XIDONDZRO 48

Hlawula Vanghanu Vaku Hi Wutlhazri

Buku Ledzri Gandlisiwiki

Vanghanu vezru lavakulu va nga yengesela ku nyonxa kwezru loko swi hi fambela ha hombe, va tlhela va hi tiyisa loko swi nga hi fambeli ha hombe. Kambe Bibele dzri hi dzrimuxa leswaku a hi hinkwavu lava nga vanghanu vanene. Kutani ke, u nga va hlawulisa kuyini vanghanu lavanene? Kambisisa swivutiso leswi landzrelaka.

1. Xana vanghanu lava u va hlawulaka va ta ku kutxetela ku yentxa yini?

Hi talisa ku fana ni lava hi hetaka nkama na hi li na vone. Leswo swi nga ha hi xongela kumbe swi hi bihela, leswo i ntiyiso nambiloko hi hungata na vone hi ku kongoma kumbe hi le ka internet. Swi hi lani Bibele dzri hlayaka ha kone: ‘Lwa fambaka ni tintlhazri a ta tlhazriha; kambe lwa tolovelanaka ni swihunguki [lava nga mu zrandzrikiki Yehovha] a ta honeka.’ (Amaproverbia 13:20) Vanghanu lava zrandzraka Yehovha va tlhela va mu gandzrela, va nga ku pfuna ku kulisa wuxaka byaku na yene ni ku teka swiboho leswinene. Kambe loko hi ni vanghanu lava nga mu zrandzrikiki Yehovha, va ta hi tsrhindzreta kule na yene. Hi leswo swi yentxaka Bibele dzri hi kutxa ku hlawula vanghanu vezru hi wutlhazri! Loko vanghanu vezru va zrandzra Xikwembu Nkulukumba, ku pfuneka hine na vone. Xileswo hi kota ku tsrhama na hi ‘khongotelana, hi yakisana’.—1 Ba-le-Thesalonika 5:11.

2. Xana Yehovha a titwisa kuyini hi vanghanu lava u va hlawulaka?

Yehovha a hlawula vanghanu vake hi wutlhazri. ‘Lava lulamiki va ni vunakulobye byakwe.’ (Amaproverbia 3:32) Xana Yehovha a titwisa kuyini loko ho hlawula vanghanu lava nga mu zrandzrikiki? Swi nga mu vavisa ngopfu swinene! (Dondzra Yakob 4:4.) Hi hala tlhelo, loko hi bakanya vanghanu va ku biha hi va hi hlawula vanghanu lava zrandzraka Yehovha, yene a ta nyonxa nakone a ta hi hlawula swanga vanghanu vake.—Amapsalma 15:1-4.

KELISISA

Kambisisa leswaku ha yini swi ni lisima dzrikulu ku hlawula vanghanu lavanene, u tlhela u vona leswaku u nga va kumisa kuyini vanghanu lava hakunene va taka ku pfuna wuton’wini.

3. Tivonele ka vanghanu va ku biha

Vanghanu va ku biha ku hlayiwa vhanu lava nga mu zrandzrikiki Yehovha ni milawu yake. Vonani VHIDIYU, mi gama mi bulisana hi xivutiso lexi landzrelaka.

VHIDIYU: Tingawula Vanghanu Va Ku Biha (6:17)

Hi nga sungulisa kuyini ku titoloveta ni vanghanu va ku biha na hi nga swi xiyanga?

Dondzrani 1 Ba-le-Korinte 15:33, mi gama mi bulisana hi swivutiso leswi:

I munghanu wa muxaka muni a nga ha vaka a bihile a mavoneleni yaku? Ha yini?

Dondzrani Amapsalma 119:63, mi gama mi bulisana hi xivutiso lexi:

I yini xi taka ku komba leswaku mhunu wa kukazri a ta va munghanu munene kumbe im-him?

Paratu ledzri nga ni mamasam. Sam dzrin’we dzra ku bola dzri vitanaka tinhongana, nakone swi sungula ku bolisa lamambeni. — Loko sam dzrin’we dzri bolile, dzri nga bolisa ni lawa mambeni hinkwawu. Xana munghanu mun’we wa ku biha a nga ku khumbisa kuyini?

4. A swi sindzrisi leswaku vanghanu vezru va fana na hine

Bibele dzri hi byela hi ta matsrhamela ya Davhida na Yonatani, vavanuna vabidzri va tiko dzra khale dzra Israyele. Yonatani a a li nkulu swinene hi ntanga ka Davhida, nakone a a li n’wana wa hosi. Nambitanu, va ve ni wunghanu lebyi nyonxisaka. Dondzrani 1 Samuel 18:1, mi gama mi bulisana hi xivutiso lexi:

Ha yini swi nga sindzrisi leswaku munghanu wezru a li wa ntanga kumbe xiyimu xa ku fana ni xezru?

Dondzrani Ba-le-Roma 1:11, 12, mi gama mi bulisana hi xivutiso lexi:

Xana vanghanu lava zrandzraka Yehovha va nga kutxananisa kuyini?

Ka vhidiyu ledzri landzrelaka, vona ndlela leyi mumpshwa wa kukazri lwa nga makwezru a kumiki vanghanu ha yone lomu a a nga ku pimisi. Vonani VHIDIYU, mi gama mi bulisana hi swivutiso leswi landzrelaka.

VHIDIYU: Kuma Vanghanu Lomu U Nga Ku Pimisikiki (5:06)

Ka vhidiyu, ha yini vapswele va Akil a va kazrateka hi vanghanu vake va le xikole?
Ha yini Akil a ze a tlanga ni vanghanu lavayani?
A swi kotise kuyini ku hlula xivundzra xake?

5. Ndlela ya ku va ni vanghanu lavanene

Kambisisa leswaku u nga mu kumisa kuyini munghanu wa ntiyiso ni leswaku wene u nga va munghanu wa ku tanu hi ndlela yini. Vonani VHIDIYU.

VHIDIYU: I Yini Munghanu Wa Ntiyiso? (4:14)

Xiyenge xa vhidiyu ledzri liki ‘I Yini Munghanu Wa Xihlayelamfuzri?’ Mumpshwa wa xisati lweyi a nga ni vanghanu vake va tintanga ta ku hambanahambana, lixaka ni wuswikoti.

Dondzrani Amaproverbia 18:24 na 27:17, mi gama mi bulisana hi swivutiso leswi:

Xana vanghanu va ntiyiso va pfunanisa kuyini?
U na yene munghanu wa ku fana ni lweyo? Loko u nga li na yene, u nga mu kumisa kuyini?

Dondzrani Ba-le-Filipi 2:4, mi gama mi bulisana hi xivutiso lexi:

Akuva u kuma vanghanu va ntiyiso, u fanela ku va munghanu lwenene. U nga swi yentxisa kuyini?

Mufoto: Mumpshwa wa kukazri a pfuxelaka vanghanu vake vazrazru lava a va zrandzraka swinene. 1. Mun’we wavu a mu pfuxela hi telefone. 2. A pfuxela lweyi a kuliki hi ntanga a Ndlwini ya Mfumu. 3. A mumbeni a tlhavekiki a yentxa hi ku mu yendzrela. — Akuva u kuma vanghanu lavanene swi djula *u va* munghanu lwenene

VAN’WE VA LI: “A xikulu i ku va ni munghanu, a hi matsrhamela yake.”

Wene ke, u li yini?

NKATSRAKANYU

Loko hi hlawula vanghanu vezru hi wutlhazri hi nyonxisa Yehovha ku tlhela ku pfuneka hine.

Mpfuxeto

Ha yini Yehovha a zron’weka hi vanghanu lava hi va hlawulaka?
Hi fanela ku tivonela ka vanghanu va ku tsrhamisisa kuyini?
U nga byi txutxelisa kuyini wunghanu lebyi tiyiki ni vhanu lavanene?

Xidondzro lexi xi hele hi:

Lwela leswi

Lwela ku tiva vamakwezru vanyingi a bandleni.

Swin’wana:

Swin‘wana Leswi U Nga Swi Yentxaka

HANDZRISISA

Vona leswi vanghanu va xihlayelamfuzri va nga hi pfunisaka xiswone hi nkama wa swikazratu.

“Yaka Wunghanu Lebyi Tiyiki Na Wugamu Byi Nga Si Tlhasa” (Xihondzro Xa Ku Zrindzra, Novhembru wa 2019)

Pimisa hi mintxhumu ya ku kongoma leyi u nga yi yentxaka akuva u tikumela vanghanu lavanene.

“Ni Nga Yentxa Yini Akuva Ni Va Ni Vanghanu Lavanene?” (Swivutiso Leswi Vampshwa Va Swi Vutisaka—Tinhlamulo Leti Tizraka, Vhulumi 1, ndzrima 8)

Leswi u fanelaka ku swi tiva mayelanu ni vanghanu a internet

Tlhazriha Loko U Tizrisa Maredi Sosiyali (4:12)

Ka mfambu lowu liki “A Ni Vilela Papayi”, gungula leswi yentxiki wanuna wa kukazri a txintxa vanghanu vake.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Abrili wa 2012)