraka kwavu. Ku ni tsralwa dzra kukazri u pimisaka leswaku dzri nga pfuna mhunu wa kukazri u mu tivaka? Ku na manyingi, u ngo yentxa hi ku hlawula. U nga dzrivali leswaku mavulavulela yaku ma nga khumba mhunu swinene hi ndlela ya ku fana ni mazritu lawa u ma tizrisaka. Xileswo, minkama hinkwayu vulavula hi ndlela ya ku zrula ni ya lizrandzru.—Amaproverbia 15:1.
2. I mavulavulela muni lawa hi fanelaka ku ma bakanya?
A Bibele dzri li: ‘A zritu dzrini ni dzrini ledzrimfani dzri nga txhuki dzri huma a milon’wini yenu.’ (Dondzra Ba-le-Efesa 4:29.) Leswi swi hlaya leswaku a hi fanelanga ku tizrisa mavulavulela ya nhlambha nambi ku tlhavana hi mazritu ya mona. Hi fanela ku tlhela hi tingawula mahlevo ni ku hona vambeni vito.—Dondzra Amaproverbia 16:28.
3. I yini xi nga hi pfunaka ku vulavula hi ndlela leyi yakaka?
Minkama yinyingi leswi hi khanelaka ha swone swi kombisa leswi nga mbilwini yezru kumbe leswi hi tsrhamelaka ku pimisa ha swone. (Luka 6:45) Xileswo, hi fanela ku tidondzrisa ku yanakanya leswi nga swinene—leswi lulamiki, leswi basiki, leswi khensekaka ni leswi nga ni vito ledzrinene. (Ba-le-Filipi 4:8) Akuva hi kota ku tsrhamela ku pimisa hi leswo, hi fanela ku hlawula vanghanu, leswi hi swi hlalelaka ni leswi hi swi yingisetaka hi wutlhazri. (Amaproverbia 13:20) Hi fanela ku tlhela hi tinyika nkama wa ku pimisa hi leswi hi taka swi hlaya ni ndlela leyi hi taka swi hlaya ha yone. Pimisa hi leswi mazritu yaku ma taka va khumbisa xiswone vambeni. A Bibele dzri li: ‘Va kone lava tlhavaka hi mazritu yavu swanga hi timpanga; kambe lidzrimi la lwe wa ku tlhazriha i vutomi.’—Amaproverbia 12:18.
KELISISA
Dondzra ku vulavula hi ndlela leyi nyonxisaka Yehovha yi tlhela yi tiyisa vambeni.
4. Hluta mazritu yaku, u tiva nkama ni ndlela ya ku yangula ha yone
Hinkwezru hi pfana hi hlaya leswi hi gamaka hi tilaya ha swone. (Yakob 3:2) Dondzrani Ba-le-Galatia 5:22, 23, mi gama mi bulisana hi swivutiso leswi landzrelaka:
Ka matsrhamela lawa, he wani lawa u nga navelaka ku ma kombela hi xikhongoto leswaku ma ku pfuna ku yampswisa mavulavulela yaku? Matsrhamela lawa hinkwawu ma nga ku pfunisa kuyini?
Dondzrani 1 Ba-le-Korinte 15:33, mi gama mi bulisana hi xivutiso lexi landzrelaka:
Xana vanghanu vaku ni swihungatiso swi nga ma kutxetelisa kuyini makhanelela yaku?
I yini xi nga hlohlotelaka mavulavulela yaku?
Dondzrani Eklesiasta 3:1, 7, mi gama mi bulisana hi xivutiso lexi landzrelaka:
I ka xiyimu muni swi nga yampswaka kuva u miyela, u yangula hi nkama wumbeni?
5. Vulavula leswinene hi vambeni
Hi nga swi tsrhikisa kuyini ku zruketela vambeni kumbe ku va hona vito? Vonani VHIDIYU, mi gama mi bulisana hi swivutiso leswi landzrelaka.
Ka vhidiyu, ha yini makwezru lweyi a a djula ku txintxa ndlela leyi a a vulavula ha yone hi vambeni?
A yentxe yini leswaku a kota ku txintxa?
Dondzrani Eklesiasta 7:16, mi gama mi bulisana hi xivutiso lexi landzrelaka:
Hi fanela ku dzrimuka yini loko hi dzringeka ku vulavula swa ku biha hi mhunu?
Dondzrani Eklesiasta 7:21, 22, mi gama mi bulisana hi xivutiso lexi landzrelaka:
Xana tindzrimana leti ti nga ku pfunisa kuyini ku tikhoma loko mhunu wa kukazri a vulavula swa ku biha ha wene?
6. Vulavula hi ndlela leyinene ni ndangu waku
Yehovha a djula hi vulavula ni ndangu wezru hi ndlela leyinene ni ya lizrandzru. Vonani VHIDIYU, mi gama mi bulisana hi xivutiso lexi landzrelaka.
I yini xi taka ku pfuna ku vulavula ni ndangu waku hi ndlela leyinene?
Dondzrani Ba-le-Efesa 4:31, 32, mi gama mi bulisana hi xivutiso lexi landzrelaka:
Hi nga vulavulisa kuyini ni va ndangu wezru hi ndlela leyi va nga titwaka na va zrandzriwa?
Yehovha a phofule leswi a a titwisa xiswone hi N’wanake, Yesu. Dondzrani Matewu 17:5, mi gama mi bulisana hi xivutiso lexi landzrelaka:
U nga mu yetiselisa kuyini Yehovha loko u vulavula ni ndangu waku?
Djuletela mikhandlu ya ku kulungela vambeni
VAN’WE VA LI: “Ni hlaya leswi ni swi djulaka. I taku loko u nga swi nyonxeli.”
U yima na vone? Ha yini?
NKATSRAKANYU
Mazritu ma ni ntamu. Hi fanela ku swi pimisa ha hombe leswi hi swi hlayaka, nkama wa ku swi hlaya ni mahlayela ya kone.
Mpfuxeto
He tini tindlela timbeni leti u nga pfunaka vambeni ha tone hi mazritu yaku?
I mavulavulela muni u navelaka ku ma bakanya?
I yini xi nga hi pfunaka kuva minkama hinkwayu hi vulavula leswinene ni leswi yakaka?
HANDZRISISA
I yini xi nga hi pfunaka ku vulavula hi ndlela leyinene?
Dondzra leswi nga ku pfunaka ku bakanya mavulavulela ya ku biha.
“Xana Ku Zruketela Swi Bihile Hakakunene?” (Leswi kumekaka ka jw.org)
Vona leswi u nga tivonelisaka xiswone ku wela ka ntlhamu wa ku hleva.
Twana leswi Yehovha a mu pfunisiki xiswone wanuna wa kukazri ku tsrhika nhlambha.