A MISAVENI hinkwayu vhanu va mimbangu ya ku siyanasiyana va ni wukhongoti lebyi va yaka ka byone. Va khongota loko va li wuswavu; ni loko va li vhanu lava nga vanyingi. Va khongota loko va li a makezrekeni, a titempeleni, a masinagogeni ni ka mimbangu yin’wana ya ku gandzrela ka yone. Va nga ha tizrisa swikhumba, minkazrazra leyi nga ni xihambanu, va phindhaphindha mazritu, va tizrisa swifaniso, mabuku ya swikhongoto, kumbe makwadru ya matsrongo na va ma hayeke makhumbini.

Xikhongoto xi yentxa leswaku vhanu va hambana ni swivumbiwa hinkwaswu. Kambe ku ni mintxhumu yinyingi leyi hi yentxaka hi fana ni swihazri. Ku fana na swone, na hine hi djula ku da, hi vilela moya, ni mati, nakone loko nkama wu ya wu famba ha fa. (Eklesiasta 3:​19) Kambe i vhanu ntsena lava khongotaka. Ha yini?

Kumbexana xivangelo xa kone hi leswi hi pswaliwiki na hi li ni xivileleko xa kuva hi khongota. Xikhongoto hi xone xi hi pfunaka leswaku hi tsrhindzrekela ka mbangu lowu vhanu va wu tekaka na wu li lowu xwengikiki swinene. Bibele dzri kombisa leswaku hi pswaliwa na hi ni ku navela ka ku tanu. (Eklesiasta 3:11) Siku dzrin’wana Yesu a hlaye leswi: “Va nyonxa lava tikazratelaka ku va ni wuxaka na Xikwembu Nkulukumba, hikusa Mfumu wa matilo i wavu.”—Matewu 5:3.

“Ku tikazratelaka ku va ni wuxaka na Xikwembu Nkulukumba” hi swone swi yentxaka leswaku hi vona miyaku leyikulu ya wukhongoti nakone hi swone swi tlhelaka swi yentxa vhanu leswaku va heta mawora manyingi na va li ku khongoteni. I ntiyiso leswaku vhanu van’wana va tidumba kumbe ku dumba van’wana akuva va hetisisa ku va ni wuxaka na Xikwembu Nkulukumba. Xana a wu swi voni leswaku vhanu a va na byone wuswikoti bya ku yanelisa ku va ni wuxaka na Xikwembu Nkulukumba ni vhanu van’wana hi ku helela? Leswi hi kalaka hi nga hetisekanga, hi hanya nkama wa ku goma ngopfu nakone hi nga ha vona mintxhumu hi ndlela leyi nga liki yone. Ku ni mhunu mun’we ntsena lwa tlhazrihiki a tlhela a va ni ntamu ku hi tlula, lwa nga kotaka ku hetisisa ku tikazratelaka kwezru ka ku va ni wuxaka na Xikwembu Nkulukumba. Kambe, i yini leswi hi susumetelaka kuva hi khongota?

Yanakanya hi mhaka leyi: Xana u sama siku dzrin’wana u vilela nkongomiso, wutlhazri, kumbe swivutiso leswi swi tikombaka na ku nge na mhunu lwa nga kotaka ku swi hlamula? Xana u sama u vilela ku txhaveleliwa a ntsrhaku ka loko u vavisiwa hi ntxhumu wa kukazri, xana u vilela nkongomiso loko u djula ku teka xiboho xa kukazri lexikulu kumbe loko u djula ku dzrivaleliwa hi leswi u tisoliki?

Bibele dzri hlaya leswaku leswi hi swone swivangelo leswi hi yentxaka leswaku hi khongota. Bibele i buku ledzri dumbekaka ngopfu a mhakeni leyi ya xikhongoto nakone dzri ni swikhongoto swinyingi swa vavanuna ni vavasati va ku dumbeka. Va khongotile akuva va kuma ntxhavelelo, nkongomiso, ku dzrivaleliwa ni kuva va kuma tinhlamulo ta swivutiso leswi a swi va kazrata a wuton’wini byavu.—Amapsalma 23:3; 71:21; Daniel 9:​4, 5, 19; Habakuk 1:3.

Nambileswi swikhongoto swoleswo a swi nga fani, ku ni ntxhumu wun’we lowu a swi fana ha wone. Lava a va hamba swikhongoto leswo va tshimisise ntxhumu wa lisima lowu djulekaka akuva xikhongoto xi hlamuliwa, ku nga ntxhumu lowu ntalu wa vhanu namunhla va wu baka hi makatla. Vavanuna ni vavasati volavo va ku dumbeka a va mu tiva ha hombe lweyi a va fanela ku kongomisa swikhongoto swavu ka yene.

XANA swikhongoto hinkwaswu swi ya ka mbangu wun’we, swi nge na mhaka leswaku swi kongomisiwe ka mani? Vhanu vanyingi namunhla va yanakanya hi ndlela yoleyo. Va yi seketela mhaka ya ku tlhangana ka wukhongoti nakone va djula kuva wukhongoti hinkwabyu byi va byin’we nambileswi byi kalaka byi nga fani. Kambe xana swi nga yentxeka leswaku mhaka va yi yanakanyaka yi li madzrimi?

Bibele dzri hlaya leswaku minkama yinyingi ntalu wa vhanu a va swi kongomise ka Xikwembu Nkulukumba swikhongoto swavu. Hi nkama wa ku tsraliwa ka Bibele, a swi tolovelekile kuva vhanu va kongomisa swikhongoto swavu ka swifaniso leswi vatliwiki. Kambe yentxela ledzro Xikwembu Nkulukumba a dzri sole hi ku phindhaphindha. Hi xikombiso, loko a buku dzra Amapsalma 115:4-6 dzri vulavula hi swifaniso dzri li ‘Swi ni tindleve, kambe a swi yingeli.’ A mhaka yi le livaleni, hikusa a swi pfuni ntxhumu ku khongota ka Xikwembu lexi kalaka xi nga yingeli.

Ku ni dzrungula dzrin’wana a Bibeleni ledzri nyonxisaka nakone dzri yi tlhamuxelaka ha hombe mhaka leyi ya xikhongoto. Muprofeta Eliya a tlhontlhe vaprofeta va Bali a va byela leswaku va khongota ka xikwembu xavu, nayene a khongota ka Xikwembu Nkulukumba wakwe. Eliya a hlaye leswaku Xikwembu Nkulukumba wa ntiyiso a a ta mu hlamula kambe lexa madzrimi a xi nge ti va hlamula. Vaprofeta va Bali va hete nkama wa ku leha na va li ku khongoteni hi zritu ledzri tlakukiki, kambe a va zanga hi ku hlamuliwa hi xikwembu xavu xa Bali. Dzrungula dzra kone dzri li: ‘Kambe a ku vanga na zritu, ni yangulo ni ku yingeliwa.’ (1 Tihosi 18:29) Kambe i yini leswi yentxekiki loko Eliya a khongota?

Loko Eliya a hete ku khongota, hi nkama wolowo Xikwembu Nkulukumba wakwe a hlamule Xikhongoto xakwe hi ku zrumela ndzrilo lowu sukelaka matilweni akuva wu hisa gandzrelo dzrakwe. Kasi hi kwini ku hambana loku a ku li kone? Ntxhumu lowu a wu kombisa ku hambana wu kumeka ka buku dzra 1 Tihosi 18:36, 37. Xikhongoto a xi gome ngopfu swinene, ku kumbeteliwa leswaku a xo va ni kolomu ka 30 wa mazritu ntsena ka Xiheberu xa ku sungula. Nambileswi a xi gomile, ka xikhongoto xakwe Eliya a nghenisi vito dzra Xikwembu Nkulukumba kazrazru, ledzri liki Yehovha.

Zritu ledzri liki Bali, ledzri tlhamuxelaka “Nwinyi” a ku li xikwembu xa vakanana, nakone a ku li ni swikwembu swin’wana leswi na swone a swi vitaniwa hi vito dzroledzro. Kambe vito ledzri liki Yehovha dzri hlawuleke ngopfu nakone dzro fanela yene ntsena a wuyakwini hinkwabyu. Loko a vulavula ni vhanu vakwe a te: ‘Hi mine Yehovha, hi dzrone vito dzranga.’—Ezaya 42:8.

Xana xikhongoto xa Eliya ni xa vaprofeta va Bali swi ye ka mbangu wun’we? A wugandzreli bya Bali byi tsrongahate vhanu hikusa a byi seketela wunghwavana ni ku tlhela byi hamba magandzrelo hi vhanu. Kambe ku hamba ni vagandzreli va Bali, Yehovha a dondzrise Vaisrayele ndlela leyi va fanelaka ku mu gandzrela ha yone leyi yamukelekaka. Kutani yanakanya nyana hi mhaka leyi: Loko wo tsrala papela na u tsralela munghanu waku lweyi u mu hloniphaka, xana a wu ta yimela kuva dzri ya ka mun’wana lweyi a nga ni mahanyela ya hambana ni lweyi u tsraleliki yene? Nikutsrongo!

Loko u khongota ka Yehovha u va na u kongomisa xikhongoto xaku ka muvumbi lweyi a nga Papayi wa vhanu hinkwavu. a Ka xikhongoto xake Muprofeta Ezaya a te: ‘Wene Yehovha, u Tatana wezru.’ (Ezaya 63:16) Nakunene lweyi i Xikwembu Nkulukumba lweyi Yesu a vulavuliki ha yene loko a byela vadondzrisiwa vakwe a ku: ‘Ndzri tlhantukela ku Tatana wanga ni le ku Tatana wenu, ku Xikwembu Nkulukumba wanga ni le ku Xikwembu Nkulukumba wenu.’ (Yohan 20:17) Yehovha i Papayi wa Yesu. I Xikwembu Nkulukumba lweyi Yesu a a khongota kwake nakone i Xikwembu Nkulukumba lweyi a dondzrisiki valandzreli vakwe leswaku va khongota ka yene.—Matewu 6:9.

Xana Bibele dzri hi kutxa kuva hi kongomisa swikhongoto swezru, ka Yesu, Maria, vasantu kumbe ka tintsrumi? Im-him. Bibele dzri hi kutxa kuva hi kongomisa swikhongoto swezru ka Yehovha ntsena. Vona swivangelo swibidzri. Xa ku sungula, xi hamba xiyenge xa wugandzreli, nakone Bibele dzri hi kutxa kuva hi gandzrela Yehovha ntsena. (Eksoda 20:5) Xa wubidzri, Bibele dzri hlaya leswaku Yehovha i ‘Muyingeli wa swikhongoto’. (Amapsalma 65:2) Nambileswi Yehovha a nyikiki vhanu tindjombo tinyingi, ndjombo ya ku yingela swikhongoto a nga yi nyikanga mhunu. A hi dumbisa leswaku ko va yene ntsena a yingisetaka swikhongoto swezru.

Kutani loko u djula kuva Yehovha a Yingiseta swikhongoto swaku, dzrimuka xitsratsriyo lexi nga Bibeleni lexi liki: ‘Mun’wana ni mun’wana lwa taka vitana vito dzra Hosi [Yehovha] a ta huluxiwa.’ (Amintiṛo 2:21) Xana Yehovha a yingiseta swikhongoto hinkwaswu? Xana ku ni swa kukazri hi fanelaka ku swi tiva loko hi djula kuva Yehovha a yingiseta swikhongoto swezru?

A MHAKENI ya xikhongoto, wukhongoti byinyingi bya kazrateka ngopfu swinene hi ndlela leyi mhunu a fanelaka ku swi hlaya ni swin’wana. Kambe Bibele kuva hi vona mintxhumu ya lisima, ya ku fana ni xivutiso lexi liki, “Hi fanela ku Khongotisa kuyini?”

Bibele dzri vulavula hi malandzra ya ku dumbeka ya xikwembu Nkulukumba loko ma li ku khongoteni na ma li mimbangwini ya ku siyanasiyana nakone na ma yime hi tindlela leti kalaka ti nga fani. Ma khongote hi ndzreni ka mbilu kumbe hi zritu ledzri twalaka hi ku ya hi swiyimu swa wone. Ma khongote na ma lavisi henhla kumbe na ma kozramisi tinhloko. A matsrhan’wini ya ku tizrisa swifaniso kumbe mabuku ya swikhongoto, ma khongote na swi mpfela mbilwini. I yini leswi yentxiki leswaku Yehovha a yingela swikhongoto swa wone?

Hi lani swi boxiwiki ha kone ka nhlokomhaka leyi khalutiki, ma kongomise swikhongoto swa wone ka Xikwembu Nkulukumba wa ntiyiso ku nga Yehovha. Ku ni ntxhumu wun’wana wa lisima lowu nga ka 1 Yohan 5:14, leyi liki: ‘A ku dumba loko hi nga naku ku yene hi loko, leswaku loko hi kombela ntxhumu hi ku zrandzra wakwe, a hi yingela.’ Swikhongoto swezru swi fanela swi fambisana ni ku zrandzra ka Xikwembu Nkulukumba. Xana swi djula ku hlaya yini leswo?

Swi djula ku hlaya leswaku hi fanela ku tiva leswi ku zrandzra ka Xikwembu Nkulukumba ku nga swone? Ku dondzra Bibele swi ta hi pfuna leswaku hi khongota hi ndlela leyi faneliki. Xana leswi swi djula ku hlaya leswaku Xikwembu Nkulukumba a nge swi yingele swikhongoto swezru loko hi nga yanga xikole xa Bibele? A swi hlaye swone, kambe Xikwembu Nkulukumba a djula leswaku hi tiva ku zrandzra kwake, hi ku twisisa hi va hi hanya ha kone. (Matewu 7:21-23) Hi fanela ku khongota hi ku pfumelelana ni leswi hi swi dondzraka.

A nkama hi dondzraka ha Yehovha ni ku zrandzra kwake, lipfumelo dzrezru dzri ta kula nakone mhaka leyi i ya lisima a xikhongotweni. Yesu a te: “Nakone hinkwaswu leswi mi swi kombelaka hi xikhongoto, na mi ni lipfumelo, mi ta nyikiwa swone.” (Matewu 21:22) Lipfumelo a hi ku pfumela xin’wana ni xin’wana, kambe swi hlaya ku dumba mintxhumu leyi nga voniwikiki kambe ku nga ni wumboni lebyi kombisaka leswaku yi kone (Ba-Heberu 11:1) Bibele dzri ni wumboni byinyingi lebyi kombisaka leswaku Yehovha, lweyi hi nga kotikiki ku mu vona, I wa hi ka kunene,wa dumbeka nakone a tiyimisele ku hlamula swikhongoto swa lava nga ni lipfumelo ka yene. Handle ka leswo hi nga ya mahlweni hi kombela lipfumelo ledzri yengetelekiki nakone Yehovha a ta hi nyika leswi hi swi kombelaka.—Luka 17:5; Yakob 1:17.

Hi leyi ndlela yin’wana ya lisima ya ku khongota. Yesu a te: ‘A ku na mhunu lwa taka ka Tatana loko ku nge ha mine.’ (Yohan 14:6) Yesu hi yene lweyi a yentxiki hi tsrhindzrekela ka Yehovha. Xileswo, Yesu a dondzrise valandzreli vake leswaku swikhongoto swavu va swi khalutisa hi vito dzrakwe. (Yohan 14:13; 15:16) Leswi a swi hlayi swone leswaku hi fanela ku kongomisa swikhongoto swezru ka Yesu, kambe hi khalutisa swikhongoto swezru hi vito dzra Yesu, na hi dzrimuka leswaku hi yene lweyi a yentxiki leswaku hi kota ku tsrhindzrekela ka Papayi wezru lwa hetisekiki ni lwa xwengiki.

Vapostola va Yesu va same va ku ku yene: ‘Hosi, hi dondzrise ku khongota.’ (Luka 11:1) Swi le livaleni leswaku a va nga kombeli leswaku a va dondzrisa leswi hi nga swi boxa hala henhla kambe a va djula ku tiva leswi va fanelaka ku khongota ha swone. Ku hlaya ntiyiso a va ku, ‘i yini leswi hi fanelaka ku swi patsra loko hi khongota?’

A KU NA Xikhongoto xin’wana lexi vakriste va xi tivaka ku fana ni xikhongoto xa Hosi. Swi nge na mhaka leswaku i ntiyiso kumbe i madzrimi vhanu vanyingi a va xi twisisi xikhongoto xa Yesu xa xikombiso lexi minkama yin’wana xi vitaniwaka xikhongoto xa Hosi. Vhanu vanyingi va phindaphinda mazritu ya xone siku ni siku kambe Yesu nga xi yentxelanga swone leswo. Hi swi tivisa ku yini?

Loko Yesu a nga si na xi hlaya xikhongoto lexo a te: “Loko u khongota, u nga phindheteli mazritu wolawa ya man’we” (Matewu 6:7) Kutani, xana loko Yesu a hlaya xikhongoto xa xikombiso a yala leswi a nga swi hlaya lani henhla. Im-him, kambe a hi dondzrisa leswi hi fanelaka ku swi patsra loko hi khongota ni leswi hi fanelaka ku swi zrangisa. A hi xi kambisiseni hi wunyaminyami xikhongoto lexi. Xi kumeka ka Matewu 6:9-13.

“Papayi wezru lweyi a nga matilweni, a vito dzraku a dzri xwengisiwe.”

Yesu a dzrimuxe valandzreli vake leswaku swikhongoto hinkwaswu swi fanela ku kongomisiwa ka Tatana wakwe ku nga Yehovha. Kambe xana wa swi tiva leswaku ha yini vito dzra Xikwembu Nkulukumba dzri li dzra lisima nakone dzri fanela ku xwengisiwa?

Ku sukela a masungulweni ya vhanu vito dzra Xikwembu Nkulukumba ledzri xwengiki dzri honiwile. Sathana nala wa Xikwembu Nkulukumba a hlaye leswaku Yehovha i mufumi lwa nga ni wukanganyisi lwa kalaka wutiyanakanyi lwa ngeke na mfanelo ya ku fuma swivumbiwa swakwe. (Genesis 3:1-6) Vhanu vanyingi va pfumelelana na Sathana hi ku dondzrisa leswaku Xikwembu Nkulukumba i mufumi lwa kazrataka nakone va hlaya leswaku mintxhumu ye tiyentxekela. Vambeni va suse ni vito dzrake ka wundzruluteli byavu bya Bibele ni ku yentxa leswaku dzri nga tizrisiwe.

Bibele dzri dondzrisa leswaku Xikwembu Nkulukumba a ta helisa wubihi hinkwabyu. (Ezekiel 39:7) Hi ku yentxa leswo, a ta yanelisa swivileleko swaku ni ku helisa swikazratu leswi u nga naswone. Hi ndlela yini? Mazritu lawa ma landzrelaka ya xikhongoto xa Yesu ma nyikela nhlamulo.

“A wu te mfumu wa ku.”

Namunhla vazrangeli vanyingi va wukhongoti a va wu twisisi mfumu wa Xikwembu Nkulukumba. Kambe valandzreli va Yesu va swi tiva leswaku Xikwembu Nkulukumba a profete leswaku Mesiya, Muhuluxi lwa hlawuliwiki hi Xikwembu Nkulukumba a ta va Hosi ya Mfumu lowu taka ndzruluta misava. (Ezaya 9:6, 7; Daniyele 2:44) Wu ta xwengisa vito dzra Xikwembu Nkulukumba ni ku beka livaleni madzrimi ya Sathana wu va wu mu helisa. Mfumu wa Xikwembu Nkulukumba wu ta helisa, yimpi, mavabyi, ndlala ni lifu. (Amapsalma 46:9; 72:12-16;Ezaya 25:8; 33:24) Loko u khongota leswaku Mfumu wa Xikwembu Nkulukumba wu ta, u va na u khongotela leswaku swidumbiso leswo hinkwaswu swi hetiseka.

“A ku zrandzra kwaku a ku yentxeke la misaveni, hi lani ku yentxekaka ha kone matilweni.”

Mazritu ya Yesu ma kombisa leswaku ku zrandzra ka Xikwembu Nkulukumba ku ta yentxeka la misaveni, hi lani ku yentxekaka ha kone matilweni lani Xikwembu Nkulukumba a tsrhamaka kone. A ku na ntxhumu lexi nga sivelaka leswaku ku zrandzra ka Xikwembu Nkulukumba ku nga yentxeke lani misaveni; N’wana wa Xikwembu Nkulukumba a lwe yimpi na Sathana ku patsra ni tintsrumi takwe kutani va va txukumetela misaveni. (Apfuletelo 12:9-12) Xikombelo lexi xa wuzrazru xa xikhongoto xa xikombiso xi hi pfuna leswaku hi ti kazratela ku yentxa ku zrandzra ka Xikwembu Nkulukumba ku nga li ku yentxa ku zrandzra kwezru. Ku navela kwakwe i ka leswaku vhanu vake va kuma mintxhumu leyinene. Xileswo, nambi Yesu wanuna lweyi a hetisekiki, a byele Papayi wakwe a ku: ‘Kambe ku nga yentxiwe ku zrandzra kwanga, kambe a ke ku zrandzra kwaku!’—Luka 22:42.

“Hi nyike swakuda swa siku dzra namunhla.”

Yesu a tlhele a kombisa leswaku hi nga khongota hi swivileleko swezru. Nakunene ku yentxa hi ndlela leyo swi yentxa leswaku hi dzrimuka leswaku Yehovha ‘lwa nyikaka vhanu hinkwavu wutomi ni hika ni hinkwaswu’. (Amintiṛo 17:25) Bibele dzri hlaya leswaku a fana ni papayi lweyi nga ni lizrandzru lweyi a nyikaka vana vake leswi va swi djulaka. Kambe ku fana ni papayi lweyi a nga ni lizrandzru, a nge va nyiki mintxhumu leyi ngeke ku va pfuna ntxhumu.

“Nakone hi dzrivaleli swidoho swezru.”

Xana u ni nandzru ka Xikwembu? Xana u djula leswaku xi ku dzrivalela? Namunhla vhanu vanyingi a va swi twisisi leswaku i yini xihono ni leswaku xi hoxile ku ya tlhasa kwini. Kambe Bibele dzri dondzrisa leswaku xihono hi xone lexi hi vangelaka swikazratu ni lifu. Leswi hinkwezru hi pswaliwiki na hi nga hetisekanga, minkama ya ku tala ha doha nakone dumbo dzrezru dzra wutomi lebyi nga heliki byi tiseketele hi ku va Xikwembu Nkulukumba a hi dzrivalela. (Ba-le-Roma 3:23; 5:12; 6:23) Swa hi tiyisa ku tiva leswaku Bibele dzri li: ‘Hikusa wene Hosi, [Yehovha] u munene, u lwe a dzrivalelaka.’—Amapsalma 86:5.

“Kambe hi sizreleli ka lweyi wa ku biha.”

Xana u vona leswaku wa swi djula ku sizreleliwa hi Xikwembu Nkulukumba? Vhanu vanyingi a va dumbi leswaku lwemfani, ku nga Sathana, i mhunu wa ntshima nakone a tlhele a mu vitana ‘mufumi wa misava leyi’. (Yohan 12:31; 16:11) Sathana a hambukisa misava leyi hi leswi ku nga yene mufumi wa yone. Nakone a tiyimisele ku ku tsrhikisa leswaku u nga vi na wuxaka ni tatana waku Yehovha. (1 Petros 5:8) Nambitanu, Yehovha a ni ntamu ku tlula Sathana nakone wa va sizrelela lava a va zrandzraka.

Nkatsrakanyu wa tinhla ta lisima ta xikhongoto xa Hosi, Yesu a nga boxi tinhla hinkwatu leti fambisanaka ni xikhongoto. Dzrimuka leswi buku dzra 1 Yohan 5:14 dzri swi hlayaka ha Xikwembu Nkulukumba, dzri li: ‘A ku dumba loku hi nga naku ku yene hi loku, leswaku loko hi kombela ntxhumu hi ku zrandzra kwakwe, a hi yingela.’ U nga hlaye leswaku swikazratu swaku switsrongo nakone u nge swi patsri ka swikhongoto swaku.—1 Petros 5:7.

Kambe ku hlayiwa yini hi nkama ni mbangu lowu u khongotaka na u li ka wone? Xana swi ni mhaka leswaku hi khongota na hi li kwini nakone siku muni?

HANDLE ka ku ganaganeka na wene wa swi xiya leswaku wukhongoti byinyingi byi ni mimbangu leyi va khongotaka ka yone nakone byi tlhele byi beka ni minkama leyi byi fanelaka ku khongota ha yone. Xana Bibele dzri dondzrisa leswaku ku fanela ku va ni mimbangu leyi hi fanelaka hi khongota na hi li ka yone?

Bibele dzri kombisa leswaku ku ni minkama leyi hi fanelaka ku khongota ha yone? Hi xikombiso, loko Yesu a nga si na da ni valandzreli vake, a zrange hi ku khongota ka Xikwembu Nkulukumba. (Luka 22:17) Nakone loko vadondzrisiwa vake va tlhanganile leswaku va ta gandzrela, va khongote kun’we. Xileswo va tame va swi yentxa swi va xihena lexi ku li khale na xi yentxiwa a masinagogeni ya vayuda kun’we ni le titempeleni ta Yerusalema. Xikwembu Nkulukumba a a djula leswaku tempele yi va ‘yindlu ya ku khongota ku yone, a makazri ka matiko hinkwawu’.—Marka 11:17.

Loko malandzra ya Xikwembu Nkulukumba ma hlengeletanile ma khongota kun’we swikhongoto swa vone swi nga va ni lisima. Loko mhunu wa ku kazri a khongota hi konta ya vagandzreli kulozri a va na a yentxa leswi matsralwa ma swi hlayaka nakone, Xikwembu Nkulukumba wa nyonxa hi leswo. Xikhongoto xi nga yentxa leswaku Xikwembu Nkulukumba a hi nyika leswi hi kalaka hi nga swi kombelanga. (Ba-Heberu 13:18, 19) Minkama hinkwayu loko Timboni ta Yehovha ti li mintlhanganwini ta khongota. Ha ku zramba akuva u ya ka Yindlu ya Wugandzreli leyi nga kusuhi ni lomu u tsrhamaka kone akuva u ta swi twa hi wuswaku loko ku hambiwa swikhongoto leswo.

Nambitanu a Bibele a dzri hi bekele nkama kumbe mbangu lowu hi fanelaka ku khongota na hi li ka wone. Ka Bibele hi dondzra hi malandzra ye Xikwembu Nkulukumba lama khongotiki hi minkama ni mimbangu leyi kalaka yi nga fani. Yesu a te: “Loko u khongota, nghena ndlwini u pfala xipfalu, u gama u khongota ka Papayi waku lweyi a kalaka a nga voniwi. Kutani Papayi waku lweyi a lavisisaka swa le xihundleni a ta ku tovokisa.”—Matewu 6:6.

Xongani ka xizrambu lexo! Minkama hinkwayu hi nga khongota ka Hosi ya wuyaku hinkwabyu, nambi ka mbangu lowu tumbeliki na hi tiyiseka leswaku a wa hi twa. A swi hlamalisi leswi minkama yin’wana Yesu a a djula kuva u wuswake akuva a khongota! A same a khongota wusiku hinkwabyu ka Xikwembu Nkulukumba, leswaku a ta teka xiboho lexi faneliki.—Luka 6:12, 13.

Swikhongoto swa vavanuna ni vavasati leswi tsraliwiki Bibeleni swi kombisa leswaku va khongote loko va djula ku teka swiboho swa ku kazrata ni loko va langutana ni swikazratu. Minkama yin’wana a va khongota hi zritu ledzri twalaka kumbe hi le mbilwini, loko va li wuswavu ni loko va li hi mintlawa. A xa lisima hi leswaku a va khongota. Xileswo Xikwembu Nkulukumba a zramba malandzra yake a ku: ‘Khongotani minkama hinkwayu.’ (1 Ba-le-Thesalonika 5:17) Yehovha a tiyimisele ku yingiseta swikhongoto swa lava tiyimiseliki ku yentxa ku zrandzra kwake. Kunene xizrambu lexi xi kombisa ndlela leyi Yehovha a hi zrandzraka ha yone.

Leswi hi hanyaka ka misava leyi taliki hi swikazratu, ntalu wa vhanu va ganaganeka leswaku xikhongoto xa pfuna hakunene. Xileswo u nga ha tivutisa: ‘Xana xikhongoto xi nga ni pfuna hakunene?’

XANA loko hi khongota ha pfuneka? Bibele dzra swi hlaya,loko malandzra ya Xikwembu Nkulukumba ma khongota ma pfuneka. (Luka 22:40; Yakob 5:13) Loko hi khongota hi ta buyeliwa hi tlhelo dzra ,moya ni dzra nyama. Ha yini?

Hi xikombiso a hi nge u ni n’wana lweyi va mu nyikiki xihiwa. Xana a wu ta mu dondzrisa lisima dzra ku tlangela, kumbe a wu ta mu dondzrisa ndlela leyi a fanelaka a ku kombisa ha yone? Loko hi hlaya ndlela leyi hi titwaka ha yone , hi yentxa leswaku van’wana va swi vona leswaku ha khensa nakone swi ta va kutsra. Xana swi fanela swi va hi ndlela leyo loko hi vulavula ni Xikwembu Nkulukumba? Ina! Vona swikombiso swin’wana.

Swikhongoto swa ku khensa. Loko hi khensa Tatana wezru hi mintxhumu leyinene leyi a hi yentxelaka yone, hi kombisa leswaku ha ma vona matovoko lawa hi nga na wone. Nakone swi ta hi yentxa hi titwa na hi nyonxile.—Ba-le-Filipi 4:6.

Xikombiso: Yesu a kombise ku khensa hi ndlela leyi Tatana wakwe a mu yingisetiki ha yone ni leswi a hlamuliki a swikhongoto swakwe.—Yohan 11:41.

Swikhongoto swa ku kombela ku dzrivleliwa. Loko hi kombela leswaku Xikwembu Nkulukumba a hi dzrivalela, hi tiyisa lipfalu dzrezru, hi kombisa a ku tisola kwezru ni leswaku ha byi vona wukulu bya xidoho xezru. Nakone hi pumba ku bindzriwa hi lipfalu.

Xikombiso: Davhida a khongotile a kombisa ku tisola kwakwe ni gome.—Amapsalma 51.

Swikhongoto swa ku kombela nkongomiso ni wutlhazri. Loko hi kombela Yehovha akuva a hi kongomisa kumbe a hi nyika wutlhazri leswaku hi yentxa a swiboho leswinene, leswo swi kombisa leswaku ha titsrongahata hakunene. Swi ta tlhela swi hi dzrimuxa leswaku ku ni mintxhumu leyi hi hlulekaka ku yi yentxa swi tlhela swi hi pfuna ku dumba Tatana wezru wa le tilweni​—Amaproverbia 3:​5, 6

Xikombiso: Solomoni a kombele nkongomiso ni wutlhazri loko a fuma tiko dzra Israyele.—1 Tihosi 3:5-12.

Swikhongoto swa ku kombela mpfuno. Loko hi pfulela Xikwembu Nkulunkumba a xifuva loko hi kameke mbilu, hi ta titwa na hi ntsrhuxekile nakone hi ta dumba Yene a matsrhan’wini ya kuva hi tidumba.—Amapsalma 62:8.

Xikombiso: Hosi Asa a khongotile loko a langusane ni valala.​—2 Makronika 14:11.

Ku kombelela lava xanisekaka. Swikhongoto leswo swi hi pfuna ku tsrhika ku tidjulela swezru ntsena nakone swi hi yentxa hi va ni ntwela-wusiwana.

Xikombiso: Yesu a kombelele valandzreli vakwe.—Yohan 17:9-17.

Swikhongoto swa ku dzrumisa. Loko hi dzrumisa Yehovha hi kola ka mintizro yakwe ni matsrhamela yakwe ya ku hlamalisa, hi ta tlhela hi mu hlonipha ni ku mu tlangela. Swikhongoto swa ku fana ni leswo swi ta tlhela swi hi pfuna ku tsrhindzrekela ka Xikwembu Nkulukumba, a nga Tatana wezru.

Xikombiso: Davhida a dzrumise Xikwembu Nkulukumba hi leswi a swi tumbuluxiki.—Amapsalma 8.

Man’we ya matovoko lama fambisanaka ni xikhongoto i ‘ku zrula ka Xikwembu Nkulukumba, loku tlulaka ku yanakanya hinkwaku’. (Ba-le-Filipi4:7) Ku kuma ku zrula a misaveni leyi yi nga ni maxangu i tovoko hakunene, nakone swi tlhela swi hi pfuna hi tlhelo dzra nyama. (Amaproverbia 14:30) Kambe xana a matovoko wolawo hi ma kuma hi minzamu yezru? Ku ni swin’wana swa lisima leswi patsrekaka ke?

XIVUTISO lexi nga lani henhla xi yentxa leswaku hi djula ku tiva swinyingi. Bibele dzri dondzrisa leswaku Yehovha a wa swi yingela swikhongoto swezru namunhla. Akuva a swi twa kumbe a nga swi yingele swikhongoto swezru swi tiseketele ha hine.

Yesu a sole vazrangeli va wu khongoti va le nkameni wakwe lava a va khongota hi ndlela ya ku kanganyisa; hi leswi a va tidjulela wukosi. A hlaye leswaku vhanu va ku fana ni lava va ta dzri kuma hakelo dzravu, leswi swi nga hlaya leswaku va ta swi kuma leswi va swi djulaka, ku voniwa hi vhanu matsrhan’wini ya kuva va yingeliwa hi Xikwembu. (Matewu 6:5) Hi lani ku fanaka namunhla, vanyingi va khongota akuva va tinyonxisa ku nga li ku yentxa ku zrandzra ka Xikwembu. Leswi va yalaka milawu ya Bibele leyi hi khaneliki ha yone, leswo swi yentxa leswaku Xikwembu xi nga va yingeli.

Kambe ku hlayiwa yini ha wene? Xana Xikwembu Nkulukumba a ta swi yingela ni ku swi hlamula swikhongoto swaku? Nhlamulo a yi hi mbangu lowu u humaka ka wone, tiko kumbe xiyimu xaku. Bibele ya hi dumbisa yi ku: ‘Xikwembu a nga langusi hi wuso, kambe a tikweni dzrin’wana ni dzrin’wana lwa a mu txhavaka ni ku tizra swa ku lulama, i wa yamukeleka ku yene.’ (Amintiṛo 10:34, 35) Xana tsralwa ledzri dzra ku khumba? Ku txhava Xikwembu Nkulukumba swi hlaya ku mu hlonipha ni ku mu txhava ku mu kwatisa. Ku yentxa leswinene swi hlaya ku djula ku yentxa leswi Xikwembu Nkulukumba a hlayaka leswaku i swinene ku nga li leswi u swi vonaka leswaku i swinene. Xana hakunene swa swi djula leswaku Xikwembu Nkulukumba a yingela swikhongoto swaku? Bibele dzri hi byela ndlela leyi u fanelaka ku khongota ha yone loko u djula leswaku Xikwembu Nkulukumba a ku twa.a

I ntiyiso leswaku vhanu va ku tala va djula leswaku Xikwembu Nkulukumba a hlamula swikhongoto swavu hi ndlela ya hlolana. A minkameni ya Bibele, Xikwembu Nkulukumba a ma yentxile mahlolana. Kambe a minkameni yimbeni a a yentxa mahlolana ntsrhaku ka malembe manyingi. Ku yengetela kolanu Bibele dzri kombisa leswaku mahlolana ma hele nkama lowu ku nga fa vapostola. (1 Ba-le Korinte 13:8-10) Kambe xana leswi swi hlaya leswaku Xikwembu Nkulukumba a nga swi yingeli swikhongoto namunhla? A swi tanu! Vona swin’wana swa swikhongoto leswi a swi hlamulaka.

Xikwembu Nkulukumba a hi nyika wutlhazri. Yehovha i nhlovo ya wutlhazri hinkwabyu. A nyika lava va djulaka ku hanya ha byone.—Yakob 1:5.

Yehovha a nyika vhanu moya wa ku xwenga a tlhela a va tovokisa. Moya wa ku xwenga i ntamu wa Xikwembu Nkulukumba lowu tizraka. A wu nge dzringanisiwi ni ntxhumu. Wu nga hi pfuna leswaku hi tiyisela mindzringo. Wu nga tlhela wu hi pfuna hi titwa na hi zrulile loko hi kazrateka. Wu nga hi pfuna leswaku hi txutxela matsrhamela lamanene. (Ba-le-Galatia 5:22, 23) Yesu a kutxe vadondzrisiwa vakwe leswaku Xikwembu Nkulukumba a nyika xihanano hi ku swi zrandzra.—Luka 11:13.

Xikwembu Nkulukumba a nyika wutivi lava mu djulaka hi mbilu hinkwayu. (Amintiṛo 17:26, 27) A misaveni hinkwayu ku ni vhanu lava djulaka ntiyiso hi timbilu ta vo hinkwatu. Va djula ku tiva hi Xikwembu Nkulukumba, vito dzrakwe, nkongometo wakwe hi misava ku patsra ni vhanu kun’we ni ndlela leyi va nga tsrhindzrekelaka kwakwe. (Yakob 4:8) Minkama ya ku tala Timboni ta Yehovha ta tlhangana ni vhanu va ku tanu nakone ta swi nyonxela ku nyikela tinhlamulo ta Bibele mayelanu ni timhaka leto.

Xana leswo hi swone swi yentxeke leswaku u yamukela marevhixta lawa? Xana u djula ku tiva swa ku tala hi Xikwembu Nkulukumba? Kumbe leswi u kumiki revhixta ledzri, Xikwembu Nkulukumba a hlamule swikhongoto swaku?