Swileleto Swa Ntlhanganu Wa Wutomi Ni Wutizreli Byezru Bya Wukriste

Tinhlokomhaka

• Mazritu Ya Ku Pfula 2

• Wukosi Lebyi Nga Bibeleni 3-5

  • Wukaneli 3

  • Tindzralama Ta Moya 4

  • Ku Dondzra Ka Bibele 5

• Tihite A Ntizrweni Wa Nsimu 6-11

  • Mavhidiyu Ya Swikombiso Swa Ku Bula Hi Bibele 7

  • Liyendzro Dzra Ku Sungula 8

  • Mpinda 9

  • Xidondzro Xa Bibele 10

  • XWukaneli 11

• Ku Hanya Swanga Vakriste 12-13

  • Dondzro Ya Bibele Ya bandla 13

• Mazritu Ya Ku Pfala 14

• Tihite A Ku Dondzreni Ni Le Ku Dondzriseni 15

• Swilayu Ni Ku Kulungela 16

• Nkama 17

• Liyendzro Dzra Mulaviseli Wa Muganga 18

• Vhiki Dzra Asembleya Kumbe Dzra Kongresu 19

• Vhiki Dzra Xidzrimuxo 20

• Mulaviseli Wa Ntlhanganu Wa Wutomi Ni Wutizreli 21

• Mufambisi Wa Ntlhanganu Wa Wutomi Ni Wutizreli 22

• Mulayi Lwa Pfunisaka 23

• Masala Man’wana 24

• Mavhidiyu 25

1.Ntlhanganu wa Wutomi Ni Wutizreli Byezru Bya Wukriste wu ta famba hi lani swi kombisiwiki ha kone ka Xibukwana Xa Ntlhanganu Wa Wutomi Ni Wutizreli Byezru Bya Wukriste ni hi ku ya hi swileleto leswi landzrelaka. Vazrezri hinkwavu va fanela ku zrambiwa kuva va tsralisa leswaku va ta nyikela swiyenge swa swidondzrana. Van’wana lava hlengelaka ni bandla nkama hinkwawu na vone va nga titsralisa loko va pfumelelana ni tindondzro ta Bibele va tlhela va hanya hi pfumelelana ni milawu ya wukriste.—Xikolo Xa Vutirheli p. 282.

MAZRITU YA KU PFULA

2. 1 minutu. Ka vhiki dzrin’wana ni dzrin’wana, ntsrhaku ka lisimu dzra ku pfula ni xikhongoto xa kone, Mufambisi wa Ntlhanganu Wa Wutomi Ni Wutizreli a ta yentxa leswaku vayingiseti va navela ku twa leswi ntlhanganu wu tameliki swone. Mufambisi a fanela ku tlakuxa tinhla leti taka pfuna bandla.

WUKOSI LEBYI NGA BIBELENI

3. Wukaneli: 10 wa maminutu. Nhlokomhaka ya wukaneli lebyi yi ni tinhla tibidzri kumbe tizrazru ta lisima, leti buyaka ka Xibukwana Xa Ntlhanganu Wa Wutomi Ni Wutizreli. Wukaneli lebyi byi fanela ku yaveliwa nkulu kumbe nandzra wa wutizreli lweyi a fanelekaka. Loko ku sunguliwa buku dzrimpswha dzra Bibele ka ku dondzra ka Bibele ka vhiki ledzro, xikaneli xi nga kombisa ndlela leyi vhidiyu ni nhlokomhaka swi fambisanaka ha yone. Nambitanu, xikaneli xi fanela ku yentxa leswaku tinhla hinkwatu ta lisima ti nga ka xibukwana ti tlakuxiwa. Nakone, loko nkama wu pfumela, xi fanela ku tizrisa mifoto leyi fambisanaka ni tinhla leti dondzriwaka. Mifoto leyi yi bekeliwe ku yengetela ka dzrungula ledzri fanelaka ku nyikeliwa. Xikaneli xi nga ha yengetela swin’wana, kambe ntsena loko swi fambisana ni mhaka leyi ku buliwaka ha yone.

4. Tindzralama Ta Moya: 10 wa maminutu. Lexi i xiyenge xa swivutiso ni tinhlamulo, lexi ngeke na masungulela kumbe mahetelela. Xiyenge lexi xi fanela ku nyikeliwa hi nkulu kumbe nandzra wa wutizreli lweyi a fanelekaka. Xikaneli xi fanela ku hamba swivutiso hinkwaswu ka vayingiseti. Hi tlhelo dzrin’wana, xi nga hlawula leswaku tindzrimana leti tsrhahiwiki ti nga dondzriwa kumbe im-him. Lava nyiketiwaka akuva va hlamula, va fanela ku yentxa leswo hi 30 wa masegundu.

5. Ku Dondzra Ka Bibele: 4 wa maminutu. Xiyenge lexi xa swidondzrana xi yaveliwa vamakwezru va xinuna. Xidondzrana xi fanela ku dondzra tindzrimana leti xi yaveliwiki tone na xi nga hlayi masungulela kumbe mahetelela. Mufambisi wa ntlhanganu a fanela ku pfuna swidondzrana akuva swi dondzra hi ndlela leyi nga yone, hi ndlela leyi twisisekaka, swi nga nghanghameteki, swi tlakuxa tinhla ta lisima, swi txintxatxintxa zritu, swi hefemula lani ku fanelaka kone swi tlhela swi dondzra hi ndlela ya ntumbuluku.

TIHITE A NTIZRWENI WA NSIMU

6. 15 wa maminutu. Xiyenge lexi xa ntlhanganu xi yentxeliwe ku nyika hinkwavu mukhandlu wa ku titoloveta ku zrezra ni ku yampswisa mazrezrela ni ku dondzrisa. Vazrezri va fanela ku bula hi dzrungula dzra swikombiso swa ku bula hi Bibele ledzri nga ka Xibukwana Xa Ntlhanganu Wa Wutomi Ni Wutizreli. Nambitanu handle ka loko va nyikiwe nkongomiso wun’wana va ntsrhunxekile ku hlawula xivutiso, ndzrimana, link kumbe mhaka leyi fambisanaka ni xiyimu xa lomu va tsrhamaka kone. Vazrezri va nga ha hlawula ku tizrisa revhixta, buku kumbe vhidiyu ledzri kumekaka ka xiyenge lexi liki Switizro Swa Ku Dondzrisa loko ku nge na kongomiso wa ku yentxa leswo ka swileleto. Akuva ku pfuniwa vazrezri, a swikombiso swa ku bula hi Bibele swi nga ha patsra xiyenge lexi liki “Kuma Tsralwa Ledzri Ka Switizro Swa Ku Dondzrisa Ha Swone.” Swidondzrana swi nga ha tizrisa dzrungula ledzri ka swiyavelo loko swi swi djula. Xibukwana Xa Ntlhanganu xi kombisa nkama wa xiyavelo xin’wana ni xin’wana xa xidondzrana, nakone hi minkama yin’wana, xi nga ha nyikela swileleto leswi yengetelekiki. Swidondzrana a swi fanelanga ku yengetela swin’wana ntsena hi ku djula ku tizrisa nkama lowu swi nyikiwiki wone. Swikombiso swin’wana leswi lulamiseliwiki ha hombe a swi nge heti nambi ko va 1 minutu. Vakulu va nga nyikiwa swiyavelo swa swidondzrana loko swi vileleka. Hi minkama yin’wana, ku ta buliwa hi vhidiyu kambe ku nga li dzrone vhidiyu dzra swikombiso swa ku bula hi Bibele. Wukaneli lebyo byi ta nyikeliwa hi nkulu kumbe nandzra wa wutizreli lwa fanelekaka.

7. Mavhidiyu Ya Swikombiso Swa Ku Bula Hi Bibele: Mavhidiyu ya swikombiso swa ku bula hi Bibele ma ta txhayiwa ku tlhela ku buliwa ha wone hweti yin’wana ni yin’wana. Mavhidiyu lawa, ma ta kombisa liyendzro dzra ku sungula ni mpinda. Xiyenge lexi xi fanela ku fambisiwa hi mufambisi wa Ntlhanganu Wa Wutomi Ni Wutizreli.

8. Liyendzro Dzra Ku Sungula: Xiyenge lexi xa swidondzrana xi nga ha yaveliwa makwezru wa xinuna kumbe wa xisati. Lweyi a yaveliwaka ku pfunisa xidondzrana a fanela ku va wa limbewu ledzri fanaka kumbe xizro xa ndangu wake. Xidondzrana ni mupfunisi wa xone va nga ha tsrhama kumbe va yima. Xidondzrana xi fanela ku hlawula malosela lama fanelekaka ya muganga wolowo. Mabulu ya swikombiso swa ku bula hi Bibele lama nga ka Xibukwana Xa Ntlhanganu Wa Wutomi Ni Wutizreli ma fanela ku tizrisiwa swanga xisekelo xa nkombiso.

9. Mpinda: Xiyenge lexi xa swidondzrana xi nga ha yaveliwa makwezru wa xinuna kumbe wa xisati. Lweyi a yaveliwaka ku pfunisa xidondzrana, a fanela ku va wa limbewu ledzri fanaka. (Vutirhei Bya Mfumo 5/97 p. 3) Xidondzrana ni mupfunisi wa xone va nga ha tsrhama kumbe va yima. Xidondzrana xi fanela ku kombisa leswi nga hlayiwaka loko ku yentxiwa mpinda ka mhunu lweyi a kombisiki ku nyonxela ka liyendzro dzra ku sungula. Mabulu ya swikombiso swa ku bula hi Bibele lama nga ka Xibukwana Xa Ntlhanganu Wa Wutomi Ni Wutizreli ma fanela ku tizrisiwa swanga xisekelo xa nkombiso.

10. Xidondzro Xa Bibele: Xiyenge lexi xa swidondzrana xi nga ha yaveliwa makwezru wa xinuna kumbe wa xisati. Lweyi a yaveliwaka ku pfunisa xidondzrana, a fanela ku va wa limbewu ledzri fanaka. (Vutirhei Bya Mfumo 5/97 p. 3) Xidondzrana ni mupfunisi wa xone va nga ha tsrhama kumbe va nyima. Xiyenge lexi xi fanela ku kombisa mafambisela ya xidondzro xa Bibele lexi kutani xi sunguliki. A swi vileleki ku va ni masungulela kumbe mahetelela handle ka loko xidondzrana xi yaveliwe ku tizrela ka swoleswo. A swi sindzrisi leswaku mhaka leyi yaveliwiki yi dondzriwa hi zritu dzra le henhla, nambileswi swoswo swi nga ha yentxiwaka. Loko mhaka ya kone yi patsra vhidiyu, a dzri fanelanga ku txhayiwa kambe ku to buliwa ha dzrone. Ku fanela ku tlakuxiwa ha hombe wuswikoti bya ku dondzrisa.

11. Wukaneli: Xiyenge lexi xa swidondzrana xi ta yaveliwa makwezru wa xinuna nakone a fanela ku nyikela wukaneli lebyi kongomisiwaka ka bandla.

KU HANYA SWANGA VAKRISTE

12. Ntsrhaku ka lisimu, ku landzrela xiyenge xa 15 wa maminutu lexi taka va ni wukaneli byin’we kumbe byibidzri lebyi lulamiseliwiki ku pfuna vayingiseti ku tizrisa Zritu dzra Xikwembu Nkulukumba. Handle ka loko swi kombisiwile, wukaneli lebyi byi nga ha yaveliwa vakulu kumbe malandzra ya wutizreli lama fanelekaka. Swivileleko swa bandla swi fanela ku nyikeliwa hi vakulu ntsena. Loko xiyenge xa kukazri xi patsra ku bulisana ni vayingiseti na mhaka ya kone yi kumeka ka Xibukwana Xa Ntlhanganu Wa Wutomi Ni Wutizreli, makwezru lweyi a nga ni xiyenge lexo a nga ha hamba swivutiso swa le tlhelweni akuva a khanyisa tinhla ta lisima ta mhaka ya kone.

13. Dondzro Ya Bibele Ya Bandla: 30 wa maminutu. Xiyenge lexi xi yaveliwa nkulu lweyi a fanelekaka. (Loko nhlayu ya vakulu yi li yitsrongo, malandzra ya wutizreli lama fanekelaka ma nga ha yaveliwa xiyenge lexi loko swi vileleka.) Huvo ya vakulu yi fanela ku hlawula leswaku i vamani lava fanelaka ku fambisa Dondzro ya Bibele ya Bandla. Lava va hlawuliwiki va fanela ku fambisa dondzro hi ndlela leyinene akuva dondzro yi hela hi nkama, va tlakuxa matsralwa lama khomiki mhaka ni ku pfuna hinkwavu leswaku va twisisa matizrela ya tinhla leti ku vulavuliwaka ha tone. Va ta kuma leswi nga va pfunaka loko va pfuxeta minkongomiso leyi humexiwiki mayelanu ni ku fambisa Dondzro ya Xihondzro Xa Ku Zrindzra. Loko xiyenge lexi dondzriwaka vhiki ledzro xi helile, mufambisi wa dondzro a fanela ku gama a matsrhan’wini ya ku lehisa. Loko swi koteka, vafambisi ni vadondzri va mayava va ku hambanahambana va fanela ku yaveliwa xiyenge lexi vhiki dzrin’wana ni dzrin’wana. Loko mufambisi wa Ntlhanganu Wa Wutomi Ni Wutizreli a leleta leswaku a dondzro yi katsrakanyiwa, mufambisi wa Dondzro ya Bibele ya Bandla a ta vona leswaku a swi yentxisa kuyini leswo akuva a pumba nkama. A nga ha vona swi yampswa kuva ku nga dondzriwi mayava man’wana.

MAZRITU YA KU PFALA

14. 3 wa maminutu. Mufambisi wa Ntlhanganu Wa Wutomi Ni Wutizreli a ta hamba nkatsrakanyu wa tinhla ta lisima ta ntlhanganu. A fanela ku pfuxeta leswi taka dondzriwa ka vhiki ledzri landzrelaka. A nga tivisa mavito ya swidondzrana leswi yaveliwiki swiyenge ka vhiki ledzri landzrelaka, loko nkama wu pfumela. Handle ka loko swi kombisiwile, xitiviso xini na xini xi fanela ku nyikeliwa nakone papela dzrini ni dzrini dzri fanela ku dondzreliwa bandla hi mufambisi wa ntlhanganu ka mazritu yake ya ku pfala. Switiviso leswi tolovelekiki, swa ku fana ni malulamiselo ya nsimu ni wubasisi, a swi fanelanga swi nyikeliwa a plataforma, kambe swi fanela ku namaketiwa ka kwadru dzra switiviso. Loko nkama wa mazritu ya ku pfala wu nge ti dzringana akuva ku hambiwa switiviso kumbe ku dondzriwa mapapela, mufambisi wa ntlhanganu a fanela ku kombela vamakwezru lava nga ni wukaneli ka xiyenge lexi liki Ku Hanya Swanga Vakriste leswaku va gomisa swiyenge swavu hi lani swi djulekaka ha kone. (Vona mayava 13 ni 17.) Ntlhanganu wu fanela ku hela hi lisimu ni xikhongoto.

TIHITE A KU DONDZRENI NI LE KU DONDZRISENI

15. Xidondzrana xin’wana ni xin’wana xi fanela ku ta ni xibukwana lexi li Ku Dondzriseni ka Ntlhanganu wa Wutomi Ni Wutizreli, a nga ha va xibukwana xa hi ntshima kumbe xa eletroniku. Mufambisi wa Ntlhanganu Wa Wutomi Ni Wutizreli a fanela ku tizrisa xibukwana akuva a nyikela swilayu kumbe ku kulungela swidondzrana. Xidondzrana xin’wana ni xin’wana xi fanela ku tizrela ka dondzro leyi kumekaka ka maparenti kusuhi ni lani ku nga ni xiyavelo ka Xibukwana Xa Ntlhanganu Wa Wutomi Ni Wutizreli. Xiyenge lexi liki “Titsralele Nhluvuku Waku”, lexi kumekaka ka xibukwana lexi, xi lulamiseliwe kuva xi tizrisiwa hi xidondzrana nakone a xi fanelanga ku tsraliwa hi mufambisi wa ntlhanganu.

SWILAYU NI KU KULUNGELA

16. Ntsrhaku ka loko xidondzrana xin’wana ni xin’wana xi hetisisile xiyavelo xa xone, mufambisi wa Ntlhanganu Wa Wutomi Ni Wutizreli a ni 1 minutu leswaku a kulungela ni ku nyikela xilayu lexi seketeliwiki ka xibukwana lexi liki Ku Dondzriseni. Loko mufambisi a tivisa xiyavelo xa xidondzrana, a nge ti tivisa yinhla ya dondzro leyi xi tizrelaka ka yone. Nambitanu, loko xidondzrana xi hetile xiyavelo xa xone, ni loko mufambisi a xi kulungelile, a nga tivisa yinhla ya dondzro leyi a xi tizrela ka yone a tlhela a hlaya leswaku ha yini xidondzrana xi hambe ha hombe kumbe xi fanele ku yampswisa ka yinhla yoleyo. Mufambisi wa ntlhanganu a nga tlhela a hlaya swin’wana mayelanu ni nkombiso wa xidondzrana loko a vona leswaku swi ta pfuna xidondzrana kumbe vayingiseti. Swilayu swin’wana leswi taka pfuna swi nga nyikiwa xidondzrana a xihundleni ntsrhaku ka ntlhanganu kumbe hi nkama wun’wana, na swi seketeliwa ka xibukwana lexi liki Ku Dondzriseni kumbe ka buku ledzri liki Xikolo Xa Vutirheli. Swilayu leswo swi nga seketeliwa ka yinhla ya dondzro leyi yaveliwiki xidondzrana kumbe yin’wana.—Vona mayava 17, 22 ni 23 akuva u kuma swileleto leswi yengetelekiki mayelanu ni ntizro wa mulaviseli wa Ntlhanganu Wa Wutomi Ni Wutizreli ni ntizro wa mulayi wa vakulu ni malandzra ya wutizreli.

NKAMA

17. A ku na wukaneli ni byin’we lebyi fanelaka ku khaluta nkama lowu bekiwiki, nambi ku li mazritu ya mufambisi wa Ntlhanganu Wa Wutomi Ni Wutizreli. Nambileswi ku kalaka ku nga hlayiwanga leswaku “u nga khaluti” maminutu ya kukazri, a ku na xivangelo xa ku lehisa akuva ntsena u heta nkama lowu nyikeliwiki. Swiyavelo swa swidondzrana swi fanela ku tsremelisiwa hi ndlela ya wutlhazri loko nkama wu khalutile. Loko ka wukaneli byin’wana ku khalutisiwa nkama, mulayi wa vakulu ni malandzra ya wutizreli a fanela ku nyikela xilayu xihundleni. (Vona yava 23) Ntlhanganu hinkwawu, ku patsra ni tinsimu ni swikhongoto, wu fanela ku heta wora dzrin’we ni 45 wa maminutu.

LIYENDZRO DZRA MULAVISELI WA MUGANGA

18. Loko bandla dzri yendzreliwe hi mulaviseli wa muganga, ntlhanganu wu fanela ku fambisiwa hi laha swi kombisiwiki ha kone ka Xibukwana Xa Ntlhanganu Wa Wutomi Ni Wutizreli handle ka leswi landzrelaka: Dondzro Ya Bibele Ya Bandla, hansi ka xiyenge lexi liki Ku Hanya Swanga Vakriste, yi ta siviwa hi wukaneli bya 30 wa maminutu lebyi taka nyikeliwa hi mulaviseli wa muganga. Na wukaneli bya mulaviseli wa muganga byi nga si na sungula, mufambisi wa Ntlhanganu Wa Wutomi Ni Wutizreli a ta katsrakanya leswi dondzriwiki a tlhela a pfuxeta leswi taka dondzriwa ka vhiki ledzri landzrelaka. A ta tlhela a hamba switiviso leswi nga kone, a dondzra mapapela loko swi fanela, a gama a vitana mulaviseli wa muganga. Ntsrhaku ka wukaneli bya mulaviseli wa muganga, ntlhanganu wu ta pfaliwa hi lisimu ledzri mulaviseli wa muganga a taka va a dzri hlawulile. Ka liyendzro dzra mulaviseli wa muganga, a ku fanelanga ku tizra masala man’wana hi lidzrimi dzra bandla. Ntlawa wa lidzrimi dzrin’wana wu nga va ni mintlhanganu nambi loko mulaviseli wa muganga a yendzrela bandla dzroledzro. Nambitanu, a ntlawa wu fanela ku tlhangana ni bandla akuva wu twa wukaneli bya mulaviseli wa muganga.

VHIKI DZRA ASEMBLEYA KUMBE DZRA KONGRESU

19. Ndzreni ka vhiki dzra asembleya kumbe kongresu, a ku nge ti va ni mintlhanganu ya bandla. Tindondzro leti a ti ta dondzriwa ka mintlhanganu ya vhiki ledzro ti fanela ku dondzriwa ka wugandzreli bya ndangu kumbe dondzro ya ximhunu.

VHIKI DZRA XIDZRIMUXO

20. Loko xidzrimuxo xi va a xikazri ka vhiki, a ku nge ti va ni Ntlhanganu Wa Wutomi Ni Wutizreli vhiki dzroledzro. Kambe a mintlhanganu ya ntizro wa nsimu yi ta yentxiwa hi siku dzra Xidzrimuxo.

MULAVISELI WA NTLHANGANU WA WUTOMI NI WUTIZRELI

21. Nkulu lwa hlawuliwiki hi huvo ya vakulu a ta tizra swanga mulaviseli wa Ntlhanganu Wa Wutomi Ni Wutizreli. A fanela ku yentxa leswaku ntlhanganu lowu wu famba ha hombe hi ku ya hi swileleto leswi. Nkulu lweyi kun’we ni mulayi wa vakulu ni malandzra ya wutizreli, ha wubidzri byavu va fanela ku bula nkama ni nkama. Neti Xibukwana Xa Ntlhanganu Wa Wutomi Ni Wutizreli xi tlhasa, mulaviseli wa Ntlhanganu Wa Wutomi Ni Wutizreli a ta yavela swiyenge hinkwaswu swa mintlhanganu ya le xikazri ka vhiki swa tihweti toleto tibidzri. (Vona mayava 2-14.) Leswo swi patsra swiyavelo swa lava kalaka va nga li swidondzrana, swiyavelo swa mufambisi wa ntlhanganu wa le xikazri ka vhiki (ka vamakwezru lava va pfumeleliwiki hi huvo ya vakulu va bandla) ni swiyavelo swa swidondzrana. Swiyavelo hinkwaswu swi fanela ku yaveliwa na ka ha sale mavhiki mazrazru. A Papela Dzra Xiyavelo Xa Ntlhanganu Wa Wutomi Ni Wutizreli Byezru Bya Wukriste (S-89) dzri fanela ku tizrisiwa ka swiyavelo swa swidondzrana. A mulaviseli wa Ntlhanganu Wa Wutomi Ni Wutizreli a fanela ku tiyiseka leswaku a papela dzra xiyimiso xa swiyavelo swa ntlhanganu hinkwawu dzri bekiwile ka kwadru dzra switiviso. A huvo ya vakulu yi nga ha hlawula nkulu mumbeni kumbe nandzra wa wutizreli akuva a mu pfuna. Nambitanu lava va fanelaka ku nyikela swiyavelo swa lava va kalaka va nga li swidondzrana i vakulu va bandla ntsena.

MUFAMBISI WA NTLHANGANU WA WUTOMI NI WUTIZRELI

22. Vhiki dzrin’wana ni dzrin’wana, nkulu mun’we a ta yaveliwa ku va mufambisi wa Ntlhanganu Wa Wutomi Ni Wutizreli. (Lani nhlayu ya vakulu yi nga yitsrongo, malandzra ya wutizreli lama fanelekaka ma nga yaveliwa loko swi djuleka.) Mufambisi a fanela ku lulamisela mazritu ya ku pfula ni ya ku pfala a tlhela a bulisana ni vayingiseti hi mavhidiyu ya swikombiso swa ku bula hi Bibele. A tlhela a tivisa nhlokomhaka ya wukaneli byin’wana ni byin’wana lebyi taka bekiwa, nakone hi ku ya hi nhlayu ya vakulu lava nga kone, a nga ha tamela swiyenge swin’wana swa ntlhanganu, ngopfungopfu swiyenge leswi ku to ko txhayiwa mavhidiyu ntsena na ku nge na ku bulisana ni vayingiseti. Mazritu a ma fanelanga ma va manyingi loko a tivisa wukaneli lebyi taka landzrela. Vakulu lava fanelaka ku hlawula leswaku hi vani vakulu lava taka tamela xiyenge lexi. Vakulu lava fanelekaka va ta yaveliwa xiyenge lexi xa ku va mufambisi wa ntlhanganu nkama ni nkama. Hi ku ya hi swiyimu swa kolanu, mulaviseli wa Ntlhanganu Wa Wutomi Ni Wutizreli a nga yaveliwa xiyenge hi ku phindhaphindha ku tlula vakulu lavan’wana. Loko nkulu a faneleka ku fambisa Dondzro Ya Bibele Ya Bandla, swi le livaleni leswaku awa faneleka ku va mufambisi wa ntlhanganu. Nambitanu, dzrimukani leswaku nkulu lweyi a nga mufambisi wa ntlhanganu a fanela ku kulungela swidondzrana hi lizrandzru a tlhela a nyikela xilayu hi lizrandzru. Mufambisi wa ntlhanganu a ni wutiyanguleli bya ku yentxa leswaku ntlhanganu wu hela hi nkama wa kone. (Vona mayava 14 ni 17.) Loko mufambisi wa ntlhanganu a swi djula ni loko ku ni mbangu lowu dzringanaka, ku nga ha yimisiwa a mikrofoni a plataforma leswaku a ta vitana makwezru lweyi a landzrelaka, na kasi makwezru yelweyo kutani a lulamela ku nyikela wukaneli byake. Hi ndlela leyi fanaka, mufambisi wa ntlhanganu a nga ha djula ku tsrhama a plataforma ka menza loko xiyenge xa Ku Dondzra Ka Bibele xi famba ni loko swiyenge swa Tihite A Ntizrweni Wa Nsimu swi famba. Leswi swi nga londzrovota nkama.

MULAYI LWA PFUNISAKA

23. Loko swi koteka, i swinene ku nyika xiyavelo lexi nkulu lweyi a nga ni wuswikoti bya ku vulavula. Mulayi wa vakulu ni malandzra ya wutizreli a ni wutiyanguleli bya ku nyika swilayu vakulu ni malandzra ya wutizreli, loko swi vileleka, a xihundleni, mayelana ni swiyenge swavu leswi va swi hetisisaka ku patsra ni swa Ntlhanganu Wa Wutomi Ni Wutizreli, wukaneli bya le livaleni, ku fambisa kumbe ku dondzra mayava ka Dondzro ya Xihondzro Xa Ku Zrindzra kumbe Dondzro Ya Bibele Ya Bandla loko swi djuleka. (Vona yava 17.) Loko bandla dzri ni vakulu va ku hlawa lava nga ni wuswikoti bya ku vulavula va tlhela va va vadondzrisi lava nga ni wuswikoti, lembe dzrin’wana ni dzrin’wana vakulu lavo va nga txintxana ka xiyenge lexi. A swi sindzrisi leswaku mulayi wa vakulu ni malandzra ya wutizreli a nyikela xilayu ka wukaneli byin’wana ni byin’wana lebyi nyikeliwaka.

MASALA MAN’WANA

24. Hi ku ya hi nhlayu ya swidondzrana, mabandla ma nga va ni masala man’wana ka swiyavelo swa swidondzrana. Ku fanela ku va ni mulayi wa vakulu ni malandzra ya wutizreli, na a li nkulu loko swi koteka, ka sala dzrin’wana ni dzrin’wana. Loko swi sindzrisa, nandzra wa wutizreli lwa fanelekaka a nga tamelisiwa xiyenge lexi. Huvo ya vakulu yi fanela ku hlawula leswaku i mani a nga tizraka ka xiyenge lexi ni leswaku ku nga ha va ni ku txintxana. Mulayi wa vakulu ni malandzra ya wutizreli a fanela ku landzra mayentxela lama tlhamuxeliwiki ka yava 16. Loko ku ni masala man’wana, swidondzrana swi fanela ku kombeliwa leswaku swi ya kone ntsrhaku ka xiyenge lexi liki Tindzralama Ta Moya ni xa Wukosi Lebyi Nga Bibeleni. Swidondzrana swi fanela ku tlhela swi tlhangana ni bandla ntsrhaku ka xiyenge lexi liki Tihite A Ntizrweni Wa Nsimu. Loko ku buliwa hi vhidiyu dzra swikombiso swa ku bula hi Bibele, lava nga ka masala man’wana loko swi koteka, va fanela ku dzri vona na vone kumbe va longoloka ni bulu dzroledzro na va li kolanu ka xilawu xa wubidzri. Loko swi nge tanu, mulayi wa vakulu ni malandzra ya wutizreli a fanela ku bula hi vhidiyu na a dzri txhaya hi ku tizrisa selulari.

MAVHIDIYU

25. Ku ta tizrisiwa mavhidiyu lama hlawuliki, lama fambisanaka ni ntlhanganu lowu. Mavhidiyu ya ntlhanganu wa xikazri ka vhiki ma ta kumeka ka JW Library nakone switizrisiwa swinyingi swi nga nghena ka dzrone. Hi minkama yin’wana, mavhidiyu ya swikombiso swa ku bula hi Bibele ma nga txhayiwa ka mintlhanganu ya nsimu.