Daniyele

8 Hi lembe dzra wuzrazru dzra ku fuma ka Belxatsara, mine Daniyele ni ve ni xivoniso xin’wana. 2 Loko ni lavisa a xivonisweni, a ni li ndlwini ya wuhosi ya le Xuxani, leyi kumekaka a xifundzreni xa Elamu; ni ve ni xivoniso lexo na ni li kusuhi ni nambu wa* Ulayi. 3 Loko ni lavisa, ni vone hamba ya xinuna na yi yime kusuhi ni nambu, nakone a yi ni timhondzro tibidzri. Timhondzro ha tibidzri a ti lehile, kambe dzrin’we a dzri lehi ku tlula letin’wana, nakone ledzri dzra ku leha dzra kone dzri humelele ntsrhaku ka loko ku humelele ledzrin’wana. 4 Ni vone hamba yoleyo na yi tsrutsruma yi ya mpeladambu, yi ya n’walungu ni le nyingitimu akuva yi dliva valala va yone, nakone a ku nge na xihazri ni xin’we xa nhova lexi a xi kota ku lwisana na yone xi yi hlula. A nga kone lweyi a a kota ku ntsrhunxa lexi a xi li mavokweni ya yone. A yi yentxa hinkwaswu leswi a yi swi djula nakone a yi tikulisa.

5 Na na ha lavisa, ku humelele xiphongo lexi a xi buya hi le mpeladambu, a xi tsremakanya misava hinkwayu na xi nga khumbi hansi. Nakone a xiphongo xolexo a xi ni limhondzro dzra dzrikulu hi le xikazri ka matihlo ya xone. 6 A xi kongoma hamba ya xinuna leyi a yi ni timhondzro tibidzri, leyi ni yi voniki na yi yime kusuhi ni nambu; a xiphongo a xi tsrutsruma xi kongoma hamba na xi hlundzruke ngopfu swinene.

7 Ni xi vone na xi tsrhindzrekelela hamba na xi yi hlundzrukele ngopfu swinene. Xi hlasele hamba xi tsrhova timhondzro ta yone ha tibidzri, nakone a hamba a yi swi kotanga ku xi hlula. Xi yi wise hansi xi yi pswanyetela, nakone a nga kone lweyi a yi ntsrhunxiki a mavokweni ya xone.

8 Ntsrhaku ka leswo, a xiphongo xi tikulise ngopfu swinene, kambe loko xi ve ni ntamu, a limhondzro dzra xone ledzrikulu dzri tsrhoviwile; hiloko ku humelela mune wa timhondzro letikulu leti a ti lavise mune wa matlhelo.*

9 Ka dzrin’we dzra tone ku humelele limhondzro dzrin’wana dzra dzritsrongo, ledzri kuliki dzri va dzra dzrikulu ngopfu swinene, na dzri kongome a nyingitimu, a wuxeni ni le Tikweni dzra ku Xonga. 10 Dzri kule ngopfu lakakuva dzri kumela khandzra dzra le matilweni, nakone dzri yentxe leswaku van’we ka khandzra dzroledzro ku patsra ni tinyeleti tin’wana va wela misaveni, dzri va dzri va pswanyetela. 11 Dzri tikulise nambi mahlweni ka Muzrangeli wa khandzra, nakone dzri sivele vhanu ku Mu hambela gandzrelo dzra siku ni siku, futsrhi a mbangu Wake wa ku xwenga lowu simekiwiki wu hohlotiwile. 12 Hi mhaka ya ku tlula nawu, a khandzra dzrin’we dzri nyikeliwile, nakone a gandzrelo dzra siku ni siku dzri yimisiwile; a limhondzro dzri tame dzri txukumetela ntiyiso a hansi, nakone dzri humelelile ka leswi a dzri swi yentxa.

13 Ni twe muxwengi wa kukazri na a vulavula, nakone muxwengi mun’wana a vutise lweyi a a vulavula a ku: “A xivoniso mayelanu ni gandzrelo dzra siku ni siku ni xidoho lexi honetelaka, leswi yentxaka leswaku a mbangu wa ku xwenga ni khandzra swi va ntxhumu lowu pswanyeteliwaka, xi ta teka nkama wa ku tlhasa kwini?” 14 Yene a ni byela a ku: “Ku ya tlhasa loko ku khalute 2.300 wa masiku.* Kutani a mbangu wa ku xwenga nakunene wu ta pfuxetiwa wu va ka xiyimu xa wone lexinene.”

15 Loko mine Daniyele na ha va ni xivoniso lexo nakone ni zama ku xi twisisa, swa kola ni kola ni vone lweyi a a fana ni mhunu, na a li mahlweni kwanga. 16 Hiloko ni yingela zritu dzra ku fana ni dzra mhunu, na dzri pfa hi le xikazri ka nambu wa Ulayi; dzri huwelela dzri ku: “Gabriyele, mu yentxi a twisisa leswi a swi voniki.” 17 Xileswo, a tsrhindzrekele lani a ni li kone. Kambe loko a tlhasile ni txhave ngopfu swinene lakakuva ni khinsama ni khumba hansi hi mombo. A ni byela a ku: “N’wana wa mhunu, twisisa leswaku a xivoniso xi ta hetiseka a nkameni wa wugamu.” 18 Nambitanu, na a ha vulavula na mine, ni biwe hi wuzrongo lebyikulu, na wuso byanga byi khumbe hansi. Hiloko a ni khumba a ni sekelekisa ni yima lani a ni li kone, 19 a ni byela a ku: “Ni ta ku komba leswi taka yentxeka a ku heleni ka nkama wa mahlundzru ya* Xikwembu Nkulukumba, hikusa a xivoniso xi ta hetiseka a nkameni lowu bekiwiki, leswi liki, a nkameni wa wugamu.

20 “A hamba ya xinuna leyi u yi voniki, leyi a yi ni timhondzro tibidzri, yi yimela tihosi ta le Medo ni ta le Persiya. 21 A xiphongo* xi yimela hosi ya le Grikiya, nakone a limhondzro dzra dzrikulu ledzri a dzri li hi le xikazri ka matihlo ya xone dzri yimela hosi ya ku sungula. 22 Loko ku li limhondzro ledzri tsrhoviwiki ku va ku humelela mune wa tone, ku ta va ni mune wa mimfumu leyi taka humelela a tikweni dzrake, kambe a yi nge ti va ni ntamu wa ku tlhasa ka wake.

23 “Loko mimfumu yoleyo yi li kusuhi ni wugamu bya yone, loko a vadohi va dohe ku tlula mpimu, ku ta humelela hosi leyi txhavisaka yi tlhela yi va ni tihanyi, leyi twisisaka mazritu ya ku kazrata.* 24 Yi ta va ni ntamu lowukulu ngopfu swinene, kambe na ku nga li hi ntamu wa yone. Yi ta honetela mintxhumu ya yinyingi ngopfu swinene lakakuva yi hlamalisa vhanu, nakone nakunene yi ta humelela ka hinkwaswu leswi yi taka swi yentxa. Yi ta helisa lava ntamu ku patsra ni lava ku xwenga. 25 Nakone hi wutlhazri bya yone, yi ta tizrisa madzrimi akuva swi yi fambela ha hombe; yi ta tikulisa a mbilwini ya yone, nakone hi nkama wa ku zrula* yi ta helisa vanyingi. Yi ta pfukela ni Hosi ya tihosi, kambe yi ta pfotlotiwa na ku nga li hi mavoko ya mhunu wa nyama.

26 “Leswi hlayiwiki ka xivoniso mayelanu ni 2.300 wa masiku* i ntiyiso, kambe u fanela ku hlayisa xivoniso lexi xi va xihundla, hikusa xi vulavula hi masiku lawa ma ha liki kule ngopfu swinene.”

27 Mine Daniyele, ni titwe na ni kazralile nakone ni hete masikunyana na ni vabya hi mhaka ya leswi ni swi lozriki. Ntsrhaku ka leswo, ni sekelekile ni ya hamba mintizro ya hosi; kambe a ni pfilunganyekile hi mhaka ya xivoniso, nakone a ku nge na mhunu lweyi a a ta kota ku xi twisisa.